ADVERTISEMENT

ADVERTISEMENT

ജൈവ അധിനിവേശം: സംസ്ഥാനതല സെമിനാർ നേതാജി സ്കൂളിൽ

പത്തനംതിട്ട: കേരളത്തിലെ അധിനിവേശ ജീവിവർഗങ്ങളുടെ പാരിസ്ഥിതികവും സാമൂഹികവും സാമ്പത്തികവുമായ മാനങ്ങൾ എന്ന വിഷയത്തിൽ പ്രമാടം നേതാജി ഹയർസെക്കൻഡറി സ്കൂളിലെ ജൈവവൈവിധ്യ ക്ലബ്‌ ഏകദിന സെമിനാർ സംഘടിപ്പിച്ചു. സംസ്ഥാന ജൈവവൈവിധ്യ ബോർഡിന്‍റെ സഹായത്തോടെ സ്കൂളിലെ ഭൂമിത്രസേന ക്ലബിന്‍റെ സഹകരണത്തോടെ സംഘടിപ്പിച്ച സെമിനാർ പത്തനംതിട്ട കാതോലിക്കേറ്റ് കോളജ് മുൻ മേധാവി ഡോ. ആർ. സുനിൽകുമാർ ഉദ്ഘാടനം ചെയ്തു.

ചെങ്ങന്നൂർ ക്രിസ്ത്യൻ കോളജിലെ സുവോളജി വിഭാഗം അസോസിയേറ്റ് പ്രഫസർ ഡോ. ആർ. അഭിലാഷ്, മത്സ്യ ഗവേഷകനും പൗരശാസ്ത്രജ്ഞനുമായ ഡോ. സി.പി. ഷാജി, പത്തനംതിട്ട കാതോലിക്കേറ്റ് കോളജ് ബോട്ടണി വിഭാഗം അസിസ്റ്റന്‍റ് പ്രഫസർ ഡോ. വി.പി. തോമസ് എന്നിവർ പ്രബന്ധങ്ങൾ അവതരിപ്പിച്ചു.

സ്കൂൾ പ്രിൻസിപ്പൽ ബി. ആശ, സ്റ്റാഫ്‌ സെക്രട്ടറി കെ.ജെ. ഏബ്രഹാം, ഹെഡ്മിസ്ട്രസ് സി. ശ്രീലത, കൺവീനർ ടി.ആർ. ഗീതു എന്നിവർ പ്രസംഗിച്ചു.

ADVERTISEMENT

ദേ, കാട്ടാന ഇങ്ങെത്തി ...വടശേരിക്കര ടൗണിനടുത്തും വിളയാട്ടം; വ്യാപകമായി കൃഷി നശിപ്പിച്ചു

വടശേരിക്കര: കാടുവിട്ട് നാട്ടിലിറങ്ങിയ കാട്ടാനക്കൂട്ടം വടശേരിക്കര ടൗണിലേക്കും. വനാതിർത്തിയോടു ചേർന്ന പ്രദേശങ്ങളിൽ മുന്പ് നാശം വരുത്തിയിരുന്ന കാട്ടാനക്കൂട്ടം കഴിഞ്ഞ രാത്രി കല്ലാറിന്‍റെ തീരത്തുകൂടി വടശേരിക്കര വില്ലേജ് ഓഫീസും കടന്ന് ടൗണിനു 200 മീറ്റർ അകലെ വരെ എത്തി. കടന്നുവന്ന ഭാഗങ്ങളിലെല്ലാം വൻ തോതിൽ നാശം വരുത്തിയാണ് ഇവ എത്തിയത്. ഇതാദ്യമായാണ് കാട്ടാനകൾ ടൗണിനോടടുത്ത പ്രദേശങ്ങളിലെത്തുന്നത്. ഇടത്താവളം ഒരുക്കുന്നിടം മണ്ണാറക്കുളഞ്ഞി - പന്പ ശബരിമല പാതയിലെ പ്രധാന ടൗണാണ് വടശേരിക്കര. ചെറുകാവ് ക്ഷേത്രത്തിനു സമീപം തീർഥാടനകാലത്ത് താത്കാലിക പോലീസ് സ്റ്റേഷനും തീർഥാടകർക്ക് ഇടത്താവളവും കുളിക്കടവുകളും ഒക്കെ ഒരുക്കുന്ന ഭാഗത്താണ് കാട്ടാന എത്തിയിരിക്കുന്നത്. മുന്പ് ബൗണ്ടറി ഭാഗത്താണ് ഇവ ഏറെയും എത്തിയിരുന്നത്. കഴിഞ്ഞ വർഷം മുതൽ ബൗണ്ടറി കടന്ന് ഇവ ജനവാസ മേഖലകളിലേക്കു കയറിത്തുടങ്ങിയിരുന്നു. ഒളികല്ല് മേഖലയിൽ സ്ഥിരവാസമാക്കിയ കാട്ടാനകൾ ഇതുവഴി വടശേരിക്കര ഭാഗത്തേക്ക് എത്തുകയായിരുന്നു. ശബരിമല തീർഥാടനകാലം ആകുന്പോഴേക്കും തിരക്ക് വർധിക്കുമെന്നതിനാൽ ആനകളുടെ സാന്നിധ്യം ഏറെ ബുദ്ധിമുട്ടാകും. തിരക്കേറിയ പാതയിലേക്ക് ആന കയറുന്ന സാഹചര്യമുണ്ടായാൽ ഭീഷണി ഇരട്ടിയാകും. കൃഷി നശിപ്പിച്ചു കാട്ടാനകൾ വടശേരിക്കര ഭാഗത്തെ നിരവധി കൃഷിയിടങ്ങളിൽ നാശം വരുത്തി. ഏക്കർ കണക്കിനു സ്ഥലത്തെ വാഴ, മരച്ചീനി, തെങ്ങ് തുടങ്ങിയവ നശിപ്പിച്ചു. കുലച്ചതും കുലയ്ക്കാത്തതുമായ വാഴകളാണ് വ്യാപകമായി നശിപ്പിച്ചത്. കിഴങ്ങുവർഗങ്ങൾ അടക്കമുള്ള കൃഷിയും തെങ്ങ്, കമുക് തുടങ്ങിയവയും നശിപ്പിച്ചു. പേഴുംപാറ സ്വദേശി റെജി പാട്ടത്തിനെടുത്തു കൃഷി ചെയ്തിരുന്ന പരുവാനിക്കൽ കൃഷിയിടം ആന പൂർണമായി തകർത്തു. തുണ്ടിയിൽ പാപ്പച്ചന്‍റെ കൃഷിയിടത്തിലും നാശം വരുത്തി. സമീപത്തെ ഒരു വീടിന്‍റെ സിസിടിവി കാമറകൾക്കും കേടുപാടുകൾ വരുത്തി. രാത്രിയിൽ നാശം വിതച്ചെത്തിയ കാട്ടാന നേരം പുലർന്നിട്ടും കാടു കയറാതിരുന്നത് പ്രദേശത്തു ഭീതി പരത്തി. തുടർന്ന് വനപാലകർ ‌സ്ഥലത്തെത്തി പരിശോധന നടത്തിയെങ്കിലും ആനയെ കണ്ടെത്താനായില്ല. കാട്ടുമൃഗങ്ങളുടെ ശല്യം കാരണം ഏറെപ്പേരും കൃഷിയിടങ്ങൾ തരിശിട്ടിരിക്കുകയാണ്. കാടുകയറി കിടക്കുന്ന ഇത്തരം സ്ഥലങ്ങൾ കാടിറങ്ങുന്ന മൃഗങ്ങൾക്കു താവളമാകുകയുമാണ്. ഭീതിയോടെ യാത്ര ആനയുടെ ശല്യം കാരണം സന്ധ്യ മയങ്ങിയാൽ വടശേരക്കര നിവാസികൾ പുറത്തിറങ്ങാൻ മടിക്കുകയാണ്. പഞ്ചായത്ത് പ്രദേശത്തിലെ ഒട്ടുമിക്ക ഗ്രാമീണ വഴികളും രാത്രിയിൽ കാട്ടാനകളുടെ സ്ഥിര സാന്നിധ്യമുണ്ട്. തലച്ചിറ, കുന്പളത്താമൺ, ഒളികല്ല്, ബൗണ്ടറി മേഖലകളിൽ വൈകുന്നേരം ആറിനു ശേഷം യാത്ര തന്നെ അസാധ്യമാണ്. കാൽനടക്കാരും ഇരുചക്രവാഹന യാത്രികരും പലപ്പോഴും ആനകളുടെ മുന്നിൽനിന്നു തലനാരിഴയ്ക്കു രക്ഷപ്പെട്ട നിരവധി സംഭവങ്ങളുണ്ട്. ആന ഇറങ്ങുന്ന വിവരം ലഭിച്ചാൽ വനപാലകർ എത്തി പടക്കം പൊട്ടിച്ചും മറ്റും ഇവയെ തുരത്താൻ ശ്രമിക്കാറുണ്ടെങ്കിലും ഉദ്യോഗസ്ഥർ മടങ്ങുന്നതോടെ ആന തിരിച്ചെത്തുന്ന സ്ഥിതിയാണ്.

ജോലി വാഗ്ദാനം ചെയ്ത് ദുബായിലെത്തിച്ച യുവാക്കൾ കുടുങ്ങിയതായി പരാതി

പത്തനംതിട്ട: ദുബായിൽ ജോലി വാഗ്ദാനം ചെയ്ത് തട്ടിപ്പ് നടത്തിയതായി പരാതി. ദുബായിൽ കുടുങ്ങിക്കിടക്കുന്ന മൂന്ന് യുവാക്കളെ രക്ഷപ്പെടുത്തണമെന്ന ആവശ്യവുമായി രക്ഷിതാക്കൾ രംഗത്ത്. ചെന്നീർക്കര ചിറക്കേരോട്ട് ബിന്ദുകുമാറിന്‍റെ മകൻ വിപിൻകുമാർ, ചെന്നീർക്കര കല്ലുങ്കൽ റാണിയുടെ മകൻ മനീഷ്, ഓച്ചിറ ആലുംപീടിക കോയിക്കത്തറ കിഴക്കേതിൽ സാജി ലക്ഷമിയുടെ മകൻ ആദിത് വിജയ് എന്നിവരാണ് തട്ടിപ്പിന് ഇരയായത്. ഇവർ ദുബായിൽ എത്തിയശേഷം ജോലി ഇല്ലാതെ പുറത്തിറങ്ങാൻ കഴിയാതെ ഇപ്പോൾ കുടുങ്ങിക്കിടക്കുകയാണ്. ദുബായിൽ ഡെലിവറി ബോയി ആയി ജോലി നൽകാമെന്ന് പറഞ്ഞു വിശ്വസിപ്പിച്ച് തിരുവനന്തപുരം കടുവാപ്പള്ളി കല്ലമ്പലം സ്വദേശിയായ മുഹമ്മദ് യാസർ എന്നയാൾ 1,30,000 രൂപ വീതം ബിന്ദുകുമാർ, റാണി എന്നിവരിൽനിന്നും 1,20,000 രൂപ സാജി ലക്ഷമിയുടെ പക്കൽനിന്നും വാങ്ങുകയുണ്ടായി . ബിന്ദുവിന്‍റെ വീടിന് അടുത്തുള്ള ചെന്നീർക്കര ചരിവുകാലായിൽ സ്മിതയാണ് ഏജന്‍റായിനിന്ന് പണം വാങ്ങി മുഹമ്മദ് യാസറിന് നൽകിയത്. എന്നാൽ വിസിറ്റിംഗ് വീസയിൽദുബായിൽ എത്തിച്ച ശേഷം ജോലി തരപ്പെടുത്തിക്കൊടുക്കാതെ കബളിപ്പിച്ചുവെന്നാണ് പരാതി. സ്മിതയുടെ ഫോൺ ഗൂഗിൾപേ നമ്പരിലേക്കാണ് മൂവരും പണം അയച്ചുനൽകിയത് . മേയ് 15ന് വിവിൻകുമാറിനെയും ആദിത്യയേയും ദുബായിലേക്ക് കൊണ്ടുപോയി. മനീഷ് ജൂൺ 18നും പോയി. മനീഷ് ദയറാ എന്ന സ്ഥലത്തും വിവിൻകുമാറും ആദിത്യയും അജ്‌മാൻ എന്ന സ്ഥലത്തുമാണ്. ഇതുവരെയും ആർക്കും ജോലി ആയിട്ടില്ല. ജോലിയുടെ കാര്യം സ്മിതയോടു ചോദിച്ചപ്പോൾ കൃത്യമായ മറുപടി ലഭിച്ചില്ല. ഇവരും ഇപ്പോൾ ഒളിവിലാണ് . യാസറിനെ വിളിച്ചാൽ ഫോൺ എടുക്കുന്നില്ല. മൂന്നു യുവാക്കളും അവിടെ വാടകമുറിയിൽ കഴിയുകയാണ്. ഭക്ഷണംപോലുമില്ലാതെ വിഷമിക്കുകയാണ് അവർ. മൂന്നു പേരുടെയും വീസയും മുഹമ്മദ് യാസറിന്‍റെ കസ്റ്റഡിയിലാണെന്ന് രക്ഷിതാക്കൾ കുറ്റപ്പെടുത്തി. വീസ കാലാവധിയും കഴിഞ്ഞു . ഇതോടെ മൂന്നുപേർക്കും പുറത്തിറങ്ങാനും കഴിയുന്നില്ല. രണ്ടു ലക്ഷം രൂപ വീതം നൽകിയാൽ നാട്ടിൽവിടാമെന്നാണ് മുഹമ്മദ് യാസർ ഇപ്പോൾപറയുന്നത്. കൂടാതെ ഇയാളുടെ ഭീഷണിയുമുണ്ട്. മക്കളെ എത്രയുംവേഗം നാട്ടിൽ എത്തിക്കുന്നതിനും നഷ്ടപ്പെട്ട പണം തിരികെ ലഭിക്കാനുമായി ജില്ലാ പോലീസ് മേധാവി, ഇലവുംതിട്ട പോലീസ് എന്നിവർക്ക് പരാതി നൽകിയിട്ടുണ്ടെന്ന് ബിന്ദുകുമാർ, റാണി, സാജി ലക്ഷ്മി എന്നിവർ പത്രസമ്മേളനത്തിൽ പറഞ്ഞു. നോർക്ക അധികൃതർക്കും ആന്‍റോ ആന്‍റണി എംപിക്കും ഇവർ പരാതി നൽകിയിരുന്നു.

മെഡിക്കൽ ക്യാമ്പ് സംഘടിപ്പിച്ചു

പത്തനംതിട്ട: ജില്ലാ കുടുംബശ്രീ മിഷന്‍റെ നേതൃത്വത്തിൽ സമുന്നതി മൈക്രോപ്ലാനിന്‍റെ ഭാഗമായി മെഴുവേലി ഗ്രാമപഞ്ചായത്തിൽ സൗജന്യ മെഡിക്കൽ ക്യാമ്പ് സംഘടിപ്പിച്ചു. ഗ്രാമപഞ്ചായത്ത് പ്രസിഡന്‍റ് പിങ്കി ശ്രീധർ ഉദ്ഘാടനം ചെയ്തു. സിഡിഎസ് ചെയർപേഴ്സൺ രാജി ദാമോദരൻ അധ്യക്ഷത വഹിച്ചു. ചന്ദനക്കുന്ന് എസ്എംഎസ് യുപി സ്കൂളിൽ സംഘടിപ്പിച്ച മെഡിക്കൽ ക്യാമ്പിൽ നൂറോളം പേർ പങ്കെടുത്തു. കുടുംബശ്രീ ജില്ലാ മിഷൻ കോഓർഡിനേറ്റർ എസ്. ആദില, മുൻ എംഎൽഎ കെ.സി. രാജഗോപാൽ, ഗ്രാമപഞ്ചായത്ത് അംഗം വി. വിനോദ്, കുടുംബശ്രീ ജെൻഡർ പ്രോഗ്രാം മാനേജർ പി.ആർ. അനൂപ, സ്നേഹിതാ സർവീസ് പ്രൊവൈഡർ സവിത, സിഡിഎസ് മെംബർ സുശീല ബാബു എന്നിവർ പ്രസംഗിച്ചു.

അമ്മയ്ക്കും സഹോദരനും നേരേ തോക്ക് ചൂണ്ടി ഭീഷണി; മകൻ അറസ്റ്റിൽ

അടൂർ: വീടും സ്ഥലവും എഴുതി നൽകണമെന്നാവശ്യപ്പെട്ട് അമ്മയേയും ഇളയ സഹോദരനേയും തോക്കു ചൂണ്ടി ഭീഷണിപ്പെടുത്തിയ സംഭവത്തിൽ രണ്ടാമത്തെ മകൻ അറസ്റ്റിൽ. അടൂർ ആനയടി ചെറുകുന്നം ലിസി ഭവനത്തിൽ ജോറി വർഗീസ് (കൊച്ചുമോൻ-46) നെയാണ് അടൂർ പോലീസ് അറസ്റ്റ് ചെയ്തത്. ഇയാളുടെ പക്കൽ നിന്നും ഒരു നാടൻ തോക്കും ഒരു എയർഗണ്ണും പിടികൂടി. തോക്കിന് ലൈസൻസില്ലെന്നാണ് പോലീസ് പറയുന്നത്. ജോറി വർഗീസിന്‍റെ അമ്മ ലിസി (65)യുടെ പരാതിയിലാണ് അറസ്റ്റ്. മൂന്ന് മക്കളാണ് ലിസിക്കുള്ളത്. ഇതിൽ രണ്ടാമത്തെ മകനാണ് ജോറി വർഗീസ്. ഒക്ടോബർ 12നു പുലർച്ചെയാണ് സംഭവം. ഇടുക്കിയിൽ താമസിക്കുന്ന ജോറി വർഗീസ് ചെറുകുന്നത്തെ വീട്ടിൽ എത്തി ഇളയ സഹോദരൻ ഐറിന് നേരെയാണ് ആദ്യം തോക്ക് ചൂണ്ടിയത്. ഇതോടെ ഐറിൻ പുറത്തേക്ക് ഓടി രക്ഷപ്പെട്ടു. തുടർന്ന് അമ്മ ലിസിക്കു നേരെയും തോക്കു ചൂണ്ടി. വീടും സ്ഥലവും ഇപ്പോൾ എഴുതി തരണമെന്നായിരുന്നു ജോറി വർഗീസിന്‍റെ ആവശ്യമെന്ന് ലിസി പോലീസിനു നൽകിയ മൊഴിയിൽ പറയുന്നു.

ബനഡിക്ട് മാര്‍ ഗ്രിഗോറിയോസ് അനുസ്മരണം

പത്തനംതിട്ട: മലങ്കര കാത്തലിക് അസോസിയേഷന്‍ പത്തനംതിട്ട ഭദ്രാസന സമിതിയുടെ നേതൃത്വത്തില്‍ ആര്‍ച്ച്ബിഷപ് ബനഡിക്ട് മാര്‍ ഗ്രീഗോറിയോസ് അനുസ്മരണം വി. കോട്ടയം മലങ്കര കത്തോലിക്ക പള്ളിയില്‍ നടത്തി. കോന്നി വൈദിക ജില്ല വികാരി ഫാ. വര്‍ഗീസ് കൈതോണ്‍ സമ്മേളനം ഉദ്ഘാടനം ചെയ്തു. ഭദ്രാസന പ്രസിഡന്‍റ് ജോസ് മാത്യു അധ്യക്ഷത വഹിച്ച യോഗത്തില്‍ ഭദ്രാസന ആത്മീയ ഉപദേഷ്ടാവ് ഫാ. ഏബ്രഹാം മണ്ണില്‍ അനുസ്മരണ പ്രഭാഷണം നടത്തി. ഇടവക വികാരി ഫാ. തോമസ് ചെറുതോട്, ഭദ്രാസന ജനറല്‍ സെക്രട്ടറി എം.എം. തോമസ്, സഭാതല സെക്രട്ടറി ബെറ്റ്‌സി വര്‍ഗീസ്, സജി പീടികയിൽ, വില്‍സന്‍ പട്ടേരിൽ, സിസ്റ്റര്‍ അന്‍സെറ്റ്, വില്‍സന്‍ പാലവിള, ജോണ്‍സണ്‍ ജോസഫ്, അനിത ബിജു, ആശ ഷാജി, എം.എ. രാജന്‍ എന്നിവര്‍ പ്രസംഗിച്ചു.

മാർ തെയോഫിലോസ് ട്രോഫി ബാസ്കറ്റ്ബോൾ: പുഷ്പഗിരി മെഡിക്കൽ കോളജ് ഫൈനലിൽ

തിരുവല്ല: പുഷ്പഗിരി ഫ്ലഡ് ലിറ്റ് ബാസ്കറ്റ്ബോൾ സ്റ്റേഡിയത്തിൽ നടന്ന പതിനാറാമത് മാർ തെയോഫിലോസ് ട്രോഫി ഇന്‍റർ മെഡിക്കോസ് ബാസ്കറ്റ്ബോൾ ടൂർണമെന്‍റിന്‍റെ ഫൈനലിൽ പുഷ്പഗിരി മെഡിക്കൽ കോളജ് പുരുഷന്മാരുടെ വിഭാഗത്തിലും കെഎംസിടി മെഡിക്കൽ കോളജ് കോഴിക്കോട് വനിതകളുടെ ഫൈനലിലും പ്രവേശിച്ചു. പുരുഷ വിഭാഗം സെമിഫൈനലിൽ തിരുവല്ല പുഷ്പഗിരി മെഡിക്കൽ കോളജ് , അമൃത മെഡിക്കൽ കോളജിനെ (38-20) പരാജയപ്പെടുത്തിയപ്പോൾ, വനിതാ വിഭാഗം സെമിഫൈനലിൽ കോഴിക്കോട് കെഎംസിടി മെഡിക്കൽ കോളജ്, കോട്ടയം മെഡിക്കൽ കോളജിനെയും (24-21) പരാജയപ്പെടുത്തി.

