ADVERTISEMENT

ADVERTISEMENT

സ്കൂൾ ഗ്രൗണ്ട് നവീകരണത്തിന്‍റെ ഉദ്ഘാടനം നടത്തി

വേലൂർ: തയ്യൂർ സ്കൂൾ ഗ്രൗണ്ട് നവീകരണത്തിന്‍റെ ഉദ്ഘാടനം നടത്തി. ജില്ലാ പഞ്ചായത്ത് മെംബർ ജലീൽ ആദൂർ ഉദ്ഘാടനം നിർവഹിച്ചു. പഞ്ചായത്ത്‌ പ്രസിഡന്‍റ് ടി.ആർ. ഷോബി, വികസനകാര്യ സമിതി ചെയർമാൻ സി.എഫ്. ജോയി, ബ്ലോക്ക്‌ പഞ്ചായത്ത് മെമ്പർ സ്വപ്ന റഷീദ്, വാർഡ് മെമ്പർ വിമല നാരായണൻ, പിടിഎ പ്രസിഡന്‍റ് ടി.ജെ. ജെയിംസ്, എസ്എംസി പ്രതിനിധി കെ.വി. രഘു, ഒഎസ്എ സെക്രട്ടറി ആൽഫ്രഡ്‌ തോമസ് തുടങ്ങിയവർ പങ്കെടുത്തു.

ADVERTISEMENT

ലഹരിക്കെതിരേ ബോധവത്കരണ ക്ലാസ് നടത്തി

കൊടുങ്ങല്ലൂർ: ഗവ. പി. ഭാസ്കരൻ മെമ്മോറിയൽ ഹയർ സെക്കൻഡറി സ്കൂളിൽ കൊടുങ്ങല്ലൂർ ലയൺസ് ക്ലബ് ലഹരിവിരുദ്ധ ബോധവത്‌കരണ കാന്പയിൻ നടന്നു. റിട്ട. എക്സൈസ് സർക്കിൾ ഇൻസ്പക്ടർ കെ.എം. അബ്ദുൾ ജമാൽ ബോധവത്‌കരണ ക്ലാസെടുത്തു. പിടിഎ പ്രസിഡന്‍റ് കൈസാ‌ബ്, മെമ്പർ ഉണ്ണി, സ്കൂൾ പ്രധാനാധ്യാപകൻ സുനിൽ, ലയൺസ് ക്ലബ്ബിന്‍റെ സോൺ ചെയർ‌പേഴ്സൺ എം.എൻ. പ്രവീൺ, ലയൺസ് ഡിസ്ട്രിക്ട് കോർ കാമ്പിനറ്റ് അംഗം ടി.ആർ. കണ്ണൻ, ട്രഷറർ ഒ.എസ്. ഷിമ്മി, സി.ഡി. ബുൾഹർ, വിൽസൺ ഇലഞ്ഞിക്കൽ, വി.ആർ. പ്രേമൻ, ഇ.ആർ. അനിരുദ്ധൻ, രജീഷ്, ബിജോയ്, സെലിൻ, നഷർബാൻ എന്നിവർ പ്രസംഗിച്ചു. ലയൺസ് പ്രസിഡന്‍റ് ബൽറാം മോഹൻ സ്വാഗതവും സെക്രട്ടറി കെ.എ. നഷർബാൻ നന്ദി യും പറഞ്ഞു.

റോഡുകളുടെ തകര്‍ച്ച; ബിജെപി ധര്‍ണ നടത്തി

ഇരിങ്ങാലക്കുട: കൂടല്‍മാണിക്യം ക്ഷേത്രത്തിന്‍റെ ചുറ്റിലും ഇരിങ്ങാലക്കുട നഗരത്തിലെ പ്രധാനറോഡുകളും തകര്‍ന്നുകിടക്കുന്നതില്‍ പ്രതിഷേധിച്ച് ബിജെപി ഇരിങ്ങാലക്കുട മണ്ഡലം കമ്മിറ്റിയുടെ നേതൃത്വത്തില്‍ ബസ് സ്റ്റാന്‍ഡ് പരിസരത്ത് പ്രതിഷേധ ധര്‍ണ നടത്തി. സൗത്ത് ജില്ല ജനറല്‍ സെക്രട്ടറി കെ.പി. ഉണ്ണികൃഷ്ണന്‍ ഉദ്ഘാടനം ചെയ്തു. മണ്ഡലം പ്രസിഡന്‍റ്് ആര്‍ച്ച അനീഷ് അധ്യക്ഷത വഹിച്ചു. ജില്ലാ ജനറൽ സെക്രട്ടറി കെ.കെ. കൃപേഷ്, മണ്ഡലം ജനറല്‍ സെക്രട്ടറിമാരായ ഷൈജു കുറ്റിക്കാട്ട്, വി.സി. രമേഷ് എന്നിവര്‍ പ്രസംഗിച്ചു. ജില്ലാ സെക്രട്ടറിമാരായ ശ്യാംജി, അജീഷ് പൈക്കാട്ട്, മണ്ഡലം ഭാരവാഹികളായ രമേഷ് അയ്യര്‍, അമ്പിളി ജയന്‍, ടി.കെ. ഷാജു, സെബാസ്റ്റ്യന്‍, ഏരിയ ഭാരവാഹികളായ ലിഷോണ്‍ ജോസ്, സൂരജ് കടുങ്ങാടന്‍, ബാബുരാജ്, സൂരജ് നമ്പ്യാങ്കാവ്, സന്തോഷ് കാര്യാടന്‍, ലാംബി റാഫേല്‍, നഗരസഭ കൗണ്‍സിലര്‍മാര്‍ എന്നിവര്‍ നേതൃത്വം നല്‍കി.

കിന്‍ഫ്ര പദ്ധതി: കേരള കോണ്‍ഗ്രസ് പ്രതിഷേധസംഗമം നടത്തി

ഇരിങ്ങാലക്കുട: ഇരിങ്ങാലക്കുട എംഎല്‍എ ആയിരുന്ന തോമസ് ഉണ്ണിയാടന്‍റെ ശ്രമഫലമായി യുഡിഎഫ് സര്‍ക്കാര്‍ 2013-14 ലെ ബജറ്റില്‍ പ്രഖ്യാപിച്ചതും പിന്നീടുണ്ടായ ചില സാങ്കേതിക വിഷയങ്ങള്‍ പരിഹരിച്ച് 2016 ഫെബ്രുവരി 18 നുചേര്‍ന്ന പ്രത്യേക മന്ത്രിസഭായോഗംഅംഗീകരിച്ച് പ്രാഥമിക നടപടികള്‍ സ്വീകരിച്ച ഈ പദ്ധതി കഴിഞ്ഞ ഒമ്പതുവര്‍ഷമായി അനിശ്ചിതാവസ്ഥയിലാക്കിയ എല്‍ഡിഎഫ് സര്‍ക്കാരിന്‍റെ സമീപനത്തില്‍ പ്രതിഷേധിച്ച് കേരള കോണ്‍ഗ്രസ് പടിയൂര്‍ മണ്ഡലം കമ്മിറ്റിയുടെ ആഭിമുഖ്യത്തില്‍ എടതിരിഞ്ഞിയില്‍ പ്രതിഷേധ സംഗമം നടത്തി. പ്രതിഷേധ ധര്‍ണ കേരള കോണ്‍ഗ്രസ് ഡെപ്യൂട്ടി ചെയര്‍മാന്‍ തോമസ് ഉണ്ണിയാടന്‍ ഉദ്ഘാടനം ചെയ്തു. മണ്ഡലം പ്രസിഡന്‍റ്് ഫിലിപ്പ് ഓളാട്ടുപുറം അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി മിനി മോഹന്‍ദാസ് മുഖ്യപ്രഭാഷണം നടത്തി. പാര്‍ട്ടി ഭാരവാഹികളായ റോക്കി ആളൂക്കാരന്‍, സേതുമാധവന്‍ പറയംവളപ്പില്‍, സതീഷ് കാട്ടൂര്‍, ശിവരാമന്‍ കൊല്ലംപറമ്പില്‍, ബിജോയ് ചിറയത്ത്, തുഷാര ബിന്ദു ഷിജിന്‍, അജിത സദാനന്ദന്‍, ഷക്കീര്‍ ഉപ്പുംതുരുത്തി, ഷമീര്‍ മങ്കാട്ടില്‍, ആന്‍റോ ഐനിക്കല്‍, അഫ്‌സല്‍ ചേലൂര്‍, ബൈജു മഴുവന്‍ചേരിത്തുരുത്ത്, ആന്‍റോ ചാഴൂര്‍, ബെന്നി, അനില്‍, ഷീജ എന്നിവര്‍ പ്രസംഗിച്ചു.

കലാഭവൻമണി പാർക്കിലെ നടപ്പാതയിൽ തെന്നിവീണ് അപകടങ്ങൾ തുടരുന്നു

ചാലക്കുടി: കലാഭവൻ മണി പാർക്കിൽ ദിനംപ്രതി കുടുംബസമേതം വ്യായാമത്തിനും ഉല്ലാസത്തിനുമായി എത്തുന്ന പലരും നടപ്പാതയിൽ തെന്നിവീണ് അപകടം സംഭവിക്കുന്നു. നിർമാണത്തിലെ അപാകതമൂലമാണു നിലവിലെ നടപ്പാതയിൽ അപകടങ്ങൾ സംഭവിക്കുന്നത്. തെന്നിവീണ് നിരവധി പേർക്ക് ഇതിനകം അപകടം സംഭവിച്ചിട്ടുണ്ട്. വർഷക്കാലത്തിൽ നടപ്പാതയിൽ വേണ്ടവിധം ക്ലീനിംഗ് നടക്കുന്നില്ല, അതോടൊപ്പം നടപ്പാതയിൽ വളരെ വഴുക്കൽ ഉണ്ട്. അധികാരികളുടെ ശ്രദ്ധയിൽപ്പെടുത്തിയിട്ടും ശാശ്വതപരിഹാരം ഉണ്ടായിട്ടില്ല. എത്രയും‌ംവേഗം പാർക്കിലെ നടപ്പാത പൊതുജനങ്ങൾക്കു സുരക്ഷിതമായി നടക്കുന്നതിനും കൃത്യമായി ശുചീകരണം നടത്താൻവേണ്ട നടപടികളും സ്വീകരിക്കണമെന്നും മഴക്കാലത്ത് ആഴ്ചയിൽ ഒരു ദിവസമെങ്കിലും നടപ്പാതയിൽ ക്ലീനിംഗ് ജോലികൾ നടത്തണമെന്നും റസിഡന്‍റ് അസോസിയേഷൻ കോ-ഒാർഡിനേഷൻ ട്രസ്റ്റ് മുൻസിപ്പൽ അധികാരികൾക്ക് നല്കിയ പരാതിയിൽ ആവശ്യപ്പെട്ടു. ക്രാക്റ്റ് പ്രസിഡന്‍റ് പോൾ പാറയിലും സെക്രട്ടറി പി.ഡി. ദിനേശും നേതൃത്വം നൽകി.

ആനന്ദപുരം ഗവ. യുപി സ്‌കൂളില്‍ കെട്ടിടം അപകടാവസ്ഥയില്‍

മുരിയാട്: പഞ്ചായത്തിലെ ഏക സര്‍ക്കാര്‍ വിദ്യാലയമായ ആനന്ദപുരം ഗവ. യുപി സ്‌കൂളില്‍ പൊതുവിദ്യാഭ്യാസ വകുപ്പ് സ്‌കൂള്‍ ഉച്ചഭക്ഷണ പദ്ധതിപ്രകാരം കേന്ദ്ര - സംസ്ഥാന വിഹിതം വകയിരുത്തി നിര്‍മിച്ച കിച്ചന്‍ കം സ്റ്റോര്‍ നിര്‍മാണത്തിലെ അപാകത മൂലം കെട്ടിടം ഏതുനിമിഷവും തകരാവുന്ന നിലയില്‍. നിര്‍മാണത്തില്‍ നടന്ന വന്‍ അഴിമതിയാണു തകര്‍ച്ചയ്ക്കു കാരണമെന്നു കോണ്‍ഗ്രസ് മുരിയാട് മണ്ഡലം കമ്മിറ്റി ആരോപിച്ചു. നിര്‍മാണം പൂര്‍ത്തീകരിച്ച് കഴിഞ്ഞ നവംബറില്‍ മന്ത്രി ആര്‍. ബിന്ദു കെട്ടിടം ഉദ്ഘാടനം ചെയ്തുവെങ്കിലും കെട്ടിടത്തിന്‍റെ അപകടാവസ്ഥയെ ത്തുടര്‍ന്ന് ഇതുവരെയും തുറന്നുപ്രവര്‍ത്തിക്കാന്‍ സാധിച്ചിട്ടില്ല. പരാതിയെത്തുടര്‍ന്ന് പഞ്ചായത്തിലെ കോണ്‍ഗ്രസ് അംഗങ്ങളുടെ നേതൃത്വത്തില്‍ കെട്ടിടം തുറന്നുനോക്കിയപ്പോള്‍ കെട്ടിടത്തിനുള്ളില്‍ വിഷപ്പാമ്പ് ഉള്‍പ്പെടെ നിരവധി ഇഴജന്തുക്കളായിരുന്നു. വിദ്യാര്‍ഥികള്‍ക്ക് ഇപ്പോഴും ഉച്ചഭക്ഷണം നല്‍കുന്നത് പഴയ കെട്ടിടത്തില്‍ തന്നെയാണ്. മുരിയാട് പഞ്ചായത്തംഗം പിടിഎ പ്രസിഡന്‍റായിട്ടുള്ള കമ്മിറ്റിയാണ് നിര്‍മാണത്തിനു നേതൃത്വം നല്‍കിയത്. നിര്‍മാണ കാലഘട്ടത്തില്‍ത്തന്നെ നിര്‍മാണത്തിലെ അപാകതകളെക്കുറിച്ചും അപകടാവസ്ഥയെക്കുറിച്ചും ചൂണ്ടിക്കാണിച്ചെങ്കിലും അതെല്ലാം അവഗണിക്കുകയായിരുന്നുവെന്ന് തൊട്ടടുത്ത വാര്‍ഡിലെ പഞ്ചായത്തംഗം നിത അര്‍ജുനന്‍ പറഞ്ഞു. നിമാണം പൂര്‍ത്തീകരിച്ച് ഉദ് ഘാടനം ചെയ്യുന്നതിനായിരുന്നു തിടുക്കം. കെട്ടിടത്തിന്‍റെ ഒരു ഭാഗം നിര്‍മാണഘട്ടത്തില്‍ത്തന്നെ ഒരു വശത്തേക്കു ചെരിഞ്ഞിരുന്നു. ആ ഭാഗങ്ങള്‍ ഇരുമ്പ് ദണ്ഡ് ഉപയോഗിച്ച് താങ്ങിനിര്‍ത്തിയിരിക്കുകയാണ്. കെട്ടിടത്തിന്‍റെ ഉള്‍വശങ്ങളിലും ഇരുമ്പുദണ്ഡ് ഉപയോഗിച്ച് താങ്ങിനിര്‍ത്തിയിരിക്കുകയാണ്. നിര്‍മാണത്തിലെ അഴിമതിയെക്കുറിച്ച് അന്വേഷിക്കണമെന്നും കുറ്റക്കാര്‍ക്കെതിരെ കര്‍ശന‌നടപടി സ്വീകരിക്കണമെന്നും കോണ്‍ഗ്രസ് മണ്ഡലം പ്രസിഡന്‍റ്് സാജു പാറേക്കാടന്‍, പഞ്ചായത്തംഗം ശ്രീജിത്ത് പട്ടത്ത്, കോണ്‍ഗ്രസ് ബ്ലോക്ക് വൈസ് പ്രസിഡന്‍റ്് വിബിന്‍ വെള്ളയത്ത്, മണ്ഡലം സെക്രട്ടറിമാരായ സി.എസ്. അജീഷ്, ടി.ആര്‍. ദിനേഷ് എന്നിവര്‍ ആവശ്യപ്പെട്ടു.

ജീസസ് യൂത്ത് ലീഡേഴ്സിന്‍റെയും വൈദികരുടെയും സംഗമം "കൂട്ട്'

ആളൂർ: ഇരിങ്ങാലക്കുട രൂപത ജീസസ് യൂത്തിന്‍റെ ആഭിമുഖ്യത്തിൽ വൈദികരുടെയും ജീസസ് യൂത്ത് ലീഡേഴ്സിന്‍റെയും സം ഗമം "കൂട്ട്' നടത്തി. ആളൂർ ബിഎൽഎം സെന്‍ററിൽ നടന്ന സംഗമം ഫാ. സെബാസ്റ്റ്യൻ അരിക്കാട്ട് ഉദ്ഘാടനം ചെയ്തു. ജീസസ് യൂത്ത് ഡയറക്ടർ ഫാ. ജോയേൽ ചെറുവത്തൂർ അധ്യക്ഷത വഹിച്ചു. ഫാ. ചാക്കോ കാട്ടുപറന്പിൽ പ്രാർഥനയ്ക്കു നേതൃത്വം നൽകി. ഫാ. ഡേവിസ് കിഴക്കുംതല, ഫാ. നിക്സൻ ചാക്കോര്യ, ഫാ. റിജോ പഴയാറ്റിൽ, ഫാ. ജെയ്സൻ വടുക്കുംഞ്ചേരി, ഫാ. നൗജിൻ വിതയത്തിൽ, ഡീക്കൻ നിഖിൽ ജോണി, അഡ്വ. കെ.ജെ. ജോൺസൻ, സെബി മാളിയേക്കൽ, ജെറിൻ ജോണി, സജു ദേവസി തുടങ്ങിയവർ പ്രസംഗിച്ചു.

ബസിലിക്ക ഊട്ടുതിരുനാൾ കമ്മിറ്റി ഓഫീസ് ഉദ്ഘാടനം

തൃശൂർ: പരിശുദ്ധ വ്യാകുലമാതാവിൻ ബസിലിക്കയിലെ ഊട്ടുതിരുനാൾ കമ്മിറ്റി ഓഫീസിന്‍റെ ഉദ്ഘാടനം അതിരൂപത വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ നിർവഹിച്ചു. ബസിലിക്ക റെക്ടർ ഫാ. തോമസ് കാക്കശേരി, അസി.വികാരിമാരായ ഫാ. ബെൻവിൻ തട്ടിൽ, ഫാ. പ്രിൻസ് ചെറുതാനിക്കൽ, കൈക്കാരൻമാരായ ജോർജ് പുലിക്കോട്ടിൽ, ജോണി കുറ്റിച്ചാക്കു, വി.ആർ. ജോണ്‍, അബി ചെറിയാൻ, ജനറൽ കണ്‍വീനർ പോൾസണ്‍ ആലപ്പാട്ട്, ഊട്ട് കണ്‍വീനർ ബിനോയ് കാട്ടൂക്കാരൻ, പബ്ലിസിറ്റി കണ്‍വീനർ എം.ജെ. സൈമണ്‍ എന്നിവർ നേതൃത്വം നൽകി. സെപ്റ്റംബർ 15നാണ് ഉട്ടുതിരുനാൾ.

ദേവാലയങ്ങളില്‌ തിരുനാളാഘോഷം

കണ്ടശാംകടവ്: സെന്‍റ് മേരീസ് ഫൊറോന പള്ളിയിൽ വിശുദ്ധ യാക്കോബ് ശ്ലീഹായുടെ തിരുനാളിനു കൊടിയേറി. ഇടവകവികാരി ഫാ. റാഫേൽ ആക്കാമറ്റത്തിൽ കൊടിയേറ്റംനിർവഹിച്ചു. 24, 25 തീയതികളിലാണ് തിരുനാൾ. തിരുനാളിനോടനുബന്ധിച്ച് 24നു വൈകീട്ട് 5.30നുളള കുർബാനയ്ക്കുശേഷം കൂടുതുറക്കൽ നടക്കും. തിരുനാൾ ദിവസമായ 25നു രാവിലെ ആറിനും എട്ടിനും കുർബാന, ലദീഞ്ഞ്, നൊവേന. 10ന് ആഘോഷമായ തിരുനാൾകുർബാനയ്ക്ക് ഫാ. ജിസ്‌വിൻ വാഴപ്പിള്ളി മുഖ്യകാർമികനാകും. ഫാ. ജീൻ ചിറയത്ത് തിരുനാൾസന്ദേശംനൽകും. തുടർന്ന് ലദീഞ്ഞ്, നൊവേന, തിരുനാൾപ്രദക്ഷിണം, നേർച്ചവിതരണം എന്നിവയുണ്ടാകും. 25നു വൈകീട്ട് ആറുമുതൽ 10 വരെ റോയൽ വോയ്സ് ആമ്പല്ലൂർ, കൈരളി ചാലക്കുടി എന്നീ ടീമുകളുടെ ബാൻഡ് മേളം ഉണ്ടാകും. അസി. വികാരി. ഫാ. അജിത്ത് ചിറ്റിലപ്പിള്ളി, ട്രസ്റ്റിമാരായ സി.ഒ. ജിന്‍റോ, ബൈജു ജോർജ്, ജെയ്സൺ പോൾ, ജോസഫ് അറയ്ക്കൽ എന്നിവർ നേതൃത്വം നൽകും.

നിക്ഷേപത്തുക തിരിച്ചുനൽകിയില്ല; ഭരണസമിതിക്കെതിരേ കേസ്

പുന്നയൂർക്കുളം: കാലാവധി കഴിഞ്ഞിട്ടും നിക്ഷേപത്തുക തിരിച്ചു ലഭിച്ചില്ലെന്ന പരാതിയിൽ വടക്കേക്കാട് പോലീസ് കേസെടുത്തു. വടക്കേക്കാട് സർവീസ് സഹകരണ ബാങ്ക് സെക്രട്ടറിയുടേയും ഭരണസമിതി അംഗങ്ങളുടേയും പേരിലാണ് പോലീസ് കേസെടുത്തത്. നിക്ഷേപത്തുക തിരിച്ചുലഭിക്കാത്തതിനെ തുടർന്ന് വടക്കേക്കാട് പോലീസ്, ജില്ലാ പോലീസ് മേധാവി എന്നിവർക്ക് പരാതിനൽകിയെങ്കിലും നടപടിയുണ്ടായില്ല. തുടർന്ന് പരാതിക്കാരനായ വടക്കേക്കാട് കുറ്റിക്കരിപ്പോട്ട് ബെഞ്ചമിൻ കുന്നംകുളം ഫസ്റ്റ് ക്ലാസ് മജിസ്ട്രേറ്റ് കോടതിയെ സമീപിക്കുകയായിരുന്നു. കോടതി ഉത്തരവിനെ തുടർന്നാണ് പോലീസ് കേസെടുത്തത്. ബെഞ്ചമിന്‍റെ മാതാവ് ഫാത്തിമയുടെ പേരിൽ 2022 ഡിസംബറിൽ അഞ്ചുലക്ഷം രൂപ ഒരുവർഷത്തേയ്ക്ക് സ്ഥിരനിക്ഷേപം നടത്തിയിരുന്നു. ഫാത്തിമയുടെ ചികിത്സയ്ക്കുവേണ്ടി നിക്ഷേപത്തുക തിരിച്ചു ചോദിച്ചപ്പോഴും നൽകിയില്ലായെന്നു പരാതിയിൽ പറയുന്നു. ഇതിനിടെ നിക്ഷേപത്തുക തിരിച്ചു നൽകാത്തതിൽ പ്രതിഷേധിച്ചും നിക്ഷേപകർക്ക്പണം ഉടനെ നൽകണമെന്നും ആവശ്യപ്പെട്ട് സിപിഎമ്മിന്‍റെ നേതൃത്വത്തിൽ ബാങ്കിലേക്ക് മാർച്ചും ധർണയും നടത്തി. സിപിഎം ഏരിയ സെക്രട്ടറി ടി.ടി. ശിവദാസൻ ഉദ്ഘാടനംചെയ്തു.

ദുരിതാശ്വാസ ക്യാമ്പിൽ കഴിയുന്നവർ പ്രതിഷേധധർണ നടത്തി

ചേർപ്പ്: വെള്ളക്കെട്ടുമൂലം ദുരിതാശ്വാസക്യാമ്പിൽ കഴിയുന്നവര്‌ പ്രതിഷേധധർണ നടത്തി. ചേർപ്പ് പഞ്ചായത്ത് 17, 18 വാർഡുകളിൽ ഉൾപ്പെട്ട മുത്തുള്ളിയാൽ, കനാൽ പ്രദേശത്ത് രണ്ടുമാസമായി തുടരുന്ന വെള്ളക്കെട്ടുമൂലം അഞ്ഞൂറിൽപരം ജനങ്ങളാണ് ഇപ്പോഴും ചേർപ്പ് ഗവ. ഹൈസ്കൂളിലും ജെബിഎസ് ഹൈസ്കൂളിലും കഴിയുന്നത്. ജൂബിലി കോൾപടവ് കമ്മിറ്റി മത്സ്യലേലത്തിന് നൽകിയതിനെത്തുടർന്ന് ഹെൽബർട്ട് കനാലിലേക്ക് വെള്ളം ഒഴുകുന്ന ഓവ് ചാല്മീൻപിടിത്തക്കാർ അടച്ചിരിക്കുന്നതുമൂലം വെള്ളം ഒഴുകിപോകാത്തതിനാലാണ് വെള്ളക്കെട്ട്. ഇതിൽ പ്രതിഷേധിച്ച് ദുരിതമനുഭവിക്കുന്ന കുടുംബങ്ങൾ കനാൽ പ്രദേശത്തുനിന്നു പ്രകടനംനടത്തി. തായംകുളങ്ങരയിലെ ജൂബിലി പടവ് ഓഫീസ് ഉപരോധിച്ചു. തുടർന്നുനടന്ന ചർച്ചയിൽ ഓഗസ്റ്റ് 31 വരെ ലേലം മരവിപ്പിക്കാനും ഓവുചാല് തുറക്കാനും തീരുമാനമായി. സിപിഎം ചേർപ്പ് ലോക്കൽ സെക്രട്ടറി എ.വി. സഹദേവൻ, ലോക്കൽ സെക്രട്ടറി പി.എസ്. സനന്ദ്, വാർഡ് മെമ്പർ മാരായ സുനിത ജിനു, നസീജ മുത്ത ലീഫ്, എം.എച്ച് സജീർ എന്നിവർ സംസാരിച്ചു.

