ADVERTISEMENT

ADVERTISEMENT

ദേശബന്ധു ഹയർസെക്കൻഡറി സ്കൂളിൽ എഐ റോബോട്ടിക് ലാബ് ഉദ്ഘാടനം

കല്ലടിക്കോട്: ആധുനിക സാങ്കേതികവിദ്യകൾ ഉപയോഗിച്ചുകൊണ്ട് ദേശബന്ധു ഹയർ സെക്കൻഡറി സ്കൂളിൽ നിർമ്മിതബുദ്ധി റോബോട്ടിക് ലാബ് പ്രവർത്തനം ആരംഭിച്ചു. തച്ചമ്പാറ പഞ്ചായത്ത് പ്രസിഡന്‍റ് ബാബു മാസ്റ്ററുടെ അധ്യക്ഷതയിൽ വി.കെ. ശ്രീകണ്ഠൻ എംപി ലാബിന്‍റെ ഉദ്ഘാടനം നിർവഹിച്ചു.

ചടങ്ങിൽ എസ്എസ്എൽസി സന്പൂർണ എപ്ലസ് വിജയികളെ അനുമോദിച്ചു. പഞ്ചായത്തംഗങ്ങളായ ബിന്ദു കുഞ്ഞിരാമൻ, ഒ. നാരായണൻകുട്ടി, തേക്കത്ത് അലി തുടങ്ങിയ ജനപ്രതിനിധികളും പിടിഎ പ്രസിഡന്‍റ് സക്കീർ ഹുസൈൻ, ഹെഡ്മാസ്റ്റർ പി.എസ്. പ്രസാദ്, എ.വി. ബ്രൈറ്റി, എം.എൻ. രാമകൃഷ്ണപിള്ള, സി. നളിനി, വി.പി. ജയരാജൻ പ്രസംഗിച്ചു.

കഴിഞ്ഞ എസ്എസ്എൽസി പരീക്ഷയിൽ 569 കുട്ടികളിൽ മുഴുവൻ കുട്ടികളും വിജയിച്ച് നൂറുശതമാനം വിജയം കരസ്ഥമാക്കിയ ദേശബന്ധു സ്കൂളിലെ സമ്പൂർണ എ പ്ലസ് ജേതാക്കളെ അനുമോദിക്കുന്ന ചടങ്ങിൽ കുട്ടികളുടെ ആവശ്യാർത്ഥം ഡൽഹി സന്ദർശിക്കാൻ അവസരം ഒരുക്കാക്കാമെന്നു വി.കെ. ശ്രീകണ്ഠൻ എംപി ഉറപ്പുനൽകി.

ADVERTISEMENT

മായന്നൂർ പാലം അന്ധകാരത്തിൽ

ഒറ്റപ്പാലം: പാലക്കാട്-തൃശൂർ ജില്ലകളെ ബന്ധിപ്പിക്കുന്ന മായന്നൂർപാലം അന്ധകാരത്തിൽ. ഭാരതപ്പുഴക്ക് കുറുകെ നിർമിച്ച പാലത്തിന്‍റെ കൈവരികളിൽ വിളക്കുകൾ സ്ഥാപിച്ചിട്ടുണ്ടെങ്കിലും ഇവയുടെ വെളിച്ചം നഷ്ടപ്പെട്ടിട്ട് മാസങ്ങളായി. രാത്രികാലങ്ങളിൽ പാലം പൂർണമായും ഇരുട്ടിലാണ്. ഇതുവഴി കടന്നുപോകുന്ന വാഹനങ്ങളുടെ ഹെഡ്‌ലൈറ്റാണ് പാലത്തിന് മുകളിൽ തെളിയുന്ന ഏക പ്രകാശകിരണങ്ങൾ. രാത്രിയായാൽ മായന്നൂർപാലം മുഴുവൻ ഇരുട്ടിലാകും. പാലം ഇരുട്ടിലായതോടെ യാത്രക്കാരും ജനങ്ങളും ഏറെ ബുദ്ധിമുട്ടനുഭവിക്കുകയാണ്. പാലത്തിന്‍റെ ഒരു ഭാഗം ഒറ്റപ്പാലം നഗരസഭയുടെയും മറുവശം കൊണ്ടാഴി പഞ്ചായത്തിന്‍റേയും പരിധിയിൽ വരുന്നതാണ്. കരാർ കാലാവധി തീർന്നതാണ് വിളക്കുകൾ പ്രകാശിപ്പിക്കാത്തതിന്‍റെ കാരണമെന്നാണു വിവരം. സായാഹ്നം ചെലവഴിക്കാനും നടക്കുന്നതിനും മറ്റുമായി നിരവധിപേരാണ് മായന്നൂർ പാലത്തിൽ ദിവസവുമെത്താറുള്ളത്. പുലർച്ചെ നടക്കാനും വ്യായാമം ചെയ്യാനും സമീപത്തെ ക്ഷേത്രത്തിലേക്കുമടക്കം നിരവധിപേർ ഇതുവഴിയെത്തുന്നുണ്ട്. ഇവരെല്ലാം മതിയായ വെളിച്ചമില്ലാതെ ബുദ്ധിമുട്ടുകയാണ്. രാത്രിയിൽ റോഡൊന്നു കുറുകേ കടക്കണമെങ്കിൽ ഏറെ പ്രയാസമാണ്. നടപ്പാതയിൽ കൈവരികളുമില്ല. പെട്ടെന്ന് റോഡ് മുറിച്ചുകടക്കുന്നത് വാഹനങ്ങളുടെ ശ്രദ്ധയിൽപ്പെടില്ല. ഇത് അപകടഭീഷണിയാണ്. നഗരസഭയിൽ തെരുവുവിളക്ക് പരിപാലന കരാർ കാലാവധി കഴിഞ്ഞമാസം പൂർത്തിയായിരുന്നു. നൽകാനുള്ള ബാക്കി പണം നൽകാതെ തെരുവ് വിളക്കുകൾ പുനഃസ്ഥാപിക്കില്ലെന്ന് കരാറുകാരൻ നിലപാടെടുത്തു. ഇതോടെ നഗരസഭയിലെ 15 വാർഡുകളിൽ പലയിടങ്ങളിലും തെരുവുവിളക്കുകൾ പ്രകാശിക്കുന്നില്ല. ചിലയിടങ്ങളിൽ ഹൈമാസ്റ്റ് ലൈറ്റുകൾ ഉൾപ്പെടെ തെളിയാതെ കിടക്കുകയാണ്. ഇനി പുതിയ പദ്ധതിയായി സമർപ്പിച്ച് ജില്ലാ ആസൂത്രണസമിതിയുടെ അനുമതി ലഭിച്ചതിനുശേഷമേ തെരുവുവിളക്കുകൾ തെളിയിക്കാൻ കഴിയൂ. ഇതിന് മാസങ്ങൾ എടുക്കും. പ്രതിസന്ധി പരിഹരിക്കാൻ കരാറുകാരനെക്കൂടി ഉൾപ്പെടുത്തി പ്രത്യേക കൗൺസിൽ യോഗം ചേരാൻ തീരുമാനിച്ചിട്ടുണ്ട്. ഒറ്റപ്പാലം നഗരസഭയുടെ ഏറ്റവും വലിയ കീറാമുട്ടിയാണ് തെരുവുവിളക്ക് പരിപാലനം.

മീറ്റ്ന ശ്രീരാമകൃഷ്ണ ആശ്രമം രാമകൃഷ്ണമഠത്തിൽ ലയിച്ചു

ഒറ്റപ്പാലം: മീറ്റ്‌നയിലെ ശ്രീരാമകൃഷ്ണാശ്രമം ബേലൂരിലെ രാമകൃഷ്ണമഠത്തിൽ ലയിച്ചു. നിർമലാനന്ദസ്വാമിയുടെ സമാധിമണ്ഡപവും ക്ഷേത്രവുമുൾപ്പെട്ട പ്രധാന ആശ്രമമാണ് രാമകൃഷ്ണമഠത്തിൽ ലയിക്കുന്നത്. ബുദ്ധപൂർണിമദിനത്തിൽ വിവിധ ചടങ്ങുകൾക്കുശേഷം ആശ്രമത്തിന്‍റെ കൈമാറ്റം നടന്നു. ഒറ്റപ്പാലത്തെ ആശ്രമം സ്ഥാപിച്ചിട്ട് അടുത്തവർഷം ഒരുനൂറ്റാണ്ട് തികയാനിരിക്കെയാണു കൈമാറ്റം. 1911 നും 1938 നും ഇടയിൽ ശ്രീരാമകൃഷ്ണ പരമഹംസരുടെ ശിഷ്യനായ നിർമലാനന്ദ സ്വാമി കേരളത്തിൽ 17 ആശ്രമങ്ങൾ സ്ഥാപിച്ചിരുന്നുവെന്ന് റിട്ട. പ്രഫ.എസ്. രാജശേഖരൻ നായർ പറയുന്നു. 1926 ലാണ് ഒറ്റപ്പാലം മീറ്റ്‌നയിൽ ഭാരതപ്പുഴയോരത്ത് ശ്രീരാമകൃഷ്ണാശ്രമം സ്ഥാപിച്ചത്. തുടക്കകാലത്ത് രാമകൃഷ്ണമഠത്തിനു കീഴിൽതന്നെയാണ് ഒറ്റപ്പാലത്തെ ആശ്രമം ഉൾപ്പെടെ പ്രവർത്തിച്ചത്. 1938-ൽ ഒറ്റപ്പാലത്തെ ആശ്രമത്തിൽവെച്ചാണ് നിർമലാനന്ദസ്വാമി സമാധിയാകുന്നത്. പിന്നീട് 1942-ൽ കേരളത്തിലെ എട്ട് ആശ്രമങ്ങൾ മഠത്തിൽനിന്നുമാറി സ്വതന്ത്രമായി പ്രവർത്തനം തുടങ്ങി. ഇതിൽ നാല് ആശ്രമങ്ങൾ നേരത്തെ വീണ്ടും ബേലൂർ രാമകൃഷ്ണമഠവുമായി ലയിച്ചിരുന്നു. ഇതിനുപിന്നാലെയാണ് ഒറ്റപ്പാലത്തെ ആശ്രമവും രാമകൃഷ്ണമഠത്തിന്‍റെ കീഴിലേക്കാവുന്നതെന്നും എസ്. രാജശേഖരൻ നായർ പറയുന്നു. നിർമലാനന്ദസ്വാമിയുടെ സമാധിമണ്ഡപമുള്ള ആശ്രമമാണെന്ന പ്രത്യേകതയും ഒറ്റപ്പാലത്തിനുണ്ട്.

മഴപെയ്താൽ ഐശ്വര്യ കോളനിക്കാർക്കു ദുരിതം

ഒലവക്കോട്: മഴപെയ്തുതുടങ്ങിയാൽ ഒലവക്കോട് ഐശ്വര്യ കോളനിയുള്ളവർ കിടക്കയുമെടുത്ത് ഓടണം. വെള്ളം നിറഞ്ഞു വീടുകളിലേക്കു കയറുന്പോൾ ലോഡ്ജുകളിലേക്കോ ബന്ധുവീടുകളിലേക്കോ താമസംമാറ്റണം. കൊല്ലങ്ങളായുള്ള ഈ അവസ്ഥ അധികൃതരെ അറിയിച്ചിട്ടും പരാതി നൽകിയിട്ടും ഫലമില്ലെന്ന് കോളനിനിവാസികൾ പറയുന്നു. കോളനിക്കുപിറകിലൂടെ പോകുന്ന അന്പാട്ടുതോട് നിറഞ്ഞാണ് വെള്ളം കയറുന്നത്. മൈനർ ഇറിഗേഷന്‍റേതാണ് ഈ തോട്. താണാവ് പ്രദേശം താണ്ടി ഒലവക്കോട് റെയിൽവേ സ്റ്റേഷൻ റോഡ് കടന്നാണ് ഈ തോട് പോകുന്നത്. പരിസരങ്ങളിലെ ഹോട്ടലുകളിലെ ശുചിമുറിമാലിന്യമടക്കം ഇതിലേക്കാണ് ഒഴുകുന്നത്. മാത്രമല്ല തോട്ടിൽ പ്ലാസ്റ്റിക് കുപ്പികളടക്കം മാലിന്യങ്ങൾ കുന്നുകൂടി കിടക്കുന്നതും വലിയൊരു ആൽമരം നിൽക്കുന്നതും നീരൊഴുക്ക് തടയുകയും വെള്ളം കവിഞ്ഞൊഴുകുകയാണ്. ഇതിനുപുറമെ സ്വകാര്യവ്യക്തികൾ തോട് കൈയേറി നിർമാണ പ്രവർത്തനങ്ങൾ നടത്തുന്പോൾ തോട് വീതികുറയുന്ന തോടെ വെള്ളം കവിഞ്ഞൊഴുകാൻ കാരണമാകുന്നു. ഇതുവഴി റെയിൽവേ സ്റ്റേഷനിലേക്കു പോകുന്നതും വരുന്നതും മൂക്കുപൊത്തി വേണം. ഈ മാലിന്യക്കൂന്പാരങ്ങളൊന്നും നഗരസഭ ആരോഗ്യവിഭാഗം കാണുന്നില്ലേയെന്ന് ഇതുവഴി പോകുന്ന യാത്രക്കാരും പരിസരത്തെ വ്യാപാരികളും ചോദിക്കുന്നു. മാലിന്യംനിറഞ്ഞ ഈ തോട്ടിൽനിന്നും ഈച്ചയടക്കമുള്ള പ്രാണികളും മറ്റും പറന്ന് പരിസരത്തെ ഹോട്ടലുകളിലെ ഭക്ഷണപദാർഥങ്ങളിൽ ചെന്നിരുന്ന് രോഗങ്ങൾ പരത്തുമോ എന്ന ഭീതിയും നാട്ടുകാർ പങ്കുവയ്ക്കുന്നു. പത്തിനു നടന്ന ഐശ്വര്യ കോളനി റസിഡൻസ് വെൽഫെയർ അസോസിയേഷന്‍റെ ഇരുപത്തിയഞ്ചാം വാർഷികാഘോഷം ഉദ്ഘാടനം ചെയ്യാനെത്തിയ നഗരസഭ വൈസ് ചെയർമാൻ അഡ്വ. ഇ. കൃഷ്ണദാസിനോട് കോളനി ഭാരവാഹികൾ ഇക്കാര്യം പറഞ്ഞ് നിവേദനം നൽകി. അദ്ദേഹം സ്ഥലം സന്ദർശിച്ച് ഇറിഗേഷനുമായി ബന്ധപ്പെട്ട് വേണ്ടതായ നടപടിയെടുക്കാമെന്ന ഉറപ്പു നൽകിയതായി ഐശ്വര്യ കോളനി പ്രസിഡന്‍റ് അഡ്വ. സ്റ്റാൻലി ജെയിംസ്, വൈസ് പ്രസിഡന്‍റ് ഹംസ എന്നിവർ അറിയിച്ചു.

കുടിവെള്ള എടിഎമ്മിന്‍റെ തകരാർ ഉടൻ പരിഹരിക്കും: ചെയർപേഴ്സൺ

ഒറ്റപ്പാലം: നഗരസഭാ ബസ് സ്റ്റാൻഡിലെ കുടിവെള്ള എടിഎം ഉടൻ കേടുപാടുകൾ തീർക്കും. വേനലിന്‍റെ വറുതിയിൽ കുടിവെള്ളക്ഷാമം രൂക്ഷമായിതീർന്നിരിക്കെ ഈ കുടിവെള്ള എടിഎം ഇവിടെയെത്തുന്ന യാത്രക്കാർക്ക് ഏറെ സഹായകരമായിരുന്നു. വെള്ളം വിതരണ സംവിധാനത്തിലെ തകരാർ കാരണമാണ് രണ്ടാഴ്ചയിലേറെയായി നഗരസഭ ബസ് സ്റ്റാൻഡിലെ എടിഎം പ്രവർത്തിക്കാത്തത്. പരിപാലനകരാർ തീർന്നതിനാൽ തകരാറിലായ എടിഎം നന്നാക്കാതെ അടച്ചിട്ടിരിക്കുകയാണ്. ഒരു രൂപയ്ക്ക്‌ ഒരുലിറ്റർ തണുത്ത വെള്ളവും അഞ്ച് രൂപയ്ക്ക്‌ അഞ്ച് ലിറ്റർ വെള്ളവും ലഭിക്കുന്ന കുടിവെള്ള എടിഎമ്മാണ് പ്രവർത്തിക്കാതെ കിടക്കുന്നത്. വേനലായതോടെ പ്രതിദിനം 250 മുതൽ 300 ലിറ്റർ വരെ കുടിവെള്ളമാണ് എടിഎം വഴി പ്രതിദിനം വിതരണം ചെയ്തിരുന്നത്. ഇതു മുടങ്ങിയതോടെ നഗരസഭ ബസ് സ്റ്റാൻഡിലെത്തുന്ന യാത്രക്കാർ, നൂറുകണക്കിന് ബസ് ജീവനക്കാർ, വ്യാപാര സ്ഥാപനങ്ങളിലെ ജീവനക്കാർ തുടങ്ങിയവർ ബുദ്ധിമുട്ടിലായി. വ്യാപാര സ്ഥാപനങ്ങളിൽനിന്ന് 20 രൂപയ്ക്കാണ് ഒരു കുപ്പി തണുത്ത വെള്ളം ലഭിക്കുന്നത്. വെള്ളത്തിനാവശ്യമായ കുപ്പി കയ്യിൽ വേണമെന്നുമാത്രം. 2022-23 വർഷത്തെ പദ്ധതിയിൽ അഞ്ചുലക്ഷം രൂപ വിനിയോഗിച്ചാണ് നഗരസഭ കുടിവെള്ള സംവിധാനം സ്ഥാപിച്ചത്. ഇത് സ്ഥാപിച്ച കമ്പനിക്ക് തന്നെയാണ് തകരാർ പരിഹരിക്കാൻ കരാർ നൽകിയത്. കരാർ കാലാവധി തീർന്നതിന് പിന്നാലെ രണ്ട് തവണ എടിഎം പണിമുടക്കി. അപ്പോഴെല്ലാം താത്കാലികമായി പ്രശ്നം പരിഹരിച്ച് പ്രവർത്തിപ്പിച്ചിരുന്നു. പ്രശ്നം പരിഹരിക്കാൻ ഉടൻ വേണ്ടത് ചെയ്യുമെന്ന് നഗരസഭ ചെയർപേഴ്സൺ കെ. ജാനകിദേവി അറിയിച്ചു.

വി.ടി. ഭട്ടതിരിപ്പാട് സാംസ്കാരിക സമുച്ചയം 18നു സമർപ്പിക്കും

പാലക്കാട്: മെഡിക്കൽ കോളജിന് സമീപം യാക്കര വില്ലേജിലെ അഞ്ച് ഏക്കറിൽ നിർമിച്ച വി.ടി. ഭട്ടതിരിപ്പാട് സാംസ്കാരിക സമുച്ചയം ഉദ്ഘാടനത്തിനായി ഒരുങ്ങി. 68 കോടി ചെലവിൽ അത്യാധുനിക സംവിധാനങ്ങൾ ഉൾപ്പെടുത്തിയാണ് സാംസ്കാരികസമുച്ചയം നിർമിച്ചിട്ടുള്ളത്. ഏകദേശം ഒരു ലക്ഷം ചതുരശ്ര അടി വിസ്തീർണമുളള സമുച്ചയത്തിൽ ആധുനിക ലൈറ്റിംഗ്, സൗണ്ട്, പ്രൊജക്ഷൻ സംവിധാനങ്ങൾ അടങ്ങിയ എവി തീയറ്റർ, ബ്ലാക്ക് ബോക്സ് തീയറ്റർ, ശില്പശാലകൾക്കുളള വേദി, ക്രാഫ്റ്റ് മ്യൂസിയം എന്നിവയും ഉൾപ്പെടുത്തിയിട്ടുണ്ട്. മനോഹരമായ ഉദ്യാനവും വിശാലമായ പാർക്കിംഗ്, കഫ്റ്റീരിയ സൗകര്യങ്ങളും ചേർന്നതാണ് സാംസ്കാരിക സമുച്ചയം. 2019 ഫെബ്രുവരി 24ന് സമുച്ചയത്തിന്‍റെ ശിലാസ്ഥാപനം നിർവഹിച്ചു. കലയെ സ്നേഹിക്കുന്ന പാലക്കാടൻ ജനതയ്ക്ക് വി.ടി ഭട്ടതിരിപ്പാട് സാംസ്കാരിക സമുച്ചയം വലിയൊരു മുതൽകൂട്ടാകും. മുഖ്യമന്ത്രി പിണറായി വിജയൻ 18 ന് വൈകുന്നേരം നാലിന് വി.ടി. ഭട്ടതിരിപ്പാട് സാം സ്കാരിക സമുച്ചയം നാടിന് സമർപ്പിക്കും. മന്ത്രി സജി ചെറിയാൻ അധ്യക്ഷനാവും. മന്ത്രിമാരായ കെ. കൃഷ്ണൻ കുട്ടി, എം.ബി. രാജേഷ്, വി.കെ. ശ്രീകണ്ഠൻ എംപി, രാഹുൽ മാങ്കൂട്ടത്തിൽ എംഎൽഎ, മുൻ സാംസ്കാരിക വകുപ്പ് മന്ത്രി എ.കെ. ബാലൻ, വി.ടി ഭട്ടതിരിപ്പാടിന്‍റെ മകൻ വി.ടി. വാസുദേവൻ, രാഷ്ട്രീയ സാമൂഹിക സാംസ്കാരിക മേഖലയിലെ പ്രമുഖർ തുടങ്ങിയവർ പങ്കെടുക്കും.