മല്ലപ്പള്ളി, കോന്നി ബ്ലോക്ക് നറുക്കെടുത്തു

പത്തനംതിട്ട ജില്ലയിലെ മല്ലപ്പള്ളി, കോന്നി ബ്ലോക്കുകളില്‍ ഉള്‍പ്പെട്ട ഗ്രാമപഞ്ചായത്തുകളിലെ സംവരണ വാര്‍ഡുകളുടെ നറുക്കെടുപ്പ് ഇന്നലെ പൂർത്തീകരിച്ചു. കളക്ടറേറ്റ് കോണ്‍ഫറന്‍സ് ഹാളില്‍ രാഷ്‌ട്രീയ പാര്‍ട്ടി പ്രതിനിധികളുടെ സാന്നിധ്യത്തില്‍ ജില്ലാ കളക്ടര്‍ എസ്. പ്രേം കൃഷ്ണന്‍ സംവരണ വാര്‍ഡുകള്‍ നറുക്കെടുത്തു. ഭരണസമിതിയുടെ മൊത്തം അംഗ സംഖ്യയുടെ പകുതി വാർഡുകൾ വനിതാ സംവരണമാണ്. മിക്ക പഞ്ചായത്തുകളിലും ഇതിൽ ഒരെണ്ണം പട്ടികജാതി വനിതയ്ക്കും മാറ്റിവച്ചു. കൂടാതെ കുറഞ്ഞത് ഒരു വാർഡെങ്കിലും എല്ലാ തദ്ദേശ സ്ഥാപനങ്ങളിലും പട്ടികജാതി ജനറൽ സംവരണത്തിലുമുണ്ട്. നറുക്കെടുപ്പിനു തെരഞ്ഞെടുപ്പ് ഡെപ്യൂട്ടി കളക്ടര്‍ ബീന എസ്.ഹനീഫ്, സീനിയര്‍ സൂപ്രണ്ട് കെ.എസ് സിറോഷ് എന്നിവര്‍ നേതൃത്വം നല്‍കി. അയിരൂർ, ഇരവിപേരൂര്‍, കോയിപ്രം, തോട്ടപ്പുഴേശരി, എഴുമറ്റൂർ, പുറമറ്റം, കടപ്ര, കുറ്റൂർ, നിരണം, നെടുമ്പ്രം, പെരിങ്ങര, റാന്നി - പഴവങ്ങാടി, റാന്നി, റാന്നി - അങ്ങാടി, റാന്നി - പെരുനാട്, വടേശരിക്കര, ചിറ്റാര്‍, സീതത്തോട്, നാറാണംമൂഴി, വെച്ചൂച്ചിറ എന്നീ ഗ്രാമപഞ്ചായത്തുകളിലെ സംവരണ വാര്‍ഡുകളുടെ നറുക്കെടുപ്പ് ഇന്നു നടക്കും. നറുക്കെടുപ്പിലൂടെ നിശ്ചയിച്ച സംവരണ വാർഡുകൾ: ആനിക്കാട് ഗ്രാമപഞ്ചായത്ത് - സ്ത്രീ സംവരണ വാര്‍ഡുകൾ: വാർഡ് 2- വള്ളിയാകുളം, 5 -ചക്കാട്ടുപടി, 8 - വായ്പൂര്, 9 - വടക്കേമുറി, 10 -പുല്ലുകുത്തി, 12 - പൂവൻപാ റ. പട്ടികജാതി സ്ത്രീ സംവരണം: 14 - മാരിക്കല്‍. പട്ടികജാതി സംവരണം: വാർഡ്1 - നല്ലൂര്‍പ്പടവ്. കവിയൂർ: സ്ത്രീ സംവരണ വാര്‍ഡുകൾ: വാർഡ് 1 - ഐക്കുഴി, 4 - നാഴിപ്പാറ, 6 - മത്തിമല, 9 - തോട്ടഭാഗം, 10- മനയ്ക്കച്ചിറ, 14 - ഇലവിനാൽ. പട്ടികജാതി സ്ത്രീ സംവരണം: 8 - ഞാല്‍ഭാഗം പട്ടികജാതി സംവരണം: 13- മാകാട്ടിക്കവല. കൊറ്റനാട്: സ്ത്രീ സംവരണ വാര്‍ഡുകൾ: 2 - പെരുമ്പെട്ടി, 3 - ചുട്ടുമണ്‍, 7 - വൃന്ദാവനം, 9 - തീയാടിക്കൽ, 10 -വെള്ളയില്‍, 14 - പുള്ളോലി. പട്ടികജാതി സ്ത്രീ സംവരണം: 12 - ചാന്തോലിൽ, പട്ടികജാതി സംവരണം: 1 - അത്യാൽ. കല്ലൂപ്പാറ: സ്ത്രീ സംവരണ വാര്‍ഡുകൾ: 2 - കാഞ്ഞിരത്തിങ്കൽ, 4 - തുണ്ടിയാംകുളം, 5 - തുരുത്തിക്കാട്, 8 -മഠത്തുംഭാഗം നോര്‍ത്ത്, 9 - ചെറുമത, 13 - ശാസ്താങ്കൽ. പട്ടികജാതി സ്ത്രീ സംവരണം: 14-പുതുശേരി. പട്ടികജാതി സംവരണം: 6-കുംമല. കോട്ടാങ്ങൽ: സ്ത്രീ സംവരണ വാര്‍ഡുകൾ: 3 - വായ്പൂർ, 4 - കുളത്തൂർ, 10 - കേരളപുരം, 11 - കുമ്പിളുവേലി, 12 -കണ്ണങ്കര, 13 - ഊട്ടുകുളം, 14 - പെരുമ്പാറ. പട്ടികജാതി സംവരണം: 2 - ശാസ്താംകോയിക്കല്‍ കുന്നന്താനം: സ്ത്രീ സംവരണ വാര്‍ഡുകള്‍: 1 - വള്ളിക്കാട്, 2 - വള്ളോക്കുന്ന്, 6- പുളിന്താനം, 7 - ചെങ്ങരൂര്‍ചിറ, 9 -മുണ്ടയ്ക്കാമണ്‍, 11 - പാലക്കുഴി, 13 - ആഞ്ഞിലിത്താനം. പട്ടികജാതി സ്ത്രീ സംവരണം: 10-കുന്നന്താനം. പട്ടികജാതി സംവരണം: 3-പാലയ്ക്കാത്തകിടി. മല്ലപ്പള്ളി: സ്ത്രീ സംവരണ വാര്‍ഡുകൾ: 1 - മങ്കുഴി, 4 - മുട്ടത്തുമണ്‍, 5 - മുരണി, 6- പരയ്ക്കത്താനം, 8 -കീഴ്‌വായ്പൂര് സൗത്ത്, 12 -പരിയാരം, 13 - മല്ലപ്പള്ളി ടൗണ്‍ വെസ്റ്റ്, 14 - മല്ലപ്പള്ളി വെസ്റ്റ്, പട്ടികജാതി സംവരണം: 02-മഞ്ഞത്താനം കോന്നി: സ്ത്രീ സംവരണ വാര്‍ഡുകൾ: 1 - ആഞ്ഞിലിക്കുന്ന്, 2 -കിഴക്കുപുറം, 5 - തേക്കുമല, 11 - മുരിങ്ങമംഗലം, 12 - മങ്ങാരം, 13 - എലിയറയ്ക്കൽ, 16 - വട്ടക്കാവ്, 18 - സിവില്‍ സ്റ്റേഷൻ. പട്ടികജാതി സ്ത്രീ സംവരണം: 6 - കൊന്നപ്പാറ വെസ്റ്റ്, 17 - കോന്നി ടൗൺ. പട്ടികജാതി സംവരണം: 3- ചെങ്ങറ. അരുവാപ്പുലം: സ്ത്രീസംവരണ വാര്‍ഡുകള്‍: 1 - മെഡിക്കല്‍ കോളജ്, 3- കൊക്കാത്തോട്, 9 - മ്ലാന്തടം, 10 - പടപ്പയ്ക്കൽ , 13 - അരുവാപ്പുലം, 14 - മാവനാൽ, 15 - ഐരവൺ. പട്ടികജാതി സ്ത്രീ സംവരണം: 4 - നെല്ലിക്കാപ്പാറ പട്ടികജാതി സംവരണം: 6-കല്ലേലി. പ്രമാടം: സ്ത്രീ സംവരണ വാര്‍ഡുകൾ: 1 - മറൂര്, 2 - വലഞ്ചുഴി, 5 - വെട്ടൂര്‍, 6- ഇളകൊള്ളൂർ, 10 - പൂവന്‍പാറ, 13-വകയാർ, 14- എഴുമണ്‍, 17 - നെടുമ്പാറ, 19 - പൂങ്കാവ്, പട്ടികജാതി സ്ത്രീ സംവരണം: 15 - അന്തിച്ചന്ത പട്ടികജാതി സംവരണം: 11 - ഇളപ്പുപാറ. മൈലപ്ര: സ്ത്രീ സംവരണ വാര്‍ഡുകൾ: 3 - കോട്ടമല, 4- മണ്ണാറക്കുളഞ്ഞി, 8 - മൈലപ്ര സെന്‍ട്രൽ, 10 - ഐറ്റിസി വാര്‍ഡ്, 11 - ശാന്തിനഗർ, 12 - മൈലപ്ര സ്‌കൂള്‍ വാര്‍ഡ്. പട്ടികജാതി സ്ത്രീ സംവരണം: 5- പിഎച്ച്സി വാര്‍ഡ് പട്ടികജാതി സംവരണം: 1 -പേഴുംകാട്. വള്ളിക്കോട് സ്ത്രീ സംവരണ വാര്‍ഡുകള്‍ : 4 - മായാലിൽ, 5 - വള്ളിക്കോട്, 9 - ഞക്കുനിലം, 12 - മൂന്നാംകലുങ്ക്, 15 -വയലാവടക്ക്, 16- നരിയാപുരം കിഴക്ക്. പട്ടികജാതി സ്ത്രീ സംവരണം: 11 - വെള്ളപ്പാറ, 13 - കുടമുക്ക് പട്ടികജാതി സംവരണം: 1 - നരിയാപുരം. തണ്ണിത്തോട്: സ്ത്രീ സംവരണ വാര്‍ഡുകൾ: 2 - വികെ പാറ, 5 - തൂമ്പാക്കുളം, 6- തേക്കുതോട് സെന്‍ട്രൽ, 7 -ഏഴാംന്തല, 10 - അള്ളുങ്കൽ, 12 - എലിമുള്ളുംപ്ലാക്കൽ, 13 - തണ്ണിത്തോട് മൂഴി പട്ടികജാതി സംവരണം: 3 - മേടപ്പാറ.

ലഹരി മാഫിയ ബന്ധം: ഡാന്‍സാഫ് ടീമംഗമായ പോലീസുകാരനെ സസ്‌പെന്‍ഡ് ചെയ്തു

റാന്നി: ലഹരി മാഫിയയുമായി വഴിവിട്ട ബന്ധം പുലര്‍ത്തിയെന്ന റിപ്പോര്‍ട്ടിന്‍റെ അടിസ്ഥാനത്തില്‍ സിവില്‍ പോലീസ് ഓഫീസറെ ജില്ലാ പോലീസ് മേധാവി സസ്‌പെന്‍ഡ് ചെയ്തു. റാന്നി സബ്ഡിവിഷനില്‍ ഡാന്‍സാഫ് ടീമംഗമായി പ്രവര്‍ത്തിച്ചിരുന്ന റാന്നി സ്‌റ്റേഷനിലെ പോലീസുകാരന്‍ പത്തനംതിട്ട വലഞ്ചുഴി സ്വദേശി മുബാറക്കിനെയാണ് ജില്ലാ പോലീസ് മേധാവി ആർ. ആനന്ദ് സസ്‌പെന്‍ഡ് ചെയ്തത്. നാര്‍ക്കോട്ടിക് സെല്‍ ഡിവൈഎസ്പി ബി. അനിലിന്‍റെ റിപ്പോര്‍ട്ടിന്‍റെ അടിസ്ഥാനത്തിലാണ് സസ്‌പെന്‍ഷന്‍. മുബാറക്കിന് ലഹരി മാഫിയയുമായുള്ള ബന്ധം കണ്ടെത്തിയത് ജില്ലാ പോലീസ് മേധാവിയുടെ ഡാന്‍സാഫ് ടീമാണ്. ഇതിന്‍റെ മേല്‍നോട്ട ചുമതല നാര്‍ക്കോട്ടിക് സെല്‍ ഡിവൈഎസ്പിക്കാണ്. രഹസ്യവിവരത്തിന്‍റെ അടിസ്ഥാനത്തില്‍ ഡിവൈഎസ്പി മുബാറക്കിനെ സബ്ഡിവിഷന്‍ ഡാന്‍സാഫ് ടീമില്‍ നിന്ന് മാറ്റാന്‍ തീരുമാനിച്ചതിനേ തുടർന്നുള്ള അന്വേഷണത്തിലാണ് പോലീസുകാരന്‍റെ മാഫിയാ ബന്ധം പുറത്തുവന്നത്. മുബാറക്കിന്‍റെ ലഹരി മാഫിയ ബന്ധത്തിന് ഡിജിറ്റല്‍ തെളിവുകള്‍ അടക്കം ജില്ലാ പോലീസ് മേധാവിക്കു ലഭിച്ചിട്ടുണ്ട്. ഏറ്റവും ഒടുവിലായി വിവാഹ പാര്‍ട്ടിക്ക് വേണ്ടി എംഡിഎംഎ ആവശ്യപ്പെടുന്നതിന്‍റെ തെളിവുകളും ലഭിച്ചുവെന്നാണ് സൂചന. ഡാന്‍സാഫ് ടീം അഗം എന്ന നിലയ്ക്കാണ് മുബാറക് ലഹരി സംഘങ്ങളുമായി അടുപ്പം സ്ഥാപിച്ചത്. വിവരശേഖരണത്തിനായി സ്ഥാപിച്ചിരുന്ന ബന്ധം മുബാറക്ക് ദുർവിനിയോഗം ചെയ്തുവെന്നാണ് കണ്ടെത്തൽ. ഇയാളുടെ ഫോണ്‍ രേഖകളും മറ്റും പരിശോധിച്ചപ്പോള്‍ ലഹരി മാഫിയ ബന്ധത്തിനുള്ള തെളിവുകള്‍ ലഭിച്ചിട്ടുണ്ട്. സാമ്പത്തിക നേട്ടമുണ്ടാക്കിയതായും റിപ്പോർട്ടുണ്ട്. ഇയാള്‍ക്കെതിരേ കര്‍ശനമായ തുടര്‍ നടപടിയുണ്ടായേക്കും.

കേരളം ഭരിക്കുന്നത് തിരുട്ടുസംഘം: പുതുശേരി

ചാലാപ്പള്ളി : കേരളത്തിൽ തിരുട്ട് സംഘമാണ് ഭരണം നടത്തുന്നതെന്നും അതിന്‍റെ ഒടുവിലത്തെ ഉദാഹരണമാണ് അമ്പരപ്പിക്കുന്ന തരത്തിലുള്ള ശബരിമലയിലെ സ്വർണ മോഷണമെന്നും കേരള കോൺഗ്രസ് വൈസ് ചെയർമാൻ ജോസഫ് എം. പുതുശേരി. കോൺഗ്രസ് കൊറ്റനാട് മണ്ഡലം കമ്മിറ്റി ചാലാപ്പള്ളിയിൽ നടത്തിയ പ്രതിഷേധ പ്രകടനവും പ്രതിഷേധ കൂട്ടായ്മയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ശബരിമലയിലെ കൊള്ള മറച്ചു പിടിക്കാനാണ് ഷാഫി പറമ്പിൽ എംപിക്കു നേരേ നടന്ന പോലീസ് അതിക്രമമെന്ന് പുതുശേരി പറഞ്ഞു. കോൺഗ്രസ് മണ്ഡലം പ്രസിഡന്‍റ് ആശീഷ് പാലയ്ക്കാമണ്ണിൽ അധ്യക്ഷത വഹിച്ചു. എഴുമറ്റൂർ ബ്ലോക്ക് കോൺഗ്രസ് കമ്മിറ്റിയുടെ പ്രസിഡന്‍റ് പി.കെ. മോഹൻരാജ് മുഖ്യ സന്ദേശം നൽകി. ഗ്രാമപഞ്ചായത്ത് അംഗം ബിന്ദു സജി, എൻ. സുഗതൻ, ഷിബു കൂടത്തിനലിൽ, ജി. ഉണ്ണികൃഷ്ണൻ നായർ, ബാബു കൂടത്തിനാലിൽ സജി പള്ളിയാങ്കൽ, ജോബിൻ കോട്ടയിൽ, എം. സി. റോയ്, ശ്യം കൃഷ്ണൻ, പ്രമോദ് ചാലാപ്പള്ളി, ശ്രീവിദ്യ രാജേഷ്, സനോജ് കൊറ്റനാട് എന്നിവർ പ്രസംഗിച്ചു.

ദേവസ്വം അസിസ്റ്റന്‍റ് കമ്മീഷണർ ഓഫീസ് പടിക്കൽ ധർണ നടത്തി

തിരുവല്ല: ഇടതു മുന്നണി അധികാരത്തിൽ വന്നശേഷം ശബരിമലയുടെ വിശുദ്ധിയും, പരിപാവനതയും കളങ്കപ്പെടുത്തുന്ന സംഭവങ്ങൾ ആവർത്തിക്കുകയാണെന്ന് യുഡിഎഫ്‌ ജില്ലാ ചെയർമാൻ വർഗീസ് മാമ്മൻ. യുഡിഎഫ് തിരുവല്ല മണ്ഡലം കമ്മിറ്റിയുടെ ആഭിമുഖ്യത്തിൽ തിരുവല്ല ദേവസ്വം അസിസ്റ്റന്‍റ് കമ്മീഷണർ ഓഫീസിനു മുമ്പിൽ നടത്തിയ ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നിയോജക മണ്ഡലം കൺവീനർ ലാൽ നന്ദാവനം അധ്യക്ഷത വഹിച്ചു. അയ്യപ്പസേവാസംഘം ദേശീയ ജനറൽ സെക്രട്ടറി ഡി.വിജയകുമാർ മുഖ്യ പ്രഭാഷണം നടത്തി. കോൺഗ്രസ് ബ്ലോക്ക് പ്രസിഡന്‍റ് ഈപ്പൻ കുര്യൻ, യുഡിഎഫ് മണ്ഡലം ചെയർമാൻ ഷിബു പുതുക്കേരിൽ, മുസ് ലിം ലീഗ് നിയോജക മണ്ഡലം പ്രസിഡന്‍റ് പി.എം. അനീർ, ആർഎസ്പി നിയോജക മണ്ഡലം സെക്രട്ടറി മധുസൂദനൻ പിള്ള, മുൻ നഗരസഭ അധ്യക്ഷരായ ആർ.ജയകുമാർ, കെ.വി.വർഗീസ്, യുഡിഎഫ് നേതാക്കളായ എ.ജി. ജയദേവൻ, സണ്ണി മനയ്ക്കൽ, കോൺഗ്രസ് മണ്ഡലം പ്രസിഡന്‍റുമാരായ ശ്രീജിത്ത് മുത്തൂർ, സജി എം. മാത്യു, നെബു കോട്ടയ്ക്കൽ, കെ.പി. രഘുകുമാർ, സോമൻ കല്ലേലിൽ, ബിനു വി. ഈപ്പൻ, രാജേഷ് മലയിൽ, റെജി മണലിൽ, ശാന്തകുമാരി, ജയ്സൺ പടിയറ, പി.ജി.രംഗനാഥൻ, ജോസ് പഴയിടം, ഫിലിപ്പ് ജോർജ് തുടങ്ങിയവർ പ്രസംഗിച്ചു.

സ്വർണപ്പാളി വിഷയത്തിൽ യഥാർഥ പ്രതികൾ സിപിഎം നേതാക്കളെന്ന് ഡിസിസി പ്രസിഡന്‍റ്

പത്തനംതിട്ട: ശബരിമലയില്‍ 2019 മുതല്‍ നടന്നുവെന്ന് പറയുന്ന സ്വർണം പൂശലും സ്വര്‍ണപ്പാളികള്‍ പുറത്തുകൊണ്ടുപോയതിലും ദ്വാരപാലക ശില്പങ്ങൾ മറിച്ചുവിറ്റതിലും യഥാർഥ പ്രതികള്‍ സിപിഎം നേതാക്കളാണെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. പന്തളത്ത് എട്ടിന് നടക്കുന്ന യുഡിഎഫ് വിശ്വാസ സംരക്ഷണ സംഗമത്തിന്‍റെ ഭാഗമായുള്ള ജില്ലാ നേതൃസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യുഡിഎഫ് ജില്ലാ ചെയര്‍മാന്‍ വര്‍ഗീസ് മാമ്മന്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറി പഴകുളം മധു, യുഡിഎഫ് ജില്ലാ കണ്‍വീനര്‍ എ. ഷംസുദ്ദീന്‍, മുന്‍ മന്ത്രി പന്തളം സുധാകരൻ, ജോസഫ് എം. പുതുശേരി, പ്രഫ. ഡി.കെ. ജോണ്‍, കെ.ഇ. അബ്ദുള്‍റഹ്മാൻ, അനീഷ് വരിക്കണ്ണാമല, ജോര്‍ജ് വര്‍ഗീസ്, കുഞ്ഞുകോശിപോൾ, സമദ് മേപ്രത്ത്, ജോര്‍ജ് കുന്നപ്പുഴ, തോപ്പില്‍ ഗോപകുമാർ, റ്റി.എം. ഹമീദ്, ജോണ്‍സണ്‍ വിളവിനാൽ, പഴകുളം ശിവദാസന്‍, റോബിന്‍ പീറ്റര്‍, രാജീവ് താമരപ്പള്ളി, സക്കറിയാ വര്‍ഗ്ഗീസ്, ജോണ്‍ സാമുവല്‍ എന്നിര്‍ പ്രസംഗിച്ചു.

പരിക്കേറ്റ യുവാവ് മരിച്ചു

പന്തളം: മിനി ടെമ്പോ ഇടിച്ച് പരിക്കേറ്റ് ചികിത്സയിലായിരുന്ന യുവാവ് മരിച്ചു.കുളനട ,നെട്ടൂർ ശിവ നന്ദനത്തിൽ രമേശ് (46 )ആണ് മരിച്ചത്. കഴിഞ്ഞ വെള്ളിയാഴ്ച രാത്രി 8:30ന് കുളനട - പത്തനംതിട്ട റോഡിൽ കുളനട ദേവീക്ഷേത്രം റോഡിലൂടെ നടക്കുമ്പോൾ മിനി ടെമ്പോ ഇടിക്കുകയായിരുന്നു. ഗുരുതര പരുക്കളുടെ കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ തിങ്കളാഴ്ച രാവിലെയാണ് മരണം സംഭവിച്ചത്. ഭാര്യ: മഞ്ജു,മക്കൾ രേഷ്മ, ബിഷ്മ , രഞ്ജു,സംസ്കാരം ഇന്ന് വൈകുന്നേരം നാലിന് വീട്ടുവളപ്പിൽ നടക്കും.

