മിൽമ റെഡി ടു ഡ്രിങ്ക് പാലട പായസവും ഇളനീർ ഐസ്ക്രീമും പുറത്തിറക്കി : Deepika.com Business News |

Click here for detailed news of all items

മിൽമ റെഡി ടു ഡ്രിങ്ക് പാലട പായസവും ഇളനീർ ഐസ്ക്രീമും പുറത്തിറക്കി

Monday, July 1, 2024 11:03 PM IST

തിരുവനന്തപുരം: കേരളത്തിന്‍റെ തനതു വിഭവമായ പാലട പായസവും ഐസ്ക്രീമിലെ പുതിയ തരംഗമായ ഇളനീർ (ടെൻഡർ കോക്കനട്ട്) ഐസ്ക്രീമും പുറത്തിറക്കി മിൽമ.

പ്രവാസികളെയും അതുവഴി കയറ്റുമതിയും ലക്ഷ്യംവച്ചുള്ള റെഡി ടു ഡ്രിങ്ക് പാലട പായസം മലബാർ യൂണിയന്‍റെ സഹകരണത്തോടെ മിൽമ ഫെഡറേഷനും ഇളനീർ ഐസ്ക്രീം മിൽമ എറണാകുളം യൂണിയനുമാണു പുറത്തിറക്കിയത്. രണ്ട് ഉത്പന്നങ്ങളും സംസ്ഥാനത്തെ എല്ലാ ഔട്ട്‌ലെറ്റുകൾ വഴിയും ലഭ്യമാകും.

ഒരുവർഷം വരെ കേടുകൂടാതിരിക്കുന്ന പാലട പായസമാണു മിൽമ വിപണിയിലെത്തിക്കുന്നത്. പാലട പായസം വീട്ടിലുണ്ടാക്കുന്നതിനു വളരെ സമയം ആവശ്യമാണ്. മാത്രമല്ല, കുട്ടികൾക്കും മുതിർന്നവർക്കും ഒരുപോലെ പ്രിയങ്കരമായ ഈ കേരളവിഭവം വിദേശങ്ങളിലെത്തിക്കാനും മിൽമയുടെ ഈ സംരംഭത്തിലൂടെ സാധിക്കുമെന്നു മിൽമ ഫെഡറേഷൻ ചെയർമാൻ കെ.എസ്. മണി പറഞ്ഞു.

മൈക്രോവേവ് അസിസ്റ്റഡ് തെർമൽ സ്റ്റെറിലൈസേഷൻ (എംഎടിഎസ്) സാങ്കേതികവിദ്യ ഉപയോഗിച്ചുള്ള അസെപ്റ്റിക് രീതിയിലാണു പാലട പായസം തയാറാക്കുന്നതും പായ്ക്ക് ചെയ്യുന്നതും. രുചി, മണം, ഗുണമേന്മ എന്നിവ ചോർന്നുപോകാതെ സംരക്ഷിക്കാനാകുമെന്നതാണ് ഇതിന്‍റെ പ്രത്യേകത.

യാതൊരു വിധത്തിലുള്ള രാസപദാർഥങ്ങളോ പ്രിസർവേറ്റീവോ ചേർക്കാതെയാണ് ഇതു തയാറാക്കുന്നത്. ആന്ധ്രാപ്രദേശിലെ ശ്രീ സിറ്റിയിലുള്ള ടാറ്റയുടെ അത്യാധുനിക എംഎടിഎസ് സ്മാർട്സ് ഫുഡ് പ്ലാന്‍റിലാണ് നിര്‍മാണം. നാലു പേർക്കു വിളന്പാനാകുന്ന 400 ഗ്രാമിന്‍റെ പാക്കറ്റിലായിരിക്കും ഇതു വിപണിയിലെത്തുക. 150 രൂപയാണു പാക്കറ്റിന്‍റെ വില.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.