വേൾഡ് മലയാളി കൗൺസിൽ ലോകമാതൃദിനം ആഘോഷിച്ചു

കോയന്പത്തൂർ: വേൾഡ് മലയാളി കൗൺസിൽ കോയമ്പത്തൂർ പ്രോവിൻസ് ലോക മാതൃദിനത്തോടനുബന്ധിച്ച് സാമൂഹിക സാംസ്കാരിക രംഗത്ത് പ്രവർത്തിക്കുന്ന ലാലി മാത്യുവിനെ ആദരിച്ചു. കോയമ്പത്തൂർ കേരള ക്ലബ്ബിൽ പ്രോവിൻസിന്‍റെ വനിതാവിഭാഗം സംഘടിപ്പിച്ച ചടങ്ങിൽ പ്രസിഡൻറ് ഡോ.ജയന്തി പ്രദീപ്, ഡബ്ലുഎംസി ചെയർമാൻ ഡോ.രാജേഷ് കുമാർ, പ്രസിഡന്‍റ് രാജൻ ആറുമുഖം, ഇന്ത്യ റീജിയൻ പ്രസിഡന്‍റ് പി. പത്മകുമാർ, ജനറൽ സെക്രട്ടറി വിജയൻ ചെറുവശേരി, ട്രഷറർ വേണുഗോപാൽ എന്നിവർ ചേർന്ന് ആദരിച്ചു. ഡബ്ല്യൂഎംസി ഇന്ത്യ റീജിയന്‍റെ 2025-27 പ്രസിഡന്‍റായി തെരഞ്ഞെടുക്കപ്പെട്ട പി. പത്മകുമാർ, വൈസ് പ്രസിഡന്‍റ് ഡോ. സന്ധ്യ മേനോൻ എന്നിവരെ പ്രോവിൻസ് ഭാരവാഹികളും അംഗങ്ങളും ചേർന്ന് ആദരിച്ചു. പ്രത്യേക ക്ഷണിതാക്കളായ കോയമ്പത്തൂർ കേരള കൾച്ചറൽ സെന്‍റർ ഭാരവാഹികൾ വിൻസെന്‍റ് ലൂയിസ്, വിശാഖൻ എന്നിവർ പ്രസംഗിച്ചു. പ്രൊവിൻസ് വൈസ് ചെയർമാൻ പ്രദീപ് നമ്പ്യാർ നന്ദി പറഞ്ഞു.

വാണിയംകുളം കന്നുകാലിച്ചന്ത നവീകരണത്തിനു തുടക്കം

ഒറ്റപ്പാലം: കേരളത്തിലെ ഏറ്റവും വലിയ കന്നുകാലിച്ചന്ത നവീകരിക്കുന്നു. ഒരു കോടി രൂപയാണ് ചെലവ്. പ്രവർത്തന ഉദ്ഘാടനം നടന്നു. സംസ്ഥാന ബജറ്റിൽ അനുവദിച്ച ഒരു കോടി രൂപ ചെലവിലാണ് ചന്ത നവീകരിക്കുന്നത്. ചന്തയുടെ നിർമാണ പ്രവൃ ത്തിയുടെ ഉദ്ഘാടനം പി. മമ്മികുട്ടി എംഎൽഎ നിർവഹിച്ചു. വള്ളുവനാടിന്‍റെ വ്യാപാരചരിത്രത്തിൽ ഏറെ പ്രസിദ്ധമാണ് വാണിയംകുളം ചന്ത. കേരളത്തിനകത്തുനിന്നും പുറത്തുനിന്നും കന്നുകാലികളെ കൊണ്ടുവന്ന് കച്ചവടംചെയ്യുന്ന ചന്ത വാണിയംകുളം ഗ്രാമപഞ്ചായത്തിന്‍റെ മുഖമുദ്രയാണ്. ചന്തയിലെത്തുന്ന കച്ചവടക്കാർക്കും തൊഴിലാളികൾക്കും വിശ്രമിക്കാനും പ്രാഥമികകാര്യങ്ങൾ നിർവഹിക്കാനും ആവശ്യമായ ശുചിമുറിയും വിശ്രമമുറിയും കന്നുകാലിയെ വലിയതും ചെറിയതുമായ വാഹനങ്ങളിൽനിന്ന് എളുപ്പത്തിൽ കയറ്റുവാനും ഇറക്കാനും കഴിയുന്ന റാംപ് സൗകര്യവും ചന്തയുടെ നിലം കോൺക്രീറ്റ് ചെയ്യലും ലഘുഭക്ഷണശാലകൾക്കാവശ്യമായ കെട്ടിടം നിർമിക്കലും ഉൾപ്പെടുന്നതാണ് കാലിച്ചന്ത നവീകരണം. ചന്ത പ്രവർത്തിക്കുന്ന ദിവസങ്ങളിൽ നിർമാണപ്രവൃത്തികൾ നടത്താതെ ചന്തയുടെ ദൈനംദിനപ്രവർത്തനങ്ങളെ ബാധിക്കാത്ത രീതിയിൽ നവീകരണം സാധ്യമാക്കാനാണ് ലക്ഷ്യമിടുന്നത്.

സംഭരിച്ച നെല്ലിന്‍റെ വില ലഭിക്കാതെ കർഷകർ പ്രതിസന്ധിയിൽ

നെന്മാറ: സപ്ലൈകോ മുഖേന സംഭരിച്ച നെല്ലിന്‍റെ വില ലഭിക്കാതെ ദുരിതത്തിലായി കർഷകർ. നെല്ലുസംഭരണം പൂർത്തിയാക്കി മാസങ്ങൾകഴിഞ്ഞു പിആർഎസ് ലഭിച്ച കർഷകർക്കും നെല്ലുവില വായ്പയായി പോലും ലഭിക്കാത്ത സ്ഥിതിയായി. വിവിധ ബാങ്കുകൾ മുഖേനയാണ് നെല്ലുവില വായ്പയായി പണംനൽകാൻ സപ്ലൈകോ കരാറുണ്ടായിരുന്നത്. മാർച്ച് പകുതിയോടെ കരാർ കാലാവധി കഴിയുകയും ബാങ്കിന് സർക്കാർനൽകുന്ന പലിശ വർധിപ്പിക്കണമെന്നും ബാങ്കുകൾ ആവശ്യപ്പെട്ടതോടെയാണ് നെല്ലുവില വിതരണം സ്റ്റേറ്റ് ബാങ്ക് ഓഫ് ഇന്ത്യയിലെ അക്കൗണ്ട് ഉടമകൾക്കുമാത്രമായി ചുരുങ്ങിയത്. മറ്റു ബാങ്ക് അക്കൗണ്ട് ഉടമകൾ എന്നു പണം ലഭിക്കുമെന്നറിയാതെ കുഴങ്ങുകയാണ്. നെല്ലുവില വൈകുന്നതിൽ പ്രതിഷേധിച്ച് സിപിഎം പോഷക കർഷകസംഘടനയായ കർഷകസംഘവും കഴിഞ്ഞ ദിവസം വിവിധകേന്ദ്രങ്ങളിൽ സമരം നടത്തിയിരുന്നു. കൃഷിവകുപ്പും സിവിൽ സപ്ലൈസ് വകുപ്പും കൈകാര്യം ചെയ്യുന്ന സിപിഐ സമ്മേളനങ്ങളും നെല്ലുവില ഉടൻ വിതരണം ചെയ്യണമെന്ന് പ്രമേയങ്ങളുമായി രംഗത്തെത്തിയ കൗതുക കാഴ്ചയും കഴിഞ്ഞ ഒരാഴ്ചയായി കാണുന്നതായി കർഷകർ പരിതപിച്ചു. ആയിരക്കണക്കിനു കൃഷിക്കാരാണു ജില്ലയിൽ പ്രതിസന്ധി നേരിടുന്നത്. രണ്ടാംവിളയിൽ 52,008 കൃഷിക്കാരിൽ നിന്നു നെല്ലെടുത്തിട്ടുണ്ട്. ഇതനുസരിച്ചു മാത്രം 40,644 കൃഷിക്കാർക്കു നെല്ലു വില നൽകാനുണ്ടെന്നു സപ്ലൈകോ അധികൃതർ പറയുന്നു. സംഭരിച്ച നെല്ലിന്‍റെ വില വിതരണം വൈകുന്നതു അടുത്ത ഒന്നാംവിള ഒരുക്കത്തെയും ബാധിച്ചുതുടങ്ങി. കാലവർഷം മേയ് അവസാനവാരം എത്തുമെന്നു കാലാവസ്ഥാവകുപ്പിന്‍റെ മുന്നറിയിപ്പു വന്നതോടെ ഒന്നാംവിള ഇറക്കാമെന്ന പ്രതീക്ഷയും കർഷകരിൽ അസ്തമിച്ചു. നെൽപ്പാടങ്ങൾ ഉഴുതുമറിച്ച് നിലമൊരുക്കി എടുത്താൽമാത്രമേ ഞാർ തയാറാക്കാനും മറ്റും സാധിക്കുകയുള്ളൂ. ഇതിനുള്ള പ്രാഥമിക പ്രവർത്തനങ്ങൾ നടത്താൻ നെല്ലുവില കിട്ടാതെ സാമ്പത്തികമായി കുഴങ്ങിയിരിക്കുകയാണ് മേഖലയിലെ കർഷകർ. നിലമൊരുക്കുന്നതിനു ഉഴവുകൂലിയും, ചാണകം, വരമ്പ് വൃത്തിയാക്കൽ, ബലപ്പെടുത്താൻ നീർ ചാലുകൾ വൃത്തിയാക്കൽ എന്നിവയ്ക്കായി പണം കണ്ടെത്താൻ വഴിതേടുകയാണ് കർഷകർ. ജോജി തോമസ്

കരിമ്പ എക്യുമെനിക്കൽ കൂട്ടായ്മ യാത്രയയപ്പുസമ്മേളനം

കല്ലടിക്കോട്‌: സ്ഥലംമാറിപ്പോകുന്ന എക്യൂമെനിക്കൽ ചെയർമാൻ ഫാ. ഐസക്ക്‌ കോച്ചേരി, ഫാ. ജോവാക്കീം പണ്ടാരം കുടിയിൽ എന്നിവർക്കു കരിമ്പ എക്യൂമെനിക്കൽ ചർച്ചസ്‌ കൂട്ടായ്മ യാത്രയയപ്പുനൽകി. യാത്രയയപ്പ്‌ സമ്മേളനം ഫാ. തോമസ്‌ ജോൺ തടത്തിൽ ഉദ്ഘാടനം ചെയ്തു. കത്തോലിക്ക കോൺഗ്രസ്‌ പാലക്കാട്‌ രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ അധ്യക്ഷത വഹിച്ചു. ഫാ. വർഗീസ്‌ ജോൺ, ഫാ. ജേക്കബ്‌ കുരുവിള, റവ. ജോർജ് അബ്രഹാം, ഫാ. ജോജി വടക്കേക്കര, ഫാ. നീലേഷ്‌ തുരുത്തുവേലിൽ, ഫാ. ലാലു ഓലിക്കൽ, തമ്പി തോമസ്‌, തോമസ്‌ ആന്‍റണി, ഡോ. മാത്യു കല്ലടിക്കോട്‌ എന്നിവർ പ്രസംഗിച്ചു. എക്യൂമെനിക്കൽ ചർച്ചസിന്‍റെ താത്കാലിക ചെയർമാനായി ഫാ. ചെറിയാൻ ആഞ്ഞിലിമൂട്ടിലിനെ തെരഞ്ഞെടുത്തു.

പോക്‌സോ കേസിൽ പ്രതിക്ക് അഞ്ചുവര്‍ഷം തടവും പിഴയും

പാലക്കാട്: പതിനൊന്നുകാരിക്കുനേരെ ലൈംഗികാതിക്രമം നടത്തിയ കേസില്‍ പ്രതിക്ക് അഞ്ചുവര്‍ഷം തടവും 50000 രൂപ പിഴയും. കൊടുമ്പ് സ്വദേശി ചെന്താമര(58)യെയാണ് പാലക്കാട് ഫാസ്റ്റ് ട്രാക്ക് സ്‌പെഷ്യല്‍ പോക്‌സോ കോടതി ജഡ്ജി ടി. സഞ്ജു ശിക്ഷിച്ചത്. പിഴയടയ്ക്കാത്ത പക്ഷം ആറുമാസം അധികതടവ് അനുഭവിക്കണം. കഴിഞ്ഞവര്‍ഷം മേയ് അഞ്ചിനാണ് കേസിനാസ്പദമായ സംഭവം. ടൗൺ സൗത്ത് സബ് ഇന്‍സ്‌പെക്ടറായിരുന്ന സി.എസ്. സൂരജാണ് കേസന്വേഷിച്ച് കുറ്റപത്രം സമര്‍പ്പിച്ചത്. പ്രോസിക്യൂഷനുവേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ സി. രമിക ഹാജരായി. പിഴതുക കൂടാതെ അതിജീവിതയ്ക്ക് അധിക ധനസഹായത്തിനും വിധിയായി.

വെള്ള അരിയുടെ നെല്ല് സംഭരിക്കുന്നതിൽ വിമുഖതയെന്ന പ്രചാരണം തെറ്റ്: മന്ത്രി

പാലക്കാട്: കർഷകരിൽനിന്നും നെല്ലുസംഭരിക്കുമ്പോൾ വെള്ള അരിയുടെ നെല്ല് സംഭരിക്കുന്നതിനു സപ്ലൈകോ വിമുഖത കാണിക്കുന്നുവെന്ന പ്രചാരണം തെറ്റാണെന്നു സംസ്ഥാന ഭക്ഷ്യ സിവിൽ സപ്ലൈസ് ലീഗൽ മെട്രോളജി മന്ത്രി ജി ആർ അനിൽ അറിയിച്ചു. പുഴുക്കലരിയുമായി കലർത്തി വെള്ള അരി സംഭരണത്തിനായി നൽകുമ്പോൾ എഫ്സി ഐ യുടെ ഗുണമേന്മാ പരിശോധനയിൽ നിരസിക്കപ്പെടുന്നുണ്ട്. ആയതിനാൽ വെള്ള അരിയുടെ നെല്ലും പുഴുക്കലരിയുടെ നെല്ലും കൂടിക്കലരാത്തവിധം വേർതിരിച്ച് വെവ്വേറെ ചാക്കുകളിലായാണു നൽകേണ്ടത്. ഇത്തരത്തിൽ വേർതിരിച്ചു നൽകുന്ന നെല്ല് സപ്ലൈകോയുടെ നേതൃത്വത്തിൽ കൃത്യമായി തന്നെ സംഭരിക്കുന്നുണ്ടെന്നും മന്ത്രി വാർത്താക്കുറിപ്പിൽ അറിയിച്ചു.

‘അമൃത എക്സ്പ്രസിൽ വനിതാ കന്പാർട്ട്മെന്‍റ് അനുവദിക്കണം’

ഒറ്റപ്പാലം: വിവിധ ആവശ്യങ്ങൾക്കായി തിരുവനന്തപുരത്തേക്കും തിരിച്ചും ജനങ്ങൾ ഏറ്റവും കൂടുതൽ ആശ്രയിക്കുന്ന ട്രെയിൻ ആണ് അമൃത എക്സ്പ്രസ്. റിസർവ് ചെയ്ത സീറ്റുകളുടെ അപര്യാപ്തത മൂലം ജനറൽ കന്പാർട്ട്മെന്‍റിൽ പോലും വലിയ തിരക്കാണ് അനുഭവപ്പെടുന്നത്. ജനറൽ കന്പാർട്ട്മെന്‍റിന്‍റെ ഒരു വാതിലിൽ പേനകൊണ്ട് ലേഡീസ് എന്ന എഴുതിവെച്ചിരിക്കുകയും മറ്റേ വാതിലിലൂടെ ജനറൽ എന്ന നിലയിലുമാണ് ഒരേ കന്പാർട്ട്മെന്‍റിലേക്ക് ജനങ്ങൾ കയറുന്നത്. രാത്രികാലങ്ങളിൽ സ്ത്രീകളുടെനേരേ ശല്യവും ഉണ്ടാകാറുണ്ട്. അതിനാൽ അമൃത എക്സ്പ്രസിൽ വനിതാ കന്പാർട്ട്മെന്‍റ് അനുവദിക്കണമെന്ന് തോട്ടക്കര കൈരളി റസിഡൻസ് അസോസിയേഷൻ ആവശ്യപ്പെട്ടു. പി. ജയപ്രകാശ് അധ്യക്ഷത വഹിച്ച യോഗത്തിൽ കെ. കൃഷ്ണൻകുട്ടി, വിശ്വനാഥൻ നായർ, സുനിൽകുമാർ, ശ്രീകുമാർ, ഹബീബ് റഹ്മാൻ, കെ. അംബിക, റീന, പത്മിനി എന്നിവർ പ്രസംഗിച്ചു.

സ്ത്രീകൾക്കു വനിതാ അവകാശപദ്ധതി; ജൂൺ നാലിന് അപേക്ഷ നൽകാം

കോയന്പത്തൂർ: 2023 സെപ്റ്റംബർ മുതൽ തമിഴ്‌നാട്ടിൽ വനിതാ അവകാശ പദ്ധതി നടപ്പിലാക്കിവരികയാണ്. 1.14 കോടി സ്ത്രീകൾക്ക് ഈ പദ്ധതിയുടെ പ്രയോജനം ലഭിക്കുന്നുണ്ട്. ഈ പദ്ധതിയിലൂടെ ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് പ്രതിമാസം 1000 രൂപ നേരിട്ട് നൽകുന്നു. എല്ലാ മാസവും 15 ാം തിയതി അവരുടെ ബാങ്ക് അക്കൗണ്ടിലേക്ക് ക്രെഡിറ്റ് ചെയ്യപ്പെടും. ഇതുവരെ മൂന്ന്ഘട്ട ക്യാമ്പുകൾ നടത്തി യോഗ്യരായ സ്ത്രീകളെ പരിപാടിയിൽ ഉൾപ്പെടുത്തിയിരുന്നു. ഇനിയും പദ്ധതിയുടെ ഗുണം ലഭിക്കാത്തവർക്ക് ജൂൺ നാലിന് മുഖ്യമന്ത്രി തമിഴ്‌നാട്ടിലുടനീളം നടത്തുന്ന പൊതുപരിപാടിയിൽ അപേക്ഷ നൽകാം. തമിഴ്‌നാട്ടിലുടനീളം 9,000 സ്ഥലങ്ങളിൽ ക്യാമ്പുകൾ നടത്താനുള്ള ക്രമീകരണങ്ങൾ ചെയ്തുവരുന്നു. ഇതിനായി ഈ പദ്ധതിയിൽ പ്രവർത്തിച്ച തഹസിൽദാർമാർ ഉൾപ്പെടെയുള്ള ഉദ്യോഗസ്ഥർക്കായി ചെന്നൈയിൽ പരിശീലന ക്യാമ്പ് നടന്നു. ഓരോ ജില്ലയിലും മുഖ്യമന്ത്രിയുടെ ക്യാമ്പ് എവിടെ നടത്തണമെന്നതിന്‍റെ വിശദാംശങ്ങളും ഉദ്യോഗസ്ഥരെ അറിയിച്ചിട്ടുണ്ട്. 5000 രൂപയിൽ താഴെ വരുമാനമുള്ള കുടുംബങ്ങൾ, 5 ഏക്കറിൽ താഴെ ഭൂമിയോ ഉള്ള കുടുംബങ്ങൾക്ക് ഈ പദ്ധതിയിൽ ചേരാം. സർക്കാർ ജീവനക്കാർ, ബാങ്ക് ജീവനക്കാർ, പൊതുമേഖലാ ജീവനക്കാർ, പെൻഷൻകാർ എന്നിവരുൾപ്പെടെ ആളുകൾക്ക് ഈ പദ്ധതിക്ക് അപേക്ഷിക്കാൻ അർഹതയില്ല. കാർ, ജീപ്പ്, ട്രാക്ടർ, വ്യക്തിഗത ഉപയോഗത്തിനായി ഹെവി വാഹനങ്ങൾ എന്നിവയുൾപ്പെടെ നാല് ചക്ര വാഹനങ്ങൾ സ്വന്തമായുള്ളവർക്കും ഈ പദ്ധതിയുടെ പ്രയോജനം ലഭിക്കില്ല.