നാല് കിലോ കഞ്ചാവുമായി യുവാവ് പിടിയിൽ

തിരുവല്ല: തിരുവല്ല റെയിൽവേ സ്റ്റേഷൻ പാർക്കിംഗ് ഗ്രൗണ്ടിൽ നിന്ന് പത്തനംതിട്ട ളാഹ വെട്ടിച്ചുവട്ടിൽ വീട്ടിൽ ശരത്ത് ലാലിനെ (22) 3.990 കിലോ കഞ്ചാവുമായി പോലീസ് പിടികൂടി. ജില്ലാ പോലീസ് മേധാവിക്കു ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ തിരുവല്ല പോലീസാണ് ശരത്ത് ലാലിനെ പിടികൂടിയത്. കോടതിയിൽ ഹാജരാക്കി റിമാൻഡ് ചെയ്തു. മുൻപും കഞ്ചാവ് കൈവശം വച്ചതിന് പെരുനാട് പോലീസ് സ്റ്റേഷനിൽ ഇയാൾക്കെതിരേ കേസെടുത്തിരുന്നു.

ഭിന്നശേഷി വിഷയത്തിൽ സർക്കാർ നിലപാട് അഭിനന്ദനാർഹം: കെസിസി

തിരുവല്ല: ഭിന്നശേഷി നിയമന വിഷയത്തിൽ പ്രശ്നം പരിഹരിക്കുവാൻ മുൻകൈയെടുത്ത സംസ്ഥാന സർക്കാരിന്‍റെയും വിദ്യാഭ്യാസമന്ത്രിയുടെയും നിലപാടിനെ കേരള കൗൺസിൽ ഓഫ് ചർച്ചസ് സ്വാഗതം ചെയ്തു. ആയിരക്കണക്കിന് അധ്യാപകരെ ദുരിതത്തിലാക്കിയിരുന്ന ഭിന്നശേഷി നിയമനവുമായി ബന്ധപ്പെട്ട പ്രശ്നത്തിനു പരിഹാരം കാണണമെന്ന ക്രൈസ്തവ സഭകളുടെ ആവശ്യത്തിന് അനുകൂലമായി നടപടിയെടുത്ത സർക്കാരിന്‍റെ തീരുമാനം മാതൃകാപരമാണെന്നും ഇതു സംബന്ധിച്ച് കെസിസി വിദ്യാഭ്യാസ മന്ത്രിക്ക് കത്ത് നൽകിയതിനേ തുടർന്ന് പ്രസിഡന്‍റിനെയും ജനറൽ സെക്രട്ടറിയെയും വിദ്യാഭ്യാസ മന്ത്രി നേരിട്ട് ഫോണിൽ വിളിച്ച് കാര്യങ്ങൾ ചർച്ച ചെയ്യുകയും പ്രശ്നങ്ങൾ പരിഹരിക്കുവാൻ സർക്കാർ ഒരുക്കമാണെന്ന് അറിയിക്കുകയും ചെയ്തിരുന്നു. ഇതു പ്രകാരം എൻഎസ്എസ് മാനേജ്മെന്‌റുകൾക്ക് അനുകൂലമായി സുപ്രീംകോടതിയിൽ നിന്ന് നൽകിയ വിധി മറ്റ് മാനേജ്മെന്‍റുകളുടെ നിയമനങ്ങളുടെ കാര്യത്തിലും പരിഗണിക്കും എന്ന് നൽകിയ ഉറപ്പ് പാലിക്കുവാൻ മുൻകൈയെടുത്ത വിദ്യാഭ്യാസ മന്ത്രിയുടെ സമീപനം വിദ്യാഭ്യാസ മേഖല നേരിടുന്ന മറ്റു പ്രശ്നങ്ങളിലും ക്രിയാത്മകമായ നടപടികൾ സർക്കാരിൽ നിന്നു ഉണ്ടാകുമെന്ന് പ്രതീക്ഷ നൽകുന്നതായി കെസിസി പ്രസിഡന്‍റ്അലക്സിയോസ് മാർ യൗസേബിയോസ് മെത്രാപ്പോലീത്ത, ജനറൽ സെക്രട്ടറി ഡോ.പ്രകാശ് പി തോമസ് എന്നിവർ അഭിപ്രായപ്പെട്ടു.

ഇട്ടിയപ്പാറ - ബംഗ്ലാംകടവ് റോഡിൽ ടാറിംഗ് ജോലികൾ ആരംഭിക്കുന്നു

റാന്നി: ഇട്ടിയപ്പാറ - ബംഗ്ലാകടവ് റോഡിൽ ടാറിംഗ് ജോലികൾ ആരംഭിക്കുന്നു. പഴയ ടാറിംഗ് ഇളക്കിമാറ്റി മെറ്റൽ ഇട്ട് ഉറപ്പിക്കുന്ന പ്രവൃത്തികളാണ് നടക്കുന്നത്. റോഡിന്‍റെ ഉപരിതലം മെറ്റൽ ഇട്ട് ഉറപ്പിച്ച് ലെവൽസ് എടുത്തതിനുശേഷമാകും ബിഎംബിസി നിലവാരത്തിൽ ടാറിംഗ് നടക്കുക. റോഡിന്‍റെ ടാറിംഗ് വീതി 5.5 മീറ്ററായി വർധിപ്പിച്ച് റോഡിന് ഇരുവശവും വീതി കൂട്ടുമ്പോൾ തടസമായി നിന്നിരുന്ന വൈദ്യുത പോസ്റ്റുകൾ മാറ്റി സ്ഥാപിച്ചിട്ടുണ്ട്. റോഡരികിലൂടെ പൈപ്പിടുന്ന പ്രവൃത്തികളും ജലഅഥോറിറ്റി പൂർത്തീകരിച്ചു. 7.700 കിലോമീറ്റർ ദൂരം വരുന്ന റോഡ് ഉന്നത നിലവാരത്തിൽ പുനരുദ്ധരിക്കുനനതിനായി പത്തുകോടി രൂപയാണ് ബജറ്റിൽ നിന്നും ഫണ്ട് അനുവദിച്ചത്. 16 കലുങ്കുകളുടെ നിർമാണം പൂർത്തീകരിച്ചു. റോഡിൻറെ സംരക്ഷണഭിത്തി കെട്ടൽ, ഓട നിർമാണം, ഐറീഷ് ഡ്രെയിൻ, ഇൻറർലോക്ക്, അപകട സൂചനാ ബോർഡുകൾ എന്നിവയെല്ലാം പദ്ധതിയിൽ ഉൾപ്പെടുത്തിയിട്ടുണ്ട്. റോഡിലെ പൈപ്പുകൾ ഇടുന്നതിനും കെഎസ്ഇബി ലൈനുകൾ മാറ്റുന്നതിനും എടുത്ത കാലതാമസമാണ് നിർമാണം വൈകാനിടയാക്കിയത്. മൂന്ന് റീച്ചുകളായാണ് റോഡിൻറെ ടാറിംഗ് ആരംഭിക്കുക. വടശേരിക്കര മുതൽ കിടങ്ങമൂഴി വരെയുള്ള ഭാഗത്തെ ടാറിംഗാണ് ആദ്യം നടക്കുക. രണ്ടാംഘട്ടത്തിൽ ഇട്ടിയപ്പാറ മുതൽ ഒഴുവൻ പാറ വരെയും മൂന്നാംഘട്ടത്തിൽ ഒഴുവൻപാറ മുതൽ കിടങ്ങാമ്മൂഴി വരെയും ടാർ ചെയ്യും. മൂന്നുമാസത്തിനകം റോഡിന്‍റെ നിർമാണം പൂർത്തീകരിക്കാനാകുമെന്ന് അധികൃതർ പറഞ്ഞു.

മാക്ഫാസ്റ്റ് കോളജ് രജതജൂബിലിയും സ്വയംഭരണ പദവി പ്രഖ്യാപനവും ഇന്ന്

തിരുവല്ല: മാർ അത്താനാസിയോസ് കോളജ് ഫോർ അഡ്വാൻസ്ഡ് സ്റ്റഡീസ് (മാക്ഫാസ്റ്റ്) രജത ജൂബിലിയും സ്വയംഭരണ പദവി പ്രഖ്യാപനവും ഇന്ന് ഉച്ചകഴിഞ്ഞ് രണ്ടിന് തിരുവല്ല സെന്‍റ് ജോൺസ് മെത്രാപ്പോലീത്തൻ കത്തീഡ്രൽ ഹാളിൽ നടക്കും. എംജി സർവകലാശാല വൈസ് ചാൻസലർ ഡോ.സി.ടി. അരവിന്ദകുമാർ മാക്ഫാസ്റ്റിന്‍റെ സ്വയംഭരണ പദവി പ്രഖ്യാപനം നടത്തും. കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ അധ്യക്ഷത വഹിക്കുന്ന യോഗം മന്ത്രി വി.എൻ. വാസവൻ ഉദ്ഘാടനം ചെയ്യും. തിരുവല്ല അതിരൂപതാധ്യക്ഷൻ ഡോ.തോമസ് മാർ കൂറിലോസ് മെത്രാപ്പോലീത്ത സ്വാഗതം ആശംസിക്കും. മുൻ മന്ത്രി രമേശ് ചെന്നിത്തല എംഎൽഎ മുഖ്യപ്രഭാഷണം നടത്തും. ആന്‍റോ ആന്‍റണി എംപി, മാത്യു ടി. തോമസ് എംഎൽഎ, തിരുവല്ല നഗരസഭ ചെയർപേഴ്സൺ അനു ജോർജ്, എംജി സർവകലാശാല സിൻഡിക്കേറ്റംഗം റെജി സഖറിയ, സംസ്ഥാന ഹയർ എഡ്യുക്കേഷൻ കൗൺസിൽ ജനറൽ മെംബർ സെക്രട്ടറി ഡോ. രാജൻ വർഗീസ്, മുനിസിപ്പൽ കൗൺസിലർ ഫിലിപ്പ് ജോർജ് തുടങ്ങിയവർ പ്രസംഗിക്കും.

വയോധികനെ കൊലപ്പെടുത്താന്‍ ശ്രമിച്ചയാൾ അറസ്റ്റിൽ

പെരുന്പെട്ടി: ഒറ്റയ്ക്ക് താമസിക്കുന്ന വയോധികനെ മണ്‍വെട്ടി കൊണ്ട് തലയ്ക്ക് അടിച്ച് കൊലപ്പെടുത്താന്‍ ശ്രമിച്ച കേസിൽ യുവാവ് അറസ്റ്റിൽ. എഴുമറ്റൂര്‍ കാരമല താളിയാട്ട് അജേഷ് (മത്തായി, 32) നെയാണ് പോലീസ് അറസ്റ്റ് ചെയ്തത്. വീട്ടില്‍ വളര്‍ത്തുന്ന നായ്ക്കൾക്ക് പേ വിഷബാധയുണ്ടെന്ന് നാട്ടുകാര്‍ പറഞ്ഞതിനേ തുടര്‍ന്ന് അജേഷ് അയല്‍വാസികളെ അസഭ്യം പറയുകയും ഭീഷണി മുഴക്കുകയും ചെയ്തിരുന്നു. സംഭവം ബന്ധുവായ പറുങ്കിക്കീഴില്‍ വീട്ടില്‍ സോമന്‍(70) ചോദ്യം ചെയ്തതാണ് പ്രകോപനത്തിന് കാരണമെന്ന് പോലീസ് പറഞ്ഞു.പരിക്കേറ്റ സോമന്‍ കോട്ടയം മെഡിക്കല്‍ കോളജില്‍ ചികില്‍സയിലാണ്. പെരുമ്പെട്ടി പോലീസ് ഇന്‍സ്‌പെക്ടര്‍ സജീഷ് കുമാറിന്‍റെ നേതൃത്വത്തിലാണ് അന്വേഷണം.

വിഷൻ 2031: ആരോഗ്യ സെമിനാര്‍ ഇന്ന് തിരുവല്ലയില്‍

പത്തനംതിട്ട: സംസ്ഥാന സർക്കാരിന്‍റെ വിഷൻ 2031ന്‍റെ ഭാഗമായ ആരോഗ്യ സെമിനാർ ഇന്ന് തിരുവല്ല ബിലീവേഴ്സ് കൺവൻഷൻ സെന്‍ററിൽ നടക്കും. നയരേഖ മന്ത്രി വീണാ ജോർജ് അവതരിപ്പിക്കും. രാവിലെ 9.30ന് ആരംഭിക്കുന്ന സമ്മേളനത്തിൽ ആരോഗ്യ രംഗത്തെ കഴിഞ്ഞ ദശകത്തിലെ നേട്ടത്തെ കുറിച്ച് ആരോഗ്യ വകുപ്പ് അഡീഷണല്‍ ചീഫ് സെക്രട്ടറി ഡോ. രാജന്‍ എന്‍. ഖോബ്രഗഡെ വിശദീകരിക്കും. മാത്യു ടി. തോമസ് എംഎൽഎ ആമുഖ സന്ദേശം നൽകും. ആരോഗ്യ രംഗത്തെ വിവിധ വിഷയങ്ങളില്‍ അധിഷ്ഠിതമായ 10 പാനല്‍ ചര്‍ച്ചകള്‍ നാല് വേദികളിലായി അരങ്ങേറും. അതാത് രംഗത്തെ വിദഗ്ധര്‍ മോഡറേറ്ററുകളായും പാനലിസ്റ്റുകളായും പങ്കെടുക്കും. കാന്‍സർ, വയോജന പരിപാലനം, പാലിയേറ്റീവ് കെയര്‍ തുടങ്ങിയ സെഷനില്‍ മലബാര്‍ കാന്‍സര്‍ സെന്‍റര്‍ ഡയറക്ടര്‍ ഡോ. ബി. സതീശനും ഹൃദ്‌രോഗങ്ങൾ, സ്‌ട്രോക്ക്, പ്രമേഹം, രക്തസമര്‍ദം, കുട്ടികളിലെ ജീവിതശൈലീ രോഗങ്ങൾ, സിഒപിഡി വിഷയങ്ങളില്‍ അമൃത ആശുപത്രിയിലെ കണ്‍സള്‍ട്ടന്‍റ് കാര്‍ഡിയോളജിസ്റ്റ് ഡോ. ജയ്ദീപ് സി. മേനോനും മോഡറേറ്ററാകും. മെഡിക്കല്‍ ഗവേഷണം, ടെറിഷ്യറി കെയര്‍ ശക്തീകരണം വിഷയങ്ങളില്‍ ജവഹര്‍ലാര്‍ നെഹ്‌റു സെന്‍റര്‍ ഫോര്‍ അഡ്വാന്‍സ്ഡ് സയന്‍സ് റിസര്‍ച്ചിലെ പ്രഫ. ചന്ദ്രഭാസ് നാരായണ, പൊതുജനാരോഗ്യത്തിന്‍റെ സാമ്പത്തിക ശാസ്ത്രത്തില്‍ പ്ലാനിംഗ് ബോര്‍ഡ് വിദഗ്ധ അംഗം ഡോ. പി. കെ. ജമീല, ആയുഷ് മേഖലയുമായി ബന്ധപ്പെട്ട വിഷയത്തില്‍ ആയുര്‍വേദ മെഡിക്കല്‍ അസോസിയേഷന്‍ ഓഫ് ഇന്ത്യയിലെ ഡോ. വി.ജി. ഉദയകുമാർ, ഹോമിയോപ്പതി പ്രിന്‍സിപ്പല്‍ ആൻഡ് കണ്‍ട്രോളിംഗ് ഓഫീസര്‍ ഡോ. ടി.കെ. വിജയന്‍, സാംക്രമിക രോഗങ്ങള്‍, ഏകാരോഗ്യ പദ്ധതി എന്നിവയില്‍ ഐഎവി ഡയറക്ടര്‍ ഡോ. ഇ. ശ്രീകുമാര്‍ എന്നിവര്‍ മോഡറേറ്ററാകും. എമര്‍ജന്‍സി ആൻഡ് കെയര്‍, ദുരന്ത നിവാരണം വിഷയങ്ങളില്‍ ആരോഗ്യ വകുപ്പ് അഡീഷണല്‍ സെക്രട്ടറി ഷീബാ ജോര്‍ജ്, സ്ത്രീകളുടെയും കുഞ്ഞുങ്ങളുടെയും ആരോഗ്യം, തീരദേശ മേഖലയിലെയും ഗോത്ര വിഭാഗങ്ങളുടെയും ആരോഗ്യം വിഷയങ്ങളില്‍ കാസര്‍ഗോഡ് മെഡിക്കല്‍ കോളജ് പ്രിന്‍സിപ്പല്‍ ഡോ. പി.എസ്. ഇന്ദു, മരുന്ന് ഗവേഷണം, ഉത്പാദനം ചികിത്സയുടെ ഭാവി വിഷയങ്ങളില്‍ അസി. ഡ്രഗ്‌സ് കണ്‍ട്രോളര്‍ ഡോ. ഷാജി എം. വര്‍ഗീസ് എന്നീ ഭക്ഷ്യ സുരക്ഷയില്‍ ഡബ്ല്യുഎച്ച്ഒ കണ്‍സള്‍ട്ടന്‍റ് ഡോ. എന്‍. ആനന്ദവല്ലി എന്നിവര്‍ മോഡറേറ്ററാകും. ലോകബാങ്ക് ലീഡ് എക്കണോമിസ്റ്റ് ഡോ. അജയ് ടണ്ടൻ,ആരോഗ്യ വിദഗ്ധ ഡോ. ദേവകി നമ്പ്യാര്‍ എന്നിവരും പങ്കെടുക്കും. 3.30 മുതല്‍ ചര്‍ച്ചയുടെ ആശയ ക്രോഡീകരണം മന്ത്രി വീണാ ജോര്‍ജ് അവതരിപ്പിക്കും. സെമിനാറില്‍ ഉരുത്തിരിയുന്ന ആശയങ്ങള്‍ ആരോഗ്യ മേഖലയിലെ ഭാവി പദ്ധതികളുടെ ആസൂത്രണത്തിന് സഹായിക്കും.

ഗതാഗത വകുപ്പ് സെമിനാര്‍ നാളെ

പത്തനംതിട്ട: വിഷന്‍ 2031ന്‍റെ ഭാഗമായി ഗതാഗത വകുപ്പിന്‍റെ വികസന ലക്ഷ്യങ്ങള്‍ എന്ന പേരില്‍ സംഘടിപ്പിക്കുന്ന സംസ്ഥാനതല സെമിനാര്‍ നാളെ രാവിലെ 8.30 മുതല്‍ തിരുവല്ല ബിലീവേഴ്സ് കണ്‍വന്‍ഷന്‍ സെന്‍ററില്‍ നടക്കും. മന്ത്രി കെ.ബി. ഗണേഷ്കുമാര്‍ വിഷയം അവതരിപ്പിക്കും. ഗതാഗത വകുപ്പ് സ്പെഷല്‍ സെക്രട്ടറി പി.ബി. നൂഹ് വകുപ്പിന്‍റെ നേട്ടങ്ങള്‍ വിവരിക്കും. മന്ത്രി വീണാ ജോര്‍ജ് മുഖ്യാതിഥിയാകും. നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാർ, ആന്‍റോ ആന്‍റണി, എംഎല്‍മാരായ മാത്യു ടി. തോമസ്, കെ.യു. ജനീഷ് കുമാർ, പ്രമോദ് നാരായണ്‍, കേരള റോഡ് സേഫ്റ്റി കമ്മീഷണര്‍ യോഗേഷ് ഗുപ്ത, ഗതാഗത കമ്മീഷണര്‍ നാഗരാജു ചകിലം, പത്തനംതിട്ട ജില്ല പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, ജില്ല കളക്ടര്‍ എസ്. പ്രേം കൃഷ്ണൻ, തിരുവല്ല നഗരസഭ ചെയര്‍പേഴ്സന്‍ അനു ജോര്‍ജ്, ഗതാഗത വകുപ്പ് ഡയറക്ടര്‍ ഷാജി വി. നായർ, കേരള ട്രാന്‍സ്പോര്‍ട്ട് ഡെവലപ്പ്മെന്‍റ് ഫിനാന്‍സ് കോര്‍പറേഷന്‍ മാനേജിംഗ് ഡയറക്ടര്‍ ആനി ജൂലാ തോമസ് എന്നിവര്‍ പങ്കെടുക്കും. കെഎസ്ആര്‍ടിസി ചെയര്‍മാനും മാനേജിംഗ് ഡയറക്ടറുമായ ഡോ. പി. എസ്. പ്രമോജ് ശങ്കര്‍ നന്ദി പറയും. വിദഗ്ധര്‍ മോഡറേറ്റര്‍മാരായി ഗതാഗത വകുപ്പുമായി ബന്ധപ്പെട്ട് വിവിധ പാനല്‍ ചര്‍ച്ചകളും നടക്കും. ചര്‍ച്ചയുടെ ആശയക്രോഡീകരണം മന്ത്രി കെ.ബി. ഗണേഷ് കുമാര്‍ അവതരിപ്പിക്കും.സുസ്ഥിര ഗതാഗതവും സുരക്ഷിത സഞ്ചാരവുമുള്ള നവകേരളം സൃഷ്ടിക്കുകയാണ് സെമിനാറിന്‍റെ ലക്ഷ്യം.

സ്വകാര്യ ബസ് ബൈക്കിൽ ഇടിച്ച് അച്ഛനും മകൾക്കും പരിക്ക്

അടൂർ: സ്വകാര്യ ബസും ബൈക്കും കൂട്ടിയിടിച്ച് ബൈക്ക് യാത്രികരായ അച്ഛനും മകൾക്കും പരിക്ക്. നെല്ലിമുകൾ ആദർശ് ഭവനത്തിൽ വിജയൻ (44),മകൾ ആദിത്യ(21) എന്നിവർക്കാണ് പരിക്ക്. ഇരുവരുടേയും വലുതു കാലുകൾക്കാണ് പരിക്കേറ്റത്. ഇതിൽ ആദിത്യയുടെ പരിക്ക് ഗുരുതരമാണ്. കായംകുളം - അടൂർ റൂട്ടിൽ ഓടുന്ന ഹരിശ്രീ ബസ് വിജയനും ആദിത്യയും സഞ്ചരിച്ച ബൈക്കിൽ ഇടിക്കുകയായിരുന്നു. ഇന്നലെ വൈകുന്നേരം അഞ്ചിന് അടൂർ സെൻട്രൽ ടോളിലാണ് അപകടം. അപകടത്തിൽ ബൈക്ക് ബസിന് അടിയിലേക്ക് വീണു. പരിക്കേറ്റവരെ ബൈക്കിനൊപ്പം ബസ് നിരക്കിക്കൊണ്ട് പോയതായും ദൃക്സാക്ഷികൾ പറയുന്നു. പരിക്കേറ്റവരെ അടൂർ ജനറൽ ആശുപത്രിയിൽ പ്രവേശിപ്പിച്ചു.

