ADVERTISEMENT

ADVERTISEMENT

മാടപ്പള്ളിയിലെ വനംകുളവിക്കൂട്: പഞ്ചായത്ത് ഇടപെട്ടു

ചങ്ങനാശേരി: മാടപ്പള്ളി കുരിശടിക്കു സമീപം വല്യാനാൽ പുരയിടത്തിലെ വനംകുളവിക്കൂട് വിഷയത്തിൽ പഞ്ചായത്ത് അധികൃതർ ഇടപെട്ടു.

ദീപിക വാർത്ത ശ്രദ്ധയിൽപ്പെട്ട സ്റ്റാൻഡിംഗ് കമ്മിറ്റി ചെയർമാനും സിപിഎം ലോക്കൽ സെക്രട്ടറിയുമായ പി.എ. ബിൻസണാണ് വീട്ടുകാരുമായി സംസാരിച്ചത്.

ഇതിന്‍റെ അടിസ്ഥാനത്തിൽ പുരയിടം ഉടമ വല്യാനാൽ തങ്കച്ചൻ ഓണലൈനിലൂടെ ദീപികയുടെ പത്ര കട്ടിംഗ് സഹിതം പഞ്ചായത്ത് സെക്രട്ടറിക്കു പരാതി നൽകി.

പഞ്ചായത്തിന്‍റെ ഭാഗത്തുനിന്നും കുളവിയെ തുരത്താൻ ഇടപെടൽ നടത്തുമെന്നാണ് നാട്ടുകാരുടെ പ്രതീക്ഷ.

ADVERTISEMENT

തൊഴില്‍ മേള

മാടപ്പള്ളി: വാഴപ്പള്ളി പഞ്ചായത്തും മാടപ്പള്ളി ബ്ലോക്ക് പഞ്ചായത്തുമായി ചേര്‍ന്ന് 30ന് മാടപ്പള്ളി ബ്ലോക്ക് പഞ്ചായത്തില്‍ തൊഴില്‍ മേള സംഘടിപ്പിക്കുന്നു. ഇതിലേക്ക് തൊഴില്‍രഹിതരായ അഭ്യസ്തരെയും യുവജനങ്ങളെയും സ്വാഗതം ചെയ്യുന്നു. യോഗ്യരായവർ‍ യോഗ്യത തെളിയിക്കുന്ന സര്‍ട്ടിഫിക്കറ്റുമായി അന്നേദിവസം രാവിലെ എട്ടിന് ബ്ലോക്ക് പഞ്ചായത്ത് ഓഫീസില്‍ ഹാജരാകേണ്ടതാണ്. കോട്ടയം: കോട്ടയം നഗരസഭ, വിജ്ഞാന കേരളം, കുടുംബശ്രീ മിഷന്‍ ഇന്‍ഫോസിസ് ഫൗണ്ടേഷന്‍ നിര്‍മാണ്‍ എന്നിവര്‍ സംയുക്തമായി ജില്ലാതല തൊഴില്‍മേള 24നു രാവിലെ എട്ടു മുതല്‍ കോട്ടയം മാമ്മന്‍ മാപ്പിള ഹാളില്‍ നടക്കും. നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ ഉദ്ഘാടനം ചെയ്യും. വൈസ് ചെയര്‍മാന്‍ ബി. ഗോപകുമാര്‍ അധ്യക്ഷത വഹിക്കും. മേളയില്‍ നാല്പതി ൽപ്പരം കമ്പനികള്‍ പങ്കെടുക്കും. എസ്എസ്എല്‍സി മുതല്‍ ബിരുദാന്തര ബിരുദം വരെ യോഗ്യതയുള്ള 18 മുതല്‍ 60 വയസു വരെയുള്ളവര്‍ക്കു മേളയില്‍ പങ്കെടുക്കാം.

ഭാഗ്യക്കുറി ക്ഷേമനിധി അംഗങ്ങളുടെ മക്കള്‍ക്ക് സ്‌കോളര്‍ഷിപ്പ്

കോട്ടയം: ഭാഗ്യക്കുറി ക്ഷേമനിധി അംഗങ്ങളുടെ മക്കള്‍ക്കുള്ള 2025 വര്‍ഷത്തിലെ സ്‌കോളര്‍ഷിപ്പിനുള്ള അപേക്ഷ കോട്ടയം ജില്ലാ ഭാഗ്യക്കുറി ക്ഷേമനിധി ഓഫീസില്‍ 23 മുതല്‍ നവംബര്‍ 20 വരെ സ്വീകരിക്കും. 2025ല്‍ 80 ശതമാനം മാര്‍ക്കോടെ എസ്എസ്എല്‍സി വിജയിച്ചവര്‍ക്ക് റെഗുലര്‍ ഹയര്‍ സെക്കന്‍ഡറി തല പഠനത്തിനോ മറ്റു റെഗുലര്‍ കോഴ്‌സുകളില്‍ ഉപരിപഠനത്തിനോ ചേരുന്നവര്‍ക്കും റെഗുലര്‍ പ്രഫഷണല്‍ കോഴ്‌സുകള്‍, ബിരുദ/ബിരുദാനന്തര കോഴ്‌സുകള്‍, ഡിപ്ലോമ കോഴ്‌സുകള്‍ എന്നിവയ്ക്ക് ഉപരിപഠനത്തിന് ചേരുന്നവര്‍ക്കുമാണ് അര്‍ഹത. ഫോൺ - 0481 - 2300390.

തോടുകളില്‍ പോളനിറഞ്ഞ് ഒഴുക്കു നിലച്ചു; ഓടേറ്റി തെക്ക്, കൊല്ലത്ത്ചാത്തങ്കരി പാടശേഖരങ്ങളില്‍ മടവീഴ്ച

ചങ്ങനാശേരി: തോടുകളില്‍ പോളനിറഞ്ഞ് ഒഴുക്കു തടസപ്പെട്ടു. തുലാമഴ ശക്തമാകുന്നതിനിടെ വാഴപ്പള്ളി പഞ്ചായത്ത് 21-ാം വാര്‍ഡിലുള്ള ഓടേറ്റി തെക്ക് പാടശേഖരത്തിൽ മടവീഴ്ച. വാഴപ്പള്ളി കൃഷി ഭവനിലെ 505 ഏക്കറും വെളിയനാട് കൃഷി ഭവനിലെ 45 ഏക്കറും അടങ്ങുന്നതാണ് പാടശേഖരം. അടുത്ത കൃഷിക്കായി പാടം ഒരുക്കുന്ന സമയത്താണ് മടവീഴ്ച. പാടശേഖരസമിതി മട വീണത് അടയ്ക്കുന്നതിനുള്ള ശ്രമം നടത്തിവരികയാണ്. ഒരു അള്ള അടയ്ക്കുമ്പോള്‍ മറ്റ് അള്ളകള്‍ പൊട്ടി പാടശേഖരത്തേക്ക് വെള്ളം കുത്തിയൊഴുകുകയാണ്. ഈ പാടശേഖരത്തില്‍ 320 കൃഷിക്കാരാണുള്ളത്. കഴിഞ്ഞ ദിവസം പായിപ്പാട് കൃഷിഭവന്‍റെ കീഴിലുള്ള കൊല്ലത്തുചാത്തങ്കരി പാടത്തും മട വീണിരുന്നു. ളായിക്കാട് പാലം-പൂവം തോട്ടില്‍ പോള തിങ്ങിനിറഞ്ഞ് നീരൊഴുക്ക് തടസപ്പെട്ടതിനെത്തുടര്‍ന്നാണ് ഈ പാടശേഖരത്ത് മടവീണത്. 92 ഏക്കറുള്ള പാടശേഖരം പുഞ്ചക്കൃഷിക്കായി ഒരുക്കുന്നതിനിടെയാണ് മട വീണത്. മോട്ടര്‍ ഉപയോഗിച്ച് വെള്ളം വറ്റിക്കുന്നതിനിടെയാണ് സംഭവം. നവംബര്‍ പത്തോടെ കൃഷിയിറക്കേണ്ട പാടശേഖരങ്ങളാണിത്. മട വീണ പാടശേഖരങ്ങള്‍ നെല്‍കര്‍ഷക സംരക്ഷണ സമിതി രക്ഷാധികാരി വി.ജെ. ലാലി, സംസ്ഥാന വൈസ് പ്രസിഡന്‍റ് സന്തോഷ് പറമ്പിശേരി, അനിയന്‍കുഞ്ഞ്, കെ.ബി. രവീന്ദ്രന്‍, അപ്പച്ചന്‍ വട്ടക്കളം, ബൈജു സെബാസ്റ്റ്യന്‍ എന്നിവരുടെ നേതൃത്വത്തിലുള്ള സംഘം സന്ദര്‍ശിച്ചു. വാഴപ്പള്ളി പഞ്ചായത്ത് പ്രസിഡന്‍റ് മിനി വിജയകുമാര്‍, കൃഷി ഓഫീസര്‍ ബോണി സിറിയക് എന്നിവരും പാടശേഖരം സന്ദര്‍ശിച്ച് നഷ്ടം വിലയിരുത്തി. മടവീഴ്ചയ്ക്കു കാരണം ബണ്ടുകളുടെ ബലക്കുറവ് തണ്ണീര്‍മുക്കം ബണ്ടും തോട്ടപ്പള്ളി സ്പില്‍വേയും റെഗുലേറ്റ് ചെയ്യുന്നതിലെ സർക്കാരിന്‍റെ അനാസ്ഥയാണ് മട വീഴ്ചയ്ക്കു കാരണം. ബണ്ട് കല്ലുകെട്ടി സംരക്ഷിക്കാത്ത സര്‍ക്കാരിന്‍റെ നടപടിയും മടവീഴ്ചയ്ക്കു കാരണമാണ്. വി.ജെ. ലാലി നെല്‍കര്‍ഷക സംരക്ഷണ സമിതി രക്ഷാധികാരി തോടുകളിലെ പോള ദുരിതം തോടുകളിലെ പോള കര്‍ഷകര്‍ക്ക് ദുരിതമാണ്. ഓടേറ്റി തെക്ക് മട അടയ്ക്കുന്നതിനു രണ്ടു ലക്ഷം രൂപ ചെലവ് വരും. മട വീണ പാടശേഖരങ്ങള്‍ക്ക് എത്രയും വേഗം നഷ്ടപരിഹാരം നല്‍കാന്‍ നടപടി സ്വീകരിക്കണമെന്ന് നെല്‍കര്‍ഷക സംരക്ഷണ സമിതി ആവശ്യപ്പെട്ടു. സന്തോഷ് പറമ്പിശേരി ഓടേറ്റി തെക്ക് പാടശേഖര സമിതി സെക്രട്ടറി പോള നീക്കാന്‍ നടപടി വേണം തോടുകളിലെ പോള നീക്കി ഒഴുക്ക് സുഗമമാക്കാന്‍ ഇറിഗേഷനും കൃഷിവകുപ്പും തയാറാകണം. കര്‍ഷകര്‍ക്കുണ്ടാകുന്ന നഷ്ടം പരിഹരിക്കാനും തയാറാകണം. കൃഷ്ണപ്രസാദ്, (ചലച്ചിത്രതാരം) കൊല്ലത്ത് ചാത്തങ്കരി പാടശേഖര സമിതി പ്രസിഡന്‍റ്

റെജീനയുടെ പ്രതീക്ഷകള്‍ പിച്ചിച്ചീന്തി അന്പത് കോഴികളെ കുറുനരികള്‍ കൊന്നുതിന്നു

ചങ്ങനാശേരി: മാടപ്പള്ളി പെരുമ്പനച്ചി പ്രാക്കുഴിവീട്ടില്‍ റെജീന ജോജിയുടെ കൂട്ടിലെ അമ്പതു കോഴികളെ കൂട്ടത്തോടെയെത്തിയ കുറുനരികള്‍ കടിച്ചുകീറി കൊന്നുതിന്നു. ഇന്നലെ പുലര്‍ച്ചെ മൂന്നിനും അഞ്ചിനും ഇടയിലാണ് സംഭവം. തടിയും കമ്പിയും ഉപയോഗിച്ച് നിര്‍മിച്ച രണ്ടുകൂടുകളിലാണ് കോഴികളെ സൂക്ഷിച്ചിരുന്നത്. കൂട്ടില്‍ അറുപത് കോഴികളെയാണ് വളര്‍ത്തിയിരുന്നത്. കമ്പിവലകള്‍ വലിച്ചുപൊട്ടിച്ച് കൂട്ടില്‍ കടന്നാണ് കുറുനരികള്‍ കോഴികളെ കടിച്ചുകീറിയത്. രാവിലെ ആറുമണിയോടെ റെജീന കൂടുതുറക്കാന്‍ ചെന്നപ്പോഴാണ് കടിച്ചുകീറപ്പെട്ട് രക്തം വാര്‍ന്നൊഴുകി കിടക്കുന്ന കോഴികളെ കണ്ടത്. മാടപ്പള്ളി പഞ്ചായത്ത് 19-ാം വാര്‍ഡില്‍ തെങ്ങണ വട്ടച്ചാല്‍പ്പടിയില്‍നിന്നു പെരുമ്പനച്ചിയിലേക്കുള്ള റോഡരികിലാണ് റെജീനയുടെ വീട്. വാര്‍ഡ്‌മെംബര്‍ സ്ഥലത്തെത്തി വിവരങ്ങൾ ശേഖരിച്ച് പഞ്ചായത്ത് സെക്രട്ടറിയേയും മാടപ്പള്ളി മൃഗാശുപത്രിയിലും അറിയിച്ചിട്ടുണ്ട്. മൂന്നുമാസംമുമ്പ് ഈ ഭാഗത്തുള്ള തേനാടി ഓണാട്ട് തോമാച്ചന്‍റെ 14 താറാവുകളെയും എട്ടുമാസം മുമ്പ് പെരുമ്പനച്ചിഭാഗത്ത് വീട്ടില്‍ വളര്‍ത്തിയിരുന്ന 15 കോഴികളേയും തെരുവുനായ്ക്കള്‍ കടിച്ചു കൊന്നിരുന്നു. കോഴിയെ വളര്‍ത്തിയായിരുന്നു വീട്ടുകാര്യങ്ങള്‍ നടത്തിയിരുന്നത്; കണ്ണീരോടെ റെജീന ജോജി ഭര്‍ത്താവ് ജോജി വിദേശത്ത് ചെറിയ വരുമാനം മാത്രമുള്ള ജോലിയിലാണ്. ആറുസെന്‍റ് സ്ഥലം മാത്രമാണുള്ളത്. വീട്ടുചെലവിനുവേണ്ടിയാണ് കോഴിവളര്‍ത്തല്‍ ആരംഭിച്ചത്. ആറിലും രണ്ടിലും പഠിക്കുന്ന രണ്ടു മക്കളുണ്ട്. കഴിഞ്ഞ അഞ്ചുവര്‍ഷമായി കോഴി വളര്‍ത്തലുണ്ട്. മക്കളും കോഴികളെ നോക്കാൻ സഹായിക്കും. അറുപതില്‍ അമ്പതു കോഴികളും നഷ്ടമായത് ദുഃഖമായി. കുറുനരികള്‍ കോഴിക്കൂടും തകര്‍ത്തിട്ടുണ്ട്. ഇനി എന്തുചെയ്യുമെന്നറിയില്ല. അധികാരികള്‍ പറയുന്നതിങ്ങനെ: "ഇതിനൊന്നും നഷ്ടപരിഹാരം നല്‍കാന്‍ സ്‌കീമില്ല കാട്ടുപന്നികള്‍ കൂട്ടത്തോടെയെത്തി കൃഷിയിടങ്ങള്‍ നിലംപരിശാക്കുന്നു. തെരുവുനായ്ക്കളും കുറുനരികളും കോഴികളെയും ആടുകളെയും കൊന്നുതിന്നുന്നു. നഷ്ടം സംഭവിക്കുന്ന കര്‍ഷകര്‍ സമീപിക്കുമ്പോള്‍ തദ്ദേശ സ്ഥാപനങ്ങളേയും കൃഷി, മൃഗസംരക്ഷണ വകുപ്പിലേയും അധികൃതര്‍ കൈമലര്‍ത്തുന്നു. കൃഷിയിറക്കുന്നതിനുമുമ്പു മടവീണാൽ നഷ്‌ടപരിഹാരം നല്‍കാനും വകുപ്പില്ലെന്ന് കൃഷിവകുപ്പ് കൂട്ടിച്ചേർക്കുന്നു. ഇതിനൊന്നും നഷ്ടപരിഹാരം നല്‍കാന്‍ സ്‌കീമില്ല. ഇന്‍ഷ്വറന്‍സ് ഇല്ലെങ്കില്‍ ഒന്നും ചെയ്യാനാവില്ലെന്നു പറഞ്ഞു മടക്കിയയ്ക്കുന്നു. കര്‍ഷകര്‍ ചോദിക്കുന്നു. ഇതെന്തൊരു നാട്...ഇതെന്തൊരു സിസ്റ്റം. നടപടിയും നഷ്ടപരിഹാരവും ഉണ്ടായേ മതിയാകൂ മാടപ്പള്ളി പഞ്ചായത്തിന്‍റെ വിവിധ ഭാഗങ്ങളില്‍ കാട്ടുപന്നി, തെരുവുനായ്ക്കള്‍, കുറുനരി ശല്യം വര്‍ധിക്കുന്നത് കര്‍ഷകരിലും കോഴി, ആട് വളര്‍ത്തുകാരിലും ആശങ്ക സൃഷ്ടിക്കുകയാണ്. ഈ വിഷയങ്ങള്‍ ഉന്നയിച്ച് പഞ്ചായത്ത് ഓഫീസിനുമുമ്പില്‍ ധര്‍ണ നടത്തിയിരുന്നു. കൃഷി നാശം നേരിടുന്ന കര്‍ഷകര്‍ക്കും കോഴി, ആട് എന്നീ നഷ്ടമാകുന്നവര്‍ക്കും നഷ്ടപരിഹാരം നല്‍കാന്‍ സര്‍ക്കാര്‍ തയാറാകണം. അല്ലാത്തപക്ഷം കര്‍ഷകരെ രംഗത്തിറക്കി സമരം ചെയ്യും. ബാബു കുട്ടന്‍ചിറ, മാടപ്പള്ളി വികസന സമിതി ചെയര്‍മാന്‍

ചങ്ങനാശേരി ഒന്നാം നമ്പര്‍ ബസ് സ്റ്റാന്‍ഡില്‍ വൃത്തിയുള്ള കംഫര്‍ട്ട് സ്റ്റേഷന്‍ വേണം

ചങ്ങനാശേരി: ചങ്ങനാശേരി ഒന്നാം നമ്പര്‍ ബസ് സ്റ്റാന്‍ഡിലെ കംഫര്‍ട്ട് സ്റ്റേഷന്‍ അറ്റകുറ്റപ്പണികള്‍ക്കായി അടയ്ക്കുന്നു... തുറക്കുന്നു. യാത്രക്കാര്‍ക്കും ബസ് ജീവനക്കാര്‍ക്കും വ്യാപാരികള്‍ക്കും ദുരിതം മാത്രം. അടഞ്ഞുകിടന്ന കംഫര്‍ട്ട് സ്റ്റേഷന്‍ താത്കാലിക അറ്റകുറ്റപ്പണികള്‍ നടത്തി ഇന്നലെ വീണ്ടും തുറന്നു. പലപ്പോഴും ഇതുതന്നെയാണ് ഇവിടത്തെ കംഫര്‍ട്ട് സ്റ്റേഷന്‍റെ അവസ്ഥ. കാലപ്പഴക്കത്തില്‍ ഉപയോഗശൂന്യമായ കംഫര്‍ട്ട് സ്റ്റേഷന്‍ അറ്റകുറ്റപ്പണികള്‍ നടത്തി ലക്ഷക്കണക്കിനു രൂപയാണ് നഗരസഭ പാഴാക്കുന്നത്. കംഫര്‍ട്ട് സ്റ്റേഷന്‍ കെട്ടിടത്തിനു സമീപം പുതിയ ടാങ്ക് നിര്‍മിച്ച് നവീകരിക്കാനുള്ള നടപടികളാണ് നടന്നുവരുന്നത്. ടാങ്ക് സ്ഥാപിക്കാനായി ജെസിബി ഉപയോഗിച്ചു മണ്ണു നീക്കം ചെയ്തപ്പോള്‍ പൊങ്ങിവന്നത് പ്ലാസ്റ്റിക് കൂമ്പാരമാണ്. മണ്ണിനടിയില്‍പ്പെട്ടിരിക്കുന്ന പ്ലാസ്റ്റിക്കും മാലിന്യവും പൂര്‍ണമായും നീക്കം ചെയ്യണമെന്ന ആവശ്യം ഉയര്‍ന്നിട്ടുണ്ട്. ആയിരക്കണക്കിനു യാത്രക്കാരും നിരവധി വ്യാപാരികളും ബസ് ജീവനക്കാരും എത്തുന്ന ഈ ബസ് സ്റ്റാന്‍ഡിലെ പഴയ കംഫര്‍ട്ട് സ്റ്റേഷന്‍ പൊളിച്ചുമാറ്റി ആധുനിക രീതിയിലുള്ള ടോയ്‌ലറ്റ് സംവിധാനം നിര്‍മിക്കാനും ശുദ്ധജല ലഭ്യത ഉറപ്പാക്കാനും നഗരസഭാധികൃതര്‍ സത്വര നടപടികള്‍ സ്വീകരിക്കണമെന്ന ആവശ്യമാണ് ഉയരുന്നത്.

അവകാശസംരക്ഷണ യാത്രയ്ക്ക് ചങ്ങനാശേരിയില്‍ പ്രൗഢ വരവേല്പ്

ചങ്ങനാശേരി: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ "സമുദായ ശക്തീകരണം രാഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ്’ എന്നീ മുദ്രാവാക്യങ്ങള്‍ ഉയര്‍ത്തി ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശ സംരക്ഷണ യാത്രയ്ക്ക് ചങ്ങനാശേരിയില്‍ നല്‍കിയ സ്വീകരണം പ്രൗഢമായി. വിവിധ കേന്ദ്രങ്ങളിലെ സ്വീകരണങ്ങള്‍ ഏറ്റുവാങ്ങി പെരുന്നയില്‍ എത്തിയ യാത്രയെ അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, ഡയറക്ടര്‍ ഫാ. സാവിയോ മാനാട്ട്, അതിരൂപതാ പ്രസിഡന്‍റ് ബിജു സെബാസ്റ്റ്യന്‍ എന്നിവരുടെ നേതൃത്വത്തില്‍ സ്വീകരിച്ച് സമ്മേളനവേദിയായ പെരുന്ന ബസ് സ്റ്റാന്‍ഡ് മൈതാനത്തേക്കു സ്വീകരിച്ചു. ചങ്ങനാശേരി, തുരുത്തി, തൃക്കൊടിത്താനം, കുറുമ്പനാടം, നെടുംകുന്നം, മണിമല ഫൊറോനകളുടെ നേതൃത്വത്തിലാണ് സ്വീകരണം ഒരുക്കിയത്. ജോര്‍ജ് കോയിക്കല്‍ വിഷയാവതരണം നടത്തി. ബെന്നി ആന്‍റണി, ട്രിസ ലീസ് സെബാസ്റ്റ്യന്‍, ബിനു ഡൊമനിക്, ടോമിച്ചന്‍ അയ്യരുകുളങ്ങര, സൈബി അക്കര, കെ.എസ്. ആന്‍റണി, കുഞ്ഞുമോന്‍ തൂമ്പൂങ്കല്‍, ജോസ് വേങ്ങാന്തറ, മനു വരാപ്പള്ളി, ബാബു വള്ളപ്പുര, ലിസി പവ്വക്കര, ജോര്‍ജ്കുട്ടി മുക്കത്ത്, ഷിജി ജോണ്‍സണ്‍, പി.സി. കുഞ്ഞപ്പന്‍, ലാലി ഇളപ്പുങ്കല്‍, പി.ജെ. സെബാസ്റ്റ്യന്‍, ഇ.ജെ. തോമസ്, കെ.ഡി. ചാക്കോ, പി.സി.കുഞ്ഞപ്പന്‍, റോസിലിന്‍ കുരുവിള, സിനി പ്രിന്‍സ് തുടങ്ങിയവര്‍ നേതൃത്വം നല്‍കി. ധീരതയ്ക്കുള്ള അംഗീകാരമായി ബെന്‍ വിനുവിനെ യോഗത്തില്‍ ആദരിച്ചു.

സിഡിഎസ് വാർഷികം

വൈക്കം: വൈക്കം നഗരസഭ കുടുംബശ്രീ സിഡിഎസ് വാർഷികം നടത്തി. വൈക്കം സീതാറാം ഓഡിറ്റോറിയത്തിൽ സിഡിഎസ് ചെയർപേഴ്സൺ സൽബി ശിവദാസിന്‍റെ അധ്യക്ഷതയിൽ നടന്ന യോഗംനഗരസഭാ ചെയർപേഴ്സൺ പ്രീതി രാജേഷ് ഉദ്ഘാടനം ചെയ്തു. എഴുത്തുകാരി രവിത ടീച്ചർ മുഖ്യപ്രഭാഷണം നടത്തി. നഗരസഭാ വൈസ് ചെയർമാൻ പി.ടി. സുഭാഷ്, നഗരസഭാ കൗൺസിലർമാരായ സിന്ധു സജീവൻ, എൻ. അയ്യപ്പൻ, രേണുക രതീഷ്, രാധികാ ശ്യാം, എസ്. ഇന്ദിരാദേവി, എ.സി. മണിയമ്മ, ബിന്ദു ഷാജി, എസ്. ഹരിദാസൻ നായർ, ലേഖ ശ്രീകുമാർ, രാജശ്രീ, കവിതാ രാജേഷ്, പി.ഡി. ബിജിമോൾ, സിഡിഎസ് വൈസ് ചെയർപേഴ്സൺ രത്നമ്മ വിജയൻ, മെംബർ സെക്രട്ടറി പി. ഷിബു തുടങ്ങിയവർ പ്രസംഗിച്ചു.

പേവിഷബാധ സംശയിക്കുന്ന നായ വളർത്തുമൃഗങ്ങളെ ആക്രമിച്ചു

വൈക്കം: നഗരസഭയിലെ ആറാട്ടുകുളങ്ങര, ചാലപ്പറമ്പ്, കൊപ്പറമ്പ് പ്രദേശങ്ങളിലും ഉദയനാപുരം പഞ്ചായത്തിലെ കൊടിയാട് പ്രദേശത്തും പേവിഷബാധ സംശയിക്കുന്ന നായ വളർത്തുമൃഗങ്ങളെ ആക്രമിച്ചു പരിക്കേൽപ്പിച്ചു. ചൊവ്വാഴ്ച രാത്രിയും ഇന്നലെ രാവിലെയുമായാണ് ആക്രമ ണമുണ്ടായത്. മുട്ടിയിത്തറ സുകുമാരിയുടെ പശുവിനും കിടാരിക്കും, കൊടിയാട് കട്ടപ്പുറത്ത് ആശയുടെ പശുക്കൾക്കും പ്രദേശത്തെ നിരവധി വളർത്തുനായ്ക്കൾക്കും തെരുവ് നായ്ക്കൾക്കും ഈ നായയുടെ കടിയേറ്റിട്ടുണ്ട്. ഇന്നലെരാവിലെ ഒന്പതോടെ കൊപ്പറമ്പിലുള്ള ഷിനുവിന്‍റെ വീട്ടിലെത്തിയ പേവിഷബാധ സംശയിക്കുന്ന നായ പ്രസവിച്ചുകിടന്ന നായയെയും കുഞ്ഞുങ്ങളേയും ആക്രമിച്ചു പരിക്കേൽപിച്ചു. നഗരസഭാ കൗൺസിലർ ഏബ്രഹാം പഴയകടവന്‍റെ നേതൃത്വത്തിൽ പരിസരവാസികളായ മോനിഷും, അഭിജിത്തും ചേർന്ന് അവശനായ നായയെ പിടിച്ചുകെട്ടി. ഉച്ചയ്ക്കുശേഷം നായ ചത്തു. വൈക്കം വെറ്ററിനറി ഡോക്ടർ ഡോ. ശെങ്കോട്ടയന്‍റെ നേതൃത്വത്തിൽ പശുക്കൾക്ക് അടിയന്തര ചികിത്സ നൽകി. നഗരസഭാ ഉദ്യോഗസ്ഥരായ പ്രവീണ, രമ്യ എന്നിവരും സ്ഥലത്തെത്തിയിരുന്നു.

എസ്എംവൈഎം പാലാ രൂപത കലോത്സവം: കുറവിലങ്ങാടിന് ഓവറോൾ കിരീടം

കുറവിലങ്ങാട്: എസ്എംവൈഎം പാലാ രൂപത കലോത്സവത്തിൽ ഓവറോൾ കിരീടം ചൂടി കുറവിലങ്ങാട് ഫൊറോന. രൂപതയിലെ 19 ഫൊറോനകളെ പിന്നിലാക്കിയാണ് കുറവിലങ്ങാടിന്‍റെ തേരോട്ടം. എസ്എംവൈഎം കുറവിലങ്ങാട് ഫൊറോന രക്ഷാധികാരി ആർച്ച്പ്രീസ്റ്റ് തോമസ് മേനാച്ചേരി, ഫൊറോന ഡയറക്ടർ ഫാ. ജോസഫ് ചുരക്കൽ എന്നിവർ വിജയികളെ അഭിനന്ദിച്ചു. രാമപുരം ഫൊറോന രണ്ടാംസ്ഥാനവും അരുവിത്തുറ ഫൊറോന മൂന്നാംസ്ഥാനവും കരസ്ഥമാക്കി.

കെസിവൈഎല്‍ അതിരൂപത ലീഡര്‍ഷിപ്പ് ക്യാമ്പ് സമാപിച്ചു

കോട്ടയം: ക്നാനായ കാത്തലിക് യൂത്ത് ലീഗിന്‍റെ 2024-25 വര്‍ഷത്തെ രണ്ടാമത് ലീഡര്‍ഷിപ്പ് ക്യാമ്പ് സമാപിച്ചു. കോട്ടയം അതിരൂപത സഹായമെത്രാന്‍ ഗീവര്‍ഗീസ് മാര്‍ അപ്രേം തെള്ളകം ചൈതന്യ പാസ്റ്ററല്‍ സെന്‍ററില്‍ നടന്ന സമാപന സമ്മേളനം ഉദ്ഘാടനം ചെയ്തു. അതിരൂപത വൈസ് പ്രസിഡന്‍റ് നിതിന്‍ ജോസ് അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി, അഡ്വൈസര്‍ സിസ്റ്റര്‍ ലേഖ എസ്‌ജെസി, കെസിസി അതിരൂപത സെക്രട്ടറി ബേബി മുളവേലിപ്പുറം, കെസിവൈഎല്‍ അതിരൂപത ഡയറക്ടര്‍ ഷെല്ലി ആലപ്പാട്ട്, സെക്രട്ടറി ചാക്കോ ഷിബു, ജോയിന്‍റ് സെക്രട്ടറി ബെറ്റി തോമസ് എന്നിവര്‍ പ്രസംഗിച്ചു. അതിരൂപത പ്രസിഡന്‍റ് ജോണിസ് പി. സ്റ്റീഫന്‍, ചാപ്ലയിന്‍ ഫാ. മാത്തുകുട്ടി കുളക്കാട്ടുകുടിയില്‍, ജോയിന്‍റ് ഡയറക്ടര്‍ സ്റ്റെഫി തോമസ്, ഭാരവാഹികളായ ജാക്‌സണ്‍ സ്റ്റീഫന്‍, അലന്‍ ബിജു, ആല്‍ബിന്‍ ബിജു എന്നിവര്‍ ക്യാമ്പിന് നേതൃത്വം നല്‍കി. വിവിധ ഇടവകകളില്‍നിന്നായി 78 യുവാക്കള്‍ ക്യാമ്പില്‍ പങ്കെടുത്തു. ബെസ്റ്റ് ക്യാമ്പറായി തെള്ളിത്തോട് ഇടവകാംഗം നിതിന്‍ ലൂക്കോസ് നന്ദിക്കുന്നേല്‍, പിറവം ഇടവകാംഗമായ സോനാ അന്ന സജി എന്നിവര്‍ തെരഞ്ഞെടുക്കപ്പെട്ടു.

