ADVERTISEMENT

ADVERTISEMENT

റസിഡൻസ് അസോ. വാർഷികം

നെടുമങ്ങാട്: പൂവത്തൂർ ടൗൺ റസിഡൻസ് അസോസിയേഷന്‍റെ ഉദ്ഘാടനം സാഹിത്യകാരൻ ഡോ. ചായം ധർമരാജൻ നിർവഹിച്ചു. പൂവത്തൂർ ടൗൺ പ്രദേശത്തെ നാലു വാർഡുകളിലെ 300 ലധികം കുടുംബങ്ങളെ ഉൾപ്പെടുത്തിയാണു റസിഡൻസ് അസോസിയേഷൻ രൂപീകരിച്ചത്. കേരള സാഹിത്യ അക്കാദമി അവാർഡ് നേടിയ കഥാകാരൻ വി. ഷിനിലാലിനെ ആദരിച്ചു.

എം . രാജേന്ദ്രൻ നായർ ലോഗോ പ്രകാശനം ചെയ്തു. റസിഡന്‍റ്സ് അസോസിയേഷൻ പ്രസിഡന്‍റായി എൻ. അജയകുമാറിനെയും വൈസ് പ്രസിഡന്‍റുമാരായി പൂവത്തൂർ ജയൻ, രജിതകുമാരി എന്നിവരേയും ജനറൽ സെക്രട്ടറിയായി പി.വി. രഞ്ചുനാഥിനേയും ജോയിന്‍റ് സെക്രട്ടറിമാരായി വി. വിജയൻ, പ്രഭ കുമാരിയേയും ട്രഷററായി വി. വിജയകുമാറിനെയും തെരഞ്ഞെടുത്തു. എം. രാജേന്ദ്രൻ നായർ, താരാജയകുമാർ, ലേഖ വിക്രമൻ, പൂവത്തൂർ ചിത്രസേനൻ, ലേഖ വിജയൻ എന്നിവർ സംസാരിച്ചു.

ADVERTISEMENT

തീരദേശമേഖലയ്ക്ക് ഭീഷണിയായി തെരുവു നായകൾ; അടിമലത്തുറയിൽ 10 പേർക്ക് കടിയേറ്റു

വിഴിഞ്ഞം: തീരദേശത്തെ പേടിപ്പെടുത്തി വീണ്ടും തെരുവു നായ ആക്രമണം. അടിമലത്തുറയിൽ ഒറ്റ ദിവസം പത്തു പേർ നായകളുടെ ആക്രമണത്തിനിരയായി. പ്രശ്നം രൂക്ഷമാകുമ്പോഴും നടപടിയെടുക്കാനാകാതെ അധികൃതർ. അടിമലത്തുറ സ്വദേശികളായ മേരി വിജയം (47), സന്തോഷ്കുമാർ (45), കൊച്ചുത്രേസ്യ (70), കൊച്ചു നാരായണൻ (58), വർഗീസ് (47), ജോഷിൻ (51), വിൻസി (32), ദാസ് (47), ഷിബു (27), പുല്ലുവിള സ്വദേശി വിൻസി (45) എന്നിവരാണു കഴിഞ്ഞ ദിവസം രാത്രിയിൽ തെരുവുനായകളുടെ ആക്രമത്തിനിരയായത്. പുല്ലുവിള സർക്കാർ ആശുപത്രിയിൽ ചികിത്സ തേടിയ ഇവരെ ജനറൽ ആശുപത്രിയിലേക്ക് മാറ്റി. ഇക്കഴിഞ്ഞ മൂന്നും നാലും തീയതികളിലും പള്ളം, പുല്ലുവിള, കരിംകുളം, അടിമലത്തുറ തീരത്തെ വിറപ്പിച്ച തെരുവു നായ മുപ്പത്തഞ്ചോളം പേരെയാണു കടിച്ചു പരിക്കേൽപ്പിച്ചത്. നാലു കിലോമീറ്ററോളം ദൂരം ഓടിനടന്ന് ആക്രമിച്ചു ഭീകരാന്തരീക്ഷം സൃഷ്ടിച്ച നായയെ പിടികൂടിയെങ്കിലും ജനങ്ങളുടെ മനസിലെ പേടിയകറ്റാനായില്ല. ഇതിനിടയിലാണ് കഴിഞ്ഞ ദിവസം അടിമലത്തുറയിലും നായകളുടെ കൂട്ടമായ ആക്രമണം അരങ്ങേറിയത്. ഇതോടെ തീരത്തുള്ളവർക്കു പേടിയില്ലാതെ പുറത്തിറങ്ങാൻ പറ്റാത്ത അവസ്ഥയായി. ഇതുവരെയും കണ്ടു പരിചയമില്ലാത്ത നായകളാണു കടിച്ചതെന്ന് അടിമലത്തുറക്കാർ പറയുന്നു. വീടിനുള്ളിൽ കയറിവരെ ആക്രമിച്ച തെരുവുനായകൾ വീടിനു മുന്നിൽ നിന്നവരെയും നടന്നു പോയവരെയും കടിച്ച് പറിച്ചു. കൂടാതെ വളർത്തു നായകളും നിരവധി തെരുവുനായകളും ആക്രമണത്തിനിരയായെന്നും നാട്ടുകാർ പറയുന്നു. മൂന്നാം തീയതിയിൽ ഓടിനടന്നു കണ്ണിൽ കണ്ടവരെയെല്ലാം ആക്രമിച്ച തെരുവുനായയ്ക്കു പോയുള്ളതായി നാട്ടുകാർ പറയുന്നുണ്ടെങ്കിലും അധികൃതരുടെ സ്ഥിരീകരണം വന്നിട്ടില്ല. ജനങ്ങൾ തിങ്ങിപ്പാർക്കുന്ന തീരദേശത്തു അലഞ്ഞു തിരിഞ്ഞു നടക്കുന്ന നായ്ക്കളുടെ എണ്ണവും കൂടുതലാണ്. സമീപത്തെ കടകളിലും വീടുകളിലും അറവുശാലകളിൽ നിന്നുമായി വലിച്ചെറിയുന്ന ഭക്ഷണാവശിഷ്ടങ്ങൾ തിന്നുകൊഴുത്തു നടക്കുന്നവനാട്ടുകാർക്കും ഭീഷണിയായി മാറി. ഇതിനുപരി മറ്റു സ്ഥലങ്ങളിൽനിന്നു വയസായ വളർത്തുനായ്കളെ ഉടമസ്ഥർ രഹസ്യമായികൊണ്ടുവന്ന് ഉപേക്ഷിച്ച് കടന്നു കളയുന്ന സംഭവങ്ങളും ഉണ്ടാകുന്നതായും നാട്ടുകാർ പറയുന്നു. ഇവയും തീരദേശവാസികൾക്കു വിനയായി. അലഞ്ഞു തിരിഞ്ഞു നടക്കുന്ന ഇത്തരം നായ്കൾ ഏറെ അക്രമകാരികളാണെന്നും പറയപ്പെടുന്നു. ഇവയിൽ നിരവധി എണ്ണത്തെ കടിച്ചുരുട്ടിയാണ് പേയുണ്ടെന്നു കരുതുന്ന നായയും കടന്നുപോയത്. പൂവാർ, കരിംകുളം, കോട്ടു കാൽ പഞ്ചായത്തുകളിൽപ്പെടുന്ന മേഖലയാണിവ. നിയന്ത്രണങ്ങളുടെ പേരുപറഞ്ഞ് പഞ്ചായത്തും കൈയൊഴിഞ്ഞ തോടെ ജനം കഷ്ടത്തിലായി.

വസ്തുതട്ടിപ്പ് കേസ്: അനില്‍ തമ്പിയുടെ ജാമ്യാപേക്ഷ ഹൈക്കോടതി നാളെ പരിഗണിക്കും

പേരൂര്‍ക്കട: വസ്തുതട്ടിപ്പുമായി ബന്ധപ്പെട്ട് ഒളിവില്‍ക്കഴിഞ്ഞു വരുന്ന വ്യവസായി അനില്‍ തമ്പിയുടെ ജാമ്യാപേക്ഷ ഹൈക്കോടതി നാളെ പരിഗണിക്കും. അതുവരെ അനില്‍ തമ്പിയെ അറസ്റ്റുചെയ്യരുതെന്നു കോടതിയുടെ നിർദേശമുണ്ടായിരുന്നു. വളരെ നാളുകളായി ഇയാള്‍ ഒളിവില്‍ കഴിഞ്ഞുവരികയാണ്. കവടിയാര്‍ ജവഹര്‍ നഗര്‍ സ്വദേശിനിയും നിലവില്‍ അമേരിക്കയില്‍ സ്ഥിരതാമസാക്കിയ ആളുമായ ഡോറ അസറിയ ക്രിപ്‌സ് എന്ന വയോധികയുടെ 10 കോടിയോളം വില വരുന്ന വീടും വസ് തുവും വട്ടിയെടുത്തതിന്‍റെ മുഖ്യ സൂത്രധാരനാണ് അനില്‍ തമ്പി. അതിനിടെ അനില്‍ തമ്പിയെ അന്വേഷിച്ചു മ്യൂസിയം പോലീസിന്‍റെ പ്രത്യേക സംഘം ഇന്ത്യയിലെ ഒട്ടുമിക്ക സംസ്ഥാനങ്ങളിലും പരിശോധന നടത്തിയിരുന്നു. ഡല്‍ഹിയിലെ ഒരു ഹോട്ടലില്‍നിന്നും അനില്‍ തമ്പി കഷ്ടിച്ചാണ് പോലീസിന്‍റെ കൈയില്‍പ്പെടാതെ രക്ഷപ്പെട്ടത്. അതേസമയം പോലീസ് ഇയാളെ അന്വേഷിച്ച് നേപ്പാള്‍, ഭൂട്ടാന്‍ രാജ്യങ്ങളിലും എത്തിയിരുന്നു. ഏറ്റവുമൊടുവില്‍ അനില്‍ തമ്പി ഇന്ത്യയിലെവിടെയെങ്കിലും ഒളിവില്‍ക്കഴിയുന്നുണ്ടാകുമെന്നാണ് പോലീസ് പറയുന്നത്. തിരുവനന്തപുരം ജവഹര്‍ നഗറിലെ വീട്ടില്‍ ഇയാള്‍ ഇതുവരെയും എത്തിയിട്ടില്ലെന്നാണ് പോലീസ് അന്വേഷണത്തില്‍ അറിയാന്‍ സാധിച്ചത്. ശക്തമായ തെളിവുകളുമായാണ് അന്വേഷണസംഘം കോടതിയെ സമീപിച്ചിട്ടുള്ളത്. ബുധനാഴ്ചത്തെ കോടതിവിധി അനുസരിച്ചായിരിക്കും പോലീസിന്‍റെ ബാക്കിയുള്ള അന്വേഷണം.

കേരള മാതൃക പിന്തുടരാന്‍ തെലങ്കാന സംഘം: പരിശീലനം പിടിപി നഗറില്‍

പേരൂര്‍ക്കട: സംസ്ഥാന സര്‍ക്കാരിന്‍റെ എന്‍റെ ഭൂമി സംയോജിത പോര്‍ട്ടലിനെക്കുറിച്ചു പഠിക്കുന്നതിനും പരിശീലനത്തിനുമായി തെലങ്കാന സംഘം തിരുവനന്തപുരത്ത് എത്തി. നാഷണല്‍ സര്‍വേ-റവന്യു ഉദ്യോഗസ്ഥര്‍, ഇന്‍ഫോര്‍മാറ്റിക്‌സ് സെന്‍റര്‍ ഉദ്യോഗസ്ഥര്‍ എന്നിവരാണ് സംഘത്തിലുള്ളത്. പോര്‍ട്ടല്‍ മാതൃക തെലങ്കാനയിലും നടപ്പാക്കാന്‍ താല്‍പ്പര്യം പ്രകടിപ്പിച്ച ഇവര്‍ അതിനെക്കുറിച്ച് വരും ദിവസങ്ങളില്‍ വ്യക്തമായ ധാരണ നേടുകയും ഇതുസംബന്ധിച്ചുള്ള സാധ്യത പഠിക്കുകയും ചെയ്യും. രണ്ടുദിവസം തലസ്ഥാനത്തുണ്ടാകുന്ന തെലങ്കാന സര്‍വെ ജോയിന്‍റ് ഡയറക്ടര്‍ പ്രസന്ന ലക്ഷ്മി, സര്‍വെ ഇന്‍സ്‌പെക്ടര്‍ എം. നാഗേന്ദര്‍, സര്‍വെയര്‍മാരായ ടി. സസ്യാറാണി, കെ. വിനയകുമാര്‍, നാഷണല്‍ ഇന്‍ഫര്‍മാറ്റിക്‌സ് സീനിയര്‍ ഡയക്ടര്‍മാരായ വിജയമോഹന്‍, ഭാഗ്യരേഖ, ഡയറക്ടര്‍ എസ്. കൃഷ്ണ, റവന്യു തഹസില്‍ദാര്‍ സായികൃഷ് ണ എന്നിവര്‍ വട്ടിയൂര്‍ക്കാവ് പി.ടി.പി നഗറിലെ സര്‍വെ ട്രെയിനിംഗ് ഇന്‍സ്റ്റിറ്റ്യൂട്ടിലാണ് പരിശീലനം നേടാന്‍ പോകുന്നത്. ഇതിനു മുന്നോടിയായി ഇവര്‍ റവന്യു മന്ത്രി കെ. രാജനെ നേരില്‍ക്കണ്ട് ആശയവിനിമയം നടത്തുകയുണ്ടായി.

കോരിയിട്ട ഓടമാലിന്യം ഒരാഴ്ചയായി ഫുട്പാത്തില്‍

പേരൂര്‍ക്കട: ഓടയിൽന്നു കോരിയിട്ട മാലിന്യം ഒരാഴ്ചയായി ഫുട്പാത്തില്‍ കിടന്നിട്ടും നീക്കം ചെയ്യുന്നില്ല. തമ്പാനൂര്‍ പഴയ ജനമൈത്രി സ്റ്റേഷന്‍റെ മതിലിനോടു ചേര്‍ന്ന ഭാഗത്താണ് ഓടയിലെ മാലിന്യം കോരിയിട്ടിരിക്കുന്നത്. തിരുവനന്തപുരം നഗരസഭാ തൊഴിലാളികള്‍ റോഡുവശത്തെ ഓട വൃത്തിയാക്കുന്നതിന്‍റെ ഭാഗമായിട്ടാണ് മാലിന്യം കാല്‍നടയാത്രികര്‍ക്കുള്ള ഫുട്പാത്തിലേക്ക് ഒരാഴ്ച മുമ്പ് കോരിയിട്ടത്. ഇതില്‍ മണ്ണും മണലും ചളിയും മറ്റവശിഷ്ടങ്ങളും കവര്‍ന്നിട്ടുണ്ട്. ഫുട്പാത്തിനു സമീപം വാഹനപാര്‍ക്കിംഗ് നിരോധിച്ചുകൊണ്ട് പോലീസ് സേഫ്റ്റി കോണുകള്‍ സ്ഥാപിച്ചിട്ടുണ്ട്. ഇതു കാല്‍നടയാത്രികരുടെ സുഗമമായ സഞ്ചാരവും റോഡിലൂടെയുള്ള വാഹനഗതാഗതം സുഗമമാക്കുന്നതിനും വേണ്ടിയാണ്. അതിനിടെയാണ് കാല്‍നടയാത്രികരെ ദുരിതത്തിലാക്കിക്കൊണ്ട് ഫുട്പാത്തില്‍ മാലിന്യം കോരിയിട്ടിരിക്കുന്നത്. അതേസമയം റെയില്‍വേ സ്റ്റേഷനു സമീപത്തെ ഫുട്പാത്തില്‍ കോരിയിട്ടിരുന്ന മാലിന്യം ഇവിടെനിന്ന് നീക്കം ചെയ്തുകഴിഞ്ഞു. തമ്പാനൂര്‍ ഫുട്പാത്തിലെ മാലിന്യം നീക്കം ചെയ്യാത്തതിനാല്‍ ദുര്‍ഗന്ധവും അനുഭവപ്പെടുന്നുണ്ട്.