റിട്ടയേഡ് ടീച്ചേഴ്സ് കോൺഗ്രസ് ഭാരവാഹികൾ

പത്തനംതിട്ട: സർവീസിൽ നിന്നു വിരമിച്ച അധ്യാപകർക്കും ജീവനക്കാർക്കുമുള്ള ആരോഗ്യ ഇൻഷ്വറൻസ്പദ്ധതിയായ മെഡിസെപിന്‍റെ സേവനങ്ങൾ കുറ്റമറ്റതും പ്രയോജനപ്രദവുമാക്കാൻ സർക്കാർ നടപടി സ്വീകരിക്കണമെന്ന് കേരള റിട്ടയേഡ് ടീച്ചേഴ്സ് കോൺഗ്രസ് യോഗം ആവശ്യപ്പെട്ടു. സംസ്ഥാന പ്രസിഡന്‍റ് എം. സലാഹുദ്ദീൻ യോഗം ഉദ്ഘാടനം ചെയ്തു. അനിൽ സി. ഉഷസ് അധ്യക്ഷത വഹിച്ചു. ജോൺ സാമുവേൽ, കെ.ജി. റെജി, വി.എൻ. സദാശിവൻപിള്ള, പി.ജി. ഗീവർഗീസ്, തോമസ് തുണ്ടിയത്ത്, കെ.ടി. രേണുക, പ്രീതാ ബി. നായർ, കർമല കുസുമം, ജോൺ ഫിലിപ്പ് എന്നിവർ പ്രസംഗിച്ചു. ജില്ലാ ഭാരവാഹികളായി അനിൽ സി. ഉഷസ് - പ്രസിഡന്‍റ്, ജോൺ സാമുവേൽ - ജനറൽ സെക്രട്ടറി,കെ.ജി. റെജി - ട്രഷറാർ എന്നിവരെ തെരഞ്ഞെടുത്തു.

വിശ്വാസ സംരക്ഷണം ഭരണഘടനാവകാശം: അടൂര്‍ പ്രകാശ്

പത്തനംതിട്ട: ഒന്നാം പിണറായി സര്‍ക്കാരിന്‍റെ കാലത്ത് അവിശ്വാസികളായ യുവതികളെ അയ്യപ്പ സന്നിധിയില്‍ കയറ്റിയ പിണറായി വിജയന്‍ തന്‍റെ രണ്ടാം ഭരണകാലത്ത് അയ്യപ്പന്‍റെ സ്വത്തും സ്വര്‍ണവും കവരുന്ന കാഴ്ചയാണ് കേരളം കാണുന്നതെന്ന് യുഡിഎഫ് സംസ്ഥാന കണ്‍വീനര്‍ അടൂര്‍ പ്രകാശ് എംപി. വിശ്വാസ സംരക്ഷണ ജാഥയുടെ അവലോകനത്തിനായുള്ള കോണ്‍ഗ്രസ് ആറന്‍മുള നിയോജക മണ്ഡലത്തിലെ നേതൃയോഗം പത്തനംതിട്ട രാജീവ് ഭവനില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദഹം. ക്ഷേത്രങ്ങളും ആരാധനാലയങ്ങളും വിശ്വാസങ്ങളും സംരക്ഷിക്കേണ്ടത് ഭരണഘടനാപരമായ അവകാശമാണെന്നും അടൂര്‍ പ്രകാശ് കൂട്ടിച്ചേര്‍ത്തു. നാളെ തിരുവനന്തപുരത്ത് നിന്ന് ആരംഭിക്കുന്ന ജാഥ ആറന്‍മുള നിയോജക മണ്ഡലത്തിലെ ആറന്‍മുള ഐക്കര ജംഗ്ഷനില്‍ 17ന് ഉച്ചകഴിഞ്ഞ് രണ്ടിന് എത്തിച്ചേരും. യുഡിഎഫ് സംസ്ഥാന കണ്‍വീനര്‍ അടൂര്‍ പ്രകാശ് എംപി നയിക്കുന്ന വിശ്വാസ സംരക്ഷണ യാത്രയുടെ വിജയത്തിനായി കെ. ശിവദാസന്‍ നായര്‍ ചെയര്‍മാനായി 101 അംഗ കമ്മിറ്റിയെ തെരഞ്ഞെടുത്തു. വിശ്വാസ സംരക്ഷണ യാത്ര ആറന്‍മുള നിയോജകമണ്ഡലത്തിലെത്തുമ്പോള്‍ രണ്ടായിരം പ്രവര്‍ത്തകരെ പങ്കെടുപ്പിക്കുന്നതിനും നേതൃയോഗം തീരുമാനിച്ചു. പത്തനംതിട്ട ബ്ലോക്ക് കോണ്‍ഗ്രസ് പ്രസിഡന്‍റ് ജെറി മാത്യു സാം അധ്യക്ഷത വഹിച്ചു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ, കെപിസിസി ജനറല്‍ സെക്രട്ടറി പഴകുളം മധു, കെപിസിസി അംഗം പി. മോഹന്‍രാജ്, യുഡിഎഫ് ജില്ലാ കണ്‍വീനര്‍ എ. ഷംസുദ്ദീൻ, മുന്‍ എംഎല്‍എ മാലേത്ത് സരളാദേവി, ഡിസിസി ഭാരവാഹികളായ എ. സുരേഷ് കുമാര്‍, അനില്‍ തോമസ്, കെ. ജാസിം കുട്ടി, ജോണ്‍സണ്‍ വിളവിനാൽ, സുനില്‍ എസ്. ലാല്‍, റോഷന്‍ നായർ, ജി. രഘുനാഥ്, ഉണ്ണികൃഷ്ണന്‍ നായർ, സുനില‍ പുല്ലാട്, എന്‍. സി. മനോജ്, വിനീത അനിൽ, മഹിളാ കോണ്‍ഗ്രസ് ജില്ലാ പ്രസിഡന്‍റ് രജനി പ്രദീപ്, മണ്ഡലം പ്രസിഡന്‍റുമാരായ റെനീസ് മുഹമ്മദ്, നാസര്‍ തോണ്ടമണ്ണിൽ, ജോമോന്‍ പുതുപറമ്പില്‍, എം. കെ. മണികണ്ഠൻ, എം. ആര്‍. രമേശ്, പ്രദീപ് കിടങ്ങന്നൂർ, സജി വട്ടമോടി, കെ. പി. മുകുന്ദൻ, സാജന്‍ കുഴുവേലി തുടങ്ങിയവര്‍ പ്രസംഗിച്ചു.

സി.എ. മാത്യു കാലത്തിനു മുന്പ് സഞ്ചരിച്ച കർമയോഗി: മുഖ്യമന്ത്രി

പത്തനംതിട്ട: മുൻ എംഎൽഎയും ഇടതുപക്ഷ പ്രസ്ഥാനത്തിന്‍റെ മുൻനിര പോരാളിയുമായിരുന്ന യശശരീരനായ സി.എ. മാത്യു കാലത്തിനു മുന്പേ സഞ്ചരിച്ച കർമയോഗിയായിരുന്നുവെന്ന് മുഖ്യമന്ത്രി പിണറായി വിജയൻ. സി.എ. മാത്യുവിന്‍റെ ജീവിതവും പ്രവർത്തനങ്ങളും ആസ്പദമാക്കി തയാറാക്കിയ സി.എ. മാത്യു ജീവിതത്തിന്‍റെ സമഗ്രത എന്ന ജീവചരിത്രത്തിന്‍റെ പ്രകാശനം നിർവഹിച്ചു പ്രസംഗിക്കുകയായിരുന്നു അദ്ദേഹം. പ്രസിദ്ധീകരണത്തിന്‍റെ ആദ്യപ്രതി മന്ത്രി കടന്നപ്പള്ളി രാമചന്ദ്രൻ ഏറ്റുവാങ്ങി. മന്ത്രി വീണാ ജോർജ് മുഖ്യസന്ദേശം നൽകി. ജില്ലാ പഞ്ചായത്തംഗം സാറാ തോമസ്, ഏലിയാമ്മ മാത്യു, സുനിൽ മാത്യു, സുജ, ചെറിയാൻ സി. ജോൺ, പ്രഫ. പി.എ. ഉമ്മൻ, സജി മാത്യു, ഏബ്രഹാം ഫിലിപ്പ്, റെജി താഴമൺ എന്നിവർ പ്രസംഗിച്ചു.

കാതോലിക്കേറ്റ് കോളജ് ബോട്ടണി വിഭാഗം എതനോ ബൊട്ടാണിക്കൽ ഗാർഡൻ തുറന്നു

പത്തനംതിട്ട: കാതോലിക്കേറ്റ് കോളജിൽ ആരംഭിച്ച എതനോ ബൊട്ടാണിക്കൽ ഗാർഡൻ സംസ്ഥാന ജൈവവൈവിധ്യ ബോർഡ് ചെയർമാൻ ഡോ. എൻ. അനികുമാർ ഉദ്ഘാടനം ചെയ്തു. എഴുപതു വർഷം പിന്നിടുന്ന ബോട്ടണി വകുപ്പിലെ ഹെർബേറിയം, ഇഞ്ചി സംരക്ഷണ കേന്ദ്രം എന്നിവ അന്താരാഷ്ര്ട തലത്തിൽ ശ്രദ്ധയാകർഷിക്കുന്നതാണെന്ന് അഭിപ്രായപ്പെട്ടു. സംസ്ഥാന ജൈവവൈവിധ്യ ബോർഡിന്‍റെയും സംസ്ഥാന ഔഷധ സസ്യ ബോർഡിന്‍റെയും സാമ്പത്തിക സഹായത്തോടെ കോളജിലെ ബൊട്ടാണിക്കൽ ഗാർഡനിൽ ഒരുക്കുന്ന എതനോ ഔഷധ സസ്യത്തോട്ടം ഔഷധ സസ്യ ബോർഡ് എക്സിക്യൂട്ടീവ് മെംബർ ഡോ. പ്രിയ ദേവദേതും ഉദ്ഘാടനം ചെയ്തു. ബോട്ടണി വകുപ്പ് അധ്യക്ഷൻ ഡോ. ബിനോയ് ടി. തോമസ് അധ്യക്ഷത വഹിച്ചു. കോളജ് പ്രിൻസിപ്പൽ ഡോ. സിന്ധു ജോൺസ്‌ മുഖ്യസന്ദേശം നൽകി. ബോട്ടണി വിഭാഗത്തിലെ പൂർവ വിദ്യാർഥികളുടെ സാമ്പത്തിക സഹായത്തോടെ പുനരുദ്ധാരണം നടത്തിയ പ്ലാന്‍റ് നഴ്സറിയുടെ ഉദ്ഘാടനവും നടന്നു. എതനോ ബൊട്ടാണിക്കൽസസ്യങ്ങളുടെ വിവരങ്ങൾ അടങ്ങിയ മാഗസിൻ പ്രകാശനം കോളജ് മുൻ പ്രിൻസിപ്പൽ ഡോ. ഫിലിപ്പോസ് ഉമ്മൻ നിർവഹിച്ചു. ഔഷധ സസ്യങ്ങളുടെ വിതരണം പ്രഫ.ഉമ്മൻ ജേക്കബ് നിർവഹിച്ചു. എതനോബൊട്ടാണിക്കൽ സെമിനാർ പാലോട് ബൊട്ടാണിക്കൽ ഗാർഡൻ ഡോ. എം. നവാസ് നയിച്ചു. പ്രിൻസിപ്പൽ ഇൻവെസ്റ്റിഗേറ്റർമാരായ ഡോ. വി.പി. തോമസ്, കെ.എസ്. ഹിമ, അലുമ്നി വൈസ് പ്രസിഡന്‍റ് ഡോ. മാത്യു ഡാൻ, സെക്രട്ടറി പി.ടി. റെജി, ജൈവവൈവിധ്യ ജില്ലാ കോഓർഡിനേറ്റർ അരുൺ സി. രാജൻ, സപ്തതി കോഓർഡിനേറ്റർ ഡോ. ഗോകുൽ ജി. നായർ, എ.എസ്. ദീപ്തി, നിഷ കെ. ജോസഫ്, ടിനു തോമസ് എന്നിവർ പ്രസംഗിച്ചു. ബോട്ടണി വകുപ്പിന്‍റെ ഒരുവർഷം നീളുന്ന സപ്തതി ആഘോഷങ്ങളുടെ ഭാഗമായി ഗാർഡൻ ഫെസ്റ്റിവലും സംഘടിപ്പിച്ചു. വൈവിധ്യമാർന്ന ജിഞ്ചർ ഹൗസ്, എതനോ ബൊട്ടാണിക്കൽ ഗാർഡൻ, ഔഷധ സസ്യ ഗാർഡൻ, ഫേനറി, നഴ്സറി ഗാർഡൻ എന്നിവ പൊതുജനങ്ങൾക്കും വിദ്യാർഥികൾക്കുമായി തുറന്നു നൽകി. പത്തനംതിട്ട നഗരസഭ ചെയർമാൻ ടി. സക്കീർ ഹുസൈൻ ഉദ്ഘാടനം നിർവഹിച്ചു. കുര്യാക്കോസ് മാർ ക്ലീമിസ് വലിയ മെത്രാപ്പോലീത്ത മുഖ്യാതിഥിയായിരുന്നു. കോളജ് പ്രിൻസിപ്പൽ ഡോ. സിന്ധു ജോൺസ്‌ അധ്യക്ഷത വഹിച്ചു. ജിഞ്ചർ ഹൗസ് വൈവിധ്യങ്ങളുടെ കലവറ കേരളത്തിലെ വിവിധ മേഖലകളിൽനിന്നും ശേഖരിച്ച സസ്യങ്ങളിൽ കൂടുതലും ഔഷധ പ്രാധാന്യമുള്ളതാണ്. ആരോഗ്യപച്ച, മര മഞ്ഞൾ, കരി മഞ്ഞൾ, പൊൻകൊരണ്ടി, കുറപ്പുന്, കസ്തൂരി മഞ്ഞൾ, കോടാശേരി. വാതക്കൊടി തുടങ്ങിയ ഒട്ടനവധി സസ്യങ്ങൾ ശ്രദ്ധേയങ്ങളാണ്. കേരളത്തിലും വിദേശത്തും ഇന്ത്യയിലെ വിവിധ ഭാഗങ്ങളിൽ നിന്നും കൊണ്ടുവന്നതും വിവിധ വനങ്ങളിൽ കാണപ്പെടുന്നതുമായ 200ലധികം ഇഞ്ചി വർഗ സസ്യങ്ങളെ സംരക്ഷിച്ചു വരുന്നു. ഇഞ്ചിവർഗ സസ്യങ്ങളുടെ ബന്ധുക്കളായ ഏലം, മഞ്ഞൾ, ഇഞ്ചി പെരിയ ഏലം, കച്ചോലം, ചെങ്ങനീർ കിഴങ്ങ്, മഞ്ഞൾ, കരിമഞ്ഞൾ, ചിറ്റരത്ത, കോലിഞ്ചി, കൂവ തുടങ്ങിയ ഒട്ടനവധി മനുഷ്യന് ഉപയോഗമുള്ള സസ്യങ്ങളെയും അവയുടെ വന്യ ഇനങ്ങളെയും ഗവേഷണത്തിനായി പരിപാലിക്കുന്നു. ഇഞ്ചി വർഗ സസ്യങ്ങൾ പ്രധാനമായി ഔഷധമായും സുഗന്ധവ്യഞ്ജനമായും ആഹാരത്തിനുമായാണ് ഉപയോഗിച്ചു വരുന്നത്. ഇന്ത്യയുടെ വിവിധ ഭാഗങ്ങളിൽ നിന്നും കണ്ടെത്തിയ ശാസ്ത്രലോകത്തെ പുതിയ സസ്യങ്ങളായ അമോമം ആൻഡമാനിക്കം, അമോമം അഗസ്ത്യമലയാനം, അമോമം സാഹയാദൃക്കം, അമോമം മിസോറാമൻസ് തുടങ്ങിയ സസ്യങ്ങളെയും ജിഞ്ചർ ഹൗസിൽ പരിപാലിച്ചു വരുന്നു.

മുനമ്പം ഹൈക്കോടതിവിധി സ്വാഗതാർഹം: സി.പി. ജോൺ

തിരുവല്ല: മുനമ്പത്തെ തർക്കഭൂമി വഖഫ് ബോർഡ് സ്വത്തല്ലെന്ന ഹൈക്കോടതി വിധി സ്വാഗതാർഹം ആണെന്ന് സോഷ്യലിസ്റ്റ് പാർട്ടി (ഇന്ത്യ) ദേശീയ വൈസ് പ്രസിഡന്‍റ് സി.പി ജോൺ പറഞ്ഞു. കിടപ്പാടം നഷ്ടപ്പെടുമോ എന്നആധിയിലും ആശങ്കയിലുമായിരിക്കുന്ന മുനമ്പം നിവാസികൾക്ക് വിധി ആശ്വാസകരം ആണ്. സോഷ്യലിസ്റ്റ് പാർട്ടി ഓഫ് ഇന്ത്യ ദേശീയ, സംസ്ഥാന നേതൃത്വം മുനമ്പം വിഷയത്തിൽ സ്വീകരിച്ച നിലപാട് ശരിവയ്ക്കുന്ന വിധി ബന്ധപ്പെട്ട എല്ലാ കക്ഷികളും അംഗീകരിച്ചു സൗഹാർദ അന്തരീക്ഷം സൃഷ്ടിക്കണമെന്നും സി.പി ജോൺ അഭ്യർത്ഥിച്ചു.

ആക്‌ഷൻ കൗൺസിൽ രൂപീകരിച്ചു

മല്ലപ്പള്ളി: സഹപ്രവർത്തകയായ ആശാ വർക്കർ ലതാകുമാരി ദാരുണമായി ആക്രമിക്കപ്പെട്ടതിൽ പ്രതിഷേധിച്ച് മല്ലപ്പള്ളി താലൂക്കാശുപത്രി ജീവനക്കാർ ആക്‌ഷൻ കൗൺസിൽ രൂപീകരിച്ചു. ആശുപത്രിയിൽ പ്രതിഷേധ യോഗവും നടത്തി. ചെയർമാനായി ഡോ. മനേഷ് ചന്ദ്രനെയും കൺവീനറായി ജൂണിയർ ഹെൽത്ത്‌ ഇൻസ്‌പെക്ടർ അപർണയേയും തെരഞ്ഞെടുത്തു. ആശുപത്രി സൂപ്രണ്ട് ഡോ. സി.എസ്. നന്ദിനി യോഗത്തിൽ അധ്യക്ഷത വഹിച്ചു. ബ്ലോക്ക്‌ മെഡിക്കൽ ഓഫീസർ ഡോ. മാത്യൂസ് വർഗീസ്, മുൻ സൂപ്രണ്ട് ഡോ. സിനീഷ് പി. ജോയ്, ഡോ. മനേഷ് ചന്ദ്രൻ, എച്ച്ഐ ബ്രിജേഷ്, അപർണ, ആശാ വർക്കർ സിന്ധു എന്നിവർ പ്രസംഗിച്ചു.

വിഷന്‍ 2031: ആരോഗ്യ സെമിനാര്‍ നാളെ

പത്തനംതിട്ട: ആരോഗ്യ വകുപ്പിന്‍റെ നേതൃത്വത്തില്‍ വിഷന്‍ 2031- ദശാബ്ദത്തിന്‍റെ നേട്ടങ്ങള്‍ - ഭാവി കാഴ്ച്ചപ്പാടുകള്‍ എന്ന പേരില്‍ ആരോഗ്യ സെമിനാര്‍ നാളെ തിരുവല്ല ബിലീവേഴ്‌സ് കണ്‍വന്‍ഷന്‍ സെന്ററില്‍ നടക്കും. ജീവിതശൈലി രോഗങ്ങൾ, മെഡിക്കല്‍ ഗവേഷണം, പൊതുജനാരോഗ്യത്തിന്‍റെ സാമ്പത്തിക ശാസ്ത്രം, ആയുഷ് മേഖലയും കേരളത്തിന്‍റെ ആരോഗ്യ വികസന കാഴ്ചപ്പാടുകളും സാംക്രമിക രോഗങ്ങള്‍ - ഏകാരോഗ്യ പദ്ധതി, ട്രോമകെയർ, അത്യാഹിത പരിചരണം, ദുരന്ത നിവാരണവും ആരോഗ്യ വിഷയങ്ങളും സ്ത്രീകളുടേയും കുഞ്ഞുങ്ങളുടേയും ആരോഗ്യം, തീരദേശ മേഖലയിലേയും ഗോത്ര വിഭാഗങ്ങളുടേയും ആരോഗ്യം, മരുന്ന് ഗവേഷണം, ഉത്പാദനം, ചികിത്സയുടെ ഭാവി, ഫുഡ് സേഫ്റ്റി എന്നിവയാണ് സമാന്തര സെഷനുകളിലെ ചര്‍ച്ചാ വിഷയങ്ങൾ. അതാതു മേഖലയിലെ വിദഗ്ധര്‍ ചര്‍ച്ചകളില്‍ പങ്കെടുക്കുമെന്നും മന്ത്രി വീണാ ജോര്‍ജ് അറിയിച്ചു. രാവിലെ 9.30ന് ആരോഗ്യ സെമിനാര്‍ ആരംഭിക്കും. ആരോഗ്യ രംഗത്തെ കഴിഞ്ഞ ദശകത്തിലെ നേട്ടങ്ങള്‍ ആരോഗ്യ വകുപ്പ് അഡീഷണല്‍ ചീഫ് സെക്രട്ടറി ഡോ. രാജന്‍ എന്‍. ഖോബ്രഗഡെ അവതരിപ്പിക്കും. കേരളത്തിന്‍റെ ആരോഗ്യ മേഖല വിഷന്‍ 2031 നയരേഖ മന്ത്രി വീണാ ജോര്‍ജ് അവതരിപ്പിക്കും. കേരളത്തിന്‍റെ ഭാവി വികസന ലക്ഷ്യങ്ങള്‍ ആസൂത്രണം ചെയ്യുന്നതിനും 2031-ല്‍ കേരളം എങ്ങനെയായിരിക്കണം എന്ന വിപുലമായ കാഴ്ചപാട് സംബന്ധിച്ച ആശയ രൂപീകരണത്തിനുമായാണ് സംസ്ഥാന സര്‍ക്കാര്‍ 33 വിഷയങ്ങളിലായി എല്ലാ ജില്ലകളിലും വിഷന്‍ 2031ന്‍റെ ഭാഗമായി സെമിനാറുകള്‍ സംഘടിപ്പിക്കുന്നത്.