പാണഞ്ചേരി പഞ്ചായത്തിൽ കാട്ടാനശല്യം രൂക്ഷം

പട്ടിക്കാട്: പാണഞ്ചേരി പഞ്ചായത്തിന്‍റെ വിവിധ ഭാഗങ്ങളിൽ കാട്ടാനയിറങ്ങി വ്യാപകമായി കൃഷിനശിപ്പിച്ചു. വഴുക്കുംപാറയിലും ചാണോത്തുമാണ് കാട്ടാനക്കൂട്ടം കാർഷികവിളകൾ നശിപ്പിച്ചത്. വഴുക്കുംപാറയിൽ പത്തോളം കർഷകരുടെ കൃഷിയാണ് കാട്ടാന നശിപ്പിച്ചത്. തെങ്ങ്, വാഴ, കവുങ്ങ്, റബർ, നഴ്‌സറിയിലെ ചെടികൾ തുടങ്ങിയവ പൂർണമായും നശിപ്പിച്ച നിലയിലാണ്. രാത്രിയിൽ കൃഷിയിടത്തിൽ ഇറങ്ങിയ ആന വീടിന്‍റെ മുറ്റത്ത് നിലയുറപ്പിച്ചതോടെ കർഷകർ ഏറെ പരിഭ്രാന്തിയിലായി. കഴിഞ്ഞ വർഷങ്ങളിൽ‌ പ്രദേശത്ത് കാട്ടാനശല്യം ഉണ്ടെങ്കിലും വീടിനുസമീപത്തേയ്ക്ക് കാട്ടാന എത്തുന്നത് ഇതാദ്യമാണെന്ന് നാട്ടുകാർ പറഞ്ഞു. വന്യമൃഗശല്യം രൂക്ഷമായതോടെ നിരവധിയാളുകൾ പ്രദേശത്തുനിന്ന് താമസംമാറി. പ്രദേശത്തെ സൗരോർജ വൈദ്യുതവേലി പ്രവർത്തനരഹിതമായതാണ് കാട്ടാന ശല്യം രൂക്ഷമാകാൻ കാരണമെന്ന് വാർഡ് മെമ്പർ കെ.പി. ചാക്കോച്ചൻ പറഞ്ഞു. പഴയ വൈദ്യുതവേലി പൂർണമായി നശിക്കുകയും ബാറ്ററികൾ തകരാറിലാവുകയുംചെയ്തു. പുതിയ സൗരോർജ വേലി സ്ഥാപിക്കുന്നതിനുള്ള ടെൻഡർ നടപടികൾ പൂർത്തിയായെങ്കിലും മറ്റു നടപടികൾ ഉണ്ടായിട്ടില്ലെന്നും വാർഡ് മെമ്പർ പറഞ്ഞു. ചാണോത്ത് മേഖലയിൽ എട്ടുമാസംമുമ്പാണ് ആദ്യമായി കാട്ടാന എത്തിയത്. എന്നാൽ കഴിഞ്ഞ ചില ആഴ്ചകളായി നിരന്തരം കാട്ടാന പ്രദേശത്ത് എത്തുന്നതായി വാർഡ് മെമ്പർ സാവിത്രി സദാനന്ദൻ പറഞ്ഞു. നിരവധി കാർഷിക വിളകളും കാട്ടാന നശിപ്പിച്ചിട്ടുണ്ട്. ജനങ്ങൾക്ക് സംരക്ഷണം നൽകേണ്ട സർക്കാർ നോക്കുകുത്തികളാകുന്ന അവസ്ഥയാണെന്നും വന്യമൃഗങ്ങളുടെ ആക്രമണത്തിൽനിന്ന് സംരക്ഷണം ഉറപ്പുവരുത്താൻ അധികൃതർ ശ്രമിക്കുന്നില്ലെന്നും കർഷകർ ആരോപിച്ചു. സ്ഥലം എംഎൽഎയും റവന്യുമന്ത്രിയുമായ കെ. രാജൻ പ്രശ്‌നത്തിൽ അടിയന്തരനടപടി സ്വീകരിക്കണമെന്ന് അവർ ആവശ്യപ്പെട്ടു. കാട്ടാനകളിറങ്ങി കൃഷി നശിപ്പിച്ചു വടക്കാഞ്ചേരി: വാഴക്കോടും ഉദുവടിയിലും മണലാടിയിലും കാട്ടാനകളിറങ്ങി കൃഷികൾ നശിപ്പിച്ചു. ജനവാസമേഖലകളിലറിങ്ങിയ കാട്ടാനകൾ നാട്ടിൽ ഭീതിപരത്തി. മണലാടിയിൽ കഴിഞ്ഞദിവസം രാത്രിയിലായിരുന്നു കാട്ടാനകൾ നാശംവിതച്ചത്. ആനകളിറങ്ങിയ സമയത്ത് വെെദ്യുതിയില്ലാത്തത് നാട്ടുകാരുടെ ഭീതി വർധിപ്പിച്ചു. മണലാടി സ്വദേശി പുന്നപ്പുഴവീട്ടുകാരായ ബേബി, ബിജു, മാഞ്ഞാപറമ്പിൽ വീട്ടിൽ ലിസി ജോസഫ് എന്നിവരുടെ വീട്ടുപറമ്പിലെ കൃഷികളാണ് നശിപ്പിച്ചത്. വിവരമറിയിച്ചതിനെ തുടർന്ന് വനപാലകരെത്തിയെങ്കിലും ശക്തമായ മഴയായതിനാൽ പടക്കംപൊട്ടിക്കാൻ കഴിയാത്തതിനാൽ ആനകളെ തുരത്താൻ കഴിയില്ലെന്ന നിലപാടായിരുന്നു. പ്രദേശത്ത് വഴിവിളക്കുകൾ ഇല്ലാത്തതും പ്രതിസന്ധി രൂക്ഷമാക്കി. വാഴക്കോട് പ്രദേശത്ത് ഇന്നലെ പുലർച്ചെയാണ് കാട്ടാനകളിറങ്ങി കൃഷികൾ നശിപ്പിച്ചത്. ജനവാസമേഖലകളിറങ്ങിയ കാട്ടാനകൾ വൻതോതിൽ നാശനഷ്ടം വരുത്തിയാണ് മടങ്ങിയത്. കറത്തോടിവീട്ടിൽ സോമസുന്ദരൻ, കോടങ്ങാട്ടിൽവീട്ടിൽ ഉണ്ണികൃഷ്ണൻ, കുന്നാംതൊടിവീട്ടിൽ അലി, കുളത്തിങ്കൽപീടികയിൽ ഷാഹിദ, പുത്തൻവീട്ടിൽ ഹംസ, പൊറത്തൂർ വീട്ടിൽ ഫ്രാൻസിസ് എന്നിവരുടെ വീട്ടുപറമ്പിലെ കൃഷികളാണ് നശിപ്പിച്ചത്. വിവരമറിച്ചതിനെത്തുടർന്ന് മച്ചാട് ഫോറസ്റ്റ് സ്റ്റേഷനിലെ വനപാലകരെത്തി അന്വേഷണംനടത്തി.

ജനകീയ കുടിവെള്ളസംരക്ഷണവേദി പ്രതിഷേധധര്‍ണ നടത്തി

കാട്ടൂര്‍: മിനി ഇൻഡസ്ട്രിയല്‍ എസ്റ്റേറ്റില്‍നിന്നുള്ള കുടിവെള്ളമലിനീകരണത്തിനെതിരേ ജനകീയ കുടിവെള്ളസംരക്ഷണവേദി കാട്ടൂര്‍ പഞ്ചായത്തിലേക്കു പ്രതിഷേധമാര്‍ച്ചും ധര്‍ണയും നടത്തി. കവയിത്രിയും സാമൂഹ്യപ്രവര്‍ത്തകയുമായ ആതിര തീക്ഷ്ണ പ്രതിഷേധധര്‍ണ ഉദ്ഘാടനം ചെയ്തു. വേദി പ്രസിഡന്‍റ് അരുൺ വന്‍പറമ്പില്‍ അധ്യക്ഷത വഹിച്ചു. അഞ്ചാം വാര്‍ഡ് മെമ്പര്‍ മോളി പിയൂസ്, കോണ്‍ഗ്രസ് കാട്ടൂര്‍ മണ്ഡലം പ്രസിഡന്‍റ് എ.പി. വില്‍സണ്‍, സിപിഐ പ്രതിനിധി കെ.പി. രാജന്‍, ബിജെപി പ്രതിനിധി ലോനജന്‍ അമ്പാട്ട്, കേരള കോണ്‍ഗ്രസ് പ്രതിനിധി അഷ്‌റഫ് പാലിയത്താഴത്ത്, സര്‍വീസ് സഹകരണബാങ്ക് പ്രസിഡന്‍റ് ജോമോന്‍ വലിയവീട്ടില്‍, സംരക്ഷണവേദി ട്രഷറര്‍ ജോയ് തോമസ് എന്നിവര്‍ സംസാരിച്ചു.

ജ്യോതിയും സിഗ്നിഫൈസിസും ധാരണാപത്രം ഒപ്പുവച്ചു

തൃശൂർ: അയർലൻഡ് ആസ്ഥാനമായി പ്രവർത്തിക്കുന്ന സിഗ്നിഫൈസിസ് കന്പനിയും ജ്യോതി എൻജിനീയറിംഗ് കോളജും തമ്മിൽ ധാരണാപത്രം ഒപ്പുവച്ചു. വിവിധ സാങ്കേതികമേഖലകളിൽ പ്രവർത്തിക്കുന്ന കന്പനിയിൽ വിദ്യാർഥികൾക്ക് ഇന്‍റേണ്‍ഷിപ്പിനുള്ള അവസരം ഇതുവഴി ലഭിക്കും. മികച്ച രീതിയിൽ പരിശീലനം പൂർത്തിയാക്കുന്ന വിദ്യാർഥികൾക്കു കന്പനിയിൽതന്നെ തൊഴിലവസരങ്ങളും ഉണ്ടാകും. ‌കന്പനി ഫൗണ്ടറും സിടിഒയുമായ സുരേഷ് ചന്ദ്രൻ ധാരണാപത്രം കോളജ് പ്രിൻസിപ്പൽ ഡോ. പി. സോജൻലാലിനു കൈമാറി. കോളജ് എക്സിക്യൂട്ടീവ് മാനേജർ ഫാ. ഡേവിഡ് നെറ്റിക്കാടൻ, അക്കാദമിക് ഡയറക്ടർ റവ.ഡോ. ജോസ് കണ്ണന്പുഴ, കന്പ്യൂട്ടർ സയൻസ് വിഭാഗം മേധാവി ഡോ. പി. ശോഭ സേവിയർ എന്നിവർ പ്രസംഗിച്ചു.

ചൈനീസ് കുടകൾക്കും കോട്ടുകൾക്കും പിറകിൽ മറയുന്നു, ആ ജീവിതങ്ങൾ

സി.ജി. ജിജാസൽ തൃശൂർ: മഴയായാലും വെയിലായാലും ഒരുകാലത്ത് നഗരത്തിന്‍റെ ഓരോ കോണിലും കണ്ടിരുന്ന മുഖങ്ങളായിരുന്നു കുട, ചെരിപ്പ് റിപ്പയർമാരുടേത്. ഒരു ചെരിപ്പ് പൊട്ടിയാൽ, കുടയുടെ കന്പിയൊന്ന് ഒടിഞ്ഞാൽ അവരെ തേടി ആളുകൾ നടന്നിരുന്ന ഒരുകാലമുണ്ടായിരുന്നു. നടപ്പാതകളിലും മരച്ചുവടുകളിലും കുനിഞ്ഞിരുന്ന് തങ്ങളുടെ തൊഴിലിൽ വ്യാപൃതരായിരുന്നവർ, തങ്ങളുടെ തുച്ഛമായ വരുമാനത്തിലും സന്തോഷത്തോടെ ജീവിതം നയിച്ചിരുന്നവർ. പക്ഷേ ഇന്നിപ്പോൾ അവരുടെ മുഖത്തു പഴയ പ്രസന്നതയില്ല, സന്തോഷമില്ല. കാര്യമായ പണിയല്ലാതെ വന്നപ്പോൾ ആ മുഖങ്ങൾ മങ്ങിപ്പോയി. ചെറിയ വിലയ്ക്കു കളർഫുൾ കുടകളും പ്ലാസ്റ്റിക് ചെരിപ്പുകളും കോട്ടുകളും മാർക്കറ്റുകൾ കീഴടക്കിയപ്പോൾ പേരിനുപോലും പണിയില്ലാതെ ഇരിക്കേണ്ട അവസ്ഥയാണ് തൊഴിലാളികൾക്കിപ്പോൾ. ഒരുകാലത്ത് അതിർത്തികൾ കടന്നു നഗരത്തിന്‍റെ ഹൃദയഭാഗങ്ങളിൽ കുടനന്നാക്കാനെത്തിയ തൊഴിലാളികളെ ഇന്ന് അധികമാരും ശ്രദ്ധിക്കുന്നില്ല. കാര്യങ്ങൾ വിപണിയുടെ കൈയിലാണ്. കാര്യം നേരത്തേ പറഞ്ഞതുതന്നെ. പലദിവസങ്ങളിലും വിരലിൽ എണ്ണാവുന്നവർമാത്രമാണ് വരുന്നതെന്നും അതുകൊണ്ടുതന്നെ ഓരോ ദിനവും തള്ളിനീക്കാൻ പാടുപെടുകയാണെന്നും സ്വരാജ് റൗണ്ടിൽ വർഷങ്ങളായി കുടയും ചെരുപ്പുകളും നന്നാക്കുന്ന തിരൂർ സ്വദേശി ചന്ദ്രൻ പറഞ്ഞു. കുടയോ ചെരിപ്പോ പൊട്ടിയാൽതന്നെ ഇപ്പോൾ ആളുകൾ പഴയത് ഉപേക്ഷിച്ചു പുതിയതു വാങ്ങുക‍യാണ്. നന്നാക്കണമെന്ന് ആരും പറയാറില്ല. ഉന്നം അന്നമായതിനാൽതന്നെ കൂടുതൽ കൂലികിട്ടുന്ന മറ്റു തൊഴിലുകളിലേക്ക് ഒരിടയ്ക്കു മാറി. എന്നാൽ, അസുഖങ്ങൾമൂലം ബുദ്ധിമുട്ടുകൾ നേരിടാൻ തുടങ്ങിയപ്പോൾ പഴയ തൊഴിലിലേക്കു തിരികെവരികയായിരുന്നുവെന്നും ചന്ദ്രൻ പറഞ്ഞു. ഇത്തരം തൊഴിലുകൾ എടുത്തിരുന്ന മലയാളികളുടെ എണ്ണം കുത്തനേ കുറഞ്ഞെങ്കിലും പലനാടുകളിൽനിന്നും ഏറെ പ്രതീക്ഷയോടെ നഗരത്തിൽ ഇപ്പോഴും ഈ തൊഴിലിനായി പലരും എത്തുന്നുണ്ട്. കഴിഞ്ഞ പത്തുകൊല്ലത്തിനിടെ ഈ തൊഴിൽമേഖലയിലെ ഇടിവ് 80 ശതമാനത്തിലേറെ എന്നാണ് കണക്ക്. പലരും മറ്റു ചെറുപണികളിലേക്ക് ഒഴിഞ്ഞുപോയതു പട്ടിണിയില്ലാതെ ജീവിക്കാനുള്ള ആഗ്രഹംകൊണ്ടാണ്. എങ്കിലും, ചില തൊഴിലാളികൾ ഇപ്പോഴും നഗരചുറ്റുപാടിൽ കാത്തിരിക്കുന്നു... ആരെങ്കിലും ചെരിപ്പോ കുടയോ കൈയിൽ പിടിച്ച് “നന്നാക്കാമോ?” എന്നൊരു ചോദ്യവുമായി വരും എന്ന പ്രതീക്ഷയോടെ...

ഉമ്മൻചാണ്ടി മനുഷ്യത്വമുള്ള ജനകീയനേതാവ്: വി.കെ. ശ്രീകണ്ഠൻ എംപി

തൃശൂർ: ജനക്ഷേമത്തിനു തടസം സൃഷ്ടിക്കുന്ന ചുവപ്പുനാടകൾ ഒഴിവാക്കാൻ എന്തുംചെയ്യാൻ തയാറായ ഭരണാധികാരിയാണ് ഉമ്മൻചാണ്ടിയെന്നു വി.കെ. ശ്രീകണ്ഠൻ എംപി പറഞ്ഞു. ഉമ്മൻചാണ്ടിയുടെ രണ്ടാംചരമവാർഷികത്തോടനുബന്ധിച്ച് ഡിസിസിയിൽ അനുസ്മരണസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിന്‍റെ വികസനചരിത്രത്തിലെ നാഴികക്കല്ലാണ് ഉമ്മൻചാണ്ടിയുടെ ഭരണകാലം. ആരോഗ്യ, വിദ്യാഭ്യാസമേഖലയിൽ വലിയ മാറ്റങ്ങളാണ് അദ്ദേഹം നടപ്പാക്കിയത്. മനുഷ്യത്വമുള്ള ജനകീയനേതാവായി നിലകൊണ്ട ഉമ്മൻചാണ്ടിയാകാൻ ഒരാൾക്കുപോലും ഭാവിയിൽ കഴിയില്ല. കോൺഗ്രസിലേക്കു ജനങ്ങളെ അടുപ്പിച്ചത് ഉമ്മൻചാണ്ടിയാണെന്നും അദ്ദേഹം പറഞ്ഞു. ഉമ്മൻചാണ്ടിയുടെ ഛായാചിത്രത്തിനുമുന്പിൽ മുൻസ്പീക്കർ തേറമ്പിൽ രാമകൃഷ്ണൻ ദീപം തെളിയിച്ചു. ഡിസിസി പ്രസിഡന്‍റ് അഡ്വ. ജോസഫ് ടാജറ്റ് അധ്യക്ഷത വഹിച്ചു. മുതിർന്ന മാധ്യമപ്രവർത്തകൻ ജോർജ് പുളിക്കൻ അനുസ്മരണപ്രഭാഷണം നടത്തി. നേതാക്കളായ തേറമ്പിൽ രാമകൃഷ്ണൻ, ഒ. അബ്ദുറഹ്‌മാൻകുട്ടി, എം.പി. വിൻസെന്‍റ്, ജോസ് വള്ളൂർ, ടി.വി. ചന്ദ്രമോഹൻ, ജോസഫ് ചാലിശേരി, കെ.കെ. കൊച്ചുമുഹമ്മദ്, സുനിൽ അന്തിക്കാട്, രാജേന്ദ്രൻ അരങ്ങത്ത്, ഷാജി കോടങ്കണ്ടത്ത്, ജോൺ ഡാനിയൽ, എ. പ്രസാദ്, സി.സി. ശ്രീകുമാർ, കെ.ബി. ശശികുമാർ, കെ.കെ. ബാബു, വി. സുരേഷ് കുമാർ, ടി. നിർമല എന്നിവർ പങ്കെടുത്തു.

ദീപിക അന്നേ പറഞ്ഞു, ഒടുവിൽ മജിസ്ട്രേറ്റും ഇടപെട്ടു; പാർക്ക് വൃത്തിയാകും

തൃശൂർ: ആദ്യം പക്ഷിശല്യം. പിന്നെ പാന്പുശല്യം. അയ്യന്തോൾ നിവാസികളുടെ ദുരിതങ്ങളെക്കുറിച്ച് ദീപിക നൽകിയ വാർത്തയ്ക്ക് ഒടുവിൽ പരിഹാരമാകുന്നു. മരച്ചില്ലകളും വിറകും കൂട്ടിയിട്ടതിനെതുടർന്നു പാന്പുകൾ തന്പടിച്ച അയ്യന്തോൾ സിവിൽ ലൈൻ പാർക്കിൽ പൊതുമരാമത്തുവകുപ്പ് ശുചീകരണപ്രവർത്തനങ്ങൾ ആരംഭിച്ചു. നേരത്തേ ദീപിക ചൂണ്ടിക്കാട്ടിയ വിഷയത്തിൽ അഡീഷണൽ ജില്ലാ മജിസ്ട്രേറ്റ് കൂടി ഇടപെട്ട് കർശനനിർദേശം നൽകിയതോടെയാണ് പ്രശ്നത്തിനു പരിഹാരമാകുന്നത്. കുട്ടികളുടെ പാർക്കിൽ കൂട്ടിയിട്ടിരിക്കുന്ന മരച്ചില്ലകളും വിറകും പാർക്കിൽ വരുന്ന കുട്ടികളുടെയും ജനങ്ങളുടെയും ആരോഗ്യത്തിനും ജീവനും ഗുരുതരഭീഷണിയായിട്ടും നടപടികൾ ഇല്ലാത്ത സാഹചര്യത്തിൽ പൊതുപ്രവർത്തകൻ ജെയിംസ് മുട്ടിക്കലും പാർക്കിലെ വാക്കേഴ്സ് ക്ലബ്ബും കളക്ടർക്കും ബന്ധപ്പെട്ട അധികാരികൾക്കും നിവേദനം നൽകിയിരുന്നു. പാർക്കിനുള്ളിൽ മതിലിനു സമീപത്തും നടപ്പാതകൾക്കും ചാരുബഞ്ചുകൾക്കും കുട്ടികളുടെ കളിയുപകരണങ്ങൾക്കും അരികിലും മരച്ചില്ലകളും മരത്തടികളും കുന്നുകൂട്ടി ഇട്ടതു കളിക്കാൻ വരുന്ന കുട്ടികളെയും വ്യായാമത്തിനു വരുന്നവരെയും ഒരുപോലെയാണ് അലട്ടിയിരുന്നത്. ഇതിനുപുറമെ ഉഗ്രവിഷമുള്ള പാന്പുകളെയും അടിക്കടി പിടിക്കാൻ തുടങ്ങിയിട്ടും നടപടി ഇല്ലാത്ത വിഷയത്തിനാണ് ഇപ്പോൾ പരിഹാരമാവുന്നത്.

പുഴയ്ക്കൽ - മുതുവറ റോഡുപണി വൈകാൻ സാധ്യത; കുരുക്ക് തുടരും

മുതുവറ: കേരള സ്റ്റേറ്റ് ട്രാന്‍സ്പോര്‍ട്ട് പ്രോജക്ട് (കെഎസ്ടിപി) ഏറ്റെടുത്തുനടത്തുന്ന തൃശൂര്‍ - കുറ്റിപ്പുറം റോഡിന്‍റെ നിര്‍മാണം ഇഴയുന്നു. രണ്ടുമാസത്തിനുള്ളിൽ പുഴയ്ക്കൽമുതൽ മുതുവറവരെ ഇരുവശങ്ങളും ഗതാഗതയോഗ്യമാക്കാൻ കഴിയുമെന്ന് ഉദ്യോഗസ്ഥർ പ്രതീക്ഷ പ്രകടിപ്പിക്കുന്നുണ്ടെങ്കിലും ദുരിതമനുഭവിക്കുന്ന യാത്രക്കാർക്കും നാട്ടുകാർക്കും അത്ര പ്രതീക്ഷ പോരാ. പുഴയ്ക്കലിൽനിന്നു മുതുവറയിലേക്കു വരുമ്പോൾ വലതുവശത്തെ കോൺക്രീറ്റിംഗ് പണികളാണ് നടന്നുവരുന്നത്. കോൺക്രീറ്റിംഗിനുള്ള മെഷീനുകളെല്ലാം മേഖലയിൽനിന്നു മാറ്റി, പണിക്കാരെ ഉപയോഗിച്ച് മാനുവലായാണ് ഇപ്പോൾ കോൺക്രീറ്റിംഗ്. അതുകൊണ്ടുതന്നെ പണി വൈകുമെന്നുറപ്പ്. മെഷീൻ ഉപയോഗിച്ച് കോൺക്രീറ്റിംഗ് നടത്തുമ്പോൾ ഇപ്പോൾ വാഹനങ്ങൾ കടന്നുപോകുന്ന ഭാഗത്തു മെഷീൻ നിർത്തേണ്ടിവരുമെന്നും അതു കൂടുതൽ ഗതാഗതതടസമുണ്ടാക്കുമെന്നുമാണ് ഉദ്യോഗസ്ഥർ കാരണം പറഞ്ഞത്. ശക്തമായ മഴയും റോഡുപണിയുടെ വേഗം കുറയ്ക്കുന്നുണ്ട്. എന്നാൽ, പത്തുദിവസത്തിനുള്ളിൽ മുതുവറ സെന്‍റർവരെയുള്ള വലതുഭാഗത്തെ പണികൾ പൂർത്തീകരിക്കാനാകുമെന്ന് ഉദ്യോഗസ്ഥർ പറയുന്നു. ഒരുദിവസം നൂറുമീറ്ററോളം ദൂരമാണ് പണിക്കാർ കോൺക്രീറ്റ് ചെയ്യുന്നത്. പത്തു കിലോമീറ്റർ അകലെയുള്ള കമ്പനിയിൽനിന്നു കോൺക്രീറ്റിംഗ് മിശ്രിതം കൊണ്ടുവരികയാണ്. അമല മുതൽ പുഴയ്ക്കൽവരെയുള്ള ഗതാഗതക്കുരുക്കിന്‍റെ ദുരിതം ഇനിയും നീളുമെന്നുറപ്പ്. ആംബുലൻസുകൾ ഉൾപ്പെടെ നിരവധി വാഹനങ്ങളാണ് ദിനംപ്രതി ഗതാഗതക്കുരുക്കിൽപ്പെടുന്നത്. ഇപ്പോൾ ഇരുദിശയിലേക്കു പോകുന്ന വാഹനങ്ങൾ ഒരുവശത്തുകൂടിയാണ് മുതുവറ മുതൽ പുഴയ്ക്കൽ വരെ പോകുന്നത്. കുരുക്കിനിടയിൽ ബസുകൾ ഉൾപ്പെടെ നിരവധി വാഹനങ്ങൾ കുത്തിക്കയറ്റി കയറുന്നതു ഗതാഗതക്കുരുക്ക് രൂക്ഷമാക്കുന്നുമുണ്ട്. ഇന്നലെ ഉച്ചയോടെ ഒരു ഓമ്നി വാനിന്‍റെ ഇരുചക്രങ്ങളും റോഡിൽനിന്നു തെന്നി നിർമാണം നടക്കുന്ന ഭാഗത്തേക്കു ചാടി. വാഹനം മറിയാതിരുന്നതിനാൽ ദുരന്തം ഒഴിവായി.

കൊച്ചിൻ ദേവസ്വം ബോർഡിന്‍റെ ആനകൾക്കു സുഖചികിത്സ

തൃശൂർ: കൊച്ചിൻ ദേവസ്വം ബോർഡിന്‍റെ ആനകൾക്ക് ആരോഗ്യസംരക്ഷണത്തിനും ശരീരപുഷ്ടിക്കുംവേണ്ടി ഒരുമാസത്തെ സുഖചികിത്സ ആരംഭിച്ചു. വടക്കുന്നാഥൻ ക്ഷേത്രാങ്കണത്തിൽ കൊച്ചിൻ ദേവസ്വം ബോർഡ് പ്രസിഡന്‍റ് കെ. രവീന്ദ്രൻ ഉദ്ഘാടനം നിർവഹിച്ചു. മരുന്നുചേരുവകളോടുകൂടിയ ചോറുരുള ഗജവീരൻ ദേവസ്വം ശിവകുമാറിനു നൽകിക്കൊണ്ടാണ് സുഖചികിത്സയ്ക്കു തുടക്കംകുറിച്ചത്. ദേവസ്വം ബോർഡ് ഉദ്യോഗസ്ഥരായ അഡ്വ.കെ.പി. അജയൻ, എസ.ആർ. ഉദയകുമാർ, കെ. സുനിൽകുമാർ, വി.എം. രമേഷ്ബാബു, എം. മനോജ്കുമാർ, വടക്കുന്നാഥൻ ദേവസ്വം മാനേജർ കെ.എസ്. രാജീവ്, കെ.എൻ. കൃഷ്ണൻകുട്ടി തുടങ്ങിയവർ സന്നിഹിതരായി. ദേവസ്വം എലിഫന്‍റ് കണ്‍സൾട്ടന്‍റ് ഡോ. പി.ബി. ഗിരിദാസിന്‍റെ മേൽനോട്ടത്തിലാണ് സുഖചികിത്സ നടത്തുന്നത്. ദേവസ്വം ബോർഡിന് ഇപ്പോൾ അഞ്ച് ആനകളാണുള്ളത്.