എടിഎം കവർച്ച: മോഷ്ടാവ് പിടിയിൽ

കാട്ടാക്കട: എടിഎം കവർച്ച ശ്രമം അലാറം കേട്ടതോടെ പാളി, രണ്ട് എടിഎമ്മുകളിൽ കവർച്ചാശ്രമം നടത്തി അലാറം കേട്ടതോടെ ഓടി രക്ഷപെട്ട കള്ളനെ മണിക്കൂറുകൾക്കുള്ളിൽ കാട്ടാക്കട ഡിവൈഎസ്പിയുടെ നേതൃത്വത്തിൽ പിടികൂടി. കുറ്റിച്ചൽ, കോട്ടൂർ വലിയവിള തടത്തരികത്തു വീട്ടിൽ ശ്രീശങ്കറി(21)നെയാണ് സംഭവ ശേഷം പൂവച്ചൽ നിന്നും പിടികൂടിയത്. കഴിഞ്ഞ ദിവസം രാത്രിയോടെയായിരുന്നു സംഭവം. ആദ്യം കാട്ടാക്കട എസ് എൻ ഗുരുമന്ദിരത്തിനു സമീപം ബാങ്ക് ഓഫ് ബറോഡ, ശേഷം കാട്ടാക്കട ജംഗ്ഷനിൽ ഇന്ത്യൻ ബാങ്ക് എന്നിവിടങ്ങളിലെ എടിഎം കൗണ്ടറുകളാ ണു കുത്തിത്തുക്കാൻ ശ്രമിച്ചത്. അലാറം മുഴങ്ങിയതോടെ ശ്രമം ഉപേക്ഷിക്കുകയായിരുന്നു. ബാങ്ക് ആസ്ഥാനത്ത് അലാറം അലേർട്ട് ലഭിച്ചതോടെ ഇവർ കാട്ടാക്കട പോലീസിൽ അറിയിക്കുകയായിരുന്നു. തുടർന്ന് കാട്ടാക്കട ഡിവൈഎസ് പി റാഫിയുടെ നേതൃത്വത്തിലുള്ള പോലിസ് സംഘം കാട്ടാക്കടയിൽ നടത്തിയ വ്യാപക തെരച്ചിലിൽ മണിക്കൂറുകൾക്കുള്ളിൽ തന്നെ പൂവച്ചൽ ഭാഗത്തു നിന്നും പ്രതിയെ കണ്ടെത്തുകയായിരുന്നു.കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കാര്‍ പാര്‍ക്കിംഗുമായി ബന്ധപ്പെട്ടു തര്‍ക്കം; മൂന്നംഗ സംഘം പിടിയില്‍

പൂന്തുറ: അനധികൃതമായി കടയുടെ മുന്നില്‍ കാര്‍ പാര്‍ക്ക് ചെയ്തതുമായി ബന്ധപ്പെട്ടുണ്ടായ തര്‍ക്കത്തില്‍ കടയുടമയെ മര്‍ദിച്ച കേസില്‍ മൂന്നംഗ സംഘത്തെ പൂന്തുറ പോലീസ് അറസ്റ്റ് ചെയ്തു. കഠിനംകുളം ചന്നാങ്കര ബ്രിഡ്ജിനു സമീപം സുലൈമാന്‍ (67), പൂന്തുറ ബീമാപള്ളി സ്വദേശിക ളായ കലാം (50), സിദ്ധിഖ് (45) എന്നിവരെയാണ് പോലീസ് അറസ്റ്റ് ചെയ്തത്. ഞായറാഴ്ച വൈകുന്നേരം 4.30 ഓടുകൂടി ബീമാപള്ളി മാണിക്കവിളാകം ജവഹര്‍ പള്ളി ക്ക് സമീപത്തായിരുന്നു കേസിനിടയായ സംഭവം. ബീമാപള്ളി മാണിക്കവിളാകം സ്വദേശി നിസാര്‍ (41) ആണ് സംഘത്തിന്‍റെ മര്‍ദനത്തില്‍ പരിക്കേറ്റ് ചികിത്സ തേടിയത്. ഞായറാഴ്ച ഉച്ചയോടെ നിസാര്‍ മാണിക്കവിളാകം ജവഹര്‍ പള്ളി ക്കുസമീപത്തുള്ള തന്‍റെ സ്റ്റേഷനറിക്കട പൂട്ടിയശേഷം ഭക്ഷണം കഴിക്കാന്‍ വീട്ടില്‍ പോയിരുന്നു. തിരികെ കടതുറക്കാനെത്തിയപ്പോള്‍ കടയുടെ മുന്നിലായി കാര്‍ പാര്‍ക്ക് ചെയ്തിരുന്നു. നിസാര്‍ ദേഷ്യത്തില്‍ കാര്‍ തള്ളി മാറ്റാന്‍ ശ്രമിക്കുകയും ഇതേ തുടര്‍ന്ന് കാറിന്‍റെ ഡോറിനു കേടുപാടുകള്‍ സംഭവിക്കുകയും ചെയ്തു. ഏറെ നേരം കഴിഞ്ഞി തിരികെയെത്തിയ മൂന്നംഗ സംഘം ഇതു ചോദ്യം ചെയ്യുകയും വാക്കേറ്റത്തിനൊടുവില്‍ മടങ്ങിപോകുകയും ചെയ്തു. എന്നാല്‍ അല്‍പ്പ സമയത്തിനുള്ളില്‍ മൂന്നു പേരും തിരികെയെത്തി നിസാറിനെ മര്‍ദിക്കുകയും കുത്തിപ്പരിക്കേല്‍പ്പിക്കുകയുമായിരുന്നതായി പോലീസ് പറഞ്ഞു. കഠിനംകുളം സ്വദേശി സുലൈമാന്‍ ബീമാപള്ളി മാണിക്കവിളാകത്തെ ബന്ധുവീട്ടിലെത്തിയതായിരുന്നു. കലാമും , സിദ്ധിഖും സുലൈമാനെ യാത്രയാക്കാന്‍ കൂടെ വന്നതായിരുന്നു. പൂന്തുറ എസ്എച്ച്ഒ സജീവ്, എസ്ഐ ശ്രീജേഷ്, എസ്‌സിപിഒ സജിവ് എന്നിവരുള്‍പ്പെട്ട പോലീസ് സംഘം അറസ്റ്റ് ചെയ്ത പ്രതികളെ കോടതി റിമാന്‍ഡ് ചെയ്തു.

വലിയതുറയില്‍ കുരിശടിയിലെ കാണിക്കവഞ്ചി കുത്തിത്തുറന്ന് കവർച്ച

വലിയതുറ: പള്ളി കുരിശടിയിലെ കാണിക്ക വഞ്ചി കുത്തിത്തുറന്നു പണം കവര്‍ന്നു. കണ്ണാന്തുറ സെന്‍റ് ആന്‍റണീസ് കുരിശടിയിലെ കണിക്കവഞ്ചി കുത്തിത്തുറന്നാണ് പതിനായിരത്തോളം രൂപ മോഷ്ടാക്കൾ കവർന്നത്. ഞായറാഴ്ച പുലര്‍ച്ചെയായിരുന്നു മോഷണം. മോഷ്ടാവിന്‍റെ ദൃശ്യം കുരിശടിയിലെ നിരീക്ഷണ കാമറയില്‍ നിന്നും പോലീസിനു ലഭിച്ചു. കുരിശടിയുടെ സ്ലൈഡിംഗ് വിന്‍ഡോ വഴി അകത്തു കയറിയ മോഷ്ടാവ് പതുങ്ങി പോകുന്ന ദൃശ്യമാണ് ലഭിച്ചത്. രാത്രി 12നെത്തിയ മോഷ്ടാവ് അകത്ത് കടക്കാനാകാതെ മടങ്ങിപോയി. വീണ്ടും തിരികെ എത്തി കവര്‍ച്ച നടത്തുകയായിരുന്നു. മോഷണം നടത്തിയശേഷം പുലര്‍ച്ചെ 1.20 ഓടുകൂടി പുറത്തു കടന്നതായും പോലീസ് പറഞ്ഞു. വരലടയാള വിദഗ്ധർ സ്ഥലത്തെത്തി മോഷ്ടാവിന്‍റെ വിരലടയാളം ശേഖരിച്ചു. സംഭവത്തില്‍ പോലീസ് അന്വേഷണം ഊര്‍ജിതമാക്കിയതായും മോഷ്ടാവ് ഉടന്‍ പിടിയിലാകുമെന്നും പോലീസ് പറഞ്ഞു. രണ്ടാഴ്ചകള്‍ക്കിടെ വലിയതുറ പോലീസ് സ്റ്റേഷന്‍ പരിധിയില്‍ നടക്കുന്ന നാലാമത്തെ മോഷണമാണിത്. രണ്ടു വീടുകളില്‍ നിന്നായി 32 പവനോളം സ്വര്‍ണാഭരണങ്ങളും കൊച്ചുവേളിക്കു സമീപം റോഡരികില്‍ പാര്‍ക്ക് ചെയ്തിരുന്ന യുവതിയുടെ സ്‌കൂട്ടറും മോഷണം പോയിരുന്നു. രണ്ടു സംഭവങ്ങളിലും മോഷ്ടാക്കളുടെ ദൃശ്യം സിസിടിവി കാമറകളില്‍ നിന്നും ലഭിച്ചിട്ടും പോലീസിനു പ്രതികളെ പിടികൂടാന്‍ കഴിയാത്തതില്‍ പ്രദേശത്ത് നാട്ടുകാര്‍ക്കിടയില്‍ ശക്തമായ പ്രതിഷേധം ഉയര്‍ന്നിട്ടുണ്ട്.

സ്കൂള്‍ ബസിനടിയിലേക്ക് ഇരുചക്രവാഹനം ഇടിച്ചുകയറി

മാറനല്ലൂർ: മാറനല്ലൂരില്‍ സ്കൂള്‍ ബസിനടിയിലേക്ക് ഇരുചക്രവാഹനം ഇടിച്ചുകയറി. യുവാവ് തലനാരിഴയ്ക്ക് രക്ഷപ്പെട്ടു. മാറനല്ലൂര്‍ കുന്നിലാണ് അപകടം നടന്നത്. സ്വകാര്യ കമ്പനിയില്‍ ജോലിചെയ്യുന്ന പുന്നാവൂര്‍ സ്വദേശി ജോസാണ് അപകടത്തില്‍പെട്ടത്. റോഡ് സൈഡില്‍ പാര്‍ക്ക് ചെയ്തിരുന്ന മീന്‍ വണ്ടിയെ മറികടന്നെത്തിയ മാറനല്ലൂര്‍ ഹയര്‍ സെക്കൻഡറി സ്കൂളിലെ വാഹനത്തിനടിയിലേക്കാണ് ജോബ് വീണത്. പരിക്കേറ്റ ജോസിനെ 108 എത്തി ആശുപത്രിയിലേക്കു മാറ്റി. രാവിലെ 8.30 ഓടെയാണ് അപകടം നടന്നത്. പൊങ്ങുമൂട് നിന്നു മേലാരിയോടു വഴി നെയ്യാറ്റിൻകര പോവുകയായിരുന്ന ബൈക്കും പുന്നാവർ ഭാഗത്തുനിന്നു പോങ്ങുമ്മൂടിലേക്ക് വരികയായിരുന്നു ബസുമാണ് അപകടത്തിൽ പെട്ടത്.

മികച്ച പച്ചത്തുരുത്തുകൾക്കുള്ള പുരസ്കാരം ഇന്നു സമ്മാനിക്കും

തിരുവനന്തപുരം: ഹരിതകേരളം മിഷന്‍റെ ആഭിമുഖ്യത്തിൽ സംസ്ഥാനത്തു സ്ഥാപിച്ച പച്ചത്തുരുത്തുകളിൽ മികച്ച വയ്ക്കുള്ള പുരസ്കാരങ്ങൾ മുഖ്യമന്ത്രി പിണറായി വിജയൻ ഇന്ന് സമ്മാനിക്കും. വൈകുന്നേരം ആറിന് ടാഗോർ തിയറ്ററിൽ നടക്കുന്ന പുരസ്കാര വിതരണം മുഖ്യമന്ത്രി ഉദ്ഘാടനം ചെയ്യും. തദ്ദേശ സ്വയംഭരണ സ്ഥാപനങ്ങൾ, സ്‌കൂളുകൾ, കോളജുകൾ, മറ്റ് സ്ഥാപനങ്ങൾ, ദേവഹരിതം പച്ചത്തുരുത്ത്, മുളംതുരുത്ത്, കണ്ടൽ പച്ചത്തുരുത്ത്, കാവുകൾ എന്നീ വിഭാഗങ്ങളിലായി 145 പച്ചത്തുരുത്തുകളാണ് സ്ക്രീനിംഗിൽ പങ്കെടുത്തത്. തദ്ദേശ സ്വയംഭരണ സ്ഥാപനങ്ങളിലെ പച്ചത്തുരുത്തുകളിൽ ഒന്നാം സ്ഥാനം കണ്ണൂരിലെ മുഴക്കുന്ന് ഗ്രാമപഞ്ചായത്തിലെ അയ്യപ്പൻകാവിനാണ്. പത്തനംതിട്ട തുമ്പമൺ ഗ്രാമപഞ്ചായത്തിലെ കുടമാങ്കലും പാലക്കാട് കാഞ്ഞിരപ്പുഴ ഗ്രാമപഞ്ചായത്തിലെ കുമ്പളംചോലയും രണ്ടാം സ്ഥാനം നേടി. കൊല്ലം കോർപറേഷൻ തീരദേശം പച്ചത്തുരുത്തിനും കാസർഗോഡ് അജാനൂർ ഗ്രാമപഞ്ചായത്ത് പുലയനാർത്തോടിനുമാണ് മൂന്നാം സ്ഥാനം. കാസർഗോഡ് തൃക്കരിപ്പൂർ ഗ്രാമപഞ്ചായത്തിലെ നടക്കാവ് ഹരിതവീഥി നാലാം സ്ഥാനം നേടി. കോട്ടയം കല്ലറ ഗ്രാമപഞ്ചായത്തിലെ ഐസിഡിഎസ് കുന്നുംപുറത്തും വയനാട് തൊണ്ടർനാട് ഗ്രാമപഞ്ചായത്തിലെ ശാന്തിവനവും അഞ്ചാം സ്ഥാനവും പങ്കിട്ടു. പാലക്കാട് കുടുമ്പ് ഗ്രാമപഞ്ചായത്തിലെ കരിങ്കരപ്പുള്ളി കനാൽതീരവും ഇടുക്കി വെളിയാമറ്റം ഗ്രാമപഞ്ചായത്തിലെ കാഞ്ഞാറും കണ്ണൂരിലെ കുറുമാതൂർ ഗ്രാമപഞ്ചായത്തിലെ ശ്രീസ്ഥയും കോട്ടയം കടനാട് ഗ്രാമപഞ്ചായത്തിലെ കടനാട് ഹൈസ്കൂളിന് സമീപമുള്ള പച്ചത്തുരുത്തും പത്തനംതിട്ട കൊടുമൺ ഗ്രാമപഞ്ചായത്തിലെ മുല്ലോട്ട് ഡാം പച്ചത്തുരുത്തും പ്രത്യേക ജൂറി പുരസ്കാരത്തിന് അർഹമായി. കലാലയ വിഭാഗത്തിൽ കണ്ണൂരിലെ പയ്യന്നൂർ കോളേജ് പച്ചത്തുരുത്ത് ഒന്നും പാലക്കാട് വി.ടി ഭട്ടതിരിപ്പാട് ഗവ. കോളജിലെ വാൾട്ടർവാലി ഫ്രൂട്ട് ഫോറസ്റ്റ് രണ്ടും തൃശൂർ പനമ്പിള്ളി മെമ്മോറിയൽ ഗവ. കോളജ് പച്ചത്തുരുത്ത് മൂന്നും സ്ഥാനങ്ങൾ നേടി. വിദ്യാലയ വിഭാഗത്തിൽ കണ്ണൂർ തവിടിശേരി ജിഎച്ച്എസ്എസും വയനാട് ജിഎച്ച് എസ്എസ് വടുവൻചാലും ഒന്നാം സ്ഥാനം നേടി. മലപ്പുറം അരിക്കോട് ജിഎച്ച്എസ്എസും കാസർഗോഡ് ജിയുപി സ്കൂൾ പാടിക്കീലും രണ്ടാം സ്ഥാനം പങ്കിട്ടു. കാസർഗോഡ് ജിയുപിഎസ് ചാമക്കുഴി കുവാറ്റി പച്ചത്തുരുത്തിനാണ് മൂന്നാംസ്ഥാനം. മലപ്പുറം എസ്എസ്എച്ച്എസ് മൂർക്കനാട് നാലാം സ്ഥാനവും എറണാകുളം ഗവ. യു.പി സ്കൂൾ പെരുമ്പള്ളി അഞ്ചാം സ്ഥാനവും നേടി. സ്ക്രീനിംഗിൽ പങ്കെടുത്ത എല്ലാവർക്കും ഉപഹാരവും സർട്ടിഫിക്കറ്റും നൽകും. പുരസ്‌കാര ദാന ചടങ്ങിൽ ഹരിതകേരളം മിഷന്‍റെ നേതൃത്വത്തിൽ ഒരു കോടി തൈകൾ നട്ടുപിടിപ്പിക്കുന്ന ‘ഒരു തൈ നടാം’ വൃക്ഷവത്കരണ പരിപാടിയിൽ 60 ലക്ഷം പൂർത്തിയായതിന്‍റെ പ്രഖ്യാപനം മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി കെ. എം. ഏബ്രഹാം നിർവഹിക്കും. മികച്ച പച്ചത്തുരുത്തുകൾ, വേങ്ങോട് ആദ്യ പച്ചത്തുരുത്ത്, ടൈറ്റാനിയം പച്ചത്തുരുത്ത്, കണ്ടൽ പച്ചത്തുരുത്ത്, മുഴക്കുന്ന് ഗ്രാമപഞ്ചായത്തിലെ പച്ചത്തുരുത്ത്, കേളകം ഗ്രാമപഞ്ചായത്തിലെ പൂമ്പാറ്റകൾ എന്നിവ അടിസ്ഥാനമാക്കി തയാറാക്കിയ പുസ്തകങ്ങളുടെ പ്രകാശനവും ചടങ്ങിൽ നടക്കും.