കരുതല്‍ 2025: ലോഗോ പ്രകാശനം

കടുത്തുരുത്തി: കെസിവൈഎല്‍ കടുത്തുരുത്തി യൂണിറ്റിന്‍റെയും എവര്‍ഗ്രീന്‍ കന്പാനിയന്‍റെയും ആഭിമുഖ്യത്തില്‍ കരുതല്‍ 2025 കടുത്തുരുത്തി സെന്‍റ് ജോസഫ് ഓള്‍ഡ് ഏജ് ഹോമില്‍ നടത്തി. കെസിവൈല്‍ കടുത്തുരുത്തി യൂണിറ്റ് പ്രസിഡന്‍റ് ഗാസ്പര്‍ തോമസ് സജി കളത്തിക്കോട്ടിലിന്‍റെ അധ്യക്ഷതയില്‍ ചേര്‍ന്ന യോഗത്തില്‍ കെസിവൈല്‍ അതിരൂപതാ പ്രസിഡന്‍റ് ജോണീസ് പി. സ്റ്റീഫന്‍ കരുതല്‍ 2025ന്‍റെ ഉദ്ഘാടനം നിര്‍വഹിച്ചു. കടുത്തുരുത്തി വലിയപള്ളി വികാരി ഫാ. ജോണ്‍സണ്‍ നീലനിരപ്പേല്‍ അനുഗ്രഹപ്രഭാഷണം നടത്തി. യോഗത്തില്‍ എവര്‍ഗ്രീന്‍ കന്പാനിയന്‍ ഹോം ഹെല്‍ത്ത് ആൻഡ് മെഡിക്കല്‍ സര്‍വീസ് ലോഗോ പ്രകാശനം ജോണിസ് പി. സ്റ്റീഫനും ചാക്കോ ഷിബു ചേനാട്ടുകുഴിയിലും ചേര്‍ന്നു നിര്‍വഹിച്ചു. വീട്ടില്‍ നല്‍കാന്‍ കഴിയുന്ന എല്ലാ ഹോസ്പിറ്റല്‍ സൗകര്യങ്ങളും വീട്ടിലെത്തിച്ചു നല്‍കുന്നതാണ് എവര്‍ഗ്രീന്‍ കമ്പാനിയന്‍ ഹോം ഹെല്‍ത്ത് മെഡിക്കല്‍ സവീസ്. കെസിവൈഎല്‍ അതിരൂപത സെക്രട്ടറി ചാക്കോ ഷിബു ചേനാട്ടുകുഴിയില്‍, സിസ്റ്റര്‍ സിബി, സെന്‍റ് ജോസഫ് ഹോം ഫോര്‍ എല്‍ഡേര്‍ലി ഇന്‍ ചാര്‍ജ് സിസ്റ്റര്‍ സിമോണ, ജോയല്‍ ജോസ് മൂര്‍ത്തിക്കല്‍, ജോയേല്‍ റെജി കരോട്ടുപുത്തന്‍പുരയില്‍ എന്നിവര്‍ പ്രസംഗിച്ചു. ‌

നന്പ്യാകുളത്ത് ലോറിയിടിച്ചു തകര്‍ത്ത ബസ് കാത്തിരിപ്പുകേന്ദ്രം നന്നാക്കൽ‌ വൈകുന്നു

നന്പ്യാകുളം: ഒന്നര വര്‍ഷം മുമ്പ് ലോറിയിടിച്ചു തകര്‍ന്ന ബസ് കാത്തിരിപ്പു കേന്ദ്രം നന്നാക്കാന്‍ നടപടികളില്ല. കോട്ടയം-എറണാകുളം റോഡിലെ നമ്പ്യാകുളം ജംഗ്ഷനിലെ ബസ് കാത്തിരിപ്പു കേന്ദ്രമാണ് നിയന്ത്രണംവിട്ട ലോറിയിടിച്ചു തകര്‍ത്തത്. കാത്തിരിപ്പുകേന്ദ്രത്തില്‍ ഇടിച്ചശേഷം നിര്‍ത്താതെ ഓടിച്ചുപോയ ലോറി കോതനല്ലൂരില്‍ വൈദ്യുതിത്തൂണുകളും ഇടിച്ചുതകര്‍ത്തിരുന്നു. ബസ് കാത്തിരിപ്പു കേന്ദ്രം നന്നാക്കണമെന്ന ആവശ്യം പലവട്ടം ത്രിതല പഞ്ചായത്തുകളിലെ ജനപ്രതിനിധികളോടും എംഎല്‍എയോടും പരാതി പറഞ്ഞിട്ടും യാതൊരു നടപടിയും ഉണ്ടായില്ലെന്ന് നാട്ടുകാരനായ സി. വിന്‍സന്‍റ് പറയുന്നു. ലിമിറ്റഡ് സ്റ്റോപ്പ് ബസ്സുകള്‍ ഉള്‍പ്പെടെ നമ്പ്യാകുളത്തെ ബസ് സ്റ്റോപ്പില്‍ നിര്‍ത്തുന്നുണ്ട്. ശക്തമായ കാറ്റും മഴയുമുണ്ടായാല്‍ അപകടാവസ്ഥയിലായ ബസ് കാത്തിരിപ്പ് കേന്ദ്രം മറിഞ്ഞുവീഴുന്നതിനുള്ള സാധ്യതയുമുണ്ടെന്ന് അദ്ദേഹം പറഞ്ഞു. നമ്പ്യാകുളം ജംഗ്ഷനില്‍ 2014-15 കാലഘട്ടത്തില്‍ എംഎല്‍എയുടെ പ്രാദേശിക വികസനഫണ്ടില്‍നിന്ന് അനുവദിച്ച 2.50 ലക്ഷം രൂപ ഉപയോഗിച്ച് നിര്‍മിച്ച ബസ് കാത്തിരിപ്പ് കേന്ദ്രമാണിത്. സ്റ്റീല്‍ കമ്പി കൊണ്ടുള്ള ഇരിപ്പിടമടക്കം സൗകര്യമുള്ള കാത്തിരിപ്പ് കേന്ദ്രത്തിന്‍റെ തൂണുകള്‍ ഉള്‍പ്പെടെ പൂര്‍ണമായും തകര്‍ന്നു. എറണാകുളം ഭാഗത്തേക്കു പോകുമ്പോള്‍ ഇടതുവശത്തായി സ്ഥിതി ചെയ്തിരുന്ന ബസ് കാത്തിരിപ്പു കേന്ദ്രമാണ് തകര്‍ന്നത്. സ്‌കൂള്‍ കുട്ടികളും മറ്റു യാത്രക്കാരും ഇതുമൂലം വലിയ പ്രതിസന്ധിയാണ് നേരിടുന്നത്. ദിവസവും പുലര്‍ച്ചെ മുതല്‍ ജോലിസ്ഥലത്തേക്കടക്കം പോകാനായി നിരവധിയാളുകളാണ് ഇവിടെ ബസ് കാത്തുനിന്നിരുന്നത്. മഴ പെയ്താല്‍ മുഴുവന്‍ വെള്ളവും യാത്രക്കാരുടെ ദേഹത്ത‌ു വീഴുന്ന സ്ഥിതിയാണ്. കാറ്റും മഴയുമുള്ള സമയങ്ങളില്‍ അപകടഭീതിമൂലം കുട്ടികളടക്കം സമീപത്തെ കടകളുടെ വരാന്തയിലാണ് ബസ് കാത്തു നില്‍ക്കുന്നത്. ബസ് വരുന്ന സമയങ്ങളില്‍ ഇവിടെനിന്ന് ഓടി വരുന്നതിനിടെ വിദ്യാര്‍ഥികളെ കയറ്റാതെ ബസ് മുന്നോട്ടുപോകുന്നത് കുട്ടികളെ ബുദ്ധിമുട്ടിലാക്കുന്നു. ഈ കാത്തിരിപ്പുകേന്ദ്രം വരുന്നതിന് മുമ്പ് ഉണ്ടായിരുന്ന വിശ്രമകേന്ദ്രം കാറ്റില്‍ മരം വീണാണ് നശിച്ചതെന്ന് കിഴക്കെത്തെരുവില്‍ ജോമോന്‍ സ്‌കറിയ പറഞ്ഞു. തുടര്‍ന്ന് മെച്ചപ്പെട്ട നിലയില്‍ നിര്‍മിച്ച കാത്തിരിപ്പ് കേന്ദ്രമാണ് ലോറിയിടിച്ച് തകര്‍ന്നതെന്നും ജോമോന്‍ പറയുന്നു. പുതിയ കാത്തിരിപ്പു കേന്ദ്രം ഉടന്‍ പുതിയ കാത്തിരിപ്പു കേന്ദ്രത്തിനായി മോന്‍സ് ജോസഫ് എംഎല്‍എയുടെ പ്രാദേശിക വികസന ഫണ്ടില്‍നിന്ന് അഞ്ചുലക്ഷം രൂപ അനുവദിച്ചിട്ടുണ്ട്. എസ്റ്റിമേറ്റ് ഒരാഴ്ച്ചയ്ക്കകം എടുക്കും. തകര്‍ന്നുകിടക്കുന്ന കാത്തിരിപ്പു കേന്ദ്രം പൊളിച്ചു മാറ്റും. നിലവിലുള്ളതില്‍നിന്ന് കുറച്ചുകൂടി ഉയര്‍ത്തി ആധുനിക സൗകര്യത്തോടെ ഹൈടെക് ബസ് കാത്തിരിപ്പു കേന്ദ്രമാകും സ്ഥാപിക്കുന്നത്. ബിനോ സ്‌കറിയ, മാഞ്ഞൂര്‍ ‌പഞ്ചായത്തംഗം

ബൈക്കുകൾ കൂട്ടിയിടിച്ച് യുവാവ് മരിച്ചു; ഒരാൾക്കു ഗുരുതര പരിക്ക്

വൈക്കം: ബൈക്കുകൾ കൂട്ടിയിടിച്ചുണ്ടായ അപകടത്തിൽ ബൈക്കിൽ സഞ്ചരിച്ചിരുന്ന യുവാവ് മരിച്ചു. ഒരാൾക്ക് ഗുരുതരമായി പരിക്കേറ്റു. വൈക്കം ഉദയനാപുരം പടിഞ്ഞാറേക്കര പെരുമ്പള്ളിക്കാവിനു സമീപം കോരേത്ത് (ചമ്പക്കാട്ട്) വിശ്വംഭരന്‍റെ മകൻ അനീഷാണ് (45) മരിച്ചത്. ഗുരുതരമായി പരിക്കേറ്റ ഉദയനാപുരം പടിഞ്ഞാറെക്കര എട്ടുപറയിൽ സജീവന്‍റെ മകൻ ഹരികൃഷ്ണനെ (19) കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇന്നലെ വൈകുന്നേരം 7.30ന് വല്ലകം തുറുവേലിക്കുന്നിനു സമീപമായിരുന്നു അപകടം. ഹരികൃഷ്നും അനീഷും സഞ്ചരിച്ചിരുന്ന ബൈക്കുകൾ കുട്ടിയിയിടിക്കുകയായിരുന്നു. മൂന്നാറിലെ സ്വകാര്യ കോളജിൽ കെയർടേക്കറായിരുന്നു അനീഷ്. ഇന്നലെ വൈകുന്നേരം ജോലിസ്ഥലത്തുനിന്നു വൈക്കത്തെത്തിയശേഷം വീട്ടിലേക്കു മടങ്ങുന്നതിനിടെയാണ് അപകടം. മൃതദേഹം വൈക്കം താലൂക്ക് ആശുപത്രി മോർച്ചറിയിൽ. മാതാവ്: പുഷ്പ. സഹോദരങ്ങൾ: അൻകുമാർ, അനൂപ്, പരേതയായ അനിമോൾ. വൈക്കം പോലീസ് മേൽനടപടി സ്വീകരിച്ചു.

പിറവം റോഡ് റെയിൽവേ അടിപ്പാത വെള്ളത്തിൽ‌

വെള്ളൂർ: പിറവം റോഡ് റയിൽവേ സ്റ്റേഷനു സമീപത്തെ റയിൽവേ മേൽപ്പാലത്തിന്‍റെ വാഹനഗതാഗതത്തിനും കാൽനടക്കാർക്കുമായി നിർമിച്ച അടിപ്പാത വെള്ളത്തിൽ മുങ്ങി ഗതാഗതം ദുഷ്കരമായി. വെള്ളൂർ - കല്ലുവേലിൽ റെയിൽവേ ഗേറ്റ് മാറ്റി പകരം റെയിൽവേ മേൽപ്പാതയ്ക്കു കീഴിലൂടെ വാഹന ഗതാഗതത്തിനായി നിർമിച്ച അടിപ്പാതയിൽ മഴവെള്ളവും ചെളിയും നിറഞ്ഞതാണ് വാഹന ഗതാഗതം ദുഷ്കരമാക്കുന്നത്. കഴിഞ്ഞദിവസം ഇതുവഴി ബൈക്കിലെത്തിയ അവർമ സ്വദേശിയായ യുവാവ് ബൈക്ക് മറിഞ്ഞു വീണ് പരിക്കേറ്റിരുന്നു. വെള്ളൂർ - വെട്ടിക്കാട്ടുമുക്ക് റോഡിലൂടെ കെപിപിഎൽ, തലയോലപറമ്പ്, വൈക്കം, ഇറുമ്പയം, പെരുവ ഭാഗങ്ങളിലേക്ക് എത്താൻ നൂറുകണക്കിനാളുകൾ ഈ അടിപ്പാതയെ ആശ്രയിക്കുന്നുണ്ട്. ‌അടിപ്പാതയിൽ ചെളിവെള്ളം നിറഞ്ഞുകിടക്കുന്നതു വലിയ അപകടങ്ങൾക്ക് ഇടയാക്കുമെന്ന് പ്രദേശവാസികൾ പറയുന്നു. വെള്ളൂർ റബർ പാർക്കിലെ നിർമാണപ്രവർത്തനങ്ങൾക്കായി ടിപ്പർ ലോറികളിൽ കൊണ്ടുപോകുന്ന മണ്ണ് വാർന്ന് അടിപ്പാതയിൽ കെട്ടിക്കിടക്കുന്ന വെള്ളത്തിൽ വീണ് ചെളിക്കുളമായിരിക്കുകയാണ്. റെയിൽവേ വെള്ളം പമ്പ് ചെയ്ത് കളയുന്നതിന് നിർമിച്ചിരിക്കുന്ന കിണറിലേക്കു ചെളി വീണ് നിറഞ്ഞ് പമ്പിംഗ് സംവിധാനം തകരാറിലായതാണ് ഗതാഗതതടസത്തിനു കാരണം. മലിനജലം കെട്ടിക്കിടക്കുന്നത് സാംക്രമികരോഗഭീഷണയും ഉയർത്തുന്നു. കമ്പനി കോൺട്രാക്ടറോടും കെആർഎൽ മാനേജ്മെന്‍റ് അധികൃതരോടും നിരവധി തവണ പറഞ്ഞിട്ടും വെള്ളക്കെട്ട് പ്രശ്നത്തിന് പരിഹാരമുണ്ടായില്ലെന്ന് പ്രദേശവാസികൾ കുറ്റപ്പെടുത്തുന്നു. അപകടസ്ഥിതി കണക്കിലെടുത്ത് റെയിൽവേ അധികൃതർ അടിപ്പാതയിലൂടെയുള്ള ഗതാഗതം നിരോധിക്കാനിടയുണ്ടെന്നും പ്രദേശവാസികൾ പറയുന്നു.

പഞ്ചായത്ത് ഓഫീസ് മാർച്ചും കുറ്റവിചാരണ സദസും

വെമ്പള്ളി: എൽഡിഎഫ് സർക്കാരിന്‍റെ ദുർഭരണത്തിലും കാണക്കാരി പഞ്ചായത്തിന്‍റെ വികസനമുരടിപ്പിലും ജനദ്രോഹ നടപടിയിലും പ്രതിഷേധിച്ച് കേരള കോൺഗ്രസ് കാണക്കാരി മണ്ഡലം കമ്മിറ്റിയുടെ നേതൃത്വത്തിൽ ഇന്നു രാവിലെ പത്തിന് കാണക്കാരി പഞ്ചായത്ത് ഓഫീസിലേക്ക് മാർച്ചും കുറ്റവിചാരണ സദസും നടത്തും. വെമ്പള്ളി വില്ലേജ് ഓഫീസ് ജംഗ്ഷനിൽനിന്ന് ആരംഭിക്കുന്ന മാർച്ച് ഫ്രാൻസീസ് ജോർജ് എംപി ഉദ്ഘാടനം ചെയ്യും. കാണക്കാരി പഞ്ചായത്ത് ഓഫീസിനു മുമ്പിൽ മണ്ഡലം പ്രസിഡന്‍റ് റോയി ചാണകപ്പാറയുടെ അധ്യഷതയിൽ നടക്കുന്ന കുറ്റവിചാരണ സദസ് മോൻസ് ജോസഫ് എംഎൽഎ ഉദ്ഘാടനം ചെയ്യുമെന്ന് മണ്ഡലം ജനറൽ സെക്രട്ടറി രാജു ഇമ്മാനുവൽ അറിയിച്ചു.

കേരള കോണ്‍ഗ്രസ് മണ്ഡലം കണ്‍വന്‍ഷന്‍

അയര്‍ക്കുന്നം: കേരള കോണ്‍ഗ്രസ് അയര്‍ക്കുന്നം മണ്ഡലം കണ്‍വന്‍ഷനും പ്രതിഭാ സംഗമവും മണ്ഡലം പ്രസിഡന്‍റ് സേവ്യര്‍ കുന്നത്തേട്ടിന്‍റെ അധ്യക്ഷതയില്‍ എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ ഉദ്ഘാടനം ചെയ്തു. സെക്രട്ടറി ജനറല്‍ അഡ്വ. ജോയ് ഏബ്രഹാം, ഡെപ്യൂട്ടി ചെയര്‍മാന്‍ കെ. ഫ്രാന്‍സിസ് ജോര്‍ജ് എംപി, ജില്ലാ പ്രസിഡന്‍റ് ജെയ്‌സണ്‍ ജോസഫ്, സെക്രട്ടറി സന്തോഷ് കാവുകാട്ട്, നിയോജകമണ്ഡലം പ്രസിഡന്‍റ് ആന്‍റണി തുപ്പലഞ്ഞി, ഉന്നതാധികാരസമിതിയംഗം സാബു ഒഴുങ്ങാലില്‍, എ.സി. ബേബിച്ചന്‍, ജെ.സി. തറയില്‍, അശ്വിന്‍ പടിഞ്ഞാറേക്കര തുടങ്ങിയവര്‍ പ്രസംഗിച്ചു.

കണ്‍വീനറെ മാറ്റി ഉത്തരവായി

കോട്ടയം: അയ്മനത്തെ 479 ഏക്കറുള്ള ഏറങ്കേരി മേക്കരി മേനോങ്കരി പാടശേഖരത്തിനെ 1200 വിരിപ്പ് കൃഷിയുടെ കണ്‍വീനറെ മാറ്റി പുതിയ ആളെ നിയമിച്ചു കോട്ടയം പുഞ്ച സ്‌പെഷല്‍ ഓഫീസര്‍ ഉത്തരവായി. കണ്‍വീനറായിരുന്ന എം.കെ. ജോസഫിനെ മാറ്റി ആര്‍പ്പൂക്കര സ്വദേശി മോഹന്‍ സുരദാസിനെയാണ് പുതിയ കണ്‍വീനറായി നിയമിച്ചത്. എം.കെ. ജോസഫിനു പാടശേഖരത്തില്‍ നിലമില്ലാത്തതിനാല്‍ കണ്‍വീനര്‍ സ്ഥാനത്തുനിന്നു മാറ്റണമെന്നാവശ്യപ്പെട്ട് എം.വി. ജോയിയാണ് പരാതി നല്കിയത്. തുടര്‍ന്നു പുഞ്ച സ്‌പെഷല്‍ ഓഫീസര്‍ വിഷയത്തില്‍ നടപടി സ്വീകരിക്കാന്‍ പാടശേഖര സമിതിയോട് നിര്‍ദേശിക്കുകയും കൃഷി ഓഫീസറോട് റിപ്പോര്‍ട്ട് ആവശ്യപ്പെടുകയും ചെയ്തു. തുടര്‍ന്നു പാടശേഖരസമിതി പുതിയ ആളെ തെരഞ്ഞെടുത്തതിന്‍റെയും കൃഷി ഓഫീസറിന്‍റെ റിപ്പോര്‍ട്ടിന്‍റെയും അടിസ്ഥാനത്തിലാണ് 1200 വിരിപ്പ് കൃഷിയുടെ കണ്‍വീനറെ മാറ്റി ഉത്തരവായത്.

സോളാര്‍ എല്‍ഇഡി ലൈറ്റുകള്‍ നാടിനു സമര്‍പ്പിച്ചു

കോട്ടയം: കൊല്ലാട് കളത്തിക്കടവിലെ നൈറ്റ് വോക്ക് വേയില്‍ സ്ഥാപിച്ച 30 സോളാര്‍ എല്‍ഇഡി ലൈറ്റുകള്‍ നാടിനു സമര്‍പ്പിച്ചു. കൊടൂരാറിന്‍റെ തീരത്ത് കളത്തിക്കടവ് പാലത്തിന് താഴെയാണ് ഈ സ്ഥലം. പ്രഭാത സായാഹ്ന സവാരിക്കാര്‍ ഏറെയുള്ള ഈ സ്ഥലത്ത് വെളിച്ചക്കുറവ് മൂലം ആളുകള്‍ക്കു വലിയ ബുദ്ധിമുട്ടായിരുന്നു. രാത്രികാലങ്ങളിലും നിരവധി ആളുകള്‍ എത്തിയിരുന്ന സ്ഥലത്ത് വെളിച്ചക്കുറവ് തടസമായിരുന്നു. ജില്ലാ പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്തംഗം പി.കെ. വൈശാഖ് ഡിവിഷന്‍ ഫണ്ടില്‍നിന്നും 20 ലക്ഷം രൂപ ചെലവഴിച്ചാണു സോളാര്‍ എല്‍ഇഡി ലൈറ്റുകള്‍ സ്ഥാപിച്ചത്. ജില്ലാ പഞ്ചായത്തും പനച്ചിക്കാട് പഞ്ചായത്തും സംയുക്തമായാണ് പദ്ധതി നടപ്പാക്കിയത്. തിരുവഞ്ചൂര്‍ രാധാകൃഷ്ണന്‍ എംഎല്‍എ നൈറ്റ് വോക്ക് വേയുടെ ഉദ്ഘാടനം നിര്‍വഹിച്ചു. പഞ്ചായത്ത് പ്രസിഡന്‍റ് ആനി മാമ്മന്‍ അധ്യക്ഷത വഹിച്ചു. ജില്ലാ പഞ്ചായത്തംഗം പി.കെ. വൈശാഖ്, ബ്ലോക്ക് പഞ്ചായത്തംഗം സിബി ജോണ്‍, പഞ്ചായത്തംഗങ്ങളായ മിനി ഇട്ടിക്കുഞ്ഞ്, സുനില്‍ ചാക്കോ, അനില്‍ കുമാര്‍ തുടങ്ങിയവര്‍ പ്രസംഗിച്ചു.

യുഡിഎഫ് പ്രക്ഷോഭത്തിന്

കോട്ടയം: കുടിശിക നല്‍കാത്തതിന്‍റെ പേരില്‍ തിരിച്ചുകൊണ്ടുപോയ ഹൃദയശസ്ത്രക്രിയ ഉപകരണങ്ങള്‍ തിരികെയെത്തിക്കാന്‍ ആരോഗ്യവകുപ്പ് നടപടി സ്വീകരിച്ചില്ലെങ്കില്‍ ശക്തമായ പ്രക്ഷോഭം ആരംഭിക്കാനൊരുങ്ങി യുഡിഎഫ് ജില്ലാ കമ്മറ്റി. സംസ്ഥാനത്ത് ഏറ്റവും കൂടുതല്‍ ആന്‍ജിയോപ്ലാസ്റ്റി നടക്കുന്ന കോട്ടയം മെഡിക്കല്‍ കോളജ് ആശുപത്രിയില്‍ സാധാരണക്കാര്‍ക്ക് ചികിത്സ നിഷേധിക്കപ്പെടുന്ന സാഹചര്യമാണ് ഇതുമൂലമുണ്ടായിരിക്കുന്നതെന്നും ഇതിനെതിരേ ശക്തമായ ഉപരോധ സമരം സംഘടിപ്പിക്കുമെന്നും ജില്ലാ കണ്‍വീനര്‍ ഫില്‍സണ്‍ മാത്യൂസ് അറിയിച്ചു. ചെയര്‍മാന്‍ ഇ.ജെ. ആഗസ്തി അധ്യക്ഷത വഹിച്ച യോഗത്തില്‍ സെക്രട്ടറി അസീസ് ബഡായില്‍, ജെയ്‌സണ്‍ ജോസഫ് എന്നിവര്‍ പ്രസംഗിച്ചു.

വെട്ടിമുകളിൽ വൈദ്യുതി തടസം; കൈമലർത്തി അധികൃതർ

വെട്ടിമുകൾ: വെട്ടിമുകൾ ഭാഗത്ത് ഒന്നരമാസത്തോളമായി വൈദ്യുതി തടസം. കാരണമെന്തെന്ന് ആരാഞ്ഞ നാട്ടുകാരോട് അറിയില്ലെന്ന് കെഎസ്ഇബി അധികൃതർ. പുന്നത്തുറ കവല, വെട്ടിമുകൾ, ഷട്ടർ കവല ഭാഗങ്ങളിലാണ് നിരന്തരം വൈദ്യുതി തടസം ഉണ്ടാകുന്നത്. പകൽ സമയം ഇടയ്ക്കിടെ വൈദ്യുതി മുടങ്ങും. ഏതാനും നിമിഷങ്ങൾക്കുശേഷം തടസം നീങ്ങും. ഇന്നലെ പകൽ മുപ്പതിലേറെ തവണ വൈദ്യുതി പോയതായി നാട്ടുകാർ പറയുന്നു. രാത്രിയിൽ അരമണിക്കൂർ വരെ വൈദ്യുതി തടസം ഉണ്ടാകുന്നു. സാമൂഹ്യവിരുദ്ധർ ട്രാൻസ്ഫോർമറുകളിൽനിന്ന് ഫ്യൂസ് ഊരുന്നതാണോയെന്ന സംശയവും ഉണ്ടാകുന്നുണ്ട്. വൈദ്യുതി തടസത്തിൽ വലയുന്ന നാട്ടുകാർ വിഷയം കെഎസ്ഇബി അധികൃതരുടെ ശ്രദ്ധയിൽ പ്പെടുത്തിയിട്ടും പരിഹാരമുണ്ടാകുന്നില്ല. വൈദ്യുതി തടസത്തിന്‍റെ കാരണം പറയാൻ പോലും ജീവനക്കാർ തയാറാകുന്നില്ലെന്നാണ് നാട്ടുകാർ പറയുന്നത്. പകൽ സമയം വ്യാപാരികൾക്കും ഓഫീസുകൾക്കും വൈദ്യുതി തടസം ബുദ്ധിമുട്ടുണ്ടാക്കുന്നു. രാത്രിയിൽ കൊച്ചുകുട്ടികളും രോഗികളും ഉൾപ്പെടെയുള്ളവരും വലയുകയാണ്.

മെഡി. കോളജിൽ ശസ്ത്രക്രിയ ഉപകരണങ്ങൾ എത്തിച്ചില്ലെങ്കിൽ ‌സമരമെന്ന് കോൺഗ്രസ്

ഏറ്റുമാനൂർ: കോട്ടയം മെഡിക്കൽ കോളജ് ആശുപത്രിയിൽനിന്ന് ഹൃദയ ശസ്ത്രക്രിയ ഉപകരണങ്ങൾ തിരികെ കൊണ്ടുപോയതതോടെ പാവപ്പെട്ട രോഗികളുടെ ജീവൻ അപകടത്തിലാണെന്ന് കോൺഗ്രസ് ആരോപിച്ചു. സ്വന്തം നിയോജകമണ്ഡലത്തിലെ മെഡിക്കൽ കോളജ് ആശുപത്രിയിൽനിന്ന് ഹൃദയ ശസ്ത്രക്രിയ ഉപകരണങ്ങൾ തിരികെക്കൊണ്ടുപോയത് മന്ത്രി വി.എൻ. വാസവന്‍റെ പിടിപ്പുകേടാണെന്ന് കോൺഗ്രസ്. മുടങ്ങിയ ശസ്ത്രക്രിയകൾ ഉടൻ ആരംഭിച്ച് രോഗികളുടെ ജീവൻ രക്ഷിക്കാൻ ആവശ്യമായ നടപടി സ്വീകരിക്കണം. അല്ലാത്തപക്ഷം ശക്തമായ സമരപരിപാടികൾ തുടങ്ങുമെന്ന് ജില്ലാ കോൺഗ്രസ് കമ്മിറ്റി പ്രസിഡന്‍റ് നാട്ടകം സുരേഷ്, ഡിസിസി ജനറൽ സെക്രട്ടറി എം. മുരളി എന്നിവർ അറിയിച്ചു.

കെസിവൈഎല്‍ അതിരൂപത ലീഡര്‍ഷിപ്പ് ക്യാമ്പ് സമാപിച്ചു

കോട്ടയം: ക്നാനായ കാത്തലിക് യൂത്ത് ലീഗിന്‍റെ 2024-25 വര്‍ഷത്തെ രണ്ടാമത് ലീഡര്‍ഷിപ്പ് ക്യാമ്പ് സമാപിച്ചു. കോട്ടയം അതിരൂപത സഹായമെത്രാന്‍ ഗീവര്‍ഗീസ് മാര്‍ അപ്രേം തെള്ളകം ചൈതന്യ പാസ്റ്ററല്‍ സെന്‍ററില്‍ നടന്ന സമാപന സമ്മേളനം ഉദ്ഘാടനം ചെയ്തു. അതിരൂപത വൈസ് പ്രസിഡന്‍റ് നിതിന്‍ ജോസ് അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി, അഡ്വൈസര്‍ സിസ്റ്റര്‍ ലേഖ എസ്‌ജെസി, കെസിസി അതിരൂപത സെക്രട്ടറി ബേബി മുളവേലിപ്പുറം, കെസിവൈഎല്‍ അതിരൂപത ഡയറക്ടര്‍ ഷെല്ലി ആലപ്പാട്ട്, സെക്രട്ടറി ചാക്കോ ഷിബു, ജോയിന്‍റ് സെക്രട്ടറി ബെറ്റി തോമസ് എന്നിവര്‍ പ്രസംഗിച്ചു. അതിരൂപത പ്രസിഡന്‍റ് ജോണിസ് പി. സ്റ്റീഫന്‍, ചാപ്ലയിന്‍ ഫാ. മാത്തുകുട്ടി കുളക്കാട്ടുകുടിയില്‍, ജോയിന്‍റ് ഡയറക്ടര്‍ സ്റ്റെഫി തോമസ്, ഭാരവാഹികളായ ജാക്‌സണ്‍ സ്റ്റീഫന്‍, അലന്‍ ബിജു, ആല്‍ബിന്‍ ബിജു എന്നിവര്‍ ക്യാമ്പിന് നേതൃത്വം നല്‍കി. വിവിധ ഇടവകകളില്‍നിന്നായി 78 യുവാക്കള്‍ ക്യാമ്പില്‍ പങ്കെടുത്തു. ബെസ്റ്റ് ക്യാമ്പറായി തെള്ളിത്തോട് ഇടവകാംഗം നിതിന്‍ ലൂക്കോസ് നന്ദിക്കുന്നേല്‍, പിറവം ഇടവകാംഗമായ സോനാ അന്ന സജി എന്നിവര്‍ തെരഞ്ഞെടുക്കപ്പെട്ടു.