വണ്ടിത്താവളം നാലുമൊക്ക് പാതയിൽ അണഞ്ഞ ഹൈമാസ്റ്റ് ശരിയാക്കണം

വണ്ടിത്താവളം: ടൗൺ നാലുമൊക്ക് റോഡിൽ ഹൈമാസ്റ്റ് അണഞ്ഞ് രണ്ടാഴ്ചയായിട്ടും ശരിയാക്കാത്തതിൽ യാത്രക്കാരുടേയും വ്യാപാരികളുടേയും പ്രതിഷേധം ശക്തം. ബന്ധപ്പെട്ട പഞ്ചായത്ത് അധികൃതർ ഏർപ്പെടുത്തിയ സ്വകാര്യ ഏജൻസിക്കാണ് ഹൈമാസ്റ്റ് ലാമ്പിന്‍റെ സംരക്ഷണചുമതല. ഏജൻസി ഇതിന് സമ്മതപത്രം നൽകിയാണ് ബിൽതുക വാങ്ങി സ്ഥലംവിട്ടത്. പിന്നീട് മൊബൈലിൽ വിളിച്ചാൽ ദൂരസ്ഥലത്താണെന്ന് മുടന്തൻ ന്യായവാദം പറഞ്ഞ് ഒഴിയുകയാണ് പതിവ്. വൈകുന്നേരം ആറുമുതൽ 8 വരേയും നിലക്കാത്ത വാഹനസഞ്ചാരമുള്ളിടത്താണ് ഹൈമാസ്റ്റ് അണഞ്ഞുകിടക്കുന്നത്. സ്ഥലത്ത് യാത്രക്കാർ രാത്രിസമയത്ത് വിളയോടി റോഡിൽ ബസ് കാത്ത് നിൽക്കുന്നത് അപകടഭീതിയിലാണ്. മുന്പ് ഈ സ്ഥലത്ത് കാറിടിച്ച് വയോധികൻ തൽക്ഷണം മരണപ്പെട്ട അപകടവും നടന്നിട്ടുണ്ട്.

വിദ്യാർഥികൾക്ക് മത്സരം

പാലക്കാട്: ലോക ക്ഷീരദിനത്തോടനുബന്ധിച്ച് ആലത്തൂർ ക്ഷീര പരിശീലന കേന്ദ്രം സ്കൂൾ വിദ്യാർഥികൾക്കായി വിവിധ മത്സരങ്ങൾ നടത്തുന്നു. ചിത്രരചന, ക്വിസ്, പ്രബന്ധ മത്സരം എന്നിവയാണ് നടത്തുന്നത്. 29 ന് രാവിലെ 10 ന് ആലത്തൂർ ക്ഷീര പരിശീലന കേന്ദ്രത്തിലാണ് മത്സരം. ചിത്രരചനാമത്സരം എൽപി, യുപി, ഹൈസ്കൂൾ വിഭാഗത്തിന് പങ്കെടുക്കാം. പ്രബന്ധ മത്സരം, ക്വിസ് എന്നിവയ്ക്ക് യുപിക്കും ഹൈസ്കൂളിനും പങ്കെടുക്കാം. വിദ്യാർഥികൾ സ്കൂൾ തിരിച്ചറിയൽ കാർഡും ചിത്രരചനയ്ക്കാവശ്യമായ സാമഗ്രികളും സഹിതം എത്തിച്ചേരേണ്ടതാണ്. താത്പര്യമുള്ളവർ 24 നകം രജിസ്റ്റർ ചെയ്യണം. ഫോണ്‍: 04922 226040, 7902458762, 9074993554.

പൈനാപ്പിൾ വിലയിടിഞ്ഞു; മൊത്തവില 20 രൂപയിലുംതാഴെ

വടക്കഞ്ചേരി: യുദ്ധഭീതിയിൽ പൈനാപ്പിൾ വില കുത്തനെ ഇടിഞ്ഞു. ഒരുമാസം മുമ്പ് കിലോയ്ക്ക് 48 രൂപ ഉണ്ടായിരുന്ന പൈനാപ്പിളിന്‍റെ മൊത്തവില ഇപ്പോൾ 20 രൂപയായി കുറഞ്ഞു. ഇരുപതിലും താഴ്ന്ന് 19 രൂപയ്ക്കും പൈനാപ്പിൾ വിൽക്കേണ്ടിവരുന്നതായി പ്രാദേശികമായി ഏറ്റവും കൂടുതൽ പൈനാപ്പിൾ കൃഷി നടത്തുന്ന വാൽകുളമ്പ് കണ്ടത്തിൽപറമ്പിൽ സജി പറഞ്ഞു. യുദ്ധഭീഷണിയെ തുടർന്ന് കയറ്റുമതി നിലച്ചത് പൈനാപ്പിളിന്‍റെ വിലയിടിയാൻ കാരണമായി. കാശ്മീർ ഉൾപ്പെടെയുള്ള സ്ഥലങ്ങളിൽ ടൂറിസ്റ്റുകൾ ഇല്ലാതായത് പൈനാപ്പിൾ വ്യാപാരത്തേയും ബാധിച്ചിട്ടുണ്ട്. മാങ്ങാ ഉത്പാദനം കൂടിയതും തണ്ണിമത്തൻ വില കുറഞ്ഞതും പൈനാപ്പിൾ വിപണിയെ തളർത്താൻ കാരണമായി. വടക്കേ ഇന്ത്യൻ ലോബിയുടെ ഇടപെടലുകൾ പൈനാപ്പിളിന് വലിയ ദോഷകരമായിട്ടുണ്ടെന്ന് പൈനാപ്പിൾ കർഷകർ പറയുന്നു. പൾപ്പ് കമ്പനികൾ കുറഞ്ഞ വിലയ്ക്ക് ലഭിക്കുന്ന മാമ്പഴം വാങ്ങിക്കൂട്ടിയാണ് കമ്പനികൾ പ്രവർത്തിക്കുന്നത്. അതേസമയം, പൈനാപ്പിൾ വില കുത്തനെ ഇടിഞ്ഞെങ്കിലും ചില്ലറ വില്പന വില ഇപ്പോഴും ഉയർന്നു നിൽക്കുകയാണ്. ഒരു പൈനാപ്പിൾ ചെടി നട്ടുവളർത്തി വിളവെടുപ്പ് ഘട്ടം വരെയുള്ള പരിപാലന ചെലവ് തന്നെ 50 രൂപ വരുന്നുണ്ടെന്ന് സജി പറഞ്ഞു. അതിനാൽ വില വളരെ താഴ്ന്നു പോകുന്നത് പൈനാപ്പിൾ കർഷകർക്ക് വലിയ നഷ്ടമുണ്ടാക്കും. സജിയുടെ മാര്യപാടത്തെ തോട്ടത്തിൽ 10 തലപ്പുകളുള്ള പൈനാപ്പിൾ ഉണ്ടായത് കൗതുകമായി.രണ്ടര കിലോയിലധികം തൂക്കമുണ്ട് ഇതിന്.

സെന്‍റ് വിൻസന്‍റ് ഡിപോൾ ജൂബിലിഭവനം വെഞ്ചരിപ്പ് 12 ന്

പാലക്കാട്: സൊസൈറ്റി ഓഫ് സെന്‍റ് വിൻസന്‍റ് ഡി പോൾ പാലക്കാട് സെൻട്രൽ കൗണ്‍സിൽ റൂബി ജൂബിലി സ്്മാരകമായി പൊന്നംകോട് ഏരിയ കൗണ്‍സിലിലെ കരിന്പ ലിറ്റിൽ ഫ്ളവർ കോണ്‍ഫറൻസിൽ നിർമിച്ച 10 ാമത് ജൂബിലിഭവനത്തിന്‍റെ വെഞ്ചരിപ്പ് 12 ന് രാവിലെ 11.30 ന് രൂപത വികാരി ജനറാൾ മോണ്‍. ജീജോ ചാലയ്ക്കൽ നിർവഹിക്കും. രൂപത പ്രൊക്യുറേറ്റർ ഫാ. റെനി കാഞ്ഞിരത്തിങ്കൽ പങ്കെടുക്കും. ചടങ്ങിന് സെൻട്രൽ കൗണ്‍സിൽ പ്രസിഡന്‍റ് ജെയിംസ് പടമാടൻ, കരിന്പ ലിറ്റിൽ ഫ്ളവർ പള്ളി വികാരിയും ആധ്യാത്മിക ഉപദേഷ്ടാവുമായ ഫാ. അനീഷ് സിഎംഐ, സെൻട്രൽ കൗണ്‍സിൽ സെ ക്രട്ടറി ജോസഫ് കൊള്ളന്നൂർ, ട്രഷറർ ടോമി പള്ളിവാതുക്കൽ, സെൻട്രൽ കൗണ്‍സിൽ ബോർഡ് അംഗങ്ങൾ, കോണ്‍ഫറൻസ് പ്രസിഡന്‍റ് സണ്ണി, കോണ്‍ഫറൻസ് അംഗങ്ങൾ എന്നിവർ നേതൃത്വം നല്കും. പതിനൊന്നാമത് ജൂബിലി ഭവനം താവളം ഏരിയ കൗണ്‍സിലിലെ അഗളി ഗൂളിക്കടവ് ഫാത്തിമമാത കോണ്‍ഫറൻസിലും പന്ത്രണ്ടാമത് ഭവനം വടക്കഞ്ചേരി ഏരിയ കൗണ്‍സിലിലെ പന്തലാംപാടം നിത്യസഹായമാത കോണ്‍ഫറൻസിലും നിർമാണം പുരോഗമിക്കുന്നതായി സെൻട്രൽ കൗണ്‍സിൽ പ്രസിഡന്‍റ് ജെയിംസ് പടമാടൻ അറിയിച്ചു.

പ്രകൃതിവിഭവങ്ങൾ ജനങ്ങളുടേത്, സർക്കാർ ട്രസ്റ്റിമാത്രം: അഡ്വ. ജോണ്‍ ജോസഫ്

പാലക്കാട്: മണ്ണും ജലവും വായുവും കുളവും പുഴയും അടക്കമുള്ള പ്രകൃതി വിഭവങ്ങൾ ജനങ്ങളുടെതാണെന്നും സർക്കാർ ട്രസ്റ്റി മാത്രമാണെന്നും കോർപറേറ്റുകൾക്ക് തീറെഴുതി കൊടുക്കാൻ അധികാരമില്ലെന്നും ജനാധികാര ജനകീയ മുന്നേറ്റം സംസ്ഥാന ചീഫ് കോ-ഓർഡിനേറ്റർ അഡ്വ. ജോണ്‍ ജോസഫ് അഭിപ്രായപ്പെട്ടു. പ്രകൃതി വിഭവങ്ങളുടെ മേലുള്ള ജനങ്ങളുടെ അധികാരവും പഞ്ചായത്തീരാജ് നിയമവും എന്ന വിഷയത്തിൽ പഠനക്ലാസ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എലപ്പുള്ളി ബ്രൂവറി വിരുദ്ധ സമരഐക്യദാർഢ്യസമിതി സംസ്ഥാന ചെയർമാൻ അഡ്വ.പി.എ. പൗരൻ മോഡറേറ്ററായ പഠന ക്ലാസിൽ രാമശേരി ഗാന്ധി ആശ്രമം ട്രസ്റ്റി പുതുശേരി ശ്രീനിവാസൻ വിഷയാവതരണം നടത്തി. സജീഷ് കുത്തനൂർ, മോഹൻ കാട്ടാശേരി, പാണ്ടിയോട് പ്രഭാകരൻ, ആറുമുഖൻ പത്തിച്ചിറ, രഘു മാത്തൂർ, കെ.സി. അശോക്, പി.പി. ഉണ്ണികൃഷ്ണൻ, ആർ. അനുപമ, ടി.ആർ. ബാലസുബ്രഹ്മണ്യൻ, ജയശ്രീ രവി, എ. ഗോപിനാഥൻ, ആർ. ശിവദാസൻ, കെ. മായാണ്ടി തുടങ്ങിയവർ ചർച്ചയിൽ പങ്കെടുത്തു.

കാഞ്ഞിരക്കടവിലെ കുരുന്നുകളുടെ ആവശ്യംകേട്ട് അതിശയിച്ച് എംപി

മലമ്പുഴ: സാറേ ഞങ്ങൾക്ക് റോഡ് വേണമെന്ന് വി.കെ. ശ്രീകണ്ഠൻ എംപിയോട് ആവശ്യപ്പെട്ടത് കാഞ്ഞിരക്കടവിലെ കുരുന്നുവാദ്യക്കാർ. എംപി ക്കും കൂടെയുണ്ടായിരുന്നവർക്കും കുട്ടികളുടെ ഈ ആവശ്യം കേട്ട് അത്ഭുതം. വല്ല വാദ്യ ഉപകരണങ്ങൾ ആവശ്യപ്പെടുമെന്നാണ് കരുതിയത് എന്നാൽ വലിയവർ പറയേണ്ട കാര്യം ഇവർ പറഞ്ഞപ്പോൾ അതിശയമായി എന്ന് എംപി. പിന്നെ കൂട്ടികളോടായ് പറഞ്ഞു"ശ്രമിക്കാട്ടോ’. കാഞ്ഞിരക്കടവിൽ റെയിൽവേപാളത്തിൽ തീവണ്ടിമുട്ടിചത്ത ഒമ്പത് കറവപശുക്കളുടെ ഉടമ അനന്തകൃഷ്ണന് കാലികളെ നൽകാൻ എത്തിയതായിരുന്നു വി.കെ. ശ്രീകണ്ഠൻ എംപി. നേതാക്കളും നാട്ടുകാരും എംപി യെ കാത്തുനിൽക്കുമ്പോൾ കാലിയായ പെയിന്‍റ് ടിന്നുകൾ, കേടുവന്ന അലുമിനിയം ചട്ടി എന്നിവ ഉപയോഗിച്ച് വാദ്യമേളം നടത്തുന്ന കുരുന്നുകളെ കണ്ടപ്പോൾ കൗതുകം തോന്നി കണ്ടുനിന്നവർ പ്രോത്സാഹിപ്പിച്ചു. പത്തുമിനിറ്റ് കഴിഞ്ഞപ്പോൾ എംപി എത്തി. കുട്ടികളുടെ വാദ്യമേളം അൽപനേരം ആസ്വദിച്ച ശേഷം കുട്ടികളെ ചേർത്തുപിടിച്ച് നിങ്ങളുടെ വാദ്യമേളം നന്നായിട്ടുണ്ട് നിങ്ങൾക്ക് എന്താണ് വേണ്ടതെന്ന എംപി യുടെ ചോദ്യത്തിനാണ് ‘ഞങ്ങൾക്ക് റോഡ് വേണം സാറേ’ എന്ന് കുരുന്നുകൾ ആവശ്യപ്പെട്ടത്. റോഡ് ആവശ്യപ്പെട്ടുകൊണ്ട് രണ്ടു ദിവസം മുമ്പ് നാട്ടുകാർ എംപിക്ക് നിവേദനം നൽകിയിരുന്നു.

ചിറ്റൂർ, കൊല്ലങ്കോട് ക്ലസ്റ്റർ അരങ്ങ് സർഗോത്സവം ശ്രദ്ധേയമായി

വണ്ടിത്താവളം: ചിറ്റൂർ, കൊല്ലങ്കോട് ക്ലസ്റ്റർ അരങ്ങ് സർഗോത്സവം മന്ത്രി കെ. കൃഷ്ണൻകുട്ടി ഉദ്ഘാടനം ചെയ്തു. കൊല്ലങ്കോട് ബ്ലോക്ക്പഞ്ചായത്ത് അധ്യക്ഷൻ ആർ. ചിന്നക്കുട്ടൻ അധ്യക്ഷനായി. ചിറ്റൂർ ബ്ലോക്ക് പഞ്ചായത്ത് അധ്യക്ഷ എ. സുജാത മുഖ്യാതിഥിയായി. ജില്ലാ കുടുംബശ്രീമിഷൻ എഡിഎംസി. അനുരാധ, ഡിപിഎം ഡാൻ വട്ടോളി, പട്ടഞ്ചേരി പഞ്ചായത്ത് അധ്യക്ഷൻ പി.എസ്. ശിവദാസ്, ഉപാധ്യക്ഷ അനില മുരളീധരൻ, പെരുമാട്ടി പഞ്ചായത്ത് അധ്യക്ഷ ഷീബ രാധാകൃഷ്ണൻ, കൊടുവായൂർ പഞ്ചായത്ത് അധ്യക്ഷ പ്രേമ സുകുമാരൻ, തുടങ്ങിയവർ പ്രസംഗിച്ചു. സർഗോത്സവം സമാപന സമ്മേളനം കെ ബാബു എംഎൽഎ ഉദ്ഘാടനം ചെയ്തു. സിനിമ സംവിധായകൻ ഫാറൂഖ് അബ്ദുൾ റഹ്മാൻ മുഖ്യാതിഥിയായി. പട്ടഞ്ചേരി പഞ്ചായത്ത് പ്രസിഡന്‍റ് പി.എസ്. ശിവദാസ് അധ്യക്ഷനായി. പെരുമാട്ടി ഗ്രാമപഞ്ചായത്ത് പ്രസിഡന്‍റ് ഷീബാ രാധാകൃഷണൻ, പട്ടഞ്ചേരി പഞ്ചായത്ത് ഉപാധ്യക്ഷ അനില മുരളീധരൻ തുടങ്ങിയവർ പ്രസംഗിച്ചു. സർഗോത്സവത്തിൽ പെരുമാട്ടി പഞ്ചായത്ത് ഓവറോൾ ചാമ്പ്യന്മാരായി.

സഹകരണ റിസ്ക്ഫണ്ട് അപേക്ഷകൾ ഓൺലൈനിലാക്കണം

ചിറ്റൂർ: സഹകരണ ബാങ്കുകളിലും ക്രെഡിറ്റ് സൊസൈറ്റികളിലും വായ്പ എടുത്ത് മരണപ്പെട്ടപ്പെട്ടവർക്കുള്ള ധനസഹായം അപേക്ഷകൾ ഓൺലൈനിൽ സ്വീകരിക്കണമെന്ന് കേരള കോ-ഓപ്പറേറ്റീവ് എംപ്ലോയീസ് കോൺഗ്രസ് (ഐഎൻടിയുസി) ജില്ലാ കമ്മിറ്റിയോഗം ആവശ്യപ്പെട്ടു. നിലവിൽ റിസ്ക് ഫണ്ട് അടച്ചിട്ടും സർക്കാരിൽ നിന്നും ആനുകൂല്യം ലഭിക്കുന്നതിന് വർഷങ്ങളോളം കാത്തിരിക്കേണ്ടതായി വരുന്നു. നിലവിലുള്ള മാനുവൻ അപേക്ഷകളുടെ സീനിയോറിറ്റിയും എപ്പോൾ ലഭ്യമാവുമെന്നും അറിയാൻ കഴിയുന്നില്ല. സംസ്ഥാനകമ്മിറ്റി അംഗം പ്രീത യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് എം. സജിത്ത് അധ്യക്ഷത വഹിച്ചു.ജില്ലാ സെക്രട്ടറി എ.എം ജോഷിത്ത്, ടി.സി. ഷാംജോ, കൃഷ്ണകുമാർ, ബി. പ്രസാദ്, സുബിൻ, ഷൈജു, കെ. അക്ഷയ്, കിരൺ എന്നിവർ പ്രസംഗിച്ചു.

തുടർച്ചയായി ആറാംവർഷവും നൂറുമേനി കൊയ്ത് പന്തലാംപാടം മേരിമാതാ സ്കൂൾ

വടക്കഞ്ചേരി: തുടർച്ചയായി ആറാം വർഷവും സ്കൂളിൽ നൂറു ശതമാനത്തിന്‍റെ വിജയപതാക പാറികളിക്കുകയാണ് പന്തലാംപാടം മേരി മാതാഹയർ സെക്കൻഡറി സ്കൂളിൽ. 247 പേർ പരീക്ഷ എഴുതി മുഴുവൻ പേരും ഉപരിപഠന യോഗ്യത നേടി. ഫുൾ എ പ്ലസുകാരായി 21 പേരുമുണ്ട്. 2019 ലും 2014ലും ഒരു കുട്ടിയുടെ തോൽവിയിൽ നൂറ് ശതമാനം വിജയം സ്കൂളിന് നഷ്ടപ്പെട്ടിരുന്നു. 2017 ലും 2008ലും സ്കൂൾ നൂറ് ശതമാനത്തിൻ്റെ നെറുകയിൽ തന്നെയായിരുന്നു. മികച്ച വിജയത്തിന്‍റെ സന്തോഷത്തിലാണ് വിദ്യാർഥികൾക്കൊപ്പം സ്കൂൾ മാനേജ്മെന്‍റും അധ്യാപകരും നാട്ടുകാരുമെല്ലാം.