പാറശാല പഞ്ചായത്ത് കേരളോത്സവം സമാപിച്ചു

പാറശാല: പാറശാല പഞ്ചായത്തും കേരള സംസ്ഥാന യുവജന ക്ഷേമ ബോര്‍ഡും ചേര്‍ന്ന് സംഘടിപ്പിച്ച കേരളോത്സവം സമാപിച്ചു. സമാപന സമ്മേളനവും സമ്മാനവിതരണവും പഞ്ചായത്ത് പ്രസിഡന്‍റ് എല്‍, മഞ്ജുസ്മിത ഉദ്ഘാടനം ചെയ്തു. പഞ്ചായത്ത് വികസനകാര്യ സ്ഥിരം സമിതി അധ്യക്ഷ അനിതാറാണി അധ്യക്ഷത വഹിച്ചു. പഞ്ചായത്ത് ആരോഗ്യ-വിദ്യാഭ്യാസകാര്യ സ്ഥിരം സമിതി അധ്യക്ഷ വീണ, പഞ്ചായത്ത് അംഗങ്ങളായ സുധാമണി, എം. സുനില്‍, മായ, പഞ്ചായത്ത് അസിസ്റ്റന്‍റ് സെക്രട്ടറി സാംജി തുടങ്ങിയവര്‍ പ്രസംഗിച്ചു. നാലുദിവസങ്ങളിലായി വിവിധ വേദികളില്‍ നടന്ന കലാകായിക മത്സരങ്ങളില്‍ കുഴിഞ്ഞാന്‍വിള തംബുരു ആര്‍ട്‌സ് ആൻഡ് സ്‌പോര്‍ട്‌സ് ക്ലബ് ഓവറോള്‍ ചാമ്പ്യന്മാരായി. എസ്.എൽ. അഞ്ചു കലാതിലകമായി തെരെഞ്ഞടുത്തു.

പാച്ചല്ലൂർ സ്കൂൾ ജംഗ്ഷൻ ബസ് സർവീസ് പുനരാരംഭിച്ചു

തിരുവല്ലം: 1965 മുതൽ നിലവിലുണ്ടായിരുന്നതും കഴിഞ്ഞ 30 വർഷങ്ങൾക്കു മുമ്പ് നിർത്തലാക്കിയതുമായ പാച്ചല്ലൂർ സ്കൂൾ ജംഗ്ഷൻ ബസ് സർവീസ് പുനരാരംഭിച്ചു. തിരുവല്ലം, കിഴക്കേകോട്ട, പാളയം, വഴുതയ്ക്കാട്, ജഗതി, പൂജപ്പുര, മുടവൻമുകൾ വഴി പുന്നയ്ക്കാമുകളിലേക്കാണ് കെഎസ്ആർടിസി ബസ്‌ സർവീസ് പുനരാംഭിച്ചത്. തിങ്കളാഴ്ച രാവിലെ പാച്ചല്ലൂർ സ്കൂൾ ജംഗ്ഷനിൽ കേരളാ കോൺഗ്രസ് (ബി) തിരുവനന്തപുരം ജില്ലാ വർക്കിംഗ് പ്രസിഡന്‍റ് പാച്ചല്ലൂർ ജയചന്ദ്രന്‍റെ അധ്യക്ഷതയിൽ കൂടിയ ചടങ്ങിൽ കൗൺസിലർ പനത്തുറ പി. ബൈജു ഫ്ലാഗ് ഓഫ് ചെയ്ത് ഉദ്ഘാടന കർമം നിർവഹിച്ചു. ഡി. ജയകുമാർ സ്വാഗതം പറഞ്ഞു. അഡ്വ. പാച്ചല്ലൂർ നുജുമുദ്ദീൻ, ഡോ. വാഴാമുട്ടം ചന്ദ്രബാബു, പ്രഫ. ഡി. സജീവ് കുമാർ, സൂര്യ സന്തോഷ്, പാച്ചല്ലൂർ മണിയൻ നായർ, വെള്ളാർ സാബു, വാഴമുട്ടം രാധാകൃഷ്ണൻ, എസ്. പ്രശാന്തൻ, ഷിബു സേതുനാഥ്, പാറവിള വിജയകുമാർ, അനന്ത ശശി, ബി.എം. സുരേഷ്, ദൗലത്ത് ഷാ, എൻ. പദ്മകുമാർ, ഗിരിജ സുകുമാരൻ, ഹാർബർ വിജയൻ, ശ്രീകണ്ഠൻ നായർ, ആർ. ഹേമചന്ദ്രൻ, അബ്ദുൽ റഹിം, അജന്ത, നീതി ഫസിൽ, ജയകൃഷ്ണൻ തുടങ്ങിയവർ പങ്കെടുത്തു. ബസ് ഡ്രൈവറെയും കണ്ടക്ടറെയും മറ്റു ബസ് ജീവനക്കാരെയും ആദരിച്ചു.

അഷ്ടമിരോഹിണി ശോഭയാത്ര സംഘടിപ്പിച്ചു

നെടുമങ്ങാട്: ബാലഗോകുലം ആനാട് മണ്ഡലം മഹാശോഭയാത്ര വർണാഭം. പാറയ്ക്കൽ മണ്ഡപം ക്ഷേത്രം, വട്ടർത്തല ശ്രീധർമശാസ്താക്ഷേത്രം എന്നിവിടങ്ങളിൽനിന്ന് ആരംഭിച്ച് ശോഭായാത്ര ആനാട്ട് സംഗമിച്ചു. പണ്ടാരക്കോണം ദുർഗാക്ഷേത്രത്തിൽ സമാപിച്ചു.ബാലഗോകുലം ജില്ലാ അധ്യ ക്ഷൻ ജി. വേണുഗോപാൽ ഭദ്രദീപം തെളിച്ചു.കൃഷ്ണ വിഗ്രത്തിൽ ആനാട് രഘു മാല ചാർത്തി. ഗോകുലപതാക ശ്രീ കണ്ഠൻ നായർ കൈമാറി. ഗോപികാനൃത്തം അരങ്ങേറി.

കാർ മരത്തിൽ ഇടിച്ച്‌ അഞ്ച് പേർക്ക് പരിക്ക്

വെമ്പായം: കൊപ്പം ജംഗ്ഷനു സമീപം കാർ നിയന്ത്രണംവിട്ട് മരത്തിലിടിച്ച്‌ അഞ്ചു പേർക്ക് പരുക്ക്. സംസ്ഥാന പാതയിൽ ഇന്നലെ പുലർച്ചയാണ് അപകടം ഉണ്ടായത്. വെഞ്ഞാറമൂട് ഭാഗത്തു നിന്നും ആര്യനാട് കോട്ടൂർ ഭാഗത്തേക്കു പോയ വാഹനമാണ് അപകടത്തില്‍പ്പെട്ടത്. തീർഥാടനയാത്ര കഴിഞ്ഞ് മടങ്ങി വരികയായിരുന്ന അഞ്ചുപേർ അടങ്ങുന്ന സംഘമാണ് വാഹനത്തില്‍ ഉണ്ടായിരുന്നത്. ഡ്രൈവർ ഉറങ്ങിപ്പോയതാകാം അപകടകാരണമെന്നാണ് പ്രാഥമിക നിഗമനം. വെഞ്ഞാറമൂട് പോലീസ് മേൽ നടപടി സ്വീകരിച്ചു.

ലൈഫ് ഗാർഡുമാർക്കു ഇക്കുറിയും ശന്പളമില്ല

വിഴിഞ്ഞം: ഏതു പ്രതികൂല സാഹചര്യങ്ങളിലും കടലിൽ രക്ഷാപ്രവർത്തനം നടത്തി മത്സ്യത്തൊഴിലാളികളുടെ ജീവനും സ്വത്തിനും സുരക്ഷയൊരുക്കുന്ന ലൈഫ് ഗാർഡുമാർക്കും മറൈൻ ആംബുലൻസിലെ നേഴ്സുമാർക്കും ഇക്കുറി ഓണമുണ്ണാനായില്ല. തുച്ഛമായ ശമ്പളത്തിനു ദിവസവേതനാടിസ്ഥാനത്തിൽ പണിയെടുക്കുന്നവരെ അധികൃതർ തിരിഞ്ഞു നോക്കിയില്ലെന്ന് ആക്ഷേപം. നാലു മാസമായുള്ള ശമ്പളക്കുടിശിക കിട്ടണമെന്ന നിരന്തര ആവശ്യവും ഉന്നതർ പരിഗണിച്ചില്ല. ആയിരക്കണക്കിനു വള്ളങ്ങൾ കടലിൽ ഇറങ്ങുന്ന വിഴിഞ്ഞത്തിന്‍റെയും എന്നും അപകടക്കെണിയായി മാറിയ മുതലപ്പൊഴിയുടെയും സുരക്ഷയ്ക്കായി ഫിഷറീസ് വകുപ്പ് നിയോഗിച്ച 35 ഓളം ലൈഫ് ഗാർഡുമാരാണു കഷ്ടത്തിലായത്. എട്ടു മണിക്കൂർ ജോലിക്ക് 730 രൂപ ശമ്പളം നിശ്ചയിച്ച് നിയോഗിക്കപ്പെട്ട ഇവർ, നിലവിൽ 12 മണിക്കൂർ വരെ പണിയെടുക്കുന്നുണ്ട്. മറ്റു പണികൾക്കു പോകാൻ പറ്റാത്ത ഗാർഡുമാരുടെ ഏക വരുമാനമാണു നാലു മാസമായി ഇല്ലാതായത്. ഇതോടെ കുടുംബവും പട്ടിണിയുടെ വക്കിലായതായും ഇവർ പറയുന്നു. ഫിഷറീസ് വകുപ്പിന്‍റെ വകയായി മൂന്നു രക്ഷാ വള്ളങ്ങളും ഒരു വാടകബോട്ടും മറൈൻ ആംബുലൻസുമാണ് വിഴിഞ്ഞത്തിനും മുതലപ്പൊഴിക്കുമായുള്ളത്. ഇവയിൽ എല്ലാമായി ആകെയുള്ള 45 ലൈഫ് ഗാർഡുമാരിൽ പത്തു പേർക്കു ഫിഷറീസ് ഡെപ്യൂട്ടി ഡയറക്ടറുടെ മേൽനോട്ടത്തിലും 35 പേർക്ക് അസിസ്റ്റന്‍റ് ഡയറക്ടറുടെ മേൽനോട്ടത്തിലുമാണ് ശമ്പളം നൽകുന്നത്. പ്രതിഷേധമുയർന്നപ്പോൾ പത്ത് പേർക്ക് ഓഗസ്റ്റുവരെയുള്ള കുടിശിക നൽകിയെങ്കിലും 35 പേരുടെ കാര്യത്തിൽ തീരുമാനമുണ്ടായില്ല. ഇവർക്കു ശമ്പളം നൽകാനുള്ള ഫണ്ടില്ലെന്നാണ് അധികൃതരുടെ വാദം. മറ്റു ജില്ലകളിൽ ഉള്ളതിനെക്കാൾ തിരുവനന്തപുരം ജില്ലയിൽ ലൈഫ് ഗാർഡുമാരുടെ അംഗസംഖ്യ കൂടിയതാണ് പ്രശ്നമായി അധികൃതർ പറയുന്നത്. പതിനെട്ടു വർഷം മുതൽ പണിയെടുക്കുന്നവർക്കുപരി മൂന്നു മാസം മുൻപു വരെയും ലൈഫ് ഗാർഡുകളായി ആളെടുത്തതായും പറയപ്പെടുന്നു. പ്രളയകാലത്തു രക്ഷാപ്രവർത്തനം നടത്തിയ കുറച്ചു മത്സ്യത്തൊഴിലാളികൾക്കു സർക്കാരിന്‍റെ മേൽനോട്ടത്തിൽ ഗോവയിലെ നാഷണൽ ഇൻസ്റ്റിറ്റ്യൂട്ട് ഓഫ് വാട്ടർ സ്പോർട്സിൽനിന്ന് 15 ദിവസത്തെ ട്രെയിനിംഗം നൽകിയിരുന്നു. മുതലപ്പൊഴിയുടെ പേരിൽ ആദ്യം തെരഞ്ഞെടുത്തവർക്ക് ഗോവയിലെ ട്രെയിനിംഗ് മാനദന്ധമായി നിശ്ചയിച്ചിരുന്നെങ്കിലും പിന്നെയെല്ലാം തകിടം മറിഞ്ഞതായും ആരോപണമുയർന്നിരുന്നു. ഇവരുൾപ്പെടെയുള്ള ഭൂരിപക്ഷം ആൾക്കാർക്കും ജൂൺ മാസത്തിനുശേഷം ശമ്പളം നൽകിയിട്ടില്ലെന്നാണറിവ്. ഇതോടെ കുട്ടികളുടെ പഠനവും വീട്ടുകാര്യങ്ങളും വഴിമുട്ടിയ സങ്കടത്തിലാണു രക്ഷാദൗത്യസംഘം. മറൈൻ ആംബുലൻസിലെ മറ്റു ജീവനക്കാർക്കു മേൽനോട്ടം വഹിക്കുന്ന കമ്പനി ശമ്പളം നൽകുമ്പോൾ രണ്ടു നേഴ്സുമാർക്ക് ഫിഷറീസ് വകുപ്പാണ് ശമ്പളം നൽകേണ്ടത്. ഇക്കുറി നേഴ്സുമാരെയും അധികൃതർ മറന്നു. സ്വന്തം ലേഖകൻ

എൻ. കൃഷ്ണപിള്ള കലോത്സവം 19 മുതൽ 22 വരെ

തിരുവനന്തപുരം: പ്രഫ. എൻ.കൃഷ്ണപിള്ളയുടെ ജന്മവാർഷികത്തോടനുബന്ധിച്ച് എൻ. കൃഷ്ണപിള്ള ഫൗണ്ടേഷന്‍റെ ആഭിമുഖ്യത്തിൽ 19 മുതൽ 22 വരെ നന്ദാവനം എൻ.കൃഷ്ണപിള്ള ഫൗണ്ടേഷൻ ഓഡിറ്റോറിയത്തിൽ കലോത്സവം സംഘടിപ്പിക്കും. നാടകാവാതരണം, നാടകപാരായണം, ശീതങ്കൻ തുള്ളൽ, സാസ്കാരികസമ്മേളനം, പുസ്തകശാല ഉദ്ഘാടനം, തിരുവാതിര, കഥാപ്രസംഗം, പഞ്ചവാദ്യം, അക്ഷരശ്ലോകം, നൃത്തനൃത്ത്യങ്ങൾ, ലളിതഗാനാഞ്ജലി, കാവ്യപൂജ, കവിയരങ്ങ്, പുസ്തക പ്രകാശനം, ഛായാചിത്രങ്ങൾ അനാച്ഛാദനം, പുസ്തകപ്രദർശന-വിൽപ്പന, കുട്ടികളുടെ വിവിധ കലാപരിപാടികൾ എന്നിവ കലോത്സവത്തിന്‍റെ ഭാഗമായി സംഘടിപ്പിച്ചിട്ടുണ്ട്. 19 നു കലോത്സവവും പുസ്തകശാലയും അടൂർ ഗോപാലകൃഷ്ണൻ ഉദ്ഘാടനം ചെയ്യും. ഫൗണ്ടേഷൻ ചെയർമാൻ പന്ന്യൻ രവീന്ദ്രൻ അധ്യക്ഷനാകും. പൂന്താനം, ഇരയിമ്മൻ തന്പി, സ്വാതിതിരുനാൾ എന്നിവരുടെ ഛാ യാചിത്രങ്ങൾ ശ്രീകുമാരൻ തന്പി അനാച്ഛാദനം ചെയ്യും.