സംസ്ഥാനതല സഹകരണ സെമിനാര്‍: ‌സ്വാഗതസംഘം ഓഫീസ് ഉദ്ഘാടനം ഇന്ന്

ഏറ്റുമാനൂര്‍: ‘വിഷന്‍ 2031’ -ന്‍റെ ഭാഗമായി സര്‍ക്കാര്‍ കോട്ടയത്ത് സംഘടിപ്പിക്കുന്ന സഹകരണവകുപ്പിന്‍റെ സംസ്ഥാനതല സഹകരണ സെമിനാറിന്‍റെ സ്വാഗതസംഘം ഓഫീസ് ഉദ്ഘാടനം ഇന്ന് ഏറ്റുമാനൂരില്‍ നടക്കും. ഏറ്റുമാനൂര്‍ പ്രൈവറ്റ് ബസ്‌സ്റ്റാന്‍ഡില്‍ നഗരസഭാ ഓഫീസിന് സമീപമുള്ള ബില്‍ഡിംഗില്‍ വൈകുന്നേരം ആറിന് നടക്കുന്ന ചടങ്ങില്‍ സ്വാഗതസംഘം ചെയര്‍മാന്‍ ചീഫ് വിപ്പ് ഡോ.എന്‍. ജയരാജ് എംഎല്‍എ ഓഫീസ് ഉദ്ഘാടനം ചെയ്യും. ഏറ്റുമാനൂര്‍ ഗ്രാൻഡ് അരീന കണ്‍വന്‍ഷന്‍ സെന്‍ററില്‍ 28നാണ് ‘വിഷന്‍ 2031 ന്‍റെ ഭാഗമായുള്ള നേട്ടങ്ങളും, ഭാവി വികസന ലക്ഷ്യങ്ങളും’ സഹകരണ സെമിനാര്‍ നടക്കുക. സംസ്ഥാനത്തിന്‍റെ വിവിധ ഭാഗങ്ങളില്‍ നിന്നായി 2000 പേര്‍ സെമിനാറില്‍ പങ്കെടുക്കും.

അവകാശസംരക്ഷണ യാത്രയ്ക്ക് ഏറ്റുമാനൂരിൽ ഉജ്വല സ്വീകരണം

ഏറ്റുമാനൂർ: സുറിയാനി കത്തോലിക്കരുടെ സംഘശക്തി വിളിച്ചോതുന്ന സമുദായ സംഗമമായി അവകാശ സംരക്ഷണയാത്ര. സമുദായ ശക്തീകരണം രാഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ് എന്നീ മുദ്രാവാക്യങ്ങൾ ഉയർത്തി കത്തോലിക്ക കോൺഗ്രസ് ഗ്ലോബൽ സമിതിയുടെ നേതൃത്വത്തിൽ 13ന് കാസർഗോഡുനിന്ന് ആരംഭിച്ച അവകാശ സംരക്ഷണ യാത്രയ്ക്ക് ഏറ്റുമാനൂരിൽ ഉജ്വല സ്വീകരണം നൽകി. കത്തോലിക്കാ കോൺഗ്രസ് അതിരമ്പുഴ ഫൊറോനാ സമിതിയുടെ നേതൃത്വത്തിൽ നടന്ന സ്വീകരണത്തിൽ നൂറുകണക്കിന് കത്തോലിക്കാ കോൺഗ്രസ് പ്രവർത്തകർ പങ്കെടുത്തു. ചങ്ങനാശേരി അതിരൂപതയിലെ ആദ്യ സ്വീകരണ കേന്ദ്രമായിരുന്നു ഏറ്റുമാനൂർ. കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തിൽ എത്തിച്ചേർന്ന അവകാശ സംരക്ഷണ യാത്രയെ സെൻട്രൽ ജംഗ്ഷനിൽ സ്വീകരിച്ച് കുരിശുപള്ളി ജംഗ്ഷനിലെ സമ്മേളന വേദിയിലേക്ക് ആനയിച്ചു. ജാഥ സ്ഥിരാംഗങ്ങളായ ഗ്ലോബൽ ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, വൈസ് പ്രസിഡന്‍റുമാരായ രാജേഷ് ജോൺ, ട്രീസാ ലിസ് സെബാസ്റ്റ്യൻ, ബെന്നി ആന്‍റണി, ജോർജ് കോയിക്കൽ, അഡ്വ. മനു ജെ. വരാപ്പള്ളി, ബിജു സെബാസ്റ്റ്യൻ, ടോമിച്ചൻ അയ്യരുകുളങ്ങര എന്നിവരും സംഘത്തിൽ ഉണ്ടായിരുന്നു. കുരിശുപള്ളി ജംഗ്ഷനിൽ നടന്ന സ്വീകരണ സമ്മേളനം ചങ്ങനാശേരി അതിരൂപതാ പ്രോട്ടോസിഞ്ചെല്ലൂസ് മോൺ. ആന്‍റണി എത്തയ്ക്കാട്ട് ഉദ്ഘാടനം ചെയ്തു. കത്തോലിക്ക കോൺഗ്രസ് അതിരൂപത പ്രസിഡന്‍റ് ബിജു സെബാസ്റ്റ്യൻ പടിഞ്ഞാറേവീട്ടിൽ അധ്യക്ഷത വഹിച്ചു. അതിരമ്പുഴ ഫൊറോനാ വികാരി ഫാ. മാത്യു പടിഞ്ഞാറേക്കുറ്റ് മുഖ്യ സന്ദേശവും അതിരൂപതാ ഡയറക്ടർ റവ.ഡോ. സാവിയോ മാനാട്ട് ആമുഖസന്ദേശവും നൽകി. ജാഥാ ക്യാപ്റ്റൻ പ്രഫ. രാജീവ് കൊച്ചുപറമ്പിൽ, ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, അതിരൂപതാ ജനറൽ സെക്രട്ടറി ബിനു ഡൊമിനിക് നടുവിലേഴം, ഫൊറോന ഡയറക്ടർ ഫാ. ജോസഫ് ആലുങ്കൽ, ഏറ്റുമാനൂർ ക്രിസ്തുരാജ പള്ളി വികാരി ഫാ. തോമസ് കുത്തുകല്ലുങ്കൽ, സഹവികാരി ഫാ. ജേക്കബ് ചക്കാത്ര, അതിരൂപതാ ട്രഷറർ ജോസ് ജോൺ വെങ്ങാന്തറ, ഭാരവാഹികളായ സെബാസ്റ്റ്യൻ പുല്ലാട്ടുകാല, ജോയി പാറപ്പുറം, ബിജു തുളിശേരിൽ, ജോബി ചൂരക്കുളം എന്നിവർ പ്രസംഗിച്ചു. അതിജീവനത്തിനായുള്ള പോരാട്ടം: പ്രഫ. രാജീവ് കൊച്ചുപറമ്പിൽ ഏറ്റുമാനൂർ: ഒരു ജനത എന്ന നിലയിൽ നിഷ്കാസിതരായിക്കൊണ്ടിരിക്കുന്ന ഒരു സമൂഹത്തിന്‍റെ അതിജീവനത്തിനായുള്ള പോരാട്ടമാണ് കത്തോലിക്ക കോൺഗ്രസിന്‍റെ നേതൃത്വത്തിൽ നടക്കുന്നതെന്ന് കത്തോലിക്ക കോൺഗ്രസ് ഗ്ലോബൽ പ്രസിഡന്‍റും അവകാശ സംരക്ഷണയാത്ര ക്യാപ്റ്റനുമായ പ്രഫ. രാജീവ് കൊച്ചുപറമ്പിൽ. അവകാശ സംരക്ഷണയാത്രയ്ക്ക് ഏറ്റുമാനൂരിൽ നൽകിയ സ്വീകരണത്തിൽ പ്രസംഗിക്കുകയായിരുന്നു അദ്ദേഹം. അവകാശങ്ങൾക്കുവേണ്ടിയുള്ള പോരാട്ടത്തെ വിമോചനസമരമായി ആരെങ്കിലും കണ്ടാലും വിരോധമില്ല. തങ്ങൾ പ്രക്ഷോഭത്തിൽനിന്ന് പിന്മാറില്ല. വർധിതവീര്യത്തോടെ പൗരാവകാശങ്ങൾക്കായുള്ള പോരാട്ടം തുടരുകതന്നെ ചെയ്യുമെന്ന് അദ്ദേഹം പറഞ്ഞു. രണ്ടായിരം വർഷമായി ഇവിടെ ജനിച്ചു വളരുന്ന തങ്ങളെ വിദേശികൾ എന്നു മുദ്രചാർത്താനും ഭയപ്പെടുത്താനും ഏതു ശക്തികൾ ശ്രമിച്ചാലും നടക്കില്ലെന്നും ഈ സമൂഹം ഇവിടെത്തന്നെ ഉണ്ടാകുമെന്നും ഗ്ലോബൽ ഡയറക്ടർ ഫാ. ഫിലിപ്പ് കവിയിൽ പറഞ്ഞു. സമുദായം ഉയർത്തിക്കാട്ടുന്ന പ്രശ്നങ്ങൾക്ക് പരിഹാരമുണ്ടാകണം. ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് പ്രസിദ്ധീകരിക്കുകയും ശ‌ിപാർശകൾ അടിയന്തരമായി നടപ്പാക്കുകയും വേണം. അതല്ലെങ്കിൽ തെരഞ്ഞെടുപ്പിൽ അതിന്‍റെ പ്രതിഫലനം ഉണ്ടാകും. പ്രശ്നാധിഷ്ഠിത നിലപാടെടുക്കാൻ തങ്ങൾ നിർബന്ധിതരാകുമെന്ന് അദ്ദേഹം പറഞ്ഞു. ന്യായമായ അവകാശങ്ങൾ സംരക്ഷിക്കാനുള്ള പോരാട്ടമാണ് കത്തോലിക്ക കോൺഗ്രസിന്‍റേതെന്ന് സമ്മേളനം ഉദ്ഘാടനം ചെയ്ത ചങ്ങനാശേരി അതിരൂപത പ്രോട്ടോ സിഞ്ചല്ലൂസ് മോൺ. ആന്‍റണി എത്തയ്ക്കാട്ട് പറഞ്ഞു. ഈ പോരാട്ടത്തെ ആർക്കും പരാജയപ്പെടുത്താനാവില്ല.

അവഗണന അംഗീകരിക്കാനാവില്ല: മാർ പണ്ടാരശേരിൽ

കോട്ടയം: ജെ.ബി. കോശി കമ്മീഷൻ റിപ്പോർട്ട് പുറത്ത് വിടാത്തതും പ്രസിദ്ധീകരിക്കാത്തതും ക്രൈസ്തവ സമൂഹത്തിന് നീതി നിഷേധിക്കലാണെന്ന് കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശേരിൽ. ഈ വിഷയത്തിലെ അവഗണന അംഗീകരിക്കാനാവില്ല എന്നും അദ്ദേഹം പറഞ്ഞു. കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശ സംരക്ഷണ യാത്രയ്ക്ക് കോട്ടയത്ത് നൽകിയ സ്വീകരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കത്തോലിക്ക കോൺഗ്രസ് കോട്ടയം അതിരൂപത പ്രസിഡന്‍റ് പി.എ. ബാബു അധ്യക്ഷത വഹിച്ചു. ചങ്ങനാശേരിയിൽ നടന്ന യോഗത്തിൽ കത്തോലിക്ക കോൺഗ്രസ് ചങ്ങനാശേരി അതിരൂപതാ പ്രസിഡന്‍റ് ബിജു സെബാസ്റ്റ്യൻ അധ‍്യക്ഷനായിരുന്നു. ഏറ്റുമാനൂർ, ആലപ്പുഴ, കുട്ടനാട് എന്നിവിടങ്ങളിൽ നടന്ന സ്വീകരണ യോഗങ്ങൾ ചങ്ങനാശേരി അതിരൂപത വികാരി ജനറാൾമാരായ ഫാ. ആന്‍റണി എത്തയ്ക്കാട്ട്, ഫാ. സ്കറിയ കന്യാകോണിൽ എന്നിവർ ഉദ്ഘാടനം ചെയ്തു. വിവിധ കേന്ദ്രങ്ങളിൽ ഗ്ലോബൽ ഡയറക്ടർ ഫാ. ഫിലിപ്പ് കവിയിൽ ആമുഖ സന്ദേശവും ഗ്ലോബൽ ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ അവകാശ പത്രിക അവതരണവും നടത്തി. ചങ്ങനാശേരി അതിരൂപത കത്തോലിക്ക കോൺഗ്രസ് ഡയറക്ടർ ഫാ. സാവിയോ മാനാട്ട് മാനാട്ട്, വൈസ് പ്രസിഡന്‍റുമാരായ രാജേഷ് ജോൺ, ട്രീസാ ലിസ് സെബാസ്റ്റ്യൻ, ബെന്നി ആന്‍റണി , ജോർജ് കോയിക്കൻ, അഡ്വ. മനു ജെ. വരാപ്പള്ളി, ഫാ. സബിൻ തൂമുള്ളിൽ, ടോമിച്ചൻ അയ്യരുകുളങ്ങര, തമ്പി എരുമേലിക്കര, തോമസ് പീടികയിൽ, ബിനു ഡൊമിനിക് നടുവിലേഴം, ജോസ് ജോൺ വെങ്ങാന്തറ, ലിസി ജോസ്, സെബാസ്റ്റ്യൻ വർഗീസ്, സൈബി അക്കര എന്നിവർ വിവിധ കേന്ദ്രങ്ങളിൽ പ്രസംഗിച്ചു.

ശ്രവണ സ്പീച്ച് ആന്‍ഡ് ഹിയറിംഗ് സെന്‍റർ വാർഷികം 25ന്

കോട്ടയം: കഞ്ഞിക്കുഴി ആസ്ഥാനമായി കേള്‍വി, സംസാര പരിചരണരംഗത്ത് പ്രവര്‍ത്തിക്കുന്ന ശ്രവണ സ്പീച്ച് ആന്‍ഡ് ഹിയറിംഗ് സെന്‍ററിന്‍റെ 30-ാം വാര്‍ഷിക ഉദ്ഘാടനവും സൗജന്യ ശ്രവണ സഹായികളുടെ വിതരണവും 25ന് രാവിലെ 10.30 ന് കഞ്ഞിക്കുഴിയില്‍ ചാണ്ടി ഉമ്മന്‍ എംഎല്‍എ നിര്‍വഹിക്കും. വോയിസ് ഓഫ് സൈലന്‍റ് സംഘടനയുമായി ചേര്‍ന്ന് സാമ്പത്തികമായി പിന്നാക്കം നില്‍ക്കുന്ന 30 പേർക്കാണ് ശ്രവണസഹായികള്‍ സൗജന്യമായി നല്‍കുന്നത്. സംസാര-സ്വഭാവ ബുദ്ധിമുട്ടുകള്‍ നേരിടുന്ന കുട്ടികളെ മുഖ്യധാര സ്‌കൂളുകളിലേക്കു പോകുവാന്‍ പ്രാപ്തരാക്കുന്ന കോംഡീല്‍ പ്രീ-സ്‌കൂള്‍ പ്രോഗ്രാം ശ്രവണയുടെ മാത്രം പ്രത്യേകതയാണ്. കുട്ടികള്‍ക്കായി കൂടുതല്‍ നൂതന സൗകര്യങ്ങളോടെ സെന്‍സറി പ്ലേ ഏരിയാ ഒരുക്കിയിരിക്കുന്നു. വിവിധ മേഖലകളില്‍ മികവ് തെളിയിച്ച ശ്രവണയില്‍നിന്ന് ശ്രവണ സഹായികള്‍ വാങ്ങി ഉപയോഗിക്കുന്നവരെ ചടങ്ങില്‍ ആദരിക്കും. സ്‌പെഷല്‍ ഡിസ്‌കൗണ്ട് വിലയില്‍ ഹിയറിംഗ് എയ്ഡുകള്‍ അപ്‌ഗ്രേഡ്/ എക്‌സ്‌ചേഞ്ച് ചെയ്യാനുള്ള അവസരം നവംബര്‍ അഞ്ചുവരെ ലഭ്യമാണ്. കോട്ടയം കഞ്ഞിക്കുഴി, പുളിമൂട് ജംഗ്ഷന്‍, കാഞ്ഞിരപ്പള്ളി, ചങ്ങനാശേരി, തിരുവല്ല, കോഴഞ്ചേരി, തൃപ്പൂണിത്തുറ, ബഗംളൂരു എന്നിവിടങ്ങളിലും ബ്രാഞ്ചുകള്‍ പ്രവര്‍ത്തിക്കുന്നു. 9447041852.

പള്ളിക്കത്തോട്ടില്‍ കേന്ദ്രമന്ത്രി സുരേഷ് ഗോപിയുടെ വാഹനം തടഞ്ഞു

കോട്ടയം: പള്ളിക്കത്തോട്ടില്‍ കേന്ദ്രമന്ത്രി സുരേഷ് ഗോപിയുടെ വാഹനം തടഞ്ഞു നിവേദനം നല്കാന്‍ ശ്രമിച്ചയാളെ ബിജെപി പ്രവര്‍ത്തകര്‍ പിടിച്ചുമാറ്റി. ഇന്നലെ രാവിലെ 10നു കോട്ടയം പള്ളിക്കത്തോട് ബസ് സ്റ്റാന്‍ഡില്‍ കേന്ദ്രമന്ത്രി സുരേഷ് ഗോപി കലുങ്ക് സഭ കഴിഞ്ഞു മടങ്ങുമ്പോഴാണ് സംഭവം. കല്ലാടംപൊയ്ക സ്വദേശി ഷാജിയാണു കേന്ദ്രമന്ത്രിയുടെ വാഹനം തടഞ്ഞു നിവേദനം നല്കാന്‍ ശ്രമം നടത്തിയത്. വാഹനം തടഞ്ഞതോടെ ബിജെപി പ്രവര്‍ത്തകര്‍ ഇയാളെ കൈയേറ്റം ചെയ്യാന്‍ ശ്രമിച്ചെങ്കിലും മറ്റു നേതാക്കള്‍ ഇടപെട്ട് തടഞ്ഞു. സാമ്പത്തിക സഹായം ആവശ്യപ്പെട്ടാണ് ഇയാള്‍ എത്തിയതെന്നാണു പറയുന്നത്. തുടര്‍ന്ന് നിവേദനം നല്‍കാനെത്തിയ ആളെ മുതിര്‍ന്ന ബിജെപി പ്രവര്‍ത്തകര്‍ തന്നെ സമാധാനിപ്പിച്ചു പ്രശ്‌നം ചോദിച്ചശേഷം സാമ്പത്തിക സഹായം നല്‍കി വീട്ടിലേക്ക് മടക്കിവിടുകയായിരുന്നു. ഇത് സംബന്ധിച്ചു ബിജെപി പള്ളിക്കത്തോട് പഞ്ചായത്ത് പ്രസിഡന്‍റ് ദിപിന്‍ കെ. സുകുമാര്‍ പള്ളിക്കത്തോട് പോലീസില്‍ പരാതി നല്കി. ഇതിന്‍റെ ഉത്തരവാദിത്വം ആഭ്യന്തരവകുപ്പിനും പോലീസ് ഉദ്യോഗസ്ഥര്‍ക്കുമാണെന്നും അതിനാല്‍ സമഗ്ര അന്വേഷണം നടത്തി കുറ്റക്കാര്‍ക്കെതിരേ കര്‍ശന നടപടിയെടുക്കണമെന്നും ബിജെപി ആവശ്യപ്പെട്ടു. അതേസമയം താന്‍ ബിജെപി അനുഭാവിയാണെന്ന് ഷാജി പറഞ്ഞു. സമഗ്രാന്വേഷണം വേണം സംഭവത്തെക്കുറിച്ച് സമഗ്രാന്വേഷണം വേണമെന്ന് ബിജെപി നേതാവ് എന്‍. ഹരി ആവശ്യപ്പെട്ടു. വലിയ സുരക്ഷാ വീഴ്ചയാണ് സംഭവിച്ചത്. പരിപാടിയില്‍ പ്രശ്‌നമുണ്ടാവാന്‍ സാധ്യതയുണ്ടെന്ന് ഡിവൈഎസ്പി അടക്കമുള്ളവരെ അറിയിച്ചിരുന്നതാണ്. ഒന്നരമണിക്കൂര്‍ നീണ്ട സഭയിലോ ഹെല്‍പ്പ് ഡെസ്‌കിലോ പരാതി നല്‍കാതെ വാഹനം തടഞ്ഞുനിര്‍ത്തി ഇതിനു ശ്രമിച്ചുവെന്നതു വിശ്വസിക്കാനാകുന്നില്ല. എന്‍. ഹരി ബിജെപി മധ്യമേഖല പ്രസിഡന്‍റ്

ഒരുവട്ടംകൂടിയെന്നോര്‍മകള്‍ മേയുമ്പോള്‍...

മന്ത്രി റോഷി അഗസ്റ്റിന്‍ 1984ല്‍ പ്രീഡിഗ്രിക്ക് സെന്‍റ് തോമസ് കോളജിലേക്ക് അല്‍പം ആശങ്കയോടെയാണു കടന്നുചെന്നതെങ്കിലും കോളജ് വോളിബോളിന് പ്രസിദ്ധമാണെന്നത് വോളി കമ്പക്കാരനായ എനിക്ക് ഏറെ സന്തോഷം പകര്‍ന്നു. വോളിപ്രിയരുടെ മനസില്‍ ഒരിക്കലും മായാത്ത ജിമ്മി ജോര്‍ജ് പഠിച്ച കോളജിന്‍റെ ടീമിലെത്താനായത് ഭാഗ്യമായി ഞാന്‍ കരുതി. കലാലയ രാഷ്‌ട്രീയവും വോളിബോള്‍ കളിയുമൊക്കെയായി അഞ്ചു വര്‍ഷം ഞാന്‍ സെന്‍റ് തോമസില്‍ പഠിച്ചു. ക്ലാസില്‍ ചെല്ലുമ്പോള്‍ ആദ്യ രണ്ട് അവറുകള്‍ കഴിഞ്ഞിരിക്കും. പലപ്പോഴും പ്രാക്ടിക്കല്‍ ആണ് നഷ്ടമാകുന്നത്. അതിനൊരു പോംവഴി കണ്ടെത്തി. വൈകുന്നേരം വോളി പ്രാക്ടീസ് കഴിഞ്ഞ് രാത്രിബസില്‍ കോട്ടയം തിരുനക്കരയിലെ പ്രതിഭാ ട്യൂഷന്‍ സെന്‍ററില്‍ എത്തും. രാവിലെ കോളജില്‍ ചെയ്യാന്‍ പറ്റാതിരുന്ന പ്രാക്ടിക്കല്‍ അവിടെ വച്ചുചെയ്യും. ട്യൂഷന്‍സെന്‍ററില്‍നിന്ന് രാത്രി വൈകി തിരിച്ചെത്തി വൈകി മുത്തോലിയില്‍ തങ്ങും. ഡിഗ്രി പരീക്ഷ എഴുതാനുള്ള അറ്റന്‍ഡന്‍സ് അല്‍പം കുറവായിരുന്നു. പ്രിന്‍സിപ്പല്‍ ഫാ. ഈനാസ് ഒറ്റത്തെങ്ങുങ്കല്‍ കനിഞ്ഞാലേ പരീക്ഷ എഴുതാന്‍ സാധിക്കൂ എന്ന സാഹചര്യം. ഒരു തരത്തിലും അച്ചന്‍ വഴങ്ങുന്ന മട്ടുമില്ല. ഇതോടെ നാട്ടകം കോളജില്‍ പരീക്ഷ എഴുതാന്‍ സൗകര്യം ഒരുക്കാനുള്ള ശ്രമത്തിലായി ഞാന്‍. ഫീസ് അടയ്‌ക്കേണ്ട ദിവസത്തിന് തലേന്ന് ഞാന്‍ അച്ചനെ സമീപിച്ച് തുടരെ യാചിച്ചെങ്കിലും അച്ചന്‍ മുഖത്തോട്ടു പോലും നോക്കാതെ ഗൗരവത്തിലാണ്. മണിക്കൂറുകള്‍ അച്ചന്‍റെ മുറിവാതില്‍ക്കല്‍ നിന്നു. ഏറെക്കഴിഞ്ഞ് അച്ചന്‍ ഇറങ്ങിവന്ന് നീ രാവിലെ ഓഫീസിലേക്ക് വാ എന്ന് പറഞ്ഞത് ആശ്വാസമായി. അങ്ങനെ ഫീസ് അടച്ചു പരീക്ഷ എഴുതി. മന്ത്രിയായശേഷം നടന്ന ഞങ്ങളുടെ ബാച്ചിലെ റീയൂണിയന് സഹപാഠികള്‍ എല്ലാവരും എത്തിയത് തിളങ്ങുന്ന ഓര്‍മയാണ്. ആ യോഗം ഉദ്ഘാടനം ചെയ്തതാകട്ടെ ഈനാസച്ചനും. സെന്‍റ് തോമസ് കലാലയ ജീവിതമാണ് പൊതുപ്രവര്‍ത്തന രംഗത്തേക്ക് കടന്നുവരാനും രാഷ്‌ട്രീയ രംഗത്ത് ഉയരാനും എന്നെ പ്രാപ്തനാക്കിയത് എന്നു പറയുന്നതില്‍ അഭിമാനമുണ്ട്.

ഓര്‍മയില്‍ മായാതെ ജിമ്മി ജോര്‍ജ്

മാണി സി. കാപ്പന്‍ എംഎല്‍എ സെന്‍റ് തോമസ് കോളജിലെ ക്ലാസ്മുറിയിലിരുന്നു പഠിക്കാന്‍ സാധിച്ചിട്ടില്ലെങ്കിലും എന്നെ വോളിബോള്‍ പഠിപ്പിച്ചതും സംസ്ഥാന താരമാക്കിയതും സെന്‍റ് തോമസ് കോളജിലെ കളിക്കളമാണ്. ജിമ്മി ജോര്‍ജും ജോസ് ജോര്‍ജും എം.എ. ജോസഫും ഡോ. ജോര്‍ജ് മാത്യുവും ഗോപിനാഥുമൊക്കെ നെറ്റിനു മുകളില്‍ ഉയര്‍ന്നു പൊങ്ങിനിന്ന് കണ്ണുമഞ്ചിക്കുന്ന സ്മാഷുകള്‍ തീര്‍ക്കുന്ന കാലം. വോളിബോളിനോടുള്ള കമ്പത്തില്‍ ഞാനും കോളജിലെത്തി അവര്‍ക്കൊപ്പം കളിച്ചു. അങ്ങനെ ഞാന്‍ കാലിക്കട്ട് സര്‍വകലാശാലാ വോളി ടീമിലും പിന്നീട് സ്റ്റേറ്റ് ടീമിലും വോളി താരമായി. സെന്‍റ് തോമസ് കോളജിലെ വോളി ടീമുമായുള്ള ബന്ധം എക്കാലവും തുടര്‍ന്നുവെന്നു മാത്രമല്ല ഞാനും ജിമ്മി ജോര്‍ജും അബുദാബി സ്‌പോര്‍ട്‌സ് ക്ലബിനുവേണ്ടി മൂന്നര വര്‍ഷം കളിച്ചു. മൂന്നര വര്‍ഷവും ഞങ്ങള്‍ ഒരു മുറിയിലാണു താമസിച്ചിരുന്നത്. ജിമ്മി ജോര്‍ജ് അകാലത്തില്‍ പൊലിഞ്ഞപ്പോള്‍ ഓര്‍മ നിലനിറുത്താന്‍ സെന്‍റ് തോമസ് കോളജില്‍ ജിമ്മി ജോര്‍ജ് സ്‌റ്റേഡിയം പണിയാനും വോളി ടൂര്‍ണമെന്‍റ് തുടങ്ങാനും എല്ലാത്തരത്തിലും ഞാനും മുന്നിലുണ്ടായിരുന്നു. പാലായുടെ മാത്രമല്ല കേരളത്തില്‍ കലാ കായിക വിദ്യാഭ്യാസ മുന്നേറ്റത്തിന് സെന്‍റ് തോമസ് കോളജിന്‍റെ സംഭാവനകള്‍ ഉദാത്തമാണ്. അവിടെ പഠിക്കാനായില്ലെങ്കിലും സെന്‍റ് തോമസ് എന്‍റെയും ആത്മകലാലയമാണെന്ന് മനസില്‍ ഉറച്ചു വിശ്വസിക്കുന്നു.

ഉദിച്ചുയർന്ന താരങ്ങളേറെ

പഠിച്ചു പോയവരില്‍ ഏറ്റവും അറിയപ്പെടുന്നവരാരെന്ന ചോദ്യത്തിനു സത്യമായ മറുപടി രണ്ടു പേരുകളില്‍ വന്നു നില്‍ക്കുമെന്നാണ് ഇവിടെ പഠിക്കുകയും പഠിപ്പിക്കുകയും ചെയ്തയാളെന്ന നിലയില്‍ എന്‍റെ ബോധ്യവും വിശ്വാസവും. അത് ജിമ്മി ജോര്‍ജും സക്കറിയയുമാണ്. നക്ഷത്രങ്ങള്‍ വേറേയുമുണ്ട്. എന്‍റെ പൊളിറ്റിക്‌സ് ക്ലാസുകളിലിരുന്നു പ്രീഡിഗ്രിയും ഡിഗ്രിയും പഠിച്ച സജീവ് വടക്കേല്‍ തുടര്‍ച്ചയായി മൂന്നുവര്‍ഷം സര്‍വകലാശാലാ മത്സരങ്ങളില്‍ സ്വര്‍ണ മെഡല്‍ നേടി. രാജേഷ് കൈമള്‍ പഞ്ചഗുസ്തിയില്‍ ദേശീയ ചാമ്പ്യനും. സിബി ജോര്‍ജ് ഡിഗ്രിക്കും പിജിക്കും ഒന്നാം റാങ്കു നേടി ഐഎഫ്എസ് പാസായി. കെ.ജെ. മാത്യുവും ടോം ജോസും ടി.കെ. ജോസും ചീഫ് സെക്രട്ടറിമാരായി. സക്കീര്‍ തോമസ് ഐആര്‍എസ് ജയിച്ച് ഇന്‍കം ടാക്‌സ് ഡയറക്ടര്‍ ജനറലും. എന്നെ പഠിപ്പിച്ചവരില്‍ പ്രഫ. കെ.എം. ചാണ്ടി ഗവര്‍ണറായപ്പോള്‍ ഡോ. എ.ടി. ദേവസ്യ ഗാന്ധിജി സര്‍വകലാശാലയില്‍ പ്രഥമ വൈസ് ചാന്‍സലറായി. ഞാന്‍ പഠിപ്പിച്ചവരില്‍ മാര്‍ ജോസഫ് കൊല്ലംപറമ്പിലും മാര്‍ ജോസഫ് സ്രാമ്പിക്കലും ബിഷപ്പുമാരും ഡോ. സ്റ്റാനി തോമസ് സ്റ്റേറ്റ് പബ്ലിക് സര്‍വീസ് കമ്മീഷന്‍ അംഗവുമായി. പ്ലാറ്റിനം ജൂബിലിയില്‍ രാഷ്‌ട്രപതിതന്നെ മുഖ്യാതിഥിയാവുമ്പോള്‍ പാലാ സെന്‍റ് തോമസ് കോളജ് പുതിയ ചരിത്രമെഴുതുകയാണ്.