അട്ടപ്പാടിയിൽ എസ്എസ്എൽസി പരീക്ഷയിൽ മികച്ച വിജയം

അഗളി: അട്ടപ്പാടിയിൽ 806 കുട്ടികൾ എസ്എസ്എൽസി പരീക്ഷ എഴുതിയതിൽ 802 പേരും ഉപരിപഠനത്തിന് യോഗ്യത നേടി. ആകെ വിജയശതമാനം 99.5. അഗളി സർക്കാർ സ്കൂളിൽ 203 പേർ പരീക്ഷയ്ക്കിരുന്നതിൽ 202 പേരും ഉപരിപഠനത്തിന് യോഗ്യത നേടി. ഏഴു വിദ്യാർഥികൾ സമ്പൂർണഎ പ്ലസും കരസ്ഥമാക്കി. വിജയശതമാനം 99.51. അട്ടപ്പാടി എംആർഎസ് സ്കൂളിൽ 35 വിദ്യാർഥികൾ പരീക്ഷയെഴുതിയതിൽ രണ്ട് സമ്പൂർണ എ പ്ലസ് ഓടെ100% വിജയം വരിച്ചു. ഷോളയൂർ ഗവ. ഹൈസ്കൂളിൽ പരീക്ഷയ്ക്കിരുന്ന 74 കുട്ടികളും ഉപരിപഠനത്തിന് അർഹരായി. ഒരു സമ്പൂർണ എ പ്ലസും ലഭിച്ചു. മട്ടത്തുകാട് ജിടിഎച്ച്എസിൽ പരീക്ഷ എഴുതിയ 24 കുട്ടികളും പുതൂർ ജിടിഎച്ച്എസിൽ പരീക്ഷയെഴുതിയ 27 കുട്ടികളും വിജയിച്ച് 100 ശതമാനം ഉപരിപഠനത്തിന് യോഗ്യരായി. ജെല്ലിപ്പാറ മൗണ്ട് കാർമൽ സ്കൂളിൽ പരീക്ഷയെഴുതിയ 123 വിദ്യാർഥികളും വിജയംവരിച്ചു. 13 സമ്പൂർണ എ പ്ലസ് മൗണ്ട് കാർമൽ സ്കൂൾ കരസ്ഥമാക്കി. കൂക്കംപാളയം സെന്‍റ് പീറ്റേഴ്സ് സ്കൂളിൽ 153 വിദ്യാർഥികൾ പരീക്ഷയെഴുതിയതിൽ152 പേരും ഉപരിപഠനത്തിന് യോഗ്യത നേടി 99.51% വിജയം കൈവരിച്ചു. 12 സമ്പൂർണ എ പ്ലസും നേടി. കോട്ടത്തറ ആരോഗ്യമാത സ്കൂളിൽ പരീക്ഷ എഴുതിയ 108 വിദ്യാർഥികളിൽ 106 പേരും ഉപരിപഠനത്തിന് അർഹരായി. വിജയശതമാനം 98.14. ഒരു സമ്പൂർണഎ പ്ലസും സ്കൂളിന് ലഭിച്ചു.എഎഎച്ച്എസ് ചിണ്ടക്കി, ബദനി ഇംഗ്ലീഷ് മീഡിയം സ്കൂൾ എന്നിവ 100% വിജയം നേടി. ചിണ്ടക്കിയിൽ 31 വിദ്യാർഥികളും ബഥനിയിൽ 28 വിദ്യാർഥികളുമാണ് പരീക്ഷയ്ക്കു മാറ്റുരച്ചത്.

മലയോരമേഖലയ്ക്ക് അഭിമാനമായി മംഗലംഡാം ലൂർദ്മാത

മംഗലംഡാം: മലയോര മേഖലക്ക് അഭിമാനമായി മംഗലംഡാം ലൂർദ് മാതാഹയർ സെക്കൻഡറി സ്കുളിന് ഇക്കുറിയും എസ്എസ്എൽസി പരീക്ഷയിൽ മിന്നും വിജയം. പരീക്ഷ എഴുതിയ 225 പേരും ഉപരി പഠനയോഗ്യത നേടി. 21 പേർക്ക് ഫുൾ എ പ്ലസുമുണ്ട്. ഒമ്പത് വിഷയങ്ങളിൽ എപ്ലസ് നേടി സ്കൂളിന്‍റെ സൽപ്പേര് കൂട്ടാൻ പതിനൊന്ന് പേർ ഒപ്പമുണ്ട്. ഒരു കുട്ടി ഒരു വിഷയത്തിൽ തോറ്റതിനെ തുടർന്ന് സ്കൂളിൻന്‍റെ നൂറ് മേനിയുടെ ഹാട്രിക് സ്വപ്നത്തിന് 2022 ൽ മങ്ങലേല്പിച്ചിരുന്നു.എന്നാൽ അതിന്‍റെ ക്ഷീണം തീർത്ത് തുടർന്നുള്ള വർഷങ്ങളിൽ നൂറിൽ നൂറ് ആവർത്തിച്ച് മലയോരത്തെ ഈ അക്ഷരാലയം വർധിത ഉയിരോടെ വലിയ വിജയയാത്ര തുടരുകയാണ്. തിളക്കമാർന്ന വിജയത്തിനു പിന്നിൽ കൂട്ടായ പ്രവർത്തനഫലമാണെന്ന് ഹെഡ്മിസ്ട്രസ് സിസ്റ്റർ ജോസി ടോം പറഞ്ഞു. സ്കൂളിന്‍റെ ആറ് പതിറ്റാണ്ട് കാലത്തെ ചരിത്രം തിരുത്തിക്കുറിച്ച് 2020 ലാണ് ആദ്യമായി നൂറുമേനി കൊയ്തത്. അതിനു പിന്നാലെ കുറവുകളെ മികവുകളാക്കി 2021 ലും വിജയഗാഥ തീർത്തു. 2019 ൽ 98 ശതമാനമായിരുന്നു വിജയം. 2018 ലും 2015 ലും മൂന്ന് കുട്ടികളുടെ തോൽവിയിലാണ് നൂറുമേനി കൈവിട്ടത്. മലയോര മേഖലയിലെ വളരെ പരിമിതമായ സൗകര്യങ്ങളുള്ള വീടുകളിൽ നിന്നും ആദിവാസി മേഖലയിൽ നിന്നുമുള്ള കുട്ടികളാണ് ഇവിടെ പഠിക്കുന്നത്. ഇതിനാൽ വിദ്യാർഥികൾക്കൊപ്പം അധ്യാപകരുടെയും രക്ഷിതാക്കളുടെയും നാട്ടുകാരുടെയും കൂട്ടായ പ്രയത്ന ഫലങ്ങളുണ്ട് വിജയങ്ങൾക്കെല്ലാം പിന്നിൽ. മലയോര മേഖലയുടെ അക്ഷരവെളിച്ചമായി ഉയർന്നു നിൽക്കുന്ന സ്കൂൾ വിജയ മികവുകളിൽ തിളങ്ങുമ്പോൾ സ്കൂൾ അധികൃതർക്കൊപ്പം മലയോരമൊന്നാകെ ആഹ്ലാദത്തിലാണ്.

വടക്കഞ്ചേരി ചെറുപുഷ്പം സ്കൂളിന് ഇക്കുറി പുതുചരിത്രം

വടക്കഞ്ചേരി: ചെറുപുഷ്പം ഗേൾസ് ഹയർ സെക്കൻഡറി സ്കൂൾ ഇക്കുറി പുതിയ ചരിത്രം കുറിച്ചാണ് എസ്എസ്എൽസി പരീക്ഷാഫലത്തെ വരവേറ്റിട്ടുള്ളത്. സ്കൂൾ ചരിത്രത്തിൽ തന്നെ ഇതാദ്യമായി 441 കുട്ടികൾ പരീക്ഷ എഴുതി മുഴുവൻ പേരും വിജയിച്ച് നൂറ് ശതമാനത്തോടെയാണ് മിന്നും വിജയം നേടിയിട്ടുള്ളതെന്ന് ഹെഡ്മിസ്ട്രസ് സിസ്റ്റർ ശോഭാ റോസ് പറഞ്ഞു. 93 പേർക്ക് ഫുൾ എപ്ലസുമുണ്ട്. കഴിഞ്ഞ വർഷം 364 പേർ പരീക്ഷ എഴുതി ഉപരിപഠന യോഗ്യത നേടിയിരുന്നു. 2023 ൽ നൂറ് മേനി വിജയം കൊയ്യുമ്പോൾ 421 കുട്ടികളാണ് പരീക്ഷ എഴുതിയത്. 98 ഫുൾ എപ്ലസുകാരുമുണ്ടായിരുന്നു.എന്നാൽ ഈ നമ്പറും മറികടന്നാണ് ഇത്തവണ ഉപജില്ലയിൽ തന്നെ ഏറ്റവും കൂടുതൽ കുട്ടികളെ പരീക്ഷക്കിരുത്തി മികച്ച വിജയം നേടാൻ സ്കൂളിന് കഴിഞ്ഞത്. 2021 ലും ഫുൾ എപ്ലസുക്കാരുടെ എണ്ണത്തിൽ വൻ വർധനവ് സ്കൂളിൽ ഉണ്ടായിരുന്നു. 410 പേർ പരീക്ഷ എഴുതി 249 പേർക്ക് ഫുൾ എപ്ലസ് കിട്ടിയത് ചരിത്രമായിരുന്നു. എന്നാൽ ഒരു കുട്ടി പരീക്ഷ എഴുതാതിരുന്നതിനെ തുടർന്ന് 2021 ൽ 100 ശതമാനം വിജയം കൈവിട്ടു. 2022 ലും സ്കൂളിന് നൂറുമേനിയായിരുന്നു. 400 പേർ പരീക്ഷ എഴുതി മുഴുവൻ പേരും വിജയിച്ചു. 90 പേർക്ക് ഫുൾ എ പ്ലസും ലഭിച്ചിരുന്നു. വിദ്യാഭ്യാസ ഉപജില്ലയിൽ തന്നെ എയ്ഡഡ് മേഖലയിൽ ഏറ്റവും കൂടുതൽ ഫുൾ എ പ്ലസ് എന്ന നേട്ടമുണ്ടാക്കിയ സ്കൂളുകളുടെ പട്ടികയിൽ മുന്നിൽ ഇക്കുറിയും ചെറുപുഷ്പമാകും. ഏറ്റവും കൂടുതൽ കുട്ടികൾ പരീഷ എഴുതി വിജയിച്ച വിദ്യാലയം എന്ന അംഗീകാരഗണത്തിലും ചെറുപുഷ്പം സ്ഥാനം പിടിക്കും. 2020 ലും സ്കൂളിന് നൂറ് മേനിയുണ്ടായിരുന്നു. 2015 ലും അതിനു മുമ്പും ചെറുപുഷ്പം നൂറുമേനിയുടെ തിളക്കം ആഘോഷിച്ചിട്ടുണ്ട്. 2021, 2019, 2018, 2017, 2016 എന്നീ വർഷങ്ങളിൽ ഒരു കുട്ടിയുടെ തോൽവിയിൽ സ്കൂളിന് നൂറ് ശതമാനം നഷ്ടപ്പെടുന്ന സ്ഥിതിയുണ്ടായി.

കല്ലൻതോട്ടിൻ പന്നിക്കൂട്ടത്തിനു മുന്നിൽ അകപ്പെട്ട ബൈക്ക് യാത്രികൻ രക്ഷപ്പെട്ടു

വണ്ടിത്താവളം: രാത്രിസമയത്ത് പന്നിക്കൂട്ടത്തിന് മുന്നിൽ അകപ്പെട്ട ബൈക്ക് യാത്രികൻ ഭാഗ്യം തുണച്ചതിനാൽ രക്ഷപ്പെട്ടു. കല്ലന്തോട് സ്വദേശി ടി. വെങ്കിടേഷാണ് വ്യാഴാഴച രാത്രി വീട്ടിലേക്ക് ബൈക്കിൽ പോവുന്നതിനിടെ റോഡിലെത്തിയ പന്നിക്കൂട്ടത്തിനു മുന്നിൽ അകപ്പെട്ടത്. റോഡിൽ ഇവ നിൽക്കുന്നതു ദൂരെനിന്നും കണ്ടതിനാൽ വണ്ടി നിർത്തി ജാഗ്രത പാലിച്ചു. പന്നികൾ റോഡിൽ നിന്നും വയലുകളിലേക്ക് ഇറങ്ങിയ ശേഷമാണ് ബൈക്ക് ഓടിച്ച് വീട്ടിലെത്തിയത്. ഈ സമയത്ത് എതിരെ വന്ന കാർ പന്നിക്കൂട്ടത്തെ കണ്ട് പുറകോട്ട് മാറ്റിനിർത്തി. ആലാംകടവ് പുഴയിൽ കുറ്റിച്ചെടികളിൽ തമ്പടിച്ച പന്നികൾ രാത്രിയാവുമ്പോൾ റോഡിലും സമീപവീടുകളിലേക്കും കയറിവരുന്നത് പതിവാണ്. പുഴയിൽ നിന്നും കോരിയാർച്ചള്ള വരെയുള്ള പ്രദേശം രാത്രിയായാൽ വന്യമൃഗഭീഷണിയിലാണ്.

എന്‍റെ കേരളം പ്രദർശന-വിപണനമേള ഇന്നു സമാപിക്കും

പാലക്കാട്: സംസ്ഥാന സർക്കാരിന്‍റെ നാലാം വാർഷികത്തോടനുബന്ധിച്ച് സ്റ്റേഡിയം ബസ് സ്റ്റാന്‍റിന് സമീപത്തെ മൈതാനത്ത് കഴിഞ്ഞ ഒരാഴ്ചയായി നടക്കുന്ന എന്‍റെ കേരളം പ്രദർശന-വിപണനമേളയ്ക്ക് ഇന്ന് സമാപനം. വിവിധ വകുപ്പുകളുടെ ശീതീകരിച്ച 250 ഓളം സ്റ്റാളുകൾ മേളയുടെ ഭാഗമായി. എംപ്ലോയ്മെന്‍റ് എക്സ്ചേഞ്ചിന്‍റെ നേതൃത്വത്തിൽ തൊഴിൽമേള, വനിത ശിശു വികസന വകുപ്പിന്‍റെ നേതൃത്വത്തിൽ കുട്ടികൾക്കും കൗമാരക്കാർക്കുമായി സൗജന്യ കൗൺസിലിംഗ്, പോലീസ് ഡോഗ് ഷോ, കുടുംബശ്രീയുടെ നേതൃത്വത്തിൽ കൈമാറ്റചന്ത, ഫിഷ് സ്പാ, എ.ഐ പ്രദർശനവും ക്ലാസും, പാലക്കാടൻ രുചി വൈഭവങ്ങളോടുകൂടിയ ഫുഡ് കോർട്ട്, സൗജന്യ കുതിര സവാരി, ആധാർകാർഡ് എടുക്കാനും തെറ്റ് തിരുത്താനുൾപ്പെടെ അക്ഷയയുടെ പ്രത്യേക സ്റ്റാൾ, സഹകരണ വകുപ്പിന്‍റെ പുഷ്പമേള, വിലക്കുറവിൽ കർഷകർ ഉത്പാദിപ്പിക്കുന്ന ഉത്്പന്നങ്ങളുടെ പ്രദർശനം തുടങ്ങി വിവിധ വകുപ്പുകളുടെ വ്യത്യസ്തമായ സ്റ്റാളുകളായിരുന്നു മേളയുടെ പ്രധാന ആകർഷണം. സമാപന സമ്മേളനം വൈകീട്ട് ആറിന് മന്ത്രി എം.ബി രാജേഷ് ഉദ്ഘാടനം ചെയ്യും. മന്ത്രി കെ. കൃഷ്ണൻകുട്ടി അധ്യക്ഷനാവും. എംപിമാർ, എംഎൽഎമാർ, വിവിധ രാഷ്ട്രീയ പാർട്ടി നേതാക്കൾ, വകുപ്പ്തല ഉദ്യോഗസ്ഥർ എന്നിവർ പങ്കെടുക്കും.