തിരുവനന്തപുരത്തും കോഴിക്കോടും അന്താരാഷ്ട്ര കൊറിയർ കാർഗോ ടെർമിനലുകൾ പ്രവർത്തനസജ്ജം

വലിയതുറ: തിരുവനന്തപുരത്തും കോഴിക്കോടും അന്താരാഷ്ട്ര കൊറിയർ കാർഗോ ടെർമിനലുകൾ സജ്ജമായി. തിരുവനന്തപുരം ശംഖുമുഖം എയർ കാർഗോ ടെർമിനലിൽ നടന്ന ചടങ്ങിൽ മന്ത്രി പി. രാജീവ് തിരുവനന്തപുരത്തെയും കോഴിക്കോടിലെയും ടെർമിനലുകൾ ഉദ്ഘാടനം ചെയ്തു. തിരുവനന്തപുരം സോൺ സിജിഎസ്ടി ആൻഡ് കസ്റ്റംസ് ചീഫ് കമ്മീഷണർ ഷെയ്ഖ് ഖാദർ റഹ്മാൻ ടെർമിനലിന്‍റെ പ്രവർത്തനങ്ങൾക്ക് തുടക്കം കുറിച്ചു. കേരളത്തിന്‍റെ ആഗോള വ്യാപാര മത്സരക്ഷമത വർധിപ്പിക്കുന്നതിലും സംസ്ഥാനത്തിന്‍റെ വ്യാവസായിക വളർച്ചയെ പിന്തുണയ്ക്കുന്നതിലും ആധുനിക കൊറിയർ കാർഗോ സൗകര്യങ്ങൾ വഹിക്കുന്ന നിർണായക പങ്കിനെ മന്ത്രി പി. രാജീവ് അഭിനന്ദിച്ചു. തിരുവനന്തപുരത്ത് അന്താരാഷ്ട്ര കൊറിയർ ടെർമിനലിന് തത്വത്തിൽ അംഗീകാരം നൽകുന്നതിലൂടെ നൽകിയ പിന്തുണയ്ക്ക് കസ്റ്റംസ് വകുപ്പിനും മന്ത്രി നന്ദി പറഞ്ഞു. ഇതു പ്രവാസി മലയാളികളുടെ കുടുംബങ്ങൾക്ക് ഏറെ പ്രയോജനം ചെയ്യുമെന്നും കേരളം ആസ്ഥാനമായി പ്രവർത്തിക്കുന്ന വിൽപ്പനക്കാർക്കുള്ള അതിർത്തി കടന്നുള്ള ഇ-കൊമേഴ്‌സ് പ്രോത്സാഹിപ്പിക്കുമെന്നും ചീഫ് കമ്മീഷണർ സിജിഎസ്ടി ആൻഡ് കസ്റ്റംസ് ഷെയ്ഖ് ഖാദർ റഹ്മാൻ പറഞ്ഞു. സെൻട്രൽ ബോർഡ് ഓഫ് ഇൻഡയറക്ട് ടാക്സസ് ആൻഡ് കസ്റ്റംസ് കൊച്ചി, കാലിക്കറ്റ്, തിരുവനന്തപുരം എന്നിവയുൾപ്പെടെ 13 അന്താരാഷ്ട്ര വിമാനത്താവളങ്ങളെ അന്താരാഷ്ട്ര കൊറിയർ ടെർമിനലുകളായി വിജ്ഞാപനം ചെയ്തിരുന്നു. കേരളത്തിൽ ഇതുവരെ കൊ ച്ചി വിമാനത്താവളത്തിൽ മാത്രമേ കൊറിയർ സൗകര്യം ലഭ്യമായിരുന്നുള്ളൂ. ഈ മൂന്ന് അന്താരാഷ്ട്ര കൊറിയർ ടെർമിനലുകളുടെയും സാന്നിധ്യം കേരളത്തിന്‍റെ വ്യാപാര അടിസ്ഥാന സൗകര്യങ്ങൾ മെച്ചപ്പെടുത്തുകയും കാര്യക്ഷമമായ ആഗോള ലോജിസ്റ്റിക്സ് സുഗമമാക്കുകയും ചെയ്യും. വ്യാവസായിക, വാണിജ്യ പുരോഗതിക്കുള്ള ഒരു കേന്ദ്രമെന്ന നിലയിൽ സംസ്ഥാനത്തിന്‍റെ പങ്ക് കൂടുതൽ ശക്തിപ്പെടുത്തുകയും ചെയ്യും. എംഎൽഎമാരാ യ ആന്‍റണി രാജു, ടി.വി. ഇബ്രാഹിം, പി. അബ്ദുൾ ഹമീദ്, കെഎസ്ഐഇ ചെയർമാൻ പീലിപ്പോസ് തോമസ് തുടങ്ങിയവർ ചടങ്ങിൽ സംബന്ധിച്ചു.

ഡെലിവറി വാൻ അപകടത്തിൽപ്പെട്ടു, ഒരാൾ മരിച്ചു; രണ്ടു പേർക്ക് പരിക്ക്

കിളിമാനൂർ : ഡെലിവറി വാൻ നിയന്ത്രണം വിട്ട് റോഡ് സൈഡിലേക്ക് ഇടിച്ചു കയറിയുണ്ടായ അപകടത്തിൽ ഒരാൾ മരിച്ചു. രണ്ടു പേർക്ക് ഗുരുതരമായി പരിക്കേറ്റു . മടവൂർ പുലിയൂർ കോണം എലികുന്നാം മുകൾ റോഡരികത്ത് വീട്ടിൽ നിസാമുദ്ദീൻ -ഷീബ ദമ്പതികളുടെ മകൻ ഷിബിൻ (29) ആണ് മരിച്ചത്.അവിവാഹിതനാണ്. തങ്കകല്ല് കൈതോട് കുന്നത്ത് വീട്ടിൽ ജിഷു (26) കൈതോട് സ്വദേശി ആസിഫ് (28) എന്നിവർക്കാണ് പരിക്കേറ്റത് .പരിക്കേറ്റവരെ വെഞ്ഞാറമൂട് ഗോകുലം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു സംസ്ഥാന പാതയിൽ കിളിമാനൂരിന് സമീപം മണലേത്ത് പച്ചയിൽ ഇന്നലെ വൈകുന്നേരം 5.15 മണിയോടെയായിരുന്നു അപകടം. തങ്കകല്ലിൽ പ്രവർത്തിക്കുന്ന കുന്നത്ത് സോഡാ ഫാക്‌ടറിയിൽ നിന്നും കാലി കുപ്പികളുമായി കിളിമാനൂരിലേക്ക് വന്നതായിരുന്നു ഡെലിവറിവാൻ . വാനിന്‍റെ ഡ്രൈവറായിരുന്നു മരണപ്പെട്ട ഷിബിൻ. തട്ടത്തുമലയിൽ നിന്നും ഇറക്കം ഇറങ്ങി വരുമ്പോൾ നിയന്ത്രണം വിട്ട് ഇടതു ഭാഗത്തേക്ക് ഇടിച്ചുകയറുകയായിരുന്നു. വെഞ്ഞാറമൂടിൽ നിന്നും ഫയർ ഫോഴ്‌സ് സംഘം എത്തിയാണ് വാഹനത്തിൽ കുരുങ്ങി കിടന്ന ഷിബിനെ പുറത്തെടുത്തത് . ഉടനെ ആശുപത്രിയിൽ എത്തിച്ചെങ്കിലും മരിക്കുകയായിരുന്നു .കിളിമാനൂർ പോലീസ് കേസെടുത്തു

ജീർണിച്ച നിലയിൽ കണ്ടെത്തിയ മൃതദേഹം തിരിച്ചറിഞ്ഞില്ല

മെഡിക്കൽ കോളജ്: ജീർണിച്ച നിലയിൽ കണ്ടെത്തിയ മൃതദേഹം തിരിച്ചറിയാനായില്ല. ഞായറാഴ്ച ചാക്കയിൽ പണി നടന്നുവരുന്ന ആറു നില കെട്ടിടത്തിന്‍റെ രണ്ടാമത്തെ നിലയിലാണ് 40 വയസിനോടടുത്ത് പ്രായം വരുന്ന പുരുഷന്‍റെ മൃതദേഹം കണ്ടെത്തിയത്. തറയിൽ കിടക്കുന്ന നിലയിലായിരുന്നു മൃതദേഹം. പുഴുവരിച്ച നിലയിൽ കണ്ടെത്തിയ മൃതദേഹത്തിന് 15 ദിവസത്തോളം പഴക്കം വരും എന്നാണ് പോലീസ് പറയുന്നത്. ശരീരത്തിന്‍റെ ഭൂരിഭാഗവും നഷ്ടപ്പെട്ട അവസ്ഥയിലായിരുന്നു. മരണത്തിൽ ദുരൂഹതയുണ്ടോ എന്നുള്ള കാര്യം വ്യക്തമായിട്ടില്ല. വിശദമായ അന്വേഷണം നടന്നുവരുന്നതായി പേട്ട പോലീസ് അറിയിച്ചു.

നേത്രദാന ബോധവത്ക്കരണ ക്ലാസ്

നെടുമങ്ങാട് : ദേശീയ നേത്രദാന പക്ഷാചരണത്തിന്‍റെ ഭാഗമായി നെടുമങ്ങാട് ജില്ലാ ആശുപത്രിയിൽ നേത്രദാന ബോധവത്ക്കരണ ക്ലാസ് നടത്തി. ആശുപത്രി നേത്രവിഭാഗം മേധാവി ഡോ. ദീപ്തിലാൽ ബോധവത്ക്കരണ ക്ലാസിന് നേതൃത്വം നൽകി. ആശുപത്രി സൂപ്രണ്ട് ഡോ.രേഖ രവീന്ദ്രൻ അധ്യക്ഷത വഹിച്ചു. ആർഐഒ ഒഫ്താൽമോളജിസ്റ്റ് ഡോ. ജിത്തുവിന്‍റെ നേതൃത്വത്തിൽ നേത്രദാന പ്രതിജ്ഞ ചൊല്ലി. നഴ്സിംഗ് സൂപ്രണ്ട് ബിന്ദു, ലേ സെക്രട്ടറി സ്റ്റാൻലി, സീനിയർ നഴ്‌സിംഗ് ഓഫീസർമാരായ ബിന്ദു, ലീന, ഫാർമസിസ്റ്റ് സുമയ്യ, ഗോകുലം മെഡിക്കൽ കോളജിലെ ഒഫ്തൽമോളജിസ്റ്റ് ഡോ.ശിവഒപ്റ്റോമെട്രിസ്റ്റുമാരായ നബീൽ, സ്മൃതി എന്നിവർ പങ്കെടുത്തു. സീനിയർ ഒപ്റ്റോമെട്രിസ്റ്റ് ജലീല യോഗത്തിന് നന്ദി പറഞ്ഞു.

അഷ്ടമിരോഹിണി ഉത്സവം ആരംഭിച്ചു

വെള്ളറട: കുന്നത്തുകാല്‍ മാണിനാട് ശ്രീകൃഷ്ണ സ്വാമി ക്ഷേത്രത്തിലെ അഷ്ടമിരോഹിണി ഉത്സവവും ഭാഗവത സപ്താഹ യജ്ഞവും സെപ്റ്റംബര്‍ 13ന് ആരംഭിച്ചു. 21 ന് സമാപിക്കും. ശ്രീകൃഷ്ണ ജയന്തി ഉത്സവവും പതിമൂന്നാമത് ഭാഗവത സപ്താഹ യജ്ഞവും തിരുവിതാംകൂര്‍ രാജകുടും ബാംഗം ആദിത്യ വര്‍മ്മ ഭദ്രദീപം കൊളുത്തി ഉദ്ഘാടനം ചെയ്തു. ആഴിമല ക്ഷേത്രം മേല്‍ശാന്തി ജ്യോതിഷ് പോറ്റി മുഖ്യപ്രഭാഷണം നടത്തി. കലണ്ടര്‍ പ്രകാശനം ക്ഷേത്രതന്ത്രി ഡോ. വാസുദേവന്‍ നിര്‍വഹിച്ചു. ഉത്സവ ദിനങ്ങളില്‍ ഗണപതി ഹോമം ,ശാസ്താ പൂജ, നാഗര്‍ പൂജ, ബ്രഹ്മരക്ഷസ് പൂജ ,സമൂഹസദ്യ, അലങ്കാര ദീപാരാധന, വിശേഷാല്‍ പൂജ എന്നിവ നടക്കും.15 ന് രാവിലെ 6.3ന് സപ്താഹ യജ്ഞം ആരംഭം. 9 ന് മെഡിക്കല്‍ ക്യാമ്പ് .16ന് വൈകുന്നേരം 9.30 ന് ഗാനാമൃതം . 17 ന് രാവിലെ 9 ന് യജ്ഞവേദിയില്‍ ശ്രീകൃഷ്ണ അവതാരം പ്രഭാഷണം. 9.30 ന് തിരുവാതിര .18 ന് രാവിലെ 9 ന് മഹാമൃത്യുഞ്ജയഹോമം 10 ന് യജ്ഞശാലയില്‍ ഗോവിന്ദാഭിഷേകം. 19 ന് ഉച്ചയ്ക്ക് 1 ന് കല്ലാണസദ്യ. വൈകു. 5 ന് രുഗ്മിണീ സ്വയംവര ഘോഷയാത്ര 20ന് രാവിലെ 10ന് മെഡിക്കല്‍ ക്യാമ്പ്.വൈകു.6 ന് വിദ്യാരാജഗോപാലമന്ത്രാര്‍ച്ചന. രാത്രി. 9.30ന് കാവ്യാര്‍ച്ചന. 21 ന് ഞായര്‍ രാവിലെ 8ന് പ്രഭാത പൂജ 9 ന് ആറാട്ട് ഘോഷയാത്ര തുടര്‍ന്ന് ആറാട്ട് സദ്യ. വൈകു.6.30ന് വെടിക്കെട്ട് തുടര്‍ന്ന് തിരുവാതിര .

സൗദി ജയിലില്‍ കഴിയുന്ന ഷിബുവിനെ മോചിപ്പിക്കാൻ ഫണ്ട് ശേഖരണം

വെള്ളറട : സൗദി ജയിലില്‍ കഴിയുന്ന ഷിബുവിനെ മോചിപ്പിക്കുന്നതിനായി വെള്ളറടയില്‍ നാട്ടുകാര്‍ ഒന്നിച്ചു. കോവിഡ് സമയത്ത് സൗദിയില്‍ ഡ്രൈവറായിരുന്ന കുടപ്പനമൂട് വയലിംഗല്‍ റോഡരികത്ത് വീട്ടില്‍ ഷിബു(45) അനധികൃതമായി കാര്‍ ഓടിച്ചുവെന്ന കാരണത്താൽ സൗദി ജയിലില്‍ 5 വര്‍ഷമായി ശിക്ഷയില്‍ കഴിയുകയാണ്. ഷിബു അഞ്ച് വര്‍ഷമായി ജയിലില്‍ കഴിയുന്നുവെങ്കിലും രണ്ടുവര്‍ഷത്തെ ശിക്ഷയാണ് സൗദി കോടതി വിധിച്ചത്. ഒന്നരലക്ഷം റിയാല്‍ (36 ലക്ഷം രൂപ) പിഴ അടച്ചാലെ ജയില്‍ മോചിതനാകാന്‍ കഴിയുകയുള്ളു. ആ ഫണ്ട് സ്വരൂപിക്കുന്നതിനുള്ള ശ്രമത്തിലാണ് പ്രവാസി സംഘടന. ഫണ്ട് സ്വരൂപണത്തിനുള്ള ഉദ്ഘാടനം ഇന്നലെ വൈകുന്നേരം വെള്ളറടയില്‍ പ്രവാസി കോണ്‍ഗ്രസ് സംസ്ഥാന പ്രസിഡന്‍റ് എല്‍. ബി. അജയകുമാര്‍ ബ്രോഷര്‍ കൈമാറി നിര്‍വഹിച്ചു. നേതാക്കളായ ഷിജു തടത്തില്‍, പ്രതീപ്, അശോകന്‍ തുടങ്ങിയവര്‍ സംസാരിച്ചു. ഫണ്ട് ശേഖരണത്തിന് പ്രവാസി സംഘടനയില്‍ പെട്ട ജംഷീര്‍, ഷിജിന്‍, രാജന്‍, സനല്‍, പ്രേമന്‍, സനല്‍ അടങ്ങുന്ന സംഘം ്‍ ഉണ്ട്. വെള്ളറടയില്‍ നടന്ന പരിപാടിയില്‍ ഷിബുവിന്‍റെ ഭാര്യ സുനിത മകന്‍ സോജു, മാതാവ് പാലമ്മ എന്നിവര്‍ പങ്കെടുത്തു.