ട്രെയിനില്‍നിന്നു വീണ് മരിച്ച നിലയില്‍

വെള്ളിക്കുളങ്ങര‌: ഗോവയിലുള്ള ബന്ധുക്കളുടെ വീട്ടിലേക്കു പോകുന്നതിനിടെ വെള്ളിക്കുളങ്ങര സ്വദേശിയായ മധ്യവയസ്കനെ ട്രെയിനില്‍നിന്നു വീണ് മരിച്ചനിലയില്‍ കണ്ടെത്തി. വെള്ളിക്കുളങ്ങര സൊസൈറ്റിപ്പടി പാറേക്കാടന്‍ തോമസിന്‍റെ മകന്‍ ബേബി(57)യെയാണ് കര്‍ണാടകയിലെ കാര്‍വാറില്‍ റെയില്‍പ്പാളത്തിനുസമീപം ട്രെയിനില്‍നിന്നു വീണു മരിച്ചനിലയില്‍ കണ്ടെത്തിയത്. വ്യാഴാഴ്ച ഉച്ചയ്ക്ക് രണ്ടരയോടെയാണ് തൃശൂരില്‍നിന്നുള്ള ട്രെയിനില്‍ ബേബി മക്കളോടും ബന്ധുക്കളോടുമൊപ്പം ഗോവയ്ക്കു പോയത്. ഗോവയില്‍ ട്രെയിൻ ഇറങ്ങിയപ്പോഴാണ് ബേബിയെ കാണുന്നില്ലെന്ന വിവരം കൂടെയുള്ളവർ അറിഞ്ഞത്. തുടര്‍ന്നുനടത്തിയ അന്വേഷണത്തില്‍ ബേബിയെ മരിച്ചനിലയില്‍ കണ്ടെത്തുകയായിരുന്നു. സംസ്‌കാരം ഇന്ന് ഉച്ചകഴിഞ്ഞു 3.30 ന് കൊടുങ്ങ സെന്‍റ് സെബാസ്റ്റ്യന്‍സ് പള്ളിയില്‍. ഭാര്യ: ജാസ്മിന്‍ (കുവൈറ്റ്). മക്കള്‍: എല്‍റോയ്, എറിക്.

യുവാവ് ട്രെയിൻതട്ടി മരിച്ചനിലയിൽ

വടക്കാഞ്ചേരി: യുവാവിനെ ട്രെയിൻതട്ടി മരിച്ചനിലയിൽ കണ്ടെത്തി. അത്താണി കുറ്റിയാങ്കാവ് ക്ഷേത്രത്തിനുസമീപം റെയിൽവേ ട്രാക്കിനു സമീപത്തെ കുറ്റിക്കാട്ടിലാണ് മൃതദേഹം കണ്ടത്. ഇതരസംസ്ഥാനതൊഴിലാളിയാണെന്നു സംശയിക്കുന്നതായി പോലീസ് പറഞ്ഞു. വ്യാഴാഴ്ച രാത്രിയിലാണ് സംഭവം. 30 നും 40 നും ഇടയിൽ പ്രായം തോന്നിക്കും. കറുത്ത ടീ ഷർട്ടാണ് ധരിച്ചിരിക്കുന്നത്. വടക്കാഞ്ചേരി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

വള്ളം മറിഞ്ഞു കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

ചേറ്റുവ: ഹാർബർ അഴിമുഖത്തു വള്ളം മറിഞ്ഞു കാണാതായ മത്സ്യത്തൊഴിലാളിയുടെ ജഡം അഴീക്കോട് അഴിമുഖത്തിനു തെക്കുപടിഞ്ഞാറുഭാഗത്തു കടലിൽനിന്ന് ഇന്നലെ രാവിലെ കണ്ടെടുത്തു. കയ്പമംഗലം നെച്ചിപ്പറമ്പിൽ അഷറഫിന്‍റെ മകൻ അൻസിലി(18)ന്‍റെ മൃതദേഹം ബന്ധുക്കൾ തിരിച്ചറിഞ്ഞു. അഴീക്കോട് ഫിഷറീസ് മറൈൻ റസ്ക്യൂ ബോട്ടും അഴീക്കോട് തീരദേശപോലീസും തെരച്ചിൽ നടത്തിവരവേയാണ് ജഡം കണ്ടെടുത്തത്. മൃതദേഹം ബോട്ടിൽ അഴീക്കോട് എഫ്എൽഎസിൽ എത്തിച്ച് ആംബുലൻസിൽ കൊടുങ്ങല്ലൂർ താലൂക്ക് ആശുപത്രിയിലേക്കു മാറ്റി. പോസ്റ്റ്മോർട്ടത്തിനുശേഷം കൂരിക്കുഴിയിൽ മൃതദേഹം സംസ്കരിച്ചു. ഏതാനും മാസങ്ങൾക്കുമുമ്പാണ് അൻസിൽ മത്സ്യബന്ധനത്തിനു പോയിത്തുടങ്ങിയത്. സെബിനയാണ് അമ്മ. ബുധനാഴ്ച വൈകീട്ടാണ് ശക്തമായ കാറ്റിലും മഴയിലുംപെട്ട് അൻസിലും മറ്റു രണ്ടു മത്സ്യത്തൊഴിലാളികളും സഞ്ചരിച്ചിരുന്ന വള്ളം മറിഞ്ഞത്. കൂടെയുണ്ടായിരുന്ന മറ്റു രണ്ടുപേർ നീന്തിരക്ഷപ്പെട്ടിരുന്നു. മുനയ്ക്കക്കടവ് തീരദേശപോലീസ് മേൽനടപടികൾ സ്വീകരിച്ചു.

അജാനൂർ തീരത്ത് അഴിമുഖം അടച്ച് കടലേറ്റം തടയാൻ ജലവിഭവ വകുപ്പ്

കാഞ്ഞങ്ങാട്: രൂക്ഷമായ കടലേറ്റം മൂലം ഫിഷ് ലാൻഡിംഗ് സെന്‍റർ കെട്ടിടവും വീടുകളും ഭീഷണിയിലായ അജാനൂർ കടപ്പുറത്ത് നിലവിലുള്ള അഴിമുഖം അടച്ച് പുഴയെ വഴിതിരിച്ചുവിട്ട് കടലേറ്റം തടയാൻ ശ്രമം. ഇപ്പോൾ പുഴ കടലിലേക്ക് ചെന്നുചേരുന്ന ഭാഗത്ത് ജിയോട്യൂബുകൾ സ്ഥാപിച്ചാണ് അഴിമുഖം അടക്കുക. ജലവിഭവ വകുപ്പിന്‍റെ നേതൃത്വത്തിൽ ഇതിനായുള്ള നിർമാണസാമഗ്രികളെത്തിച്ച് പ്രവൃത്തികൾ തുടങ്ങി. അജാനൂർ തീരത്ത് കടലേറ്റം തടയാനുള്ള പ്രവൃത്തികൾക്കായി ജലവിഭവവകുപ്പ് കഴിഞ്ഞ ദിവസം 25 ലക്ഷം രൂപ അനുവദിച്ചിരുന്നു. ഈ തുക ഉപയോഗിച്ചാണ് പ്രവൃത്തികൾ നടത്തുന്നത്. ചിത്താരിപ്പുഴ സാധാരണഗതിയിൽ കടലിൽ ചേരുന്ന ഭാഗത്തുനിന്ന് അര കിലോമീറ്ററോളം തെക്കുഭാഗത്തേക്ക് ഗതിമാറിയൊഴുകിയതാണ് അജാനൂർ തീരത്ത് കടലേറ്റം രൂക്ഷമാക്കിയത്. ഫിഷ് ലാൻഡിംഗ് സെന്‍ററിന് സമീപത്തുകൂടി പുഴ കടലിൽ ചെന്നുചേരാൻ തുടങ്ങിയതോടെ ഇവിടെ പുതിയ അഴിമുഖം രൂപപ്പെടുകയും ഇതിന്‍റെ സമീപസ്ഥലങ്ങളിൽ കടൽ കരയിലേക്ക് വന്നുകയറുകയുമായിരുന്നു. ഈ പുതിയ അഴിമുഖമാണ് ജിയോ ട്യൂബുകൾ സ്ഥാപിച്ച് അടക്കുക. ഇതോടെ പുഴയെ വീണ്ടും വഴിതിരിച്ചുവിട്ട് അര കിലോമീറ്ററോളം വടക്കുമാറിയുള്ള പഴയ അഴിമുഖത്തിലൂടെ തന്നെ കടലിൽ ചെന്നുചേരുന്ന നിലയിലാക്കാനാണ് പദ്ധതി. 20 മീറ്റർ നീളവും മൂന്നുമീറ്റർ വ്യാസവുമുള്ള പോളിത്തീൻ ട്യൂബുകളാണ് ജിയോ ട്യൂബുകൾ. ഇവയ്ക്കുള്ളിലേക്ക് യന്ത്രസഹായത്തോടെ മണൽ പമ്പ് ചെയ്ത് നിറച്ചാണ് പുഴയ്ക്ക് കുറുകേ സ്ഥാപിക്കുക. അഞ്ചുവർഷം മുമ്പും ഇവിടെ കടലേറ്റം രൂക്ഷമായപ്പോൾ പുഴയെ വഴിതിരിച്ചുവിട്ടിരുന്നു. അന്ന് ജിയോ ട്യൂബുകൾ പോലുള്ള ആധുനിക സംവിധാനങ്ങൾ ലഭ്യമാകാത്തതിനാൽ നാട്ടുകാരുടെ അധ്വാനത്തിലൂടെ മണൽച്ചാക്കുകളും തെങ്ങോലകളും സ്ഥാപിച്ചാണ് അഴിമുഖം അടച്ചത്. ഫിഷ് ലാൻഡിംഗ് സെന്‍ററിലേക്കുള്ള റോഡ് ദിവസങ്ങൾക്കുമുമ്പേ കടലേറ്റത്തിൽ തകർന്നിരുന്നു. കടലേറ്റം തടയുന്നതിനായി പഞ്ചായത്തിന്‍റെ ചെലവിൽ നിർമിച്ച കോൺക്രീറ്റ് ഭിത്തിയും തകർന്നു. ഇപ്പോൾ കെട്ടിടത്തിന് രണ്ടു മീറ്റർ അടുത്തുവരെ തിരമാലകളെത്തുന്നുണ്ട്. റോഡ് തകർന്നതോടെ മറുകരയിലുണ്ടായിരുന്ന വീടുകളും കടലേറ്റ ഭീഷണിയിലായി. ചിത്താരിപ്പുഴ കടലിനടുത്തെത്തുമ്പോൾ വർഷാവർഷം ഗതിമാറി ഒഴുകുന്നതാണ്അജാനൂർ കടപ്പുറത്തെ അപകടാവസ്ഥയിലാക്കുന്നത്. പ്രശ്നത്തിന് ശാശ്വത പരിഹാരമായി ഇവിടെ ഒരു മിനി ഹാർബർ നിർമിക്കണമെന്ന ആവശ്യം വർഷങ്ങളായി ഉള്ളതാണ്. ഇതുമായി ബന്ധപ്പെട്ട് പലതവണ സർവേകളും വിദഗ്ധ സമിതികളുടെ സന്ദർശനവും സ്ഥലപരിശോധനയും നടന്നിരുന്നു. എല്ലാ റിപ്പോർട്ടുകളും അനുകൂലമായിട്ടും തുറമുഖത്തിന്‍റെ നിർമാണം തുടങ്ങാൻ വൈകുകയാണെന്ന് നാട്ടുകാർ ചൂണ്ടിക്കാട്ടുന്നു.

കാട്ടൂരിലെ കിണറുകളിലെ രാസമാലിന്യം : കേന്ദ്രമന്ത്രി സുരേഷ് ഗോപിയുടെ പ്രതിനിധി സ്ഥലം സന്ദർശിച്ചു

ഇരിങ്ങാലക്കുട: കിണറുകളിൽ രാസമാലിന്യം കണ്ടെത്തിയ കാട്ടൂർ മിനി ഇൻഡസ്ട്രിയൽ എസ്റ്റേറ്റിനു സമീപത്തെ വീടുകൾ കേന്ദ്രമന്ത്രി സുരേഷ് ഗോപിയുടെ പ്രതിനിധി രാജേഷ് ആർ. നായർ സന്ദർശിച്ചു. പരിസരവാസികൾ തങ്ങൾ അനുഭവിക്കുന്ന ദുരിതങ്ങൾ ബോധ്യപ്പെടുത്തി. പ്രശ്നങ്ങൾ കേന്ദ്രമന്ത്രിയുടെ ശ്രദ്ധയിൽപ്പെടുത്തുമെന്നും പരിഹാരം ഉണ്ടാക്കുന്നതിനു നടപടി സ്വീകരിക്കുമെന്നും അദ്ദേഹം ഉറപ്പുനൽകി. ജനകീയ കുടിവെള്ളസംരക്ഷണസമിതിയുടെ പരാതിയെത്തുടർന്നായിരുന്നു സന്ദർശനം. ഇൻഡസ്ട്രിയൽ എസ്റ്റേറ്റിനുള്ളിൽ പ്രവർത്തിക്കുന്ന രണ്ടു കന്പനികളിൽനിന്നാണു രാസമാലിന്യം സമീപപ്രദേശങ്ങളിലെ കുടിവെള്ളസ്രോതസുകളിലേക്കു വ്യാപിക്കുന്നതെന്നു പരിസരവാസികൾ പറഞ്ഞു. പത്തുദിവസമായി പ്രദേശവാസികൾ മിനി എസ്റ്റേറ്റിനുമുന്നിൽ റിലേ നിരാഹാരസമരം നടത്തുകയാണ്. ഇന്നു രാവിലെ കാട്ടൂർ പഞ്ചായത്ത് ഓഫീസിലേക്കു നടത്തുന്ന പ്രതിഷേധമാർച്ച് കവി ആതിര തീക്ഷ്ണ ഉദ്ഘാടനം ചെയ്യും. വിവിധ രാഷ്ട്രീയകക്ഷിനേതാക്കൾ പ്രസംഗിക്കും.

രാസവളം വിലവർധന;തൃശൂരിലെ കോൾകൃഷിക്ക് ഇരുട്ടടി

തൃശൂർ: രാസവളങ്ങളുടെ വിലവർധന തൃശൂരിലെ നെൽകൃഷിമേഖലയ്ക്കു വൻതിരിച്ചടി. കാലാസ്ഥാ വ്യതിയാനം, വിത്തിന്‍റെ ഗുണമേൻമക്കുറവ്, കഠിനമായ ചൂട്, മണ്ണിന്‍റെ പുളിപ്പ് എന്നിവകൊണ്ടു വിളലഭ്യതയിൽ കാര്യമായ കുറവുണ്ടാകുന്നതിനൊപ്പം രാസവളങ്ങളുടെ വില കുതിച്ചുയർന്നതു കോൾകർഷകർക്കു കടുത്ത പ്രതിസന്ധിയാകും. ഏക്കറിന് 25,000 രൂപവരെയായിരുന്നു കൃഷിച്ചെലവ്. കീടനാശിനി, കുമിൾനാശിനി, കളനാശിനി എന്നിവയ്ക്കൊപ്പം വളത്തിന്‍റെ വിലയുമുയർന്നതോടെ ചെലവ് 40,000 ആയി ഉയർന്നെന്നു കർഷകർ പറഞ്ഞു. പായ്ക്കറ്റിന് 1550 രൂപയായിരുന്ന പൊട്ടാഷിന് 1800 രൂപയായും 1450 രൂപയുണ്ടായിരുന്ന 16:16:15 കൂട്ടുവളത്തിന് 1600 രൂപയായും ഫാക്ടംഫോസ് 1300ൽനിന്ന് 1425 രൂപയായും വില ഉയർന്നു. രാസവളങ്ങളിലേറെയും വിദേശത്തുനിന്ന് ഇറക്കുമതി ചെയ്യുന്നതാണ്. കേന്ദ്രസർക്കാർ സബ്സിഡി കുറച്ചതിനൊപ്പം രാജ്യാന്തര മാർക്കറ്റിൽ വിലകൂടിയതും വളംവിലയിൽ പ്രതിഫലിച്ചു. 266.50 രൂപയാണു യൂറിയയ്ക്കെങ്കിലും ആവശ്യത്തിനു കിട്ടാനില്ല. ദക്ഷിണേന്ത്യയിൽ കൂടുതൽ ഉപയോഗിക്കുന്ന പൊട്ടാഷ്, ഫാക്ടംഫോസ്, 16:16 എന്നിവയ്ക്കുള്ള സബ്സിഡി വെട്ടിക്കുറച്ചു. ഏറ്റവും കൂടുതൽ ഉപയോഗിക്കുന്ന ഫാക്ടംഫോസിന് അന്പതുകിലോയുടെ ചാക്കിന് 125 രൂപയാണ് ഉയർന്നത്. ഇറക്കുമതി ചെയ്യുന്ന ഫോസ്ഫറിക് ആസിഡിന്‍റെ വില ഉയർന്നതാണു കാരണം. ചൈന, ഇസ്രായേൽ എന്നിവിടങ്ങളിൽനിന്നാണ് കൂടുതൽ ഇറക്കുമതി. ഫാക്ടംഫോസ്, പൊട്ടാഷ്, യൂറിയ എന്നിവ മൂന്നുവട്ടം ഉപയോഗിച്ചാൽ നെൽക്കൃഷിക്കു തൊഴിലാളിക്കുള്ള കൂലിക്കുപുറമേ ഏക്കറിനു രണ്ടായിരം രൂപയോളം അധികച്ചെലവു വരും. തെങ്ങിനു പ്രതിവർഷം മൂന്നുമുതൽ അഞ്ചുകിലോവരെ രാസവളം വേണം. ഒരേക്കറിൽ ശരാശരി 75 തെങ്ങുകൾക്ക് 22,000 രൂപയാകും. പച്ചക്കറികൃഷിക്ക് പ്രതിവർഷം ഏക്കറിനു 4000 രൂപയും റബറിനു മൂവായിരം രൂപയും ചെലവേറും. കേന്ദ്രസർക്കാർ 2023ൽ 65,199 കോടി സബ്സി നൽകിയിരുന്നത് 2024ൽ 52,310 കോടിയായും 2025ൽ 49,000 കോടിയായും വെട്ടിച്ചുരുക്കി. 2017 മുതൽ സബ്സിഡി നേരിട്ടു കർഷകർക്കു നൽകാതെ രാസവള കന്പനികൾക്കാണു നൽകുന്നത്. കർഷകനു നേരിട്ട് ബാങ്ക് അക്കൗണ്ടിലേക്കു സബ്സിഡി നൽകുന്ന സംവിധാനം വരുമെന്നു പ്രഖ്യാപിച്ചെങ്കിലും നടപ്പാക്കിയിട്ടില്ല. പ്രതിസന്ധി ഡീലർമാർക്കും വിലവർധനയ്ക്കൊപ്പം വളംലഭ്യത കുറഞ്ഞതു ഡീലർമാരെയും പ്രതിസന്ധിയിലാക്കുന്നെന്ന് അസോസിയേഷൻ ഓഫ് ഫെർട്ടിലൈസേഴ്സ് - പെസ്റ്റിസൈഡ്സ് ആൻഡ് സീഡ്സ് ഡീലേഴ്സ് അസോസിയേഷൻ തൃശൂർ സെക്രട്ടറി കെ.ആർ. സദാനന്ദൻ പറഞ്ഞു. നേരത്തേ, വർഷത്തിൽ രണ്ടുവട്ടമാണു വളംവില നിശ്ചയിച്ചിരുന്നത്. സബ്സിഡി പ്രഖ്യാപിക്കുന്പോൾ വളംവിലയിൽ കുറവുണ്ടെങ്കിൽമാത്രമാണ് വർധിപ്പിക്കുക. സബ്സിഡിയെ അടിസ്ഥാനമാക്കിയുള്ള വളംവില നിശ്ചയിക്കൽ അവസാനിപ്പിച്ചതോടെ രാജ്യാന്തരവിപണിയിലെ വിലവ്യത്യാസം നേരിട്ടുപ്രതിഫലിക്കാൻ തുടങ്ങി. വടക്കേ ഇന്ത്യൻ കൃഷിയിടങ്ങളിൽ ഏറ്റവും കൂടുതൽ ഉപയോഗിക്കുന്നതു യൂറിയ ആയതിനാൽ സബ്സിഡിയിൽ വൻ വെട്ടിക്കുറവു വരുത്തിയിട്ടില്ലെന്നും അസോസിയേഷൻ ചൂണ്ടിക്കാട്ടി. സ്വന്തം ലേഖകൻ

തൃശൂർ കോർപറേഷനു സ്റ്റാർ റേറ്റിംഗ്, സ്വച്ഛ് സർവേയിൽ 58-ാം റാങ്ക്

തൃശൂർ: പാൻ ഇന്ത്യൻ ശുചിത്വസർവേയായ സ്വച്ഛ് സർവേക്ഷൻ സർവേയിൽ 58-ാം റാങ്കിലേക്കുയർന്ന് തൃശൂർ കോർപറേഷൻ. ഇതോടൊപ്പം മാലിന്യസംസ്കരണരംഗത്തു ഗാർബേജ് ഫ്രീ സിറ്റി പദവിയിൽ സ്റ്റാർ റേറ്റിംഗോടെയും തൃശൂർ തെരഞ്ഞെടുക്കപ്പെട്ടതായി മേയർ എം.കെ. വർഗീസ് അറിയിച്ചു. കഴിഞ്ഞവർഷം ദേശീയ റാങ്കിംഗിൽ 333-ാം സ്ഥാനമായിരുന്നു. സ്വച്ഛ് ഭാരത് അഭിയാൻ പദ്ധതിയുടെ കീഴിൽ കേന്ദ്ര നഗരവികസനമന്ത്രാലയം ഗ്രാമങ്ങളിലും നഗരങ്ങളിലും തുറസായ സ്ഥലങ്ങൾ മലമൂത്രവിസർജനരഹിതമാക്കുകയെന്ന ലക്ഷ്യത്തോടെയാണു സ്വച്ഛ് സർവേക്ഷൻ സർവേ നടത്തുന്നത്. മൊത്തം നാലായിരത്തോളം നഗരങ്ങളിലാണു സർവേ. പൊതുസ്ഥലങ്ങളിൽ മാലിന്യം കൂടിക്കിടക്കുന്നത് ഒഴിവാക്കുക, വീടുകളിൽനിന്നു മാലിന്യം കൃത്യമായ ഇടവേളകളിൽ ശേഖരിക്കുക, ശേഖരിച്ച മാലിന്യം തരംതിരിച്ച് ശാസ്ത്രീയമായി സംസ്കരിക്കുക തുടങ്ങിയ പ്രവർത്തനങ്ങൾ വിലയിരുത്തിയാണ് കോർപറേഷനെ ഗാർബേജ് ഫ്രീ സിറ്റി പദവിയിലേക്കു സ്റ്റാർ റേറ്റിംഗോടെ തെരഞ്ഞെടുത്തത്. ഇതോടൊപ്പം മാലിന്യസംസ്കരണത്തിലെ പൊതുജനാഭിപ്രായം സർവേ വഴി ശേഖരിക്കുകയും 65,000ത്തിലധികം വോട്ടുനേടി സംസ്ഥാനത്ത് ഒന്നാംസ്ഥാനത്ത് എത്തുകയും ചെയ്തു. ദേശീയതലത്തിൽ കാറ്റഗറി അടിസ്ഥാനത്തിൽ എട്ടാംസ്ഥാനവും ലഭിച്ചു. പൊതുഇടങ്ങളിൽ മലമൂത്രവിസർജനം നടത്തുന്നില്ലെന്ന് ഉറപ്പാക്കുന്ന ഒഡിഎഫ് പ്ലസ് ബഹുമതി ഈ വർഷവും നിലനിർത്താൻ സാധിച്ചു. ഡൽഹി വിജ്ഞാൻഭവനിൽ നടന്ന ചടങ്ങിൽ രാഷ്‌ട്രപതി ദ്രൗപതി മുർമുവാണു പ്രഖ്യാപനം നടത്തിയതെന്നും മേയർ പത്രക്കുറിപ്പിൽ വ്യക്തമാക്കി.

ചിമ്മിനി ഇക്കോ ടൂറിസം: 50 ലക്ഷം അനുവദിച്ചു

തൃശൂർ: വിനോദസഞ്ചാരവകുപ്പിന്‍റെ ചിമ്മിനി ഡാം ഇക്കോ ടൂറിസം പദ്ധതിയെ വരന്തരപ്പിള്ളി ഗ്രാമപഞ്ചായത്തിന്‍റെ ടൂറിസം ഡെസ്റ്റിനേഷൻ ചാലഞ്ച് പദ്ധതിയിൽ ഉൾപ്പെടുത്തി 50 ലക്ഷം രൂപ അനുവദിച്ചെന്നു കെ.കെ. രാമചന്ദ്രൻ എംഎൽഎ. വനം വകുപ്പ് പീച്ചി വൈൽഡ്‌ലൈഫ് വാർഡൻ മുഖേന തയാറാക്കിയ പ്രോജക്ട് റിപ്പോർട്ടിന്‍റെ അടിസ്ഥാനത്തിലാണു തുക അനുവദിച്ചത്. തദ്ദേശസ്വയംഭരണ സ്ഥാപനങ്ങളുടെ പങ്കാളിത്തംവഴി ടൂറിസം കേന്ദ്രം വികസിപ്പിക്കുന്നതിനു നടപ്പാക്കുന്ന പദ്ധതിയാണു ഡെസ്റ്റിനേഷൻ ചാലഞ്ച്. എംഎൽഎയുടെ ആസ്തിവികസന ഫണ്ടിൽനിന്ന് 50 ലക്ഷം രൂപ പദ്ധതിക്ക് അനുവദിച്ചിരുന്നു. കേരള കണ്‍സ്ട്രക്‌ഷൻ കോർപറേഷനാണ് പ്രവൃത്തിയുടെ നിർവഹണ ഏജൻസി. സംസ്ഥാന ബജറ്റിലും പദ്ധതിക്കായി ഒരു കോടി രൂപ അനുവദിച്ചു. ഇതിൽ 20 ലക്ഷം നീക്കിവച്ചു. വരന്തരപ്പിള്ളി പഞ്ചായത്തിന്‍റെ ടോയ്‌ലറ്റ് കെട്ടിടത്തിന്‍റെ നിർമാണവും അവസാന ഘട്ടത്തിലാണ്. നവകേരളനിർമിതിയുടെ ഭാഗമായി പുതുക്കാട് മണ്ഡലത്തിൽനിന്നു സമർപ്പിച്ച പദ്ധതിയിൽ ഉൾപ്പെടുത്തി ഒരു കോടി ലഭ്യമാക്കുന്നതിനും നടപടി സ്വീകരിക്കുന്നുണ്ടെന്നും എംഎൽഎ അറിയിച്ചു.