കാട്ടാനക്കലിയടങ്ങാതെ കരിമ്പാറ കൽച്ചാടി മേഖല

നെന്മാറ: അയിലൂർ പഞ്ചായത്തിലെ കരിമ്പാറ, കൽച്ചാടി മേഖലയിൽ തുടർച്ചയായ ദിവസങ്ങളിൽ കാട്ടാനക്കൂട്ടം ഇറങ്ങി കൃഷിനാശവും സ്വൈര്യജീവിതത്തിന് തടസവും ഉണ്ടാക്കുന്നു. കഴിഞ്ഞരാത്രിയിൽ മരുതംചേരി യു. ഷാജഹാന്‍റെ ചള്ളയിലുള്ള കൃഷിയിടത്തിൽ എത്തിയ കാട്ടാനക്കൂട്ടം എട്ടു തെങ്ങുകളും നിരവധി ഫലവൃക്ഷങ്ങൾ, കമ്പിവേലി, വേലിക്കാലുകൾ തുടങ്ങിയവ നശിപ്പിച്ചു. സമീപത്തെ കർഷകരായ പൂഞ്ചേരികളം ചെന്താമരാക്ഷൻ (കുഞ്ഞൻ), കല്യാണക്കണ്ടം കെ. ബാലചന്ദ്രൻ, വീപ്പനാടൻ ജോർജ് തുടങ്ങിയ കർഷകരുടെ കൃഷിയിടങ്ങളിലൂടെ നടന്ന കാട്ടാനക്കൂട്ടം വാഴ, ഫലവൃക്ഷങ്ങൾ, കുരുമുളക് താങ്ങുമരങ്ങൾ, ഈറമ്പന എന്നിവ നശിപ്പിച്ച് വ്യാപകനാശം ഉണ്ടാക്കി. കഴിഞ്ഞ രണ്ടുമാസമായി തുടർച്ചയായി ഈ മേഖലകളിൽ കാട്ടാനകൾഎത്തി സ്ഥിരമായി കൃഷിനാശം വരുത്തുന്നത് പതിവായി. കാട്ടാനകളെ പേടിച്ച് മേഖലയിലെ പല വീടുകളിൽ നിന്നും ആളുകൾ താമസംമാറി തുടങ്ങി. നെന്മാറ വനം ഡിവിഷനിലെ നെല്ലിയാമ്പതി വനംറേഞ്ചിൽപ്പെട്ട തിരുവഴിയാട് സെക്ഷനിൽ ഉൾപ്പെടുന്ന പ്രദേശമാണ് സ്ഥിരമായി കാട്ടാന ഉൾപ്പെടെയുള്ള വന്യമൃഗങ്ങൾ കൃഷിനാശം വരുത്തുന്ന ഇവിടം. ചൊവ്വാഴ്ച വൈകുന്നേരംതന്നെ വനമേഖലയോട് ചേർന്ന് കാട്ടാനകളുടെ സാന്നിധ്യം അറിഞ്ഞ പ്രദേശവാസികൾ വനംഅധികൃതരെ വിവരം അറിയിച്ചതിനെ തുടർന്ന് വാച്ചർമാരായ ബാലൻ, റഷീദ് എന്നിവരുടെ നേതൃത്വത്തിൽ സ്ഥലത്തെത്തി രാത്രി 7 നു തുടങ്ങി 9 വരെ പടക്കം പൊട്ടിച്ച് ആനയെ പ്രതിരോധിച്ചിരുന്നു. എന്നാൽ അർധരാത്രിയോടെ കാട്ടാനക്കൂട്ടം ചള്ള ഭാഗത്ത്കൂടെ കൃഷിയിടങ്ങളിലേക്ക് വീണ്ടും എത്തിയാണ് നാശം ഉണ്ടാക്കിയത്. ബുധനാഴ്ച രാവിലെ കൃഷിയിടങ്ങളിൽ നിന്നും മടങ്ങിയ കാട്ടാനക്കൂട്ടം കൽച്ചാടി ഒലിപ്പാറ ബ്രാഞ്ച് കനാലിന് സമീപമുള്ള ഈറമ്പനകളും റോഡിലേക്ക് തള്ളിയിട്ട് തിന്നുനശിപ്പിച്ചിട്ടുണ്ട്. രാവിലെ ആറരയോടെ കനാൽ ബണ്ട് റോഡിലൂടെ വരികയായിരുന്ന കൽച്ചാടി നഗറിലെ ആദിവാസി യുവാവ് മമ്മുവിനെ കാട്ടാനകൾ ഓടിച്ചു. സമീപത്തെ കൃഷിയിടങ്ങളിലൂടെ ഓടി രക്ഷപ്പെടുകയായിരുന്നു എന്ന് യുവാവ് പറഞ്ഞു. കഴിഞ്ഞദിവസം കൽച്ചാടി മേഖലയിൽ റബർ ടാപ്പിംഗിന് പോയ തൊഴിലാളികളായ മോളത്ത് എൽദോസ്, ഭാര്യ സൂസി എന്നിവരെയും കാട്ടാനകൾ ഏറെ ദൂരം തുരത്തി ഓടിച്ചിരുന്നു. ഇരുവരും മറ്റു തോട്ടങ്ങളിലൂടെ ഓടി ജീവനും കൊണ്ട് രക്ഷപ്പെടുകയായിരുന്നു. രാവിലെ പ്രദേശവാസികൾ അറിയിച്ചതിനെത്തുടർന്ന് വനം വാച്ചർമാർ സ്ഥലത്്എത്തി പടക്കം പൊട്ടിച്ച് കാട്ടാനയെ വനമേഖലയിലേക്ക് തുരത്തി. സൗരോർജ തൂക്കുവേലി നിർമാണം ആരംഭിച്ചില്ല നെന്മാറ, അയിലൂർ, വണ്ടാഴി പഞ്ചായത്തുകളിലെ മലയോരമേഖലകളിൽ വന്യമൃഗങ്ങൾ കൃഷിയിടങ്ങളിൽ എത്തുന്നത് തടയുന്നതിനായി കേന്ദ്ര-സംസ്ഥാന സർക്കാരുകളുടെ രണ്ടുകോടി 20 ലക്ഷം രൂപയുടെ ഫണ്ട് ഉപയോഗിച്ച് 27 കിലോമീറ്റർ ദൂരം കൃഷിവകുപ്പ് മുഖേന പ്രഖ്യാപിച്ച സൗരോർജ തൂക്കുവേലിയുടെ നിർമാണം മേഖലയിൽ ആരംഭിച്ചില്ല. തൂക്കുവേലി നിർമാണത്തിനായുള്ള സാമഗ്രികൾ തിരുവഴിയാട് സെക്ഷനിലെ കരിങ്കുളത്ത് എത്തിച്ചിട്ട് മാസങ്ങളായെങ്കിലും തൂക്കുവേലിയുടെ നിർമാണം ആരംഭിച്ചിട്ടില്ല. കരാർ ലഭിച്ചവർ കൊല്ലങ്കോട് വനം റേഞ്ചിൽപെട്ട സ്ഥലത്ത് നിർമാണം നടത്തുകയാണ് എന്നും അത്കഴിഞ്ഞാൽ ഉടൻ ആരംഭിക്കുമെന്നും പറയുന്നു. മേഖലയിലെ സൗരോർജവേലികൾ പ്രവർത്തിക്കാത്തത് കാട്ടാനകൾ ഉൾപ്പെടെയുള്ള വന്യമൃഗങ്ങൾ കൃഷിയിടങ്ങളിൽ വരുന്നതിന് സഹായമായി. നിലയിൽ മലയോര മേഖലയോട് ചേർന്നുള്ള കരിമ്പാറ, കൽച്ചാടി, നിരങ്ങാൻപാറ, ചള്ള, പൂഞ്ചേരി പ്രദേശങ്ങളിലെ സൗരോർജവേലിയുടെ പ്രവർത്തനവും കാര്യക്ഷമമല്ല. മിക്ക സ്ഥലങ്ങളിലും വേലി കാട്ടാന ഉൾപ്പെടെയുള്ളവ ചവിട്ടി നശിപ്പിച്ചിരിക്കുകയാണ്. ചില സ്ഥലങ്ങളിൽ കാടുകയറി നശിക്കുകയും ചെയ്തിട്ടുണ്ട്. വൈദ്യുതവേലി പരിപാലനത്തിന് വനംവകുപ്പ് ആവശ്യമായ ഫണ്ട് അനുവദിക്കാത്തതും പരിപാലനത്തിന് ജീവനക്കാരില്ലാത്തതും മേഖലയിലെ വേലികളുടെ പ്രവർത്തനം കാര്യക്ഷമമല്ലാതാകാൻ കാരണമായതായി കർഷകർ ചൂണ്ടിക്കാണിക്കുന്നു. വനംവകുപ്പ് സ്വന്തം ഫണ്ട് ഉപയോഗിച്ച് ഒലിപ്പാറ, നേർച്ചപ്പാറ, ഓവുപാറ മേഖലകളിൽ കുറച്ചുസ്ഥലത്ത് സൗരോർജ തൂക്കുവേലി നിർമിച്ചതിനാൽ ഇവ ഇല്ലാത്ത ഭാഗങ്ങളിലേക്ക് മുഴുവൻ വന്യജീവികളും എത്താൻ വഴിയൊരുക്കി. സൗരോർജതൂക്കുവേലി നിർമാണം ആരംഭിച്ചതായി നെല്ലിയാമ്പതി റേഞ്ച് ഫോറസ്റ്റ് ഓഫീസർ ഷെരീഫ് അറിയിച്ചു. മൂന്നു പഞ്ചായത്തുകളിലായി നടത്തുന്ന തൂക്കുവേലി നിർമാണം പോത്തുണ്ടി സെക്ഷനു കീഴിൽ കഴിഞ്ഞ ദിവസങ്ങളിലായി ആരംഭിച്ചതായും 300 മീറ്ററോളം ദൂരം തൂക്കുവേലിക്കുള്ള തൂണുകൾ സ്ഥാപിക്കുന്നത് പുരോഗമിക്കുന്നുണ്ടെന്നും പറഞ്ഞു. നിലവിലുള്ള സൗരോർജവേലി അറ്റകുറ്റപ്പണികളും നടത്തുന്നുണ്ടെന്നും അദ്ദേഹം പറഞ്ഞു. കൽച്ചാടി മേഖലയിൽ എത്തുന്ന കാട്ടാനകളെ ഉൾവനത്തിലേക്ക് കയറ്റിവിടുന്നുണ്ടെന്നും ആവശ്യമായ പ്രതിരോധ സംവിധാനങ്ങൾ പ്രദേശത്ത് ഒരുക്കുമെന്നും അറിയിച്ചു. ദ്രുതപ്രതികരണസേനയുടെ സേവനം പ്രഖ്യാപനത്തിൽ മാത്രം നെന്മാറ വനം ഡിവിഷനിൽ രണ്ടുവർഷം മുമ്പ് പ്രഖ്യാപിച്ച ദ്രുത പ്രതികരണ സേന (ആർആർടി) രൂപീകരണം പ്രഖ്യാപനത്തിൽ ഒതുങ്ങി. ഡിവിഷനിലെ വിവിധ പ്രദേശങ്ങളിൽ നിന്ന് ജീവനക്കാരെ ഡെപ്യൂട്ടേഷനിൽ നിയമിച്ചാണ് നെന്മാറ കേന്ദ്രമായി ആർആർടി യുടെ പ്രവർത്തനം ആരംഭിക്കാൻ ഉത്തരവായത്. സ്ഥിരം ജീവനക്കാരെ നിയമിക്കാത്തത് ആർആർടി സേവനം ആരംഭിക്കുന്നതിന് തടസമായി. നെന്മാറ എംഎൽഎ, ആലത്തൂർ എംപി എന്നിവരുടെ പ്രാദേശിക വികസനഫണ്ടിൽ നിന്നും ആർആർടികൾക്ക് പ്രത്യേക വാഹനങ്ങൾ നൽകിയെങ്കിലും ഇരുവാഹനങ്ങളും കൊല്ലങ്കോട്, ലത്തൂർ വനംറേഞ്ചുകളിലെ പ്രവർത്തനങ്ങൾക്കായി വിട്ടുനൽകി. വനംവകുപ്പിന്‍റെ ആയുധം ഇപ്പോഴും പടക്കം വിവിധ വന്യജീവികളുടെ ഭീഷണിമൂലം പുറത്തിറങ്ങാൻ കഴിയാതെ വനംവകുപ്പിന് വിവരം അറിയിച്ചാൽ വാച്ചർമാർ സ്ഥലത്തെത്തി പടക്കങ്ങൾ പൊട്ടിച്ച് ശബ്ദമുണ്ടാക്കി ജനങ്ങളെ സമാധാനിപ്പിച്ച് മടങ്ങുന്ന സ്ഥിതിയാണ് ഇപ്പോഴുമുള്ളത്. കൃഷിനാശം വരുത്തി പകൽ മടങ്ങുന്ന കാട്ടാനക്കൂട്ടം ഉൾപ്പെടെയുള്ളവരുടെ പിന്നാലെ അല്പസമയം നടന്ന് പടക്കം പൊട്ടിച്ച് വനത്തിലേക്ക് കയറ്റി അയച്ചു എന്ന സ്ഥിരം മറുപടിയിൽ ജനങ്ങളെ സമാധാനിപ്പിക്കുകയാണ് സ്ഥിരം വനംവകുപ്പിന്‍റെ സ്ഥിരം പരിപാടിയെന്ന് പ്രദേശവാസികൾ ആരോപിച്ചു. ആന, പുലി, കാട്ടുപന്നി, മാൻ, മയിൽ, കുരങ്ങ്, മലയണ്ണാൻ തുടങ്ങിയവ വ്യാപകമായി കൃഷിനാശം വരുത്തുമ്പോൾ കർഷകന് നോക്കിനിൽക്കാൻ മാത്രമേ കഴിയുന്നുള്ളൂ.

പാലക്കാട് വനംഡിവിഷനിൽ ഏർലി വാണിംഗ് സിസ്റ്റം ഉദ്ഘാടനംചെയ്തു

പാലക്കാട്: നിർമിതബുദ്ധി സാങ്കേതികവിദ്യ ഉപയോഗിച്ച് പ്രവർത്തിക്കുന്ന ഏർലി വാണിംഗ് സിസ്റ്റം മനുഷ്യ-വന്യജീവി സംഘർഷ പരിഹാരത്തിലേക്കുള്ള മികച്ച കാൽവെപ്പാണെന്ന് വനം-വന്യജീവി വകുപ്പ് മന്ത്രി എ.കെ. ശശീന്ദ്രൻ പറഞ്ഞു. മനുഷ്യ വന്യജീവി സംഘർഷം എന്ന സംസ്ഥാനത്തെ വലിയൊരു സാമൂഹ്യപ്രശ്നത്തിന് പരിഹാരം കാണാൻ ഈ സംവിധാനത്തിന് സാധിക്കുമെന്നും മന്ത്രി പറഞ്ഞു. വനാതിർത്തികളിൽ വന്യജീവികളുടെ സാന്നിധ്യം മുൻകൂട്ടി അറിയുന്നതിനും മനുഷ്യ-വന്യജീവി സംഘർഷം ലഘൂകരിക്കുന്നതിനുമായി പാലക്കാട് ഫോറസ്റ്റ് ഡിവിഷനിൽ നടപ്പാക്കിയ ഏർലി വാർണിംഗ് സിസ്റ്റം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ഈ സംവിധാനം ഫലപ്രദമാണെന്ന് കണ്ടാൽ തീർച്ചയായും സമാനമായ പ്രശ്നങ്ങളുള്ള മേഖലയിലേക്ക് വ്യാപിപ്പിക്കുക എന്ന നിലപാടാണ് സർക്കാരിനുള്ളതെന്നും മന്ത്രി കൂട്ടിച്ചേർത്തു. കാട്ടിലെ മൃഗങ്ങളെയെല്ലാം ഇല്ലാതാക്കി വന്യജീവി സംഘർഷം അവസാനിപ്പിക്കാമെന്ന് ആരും ചിന്തിക്കുമെന്ന് തോന്നുന്നില്ല. കാട്ടിലെ മൃഗങ്ങളും കാടും പുഴയും അരുവിയും എല്ലാം ഉണ്ടെങ്കിലേ പ്രകൃതിയും ഉള്ളൂ എന്ന തിരിച്ചറിവുള്ളവരാണ് ജനസമൂഹം. മന്ത്രി പറഞ്ഞു. പാലക്കാട് ഡിവിഷണൽ ഫോറസ്റ്റ് ഓഫീസ് കോന്പൗണ്ടിൽ നടന്ന പരിപാടിയിൽ എ. പ്രഭാകരൻ എംഎൽഎ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ മുഖ്യാതിഥിയായി. ജില്ലാ പഞ്ചായത്ത് അംഗം വി.കെ. ജയപ്രകാശ്, മലന്പുഴ ബ്ലോക്ക് പഞ്ചായത്ത് വൈസ് പ്രസിഡന്‍റ് എൽ. ഇന്ദിര, പുതുപ്പരിയാരം, അകത്തേത്തറ, മുണ്ടൂർ ഗ്രാമപഞ്ചായത്ത് പ്രസിഡന്‍റുമാരായ പി.ആർ. ബിന്ദു, സുനിത അനന്തകൃഷ്ണൻ, എം.വി. സജിത, വന്യജീവി വിഭാഗം ഉത്തരമേഖല ഫോറസ്റ്റ്സ് ചീഫ് കണ്‍സർവേറ്ററും പാലക്കാട് ഈസ്റ്റേണ്‍ സർക്കിൾ ഫോറസ്റ്റ്സ് ചീഫ് കണ്‍സർവേറ്റർ കൂടിയായ ടി. ഉമ, ചീഫ് വൈൽഡ് ലൈഫ് വാർഡൻ കൂടിയായ അഡീഷണൽ പ്രിൻസിപ്പൽ ചീഫ് കണ്‍സർവേറ്റർ ഓഫ് ഫോറസ്റ്റ്. പ്രമോദ് ജി. കൃഷ്ണൻ, ഡിവിഷണൽ ഫോറസ്റ്റ് ഓഫീസർ ജോസഫ് തോമസ്, മറ്റ് ജനപ്രതിനിധികൾ, വകുപ്പ് ഉദ്യോഗസ്ഥർ, ജനപ്രതിനിധികൾ തുടങ്ങിയവർ പങ്കെടുത്തു. ഏർലി വാർണിംഗ് സിസ്റ്റം ജനവാസ മേഖലയിലേക്ക് വന്യമൃഗങ്ങൾ ഇറങ്ങുന്നതിന് മുന്പ് വനാതിർത്തികളിൽ വന്യമൃഗങ്ങൾ എത്തുന്ന അവസരത്തിൽ തന്നെ മുൻകൂട്ടി അറിവ് ലഭിക്കുന്നതിന് വേണ്ടിയാണ് നിർമിതബുദ്ധിയുടെ സഹായത്തോടെ ഏർലി വാർണിംഗ് സംവിധാനം സജ്ജമാക്കിയിരിക്കുന്നത്. ഏത് പ്രതികൂല സാഹചര്യത്തിലും രാത്രിയിലും പകലും പ്രവൃത്തിക്കുന്നതും 500 മുതൽ 1200 മീറ്റർ വരെ ദൂരപരിധിയിൽ സഞ്ചാരപഥത്തിലുള്ള ആന, പുലി മുതലായ വന്യജീവികളുടെ സാനിധ്യം മനസിലാക്കാൻ കഴിയുന്നതുമായ അത്യാധുനിക തെർമൽ കാമറകളും നൈറ്റ് വിഷൻ കാമറകളും ഉൾപ്പടെയുള്ള പെരിമീറ്റർ ഇൻട്രൂഷൻ ഡിറ്റക്ഷൻ സാങ്കേതികവിദ്യയാണിത്. ഇവ ഉപയോഗിച്ച് വന്യജീവികളുടെ വിവരങ്ങൾ ശേഖരിക്കുകയും അവ കേന്ദ്രീകൃത കണ്‍ട്രോൾ റൂമിലെത്തിച്ച് നിർമിതബുദ്ധിയുടെ സഹായത്തോടെ വിശകലനം ചെയ്യുകയും ഈ വിവരം നിമിഷങ്ങൾക്കുള്ളിൽ ജനങ്ങളെ അറിയിക്കാൻ സാധിക്കുന്ന സംവിധാനമാണ് ഏർലി വാർണിംഗ്് സിസ്റ്റം. പാലക്കാട് ഫോറസ്റ്റ് ഡിവിഷന് കീഴിലെ ഒലവക്കോട്, വാളയാർ റേഞ്ച് പരിധികളിലെ പരുതിപ്പാറ, മായാപുരം എന്നിവിടങ്ങളിലാണ് കാമറകൾ സ്ഥാപിച്ചിരിക്കുന്നത്.

സേവ് മണ്ണാർക്കാടിന്‍റെ സൗജന്യ ഉച്ചഭക്ഷണവിതരണം

മണ്ണാർക്കാട്: കഴിഞ്ഞ എട്ട് വർഷങ്ങളായി സേവ് മണ്ണാർക്കാട് ചാരിറ്റബിൾ ട്രസ്റ്റ് താലൂക്ക് ആശുപത്രിയിൽ എല്ലാ ബുധനാഴ്ചകളിലും സൗജന്യ ഉച്ചഭക്ഷണം വിതരണം ചെയ്തു വരുന്നു. കഴിഞ്ഞദിവസത്തെ ഉച്ചഭക്ഷണത്തിന്‍റെ വിതരണത്തിന്‍റെ ചുമതല സേവ് മണ്ണാർക്കാടിന്‍റെ കുട്ടിക്കൂട്ടത്തിലെ വിദ്യാർഥികൾക്കായിരുന്നു. അവർക്ക് ഈദിനം ഓർമയിൽ എന്നും തങ്ങിനിൽക്കുന്ന സന്തോഷത്തിന്‍റെ മുഹൂർത്തങ്ങളാണ് സമ്മാനിച്ചത്. ഇല്ലാത്തവന് ദാനം നൽകുന്നതിന്‍റെ മഹത്വം കുട്ടികളെ ബോധ്യപ്പെടുത്തുകയും പ്രേരിപ്പിക്കുകയും ചെയ്യുക എന്നതായിരുന്നു സൗജന്യ ഉച്ചഭക്ഷണ വിതരണത്തിന് കുട്ടികളെ ചുമതലപ്പെടുത്തിയതിന്‍റെ ലക്ഷ്യമെന്ന് സംഘാടകര്‍ പറഞ്ഞു. രോഗികൾക്കും കൂട്ടിരിപ്പുകാർക്കുമായി ഭക്ഷണം സ്പോൺസർ ചെയ്തത് സേവ് മണ്ണാർക്കാട് മെംബറും ആയുർവേദ ഡോക്ടറുമായ ഷിബു തന്‍റെ അമ്മയുടെ ഓർമദിനത്തോടനുബന്ധിച്ചായിരുന്നു. സേവ് മണ്ണാർക്കാട് കുട്ടിക്കൂട്ടം അംഗങ്ങളായ അഹമ്മദ് നാസിം, ഫൈഹ ഫാത്തിമ, ഫാത്തിമ റുഫൈദ, ഷാൻ കൂടാതെ സേവ് മണ്ണാർക്കാട് ഭാരവാഹികളായ റംഷാദ്, ഫക്രുദ്ദീൻ, പ്രവർത്തകസമിതി അംഗങ്ങളായ ഹബീബി, എൻ.ടി. നാസർ എന്നിവരാണ് ഭക്ഷണവിതരണത്തിന് നേതൃത്വം നൽകിയത്.

മഹിളാ സാഹസ് യാത്രയ്ക്കു പട്ടഞ്ചേരിയിൽ സ്വീകരണം നൽകി

വണ്ടിത്താവളം: മഹിളാ കോൺഗ്രസ് സംസ്ഥാന അധ്യക്ഷ ജെബി മേത്തർ എംപി നയിക്കുന്ന മഹിളാസാഹസ് കേരള യാത്രയ്ക്ക് പട്ടഞ്ചേരിയിൽ സ്വീകരണം നൽകി. സാഹസ് യാത്രയുടെ അഞ്ഞൂറാം സ്വീകരണകേന്ദ്രമായ പട്ടഞ്ചേരി ആൽത്തറയിൽ കേക്ക് മുറിച്ചാണ് ജാഥയെ സ്വീകരിച്ച ത്. ഡിസിസി അധ്യക്ഷൻ എ. തങ്കപ്പൻ കേക്ക് മുറിച്ച് ജാഥ ക്യാപ്റ്റൻ ജെബി മേത്തർ എംപിക്കു നൽകി. കെപിസിസി സെക്രട്ടറി കെ.എ. തുളസി ഉദ്ഘാടനം ചെയ്തു. മഹിളാ കോൺഗ്രസ് മണ്ഡലം പ്രസിഡന്‍റ് ധനലക്ഷ്മി അധ്യക്ഷത വഹിച്ചു. സംസ്ഥാന വൈ സ് പ്രസിഡന്‍റ് രജനി, സെക്രട്ടറിമാരായ ജയലക്ഷ്മി ദത്തൻ, സ്വപ്ന രാമചന്ദ്രൻ, പുണ്യ കുമാരി, കവിത മണികണ്ഠൻ, ജില്ലാ പ്രസിഡന്‍റ് സിന്ധു രാധാകൃഷ്ണൻ, ഡിസിസി ഉപാധ്യക്ഷൻ സുമേഷ് അച്യുതൻ, മുൻ എംപി രമ്യ ഹരിദാസ്, കെ.എ. ഷീബ, ബ്ലോക്ക് കോൺഗ്രസ് പ്രസിഡന്‍റ് സച്ചിദാനന്ദ ഗോപാലകൃഷ്ണൻ, പട്ടഞ്ചേരി പഞ്ചായത്ത് അധ്യക്ഷൻ പി.എസ്. ശിവദാസ്, മണ്ഡലം പ്രസിഡന്‍റ് എസ്. പ്രദീപ്, ഉപാധ്യക്ഷ അനിലാ മുരളീധരൻ, പഞ്ചായത്ത് അംഗങ്ങളായ കെ. ചെമ്പകം, എസ്. സുകന്യ രാധാകൃഷ്ണൻ തുടങ്ങിയവർ പ്രസംഗിച്ചു. മീനാക്ഷിപുരത്തും കോൺഗ്രസ് പ്രവർത്തകർ സ്വീകരണം നൽകി.