ആനപ്പാറ വിശുദ്ധ കുരിശിന്‍റെ ദേവാലയ തിരുനാളിന് കൊടിയിറങ്ങി

വെള്ളറട: ആനപ്പാറ വിശുദ്ധ കുരിശിന്‍റെ ദേവാലയത്തിലെ 8-ാമത് തിരുനാളിന് സമാപനമായി. 7 ന് ആരംഭിച്ച തിരുനാള്‍ 14 ന് ഇടവക വികാരി മോണ്‍.ഡോ. വിന്‍സെന്‍റ് കെ.പീറ്റര്‍ പതാക താഴ്ത്തിയതോടെ സമാപിച്ചു. ആനപ്പാറ ഇടവക ദേവാലയത്തില്‍ നിന്നും വിശുദ്ധ മിഖായേല്‍ മാലാഖ കുരിശടിയിലേയ്ക്ക് നടന്ന ദിവ്യകാരുണ്യ പ്രദക്ഷിണത്തില്‍ കത്തിച്ച മെഴുകുതിരികളുമായി നൂറ് കണക്കിന് വിശ്വാസികള്‍ പങ്കെടുത്തു. സഹ വികാരി ഫാ. അരുണ്‍ പി. ജിത്ത് നേതൃത്വം നല്‍കി. ആഘോഷമായ സമാപന ദിവ്യബലിയ്ക്ക് കിളിയൂര്‍ ഇടവക വികാരി ഫാ.എം.കെ. ക്രിസ്തുദാസ് മുഖ്യ കാര്‍മികത്വം വഹിച്ചു. ഫാ. സി. അനു വചന പ്രഘോഷണം നടത്തി. മോണ്‍.ഡോ. വിന്‍സെന്‍റ് കെ.പീറ്റര്‍, ഫാ. അരുണ്‍ പി. ജിത്ത് എന്നിവര്‍ സഹകാര്‍മാകരായിരുന്നു. സ്‌നേഹവിരുന്നും നടന്നു. ജൂബിലി ഗാനാലാപത്തോടെ തിരുനാള്‍ അവസാനിച്ചു.

ചവറുകൂനയ്ക്ക് തീപിടിച്ചു

പേരൂര്‍ക്കട: തൈക്കാട് മേട്ടുക്കട അയ്യാഗുരു ക്ഷേത്രത്തിനു സമീപം സ്വകാര്യവ്യക്തിയുടെ ഭൂമിയില്‍ കൂട്ടിയിട്ടിരുന്ന ചപ്പുചവറുകള്‍ക്കും സ്‌പ്രേ ബോട്ടിലുകള്‍ക്കും തീപിടിച്ചു. ഫയർഫോഴ്സ് എത്തി തീയണച്ചു. ഇന്നലെ ഉച്ചയ്ക്ക് ഒന്നിന് സ്വകാര്യ വ്യക്തിയുടെ ഉടമസ്ഥതയിലുള്ള 25 സെന്‍റ് വരുന്ന പുരയിടത്തില്‍ പുറമേയുള്ളവര്‍ നിക്ഷേപിച്ചിരുന്ന ചപ്പുചവറുകള്‍ക്കാണു തീപിടിച്ചത്. ചവറുകള്‍ക്കിടയില്‍ കിടന്ന സ്‌പ്രേ ബോട്ടിലുകള്‍ക്ക് തീപിടിച്ചപ്പോള്‍ വന്‍ശബ്ദമാണ് ഉണ്ടായത്. ഇതേ ഭൂമിയില്‍ കഴിഞ്ഞ രണ്ടുമാസത്തിനു മുമ്പ് രണ്ടുതവണ തീപിടിത്തമുണ്ടായിരുന്നു. തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റെസ്‌ക്യു ഓഫീസര്‍ ശ്രീജിത്തിന്‍റെ നേതൃത്വത്തില്‍ എഫ്ആര്‍ഒമാരായ ഷഹീര്‍, മഹേഷ്, ഷിബിന്‍, ജിത, രശ്മി, എഫ്ആര്‍ഒ ഡ്രൈവര്‍ അരുണ്‍രാജ് എന്നിവര്‍ ചേര്‍ന്നാണ് തീ കെടുത്തിയത്.

വെള്ളൂര്‍ക്കോണം പള്ളിയിൽ തിരുനാളിന് കൊടിയേറി

നെടുമങ്ങാട്: വെള്ളൂര്‍ക്കോണം മലങ്കര കത്തോലിക്കാ പള്ളിയില്‍ ലാസലേത്ത് മാതാവിന്‍റെ തിരുനാളിനു കൊടിയേറി. ഇന്നലെ പ്രഭാതപ്രാര്‍ത്ഥനയ്ക്കും വിശുദ്ധ കുര്‍ബാനയ്ക്കും ശേഷം ഇടവക വികാരി റവ.ഡോ. തോമസ് കുഴിനാപ്പുറത്ത് തിരുനാള്‍ കൊടിയേറ്റി. തുടര്‍ന്നുവരുന്ന ദിവസങ്ങളില്‍ ഫാ. അരുണ്‍ ഏറത്ത്, ഫാ. ജേക്കബ് മാത്യു, ഫാ. മാത്യൂസ് ആലുംമൂട്ടില്‍, ഫാ. ആന്‍റണി പ്ലാംപറമ്പില്‍, ഫാ. ജോഷ്വാ കൊച്ചുവിളയില്‍ എന്നിവര്‍ വിശുദ്ധ കുര്‍ബാനയ്ക്ക് മുഖ്യ കാര്‍മികത്വം വഹിക്കും. തിങ്കള്‍, ചൊവ്വ, ബുധന്‍ ദിവസങ്ങളില്‍ നടക്കുന്ന കുടുംബ നവീകരണ ധ്യാനത്തിന് ബാംഗ്ലൂര്‍ ശീലോഹ ധ്യാനകേന്ദ്രത്തില്‍ നിന്നുള്ള ബ്രദര്‍ റോയി ജോസഫ് നേതൃത്വം നല്‍കും. വ്യാഴാഴ്ച ഭക്തസംഘടനകളുടെ വാര്‍ഷികം റവ.ഡോ. തോമസ് പ്രമോദ് ഒഐസി ഉദ്ഘാടനം ചെയ്യും. കുട്ടികളുടെയും യുവജനങ്ങളുടെയും വിവിധ കലാപരിപാടികള്‍ അരങ്ങേറും. വെള്ളി നെടുമങ്ങാട് വൈദിക ജില്ലയിലെ വൈദികരുടെ കാര്‍മികത്വത്തില്‍ സമൂഹ ബലിയും ആഘോഷമായ തിരുനാള്‍ റാസയും നടക്കും. പ്രധാന തിരുനാള്‍ ദിവസമായ 21 ഞായറാഴ്ച ആഘോഷമായ പൊന്തിഫിക്കല്‍ കുര്‍ബാനയ്ക്ക് മലങ്കര സുറിയാനി കത്തോലിക്കാ സഭയിലെ സീനിയര്‍ മെത്രാപോലിത്ത യൂഹാനോന്‍ മാര്‍ ക്രിസോസ്റ്റം കാര്‍മികത്വം വഹിക്കും. സ്‌നേഹവിരുന്നോടെ ചടങ്ങുകള്‍ ചടങ്ങുകള്‍ക്ക് സമാപനം കുറിക്കും. വിവിധ ആഘോഷ പരിപാടികള്‍ക്ക് ഇടവക കൈക്കാരന്‍ ജെ.അനില്‍കുമാര്‍, സെക്രട്ടറി സോനു സതീഷ് എന്നിവരുടെ നേതൃത്വത്തില്‍ വിവിധ കമ്മിറ്റികള്‍ നേതൃത്വം നല്‍കും.

മാറനല്ലൂരിൽ മോഷണം തുടർക്കഥ; പ്രതികളെ പിടികൂടാനാകാതെ പോലീസ്

മാറനല്ലൂർ : മാറനല്ലൂർ സ്റ്റേഷൻ പരിധിയിൽ ഒരു മാസത്തിനിടെ പത്തിടത്ത് മോഷണങ്ങൾ നടന്നിട്ടും പ്രതികളെ പിടികൂടാനാകാതെ പോലീസ്. ഒരു പ്രതിയെ മാത്രമാണ് പോലീസിന് ഇതുവരെ കണ്ടെത്താനായത്. കഴിഞ്ഞ വെള്ളിയാഴ്ച പുലർച്ചെ മണ്ണടിക്കോണം പാപ്പാകോട്ടുള്ള ആദിപരാശക്തി ഗണപതി ക്ഷേത്രത്തിലെ കാണിക്കവഞ്ചി കുത്തിത്തുറന്ന് മോഷണം നടത്തിയതാണ് ഒടുവിലത്തേത്. മോഷ്ടാക്കളെപ്പറ്റി ഒരു തുമ്പും ഇതുവരെ പോലീസിന് കണ്ടെത്താനായിട്ടില്ല. ഒരു മാസം മുൻപാണ് രണ്ടു പേർ സ്‌കൂട്ടറിൽ കറങ്ങി മാറനല്ലൂരിൽ മോഷണം നടത്തിയത്. പഞ്ചായത്ത് ഓഫീസിനു സമീപം പ്രവർത്തിക്കുന്ന ബേക്കറിയും പുന്നാവൂരിൽ പ്രവർത്തിക്കുന്ന മാവേലി സ്റ്റോറും ചെന്നിയോടുള്ള ആളില്ലാത്ത വീടും വെളിയംകോട് പ്രവർത്തിക്കുന്ന രണ്ട് കടകളിലുമാണ് മോഷണം നടത്തിയത്. മാവേലി സ്റ്റോറിൽനിന്ന് 18000 രൂപയും ചെന്നിയോട്ടെ വീട്ടിൽനിന്ന് വിവാഹ സാരിയും രണ്ട് പവൻ വരുന്ന മാലയും മോഷ്ടിച്ചിരുന്നു. പ്രദേശത്തെ നിരീക്ഷണ കാമറകൾ പരിശോധിച്ച പോലീസ് പ്രതികളെ തിരിച്ചറിഞ്ഞു. കടയ്ക്കാവൂരിൽനിന്ന് മോഷ്ടിച്ചെടുത്ത സ്‌കൂട്ടറിലാണ് മാറനല്ലൂരിലും രണ്ട് പേർ മോഷണം നടത്തിയതെന്ന് കണ്ടെത്തുകയും ചെയ്തു. ഇവർ ഉപയോഗിച്ചിരുന്ന സ്‌കൂട്ടർ ഉപേക്ഷിച്ച നിലയിൽ റെയിൽവേ സ്റ്റേഷനിൽനിന്ന് കണ്ടെത്തിയെങ്കിലും പ്രതികളെ പിടികൂടാനായിട്ടില്ല. ഈ സംഭവം കഴിഞ്ഞ് ഒരാഴ്ചയ്ക്കു ശേഷം വീണ്ടും നാലിടങ്ങളിൽ മോഷണം നടന്നു. കൂവളശേരിയിലുള്ള ആളില്ലാത്ത വീടുകളിലാണ് ഒരേ ദിവസം മോഷണം നടന്നത്. എന്നാൽ ഇവിടങ്ങളിൽനിന്ന് വിലപിടിപ്പുള്ള സാധനങ്ങളൊന്നും നഷ്ടപ്പെടാത്തത് കാരണം ആരും തന്നെ പരാതിപ്പെട്ടതുമില്ല. രണ്ട് ദിവസങ്ങൾ പിന്നിട്ടപ്പോഴാണ് കണ്ടല ജംഗ്ഷനിൽ പ്രവർത്തിക്കുന്ന മൊബൈൽ കട കുത്തിത്തുറന്ന് സാധനങ്ങൾ മോഷ്ടിച്ചത്. ഇതിലും രണ്ടു പേർ ഉൾപ്പെട്ടെങ്കിലും രണ്ടുദിവസങ്ങൾക്ക് ശേഷം ശ്രീവരാഹം സ്വദേശിയായ യുവാവിനെ പോലീസ് അറസ്റ്റ് ചെയ്തു. ഒരു പ്രതിയെ ഇനിയും കണ്ടെത്താനായിട്ടില്ല. രണ്ടാഴ്ച മുൻപാണ് വീട് പൂട്ടി ഓണാഘോഷം കാണാൻ പോയ മേലാരിയോട് സ്വദേശിയുടെ വീട് കുത്തിത്തുറന്ന് 13 പവൻ മോഷ്ടിച്ചത്. വിരലടയാള വിദഗ്ധർ ഉൾപ്പെടെ പരിശോധന നടത്തിയെങ്കിലും പ്രതികളെക്കുറിച്ചുള്ള ഒരു സൂചനയും ഇതുവരെ ലഭിച്ചിട്ടില്ല.

ആനാട് പഞ്ചായത്തിന് ആർദ്ര കേരളം പുരസ്കാരം

നെടുമങ്ങാട്: ആർദ്ര കേരളം പുരസ്‌കാരം നേടി ആനാട് പഞ്ചായത്ത്.അലോപ്പതി, ആയുർവേദം, ഹോമിയോപ്പതി എന്നീ മേഖലകളിലെ മാതൃകാ പദ്ധതികളിലൂടെ ജില്ലയിലെ മികച്ച മൂന്നാമത്തെ പഞ്ചായത്തിനുള്ള അവാർഡാണ്‌ ആനാടിനെ തേടിയെത്തിയത്‌. ആനാട് ഹെൽത്ത് സെന്‍ററിനു പുതിയ കെട്ടിടം നിർമിച്ചു. അത്യാധുനിക ലാബ് സൗകര്യവും ഡോക്ടർമാരുടെ സേവനവും വിപുലപ്പെടുത്തി.ആയുർവേദ ആശുപത്രിയിൽ രോഗികൾക്കായി വിപുലമായ ഹാൾ സജ്ജീകരിച്ചു. ലാബ് സൗകര്യങ്ങളും വർധിപ്പിച്ചു. ഒരു കോടിയുടെ നിർമാണ പ്രവൃത്തികൾ അവസാന ഘട്ടത്തിലാണ്‌. ഹോമിയോ ഡിസ്പെൻസറിയിൽ വിപുലമായ ഹാളും ചികിത്സാ സംവിധാനങ്ങളും ശുചിമുറി സൗകര്യവും പുതുതായി സജ്ജീകരിച്ചു. യോഗാ പരിശീലനത്തിനും സൗകര്യമൊരുക്കി. പാലിയേറ്റീവ് കെയർരംഗത്തെ സംഭാവനകളും പുരസ്‌കാരത്തിന് വഴിയൊരുക്കി.വിവിധ ചികിത്സാരീതികൾ സംയോജിപ്പിച്ചാണ് പാലിയേറ്റീവ് രംഗത്തുൾപ്പെടെ പഞ്ചായത്ത് പദ്ധതികൾ നടപ്പാക്കുന്നത്‌. ഇത്തരം ഇടപെടലുകൾക്കുള്ള അംഗീകാരമാണ് പുരസ്കാരമെന്ന് ആനാട്‌ പഞ്ചായത്ത്‌ പ്രസിഡന്‍റ് എന്‍.ശ്രീകല പറഞ്ഞു. photo: ആനാട്‌ പഞ്ചായത്ത്‌ പ്രസിഡന്‍റ് എന്‍.ശ്രീകല

പൊട്ടിപ്പൊളിഞ്ഞ ടോയ്‌ലെറ്റുകള്‍; ക്ലിഫ്ഹൗസിനു പുറത്ത് ഡ്യൂട്ടിയിലുള്ള പോലീസുകാര്‍ ദുരിതത്തില്‍