റാന്നിയിലെ മെഗാ എഡ്യു കാര്‍ണിവല്‍ ശ്രദ്ധേയമായി

റാന്നി: കേരളം തൊഴിലവസരങ്ങളുടെ ദേശീയ ഹബായി മാറുകയാണെന്ന് രാജു ഏബ്രഹാം എക്‌സ് എംഎല്‍എ. റാന്നി മാര്‍ത്തോമ്മ കണ്‍വന്‍ഷന്‍ സെന്‍ററില്‍ പെരുവന്താനം സെന്‍റ് ആന്‍റണീസ് കോളജ് സംഘടിപ്പിച്ച മെഗാ എഡ്യു കാര്‍ണിവല്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആധുനിക തൊഴിലവസരങ്ങളും കോഴ്‌സുകളും ഒരു പ്രദര്‍ശനം പോലെ കോളജിലെ വിദ്യാര്‍ഥികള്‍ ഗ്രാമീണര്‍ക്കിടയില്‍ അവതരിപ്പിച്ചത് ശ്രദ്ധേയമാണ്. സെന്‍റ് ആന്‍റണീസ് കോളജിലെ എഐ, റോബോട്ടിക്‌സ്, ഫാഷന്‍ ഡിസൈനിംഗ്, ഹോട്ടല്‍ മാനേജ്‌മെന്‍റ്, സൈക്കോളജി, സിഎംഎ, എസിസിഎ സൈബര്‍ സെക്യൂരിറ്റി വിദ്യാര്‍ഥികള്‍ മികവ് പുലര്‍ത്തിയെന്നും രാജു ഏബ്രഹാം അഭിപ്രായപ്പെട്ടു. പത്താം ക്ലാസ് വിഭാഗത്തില്‍ എല്ലാ വിഷയങ്ങളിലും എ പ്ലസ് ലഭിച്ച 361 വിദ്യാര്‍ഥികളെയും ഹയര്‍ സെക്കന്‍ഡറി തലത്തില്‍ 712 വിദ്യാര്‍ഥികളെയും മൊമെന്റോ നല്‍കി ആദരിച്ചു. റവ. ഡോ. നിരപ്പേല്‍ ബിസിനസ് ഐക്കണ്‍ ഓഫ് ദി ഇയര്‍ അവാര്‍ഡ് ഓക്‌സിജന്‍ സിഇഒ ഷിജോ കെ. തോമസിനും റവ. ഡോ. നിരപ്പേല്‍ എഡ്യൂക്കേഷണല്‍ ഐക്കണ്‍ ഓഫ് ദി ഇയര്‍ അവാര്‍ഡ് ആനക്കല്ല് സെന്‍റ് ആന്‍റണീസ് പബ്ലിക് സ്‌കൂള്‍ പ്രിന്‍സിപ്പല്‍ ഫാ. ആന്‍റണി തോക്കനാട്ടിനും സമ്മാനിച്ചു. സ്പാഗോ ഇന്‍റര്‍നാഷണല്‍ സിഇഒ ബെന്നി തോമസ് നേതൃത്വം നല്‍കിയ മോട്ടിവേഷണല്‍ ക്ലാസും ഡോ. ആന്‍റണി ജോസഫ് കല്ലമ്പള്ളി നേതൃത്വം നല്‍കിയ കരിയര്‍ ഗൈഡന്‍സ് ക്ലാസും നടന്നു. മെഗാ എഡ്യു കാര്‍ണിവലില്‍ രാജു ഏബ്രഹാം എക്‌സ് എംഎല്‍എ, സിനി ആര്‍ട്ടിസ്റ്റ് ഡയാന ഹമീദ്, സ്വാമി പ്രജ്ഞാനാനന്ദ തീര്‍ഥപാദ, റാന്നി പഴവങ്ങാടി ഗ്രാമ പഞ്ചായത്ത് പ്രസിഡന്‍റ് റൂബി കോശി, മഹാത്മാഗാന്ധി യൂണിവേഴ്‌സിറ്റി സിന്‍ഡിക്കേറ്റ് മെംബര്‍ പി. ബി. സതീഷ് കുമാർ, ആനക്കല്ല് സെന്‍റ് ആന്‍റണീസ് പബ്ലിക് സ്‌കൂള്‍ പ്രിന്‍സിപ്പല്‍ ഫാ. ആന്‍റണി തോക്കനാട്ട്, ഓക്സിജന്‍ ഗ്രൂപ്പ് സിഇഒ ഷിജോ കെ. തോമസ്, അജയ് ഹാച്ചറീസ് സിഇഒ പി. വി. ജയൻ, പിറ്റിഎ പ്രസിഡന്‍റ് ജോര്‍ജ് കൂരമറ്റം, കണ്‍വീനര്‍മാരായ ജോസ് ആന്‍റണി, റ്റിജോ മോന്‍ ജേക്കബ്, സുപര്‍ണ രാജു, പി.ആർ. രതീഷ്, ജസ്റ്റിന്‍ ജോസ്, അഞ്ജലി ആർ. നായര്‍, എസ്. ഷാന്‍റിമോള്‍, കിഷോര്‍ ബേബി, ജിനു തോമസ്, ക്രിസ്റ്റി ജോസ്, ഡോ. ഷിജിമോള്‍ തോമസ് എന്നിവര്‍ പ്രസംഗിച്ചു. വിവിധ ഡിപ്പാര്‍ട്ട്‌മെന്‍റുകള്‍ ശ്രദ്ധേയമായ പ്രദര്‍ശനങ്ങളും പരിപാടികളും അവതരിപ്പിച്ചു. കോളജിലെ വിദ്യാര്‍ഥികള്‍ തന്നെ തയാറാക്കിയ റോബോട്ടുകളുടെ പ്രദര്‍ശനവും ആകർഷീയമായിരുന്നു.‌

മല്ലപ്പുഴശേരിയില്‍ പുതിയ ആയുര്‍വേദ ആശുപത്രി ഉടൻ: മന്ത്രി വീണ

പത്തനംതിട്ട: മല്ലപ്പുഴശേരിയില്‍ പുതിയ ആയുര്‍വേദ ആശുപത്രി ആരംഭിക്കുമെന്ന് മന്ത്രി വീണാ ജോര്‍ജ്. ഗ്രാമപഞ്ചായത്ത് വികസന സദസിന്‍റെ ഉദ്ഘടനം പുന്നയ്ക്കാട് വയല്‍വാരം ഓഡിറ്റോറിയത്തില്‍ നിര്‍വഹിച്ചു പ്രസംഗിക്കുകയായിരുന്നു മന്ത്രി. 15 കോടി രൂപ ചെലവിൽ മല്ലപ്പുഴശേരിയില്‍ നിര്‍മിക്കുന്ന ആശുപത്രിക്ക് ജലസേചന വകുപ്പിന്‍റെ സ്ഥലം ലഭ്യമാക്കി ഡിപിആര്‍ പൂര്‍ത്തിയാക്കി. മല്ലപ്പുഴശേരി നെല്ലിക്കാല സ്‌കൂളിന്‍റെ അടിസ്ഥാന സൗകര്യ വികസനത്തിനായി 75 ലക്ഷം എംഎല്‍എ ഫണ്ട് അനുവദിച്ചു. ആതുര ശുശ്രൂഷ ആവശ്യമുള്ളവർക്ക് കുടുംബശ്രീ പ്രവർത്തകർ വീട്ടിലെത്തി കുറഞ്ഞ ചെലവിൽ സേവനം നൽകുന്ന പദ്ധതിക്കും തദ്ദേശ വകുപ്പുമായി ചേർന്ന് തുടക്കമാകുകയാണെന്ന് മന്ത്രി പറഞ്ഞു. ആരോഗ്യവകുപ്പിന്‍റെ നേതൃത്വത്തിൽ ഇവർക്ക്പരിശീലനം നൽകും. സുസ്ഥിര വികസനത്തിലൂടെ ജീവിത ഗുണനിലവാരം മെച്ചപ്പെടുത്തുക എന്നതാണ് സര്‍ക്കാരിന്‍റെ ലക്ഷ്യമെന്നും വീണാ ജോർജ് പറഞ്ഞു. സംസ്ഥാനസര്‍ക്കാരിന്‍റെയും ത്രിതല പഞ്ചായത്തുകളുടെയും വികസന-ക്ഷേമ പ്രവര്‍ത്തനങ്ങള്‍ ജനങ്ങളിലെത്തിക്കാനും ഭാവി വികസനത്തിന് പൊതുജനാഭിപ്രായം സ്വരൂപിക്കാനുമായാണ് വികസന സദസ് സംഘടിപ്പിച്ചത്. ഗ്രാമപഞ്ചായത്ത് പ്രസിഡന്‍റ് മിനി ജിജു ജോസഫ് അധ്യക്ഷത വഹിച്ചു. ജില്ലാ പഞ്ചായത്തംഗം ഓമല്ലൂര്‍ ശങ്കരന്‍ മുഖ്യപ്രഭാഷണം നടത്തി.റിസോഴ്‌സ് പേഴ്‌സണ്‍രേണു വികസന സദസിന്‍റെ ലക്ഷ്യം വിശദീകരിച്ചു. തുടര്‍ന്ന് വിവിധ മേഖലകളിലെ സര്‍ക്കാരിന്‍റെ നേട്ടം സംബന്ധിച്ച് വീഡിയോ പ്രദര്‍ശിപ്പിച്ചു. പഞ്ചായത്തിന്‍റെ ക്ഷേമപ്രവര്‍ത്തനങ്ങളും വികസന പദ്ധതികളും സംബന്ധിച്ച് സെക്രട്ടറി ആര്‍. സുമാഭായി അമ്മ അവതരണം നടത്തി. ഇലന്തൂര്‍ ബ്ലോക്ക് പഞ്ചായത്ത് പ്രസിഡന്‍റ് ജെ. ഇന്ദിരാദേവി, മല്ലപ്പുഴശേരി ഗ്രാമപഞ്ചായത്ത് വൈസ് പ്രസിഡന്‍റ് വത്സല വാസു, വികസനകാര്യ സ്ഥിരം സമിതി അധ്യക്ഷ അശ്വതി പി. നായര്‍, ക്ഷേമകാര്യ സ്ഥിരം സമിതി അധ്യക്ഷന്‍ ടി. പ്രദീപ്കുമാര്‍, അസിസ്റ്റന്‍റ് സെക്രട്ടറി പുഷ്പകുമാരി തുടങ്ങിയവര്‍ പ്രസംഗിച്ചു.

അടൂർ നഗരത്തിൽ ഫീസ് ഈടാക്കിയുള്ള പാർക്കിംഗ് ഇന്നുമുതൽ

അടൂർ: നഗരത്തിൽ ഫീസ് ഈടാക്കിയുള്ള പാർക്കിംഗ് ഇന്നുമുതൽ ആരംഭിക്കും. ഇതിനുള്ള നടപടികൾ എല്ലാം പൂർത്തിയായി. പാർക്കിംഗ് ഒരുക്കുന്നതിന്‍റെ മുന്നോടിയായിട്ടുള്ള അടയാളപ്പെടുത്തലുകൾ കഴിഞ്ഞു. അടൂർ പാർഥസാരഥി ക്ഷേത്രത്തിന് എതിർവശം മുതൽ ഇന്ദ്രപ്രസ്ഥ ഹോട്ടലിന്‍റെ പ്രധാന കവാടം, കെഎസ്ആർടിസി സ്റ്റാൻഡിനോടു ചേർന്ന് പാർഥസാരഥി ക്ഷേത്ര ഭാഗത്തേക്ക് വരുന്നിടത്ത് ഇടതു വശം എന്നിവിടങ്ങളിലാണ് പാർക്കിംഗ്. ഈ ഭാഗങ്ങളിൽ ഇരുചക്രവാഹനങ്ങൾക്ക് മാത്രമാണ് പാർക്കിംഗ് . ക്ഷേത്രത്തിന് എതിർവശം കാറുകൾക്ക് പാർക്കിംഗ് ഉണ്ടാകും. ടൗൺ ഹാൾ ഭാഗത്തും പാർക്കിംഗ് പഴയ അടൂർ ടൗൺ ഹാൾ നിന്ന ഭാഗം താത്കാലികമായി ഫീസ് ഈടാക്കിയുള്ള പാർക്കിംഗ് തുടങ്ങാൻ നഗരസഭ തീരുമാനിച്ചു. പുതിയ ടൗൺ ഹാൾ നിർമാണം തുടങ്ങുന്നതുവരെയാണ് പാർക്കിംഗ്. ടൗൺഹാൾ നിന്ന സ്ഥലം ഇപ്പോൾ ഉപയോഗശൂന്യമായിക്കിടക്കുന്നതിനാൽ നഗരത്തിലെ ഗതാഗത തടസം ഒഴിവാക്കുന്നതിലേക്ക് യൂസർ ഫീ ഈടാക്കി എപ്പോൾ ആവശ്യമാണോ ആ സമയം തിരികെ എടുക്കത്തക്ക രീതിയിൽ വാഹന പാർക്കിംഗിനു നൽകണമെന്ന് നഗരസഭയോട് അടൂർ താലൂക്ക് വികസന സമിതി യോഗവും നിർദ്ദേശിച്ചിരുന്നു. പിരിവ് നടത്തുന്നത് കുടുംബശ്രീ നഗരസഭയിലെ നാല് കുടുംബശ്രീ അംഗങ്ങളെയാണ് പാർക്കിംഗ് ഫീസ് പിരിക്കുന്നതിന് ചുമതലപ്പെടുത്തിയിരിക്കുന്നത്. രാവിലെ ഏഴു മുതൽ രാത്രി എട്ടു വരെയാണ് ഇവരുടെ ജോലി സമയം. പാർക്കിംഗ് ഫീസ് ഇങ്ങനെ: ഒരു മണിക്കൂർ വരെ - നാലു ചക്രവാഹനങ്ങൾ: 10 രൂപ, ഇരുചക്രവാഹനങ്ങൾ: 5രൂപ, നിശ്ചയിച്ച സമയത്തിന് മുകളിൽ പോയാൽ അധികത്തിൽ തുക ഈടാക്കും.

സുബല പാര്‍ക്കിന് കൈകൊടുത്ത്‍ പത്തനംതിട്ട നഗരസഭ

80 ലക്ഷം രൂപയുടെ നിര്‍മാണ പ്രവര്‍ത്തനങ്ങള്‍ക്ക് തുടക്കമായി പത്തനംതിട്ട: ജില്ലാ ആസ്ഥാനത്തെ സ്വപ്ന പദ്ധതിയായ സുബല പാര്‍ക്ക് നിര്‍മാണത്തില്‍ നഗരസഭയുടെ ഇടപെടല്‍. പതിറ്റാണ്ടുകള്‍ പിന്നിട്ടിട്ടും പൂര്‍ത്തിയാകാത്ത സുബല പാര്‍ക്കില്‍ ഇതാദ്യമായാണ് പത്തനംതിട്ട നഗരസഭ പങ്കാളിയാകുന്നത്. പട്ടികജാതി വികസന വകുപ്പിന്‍റെ ചുമതലയില്‍ 1995 - 96 ല്‍ തുടക്കമിട്ട പദ്ധതിയാണിത്. ടൂറിസം വകുപ്പിന്‍റേതടക്കം ഇടപെടലുകളുണ്ടായെങ്കിലും പദ്ധതി പൂര്‍ണമായില്ല. 80 ലക്ഷം രൂപയുടെ നിര്‍മാണ പ്രവര്‍ത്തനങ്ങളാണ് കഴിഞ്ഞദിവസം നഗരസഭ ചെയര്‍മാന്‍ ടി. സക്കീര്‍ ഹുസൈന്‍ ഉദ്ഘാടനം ചെയ്തത്. പാര്‍ക്കിലെ തടാകത്തിനു ചുറ്റും ഭാഗികമായി നിര്‍മിച്ച ചുറ്റുമതില്‍ പൂര്‍ത്തിയാക്കുക, തടാകത്തിനു ചുറ്റും ടൈല്‍ വിരിച്ച് നടപ്പാത നിര്‍മിക്കുക എന്നിവയാണ് നഗരസഭ ഇപ്പോള്‍ ഏറ്റെടുത്തിരിക്കുന്ന പ്രധാന പ്രവര്‍ത്തനങ്ങൾ. അമൃത 2.ഒ പദ്ധതി പ്രകാരമാണ് ആവശ്യമായ ഫണ്ട് കണ്ടെത്തിയത്. തൊഴില്‍ പരിശീലനം, ടൂറിസം വികസനം, സാംസ്‌കാരിക വേദി തുടങ്ങിയ ലക്ഷ്യങ്ങളോടെയാണ് സുബല പാര്‍ക്ക് പദ്ധതി തയാറാക്കിയത്. വര്‍ഷങ്ങള്‍ക്കുശേഷം കണ്‍വന്‍ഷന്‍ സെന്‍റര്‍ അടക്കം പണിതുവെങ്കിലും നിര്‍മാണം പൂര്‍ത്തീകരിച്ച് തുറന്നു നല്കാനായില്ല. സാങ്കേതിക തടസങ്ങള്‍ മാറിക്കിട്ടി ജില്ലാ പട്ടികജാതി വകുപ്പിന്‍റെ ഉടമസ്ഥതയിലുള്ള സുബല പാര്‍ക്കിന്‍റെ വികസന പ്രവര്‍ത്തനങ്ങള്‍ക്കായി നഗരസഭ അമൃത് പദ്ധതിയില്‍ നിര്‍ദ്ദേശങ്ങള്‍ സമര്‍പ്പിച്ച് അനുമതി നേടിയെങ്കിലും നിര്‍വഹണം നഗരസഭയെ ഏല്പിക്കുന്നതിന് സാങ്കേതിക തടസങ്ങളുണ്ടായി. എന്നാല്‍ പദ്ധതിയില്‍ പങ്കാളിത്തമോ നടത്തിപ്പ് ചുമതലയോ നഗരസഭ ചോദിച്ചിട്ടില്ലെന്നും, ജില്ലാ ആസ്ഥാനത്തെ പ്രധാനപ്പെട്ട വിനോദ വിശ്രമ കേന്ദ്രമാക്കി പദ്ധതിയെ മാറ്റാന്‍ നഗരസഭ സഹായം ചെയ്യുക മാത്രമാണെന്നും കാണിച്ച് നഗരസഭ ചെയര്‍മാന്‍ പട്ടികജാതി വികസന മന്ത്രിക്ക് 2023 ല്‍ കത്ത് നല്‍കി. തുടര്‍ന്ന് നഗരസഭയുടെ മേല്‍നോട്ടത്തില്‍ നിലവിലെ നിര്‍വഹണ ഏജന്‍സിയായ ജില്ലാ നിര്‍മിതി കേന്ദ്രത്തെ വകുപ്പ് ചുമതലപ്പെടുത്തി. എന്നാല്‍ ജില്ലാ നിര്‍മിതികേന്ദ്രത്തിന് ഏറ്റെടുക്കാന്‍ കഴിയുന്ന പ്രവൃത്തികളുടെ തുക അധികരിച്ചതിനാല്‍ പദ്ധതി ഏറ്റെടുക്കാന്‍ ആവില്ലെന്ന് നിര്‍മിതി കേന്ദ്രം അറിയിച്ചു. ഇതോടെ ലഭിച്ച തുക നഷ്ടപ്പെടാതിരിക്കുന്നതിന് വേണ്ടി നിര്‍വഹണം ഏറ്റെടുക്കാന്‍ നഗരസഭ തയാറാണെന്ന് പട്ടികജാതി വികസന വകുപ്പിനെ അറിക്കുകയായിരുന്നു. 2024 ജൂലൈ 22 ന് നഗരസഭയ്ക്ക് വകുപ്പിന്‍റെ നിര്‍വഹണ അനുമതി ലഭിച്ചു. തുടര്‍ന്ന് ടെന്‍ഡര്‍ നടപടികള്‍ നഗരസഭ പൂര്‍ത്തിയാക്കിയിരുന്നു. ബോട്ടിംഗ് സൗകര്യമൊരുക്കും സുബല പാര്‍ക്കിന്‍റെ തുടര്‍ നിര്‍മാണ പ്രവര്‍ത്തനങ്ങളില്‍ നഗരസഭാ കൗണ്‍സിലിന് ഇടം നല്‍കാന്‍ കഴിഞ്ഞുവെന്നതാണ് പദ്ധതിയുടെ പ്രത്യേകത. ജനങ്ങള്‍ക്ക് വ്യായാമത്തിനും വിശ്രമത്തിനും ഉള്ള സാമൂഹിക ഇടമാക്കി പാര്‍ക്കിനെ മാറ്റുക എന്നതാണ് ലക്ഷ്യമെന്ന് നഗരസഭാ ചെയര്‍മാന്‍ ടി. സക്കീര്‍ ഹുസൈന്‍ പറഞ്ഞു. നിലവില്‍ നിര്‍മാണം നടത്തിയിട്ടുള്ള കുളത്തിനു ചുറ്റും നടപ്പാത നിര്‍മിക്കുന്നതോടെ അടുത്ത ഘട്ടമായി ബോട്ടിംഗ് ഉള്‍പ്പെടെയുള്ള സൗകര്യങ്ങളും ഒരുക്കാന്‍ കഴിയും. ഇതോടെ സഞ്ചാരികളെ ആകര്‍ഷിക്കാനും വിശ്രമകേന്ദ്രമാക്കി മാറ്റാനും കഴിയും. ജില്ലയുടെ പ്രതീക്ഷയായ ഒരു പദ്ധതിയില്‍ വലിയ പങ്കാളിയാകാന്‍ കഴിഞ്ഞുവെന്നതില്‍ നഗരസഭാ ഭരണസമിതിക്ക് സന്തോഷമുണ്ടെന്നും അദ്ദേഹം പറഞ്ഞു. സുബല പാര്‍ക്കിലെ തടാകത്തിന് ചുറ്റും ഭാഗികമായി നിര്‍മിച്ച ചുറ്റുമതില്‍ പൂര്‍ത്തിയാക്കുക, തടാകത്തിനു ചുറ്റും ടൈല്‍ വിരിച്ച് നടപ്പാത നിര്‍മിക്കുക എന്നീ പ്രവര്‍ത്തനങ്ങൾക്കായി 80 ലക്ഷം രൂപയാണ് അമൃത് 2.ഒ പദ്ധതി പ്രകാരം അനുവദിച്ചിട്ടുള്ളത്. നിലവില്‍ പൊതു ഇടപെടലുകള്‍ കാര്യമായി നടക്കാത്ത പാര്‍ക്കില്‍ നടപ്പാതപൂര്‍ത്തിയാകുന്നതോടെ പ്രഭാത - സായാഹ്ന നടത്തത്തിന് സാഹചര്യമൊരുങ്ങും. കൂടുതല്‍ ആളുകള്‍ എത്തിച്ചേരുന്ന സാമൂഹ്യ ഇടമായി പാര്‍ക്ക് മാറുന്നതോടെ സാംസ്‌കാരിക പ്രവര്‍ത്തനങ്ങള്‍ക്കും വേദിയാകുമെന്നും നിര്‍മാണോദ്ഘാടനം നിര്‍വഹിച്ച് ചെയര്‍മാന്‍ പറഞ്ഞു. സുബല പാര്‍ക്ക് കണ്‍വന്‍ഷന്‍ സെന്‍ററില്‍ നടന്ന ചടങ്ങില്‍ വാര്‍ഡ് കൗണ്‍സിലര്‍ സി. കെ. അര്‍ജുനന്‍ അധ്യക്ഷത വഹിച്ചു. ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ ജെറി അലക്‌സ്, പ്രതിപക്ഷ നേതാവ് എ. ജാസിംകുട്ടി, ജില്ലാ ആസൂത്രണ സമിതി അംഗം പി. കെ. അനീഷ്, കൗണ്‍സിലര്‍മാരായ ശോഭ കെ. മാത്യു, എ. സുരേഷ് കുമാർ, വിമല ശിവന്‍, സിഡിഎസ് ചെയര്‍പേഴ്‌സണ്‍ പൊന്നമ്മ ശശി, പൊതുപ്രവര്‍ത്തകരായ പി. കെ. ജേക്കബ്, എം.എച്ച്. ഷാജി, മാത്തൂര്‍ സുരേഷ്, ഷാഹുല്‍ ഹമീദ്, നൗഷാദ് കണ്ണങ്കര, സത്യന്‍ കണ്ണങ്കര, പി.വി. അശോക് കുമാർ, സിഡിഎസ് അംഗം കൊച്ചുമോള്‍ ജോസ്, അമൃത് കോഓഡിനേറ്റര്‍ ആദര്‍ശ്, ജില്ലാ പട്ടികജാതി ഓഫീസ് സൂപ്രണ്ട് ഫിലിപ്പ് മാത്യു തുടങ്ങിയവര്‍ പ്രസംഗിച്ചു.