കൂടല്‍മാണിക്യംക്ഷേത്രത്തില്‍ അംഗുലീയാങ്കംകൂത്ത് പുറപ്പാട്

ഇരിങ്ങാലക്കുട: കൂടല്‍മാണിക്യംക്ഷേത്രത്തില്‍ കൂത്തടിയന്തരത്തിന്‍റെ ഭാഗമായി അംഗുലീയാങ്കം കൂത്ത് പുറപ്പാട് നടന്നു. ശ്രീരാമന്‍റെ പ്രതീകമായി സീതയ്ക്ക് കാഴ്ചവയ്ക്കാനുളള അംഗുലീയകം(മോതിരം) അടയാളമായി ധരിച്ച് സമുദ്രംചാടിക്കടന്ന് ലങ്കയിലെത്തിയ ഹനൂമാന്‍റെ പുറപ്പാടാണ് അരങ്ങേറിയത്. പുറപ്പാടുദിവസം, മേല്‍ശാന്തി കൂത്തമ്പലത്തില്‍വന്ന് രംഗപൂജചെയ്യും. മംഗളവാദ്യഘോഷത്തോടെ ഹനൂമദ് വേഷധാരിയായ ചാക്യാര്‍ രംഗത്തുപ്രവേശിച്ച് സമുദ്രംകടന്ന കഥയും ലങ്കാപുരി വര്‍ണനയും അഭിനയിക്കും. തുടര്‍ന്ന് നമ്പ്യാരുടെ കുത്തുവിളക്കിന്‍റെയും മാരാരുടെ ശംഖധ്വനിയോടെയും ഒപ്പം ദേവദര്‍ശനംനടത്തി അഭീഷ്ടസിദ്ധിക്കായ് പ്രാര്‍ഥിക്കും. ഹനുമാന്‍റെ വേഷത്തില്‌ ചാക്യാര്‍ കൂത്തമ്പലത്തില്‍നിന്ന് പുറത്തുവന്ന് ശ്രീകോവിലിലെ സോപാനപ്പടിയില്‍നിന്ന് തൊഴുത് മേല്‍ശാന്തിയില്‍നിന്ന് തീര്‍ഥംവാങ്ങുന്ന ചടങ്ങ് കേരളത്തിലെ അപൂര്‍വം ക്ഷേത്രങ്ങളിലെ നിലവിലുള്ളു. തുടര്‍ന്നുള്ള 11 ദിവസങ്ങളിലായി ഹനൂമാന്‍ രാമായണകഥ ഘട്ടംഘട്ടമായി അഭിനയിക്കും. ഡോ. അമ്മന്നൂര്‍ രജനീഷ് ചാക്യാര്‍ ഹനൂമാനായി അരങ്ങില്‍വന്നു. പാലപ്പുറം നമ്പ്യാര്‍മഠം നേപഥ്യ ജിനേഷ് നമ്പ്യാര്‍ മിഴാവിലും ഇന്ദിര നങ്ങ്യാര്‍ താളംപിടിച്ചും പങ്കുചേര്‍ന്നു. കൂടല്‍മാണിക്യം ദേവസ്വം ചെയര്‍മാന്‍ അഡ്വ. സി.കെ. ഗോപി, ഭരണസമിതി അംഗങ്ങളായ അഡ്വ. അജയ്കുമാര്‍, ഡോ. മുരളി ഹരിതം, ഗുരു അമ്മന്നൂര്‍ കുട്ടന്‍ചാക്യാര്‍ എന്നിവര്‍ ചടങ്ങില്‍ സന്നിഹിതരായി.

വീട് ഇടിഞ്ഞുവീണ് രണ്ടു കുട്ടികൾക്കു പരിക്ക്

നടത്തറ: വീടിനു വിള്ളൽ വീണതിനെത്തുടർന്നു താമസംമാറിയ കുടുംബം സാധനങ്ങൾ എടുക്കാൻ തിരികെയെത്തിപ്പോൾ വീട് ഇടിഞ്ഞുവീണ് രണ്ടു കുട്ടികൾക്കു പരിക്ക്. കൊഴുക്കുള്ളി പട്ടിളംമൂലയിൽ ചേന്ദ്ര രാജേന്ദ്രന്‍റെ വീടാണു തകർന്നുവീണത്. പേരക്കുട്ടികളായ വരുണ്‍(എട്ട്), വസുദേവ്(11) എന്നിവർക്കാണു പരിക്കേറ്റത്. കാലിനു പരിക്കേറ്റ ഇരുവരെയും തൃശൂർ ജനറൽ ആശുപത്രിയിൽ പ്രവേശിപ്പിച്ചു. ഗവ. എൽപി സ്കൂളിലെ വിദ്യാർഥികളാണ്. വിള്ളൽ കണ്ടതിനെത്തുടർന്ന് രാജേന്ദ്രനും കുടുംബവും കഴിഞ്ഞദിവസമാണ് ഇവിടെനിന്നു താമസം മാറ്റിയത്. ഇന്നലെ രാവിലെ സാധനങ്ങൾ എടുക്കാൻ വീട്ടിലേക്കുവന്നപ്പോഴാണ് ഇടിഞ്ഞുവീണത്.

സി ഡിറ്റ് ജീവനക്കാരെ പിരിച്ചുവിട്ട പ്രശ്നത്തിൽ മുഖ്യമന്ത്രി ഇടപെടണം: കെ.ജി. ശിവാനന്ദൻ

തൃശൂർ: സംസ്ഥാന പൊതുമേഖലാസ്ഥാപനമായ സി ഡിറ്റിൽ 228 ജീവനക്കാരെ അകാരണമായി പിരിച്ചുവിട്ട ഡയറക്ടറുടെ നടപടി തൊഴിലാളിവിരുദ്ധവും തൊഴിൽനിയമലംഘനവുമാണന്നു സിപിഐ ജില്ലാ സെക്രട്ടറിയും എഐടിയുസി സംസ്ഥാന സെക്രട്ടറിയുമായ കെ.ജി. ശിവാനന്ദൻ. എഐടിയുസിയുടെ നേതൃത്വത്തിൽ കോർപറേഷനുമുന്പിൽ നടത്തിയ സമരസന്ദേശസംഗമം ഉദ്ഘാടനം ചെയ്യുകയായിരുന്നു അദ്ദേഹം. 18 വർഷംവരെ ജോലിചെയ്തവരെയെല്ലാം ഒറ്റയടിക്കു ജോലിയിൽനിന്ന് ഒഴിവാക്കിയിരിക്കുന്നു. എൽഡിഎഫ് സർക്കാരിന്‍റെ പ്രഖ്യാപിതനയത്തിനു വിരുദ്ധമാണിത്. വിഷയത്തിൽ മുഖ്യമന്ത്രി അടിയന്തരമായി ഇടപെടണമെന്നും പിരിച്ചുവിട്ടവരുടെ തൊഴിൽസുരക്ഷ ഉറപ്പുവരുത്തണമെന്നും അദ്ദേഹം ആവശ്യപ്പെട്ടു. എഐടിയുസി ജില്ലാ പ്രസിഡന്‍റ് ടി.കെ. സുധീഷ് അധ്യക്ഷത വഹിച്ചു. എഐടിയുസി നേതാക്കളായ പി.കെ. കൃഷ്ണൻ, ജെയിംസ് റാഫേൽ, എം. രാധാകൃഷ്ണൻ, കെ.കെ. ശിവൻ, പി.ഡി. റെജി, വി.ആർ. മനോജ്, എ.എസ്. സുരേഷ് ബാബു, സ്മിത വിജയൻ, പി.പി. ശൈലേഷ്, എ.ആർ. രജിത്ത്, പി. കൃഷ്ണനുണ്ണി, സി.ആർ. റോസിലി എന്നിവർ പ്രസംഗിച്ചു.

പിണറായിസര്‍ക്കാര്‍ വെന്‍റിലേറ്ററില്‍: ടി.എ. അഹമ്മദ് കബീര്‍

തൃശൂര്‍: കേരളത്തില്‍ രാഷ്ട്രീയമാറ്റം അനിവാര്യമാണെന്നു മുസ്‌ലിംലീഗ് അഖിലേന്ത്യ സെക്രട്ടറി ടി.എ. അഹമ്മദ് കബീര്‍. ഇടതുമുന്നണി സര്‍ക്കാരിന്‍റെ ജനദ്രോഹഭരണത്തിനെതിരേ കളക്‌ടറേറ്റിനുമുന്പിൽ നടത്തിയ സമരസംഗമം ഉദ്ഘാടനം ചെയ്യുകയായിരുന്നു അദ്ദേഹം. ജനങ്ങള്‍ക്കതു ബോധ്യപ്പെട്ടതിനു തെളിവാണ് അടുത്തയിടെ നടന്ന എല്ലാ തെരഞ്ഞെടുപ്പുകളിലും യുഡിഎഫിനുണ്ടായ വലിയ മുന്നേറ്റം. എല്ലാ മേഖലയിലും പരാജയപ്പെട്ട പിണറായി സര്‍ക്കാര്‍ വെന്‍റിലേറ്ററിലാണ്. കേന്ദ്രഭരണകൂടം ജനങ്ങളെ ഭിന്നിപ്പിക്കാന്‍ ശ്രമിക്കുന്നുവെന്നും അഹമ്മദ് കബീര്‍ പറഞ്ഞു. ജില്ലാ പ്രസിഡന്‍റ് സി.എ. മുഹമ്മദ് റഷീദ് അധ്യക്ഷനായി. സംസ്ഥാന വൈസ് പ്രസിഡന്‍റ് സി.എച്ച്. റഷീദ്, സെക്രട്ടറി പി.എം. സാദിക്കലി, ജില്ലാ ജനറല്‍ സെക്രട്ടറി പി.എം. അമീര്‍ എന്നിവര്‍ പങ്കെടുത്തു.

വിദ്യാഭ്യാസമൂല്യങ്ങൾ തകർക്കാനുള്ള ശ്രമം ചെറുക്കും: എഐഎസ്എഫ്

തൃശൂർ: ഗവർണറെ ഉപയോഗിച്ചു വിദ്യാഭ്യാസമേഖലയിലെ മൂല്യങ്ങൾ തകർക്കാനുള്ള ശ്രമം ചെറുക്കുമെന്ന് എഐഎസ്എഫ് ദേശീയസെക്രട്ടറി പി. കബീർ. വിവിധ ആവശ്യങ്ങളുന്നയിച്ചു തൃശൂർ ജില്ലാ കമ്മിറ്റിയുടെ നേതൃത്വത്തിൽ ഡിഇഒ ഓഫീസിലേക്കു നടത്തിയ അവകാശപത്രിക മാർച്ച് ഉദ്ഘാടനം ചെയ്തു പ്രസംഗിക്കുകയായിരുന്നു കബീർ. എഐഎസ്എഫ് ജില്ലാ പ്രസിഡന്‍റ് കെ.എസ്. അഭിറാം, മുൻ സംസ്ഥാന പ്രസിഡന്‍റ് ടി. പ്രദീപ്കുമാർ, സംസ്ഥാന ജോയിന്‍റ് സെക്രട്ടറി കെ.എ. അഖിലേഷ്, സംസ്ഥാന എക്സിക്യൂട്ടീവ് അംഗം അർജുൻ മുരളിധരൻ, എംഐവൈഎഫ് ജില്ലാ സെക്രട്ടറി പ്രസാദ് പറേരി, ജില്ലാ പ്രസിഡന്‍റ് ബിനോയ് ഷബീർ എന്നിവർ പ്രസംഗിച്ചു.

ചാരായവില്പന: ഒരാൾ അറസ്റ്റിൽ

അതിരപ്പിള്ളി: ചാരായം വില്പന നടത്തിയ ഒരാളെ എക്സൈസ് പിടികൂടി. വെറ്റിലപ്പാറ വെളിയത്തുപറമ്പിൽ ജിനേഷ്കുമാറി(47)നെയാണ് എക്സൈസ് അറസ്റ്റുചെയ്തത്. ഏഴു ലിറ്റർ ചാരായവുമായി പോകുമ്പോഴാണ് പിടികൂടിയത്. പ്രതിയുടെ പുരയിടത്തിൽനിന്നും 100 ലിറ്റർ വാഷും വാറ്റുപകരണങ്ങളും കണ്ടെടുത്തു. എക്സൈസ് ഇൻസ്പെക്ടർ അനീഷ് കുമാർ പുത്തില്ലൻ,അസി. എക്സൈസ് ഇൻസ്പെക്ടർമാരായ അനിൽകുമാർ, ജെയ്സൺ ജോസ്, സിവിൽ എക്സൈസ് ഓഫീസർ രാകേഷ്, പിങ്കി മോഹൻദാസ്, മുഹമ്മദ് ഷാൻ എന്നിവർ റെയ്ഡിനു നേതൃത്വം നൽകിയത്.

എംഎൽഎയുടെ അവഗണന: പ്രതിഷേധസംഗമം നാളെ

കാടുകുറ്റി: വികസനകാര്യങ്ങളിൽ കാടുകുറ്റി ഗ്രാമപഞ്ചായത്തിനെ സനീഷ്കുമാർ ജോസഫ് എംഎൽഎ അവഗണിക്കുന്നുവെന്നാരോപിച്ച് എൽഡിഎഫ് കാടുകുറ്റി പഞ്ചായത്ത് ഭരണസമിതിയുടെ നേതൃത്വത്തിൽ പ്രതിഷേധസംഗമം സംഘടിപ്പിക്കും. നാളെ വൈകീട്ട് 4.30ന് കാടുകുറ്റി ബസ് സ്റ്റേഷൻ പരിസരത്ത് സിപിഎം ചാലക്കുടി ഏരിയ സെക്രട്ടറി കെ.എസ്. അശോകൻ ഉദ്ഘാടനംചെയ്യും. 99 ലക്ഷം രൂപ ചെലവിൽ ബസ് സ്റ്റാൻഡ് കം ഷോപ്പിംഗ് കോപ്ലക്‌സിനു എല്ലാ അനുമതിയുംവാങ്ങി, പഞ്ചായത്ത് നാലുലക്ഷത്തോളം രൂപ ചെലവുചെയ്‌ത്‌ ടെൻഡർവച്ച് നിർമാണംതുടങ്ങിയ ഘട്ടത്തിൽ കോൺഗ്രസും എംഎൽഎയും ഇടപെട്ട് നിർത്തിവയ്പിച്ചതായി എൽഡിഎഫ് ആരോപിച്ചു. സംസ്ഥാന ബജറ്റിലൂടെ കാടുകുറ്റിക്ക് ലഭ്യമായ ഒന്നരക്കോടി രൂപയുടെ പുഴയോരം കെട്ടിസംരക്ഷിക്കൽ പദ്ധതി നിർമാണത്തിന്‍റെ പ്രാരംഭഘട്ടത്തിൽതന്നെ നിർത്തിവപയ്പിച്ചു. കാടുകുറ്റി പഞ്ചായത്തിലെ റോഡുകളിലെ അനുബന്ധപ്രവൃത്തികളിൽ എംഎൽഎ ശ്രദ്ധിക്കുന്നില്ല. എംഎൽഎ ആസ്‌തിവികസന ഫണ്ടും പദ്ധതിയും നൽകുന്ന കാര്യത്തിലും കാടുകുറ്റിയെ അവഗണിക്കുകയാണ്. കൊരട്ടിച്ചാൽ പദ്ധതിയുടെ രണ്ടാംഘട്ടത്തോട് മുഖംതിരിച്ചുനിൽക്കുന്ന എംഎൽഎ ദേശീയപാത നിർമാണ പ്രവൃത്തികളെ തുടർന്ന് വാഹനങ്ങൾ വഴിതിരിച്ചുവിടുന്ന ഗ്രാമീണ റോഡുകൾ തകർന്നിട്ടും ഇടപെടുന്നില്ലെന്ന് എൽഡിഎഫ് അംഗങ്ങൾ കുറ്റപ്പെടുത്തി. അനുവദിക്കപ്പെട്ട ആറങ്ങാലി പാലവും തൈക്കൂട്ടംപാലവും നടപ്പിലാക്കാൻ യാതൊന്നും എം.എൽഎ ചെയ്യുന്നില്ലെന്നും വാർത്താസമ്മേളനത്തിൽ പങ്കെടുത്ത ഗ്രാമപഞ്ചായത്ത് പ്രസിഡന്‍റ് പ്രിൻസി ഫ്രാൻസിസ്, വൈസ് പ്രസിഡന്‍റ് പി.സി. അയ്യപ്പൻ, ഭരണസമിതി അംഗങ്ങളായ പി. വിമൽകുമാർ, രാഖി സുരേഷ്, വർക്കി തേലക്കാട്ട്, മോഹിനി കുട്ടൻ എന്നിവർ പറഞ്ഞു.

ഇരിങ്ങാലക്കുട വെസ്റ്റ് ലയണ്‍സ് ക്ലബ് ഭാരവാഹികള്‍ സ്ഥാനമേറ്റു

ഇരിങ്ങാലക്കുട: വെസ്റ്റ് ലയണ്‍സ് ക്ലബിന്റെ 2025- 26ലെ ഭാരവാഹികള്‍ സ്ഥാനമേറ്റെടുത്തു. ലയണ്‍ ഡിസ്ട്രിക്ട് 318 ഡി.വൈസ് ഡിസ്ട്രിക്ട് ഗവര്‍ണര്‍ ലയണ്‍ സുരേഷ് കെ.വാരിയര്‍ സത്യവാചകം ചൊല്ലിക്കൊടുത്തു. ചടങ്ങില്‍ പ്രസിഡന്‍റ് കെ.എ. ജോസഫ് അധ്യക്ഷതവഹിച്ചു. സി.ജെ. ആന്‍റോ -പ്രസിഡന്‍റ്, ഷാജു കണ്ടംകുളത്തി- സെക്രട്ടറി, കെ.എ. ജോസഫ്- ട്രഷറര്‍ എന്നിവര്‍ സ്ഥാനമേറ്റു. പിഎംജെഎഫ് അംഗങ്ങളായ എന്‍. വിശ്വനാഥന്‍, കെ.കെ. പോള്‍സണ്‍, എംജെഎഫ് അംഗമായ അഡ്വ. അജയ്കുമാര്‍ എന്നിവരെ ആദരിച്ചു. ഉന്നതവിജയം കൈവരിച്ച ലയണ്‍സ് കുടുംബത്തിലെ കുട്ടികള്‍ക്ക് സോണ്‍ ചെയര്‍മാന്‍ ഹാരിഷ് പോള്‍ സമ്മാനങ്ങള്‍ വിതരണം ചെയ്തു. ഈ വര്‍ഷത്തെ സര്‍വ്വീസ് പ്രൊജക്ട് ഉദ്ഘാടനം റീജിയണ്‍ ചെയര്‍മാന്‍ റോയ് അലുക്ക നിര്‍വഹിച്ചു. ഡിസ്ട്രിക്ട് കോ- ഓര്‍ഡിനേറ്റര്‍മാരായ ബിജു പൊറത്തൂര്‍, ഷാജന്‍ ചക്കാലക്കല്‍, സെക്രട്ടറി ഷാജു കണ്ടംകുളത്തി എന്നിവര്‍ സംസാരിച്ചു.

അങ്കണവാടി കെട്ടിടം ഉദ്ഘാടനം 20ന്

ചാലക്കുടി: നഗരസഭ ഏഴാംവാർഡിൽ 56 ലക്ഷം രൂപ ചെലവിൽ നിർമിച്ച അനുഗ്രഹ അങ്കണവാടി കെട്ടിടത്തിന്‍റെ ഉദ്ഘാടനം 20ന് അഞ്ചിന് നിയമസഭ പ്രതിപക്ഷനേതാവ് വി.ഡി. സതീശൻ നിർവഹിക്കും. സനീഷ്കുമാർ ജോസഫ് എംഎൽഎ ഫണ്ടിൽനിന്നു അനുവദിച്ച 50 ലക്ഷം രൂപ ചെലവിൽ നിർമിക്കുന്ന ഹെൽത്ത് വെൽനെസ് സെന്‍റർ കെട്ടിടത്തിന്‍റെ ശിലാസ്ഥാപനം കായികമന്ത്രി വി. അബ്ദുറഹിമാനും ബെന്നി ബഹനാൻ എംപി ഫണ്ടിൽനിന്നു അനുവദിച്ച 50 ലക്ഷം രൂപ ചെലവിൽ നിർമിക്കുന്ന വയോജന മന്ദിരത്തിന്‍റെ ശിലാസ്ഥാപനം മന്ത്രി റോഷി അഗസ്റ്റിനും നിർവഹിക്കും. സനീഷ്കുമാർ ജോസഫ് എംഎൽഎ അധ്യക്ഷതവഹിക്കും. ബെന്നി ബഹനാൻ എംപി മുഖ്യപ്രഭാഷണംനടത്തും. ചെയർമാൻ ഷിബു വാലപ്പൻ, വൈസ് ചെയർപേഴ്സൻ സി. ശ്രീദേവി, ജനറൽ കൺവീനർ വി.ഒ. പൈലപ്പൻ, പ്രതിപക്ഷനേതാവ് സി.എസ്. സുരേഷ്, സ്റ്റാൻഡിംഗ്കമ്മിറ്റി ചെയർമാൻ മാരായ കെ.വി. പോൾ, ദിപു ദിനേശ്, ആനി പോൾ തുടങ്ങിയവർ പത്രസമ്മേളനത്തിൽ പങ്കെടുത്തു.

സൗജന്യ കോക്ലിയർ ഇംപ്ലാന്‍റ് കേൾവി നിർണയ ക്യാമ്പ് 20ന്

കൊടുങ്ങല്ലൂർ: മർച്ചന്‍റ്സ് അസോസിയേഷൻ, റോട്ടറി ക്ലബ് ഓഫ് കൊച്ചിൻ, എറണാകുളം ലൂർദ് ആശുപത്രി എന്നിവ സംയുക്തമായി സൗജന്യ കോക്ലിയർ ഇംപ്ലാന്‍റ് കേൾവിനിർണയ ക്യാമ്പ് നടത്തുന്നു. 20ന് കൊടുങ്ങല്ലൂർ വ്യാപാര ഭവനിലാണ് ക്യാമ്പ്. ശ്രവണവൈകല്യമുള്ള കുട്ടികളടക്കമുള്ള എല്ലാവർക്കും പങ്കെടുക്കാം. 50,000 രൂപ വരെയുള്ള ശസ്തക്രിയ ലൂർദ് ഹോസ്പിറ്റലിൽ സൗജന്യമായി നടത്തും. സൗജന്യ ഓഡിയോളജിടെസ്റ്റും നടത്തും. അഞ്ചുവയസിൽ താഴെയുള്ള കുട്ടികൾക്ക് സൗജന്യ ശസ്ത്രക്രിയനടത്തും. രോഗികൾ കൊടുങ്ങല്ലൂർ മർച്ചന്‍റ് അസോസിയേഷനുമായി ബന്ധപ്പെടണമെന്ന് മർച്ചന്‍റ് അസോസിയേഷൻ ജനറൽസെക്രട്ടറി എൻ.ആർ. വിനോദ്കുമാർ, സെക്രട്ടറി ടി.കെ. ഷാജി, ഡോ, ജോർജ് കുരുവിള, ലൂർദ് ആശുപത്രി ലെയ്സൺ മാനേജർ സജി ജോസ്, കെ.ജെ. ശ്രീജിത്ത്, പി.കെ. സത്യശീലൻ, മൊഹിയുദ്ദീൻ എന്നിവർ വാർത്താസമ്മേളനത്തിൽ അറിയിച്ചു.

ജനത്തെ വലച്ച് കൈപ്പറമ്പ് സെന്‍ററിലെ അശാസ്ത്രീയ ഡിവൈഡർ നിർമാണം

കൈപ്പറമ്പ്: തൃശൂർ - കുറ്റിപ്പുറം റോഡിന്‍റെ നിർമാണപ്രവൃത്തിയുടെ ഭാഗമായി ഡിവൈഡർ നിർമാണം അശാസ്ത്രീയം. കൈപ്പറമ്പ് സെന്‍ററിൽ പറപ്പൂർ ഭാഗത്തേക്കും തലക്കോട്ടുകര ഭാഗത്തേക്കും വാഹനങ്ങൾ തിരിഞ്ഞുപോകുന്നതിനുവേണ്ടി ഡിവൈഡർ സൗകര്യം മുന്പുണ്ടായിരുന്നു. എന്നാൽ പുതിയ നിർമാണത്തിൽ കേച്ചേരി-കുറാഞ്ചേരി സംസ്ഥാനപാതയെ ബന്ധിപ്പിക്കുന്ന തലക്കോട്ടുകര റോഡിലേക്കു വാഹനങ്ങൾ തിരിഞ്ഞുപോകുന്നതിനു വേണ്ട സൗകര്യം ഇല്ലാതെയാണ് ഡിവൈഡർ നിർമിച്ചിട്ടുള്ളത്. ഈ വഴിയിലാണ് വിദ്യ എൻജിനീയറിംഗ് കോളജ്, ഗാഗുൽത്ത ധ്യാനകേന്ദ്രം, കിഡ്നി ഫൗണ്ടേഷൻ ഓഫ് ഇന്ത്യയുടെ സൗജന്യ ഡയാലിസിസ് കേന്ദ്രം തുടങ്ങി നിരവധി സ്ഥാപനങ്ങൾ ഉള്ളത്. വിദ്യ കോളജിന്‍റെ ബസുകൾ ഉൾപ്പെടെ സ്കൂൾവാഹനങ്ങളടക്കം നൂറുകണക്കിനു വാഹനങ്ങളാണ് ഈ വഴിയിലൂടെ കടന്നുപോകുന്നത്. സംസ്ഥാനപാതകളിൽ ഗതാഗതതടസങ്ങളുണ്ടാകുന്പോൾ എല്ലാ വാഹനങ്ങളും ഈ വഴിയെയാണ് ആശ്രയിക്കുക. ഇപ്പോൾ കൈപ്പറമ്പ് സെന്‍ററിൽ പറപ്പൂർ ഭാഗത്തേക്കുമാത്രമാണ് വാഹനങ്ങൾക്കു തിരിഞ്ഞുപോകുന്നതിനു മീഡിയൻ ഗ്യാപ്പ് സൗകര്യം ഉള്ളത്. പുതിയതായി സ്ഥാപിച്ച മീഡിയൻ ഗ്യാപ്പിൽ യുടേൺ എടുത്തു തലക്കോട്ടുകര ഭാഗത്തേക്കു ബസുകൾ ഉൾപ്പെടെ വലിയ വാഹനങ്ങൾക്കു തിരിഞ്ഞുപോകാൻ കഴിയില്ല. തിരിക്കാൻ ശ്രമിച്ചാൽ കൈപ്പറമ്പ് സെന്‍ററിൽ കേച്ചേരിയെക്കാൾ വലിയ ഗതാഗതതടസത്തിനും കാരണമാകും. തലക്കോട്ടുകര വഴിയിലേക്കുകൂടി വാഹനങ്ങൾ തിരിഞ്ഞുപോകുന്നതിനു ഡിവൈഡർ ഗ്യാപ്പ് സൗകര്യം ഒരുക്കണമെന്ന് ജില്ലാ പഞ്ചായത്ത് മെമ്പർ ജിമ്മി ചൂണ്ടൽ, കേരള കോൺഗ്രസ് ജില്ലാ പ്രസിഡന്‍റ് സി.വി. കുര്യാക്കോസ്, പുഴയ്ക്കൽ ബ്ലോക്ക് പ്രസിഡന്‍റ് ലീല രാമകൃഷ്ണൻ എന്നിവരും കോളജ്, ഗാഗുൽത്ത അധികൃതരും വ്യാപാരികളും ഓട്ടോ തൊഴിലാളികളും പ്രദേശവാസികളും ആവശ്യപ്പെട്ടു.