പേരൂര്‍ക്കട: നന്തന്‍കോട് ക്ലിഫ്ഹൗസില്‍ ഡ്യൂട്ടിനോക്കുന്ന പോലീസുകാര്‍ അടിസ്ഥാന സൗകര്യങ്ങളില്ലാതെ ദുരിതത്തില്‍. ശുചീകരണവും മെയിന്‍റനന്‍സും ഇല്ലാത്തതിനാല്‍ ക്ലിഫ് ഹൗസ് കോമ്പൗണ്ടില്‍ സ്ഥാപിച്ചിട്ടുള്ള മൂന്ന് ടോയ്‌ലെറ്റുകൾ പരിതാപകരമായ അവസ്ഥയിലാണ്. ക്ലിഫ്ഹൗസിന് പുറത്ത് റോഡില്‍ ഡ്യൂട്ടിനോക്കുന്ന അന്പതോളം പോലീസുകാര്‍ക്ക് ഉപയോഗിക്കാന്‍ രണ്ട് വര്‍ഷത്തിനു മുമ്പ് നിര്‍മിച്ച ടോയ്‌ലെറ്റുകളാണ് നാശാവസ്ഥയില്‍ കിടക്കുന്നത്. മിക്ക ടോയ്‌ലെറ്റുകളുടെ ഡോറുകള്‍ക്കും കൊളുത്തുകളില്ല. ശുചീകരണമില്ലാത്തതിനാല്‍ ചപ്പുചവറുകളും മറ്റുള്ള മാലിന്യവും നിറഞ്ഞുകിടക്കുന്ന ടൈല്‍പാകിയ തറ. യൂറോപ്യന്‍ ക്ലോസറ്റുകള്‍ക്കു മേല്‍മൂടികളില്ല. ഫ്‌ളഷുകള്‍ മൂന്നും പ്രവര്‍ത്തനം നിലച്ച നിലയില്‍. ടോയ്‌ലെറ്റുകളിലുള്ള ബക്കറ്റുകള്‍ പൊട്ടിപ്പൊളിഞ്ഞ നിലയില്‍. പ്രാഥമിക കൃത്യനിര്‍വഹണത്തിനുശേഷം ശുചീകരണത്തിന് ഉപയോഗിക്കുന്ന പൈപ്പിനു ടാപ്പുപോലുമില്ല! ടോയ്‌ലെറ്റുകളിലേക്കുള്ള വെള്ളത്തിനു മാത്രം മുടക്കമില്ല. മുഖ്യമന്ത്രിയുടെ സുരക്ഷ വര്‍ധിപ്പിച്ചപ്പോൾ പോലീസുകാരുടെ എണ്ണം കൂട്ടിയതോടെയാണ് കൂടുതല്‍ ടോയ്‌ലെറ്റുകള്‍ നിര്‍മിച്ചത്. അതേസമയം ഗാര്‍ഡ്‌റൂമിനു സമീപത്തെ ടോയ്‌ലെറ്റ് നല്ലനിലയില്‍ പ്രവര്‍ത്തിക്കുന്നുണ്ട്. ഇവിടേക്ക് ചെല്ലാന്‍ റോഡില്‍ ഡ്യൂട്ടി നോക്കുന്ന പോലീസുകാര്‍ക്ക് അനുവാദമില്ല എന്നതാണ് വാസ്തവം. അടിസ്ഥാന സൗകര്യങ്ങള്‍പോലും അധികാരികള്‍ നിഷേധിക്കുന്നത് നോക്കിനില്‍ക്കാന്‍ മാത്രമാണ് പോലീസുകാരുടെ വിധി. തങ്ങളുടെ പരിദേവനങ്ങള്‍ ആരോടു പറയണം എന്നറിയാത്ത ദൈന്യതയിലാണ് പോലീസുകാര്‍.

മസ്‌കറ്റിലേക്കുളള വിമാനം റദ്ദാക്കി; പ്രതിഷേധിച്ച് യാത്രക്കാര്‍

വലിയതുറ: വിമാനം റദ്ദാക്കിയതിനെത്തുടര്‍ന്ന് തിരുവനന്തപുരം അന്താരാഷ്ട്ര വിമാനത്താവളത്തില്‍ യാത്രക്കാര്‍ പ്രതിഷേധിച്ചു. ഇന്നലെ രാവിലെ 7.30 ന് മസ്‌കറ്റിലേക്ക് പോകേണ്ടിയിരുന്ന എയര്‍ ഇന്ത്യ വിമാനം മുന്നറിയിപ്പില്ലാതെ റദ്ദാക്കിയതിനെത്തുടർന്നാണ് യാത്രക്കാര്‍ പ്രതിഷേധിച്ചത്. എന്നാല്‍ ഏത് സാഹചര്യത്തിലാണ് വിമാനം റദ്ദാക്കിയതെന്നോ പകരം സംവിധാനം ഒരുക്കാനോ ബന്ധപ്പെട്ട അധികൃതര്‍ തയാറിയിട്ടില്ലെന്നും ആക്ഷേപമുയരുന്നു. 182 യാത്രക്കാരാണ് വിമാനത്തില്‍ യാത്രചെയ്യാനായി വിമാനത്താവളത്തില്‍ എത്തിയതെന്നാണ് സൂചന. ഇവര്‍ക്ക് ഈ മാസം 21 വരെയുളള ദിവസങ്ങളില്‍ ഇതേ വിമാനത്താല്‍ യാത്ര ചെയ്യാനുളള സൗകര്യം ചെയ്തുകൊടുത്തതായിട്ടാണ് അധികൃതര്‍ വ്യക്തമാക്കുന്നത്.

വെഞ്ഞാറമ്മൂട് മേൽപ്പാല നിർമാണം : യാത്രികരുടേയും പ്രദേശവാസികളുടേയും ബുദ്ധിമുട്ട് പരമാവധി കുറയ്ക്കും

വെഞ്ഞാറമൂട് : യാത്രക്കാരുടേയും വ്യാപാരികളുടേയും പ്രദേശവാസികളുടേയും ബുദ്ധിമുട്ട് പരമാവധി ഒഴിവാക്കി വെഞ്ഞാറമൂട് മേൽപാല നിർമാണം നടത്തുമെന്ന് ഡി.കെ മുരളി എംഎൽഎ. മേൽപാല നിർമാണത്തിന്‍റെ ഭാഗമായുള്ള വാഹന ഗതാഗത നിയന്ത്രണങ്ങളുടെ നിലവിലെ സ്ഥിതി പരിശോധിക്കുന്നതിനായി ബന്ധപ്പെട്ട ഉദ്യോഗസ്ഥരുടെ അവലോകന യോഗത്തിനു ശേഷം സംസാരിക്കുകയായിരുന്നു അദ്ദേഹം. വാഹനങ്ങൾ തിരിച്ചുവിടുന്ന വിവരങ്ങൾ യാത്രക്കാരേയും പ്രദേശവാസികളേയും അറിയിക്കുന്നതിനായി നെല്ലനാട്, മാണിക്കൽ, പുല്ലമ്പാറ, പഞ്ചായത്ത് പ്രദേശങ്ങളിൽ മൈക്ക് അനൗൺസ്മെന്‍റ് നടത്താനും തീരുമാനമായി. മറ്റ് തീരുമാനങ്ങൾ 1.തിരുവനന്തപുരത്ത് നിന്ന് വരുന്ന കെ.എസ് ആർ ടി സി വാഹനങ്ങളും മറ്റ് ഹെവി വാഹനങ്ങളും തൈക്കാട് സമന്വയ നഗർ തിരിഞ്ഞ് മൈത്രി നഗർ വഴി വെഞ്ഞാറമൂട് എത്തി പോകണം. 2പിരപ്പൻകോട് നിന്നുള്ള വാഹനങ്ങളൊന്നും തന്നെ (തദ്ദേശ വാസികളുടെ വാഹന ങ്ങളൊഴികെ) ഔട്ടർ റിംഗ് റോഡ് വഴി കടത്തിവിടരുത്. 3.കിളിമാനൂരിൽ നിന്ന് തിരുവനന്തപുരത്തേക്ക് വരുന്ന വാഹനങ്ങൾ അമ്പലമുക്കിൽ നിന്ന് തിരിഞ്ഞ് ഔട്ടർ റിംഗ് റോഡ് വഴി പിരപ്പൻകോട്ടേയ്ക്ക് പോകണം. (എന്നാൽ ഇതു വഴിയുള്ള കെഎസ്ആർടിസി ബസുകൾ വെഞ്ഞാറമൂട് എത്തി തന്നെ പോകണം.) 4.പോത്തൻകോട് ഭാഗത്തു നിന്നു വരുന്ന ഹെവി വാഹനങ്ങൾ വേളാവൂരിൽ നിന്ന് തിരിഞ്ഞ് മൈത്രി നഗറിലെത്തി വെഞ്ഞാറമൂട് വഴി പോകണം. എന്നാൽ പോത്തൻകോട് വഴി വരുന്ന ചെറു വാഹനങ്ങളും ടൂവീലറുകളും വെഞ്ഞാറമൂട് വഴി വരുന്നതിന് നിലവിൽ തടസമില്ല. 5.പോത്തൻകോട് നിന്നു വരുന്ന സ്കൂൾ ബസുകൾക്ക് തൈക്കാട് നിന്ന് വയേറ്റ് മാണിക്കോട് എത്തി തിരിച്ച് പോകാവുന്നതാണ്. 6.വ്യാപാരാവശ്യത്തിനായി വരേണ്ട വാഹനങ്ങൾക്ക് വെഞ്ഞാറമൂട് പോലീസ് സ്റ്റേഷനിൽ നിന്ന് ലഭിക്കുന്ന പ്രത്യേക പാസ് ഉപയോഗിച്ച് വെഞ്ഞാറമൂട് വന്ന് പോകാവുന്നതാണ്. 7.വാഹനങ്ങൾ തിരിഞ്ഞു പോകേണ്ട സ്ഥലങ്ങളിൽ കൂടുതൽ അറിയിപ്പ് ബോർഡുകൾ വയ്ക്കേണ്ടതാണ്. 8.സമന്വയ നഗർ വഴി റോഡ് ആവശ്യമായ സ്ഥലങ്ങളിൽ അടിയന്തിരമായി അറ്റകുറ്റപണികൾ നടത്തണം. യോഗത്തിൽ നെല്ലനാട്, മാണിക്കൽ, പുല്ലമ്പാറ പഞ്ചായത്ത് പ്രസിഡൻറുമാർ, സെക്രട്ടറിമാർ, എസ് എച്ച് ഒ, കെഎസ്ആർടിസി, കെആർഎഫ്ബി, കെഎസ്ടിപി, കെഎസ്ഇബി, ഊരാളുങ്കൽ സൊസൈറ്റി എന്നിവിടങ്ങളിലെ ഉദ്യോഗസ്ഥരും പങ്കെടുത്തു.

ചൈനീസ് പ്രതിനിധി സംഘത്തിന് ഐസിഎഫ്എ സ്വീകരണം നൽകി

തിരുവനന്തപുരം: സൗഹൃദ സന്ദർശനാർഥം തിരുവനന്തപുരത്ത് എത്തിയ ചൈനീസ് എംബസി പ്രതിനിധി സംഘത്തിന് ഇന്ത്യ-ചൈന ഫ്രണ്ട്ഷിപ്പ് അസോസിയേഷൻ (ഐസിഎഫ്എ) സ്വീകരണം നൽകി. ഐസിഎഫ്എ സംസ്ഥാന കമ്മിറ്റിയുടെ നേതൃത്വത്തിൽ ക്ലാസിക് സരോവർ ഹോട്ടലിൽ സംഘടിപ്പിച്ച ചടങ്ങിൽ ഐസിഎഫ്എ സംസ്ഥാന ജനറൽ സെക്രട്ടറി ഡോ. ഗോപി ആചാരി ചൈനീസ് എംബസിയിലെ മിനിസ്റ്റർ ഡെപ്യൂട്ടി ചീഫ് ഓഫ് മിഷൻ ഹെ മെങ് , രാഷ്ട്രീയകാര്യങ്ങളുടെ ചുമതലയുള്ള മിനിസ്റ്റർ കോൺസുലർ ഷൗ ഗുവോ ഹുയി, എംബസി സെക്രട്ടറി ഗുവോ ഡോങ് ഡോങ് എന്നിവരെ ആദരിക്കുകയും മൊമന്‍റോ സമ്മാനിക്കുകയും ചെയ്തു. യോഗത്തിൽ സംസ്ഥാന പ്രസിഡന്‍റ് ് അഡ്വ. രാജാദാസ്, സംസ്ഥാന സെക്രട്ടറി അഡ്വ. പ്രതാപ് സിംഗ്, ജില്ലാ കമ്മിറ്റി സെക്രട്ടറി മുരുകേഷ്, ജില്ലാ കമ്മിറ്റി പ്രസിഡൻറ് രാജമോഹൻ , സംസ്ഥാന കമ്മിറ്റി അംഗം ഇടപ്പള്ളി ബഷീർ തുടങ്ങിയവർ പങ്കെടുത്തു.

പാപ്പനംകോട് എൻജിനീയറിംഗ് കോളജിൽ ബിരുദ ദാന ചടങ്ങ്

നേമം: പാപ്പനംകോട് ശ്രീ ചിത്ര തിരുനാൾ എൻജിനീയറിംഗ് കോളജിലെ 2021 -2025 ബാച്ച് വിദ്യാർഥികളുടെ ബിരുദദാന ചടങ്ങ് വിഎസ്‌സി ഡയറക്ടർ ഡോ. എ. രാജരാജൻ ഉദ്ഘാടനം ചെയ്തു. ജോലി ലഭിച്ചു എന്ന് കരുതി പഠനം ഒരിക്കലും നിർത്തരുതെന്ന് അദ്ദേഹം ഉദ്ഘാടന പ്രസംഗത്തിൽ പറഞ്ഞു. ലോകത്ത് നടക്കുന്ന ഓരോ മാറ്റവും സമയാസമയങ്ങളിൽ നിരീക്ഷിക്കുകയും അതിൽ സ്വായത്തമാക്കേണ്ടവ എത്രയും വേഗം പഠിക്കുകയും വേണം. എത്ര ഉന്നത പദവിയിൽ ഉണ്ടായിരുന്നാലും, പഴയകാല സുഹൃത്തുക്കൾ കുടുംബം എന്നിവയുമായി നിരന്തരസമ്പർക്കം പുലർത്തണമെന്നും അദ്ദേഹം വിദ്യാർഥികളോട് പറഞ്ഞു. കോളജ് ഗവേണിംഗ് ബോഡി അംഗവും കെഎസ്ആർടിസി മാനേജിംഗ് ഡയറക്ടറുമായ പി.എസ്.പ്രമോദ് ശങ്കർ അധ്യക്ഷനായി. പ്രിൻസിപ്പൽ സതീഷ് കുമാർ, ഉന്നത വിദ്യാഭ്യാസ വകുപ്പ് അഡീഷണൽ സെക്രട്ടറി അജയൻ, സാങ്കേതിക വിദ്യാഭ്യാസ വകുപ്പ് ഡയറക്ടർ ഡോ. ജയപ്രകാശ്, കെഎസ്ആർടിസി ഫിനാൻസ് ഓഫീസർ ഷാജി, ഡോ.രാധാകൃഷ്ണൻ, ഡോ. എസ് .എച്ച്. അനിൽകുമാർ, ഡോ.ബി.സോണിയ, ഡോ. നിഷാ ജോസ്, ഡോ. അനൂപ് കുമാര്‍ തുടങ്ങിയവർ പങ്കെടുത്തു. ഇരുന്നൂറ്റി അറുപത്തിയെട്ട് വിദ്യാർഥികൾ സർട്ടിഫിക്കറ്റ് ഏറ്റുവാങ്ങി.