വൈഎംസിഎ പ്രവര്‍ത്തന പദ്ധതികള്‍ ഉദ്ഘാടനം ചെയ്തു

പത്തനംതിട്ട: പത്തനംതിട്ട വൈഎംസിഎയുടെ ഒരു വര്‍ഷം നീണ്ടുനില്‍ക്കുന്ന പ്രവര്‍ത്തന പദ്ധതികള്‍ മന്ത്രി വീണാ ജോര്‍ജ് ഉദ്ഘാടനം ചെയ്തു.പ്രസിഡന്‍റ് രാജു തോമസിന്‍റെ അധ്യക്ഷതയില്‍ ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം മുഖ്യ പ്രഭാഷണം നടത്തി. മാര്‍ത്തോമ്മ സഭാ റാന്നി നിലയ്ക്കല്‍ ഭദ്രാസന സെക്രട്ടറി റവ. തോമസ് കോശി പനച്ചമൂട്ടില്‍ അനുഗ്രഹ സന്ദേശം നല്‍കി. വൈഎംസിഎ സ്ഥാപകന്‍ സര്‍ ജോര്‍ജ് വില്യംസിന്‍റെ 204 മത് ജന്മദിനാഘോഷം മുന്‍ ദേശിയ പ്രസിഡന്‍റ് ലെബി ഫിലിപ് മാത്യൂ ഉദ്ഘാടനം ചെയ്തു. വൈസ് പ്രസിഡന്‍റ് ബെന്നി ഏബ്രഹാം അജന്ത, സുനില്‍ പി. ഏബ്രഹാം, സാലി ജോൺ, അനി എം. ഏബ്രഹാം, ഏബല്‍.മാത്യു, വി.ടി. ഈശോ, അനൂ മാത്യു ജോര്‍ജ്. എന്നിവര്‍ പ്രസംഗിച്ചു.

മന്ത്രി വാസവന്‍റെ നിലപാട് അപഹാസ്യം: പുതുശേരി

വെണ്ണിക്കുളം: ശബരിമലയില്‍ വന്‍ കൊള്ള നടക്കുകയും ഹൈക്കോടതി തന്നെ അതു കണ്ടെത്തി സ്ഥിരീകരിക്കുകയും ചെയ്തിട്ടും എഫ്‌ഐആർ. ഇല്ലാത്തതുകൊണ്ട് താന്‍ രാജിവയ്‌ക്കേണ്ട ആവശ്യമില്ലെന്ന ദേവസ്വം മന്ത്രി വി. എൻ. വാസവന്‍റെ പ്രസ്താവന വിചിത്രവും അപഹാസ്യവുമാണെന്ന് കേരള കോണ്‍ഗ്രസ് വൈസ് ചെയര്‍മാന്‍ ജോസഫ് എം. പുതുശേരി. കേരള കോണ്‍ഗ്രസ് പുറമറ്റം മണ്ഡലം കണ്‍വന്‍ഷന്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ശബരിമലയുടെ ഭദ്രമായ സൂക്ഷിപ്പുകാരും ജാഗ്രതയുള്ള നടത്തിപ്പുകാരുമാകേണ്ട ദേവസ്വം മന്ത്രിയും ദേവസ്വം ബോര്‍ഡും അമ്പരപ്പിക്കുന്ന കൊള്ള നടന്നിട്ട് അത് തടയാനോ ഉത്തരവാദികളായവരുടെ മേല്‍ നടപടിയെടുക്കാനോ തുനിയാതെ അവരെ സംരക്ഷിക്കാനും വീണ്ടും കൊള്ളക്ക് വഴിയൊരുക്കാനുമാണ് ശ്രമിച്ചതെന്ന് പുതുശേരി പറഞ്ഞു. മണ്ഡലം പ്രസിഡന്‍റ് വര്‍ഗീസ് കച്ചിറക്കല്‍ അധ്യക്ഷത വഹിച്ചു. പാര്‍ട്ടി സീനിയര്‍ ജനറല്‍ സെക്രട്ടറി കുഞ്ഞുകോശി പോൾ, ജോണ്‍സണ്‍ കുര്യന്‍, ഷാജന്‍ മാത്യു, അഡ്വ. സൈമണ്‍ ഏബ്രഹാം, പഞ്ചായത്ത് പ്രസിഡന്‍റ് ജൂലി കെ. വര്‍ഗീസ്, ജോര്‍ജ് ഈപ്പന്‍ കല്ലാക്കുന്നേൽ, ജോര്‍ജ് വര്‍ഗീസ് തുണ്ടിയിൽ, വിനോദ് കളക്കുടി, സന്തോഷ് കരിമാലത്ത്, മാത്യു വല്ലത്ത്, ഫിലിപ്പ് സാബു, ജോസഫ് തോണ്ടക്കരോട്ട്, ഷാജി അലക്‌സ് എന്നിവര്‍ പ്രസംഗിച്ചു.

വനിത പ്രീ അസംബ്ലി സ്ത്രീകള്‍ നീതിക്കും സത്യത്തിനും വേണ്ടി നിലകൊള്ളണം: ഡോ. സിസ തോമസ്

അടൂര്‍: സ്ത്രീകള്‍ നീതിക്കും സത്യത്തിനും വേണ്ടി നിലകൊള്ളണമെന്ന് കേരള ഡിജിറ്റല്‍ സര്‍വകലാശാല വൈസ് ചാന്‍സലര്‍ ഡോ.സിസ തോമസ്. കേരള കൗണ്‍സില്‍ ഓഫ് ചര്‍ച്ചസ് സംസ്ഥാന വാര്‍ഷിക അസംബ്ലിക്ക് മുന്നോടിയായി അടൂര്‍ തുവയൂര്‍ എബനേസര്‍ മാര്‍ത്തോമ്മ പള്ളിയില്‍ നടന്ന വനിത പ്രീ അസംബ്ലി ഉദ്ഘാടനം ചെയ്തു പ്രസംഗിക്കുകയായിരുന്നു ഡോ.സിസ തോമസ്. കെസിസി പ്രസിഡന്‍റ് അലക്സിയോസ് മാര്‍ യൗസേബിയോസ് മെത്രാപ്പോലീത്ത അധ്യക്ഷത വഹിച്ചു. ജനറല്‍ സെക്രട്ടറി ഡോ.പ്രകാശ് പി.തോമസ്, കെസിസി വനിത കമ്മീഷന്‍ ചെയര്‍പേഴ്‌സണ്‍ ധന്യ ജോസ്, കണ്‍വീനര്‍ ദീദി ഷാജി, കെസിസി ജില്ലാ പ്രസിഡന്‍റ് ജാണ്‍സണ്‍ കല്ലിട്ടതില്‍ കോര്‍ എപ്പിസ്‌കോപ്പ, സ്വാഗത സംഘം ചെയമാന്‍ ഫാ. ഡോ.ഏബ്രഹാം ഇഞ്ചക്കലോടി കോര്‍ എപ്പിസ്‌കോപ്പ, ഫാ. ജോര്‍ജ് വര്‍ഗീസ്, ഫാ.ജോസഫ് സാമുവേല്‍ തറയിൽ, റവ.കെ.ഐ.ജോസ്, ഫാ. കെ.ജി.അലക്‌സാണ്ടര്‍, ഫാ.ഷിജു ബേബി, റവ.വിപിന്‍ സാം തോമസ്, റവ.പോള്‍ ജേക്കബ്, റവ.റോബിന്‍ ടി.മാത്യു, ഫാ.ജോണ്‍ സാമുവേല്‍ തയ്യിൽ, ഡെന്നീസ് സാംസണ്‍, വര്‍ഗീസ് ജി.കുരുവിള, സോമി ബിജു, ഡെയ്‌സി വര്‍ഗീസ്, ബൈജു ജോയി, ഷേര്‍ളി വര്‍ഗീസ് എന്നിവര്‍ പ്രസംഗിച്ചു.

ലഹരി വിമുക്ത സന്ദേശവുമായി കുടുംബശ്രീ ഉന്നതികളില്‍

പത്തനംതിട്ട: ഉന്നതികളെ ലഹരിമുക്തമാക്കുക എന്ന ലക്ഷത്തോടെ കുടുംബശ്രീ ജില്ലാമിഷനും ജില്ലാ എക്‌സൈസ് വിമുക്തി മിഷനും സംയുക്തമായി കൊല്ലം ഹാഗിയോസുമായി ചേര്‍ന്നു നടപ്പിലാക്കി വരുന്ന ലഹരി വിരുദ്ധ കാമ്പെയിന്‍ ബോധ 2025 പാവനാടകം ഇടത്താവളം ജംഗ്ഷനില്‍ റാന്നി ബ്ലോക്ക് പഞ്ചായത്ത് പ്രസിഡന്‍റ് കെ. എസ്. ഗോപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ്സ് അസോസിയേഷന്‍ പ്രസിഡന്‍റ് പി. എസ്. മോഹനന്‍ അധ്യക്ഷത വഹിച്ചു. കുടുംബശ്രീ ജില്ലാ മിഷന്‍ സ്‌നേഹിത ജെന്‍ഡര്‍ ഹെല്‍പ് ഡെസ്‌ക് പട്ടികവര്‍ഗ മേഖലയിലെ ഉന്നമനത്തിനായി വിവിധ അവബോധ പ്രവര്‍ത്തനങ്ങള്‍ സംഘടിപ്പിക്കുന്നതിന്‍റെ ഭാഗമായാണ് ജില്ലയിലെ റാന്നി പെരുനാട് പഞ്ചായത്തിലെ അട്ടത്തോട് കിഴക്കേകര, അട്ടത്തോട് പടിഞ്ഞാറെക്കര, ളാഹ എന്നീ ഉന്നതികളിലും പെരുനാട് ഇടത്താവളം ജംഗ്ഷനിലും ചിറ്റാര്‍ പഞ്ചായത്തിലെ കൊടുമുടി, കോതയാട്ടുപാറ, പാമ്പിനി എന്നീ ഉന്നതികളിലും ചിറ്റാര്‍ ബസ് സ്റ്റാന്‍ഡിലുമായി എട്ട് വേദി കളിലാണ് പവനാടകം സംഘടിപ്പിച്ചത്. കുടുംബശ്രീ ജില്ലാ മിഷന്‍ കോഓര്‍ഡിനേറ്റര്‍ എസ്. ആദില, കുടുംബശ്രീ ജെന്‍ഡര്‍ ജില്ലാ പ്രോഗ്രാം മാനേജര്‍ പി.ആർ. അനൂപ്, സിഡിഎസ് ചെയര്‍പേഴ്‌സണ്‍ ഷീല സന്തോഷ്, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ ബിജു ഫിലിപ്പ്, എക്‌സൈസ് പ്രിവന്‍റീവ് ഓഫീസര്‍ ബിനു വര്‍ഗീസ്, വിമുക്തി മിഷന്‍ ജില്ലാ കോഓര്‍ഡിനേറ്റര്‍ ജോസ് കളീക്കൽ, പെരുനാട് പഞ്ചായത്ത് വൈസ് പ്രസിഡന്‍റ് ഡി. ശ്രീകല, വാര്‍ഡ് മെംബര്‍ എം.എസ്. ശ്യാം, ഹാഗിയോസ് കോഓര്‍ഡിനേറ്റര്‍ ജോമോന്‍ ഹാഗിയോസ്, സ്‌നേഹിതാ സര്‍വീസ് പ്രൊവൈഡര്‍ കെ.എം. റസിയ, സിഡിഎസ് വൈസ് ചെയര്‍പേഴ്‌സണ്‍ ഹസീന എന്നിവര്‍ പ്രസംഗിച്ചു.

പമ്പ ഗണപതി കോവിലിലെ സന്ദര്‍ശനം പോലീസ് തടഞ്ഞു

പത്തനംതിട്ട: പമ്പ ഗണപതി കോവില്‍ സന്ദര്‍ശിക്കാനെത്തിയ ശബരിമല ആചാര സംരക്ഷണ സമിതി പ്രവര്‍ത്തകരെ പോലീസ് തടഞ്ഞു. നാറാണംതോട്, അട്ടത്തോട് പ്രദേശങ്ങളില്‍ നിന്നുള്ള സ്ത്രീകളും കുട്ടികളും ഉള്‍പ്പെട്ട സംഘത്തെയാണ് ത്രിവേണിയില്‍ പോലീസ് തടഞ്ഞത്. തുടര്‍ന്ന്, സമിതി പ്രവര്‍ത്തകര്‍ ശക്തമായി പ്രതിഷേധിച്ചതോടെ സ്ത്രീകളെയും കുട്ടികളെയും കോവില്‍ സന്ദര്‍ശിക്കാന്‍ അനുവദിച്ചു. ശബരിമല സ്വര്‍ണ കവര്‍ച്ചയുമായി ബന്ധപ്പെട്ട് ആചാര സംരക്ഷണ സമിതി രണ്ടാം ഘട്ട ശബരിമല സംരക്ഷണ സമരം തുടങ്ങുന്നതിന് മുന്നോടിയായി പമ്പ ഗണപതി കോവിലില്‍ നേര്‍ച്ച സമര്‍പ്പിക്കാനെത്തിയതായിരുന്നുവെന്ന് പറയുന്നു. മൂന്ന് വാഹനങ്ങളിലായി എത്തിയ പ്രവര്‍ത്തകരെ തടഞ്ഞ പോലീസ്, രാഷ്‌ട്രപതി ശബരിമല സന്ദര്‍ശിക്കുന്നതുമായി ബന്ധപ്പെട്ട് നിയന്ത്രണങ്ങള്‍ ഉള്ളതിനാല്‍ പ്രവേശനം നിഷേധിക്കുന്നതായി അറിയിച്ചു. എന്നാൽ, പൊതുജനങ്ങള്‍ക്കായി ഇത്തരമൊരു നിയന്ത്രണത്തെക്കുറിച്ച് യാതൊരു മുന്നറിയിപ്പും നല്‍കിയിരുന്നില്ലെന്ന് സമിതി പ്രവര്‍ത്തകര്‍ ആരോപിച്ചു. ഇതേ തുടര്‍ന്ന് പ്രവര്‍ത്തകരും പോലീസുമായി ഏറെ നേരം വാക്കേറ്റമുണ്ടായി. പി.വി. അനോജ് കുമാർ, ഗ്രാമപഞ്ചായത്ത് മെംബ്‍ ജിതേഷ് ഗോപാലകൃഷ്ണൻ, അരുണ്‍ അനിരുദ്ധന്‍, അനന്തു മണിലാൽ, സന്തോഷ് മടുക്കോലില്‍, ശ്യാം കുമാർ, സാനു മാമ്പാറ, സുരേഷ് മടുക്കോലിൽ, രാഘുനാഥന്‍ നായര്‍ എന്നിവരുടെ നേതൃത്വത്തിലാണ് സംഘം പമ്പയിലെത്തിയത്.

മിനിമം വേതനനിയമം നടപ്പാക്കുന്നതില്‍ സംസ്ഥാനം പരാജയം: ഐഎന്‍ടിയുസി

പത്തനംതിട്ട: കേരളത്തിലെ തൊഴില്‍ മേഖലകളില്‍ മിനിമം വേതന നിയമം ബാധകമായ 84 ഇനം സ്ഥാപനങ്ങളില്‍ കാലാകാലങ്ങളില്‍ കുറഞ്ഞ കൂലിക്ക് വിജ്ഞാപനം പുറപ്പെടുവിപ്പിക്കാറുണ്ടെങ്കിലും അതു ലഭിക്കുന്നുണ്ടോയെന്ന് ഉറപ്പാക്കുന്നതില്‍ സംസ്ഥാന സര്‍ക്കാര്‍ സമ്പൂര്‍ണ പരാജയമാണെന്ന് ഐഎന്‍ടിയുസി അഖിലേന്ത്യാ സെക്രട്ടറി വി. ജെ. ജോസഫ്. തോട്ടം തൊഴിലാളി ഫെഡറേഷന്‍ സംസ്ഥാന വര്‍ക്കിംഗ് കമ്മിറ്റി യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇത്തരത്തില്‍ വിജ്ഞാപനം പുറത്തിറക്കിയ 14 വ്യവസായങ്ങളില്‍ കുറഞ്ഞ കൂലി നടപ്പാക്കാതിരിക്കാന്‍ ഉടമ സംഘടനകള്‍ ഹൈക്കോടതിയില്‍ നിന്ന് സ്റ്റേ സമ്പാദിച്ചിരിക്കുകയാണ്. തൊഴിലാളി സമൂഹത്തിന് നീതി ലഭിക്കും വിധം കോടതികളില്‍ വാദമുഖങ്ങള്‍ നിരത്തുന്നതില്‍ സര്‍ക്കാര്‍ അഭിഭാഷകര്‍ അലംഭാവം കാണിക്കുകയാണെന്നും ജെ. ജോസഫ് കുറ്റപ്പെടുത്തി. ഫെഡറേഷന്‍ സംസ്ഥാന പ്രസിഡന്‍റ് പി.ജെ. ജോയ് അധ്യക്ഷത വഹിച്ചു. ആന്‍റോ ആന്‍റണി എംപി അധ്യക്ഷത വഹിച്ചു. എ. കെ. മണി, ജ്യോതിഷ് കുമാര്‍ മലയാലപ്പുഴ, എ. ഷംസുദ്ദീൻ, വി. ആര്‍. പ്രതാപൻ, പി.ആര്‍ അയ്യപ്പന്‍, സി. ആർ. നജീബ്, ജി. മുനിയാണ്ടി, രാജാ മാട്ടുക്കാരൻ, ഹരികുമാര്‍ പൂതങ്കര, പി. കെ. ഗോപി എന്നിവര്‍ പ്രസംഗിച്ചു. തോട്ടം തൊഴിലാളികളുടെ കൂലി വര്‍ധന ഉള്‍പ്പെടെയുള്ള 21 ഇന ആവശ്യങ്ങള്‍ സര്‍ക്കാരിന് മുമ്പാകെ സമര്‍പ്പിക്കാന്‍ വര്‍ക്കിംഗ് കമ്മിറ്റി യോഗം തീരുമാനിച്ചു.

ജില്ലാ സ്‌കൂള്‍ കായികമേള നാളെ മുതല്‍ കൊടുമണ്ണില്‍

പത്തനംതിട്ട: റവന്യു ജില്ലാ സ്‌കൂള്‍ കായികമേള നാളെ മുതല്‍ 16 വരെ കൊടുമണ്‍ ഇഎംഎസ് സ്റ്റേഡിയത്തില്‍ നടക്കും. നാളെ രാവിലെ ഒമ്പതിന് ഗ്രാമപഞ്ചായത്ത് പ്രസിഡന്‍റ് കെ.കെ. ശ്രീധരന്‍ പതാക ഉയര്‍ത്തും. ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ് കെ. അനില്‍ കുമാര്‍ മാര്‍ച്ച് പാസ്റ്റില്‍ അഭിവാദ്യം സ്വീകരിക്കും. പത്തിന് കായികമേളയുടെ ഉദ്ഘാടനം മന്ത്രി വീണാ ജോര്‍ജ് നിര്‍വഹിക്കും. ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ അധ്യക്ഷത വഹിക്കും. ത്രിതല പഞ്ചായത്തംഗങ്ങൾ, വിദ്യാഭ്യാസ വകുപ്പ് ഉദ്യോഗസ്ഥര്‍ തുടങ്ങിയവര്‍ പ്രസംഗിക്കും. 11 ഉപജില്ലകളില്‍ നടന്ന മത്സരങ്ങളില്‍ വിജയികളായവരാണ് ജില്ലാതലത്തില്‍ പങ്കെടുക്കുന്നത്. ഹൈസ്‌കൂൾ, ഹയര്‍ സെക്കന്‍ഡറി തലങ്ങളില്‍ വിവിധ കാറ്റഗറികളിലായിട്ടാണ് മത്സരങ്ങൾ. നാളെ രാവിലെ സീനിയര്‍ ആണ്‍കുട്ടികളുടെയും പെണ്‍കുട്ടികളുടെയും 1500 മീറ്റര്‍ ഓട്ടമത്സരത്തോടെയാണ് തുടക്കം. വിവിധ ഫൈനലുകള്‍ ഉള്‍പ്പെടെ 138 മത്സരങ്ങളാണ് മൂന്നുദിവസമായി നടക്കുന്നത്. 16നു വൈകുന്നേരം സമാപനസമ്മേളനം ആന്‍റോ ആന്‍റണി എംപി ഉദ്ഘാടനം ചെയ്യും. കെ.യു. ജനീഷ് കുമാര്‍ എംഎല്‍എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം സമ്മാനദാനവും ആരോഗ്യ, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ആർ. അജയകുമാര്‍ സര്‍ട്ടിഫിക്കറ്റ് വിതരണവും നിര്‍വഹിക്കും.