പുതുചരിത്രമെഴുതി സെന്‍റ് തോമസ് കോളജ്

ഡോ. സിറിയക് തോമസ് മുന്‍ വൈസ് ചാന്‍സലര്‍, എംജി സര്‍വകലാശാല പാലാ സെന്‍റ് തോമസ് കോളജ് ഒരു രാത്രി വെളുത്തപ്പോള്‍ സ്വയംഭൂവായി വന്ന സ്ഥാപനമല്ല. കല്ലിലും മണ്ണിലും ചവിട്ടിനിന്നും കല്ലും മണ്ണും തലയില്‍ ചുമന്നും ഒരു തലമുറ കഷ്ടപ്പെട്ടു പണിതുയര്‍ത്തിയ വിജ്ഞാനമന്ദിരമെന്നോ സരസ്വതീക്ഷേത്രമെന്നോ വിശേഷിപ്പിച്ചാല്‍ പരിഭവം വേണ്ട. പാലാ കോളജിന്‍റെ സ്ഥാപനം പാലായുടെ ചരിത്രം മാറ്റിയെഴുതി. ഉന്നത വിദ്യാഭ്യാസ രംഗത്ത് അതൊരു പൂക്കാലം തന്നെയായിരുന്നു. എന്‍എസ്എസ് വകയായി മന്നത്തു പത്മനാഭനും എസ്എന്‍ഡിപി യോഗം വകയായി ആര്‍. ശങ്കറും കോളജുകള്‍ തുടങ്ങിയ കാലം. ശങ്കര്‍ കൊല്ലം കോളജിലേക്കു പ്രിന്‍സിപ്പലായി കൊണ്ടുവരുവാന്‍ ശ്രമിച്ചത് സര്‍ സി.വി. രാമനെയാണ്. അന്നത്തെ മൈസൂര്‍ മുഖ്യമന്ത്രി കെ. ഹനുമന്തയ്യ വഴി സമ്മര്‍ദം ചെലുത്തിയിട്ടും സി.വി. രാമന്‍ വഴങ്ങിയില്ല. പാലാ കോളജിലേക്ക് വയലില്‍ പിതാവ് ആദ്യ പ്രിന്‍സിപ്പലായി കൊണ്ടുവന്നത് ഡല്‍ഹിയില്‍ ഇന്ത്യാ ഗവണ്‍മെന്‍റിന്‍റെ സാമ്പത്തികോപദേഷ്ടാവായിരുന്ന ഡോ. പി.ജെ. തോമസിനെയായിരുന്നു. രണ്ടു വര്‍ഷം കഴിഞ്ഞപ്പോള്‍ അദ്ദേഹം ഡല്‍ഹിക്കു മടങ്ങി. കൊല്ലം ഫാത്തിമാമാതാ കോളജ് പ്രിന്‍സിപ്പലായിരുന്ന ഫാ. ജോസഫ് കുരീത്തടമായിരുന്നു പിന്‍ഗാമിയായി എത്തിയത്. പതിനാറു വര്‍ഷം അച്ചന്‍ കോളജിന്‍റെ ജീവാത്മാവും പരമാത്മാവുമായി പ്രിന്‍സിപ്പലിന്‍റെ കസേരയിലിരുന്നു. അച്ചന്‍റെയും കോളജിന്‍റെയും രാജയോഗകാലമായിരുന്നു അതെന്ന് സാക്ഷ്യപ്പെടുത്തിയത് സെന്‍റ് തോമസ് കോളജില്‍ത്തന്നെ സ്റ്റാറ്റിസ്റ്റിക്‌സ് വകുപ്പുമേധാവിയായിരുന്ന ജ്യോതിഷ പണ്ഡിതന്‍ പ്രഫ. കെ. രാമകൃഷ്ണപിള്ളയായിരുന്നു. പിന്നീടു വന്ന പ്രിന്‍സിപ്പല്‍മാരും മോശക്കാരായിരുന്നില്ല. ഡോ. എന്‍.എം. തോമസച്ചന്‍ ഞങ്ങളുടെ പൊളിറ്റിക്‌സ് പ്രഫസറായിരിക്കെയാണ് അല്‍ഫോന്‍സാ കോളജിന്‍റെ ആദ്യ പ്രിന്‍സിപ്പലായത്. പിന്നീട് കുരീത്തടത്തിലച്ചന്‍റെ പിന്‍ഗാമിയെന്ന നിലയില്‍ അച്ചന്‍ സെന്‍റ് തോമസ് കോളജിന്‍റെ സാരഥിയായി. തുടര്‍ന്ന് പ്രിന്‍സിപ്പലായ പ്രഫ. പി.എം. ചാക്കോ പാലാ കോളജ് കണ്ട ഏറ്റവും ജനകീയനായ പ്രിന്‍സിപ്പലുമായിരുന്നു. പണ്ഡിതരും പ്രഗത്ഭരും പ്രശസ്തരുമായ അധ്യാപകരുടെ ഒരു ശൃംഖലതന്നെ കോളജിന് എക്കാലത്തും അവകാശപ്പെടാനുണ്ടായിരുന്നു.

രാഷ്‌ട്രപതിക്ക് ഇന്ന് ഉജ്വലവരവേല്‍പ്

പാലാ: മുക്കാല്‍ നൂറ്റാണ്ടിന്‍റെ പ്രൗഢമായ ചരിത്രമുള്ള പാലാ സെന്‍റ് തോമസ് കോളജിലേക്ക് ഇന്ന് രാജ്യത്തിന്‍റെ പ്രഥമ പൗരന്‍ ദ്രൗപദി മുര്‍മു എത്തുന്നു. രാഷ്ട്രപതിയെ വരവേല്‍ക്കാന്‍ കോളജും പാലായും അണിഞ്ഞൊരുങ്ങി. ആയിരക്കണക്കിനു പ്രശസ്ത വ്യക്തികള്‍ക്ക് അറിവനുഭവങ്ങള്‍ പകര്‍ന്ന കലാലയത്തില്‍ രാഷ്‌ട്രപതിക്ക് വന്‍വരവേല്‍പ്പാണു കോളജ് ഒരുക്കുന്നത്. പുതിയ വര്‍ണച്ചായങ്ങള്‍ അണിയിച്ചു കോളജും കമാനവും മോടിയാക്കി. രാഷ്‌ട്രപതിയെ സ്വാഗതം ചെയ്യുന്ന ബോര്‍ഡ് കോളജിനു മുന്നില്‍ സ്ഥാപിച്ചു. ഇന്നു വൈകുന്നേരം 3.50ന് ഹെലികോപ്ടറിലാണു വിശിഷ്ടാതിഥി പാലായിലെത്തുന്നത്. ഹെലിപാഡില്‍നിന്ന് ബിഷപ് വയലില്‍ ഹാളിലേക്ക് കാറിലാണ് രാഷ്‌ട്രപതിയും ഗവര്‍ണറും എത്തുക. അവിടെനിന്നും വേദിയിലേക്ക് അതിഥികളെ സ്വീകരിച്ചാനയിക്കും. കോളജിന്‍റെ പ്ലാറ്റിനം ജൂബിലി സമാപന സമ്മേളനം ഉദ്ഘാടനത്തിനുശേഷം ജൂബിലി സ്മാരകമായി നിര്‍മിക്കുന്ന പുതിയ ബ്ലോക്കിന്‍റെ ശിലാഫലകവും രാഷ്‌ട്രപതി അനാഛാദനം ചെയ്യും. ബിഷപ് മാര്‍ ജോസഫ് കല്ലറങ്ങാട്ട് രാഷ്‌ട്രപതിക്ക് ഉപഹാരം സമ്മാനിക്കും. പ്രത്യേക ക്ഷണം ലഭിച്ച 800 പേര്‍ പങ്കെടുക്കും. 4.50ന് രാഷ്‌ട്രപതിയും സംഘവും കോട്ടയത്തേക്ക് മടങ്ങും.വിവിധ രാഷ്‌ട്രപതിമാരുടെയും പ്രധാനമന്ത്രിമാരുടെയും സന്ദര്‍ശനത്തിലൂടെ ചരിത്രമെഴുതിയ പാലാ സെന്‍റ് തോമസ് കോളജിലേക്ക് മറ്റൊരു വിശിഷ്ടാതിഥികൂടി എത്തുന്നതിന്‍റെ ആവേശത്തിലാണു പാലാ നഗരവും കാമ്പസും. പാസ് ലഭിച്ചവര്‍ക്ക് പ്രവേശനം മുന്‍കൂട്ടി രജിസ്റ്റര്‍ ചെയ്ത് പാസ് ലഭിച്ചവര്‍ പാസ്റ്ററല്‍ ഇന്‍സ്റ്റിറ്റ്യൂട്ടിന്‍റെ സമീപമുള്ള ഗേറ്റിലൂടെയാണ് സമ്മേളനവേദിയിലേക്ക് എത്തേണ്ടത്. പങ്കെടുക്കുന്നവര്‍ പ്രവേശനത്തിനുള്ള പാസ് കൂടാതെ ഒരു ഐഡി പ്രൂഫുംകൂടി കൊണ്ടുവരേണ്ടതാണ്. 2.30നു മുന്‍പായി ഹാളില്‍ പ്രവേശിക്കണം. മൊബൈല്‍ ഫോണ്‍ ഉള്‍പ്പെടെയുള്ള യാതൊരു വസ്തുക്കളും ഹാളില്‍ പ്രവേശിപ്പിക്കാന്‍ അനുമതി ഇല്ലാത്തതിനാല്‍ ഗേറ്റിനു സമീപമുള്ള കൗണ്ടറില്‍ അവ ഏല്‍പിക്കേണ്ടതാണ്. പാര്‍ക്കിംഗ് ഊരാശാലയ്ക്കു സമീപമുള്ള സണ്‍ സ്റ്റാര്‍ കണ്‍വന്‍ഷന്‍ സെന്‍ററിന്‍റെ മുന്‍വശത്തും പാസ്റ്ററല്‍ ഇന്‍സ്റ്റിറ്റ്യൂട്ടിലേക്കുള്ള റോഡിന്‍റെ വലതുവശത്തുനിന്നു പ്രവേശിക്കാവുന്ന കോളജിന്‍റെ എച്ച് ബ്ലോക്കിനു മുന്നിലുമാണു പാര്‍ക്കിംഗ് ക്രമീകരിച്ചിരിക്കുന്നത്. സി.ആര്‍. ഹോസ്റ്റലിനു മുന്‍വശം വിഐപികള്‍ക്കുള്ള പാര്‍ക്കിംഗ് ഏരിയയാണ്. 5.10ന് കോട്ടയത്ത് 5.10ന് ഹെലികോപ്റ്ററില്‍ കോട്ടയത്തേക്ക് എത്തുന്ന രാഷ്‌ട്രപതി കോട്ടയം പോലീസ് പരേഡ് ഗ്രൗണ്ടില്‍ ഇറങ്ങും. അവിടെനിന്ന് ലോഗോസ് ജംഗ്ഷന്‍, ശാസ്ത്രി റോഡ്, കുര്യന്‍ ഉതുപ്പ് റോഡ്, സീസേഴ്‌സ് ജംഗ്ഷന്‍, ബേക്കര്‍ ജംഗ്ഷന്‍ വഴി കോട്ടയം - കുമരകം റോഡില്‍ എത്തും. ഈ വഴി നേരേ കുമരകം താജ് ഹോട്ടലില്‍ എത്തും. 24ന് ഇതേവഴി തന്നെ കുമരകത്തുനിന്ന് തിരികെ പോലീസ് പരേഡ് ഗ്രൗണ്ടില്‍ എത്തും. 11നു പോലീസ് പരേഡ് ഗ്രൗണ്ടില്‍ ഹെലികോപ്റ്ററില്‍ കൊച്ചിക്കു പോകും. പ്രതിഭാ പാട്ടീലാണു കുമരകത്ത് എത്തിയ ആദ്യ രാഷ്‌ട്രപതി. 2010 ഓഗസ്റ്റ് 11നാണു പ്രതിഭാ പാട്ടീല്‍ കുടുംബ സമേതം എത്തിയത്. രാജ്യത്തിന്‍റെ രണ്ട് വനിതാ രാഷ്‌ട്രപതിമാരും എത്തിയ ഇടം എന്നതു കുമരകത്തിന്‍റെ പെരുമയേറ്റും. ജി - 20 ഉദ്യോഗസ്ഥതല സമ്മേളനം നടന്നപ്പോള്‍ വിവിധ രാജ്യങ്ങളുടെ പ്രതിനിധികള്‍ കുമരകത്ത് എത്തിയിരുന്നു.

പൗരോഹിത്യ സുവർണജൂബിലി

പൂവത്തോട്: വൈദികരും സന്യസ്തരും സഭയ്ക്കും സമൂഹത്തിനും സേവനം ചെയ്ത് ക്രിസ്തുവിന്‍റെ സുവിശേഷ പ്രഘോഷകരായി ജീവിക്കുന്നവരാണെന്ന് ബിഷപ് മാർ ജേക്കബ് മുരിക്കൻ. ഫാ. ജോസ് പ്രകാശ് മണ്ണൂരെട്ടൊന്നിലിന്‍റെ പൗരോഹിത്യ സുവർണ ജൂബിലി സമ്മേളനത്തിൽ മുഖ്യപ്രഭാഷണം നടത്തുകയായിരുന്നു ബിഷപ്. ജൂബിലി സമ്മേളനം സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. സിഎസ്ടി അസിസ്റ്റന്‍റ് ജനറൽ ഫാ. ജോർജ് ആറാഞ്ചേരി അധ്യക്ഷത വഹിച്ചു. ഫാ. ജോസ് തടത്തിൽ സിഎസ്ടി, പൂവത്തോട് പള്ളി വികാരി ഫാ. ജേക്കബ് പുതിയാപറമ്പിൽ, തിടനാട് പഞ്ചായത്ത് പ്രസിഡന്‍റ് സ്കറിയാച്ചൻ പൊട്ടനാനി, ഫാ. ജോർജ് ചേപ്പില, എം.എം. മാനുവൽ, അബേഷ് അലോഷ്യസ്, എം.എം. മാത്യു തുടങ്ങിയവർ പ്രസംഗിച്ചു.

ആഘോഷ രാവുകള്‍ സമ്മാനിച്ച് പാലാ ഫുഡ് ഫെസ്റ്റ് വരുന്നു

പാലാ: രുചിപ്രേമികള്‍ക്ക് ആഘോഷരാവുകള്‍ സമ്മാനിച്ച് പാലാ ഫുഡ് ഫെസ്റ്റിനു ഡിസംബര്‍ അഞ്ചിനു പാലായില്‍ തുടക്കമാകും. കേരള വ്യാപാരി വ്യവസായി ഏകോപനസമിതിയുടെ യൂത്ത് വിംഗ് ആണ് പാലാ ജൂബിലിത്തിരുനാളിനോടനുബന്ധിച്ചു മഹാമേള സംഘടിപ്പിക്കുന്നത്. ഡിസംബര്‍ അഞ്ചുമുതല്‍ എട്ടുവരെ പാലാ പുഴക്കര മൈതാനത്താണു രുചിയുടെയും കലയുടെയും മഹോത്സവം അരങ്ങേറുക. കേരളീയ, ഇന്ത്യന്‍, ചൈനീസ്, അറബിക്, കോണ്ടിനെന്‍റല്‍ ഉള്‍പ്പെടെയുള്ള വിഭവങ്ങള്‍ 50ല്‍പരം സ്റ്റാളുകളിലായി അണിയിച്ചൊരുക്കും. വൈവിധ്യമാര്‍ന്ന മധുരപലഹാരങ്ങളും വീട്ടിലുണ്ടാക്കിയ സ്‌നേഹത്തിന്‍റെ രുചിക്കൂട്ടുകളും ഇവിടെ ലഭ്യമാകും. രുചിവൈവിധ്യങ്ങള്‍ ആസ്വദിക്കുന്നതോടൊപ്പം എല്ലാ ദിവസവും വൈകുന്നേരം ഏഴുമുതല്‍ കലാവിരുന്നും ഉണ്ടായിരിക്കും. കലാപരിപാടികൾ അഞ്ചിന് ആഞ്ജിന്‍ ആന്‍ഡ് ചാര്‍മിനാര്‍ ടീമിന്‍റെ മ്യൂസിക്കല്‍ ഡിജെ നൈറ്റ്. ആറിനു പാലാ പള്ളി തിരുപ്പള്ളി ഫ്രെയിം അതുല്‍ നറുകര നയിക്കുന്ന ഫോക് ഗ്രാഫര്‍ ലൈവ്. ഏഴിന് അശ്വിന്‍ ആന്‍ഡ് ടീം നയിക്കുന്ന ഡിജെ നൈറ്റ്. എട്ടിനു ചെണ്ടക്കാരന്‍ ആന്‍ഡ് ടീം അണിയിച്ചൊരുക്കുന്ന ഡിജെ വിത്ത് മ്യൂസിക്കല്‍ ഫ്യൂഷന്‍. ദിവസവും രാഷ്‌ട്രീയ, സമൂഹിക, സാംസ്‌കാരിക നേതാക്കന്മാരും പാചക മേഖലയിലെ വിദഗ്ധരും പങ്കെടുക്കും. ദിവസേന വൈകുന്നേരം നാലിന് ആരംഭിക്കുന്ന ഫുഡ് ഫെസ്റ്റിലേക്ക് പ്രവേശനം പാസ് മൂലം നിയന്ത്രിക്കും. അഞ്ചിനു വൈകുന്നേരം അഞ്ചിനു ജോസ് കെ. മാണി എംപി ഉദ്ഘാടനം നിര്‍വഹിക്കും. മാണി സി. കാപ്പന്‍ എംഎല്‍എ മുഖ്യാതിഥിയായിരിക്കും. പുളിമൂട്ടില്‍ സില്‍ക്‌സ് മെയിന്‍ സ്‌പോണ്‍സറും സണ്‍റൈസ് ഹോസ്പിറ്റല്‍ ഈരാറ്റുപേട്ട മെഡിക്കല്‍ പാര്‍ട്ട്ണറുമാണ്. സ്റ്റാള്‍ ബുക്കിംഗിനും സ്‌പോണ്‍സര്‍ഷിപ്പിനും ഫോൺ: 9164069066. പത്രസമ്മേളനത്തില്‍ ഏകോപനസമിതി പ്രസിഡന്‍റ് വക്കച്ചന്‍ മറ്റത്തില്‍, സെക്രട്ടറി വി.സി. ജോസഫ്, യൂത്ത് വിംഗ് ഭാരവാഹികളായ ജോണ്‍ ദര്‍ശന, എബിസണ്‍ ജോസ്, ജോസ്റ്റിന്‍ വന്ദന, പ്രോഗ്രാം കണ്‍വീനര്‍മാരായ ഫ്രെഡി ജോസ്, സിറിള്‍ ട്രാവലോകം, ബൈജു കൊല്ലംപറമ്പില്‍, അനൂപ് ജോര്‍ജ്, ആന്‍റണി കുറ്റിയാങ്കല്‍, ജിന്‍റോ അഗസ്റ്റിന്‍, വിപിന്‍ പോള്‍സണ്‍ എന്നിവര്‍ പങ്കെടുത്തു.

പൂഞ്ഞാർ വളതൂക്കിൽ ആടിനെ കടിച്ചുകൊന്നത് കുറുനരി

പൂഞ്ഞാർ: വളതൂക്കിൽ ആടിനെ കടിച്ചുകൊന്നത് കുറുനരി. വനംവകുപ്പ് സ്ഥാപിച്ച കാമറയിൽനിന്നാണ് ദൃശ്യങ്ങൾ ലഭിച്ചത്. പൂഞ്ഞാർ പഞ്ചായത്ത് വളതൂക്ക് കൃഷിഭവനു സമീപം കീരംചിറയിൽ ജോസിന്‍റെ ഒന്നര വയസ് പ്രായമുള്ള ആടിനെയാണ് ചൊവ്വാഴ്ച വൈകുന്നേരം കൊലപ്പെടുത്തിയത്. പുരയിടത്തിൽ തീറ്റ്ക്കായി വിട്ടിരുന്ന ആടിനെയാണ് കൊന്നുതിന്നത്. ആടിന്‍റെ ശരീരം പകുതിയോളം കടിച്ചുതിന്ന നിലയിലായിരുന്നു. തള്ളയാടിനെ കെട്ടിയിട്ടിരിക്കുകയായിരുന്നു. തീറ്റയ്ക്കായി അഴിച്ചുവിട്ടിരുന്ന ആടിനെയാണ് കൊന്നത്. ഏതു മൃഗമാണ് അക്രമിച്ചതെന്നു സംശയം ഉയർന്നതോടെ വനംവകുപ്പ് അധികൃതരെ വിവരമറിയിച്ചു. തുടർന്ന് രാത്രി ഒൻപതോടെ ഫോറസ്റ്റ് അധികൃതർ സ്ഥലത്തെത്തി പരിശോധന നടത്തി കാമറ സ്ഥാപിച്ചു. പിന്നീട് രാത്രിയിലും ആടിനെ അജ്ഞാതജീവി തിന്നുകയായിരുന്നു. കാമറയിലെ ദൃശ്യങ്ങൾ പരിശോധിച്ചപ്പോളാണ് കുറുനരിയാണെന്ന് മനസിലായത്.

സംസ്ഥാന നീന്തൽ മത്സരം: ജെയ്സണ് സ്വർണം

എരുമേലി: വർഷങ്ങൾക്ക് മുമ്പ് മണിമലയാറിൽ ഒഴുക്കിൽപ്പെട്ട് മരണത്തിന്‍റെ വക്കിലെത്തിയ രണ്ട് അയ്യപ്പഭക്തരെ രക്ഷിച്ച ജെയ്‌സൺ നീന്തൽ മത്സരത്തിൽ വിജയം തുടരുന്നു. കഴിഞ്ഞദിവസം തിരുവല്ലയിൽ നടന്ന 14-ാമത് സംസ്ഥാന നീന്തൽ മത്സരത്തിൽ 35 വയസിന് മേലുള്ളവരുടെ 50 മീറ്റർ ഫ്രീസ്റ്റൈലിലാണ് സ്വർണ മെഡൽ നേടിയത്. 2021ൽ കേരള സ്റ്റേറ്റ് മാസ്റ്റേഴ്സ് ഗെയിംസിൽ 50 മീറ്റർ, 100 മീറ്റർ ഫ്രീസ്റ്റൈൽ, 50 മീറ്റർ ബാക്ക് സ്ട്രോക്ക് ഇനങ്ങളിൽ ജെയ്‌സൺ ഒന്നാം സ്ഥാനം നേടിയിരുന്നു. തുടർന്ന് ഗുജറാത്തിലെ വഡോദരയിൽ നടന്ന ദേശീയ മാസ്റ്റേഴ്സ് നീന്തൽ മത്സരത്തിൽ ഫ്രീ സ്റ്റൈൽ വിഭാഗം 50, 100 മീറ്റർ ഇനങ്ങളിലും 50 മീറ്റർ ബാക്ക് സ്ട്രോക്കിലും ഒന്നാം സ്ഥാനം ലഭിച്ചിരുന്നു. എരുമേലി കണ്ണിമല മഞ്ഞക്കാലയിൽ ജയിംസ്-റോസമ്മ ദമ്പതികളുടെ മകനായ ജെയ്‌സൺ നിലവിൽ വെണ്ണിക്കുളം ബഥനി അക്കാദമി സ്കൂളിലെ കായികാധ്യാപകനും നീന്തൽ പരിശീലകനുമാണ്. ചെറുപ്പത്തിലേ അച്ഛനൊപ്പം മണിമലയാറിൽ നീന്തി നേടിയ പരിചയമാണ് നീന്തൽ രംഗത്ത് പരിശീലനം നേടി പരിശീലകനായി മാറുന്നതിൽ എത്തിയതെന്ന് ജെയ്‌സൺ പറഞ്ഞു. എരുമേലിയിൽ ഒട്ടേറെ പേർക്ക് നീന്തലിൽ പരിശീലകൻകൂടിയാണ് ജെയ്‌സൺ. ഹഏതാനും വർഷം മുമ്പ് ശബരിമല സീസണിൽ മണിമലയാറിൽ രണ്ട് അയ്യപ്പഭക്തർ ഒഴുക്കിൽപ്പെട്ടപ്പോൾ രക്ഷിച്ചത് ജെയ്സണും സുഹൃത്തുക്കളും ചേർന്നായിരുന്നു.

സോളാർ വഴിവിളക്കുകൾ നാശത്തിന്‍റെ വക്കിൽ

മുണ്ടക്കയം: ടൗണിനെ പ്രകാശപൂരിതമാക്കുകയെന്ന ലക്ഷ്യത്തോടെ 2015-16 കാലഘട്ടത്തിൽ സ്ഥാപിച്ച വഴിവിളക്കുകൾ ഇന്ന് പൂർണമായി നാശത്തിന്‍റെ വക്കിൽ. ആന്‍റോ ആന്‍റണി എംപിയുടെ പ്രാദേശിക വികസനഫണ്ടിൽനിന്നു 14.5 ലക്ഷം രൂപ മുടക്കിയായിരുന്നു വഴിവിളക്കുകൾ സ്ഥാപിച്ചത്. കല്ലേപ്പാലം മുതൽ പൈങ്ങന പാലം വരെയും കോസ്‌വേ പാലം, സിഎംഎസ് ഹൈസ്കൂൾ ഭാഗം തുടങ്ങിയ പ്രദേശങ്ങളിലായി 54ഓളം സോളാർ വഴിവിളക്കുകളാണ് സ്ഥാപിച്ചത്. ഇതിൽ മൂന്നോ നാലോ എണ്ണം മാത്രമാണ് ഇപ്പോൾ അവശേഷിക്കുന്നത്. ഇതും പ്രവർത്തന രഹിതമാണ്. സ്ഥാപിച്ച് ഒരു വർഷത്തിനുള്ളിൽ തന്നെ വിളക്കുകളുടെ സോളർ പാനൽ, ബാറ്ററി, ബൾബ് തുടങ്ങിയവ പലയിടങ്ങളിലെയും മോഷണം പോയി. യാതൊരു ദീർഘവീക്ഷണവുമില്ലാതെ പാതയോരങ്ങളിൽ സ്ഥാപിച്ച വഴിവിളക്കുകളിൽ വാഹനമിടിച്ച് കേടുപാട് സംഭവിച്ചു. പല സ്ഥലങ്ങളിലും ലൈറ്റിനായി സ്ഥാപിച്ച തൂണുകൾ പോലും മോഷ്ടാക്കൾ കൊണ്ടുപോയ നിലയിലാണ്. ഇതോടെ ലക്ഷങ്ങൾ മുടക്കി നടപ്പാക്കിയ പദ്ധതി കൊണ്ട് പൊതുജനത്തിന് യാതൊരു പ്രയോജനവും ഇല്ലാതെയായി. കൃത്യമായി ആസൂത്രണമില്ലാതെ സ്ഥാപിച്ചതും വഴിവിളക്കുകളുടെ പരിപാലനം കരാർ കമ്പനിയോ തദ്ദേശ സ്വയംഭരണ സ്ഥാപനങ്ങളോ നടത്താത്തതും വഴിവിളക്കിന്‍റെ നാശത്തിന് കാരണമായി. ‌പദ്ധതി പൂർണമായും പരാജയപ്പെട്ടതോടെ ടൗണിന്‍റെ പല ഭാഗങ്ങളും ഇപ്പോൾ ഇരുളിന്‍റെ പിടിയിലാണ്. ഇനിയും ലക്ഷങ്ങൾ മുടക്കി പുതിയ പദ്ധതികൾ ആവിഷ്കരിക്കുമ്പോൾ അവ അറ്റകുറ്റപ്പണികൾ നടത്തി സംരക്ഷിക്കുന്നതിനുള്ള നടപടികൾകൂടി ഉണ്ടാകണമെന്നും ആവശ്യം ഉയരുന്നുണ്ട്.

എരുമേലി പഞ്ചായത്തിൽ വികസനസദസ്

എരുമേലി: എരുമേലി പഞ്ചായത്തിലെ വികസനസദസ് സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. എരുമേലി അസംപ്ഷൻ ഫൊറോന പള്ളി പാരിഷ് ഹാളിൽ നടന്ന പരിപാടിയിൽ പഞ്ചായത്ത് പ്രസിഡന്‍റ് സുബി സണ്ണി അധ്യക്ഷത വഹിച്ചു. കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് പ്രോഗ്രസ് റിപ്പോർട്ട് പ്രകാശനം ചെയ്തു. ജില്ലാ പഞ്ചായത്തംഗം ശുഭേഷ് സുധാകരൻ മുഖ്യപ്രഭാഷണം നടത്തി. സംസ്ഥാന സർക്കാരിന്‍റെ വികസന പ്രവർത്തനങ്ങൾ റിസോഴ്സ് പേഴ്സൺ പി.എം. ഷെമീമും പഞ്ചായത്തിന്‍റെ വികസന നേട്ടങ്ങൾ പഞ്ചായത്ത് സെക്രട്ടറി ബി. മഞ്ജുവും അവതരിപ്പിച്ചു. പഞ്ചായത്ത് വൈസ് പ്രസിഡന്‍റ് സെയ്ദു മുഹമ്മദ്, പഞ്ചായത്തംഗങ്ങളായ കെ.ആർ. അജേഷ്, ടി.വി. ഹർഷകുമാർ, ജെസ്ന നെജീബ്, പി.എ. ഷാനവാസ്, ഷിനിമോൾ, സനില രാജൻ, എം.എസ്. സതീഷ്, അസിസ്റ്റന്‍റ് സെക്രട്ടറി മുഹമ്മദ് ഷാഫി, ടി.എസ്. കൃഷ്ണകുമാർ, തങ്കമ്മ ജോർജുകുട്ടി, അനിശ്രീ സാബു, മുഹമ്മദ് ഷാഫി എന്നിവർ പ്രസംഗിച്ചു.

വാഴൂർ ബ്ലോക്ക് പഞ്ചായത്ത് കേരളോത്സവത്തിനു തുടക്കം

വാഴൂർ: യുവജനങ്ങളിൽ സാഹോദര്യവും സഹകരണവും സഹവർത്തിത്വവും വളർത്തുക എന്ന ലക്ഷ്യത്തോടെ സംസ്ഥാന യുവജനക്ഷേമ ബോർഡിന്‍റെ നിർദേശാനുസരണം നടത്തുന്ന വാഴൂർ ബ്ലോക്ക് പഞ്ചായത്ത് കേരളോത്സവത്തിന് തുടക്കമായി. പ്രസിഡന്‍റ് മുകേഷ് കെ. മണി ഉദ്ഘാടനം ചെയ്തു. വൈസ് പ്രസിഡന്‍റ് ഗീത എസ്. പിള്ള അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, പി.എം. ജോൺ, ബി. രവീന്ദ്രൻ നായർ, രഞ്ജിനി ബേബി, മിനി സേതുനാഥ്, സെക്രട്ടറി എം. ബീമ, ഡോ. അനീഷ് വർക്കി, ജിഇഒ വി.എ. സിയാദ് എന്നിവർ പ്രസംഗിച്ചു. ഇന്നലെ രചനാ മത്സരങ്ങളും ഷട്ടിൽ ബാഡ്മിന്‍റൺ മത്സരങ്ങളും നടത്തി. നാളെ രാവിലെ ഒന്പതുമുതൽ ക്രിക്കറ്റ്, ഫുട്ബോൾ മത്സരങ്ങൾ മൈലാടി ഐറാസ് സ്പോർട്സ് ക്ലബ്ബിൽ നടക്കും. 25നു രാവിലെ പത്തുമുതൽ മണിമല കർദിനാൾ പടിയറ സ്കൂൾ ഗ്രൗണ്ടിൽ വടംവലി മത്സരവും കൊടുങ്ങൂർ പഞ്ചായത്ത് ഹാളിൽ കലാമത്സരവും നടക്കും. 28നു രാവിലെ 9.30ന് പൊൻകുന്നം ടൗൺ സ്റ്റേഡിയത്തിൽ വോളിബോൾ മത്സരവും ഒന്പതു മുതൽ കുന്നുംഭാഗം ഗവൺമെന്‍റ് ഹൈസ്കൂളിൽ അത്‌ലറ്റിക് മത്സരങ്ങളും നടക്കും. 29ന് വാഴൂർ ബ്ലോക്ക് പഞ്ചായത്ത് അങ്കണത്തിൽ നടക്കുന്ന സമാപന സമ്മേളനം ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. പ്രസിഡന്‍റ് മുകേഷ് കെ. മണി അധ്യക്ഷത വഹിക്കും.