ശരീരം നിറയെ വ്രണങ്ങളുമായി വെയിറ്റിംഗ് ഷെഡിൽ കഴിഞ്ഞയാളെ സുരക്ഷിത കേന്ദ്രത്തിലാക്കി

നെടുമങ്ങാട് : ശരീരത്തിൽ വ്രണങ്ങളുമായി വെയിറ്റിംഗ് ഷെഡിൽ കഴിഞ്ഞിരുന്ന വയോധികനെ മുൻ പഞ്ചായത്ത്‌ പ്രസിഡന്‍റും സഹപ്രവർത്തകരും സുരക്ഷിത കേന്ദ്രത്തിലെത്തിച്ചു. കഴിഞ്ഞ ഒരു മാസക്കാലമായി ആനാട് ജംഗ്ഷനിലെ വെയിറ്റിംഗ് ഷെഡിലും കടവരാന്തയിലുമായി താമസിച്ചിരുന്ന രാമകൃഷ്ണൻ എന്ന 65കാരനെയാണ് മുൻ പഞ്ചായത്ത്‌ പ്രസിഡന്‍റ് ആനാട് സുരേഷും സഹപ്രവർത്തകരും സുരക്ഷിത കേന്ദ്രത്തിൽ എത്തിച്ചത്. കോൺഗ്രസ്‌ ഭാരവാഹിയായ ആനാട് പി.ഗോപകുമാർ, സോപാനം ഷിബു, ആനാട് വ്യാപാരിയായ ഹരികുമാർ എന്നിവർ വിവരം അറിയിച്ചതിനെത്തുടർന്ന് ആനാട് സുരേഷ് ഇടപെട്ട് രാമകൃഷ്ണനെ തിരുവനന്തപുരം ജനറൽ ആശുപത്രിയിൽ എത്തിച്ചെങ്കിലും ബെഡ് ഒഴിവില്ലാത്തതിനാൽ തിരുവനന്തപുരം മെഡിക്കൽ കോളജിൽ സർജറി വാർഡിൽ കെയർ ടേക്കർ സംവിധാനത്തോടെ അഡ്മിറ്റ് ചെയ്യുകയായിരുന്നു.

വാട്ടര്‍ ടാങ്കില്‍ കുടുങ്ങിയ പരുന്തിനെ ഫയര്‍ഫോഴ്‌സ് രക്ഷപ്പെടുത്തി

പേരൂര്‍ക്കട: വാട്ടര്‍ ടാങ്കില്‍ കുടുങ്ങിയ പരുന്തിനെ ഫയര്‍ഫോഴ്‌സ് സംഘം രക്ഷപ്പെടുത്തി. ഹൗസിംഗ് ബോര്‍ഡ് ജംഗ്ഷന്‍ സംഗീത നഗറില്‍ വിജയലക്ഷ്മിയുടെ വീടിന്‍റെ മുകളില്‍ സ്ഥാപിച്ചിരുന്ന വെള്ളമില്ലാത്ത വാട്ടര്‍ ടാങ്കിലാണ് വലിയൊരു പരുന്ത് കുടുങ്ങിയത്. വീട്ടുകാര്‍ ഫയര്‍ഫോഴ്‌സില്‍ അറിയിച്ചു. തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ഇന്‍-ചാര്‍ജ് പ്രദോഷിന്‍റെ നേതൃത്വത്തില്‍ എഫ്ആര്‍ഒമാരായ ഷഹീര്‍, രതീഷ്, ഷിബിന്‍, എഫ്.ആര്‍.ഒ ഡ്രൈവര്‍ സുജീഷ് എന്നിവര്‍ ചേര്‍ന്നാണ് പരുന്തിനെ രക്ഷപ്പെടുത്തിയത്.

അമീബിക് മസ്തിഷ്‌ക ജ്വരം : നീന്തല്‍കുളത്തില്‍ ഇറങ്ങിയവരുടെ വിവരങ്ങള്‍ തേടി ആരോഗ്യ വകുപ്പ്

തിരുവനന്തപുരം: തിരുവനന്തപുരത്ത് നീന്തല്‍ കുളത്തില്‍ കുളിച്ച പതിനേഴുകാരന് അമീബിക് മസ്തിഷ്‌ക ജ്വരം ബാധിച്ചത് ആക്കുളത്തെ സ്വിമ്മിംഗ് പൂളിലെ വെള്ളം മൂക്കില്‍ കയറിയതിനെ തുടര്‍ന്നെന്ന് ആരോഗ്യ വകുപ്പിന്‍റെ റിപ്പോര്‍ട്ട്. രോഗം സ്ഥിരീകരിച്ച കുട്ടിക്കൊപ്പം കുളത്തിലിറങ്ങിയ മറ്റു മൂന്നു കുട്ടികള്‍ നിരീക്ഷണത്തിലാണ്. നിലവില്‍ ഇവര്‍ക്ക് രോഗലക്ഷണങ്ങളൊന്നുമില്ലെന്നാണ് വിവരം. അതേസമയം കുളത്തിലിറങ്ങിയ മറ്റുള്ളവരുടെ വിവരങ്ങള്‍ ആരോഗ്യ വകുപ്പ് ശേഖരിച്ചു തുടങ്ങി. ഓഗസ്റ്റ് 16 മുതല്‍ ഇക്കഴിഞ്ഞ ദിവസം വരെ പൂളില്‍ ഇറങ്ങിയവരുടെ വിവരങ്ങളാണ് ശേഖരിക്കുന്നത്. അതേസമയം ആക്കുളം ടൂറിസ്റ്റ് വില്ലേജില്‍ സന്ദര്‍ശനത്തിന് കര്‍ശന നിയന്ത്രണങ്ങളും ഏര്‍പ്പെടുത്തിയിട്ടുണ്ട്. ഓഗസ്റ്റ് 16 നാണ് ആക്കുളം ടൂറിസ്റ്റ് വില്ലേജിലെ നീന്തല്‍ കുളത്തില്‍ കുട്ടികള്‍ ഇറങ്ങിയത്. നാലു പേരില്‍ ഒരാള്‍ക്ക് പിറ്റേ ദിവസം തന്നെ കടുത്ത തലവേദനയുണ്ടാവുകയും ശാരീരിക അസ്വസ്ഥതകള്‍ അനുഭവപ്പെടുകയും ചെയ്തതോടെ സ്വകാര്യ ആശുപത്രിയില്‍ പ്രവേശിപ്പിച്ചു. എന്നാല്‍ രോഗത്തിന് ശമനമാകാതെ വന്നതോടെ കുട്ടിയെ മറ്റൊരു സ്വകാര്യ ആശുപത്രിയില്‍ പ്രവേശിപ്പിച്ചു. ഇവിടെ നടത്തിയ പരിശോധനയിലാണ് രോഗം സ്ഥിരീകരിച്ചത്. തുടര്‍ന്ന് കുട്ടിയെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിക്കുകയായിരുന്നു. കുട്ടി ഇപ്പോഴും ഐസിയുവില്‍ തുടരുകയാണ്. കുളത്തിലെ വെള്ളം പരിശോധനയ്ക്കായി അയച്ചിരിക്കുകയാണ്. ഇതിന്‍റെ റിപ്പോര്‍ട്ട് കിട്ടിയ ശേഷം തുടര്‍ നടപടികള്‍ സ്വീകരിക്കുമെന്ന് ആരോഗ്യ വകുപ്പ് അറിയിച്ചു.

മുത്തച്ഛനെ ചെറുമകൻ കുത്തിക്കൊന്നു

പാലോട്: വാക്കുതർക്കത്തിനിടെ മുത്തച്ഛനെ ചെറുമകൻ കുത്തിക്കൊന്നു. പെരിങ്ങമ്മല ഇടിഞ്ഞാർ മയിലാടുംകുന്നിൽ ആർ.രാജേന്ദ്രൻ കാണി (ഗോവിന്ദൻ-58) ആണ് മരിച്ചത്. രാജേന്ദ്രനെ കുത്തിവീഴ്ത്തിയശേഷം നാട്ടുകാരെ വെല്ലുവിളിച്ച ചെറുമകൻ സന്ദീപിനെ (28) പിടികൂടി പാലോട് പോലീസിനു കൈമാറി. ഇന്നലെ വൈകിട്ട് 5.20ന് ഇടിഞ്ഞാർ ജംഗ്‌ഷനിലാണ് സംഭവം. റോഡുവക്കിൽ വച്ച് കൈയേറ്റം ചെയ്ത സന്ദീപിൽ നിന്ന് രക്ഷപ്പെടാൻ വാടകയ്ക്ക് താമസിക്കുന്ന മുറിയിലേയ്ക്ക് ഓടിയ രാജേന്ദ്രനെ പിന്തുടർന്ന് എത്തിയാണ് കുത്തിയത്. നെഞ്ചിൽ ആഴത്തിലേറ്റ രണ്ടു മുറിവുണ്ട്. ആളുകൾ ഓടിക്കൂടിയപ്പോഴേയ്ക്കും രാജേന്ദ്രൻ മരിച്ചു. അരമണിക്കൂറിനുള്ളിൽ പാലോട് പോലീസും ആംബുലൻസും സ്ഥലത്തെത്തി രാജേന്ദ്രനെ മെഡിക്കൽ കോളജ് മോർച്ചറിയിലേക്ക് മാറ്റി. സന്ദീപിന്‍റെ അറസ്റ്റ് രേഖപ്പെടുത്തിയതായി പോലീസ് അറിയിച്ചു. കുത്താൻ ഉപയോഗിച്ച കത്തി കണ്ടെടുത്തു. രാജേന്ദ്രന്‍റെ ഭാര്യ വസന്ത ആറ് മാസം മുമ്പ് പാലോട് വച്ചുണ്ടായ ബൈക്ക് അപകടത്തിൽ മരിച്ചിരുന്നു. ഇതിനുശേഷം രാജേന്ദ്രൻ വാടകമുറിയെടുത്ത് താമസം മാറ്റുകയായിരുന്നു. ക്ലെയിം നടപടികൾ നടന്നുവരുന്നതിനിടെ സന്ദീപ് രാജേന്ദ്രനും മറ്റു ബന്ധുക്കളുമായി വഴക്കിടുന്നത് പതിവായിരുന്നു. യുവാവ് കഞ്ചാവിന് അടിമയാണെന്നും ക്രിമിനൽ കേസുകളിൽ പ്രതിയാണെന്നും പോലീസ് പറഞ്ഞു. ഇയാൾക്ക് ഭാര്യയും ഒരു കുഞ്ഞുമുണ്ട്. രാജേന്ദ്രൻ വനംവകുപ്പിലെ നൈറ്റ് വാച്ചറാണ്.

കേരളാ കോണ്‍ഗ്രസ് പ്രതിനിധി സമ്മേളനം

തിരുവനന്തപുരം : കേരള കോണ്‍ഗ്രസ് എം ജില്ലാ പ്രതിനിധി സമ്മേളനം 18,19 തീയതികളിൽ നടത്തും. 18 ന് ഉച്ചകഴിഞ്ഞ് മൂന്നിന് പാളയം രക്തസാക്ഷി മണ്ഡപത്തിൽ നിന്നും പ്രകടനം ആരംഭിക്കും. തുടർന്ന് ബാങ്ക് എംപ്ലോയീസ് യൂണിയൻ ഹാളിൽ പൊതുസമ്മേളനം നടത്തും. ജില്ലാ പ്രസിഡന്‍റ് സഹായദാസിന്‍റെ അധ്യക്ഷതയിൽ കൂടുന്ന സമ്മേളനം പാർട്ടി ചെയർമാൻ ജോസ് കെ.മാണി എം.പി ഉദ്്ഘാടനം ചെയ്യും. മന്ത്രി റോഷി അഗസ്റ്റിൻ മുഖ്യപ്രഭാഷണം നടത്തും. തോമസ് ചാഴികാടൻ എക്സ് എംപി, ചീഫ് വിപ്പ് ഡോ.എൻ.ജയരാജ് , സ്റ്റീഫൻ ജോർജ്, എംഎൽഎ മാരായ ജോബ് മൈക്കിൾ, പ്രമോദ് നാരായണൻ,സെബാസ്റ്റ്യൻ കുളത്തുങ്കൽ,ഹൈപ്പവർ കമ്മിറ്റി അംഗം ജേക്കബ്് തോമസ് അരികുപുറം, ട്രഷറർ ബേബി ഉഴുത്തുവാൽ, സെക്രട്ടറി കെ. ആനന്ദകുമാർ, സി. ആർ.സുനു തുടങ്ങിയവർ പ്രസംഗിക്കും.

ഭിന്നശേഷി ജിവനക്കാരുടെ സർവീസ് വിഷയങ്ങളിൽ സർക്കാർ ഉദാര സമീപനം സ്വീകരിക്കണമെന്ന്

തിരുവനന്തപുരം: സംസ്ഥാനത്തെ ഭിന്നശേഷി ജീവനക്കാരുടെ പ്രമോഷൻ സംവരണം, സൂപ്പർ ന്യൂമററി തസ്തിക ഏകീകരണം, പെൻഷൻ പ്രായം വർധന തുടങ്ങിയ വിഷയങ്ങളിൽ സർക്കാർ അടിയന്തിര നടപടി സ്വീകരിക്കണമെന്ന് ആന്‍റണി രാജു എംഎൽഎ. ആവശ്യപ്പെട്ടു. ഡിഫറന്‍റലി ഏബിൾഡ് എംപ്ലോയീസ് അസോസിയേഷൻ നാലാമത് സംസ്ഥാന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സമ്മേളനത്തിൽ മന്ത്രി രാമചന്ദ്രൻ കടന്നപ്പള്ളി ഓണ്‍ലൈൻ ആയി പങ്കെടുത്തു. സംസ്ഥാന പ്രസിഡന്‍റ് വർഗീസ് തെക്കേത്തല അധ്യക്ഷത വഹിച്ചു. സംസ്ഥാന വൈസ്പ്രസിഡന്‍റ് കെ.എൻ.ആനന്ദ് നാറാത്ത്, രക്ഷാധികാരി എ.എസ്.ജോബി, ജനറൽ സെക്രട്ടറി ടി.കെ.ബിജു, ട്രഷറർ ബി. ലതാകുമാരി, വനിതാ കണ്‍വീനർ ഷിജി ഷോണി, ഭാരവാഹികളായ കെ.ജയകുമാർ, ആർ.ഡാലി, എ.വി.ബിജുമോൻ, യു. ഷാജി, താജ് പത്തനംതിട്ട, ബെന്നി വർഗീസ് എന്നിവർ പ്രസംഗിച്ചു.

കാർ തോട്ടിലേക്ക് മറിഞ്ഞു

നെടുമങ്ങാട്: കാർ നിയന്ത്രണം വിട്ട് തോട്ടിലേക്ക് മറിഞ്ഞു. ശനിയാഴ്ച ഉച്ചയോടെ ആര്യനാട് ആയിരുന്നു സംഭവം. കാർ ഓടിച്ചിരുന്നയാൾക്ക് നിസാര പരിക്കേറ്റു.ആളെപ്പറ്റി കൂടുതൽ വിവരങ്ങൾ ലഭ്യമായിട്ടില്ല. അതേസമയം കാർ പൂർണമായും തകർന്ന നിലയിലാണ്. കാറിൽ ഡ്രൈവർ മാത്രമാണ് ഉണ്ടായിരുന്നത്.