യുവാവിനെ ആക്രമിച്ച് പരിക്കേൽപ്പിച്ച പ്രതികൾ അറസ്റ്റിൽ

തൃപ്രയാർ: ബസ് സ്റ്റാൻഡിനു സമീപത്തുള്ള പള്ളിയുടെ മുൻവശത്ത് മൂത്രമൊഴിക്കാൻ നിൽക്കുന്നത് ചോദ്യംചെയ്തതിനുള്ള വൈരാഗ്യത്താൽ യുവാവിനെ ആക്രമിച്ച് പരിക്കേൽപ്പിച്ച പ്രതികൾ അറസ്റ്റിൽ. മുറ്റിച്ചൂർ സ്വദേശി എടക്കാട്ടുതറ വീട്ടിൽ ഹാരിസ്(32), ചാഴൂർ വേലുമാൻപടി സ്വദേശി കുളങ്ങരപ്പറമ്പിൽ വീട്ടിൽ ഷിജാദ്(34) എന്നിവരെയാണ് വലപ്പാട് പോലീസ് അറസ്റ്റ് ചെയ്തത്. തളിക്കുളം പുതുക്കുളം കളാംപറമ്പ് സ്വദേശി പുതിയവീട്ടിൽ യൂസഫി(40)നെയാണ് അസഭ്യം പറയുകയും കരിങ്കല്ലുകൊണ്ട് ആക്രമിച്ച് പരിക്കേൽപ്പിക്കുകയും ചെയ്തത്. മദ്യലഹരിയിലായിരുന്നു പ്രതികൾ. വലപ്പാട് പോലീസ് രജിസ്റ്റർ ചെയ്ത കേസിലാണ് അറസ്റ്റ്. കോടതിയിൽ ഹാജരാക്കിയ പ്രതികളെ റിമാന്‍റ് ചെയ്തു.

വള്ളം മറിഞ്ഞു കാണാതായ യുവാവിനായി തെരച്ചിൽ തുടരുന്നു

ചാവക്കാട്: മത്സ്യബന്ധനത്തിനിടയിൽ വള്ളം മറിഞ്ഞ് കാണാതായ യുവാവായ മത്സ്യത്തൊഴിലാളിക്കുവേണ്ടി തെരച്ചിൽ നടത്തി; കണ്ടെത്തിയില്ല. കയ്പമംഗലം കൂരിക്കുഴി നെച്ചിപ്പറമ്പിൽ അഷ്റഫിന്‍റെ മകൻ അൻസിലി(18)നെയാണ് കാണാതായത്. ബുധനാഴ്ച വൈകീട്ട് ചെറുവള്ളത്തിൽ (ഡിങ്കി) മത്സ്യവുമായി വരുമ്പോൾ ചേറ്റുവ അഴിമുഖത്തിനു പടിഞ്ഞാറ് വലിയ തിരമാലയിൽപ്പെട്ട് മൂന്നു തൊഴിലാളികൾ ഉണ്ടായിരുന്ന വള്ളം മറിയുകയായിരുന്നു. വള്ളത്തിൽ പിടിച്ചുനിന്ന തൊഴിലാളികളിൽ അൻസിലിൽ പിടിവിട്ടുപോയി. വലപ്പാട് സ്വദേശികളായ ബിബിൻ(38), വിജിത്ത് (35) എന്നിവർ നിന്തി കരപറ്റി. കഴിമ്പ്രം സ്വദേശി രാജുവിന്‍റെ ഉടമയിലുള്ള ശ്രീ മഹാസേനൻ വള്ളത്തിന്‍റെ കാരിയർവള്ളമാണ് അപകടത്തിൽപെട്ടത്. രാത്രിതന്നെ മുനയ്ക്കക്കടവ് പോലീസ് തെരച്ചിൽ നടത്തിയിരുന്നു. ഇന്നലെ തീരദേശ പോലീസിന്‍റെ നേതൃത്വത്തിൽ ഫിഷറീസ് വകുപ്പിന്‍റെ ചെറുതും വലുതുമായ റെസ്ക്യുബോട്ടുകൾ ചേറ്റുവ അഴിമുഖം കേന്ദ്രീകരിച്ചും തീരക്കടലിൽ ഹെലികോപ്ടർ രണ്ടു തവണയും തെരച്ചിൽ നടത്തിയിരുന്നു. മത്സ്യത്തൊഴിലാളികളും തെരച്ചിലിൽ പങ്കെടുത്തു.

ദേശീയപാത തകർച്ച: ഒരുമനയൂർ പഞ്ചായത്ത് ഭരണ-പ്രതിപക്ഷം ഒന്നിച്ച് ധർണ

ചാവക്കാട്: ദേശീയപാതയുടെ തകർച്ച ഒരുമനയൂർ പഞ്ചായത്ത് ഭരണ-പ്രതിപക്ഷ സമിതിയുടെ നേതൃത്വത്തിൽ സംയുക്തമായി പ്രതിഷേധ ധർണ നടത്തി. വില്യംസ് മുതൽ ചാവക്കാട് തെക്കേ ബൈപ്പാസ് വരെയുള്ള റോഡിന്‍റെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് പഞ്ചായത്ത് യോഗത്തിൽ ഐക്യകണ്ഠ്യേന പാസാക്കിയ പ്രമേയത്തിന്‍റെ അടിസ്ഥാനത്തിലാണ് ധർണ നടത്തിയത്. പ്രസിഡന്‍റ് വിജിത സന്തോഷ്‌ ഉദ്ഘാടനം ചെയ്തു. പ്രതിപക്ഷ നേതാവ് കെ.ജെ. ചാക്കോ അധ്യക്ഷത വഹിച്ചു. വിവിധ രാഷ്ട്രീയ നേതാക്കൾ പ്രസംഗിച്ചു.

ബൈക്കപകടം; നിർത്താതെ പോയ ബൈക്ക് ഓടിച്ചിരുന്ന യുവാവ് പിടിയിൽ

ചാവക്കാട്: ബൈക്ക് ഇടിച്ച് കാൽനടയാത്രക്കാരൻ മരിച്ച സംഭവത്തിൽ നിർത്താതെ പോയ ബൈക്ക് ഓടിച്ചിരുന്ന യുവാവ് പിടിയിൽ. ഗുരുവായൂർ പുത്തമ്പല്ലി കറുപ്പം വീട്ടിൽ മുഹമ്മദ് റഫീക്കിനെ (അജ്മൽ - 19)യാണ് എസ്എച്ച്ഒ വി.വി. വിമലിന്‍റെ നേതൃത്വത്തിൽ അറസ്റ്റ് ചെയ്തത്. കഴിഞ്ഞ ഏഴിന് രാത്രിയോടെയാണ് പാലയൂരിൽ തളിയക്കുളത്തിനു സമീപമുള്ള തകിടിയിൽ തോമസിനെ (ബേബി-66) ബൈക്ക് ഇടിച്ചത്. തൃശൂരിലെ സ്വകാര്യആശുപത്രിയിൽ എത്തിച്ചെങ്കിലും പിറ്റേന്ന് മരിച്ചു. അപകടത്തെത്തുടർന്ന് ബൈക്ക് നിർത്താതെ പോയി. എസ്ഐമാരായ ശരത് സോമൻ, വിഷ്ണു എസ്. നായർ, എഎസ്ഐ അൻവർ സാദസാദത്ത് തുടങ്ങിയവർ നേതൃത്വം നൽകി.

കഥകളിയില്‍ കുചേലനായി മഞ്ജുവാര്യരുടെ അമ്മ ഗിരിജവാര്യർ

ഗുരുവായൂര്‍: കണ്ണന്‍റെ സന്നിധിയിൽ കളിവിളക്കിനു മുന്നിൽ നടി മഞ്ജു വാര്യരുടെ അമ്മ ഗിരിജ വാര്യർ കുചേലവൃത്തം കഥയിലെ കുചേലവേഷത്തിലെത്തി. ശ്രീകൃഷ്ണനായി കലാനിലയം ഗോപിയും രുക്മിണിയായി. ആര്യയും വേഷമിട്ടു. കലാനിലയം രാജീവന്‍ നമ്പൂതിരി, ഹരി ശങ്കര്‍ കണ്ണമംഗലം(പാട്ട്), കലാനിലയം ദീപക്(ചെണ്ട), കലാനിലയം ജയപ്രകാശന്‍ (മദ്ദളം) എന്നിവരായിരുന്നു അകമ്പടി.

ചക്കംകണ്ടം അഴുക്കുചാൽ: കൗൺസിൽ ബഹളം

ചാവക്കാട്: ചക്കംകണ്ടം അഴുക്കുചാൽപദ്ധതിയെ ചൊല്ലി കൗൺസിൽ യോഗത്തിൽ വാക്കുതർക്കം. ബഹളത്തെതുടർന്ന് കൗൺസിൽ പിരിച്ചുവിട്ടു. ഗുരുവായൂരിലെ ശുചിമുറിമാലിന്യം ലോറിയിൽ കയറ്റി ചക്കംകണ്ടത്തു തള്ളാനുള്ള ഗുരുവായൂർ നഗരസഭയുടെ തീരുമാനം റദ്ദ് ചെയ്യാൻ ആവശ്യപ്പെടണമെന്ന യുഡിഎഫ് പ്രമേയം ചർച്ചയ്ക്കെടുക്കാത്തതിനെ ചൊല്ലിയുള്ള തർക്കമാണ് ബഹളത്തിലും കൗൺസിൽ പിരിച്ചുവിടുന്നതിലും എത്തിയത്. ചക്കംകണ്ടം പ്രദേശത്തിനോട് ചേർന്നുകിടക്കുന്ന ചാവക്കാട് നഗരസഭയിലെ 12, 14 വാർഡിലെ കാൺസിലർമാരായ ജോയ്സി ആന്‍റണി, പ്രിയ രാമചന്ദ്രൻ എന്നിവരാണ് പ്രമേയം കൊണ്ടുവന്നത്. എന്നാൽ 13-ാം വാർഡ് സിപി എം കൗൺസിലർ പ്രമേയത്തിൽ ഒപ്പുവച്ചില്ല. പ്രമേയം ചർച്ചക്കെടുത്ത നിലപാടിനെ പ്രതിപക്ഷ നേതാവ് കെ.വി സത്താറിന്‍റെ നേതൃത്വത്തിൽ യുഡിഎഫ് അംഗങ്ങൾ ചോദ്യം ചെയ്തതാണ് ഭരണ- പ്രതിപക്ഷ ബഹളത്തിൽ എത്തിത്. ചക്കംകണ്ടം സ്വീവറേജ് ട്രീറ്റ്മെന്‍റ് പ്ലാന്‍റ് പ്രവർത്തനവുമായി ബന്ധപ്പെട്ട് ഗുരുവായൂർ നഗരസഭ കൗൺസിൽ തീരുമാനത്തെ ചൊല്ലി ചാവക്കാട് നഗരസഭ യുഡിഎഫ് കൗൺസിലർമാർ കൗൺസിൽ യോഗം അലങ്കോലമാക്കുകയാണ് ചെയ്തതെന്ന് അധ്യക്ഷ ഷീജ പ്രശാന്ത് പറഞ്ഞു.

മഴയിൽ തകർന്നടിഞ്ഞ് റോഡുകൾ

വടക്കാഞ്ചേരി: നഗരസഭ പരിധിയിൽ ഉൾപ്പെട്ട എങ്കക്കാട് മേഖലയിൽ കനത്ത മഴയിൽ റോഡുകൾ തകർന്നടിഞ്ഞത്. കാൽനടയാത്ര പോലും ഈ മേഖലയിൽ ദുസഹമായി. സംവീധായകൻ ഭാരതന്‍റെ പേരിലുള്ള വടക്കാഞ്ചേരി- പുല്ലാനിക്കാട് എങ്കക്കാട് ഭാരതൻ റോഡും, ഓട്ടുപാറ വാഴാനി റോഡിൽ എങ്കക്കാട് റെയിൽവേ ഗേറ്റ് പരിസരത്തുമാണ് റോഡ് കൂടുതലായും തകർന്നടിഞ്ഞിരിക്കുന്നത്. എങ്കക്കാട് റെയിൽവേ ഗേറ്റിൽ മണിക്കൂറുകളോളം വാഹനങ്ങൾ കാത്തുകിടക്കുന്നതിനു പിന്നാലെ റോഡുകൾ കൂടി തകർന്നടിഞ്ഞത് അപകടഭീഷണിയും വർധിച്ചിരിക്കുകയാണ്. സമീപത്തെ തോടിനോട് ചേർന്നുള്ള ഭാഗമാണ് റോഡ് ഇടിഞ്ഞു താഴ്ന്നിരിക്കുന്നത്. അമിത ഭാരം കയറ്റിയുള്ള ടോറസ് ലോറികളുടെ യാത്രയാണ് റോഡിന്‍റെ തകർച്ചയ്ക്ക് കാരണമെന്ന് നാട്ടുകാർ പറയുന്നു.

വെണ്ടോരില്‍ കേബിളിനു‍ സ്ഥാപിച്ച കുഴിയില്‍ ബസ് താഴ്ന്നു

വെണ്ടോര്‍: ആമ്പല്ലൂര്‍ -വരന്തരപ്പിള്ളി റോഡില്‍ വെണ്ടോര്‍ കനാല്‍ സ്റ്റോപ്പിനു സമീപം കേബിള്‍ സ്ഥാപിക്കാനെടുത്ത കുഴിയില്‍ സ്വകാര്യബസ് താഴ്ന്നു. ഇന്നലെ രാവിലെയാണ് സംഭവം. വരന്തരപ്പിള്ളിയില്‍നിന്നു തൃശൂരിലേക്ക് പോയിരുന്ന ഉസ്താദ് എന്ന സ്വകാര്യബസാണ് കുഴിയില്‍ താഴ്ന്നത്. മറ്റൊരു വാഹനത്തിനു സൈഡ് കൊടുക്കുന്നതിടെയാണ് അപകടം. ബസിന്‍റെ മുന്‍ചക്രം പൂര്‍ണമായി കുഴിയില്‍ താഴ്ന്ന് ബസ് ഒരു വശത്തേക്ക് ചെരിഞ്ഞെങ്കിലും ആര്‍ക്കും പരിക്കില്ല. മാസങ്ങള്‍ക്കുമുന്‍പ് കേബിള്‍ സ്ഥാപിച്ച കാനകള്‍ കൃത്യമായി മൂടാത്തതാണ് അപകടത്തിനു കാരണമായത്. മഴ പെയ്തതോടെ കാനമൂടിയ ഇടങ്ങളിലെല്ലാം അപകടാവസ്ഥയിലായിരിക്കയാണ്. തിരക്കേറിയ റോഡിന്‍റെ വശങ്ങളില്‍ ജല്‍ജീവന്‍ പദ്ധതിയുടെ പൈപ്പ് സ്ഥാപിക്കുന്നതിനും കേബിള്‍ ഇടുന്നതിനുമായി തീര്‍ത്ത കാനകളില്‍ വാഹനങ്ങള്‍ കുടുങ്ങുന്നത് പതിവായി.

കേരള സ്പർസ്: ആദ്യ ഫുട്ബോൾ കിറ്റ് വിതരണം മാന്ദാമംഗലം സ്കൂളിൽ

തൃശൂർ: ഇംഗ്ലീഷ് പ്രീമിയർ ലീഗ് ക്ലബ് ടോട്ടനം ഹോട്ട്സ്പറിന്‍റെ കേരളത്തിലെ ഒഫിഷ്യൽ സപ്പോർട്ടേഴ്സ് ക്ലബ്ബായ കേരള സ്പർസിന്‍റെ നേതൃത്വത്തിൽ സ്കൂൾ ഫുട്ബോൾ ടീമുകൾക്കുള്ള പരിശീലനകിറ്റുകൾ വിതരണംചെയ്തു. പ്ലേ ഫോർവേഡ് എന്ന പേരിൽ ആരംഭിച്ച പദ്ധതിക്കു മാന്ദാമംഗലം സെന്‍റ് സെബാസ്റ്റ്യൻസ് ഹൈസ്കൂളിലാണു തുടക്കമായത്. ഫുട്ബോളുകളും ജഴ്സിയും പരിശീലനവസ്ത്രങ്ങളും ഉൾപ്പെടെയാണു വിതരണംചെയ്തത്. ഗ്രാമീണതലത്തിലുള്ള വിദ്യാർഥികളിൽ ഫുട്ബോൾ അഭിരുചി വളർത്തുകയും പ്രോത്സാഹിപ്പിക്കുകയുമാണു ലക്ഷ്യമെന്നു കേരള സ്പർസ് ചെയർമാൻ നിതിൻ പറഞ്ഞു. സെക്രട്ടറി എസ്. ശിവശങ്കർ, എക്സിക്യൂട്ടീവ് മെന്പറും ടീം ക്യാപ്റ്റനുമായ ഇർഷാദ്, എകസിക്യൂട്ടിവ് മെന്പർ അമലേന്ദു എന്നിവരുടെ നേതൃത്വത്തിലാണ് കിറ്റ് വിതരണം ചെയ്തത്. ഹെഡ്മാസ്റ്റർ ഹിൻസ ജോസ്, ഫിസിക്കൽ എഡ്യുക്കേഷൻ ട്രെയ്നർ സി.ജെ. ജോജു, ടീം ക്യാപ്റ്റന്മാർ, ഗോളി എന്നിവർ കിറ്റുകൾ സ്വീകരിച്ചു. തുടർന്നു കുട്ടികൾക്കു പരിശീലനവും നൽകി.

കോൾ ആവാസവ്യവസ്ഥ: സെന്‍റ് അലോഷ്യസ് കോളജിൽ ശില്പശാല നടത്തി

തൃശൂർ: കോൾ ആവാസവ്യവസ്ഥയെ പ്രാദേശിക കാർഷിക ജൈവവൈവിധ്യ പൈതൃകപ്രദേശമായി രേഖപ്പെടുത്താൻ ശില്പശാല നടത്തി. എം.എസ്. സ്വാമിനാഥൻ ഗവേഷണനിലയം, സംസ്ഥാന ജൈവവൈവിധ്യ ബോർഡ്, അലോഷ്യൻ കോൾ പഠനഗവേഷണ കേന്ദ്രം, കോൾ ബേഡേഴ്സ് കളക്ടീവ് എന്നിവർ സംയുക്തമായാണ് സെന്‍റ് അലോഷ്യസ് കോളജിൽ ശില്പശാല സംഘടിപ്പിച്ചത്. കോർപറേഷൻ കൗണ്‍സിലർ ലാലി ജെയിംസ് ഉദ്ഘാടനം ചെയ്തു. എം.എസ്. സ്വാമിനാഥൻ ഗവേഷണനിലയം ഡയറക്ടർ ഡോ. നീരജ്, കേരള കാർഷികസർവകലാശാല കോളജ് ഓഫ് ക്ലൈമറ്റ് ചേഞ്ച് ആൻഡ് എൻവയണ്‍മെന്‍റ് സയൻസസ് ഡീൻ ഡോ. പി.ഒ. നമീർ, കോളജ് പ്രിൻസിപ്പൽ ഡോ. ഡയസ്, അഡ്മിനിസ്ട്രേറ്റർ ഫാ. അരുണ്‍, കോൾപഠനകേന്ദ്രം കോ-ഓർഡിനേറ്റർ ജെയിൻ തേറാട്ടിൽ, പ്രജീഷ് പരമേശ്വരൻ എന്നിവർ പ്രസംഗിച്ചു. ഡോ. അർച്ചന, ഡോ. വി.ജി. സുനിൽ, ഹരികൃഷ്ണൻ, മനോജ് കരിങ്ങാമഠത്തിൽ, സുബിൻ, ഡോ. കെ. വിദ്യാസാഗരൻ, ടി.വി. ബാലകൃഷ്ണൻ, ജോബി, ഷാജി കാക്കശേരി, ഹേന, ഡോ. ജോബി പോൾ, കെ.കെ. അനീഷ് കുമാർ എന്നിവർ വിവിധ സെഷനുകളിൽ പ്രസംഗിച്ചു.

ഓണത്തിന് ജില്ലയിൽ സിപിഎം 500 ഏക്കറിൽ കൃഷിയിറക്കും

അരിമ്പൂർ: തൃശൂർ ജില്ലയിലെ ഓണം വിപണി ലക്ഷ്യമാക്കിയുള്ള സിപിഎമ്മിന്‍റെ പച്ചക്കറി തൈനടീൽ ഉത്സവത്തിന്‍റെ ജില്ലാതല ഉദ്ഘാടനം അരിമ്പൂരിലെ കൈപ്പിള്ളിയിൽ നടന്നു. സിപിഎം ജില്ലാ സെക്രട്ടറി കെ.വി. അബ്ദുൽ ഖാദർ ആദ്യതൈ നട്ടുകൊണ്ട് ഉദ്ഘാടനം ചെയ്തു. മണലൂർ ഏരിയ സെക്രട്ടറി പി.എ. രമേശൻ അധ്യക്ഷനായി. സംയോജിത കൃഷിയുടെ ജില്ലാ ചെയർമാൻ എം. ബാലാജി, ജില്ലാ കമ്മിറ്റി അംഗം ടി.വി. ഹരിദാസൻ, കർഷസംഘം മണലൂർ ഏരിയ സെക്രട്ടറി വി.എൻ. സുർജിത്ത്, അന്തിക്കാട് ബ്ലോക്ക് പഞ്ചായത്ത് പ്രസിഡന്‍റ് കെ.കെ. ശശിധരൻ, സംയോജിത കൃഷി ജില്ലാ കൺവീനർ സി.ആർ. രാഗേഷ്, കെ.എം. ഗോപിദാസൻ, കെ. രാഗേഷ്, അരിമ്പൂർ പഞ്ചായത്ത് തല ചെയർമാൻ സ്മിത അജയകുമാർ എന്നിവർ പ്രസംഗിച്ചു. ജില്ലയിൽ വീടുകളിൽ അടക്കം 500 ഏക്കറിൽ ഇക്കുറി കൃഷിയിറക്കുമെന്ന് ജില്ലാ ചെയർമാൻ ബാലാജി പറഞ്ഞു.

ന്യൂട്രി ഗാർഡൻ ഉത്പന്നങ്ങൾ വിതരണം ചെയ്തു

പഴയന്നൂർ: പാഞ്ഞാൾ ഗ്രാമപഞ്ചായത്ത് കൃഷിഭവന്‍റെ നേതൃത്വത്തിൽ വീടുകളിലേക്കും സ്കൂളുകളിലേക്കും അംഗൻവാടികളിലേക്കുമുള്ള ന്യൂട്രി ഗാർഡൻ ഉത്പന്നങ്ങളുടെ വിതരണം നടന്നു. കൃഷിഭവനിൽ നടന്ന ചടങ്ങ് ഗ്രാമപഞ്ചായത്ത് പ്രസിഡന്‍റ് വി. തങ്കമ്മ ഉദ്ഘാടനം ചെയ്തു. വൈസ് പ്രസിഡന്‍റ് പി. കൃഷ്ണൻകുട്ടി അധ്യക്ഷനായി. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ഉണ്ണികൃഷ്ണൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ നിർമല രവികുമാർ, കൃഷി ഓഫീസർ കൃഷ്ണ, വാർഡ് മെമ്പർമാരായ ശ്രീജ, അശ്വതി സജു, കൃഷിഭവൻ ഉദ്യോഗസ്ഥരായ സുസ്മിത, ബിനു എന്നിവർ പ്രസംഗിച്ചു.

ദേശീയ ശില്പശാല നടത്തി

തൃശൂർ: നൂതന നഴ്സിംഗ് സാധ്യതകൾ എന്ന വിഷയത്തിൽ ജൂബിലി മിഷൻ നഴ്സിംഗ് കോളജിലെ അലുംമ്നി കൂട്ടായ്മ ഏകദിന അന്തർദേശീയ ശില്പശാല നടത്തി. ജൂബിലി മിഷൻ മെഡിക്കൽ കോളജ് ഡയറക്ടർ ഫാ. റെന്നി മുണ്ടൻകുരിയൻ ഉദ്ഘാടനം ചെയ്തു. പ്രിൻസിപ്പൽ ഡോ. ഏയ്ഞ്ചല ജ്ഞാനദുരൈ, ഡോ. ജോബിൻസ്, ഡോ. രമേഷ്, നൈബിൻ, ക്രിസ്റ്റോ, സിജ, കോളജ് അസി. ഡയറക്ടർ ഫാ. ജോയ്സൻ ചെറുവത്തൂർ, വൈസ് പ്രിൻസിപ്പൽ സിസ്റ്റർ ഡോ. ട്രീസ ആന്‍റോ, സ്കൂൾ പ്രിൻസിപ്പൽ സിസ്റ്റർ റെജി അഗസ്റ്റിൻ എന്നിവർ നേതൃത്വം നൽകി.