പ്ലസ് ടു പൊതുപരീക്ഷാഫലം പ്രസിദ്ധീകരിച്ചു: കോയന്പത്തൂർ ജില്ല നാലാംസ്ഥാനത്ത്

കോയന്പത്തൂർ: തമിഴ്‌നാട് പ്ലസ് ടു പൊതുപരീക്ഷാഫലം പ്രസിദ്ധീകരിച്ചു. ചെന്നൈയിലെ കോട്ടൂർപുരത്തുള്ള അണ്ണാ സെന്‍റിനറി ലൈബ്രറി ഓഡിറ്റോറിയത്തിൽ സ്കൂൾ വിദ്യാഭ്യാസമന്ത്രി അൻബിൽ മഹേഷ് പൊയ്യമോഷിയാണ് പൊതുപരീക്ഷാഫലം പുറത്തിറക്കിയത്. കഴിഞ്ഞ വർഷത്തെ അപേക്ഷിച്ച് ഈ വർഷം പ്ലസ് ടു പൊതുപരീക്ഷയിലെ വിജയശതമാനം വർധിച്ചു. കഴിഞ്ഞ വർഷം 94.56 ശതമാനം വിദ്യാർഥികൾ വിജയിച്ചപ്പോൾ ഈ വർഷം 95.03 ശതമാനം പേർ വിജയിച്ചു. 753142 പേർ വിജയിച്ചു. പ്ലസ് ടു പൊതു പരീക്ഷയിൽ പരാജയപ്പെട്ടവർക്കുള്ള സപ്ലിമെന്‍ററി പരീക്ഷകൾ ജൂൺ 25 മുതൽ ആരംഭിക്കുമെന്നും സപ്ലിമെന്‍ററി പരീക്ഷകളുടെ പരീക്ഷാ ഷെഡ്യൂൾ നാളെ പ്രസിദ്ധീകരിക്കുമെന്നും സ്കൂൾ വിദ്യാഭ്യാസ വകുപ്പ് അറിയിച്ചു. വിദ്യാർഥികൾക്ക് അവർ പഠിക്കുന്ന സ്കൂൾ വഴി സപ്ലിമെന്‍ററി പരീക്ഷയ്ക്ക് അപേക്ഷിക്കാമെന്ന് അറിയിച്ചിട്ടുണ്ട്. സപ്ലിമെന്‍ററി പരീക്ഷ എഴുതാൻ ആഗ്രഹിക്കുന്ന വിദ്യാർഥികൾക്ക് 14 മുതൽ 31 വരെ അപേക്ഷിക്കാം. സ്വകാര്യ ഉദ്യോഗാർഥികൾക്ക് സർക്കാർ പരീക്ഷാ സേവനകേന്ദ്രങ്ങളിൽ അപേക്ഷിക്കാം. 13 മുതൽ 17 വരെ വിദ്യാർഥികൾക്ക് അവർ പഠിച്ച സ്കൂളുകളിൽ നിന്ന് ഉത്തരക്കടലാസുകളുടെ പകർപ്പുകൾക്ക് അപേക്ഷിക്കാം. കോയന്പത്തൂർ ജില്ല നാലാം സ്ഥാനത്ത് കോയന്പത്തൂർ: പ്ലസ് ടു പരീക്ഷാഫലം പുറത്തുവന്നപ്പോൾ 97.48% വിജയത്തോടെ കോയമ്പത്തൂർ ജില്ല സംസ്ഥാനത്ത് നാലാം സ്ഥാനത്ത്. ജില്ലയിലെ 363 സ്കൂളുകളിൽ നിന്നായി 35,037 വിദ്യാർഥികൾ (16,135 ആൺകുട്ടികളും 18,902 പെൺകുട്ടികളും) പരീക്ഷയിൽ പങ്കെടുത്തു. അവരിൽ 34,155 വിദ്യാർഥികൾ (15,579 ആൺകുട്ടികളും 18,576 പെൺകുട്ടികളും) വിജയിച്ചു. ആൺകുട്ടികളുടെ വിജയശതമാനം 96.55 ഉം പെൺകുട്ടികളുടേത് 98.28 ഉം ആണ്. കോയമ്പത്തൂർ ജില്ലയിൽ 180 സ്കൂളുകൾ 100 ശതമാനം വിജയം നേടി. തമിഴ്നാട്ടിൽ 98.82 ശതമാനം വിജയം നേടി അരിയലുർ ജില്ല ഒന്നാംസ്ഥാനത്തും, 97.98 ശതമാനം വിജയം നേടി ഈറോഡ് രണ്ടാം സ്ഥാനത്തും 97.53 ശതമാനം വിജയം നേടി തിരുപ്പൂർ ജില്ല മൂന്നാംസ്ഥാനത്തുമാണ്. കോയമ്പത്തൂർ സെൻട്രൽ ജയിലിലെ പ്ലസ് ടു പൊതുപരീക്ഷ എഴുതിയ എല്ലാ തടവുകാരും വിജയിച്ചു. ജയിലിലെ തടവുകാരിൽ 23 പേർ ഈ വർഷം പ്ലസ് ടു പൊതുപരീക്ഷ എഴുതിയിരുന്നു. ഇതിൽ ഭാസ്‌കർ എന്ന തടവുകാരൻ 448 മാർക്ക് നേടി തടവുകാരുടെ പട്ടികയിൽ ഒന്നാമതെത്തി. ഹരികൃഷ്ണൻ 430 മാർക്കുമായി രണ്ടാം സ്ഥാനവും തുളസി ഗോവിന്ദരാജൻ 429 മാർക്കുമായി മൂന്നാം സ്ഥാനവും നേടി. തമിഴ്‌നാട്ടിലെ ജയിലുകളിലായി 140 തടവുകാർ പ്ലസ് ടു പൊതുപരീക്ഷ എഴുതി. ഇതിൽ 130 പേർ വിജയിച്ചു.

മന്ത്രി ഒ.ആർ. കേളു തുടിക്കോട് ഉന്നതി സന്ദർശിച്ചു

കല്ലടിക്കോട്: മൂന്ന് കുട്ടികൾ മുങ്ങിമരിച്ച കരിമ്പ മൂന്നേക്കർ തുടിക്കോട് ഗോത്രവർഗ ഉന്നതിയിൽ മന്ത്രി ഒ.ആർ. കേളു സന്ദർശനംനടത്തി. കുരുന്നുകളുടെ അകാല വിയോഗത്തിൽ ദു:ഖാർത്തരായ പ്രകാശൻ - അനിത, തമ്പി - മാധവി ദമ്പതികളെ മന്ത്രി ആശ്വസിപ്പിച്ചു. ഇന്നലെ വൈകുന്നേരം 5.30 ഓടെ തുടിക്കോട് ഉന്നതിയിലെത്തിയ മന്ത്രി ഇവിടെ കഴിയുന്ന ആദിവാസി കുടുംബങ്ങളുടെ ജീവിതസാഹചര്യങ്ങൾ വിലയിരുത്തി. ഉന്നതിയിലെ കുട്ടികളുടെ വിദ്യാഭ്യാസം ഉറപ്പുവരുത്തുന്നതിനൊപ്പം പാർപ്പിടം, ശുചിമുറി, ശുദ്ധജല ലഭ്യത തുടങ്ങിയ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള നടപടി സ്വീകരിക്കുമെന്നും ജില്ലാ പട്ടികവർഗ വികസന ഓഫീസറുടെ റിപ്പോർട്ട് ലഭിക്കുന്നതനുസരിച്ച് മരണമടഞ്ഞ കുട്ടികളുടെ മാതാപിതാക്കൾക്ക് ദുരന്തനിവാരണ സമിതി മുഖാന്തരമുള്ള ധനസഹായമുൾപ്പടെയുള്ള കാര്യങ്ങൾ ഉറപ്പുവരുത്തുമെന്നും മന്ത്രി പറഞ്ഞു. കെ. ശാന്തകുമാരി എംഎൽഎ, കരിമ്പ ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ, സിപിഎം മണ്ണാർക്കാട് ഏരിയാ സെക്രട്ടറി എൻ.കെ. നാരായണൻകുട്ടി, ജില്ലാ പട്ടികവർഗ വികസനഓഫീസർ ഷമീന തുടങ്ങിയവർ മന്ത്രിക്കൊപ്പമുണ്ടായിരുന്നു.

വികസിതകേരളം കേരള കോണ്‍ഗ്രസിന്‍റെ ലക്ഷ്യം: റോഷി അഗസ്റ്റിൻ

പാലക്കാട്: മലയോരവാസികളുടെയും തീരദേശവാസികളുടെയും കർഷകന്‍റേയും കർഷക തൊഴിലാളിയുടേയും സന്തുലിതമായ സമഗ്രവികസനം ആണ് കേരള കോണ്‍ഗ്രസ് ലക്ഷ്യമിടുന്നത് എന്ന് മന്ത്രി റോഷി അഗസ്റ്റിൻ പറഞ്ഞു. കേരള കോണ്‍ഗ്രസ്-എം പാർട്ടിയുടെ പ്രവർത്തനഫണ്ട് സമാഹരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കേരള കോണ്‍ഗ്രസ്-എം ജില്ലാ കമ്മിറ്റി അധ്യക്ഷൻ അഡ്വ.കെ. കുശലകുമാർ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി അഡ്വ. ജോസ് ജോസഫ്, സംസ്ഥാന സ്റ്റിയറിംഗ് കമ്മിറ്റി അംഗം കെ.എം. വർഗീസ്, സെക്രട്ടറിയേറ്റ് അംഗം എ. ശശിധരൻ, ഓഫീസ് ചാർജ് സെക്രട്ടറി തോമസ് ജോണ്‍ കാരുവള്ളി, ജനറൽ സെക്രട്ടറിമാരായ ജോസ് വി. ജോർജ്, ഐ.കെ. മത്തായി, യു. ഉണ്ണികൃഷ്ണൻ, പന്പാവാസൻ, ജില്ലാ ട്രഷറർ മധുദണ്ഡപാണി, കെടിയുസി സംസ്ഥാന സെക്രട്ടറി ആർ. സുരേഷ്, ജില്ലാ പ്രസിഡന്‍റ് എ. ഇബ്രാഹിം, വനിതാ കോണ്‍ഗ്രസ് ജില്ല പ്രസിഡന്‍റ്് പ്രേമകൃഷ്ണകുമാർ, യൂത്ത് ഫ്രണ്ട് സംസ്ഥാന സെക്രട്ടറിയേറ്റ് അംഗം ലയന എന്നിവർ പ്രസംഗിച്ചു.

മലയോരവാസികളുടെ പ്രശ്നങ്ങൾ അറിയാൻ വി.കെ. ശ്രീകണ്ഠൻ എംപി മീൻവല്ലം സന്ദർശിച്ചു

കല്ലടിക്കോട്: മെംബറുടെ ഭാഗ്യം, വെള്ളച്ചാട്ടം മാത്രമല്ല ഇടയ്ക്ക് ആനയും പുലിയും കാണാമല്ലോ എന്ന് തമാശരൂപേണ എംപി. വല്ലപ്പോഴുമല്ല എന്നും കാട്ടുമൃഗശല്യമാണ് സാറേ എന്ന് മെംബറും നാട്ടുകാരും. മീൻവല്ലം മലയോര നിവാസികളുടെ പ്രശ്നങ്ങൾ സർക്കാരുകളുടെ ശ്രദ്ധയിൽ കൊണ്ടുവരുമെന്ന് കാര്യങ്ങൾ മനസ്സിലാക്കിയ എംപി പറഞ്ഞു. മീൻവല്ലം ആറ്റ്‌ല നിവാസികളുടെ ക്ഷണം സ്വീകരിച്ച് പ്രദേശത്തുള്ളവരുടെ പ്രശ്നങ്ങൾ നേരിട്ടറിയാൻ എം പി സ്ഥലം സന്ദർശിക്കുകയായിരുന്നു. പദ്ധതി പ്രദേശത്തേക്കുള്ള പാലം, കാട്ടുമൃഗശല്യം, പ്രദേശത്തെ ടെലി കമ്യൂണിക്കേഷൻ സംവിധാനത്തിന്‍റെ അപര്യാപ്തത എന്നീ പ്രധാന പ്രശ്നങ്ങൾ എംപി യുടെ ശ്രദ്ധയിൽ പ്പെടുത്തി. പ്രദേശത്തുകാരുടെ വിവിധ കാര്യങ്ങൾ ചോദിച്ചറിഞ്ഞു. ജലവൈദ്യുതിപദ്ധതി പ്രദേശത്തേക്ക് എത്താൻ പുഴക്ക് കുറുകെ പാലം വേണമെന്നും വന്യമൃഗശല്യത്തിന് പരിഹാരം വേണമെന്നും നാട്ടുകാർ അവലോകനയോഗത്തിൽ പറഞ്ഞു. യുഡിഎഫ് നേതാക്കളായ ആൻറണി മതിപ്പുറം, യൂസഫ് പാലക്കൽ, എം.കെ. മുഹമ്മദ് ഇബ്രാഹിം, വി. കെ. ഷൈജു, കെ. ചന്ദ്രൻ, സി.എം. നൗഷാദ്, മാത്യു കല്ലടിക്കോട്, സാബു ജോസഫ്‌, മുഹമ്മദ് അസ്‌ലം, മുഹമ്മദ് നവാസ്, നൗഫൽ, ഷിനു ജോർജ്‌ തുടങ്ങിയവരും എംപി യോടൊപ്പം ഉണ്ടായിരുന്നു.

നെന്മാറ-ഒലിപ്പാറ റോഡിന്‍റെ ശോച്യാവസ്ഥ തുടരും

നെന്മാറ: നെന്മാറ-ഒലിപ്പാറ റോഡിന്‍റെ ദുരവസ്ഥയുമായി ബന്ധപ്പെട്ട പരാതികൾക്കും ആക്ഷേപങ്ങൾക്കും ഒടുവിൽ കേരള പിഡബ്ല്യുഡി എൻഎച്ച് വിഭാഗം ചീഫ് എൻജിനീയറും സംഘവും പരിശോധനയ്ക്കെത്തിയെങ്കിലും റോഡ്പണിയുടെ വേഗതയിൽ വലിയ പുരോഗതിയില്ലെന്ന് ആക്ഷൻ കമ്മിറ്റി. ഉദ്യോഗസ്ഥസംഘം വരുന്ന വിവരം അറിഞ്ഞ ആക്ഷൻ കമ്മിറ്റി ഭാരവാഹികളും നാട്ടുകാരും വർക്ക് സൈറ്റിലെത്തി. ഉദ്യോഗസ്ഥ സംഘം സഞ്ചരിച്ച വാഹനത്തിന് കൈ കാണിച്ചിട്ട് വാഹനം നിർത്താതെ പോയപ്പോൾ പിൻതുടർന്ന് വാഹനം തടഞ്ഞ്നിർത്തി ഉദ്യോഗസ്ഥരെ കാണേണ്ടിവന്നതിൽ ആക്ഷൻ കമ്മിറ്റി ഭാരവാഹികൾ പ്രതിഷേധിച്ചു. റോഡ്പണിയുടെ വേഗതക്കുറവ്, പണി നടക്കുന്ന സ്ഥലങ്ങളിൽ ആവശ്യത്തിന് സൂചനാബോർഡുകൾ ഇല്ലാത്തത്, റോഡ് പണിയുടെ ഭാഗമായി കുടിവെള്ള പൈപ്പ് പൊട്ടി പോകുന്ന കാര്യം, കുടിവെള്ള വിതരണത്തിനായി പത്തിലധികം ഭാഗങ്ങളിൽ റോഡ് ക്രോസ് ചെയ്ത് നടത്താൻ നിശ്ചയിച്ച പണികൾ വേഗം പൂർത്തീകരിക്കൽ തുടങ്ങിയ കാര്യങ്ങളിൽ പ്രദേശവാസികളുടെ ആശങ്കകൾ ഉദ്യോഗസ്ഥരെ അറിയിക്കുവാനാണ് ആക്ഷൻ കമ്മിറ്റി ഭാരവാഹികളും നാട്ടുകാരും എത്തിച്ചേർന്നത്. ടാറിംഗ് പണി 15നകം തുടങ്ങുമെന്ന് ചീഫ് എൻജിനീയർ അറിയിച്ചു. ആക്ഷൻ കമ്മിറ്റി ചെയർമാൻ കെ. രഘുകുമാർ, ജനറൽ കൺവീനർ എസ്.എം. ഷാജഹാൻ, എസ്. ഉമർ, റോയ് പുൽപ്ര, വി.എം. സ്കറിയ, കെ.ജി. രാഹുൽ എന്നിവർ പങ്കെടുത്തു.

ടാപ്പിംഗ് നിലച്ചിട്ടും റബർവില കുറഞ്ഞു

നെന്മാറ: റബർവില വീണ്ടും കൂപ്പുകുത്തി. നാലാം ഗ്രേഡ് റബർഷീറ്റ് 190 രൂപയിലേക്ക് വില താഴ്ന്നു. മാർച്ച് അവസാനം വില 207 രൂപ വരെയായി ഉയർന്നിരുന്നതാണ്. ക്രമേണ വില ഉയരും എന്ന പ്രതീക്ഷയിലായിരുന്നു കർഷകർ. വിഷു, ഈസ്റ്റർ ഉത്സവങ്ങളോട് അനുബന്ധിച്ച് കർഷകരുടെ കയ്യിൽ ശേഷിച്ച റബർ ഷീറ്റ് വില്പനയ്ക്ക് എത്തിയതോടെയാണ് വില ദിവസേന ഒന്നും രണ്ടും രൂപ ക്രമത്തിൽ താഴ്ന്നുതുടങ്ങിയത്. റബർ ഷീറ്റ് വിലകുറഞ്ഞതിന് അനുപാതകമായി ഒട്ടുപാലിന്‍റെ വിലയും 110 രൂപയിലേക്ക് താഴ്ന്നു. വേനൽ ശക്തമായി മാർച്ച് പകുതിയോടെ റബർ ടാപ്പിംഗ് നിലയ്ക്കുന്നതോടെ സാധാരണഗതികൾ റബർ വില ഉയരാറുള്ളതാണ്. ഇക്കുറി നേരെ വിപരീതഫലമാണ് വിലനിലവാരത്തിൽ ഉണ്ടായത്. 200 ൽ താഴേക്ക് വില ചുരുങ്ങാൻ തുടങ്ങിയതോടെ റബർ ഷീറ്റുകൾ സംഭരിച്ചുവെച്ച കർഷകരുടെ കയ്യിലെ ശേഷിച്ച റബറും വിറ്റുതുടങ്ങി. കാലവർഷം ആരംഭിക്കുന്നതിന് മുന്പായി റബർമരങ്ങളിൽ മഴമറ സ്ഥാപിച്ച് മഴക്കാലത്ത് ടാപ്പിംഗ് ആരംഭിക്കുന്നതിനായി പ്ലാസ്റ്റിക്, പശ തുടങ്ങിയവ വാങ്ങേണ്ട സ്ഥിതിയും ഇപ്പോൾ കർഷകർക്കുണ്ട്. ജൂൺ രണ്ടാം വാരത്തോടെ പ്ലാസ്റ്റിക് ഷേഡ് ഇട്ട് ടാപ്പിംഗ് ആരംഭിക്കുകയും ചെയ്താൽ പുതിയ വർഷത്തെ ഉത്പന്നം വിപണിയിൽ എത്തുകയും വീണ്ടും വില താഴും എന്ന ആശങ്കയും കർഷകർക്കുണ്ട്. റബർ വില 200ൽ താഴെ നിൽക്കുന്നത് തുടർന്നാൽ മഴക്കാലത്ത് ടാപ്പിംഗിന് കർഷകർ തയ്യാറാവാതെ ഇരിക്കുന്ന സ്ഥിതിയും ഉണ്ടാകും. റബർവില കുറഞ്ഞുനിൽക്കുന്നത് റബർ ഉത്പാദനത്തെ ബാധിക്കാൻ ഇടയുണ്ട്. റബർ ഉത്പാദനം വർധിപ്പിക്കുന്നതിനായി മഴക്കാല ടാപ്പിംഗ് ആരംഭിക്കുന്നതിനായി മഴമറ സ്ഥാപിക്കുന്നതിന് റബർ ബോർഡ് ഹെക്ടറിന് 4000 രൂപ സബ്സിഡി നൽകുമെന്ന് പ്രഖ്യാപിച്ചിട്ടുണ്ടെങ്കിലും മഴമറ സ്ഥാപിക്കാൻ കൂടുതൽ കർഷകർ മുന്നോട്ടു വന്നിട്ടില്ലെന്ന് റബർ ഉത്പാദകസംഘം ഭാരവാഹികൾ പറയുന്നു. 250 രൂപയെങ്കിലും താങ്ങുവില ലഭിക്കണമെന്ന കർഷകരുടെ ആവശ്യം സർക്കാർ നടപ്പാക്കിയിട്ടില്ല. രണ്ടാം പിണറായി സർക്കാർ താങ്ങുവിലയിലും വർധന വരുത്താത്തത് റബർ മേഖലയിൽ കനത്ത അസംതൃപ്തി ഉണ്ടാക്കിയിട്ടുണ്ട്.