എസ്എംവൈഎം കൂട്ടിക്കൽ ഫൊറോന യുവജനസംഗമം

കൂട്ടിക്കൽ: എസ്എംവൈഎം കൂട്ടിക്കൽ ഫൊറോനയുടെ യുവജന ദിനാഘോഷവും യുവജനസംഗമവും കാവാലി സെന്‍റ് മേരീസ് പള്ളിയിൽ നടത്തി. കൂട്ടിക്കൽ ഫൊറോന വികാരി ഫാ. ജോസഫ് വടക്കേമംഗലത്ത് ഉദ്ഘാടനം ചെയ്തു. ഫൊറോന പ്രസിഡന്‍റ് ജെന്‍റോ മാത്യു പതാക ഉയർത്തി. എസ്എംവൈഎം ഗ്ലോബൽ പ്രസിഡന്‍റ് അഡ്വ. സാം സണ്ണി മുഖ്യാതിഥിയായിരുന്നു. ഫൊറോന ഡയറക്ടർ ഫാ. ഓസ്റ്റിൻ മേച്ചേരിൽ, കാവാലി പള്ളി വികാരി ഫാ. ജോസഫ് കൂനാനിക്കൽ, മലയിഞ്ചിപ്പാറ പള്ളി വികാരി ഫാ. തോമസ് ഓലിക്കൽപുത്തൻപുരയ്ക്കൽ, യൂണിറ്റ് പ്രസിഡന്‍റ് ഷെർലോൺ, ഫൊറോന വൈസ് പ്രസിഡന്‍റ് ഷെറിൻ, രൂപത വൈസ് പ്രസിഡന്‍റ് ജോസഫ് തുടങ്ങിയവർ പ്രസംഗിച്ചു. സമ്മേളനത്തിനുശേഷം യുവജനങ്ങൾക്കായി വിവിധ ക്ലാസുകളും നടത്തി. കൂട്ടിക്കൽ ഫൊറോനയിലെ വിവിധ ഇടവകകളിൽനിന്നായി നിരവധി യുവജനങ്ങൾ പങ്കെടുത്തു.

മെഗാ തൊഴിൽമേളയുമായി ചിറക്കടവ് പഞ്ചായത്ത്

പൊൻകുന്നം: യുവജനങ്ങൾക്ക് തൊഴിലവസരമൊരുക്കി ചിറക്കടവ് പഞ്ചായത്ത്. നാല്പതിലേറെ കമ്പനികളുടെ തൊഴിലവസരങ്ങളിലേക്ക് അഭിമുഖത്തിന് അവസരം നൽകും. 25നു രാവിലെ ഒന്പതുമുതൽ പൊൻകുന്നം ടൗണിലെ അഗ്രികൾച്ചർ മാർക്കറ്റിംഗ് കോംപ്ലക്‌സിലാണ് മെഗാ തൊഴിൽമേള. വിജ്ഞാനകേരളം പദ്ധതിയുടെ ഭാഗമായി 2025-26 സാമ്പത്തിക വർഷത്തെ പദ്ധതിയിൽ ഉൾപ്പെടുത്തി കുടുംബശ്രീ മിഷൻ, യൂത്ത് മിഷൻ എന്നിവയുടെ സഹകരണത്തോടെയാണ് മേള നടത്തുന്നതെന്ന് പഞ്ചായത്ത് അധികൃതർ പത്രസമ്മേളനത്തിൽ പറഞ്ഞു. അപേക്ഷകർ ചിറക്കടവ് പഞ്ചായത്ത് നിവാസികളാകണമെന്നില്ല. എസ്എസ്എൽസി മുതൽ ഉന്നത വിദ്യാഭ്യാസ യോഗ്യത നേടിയ ഉദ്യോഗാർഥികൾക്കുവരെ പങ്കെടുക്കാം. ഒരാൾക്ക് അഞ്ചു കമ്പനികളുടെ അഭിമുഖത്തിൽ വരെ പങ്കെടുക്കാം. സ്ട്രീം പെർഫെക്‌ട്, ലുലു, ഒലീവിയ, ജിഐസിഇ, മെഡ്പ്ലസ്, കല്യാൺ, നിപ്പോൺ ടൊയോട്ട, ബെൽസ്റ്റാർ, മാക്‌സ് വാല്യു, പോപ്പുലർ വെഹിക്കിൾസ്, കെഎൽഎം ആക്‌സിവ, ജിയോജിത്, മിഗ് ഗ്രൂപ്പ്, ആൻസൺ ഗ്രൂപ്പ്, രാംരാജ്, പോപ്പുലർ ഹ്യൂണ്ടായ്, ഓട്ടോബാൻ, ടെക് മഹീന്ദ്ര തുടങ്ങി നാല്പതിലേറെ തൊഴിൽദാതാക്കളെത്തും. ‌ക്യുആർ കോഡ് മുഖേനയും ഗൂഗിൾഫോം മുഖേനയും മുൻകൂട്ടി രജിസ്റ്റർ ചെയ്യാം. കൂടാതെ 25ന് സ്‌പോട്ട് രജിസ്‌ട്രേഷനിലൂടെയും പങ്കെടുക്കാം. മുൻകൂർ രജിസ്‌ട്രേഷന് വാട്‌സാപ്പ് നമ്പർ - 9656557054. രാവിലെ ഒന്പതിന് ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. വിജ്ഞാനകേരളം സ്റ്റേറ്റ് കോ-ഓർഡിനേറ്ററായ മുൻ മന്ത്രി ഡോ. ടി.എം. തോമസ് ഐസക് പദ്ധതി വിശദീകരിക്കും. പത്രസമ്മേളനത്തിൽ പ്രസിഡന്‍റ് സി.ആർ. ശ്രീകുമാർ, വൈസ്പ്രസിഡന്‍റ് സതി സുരേന്ദ്രൻ, പഞ്ചായത്തംഗങ്ങളായ സുമേഷ് ആൻഡ്രൂസ്, ലീന കൃഷ്ണകുമാർ, ഷാക്കി സജീവ്, അമ്പിളി ശിവദാസ്, ശ്രീലത സന്തോഷ്, എസ്. സിന്ധുദേവി, സി. ഗോപാലൻ, അസിസ്റ്റന്‍റ് സെക്രട്ടറി എസ്. സിന്ധുമോൾ, സിഡിഎസ് ചെയർപേഴ്‌സൺ ഉഷാ പ്രകാശ് എന്നിവർ പങ്കെടുത്തു.

കൈവരിയുണ്ടെങ്കിൽ ഈ കലുങ്ക് ഇങ്ങനെ നാണംകെട്ട് നിൽക്കില്ല!

കാഞ്ഞിരപ്പള്ളി: കാഞ്ഞിരപ്പള്ളി-സുഖോദയ റോഡിലെ കലുങ്കിന് കൈവരി നിർമിക്കണമെന്ന ആവശ്യം ശക്തമാകുന്നു. ചിറ്റാറിന്‍റെ കൈത്തോടിനു കുറുകെയുള്ള കലുങ്കാണ് കൈവരി ഇല്ലാത്തതുമൂലം അപകടഭീഷണി ഉയർത്തുന്നത്. ഈരാറ്റുപേട്ട റോഡിൽനിന്നടക്കം എത്തുന്ന വാഹനയാത്രക്കാർ കാഞ്ഞിരപ്പള്ളി ടൗണിൽ പ്രവേശിക്കാതെ കുന്നുംഭാഗത്തു ദേശീയപാതയിലെത്താൻ ആശ്രയിക്കുന്ന റോഡാണ് സുഖോദയ റോഡ്. വീതി കുറവാണെങ്കിലും ഈ റോഡിലൂടെ നൂറുകണക്കിനു ചെറുവാഹനങ്ങളാണ് കടന്നുപോകുന്നത്. ടൗണിൽ ഗതാഗതക്കുരുക്കുള്ളപ്പോൾ യാത്രക്കാരുടെ എണ്ണം കൂടും. സ്കൂൾ വാനുകളടക്കം ഇതുവഴി കടന്നുപോകുന്നുണ്ട്. തമ്പലക്കാട് റോഡിൽനിന്നു സുഖോദയ റോഡിലേക്കു പ്രവേശിക്കുന്നയിടത്തെ കലുങ്കാണ് യാത്രക്കാർക്ക് കൈവരിയില്ലാതെ അപകടഭീഷണി ഉയർത്തുന്നത്. പഞ്ചായത്തേ ഉണരൂ വീതി കുറവായ കലുങ്കിലൂടെ ഒരു വാഹനത്തിനു മാത്രമാണ് കടന്നു പോകാനാകുക. വഴി പരിചയമില്ലാത്ത ഇരുചക്ര വാഹനയാത്രക്കാർ ആരെങ്കിലും ഈ സമയം ഇതുവഴി കടന്നുപോകാൻ ശ്രമിച്ചാൽ അപകടസാധ്യത വർധിക്കും. കലുങ്കിന്‍റെ ഒരു വശത്തു കാട് വളർന്ന നിലയിലാണ്. ഇത് ഈ ഭാഗത്തെ റോഡിന്‍റെ അതിര് കാഴ്ചയിൽനിന്നു മറയ്ക്കുന്ന സ്ഥിതിയുമുണ്ട്. മഴ കൂടി പെയ്തു വെള്ളം റോഡിലൂടെ ഒഴുകിയാൽ അപകടസാധ്യത കൂടും. പഞ്ചായത്തിന്‍റെ ആസ്തിയിലുള്ളതാണ് ഈ റോഡ്. ഇവിടെ കലുങ്കിനു കൈവരി നിർമിക്കേണ്ടതും പഞ്ചായത്താണ്. എത്രയും വേഗം കലുങ്കിനു കൈവരി നിർമിച്ച് അപകട സാധ്യത ഒഴിവാക്കണമെന്നാണ് യാത്രക്കാരുടെ ആവശ്യം.

വെരൂര്‍ ഇന്‍ഡസ്ട്രിയല്‍ എസ്റ്റേറ്റില്‍ അടിസ്ഥാന സൗകര്യങ്ങള്‍ മെച്ചപ്പെടുത്തണം

ചങ്ങനാശേരി: ചങ്ങനാശേരിയിലെ ഇന്‍ഡസ്ട്രിയല്‍ പാര്‍ക്കായ വെരൂര്‍ ഇന്‍ഡസ്ട്രിയല്‍ എസ്റ്റേറ്റില്‍ അടിസ്ഥാന സൗകര്യങ്ങള്‍ മെച്ചപ്പെടുത്തി കൂടുതല്‍ വ്യവസായ സംരംഭങ്ങള്‍ ആരംഭിക്കാന്‍ സാഹചര്യമൊരുക്കണമെന്ന ആവശ്യം ഉയരുന്നു. ആധുധിക കാലഘട്ടത്തിന്‍റെ സാധ്യതകള്‍ക്കനുസൃതമായി ഐടി വ്യവസായത്തിനുവേണ്ട അടിസ്ഥാന സൗകര്യങ്ങള്‍ ഒരുക്കിയാല്‍ അഭ്യസ്തരായ തൊഴില്‍ അന്വേഷകര്‍ക്ക് കൂടുതല്‍ അവസരം സൃഷ്ടിക്കാന്‍ കഴിയും. ഇവിടെ പ്രവര്‍ത്തിക്കുന്ന കോമണ്‍ ഫെസിലിറ്റി സെന്‍ററിലെ ഇന്‍റര്‍നെറ്റ് കണക്ടിവിറ്റി മെച്ചപ്പെടുത്താനും ചെറുകിട വ്യവസായ യൂണിറ്റുകളിലേക്കുള്ള റോഡ് ഗതാഗതം മെച്ചപ്പെടുത്താനും അധികൃതര്‍ തയാറാകണമെന്നും ആര്‍ജെഡി ചങ്ങനാശേരി നിയോജകമണ്ഡലം നേതൃസമ്മേളനം ആവശ്യപ്പെട്ടു. ആര്‍ജെഡി ജില്ലാ പ്രസിഡന്‍റ് സണ്ണി തോമസ് സമ്മേളനം ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ബെന്നി സി. ചീരഞ്ചിറ അധ്യക്ഷത വഹിച്ചു. ജില്ലാ സെക്രട്ടറി ജോണ്‍ മാത്യു, ഓമന വിദ്യാധരന്‍, സുരേഷ് പുഞ്ചക്കോട്ടില്‍, ജോസഫ് കടപ്പള്ളി, ഇ.ഡി. ജോര്‍ജ്, ലാല്‍ പ്ലാംതോപ്പില്‍, ജോര്‍ജുകുട്ടി കുന്നേല്‍ എന്നിവര്‍ പ്രസംഗിച്ചു.

യുവാവിന്‍റെ അപകടമരണം: എഫ്‌ഐആറിനെതിരേ പരാതി

തൃക്കൊടിത്താനം: തൃക്കൊടിത്താനം കൊക്കോട്ടുചിറയ്ക്കു സമീപം മാടത്തരുവിയില്‍ വാഹനാപകടത്തില്‍ വായ്പൂര് സ്വദേശി വേങ്ങമടത്തില്‍ ആദിത്യന്‍ സുരേഷിന്‍റെ (19) മരണവുമായി ബന്ധപ്പെട്ട് പോലീസ് തയാറാക്കിയ എഫ്‌ഐആര്‍ വസ്തുതാവിരുദ്ധമെന്ന് കാട്ടി അമ്മ അമ്പിളി കോട്ടയം ജില്ലാ പോലീസ് മേധാവിക്കു പരാതി നല്‍കി. എതിര്‍ദിശയില്‍നിന്നു വന്ന കാര്‍ അമിതവേഗത്തില്‍ മറ്റൊരു ടുവീലറിനെ ഓവര്‍ടേക്ക് ചെയ്ത് ആദ്യത്യന്‍റെ വാഹനത്തില്‍ ഇടിച്ചു. ഇടിയുടെ ആഘാതത്തില്‍ യുവാവ് വാഹനത്തില്‍ നിന്നും തെറിച്ച് അടുത്തുള്ള മതിലില്‍ പോയി തലയടിച്ചു വീണു വഴിയില്‍ കിടക്കുകയായിരുന്നു. അപകടം നടന്നയുടനെ പോലീസ് അവിടെയെത്തിയെങ്കിലും ആശുപത്രിയിലെത്തിക്കുന്നതിന് കാലതാമസം വരുത്തിയെന്നും അപകടത്തിനിടയാക്കിയ വാഹനം ഓടിച്ച സ്ത്രീയെ കേസില്‍നിന്ന് ഒഴിവാക്കുന്നതിനു ശ്രമം നടത്തിയെന്നും പരാതിയില്‍ പറയുന്നു. ഏറെസമയത്തിനുശേഷം ഒരു പെട്ടിവണ്ടിയിലാണ് ആദിത്യനെ ചങ്ങനാശേരി ജനറല്‍ ആശുപത്രിയില്‍ എത്തിച്ചത്. തലയ്ക്കു ഗുരുതര പരിക്കായതിനാല്‍ അവിടെനിന്ന് മെഡിക്കല്‍ കോളജിലേക്കു മാറ്റിയെങ്കിലും യാത്രാമധ്യേ യുവാവ് മരിച്ചു. ആദിത്യന്‍ ഓടിച്ചിരുന്ന ബൈക്കിന്‍റെ പിന്നിലിരുന്ന സുഹൃത്ത് സമീര്‍ അപകടത്തില്‍പ്പെട്ട് ആശുപത്രിയില്‍ ചികിത്സയിലായിരുന്നു. സമീറിന്‍റെ മൊഴിയെടുക്കാതെയാണ് പോലീസ് എഫ്ഐആര്‍ തായാറാക്കിയതെന്നു കാണിച്ചാണ് ബന്ധുക്കള്‍ പോലീസ് മേധാവിക്കു പരാതി നല്‍കിയിരിക്കുന്നത്.

അധികമായി ഈടാക്കിയ ബില്‍ തുക തിരിച്ചുനല്‍കണമെന്ന് ഉപഭോക്തൃ തര്‍ക്കപരിഹാര കമ്മീഷന്‍

ചങ്ങനാശേരി: ക്രെഡിറ്റ് പരിധി കടക്കില്ലെന്ന വാഗ്ദാനത്തില്‍ വിശ്വസിച്ച് റിലയന്‍സ് ജിയോ പ്രീപെയ്ഡ് സിം എടുത്ത ഉപഭോക്താവിന് അധികമായി ഈടാക്കിയ ബില്‍ തുക തിരിച്ചുനല്‍കണമെന്ന് ഉത്തരവിട്ട് കോട്ടയം ഉപഭോക്തൃ തര്‍ക്കപരിഹാര കമ്മീഷന്‍. ചങ്ങനാശേരി ചെറുവള്ളി പുതിയേടത്തുവീട്ടില്‍ പി.ജി. രതീഷ് നല്‍കിയ പരാതിയിലാണ് നടപടി. റിലയന്‍സ് ജിയോയുടെ ചങ്ങനാശേരി ശാഖയില്‍നിന്ന് പരാതിക്കാരന്‍ ക്രെഡിറ്റ് പ്ലാനില്‍ പ്രീപെയ്ഡ് സിം വാങ്ങുകയും ഇന്‍റര്‍നാഷണല്‍ റോമിംഗ് പ്ലാനില്‍ 1,102 രൂപയ്ക്ക് മൊബൈല്‍ റീചാര്‍ജ് ചെയ്യുകയും ചെയ്തു. തുടര്‍ന്ന് 2024 ഓഗസ്റ്റ് 11ന് മാലദ്വീപില്‍ യാത്ര പോയ പരാതിക്കാരന്‍ ലോക്കല്‍ സിം വാങ്ങി ഉപയോഗിച്ച സമയത്ത് ഓഗസ്റ്റ് 21ന് 27,215 രൂപയുടെ ബില്‍ ലഭിച്ചു. പരാതിയോടൊപ്പം സമര്‍പ്പിച്ച രേഖ പരിശോധിച്ച കമ്മീഷന്‍ പരാതിക്കാരന്‍ എടുത്തിരിക്കുന്ന 999 രൂപയുടെ ഡബ്ല്യുഎംഎന്‍പി 999 പ്രൈം പ്ലാന്‍ പ്രകാരം 200 ജിബിയുടെ ഹൈ സ്പീഡ് ഡാറ്റയും അധിക ഉപയോഗമായി ഓരോ ജിബിക്കും ലിമിറ്റ് ചേഞ്ച് 10 രൂപയാണെന്നും കണ്ടെത്തി. 2024 ജൂലൈ 22 മുതല്‍ ഓഗസ്റ്റ് 10 വരെ 36 ജിബി മാത്രമാണ് പരാതിക്കാരന്‍ ഉപയോഗിച്ചിരിക്കുന്നതെന്നും അത് 200 ജിബിയുടെ ഹൈ സ്പീഡ് ഡാറ്റയില്‍ ഉള്‍പ്പെടുത്തുന്നതാണെന്നും കമ്മീഷന്‍ കണ്ടെത്തി. ക്രെഡിറ്റ് പരിധി കഴിയുമ്പോള്‍ എസ്എംഎസ് ഇമെയിലായി സന്ദേശം നല്‍കുമെന്ന വാദം തെളിയിക്കാന്‍ എതിര്‍ കക്ഷികള്‍ക്ക് സാധിക്കാത്തതിനാല്‍ 2024 ഒക്‌ടോബര്‍ 30 മുതല്‍ 9 ശതമാനം പലിശനിരക്കില്‍ 21,435 രൂപയും നഷ്ടപരിഹാരമായി 10,000 രൂപയും കോടതിച്ചെലവായി 5000 രൂപയും നല്‍കണമെന്ന് അഡ്വ.വി.എസ്. മനുലാല്‍ പ്രസിഡന്‍റും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള കമ്മീഷന്‍ ഉത്തരവിട്ടു.

അഞ്ജു ബോബി ജോര്‍ജ് റോഡ് ഒരു കോടി മുടക്കി നവീകരിക്കുന്നു

ചങ്ങനാശേരി: മാടപ്പള്ളി പഞ്ചായത്തിനെയും വാഴപ്പള്ളി പഞ്ചായത്തിനെയും തമ്മില്‍ ബന്ധിപ്പിക്കുന്ന അന്തര്‍ദേശീയ ലോംഗ്ജംപ് താരം അഞ്ജു ബോബി ജോര്‍ജ് റോഡിന്‍റെ നിര്‍മാണോദ്ഘാടനം ജോബ് മൈക്കിള്‍ എംഎല്‍എ നിര്‍വഹിച്ചു. ഒരു കോടി രൂപ മുടക്കി മികച്ച രീതിയിലാണ് റോഡ് നിര്‍മാണം ക്രമീകരിച്ചിരിക്കുന്നത്. റോഡിലെ കാലപ്പഴക്കമുള്ള കലുങ്ക് പൊളിച്ച് പുനര്‍നിര്‍മിക്കാനും തുക വകയിരുത്തിയിട്ടുണ്ട്. കായികതാരം അഞ്ജു ബോബി ജോര്‍ജിന്‍റെ കുടുംബവീടിനു സമീപത്തുകൂടി കടന്നുപോകുന്ന ഈ പഞ്ചായത്ത് റോഡ് ദീര്‍ഘനാളുകളായി തകര്‍ന്നു കിടക്കുകയായിരുന്നു. റോഡിന്‍റെ നവീകരണം വേഗത്തിലാക്കും ചങ്ങനാശേരിയുടെ അഭിമാന കായികതാരം അഞ്ജു ബോബി ജോര്‍ജ് റോഡിന്‍റെ ശോചനീയാവസ്ഥ പരിഗണിച്ചാണ് എംഎല്‍എ ഫണ്ടില്‍നിന്നും പണം അനുവദിച്ചത്. എത്രയും വേഗം റോഡ് നിര്‍മാണം പൂര്‍ത്തിയാക്കി റോഡ് ഗതാഗത യോഗ്യമാക്കാനുള്ള നടപടികള്‍ ചെയ്യും. ജോബ് മൈക്കിള്‍ എംഎല്‍എ

സിഎംസി മഹാജൂബിലി വിദ്യാഭ്യാസ കണ്‍വന്‍ഷന്‍

ചങ്ങനാശേരി: സിഎംസി ഹോളി ക്വീന്‍സ് പ്രൊവിന്‍സിന്‍റെ മഹാജൂബിലി വിദ്യാഭ്യാസ കണ്‍വന്‍ഷന്‍ അസംപ്ഷന്‍ കോളജ് ഓഡിറ്റോറിയത്തില്‍ നടത്തി. പ്രൊവിന്‍ഷ്യല്‍ സുപ്പീരിയർ സിസ്റ്റര്‍ സോഫി റോസ് സിഎംസി അധ്യക്ഷത വഹിച്ചു. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്തു. അതിരൂപതാ കോര്‍പറേറ്റ് മാനേജര്‍ ഫാ. ജോബി മൂലയില്‍, ഫാ. മനോജ് കറുകയില്‍, സിസ്റ്റര്‍ ആനി തോമസ് സിഎംസി, സിസ്റ്റര്‍ ബ്ലെസി ആന്‍സ് സിഎംസി എന്നിവര്‍ പ്രസംഗിച്ചു. അസംപ്ഷന്‍ കോളജ് പ്രിന്‍സിപ്പല്‍ ഡോ.റാണി മരിയ ക്ലാസ് നയിച്ചു. വിവിധ മേഖലകളില്‍ മികവ് പ്രകടിപ്പിച്ചവരെ ഉപഹാരം നല്‍കി ആദരിച്ചു.

ദേശീയ ക്യുഐ കോണ്‍ഫറന്‍സ് ഇന്ന് ചെത്തിപ്പുഴ ആശുപത്രിയില്‍

ചങ്ങനാശേരി: ചെത്തിപ്പുഴ സെന്‍റ് തോമസ് ആശുപത്രിയിലെ ക്വാളിറ്റി ആന്‍ഡ് ഇന്‍ഫക്‌ഷന്‍ കണ്‍ട്രോള്‍ ഡിപ്പാര്‍ട്ട്‌മെന്‍റുകളുടെ നേതൃത്വത്തില്‍ മൂന്നാമത് ദേശീയ കോണ്‍ഫറന്‍സ് സെന്‍റ് തോമസ് ആശുപത്രി ഓഡിറ്റോറിയത്തില്‍ ഇന്നു രാവിലെ ഒമ്പതിന് നടക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ക്വാളിറ്റി, ഇന്‍ഫക‌്ഷന്‍ കണ്‍ട്രോള്‍ മേഖലയുമായി ബന്ധപ്പെട്ട ഹോസ്പിറ്റല്‍ അഡ്മിനിസ്‌ട്രേറ്ററുമാര്‍, ഡോക്ടർമാര്‍, നഴ്‌സുമാര്‍, പിജി വിദ്യാര്‍ഥികള്‍ എന്നിവര്‍ പങ്കെടുക്കും. സെന്‍റ് തോമസ് നഴ്‌സിംഗ് കോളജ് പ്രിന്‍സിപ്പൽ ഡോ. ഷൈല ഐപ്പ് വര്‍ഗീസ്, ആലപ്പുഴ ജില്ലാ ക്വാളിറ്റി അഷ്വറന്‍സ് കമ്മിറ്റി അംഗം ഡോ. ജോസഫ് ജോസഫ്, ആലുവ രാജഗിരി ഹോസ്പിറ്റലിലെ ഡോ. സോണിയ ജോയി, തിരുവനന്തപുരം മെഡിഫോര്‍ട്ട് ഹോസ്പിറ്റല്‍ ചീഫ് ഓപ്പറേറ്റിംഗ് ഓഫീസര്‍ ഡോ. രശ്മി നായര്‍, ബംഗളൂരു‍ സെന്‍റ് ജോണ്‍സ് മെഡിക്കല്‍ കോളേജിലെ ജനറല്‍ മാനേജര്‍ ബീനാമ്മ കുര്യന്‍, എറണാകുളം ലിസി ഹോസ്പിറ്റലിലെ ഡോ. രോഹിത എസ്. ചന്ദ്ര എന്നിവര്‍ ക്ലാസുകള്‍ നയിക്കും. സെന്‍റ് തോമസ് ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിക്കും. അസോസിയേറ്റ് ഡയറക്ടറുമാരായ ഫാ. ജോഷി മുപ്പതില്‍ച്ചിറ, ഫാ. ജേക്കബ് അത്തിക്കളം, ഫാ. ജോസ് പുത്തന്‍ചിറ, മെഡിക്കല്‍ അഡ്മിനിസ്‌ട്രേറ്റര്‍ ഡോ.എന്‍. രാധാകൃഷ്ണന്‍, മെഡിക്കല്‍ സൂപ്രണ്ട് ഡോ. തോമസ് സഖറിയ, ചീഫ് ഓപ്പറേറ്റിംഗ് ഓഫീസര്‍ ഡോ. നവീന്‍ എസ്. നായര്‍, ബിജി മാത്യു, നീനു വര്‍ഗീസ് എന്നിവര്‍ പ്രസംഗിക്കും. രാവിലെ 8.30 ന് രജിസ്‌ട്രേഷന്‍ ആരംഭിക്കും. രജിസ്‌ട്രേഷന് 6282102385, 7736679819.

എസ്ബി കോളജില്‍ കാര്‍ഷിക സംരംഭകത്വ പരിശീലന പരിപാടി ഇന്ന്

ചങ്ങനാശേരി: കാര്‍ഷികമേഖലയെ അടിസ്ഥാനമാക്കിയുള്ള സംരംഭകത്വ പരിശീലന പരിപാടി ഇന്നു രാവിലെ പത്തിന് എസ്ബി കോളജില്‍ നടക്കും. കുട്ടനാട് പഠനഗവേഷണ കേന്ദ്രത്തിന്‍റെ നേതൃത്വത്തിലാണ് ശില്പശാല സംഘടിപ്പിക്കുന്നത്. ഒരു ലക്ഷം കോടി രൂപയുടെ കാര്‍ഷിക അടിസ്ഥാന വികസനകാര്യ നിധിയില്‍ എങ്ങനെ പങ്കാളികളാകാം എന്നതാണ് പരിശീലന പദ്ധതി. ഫലത്തില്‍ നാലു ശതമാനം മാത്രമാണ് പലിശ. വായ്പയുടെ 40 മുതല്‍ 80 ശതമാനം വരെ സബ്‌സിഡി ലഭിക്കും. ഒരു വര്‍ഷത്തെ മോറട്ടോറിയം ലഭിക്കും. കൃഷിവിജ്ഞാന കേന്ദ്രം, നബാര്‍ഡ്, ലീഡ് ബാങ്ക്, കാര്‍ഷിക ഡയറക്ടറേറ്റ് എന്നിവിടങ്ങളില്‍നിന്നുള്ള വിദഗ്ധരുടെ ക്ലാസുകള്‍ ലഭിക്കും. പദ്ധതി തെരഞ്ഞെടുക്കല്‍, പ്രോജക്ട് റിപ്പോര്‍ട്ടുകള്‍ തയാറാക്കല്‍, വായ്പാ സമ്പാദനം, കയറ്റുമതി ഉള്‍പ്പെടെയുള്ള വിപണനസാധ്യതകള്‍ തുടങ്ങിയവയില്‍ മാര്‍ഗനിര്‍ദേശങ്ങളും തുടര്‍സേവനങ്ങളും ലഭ്യമാക്കും. വ്യക്തിഗത വായ്പകള്‍ ഒരു യൂണിറ്റിന് രണ്ടു കോടി രൂപ വരെയാണ്. കൂട്ടു സംരംഭങ്ങള്‍ക്ക് പരിധിയില്ല. കാര്‍ഷിക വരുമാനത്തിലെ അപര്യാപ്ത, കണ്‍സ്ട്രക്‌ഷന്‍, വ്യാപാര വ്യവസായ മേഖലകള്‍ എന്നിവ നേരിടുന്ന മാന്ദ്യം പരിഹരിക്കുന്നതിന് കാര്‍ഷിക അടിസ്ഥാന സൗകര്യവികസന നിധി ഉപയോഗപ്പെടുത്താം. ഫാര്‍മര്‍ പ്രൊഡ്യൂസേഴ്‌സ് ഓർഗനൈസേഷന്‍സ് രൂപീകരിക്കുന്നതും പ്രവര്‍ത്തിപ്പിക്കേണ്ടതും എങ്ങനെയെന്നതു സംബന്ധിച്ച് വിജയകരമായി പ്രവര്‍ത്തിക്കുന്ന എഫ്പിഒകളുടെ സംഘാടകര്‍ വിശദീകരിക്കും. ഇന്നു രാവിലെ ഒമ്പതു മുതല്‍ 10 വരെ സ്‌പോട്ട് രജിസ്‌ട്രേഷന്‍ ഉണ്ടായിരിക്കും. ഫോണ്‍: 8547829482.

അവകാശസംരക്ഷണ യാത്രയ്ക്ക് ചങ്ങനാശേരിയില്‍ സ്വീകരണം ഇന്ന്

ചങ്ങനാശേരി: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ "സമുദായ ശക്തീകരണം രാഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ്’ എന്നീ മുദ്രാവാക്യങ്ങള്‍ ഉയര്‍ത്തി ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശ സംരക്ഷണ യാത്രയ്ക്ക് ഇന്ന് ചങ്ങനാശേരിയില്‍ വരവേല്പ് നല്‍കും. വൈകുന്നേരം 4.30ന് പെരുന്ന റെഡ്‌സ്‌ക്വയര്‍ ജംഗ്ഷനില്‍നിന്ന് വാദ്യമേളങ്ങളുടെ അകമ്പടിയോടുകൂടി യാത്രയെ സ്വീകരിച്ച് പെരുന്ന ബസ് സ്റ്റാന്‍ഡ് മൈതാനത്ത് ക്രമീകരിച്ചിരിക്കുന്ന സമ്മേളന നഗറിലേക്ക് ആനയിക്കും. തുടര്‍ന്നു നടക്കുന്ന സമാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. ജാഥാ ക്യാപ്റ്റന്‍ പ്രഫ. രാജീവ് കൊച്ചുപറമ്പില്‍ വിഷയാവതരണ പ്രസംഗം നടത്തും. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യസന്ദേശം നല്കും. അതിരൂപതാ ഡയറക്ടര്‍ ഫാ. സാവിയോ മാനാട്ട്, കത്തോലിക്കാ കോണ്‍ഗ്രസ് ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍ തുടങ്ങിയവര്‍ പ്രസംഗിക്കും. വിവിധ ഫൊറോനകളില്‍നിന്നുള്ള ആയിരക്കണക്കിനു സംഘടനാംഗങ്ങള്‍ സമ്മേളനത്തില്‍ അണിനിരക്കും.