തെരുവുനായ് ശല്യം രൂക്ഷം

ഇരിങ്ങാലക്കുട: ഭീതിവിതച്ച് ഇരിങ്ങാലക്കുട ടൗണിലും പരിസരപ്രദേശങ്ങളിലും തെരുവുനായ്ക്കളുടെ ശല്യം രൂക്ഷമാകുന്നു. അതിരാവിലെ ബസ് സ്റ്റാന്‍ഡ് പരിസരത്തും മാര്‍ക്കറ്റിനുസമീപമുള്ള റോഡുകളിലുമാണു തെരുവുനായ്ക്കള്‍ കൂട്ടമായി തമ്പടിച്ചിരിക്കുന്നത്. സംഘംചേര്‍ന്ന് റോഡില്‍ തമ്പടിക്കുന്ന നായ്ക്കൂട്ടത്തെ മറികടന്നുപോകണമെന്നുള്ളത് വിദ്യാര്‍ഥികള്‍ക്കും ഇരുചക്ര വാഹന യാത്രക്കാര്‍ക്കും ഏറെ ഭീതിജനകമായ കാര്യമാണ്. നടപടിയെടുക്കാന്‍ ബന്ധപ്പെട്ടവര്‍ തയാറാകാത്തതിനെ തുടര്‍ന്ന് വിദ്യാര്‍ഥികളടക്കം, രാവിലെ യാത്രചെയ്യുന്നവര്‍ ഭീതിയുടെ മുള്‍മുനയിലാണ്. നഗരസഭയുടെ പൊറത്തിശേരി മേഖലയില്‍ 35, 38, 39 എന്നീ വാര്‍ഡുകളില്‍ പേവിഷബാധ പടരുന്നതായി പരാതി ഉയര്‍ന്നിട്ടുണ്ട്. കല്ലട ക്ഷേത്രത്തിനടുത്ത് കഴിഞ്ഞദിവസം രാത്രി പുറത്തുനിന്നെത്തിയ തെരുവുനായും സമീപപ്രദേശത്തുള്ള ഏഴോളം നായ്ക്കളും തമ്മിലുണ്ടായ കടിപിടിയില്‍ പുറത്തുനിന്നെത്തിയ നായ ചത്തു. ചത്ത തെരുവുനായയെ നഗരസഭ ആരോഗ്യവിഭാഗം കൊണ്ടുപോയി പോസ്റ്റുമോര്‍ട്ടം ചെയ്തപ്പോഴാണ് പേവിഷബാധയുണ്ടെന്ന് തെളിഞ്ഞത്. ഇതിന്‍റെ അടിസ്ഥാനത്തില്‍ വളര്‍ത്തുനായകള്‍ക്ക് പ്രതിരോധ കുത്തിവയ്പ് നല്‍കുകയായിരുന്നു. ആറുമാസത്തിനുള്ളില്‍ കടിയേറ്റ് ചികിത്സതേടിയത് 1132 പേര്‍ കഴിഞ്ഞ ആറുമാസത്തിനുള്ളില്‍ ഇരിങ്ങാലക്കുട മേഖലയില്‍ തെരുവുനായ്ക്കളുടെ കടിയേറ്റ് ചികിത്സതേടിയത് 1132 പേരാണ്. ജനുവരി- 189, ഫെബ്രുവരി- 191, മാര്‍ച്ച്- 177, ഏപ്രില്‍- 207, മെയ്- 220, ജൂണ്‍- 148 എന്നിങ്ങനെയാണ് കടിയേറ്റ് ഇരിങ്ങാലക്കുട ജനറല്‍ ആശുപത്രിയില്‍ ചികിത്സതേടിയവരുടെ കണക്ക്. പൂച്ചയുടെയും മറ്റു മൃഗങ്ങളുടെയും കടിയേറ്റ് ചികിത്സതേടിയവര്‍ 1701 പേരാണ്. ഇതില്‍ 187 പേര്‍ക്കാണ് അടിയന്തരമായി വിദഗ്ധചികിത്സ നല്‍കേണ്ടിവന്നത്. ഇത് ഇരിങ്ങാലക്കുട ജനറല്‍ ആശുപത്രിയിലെ മാത്രം കണക്കാണ്. സമീപപ്രദേശങ്ങളിലുള്ള പഞ്ചായത്തുകളിലെ പ്രാഥമികാരോഗ്യകേന്ദ്രങ്ങളില്‍ ചികിത്സ തേടുന്നവരുടെ ഏണ്ണംകൂടി കണക്കാക്കിയാല്‍ തെരുവുനായ്ക്കളുടെ കടിയേല്‍ക്കുന്നവരുടെ എണ്ണം ഇനിയുംകൂടും.

അധികാരത്തിലെത്തിയാൽ ലഹരിമാഫിയയെ അമർച്ചചെയ്യും: സന്ദീപ് വാര്യർ

കൊടുങ്ങല്ലൂർ: യുഡിഎഫ് അധികാരത്തിലെത്തിയാൽ ലഹരി മാഫിയയെ അമർച്ചചെയ്യുമെന്ന് സന്ദീപ് വാര്യർ പറഞ്ഞു. മഹിളാ കോൺഗ്രസ് എറിയാട് ബ്ലോക്ക് കൺവൻഷനും ആദരവും കാരയിൽ ഉദ്ഘാടനം ചെയ്യുകയായിരുന്നു സന്ദീപ് വാര്യർ. 1000 ബാറുകൾ തുറന്നുനൽകി ലഹരിക്കെതിരേ ബോധവൽകരണ ആഭാസംനടത്തുകയാണ് പിണറായി സർക്കാർ. ലഹരിഭീകരതയിൽ കണ്ണീരുകുടിക്കുന്ന അമ്മമാർ നെറികെട്ട ഇടതുസർക്കാരിനെ 2026ലെ തെരഞ്ഞെടുപ്പിൽ വലിച്ചെറിയുമെന്നും സന്ദീപ് വാര്യർ കൂട്ടിച്ചേർത്തു. ബ്ലോക്ക് പ്രസിഡന്‍റ് ഷമീന ഷെരീഫ് അധ്യക്ഷത വഹിച്ചു. മേരി ജോളി, പ്രഫ.കെ.എ. സിറാജ്, സി.പി. സാലിഹ്, ഫസലു റഹൻ എന്നിവരെ ആദരിച്ചു. സിനിമ സംവിധായകൻ ദീപു കരുണാകരൻ മുഖ്യപ്രഭാഷണംനിർവഹിച്ചു. 100 കാൻസർ രോഗികൾക്ക് സി.പി. മുഹമ്മദ് ട്രസ്റ്റിന്‍റെ ആശ്വാസ ധനസഹായം കോട്ടപ്പുറം കിഡ്സ് ഡയറക്ടർ ഫാ. നിമേഷ് അഗസ്റ്റിൻ കാട്ടാശേരി വിതരണംചെയ്തു. മഹിളാ കോൺഗ്രസ് ജില്ലാ പ്രസിഡന്‍റ് ടി. നിർമല, ഐഎൻടിയുസി ജില്ലാ പ്രസിഡന്‍റ് സുന്ദരൻ കുന്നത്തുള്ളി എന്നിവർ മുഖ്യാതിഥികളായി. എം.കെ അബ്ദുൽസലാം, സുനിൽ പി.മേനോൻ, ഇ.എസ്. സാബു തുടങ്ങിയവർ പ്രസംഗിച്ചു.

പഞ്ചായത്ത് കാലാവസ്ഥാ പാര്‍ലമെന്‍റ്; സിദ്ധാന്തങ്ങള്‍ പ്രായോഗികതലത്തിലേക്ക് എത്തിക്കാനുള്ള ലക്ഷ്യം: മന്ത്രി

ഇരിങ്ങാലക്കുട: സിദ്ധാന്തങ്ങള്‍ പ്രായോഗികതലത്തിലേക്ക് എത്തിക്കാനുള്ള ലക്ഷ്യമാണ് പഞ്ചായത്ത് കാലാവസ്ഥാ പാര്‍ലമെന്‍റ് സംഘടിപ്പിക്കുക വഴി വിദ്യാര്‍ഥിസമൂഹത്തിന് കൈവന്നിരിക്കുന്നതെന്ന് മന്ത്രി ആര്‍. ബിന്ദു. ക്രൈസ്റ്റ് കോളജില്‍നടന്ന പഞ്ചായത്ത് കാലാവസ്ഥാ പാര്‍ലമെന്‍റ് ഉദ്ഘാടനംചെയ്ത് സംസാരിക്കുകയായിരുന്നു മന്ത്രി. കിലയുടെയും ബ്രിംഗ് ബാക്ക് ഗ്രീന്‍ ഫൗണ്ടേഷന്‍റെയും മേല്‍നോട്ടത്തില്‍ സംഘടിപ്പിച്ച പരിപാടിയില്‍ ക്രൈസ്റ്റ് കോളജ്, സെന്‍റ് ജോസഫസ് കോളജ്, ഇ.കെ.എന്‍. സെന്‍റര്‍ എന്നിവര്‍ പങ്കാളികളായി. ഇരിങ്ങാലക്കുട നഗരസഭ, മുരിയാട്, പടിയൂര്‍, പൂമംഗലം പഞ്ചായത്തുകളിലെ കാലാവസ്ഥാ വ്യതിയാനവുമായി ബന്ധപ്പെട്ട വിവിധ വിഷയങ്ങളെ ആസ്പദമാക്കി തയാറാക്കിയ റിപ്പോര്‍ട്ടുകള്‍ തദ്ദേശസ്വയംഭരണ സ്ഥാപനങ്ങളിലെ പ്രതിനിധികള്‍ ഏറ്റുവാങ്ങി. ക്രൈസ്റ്റ് കോളജ് മാനേജര്‍ ഫാ. ജോയ് പീണിക്കപ്പറമ്പില്‍ അധ്യക്ഷതവഹിച്ചു. പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ് സിഎംഐ, കില പ്രഫസര്‍ ഡോ. മോനിഷ്, ബ്രിംഗ് ബാക്ക് ഗ്രീന്‍ ഡയറക്ടര്‍ അഖിലേഷ് അനില്‍കുമാര്‍, ഡോ. മാത്യു പോള്‍ ഊക്കന്‍, ഡോ.എസ്. ശ്രീകുമാര്‍, നിതിന്‍, തവനിഷ് കോഓര്‍ഡിനേറ്റര്‍ മുവിഷ് മുരളി, ഡോ. ജോസ് കുര്യക്കോസ് എന്നിവര്‍ സംസാരിച്ചു.

യുവാവിനെ ആക്രമിച്ച മൂവർസംഘം അറസ്റ്റിൽ

കയ്പമംഗലം: മൂന്നുപീടികയിൽ ബസ് കാത്തുനിന്ന യുവാവിനെ ആക്രമിച്ച് പരിക്കേൽപ്പിച്ച് മൊബൈൽഫോണും എയർപോഡും പിടിച്ചുവാങ്ങി കടന്നുകളഞ്ഞ മൂവർസംഘത്തെ അറസ്റ്റ്ചെയ്തു. ചാവക്കാട് എടക്കഴിയൂർ ഐനിപ്പുള്ളിവീട്ടിൽ നിഗേഷ്(26), ചാവക്കാട് മതിലകത്തുവിട്ടിൽ നിസാമുദ്ദീൻ(24), ചാവക്കാട് തിരുവത്ര സ്വദേശി മേത്തിവീട്ടിൽ മുർഷാദ്(22) എന്നിവരാണ് കേസിലെ പ്രതികൾ. കയ്പമംഗലം പോലീസും കൊടുങ്ങല്ലൂർ പോലീസും ചേർന്നാണ് പ്രതികളെ കൊടുങ്ങല്ലൂരിൽവച്ച് പിടികൂടിയത്. കയ്പമംഗലം ചളിങ്ങാട് സ്വദേശി പുത്തേഴത്ത് വീട്ടിൽ ശാഹുൽ ഹമീദിന്‍റെ മകൻ സാഹിൽ(19) ആയിരുന്നു ആക്രമണത്തിനിരയായത്. 14നു പുലർച്ചെ ഒന്നരയോടെയായിരുന്നു സംഭവം. എറണാകുളത്ത് പഠനസ്ഥലത്തേയ്ക്ക് പോകാനായി ബസ് കാത്തുനിൽക്കുകയായിരുന്നു സാഹിൽ. ബഹളംകേട്ട് മൂന്നുപീടിക സെന്‍ററിലെ ഒട്ടോഡ്രൈവർമാർ പോലീസിനെ വിളിച്ചപ്പോഴേയ്ക്കും ഇവർ കടന്നുകളഞ്ഞു. പോലീസ് പിന്തുടരുന്നതിനിടെ കൊടുങ്ങല്ലൂർ വടക്കേനടയിൽ റോഡിലെ ബാരിക്കേഡിൽ പ്രതികൾ സഞ്ചരിച്ച ബൈക്കിടിച്ച് മറിയുകയായിരുന്നു. സാരമായി പരിക്കേറ്റ മൂന്നുപേരെയും പോലീസ് കളമശേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇവരെ കഴിഞ്ഞദിവസം കസ്റ്റഡിയിലെടുത്തു അറസ്റ്റ് രേഖപ്പെടുത്തുകയായിരുന്നു.

യുഡിഎഫ് നേതൃയോഗം

ചാലക്കുടി: സംസ്ഥാനസർക്കാരിന്‍റെ ആരോഗ്യ- വിദ്യാഭ്യാസമേഖലയിലെ കെട്ടുകാര്യസ്ഥതക്കെതിരേ ശക്തമായ നടപടികളുമായി മുന്നോട്ടുപോകുമെന്ന് യുഡിഎഫ് നിയോജകമണ്ഡലം കമ്മിറ്റി അറിയിച്ചു. 23ന് നടത്തുന്ന കളക്ടറേറ്റ് ധർണയുടെ മുന്നോടിയായിചേർന്ന യുഡിഎഫ് നേതൃയോഗം സനീഷ്കുമാർ ജോസഫ് എംഎൽഎ ഉദ്ഘാടനംചെയ്തു. യുഡിഎഫ് ചെയർമാൻ സി.ജി. ബാലചന്ദ്രൻ അധ്യക്ഷതവഹിച്ചു. കൺവീനർ ഒ.എസ്. ചന്ദ്രൻ, നഗരസഭ ചെയർമാൻ ഷിബു വാലപ്പൻ, ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ, കോൺഗ്രസ് പരിയാരം ബ്ലോക്ക് പ്രസിഡന്‍റ് എം.ടി. ഡേവിസ്, ഐ.ഐ. അബ്ദുൽ മജീദ് എന്നിവർ പ്രസംഗിച്ചു.

ഡോ. യു.എം. മുസ്തഫ കമാലിനു പുരസ്കാരം

മതിലകം: ചങ്ങാതിക്കൂട്ടം കലാസാഹിത്യസമിതി സാംസ്കാരിക പ്രവർത്തകനും കവിയും ചിത്രകാരനുമായിരുന്ന ഷാജി കെ.അബ്ദുവിന്‍റെ സ്മരണയ്ക്കായി തദ്ദേശീയ എഴുത്തുകാർക്ക് ഏർപ്പെടുത്തിയ മൂന്നാമത് ഷാജി കെ.അബ്ദു സ്മാരക സാഹിത്യപുരസ്കാരത്തിന് ഡോ.യു.എം. മുസ്തഫ കമാൽ അർഹനായി. മുസ്തഫ കമാൽ അഞ്ച് ഗ്രന്ഥങ്ങൾരചിക്കുകയും വിവിധ പ്രസിദ്ധീകരണങ്ങളുടെ എഡിറ്ററായി പ്രവർത്തിക്കുകയും ചെയ്തിട്ടുണ്ട്. ഇന്ന് വൈകീട്ട് 3.30ന് മതിലകം വ്യാപാരഭവനിൽ സംഘടിപ്പിക്കുന്ന ഷാജി കെ.അബ്ദു അനുസ്മരണത്തിൽ ഇ.ടി. ടൈസൺ എംഎൽഎ പുരസ്കാരംസമർപ്പിക്കും. ചങ്ങാതിക്കൂട്ടം പ്രസിഡന്‍റ് ബഷീർ തൃപ്പേക്കുളത്തിന്‍റെ അധ്യക്ഷതയിൽചേരുന്ന പരിപാടിയിൽ മതിലകം മഹല്ല് ഖത്തീബ് ഡോ. അബ്ദു സലാം ഫൈസി മുഖ്യാതിഥിയാകും.

അപ്രത്യക്ഷമാകുന്ന രംഗകലകളെ തിരിച്ചുകൊണ്ടുവരാനുള്ള ശ്രമങ്ങള്‍ ഉണ്ടാകണം: വേണുജി

ഇരിങ്ങാലക്കുട: അപ്രത്യക്ഷമായികൊണ്ടിരിക്കുന്ന രംഗകലകളെ തിരിച്ചുകൊണ്ടുവരാനുള്ള ശ്രമങ്ങള്‍ ഉണ്ടാകേണ്ടതുണ്ടെന്ന് നടനകൈരളി ഡയറക്ടറും കൂടിയാട്ട കലാകാരനുമായ വേണുജി അഭിപ്രായപ്പെട്ടു. സെന്‍റ് ജോസഫ്‌സ് കോളജ് സംഘടിപ്പിക്കുന്ന രണ്ടാമത് ഋതു അന്താരാഷ്ട്ര പരിസ്ഥിതി ചലച്ചിത്രമേളയുടെ ഡെലിഗേറ്റ് പാസിന്‍റെയും ഫെസ്റ്റിവല്‍ ബാഗിന്‍റെയും വിതരണോദ്ഘാടനം നിര്‍വഹിക്കുകയായിരുന്നു അദ്ദേഹം. ഋതു ഫിലിം ഫെസ്റ്റ് ചെയര്‍മാനും കോളജ് പ്രിന്‍സിപ്പലുമായ സിസ്റ്റര്‍ ഡോ. ബ്ലെസി അധ്യക്ഷതവഹിച്ചു. ചടങ്ങില്‍ ഹോളിഫാമിലി സന്യാസസഭ മദര്‍ ജനറല്‍ സിസ്റ്റര്‍ ഡോ. ആനി കുര്യാക്കോസ്, ഇരിങ്ങാലക്കുട ഫിലിം സൊസൈറ്റി പ്രസിഡന്‍റ് മനീഷ് അരീക്കാട്ട്, പ്രോഗ്രാം കമ്മിറ്റി കണ്‍വീനര്‍ ഷിബിത ഇമ്മാനുവല്‍, കോര്‍ കമ്മിറ്റി കോ ഓര്‍ഡിനേറ്റര്‍ ശ്രുതി ദീപക്, കണ്‍വീനര്‍ പി.വി. അരവിന്ദ് എന്നിവര്‍ സംസാരിച്ചു.

കോടശേരി പഞ്ചായത്ത്; ആരോപണങ്ങൾ വാസ്തവവിരുദ്ധമെന്ന് എൽഡിഎഫ്

ചാലക്കുടി: കോടശേരി പഞ്ചായത്തിൽ വാസ്തവവിരുദ്ധമായ കാര്യങ്ങളാണ് കോൺഗ്രസ് പ്രചരിപ്പിക്കുന്നതെന്ന് എൽഡിഎഫ് അംഗങ്ങൾ. പഞ്ചായത്ത് ഹാളിൽ സമാധാനപരമായാണ് ഇറങ്ങിപ്പോക്കുനടത്തിയത്. യുഡിഎഫ് അംഗം റിജു മാവേലി ഗുരുതരാവസ്ഥയിലായത് എങ്ങനെയെന്ന് അറിയില്ലെന്നും തങ്ങൾ ആക്രമിച്ചിട്ടില്ലെന്നും യുഡിഎഫ് അംഗങ്ങളാണ് തങ്ങൾക്കുനേരെ അക്രമംനടത്തിയെന്നും എൽഡിഎഫ് അംഗങ്ങൾ പറഞ്ഞു. കോടശേരിയിലെ ഹരിതകർമസേന രജിസ്റ്റർചെയ്തത് കുടുംബശ്രീയുടെ കീഴിലാണ്. എന്നാൽ ഇതിൽ യുഡിഎഫ് സാമ്പത്തികക്രമക്കേട് നടത്തിട്ടുണ്ടെന്ന് എൽഡിഎഫ് അംഗങ്ങൾ ആരോപിച്ചു. ക്രമക്കേടുകൾ മറച്ചുവയ്ക്കാനാണ് കുടുംബശ്രീയുടെ കീഴിൽനിന്നു ഹരിതകർമസേനയെ മാറ്റാൻ ശ്രമംനടക്കുന്നത്. എല്ലാ ചട്ടങ്ങളും പാലിച്ചാണ് ഹരിതകർമസേനയുടെ പ്രസിഡന്‍റ് തെരഞ്ഞെടുപ്പ് നടത്തിയത്. ഇതിനെതിരേ 22 പേർ പരാതി നൽകിയെന്നത് വ്യാജമാണ്. ഇത്തരം നീക്കങ്ങൾക്കെതിരേ ശക്തമായ പ്രതിഷേധം തുടരുമെന്ന് പഞ്ചായത്ത് അംഗങ്ങളായ ഇ.എ. ജയതിലകൻ, എം.ഡി. ബാഹുലേയൻ, ശ്യാമ സജീവൻ, വി.ജെ. വില്യംസ്, ദീപ പോളി, ടി.ആർ. ബാബു എന്നിവർ പത്രസമ്മേളനത്തിൽ അറിയിച്ചു.

വൈദ്യുതിവിതരണം നിലച്ചാൽ അന്നമനട പോസ്റ്റ് ഓഫീസ് പ്രവർത്തനരഹിതം

അന്നമനട: അന്നമനട സെന്‍ററിൽ വൈദ്യുതിവിതരണം നിലച്ചാൽ പോസ്റ്റ് ഓഫീസിന്‍റെ പ്രവർത്തനം താളംതെറ്റുന്നതായി പരാതി. പഞ്ചായത്തിനകത്തും സമീപപഞ്ചായത്തുകളിൽനിന്നും പോസ്റ്റ് ഓഫീസിലെത്തുന്നവർ വൈദ്യുതിയുണ്ടാേയെന്ന് ഉറപ്പുവരുത്തിവരേണ്ട ഗതികേടിലാണെന്നാണ് ആക്ഷേപം. ജനറേറ്റർ, ബാറ്ററി എന്നിവയിൽനിന്നു വേണ്ടത്ര ബാക്കപ്പ് ലഭിക്കാത്തതാണ് കാരണം. മേൽത്തട്ടിൽ വിഷയം അറിയിച്ചിട്ടും നടപടിയില്ലെന്നാണ് പറയുന്നത്. പ്രവർത്തനക്ഷമമായ ബാറ്ററിയും ജനറേറ്ററും സ്ഥാപിച്ച് ജനങ്ങളുടെ ബുദ്ധിമുട്ടുകൾക്ക് പരിഹാരമുണ്ടാക്കണമെന്ന ആവശ്യവും ഉയരുന്നുണ്ട്.

സൗരോര്‍ജപദ്ധതി ഉദ്ഘാടനം

കൊടകര: ആലത്തൂര്‍ എഎല്‍പി സ്‌കൂളിലെ സൗരോര്‍ജപദ്ധതിയുടെയും ശീതീകരിച്ച ക്ലാസ്മുറികളുടേയും ഉദ്ഘാടനം ജില്ലാപഞ്ചായത്ത് വൈസ് പ്രസിഡന്‍റ് ലത ചന്ദ്രന്‍ നിര്‍വഹിച്ചു. പറപ്പൂക്കര പഞ്ചായത്ത് പ്രസിഡന്‍റ് ഇ.കെ. അനൂപ് അധ്യക്ഷതവഹിച്ചു. പഞ്ചായത്തംഗം ടി.കെ. സതീശന്‍, ഇരിങ്ങാലക്കുട എഇഒ എം.എസ്. രാജീവ്, പ്രധാനധ്യാപിക പി.എം. ജിന്‍സ, മാനേജര്‍ ടി. രമേഷ്‌കുമാര്‍, പിടിഎ പ്രസിഡന്‍റ് പി.എസ്. സുനില്‍ തുടങ്ങിയവര്‍ പ്രസംഗിച്ചു. സജു പൗലോസ് ലഹരിവിരുദ്ധ ബോധവത്കരണ ക്ലാസും ജൂണിയര്‍ ഹെല്‍ത്ത് ഇന്‍സ്‌പെക്ടര്‍ ടി.കെ. സലീഷ് ശുചിത്വബോധവത്കരണ ക്ലാസും നയിച്ചു.

നാലമ്പലദർശന പുണ്യത്തിന് ഒരുങ്ങി ശ്രീവില്വാദ്രിനാഥ ക്ഷേത്രം

തിരുവില്വാമല: ക്ഷേത്രങ്ങളിൽ ഇനി ഒരു മാസക്കാലം രാമായണ മാസാചരണത്തിന്‍റെ നാളുകൾ. ശ്രീവില്വാദ്രിനാഥക്ഷേത്രം, പറക്കോട്ടുകാവ്, പാമ്പാടി സോമേശ്വരം മഹാദേവക്ഷേത്രം, കൊച്ചുപറക്കോട്ടുകാവ്, വടക്കേ കൂട്ടാല ഭദ്രകാളിക്ഷേത്രം തുടങ്ങി മേഖലയിലെ വിവിധ ക്ഷേത്രങ്ങളിൽ ഒരുക്കങ്ങൾ പൂർത്തിയായി. ശ്രീരാമ - ലക്ഷ്മണൻമാരുടെ പ്രതിഷ്ഠയുള്ള വില്വാദ്രിനാഥ ക്ഷേത്രത്തിൽ രാമായണ മാസാചരണത്തോടനുബന്ധിച്ച് നാലമ്പലദർശനത്തിന് ഇന്ന് തുടക്കമാകും. ശ്രീരാമ-ലക്ഷ്മണ-ശത്രുഘ്ന ക്ഷേത്രദർശനപൂർത്തീകരണങ്ങൾ ഒരു ദിവസംതന്നെ നടത്തുന്ന പാലക്കാട് കേന്ദ്രീകരിച്ചുള്ള നാലമ്പലദർശനപാതയിൽ തിരുവില്വാമല വില്വാദ്രിനാഥക്ഷേത്രം, 18 കിലോമീറ്റർ അകലെ പാലക്കാട് കുഴൽമന്ദത്തിനടുത്തുള്ള പുൽപ്പുര മന്ദം ഭരതക്ഷേത്രം, കൽക്കുളം ശത്രുഘ്ന ക്ഷേത്രം എന്നീ ക്ഷേത്രങ്ങളാണ് ഉൾപ്പെടുന്നത്. ഈ പാത താരതമ്യേന തിരക്കു കുറഞ്ഞതും പാലക്കാടിന്‍റെ പ്രകൃതിഭംഗിയുടെ പാശ്ചാത്തലമുള്ളതുമാണ്. ഇരട്ട ശ്രീകോവിലുകളുള്ള ശ്രീ വില്വാദ്രിനാഥക്ഷേത്രത്തിൽ ഹനുമാൻസ്വാമിയെ കൂടി ദർശിക്കാമെന്നതാണ് ഈ നാലമ്പലദർശനത്തിലെ മറ്റൊരു മാഹാത്മ്യം. രാമായണ മാസാചരണത്തോടനുബന്ധിച്ച് ക്ഷേത്രത്തിൽ രാമായണ പാരായണം, പ്രസാദ ഊട്ട്, ചുറ്റുവിളക്ക് എന്നിവയുണ്ടാകും. ക്ഷേത്രത്തിൽ ഇന്നു വൈകീട്ട് 6.30ന് അകലൂർ ഭഗവതി നൃത്ത കലാക്ഷേത്രം അവതരിപ്പിക്കുന്ന നൃത്താർച്ചന അരങ്ങേറും.