സംസ്ഥാന പട്ടയമേളയിൽ കൂടുതൽ പട്ടയം നൽകിയത് പാലക്കാട് ജില്ലയിൽ

പാലക്കാട്: സംസ്ഥാന പട്ടയമേളയിൽ ഏറ്റവും കൂടുതൽ പട്ടയം നൽകിയത് പാലക്കാട് ജില്ലയിലാണ്. എൽടി 8486, എൽഎ 179, മിച്ചഭൂമി പട്ടയങ്ങൾ 325, വനാവകാശം 60 എന്നിങ്ങനെ ആകെ 9050 പട്ടയങ്ങളാണ് ജില്ലയിൽ വിതരണം ചെയ്തത്. ഉണ്ണിരാംകുന്ന് കുറ്റിക്കൽ വീട്ടിൽ ആമിന, കോങ്ങാട് പാറശേരി കുന്നത്ത് അംബിക ( ലാൻഡ് അസൈൻമെന്‍റ് പട്ടയം), കള്ളമല താണിച്ചുവട് നീലി (ലാൻഡ് ട്രിബ്യൂണൽ പട്ടയം), അഗളി നായ്ക്കർപാടി കാളിയമ്മാൾ (ലാൻഡ് ട്രിബ്യൂണൽ പട്ടയം), ചാലിശേരി മലയംപറന്പൽ സനിത, ഞാങ്ങാട്ടിരി പാടൻമാരിൽ ഉഷ, അങ്ങാടിദേശം ചോലയിൽ സുഹറ എന്നിവർ മുഖ്യമന്ത്രിയിൽ നിന്നും നേരിട്ട് പട്ടയം ഏറ്റു വാങ്ങി. ഇരുപത് കൗണ്ടറുകൾ പട്ടയ വിതരണത്തിനായി ഒരുക്കിയിരുന്നു. സംസ്ഥാനത്തിന്‍റെ ചരിത്രത്തിൽ തന്നെ രണ്ടാം ഗവണ്‍മെന്‍റ് പുതിയൊരു ചരിത്രം കുറിക്കുകയാണെന്നും കേരളചരിത്രത്തിൽ ഏറ്റവും കൂടുതൽ പട്ടയം വിതരണം ചെയ്യാൻ കഴിഞ്ഞു എന്ന ബഹുമതി നേടാൻ ഈ സർക്കാരിന് സാധിച്ചെന്നും റവന്യൂമന്ത്രി കെ.രാജൻ പറഞ്ഞു. സംസ്ഥാന പട്ടയമേളയിൽ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. എല്ലാവർക്കും പട്ടയം കൊടുക്കുവാൻ സാധ്യമായ എല്ലാ വഴികളിലൂടെയും ഗവണ്‍മെന്‍റ് സഞ്ചരിച്ചു വരുകയാണെന്നും മന്ത്രി പറഞ്ഞു. സംസ്ഥാനത്ത് എല്ലാവർക്കും പട്ടയം ലഭ്യമാക്കുക എന്ന ലക്ഷ്യത്തോടെ പട്ടയം മിഷൻ രൂപീകരിക്കുകയും സംസ്ഥാനത്തിലെ 140 മണ്ഡലങ്ങളിലും എംഎൽഎമാർ അധ്യക്ഷരായി മണ്ഡലത്തിലെ മുഴുവൻ ജനപ്രതിനിധികളെയും പങ്കാളികളാക്കിക്കൊണ്ട് റവന്യൂ അസംബ്ലിയും ചേരുവാൻ സംസ്ഥാന സർക്കാരിന് സാധിച്ചു. മൂന്ന് വില്ലേജുകളുടെ കൂടി ഡിജിറ്റൽ റീസർവേ പ്രകാരമുള്ള നടപടിക്രമങ്ങൾ ജൂണ്‍ മാസത്തിൽ ആരംഭിക്കുമെന്നും മന്ത്രി പറഞ്ഞു.

വികസനപദ്ധതികൾ സമയബന്ധിതമാക്കുന്ന തീരുമാനങ്ങളുമായി മേഖലാ അവലോകനയോഗം

പാലക്കാട്: തൃശൂർ, മലപ്പുറം, പാലക്കാട് ജില്ലകളിലെ വിവിധ വികസന പദ്ധതികൾക്ക് ഗതിവേഗം പകർന്ന് സമയബന്ധിതമാക്കുന്ന സുപ്രധാന തീരുമാനങ്ങളുമായി മുഖ്യമന്ത്രി പിണറായി വിജയന്‍റെയും മന്ത്രിമാരുടെയും നേതൃത്വത്തിൽ പാലക്കാട് നടന്ന മേഖലാതല അവലോകന യോഗം. വിവിധ കാരണങ്ങളാൽ വർഷങ്ങളായി മുടങ്ങിക്കിടന്ന പദ്ധതികളുടെ കുരുക്കഴിക്കാനും നിലവിൽ പുരോഗമിക്കുന്ന വികസനക്ഷേമ പദ്ധതികളുടെ വേഗം കൂട്ടാനും ആവശ്യമായ തീരുമാനങ്ങളും നടപടികളുമാണ് യോഗത്തിലുണ്ടായത്. ജില്ലയിലെ 19 പ്രധാനപ്പെട്ട വിഷയങ്ങൾ യോഗത്തിൽ ചർച്ചചെയ്തു. ജില്ലയിൽ പട്ടാന്പി, തൃത്താല നിയോജകമണ്ഡലത്തിലെ കൃഷിക്കാർക്ക് സൗകര്യപ്രദമായ പട്ടാന്പി തടയണ നിർമാണം നവംബർ മാസത്തോടെ പൂർത്തീകരിക്കും. ഭാരതപ്പുഴയിൽ 32.50 കോടി രൂപ ചെലവിൽ നിർമിക്കുന്ന പദ്ധതിയുടെ 80 ശതമാനം പ്രവൃത്തി പൂർത്തീകരിച്ചിട്ടുണ്ട്. ഇടതു വലതു കരയിലുള്ള റീറ്റെയ്നിംഗ് വാളിന്‍റെ നിർമാണവും ബ്ലോക്ക് അപ്രോണ്‍ന്‍റ്െ നിർമാണവും പുരോഗമിക്കുന്നു. കുറ്റിപ്പുറം-തൃത്താല-പട്ടാന്പി റോഡ് നവീകരണവുമായി ബന്ധപ്പെട്ട് സ്ഥലം ഏറ്റെടുപ്പ് നടപടികൾ വേഗത്തിലാക്കുന്നതിന് ജോയിന്‍റ് ഇൻസ്പെക്ഷൻ ഈ മാസം നടത്താനും യോഗത്തിൽ തീരുമാനമായി. ഭൂമി ഏറ്റെടുക്കലുമായി അലൈൻമെന്‍റ് കല്ലുകൾ സ്ഥാപിക്കുന്ന പ്രവൃത്തി പൂർത്തീകരിച്ചിട്ടുണ്ട്. കൂമൻതോട് ഭാഗത്ത് സംരക്ഷണഭിത്തി നിർമാണവുമായി ബന്ധപ്പെട്ട് അധികമായി വേണ്ടിവരുന്ന ഭൂമിയിൽകൂടി കല്ലിട്ട് ഉൾപ്പെടുത്തിയ സ്കെച്ച് 10നകം അന്തിമമായി തയ്യാറാക്കുമെന്നും ഉദ്യോഗസ്ഥർ യോഗത്തെ അറിയിച്ചു. കൂറ്റനാട് ടൗണ്‍ നവീകരണവുമായി ബന്ധപ്പെട്ട് സ്ഥലം ഏറ്റെടുക്കുന്ന നടപടികളും വേഗത്തിലാക്കും.നാഗലശേരി, പട്ടിത്തറ വില്ലേജുകളിൽ നിന്നായി ഏകദേശം 35 സെന്‍റ് ഭൂമി ഏറ്റെടുക്കണം. വാണിയംകുളം മായന്നൂർ റെയിൽവേ സ്റ്റേഷൻ റോഡ് പിഡബ്ല്യുഡി റോഡ് വിഭാഗം രണ്ടാം റീച്ച് പ്രവൃത്തിയിൽ പുതുക്കിയ സ്റ്റാറ്റസ് ഈ മാസം നൽകും. അട്ടപ്പാടി ട്രൈബൽ താലൂക്കിൽ വിവിധ സർവേ നടപടികൾ ത്വരിതപ്പെടുത്തുന്നതിന് ആവശ്യമായ നടപടികൾ സ്വീകരിക്കാൻ സർവേ ആൻഡ് ലാൻഡ് റെക്കോർഡ്സ് ഡയറക്ടറോട് നിർദേശിച്ചു.സർവേജോലികൾക്ക് ആവശ്യമായ സർവേയർമാരെ വിന്യസിക്കാൻ പാലക്കാട് സർവേ ഡെപ്യൂട്ടി ഡയറക്ടർക്കും നിർദേശം നൽകി.കിഴക്കഞ്ചേരി 2 വില്ലേജിലെ യുടിടി കന്പനിയിൽ നിന്നും സർക്കാർ ഏറ്റെടുത്ത മിച്ചഭൂമിയിലെ താമസക്കാർക്ക് നൽകാൻ തീരുമാനിച്ച പട്ടയം നൽകുന്നതിനായി ഡിജിറ്റൽ സർവേ വേഗത്തിലാക്കാനും യോഗത്തിൽ തീരുമാനിച്ചു. ഷൊർണൂരിൽ ബഹുനില വ്യവസായ സമുച്ചയമായ ഗാല പദ്ധതി ആരംഭിക്കുന്നതിന് വ്യവസായ സ്റ്റേറ്റിന്‍റെ ഡിസൈൻ, ഡ്രോയിംഗ് എന്നിവ എത്രയും പെട്ടെന്ന് കിറ്റ്കോ തയ്യാറാക്കി നൽകും. ഒറ്റപ്പാലം കോടതി സമുച്ചയ നിർമാണം ദ്രുതഗതിയിൽ ആരംഭിക്കുന്നതിനുള്ള നടപടി സ്വീകരിക്കുന്നതിന് നബാർഡുമായി ചർച്ച ചെയ്യാൻ യോഗത്തിൽ തീരുമാനമായി. പട്ടാന്പി റവന്യൂ ടവർ നിർമിക്കുന്നതിന് സാങ്കേതികാനുമതി ലഭ്യമായതിനാൽ ടെൻഡർ നടപടികൾ ഉടൻ സ്വീകരിക്കും. പാപ്കോസ് ആധുനിക റൈസ് മിൽ കണ്ണന്പ്ര പദ്ധതി പ്രദേശത്തിലേക്കുള്ള വഴിയും ആർഐഡിഎഫ് വായ്പയും ലഭ്യമാക്കുന്ന വിഷയം ഗൗരവമായി കാണണമെന്ന് മുഖ്യമന്ത്രി നിർദ്ദേശിച്ചു. പട്ടികവർഗ വികസന ഓഫീസിന് കീഴിൽ വരുന്ന മലന്പുഴ ആശ്രമം സ്കൂളിന് കളിസ്ഥലം ലഭ്യമാക്കുന്നതിന് എൻഒസി നൽകാനും യോഗത്തിൽ തീരുമാനമായി.

കാള കുറുകെചാടി സ്കൂട്ടറിൽനിന്നു വീണു പരിക്കേറ്റയാൾ മരിച്ചു

മണ്ണാർക്കാട്: തെങ്കരയിൽ കാള കുറുകെചാടി സ്കൂട്ടറിൽനിന്നു വീണു പരിക്കേറ്റയാൾ മരിച്ചു. തെങ്കര പുഞ്ചക്കോട് കളയംകോട്ടിൽ ചന്ദ്രൻ(57) ആണ് മരിച്ചത്. ബുധനാഴ്ച വൈകുന്നേരം അഞ്ചുമണിയോടെയാണ് സംഭവം. ഉടനേ നാട്ടുകാർ മണ്ണാർക്കാട് താലൂക്ക് ആശുപത്രിയിലും തുടർന്നു വട്ടമ്പലം സ്വകാര്യ ആശുപത്രിയിലും എത്തിച്ചു ചികിത്സ നൽകിയെങ്കിലും ഇന്നലെ പുലർച്ചെ നാലുമണിയോടെ മരിച്ചു. സംസ്കാരം നടത്തി. ഭാര്യ ശാന്ത. മക്കൾ: സന്ധ്യ, സച്ചു, സഞ്ജു. മരുമക്കൾ: രാമദാസ്, മഞ്ജു, സുവർണ.

അടിയന്തരസാഹചര്യങ്ങളെ നേരിടാൻ മോക്ഡ്രിൽ സംഘടിപ്പിച്ചു

പാലക്കാട്: പാക്കിസ്ഥാൻ അതിർത്തിയിലെ സംഘർഷങ്ങളുടെ പശ്ചാത്തലത്തിൽ ഏത് അടിയന്തര സാഹചര്യത്തേയും നേരിടാനും ജനങ്ങളുടെ സുരക്ഷിതത്വം ഉറപ്പാക്കുന്നതിനും ജില്ലയിൽ മോക്ക്ഡ്രിൽ നടന്നു. വൈകുന്നേരം നാലിന് ജില്ലാ ഭരണാകൂടത്തിന്‍റെ സിരാകേന്ദ്രമായ സിവിൽ സ്റ്റേഷൻ പരിസരത്ത് 90 സെക്കൻഡ് നീണ്ടുനിന്ന സൈറണ്‍ മുഴങ്ങിയതോടെ അപകട സാഹചര്യത്തെ എങ്ങനെ അതിജീവിക്കാമെന്ന് ഉദ്യോഗസ്ഥരടക്കം പൊതുജനങ്ങൾക്ക് നിർദേശം നൽകി. ജില്ലയിലെ വിവിധയിടങ്ങളിൽ സജ്ജീകരിച്ച കണ്‍ട്രോൾ റൂമുകളിലേക്ക് വ്യോമസേന നൽകുന്ന സന്ദേശത്തെ തുടർന്നായിരുന്നു സിവിൽ ഡിഫൻസ് സംവിധാനം സജ്ജമാക്കിയത്. ജില്ലാകളക്ടർ, ജില്ലാ പോലീസ് മേധാവി, ജില്ലാ ഫയർ ഓഫീസർ തുടങ്ങിയവരുടെ നേതൃത്വത്തിലായിരുന്ന മോക്ഡ്രിൽ നടന്നത്. യുദ്ധസമാന സാഹചര്യമുണ്ടായാൽ എങ്ങനെ ഇടപെടണമെന്ന് അറിയിക്കുന്നതാണ് മോക്ഡ്രിൽ. മോക്ഡ്രില്ലിനോടനുബന്ധിച്ച് മെഡിക്കൽ, ആംബുലൻസ് ഉൾപ്പെടെ സജ്ജമാക്കിയിരുന്നു. കേന്ദ്രസർക്കാരിന്‍റെ സുരക്ഷാ മുൻകരുതലിന്‍റെ ഭാഗമായി ജില്ലയിലെ അണക്കെട്ടുകളിലും സുരക്ഷ ഏർപ്പെടുത്തി. മലന്പുഴ, വാളയാർ, കാഞ്ഞിരപ്പുഴ, മംഗലംഡാം, പോത്തുണ്ടി, ശിരുവാണി, പറന്പിക്കുളം, മീങ്കര, ചുള്ളിയാർ ഡാമുകളിലാണ് പോലീസിനെ വിന്യസിച്ചിരിക്കുന്നത്. കഞ്ചിക്കോട് ഉൾപ്പെടെ കെഎസ്ഇബിയുടെ പവർ സ്റ്റേഷനുകളിലും പോലീസിനെ വിന്യസിച്ചിട്ടുണ്ട്. കേന്ദ്രത്തിന്‍റെ അറിയിപ്പ് ലഭിക്കുന്നത്‌വരെ സുരക്ഷ തുടരുമെന്ന് ജില്ലാകളക്ടർ അറിയിച്ചു.

എ.വി. മുകേഷ് അനുസ്മരണം

പാലക്കാട്: ജോലിക്കിടെ കാട്ടാനയുടെ ആക്രമണത്തിൽ കൊല്ലപ്പെട്ട മാതൃഭൂമി ന്യൂസ് സീനിയർ കാമറാമാൻ എ.വി. മുകേഷിനെ ഒന്നാം ചരമവാർഷികത്തിന്‍റെ ഭാഗമായി അനുസ്മരിച്ചു. പ്രസ്ക്ലബ്ബിൽ നടന്ന പരിപാടി മന്ത്രി കെ. കൃഷ്ണൻകുട്ടി ഉദ്ഘാടനം ചെയ്തു. വന്യമൃഗശല്യം പോലെ ജനങ്ങളെ ബാധിക്കുന്ന പ്രശ്നങ്ങൾ മാധ്യമങ്ങൾ കാന്പയിനായി ഏറ്റെടുക്കണമെന്ന് മന്ത്രി പറഞ്ഞു. ജനങ്ങളെ ബാധിക്കുന്ന പ്രശ്നങ്ങളും സമൂഹത്തിന്‍റെ അടിത്തട്ടിൽ നടക്കുന്ന പ്രശ്നങ്ങളും ചർച്ചയാകണം. വന്യമൃഗ ആക്രമണത്തിന് എന്താണ് പ്രതിവിധിയെന്ന് ആരും പറയുന്നില്ല. ഇക്കാര്യത്തിൽ നിയമവശങ്ങൾ പരിശോധിച്ച് നടപടിയെടുക്കണമെന്നും മന്ത്രി പറഞ്ഞു. എ.വി. മുകേഷിന്‍റെ സ്മരണയ്ക്കായി പാലക്കാട് പ്രസ് ക്ലബ് ഏർപ്പെടുത്തിയ പുരസ്കാരം മാതൃഭൂമി ന്യൂസ് തിരുവനന്തപുരം യൂണിറ്റ് കാമറാമാൻ എം.ആർ. അനൂപിന് മന്ത്രി കെ. കൃഷ്ണൻകുട്ടി സമ്മാനിച്ചു. 10,000 രൂപയും ഫലകവും പ്രശസ്തിപത്രവും ഉൾപ്പെടുന്നതാണ് പുരസ്കാരം. എൻ. സുസ്മിത അനുസ്മരണ പ്രഭാഷണം നടത്തി. പ്രസ്ക്ലബ് പ്രസിഡന്‍റ് നോബിൾ ജോസ് അധ്യക്ഷത വഹിച്ചു. കേരള പത്രപ്രവർത്തക യൂണിയൻ സംസ്ഥാന ജനറൽ സെക്രട്ടറി സുരേഷ് എടപ്പാൾ, പ്രസ്ക്ലബ് സെക്രട്ടറി എം. ശ്രീനേഷ്, ട്രഷറർ ടി.എസ്. മുഹമ്മദ് അലി, എംഎ പ്ലൈ ഫൗണ്ടേഷൻ സ്ഥാപകൻ നിഖിൽ കൊടിയത്തൂർ എന്നിവർ പ്രസംഗിച്ചു.

ട്രെയിനിടിച്ച് പശുക്കൾ നഷ്ടപ്പെട്ട അനന്തന് സഹായമെത്തിച്ച് വി.കെ. ശ്രീകണ്ഠൻ എംപി

മലന്പുഴ: കഴിഞ്ഞ ദിവസം ട്രെയിൻ തട്ടി ഒൻപതു കറവപ്പശുക്കൾ നഷ്ടപ്പെട്ട അനന്തന് സഹായഹസ്തവുമായി വി.കെ. ശ്രീകണ്ഠൻ എംപി. വാർത്ത അറിഞ്ഞ് അനന്തന്‍റെ കുടുംബത്തെ കാണാനെത്തിയ എംപി കഴിയുന്നസഹായം ചെയ്യാമെന്നു വാഗ്ദാനം നല്കിയിരുന്നു. തുടർന്ന് അഭ്യുദയകാംക്ഷികളായ സുഹൃത്തുക്കളോട് എംപി ഇക്കാര്യം സൂചിപ്പിക്കുകയും അവർ നല്കിയ മൂന്നു പശുക്കളേയും രണ്ടു കാളകളെയും അനന്തന്‍റെ കുടുംബത്തിനു കൈമാറുകയുമായിരുന്നു. നിർധനരായ അനന്തന്‍റെ കുടുംബത്തെ സഹായിക്കണമെന്ന് നാട്ടുകാരും എംപിയോട് ആവശ്യപ്പെട്ടിരുന്നു. ഇതിൽ ഒരു പശുവിനെ നല്കിയത് ഫൈവ് സ്റ്റാർ മെറ്റൽസ് ഗ്രൂപ്പ് മാധവനും രണ്ടു പശുക്കളെയും രണ്ടു കാളകളെയും നൽകിയത് അത്താച്ചി ഗ്രൂപ്പ് ഉടമ സുന്ദറുമാണ.് ഇന്നലെ ഈ വളർത്തുമൃഗങ്ങളെ എംപി മുഖാന്തരം അനന്തന്‍റെ വീട്ടിൽ എത്തിച്ചപ്പോൾ അനന്തന്‍റെ ഭാര്യയും മക്കളും മാത്രമല്ല ആ പ്രദേശത്തെ മുഴുവൻ ജനങ്ങളും ചടങ്ങിൽ പങ്കാളികളായി. കെപിസിസി സെക്രട്ടറി പി.വി. രാജേഷ്, യുഡിഎഫ് നേതാക്കളായ മണ്ഡലം കോണ്‍ഗ്രസ് പ്രസിഡന്‍റ് എ. ഷിജു, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് എം.സി. സജീവൻ, കെ. ശിവരാജേഷ്, ഹരിദാസ് മച്ചിങ്ങൽ, കെ.കെ. വേലായുധൻ, ഇ.വി. കോമളം, എം.ബി. സുരേഷ് കുമാർ, എം. പ്രേമകുമാരൻ, ശ്രീജിത്ത് ചെറാട്, ബി. ശ്രീകുമാർ, കെ.വെള്ള, തങ്കമണി ടീച്ചർ എന്നിവരും ചടങ്ങിൽ പങ്കെടുത്തു.