സംവരണ സീറ്റുകൾ : ചങ്ങനാശേരി നഗരസഭയില്‍ പ്രമുഖര്‍ക്ക് തട്ടകങ്ങള്‍ നഷ്ടമായി

ചങ്ങനാശേരി: വനിതാ, പട്ടികജാതി സംവരണ സീറ്റുകള്‍ പ്രഖ്യാപിച്ചതോടെ ചങ്ങനാശേരി നഗരസഭയിലും സമീപ പഞ്ചായത്തുകളിലും പ്രമുഖ നേതാക്കള്‍ക്ക് നിലവിലുള്ള തട്ടകങ്ങള്‍ നഷ്ടമാകും. പൂവക്കാട്ടുചിറ (മൂന്ന്), പാറേല്‍ പള്ളി (ഒമ്പത്), ബോട്ടു ജെട്ടി (31) എന്നീ വാര്‍ഡുകളാണ് പട്ടികജാതി സംവരണ വാര്‍ഡുകളായത്. ഇതില്‍ ഒമ്പതും 31ഉം പട്ടികജാതി സ്ത്രീ സംവരണവും മൂന്ന് പട്ടികജാതി സംവരണവുമാണ്. ഇതുകൂടാതെ ഒന്ന്, രണ്ട്, ആറ്, ഏഴ്, 10, 12, 15, 17, 18, 19, 24, 29, 32, 33, 34, 36, 37 വാര്‍ഡുകളിലാണ് വനിതകള്‍ക്ക് കുറി വീണത്. യുഡിഎഫ് നേതാക്കളായ ജോമി ജോസഫ്, സന്തോഷ് ആന്‍റണി, ബെന്നി ജോസഫ്, എല്‍ഡിഎഫ് നേതാക്കളായ മാത്യൂസ് ജോര്‍ജ്, കെ.ആര്‍. പ്രകാശ്, പി.എ. നസീര്‍, ശിവകുമാര്‍ തുടങ്ങിയവര്‍ക്കാണ് സ്വന്തം വാര്‍ഡുകള്‍ നഷ്ടമായത്. ഇതോടെ ഇവര്‍ സമീപ വാര്‍ഡുകളിള്‍ മത്സരത്തിനുള്ള ശ്രമത്തിലാണ്. അമ്പതുശതമാനം സംവരണവാര്‍ഡുകളായി മാറിയ സാഹചര്യത്തില്‍ പുരുഷ സ്ഥാനാര്‍ഥികള്‍ക്ക് അവസരം കുറയുമെന്നിരിക്കെ ജനറല്‍ വാര്‍ഡുകളില്‍ വനിതകള്‍ മത്സരിക്കേണ്ടതില്ലെന്ന തീരുമാനത്തിലേക്ക് ഇരുമുന്നണികളുടെയും സംസ്ഥാന നേതൃത്വങ്ങള്‍ എത്തിച്ചേരാനിടയുണ്ട്. അതേസമയം, യുഡിഎഫില്‍ ഘടക കക്ഷികള്‍ക്കിടയില്‍ സീറ്റുനിര്‍ണയം സംബന്ധിച്ച് തര്‍ക്കങ്ങള്‍ ഉടലെടുത്തിട്ടുണ്ട്. മുസ്‌ലിംലീഗ് വിജയ സാധ്യതയുള്ള രണ്ട് സീറ്റുകൾ ആവശ്യപ്പെട്ടിട്ടുണ്ട്. നിലവില്‍ ലീഗിന്‍റെ സിറ്റിംഗ് വാര്‍ഡായ 28, കോണ്‍ഗ്രസിന്‍റെ സിറ്റിംഗ് വാര്‍ഡും മുമ്പ് മുസ്‌ലിംലീഗ് മത്സരിച്ചു ജയിച്ച പെരുന്ന എല്‍പിഎസ് (14), 17 വാര്‍ഡുകളിലുമാണ് ലീഗ് അവകാശവാദമുന്നയിച്ചിരിക്കുന്നത്. ലീഗിന്‍റെ പ്രമുഖ നേതാക്കളെ മത്സരരംഗത്തിറക്കാനാണ് തീരുമാനം.

ഞങ്ങൾ എങ്ങനെ ഉറങ്ങും? കൂറ്റൻ വനംകുളവിക്കൂടിനടിയിൽ ഭീതിയോടെ ഒരു നാട്

ബെന്നി ചിറയിൽ ചങ്ങനാശേരി: ഒരു നാടിന്‍റെ ഉറക്കം കെടുത്തി കൂറ്റൻ വനംകുള വിക്കൂട്. കാട്ടുകുളവിയെന്നും ആനക്കുളവിയെന്നുമൊക്കെ അറിയപ്പെടുന്ന അതീവ അപകടകാരിയായ കടന്നലിന്‍റെ കൂടാണ് ഒരു നാടിനെ ഭീതിയിലാഴ്ത്തിയിരിക്കുന്നത്. മാടപ്പള്ളി മോസ്കോ-വെങ്കോട്ട റോഡിൽ ഏലംകുന്ന് കുരിശടിക്കു സമീപത്തെ വല്യാനാൽ തങ്കച്ചന്‍റെ വീടിന്‍റെ പുരയിടത്തിലാണ് നാടിനെ വിറപ്പിക്കുന്ന കുളവിക്കൂട് മരക്കൊന്പിൽ തൂങ്ങിക്കിടക്കുന്നത്. ഒരു മഹാഗണി മരത്തിലാണ് ഈ കൂട് തൂങ്ങിക്കിടക്കുന്നത്. കാഴ്ചയിൽ ഭംഗിയുണ്ടെങ്കിലും പ്രാണഭീതിയിലാണ് നാട്ടുകാർ. ആയിരക്കണക്കിനു കുളവികളാണ് ഒാരോ നിമിഷവും ഈ കൂട്ടിലേക്കു കയറുകയും ഇറങ്ങുകയും ചെയ്യുന്നത്. കാഴ്ചയിൽത്തന്നെ ഭീതി ജനിപ്പിക്കുന്ന ദൃശ്യം. ലക്ഷക്കണക്കിനു കുളവികൾ ഈ കൂട്ടിലുണ്ടെന്നാണ് നാട്ടുകാർ പറയുന്നത്. സമീപത്തെല്ലാം വീടുകളുള്ള മേഖലയാണ്. കുട്ടികളും വയോധികരുമൊക്കെ ഏറെയുള്ള പ്രദേശത്ത് ഈ കുളവിക്കൂട് ഇപ്പോൾ നാട്ടുകാരുടെ ഉറക്കം കെടുത്തിയിരിക്കുകയാണ്. ഒാരോ ദിവസവും ഇതിന്‍റെ വലിപ്പം കൂടി വരുന്നതായിട്ടാണ് നാട്ടുകാർ പറയുന്നത്. കഴിഞ്ഞദിവസമാണ് കുളവിക്കൂട് വീട്ടുകാരുടെ ശ്രദ്ധയിൽപ്പെട്ടത്. പഞ്ചായത്ത് അധികൃതർക്കു വിവരം നൽകിയെങ്കിലും മരം മുറിച്ചുനീക്കാനാണ് നിർദേശിച്ചതെന്നു പറയുന്നു. എന്നാൽ, കൂറ്റൻ കുളവിക്കൂട് ഉള്ള മരം എങ്ങനെ മുറിക്കുമെന്നും ആരു മുറിക്കുമെന്നും നാട്ടുകാർ ചോദിക്കുന്നു. കാക്കയോ മറ്റു പക്ഷികളോ കൂടിനെ ആക്രമിച്ചാൽ ഇവ ഇളകുമെന്നും നാട്ടുകാരെ ആക്രമിക്കുമെന്നുമുള്ള ഭീതിയിലാണ് ഈ പ്രദേശത്തുള്ളവർ. കൂട്ടത്തോടെ ആക്രമിച്ചാൽ ജീവൻ പോലുമെടുക്കാൻ ശേഷിയുള്ള അപകടകാരികളാണ് കുളവികൾ. വളർത്തു മൃഗങ്ങളെയും ഇവ ആക്രമിക്കും. പോലീസോ ഫയർഫോഴ്സോ ഇടപെട്ട് ഈ ഇവയെ നീക്കം ചെയ്യണമെന്നാണ് നാട്ടുകാരുടെ ആവശ്യം.

പെൻഷനേഴ്സ് ഓർഗനൈസേഷൻ ധർണ

വൈക്കം: പെൻഷൻ പരിഷ്കരണം നടപ്പാക്കുക, ഓണം ഉത്സവബത്ത പുനഃസ്ഥാപിക്കുക, പെൻഷൻ സർക്കാർ ഏറ്റെടുക്കുക തുടങ്ങിയ ആവശ്യങ്ങൾ ഉന്നയിച്ച് സെക്രട്ടേറിയറ്റ് നടയിലും യൂണിറ്റ് ഓഫീസുകളിലും നടത്തിയ സമരത്തിൽ സർക്കാർ അനുകൂല നിലപാട് സ്വീകരിക്കാത്തതിൽ പ്രതിഷേധിച്ച് പെൻഷനേഴ്സ് ഓർഗനൈസേഷന്‍റെ നേതൃത്വത്തിൽ ഡിപ്പോ ഓഫീസിനു മുന്നിൽ ധർണ നടത്തി. വൈക്കം കെഎസ്ആർടിസി ഡിപ്പോയ്ക്ക് മുന്നിൽ യൂണിറ്റ് പ്രസിഡന്‍റ് കെ.എം. മുരളീധരന്‍റെ അധ്യക്ഷതയിൽ നടന്ന ധർണാസമരം സിഐടിയു ഏരിയാ പ്രസിഡന്‍റ് പി.വി. പുഷ്കരൻ ഉദ്ഘാടനം ചെയ്തു. ഓർഗനൈസേഷൻ നേതാക്കളായ എൻ.കെ. സോമൻ, എ.വി. ജോസഫ്, ടി.കെ. പൊന്നപ്പൻ, പി.വി. പത്മനാഭൻ, ജി. ഗോപകുമാർ തുടങ്ങിയവർ പ്രസംഗിച്ചു. സെക്രട്ടേറിയറ്റ് നടയിൽ ആരംഭിക്കുന്ന അനിശ്ചിതകാല സമരം സമരസഹായ സമിതി ചെയർമാൻ പന്ന്യൻ രവീന്ദ്രൻ ഉദ്ഘാടനം ചെയ്യും.

കൂണ്‍ കൃഷി സംസ്ഥാനമൊട്ടാകെ വ്യാപിപ്പിക്കും: മന്ത്രി പി. പ്രസാദ്

കടുത്തുരുത്തി: കൂണ്‍ കൃഷി സംസ്ഥാനമൊട്ടാകെ വ്യാപിപ്പിക്കുന്നതിന്‍റെ ഭാഗമായി സംസ്ഥാന കൃഷി വകുപ്പ് ഡിഎംആറുമായി ഉടന്‍ ധാരണാപത്രം ഒപ്പ് വയ്ക്കുമെന്ന് മന്ത്രി പി. പ്രസാദ്. സമഗ്ര കൂണ്‍ഗ്രാമം വികസനപദ്ധതി പൂര്‍ത്തീകരണം സംസ്ഥാനത്തെ പ്രഥമ പ്രഖ്യാപനവും ഭാരതീയ പ്രകൃതി കൃഷി പദ്ധതി കിസാന്‍ മേളയും കടുത്തുരുത്തിയില്‍ ഉദ്ഘാടനം ചെയ്യുകയായിരുന്നു മന്ത്രി. കടുത്തുരുത്തി മിനി സിവില്‍ സ്റ്റേഷന്‍ അങ്കണത്തില്‍ നടന്ന യോഗത്തില്‍ മോന്‍സ് ജോസഫ് എംഎല്‍എ അധ്യക്ഷത വഹിച്ചു. പരിപാടിയോടനുബന്ധിച്ചു കര്‍ഷകരുടെ ഉത്പന്നങ്ങളും മൂല്യവര്‍ധിത ഉത്പന്നങ്ങളും പ്രോത്സാഹിപ്പിക്കുന്നതിന്‍റെ ഭാഗമായി കാര്‍ഷിക പ്രദര്‍ശന മേളയും ഉണ്ടായിരുന്നു. 2024-25 വര്‍ഷത്തെ സംസ്ഥാനത്തെ മികച്ച കൂണ്‍ കര്‍ഷകനായി തെരഞ്ഞെടുക്കപ്പെട്ട രാഹുല്‍ ഗോവിന്ദ് നയിച്ച "ശാസ്ത്രീയ കൂണ്‍ കൃഷിയും സംരംഭകത്വവും' എന്ന വിഷയത്തില്‍ സെമിനാറും നടന്നു. കിസാന്‍ മേളയുടെ ഉദ്ഘാടനം കെ. ഫ്രാന്‍സിസ് ജോര്‍ജ് എംപി നിര്‍വഹിച്ചു. മിഷന്‍ ഡയറക്ടര്‍ സജി ജോണ്‍, കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി, കൃഷി അസിസ്റ്റന്‍റ് ഡയറക്ടര്‍ ടി.ആര്‍. സ്വപ്ന, ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ, പ്രിന്‍സിപ്പല്‍ കൃഷി ഓഫീസര്‍ സി. ജോ ജോസ്, വിവിധ പഞ്ചായത്ത് പ്രസിഡന്‍റുമാര്‍, ജനപ്രതിനിധികള്‍, ഉദ്യോഗസ്ഥര്‍, കൃഷിക്കാര്‍ തുടങ്ങിയവര്‍ പങ്കെടുത്തു. സംഘമൈത്രിക്ക് 18 ലക്ഷം അനുവദിച്ചു: മന്ത്രി കടുത്തുരുത്തി: കുറുപ്പന്തറയിലെ സംഘമൈത്രിക്ക് അടിസ്ഥാന സൗകര്യ വികസനം നടപ്പിലാക്കുന്നതിനായി 18 ലക്ഷം രൂപ അനുവദിച്ചതായി മന്ത്രി പി. പ്രസാദ്. മോന്‍സ് ജോസഫ് എംഎല്‍എയുടെ അഭ്യര്‍ഥനയെത്തുടര്‍ന്നാണ് ഇക്കാര്യത്തില്‍ അനുകൂല തീരുമാനമുണ്ടായതെന്നും മന്ത്രി അറിയിച്ചു. സമഗ്ര കൂണ്‍ ഗ്രാമം വികസന പദ്ധതി പൂര്‍ത്തീകരണം സംസ്ഥാനത്തെ പ്രഥമ പ്രഖ്യാപനവും ഭാരതീയ പ്രകൃതി കൃഷി പദ്ധതി കിസാന്‍ മേളയും കടുത്തുരുത്തിയില്‍ ഉദ്ഘാടനം ചെയ്യുന്നതിനിടെയാണ് മന്ത്രി ഇക്കാര്യങ്ങള്‍ അറിയിച്ചത്.

പാടശേഖരങ്ങളുടെ ഭൗതിക സാഹചര്യം മെച്ചപ്പെടുത്താൻ 4.5 കോടി: മന്ത്രി റോഷി

വൈക്കം: വൈക്കം നിയോജക മണ്ഡലത്തിലെ വിവിധ പാടശേഖരങ്ങളുടെ ഭൗതിക സാഹചര്യം മെച്ചപ്പെടുത്തുന്നതിനായി 4.5കോടി രൂപ അനുവദിച്ചതായി ജലവിഭവ മന്ത്രി റോഷി അഗസ്റ്റിൻ. കേരള കോൺഗ്രസ്‌-എം വൈക്കം നിയോജകമണ്ഡലം കമ്മിറ്റിയുടെ നിവേദനത്തിന്‍റെ അടിസ്ഥാനത്തിൽ നിയോജകമണ്ഡലത്തിലെ വൈക്കം നഗരസഭയിലേയും അഞ്ച് പഞ്ചായത്തുകളിലും ഉൾപ്പെട്ട വിവിധ പാടശേഖരങ്ങൾക്ക് കുട്ടനാട് പാക്കേജിൽപ്പെടുത്തിയാണ് അപ്പർ കുട്ടനാടൻ മേഖലയായ വൈക്കത്തിന് 4.5 കോടി രൂപ അനുവദിച്ചതെന്ന് മന്ത്രി അറിയിച്ചു. കാർഷിക മേഖലയിലെ ഉത്പാദന വർധനവിനായി അടിസ്ഥാന സൗകര്യങ്ങൾ ഒരുക്കുന്നതിനാണ് തുക അനുവദിച്ചിരിക്കുന്നത്. നിയോജകമണ്ഡലം പ്രസിഡന്‍റ് ലൂക്ക് മാത്യുവിന്‍റെ നേതൃത്വത്തിൽ ഏബ്രഹാം പഴയകടവൻ, ജോയി ചെറുപുഷ്പം, വക്കച്ചൻ മണ്ണത്താലി, പി. വി. കുര്യൻ പ്ലാക്കോട്ടയിൽ, സന്തോഷ് കല്ലറ, റെജി ആറാക്കൻ, എം.സി. ഏബ്രഹാം, ബാബു ജോസഫ്, മണ്ഡലം പ്രസിഡന്‍റുമാരായ ആന്‍റണി കളമ്പുകാടൻ, ടെൽസൺ തോമസ്, സജുമോൻ ജോസഫ്, അനീഷ് തേവരപടിക്കൽ എന്നിവരാണ് മന്ത്രിക്ക് നിവേദനം നൽകിയത്. കല്ലറ പഞ്ചായത്തിലെ മുണ്ടാർ പാടശേഖരത്തിന് 30 ലക്ഷം, കളത്തോട്- പടിനിരപ്പള്ളി പാടശേഖരം 50 ലക്ഷം, വൈക്കം നഗരസഭ എട്ടാം വാർഡിലെ നാറാണത്ത് പാടശേഖരത്തിന് 50 ലക്ഷം, തലയോലപ്പറമ്പ് പഞ്ചായത്തിലെ ആലങ്കരി പാടശേഖരത്തിന് 75 ലക്ഷം, വെച്ചൂർ പഞ്ചായത്തിലെ പൂവത്തിക്കരി പാടശേഖരത്തിന് 75 ലക്ഷം, പന്നയ്ക്കാതടം പാടശേഖരത്തിന് 25 ലക്ഷം, ഉദയനാപുരം പഞ്ചായത്തിലെ ചാലകം പാടശേഖരത്തിന് 50 ലക്ഷം, ടിവിപുരം പഞ്ചായത്തിലെ പാലോന്ന് പാടശേഖരത്തിന് 50 ലക്ഷമടക്കം 4.5 കോടി രൂപയാണ് അനുവദിച്ചിരിക്കുന്നത്. കുട്ടനാട് പാക്കേജിൽ ഒരു നിയോജകമണ്ഡലത്തിൽ കാർഷികമേഖലയുടെ ഉണർവിനായി ഇത്രയും തുക ഒരുമിച്ച് അനുവദിക്കുന്നത് ആദ്യമാണ്. നിയോജകമണ്ഡലം കമ്മിറ്റി ആവശ്യപ്പെട്ട മുഴുവൻ പാടശേഖരങ്ങൾക്കും തുക അനുവദിച്ച മന്ത്രിയെ പാർട്ടി നിയോജകമണ്ഡലം കമ്മിറ്റി അഭിനന്ദിച്ചു.

കാറ്റില്‍ നെല്ല് നിലംപൊത്തി; വിരിപ്പിലും കണ്ണീര്‍ക്കൊയ്ത്ത്

കോട്ടയം: വിരിപ്പുവിളവിലും നെല്‍കര്‍ഷകര്‍ക്ക് കണ്ണീര്‍ക്കൊയ്ത്ത്. കനത്ത തുലാമഴയ്‌ക്കൊപ്പം ആഞ്ഞുവീശിയ കാറ്റില്‍ കല്ലറ, തലയാഴം, വെച്ചൂര്‍, പൂവത്തുംകര പ്രദേശങ്ങളിലെ പാടങ്ങളില്‍ നെല്ല് നിലംപൊത്തി. കൊയ്യാന്‍ ഒരു മാസം ബാക്കിനില്‍ക്കെയാണ് കര്‍ഷകര്‍ക്ക് വന്‍ നഷ്ടം സംഭവിച്ചിരിക്കുന്നത്. പൂര്‍ണമായി വിളവെത്താത്ത നെല്ല് കൊയ്‌തെടുത്താലും പ്രയോജനമില്ല. നിലംപൊത്തിയ നെല്ല് പാടത്ത് ഉപേക്ഷിക്കാനേ കര്‍ഷകര്‍ക്ക് കഴിയൂ. ചിലയിടങ്ങളില്‍ ഈ നെല്ല് കിളിര്‍ത്തു തുടങ്ങിയിട്ടുണ്ട്. പ്രദേശത്തെ നൂറ് ഏക്കറിലേറെ പാടങ്ങളില്‍ കൃഷിനാശമുണ്ട്. കഴിഞ്ഞ പുഞ്ചക്കൊയ്ത്തിന് മില്ലുകാര്‍ക്ക് 30 കിലോവരെ താര കൊടുക്കേണ്ടിവന്ന കര്‍ഷകര്‍ക്ക് വിരിപ്പുകൊയ്ത്തും ഭീമമായ നഷ്ടത്തില്‍ കലാശിച്ചു. അപ്പര്‍ കുട്ടനാട്ടില്‍ നവംബര്‍ പകുതിയോടെ കൊയ്ത്ത് തുടങ്ങാന്‍ പാകത്തില്‍ നെല്ല് വിളവായി വരുമ്പോഴാണ് മഴക്കെടുതി. തുലാമഴ ശക്തിപ്പെടുംതോറും കര്‍ഷകര്‍ക്ക് ആധിയും ആശങ്കയും വര്‍ധിക്കുകയാണ്. കഴിഞ്ഞ പുഞ്ചനെല്ല് വിറ്റ് ആറു മാസം പിന്നിടുമ്പോഴും സപ്ലൈകോയില്‍നിന്ന് പണം ലഭിക്കാത്ത കര്‍ഷകര്‍ ഏറെപ്പേരാണ്.

ഇടവട്ടത്ത് കിണർ ഇടിഞ്ഞുതാഴ്ന്നു

മറവൻതുരുത്ത്: മറവൻതുരുത്ത് ഇടവട്ടത്ത് കിണർ ഇടിഞ്ഞുതാണു. ഇടവട്ടം ചിറേക്കടവിൽ തൈപ്പടവിൽ ടി.എസ്. മധുവിന്‍റെ കിണറാണ് ഇടിഞ്ഞുതാഴ്ന്നത്. രണ്ടടി ഉയരമുള്ള ആൾമറയും ഒരടി വീതമുള്ള 12 റിംഗുകളും പൂർണമായി താഴ്ന്നുപോയ സ്ഥിതിയിലാണ്. കൂലിപ്പണിക്കാരനായ മധു ഇന്നലെ രാവിലെ എഴുന്നേറ്റു പുറത്തിറങ്ങിയപ്പോഴാണ് കിണർ താഴ്ന്നത് ശ്രദ്ധയിൽപ്പെട്ടത്. തിങ്കളാഴ്ച രാത്രി ശക്‌തമായ മഴയുണ്ടായിരുന്നതിനാൽ പുറത്തുനിന്നു ശബ്ദമൊന്നും കേട്ടിരുന്നില്ലെന്നും മധു പറഞ്ഞു. കനത്ത മഴയെത്തുടർന്ന് വെള്ളം കെട്ടിനിന്ന് മണ്ണിന് ഇളക്കം തട്ടിയാണ് കിണർ താണുപോയതെന്നാണ് കരുതുന്നത്.

തുലാവർഷം കനത്തു : 1,200 ഏക്കർ നെൽക്കൃഷി ഭീഷണിയിൽ

തലയോലപ്പറമ്പ്: തുലാവർഷം ശക്തമായതിനെത്തുടർന്ന് തലയോലപ്പറമ്പ് കൃഷിഭവൻ പരിധിയിൽ വരുന്ന 1200 ഏക്കർ നെൽക്കൃഷി വെള്ളപ്പൊക്ക ഭീഷണിയിൽ. പുഞ്ചക്കൃഷിയുടെ ഭാഗമായി വിതച്ച പാടശേഖരങ്ങളും വിതയ്ക്ക് നിലമൊരുക്കിയ പാടശേഖരങ്ങളും തുലാവർഷക്കെടുതിയുടെ പിടിയിലമരുകയാണ്. മഴയെത്തുടർന്ന് മൂവാറ്റുപുഴയാറിലെ ജലനിരപ്പ് ഉയർന്നതോടെ പുത്തൻതോട് -കരിയാർ തോട് കരകവിഞ്ഞൊഴുകി പാടശേഖരങ്ങളിൽ വെള്ളംകയറി. കൃഷിനാശമൊഴിവാക്കാൻ അടിയം - താഴപ്പള്ളി ഷട്ടർ ഉടൻ അടയ്ക്കണമെന്ന് കർഷകർ ആവശ്യപ്പെട്ടു. പായലും പുല്ലും വളർന്ന് നീരൊഴുക്ക് നിലച്ചു കരിയാറുമായി ബന്ധപ്പെട്ട് ഒഴുകിയിരുന്ന പുത്തൻതോട്ടിൽ പായലും പുല്ലും പിടിച്ച് നീരൊഴുക്ക് തടസപ്പെട്ടതിനാൽ പെയ്ത്തുവെള്ളം ഒഴുകിപ്പോകാതെ പാടശേഖരങ്ങളിലേക്ക് ഇരച്ചുകയറി. മോട്ടോർ തറകളും വെള്ളംകയറി മുങ്ങിയതോടെ മോട്ടോർ പ്രവർത്തിപ്പിക്കാനും കഴിയുന്നില്ല . മഴയും ഇടിമിന്നലും കാരണം വൈദ്യുതിയും തടസപ്പെടുന്നത് കർഷകരെ ആശങ്കയിലാക്കുകയാണ് . കൃഷി വകുപ്പും പഞ്ചായത്ത് അധികൃതരും അടിയം-താഴപ്പള്ളി ഷട്ടർ അടയ്ക്കുന്നതിന് നടപടി സ്വീകരിക്കണമെന്നു കോലത്താർ പാടശേഖരസമിതി ഭാരവാഹികളായ സാബു ജോർജ് മംഗലത്ത്, വി.കെ. ശശിധരൻ വാളവേലി, സി.ഡി. ദിനേശ് തയ്യിൽ തുടങ്ങിയവർ ആവശ്യപ്പെട്ടു.

വയോജനങ്ങൾക്കൊപ്പം ഷെഫ്സ് ഡേ

കുമരകം: ഇന്‍റർനാഷണൽ ഷെഫ്സ് ഡേ ഓർഫനേജിലെ അന്തേവാസികൾക്കൊപ്പം ആഘോഷിച്ചു. ദി സുരി കുമരകം കേരള റിസോർട്ട് ആൻഡ് സ്‌പായിലെ ജീവനക്കാരും ഷെഫുമാരുമാണ് ഇന്‍റർനാഷണൽ ഷെഫ്സ് ഡേ-2025 വേറിട്ട മാതൃകയായി ആഘോഷിച്ചത്. ഫുഡ് എക്സ്പ്ലോർസ് എന്ന തീമിനെ ആസ്പദമാക്കിയായിരുന്നു പരിപാടി. ഷെഫ്മാർ കുമരകം സംരക്ഷ ഓർഫനേജ് സന്ദർശിക്കുകയും അന്തേവാസികളോടൊപ്പം ദിവസം മുഴുവൻ ചെലവഴിക്കുകയും ചെയ്തു. ഷെഫുമാർ ഓർഫനേജിന്‍റെ ചുറ്റുമതിൽ പെയിന്‍റ് ചെയ്തു മനോഹരമാക്കി. ഇത് ഷെഫുമാരുടെ കലാത്മക മികവും ടീം സ്പിരിറ്റും തെളിയിച്ചു. കലയും കരുണയും ചേർന്ന ദിനത്തിൽ ഷെഫുമാർ അവതരിപ്പിച്ച നൃത്ത-സംഗീത പരിപാടികൾ അന്തേവാസികളുടെ ഹൃദയങ്ങളിൽ സന്തോഷത്തിന്‍റെ വെളിച്ചം പകർന്നു. ഷെഫുമാർ തയാറാക്കിയ രുചികരമായ വിഭവങ്ങൾ വിളമ്പിയതോടെ ആഘോഷം പൂർണതയിലെത്തി. പാചകത്തിന്‍റെ രുചിയും ഹൃദയത്തിന്‍റെ താപവും ഒരുമിച്ച് നിറഞ്ഞതായിരുന്നു വൃദ്ധസദനത്തിലെ ദിനാഘോഷം. ജനറൽ മാനേജർ ശരത് വത്സരാജ്. എച്ച്ആർ ഹെഡ് വി.ആർ. ഹരികൃഷ്ണൻ, എക്സിക്യൂട്ടീവ് ഷെഫ് ബോബൻ തോമസ് എന്നിവരുടെ നേതൃത്വത്തിലായിരുന്നു ഷെഫേഴ്സ് ദിനാഘോഷം.

പാമ്പാടിക്കാര്‍ക്ക് ഇനി ജിം സൗകര്യങ്ങള്‍ സൗജന്യം

പാമ്പാടി: പാമ്പാടി ബ്ലോക്ക് പഞ്ചായത്ത് വികസന പദ്ധതിയില്‍ ഉള്‍പ്പെടുത്തി സൗത്ത് പാമ്പാടി സഹൃദയ ഗ്രന്ഥശാലയ്ക്ക് അനുവദിച്ച ഓപ്പണ്‍ ജിം കുട്ടികളും വനിതകളും അടങ്ങുന്ന കായികപ്രേമികളുടെ സാനിധ്യത്തില്‍ എംജി സര്‍വകലാശാല സിന്‍ഡിക്കേറ്റംഗം റെജി സക്കറിയ നാടിനു സമര്‍പ്പിച്ചു. ഗ്രന്ഥശാല പ്രസിഡന്‍റും ബ്ലോക്ക് പഞ്ചായത്തംഗവുമായ സി.എം. മാത്യു അധ്യക്ഷത വഹിച്ചു. കാപ്‌കോസ് ചെയര്‍മാന്‍ കെ.എം. രാധാകൃഷ്ണന്‍, പാമ്പാടി സര്‍വീസ് സഹകരണ ബാങ്ക് പ്രസിഡന്‍റ് വി.എം. പ്രദീപ്, പഞ്ചായത്ത് പ്രസിഡന്‍റ് ഡാലി റോയ്, ബ്ലോക്ക് പഞ്ചായത്തംഗങ്ങളായ മറിയാമ്മ ഏബ്രഹാം, ടി.എം. ജോര്‍ജ്, സെന്‍റ് തോമസ് ഹൈസ്‌കൂള്‍ മാനേജര്‍ മാത്യു സി. വര്‍ഗീസ്, ജോജോ സാമുവല്‍, സാജന്‍ സാമുവല്‍, എ.ആര്‍. ഉണ്ണികൃഷ്ണന്‍, സാബു പാത്തിങ്കല്‍, സന്ധ്യാ രാജേഷ്, കെ.കെ. തങ്കപ്പന്‍, സുനിത ദീപു, പി.എം. വര്‍ഗീസ്, ഏലിയാസ് കെ. ഏബ്രഹാം, ജേക്കബ് എം. ഏബ്രഹാം, കെ.പി. ബെന്നിമോന്‍, ഗീതാ അജയ്, ലൈലാ രാജു എന്നിവര്‍ പ്രസംഗിച്ചു.