വള്ളംമറിഞ്ഞ് ഒരാളെ കാണാതായി; രണ്ടുപേർ നീന്തിരക്ഷപ്പെട്ടു

ചേറ്റുവ: മത്സ്യബന്ധനത്തിനുള്ള ചെറുവള്ളം മറിഞ്ഞ് ഒരാളെ കാണാതായി; രണ്ടു പേർ നീന്തി കരപ്പറ്റി. ചേറ്റുവ അഴിമുഖത്തിന് പടിഞ്ഞാറ് ശക്തമായ കാറ്റിലും തിരയിലും പെട്ട് മീന്‍പിടിത്ത ചെറുവള്ളം ഇന്നലെ വൈകിട്ട് ആറോടെ മറിഞ്ഞത്. വള്ളത്തിലുണ്ടായിരുന്ന മൂന്ന് പേരില്‍ ഒരാളെ കാണാതായി. കയ്പമംഗലം കൂരിക്കുഴി നെച്ചിപ്പറമ്പില്‍ അഷ്‌റഫിന്‍റെ മകന്‍ അന്‍സിലി(18)നെയാണ് കാണാതായത്. വലപ്പാട് ബീച്ച് സ്വദേശികളായ കല്ലയില്‍ ബിബിന്‍(38), തട്ടാരുപുരയ്ക്കല്‍ വിജിത്ത്(35) എന്നിവരാണ് നീന്തിരക്ഷപ്പെട്ടത്. ഏത്തായി ബീച്ചിലേയ്ക്ക് നീന്തിക്കയറിയ ഇവരെ ഏങ്ങണ്ടിയൂര്‍ എംഐ ആശുപത്രിയിൽ പ്രവേശിപ്പിച്ചു. വലപ്പാട് കഴിമ്പ്രം സ്വദേശി രാജുവിന്‍റെ ഉടമസ്ഥതയിലുള്ള ശ്രീ മഹാസേനന്‍ വള്ളത്തിന്‍റെ കാരിയര്‍ വള്ള(ഡിങ്കി)മാണ് അപകടത്തില്‍ പെട്ടത്. കടല്‍ പെട്ടെന്ന് പ്രക്ഷുബ്ധമായതിനെ തുടര്‍ന്ന് ചേറ്റുവ ഹാര്‍ബറിലേക്കു വരികയായിരുന്ന വള്ളം മറിയുകയായിരുന്നു. വള്ളത്തിലുണ്ടായിരുന്ന മൂന്നുപേരും ഏറെ നേരം മറിഞ്ഞ വള്ളത്തില്‍ പിടിച്ചുനിന്ന് രക്ഷപ്പെടാന്‍ ശ്രമിക്കുന്നതിനിടെ അന്‍സില്‍ പിടിത്തം വിട്ട് മുങ്ങിപ്പോകുകയായിരുന്നുവെന്ന് പറയുന്നു. മുനയ്ക്കകടവ് തീരദേശ പോലീസും മത്സ്യതൊഴിലാളികളും ബോട്ടിലും വള്ളങ്ങളിലുമായി അന്‍സിലിനായി തെരച്ചില്‍ നടത്തിയെങ്കിലും കണ്ടെത്താനായില്ല. രാത്രിയിലും തെരച്ചിൽ നടത്തുണ്ടെങ്കിലും കാലാവസ്ഥ പ്രതികൂലമാണ്. അപകടത്തില്‍പെട്ട കാരിയര്‍ വള്ളം മത്സ്യതൊഴിലാളികളുടെ സഹായത്തോടെ കരയ്ക്കുകയറ്റി.

യൂത്ത് കോണ്‍ഗ്രസ് മാര്‍ച്ചില്‍ സംഘര്‍ഷം

പുതുക്കാട്: യൂത്ത് കോണ്‍ഗ്രസ് പുതുക്കാട് നിയോജക മണ്ഡലം കമ്മിറ്റിയുടെ നേതൃത്വത്തില്‍ കൊടകര ബ്ലോക്ക് പഞ്ചായത്ത് ഓഫീസിലേക്കു നടത്തിയ മാര്‍ച്ചില്‍ സംഘര്‍ഷം. ബാരിക്കേഡ് മറികടന്ന പ്രവര്‍ത്തകര്‍ക്കുനേരെ പോലീസ് ജലപീരങ്കി പ്രയോഗിച്ചു. നാലു യൂത്ത് കോണ്‍ഗ്രസ് പ്രവര്‍ത്തകര്‍ക്കു പരിക്കേറ്റു. ഇവരെ പുതുക്കാട് താലൂക്ക് ആശുപത്രിയില്‍ പ്രവേശിപ്പിച്ചു. ഫൈസല്‍ ഇബ്രാഹിം, ജോജു പുന്നക്കര, റിന്‍റോ ജോണ്‍സണ്‍, ജെറോം ജോണ്‍ എന്നിവര്‍ക്കാണ് പരിക്കേറ്റത്. ബ്ലോക്ക് ഓഫീസിലേക്ക് തള്ളിക്കയറാന്‍ ശ്രമിച്ച യൂത്ത് കോണ്‍ഗ്രസ് നിയോജക മണ്ഡലം പ്രസിഡന്‍റ് ഫൈസല്‍ ഇബ്രാഹിം, സംസ്ഥാന സെക്രട്ടറി ജെറോം ജോണ്‍ എന്നിവരെ പോലീസ് കൈയ്യേറ്റം ചെയ്തുവെന്നാരോപിച്ച് പ്രവര്‍ത്തകരും പോലീസും വാക്കുതര്‍ക്കമുണ്ടായി. പുതുക്കാട് ഗവ. താലൂക്ക് ആശുപത്രിയിലെ നിര്‍മാണപ്രവര്‍ത്തനങ്ങളിലെ അഴിമതി വിജിലന്‍സ് അന്വേഷിക്കണമെന്നാവശ്യപ്പെട്ടായിരുന്നു മാര്‍ച്ച്. തുടര്‍ന്ന് നടന്ന ഉപരോധസമരം ഡിസിസി ജനറല്‍ സെക്രട്ടറി ശോഭ സുബിന്‍ ഉദ്ഘാടനം ചെയ്തു. പുതുക്കാട് നിയോജകമണ്ഡലം പ്രസിഡന്‍റ് ഫൈസല്‍ ഇബ്രാഹിം അധ്യക്ഷത വഹിച്ചു. നേതാക്കളായ സതീഷ് വിമലന്‍, ജെറോം ജോണ്‍ വട്ടക്കുഴി, കെ.എല്‍. ജോസ്, പോള്‍സണ്‍ തെക്കുംപീടിക, നൈജോ ആന്‍റോ, ജസ്റ്റിന്‍ ജോണ്‍സന്‍, കെ. ഗോപാലകൃഷ്ണന്‍, ടി.എം. ചന്ദ്രന്‍, സെബി കൊടിയന്‍, സുധന്‍ കാരയില്‍, പി.ടി. വിനയന്‍, സിജോ പുന്നക്കര, ജിമ്മി മഞ്ഞളി, ജെന്‍സന്‍ കണ്ണത്ത്, ഷാഫി കല്ലൂപറമ്പില്‍, കെ.എസ്. മനോജ് കുമാര്‍, ലിനോ മൈക്കിള്‍, ആന്‍സ് ആന്‍റോ, ശ്യാംരാജ്, ഹരന്‍ ബേബി, റിന്‍റോ ജോണ്‍സന്‍, ജിജോ പുന്നക്കര എന്നിവര്‍ പ്രസംഗിച്ചു. എട്ടു പ്രവര്‍ത്തകരെ പോലീസ് അറസ്റ്റ് ചെയ്ത് ജാമ്യത്തില്‍ വിട്ടയച്ചു. ഫൈസല്‍ ഇബ്രാഹിം, ആല്‍വിന്‍ വര്‍ഗീസ്, ജെറോം ജോണ്‍, ജെസ്റ്റിന്‍ ജോണ്‍സന്‍, റിന്‍റോ ജോണ്‍സണ്‍, വൈശാഖ് ഐത്തടാന്‍, ജിമ്മി മഞ്ഞളി, ജെന്‍സണ്‍ കണ്ണത്ത് എന്നിവരെയാണ് അറസ്റ്റ് ചെയ്തത്.

പോളിടെക്നിക്കിൽ സംഘട്ടനം

തൃപ്രയാർ: സംസ്ഥാന ഇന്‍റർപോളി കലോത്സവത്തിലുണ്ടായ എസ്എഫ്ഐ ആക്രമണത്തിൽ പ്രതിഷേധിച്ച് സംസ്ഥാനവ്യാപകമായി കെഎസ്‌യു ആഹ്വാനം ചെയ്ത വിദ്യാഭ്യാസ ബന്ദിൽ തൃപ്രയാർ പോളി ടെക്നിക്കിൽ സമരം ചെയ്ത കെഎസ്‌യു ഭാരവാഹികളെ ആകമിച്ചതായി പരാതി. യൂണിറ്റ് പ്രസിഡന്‍റ് ആഷിക്ക്, സെക്രട്ടറി അദ്നാൻ എന്നിവർക്കു നേരെയാണ് എസ്എഫ്ഐ പ്രവർത്തകർ ആക്രമണം നടത്തിയത്. പരിക്കേറ്റ ഇരുവരേയും വലപ്പാട് ഗവൺമെന്‍റ് ആശുപത്രിയിൽ പ്രവേശിപ്പിച്ചു. മുൻ ഡിസിസി പ്രസിഡന്‍റ് ജോസ് വള്ളൂർ, കോൺഗ്രസ്‌ നാട്ടിക മണ്ഡലം പ്രസിഡന്‍റ് പി.എം. സിദ്ദിഖ്, മുൻ നാട്ടിക പഞ്ചായത്ത് പ്രസിഡന്‍റ് പി. വിനു, വലപ്പാട് പഞ്ചായത്ത്‌ മെമ്പർ വൈശാഖ് വേണുഗോപാൽ, കെഎസ്‌യു ജില്ലാ വൈസ് പ്രസിഡന്‍റ് ഉവൈസ് നാസർ, ജില്ലാ സെക്രട്ടറി എം.വി. വൈഭവ്, യൂത്ത് കോൺഗ്രസ്‌ നേതാക്കളായ സഗീർ പടുവിങ്ങൽ, ലായേഷ് മാങ്ങാട്ട് എന്നിവർ ആശുപത്രിയിൽ ചികിത്സയിൽ കഴിയുന്നവരെ സന്ദർശിച്ചു.

മികച്ച നേട്ടവുമായി മുണ്ടൂർ കുടുംബാരോഗ്യകേന്ദ്രം

മുണ്ടൂർ : നാഷണല്‍ ക്വാളിറ്റി അഷ്വറന്‍സ് സ്റ്റാൻഡേർഡ്സ് പട്ടികയിൽ മികച്ച നേട്ടവുമായി കൈപ്പറമ്പ് പഞ്ചായത്തിലെ മുണ്ടൂർ കുടുംബരോഗ്യ കേന്ദ്രം. നേരത്തെ തന്നെ ഈ പട്ടികയിൽ ഇവർ ഇടം പിടിച്ചിരുന്നെങ്കിലും ഇത്തവണ ദേശീയ ഗുണനിലവാര അംഗീകാരം ലഭിച്ച സംസ്ഥാനത്തെ ഏഴ് ആരോഗ്യകേന്ദ്രങ്ങളിൽ ഏറ്റവും മികച്ച പോയിന്‍റായ 96.63 ശതമാനം നേടിയാണ് പ്രവേശനം. നാഷണല്‍ ക്വാളിറ്റി അഷ്വറന്‍സ് സ്റ്റാൻഡേർഡ്സ് അംഗീകാരത്തിന് മൂന്നു വര്‍ഷത്തെ കാലാവധിയാണുള്ളത്. മികച്ച നേട്ടം കൈവരിക്കാനായതിന്‍റെ സന്തോഷത്തിലാണ് കൈപ്പറമ്പ് ഗ്രാമപഞ്ചായത്തും മുണ്ടൂർ കുടുംബാരോഗ്യ കേന്ദ്രത്തിലെ ജീവനക്കാരും നാട്ടുകാരും.

"ആ തോക്ക് ഇപ്പോഴും ശബ്ദിച്ചുകൊണ്ടിരിക്കുന്നു'

തൃശൂർ: രാഷ്ട്രപിതാവായ ഗാന്ധിജിയുടെ നെഞ്ചിലേക്കു വെടിയുണ്ടകൾ ഉതിർത്ത തോക്ക് ശബ്ദിച്ചു കൊണ്ടേയിരിക്കുന്ന ഭയാനകമായ അന്തരീക്ഷമാണ് ഇന്ന് ഇന്ത്യയിൽ എന്പാടുമെന്നു പി. ബാലചന്ദ്രൻ എംഎൽഎ അഭിപ്രായപ്പെട്ടു. ജോയിന്‍റ് കൗണ്‍സിൽ നന്മ സാംസ്കാരികവേദിയുടെ സർഗാത്മക പ്രതിരോധം ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം. ബഹിരാകാശത്തുനിന്നുള്ള കാഴ്ചയിൽ അതിരുകളില്ലാത്ത സുന്ദരമായ ഭൂമി, വിവിധങ്ങളായ അതിരുകൾ സൃഷ്ടിച്ച് അതിനപ്പുറവും ഇപ്പുറവും നിന്ന് പോരടിക്കുന്ന മനുഷ്യരും പൊതു ഇടത്തിൽ ഒരു പൊതിച്ചോറ് തുറന്നു ഭക്ഷിക്കുന്പോൾപോലും അതിലെ മാംസാഹാരം മറച്ചുപിടിക്കേണ്ട വിധത്തിൽ മാറിക്കൊണ്ടിരിക്കുന്ന ചുറ്റുപാടുകളും നമ്മെ ഭയപ്പെടുത്തുന്നുവെന്നും എംഎൽഎ കൂട്ടിച്ചേർത്തു. ജോയിന്‍റ് കൗണ്‍സിൽ സംസ്ഥാനചെയർമാൻ എസ്. സജീവ് അധ്യക്ഷത വഹിച്ച ചടങ്ങിൽ സാഹിത്യകാരൻ ടി.ഡി. രാമകൃഷ്ണൻ മുഖ്യപ്രഭാഷണം നടത്തി. എഴുത്തുകാരി ലിസി, യുവകലാസാഹിതി രക്ഷാധികാരി ഇ.എം. സതീശൻ എന്നിവർ പ്രഭാഷണം നടത്തി. കെ.പി. ഗോപകുമാർ, വി.വി. ഹാപ്പി, എം.എസ് സുഗതകുമാരി തുടങ്ങിയവർ പ്രസംഗിച്ചു.

ചക്കംകണ്ടത്ത് മാലിന്യം തള്ളാൻ നഗരസഭ തീരുമാനം; ഇല്ലെന്ന് എംഎൽഎ

ചാവക്കാട്: ചക്കംകണ്ടത്തെ മാലിന്യ സംസ്കരണ ശാലയിലേക്ക് ടാങ്കർ ലോറി വഴി ശുചിമുറി മാലിന്യം എത്തിക്കാൻ ഗുരുവായൂർ നഗരസഭ കൗൺസിൽ എടുത്ത തീരുമാനം റദ്ദാക്കണമെന്ന് പൗരാവകാശ വേദി ആവശ്യപ്പെട്ടു. കഴിഞ്ഞമാസം 28ന് ചേർന്ന ഗുരുവായൂർ കൗൺസിൽ യോഗ ത്തിലാണ് ഭരണകക്ഷിയായ സിപിഐയുടെ വിയോജന കുറിപ്പ് തള്ളി സിപിഎമ്മും പ്രതിപക്ഷവും ചേർന്ന് ഗുരുവായൂരിലെ കക്കൂസ് മാലിന്യം ചക്കംകണ്ടത്ത് തള്ളാൻ തീരുമാനിച്ചത്. ഗുരുവായൂർ നഗരസഭ ചെയർമാന്‍റെ സാന്നിധ്യത്തിലാണ് ഗുരുവായൂരിലെ മാലിന്യം ലോറിയിൽ കൊണ്ടുവന്ന് ചക്കംകണ്ടത്ത് തള്ളുകയില്ലെന്ന് എംഎൽഎ പറഞ്ഞത്. പ്രഖ്യാപനം ആത്മാർത്ഥതയുള്ളതാണെങ്കിൽ ശുരുവായൂർ നഗരസഭയുടെ കൗൺസിൽ യോഗം വിളിച്ചു ചേർത്ത് തീരുമാനം റദ്ദ് ചെയ്യുകയാണ് വേണ്ടതെന്ന് പൗരാവകാശ വേദി ആവശ്യപ്പെട്ടു. കൗൺസിൽ തന്നെ തിരുത്താതെ എംഎൽഎ യുടെ അധ്യക്ഷതയിൽ യോഗം ചേർന്ന് തീരുമാനം നടപ്പിലാക്കില്ലെന്ന് പ്രഖ്യാപിച്ചത് തെരഞ്ഞെടുപ്പ് മുന്നിൽ കണ്ട് ജനങ്ങളുടെ കണ്ണിൽ പൊടിയിടാനുള്ള തന്ത്രമാണെന്ന് പൗരവേദി ആരോപിച്ചു. നഗരസഭ കൗൺസിൽ യോഗം ചേർന്ന് മാലിന്യം തള്ളാനുള്ള തീരുമാനം റദ്ദ് ചെയ്യണമെന്നാവശ്യപ്പെട്ട് 20 ന് ഞായറാഴ്ച വൈകീട്ട് അഞ്ചിന് താലൂക്ക്പൗരാവകാശ വേദിയുടെയും ചാവക്കാട് താലൂക്ക് പൗരസമിതിയുടെയും നേത്രത്ത്വത്തിൽ ചക്കംകണ്ടത്ത് പ്രതിഷേധ യോഗം സംഘടിപ്പിക്കും.

പാലയൂർ ഫെസ്റ്റ് വർണാഭമായി

പാലയൂർ: യൂത്ത് ഓഫ് പാലയൂരിന്‍റെ നേതൃത്വത്തിൽ പാലയൂർ ഫെസ്റ്റ് ആഘോഷിച്ചു. ചാവക്കാട് പോലീസ് സ്റ്റേഷൻ പരിസരത്ത് നിന്നാരംഭിച്ച എഴുന്നള്ളിപ്പിന് മൂന്ന് ആനകൾ അണിനിരന്നു വിവിധവാദ്യമേളങ്ങൾ അകമ്പടിയായി.ബ്രദേഴ്സ് ക്ലബിന്‍റെ നേതൃത്വത്തിൽ സെന്‍റ് ആന്‍റണീസ് കോൺവന്‍റ് പരിസരത്ത് നിന്നും മലാക്ക് ക്ലബിന്‍റെ നേതൃത്വത്തിൽ മുതുവട്ടൂർ സെന്‍ററിൽ നിന്നും എഴുന്നള്ളിപ്പുകൾ ആരംഭിച്ചു. എഴുന്നള്ളിപ്പുകൾ രാത്രി പാലയൂരിൽ സമാപിച്ചു. ജെറിൻ ജോസ്, എൻ.ജി. മേ ജോ, വിബിൻ കെ. വിൻസന്‍റ്, ബിനിൽ ജോസ്, ഹെൽവിൻ ജോർജ്, ജേക്കബ് ജോൺസൻ, പ്രിൻസ് പിയൂസ് തുടങ്ങിയവർ നേതൃത്വം നൽകി.

കുരിയച്ചിറ മാലിന്യ പ്ലാന്‍റ്: തീരുമാനങ്ങൾ നടപ്പാക്കിയില്ലെങ്കിൽ മാലിന്യം തടയും: സമരസമിതി

കുരിയച്ചിറ: ജൈവമാലിന്യസംസ്കരണ പ്ലാന്‍റ് പുനർനിർമാണവുമായി ബന്ധപ്പെട്ടു കളക്ടറുടെ ചേംബറിൽ നടന്ന സംയുക്തയോഗത്തിലെടുത്ത തീരുമാനങ്ങൾ നടപ്പാക്കാതെ മാലിന്യമെത്തിച്ചാൽ തടയുമെന്നു ആക്‌ഷൻ കൗണ്‍സിൽ ഫോർ ക്ലീൻ കുരിയച്ചിറ കൂട്ടായ്മ. ജില്ലാ കളക്ടറുടെ തീരുമാനങ്ങൾ മേയർ അട്ടിമറിച്ചെന്ന് ആരോപിച്ചു പ്ലാന്‍റിന്‍റെ ഉദ്ഘാടനദിവസം കൂട്ടായ്മ പ്രതിഷേധിച്ചിരുന്നു. മൂന്നുകോടി ചെലവിട്ടു മുംബൈയിൽനിന്ന് എത്തിച്ച മെഷീൻ വാറന്‍റി കാലയളവ് കഴിഞ്ഞതിനുശേഷമാണു സ്ഥാപിച്ചതെന്ന ആരോപണവും ഉദ്ഘാടനദിവസംതന്നെ ഉയർന്നിരുന്നു. പ്ലാന്‍റിലേക്കു സ്ഥിരം വൈദ്യുതി കണക്‌ഷൻ നൽകാതെ മന്ത്രിയെ ബോധ്യപ്പെടുത്താനുള്ള ശ്രമംമാത്രമാണു നടന്നതെന്ന് ആക്‌ഷൻ കൗണ്‍സിൽ ചൂണ്ടിക്കാട്ടി. മാലിന്യസംസ്കരണം പാളിയതോടെ കഴിഞ്ഞവർഷം നടത്തിയ സമരത്തെത്തുടർന്നാണ് ആധുനിക പ്ലാന്‍റ് സ്ഥാപിക്കാൻ തീരുമാനമായത്. മേയ് 28നു കളക്ടർ സംയുക്ത മീറ്റിംഗ് വിളിച്ചു. 2024 ജൂണ്‍ നാലിനു കോർപറേഷൻ മിനിറ്റ്സും പുറത്തിറക്കി. മീറ്റിംഗിലെ തീരുമാനം കഴിഞ്ഞ 13 മാസത്തിനിടെ കോർപറേഷൻ നടപ്പാക്കിയിട്ടില്ലെന്നു സമരസമിതി ആരോപിക്കുന്നു. പ്ലാന്‍റിന്‍റെ പ്രവർത്തനം കൃത്യമായി നടക്കുന്നുണ്ടോയെന്ന് അറിയാൻ അഞ്ച് കൗണ്‍സിലർമാർ ഉൾപ്പെടെയുള്ള മോണിറ്ററിംഗ് കമ്മിറ്റി രൂപീകരിക്കുക, കൂട്ടായ്മ അംഗങ്ങൾക്കു തിരിച്ചറിയൽ കാർഡ് അടക്കം നൽകുക, പ്ലാന്‍റിന്‍റെ പ്രവർത്തനത്തിൽ അപാകതയുണ്ടെങ്കിൽ റിപ്പോർട്ട് നൽകുക എന്നിവയടങ്ങുന്നതാണ് തീരുമാനം. നിലവിൽ പ്ലാന്‍റിലേക്ക് ആർക്കും പ്രവേശനം നൽകിയിട്ടില്ല. പ്ലാന്‍റ് പ്രവർത്തനക്ഷമമായാൽ 24 ഡിവിഷനുകളിൽനിന്നുള്ള മാലിന്യമെത്തും. അതിനുമുന്പ് ആവശ്യങ്ങളിൽ ചർച്ച നടത്തണമെന്നും ശക്തനിൽ സ്ഥാപിക്കേണ്ട മെഷീനാണ് കുരിയച്ചിറയിലുള്ളതെന്നും ഇതിനെതിരേ വിജിലൻസിൽ പരാതി നൽകിയിട്ടുണ്ടെന്നും സമരസമിതി പറഞ്ഞു.

യുവാവിനെ ആക്രമിച്ച ഗുണ്ട അറസ്റ്റില്‍

കാട്ടൂര്‍: കാപ്പ ഉത്തരവ് ലംഘിച്ച് യുവാവിനെ ആക്രമിച്ച കേസില്‍ കുപ്രസിദ്ധ ഗുണ്ടയെ കാട്ടൂര്‍ പോലീസ് അറസ്റ്റ് ചെയ്തു. നിരവധി ക്രിമിനല്‍ കേസുകളിലെ പ്രതിയായ കാട്ടൂര്‍ ഇല്ലിക്കാട് സ്വദേശി കതിരപ്പുള്ളി വീട്ടില്‍ തിലേഷിനെ (40) യാണ് അറസ്റ്റ് ചെയ്തത്. കാപ്പ ചുമത്തപ്പെട്ടതിനാൽ ഇരിങ്ങാലക്കുട ഡിവൈഎസ്പി ഓഫീസില്‍ 2025 മാര്‍ച്ച് 28 മുതല്‍ ആറുമാസ കാലത്തേക്ക് എല്ലാ ബുധനാഴ്ചയും ഒപ്പുവയ് ക്കേണ്ടയാളാണിത്. കാപ്പ ഉത്തരവ് ലംഘിച്ച് കഴിഞ്ഞ ദിവസം രാത്രി 11 ന് കാട്ടൂര്‍ എസ്എന്‍ഡിപി അമ്പലത്തിനു സമീപത്തുള്ള ബസ് സ്റ്റോപ്പിനടുത്തുവച്ച് കാറിന്‍റെ അതിവേഗത ചോദ്യം ചെയ്തതിലുള്ള വൈ രാഗ്യത്താല്‍ ബൈക്ക് യാത്രക്കാരനായ കരാഞ്ചിറ തേക്കൂട്ട് വീട്ടില്‍ സിബിന്‍ രാധ (31) യെ തിലേഷ് അസഭ്യം പറഞ്ഞ് ബൈക്കില്‍ വച്ചിരുന്ന ഹെല്‍മറ്റ് കൊണ്ട് തലക്കടിച്ച് പരിക്കേല്‍പ്പിക്കുകയായിരുന്നു. പോലീസ് തിലേഷ് സ ഞ്ചരിച്ചിരുന്ന കാറും കസ്റ്റഡിയിലെടുത്തു. കാട്ടൂര്‍, ഇരിങ്ങാലക്കുട, പഴയന്നൂര്‍, ആലപ്പുഴ രാമങ്കരി പോലീസ് സ്റ്റേഷനുകളിലായി രണ്ട് വധശ്രമക്കേസുൾപ്പടെ 13 ക്രിമിനല്‍ കേസുകളിലെ പ്രതിയാണ് തിലേഷ്. കാട്ടൂര്‍ സിഐ ഇ.ആര്‍. ബൈജു, സബ് ഇന്‍സ്പെക്ടര്‍ ബാബു ജോര്‍ജ്, എഎസ്ഐ കെ.ഡി. മനോജ്, സീനിയര്‍ സിവില്‍ പോലീസ് ഓഫീസര്‍മാരായ സി.ജി. ധനേഷ്, ജോഷി ജോര്‍ജ് എന്നിവരാണ് അന്വേഷണസംഘത്തിലുണ്ടായിരുന്നത്.

കരുവന്നൂര്‍ പള്ളിയില്‍ മെഗാമെഡിക്കല്‍ ക്യാമ്പ് 20ന്

കരുവന്നൂര്‍: സെന്‍റ്് മേരീസ് പള്ളിയില്‍ കത്തോലിക്ക കോണ്‍ഗ്രസിന്‍റെ ആഭിമുഖ്യത്തില്‍ അമല ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സിന്‍റെ സഹകരണത്തോടെ മെഗാ മെഡിക്കല്‍ ക്യാമ്പ് സംഘടിപ്പിക്കുന്നു. 20 ന് രാവിലെ ഒന്പതു മുതല്‍ പള്ളി മതബോധന ഹാളിലാണ് ക്യാമ്പ്. ക്യാമ്പിന്‍റെ ഉദ്ഘാടനം മുന്‍ സര്‍ക്കാര്‍ ചീഫ് വിപ്പ് അഡ്വ. തോമസ് ഉണ്ണിയാടന്‍ നിര്‍വഹിക്കും. അമല ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ് ജോയിന്‍റ്് ഡയറക്ടര്‍ ഫാ. ഷിബു പുത്തന്‍പുരയ്ക്കല്‍ സിഎംഐ മുഖ്യാതിഥി ആയിരിക്കും. കത്തോലിക്ക കോണ്‍ഗ്രസ് പ്രസിഡന്‍റ്് ജോസഫ് തെക്കൂടന്‍ അധ്യക്ഷത വഹിക്കും. പള്ളി വികാരിയും ഡയറക്ടറുമായ ഫാ. ഡേവിസ് കല്ലിങ്ങല്‍ മുഖ്യപ്രഭാഷണം നടത്തും. ജനറല്‍ മെഡിസിന്‍, ഗൈനക്കോളജി, സര്‍ജറി, കാര്‍ഡിയോളജി, ഇഎന്‍ടി, ഓര്‍ത്തോ, കിഡ്‌നി എന്നീ ഏഴ് ചികിത്സാവിഭാഗങ്ങളുടെ വിദഗ്ധരായ ഡോക്ടര്‍മാരും അമല മെഡിക്കല്‍ ടീമും നേതൃത്വം നല്‍കും. പാപ്പ്സ്മിയര്‍ ടെസ്റ്റ്, ഓഡിയോമെട്രി, ഇസിജി, ബിപി, ഷുഗര്‍ തുടങ്ങിയ ടെസ്റ്റുകളും പ്രത്യേകമായി കിഡ്‌നി സ്‌ക്രീനിംഗ് ടെസ്റ്റും സൗജന്യമായി ലഭിക്കും. ക്യാമ്പില്‍ പങ്കെടുക്കുന്ന രോഗികള്‍ക്ക് അമലയിലെ തുടര്‍ചികിത്സകള്‍ക്ക് 40 ശതമാനം വരെ ഡിസ്‌കൗണ്ട് ലഭിക്കും. ക്യാമ്പില്‍ പങ്കെടുക്കുന്ന അര്‍ഹരായ രോഗികള്‍ക്ക് സൗജന്യമായി മരുന്നുകളും നല്‍കുന്നുണ്ട്. ക്യാമ്പ് ദിവസം രാവിലെ എട്ടുമുതല്‍ 11 വരെ രജിസ്്‌ട്രേഷന്‍ സൗകര്യം ഒരുക്കിയിട്ടുണ്ട്.

