യുക്മ ദേശീയ നേതൃയോഗം ശനിയാഴ്ച ബർമിംഗ്ഹാമിൽ
Friday, April 4, 2025 4:44 PM IST
ബർമിംഗ്ഹാം: ആഗോള പ്രവാസി മലയാളികൾക്കിടയിലെ ഏറ്റവും വലിയ സംഘടനാ കൂട്ടായ്മയായ യുക്മ (യൂണിയൻ ഓഫ് യുകെ മലയാളി അസോസിയേഷൻസ്) പുതിയ ദേശീയ ഭാരവാഹികളുടെ നേതൃത്വത്തിൽ അടുത്ത രണ്ട് വർഷങ്ങളിലെ കർമപദ്ധതികൾ ആസൂത്രണം ചെയ്തു മുന്നോട്ടുള്ള പ്രയാണം ആരംഭിക്കുന്നു.
2027 ഫെബ്രുവരി വരെയുള്ള രണ്ട് വർഷക്കാലമാണ് പുതിയ ഭരണസമിതിയുടെ കാലാവധി. 2009 ജൂലൈ നാലിന് സ്ഥാപിതമായ യുക്മ ഇന്ന് 144 പ്രാദേശിക മലയാളി അസോസിയേഷനുകളുടെ അംഗത്വവുമായി ലോക മലയാളികൾക്കിടയിൽ തലയെടുപ്പോടെ നിൽക്കുകയാണ്.
യുക്മ ദേശീയ ഭാരവാഹികൾ, ദേശീയ സമിതി അംഗങ്ങൾ, റീജണൽ ഭാരവാഹികൾ, യുക്മയുടെ വിവിധ പോഷക സംഘടനാ ഭാരവാഹികൾ എന്നിവരെ ഉൾപ്പെടുത്തിയുള്ള പ്രത്യേക നേതൃയോഗം ശനിയാഴ്ച ബർമിംഗ്ഹാം വാൽസാളിലെ റോയൽ ഹോട്ടൽ ഓഡിറ്റോറിയത്തിലാണ് ചേരുന്നത്.
യുക്മ റീജിയണൽ നാഷണൽ ഭാരവാഹികളുടെ സംഗമവേദിയാകുന്ന വാൽസാളിലെ റോയൽ ഹോട്ടലിൽ രാവിലെ 9.30ന് നടക്കുന്ന ദേശീയ സമിതി യോഗത്തിന് ശേഷം 11ന് നേതൃയോഗം ആരംഭിക്കും. പ്രസിഡന്റ് അഡ്വ. എബി സെബാസ്റ്റ്യന്റെ അധ്യക്ഷതയിൽ നടക്കുന്ന യോഗത്തിൽ രണ്ടു വർഷക്കാലത്തെ പ്രവർത്തനങ്ങൾ അവതരിപ്പിക്കും.
വിവിധ റീജിയണൽ ഭാരവാഹികളും പോഷക സംഘടനാ നേതാക്കളും തങ്ങളുടെ പ്രവർത്തനങ്ങൾ യോഗത്തിൽ വിവരിക്കും. പ്രവർത്തന മികവിന്റെ 15 വർഷങ്ങൾ പൂർത്തിയാക്കി 16-ാമത് വർഷത്തിലേക്ക് കടക്കുവാനൊരുങ്ങുന്ന യുക്മയുടെ പ്രവർത്തനങ്ങൾ യുകെ മലയാളികൾക്ക് കൂടുതൽ പ്രയോജനകരമാവുന്ന വിധത്തിൽ രൂപം കൊടുക്കുവാനുള്ള ശ്രമത്തിലാണ് പുതിയ ദേശീയ, റീജിയണൽ നേതൃത്വങ്ങൾ.
യുക്മ രൂപീകൃതമായ കാലം മുതൽ സംഘടിപ്പിച്ച് വരുന്ന കലാമേള, കായികമേള, 2017 മുതൽ നടത്തി വരുന്ന കേരള പൂരം വള്ളംകളി, ചാരിറ്റി പ്രവർത്തനങ്ങൾ എന്നിവയ്ക്ക് പുറമെ കൂടുതൽ പരിപാടികൾ സംഘടിപ്പിക്കുന്നതുൾപ്പടെ നിരവധി കാര്യങ്ങളാണ് പുതിയ ദേശീയ നേതൃത്വം റീജിയണൽ കമ്മിറ്റികളുടെ സഹകരണത്തോട് കൂടി നടപ്പിലാക്കുവാൻ ഒരുങ്ങുന്നത്.
ഭാവിപ്രവർത്തനങ്ങൾ ചർച്ച ചെയ്ത് ആസൂത്രണം ചെയ്യുന്നതിനൊപ്പം തന്നെ പുതിയ ആശയങ്ങളും അഭിപ്രായങ്ങളും സ്വരൂപിക്കുന്നതിനുള്ള പ്രധാന മാർഗമാണ് നേതൃയോഗം കൊണ്ടുദ്ദേശിക്കുന്നതെന്ന് സെക്രട്ടറി ജയകുമാർ നായർ പറഞ്ഞു.
വിവിധ സെഷനുകളായി നടക്കുന്ന നേതൃയോഗത്തിൽ പങ്കെടുക്കുന്നവർക്ക് ആവശ്യമായ സൗകര്യങ്ങൾ വാൽസാളിലെ റോയൽ ഹോട്ടലിൽ ഒരുക്കിയതായി ട്രഷറർ ഷീജോ വർഗീസ് അറിയിച്ചു.
യോഗത്തിന്റെ ഒരുക്കങ്ങൾ പൂർത്തിയായതായി പ്രസിഡന്റ് എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ എന്നിവർ അറിയിച്ചു.
നേതൃയോഗം നടക്കുന്ന സ്ഥലത്തിന്റെ വിലാസം: The Royal Hotel, Ablewell Street Walsall WS1 2EL.