ഫയര്‍ഫോഴ്‌സിനു പിടിപ്പതു പണി

മൂന്നിടങ്ങളിലായി തിരക്കിട്ട ജോലികളാണ് ഇന്നലെ പത്തനംതിട്ട ഫയര്‍ഫോഴ്‌സ് സ്‌കൂബാ ടീമിനു നിര്‍വഹിക്കാനുണ്ടായിരുന്നത്. കൈപ്പട്ടൂരില്‍ ബുധനാഴ്ച കാണാതായ പെണ്‍കുട്ടിക്കുവേണ്ടി മൂന്നുദിവസം തെരച്ചില്‍ നടത്തിയിട്ടും ഫലമുണ്ടാകാതെ വന്നപ്പോള്‍ എന്‍ഡിആര്‍എഫ് സംഘത്തെയും പുറമേ നിന്നുള്ള മുങ്ങല്‍ വിദഗ്ധരെയും കൊണ്ടുവന്നെങ്കിലും ഫയര്‍ഫോഴ്‌സ് സംഘമാണ് കുടുങ്ങിക്കിടന്ന നിലയില്‍ മൃതദേഹം കണ്ടെടുത്തത്. പിന്നാലെ താഴൂര്‍ക്കടവില്‍ കാണാതായ യുവാവിന്‍റെ മൃതദേഹവും റാന്നിയില്‍ മുങ്ങിമരിച്ചയാളിന്‍റെ മൃതദേഹവും കണ്ടെടുത്തു. പ്രത്യേക പരിശീലനം നേടിയവരെ കൂടി ഉള്‍പ്പെടുത്തിയാണ് പത്തനംതിട്ടയിലെ സ്‌കൂബാ ടീം പ്രവര്‍ത്തിക്കുന്നത്. നദിയില്‍ ജലനിരപ്പ് കുറവാണെങ്കിലും അപകട സാധ്യത ഏറെയാണ്. കടവുകള്‍ ചെളി നിറഞ്ഞു കിടക്കുന്നതിനാല്‍ വെള്ളത്തിലേക്ക് അകപ്പെട്ടാല്‍ താഴ്ന്നു പോകാനാണ് സാധ്യത. കുറ്റിക്കാടുകളിലും മറ്റും കുടുങ്ങിയാല്‍ രക്ഷപ്പെടുത്തല്‍ ആയാസകരമാണ്. അസിസ്റ്റന്‍റ് സ്റ്റേഷന്‍ ഓഫീസര്‍ എ. സാബു, ഫയര്‍ ഓഫീസര്‍മാരായ കെ. പ്രേംകുമാർ, സുജിത് നായര്‍, ഹരിക്കുട്ടന്‍, അജിലേഷ്, എസ്. അസിം, ഗാര്‍ഡ് ആർ. രാജേഷ് എന്നിവരുടെ നേതൃത്തിലാണ് ഇന്നലെ സ്‌കൂബാ ടീം പ്രവര്‍ത്തിച്ചത്.

പമ്പാനദിയില്‍ കുളിക്കാനിറങ്ങിയ യുവാവ് മരിച്ചു

റാന്നി: പമ്പാനദിയില്‍ സുഹൃത്തിനൊപ്പം കുളിക്കാനിറങ്ങിയ തിരുവനന്തപുരം സ്വദേശി മുങ്ങിമരിച്ചു. വലിയതുറ മുട്ടത്തറ വള്ളക്കടവ് അനിതാ ഭവനില്‍ ഷൈനു (45) വാണ് മുങ്ങിമരിച്ചത്. ഇന്നലെ രാവിലെ 8.45ന് റാന്നി രാമപുരം ഭജനമഠം കടവില്‍ കുളിക്കുന്നതിനിടെ ഷൈനു ഒഴുക്കില്‍പ്പെടുകയായിരുന്നുവെന്ന് പറയുന്നു. പത്തനംതിട്ടയില്‍നിന്നുള്ള ഫയര്‍ഫോഴ്‌സ് സ്‌കൂബാ ടീം ഉച്ചയോടെ കുളിക്കടവിനു സമീപത്തുനിന്ന് മൃതദേഹം കണ്ടെടുത്തു. മിന്നല്‍ രക്ഷാകവചത്തിന്‍റെ ജോലി നടത്തിവരികയായിരുന്നു ഷൈനു. മൃതദേഹം റാന്നിയിലെ സ്വകാര്യ ആശുപത്രി മോര്‍ച്ചറിയിൽ.

അച്ചന്‍കോവിലാറ്റില്‍ നിന്നു രണ്ട് മൃതദേഹങ്ങള്‍ കണ്ടെടുത്തു

പത്തനംതിട്ട: അച്ചന്‍കോവിലാറ്റില്‍ ചാടിയതായി സംശയിക്കുന്ന രണ്ടു പേരുടെയും റാന്നിയില്‍ മുങ്ങിമരിച്ചയാളിന്‍റെയും മൃതദേഹങ്ങള്‍ ഫയര്‍ഫോഴ്‌സ് സ്‌കൂബാ ടീം കണ്ടെടുത്തു. കൈപ്പട്ടൂര്‍ പാലത്തില്‍ നിന്നു കഴിഞ്ഞ ബുധനാഴ്ച വൈകുന്നേരം അച്ചന്‍കോവിലാറ്റില്‍ ചാടി കാണാതായ പെണ്‍കുട്ടിയുടെ മൃതദേഹമാണ് ഇന്നലെ കണ്ടെത്തിയത്. ചന്ദനപ്പള്ളി നല്ലാനിക്കുന്ന് സന്തോഷ് - അജയശ്രീ ദമ്പതികളുടെ മകള്‍ എസ്. സന്ധ്യ (17) യുടെ മൃതദേഹമാണ് ഇന്നലെ രാവിലെ കൈപ്പട്ടൂരില്‍ അച്ചന്‍കോവിലാറ്റില്‍ കണ്ടെത്തിയത്. മൈലപ്രയിലെ സ്വകാര്യ ഐടിഐ യില്‍ ഡീസല്‍ മെക്കാനിക് കോഴ്‌സ് വിദ്യാര്‍ഥിനിയായിരുന്നു. ബുധനാഴ്ച വൈകുന്നേരം പെണ്‍കുട്ടി പാലത്തില്‍ നിന്നു ചാടിയതായി വിവരം ലഭിച്ചതിനേ തുടര്‍ന്ന് പത്തനംതിട്ടയില്‍ നിന്നും അഗ്‌നി രക്ഷാ സേന സ്‌കൂബാ ടീം തെരച്ചില്‍ ആരംഭിച്ചിരുന്നു. ഇന്നലെ രാവിലെ സ്‌കൂബ ടീം നടത്തിയ തെരച്ചിലില്‍ കൈപ്പട്ടൂര്‍ ആറാട്ട് കടവിന് ഒരു കിലോമീറ്റര്‍ അകലെ മുളങ്കൂട്ടത്തില്‍ കുടുങ്ങിക്കിടക്കുന്ന നിലയില്‍ മൃതദേഹം കണ്ടെത്തുകയായിരുന്നു. പരിശോധനയ്ക്കായി ഇന്നലെ എന്‍ഡിആര്‍എഫ് സംഘത്തെയും സ്ഥലത്തെത്തിച്ചിരുന്നുവെങ്കിലും അവര്‍ ശ്രമം തുടങ്ങുന്നതിനു മുമ്പേ മൃതദേഹം കണ്ടെത്തി. കൊടുന്തറയില്‍ മരിച്ചത് കരിമാന്‍തോട് സ്വദേശി പത്തനംതിട്ട: അച്ചന്‍കോവിലാറ്റില്‍ കൊടുന്തറ ഭാഗത്ത് ശനിയാഴ്ച രാത്രി ചാടിയതായി കരുതുന്ന യുവാവിന്‍റെ മൃതദേഹം ഫയര്‍ഫോഴ്സ് സ്‌കൂബ ടീം നടത്തിയ തെരച്ചിലില്‍ കണ്ടെത്തി. കൊടുന്തറ പടിഞ്ഞാറേ പഴന്തറ അപ്പാര്‍ട്ട്മെന്‍റില്‍ താമസിക്കുന്ന കരിമാന്‍തോട് സ്വദേശി പ്രസാദ് - കലാകുമാരി ദമ്പതികളുടെ മകനായ നന്ദു പ്രസാദി (25)ന്‍റെ മൃതദേഹമാണ് ഇന്നലെ ഉച്ചയോടെ താഴൂര്‍ക്കടവ് ഭാഗത്തു നിന്ന് കണ്ടെടുത്തത് . കുടുംബ വഴക്കിനേ തുടര്‍ന്ന് ശനിയാഴ്ച രാത്രിയാണ് അച്ചന്‍കോവിലാറ്റില്‍ കൊടുന്തറ ഭാഗത്ത് നന്ദു ചാടിയതെന്ന് പറയുന്നു. ഭാര്യ നല്‍കിയ പരാതിയുടെ പരാതിയുടെ അടിസ്ഥാനത്തില്‍ തിരോധാനത്തിന് പോലീസ് കേസ് രജിസ്റ്റര്‍ ചെയ്തിരുന്നു. രാത്രിയില്‍ ബന്ധുക്കള്‍ നടത്തിയ തെരച്ചിലില്‍ കൊടുന്തറ സുബ്രഹ്‌മണ്യ സ്വാമി ക്ഷേത്രത്തിന് തൊട്ടടുത്തുള്ള ബലിക്കടവില്‍ നന്ദുവിന്‍റെ കുട, ചെരുപ്പ് എന്നിവ കണ്ടെടുത്തിരുന്നു. ഇതേ തുടര്‍ന്നാണ് ഇന്നലെ ഉച്ചയോടെ താഴൂര്‍ക്കടവ് ഭാഗത്ത് നിന്ന് മുകളിലേക്ക് ഫയര്‍ഫോഴ്സ് സ്‌കൂബ നടത്തിയതെരച്ചിലില്‍ മൃതദേഹം കണ്ടെടുത്തത്. പത്തനംതിട്ട പോലീസ് മേല്‍നടപടി സ്വീകരിച്ചു.‌

സംസ്ഥാനത്ത് ശിശുമരണനിരക്ക് ഏറ്റവും കുറഞ്ഞ നിലയിൽ: മന്ത്രി വീണാ ജോര്‍ജ്

പത്തനംതിട്ട: സംസ്ഥാനത്ത് ശിശുമരണനിരക്ക് ചരിത്രത്തിലെ ഏറ്റവും കുറഞ്ഞ നിലയിലെന്ന് മന്ത്രി വീണാ ജോര്‍ജ്. പള്‍സ് പോളിയോ ഇമ്യൂണൈസേഷന്‍ പരിപാടിയുടെ സംസ്ഥാനതല ഉദ്ഘാടനം കോഴഞ്ചേരി സര്‍ക്കാര്‍ ഹൈസ്‌കൂളില്‍ നിര്‍വഹിച്ചു പ്രസംഗിക്കുകയായിരുന്നു മന്ത്രി. കുഞ്ഞുങ്ങളെ രോഗമുക്തരാക്കി ജീവിത നിലവാരം ഉയര്‍ത്തുകയാണ് ലക്ഷ്യം. അഞ്ചു വയസിനു താഴെള്ളവര്‍ക്കാണ് തുള്ളിമരുന്ന് നല്‍കുന്നത്. 21,11,010 കുട്ടികള്‍ക്ക് പ്രത്യേകം സജ്ജീകരിച്ച ബൂത്തുകള്‍ വഴി തുള്ളിമരുന്ന് നല്‍കും. ട്രാന്‍സിറ്റ്, മൊബൈല്‍ ബൂത്തുകള്‍ ഉള്‍പ്പെടെ 22,383 ബൂത്തുകളാണ് പ്രവര്‍ത്തിക്കുക. 44,766 വോളണ്ടിയര്‍മാര്‍ ബൂത്ത് പ്രവര്‍ത്തനങ്ങള്‍ക്ക് നേതൃത്വം നല്‍കും. ഇന്നലെ ബൂത്തുകളില്‍ തുള്ളിമരുന്ന് നല്‍കാന്‍ കഴിയാത്തവര്‍ക്ക് ഇന്നും നാളെയും വോളണ്ടിയര്‍മാര്‍ വീട്ടിലെത്തി തുള്ളിമരുന്ന് നല്‍കും. കേരളത്തില്‍ 2000നു ശേഷവും ഇന്ത്യയില്‍ 2011നു ശേഷവും പോളിയോ രോഗം റിപ്പോര്‍ട്ട് ചെയ്തിട്ടില്ല. 2014 മാര്‍ച്ചില്‍ ലോകാരോഗ്യ സംഘടന ഇന്ത്യയെ പോളിയോമുക്ത രാജ്യമായി പ്രഖ്യാപിച്ചിട്ടുണ്ട്. അയല്‍ രാജ്യങ്ങളായ പാകിസ്ഥാൻ, അഫ്ഗാനിസ്ഥാന്‍ എന്നിവിടങ്ങളില്‍ പോളിയോ രോഗം ഇപ്പോഴും റിപ്പോര്‍ട്ട് ചെയ്യപ്പെടുന്നതിനാല്‍ രോഗസാധ്യത ഒഴിവാക്കുന്നതിനായാണ് വാക്‌സിന്‍ നല്‍കുന്നതെന്നും മന്ത്രി പറഞ്ഞു. വനിതാശിശു വികസനം, തദ്ദേശസ്വയംഭരണം തുടങ്ങിയ വകുപ്പുകൾ, റോട്ടറി ഇന്‍റര്‍നാഷണല്‍, നാഷണല്‍ സര്‍വീസ് സ്‌കീം, മറ്റു സന്നദ്ധ സംഘടനകള്‍ എന്നിവയുടെ സഹകരണത്തോടെയാണ് പരിപാടി സംഘടിപ്പിച്ചത്. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിച്ചു. ആരോഗ്യ കുടുംബക്ഷേമ വകുപ്പ് ഡയറക്ടര്‍ ഡോ. കെ. ജെ. റീന, അഡീഷണല്‍ ഡയറക്ടര്‍ ഡോ. വി. മീനാക്ഷി, ലോകാരോഗ്യ സംഘടന പ്രതിനിധികളായ ഡോ. സൈറ ഭാനു, ഡോ. ആശാ രാഘവൻ, ജില്ലാ പഞ്ചായത്ത് ആരോഗ്യ സ്ഥിരം സമിതി അധ്യക്ഷന്‍ ആർ. അജയകുമാര്‍, അംഗം സാറാ തോമസ്, ഇലന്തൂര്‍ ബ്ലോക്ക് പഞ്ചായത്ത് പ്രസിഡന്‍റ് ജെ. ഇന്ദിരാദേവി, ആരോഗ്യ സ്ഥിരം സമിതി അധ്യക്ഷ സാലി ലാലു, കോഴഞ്ചേരി ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ്, അംഗങ്ങളായ ഗീതു മുരളി, ബിജിലി പി. ഈശോ, റോട്ടറി ജില്ല പ്രോജക്ട് ഓപ്പോള്‍ ചീഫ് കണ്‍വീനര്‍ നിഷ ജോസ്, ജില്ലാ മെഡിക്കല്‍ ഓഫീസര്‍ ഡോ. എല്‍. അനിതകുമാരി, ആരോഗ്യ കേരളം ജില്ലാ പ്രോഗ്രാം മാനേജര്‍ ഡോ. എസ്. ശ്രീകുമാര്‍, സ്റ്റേറ്റ് മാസ് എഡ്യൂക്കേഷന്‍ മീഡിയ ഓഫീസര്‍ ജെ. ഡോമി, ജില്ലാ ആര്‍സിഎച്ച് ഓഫീസര്‍ ഡോ. കെ. കെ. ശ്യാംകുമാർ, ഇന്ത്യന്‍ അക്കാഡമി ഓഫ് പീഡിയാട്രിക് ജില്ലാ സെക്രട്ടറി ഡോ.ബിബിന്‍ സാജന്‍, കോഴഞ്ചേരി ജില്ലാ ആശുപത്രി സൂപ്രണ്ട് ഡോ. നിതീഷ് ഐസക് സാമുവൽ, ജില്ലാ എഡ്യൂക്കേഷന്‍ മീഡിയ ഓഫീസര്‍ എസ്. ശ്രീകുമാർ, റോട്ടറി റവന്യു ജില്ലാ ഡയറക്ടര്‍ ഷാജി വര്‍ഗീസ്, റോട്ടറി അസി്ററന്റ് ഗവര്‍ണര്‍ പ്രമോദ് ഫിലിപ്പ്, കോഴഞ്ചേരി റോട്ടറി ക്ലബ് പ്രസിഡന്‍റ് ബിജു ഏബ്രഹാം തുടങ്ങിയവര്‍ പ്രസംഗിച്ചു.

ഭക്ഷണം ഉറപ്പാക്കിയത് 724 വീടുകളിൽ : 1839 കുടുംബങ്ങൾക്ക് ദാരിദ്ര്യമുക്തി

പത്തനംതിട്ട: ജില്ലയിൽ അതിദരിദ്രരെന്ന് കണ്ടെത്തിയവരിൽ 1839 കുടുംബങ്ങൾക്ക് ആശ്വാസം. 2206 കുടുംബങ്ങളാണ് അതിദരിദ്രരുടെ അന്തിമപട്ടികയിൽ ജില്ലയിൽ ഇടംപിടിച്ചിരുന്നത്. ഇതിൽ 1839 കുടുംബങ്ങളെ വിവിധ സേവനങ്ങൾ ഒരുക്കി അതിദാരിദ്ര്യത്തിൽ നിന്ന്‌ മോചിപ്പിച്ചതായാണ് തദ്ദേശവകുപ്പിന്‍റെ കണക്ക്. 724 കുടുംബങ്ങൾക്ക്‌ ഭക്ഷണവും 91 കുടുംബങ്ങൾക്ക്‌ വരുമാന ഉപാധികളും ഒരുക്കി നൽകി ദാരിദ്ര്യത്തിൽ നിന്നു കരകയറ്റിയതായി സർക്കാർ രേഖകളിൽ കാണുന്നു. ഭക്ഷണ ലഭ്യത, ആരോഗ്യപരമായ കാരണങ്ങൾ, വരുമാനശേഷി ഇല്ലാത്തവർ, വാസസ്ഥലം ഇല്ലാത്തവർ, പ്രത്യേക സാമൂഹിക വിഭാഗത്തിൽപ്പെട്ടവർ, സാമൂഹിക ദുർബലത അനുഭവിക്കുന്ന കുടുംബം എന്നിങ്ങനെ തരംതിരിച്ചാണ് അതിദരിദ്രരുടെ അന്തിമ പട്ടിക തയാറാക്കിയത്. ജില്ലയിലെ 53 പഞ്ചായത്തുകളിലും നാല് മുനിസിപ്പാലിറ്റികളിലും സർവേ നടത്തിയാണ് അതിദരിദ്രരെ കണ്ടെത്തിയത്. ജില്ലയിൽ വരുമാനമില്ലാത്തതു മൂലം പട്ടികയിൽപ്പെട്ടവരാണ് അധികവും. ഇവരിൽനിന്ന് മരിച്ചവർ, അലഞ്ഞുതിരിഞ്ഞു നടക്കുന്നതുകാരണം സേവനം നൽകാൻ കഴിയാത്തവർ, സ്വന്തം നിലയ്ക്ക് അതി ദാരിദ്ര്യമുക്തരായവർ എന്നിവരെ ഒഴിവാക്കിയപ്പോൾ പട്ടിക 1976 കുടുംബങ്ങളായി ചുരുങ്ങിയിരുന്നു. ഇവരിൽ 1839 കുടുംബങ്ങളെയാണ് തദ്ദേശവകുപ്പിന്‍റെ നേതൃത്വത്തിൽ വിവിധ വകുപ്പുകളുമായി സഹകരിച്ച്, ദാരിദ്ര്യത്തിൽനിന്ന് മോചിപ്പിക്കാനുള്ള നടപടി സ്വീകരിച്ചത്. അവശേഷിക്കുന്നവരുടെ കാര്യത്തിൽ വിവിധ നടപടികൾ പുരോഗമിക്കുകയാണെന്നും അധികൃതർ പറയുന്നു. 50 പേർക്ക് വീട് അതിദാരിദ്ര്യത്തിൽ നിന്നുള്ള മോചനപ്രകാരം 50 പേർക്ക് വീടും നൽകി. 10 പേർക്ക് വീടും വസ്തുവും ലഭ്യമാക്കിയതായും തദ്ദേശവകുപ്പ് അധികൃതർ പറയുന്നു. ജില്ലയിൽ വീട് നിർമാണത്തിന്‌ റവന്യു ഭൂമി കണ്ടെത്തേണ്ടിയിരുന്നത് 18 പേർക്കായിരുന്നു. ഇതിൽ പത്ത് പേർക്ക് സ്ഥലം കണ്ടെത്തി. അവശേഷിക്കുന്നവർക്ക് സ്ഥലം ലഭ്യമാക്കാനുള്ള നടപടികൾ പുരോഗമിക്കുകയാണ്. 924 കുടുംബങ്ങൾക്ക്‌ ആരോഗ്യ സേവനവും ലഭ്യമാക്കി. 157 കിടപ്പുരോഗികൾക്കുള്ള പരിപാലനവും ആറുപേർക്ക് ചികിത്സാ ഉപകരണങ്ങളും തദ്ദേശസ്ഥാപനങ്ങൾ ഉറപ്പാക്കി. അവകാശം അതിവേഗം പദ്ധതിയിലുൾപ്പെടുത്തി 808 കുടുംബങ്ങൾക്ക് വിവിധ രേഖകളും അനുവദിച്ചു. റേഷൻ കാർഡ്, ആധാർ, വോട്ടർ ഐഡി, ആരോഗ്യ ഇൻഷ്വറൻസ്, സാമൂഹിക സുരക്ഷാപെൻഷൻ, കുടുംബശ്രീ അംഗത്വം, ബാങ്ക് അക്കൗണ്ട്, ഭിന്നശേഷി തിരിച്ചറിയൽ കാർഡ്, തൊഴിൽ കാർഡ് എന്നീ രേഖകളാണ് വിതരണം ചെയ്തത്. ഗുണഭോക്താക്കളിൽ ചികിത്സ, ശസ്ത്രക്രിയ, ആരോഗ്യസേവനം തുടങ്ങിയവ ആവശ്യമുള്ളവർക്കായി വാതിൽപ്പടി സേവനവും നൽകിത്തുടങ്ങിയിട്ടുണ്ട്. അതിദരിദ്രരില്ലാത്ത സംസ്ഥാനമാക്കി കേരളത്തെമാറ്റാൻ ലക്ഷ്യമിട്ട് സെപ്റ്റംബർ ഒന്നിനാരംഭിച്ച പ്രവർത്തങ്ങൾ 28നു സമാപിക്കും. നവംബർ ഒന്നിന് അതിദാരിദ്ര്യമുക്ത സംസ്ഥാനമായി പ്രഖ്യാപിക്കാനുള്ള ഒരുക്കങ്ങളാണ് നടക്കുന്നത്.

