ഫാ. ബെനഡിക്റ്റ് കുര്യൻ പെരുമുറ്റത്തിന് ഇറ്റലിയിലെ മലങ്കര കത്തോലിക്കാ സമൂഹം യാത്രയയപ്പു നൽകി
ജെജി മാന്നാർ
Friday, April 4, 2025 8:05 AM IST
റോം: ഇറ്റലിയിലെ മലങ്കര കത്തോലിക്കാ സമൂഹത്തിന്റെ ചുമതല വഹിച്ചിരുന്ന ഫാ. ബെനഡിക്റ്റ് കുര്യൻ പെരുമുറ്റത്തിന് യാത്രയയപ്പു നൽകി.
റോമിലെ മലങ്കര കത്തോലിക്ക കൂട്ടായ്മയുടെ ചാപ്ലൈനും മലങ്കര കത്തോലിക്കാ സഭാ മേജർ ആർച്ച്ബിഷപ്പ് ബസേലിയോസ് കാർഡിനൽ ക്ളീമിസ് കാതോലിക്കാ ബാവയുടെ വത്തിക്കാനിലെ പ്രോക്യൂറേറ്ററും ആയിരുന്ന ഫാ. ബെനഡിക്റ്റ് കുര്യൻ പെരുമുറ്റം.
സ്തുത്യർഹമായ സേവനത്തിനുശേഷം നോർത്തേൺ അയർലൻഡിലെ ബെൽഫാസ്റ്റിലേക്കാണ് ഫാ. ബെനഡിക്റ്റ് കുര്യൻ സ്ഥലം മാറിപോകുന്നത്.

കുർബാനയ്ക്ക് ശേഷം നടന്ന യാത്രയയപ്പ് സമ്മേളനത്തിൽ ഓറിയന്റൽ സഭകൾക്കായുള്ള കാര്യാലയത്തിൽ ജോലിചെയ്യുന്ന മോൺ. കുര്യാക്കോസ് ചെറുപുഴ തോട്ടത്തിൽ, വത്തിക്കാൻ സന്തോസ്പിരിത്തോ ഹോസ്പിറ്റലിന്റെ ചപ്ലൈൻ ആയ ഫാ. ബോബിൻ തോമസ്, ഫാ. ഡോമിനിക് മൂഴിക്കര, ഇറ്റലിയിലെ മലയാളി സംഘടനയായ അലിക് ഇറ്റലിയുടെ പ്രസിഡന്റ് ഷൈൻ റോബർട്ട് ലോപ്പസ്, സെക്രട്ടറി തോമസ് ഇരിമ്പൻ, ഇടവക പ്രതിനിധി ജെജി മാന്നാർ എന്നിവർ ആശംസകൾ നേർന്നു.

സേറ മോബിൻ ഗാനം ആലപിച്ചു. റോമിലെ വിവിധ സഭാ സമൂഹങ്ങളെ പ്രതിനിധീകരിച്ച് ബഹുമാനപ്പെട്ട വൈദികരും സിസ്റ്റേഴ്സും അല്മായ വിശ്വാസികളും ഈ യാത്രയയപ്പു സമ്മേളനത്തിൽ പങ്കെടുത്തു.
ഇറ്റലിയിലെ വിവിധ സ്ഥലങ്ങളിൽ വസിക്കുന്ന മലങ്കര കത്തോലിക്കരുടെ പ്രതിനിധികളും ഈ സമ്മേളനത്തിൽ പങ്കുചേർന്നു. ഇടവക ട്രസ്റ്റി ഷെവലിയാർ കോശി പറപ്പാട്ട്, സെക്രട്ടറി മോബിൻ വർഗീസ് ഊളക്കാവിൽ ഇടവക കമ്മിറ്റി അംഗങ്ങളും പരിപാടികൾക്ക് നേതൃത്വം നൽകി.