സെന്‍റ് ജോസഫ്സ് കോളജിന് എല്‍ഇഡി വാളും സൗണ്ട് സിസ്റ്റവും മന്ത്രി ആര്‍. ബിന്ദു കൈമാറി

ഇരിങ്ങാലക്കുട: സെന്‍റ് ജോസഫ്സ് കോളജിലേക്ക് ഇരിങ്ങാലക്കുട എംഎല്‍എയും മന്ത്രിയുമായ ഡോ. ആര്‍. ബിന്ദുവിന്‍റെ 2023- 24 വര്‍ഷത്തെ പ്രത്യേക വികസന ഫണ്ടില്‍ നിന്നും അനുവദിച്ച എല്‍ഇഡി വാളിന്‍റെയും സൗണ്ട് സിസ്റ്റത്തിന്‍റെയും ഉദ്ഘാടനം മന്ത്രി ഡോ. ആര്‍. ബിന്ദു നിര്‍വഹിച്ചു. സെന്‍റ്് ജോസഫ്സ് കോളജ് ഓഡിറ്റോറിയത്തില്‍ നടന്ന ചടങ്ങില്‍ മന്ത്രി ഡോ. ആര്‍. ബിന്ദു എല്‍ഇഡി വോളും സൗണ്ട് സിസ്റ്റവും കോളജിന് കൈമാറി. 25 ലക്ഷം രൂപ ഉപയോഗിച്ചാണ് 15.75 അടി നീളവും 8.4 അടി വീതിയുമുള്ള എല്‍ഇഡി വോളും 12000 വാട്ട് സൗണ്ട് സിസ്റ്റവും കോളജിന് നല്‍കിയത്. ഇരിങ്ങാലക്കുട നഗരസഭ ചെയര്‍പേഴ്സണ്‍ മേരിക്കുട്ടി ജോയ് അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ ഡോ. ബ്ലെസി, കൗണ്‍സിലര്‍ ഫെനി എബിന്‍ വെള്ളാനിക്കാരന്‍, റെയ്ച്ചല്‍ റോസ്, ഐക്യുഎസി കോ-ഓര്‍ഡിനേറ്റര്‍ ഡോ. ടി.വി. ബിനു എന്നിവര്‍ പങ്കെടുത്തു.

എൽഡിഎഫ് അക്രമത്തിനു കാരണം അസഹിഷ്ണുത: പഞ്ചായത്ത് പ്രസിഡന്‍റ്

ചാലക്കുടി: കോടശേരി പഞ്ചായത്തിലെ കോൺഗ്രസ് ഭരണത്തിൽ അസഹിഷ്ണുത മൂത്താണ് എൽ ഡിഎഫ് അക്രമം നടത്തിയതെന്ന് കോടശേരി പഞ്ചായത്ത് പ്രസിഡന്‍റ്് കെ.പി. ജെയിംസ് ആരോപിച്ചു. വെള്ളിക്കുളങ്ങര പോലീസ് എൽഡിഎഫിന് കൂട്ടുനിൽക്കുന്നതായും അദ്ദേഹം ആരോപിച്ചു. ഹരിതകർമസേനയിലെ 20 ൽ പരം അംഗങ്ങൾ പരാതി നൽകിയതിനാലാണ് ഹരിതകർമസേന പ്രസിഡന്‍റ്് തെരഞ്ഞെടുപ്പ് റദ്ദാക്കിയതെന്ന് പഞ്ചായത്ത് പ്രസിഡന്‍റ് പറഞ്ഞു. പഞ്ചായത്തിൽ ഭരണപക്ഷം നടത്തുന്ന വികസന പ്രവർത്തനങ്ങൾ എൽഡിഎഫ് അംഗങ്ങൾ മനപ്പൂർവം തകർക്കാൻ ശ്രമിക്കുന്നതിന്‍റെ ഭാഗമായാണ് പഞ്ചായത്തിലെ കഴിഞ്ഞ ദിവസം ഉണ്ടായ അനിഷ്ട സംഭവങ്ങളെ ന്നും ഹരിതകർമസേന ഉണ്ടാക്കിയത് ഇപ്പോഴത്തെ കോൺഗ്രസ് ഭരണസമിതിയുടെ കാലത്താ ണെന്നും അദ്ദേഹം പറഞ്ഞു. എന്നാൽ അതിനെ കുടുംബശ്രീയുടെ കീഴിലാക്കാൻ എൽഡിഎഫ് ശ്രമിക്കുകയാണ്. കുടുംബശ്രീ അംഗങ്ങളല്ലാത്ത നാലു പേരെ ഒഴിവാക്കിയാണ് അവിടെ പ്രസിഡന്‍റ്് തെരഞ്ഞെടുപ്പ് നടത്തിയത്. പരാതി ലഭിച്ചപ്പോഴാണ് തെരഞ്ഞെടുപ്പ് ഭരണസമിതിയോഗം റദ്ദാക്കിയത്‌. ഈ യോഗത്തിൽ നിന്ന് ഇറങ്ങിപ്പോയ എൽഡി എഫ് അംഗങ്ങൾ കോൺഗ്രസ് അംഗങ്ങളെ തടയുകയായിരുന്നു. സംഘർഷത്തിൽ പരിക്കേറ്റ ഭരണകക്ഷി അംഗവും മുൻ പഞ്ചായത്ത് പ്രസിഡന്‍റുമായ റിജു മാവേലി ഗുരുതരമായി പരിക്കേറ്റ് എറണാകുളത്ത് ചികിത്സയിലാണ്. എന്നാൽ വെള്ളിക്കുളങ്ങര പോലീസ് എൽഡിഎഫ് അംഗങ്ങൾക്കെതിരെ നടപടിയെടുക്കുന്നില്ല. നടപടിയെടുക്കുന്നില്ലെങ്കിൽ കോൺഗ്രസ് നേതൃത്വത്തിൽ പോലീസ് സ്റ്റേഷൻ മാർച്ച് നടത്തുമെന്ന് പറഞ്ഞു. കോൺഗ്രസ് പരിയാരം ബ്ലോക്ക് പ്രസിഡന്‍റ് എം.ടി. ഡേവിസ്, കോടശേരി മണ്ഡലം പ്രസിഡന്‍റ് ജോൺസൺ മാളിയേക്കൽ, കോ ൺഗ്രസ് ബ്ലോക്ക് സെക്രട്ടറി റിൻ സൺ മണവാളൻ, പഞ്ചായത്ത് അംഗങ്ങളായ സി.വി. ആന്‍റണി, ഡെന്നി വർഗീസ് എന്നിവരും പത്രസമ്മേളനത്തിൽ പങ്കെടുത്തു.

കളിക്കളം ഇപ്പോള്‍ ചെളിക്കളം

ഇരിങ്ങാലക്കുട: ഞാറ്റുവേലകഴിഞ്ഞു, ഇനി ഞാറുനടുവാന്‍ കാത്തിരിക്കുകയാണ് ഇരിങ്ങാലക്കുടയിലെ ഒരു കൂട്ടം കായിക പ്രേമികള്‍. ഉഴുതുമറിച്ച് വിത്തിറക്കാന്‍ പാകമായിരിക്കുന്ന അവസ്ഥയിലാണു നഗരസഭ മൈതാനത്തിന്‍റെ ഇപ്പോഴത്തെ അവസ്ഥ. മൈതാനത്തിന്‍റെ പടിഞ്ഞാറേ അരികില്‍ ഒരിടത്ത് സെപ്റ്റിക് ടാങ്കിന്‍റെ കുഴിയും മറുഭാഗത്ത് വേസ്റ്റുകള്‍ നിക്ഷേപിച്ച കുഴിയും. ക്രെയിനും ലോറിയും ഉള്‍പ്പടെയുള്ള വലിയ വാഹനങ്ങള്‍ കയറിയിറങ്ങി നഗരസഭയുടെ മൈതാനം ഇപ്പോള്‍ ചെളിപ്പാടമായിരിക്കുകയാണ്. ശക്തമായ മഴയില്‍ പലപ്പോഴും മൈതാനത്തിനുള്ളില്‍ വെള്ളം കെട്ടിനില്‍ക്കുന്നതു പതിവായതിനാല്‍ അന്നൊന്നും കണ്ടില്ലെന്നുനടിച്ച നഗരസഭ ഞാറ്റുവേല മഹോത്സവത്തിനു മുന്നോടിയായി മൈതാനത്തിന്‍റെ ചുറ്റുമുള്ള കാനകളുടെ സ്ലാബുകള്‍ ഇളക്കിമാറ്റി വൃത്തിയാക്കിയിരുന്നു. വടക്കുഭാഗത്തെ കാനവൃത്തിയാക്കലിന് അല്‍പം വൃത്തി കൂടിപ്പോയി. കാനകളുടെ വീതി കൂടിയതിനാല്‍ സ്ലാബുകള്‍ പകുതിയും കാനകള്‍ക്കുള്ളിലെ വെള്ളത്തിലാണ്. പടര്‍ന്നുപന്തലിച്ച് തണലേകിയിരുന്ന ഒരു മരവും ഇവിടെ കടപുഴകി. ഞാറ്റുവേല മഹോത്സവത്തിനു പിന്നാലെ അതേ‌വേദിയില്‍ സിപിഐയുടെ ജില്ലാ സമ്മേളനത്തോടനുബന്ധിച്ചുള്ള പൊതുസമ്മേളനവും അരങ്ങേറി. ഇതിനിടയില്‍ പ്രതിഷേധം ശക്തമായപ്പോള്‍ സെപ്റ്റിക് ടാങ്കിന്‍റെ കുഴിമൂടി. ഫുഡ് സ്റ്റാളിലെ വേസ്റ്റ് വെള്ളം ഒഴുക്കി‌വിട്ടിരുന്ന കുഴി ഞാറ്റുവേല മഹോത്സവം കഴിഞ്ഞതിനു പിന്നാലെ മൂടി. ഇനി ഈ മൈതാനം കായികപ്രേമികള്‍ക്ക് ഉപയോഗിക്കാന്‍ കഴിയുംവിധം എന്നുനേരെയാകും എന്ന ആശങ്ക ബാക്കിയാവുകയാണ്. മുമ്പ് ഇവിടെ നടത്തിയ കെഎല്‍ 45 മൈതാനത്തേക്ക് വാഹനം കയറിയതിന്‍റെ പേരില്‍ ഒരു ലക്ഷം രൂപ പിഴ ഈടാക്കിയ നഗരസഭയാണ് അടുത്തകാലത്തൊന്നും നേരെയാക്കാന്‍ കഴിയാത്ത‌വിധം മൈതാനത്തെ നശിപ്പിച്ചിരിക്കുന്നത്. ലഹരിക്കെതിരേ ലഹരി കളിക്കളങ്ങളാകട്ടെ എന്ന മുദ്രാവാക്യം മുഴക്കിയ രാഷ്ട്രീയ നേതാക്കളുടെ കൈകള്‍തന്നെ ഇരിങ്ങാലക്കുടയുടെ ഹൃദയമായ മൈതാനത്തെ നാശോന്മുഖമാക്കിയതില്‍ കായികപ്രേമികള്‍ക്കിടയില്‍ കടുത്ത പ്രതിഷേധമുണ്ട്.

നാലമ്പലദര്‍ശനം: സ്‌പെഷല്‍ കെഎസ്ആര്‍ടിസി ബസ് സര്‍വീസ് ഫ്ലാഗ്ഓഫ് ചെയ്തു

ഇരിങ്ങാലക്കുട: നാലമ്പലദര്‍ശനത്തിനായുള്ള കെഎസ്ആര്‍ടി സി സ്‌പെഷല്‍ സര്‍വീസിന്‍റെ ഫ്ലാഗ്‌ഓഫ് ഉന്നത വിദ്യാഭ്യാസമന്ത്രി ഡോ. ആര്‍. ബിന്ദു നിര്‍വഹിച്ചു. കെഎസ്ആര്‍ടിസി ഇരിങ്ങാലക്കുട യൂണിറ്റില്‍നിന്നും രണ്ട് നാലമ്പല സര്‍വീസുകള്‍ ഇന്നുമുതല്‍ ആരംഭിക്കും. രാവിലെ ആറിനും 6.30 നും ഇരിങ്ങാലക്കുട കെഎസ്ആര്‍ടിസി സ്റ്റാന്‍ഡില്‍നിന്നുമാണ് യാത്ര ആരംഭിക്കുന്നത്. ഇരിങ്ങാലക്കുട നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. കൂടല്‍മാണിക്യം ദേവസ്വം ബോര്‍ഡ് ചെയര്‍മാന്‍ അഡ്വ. ഗോപി, ചാലക്കുടി അസി. ട്രാന്‍സ്‌പോര്‍ട്ട് ഓഫീസര്‍ കെ.ജെ. സുനില്‍, കൗണ്‍സിലര്‍മാരായ സ്മിത കൃഷ്ണകുമാര്‍, അമ്പിളി ജയന്‍, കൂടല്‍മാണിക്യം ദേവസ്വം ബോര്‍ഡ് അഡ്മിനിസ്‌ട്രേറ്റര്‍ ജി.എസ്. രാധേഷ് എന്നിവര്‍ പങ്കെടുത്തു.

ആരോഗ്യ ബോധവത്കരണ സെമിനാർ

ചാലക്കുടി: ചാലക്കുടി റെസിഡൻസ് അസോസിയേഷൻ കോ-ഒാർഡിനേഷൻ ട്രസ്റ്റ് (ക്രാക്റ്റ്) വനിതാവിഭാഗം വനിതകൾക്കായി ഹെൽത്ത് അവെയർനെസ് സെമിനാർ നടത്തി. ക്രാക്റ്റ് പ്രസിഡന്‍റ്് പോൾ പാറയിൽ ഉദ്ഘാടനം ചെയ്തു. ക്രാക്റ്റ് വനിതാവിംഗ് പ്രസിഡന്‍റ്് സിമി അനൂപ് അധ്യക്ഷത വഹിച്ചു. ഹെൽത്ത് അവെയർനെസ് സെ മിനാറിന്‍റെ ഭാഗമായി ഡോ. ടി. രാ ജൻ "മരുന്നില്ലാതെ എങ്ങനെ ജീവിക്കാം' എന്ന വിഷയത്തിൽ ക്ലാസ് നയിച്ചു. ക്രാക്റ്റ് സെക്രട്ടറി പി. ഡി. ദിനേഷ്, വനിതാവിംഗ് സെക്രട്ടറി സ്മിജ സണ്ണി, കൗൺസിലർ വി.ജെ. ജോജി, എൽസി ഡേവിസ്, ഹേമലത ചന്ദ്രബാബു, ജിഷ ഗിരീഷ് എന്നിവർ പ്രസംഗിച്ചു.

വിജയോത്സവം സംഘടിപ്പിച്ചു

മതിലകം സെന്‍റ്് ജോസഫ്സ് ഹയർ സെക്കൻഡറി സ്കൂൾ പള്ളിവളവ്‌: മതിലകം സെന്‍റ്് ജോസഫ്സ് ഹയർ സെക്കൻഡറി സ്കൂളിൽ 2024-25 അധ്യയന വർഷത്തിലെ എസ്എസ്എൽസി, പ്ലസ് ടു, എൽഎസ്‌എസ്, യുഎസ്എസ് പരീക്ഷകളിൽ ഉന്നത വിജയം കരസ്ഥ മാക്കിയ വിദ്യാർഥികൾക്ക് അനുമോദനമേകി. മതിലകം പള്ളിവളവ് സാൻജോ കൺവൻഷൻ സെന്‍ററിൽ സംഘടിപ്പിച്ച പുരസ്കാരദാന സമ്മേളനം ഇ.ടി. ടൈസൺ എംഎൽഎ ഉദ്ഘാടനം ചെയ്തു. സ്കൂൾ പിടിഎ സംഘടിപ്പിച്ച അനുമോദന സമ്മേളനത്തിൽ പിടിഎ പ്രസിഡന്‍റ് സി.എം. ജുഗുനു അധ്യക്ഷത വഹിച്ചു. ഹെഡ്മാസ്റ്റർ ജോജി ജോസഫ് ആമുഖപ്രസംഗം നടത്തി. മതിലകം ബ്ലോക്ക് പഞ്ചായത്ത്‌ പ്രസിഡന്‍റ് സി.കെ. ഗിരിജ എസ്എസ്എൽസി പുരസ്‌കാര ദാനവും ജില്ലാപഞ്ചായത്ത്‌ മെമ്പർ സുഗത ശശിധരൻ പ്ലസ് ടു പുരസ്‌കാര ദാനവും മതിലകം ഗ്രാമപഞ്ചായത്ത്‌ പ്രസിഡന്‍റ് സീനത്ത് ബഷീർ എൽഎസ്എസ്, യുഎസ്എസ്, എൻഎംഎംഎസ് പുരസ്‌കാരദാനവും സ്കൂൾ മാനേജർ ഫാ. ഷൈജൻ കളത്തിൽ എൻഡോവ്മെന്‍റ് വിതരണവും നിർവഹിച്ചു. മതിലകം ഗ്രാമപഞ്ചായത്ത്‌ വൈസ് പ്രസിഡന്‍റ് ടി.എസ്. രാജു, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ സുമതി സുന്ദരൻ, പ്രിൻസിപ്പൽ ഡോമനിക് സാവിയോ, പിടിഎ വൈസ് പ്രസിഡന്‍റ് ധനേഷ് കാവാലം, മാതൃസംഗമം പ്രസിഡന്‍റ് റഹിയാനത്ത് അൻസാരി, മാനേജ്മെന്‍റ്് സെക്രട്ടറി മാർട്ടിൻ പെരേര, ഡെപ്യൂട്ടി ഹെഡ്മിസ്ട്രസ് സുനി സെബാസ്റ്റ്യൻ, സ്റ്റാഫ്‌ സെക്രട്ടറി വി.എം. റിയാസ് തുടങ്ങിയവർ പ്രസംഗിച്ചു. ചെമ്പുച്ചിറ സർക്കാർ ഹയര്‍സെക്കന്‍ഡറി സ്‌കൂളില്‍ മറ്റത്തൂര്‍: ചെമ്പുച്ചിറ സര്‍ക്കാര്‍ ഹയര്‍സെക്കന്‍ഡറി സ്‌കൂളിലെ വിജയോത്സവം ജില്ലാ പഞ്ചായത്ത് പ്രസിഡന്‍റ് വി.എസ്. പ്രിന്‍സ് ഉദ്ഘാടനം ചെയ്തു. പിടിഎ പ്രസിഡന്‍റ് പി.എസ്. പ്രശാന്ത് അധ്യക്ഷത വഹിച്ചു. പഞ്ചായത്തംഗം ശാന്തി ബാബു, എസ്എംസി വൈസ് ചെയര്‍മാന്‍ സന്തോഷ് കുന്നുമ്മല്‍, എംപിടിഎ വൈസ് പ്രസിഡന്‍റ് സുനിത സുനില്‍, വികസന‌സമിതി കണ്‍വീനര്‍ ടി. ബാലകൃഷ്ണമേനോന്‍, പ്രിന്‍സിപ്പല്‍ കെ. സതീഷ്, പ്രധാനാധ്യാപിക കൃപകൃഷ്ണന്‍, സീനിയര്‍ അധ്യാപിക കെ. ജി. ഗീത എന്നിവര്‍ പ്രസംഗിച്ചു. സ്‌കൂളിലെ 28 ക്ലാസ് മുറികളിലേക്ക് ഉപയോഗപ്പെടുത്താനായി അധ്യാപിക പി.കെ. അജിത സ്‌പോണ്‍സര്‍ ചെയ്ത് സ്ഥാപിച്ച സൗണ്ട് സിസ്റ്റം ജില്ലാപഞ്ചായത്ത് പ്രസിഡന്‍റ് സ്വിച്ച് ഓണ്‍ ചെയ്തു. നാഷണല്‍ പവര്‍ ലിഫ്റ്റിംഗ് ചാമ്പ്യന്‍ഷിപ്പില്‍ ഗോള്‍ഡ് മെഡല്‍ നേടിയ ഹൈസ്‌കൂള്‍ അധ്യാപിക സി.ബി. സുനിതാദേവി, സൗണ്ട് സിസ്റ്റം സ്‌പോണ്‍സര്‍ ചെയ്ത അധ്യാപിക പി.കെ.അജിത എന്നിവരെ ആദരിച്ചു. എസ്എസ്എല്‍സി, പ്ലസ്ടു, യുഎസ്എസ്, എല്‍എസ്എസ് പരീക്ഷകളില്‍ ഉന്നതവിജയം നേടിയ വിദ്യാര്‍ഥികളെ ഉപഹാരം നല്‍കി അനുമോദിച്ചു.

ഒ.പി. ബാലൻമേനോൻ ശതാഭിഷേക ആഘോഷം 19, 20 തീയതികളിൽ

തൃശൂർ: ജീവകാരുണ്യപ്രവർത്തകനായ ഒ.പി. ബാലൻമേനോന്‍റെ ശതാഭിഷേക ആഘോഷങ്ങൾ 19, 20 തീയതികളിൽ നടക്കും. 19നു വിവേകോദയം സ്കൂളിൽ ഉച്ചയ്ക്കുശേഷം മൂന്നിനു ശിശുസംരക്ഷണമേഖലയിലെ ഇന്നത്തെ പ്രശ്നങ്ങൾ, പരിഹാരം, മാർഗനിർദേശങ്ങൾ വിഷയത്തിൽ വിദഗ്ധർ പങ്കെടുക്കുന്ന സെമിനാർ. ജില്ലാ ശിശുസംരക്ഷണസമിതി മുൻചെയർമാൻ പി.ഒ. ജോർജ് നേതൃത്വം കൊടുക്കും. 20നു രാവിലെ 10.30നു നീരാഞ്ജലി ഓഡിറ്റോറിയത്തിൽ പി. ബാലചന്ദ്രൻ എംഎൽഎ ഉദ്ഘാടനം നിർവഹിക്കും. തേറന്പിൽ രാമകൃഷ്ണൻ അധ്യക്ഷത വഹിക്കും. സുഹൃദ്സംഗമം ഡോ. പി.വി. കൃഷ്ണൻനായർ ഉദ്ഘാടനം ചെയ്യും. ഉച്ചയ്ക്കുശേഷം രണ്ടിനു കലാസായാഹ്നത്തിന്‍റെ ഉദ്ഘാടനം എം.പി. സുരേന്ദ്രൻ ഉദ്ഘാടനം ചെയ്യും. അമ്മന്നൂർ കുട്ടൻചാക്യാരുടെ കൂത്ത്, കലാമണ്ഡലം സിന്ധുവിന്‍റെ നങ്ങ്യാർകൂത്ത്, ഗാനസുധ എന്നിവ നടക്കും. വൈകീട്ട് 4.30നു സമാപനസമ്മേളനവും സമാദരണീയവും മന്ത്രി കെ. രാജൻ ഉദ്ഘാടനം ചെയ്യും. മേയർ എം.കെ. വർഗീസ് മുഖ്യാതിഥിയാകും. പത്രസമ്മേളനത്തിൽ ശ്രീധരൻ തേറമ്പിൽ, കെ. രാധാകൃഷ്ണൻ, കെ. നന്ദകുമാർ, സി.കെ. കുട്ടിശങ്കരൻ എന്നിവർ പങ്കെടുത്തു.

യുവാവ് ജീവനൊടുക്കിയ സംഭവം; കാമുകിയടക്കം മൂന്നുപേർ അറസ്റ്റില്‍

ഇരിങ്ങാലക്കുട: കരുവന്നൂര്‍ തേലപ്പിള്ളിയില്‍ യുവാവ് ജീവനൊടുക്കിയ സംഭവത്തില്‍ ആത്മഹത്യാപ്രേരണക്കുറ്റത്തിന് മൂന്നുപേര്‍ അറസ്റ്റില്‍. ഒല്ലൂര്‍ അഞ്ചേരി കൊല്ലംപറമ്പില്‍ വീട്ടില്‍ അഖില (31), ഭർത്താവ് ജീവന്‍ (31), സഹോദരൻ വല്ലച്ചിറ ചെറുശേരി ആട്ടേരി അനൂപ് (38) എന്നിവരാണ് അറസ്റ്റിലായത്. 2025 ജനുവരി 23ന് കരുവന്നൂര്‍ തേലപ്പിള്ളിയിലാണ് യുവാവ് ജീവനൊടുക്കിയത്. ആത്മഹത്യാക്കുറിപ്പ് അന്വേഷണത്തിനിടെ കണ്ടെത്തിയിരുന്നു. യുവാവ് മറ്റൊരു സ്ത്രീയുമായി വിവാഹം ഉറപ്പിച്ചിരുന്നു. ഇതറിഞ്ഞ കാമുകിയായിരുന്ന അഖിലയും ഭര്‍ത്താവായ ജീവനും അഖിലയുടെ സഹോദരന്‍ അനൂപും യുവാവിന്‍റെ തേലപ്പിള്ളിയിലുള്ള വീട്ടില്‍ കയറി ബഹളമുണ്ടാക്കിയതിലും വിവാഹം മുടക്കുകയും ചെയ്തതിലുള്ള മനോവിഷമത്തിലാണ് യുവാവ് ആത്മഹത്യ ചെയ്തത്. ഇരിങ്ങാലക്കുട പോലീസ് സ്റ്റേഷന്‍ ഇന്‍സ്പെക്ടര്‍ എം.എസ്. ഷാജന്‍, സബ് ഇന്‍സ്പെക്ടര്‍മാരായ പി.ആര്‍. ദിനേശ് കുമാര്‍, സി.എം. ക്ലീറ്റസ്, സതീശന്‍, എഎസ്ഐ മെഹറുന്നീസ, സിപിഒമാരായ അര്‍ജുന്‍, തെസ്നി ജോസ്, വിനീത്, കിഷോര്‍ എന്നിവരാണ് അന്വേഷണ സംഘത്തിലുണ്ടായിരുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]