ആർച്ച് ബിഷപ് ബനഡിക്ട് മാർ ഗ്രീഗ്രോറിയോസ് അനുസ്‌മരണം

തിരുവല്ല: മലങ്കര കാത്തലിക് അസോസിയേഷൻ (എംസിഎ) തിരുവല്ല മേഖലയുടെ നേതൃത്വത്തിൽ മലങ്കര സുറിയാനി കത്തോലിക്കാ സഭയുടെ ദ്വിതീയ മെത്രാപ്പോലീത്ത ആർച്ച് ബിഷപ് ബനഡിക്ട് മാർ ഗ്രീഗോറിയോസ് മെത്രാപ്പോലീത്തയുടെ 31 ാമത് ഓർമപ്പെരുന്നാളിനോടനുബന്ധിച്ച് (പ്രണാമം 2025 )കോട്ടൂർ തുരുത്തേൽ മാർ ഗ്രീഗ്രോറിയോസ് മണ്ഡപത്തിലെ ദിവ്യകാരുണ്യാലയത്തിൽ അനുസ്മരണ പ്രഭാഷണവും സമ്മേളനവും മാർ ഗ്രീഗ്രോറിയോസ് മണ്ഡപത്തിൽ പുഷ്പാർച്ചനയും നടന്നു. എംസിഎ പ്രസിഡന്‍റ് ബിജു ജോർജ് അധ്യക്ഷത വഹിച്ച അനുസ്‌മരണ സമ്മേളനം തിരുവല്ല സോഷ്യൽ സർവീസ് സൊസൈറ്റി ഡയറക്ടർ ഫാ. തോമസ് കാഞ്ഞിരത്തിങ്കൽ ഉദ്ഘാടനം ചെയ്തു. എംസിവൈഎം അതിഭദ്രാസന ഡയറക്ടർ ഫാ. ചെറിയാൻ കുരിശുംമൂട്ടിൽ അനുസ്മരണ പ്രഭാഷണവും ഫാ. മാത്യു വാഴയിൽ അനുഗ്രഹസന്ദേശവും നൽകി. തുടർന്ന് ധൂപ പ്രാർഥനയും നടന്നു. അന്തേവാസികൾക്ക് വസ്ത്രങ്ങളും ആഹാരസാധനങ്ങളും നൽകി. സഭാതല വൈസ് പ്രസിഡന്‍റ് ഷിബു മാത്യു ചുങ്കത്തിൽ, എംസിവൈഎം സഭാതല പ്രസിഡന്‍റ് മോനു ജോസഫ്, ദിവ്യകാരുണ്യാലയം ഡയറക്ടർ ഫാ. സുബിൻ കുറവക്കാട്ട് , തങ്ങളത്തിൽ ട്രസ്റ്റ് ഭാരവാഹികളായ നെബു തങ്ങളത്തിൽ, ജോയ് സാം, ജെയ്മോൻ, വൽസമ്മ ജോൺ, പുഷ്പാ നൈനാൻ, പി.സ. ജോർജ്, ബെർസിലി ജോസഫ്, ജനറൽ സെക്രട്ടറി ജോൺ മാമ്മൻ , കോട്ടൂർ യൂണിറ്റ് പ്രസിഡന്‍റ് യോഹന്നാൻ സൈമൺ എന്നിവർ പ്രസംഗിച്ചു.

സ്കൗട്ട്സ് ആൻഡ് ഗൈഡ്സ് ക്യാന്പ്

റാന്നി: കേരള സ്റ്റേറ്റ് ഭാരത് സ്കൗട്ട് ആൻഡ് ഗൈഡ്സിന്‍റെ റാന്നി എംഎസ് എച്ച്എസ്എസ് യൂണിറ്റിന്‍റെ ത്രിദിന ക്യാമ്പും റോവർ റേഞ്ചർ യൂണിറ്റിന്‍റെ ഉദ്ഘാടനവും റാന്നി ഗ്രാമപഞ്ചായത്ത് പ്രസിഡന്‍റ് കെ.ആർ. പ്രകാശ് നിർവഹിച്ചു. സ്കൂൾ പ്രിൻസിപ്പൽ സ്മിജു ജേക്കബ് അധ്യക്ഷത വഹിച്ചു. സ്കൂൾ മാനേജർ കെ.സി. ജേക്കബ്, വാർഡ് മെംബർ സന്ധ്യാ ദേവി, പിറ്റിഎ പ്രസിഡന്‍റ് ജോജോ കോവൂർ, മാതൃസമിതി പ്രസിഡന്‍റ് രജനി പ്രദീപ്, ഹെഡ്മാസ്റ്റർ ബിനോയ് കെ. ഏബ്രഹാം, സ്കൗട്ട് മാസ്റ്റർ റ്റോണി ജേക്കബ്, റോവർ ലീഡർ ഡോ. ജെ‌ബു ജോസഫ്, ഗൈഡ് ക്യാപ്റ്റൻ ആർ. ശ്രീകല, റേഞ്ചർ ലീഡർ പ്രീത എസ്. ജോസ് എന്നിവർ പ്രസംഗിച്ചു. ക്യാമ്പിൽ വിവിധ ബോധവത്കരണ ക്ലാസുകൾ, ലഹരി വിരുദ്ധപരിപാടികൾ എന്നിവ ക്യാമ്പിൽ നടക്കും.

പുഷ്പഗിരിയിൽ ബാസ്കറ്റ്ബോൾ ടൂർണമെന്‍റ് ആരംഭിച്ചു

തിരുവല്ല: പുഷ്പഗിരി മെഡിക്കൽ കോളജിൽ പതിനാറാമത് ജേക്കബ് മാർ തെയാഫിലോസ് ബാസ്കറ്റ്ബോൾ ടൂർണമെന്‍റ് ആന്‍റോ ആന്‍റണി എംപി ഉദ്ഘാടനം ചെയ്തു. പുഷ്പഗിരി മെഡിക്കൽ കോളജ് സിഇഒ ഫാ. ബിജു പയ്യമ്പളിൽ, ഡയറക്ടർ ഫാ. മാത്യു മഴുവഞ്ചേരിൽ മുൻ പിടിഎ പ്രസിഡന്‍റ് വർഗീസ് മാമ്മൻ, യൂണിയൻ ചെയർമാൻ ജി.ബി. അമൽ എന്നിവർ പ്രസംഗിച്ചു. ഡോക്ടർമാർക്ക് എതിരേയുള്ള ആക്രമണങ്ങളിൽ പ്രതിഷേധം രേഖപ്പെടുത്തിയശേഷമാണ് ടീമുകൾ കളത്തിൽ ഇറങ്ങിയത്. ആദ്യമത്സരത്തിൽ പുഷ്പഗിരി മെഡിക്കൽ കോളജ് അടൂർ മൗണ്ട് സിയോൺ മെഡിക്കൽ കോളജിനെ പരാജയപ്പെടുത്തി (സ്കോർ: 48 - 27).

വൈഎംസിഎ എക്യുമെനിക്കൽ അസംബ്ലി

കോന്നി: എക്യുമെനിസത്തിന് അടിത്തറ പാകി നവസമൂഹ സൃഷ്ടിക്കുവേണ്ടി പ്രവർത്തിക്കുന്ന പ്രസ്ഥനമാണെന്ന് കെ.യു. ജനീഷ് കുമാർ എംഎൽഎ . വൈഎംസിഎ സ്ഥാപകൻ സർ ജോർജ് വില്യംസിന്‍റെ 204 മത് ജന്മദിനാഘോഷവും, എക്യൂമെനിക്കൽ അസംബ്ലിയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മിഷൻ ആൻഡ് ഡവലപ്മെന്‍റ് കമ്മറ്റിയുടെയും കൾചറൽ ബോർഡിന്‍റെയും സംയുക്താഭിമുഖ്യത്തിൽ കോന്നി എലിയറക്കൽ രാജൻ അച്ചൻ ഫൗണ്ടേഷൻ ക്യാമ്പ് സെന്‍ററിലാണ് എക്യൂമെനിക്കൽ അസംബ്ലി നടന്നത്. മുൻ ദേശീയ പ്രസിഡന്‍റ് ലെബി ഫിലിപ് മാത്യു അധ്യക്ഷത വഹിച്ചു. മിഷൻ ആൻഡ് ഡെവലപ്മെന്‍റ് കമ്മിറ്റി മുൻ സംസ്ഥാന ചെയർമാൻ ഫാ. ഷൈജു കുര്യൻ എക്യുമെനിക്കൽ സന്ദേശം നൽകി. കെ. വി. തോമസ്, ടി. എസ്. തോമസ്, മാത്യു ഏബ്രഹാം, രാജു ജോൺ മല്ലശേരി, അനിൽ ജോർജ്, സാബു എ. സാമുവേൽ, വിത്സൺ മാത്യു എന്നിവർ പ്രസംഗിച്ചു.

മൂല്യങ്ങൾ വീണ്ടെടുക്കുന്നതിൽ സംഘടനകൾ ശ്രദ്ധിക്കണം: മാർ യൗസേബിയോസ്

കുന്നന്താനം: ദൈവ പരിപാലന പ്രവർത്തനങ്ങൾ എറ്റെടുക്കാനും മൂല്യബോധമില്ലാതെ ജീവിതശൈലി നയിക്കുന്നവരെ വീണ്ടെടുക്കുവാനുള്ള പ്രവർത്തനങ്ങൾ സാമൂഹ്യ സംഘടനകൾ നടത്തണമെന്നും വൈഎംസിഎ സ്ഥാപകൻ ജോർജ് വില്യംസ് അതിന് പ്രചോദനമാണെന്നും കെസിസി പ്രസിഡന്‍റ് അലക്സിയോസ് മാർ യൗസേബിയോസ് മെത്രാപ്പോലീത്ത. വൈഎംസിഎ സബ് റീജയന്‍റെ നേതൃത്വത്തിൽ സർ ജോർജ് വില്യംസ് ജന്മദിന സമ്മേളനം ദൈവ പരിപാലന കേന്ദ്രത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജോലി തേടി വിവിധ നാടുകളിൽ എത്തുന്ന യുവജനങ്ങൾക്ക് മൂല്യബോധം വളർത്തി സാന്മാർഗിക വഴികളിൽ നയിക്കുവാൻ വൈഎംസിഎകൾക്ക് വലിയ ഉത്തരവാദിത്വമുണ്ടെന്നും അലക്സിയോസ് മാർ യൗസേബിയോസ് പറഞ്ഞു. ചെയർമാൻ ജോജി പി. തോമസ് അധ്യക്ഷത വഹിച്ചു. കോഴഞ്ചേരി സബ് റീജിയൻ ചെയർമാൻ ജോസ് മാത്യൂസ് മുഖ്യ സന്ദേശം നല്കി. റീജണൽ മുൻ ചെയർമാൻ വി. സി. സാബു, കേരള റീജിയൻ യൂത്ത് വർക്ക് കമ്മിറ്റി ചെയർമാൻ ലിനോജ് ചാക്കോ, ജനറൽ കൺവീനർ സുനിൽ മറ്റത്ത്, കുന്നന്താനം വൈഎംസിഎ പ്രസിഡന്‍റ് പി.പി. മാത്യു, സിസ്റ്റർ അമല, റീജണൽ ലീഗൽ ബോർഡ് ചെയർമാൻ മാത്യു ജോസഫ്, ഡോ. പി.സി. വർഗീസ്, ജോ ഇലത്തിമൂട്ടിൽ, കെ.സി. മാത്യു, സബ് - റീജൺ വൈസ് ചെയർമാൻ തോമസ് വി. ജോൺ, കുന്നന്താനം വൈഎംസിഎ സെക്രട്ടറി റെയ്മോൾ ജോൺസൺ, ട്രഷറാർ സാബു ചാക്കുംമുട്ടിൽ, പഞ്ചായത്തംഗം ഗ്രേസി മാത്യു, കുര്യൻ ചെറിയാൻ, സജി മാമ്പ്രക്കുഴി, മെജോ വർഗീസ്, ജോൺസൺ തോമസ് എന്നിവർ പ്രസംഗിച്ചു.

ബില്ല് പാസായി, ആനന്ദപ്പള്ളി മരമടിക്ക് ഇനി തടസമില്ല

അടൂർ: കേരളത്തിൽ നിന്നു പോയ മരമടി മത്സരം തിരികെ കൊണ്ടുവരാൻ കേരള നിയമസഭയിൽ അവതരിപ്പിച്ച ബില്ല് പാസായി. കാർഷിക വൃത്തിയുമായി ബന്ധപ്പെട്ട് നടത്തിയിരുന്ന കാളപൂട്ട്, കന്നുപൂട്ട്, മരമടി, ഉഴവ് മത്സരങ്ങൾ തുടർന്നു നടത്തുന്നതിന് സാധിക്കുമെന്ന് ഡെപ്യൂട്ടി സ്പീക്കർ ചിറ്റയം ഗോപകുമാർ അറിയിച്ചു. മുടങ്ങിക്കിടന്ന അടൂർ ആനന്ദപ്പള്ളി മരമടി മത്സരവും നടത്താനാകുമെന്ന് ഡെപ്യൂട്ടി സ്പീക്കർ പറഞ്ഞു. സംസ്ഥാനത്തിന്‍റെ വിവിധ സ്ഥലങ്ങളിൽ മൃഗങ്ങളെ ഉൾപ്പെടുത്തിക്കൊണ്ടുള്ള കന്നുകാലി ഓട്ട മത്സരങ്ങൾ നടത്തിയിരുന്നു. കാളപൂട്ട്, കന്ന്പൂട്ട്, മരമടി, ഉഴവ്, പോത്തോട്ടം ഇങ്ങനെ വിവിധ പേരുകളിലാണ് ഇവ അറിയപ്പെട്ടിരുന്നത്. 1960 ലെ കേന്ദ്ര നിയമമായ ജന്തുക്കളോടുള്ള ക്രൂരത തടയൽ നിയമം ഭേദഗതി വരുത്താനുള്ളതാണ് ബില്ല് നിയമസഭയിൽ കൊണ്ടുവന്ന് നിയമമാക്കിയത്. കാർഷിക വൃത്തിയുടെ ഭാഗമായിട്ടുള്ള ഇത്തരം മത്സരങ്ങളിൽ മൃഗങ്ങളോടു ക്രൂരത ഇല്ലെന്നുറപ്പാക്കിയാണ് നിയമ നിർമാണം. കേന്ദ്രനിയമം കർശനമായതോടെ 12 വർഷമായി ആനന്ദപ്പള്ളിയിൽ മരമടി നടന്നിരുന്നില്ല. ഓണത്തിന് വരവറിയിച്ച് എല്ലാവർഷവും ഓഗസ്റ്റ് 15 നായിരുന്നു മുന്പ് മരമടി മത്സരം നടന്നിരുന്നത്. 2009-ൽ തമിഴ്നാട്ടിൽ നടന്ന ജെല്ലിക്കെട്ടിൽ മൃഗ പീഡനം ഉണ്ടെന്നു പറഞ്ഞാണ് കേന്ദ്ര സർക്കാർ ജെല്ലിക്കെട്ട് മത്സരം നിരോധിച്ചത്. ആനന്ദപ്പള്ളി മരമടി മത്സരവും ഇതോടെ നിലച്ചു. പിന്നീട് സംഘാടക സമിതി മത്സരം നടത്താൻ ഒട്ടേറെ തവണ സർക്കാർ തലത്തിൽ നിവേദനങ്ങൾ നൽകിയതിനേ തുടർന്ന് 2012-ൽ മത്സരം നടത്താൻ അനുവദിച്ചു. പക്ഷേ പിന്നീട് ഒരിക്കൽ പോലും ആനന്ദപ്പളളിയിൽ മരമടി മത്സരം നടന്നിട്ടില്ല.

മിന്നിത്തിളക്കത്തിൽ വള്ളിക്കോട് ശർക്കര

ഓണവിപണിയിൽ വിറ്റഴിച്ചത് ആറായിരം കിലോ; ഉത്പാദനം കൂട്ടാൻ തീരുമാനം വള്ളിക്കോട്: ഓണവിപണിയിൽ ഇത്തവണ വിറ്റഴിച്ചത് ആറായിരം കിലോ വള്ളിക്കോട് ശർക്കര. നഷ്ട പ്രതാപം വീണ്ടെടുത്ത വള്ളിക്കോട് ശർക്കരയ്ക്ക് ആവശ്യക്കാർ ഏറിയതോടെ കൂടുതൽ സ്ഥലങ്ങളിലേക്കു കൃഷി വ്യാപിപ്പിക്കാനുള്ള തയാറെടുപ്പിലാണ് കർഷകർ. നിലവിൽ ഓണക്കാലത്തു മാത്രമാണ് വള്ളിക്കോട് ശർക്കര വിപണിയിൽ ലഭ്യമായിരുന്നത്. എന്നാൽ, ഇനിമുതൽ എന്നും ശർക്കര ലഭിക്കാനുള്ള നടപടികളുമായാണ് കരിമ്പ് ഉത്പാദക സഹകരണ സംഘം മുന്നോട്ട് പോകുന്നത്. കരിന്പുകൃഷി വീണ്ടും രണ്ട് ഹെക്ടർ സ്ഥലത്താണ് ഇത്തവണ കൃഷി ഇറക്കിയത്. കോന്നി കരിയാട്ടം ടൂറിസം എക്സ്പോ ആയിരുന്നു പ്രധാന വിപണനകേന്ദ്രം. ജില്ലയിലെ കൃഷിഭവനുകളിലും സർക്കാർ ഓണവിപണികളിലും വള്ളിക്കോട് ശർക്കര ലഭ്യമായിരുന്നു. ഗ്രാമപഞ്ചായത്തിന്‍റെയും കൃഷിഭവന്‍റെയും പൂർണ പിന്തുണയിൽ യുവാക്കളുടെ മേൽനോട്ടത്തിലാണ്, അന്യംനിന്നുപോയ കരിമ്പുകൃഷി വീണ്ടും തുടങ്ങിയത്. ഇപ്പോൾ കൂടുതൽ ആളുകൾ കരിമ്പുകൃഷിയിലേക്ക് ഇറങ്ങുന്നുണ്ട്. 30 വർഷങ്ങൾക്കു മുമ്പ് വള്ളിക്കോട് പഞ്ചായത്തിലെ വള്ളിക്കോട്, കൈപ്പട്ടൂർ, നരിയാപുരം, വാഴമുട്ടം ഈസ്റ്റ്, തുടങ്ങിയ പ്രദേശങ്ങളിലും അച്ഛൻകോവിലാറിന്‍റെ തീരപ്രദേശങ്ങളിലും വലിയ തോതിൽ കരിമ്പു കൃഷിയാണ് ഉണ്ടായിരുന്നു. അന്ന് പത്തിലേറെ കരിമ്പാട്ട് ചക്കുകളാണ് ഇവിടെ പ്രവർത്തിച്ചിരുന്നത്. പന്തളം ഷുഗർ മില്ലിലേക്കും വലിയ തോതിൽ കരിമ്പ് എത്തിച്ചിരുന്നു. ഷുഗർ മിൽ പ്രവർത്തനം നിർത്തിയതോടെയാണ് കരിമ്പാട്ട് ചക്കുകളുടെ എണ്ണം കൂടിയത്. ചെറുപ്പക്കാരുടെ സംഘം എന്നാൽ, റബറിന്‍റെ വരവും വർധിച്ച കൂലിയും ചെലവും ആളുകൾ കരിമ്പുകൃഷിയിൽനിന്നു പിന്തിരിയാൻ കാരണമായി. ആർ. മോഹനൻ നായരുടെ നേതൃത്വത്തിലുള്ള നിലവിലെ പഞ്ചായത്ത് ഭരണ സമിതി അധികാരത്തിൽ വന്ന ശേഷമാണ് കരിമ്പുകൃഷി പുനരാരംഭിച്ചത്. പഞ്ചായത്തിന്‍റെ പ്രോത്സാഹനത്തെത്തുടർന്ന് കുറച്ചു ചെറുപ്പക്കാർ മുന്നോട്ടുവന്നു. പ്രവാസിയായ ശരത് മുൻകൈയെടുത്ത് ഒരു കരിമ്പാട്ട് മില്ലും സ്ഥാപിച്ചു. ഇതു പ്രയോജനപ്പെടുത്തിയാണ് കഴിഞ്ഞ നാലു വർഷമായി വള്ളിക്കോട് ശർക്കര വിപണിയിൽ എത്തിക്കുന്നത്. പന്തളം കൃഷി ഫാമിൽനിന്ന് എത്തിച്ച മാധുരി ഇനത്തിൽപ്പെട്ട കരിമ്പു തലയ്ക്കവും മറയൂർ കരിമ്പ് ഉത്പാദക സംഘത്തിൽനിന്ന് എത്തിച്ച സി.എ 86032 ഇനം തലയ്ക്കവുമാണ് ഇവിടെ കൃഷി ചെയ്യുന്നത്. സബ്സിഡിയും വായ്പയും അന്യം നിന്നു പോയ കരിമ്പുകൃഷി പ്രോത്സാഹിപ്പിക്കുക എന്ന ലക്ഷ്യത്തോടെ ഹെക്ടറിനു പതിനായിരം രൂപ സബ്സിഡിയും മൂന്നു ലക്ഷം രൂപ വരെ പലിശരഹിത വായ്പയും ലഭ്യമാക്കിയിട്ടുണ്ട്. രാവും പകലും പ്രവർത്തിച്ചിരുന്ന പത്തിൽ അധികം ശർക്കര ചക്കുകളാണ് ഒരു കാലത്ത് ഉണ്ടായിരുന്നത്. ഈ പ്രതാപം വീണ്ടെടുക്കാനുള്ള ശ്രമങ്ങളാണ് വിജയകരമായി പുരോഗമിക്കുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]