എന്‍റെ കേരളം പ്രദർശന വിപണനമേളയിൽ സെമിനാറുകൾ സംഘടിപ്പിച്ചു

പാലക്കാട്: സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി സ്റ്റേഡിയം ബസ് സ്റ്റാന്‍റിന് സമീപത്തെ മൈതാനത്ത് നടക്കുന്ന എന്‍റെ കേരളം പ്രദർശന വിപണന മേളയിൽ വിവിധ വകുപ്പുകൾ സെമിനാറുകൾ സംഘടിപ്പിച്ചു. രാവിലെ ഉപഭോക്തൃ ബോധവത്കരണം, പാചകവാതക സിലിണ്ടറുകൾ കൈകാര്യം ചെയ്യുന്പോൾ ശ്രദ്ധിക്കേണ്ട കാര്യങ്ങൾ, റേഷൻകടകൾ വഴി വിതരണം ചെയ്യുന്ന അരിയുടെ ഗുണങ്ങൾ തുടങ്ങിയ വിഷയങ്ങളിൽ സിവിൽ സപ്ലൈസ് വകുപ്പ് സെമിനാർ നടത്തി. സെമിനാറിൽ റിട്ട. ഡയറക്ടർ ഓഫ് പ്രോസിക്യൂഷൻ അഡ്വ. പ്രേംനാഥ്, ഭാരത് പെട്രോളിയം സെയിൽസ് ഓഫീസർ അരവിന്ദാക്ഷൻ, എഫ്സിഐ ഒലവക്കോട് ക്വാളിറ്റി കണ്‍ട്രോൾ ഡിവിഷൻ സിജുമോൻ എന്നിവർ സെമിനാറിൽ പ്രസംഗിച്ചു. ഗുണമേന്മ വിദ്യാഭ്യാസവും കേരള വികസനവും എന്ന വിഷയത്തിൽ പൊതുവിദ്യാഭ്യാസ വകുപ്പിന്‍റെ നേതൃത്വത്തിൽ ഉച്ചയ്ക്ക് സെമിനാർ നടത്തി. കെ. പ്രേംകുമാർ എംഎൽഎ സെമിനാർ ഉദ്ഘാടനം ചെയ്തു. സംസ്ഥാന വിദ്യാകിരണം അസിസ്റ്റന്‍റ് കോ-ഓർഡിനേറ്റർ ഡോ.സി. രാമകൃഷ്ണൻ വിഷയാവതരണം നടത്തി. വിദ്യാഭ്യാസ ഡയറക്ടർ പി. സുനിജ, പൊതുവിദ്യാഭ്യാസ വകുപ്പ് ജോയിന്‍റ് ഡയറക്ടർ എ. അബൂബക്കർ, ഡയറ്റ് പ്രിൻസിപ്പൽ പി. ശശിധരൻ, കൈറ്റ് ജില്ലാ കോ-ഓർഡിനേറ്റർ വൈ.സിന്ധു, വിദ്യാകിരണം ജില്ലാ കോ-ഓർഡിനേറ്റർ, കെ.എൻ. കൃഷ്ണകുമാർ, ഡിഇഒ ആസിഫ് അലിയാർ തുടങ്ങിയവർ പ്രസംഗിച്ചു.

വനാതിർത്തികളിലെ വന്യജീവികളുടെ സാന്നിധ്യം അറിയാനുള്ള പദ്ധതി ഉദ്ഘാടനം ഇന്ന്

പാലക്കാട്: ഡിവിഷനിൽ സ്ഥാപിക്കുന്ന ഏർലി വാർണിംഗ് സിസ്റ്റം ഇന്ന് വനംവകുപ്പ് മന്ത്രി എ.കെ. ശശീന്ദ്രൻ ഉദ്ഘാടനം ചെയ്യും. രാവിലെ ഒന്പതിന് പാലക്കാട് ഫോറസ്റ്റ് ഡിവിഷൻ ഓഫീസ് കോന്പൗണ്ടിലാണ് പരിപാടി. ജനവാസ മേഖലയിലേക്ക് വന്യമൃഗങ്ങൾ ഇറങ്ങുന്നതിന് മുന്പ് വനാതിർത്തികളിൽ വന്യമൃഗങ്ങൾ എത്തുന്പോൾതന്നെ മുൻകൂട്ടി അറിവ് ലഭിക്കുന്നതിനായി സ്ഥാപിക്കുന്നതാണ് ഏർലി വാർണിംഗ് സിസ്റ്റം. ഏത് പ്രതികൂല കാലാവസ്ഥയിലും രാത്രിയിലും പകലും പ്രവർത്തിക്കുന്നതും 500 മുതൽ 1200 മീറ്റർ വരെ ദൂരപരിധിയിൽ സഞ്ചാരപഥത്തിലുള്ള ആന, പുലി മുതലായ വന്യജീവികളുടെ സാന്നിധ്യം മനസിലാക്കാൻ കഴിയുന്നതുമായ അത്യാധുനിക തെർമൽ കാമറകളും, നൈറ്റ് വിഷൻ കാമറകളും ഉൾപ്പടെയുള്ള പെരിമീറ്റർ ഇന്‍ററുഷ്യൻ ഡിറ്റെക്ഷൻ സാങ്കേതിക വിദ്യയാണ് ഏർലി വാർണിംഗ് സിസ്റ്റം. ഈ സംവിധാനം ഉപയോഗിച്ച് വന്യജീവികളുടെ വിവരങ്ങൾ ശേഖരിക്കുകയും തുടർന്ന് ഒരു കേന്ദ്രീകൃത കണ്‍ട്രോൾ റൂമിലെത്തിക്കാനും നിർമിതബുദ്ധിയുടെ സഹായത്തോടെ വിശകലനം ചെയ്ത് പ്രാദേശിക ജനങ്ങളെ അറിയിക്കാനും സാധിക്കും. പാലക്കാട് ഡിവിഷന് കീഴിലെ യഥാക്രമം ഒലവക്കോട്, വാളയാർ റേഞ്ച് പരിധികളിലെ പരുത്തിപ്പാറ, മായാപുരം എന്നിവിടങ്ങിലാണ് കാമറകൾ സ്ഥാപിച്ചിട്ടുള്ളത്. പരിപാടിയിൽ എ. പ്രഭാകരൻ എംഎൽഎ അധ്യക്ഷനാകും. വി.കെ. ശ്രീകണ്ഠൻ എംപി, ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ എന്നിവർ മുഖ്യാതിഥികളാകും.

പനയംപാടം അപകടവളവിലെ പുനർനിർമാണം: എംപി ശാശ്വതപരിഹാരത്തിന് നിർദേശംനൽകി

കല്ലടിക്കോട്: ദേശീയപാതയിലെ പനയംപാടം അപകടവളവിലെ പുനർനിർമാണവുമായി ബന്ധപ്പെട്ട് സ്ഥലം സന്ദർശിച്ച എംപി ശാശ്വതപരിഹാരം കാണണമെന്ന് ഊരാളുങ്കൽ അധികാരികൾക്ക് നിർദേശം നൽകി. നിർമാണത്തിലെ അപാകതമൂലം നിരന്തരം ഉണ്ടാകുന്ന അപകടങ്ങൾ ഒഴിവാക്കുന്നതിന് വേണ്ടി നാഷണൽ ഹൈവേ അഥോറിറ്റി ഓഫ് ഇന്ത്യ അനുവദിച്ച 1.35 കോടി രൂപ ഉപയോഗിച്ച് നടപ്പാക്കുന്ന നിർമാണപ്രവൃത്തികൾ പ്രദേശത്തിന്‍റെ പ്രത്യേകതകൾക്കനുസരിച്ച് നിലവിലെ അപാകതകൾ പരിഹരിക്കുകയുംഅപകടമുണ്ടാവാത്ത വിധം ശാശ്വതപരിഹാരം കാണണമെന്നും വി.കെ. ശ്രീകണ്ഠൻ എംപി പറഞ്ഞു. ദുബായ്കുന്നു മുതൽ നിരവധി ഇടവഴികളിൽ നിന്നുള്ള വെള്ളം കുത്തനെ ഇറക്കമുള്ള റോഡിലേക്ക് പരന്ന് ഒഴുകി അപകടങ്ങൾ വർധിക്കുന്നുണ്ട്. റോഡിന്‍റെ ഇരുവശങ്ങളിലും വെള്ളം ഒഴുകിപോകുന്നതിന് ആവശ്യമായ ചാലുകൾ നിർമിക്കുക. റോഡിന്‍റെ ചെരിവ് നിരപ്പാക്കുക, റോഡിന്‍റെ ഉപരിതലം റീടാർ ചെയ്യുക തുടങ്ങിയ നിർദേശങ്ങളും അദ്ദേഹം നൽകി. യുഡിഎഫ് നേതാക്കളായ ആന്‍റണി മതിപ്പുറം, യൂസഫ് പാലക്കൽ, എം.കെ. മുഹമ്മദ് ഇബ്രാഹിം, വി.കെ. ഷൈജു, കെ. ചന്ദ്രൻ, സി.എം. നൗഷാദ്, മാത്യു കല്ലടിക്കോട്, മുഹമ്മദ് അസ് ലം, മുഹമ്മദ് നവാസ് തുടങ്ങിയവരും എംപി യോടൊപ്പം ഉണ്ടായിരുന്നു.

മണ്ണാർക്കാട് ഹോളി സ്പിരിറ്റ് ഫൊറോന പള്ളി സുവർണജൂബിലി ആഘോഷസമാപനം

മണ്ണാർക്കാട്: പെരിമ്പടാരി ഹോളി സ്പിരിറ്റ് ഫൊറോന പള്ളി സുവർണജൂബിലി ആഘോഷങ്ങളുടെ സമാപനം വർണാഭമാക്കുമെന്ന് സംഘാടകസമിതി പത്രസമ്മേളനത്തിൽ അറിയിച്ചു. ബിഷപ് എമരിറ്റസ് മാർ ജേക്കബ് മനത്തോടത്ത് ഒന്നാംതിയതി കൊടിയേറ്റ് നടത്തിയതോടെ ആഘോഷപരിപാടികൾക്ക് തുടക്കമായി. രണ്ടിന് അൾത്താരസംഘം സംഗമം, മൂന്നിന് കെസിവൈഎം യുവജനസംഗമം, ആനിമേറ്റേഴ്‌സ് മീറ്റ്, നാലിന് ആഘോഷമായ ദിവ്യകാരുണ്യ സ്വീകരണം, അഞ്ചിന് മതാധ്യാപക സംഗമം, കൈക്കാരന്മാരുടെ സംഗമം, ആറിന് കത്തോലിക്ക കോൺഗ്രസ് മാതൃവേദി സെന്‍റ് വിൻസന്‍റ് ഡിപോൾ സൊസൈറ്റി സംഗമം എന്നിവ നടന്നു. ഇന്ന് വൈകുന്നേരം 4.30ന് ചെറുപുഷ്പ മിഷൻ ലീഗ് തിരുബാലസഖ്യസംഗമം നടക്കും. ഫാ. ജോർജ് തെരുവൻകുന്നേൽ കാർമികത്വം വഹിക്കും. ഫാ. ജോജി വാവോലിൽ, ഫാ. ബിനു പൈനുങ്കൽ, ഫാ. സെബാസ്റ്റ്യൻ കക്കാട്ടിക്കാലയിൽ, ഫാ. ബിനു വടക്കേൽ എന്നിവർ സഹകാർമികത്വം വഹിക്കും. തുടർന്ന് രൂപം എഴുന്നള്ളിച്ച് വെക്കൽ. രാത്രി ഏഴിന് നാടകം. ഒന്പതിന് വൈകുന്നേരം 4.30ന് സമർപ്പിതസംഗമം നടക്കും. സിഎംഐ ജൂബിലേറിയൻ ഫാ. ജോൺസൺ വലിയകുളം കാർമികത്വം വഹിക്കും. ഫാ. സിബിൽ കരുത്തി സന്ദേശം നൽകും. തുടർന്ന് സ്നേഹവിരുന്ന്, ഇടവകദിന കലാവിരുന്ന് എന്നിവ നടക്കും. 10ന് രാവിലെ ഏഴിന് ആഘോഷമായ തിരുനാൾ കുർബാന, സന്ദേശം, വൈകുന്നേരം 4.45 ന് ലദീഞ്ഞ്, മണ്ണാർക്കാട് ടൗൺ കുരിശുപള്ളിയിൽ നിന്ന് പ്രദക്ഷിണം, ഏഴിന് കുരിശിന്‍റെ ആശീർവാദം തുടർന്ന് വാദ്യമേളങ്ങൾ, ആകാശ വിസ്മയം എന്നിവയുണ്ടാവും. രാത്രി എട്ടിന് മാജിക് ഷോ. സമാപന ദിവസമായ 11 ന് ഉച്ചയ്ക്കുശേഷം 2.15ന് ബിഷപ് മാർ പീറ്റർ കൊച്ചുപുരയ്ക്കലിന് സ്വീകരണം നൽകും. ആഘോഷമായ സുവർണജൂബിലി കുർബാന, പൊതുസമ്മേളനം, സ്നേഹവിരുന്ന് എന്നിവയുണ്ടാവും. ഇടവക വികാരി ഫാ. രാജു പുളിക്കത്താഴെ, അസിസ്റ്റന്‍റ് വികാരി ഫാ. അരുൺ വാളിപ്ലാക്കൽ, ജനറൽ കൺവീനർ ജോസ് വാകശേരി, കൈക്കാരൻ ജോൺ ജേക്കബ് ഇരട്ടെപറമ്പിൽ, ജോയിന്‍റ് കൺവീനർ സിജു കൊച്ചത്തിപറമ്പിൽ, പബ്ലിസിറ്റി കൺവീനർ ജയ്മോൻ കോമ്പേരിൽ, പബ്ലിസിറ്റി ജോയിന്‍റ് കൺവീനർ ജോഷി പള്ളിനീരായ്ക്കൽ എന്നിവർ പത്രസമ്മേളനത്തിൽ പങ്കെടുത്തു.

ശിരുവാണിഡാം അറ്റകുറ്റപ്പണികൾക്ക് 10 കോടി അനുവദിച്ച് കോർപറേഷന്‌

കോയമ്പത്തൂർ: നഗരത്തിലെ പ്രധാന ജലസ്രോതസായ ശിരുവാണി അണക്കെട്ടിന്‍റെ അറ്റകുറ്റപ്പണികൾക്ക് 10 കോടി അനുവദിച്ച് കോയന്പത്തൂർ കോർപറേഷൻ. കേരളത്തിലെ പാലക്കാട് ജില്ലയിൽ സ്ഥിതി ചെയ്യുന്ന 50 അടി ഉയരമുള്ള ശിരുവാണി അണക്കെട്ടാണ് കോയമ്പത്തൂരിലെ 100 വാർഡുകളിൽ 22 എണ്ണത്തിനും 28 ഗ്രാമങ്ങൾക്കും ഏഴു ടൗൺ പഞ്ചായത്തുകൾക്കും കുടിവെള്ളത്തിന്‍റെ സ്രോതസ്. തമിഴ്നാടിനാണ് ഡാമിന്‍റെ പരിപാലന ചുമതല. അണക്കെട്ടിലെ ജലച്ചോർച്ച കാരണം വൻതോതിൽ ജലനിരപ്പു കുറയുന്നതായി തമിഴ്നാട് അധികൃതർ കണ്ടെത്തിയിരുന്നു. നവീകരണം നടത്തി ജലനിരപ്പ് കൃത്യമായി നിലനിർത്താനാണ് തുക അനുവദിച്ചിട്ടുള്ളത്. ഈ വർഷം ആദ്യം സെൻട്രൽ വാട്ടർ ആൻഡ് പവർ റിസർച്ച് ഇൻസ്റ്റിറ്റ്യൂട്ട്, ചെന്നൈ ഐഐടി, തമിഴ്‌നാട് വാട്ടർസപ്ലൈ ആൻഡ് ഡ്രെയിനേജ് ബോർഡ്, കോയന്പത്തൂർ കോർപറേഷൻ, കേരള ജലവിഭവ വകുപ്പ് എന്നിവയുടെ വിദഗ്ധ സംഘങ്ങൾ ശിരുവാണി അണക്കെട്ട് സന്ദർശിച്ച് സ്ഥിതിഗതികൾ വിലയിരുത്തിയിരുന്നു.

അമരാവതി ഡാമിലെ ജലനിരപ്പ് താഴുന്നു

തിരുപ്പൂർ: നീരൊഴുക്കു ഗണ്യമായി കുറഞ്ഞതോടെ അമരാവതി അണക്കെട്ടിലെ ജലനിരപ്പ് താഴുന്നു. ജലനിരപ്പ് ഇപ്പോൾ 50 അടിയിൽ താഴെയായിട്ടുണ്ട്. ആകെ ഉയരം 90 അടിയാണ്. 9.3 ചതുരശ്ര കിലോമീറ്റർ വിസ്തൃതിയുള്ള റിസർവോയർ പ്രദേശത്ത് പലയിടത്തും മണൽക്കൂനകൾ കണ്ടുതുടങ്ങിയിട്ടുണ്ട്. തിരുപ്പൂർ, കരൂർ ജില്ലകളിലായി ഏകദേശം അന്പത്തിഅയ്യായിരം ഏക്കർ കൃഷിഭൂമിയിൽ അമരാവതി അണക്കെട്ടിൽ നിന്നുള്ള വെള്ളം ഉപയോഗിച്ച് ജലസേചനം നടത്തുന്നുണ്ട്. അണക്കെട്ടിന്‍റെ അടിത്തട്ടിൽ അടിഞ്ഞുകൂടിയ മണലും മറ്റു മാലിന്യവും നീക്കംചെയ്ത് സംഭരണശേഷി വർധിപ്പിക്കുന്നതിനു ഈ സാഹചര്യം ഉപയോഗപ്പെടുത്തണമെന്നു കർഷകർ അഭിപ്രായപ്പെട്ടു.

കോയമ്പത്തൂരിൽ ഇന്നു വൈദ്യുതി മുടങ്ങും

കോയന്പത്തൂർ: വിവിധ സബ്സ്റ്റേഷൻ പരിധികളിൽ ഇന്നുരാവിലെ ഒന്പതുമുതൽ വൈകുന്നേരം അഞ്ചുവരെ വൈദ്യുതി പൂർണമായോ ഭാഗികമായോ മുടങ്ങുമെന്നു അധികൃതർ അറിയിച്ചു. പൊതുപരീക്ഷകൾ നടക്കുന്നതിനാൽ മാർച്ചുമുതൽ അറ്റകുറ്റപ്പണികൾക്കായുള്ള വൈദ്യുതി മുടക്കം പിൻവലിച്ചിരുന്നു. ഇതാണ് ഇന്നുമുതൽ നടപ്പാക്കുന്നത്. പീളമേട് സബ്സ്റ്റേഷൻ പരിധിയിൽ ഇന്നു വൈദ്യുതി മുടങ്ങുന്ന സ്ഥലങ്ങൾ : ഭാരതി കോളനി, ഇളങ്കോ നഗർ, പുരാണി കോളനി, ശോഭ നഗർ, ഗണപതി ഇൻഡസ്ട്രിയൽ എസ്റ്റേറ്റ്, പോലീസ് ക്വാർട്ടേഴ്‌സ്, കൃഷ്ണരാജപുരം, അത്തിപ്പാളയം ഡിവിഷൻ, രാമകൃഷ്ണപുരം, ആവരംപാളയം, ഗണേഷ് നഗർ, വി.ജി. റാവു നഗർ, കാമത്തേനു നഗർ, കാമധേനു നഗർ, നെഹ്‌പിഎസ്‌ജി റോഡ് അറുമുഖം ലേഔട്ട്, ഇന്ദിരാ നഗർ, നവ ഇന്ത്യ, ഗോപാൽ നഗർ, പീളമേട് പുത്തർ, ബോർഡർ ഗാർഡൻ, വിഒസി, കോളനി, പികെടി നഗർ, അഖിലാണ്ഡേശ്വരി നഗർ, പുളിയകുളം, അമ്മൻ കുളം, ഭാരതി പുരം, പങ്കജ മിൽ, ദാമു നഗർ, ബാലസുബ്രഹ്മണ്യ നഗർ, ബാലഗുരു ഗാർഡൻ, സൗരിപാളയം, കൃഷ്ണ കോളനി, രാജാജി നഗർ, മീന എസ്റ്റേറ്റ്, ഒടിയംപാളയം, രാജീവ് ഗാന്ധി നഗർ, പാർസൺസ് അപ്പാർട്ടുമെൻ്റുകൾ, ശ്രീപതി നഗർ, കല്ലിമട, രാമനാഥപുരം റോഡ് നഗർ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]