നിയമക്കുരുക്കുകള് നീങ്ങി; ബിനുരാജന്റെ മൃതദേഹവുമായി ഭാര്യ ശ്രീല നാട്ടിലേക്ക്
1600235
Friday, October 17, 2025 3:41 AM IST
അടൂർ: സാമ്പത്തിക, നിയമപരമായ പ്രതിസന്ധികള്ക്ക് ഒടുവില്, ഷാര്ജയില് അന്തരിച്ച പന്തളം സ്വദേശി ബിനു രാജന്റെ മൃതദേഹം ഇന്ന് രാത്രി നാട്ടിലേക്ക് കൊണ്ടുപോകും. യാത്രാവിലക്ക് കാരണം ദുരിതത്തിലായിരുന്ന ഭാര്യ ശ്രീലയും ഭര്ത്താവിന്റെ അന്ത്യയാത്രയില് അനുഗമിക്കും.
കഴിഞ്ഞ സെപ്റ്റംബർ 29നാണ് ഹൃദയാഘാതം മൂലം ബിനു രാജന് ഷാര്ജയിലെ താമസസ്ഥലത്ത് മരിച്ചത്. ഫോറന്സിക് നടപടികളിലെ കാലതാമസവും പിന്നാലെ റിയല് എസ്റ്റേറ്റ് കമ്പനി നല്കിയ കേസിനെ തുടര്ന്നുണ്ടായ യാത്രാ നിരോധനമാണ് മൃതദേഹം നാട്ടിലെത്തിക്കുന്നതിനും ശ്രീലയുടെ യാത്രയ്ക്കും തടസമായത്.
യാബ് ലീഗല് സര്വീസ് സിഇഒ സലാം പാപ്പിനിശേരിയുടെ ഇടപെടലിലൂടെ കോടതി നടപടികള് പൂര്ത്തിയാക്കി ശ്രീലയുടെ യാത്രാവിലക്ക് നീക്കുകയായിരുന്നു. ഇന്ന് രാത്രി എയര് ഇന്ത്യ വിമാനത്തില് മൃതദേഹം തിരുവനന്തപുരത്തേക്ക് കൊണ്ടുപോകും.
ജോലി നഷ്ടപ്പെട്ടതോടെ സാമ്പത്തികമായി തകര്ന്ന അവസ്ഥയിലായിരുന്നു പ്രിന്റിംഗ് പ്രസ് ഡിസൈനറായിരുന്ന ബിനു. ഷുഗര് രോഗം മൂലം കണ്ണിന്റെ കാഴ്ച നഷ്ടപ്പെട്ടത് അദ്ദേഹത്തെ മാനസികമായി തളര്ത്തിയിരുന്നു. ശ്രീലയുടെ വരുമാനത്തെ ആശ്രയിച്ചാണ് കുടുംബം മുന്നോട്ടുപോയത്. നാളെ പുലര്ച്ചെ നാട്ടിലെത്തുന്ന മൃതദേഹം വീട്ടുവളപ്പില് സംസ്കരിക്കും. മക്കളായ നന്ദിനിയും നിവേദും നാട്ടില് പഠിക്കുകയാണ്.