എല്‍ഡിഎഫ് വിടാന്‍ ആഗ്രഹിക്കുന്നെങ്കിൽ അവർ പറയട്ടെ: മോൻസ്

കോട്ടയം: എല്‍ഡിഎഫ് മുന്നണി വിടാന്‍ കേരള കോണ്‍ഗ്രസ് -എം ആഗ്രഹിക്കുന്നുണ്ടെങ്കില്‍ അവര്‍തന്നെ പറയട്ടെന്നു കേരള കോണ്‍ഗ്രസ് എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ. ഇക്കാര്യം കേരള കോണ്‍ഗ്രസ്-എം പറഞ്ഞാല്‍ യുഡിഎഫ് ചര്‍ച്ച ചെയ്യും. കേരള കോണ്‍ഗ്രസ് ഇക്കാര്യത്തില്‍ ഗുണത്തിനോ ദോഷത്തിനോ ഇല്ലെന്നും മോന്‍സ് പറഞ്ഞു. ഇക്കാര്യത്തില്‍ യുഡിഎഫ് കണ്‍വീനര്‍ അടൂര്‍ പ്രകാശ് വ്യക്തിപരമായ അഭിപ്രായം പറഞ്ഞതാണ്. കേരള കോണ്‍ഗ്രസുകളുടെ യോജിപ്പിനെക്കുറിച്ചു യുഡിഎഫ് ഒരുഘട്ടത്തിലും ചര്‍ച്ച ചെയ്തിട്ടില്ല. ഭിന്നശേഷി അധ്യാപക നിയമന വിഷയം സര്‍ക്കാരിനു പരിഹരിക്കാന്‍ കഴിഞ്ഞിട്ടില്ല. ഇക്കാര്യത്തില്‍ സുപ്രീംകോടതിയെ ബോധ്യപ്പെടുത്തി സര്‍ക്കാര്‍ പരിഹാരത്തിനു ശ്രമിക്കുമെന്നാണു വിദ്യാഭ്യാസ മന്ത്രി പറഞ്ഞത്. കാര്‍ഷിക മേഖലയെ രക്ഷപ്പെടുത്താന്‍ കേന്ദ്രവും സംസ്ഥാനവും സഹായം ചെയ്യുന്നില്ല. നെല്ല് സംഭരിക്കുന്ന പണം സമയത്ത് കൊടുക്കാന്‍ കഴിയുന്നില്ല. വനം-വന്യജീവി പ്രശ്‌നത്തില്‍ കേന്ദ്രവും സംസ്ഥാനവും പരസ്പരം കുറ്റപ്പെടുത്തുകയാണ്. കടുത്തുരുത്തി മണ്ഡലത്തിലെ വികസന പ്രവർത്തനങ്ങളുടെ ധവളപത്രം പുറത്തിറക്കി വിമര്‍ശകരെ സംവാദത്തിനു ക്ഷണിക്കുകയാണെന്നും മോന്‍സ് പറഞ്ഞു.

അയർക്കുന്നം മോഷണം: പ്രതിയെക്കുറിച്ച് സൂചന ലഭിച്ചതായി പോലീസ്

അയർക്കുന്നം: വീടിനുള്ളിലെ അലമാര തകർത്ത് 12പവൻ സ്വർണവും 28,000 രൂപയും കവർന്ന സംഭവത്തിൽ പ്രതിയെക്കുറിച്ച് സൂചന ലഭിച്ചതായി അയർക്കുന്നം പോലീസ്. വിവിധ ഭാഗങ്ങളിലെ സിസിടിവികൾ കേന്ദ്രീകരിച്ചു നടത്തിയ അന്വേഷണത്തിൽ ഒരാളാണ് കവർച്ച നടത്തിയതെന്ന സൂചന ലഭിച്ചതായി എസ്എച്ച്ഒ അനൂപ് ജോസ് പറഞ്ഞു. ഞായറാഴ്ചയായിരുന്നു സംഭവം. അയർക്കുന്നം കല്ലിട്ടനട ഭാഗത്ത് പോളയ്ക്കൽ ബെന്നി ചാക്കോയുടെ വീട്ടിലായിരുന്നു മോഷണം. പാലായിലെ സ്വകാര്യ ആശുപത്രിയിൽ ജോലിചെയ്യുന്ന ബെന്നിയുടെ മകൾ അനീറ്റ വീട്ടിലെത്തിയപ്പോഴാണ് വീടിന്‍റെ പിൻവാതിൽ തകർത്ത് മോഷണം നടന്നതായി അറിഞ്ഞത്. തുടർന്ന് അയർക്കുന്നം പോലീസിൽ പരാതി നൽകിയിരുന്നു.

കൂരോപ്പട സാന്താ മരിയ ജേതാക്കള്‍

കൂരോപ്പട: കൂരോപ്പട സാന്താ മരിയ പബ്ലിക് സ്‌കൂളില്‍ നടന്ന 13-ാമത് സാന്താ മരിയന്‍ വോളിബോള്‍ ടൂര്‍ണമെന്‍റില്‍ പെണ്‍കുട്ടികളുടെ വിഭാഗത്തില്‍ കൂരോപ്പട സാന്താ മരിയ പബ്ലിക് സ്‌കൂള്‍ ഒന്നാം സ്ഥാനം കരസ്ഥമാക്കി. ഫസ്റ്റ് റണ്ണര്‍ അപ്പ് ആനക്കല്ല് സെന്‍റ് ആന്‍റണീസ് പബ്ലിക് സ്‌കൂള്‍ കരസ്ഥമാക്കി. പെണ്‍കുട്ടികളുടെ വിഭാഗത്തിലെ ബെസ്റ്റ് പ്രോമിസിംഗ് പ്ലെയറായി സാന്താ മരിയ പബ്ലിക് സ്‌കൂളിലെ എഞ്ചലിയ മറിയം വര്‍ഗീസും ബെസ്റ്റ് പ്ലെയറായി സെന്‍റ് ആന്‍റണീസ് പബ്ലിക് സ്‌കൂളിലെ അന്നാ ജോസഫും തെരഞ്ഞെടുക്കപ്പെട്ടു. വിജയികള്‍ക്ക് സ്‌കൂള്‍ പ്രിന്‍സിപ്പല്‍ ഫാ. റോയി മാളേയ്ക്കല്‍ സിഎംഐ ട്രോഫികളും ക്യാഷ് അവാര്‍ഡുകളും നല്കി.

എക്‌സലന്‍ഷിയ-2025

കോട്ടയം: കാണക്കാരി സിഎസ്‌ഐ കോളജ് ഫോര്‍ ലീഗല്‍ സ്റ്റഡീസിന്‍റെ ബിരുദദാനവും കോഴ്സ് കംപ്ലീഷന്‍ ചടങ്ങും “എക്‌സലന്‍ഷിയ-2025’’ കോട്ടയം സിഎസ്‌ഐ റിട്രീറ്റ് സെന്‍ററില്‍ സംഘടിപ്പിച്ചു. എംജി സര്‍വകലാശാലാ രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍ ഉദ്ഘാടനം ചെയ്തു. കോഴ്‌സ് പഠനം പൂര്‍ത്തിയാക്കിയവര്‍ക്കുള്ള സര്‍ട്ടിഫിക്കറ്റുകള്‍ സിക്കിം ഹൈക്കോടതി മുന്‍ ചീഫ് ജസ്റ്റീസ് പയസ് സി. കുര്യാക്കോസ് വിതരണം ചെയ്തു. സിഎസ്‌ഐ മധ്യ കേരള മഹാ ഇടവക ബിഷപ് ഡോ. മലയില്‍ സാബു കോശി ചെറിയാന്‍ അധ്യക്ഷത വഹിച്ചു. പ്രിന്‍സിപ്പല്‍ ഡോ. ജോര്‍ജ് ജോസഫ്, ബര്‍സാര്‍ കോശി ഏബ്രഹാം, മഹായിടവക രജിസ്ട്രാര്‍ അഡ്വ. ഷീബ തരകന്‍, വൈസ് പ്രിന്‍സിപ്പല്‍ ഡോ. ജയ്‌സി കരിങ്ങാട്ടില്‍, എ. ഐശ്വര്യ, മരിയ ജോബി എന്നിവര്‍ പ്രസംഗിച്ചു. പഠനം പൂര്‍ത്തിയാക്കിയ 114 വിദ്യാര്‍ഥികള്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു.

ഓർമ ഉണർത്തൽ സംഗമം

കുമരകം: കുമരകം വടക്കുംഭാഗം സര്‍വീസ് സഹകരണ ബാങ്ക് 1070ന്‍റെ ശതാബ്ദി ആഘോഷങ്ങളുടെ ഭാഗമായി ബാങ്കില്‍ സേവനം ചെയ്ത മുന്‍കാല പ്രസിഡന്‍റുമാര്‍, ഭരണസമിതിയംഗങ്ങള്‍, ജീവനക്കാര്‍, സഹകരണ വകുപ്പ് ഉദ്യോഗസ്ഥര്‍ എന്നിവരുടെയും നിലവിലുള്ള സഹകരണ വകുപ്പ് ഉദ്യോഗസ്ഥര്‍, ഭരണസമിതിയംഗങ്ങള്‍, ജീവനക്കാര്‍ എന്നിവരുടെയും ഓര്‍മ ഉണര്‍ത്തല്‍ സംഗമം നടത്തി. ബാങ്ക് പ്രസിഡന്‍റ് കെ.ജെ. കുഞ്ഞുമോന്‍ കരീത്ര അധ്യക്ഷത വഹിച്ചു. സംസ്ഥാന സഹകരണ ഇലക്‌ഷന്‍ കമ്മീഷന്‍ അംഗം ബിനോയ് എം. കുമാര്‍ ഉദ്ഘാടനം ചെയ്തു. സഹകരണ വകുപ്പ് ജോയിന്‍റ് ഡയറക്ടര്‍ ജയമ്മ പോള്‍, ഡെപ്യൂട്ടി രജിസ്ട്രാര്‍ കെ.സി. വിജയകുമാര്‍, മുന്‍ സെക്രട്ടറി ടി.ജെ. മാത്യു, ജനറല്‍ കണ്‍വീനര്‍ ഫിലിപ്പ് സ്‌കറിയ പെരുമ്പളത്തുശേരില്‍, സെക്രട്ടറി കെ.പി. മിനിമോള്‍ എന്നിവര്‍ പ്രസംഗിച്ചു.

നിർത്തിയിട്ട ലോറിയിൽ ഇടിച്ച് നിയന്ത്രണംവിട്ട കാർ ബൈക്കിലിടിച്ചു; മൂന്നു പേർക്ക് പരിക്ക്

ഏറ്റുമാനൂർ: നിർത്തിയിട്ടിരുന്ന ലോറിയിൽ ഇടിച്ചു നിയന്ത്രണംവിട്ട കാർ ബൈക്കിലിടിച്ച് മൂന്നുപേർക്ക് പരിക്ക്. ഇന്നലെ രാവിലെ ഒമ്പതിനു പട്ടിത്താനം-മണർകാട് ബൈപാസ് റോഡിൽ വടക്കേനട ഭാഗത്ത് ഉണ്ടായ അപകടത്തിൽ ബൈക്ക് യാത്രക്കാരൻ പട്ടിത്താനം സ്വദേശി അനന്തു (26)വിനും കാർ യാത്രക്കാരായ തോട്ടയ്ക്കാട് സ്വദേശി സന്തോഷ് (49), ഭാര്യ പ്രതിഭ (45) എന്നിവർക്കുമാണ് പരിക്കേറ്റത്. പട്ടിത്താനം ഭാഗത്തേക്ക് പോയ കാർ ബൈപാസ് റോഡരികിൽ പാർക്ക് ചെയ്തിരുന്ന നാഷണൽ പെർമിറ്റ് ലോറിയിൽ ഇടിച്ച് നിയന്ത്രണം നഷ്ടപ്പെട്ട് പാറകണ്ടം ഭാഗത്തേക്ക് വരികയായിരുന്ന ബൈക്കിൽ ഇടിക്കുകയായിരുന്നു. ഇടിയുടെ ആഘാതത്തിൽ അനന്തു റോഡിൽ തെറിച്ചു വീണു. സ്വകാര്യ സ്ഥാപനത്തിൽ അക്കൗണ്ടന്‍റായ അനന്തു ജോലിസ്ഥലത്തേക്കു പോകുകയായിരുന്നു. മൂന്നു പേരെയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഏറ്റുമാനൂർ പോലീസ് മേൽനടപടികൾ സ്വീകരിച്ചു. ഏറ്റുമാനൂർ ബൈപാസ് റോഡിൽ അപകടത്തിൽപ്പെട്ട കാറും ബൈക്കും.

കത്തോലിക്കാ കോൺഗ്രസ് അവകാശ സംരക്ഷണയാത്ര ഇന്ന് ഏറ്റുമാനൂരിൽ

ഏറ്റുമാനൂർ: കത്തോലിക്കാ കോൺഗ്രസ് ഗ്ലോബൽ സമിതിയുടെ നേതൃത്വത്തിൽ സമുദായ ശക്തീകരണം രാഷ്‌ട്ര പുരോഗതിക്ക്, നീതി ഔദാര്യമല്ല അവകാശമാണ് എന്നീ മുദ്രാവാക്യങ്ങൾ ഉയർത്തി. 13ന് കാസർഗോഡുനിന്നു കത്തോലിക്കാ കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തിൽ ആരംഭിച്ച അവകാശ സംരക്ഷണ യാത്രയ്ക്ക് ഇന്ന് ഏറ്റുമാനൂരിൽ സ്വീകരണം നൽകും. ചങ്ങനാശേരി അതിരൂപതയിലെ ആദ്യ സ്വീകരണ കേന്ദ്രമാണ് ഏറ്റുമാനൂർ. പാലായിൽനിന്ന് രാവിലെ 8.45ന് ഏറ്റുമാനൂരിൽ എത്തിച്ചേരുന്ന അവകാശ സംരക്ഷണ യാത്രയെ പാലാ റോഡിൽനിന്ന് സ്വീകരിച്ച് കുരിശുപള്ളി ജംഗ്ഷനിലെ സമ്മേളന വേദിയിലേക്ക് ആനയിക്കും. തുടർന്നു നടക്കുന്ന സ്വീകരണ സമ്മേളനം ചങ്ങനാശേരി അതിരൂപത പ്രോട്ടോ സിഞ്ചെല്ലൂസ് മോൺ. ആന്‍റണി ഏത്തയ്ക്കാട്ട് ഉദ്ഘാടനം ചെയ്യും. കത്തോലിക്കാ കോൺഗ്രസ് അതിരൂപത പ്രസിഡന്‍റ് ബിജു സെബാസ്റ്റ്യൻ പടിഞ്ഞാറേവീട്ടിൽ അധ്യക്ഷത വഹിക്കും. അതിരമ്പുഴ ഫൊറോനാ വികാരി ഫാ. മാത്യു പടിഞ്ഞാറേക്കുറ്റ് മുഖ്യസന്ദേശവും അതിരൂപതാ ഡയറക്ടർ റവ.ഡോ. സാവിയോ മാനാട്ട് ആമുഖ സന്ദേശവും നൽകും. അതിരൂപതാ ജനറൽ സെക്രട്ടറി ബിനു ഡൊമിനിക് നടുവിലേഴം, ഫൊറോന ഡയറക്ടർ ഫാ. ജോസഫ് ആലുങ്കൽ, ഏറ്റുമാനൂർ ക്രിസ്തുരാജ പള്ളി വികാരി ഫാ. തോമസ് കുത്തുകല്ലുങ്കൽ, സഹവികാരി ഫാ. ജേക്കബ് ചക്കാത്ര, അതിരൂപതാ ട്രഷറർ ജോസ് ജോൺ വെങ്ങാന്തറ, ഭാരവാഹികളായ സെബാസ്റ്റ്യൻ പുല്ലാട്ടുകാല, ജോയി പാറപ്പുറം, ബിജു തുളിശേരിൽ, ജോബി ചൂരക്കുളം എന്നിവർ പ്രസംഗിക്കും. ജാഥാ ക്യാപ്റ്റൻ പ്രഫ. രാജീവ് കൊച്ചുപറമ്പിൽ മറുപടിപ്രസംഗം നടത്തും. ജാഥ സ്ഥിരാംഗങ്ങളായ ഫാ. ഫിലിപ്പ് കവിയിൽ, ഡോ. ജോസ്കുട്ടി ജെ. ഒഴുകയിൽ, ടോണി പുഞ്ചക്കുന്നേൽ, രാജേഷ് ജോൺ, ട്രീസാ ലിസ് സെബാസ്റ്റ്യൻ, ബെന്നി ആന്‍റണി, ജോർജ് കോയിക്കൽ, മനു ജെ. വരാപ്പള്ളി എന്നിവർ വിഷയമവതരിപ്പിച്ച് പ്രസംഗിക്കും .

മെഡിക്കൽ കോളജ് ഓട്ടോ സ്റ്റാൻഡിനു സമീപം മരങ്ങൾ ഉണക്കാൻ മരുന്നൊഴിച്ചെന്നു പരാതി

ഗാന്ധിനഗർ: മെഡിക്കൽ കോളജ് ഓട്ടോ സ്റ്റാൻഡിന് സമീപം നിന്ന മരങ്ങളിൽ സാമൂഹ്യവിരുദ്ധർ മരുന്നൊഴിച്ച് ഉണക്കാൻ ശ്രമിച്ചതായി പരാതി. ഓട്ടോ സ്റ്റാൻഡിന് സമീപംനിന്ന ആര്യവേപ്പ്, പ്ലാവ്, മാവ് തുടങ്ങിയ മരങ്ങളിൽ വാക്കത്തിയോ മറ്റായുധങ്ങൾകൊണ്ടോ വെട്ടി മുറിവുണ്ടാക്കി അതിലേക്കു മരം ഉണക്കുന്നതിനുള്ള മരുന്ന് ഒഴിച്ചതായാണ് പരാതി ഉയർന്നിരിക്കുന്നത്. സംഭവത്തെ തുടർന്ന് മരങ്ങൾ കരിഞ്ഞു തുടങ്ങി. പ്രദേശത്ത് തണൽ വിരിച്ച് നിന്ന മരങ്ങളാണ് സാമൂഹ്യവിരുദ്ധരുടെ പ്രവൃത്തി മൂലം കരിഞ്ഞു തുടങ്ങിയത്. സംഭവത്തിൽ പ്രതിഷേധം ശക്തമാണ്. പഞ്ചായത്ത് അധികാരികൾ സ്ഥലത്തെത്തി മരം പരിശോധിച്ച് നടപടി സ്വീകരിക്കണമെന്ന ആവശ്യമുന്നയിച്ചിട്ടുണ്ട്. മാസങ്ങൾക്കു മുമ്പ് കുറുപ്പന്തറയിലും റോഡ് അരികിൽ നിന്ന മരം ഉണക്കുന്നതിന് സാമൂഹ്യവിരുദ്ധർ മരുന്നു പ്രയോഗം നടത്തിയിരുന്നു. അന്ന് പരിസ്ഥിതി പ്രവർത്തകരും സാമൂഹ്യ പ്രവർത്തകരും സംയുക്തമായി വലിയ പ്രതിഷേധം സംഘടിപ്പിച്ചിരുന്നു.

പ്ലാറ്റിനം ജൂബിലി ആഘോഷം നാളെ; രാഷ്‌ട്രപതി ദ്രൗപദി മുര്‍മു മുഖ്യാതിഥി

കോട്ടയം: അനേകരുടെ കഠിനാധ്വാനത്തിലും കാത്തിരിപ്പിനുമൊടുവിലാണ് സെന്‍റ് തോമസ് കോളജ് പാലായ്ക്ക് സ്വന്തമായത്. 1950 ഓഗസ്റ്റ് ഏഴിന് കോട്ടയം രൂപതാധ്യക്ഷനും മലബാര്‍ ബിഷപ്‌സ് കോണ്‍ഫറന്‍സ് സെക്രട്ടറിയുമായിരുന്ന മാര്‍ തോമസ് തറയില്‍ കോളജിന്‍റെ ഉദ്ഘാടനം നിര്‍വഹിച്ചു. ചങ്ങനാശേരി എസ്ബി, ആലുവ യുസി കോളജുകള്‍ മാത്രമായിരുന്നു അക്കാലത്തെ ഉന്നത കലാലയങ്ങള്‍. ഈ സാഹചര്യത്തിലാണ് പാലാ സെന്‍റ് തോമസ് ഹൈസ്‌കൂളിനെ ഒരു സെക്കൻഡ് ഗ്രേഡ് കോളജായി ഉയര്‍ത്തണമെന്ന ആശയം ഉദിക്കുന്നത്. 1937 ല്‍ ആരംഭിച്ച ഉദ്യമം ലക്ഷ്യത്തിലെത്തിയത് ഭാരതം സ്വതന്ത്രമായതിനു ശേഷമാണ്. 1949 ഡിസംബര്‍ ആറിന് കോളജിന് താത്കാലിക അനുമതി ലഭിക്കുകയും 1950 ഏപ്രില്‍ 16ന് മദ്രാസ് ആര്‍ച്ച് ബിഷപ്പ് റവ.ഡോ. മത്യാസ് ശിലാസ്ഥാപനം നിര്‍വഹിക്കുകയും ചെയ്തു. തുടര്‍ന്ന് ഇന്‍റര്‍മീഡിയറ്റ് ആരംഭിക്കാന്‍ അനുവാദം ലഭിച്ചു. പാലാ സെന്‍റ് തോമസ് ഹൈസ്‌കൂളിലെ ഒരു മുറിയായിരുന്നു കോളജ് ഓഫീസായി പ്രവര്‍ത്തിച്ചിരുന്നത്. ജവഹര്‍ലാല്‍ നെഹ്‌റുവിന്‍റെ സാമ്പത്തികോപദേഷ്ടാവായിരുന്ന ഡോ. പി.ജെ. തോമസായിരുന്നു പ്രഥമ പ്രിന്‍സിപ്പല്‍. പ്രഫ. വി.ജെ. ജോസഫ് വൈസ്പ്രിന്‍സിപ്പലും. മുന്നൂറിലധികം വിദ്യാര്‍ഥികളും 14 അധ്യാപകരും ഏതാനും അനധ്യാപകരുമാണ് ആദ്യ ബാച്ചിലുണ്ടായിരുന്നത്. അതേദിവസം തന്നെയാണ് പാലാ രൂപത സ്ഥാപിക്കപ്പെട്ടതും കോളജ് നിര്‍മാണ കമ്മിറ്റിക്ക് നേതൃത്വം നല്കിയിരുന്ന വയലില്‍ കളപ്പുര മാണിയച്ചന്‍ (മാര്‍ സെബാസ്റ്റ്യന്‍ വയലില്‍) പ്രഥമ മെത്രാനായി പ്രഖ്യാപിക്കപ്പെട്ടതും. 1952-53 അധ്യയനവര്‍ഷം ഇക്കണോമിക്‌സ്, മാത്തമാറ്റിക്‌സ് ഡിഗ്രി ക്ലാസുകള്‍ ആരംഭിച്ചപ്പോള്‍ 60 വിദ്യാര്‍ഥികളാണ് ഉണ്ടായിരുന്നത്. ഇന്‍റര്‍ മീഡിയറ്റില്‍ 612 വിദ്യാര്‍ഥികളും. 1952 മുതല്‍ 1968 വരെ പ്രിന്‍സിപ്പലായിരുന്ന മോണ്‍. ജോസഫ് കുരീത്തടം കോളജിനെ ഉയര്‍ച്ചയിലേക്ക് നയിച്ചു. വിവിധ ബ്ലോക്കുകളും ഓഡിറ്റോറിയവും ക്രിസ്തുരാജ് ഹോസ്റ്റലും ഫാത്തിമ ഹോസ്റ്റലും കാന്‍റീനും സ്റ്റാഫ് ക്വാര്‍ട്ടേഴ്‌സും നീന്തല്‍ക്കുളവും നിര്‍മിക്കപ്പെട്ടത് കുരീത്തടത്തിലച്ചന്‍റെ കാലത്താണ്. 10 ബിരുദ കോഴ്‌സുകളും ഒന്‍പത് ബിരുദാനന്തര ബിരുദ കോഴ്‌സുകളും അക്കാലത്ത് ആരംഭിച്ചു. 1971-72 ല്‍ 2502 വിദ്യാര്‍ഥികളും 139 അധ്യാപകരുമായി. 1976 ഫെബ്രുവരി 12ന് രജത ജൂബിലി ഉദ്ഘാടനം നിര്‍വഹിച്ചത് പ്രധാനമന്ത്രി ഇന്ദിര ഗാന്ധിയായിരുന്നു. 1999-2000 ല്‍ സുവര്‍ണ ജൂബിലി മേഘാലയ ഗവര്‍ണര്‍ എം.എം. ജേക്കബ് ഉദ്ഘാടനം ചെയ്തു. ഡോ. പി.ജെ തോമസ്, ഫാ. ജോസഫ് കുരീത്തടം, ഡോ. എന്‍.എം. തോമസ്, പ്രഫ. പി.എം. ചാക്കോ, ഫാ. ജോസഫ് വെള്ളാങ്കല്‍, ഫാ. ഈനാസ് ഒറ്റത്തെങ്ങുങ്കല്‍, ഫാ. ഫിലിപ്പ് ഞരളക്കാട്ട്, റവ.ഡോ. കുര്യന്‍ മറ്റം, റവ.ഡോ. മാത്യു മലേപ്പറമ്പില്‍, റവ.ഡോ. മാത്യു ജോണ്‍ കോക്കാട്ട്, ഡോ. കെ.കെ. ജോസ്, ഫാ. ജോസഫ് ഞാറക്കാട്ടില്‍, ഡോ. സണ്ണി ജോസഫ്, ഡോ. ജോയി ജോര്‍ജ്, ഡോ. ജയിംസ് ജോണ്‍ എന്നിവര്‍ക്കുശേഷം ഡോ. സിബി ജയിംസ് ഇപ്പോള്‍ പ്രിന്‍സിപ്പലായി സേവനമനുഷ്ഠിക്കുന്നു. പാലാ ബിഷപ് മാര്‍ ജോസഫ് കല്ലറങ്ങാട്ടാണ് രക്ഷാധികാരി. 15 യുജി, 16 പിജി പ്രോഗ്രാമുകളിലും 11 ഗവേഷണവിഭാഗങ്ങളിലുമായി ഇപ്പോള്‍ 2000ല്‍പ്പരം വിദ്യാര്‍ഥികളുണ്ട്. റവ.ഡോ. സാല്‍വിന്‍ കെ. തോമസ് വൈസ്പ്രിന്‍സിപ്പലായും ഫാ. മാത്യു ആലപ്പാട്ടുമേടയില്‍ ബര്‍സാറായും സേവനമനുഷ്ഠിക്കുന്നു. നിലവില്‍ പെണ്‍കുട്ടികള്‍ക്കും എല്ലാ കോഴ്‌സുകളിലും പ്രവേശനമുണ്ട്. നാക് സമിതിയുടെ എ പ്ലസ് പ്ലസ് അംഗീകാരവും ഓട്ടോണമസ് പദവിയും കരസ്ഥമാക്കിയതിന്‍റെ അഭിമാനത്തോടെയാണു കോളജില്‍ പ്ലാറ്റിനം ജൂബിലി ആഘോഷം.

ഒരിക്കലും മറക്കാത്ത സെന്‍റ് തോമസ് കാലം

1961 ജൂണിലാണ് ഞാന്‍ പാലാ സെന്‍റ് തോമസ് കോളജില്‍ പ്രീ യൂണിവേഴ്‌സിറ്റിക്ക് എത്തുന്നത്. വിശാലമായ പച്ച പുതച്ച കാമ്പസ്. ഗാംഭീര്യത്തോടെ മൂന്നുനില മെയിന്‍ ബില്‍ഡിംഗ്. ലാബുകള്‍, സ്വിമ്മിംഗ് പൂള്‍, അഞ്ചര ഏക്കര്‍ മൈതാനം. ഫുട്‌ബോള്‍, ഹോക്കി, ഷട്ടില്‍ കോര്‍ട്ടുകള്‍. മുന്നിലൂടെ കോട്ടയം-പൂഞ്ഞാര്‍ മെയിന്‍ റോഡ്. പിന്നില്‍ മീനച്ചിലാര്‍. മെയിന്‍ ബില്‍ഡിംഗിന്‍റെ ഇടതുവശത്തെ ലൈബ്രറി ബ്ലോക്കിലായിരുന്നു പ്രീ യൂണിവേഴ്‌സിറ്റി ക്ലാസ്. അതില്‍ ജി-ബാച്ചിലായിരുന്നു ഞാനും ജ്യേഷ്ഠന്‍ സക്കറിയാസും. അന്നു കോളജിലെത്തിയ കേരള സര്‍വകലാശാല വൈസ്ചാന്‍സലര്‍ ഡോ. കെ.സി.കെ.ഇ. രാജ, പ്രിന്‍സിപ്പല്‍ ഫാ. ജോസഫ് കുരീത്തടത്തിനൊപ്പം ഞങ്ങളുടെ ക്ലാസില്‍ വന്നു. അച്ചന്‍ എന്നെ വിശിഷ്ടാതിഥിക്കു പരിചയപ്പെടുത്തി. വൈസ് ചാന്‍സലര്‍ എന്നോടു രണ്ട് ചോദ്യങ്ങള്‍ ചോദിച്ചു. ഒന്ന് "കോടി' എന്നര്‍ഥം വരുന്ന ഇംഗ്ലീഷ് വാക്ക്. എനിക്ക് "ലാക്’ കഴിഞ്ഞ് ‘മില്യന്‍’ വരെ മാത്രമേ പറയാന്‍ കഴിഞ്ഞുള്ളൂ. "ക്രോര്‍’ എന്ന വാക്ക് "കോ’ എന്നു മുഴക്കത്തില്‍ അദ്ദേഹം തിരുത്തി ആവര്‍ത്തിക്കാന്‍ ആവശ്യപ്പെട്ടു. ഒന്നും മനസിലാകാതെ ഞാന്‍ ‘കോ’ എന്നു പ്രതിവചിച്ചു, വിസിക്കു തൃപ്തിയായി. മീനച്ചിലാറിന് കുറുകെ മുത്തോലി പാലം അക്കാലത്ത് പൂര്‍ത്തിയായിട്ടില്ല. അതിനാല്‍ കൊഴുവനാലില്‍ നിന്ന് ലൈന്‍ബസില്‍ മുത്തോലി കടവില്‍ ഇറങ്ങി വള്ളം കടന്ന് ഒരു കിലോമീറ്റര്‍ കാട്ടുവഴിയിലൂടെ കോളജിലേക്കു നടക്കും. ഒരു മാസത്തെ ക്ലേശ യാത്രയ്ക്കുശേഷം കോളജിനടുത്ത് വീട് വാടകയ്‌ക്കെടുത്തു പ്രീയൂണിവേഴ്‌സിറ്റി പൂര്‍ത്തിയാക്കി. വെള്ളപ്പൊക്കവും ആഘോഷം ഫീസ് കൊടുത്തായിരുന്നു പഠനം. യഥാസമയം ഫീസടച്ചില്ലെങ്കില്‍ മാസാന്ത്യം ഫൈന്‍ കൂട്ടി കൊടുക്കണം. അര രൂപ, മുക്കാല്‍ രൂപ, ഒരു രൂപ, ഒന്നര രൂപ പരമാവധി രണ്ട് രൂപ ആയിരുന്നു ഫൈന്‍. പ്രിന്‍സിപ്പല്‍, വൈസ്പ്രിന്‍സിപ്പല്‍, ബര്‍സാര്‍ ഇവരില്‍ ഒരാള്‍ക്കേ ഫൈന്‍ കുറയ്ക്കാനാവൂ. മൂന്നു പേരെയും ദൈന്യഭാവം കാണിച്ച് ഫൈന്‍ കുറയ്ക്കാനുള്ള ചിറ്റ് വാങ്ങും. അങ്ങനെ ഏറ്റം കുറഞ്ഞ ചിറ്റ് എടുത്ത് ഫീസിന്‍റെ കൂടെ കൊടുക്കും. മാര്‍ സെബാസ്റ്റ്യന്‍ വയലില്‍ പാലാ രൂപതാധ്യക്ഷനാകുംമുമ്പ് പാലാ സെന്‍റ് തോമസ് ഹൈസ്‌കൂള്‍ ഹെഡ്മാസ്റ്ററായിരിക്കെ രൂപീകരിച്ച കമ്മിറ്റിയുടെ നേതൃത്വത്തില്‍ 1950ലാണ് സെന്‍റ് തോമസ് കോളജ് സ്ഥാപിതമായത്. 1961ല്‍ പ്രധാന കെട്ടിടം കൂടാതെ മൂന്നുനില ലൈബ്രറി ബില്‍ഡിംഗ് 1962ല്‍ കേരള ഗവര്‍ണറായിരുന്ന വി.വി. ഗിരി ഉദ്ഘാടനം ചെയ്തു. ആ വര്‍ഷം കോളജ് ദിനാഘോഷത്തിനു മുഖ്യാതിഥി കേന്ദ്രമന്ത്രി പനമ്പള്ളി ഗോവിന്ദമേനോനായിരുന്നു. പണി തീരാറായ ഓഡിറ്റോറിയത്തിനു മുന്നില്‍ ഓടിട്ട നീളന്‍ കെട്ടിടത്തിലായിരുന്നു കാന്‍റീനും ബുക്ക് സ്റ്റാളും. താമസത്തിനു ക്രിസ്തുരാജ് ഹോസ്റ്റല്‍. മീനച്ചിലാര്‍ വര്‍ഷത്തില്‍ രണ്ടു മൂന്നു തവണ സമ്മാനിച്ചിരുന്ന വെള്ളപ്പൊക്കം ഞങ്ങളേറെ ആസ്വദിച്ചിരുന്നു. പ്രതിഭകളുടെ കാലം അറുപതുകളുടെ മധ്യത്തോടെ രാജ്യത്തെ മുന്‍നിര വോളിബോള്‍ ടീം എന്ന ഖ്യാതി സെന്‍റ് തോമസ് കോളജ് നേടി. 1966-68 കാലത്ത് ദേശീയ വോളിയിലെ ഒന്നാംസ്ഥാനം കുത്തകയാക്കിയിരുന്ന ഉത്തര്‍പ്രദേശ് പോലീസ് ടീമിനെ ഓള്‍ ഇന്ത്യാ മണര്‍കാട്ട് ടൂര്‍ണമെന്‍റില്‍ തകര്‍ത്ത് പാലാ സെന്‍റ് തോമസ് കോളജ് ട്രോഫിയില്‍ മുത്തമിട്ടത് മാധ്യമങ്ങള്‍ക്ക് ചാകരയായി. ജിമ്മി ജോര്‍ജ്, ജ്യേഷ്ഠന്‍ ജോസ് ജോര്‍ജ്, എസ്. ഗോപിനാഥ്, പി.ജെ. ജോസ്, എം.എ. ജോസഫ്, ജോര്‍ജ് മാത്യു തുടങ്ങിയവര്‍ അങ്ങനെ ദേശീയ-അന്തര്‍ദേശീയ താരങ്ങളായി. 1961-62 ലാണ് ഇംഗ്ലീഷ് സാഹിത്യത്തില്‍ ബിഎ ആരംഭിച്ചത്. 1962-63 രണ്ടാം ബാച്ചില്‍ എനിക്ക് പ്രവേശനം ലഭിച്ചു. 1965-ല്‍ എംഎ ആരംഭിച്ചപ്പോള്‍ കോഴ്‌സ് കോ-ഓര്‍ഡിനേറ്ററായി ഫാ. കുരീത്തടം കൊണ്ടുവന്നത് പ്രസിദ്ധ ഇംഗ്ലീഷ് പ്രഫസര്‍ ഡോ. എ. ശിവരാമ സുബ്രഹ്മണ്യ അയ്യരെയാണ്. ലണ്ടന്‍ യൂണിവേഴ്‌സിറ്റിയില്‍നിന്ന് ഇംഗ്ലീഷ് സാഹിത്യത്തില്‍ പിഎച്ച്ഡി നേടിയ ആദ്യ ഇന്ത്യക്കാരന്‍. ഞങ്ങളെ മോട്ടിവേറ്റ് ചെയ്യാന്‍ തന്‍റെ പൂര്‍വവിദ്യാര്‍ഥികളുടെ ലിസ്റ്റ് പലപ്പോഴും ഡോ. അയ്യര്‍ പറയുമായിരുന്നു. എന്നും ലിസ്റ്റ് ആരംഭിക്കുന്നത് "വണ്‍-കെ.ആര്‍. നാരായണന്‍’-ല്‍. പില്‍ക്കാലത്ത് ഇന്ത്യന്‍ പ്രസിഡന്‍റായ കെ.ആര്‍. നാരായണന്‍ അന്ന് ബര്‍മീസ് എംബസിയില്‍ ഫസ്റ്റ് സെക്രട്ടറി മാത്രമാണ്. ലിസ്റ്റില്‍ കേണല്‍ ഗോദവര്‍മരാജ, വൈസ് ചാന്‍സലര്‍ ഹബീബ് മുഹമ്മദ്, ഡോ. അയ്യപ്പപണിക്കര്‍, ഡോ. നരേന്ദ്രപ്രസാദ്, കെ.എം. ചാണ്ടി തുടങ്ങിയ സ്റ്റാര്‍സ്. ഞങ്ങളുടെ വകുപ്പ് അധ്യക്ഷനായിരുന്ന പ്രഫ. കെ.എം. ചാണ്ടി പില്‍ക്കാലത്ത് പോണ്ടിച്ചേരി, ഗുജറാത്ത്, മധ്യപ്രദേശ് സംസ്ഥാനങ്ങളില്‍ ഗവര്‍ണറായി. താരപ്രഭയിൽ‌ കോളജുകള്‍ അക്കാലത്ത് കലാലയങ്ങള്‍ത്തന്നെ ആയിരുന്നു. നാടകം, കഥാപ്രസംഗം, മിമിക്രി, മോണോ ആക്ട്, പ്രഭാഷണം തുടങ്ങിയവയ്ക്കായിരുന്നു മേല്‍സ്ഥാനം. ഏകാങ്ക നാടകങ്ങളും കുറവല്ലായിരുന്നു. കോളജ് യൂണിയന്‍, കാത്തലിക് സ്റ്റുഡന്‍റ്സ് യൂണിയന്‍, എന്‍സിസി, ഇംഗ്ലീഷ്-മലയാളം അസോസിയേഷനുകള്‍ തുടങ്ങിയവയുടെ ആഭിമുഖ്യത്തിലായിരുന്നു കലാപരിപാടികള്‍. 1967 ജനുവരി 17 മുതല്‍ 24 വരെ കോളജില്‍ നടത്തിയ "ഫെസ്റ്റിവല്‍ ഓഫ് ആര്‍ട്‌സ്' സംഭവമായിരുന്നു. അതിലെ അതിഥികളെക്കൂടി പറയാം. മുഹമ്മദ് റാഫി, പി.ബി. ശ്രീനിവാസ്, കെ.ജെ. യേശുദാസ്, എസ്. ജാനകി, സത്യന്‍, പ്രേം നസീര്‍, ഹിന്ദി ഹാസ്യതാരം ജോണി വിസ്‌കി തുടങ്ങിയവര്‍. കൂടാതെ മദ്രാസ് സിസ്റ്റേഴ്‌സിന്‍റെ ഡാന്‍സും കലാനിലയത്തിന്‍റെ നാലു ദിവസത്തെ നാടകവും. സെന്‍റ് തോമസിന്‍റെ ഖ്യാതിയായി അറിയപ്പെട്ടിരുന്നത് കാമ്പസിലെ മികച്ച അച്ചടക്കമായിരുന്നു. ഫാ. ജോസഫ് കുരീത്തടമായിരുന്നു ഈ സല്‍പേരിന്‍റെ മുഖ്യശില്പി. ഞാന്‍ പ്രീയൂണിവേഴ്‌സിറ്റിക്കു പഠിക്കുമ്പോള്‍ ഹിന്ദി, പൊളിറ്റിക്‌സ്, സ്റ്റാറ്റിസ്റ്റിക്‌സ്, ബോട്ടണി എന്നിവയായിരുന്നു പിജി കോഴ്‌സുകള്‍. 1964-ല്‍ കെമിസ്ട്രി, 1965-ല്‍ ഇംഗ്ലീഷ്, ഫിസിക്‌സ്, 66ല്‍ കണക്ക്, ഇക്കണോമിക്‌സ് പിജി കോഴ്‌സുകള്‍ ആരംഭിച്ചു. അക്കാലത്ത് ഏറ്റവുമധികം പിജി കോഴ്‌സുകളുണ്ടായിരുന്നത് കൊല്ലം എസ്എന്‍ കോളജിലായിരുന്നു. രണ്ടാം സ്ഥാനം പാലാ സെന്‍റ് തോമസിനും. ഡോ. സെബാസ്റ്റ്യന്‍ നരിവേലി

ഹെലികോപ്റ്ററുകളും ഡ്രോണുകളും പറത്തുന്നത് നിരോധിച്ചു

കോട്ടയം: രാഷ്‌ട്രപതി ദ്രൗപദി മുര്‍മുവിന്‍റെ സന്ദര്‍ശനത്തോടനുബന്ധിച്ച വ്യോമസുരക്ഷാ ക്രമീകരണങ്ങളുടെ ഭാഗമായി ജില്ലയിലെ വിവിധ കേന്ദ്രങ്ങളില്‍ നാളെ ഉച്ചയ്ക്കു 12 മുതല്‍ 24നു ഉച്ചയ്ക്ക് 12 വരെ ഹെലികോപ്റ്ററുകളും ഡ്രോണുകളും മൈക്രോലൈറ്റ് എയര്‍ക്രാഫ്റ്റുകളും യുഎവികളും പറത്തുന്നതിന് നിരോധം ഏര്‍പ്പെടുത്തി ജില്ലാ കളക്ടര്‍ ഉത്തരവായി. കോട്ടയം പോലീസ് പരേഡ് ഗ്രൗണ്ട്, പാലാ സെന്‍റ് തോമസ് കോളജ്, പാലാ മുനിസിപ്പല്‍ സ്റ്റേഡിയം, കോട്ടയം സിഎംഎസ് കോളജ് ഗ്രൗണ്ട്, കോട്ടയം നെഹ്‌റു സ്റ്റേഡിയം, കുമരകം താജ് ഹോട്ടല്‍ എന്നിവയുടെയും ജില്ലയിലെ മറ്റ് ഹെലിപ്പാഡുകളുടെയും സമീപ സ്ഥലങ്ങളുടെയും വ്യോമ മേഖലയിലാണ് നിരോധനം. വ്യോമസേനയ്ക്കും എസ്പിജിക്കും സംസ്ഥാന പോലീസിനും രാഷ്‌ട്രപതിയുടെ സന്ദര്‍ശനവുമായി ബന്ധപ്പെട്ട് ഔദ്യോഗികമായി നിയോഗിക്കപ്പെട്ടിട്ടുള്ള മറ്റ് ഏജന്‍സികള്‍ക്കും നിരോധനം ബാധകമല്ല. ഹെലികോപ്റ്ററുകളോ നിരോധന പരിധിയില്‍ വരുന്ന മറ്റ് ഉപകരണങ്ങളോ അടിയന്തര സാഹചര്യത്തില്‍ പറത്തേണ്ടതുണ്ടെങ്കില്‍ ജില്ലാ കളക്ടറുടെ മുന്‍കൂര്‍ അനുമതി വാങ്ങണം. ഉത്തരവ് ലംഘിക്കുന്നവര്‍ക്കെതിരേ നിയമ നടപടി സ്വീകരിക്കും.

ജെ.ബി. കോശി കമ്മീഷൻ റിപ്പോർട്ട് പുറത്തുവിടണം: മാർ പുളിക്കൽ

കാഞ്ഞിരപ്പള്ളി: ജെ.ബി. കോശി കമ്മീഷൻ റിപ്പോർട്ട് പുറത്തുവിടണമെന്നു കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ നടത്തുന്ന അവകാശ സംരക്ഷണയാത്രയ്ക്കു കാഞ്ഞിരപ്പള്ളിയിൽ നൽകിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരള സമൂഹത്തിന്‍റെ വളർച്ചയ്ക്കും പുരോഗതിക്കും വേണ്ടി നിലപാട് സ്വീകരിച്ച്, വിദ്യാഭ്യാസ സാമൂഹിക സാംസ്കാരിക ജീവകാരുണ്യ മേഖലകളിൽ വലിയ സംഭാവനങ്ങൾ നൽകിയ ഈ സമുദായത്തിന്‍റെ പിന്നാക്കാവസ്ഥയെക്കുറിച്ചു കൃത്യമായി പഠിച്ചു പുറത്തുകൊണ്ടുവരേണ്ട റിപ്പോർട്ട് പൂഴ്ത്തിവച്ചിരിക്കുകയാണ്. എയ്ഡഡ് സ്കൂളുകളിലെ അധ്യാപകരുടെ കാര്യത്തിൽ എൻഎസ്എസിനു ലഭിച്ച അനുകൂലവിധി എല്ലാവർക്കും ബാധകമാണെന്നു പകൽപോലെ വ്യക്തമായിട്ടും തമസ്കരിക്കുന്നതു ശരിയല്ല. കുട്ടികളുടെ വിദ്യാഭ്യാസ അവകാശംകൂടിയാണ് നിഷേധിക്കപ്പെടുന്നത്. എന്തുകൊണ്ടാണ് സർക്കാർ പക്ഷപാതിത്വപരമായ നിലപാടുകൾ സ്വീകരിക്കുന്നതെന്ന ചോദ്യം പ്രസക്തം. ഇടപെടുന്നുവെന്നു വരുത്തിവച്ചിട്ട് കാര്യമില്ല. വിവേചനപരമായ നിലപാടാണ് ഇക്കാര്യത്തിൽ സർക്കാർ സ്വീകരിക്കുന്നത്. വന്യജീവിശല്യം പെരുകിയതിനാൽ അടിയന്തരമായി 1972ലെ വനം വന്യജീവി നിയമത്തിൽ മാറ്റം വരുത്താൻ കേന്ദ്ര- സംസ്ഥാന സർക്കാരുകൾ ഒരുമിച്ച് ഇടപ്പെടണം. റബറിന് കൃത്യമായ വില സ്ഥിരതയുണ്ടാകണമെന്നും 250 രൂപ തറവിലയായി മാറ്റണമെന്നും മാർ ജോസ് പുളിക്കൽ കൂട്ടിച്ചേർത്തു. നമ്മൾ കടുത്ത പ്രതിഷേധം ഉയർത്തിയപ്പോൾ അധ്യാപക നിയമനമായി ബന്ധപ്പെട്ട പ്രശ്നം തീർക്കാൻ മുഖ്യമന്ത്രി ഇടപെടൽ നടത്തിയത് അവകാശ സംരക്ഷണയാത്രയുടെ വിജയത്തിന്‍റെ ഒന്നാം ഘട്ടമാണെന്നു ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ മറുപടി പ്രസംഗത്തിൽ പറഞ്ഞു. വിദ്യാഭ്യാസമന്ത്രിയുടെ പല പ്രസ്താവനകളും പ്രതിഷേധാർഹമാണെന്നും അദ്ദേഹം കൂട്ടിച്ചേർത്തു. കത്തോലിക്ക കോൺഗ്രസ് രൂപത പ്രസിഡന്‍റ് കെ.കെ. ബേബി കണ്ടത്തിൽ അധ്യക്ഷത വഹിച്ചു. രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ആമുഖ സന്ദേശവും ഗ്ലോബൽ ഡയറക്ടർ ഫാ. ഫിലിപ്പ് കവിയിൽ മുഖ്യപ്രഭാഷണവും നടത്തി. രൂപത ഡയറക്ടർ ഫാ. ജസ്റ്റിൻ മതിയത്ത്, ഗ്ലോബൽ ജനറൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, ഗ്ലോബൽ സമിതി അംഗം ടെസി ബിജു പാഴിയാങ്കൽ, രൂപത ജനറൽ സെക്രട്ടറി ജോസഫ് പണ്ടാരക്കളം, ജോർജ് കോയിക്കൽ തുടങ്ങിയവർ പ്രസംഗിച്ചു. ഭാരവാഹികളായ ഫിലിപ്പ് നിക്കോളാസ് പള്ളിവാതുക്കൽ, ജോജോ തെക്കുംചേരിക്കുന്നേൽ, ബിജു ശൗര്യാംകുഴി, സണ്ണിക്കുട്ടി അഴകമ്പ്രയിൽ, സിനി ജിബു നീറനാക്കുന്നേൽ, ജിജി പുത്തേട്ട്, ജോബി തെക്കുംചേരിക്കുന്നേൽ, ജോബിൻ വടക്കേനാത്ത്, അനിത ജസ്റ്റിൻ തുടങ്ങിയവർ പരിപാടികൾക്ക് നേതൃത്വം നൽകി. കാഞ്ഞിരപ്പള്ളി പേട്ടക്കവലയിൽനിന്ന് ആരംഭിച്ച അവകാശ സംരക്ഷണ റാലിയിൽ നിരവധിപേർ പങ്കെടുത്തു.

രാഷ്‌ട്രപതി: സ്‌കൂൾ സമയത്തില്‍ ക്രമീകരണം

കോട്ടയം: രാഷ്‌ട്രപതി ദ്രൗപദി മുര്‍മുവിന്‍റെ സന്ദര്‍ശനവുമായി ബന്ധപ്പെട്ട് നാളെയും വെള്ളിയാഴ്ചയും ജില്ലയുടെ വിവിധ ഭാഗങ്ങളില്‍ വിപുലമായ സുരക്ഷാ, ഗതാഗത ക്രമീകരണങ്ങള്‍ ഏര്‍പ്പെടുത്തുന്നതിനാല്‍ സ്‌കൂളുകളുടെ പ്രവര്‍ത്തനസമയത്തില്‍ ക്രമീകരണം വരുത്തുമെന്ന് ജില്ലാ വിദ്യാഭ്യാസ ഉപഡയറക്ടര്‍ അറിയിച്ചു. നാളെ ജില്ലയിലെ സര്‍ക്കാര്‍, എയ്ഡഡ്, അണ്‍ എയ്ഡഡ്, സിബിഎസ്ഇ, ഐസിഎസ്ഇ, കേന്ദ്രീയ വിദ്യാലയങ്ങള്‍ ഉള്‍പ്പെടെ എല്ലാ സ്‌കൂളുകളും ഉച്ചകഴിഞ്ഞ് മൂന്നിനു മുന്‍പായി പ്രവര്‍ത്തനം അവസാനിപ്പിക്കണം. വെള്ളിയാഴ്ച കോട്ടയം താലൂക്കിലെ സര്‍ക്കാര്‍, എയ്ഡഡ്, അണ്‍ എയ്ഡഡ്, സിബിഎസ്ഇ, ഐസിഎസ്ഇ, കേന്ദ്രീയ വിദ്യാലയങ്ങള്‍ ഉള്‍പ്പെടെ എല്ലാ സ്‌കൂളുകളും രാവിലെ 8.30ന് മുമ്പായി പ്രവര്‍ത്തനം ആരംഭിക്കുകയും വേണം. ഇതുസംബന്ധിച്ച് രക്ഷിതാക്കള്‍ക്ക് സ്‌കൂള്‍ അധികൃതര്‍ കൃത്യമായ അറിയിപ്പ് നല്‍കണം.

കേരള കോണ്‍ഗ്രസ് ബഹുജനസംഗമം 25ന്

കോട്ടയം: എല്‍ഡിഎഫ് സര്‍ക്കാരിന്‍റെ വാഗ്ദാന ലംഘനങ്ങള്‍ക്കും ജനദ്രോഹ നടപടികള്‍ക്കുമെതിരേ കേരള കോണ്‍ഗ്രസ് സംസ്ഥാന കമ്മിറ്റിയുടെ ആഭിമുഖ്യത്തില്‍ 25ന് ഉച്ചകഴിഞ്ഞു മൂന്നിനു കോട്ടയം തിരുനക്കര ബസ് സ്റ്റാന്‍ഡ് മൈതാനത്ത് ബഹുജനസംഗമം സംഘടിപ്പിക്കും. പാര്‍ട്ടി ചെയര്‍മാന്‍ പി.ജെ. ജോസഫ് എംഎല്‍എ ഉദ്ഘാടനം ചെയ്യും. വര്‍ക്കിംഗ് ചെയര്‍മാന്‍ പി.സി. തോമസ് അധ്യക്ഷത വഹിക്കും. എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ മുഖ്യപ്രഭാഷണം നടത്തും. സെക്രട്ടറി ജനറല്‍ ജോയി ഏബ്രഹാം, ഡെപ്യൂട്ടി ചെയര്‍മാന്മാരായ ടി.യു. കുരുവിള, ഫ്രാന്‍സിസ് ജോര്‍ജ് എംപി, തോമസ് ഉണ്ണിയാടന്‍, സംസ്ഥാന കോ ഓര്‍ഡിനേറ്റര്‍ അപു ജോണ്‍ ജോസഫ് തുടങ്ങിയവര്‍ പ്രസംഗിക്കും. പാര്‍ട്ടിയുടെ സംസ്ഥാന, ജില്ലാ, നിയോജക മണ്ഡലം, മണ്ഡലം, വാര്‍ഡ് ഭാരവാഹികളും പോഷക സംഘടനാ ഭാരവാഹികളും പാര്‍ട്ടി സംസ്ഥാന കമ്മിറ്റി അംഗങ്ങളും സംഗമത്തില്‍ പങ്കെടുക്കും. ഭിന്നശേഷി അധ്യാപക നിയമനം, കാര്‍ഷിക മേഖലയുടെ തകര്‍ച്ച, ക്ഷേമനിധി ആനുകൂല്യങ്ങള്‍ വര്‍ധിപ്പിക്കുക, വന്യജീവി ആക്രമണത്തില്‍നിന്നു സാധാരണക്കാരെ രക്ഷിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ബഹുജനസംഗമം സംഘടിപ്പിക്കുന്നത്. പത്രസമ്മേളനത്തില്‍ മോന്‍സ് ജോസഫ് എംഎല്‍എ, ജോയി ഏബ്രഹാം, ജെയ്‌സണ്‍ ജോസഫ്, ബിനു ചെങ്ങളം, സന്തോഷ് കാവുകാട്ട് എന്നിവര്‍ പങ്കെടുത്തു.

പൂഞ്ഞാറില്‍ ആടിനെ അജ്ഞാത ജീവി കടിച്ചുകൊന്നു

പൂഞ്ഞാര്‍: വളതൂക്കില്‍ ആടിനെ അജ്ഞാതജീവി കടിച്ചു കൊന്ന നിലയില്‍ കണ്ടെത്തി. പൂഞ്ഞാര്‍ പഞ്ചായത്ത് വളതൂക്ക് കൃഷിഭവന് സമീപം കീരംചിറയില്‍ ജോസിന്‍റെ ഉടമസ്ഥതയിലുള്ള ഒരു വയസ് പ്രായമുള്ള ആടിനെയാണ് കൊലപ്പെടുത്തിയത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. സമീപത്തെ പുരയിടത്തില്‍ തീറ്റാനായി വിട്ടിരുന്ന ആടിനെ അഴിക്കാന്‍ ചെന്നപ്പോഴാണ് കൊന്നുതിന്ന നിലയില്‍ കണ്ടെത്തിയത്. ആടിന്‍റെ ശരീരം പകുതിയോളം കടിച്ചു തിന്ന നിലയിലായിരുന്നു. 15 കിലോയോളം തൂക്കമുള്ള പെണ്ണാടായിരുന്നു. ഏതു മൃഗമാണ് ആക്രമിച്ചതെന്ന് സംശയം ഉയര്‍ന്നതോടെ വനം വകുപ്പ് അധികൃതരെ വിവരം അറിയിച്ചു. തുടര്‍ന്ന് രാത്രി ഒമ്പതോടെ ഫോറസ്റ്റ് അധികൃതര്‍ സ്ഥലത്തെത്തി പരിശോധന നടത്തി. ചെന്നായ ആകാനാണ് സാധ്യതയെന്ന് വനം വകുപ്പ് ഉദ്യോഗസ്ഥര്‍ പറഞ്ഞു.

അവകാശസംരക്ഷണ യാത്രയ്ക്ക് രാമപുരത്ത് ആവേശോജ്വല സ്വീകരണം

രാമപുരം: നീതി ഔദാര്യമല്ല അവകാശമാണ് എന്ന മുദ്രാവാക്യമുയര്‍ത്തി കത്തോലിക്ക കോണ്‍ഗ്രസ് ഗ്ലോബല്‍ സമിതി പ്രസിഡന്‍റ് പ്രഫ. രാജീവ് കൊച്ചുപറമ്പില്‍ നയിക്കുന്ന അവകാശസംരക്ഷണ യാത്രയ്ക്ക് രാമപുരത്ത് ഫൊറോന വികാരി ഫാ. ബെര്‍ക്കുമാന്‍സ് കുന്നുംപുറത്തിന്‍റെ നേതൃത്വത്തില്‍ ഉജ്വല സ്വീകരണം നല്‍കി. സ്വീകരണ സമ്മേളനം രാമപുരം പള്ളി വികാരി ഫാ. ബെര്‍ക്കുമാന്‍സ് കുന്നുംപുറം ഉദ്ഘാടനം ചെയ്തു. ജാഥാ ക്യാപ്റ്റന്‍ പ്രഫ. രാജീവ് കൊച്ചുപറമ്പില്‍, പ്രഫ. ജോസുകുട്ടി ഒഴുകയില്‍, ജോര്‍ജ് കോയിക്കല്‍, രൂപത പ്രസിഡന്‍റ് ഇമ്മാനുവല്‍ നിധീരി, സെക്രട്ടറി ജോസ് വട്ടുകുളം, മാര്‍ ആഗസ്തീനോസ് കോളജ് പ്രിന്‍സിപ്പൽ ഡോ. റെജി വര്‍ഗീസ് മേക്കാടന്‍ തുടങ്ങിയവര്‍ പ്രസംഗിച്ചു. ‌കത്തോലിക്ക കോണ്‍ഗ്രസ് ഭാരവാഹികളായ അജോ തൂണുങ്കല്‍, സൈജു കോലത്ത്, ജോബിന്‍ പുതിയിടത്തുചാലില്‍, സജി മിറ്റത്താനി, സണ്ണി കുരിശുംമൂട്ടില്‍, ബിനു മാണിമംഗലത്ത്, ജയ്‌സണ്‍ അറക്കപ്പറമ്പില്‍, വിവിധ സംഘടനാ ഭാരവാഹികള്‍ തുടങ്ങിയവര്‍ നേതൃത്വം നല്‍കി.

മറ്റത്തില്‍ കുടിവെള്ള പദ്ധതി നവീകരണ പ്രവർത്തനോദ്ഘാടനം

ഇടനാട്: മറ്റത്തില്‍ കുടിവെള്ള പദ്ധതിയുടെ നവീകരണ പ്രവർത്തനങ്ങളുടെയും പുതിയ പമ്പ്സെറ്റിന്‍റെയും ഉദ്ഘാടനം ഫ്രാന്‍സിസ് ജോര്‍ജ് എംപി നിര്‍വഹിച്ചു. കുടിവെള്ള പദ്ധതി പ്രസിഡന്‍റ് ജോബിഷ് തേനാടികുളം അധ്യക്ഷത വഹിച്ചു. ഷീലാ ബാബു, ഗിരിജാ ജയന്‍, എന്‍. സുരേഷ്, ജോര്‍ജ് പുളിങ്കാട്, എം.ടി. സജി, കുഞ്ഞുമോന്‍ മാടപ്പാട്ട്, സജി കരിപ്പുകാട്ടില്‍, മേരി സണ്ണി കണ്ടകത്ത്, ബിജു പുലിയുറുമ്പില്‍, സോജാ രാജു, ഫ്രാന്‍സിസ് തോമസ് തേനാടികുളത്തില്‍, ഷാജി നെല്ലിക്കല്‍, അജി വട്ടക്കുന്നേല്‍, സിബി ചെല്ലപ്പന്‍ എന്നിവര്‍ പ്രസംഗിച്ചു. ടാങ്കിനും കുളത്തിനും സൗജന്യമായി സ്ഥലം നൽകിയ മേരി മാത്യു മൂലക്കുന്നേലിനെയും അലക്‌സ് പുലിയുറുമ്പിലിനെയും എംപി ആദരിച്ചു.

മാവടി പള്ളിയിൽ ‘സൗഹൃദം-2025’

മാവടി: മാവടി പള്ളിയുടെ സുവര്‍ണജൂബിലിയോടനുബന്ധിച്ച് ഇടവകയില്‍ സേവനമനുഷ്ഠിച്ച വികാരിമാര്‍, മദര്‍ സൂപ്പീരിയര്‍മാര്‍, കൈക്കാരന്മാര്‍, അക്കൗണ്ടന്‍റുമാര്‍, ദേവാലയശുശ്രൂഷികള്‍ തുടങ്ങിയവര്‍ക്ക് മാവടി ഇടവകയുടെ സ്‌നേഹാദരവ് സമ്മാനിച്ചു. ബിഷപ് മാര്‍ ജേക്കബ് മുരിക്കന്‍ ഉദ്ഘാടനം ചെയ്തു. തുടര്‍ന്ന് സമൂഹബലി അര്‍പ്പിക്കുകയും ചെയ്തു. വികാരി ഫാ. ജോര്‍ജ് അമ്പഴത്തിനാല്‍, ജൂബിലി കമ്മിറ്റി കണ്‍വീനര്‍ സന്തോഷ് ടോം അമ്പഴത്തിനാക്കുന്നേല്‍, ജൂബിലി കമ്മിറ്റി അംഗങ്ങള്‍, കൈക്കാരന്മാര്‍, സണ്‍ഡേ സ്‌കൂള്‍ അധ്യാപകര്‍, ഭക്തസംഘടനാ അംഗങ്ങള്‍ തുടങ്ങിയവര്‍ നേതൃത്വം നല്‍കി.

മെഡിസിറ്റിയില്‍ അന്താരാഷ്‌ട്ര ഇന്‍ഫെക്‌ഷന്‍ പ്രിവന്‍ഷന്‍ വീക്ക് ആചരണം

പാലാ: മാര്‍ സ്ലീവാ മെഡിസിറ്റിയില്‍ അന്താരാഷ്‌ട്ര ഇന്‍ഫെക്‌ഷന്‍ പ്രിവന്‍ഷന്‍ വീക്ക് ആചരണം തുടങ്ങി. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ ഉദ്ഘാടനം ചെയ്തു. മാര്‍ സ്ലീവാ മെഡിസിറ്റി ഏറ്റവും പ്രാധാന്യത്തോടെയാണ് അണുബാധ പ്രതിരോധം നടപ്പാക്കുന്നതെന്ന് അദ്ദേഹം പറഞ്ഞു. ചീഫ് ഓഫ് മെഡിക്കല്‍ സര്‍വീസസ് ഡോ. പൗളിന്‍ ബാബു, ആശുപത്രി മെഡിക്കല്‍ സൂപ്രണ്ട് ഡോ. പി.എന്‍. നിതീഷ്, ഇന്‍ഫെക്‌ഷന്‍ കണ്‍ട്രോള്‍ ഓഫീസര്‍ ഡോ. ജീന ജോര്‍ജ്, സൂപ്പര്‍വൈസര്‍ ബ്ലൂമെല്‍ ബെര്‍ക്കുമാന്‍സ് എന്നിവര്‍ പ്രസംഗിച്ചു. ബോധവത്കരണമായി ബന്ധപ്പെട്ട് മാര്‍ സ്ലീവാ കോളജ് ഓഫ് നഴ്‌സിംഗ് വിദ്യാര്‍ഥിനികളുടെ ഫ്‌ളാഷ് മോബ്, ക്വിസ് മത്സരം എന്നിവയും സംഘടിപ്പിച്ചു. ഒരാഴ്ച നീണ്ടുനില്‍ക്കുന്ന ബോധവത്കരണ പരിപാടികളാണ് ക്രമീകരിച്ചിട്ടുള്ളത്.

തിടനാട് ഫാമിലി ഹെൽത്ത് സെന്‍റർ ഉദ്ഘാടനം നാളെ

തിടനാട്: ഫാമിലി ഹെല്‍ത്ത് സെന്‍ററിന്‍റെ പുതിയ കെട്ടിടത്തിന്‍റെ ഉദ്ഘാടനം നാളെ രാവിലെ 11.30ന് മന്ത്രി വീണാ ജോര്‍ജ് നിര്‍വഹിക്കും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. ആന്‍റോ ആന്‍റണി എംപി, ജോസ് കെ. മാണി എംപി എന്നിവര്‍ പ്രസംഗിക്കും. തിടനാട് സെന്‍റ് ജോസഫ് പള്ളിക്ക് സമീപത്തെ പടിഞ്ഞാറെകുരിശ് ലിങ്ക് റോഡിലാണ് പുതിയ കെട്ടിടം പൂര്‍ത്തീകരിച്ചിട്ടുള്ളത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]