മനം കവര്‍ന്ന് ഉണ്ണിക്കണ്ണന്മാര്‍; നഗരം അമ്പാടിയായി

തിരുവനന്തപുരം: പാല്‍പുഞ്ചിരി തൂകി കുഞ്ഞു കുസൃതിത്തരങ്ങളും കാട്ടി പിച്ചവച്ച് ഉണ്ണിക്കണ്ണന്‍മാര്‍ നടന്നു നിങ്ങിയപ്പോള്‍ അനന്തപുരി നിറയെ അമ്പാടിചന്തം. കളിത്തോഴരായ ഗോപാലന്മാരും ഗോപികമാരും കൂടെ കൂടിയതോടെ കുസൃതിത്തരങ്ങളുമായി കുണുങ്ങി കുണുങ്ങി നടന്ന ഉണ്ണിക്കണ്ണന്മാരെ നഗരം സ്‌നേഹത്തോടെ നോക്കി നിന്നു. ശ്രീകൃഷ്ണ ജയന്തി ആഘോഷങ്ങളുടെ ഭാഗമായി നടന്ന ശോഭായാത്രയിലാണ് ബാലന്മാര്‍ ഉണ്ണിക്കണ്ണന്‍റെ വേഷം ധരിച്ച് കാഴ്ചയുടെ വിരുന്നൊരുക്കിയത്. കുചേലന്മാര്‍ , ഹൈന്ദവ പുരാണ ഇതിഹാസങ്ങളിലെ വിവിധ കഥാപാത്രങ്ങളുടെ വേഷം ധരിച്ച കുട്ടികളും താളമേളങ്ങള്‍ക്കൊപ്പം ശോഭായാത്രയില്‍ അണിനിരന്നു. ഉച്ചകഴിഞ്ഞ് മൂന്നോടെ മ്യൂസിയം, പിഎംജി, എല്‍എംഎസ്, ബേക്കറി ജംഗ്ഷന്‍, പാളയം തുടങ്ങിയ സ്ഥലങ്ങളില്‍ നഗരത്തിലെ വിവിധയിടങ്ങളില്‍ നിന്നുള്ള ഉപശോഭായാത്രകള്‍ ഒത്തുകൂടി. തുടര്‍ന്ന് പാളയം മഹാഗണപതി ക്ഷേത്രത്തിന് മുന്നില്‍ സംഗമിച്ച് അവിടെ നിന്നും വൈകുന്നേരം അഞ്ചോടെ മഹാ ശോഭായാത്രയായി എം.ജി റോഡിലൂടെ പഴവങ്ങാടി ഗണപതി ക്ഷേത്രത്തിന് മുന്നില്‍ മഹാ ആരതിയോടെ സമാപിച്ചു. തുടര്‍ന്ന് ആറ്റുകാല്‍ ദേവീ ക്ഷേത്ര ട്രസ്റ്റ് ഒരുക്കിയ അവല്‍പ്പൊതിയും ഉണ്ണിയപ്പവും പ്രസാദമായി ശോഭായാത്രയില്‍ പങ്കെടുത്ത ഉണ്ണിക്കണ്ണന്‍മാര്‍ക്കും ഗോപികമാര്‍ക്കും വിതരണം ചെയ്തു. 'ഗ്രാമം തണലൊരുക്കട്ടെ ബാല്യം സഫലമാകട്ടെ' എന്ന സന്ദേശം മുന്‍ നിര്‍ത്തിയാണ് നാടെങ്ങും ഇക്കുറി ശ്രീകൃഷ്ണ ജയന്തി ആഘോഷിച്ചത്. മഹാശോഭായാത്ര രാജകുടുംബാംഗം അശ്വതി തിരുനാള്‍ ഗൗരി ലക്ഷ്മിഭായി ഉദ്ഘാടനം ചെയ്തു. ബാലഗോകുലം മഹനഗര്‍ അധ്യക്ഷന്‍ പ്രൊഫ. ടി.എസ് രാജന്‍ അധ്യക്ഷനായി. സംസ്ഥാന അധ്യക്ഷന്‍ ആര്‍.പ്രസന്നകുമാര്‍ ശ്രീകൃഷ്ണ ജയന്തി സന്ദേശം നല്‍കി. കാട്ടാക്കട: ശ്രീകൃഷ്ണജയന്തിയോടനുബന്ധിച്ച് ബാലഗോകുലത്തിന്‍റെ ശോഭായാത്രകൾ ഗ്രാമങ്ങളെ ആഘോഷത്തിലാക്കി. കാട്ടാക്കട മണ്ഡലത്തിന്‍റെ ശോഭായാത്ര കാട്ടാക്കടയിൽനിന്ന് ആരംഭിച്ച് ശ്രീകൃഷ്ണപുരത്ത് സമാപിച്ചു. പൂവച്ചലിൽ രണ്ട് മണ്ഡലങ്ങളായി ഘോഷയാത്ര നടന്നു. ആലമുക്കിൽനിന്ന് പൂവച്ചൽ ധർമശാസ്താക്ഷേത്രത്തിലേക്കും ഉറിയാക്കോടുനിന്ന് കൊണ്ണിയൂർ ഭഗവതിക്ഷേത്രത്തിലേക്കുമായിരുന്നു ശോഭായാത്രകൾ. വീരണകാവ് മണ്ഡലത്തിന്റെ ശോഭായാത്ര മൈലോട്ടുമൂഴി ഗണപതിക്ഷേത്രത്തിലും കള്ളിക്കാട് മണ്ഡലത്തിന്‍റേത് മൈലക്കര ദേവീക്ഷേത്രത്തിൽനിന്ന് ആരംഭിച്ച് തേവൻകോട് അധ്യാത്മ ചിന്താലയ ആശ്രമത്തിലും പ്ലാവൂർ മണ്ഡലത്തിന്‍റേത് മംഗലയ്ക്കൽനിന്നും ആരംഭിച്ച് തൃക്കാഞ്ഞിരപുരം മഹാദേവക്ഷേത്രത്തിലും സമാപിച്ചു. കുറ്റിച്ചൽ, പരുത്തിപ്പള്ളി എന്നിവിടങ്ങളിലും ശോഭായാത്രകൾ നടന്നു. ശ്രീകൃഷ്ണജയന്തി മലയോര ഗ്രാമങ്ങളിൽ ഭക്തിനിർഭരമായ ചടങ്ങുകളോടെ നടന്നു. പട്ടണങ്ങളിലും, കവലകളിലും, അമ്പലങ്ങളിലും ശ്രീകൃഷ്ണ വിഗ്രഹം അലങ്കരിച്ചു പന്തൽ കെട്ടി ആഘോഷത്തിന് തിരി തെളിഞ്ഞു. രാവിലെ വിശേഷാൽ പൂജകളും, ആർച്ചനകളും, നടന്നു. ശ്രീകൃഷ്ണ ക്ഷേത്രങ്ങളിൽ രാത്രി പന്ത്രണ്ട് മണിവരെ പൂജകളും, കലാ പരിപാടികളും നടന്നു. കാട്ടാക്കട പെരുംകുളത്തൂർ ശ്രീകൃഷ്ണ സ്വാമി ക്ഷേത്രത്തിൽ ഭഗവാന്‍റെ ജന്മ ദിന സദ്യ ഒരുക്കി. ഉറിയടി, സംഗീതാർച്ചന, കലശ പൂജ, കലശഭിഷേകം, വിശേഷാൽ പൂജ എന്നിവയും നടന്നു. കരിപ്പൂര്, കുഴയ്ക്കാട് ദേവീക്ഷേത്രം, ആൽത്തറ ദേവീക്ഷേത്രം, അന്തിയൂർക്കോണം എന്നിവിടങ്ങളിൽനിന്ന്‌ ആരംഭിച്ച ശോഭായാത്രകൾ മലയിൻകീഴ് ജംഗ്ഷനിൽ സംഗമിച്ച് മഹാശോഭായാത്രയായി ശ്രീകൃഷ്ണസ്വാമിക്ഷേത്രത്തിൽ സമാപിച്ചു. പാറശാല: ബാലഗോകുലം പാറശാല മണ്ഡലത്തിന്‍റെ ആഭിമുഖ്യത്തില്‍ പാറശാലയിലെ വിവിധയിടങ്ങില്‍ നിന്നെത്തിയ ശോഭായാത്രകള്‍ മഹാദേവര്‍ ക്ഷേത്ര ത്തില്‍ സംഗമിച്ച് മഹാശോഭായാത്രയായി പാറശാല ടൗണ്‍ ചുറ്റി മഹാദേവര്‍ ക്ഷേത്രത്തിന്റെ കിഴക്കേ നടയില്‍ സമാപിച്ചു. അയിര മണ്ഡലത്തില്‍ ചെങ്കവിള നാഗയക്ഷിയമ്മന്‍ ക്ഷേത്രത്തില്‍ നിന്നും ആരംഭിച്ച ശോഭായാത്ര അയിര ശ്രീധര്‍മ്മശാസ്താ ക്ഷേത്രസന്നിധിയില്‍ സമാപിച്ചു. കുന്നത്തുകാല്‍മണ്ഡലത്തില്‍ ചെഴുങ്ങാനൂര്‍ മഹാദേവര്‍ ക്ഷേത്രത്തില്‍ നിന്നും മാണിനാട് ശ്രീകൃഷ്ണസ്വാമി ക്ഷേത്രം വരെ ശോഭായാത്ര സംഘടി പ്പിച്ചു.ചെറിയ കൊല്ലമണ്ഡലത്തില്‍ ചെറിയകൊല്ല പിറന്തൂര്‍ മഹാദേവര്‍ ക്ഷേത്രത്തില്‍ നിന്നും ആരംഭിച്ച് തോലടി അണ്ടൂര്‍ കണ്ഠന്‍ ശ്രീധര്‍മ്മശാസ്താ ക്ഷേത്രത്തില്‍ സമാപനം നടന്നു. മണവാരി മണ്ഡലത്തിലെ ശോഭായാത്ര ആനാവൂര്‍ കോഴിക്കോട് ഗുരുമന്ദിരത്തില്‍ നിന്നും ആരംഭിച്ച് പാലിയോട് ആഴാംകുളം ശ്രീധര്‍മ്മശാസ്താ ക്ഷേത്രസന്നിധിയില്‍ സമാപിച്ചു. വെള്ളറട മണ്ഡലം ശോഭായാ ത്ര പൊട്ടന്‍ചിറ ദേവീക്ഷേത്രത്തില്‍ നിന്നും തുടങ്ങി വെള്ളറട ടൗണ്‍ വഴി ലോകനാഥ ക്ഷേത്രത്തില്‍ സമാപിച്ചു.കിളിയൂര്‍ മണ്ഡലത്തില്‍ മുള്ളിലവുവിള ജംഗ്ഷന്‍ മുതല്‍ കരിക്കാമന്‍കോട് ദേവീക്ഷേത്രം വരെയായിരുന്നു ബാലികാ ബാലന്‍മാര്‍ അണിനിരന്ന ശോഭായാത്ര .ചെമ്പൂര് മണ്ഡലം ശോഭായാത്ര ഇടവാല്‍ പാറയില്‍ ദേവീ ക്ഷേത്രത്തില്‍ നിന്നും ആരംഭിച്ച് ഒറ്റശേഖരമംഗലം മഹാദേവര്‍ ക്ഷേത്രത്തില്‍ സമാപനമായി. ആര്യങ്കോട് മണ്ഡലം ശോഭായാത്ര പഴിഞ്ഞിപ്പാറ ജംഗ്ഷനില്‍ നിന്നും ആരംഭിച്ച് കീഴാറൂര്‍ ഫണമുഖം ഭദ്രകാളീക്ഷേത്രത്തിന്‍ സമാപിച്ചു.അമ്പൂരി മണ്ഡലത്തില്‍ കുട്ടമല എസ്എന്‍ഡിപി ഹാളില്‍ നിന്നും ആരംഭിച്ച് അമ്പൂരി ശിവക്ഷേത്രത്തില്‍ സമാപിച്ചു.കള്ളിക്കാട് മണ്ഡലം ശോഭായാത്ര മൈലക്കര ദേവീക്ഷേത്രത്തില്‍ നിന്നും ആംരംഭിച്ച് ആലയില്‍ ചിന്താലയ ആശ്രമത്തില്‍ സമാപിച്ചു. നെടുമങ്ങാട്: ശ്രീകൃഷ്ണ ജയന്തിയോടനുബന്ധിച്ച് ബാലഗോകുലത്തിന്‍റെ ആഭിമുഖ്യത്തിൽ നെടുമങ്ങാട്ട് വർണ ശബളമായ ഘോഷയാത്ര നടന്നു. നെടുമങ്ങാട് ഗവൺമെൻറ് ഗേൾസ് ഹയർ സെക്കൻഡറി സ്കൂളിൽ നിന്ന് ആരംഭിച്ച ഘോഷയാത്ര നഗരം ചുറ്റി മേലാംകോട് ദേവീക്ഷേത്രത്തിൽ സമാപിച്ചു. നേമം: കല്ലിയുർ പഞ്ചായത്തിൽ ശാന്തിവിളയിൽ നിന്നും വേവിള ക്ഷേത്രം വരെയും പുന്ന മുട് നിന്ന് വേ വിള ക്ഷേത്രം വരെയും ബാലഗോകുലത്തിന്‍റെ നേതൃത്വത്തിൽ ശോഭായാത്ര നടന്നു. പള്ളിച്ചൽ പഞ്ചായത്തിൽ പ്രാവച്ചമ്പലം അരിക്കട മുക്ക് മുതൽ ഇടയ്ക്കോട് ക്ഷേത്രം വരെയും വലിയറത്തല മുതൽ ഗോവിന്ദമംഗലം വരെയും ശോഭായാത്ര നടന്നു.

ശ്രീകൃഷ്ണ ജയന്തി: ഉറിയടി

നെടുമങ്ങാട്: ശ്രീകൃഷ്ണജയന്തിയോടനുബന്ധിച്ച് പരിയാരം വൃന്ദാവനം -പാലാഴി ബാലഗോകുലത്തിന്‍റെ ആഭിമുഖ്യത്തിൽ ഉറിയടിയും സാംസ്കാരിക സമ്മേളനം നടന്നു. സാംസ്കാരിക സമ്മേളനം ബാലഗോകുലം ജില്ലാ ഭഗിനി പ്രമുഖ് അനു വിഷ്ണു പ്രിയ ഉദ്ഘാടനം ചെയ്തു. ആഘോഷ പ്രമുഖ് മണിക്കുട്ടൻ അധ്യക്ഷത വഹിച്ചു. ബിജെപി ഏരിയ പ്രസിഡന്‍റ് ഡി.എം. സുരേഷ് സ്വാഗതം പറഞ്ഞു. മൈക്ക് സെറ്റ് മേഖലയിൽ 43 വർഷം പൂർത്തിയാക്കിയ ശേഖരൻ നായരെ ആദരിച്ചു. ബിഎംഎസ് മേഖല പ്രസിഡന്‍റ് ജെ. അജികുമാർ, മിഥുൻ സുരേഷ്, പരാശരൻ തുടങ്ങിയവർ പ്രസംഗിച്ചു. ഗോകുല കലാസന്ധ്യയും നടന്നു.

ആര്യനാട് പഞ്ചായത്ത് ഭിന്നശേഷി കലോത്സവം

നെടുമങ്ങാട്: ആര്യനാട് പഞ്ചായത്ത് സംഘടിപ്പിച്ച ഭിന്നശേഷി കലോത്സവം-ഫിനിക്സ് 2025 ജി. സ്റ്റീഫൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് വി.വിജുമോഹൻ അധ്യക്ഷത വഹിച്ചു. വൈസ് പ്രസിഡന്‍റ് റീനാ സുന്ദരം, ബ്ലോക്ക് പഞ്ചായത്തംഗം എ.എം. ഷാജി, സ്റ്റാൻഡിംഗ് കമ്മിറ്റി ചെയർമാൻമാരായ കെ.എസ്. മോളി, പഞ്ചായത്തംഗങ്ങളായ, ലേഖ കെ.എ. ഷീജ, പി. സരസ്വതി, സരസ്വതി അമ്മ, ഇ. രാധാകൃഷ്ണൻ, സി.ജെ. അനീഷ്, ഐസിഡിഎസ് സൂപ്പർവൈസർ നീതു കെ. ജേക്കബ് എന്നിവർ സംസാരിച്ചു. കുട്ടികളുടെ കലാ-കായിക മത്സരങ്ങൾ, നാടൻപാട്ട് എന്നിവ നടന്നു. സമാപ സമ്മേളന ഉദ്ഘാടനവും സമ്മാന വിതരണവും പഞ്ചായത്ത് പ്രസിഡന്‍റ് വി. വിജുമോഹൻ നിർവ്വഹിച്ചു. 70 ഓളം ഭിന്നശേഷി കുട്ടികൾ പങ്കെടുത്തു.

അരുവിക്കര ബ്ലോക്ക് കോൺഗ്രസ് കമ്മിറ്റി പോലീസ് സ്റ്റേഷൻ മാർച്ച്

നെടുമങ്ങാട്: ജോലിയിൽനിന്നും പിരിച്ചുവിടണമെന്ന് ആവശ്യപ്പെട്ടുകൊണ്ട് അരുവിക്കര ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ അരുവിക്കര പോലീസ് സ്റ്റേഷൻ മാർച്ച് സംഘടിപ്പിച്ചു. മുള്ളലവൻമൂട് ജംഗ്ഷനിൽനിന്നും ആരംഭിച്ച മാർച്ച് അരുവിക്കര പോലീസ് സ്റ്റേഷനു മുന്നിൽ മുൻ ഡിസിസി പ്രസിഡന്‍റ് അഡ്വകരകുളം കൃഷ്ണപിള്ള ഉദ്ഘാടനം ചെയ്തു. അരുവിക്കര ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് വെള്ളനാട് ജ്യോതിഷ് കുമാർ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ഇന്ദുലേഖ, വെള്ളനാട് പഞ്ചായത്ത് വൈസ് പ്രസിഡന്‍റ് ശ്രീകണ്ഠൻ, കോൺഗ്രസ്‌ മണ്ഡലം പ്രസിഡന്‍റുമാരായ മുണ്ടേല പ്രവീൺ, തോപ്പിൽ ശശിധരൻ, വിമൽകുമാർ, സന്തോഷ് വീരണകാവ് തുടങ്ങിയവർ പ്രസംഗിച്ചു.

മദ്യലഹരിയില്‍ സുഹൃത്തിനെ കുത്തിപ്പരിക്കേല്‍പ്പിച്ച യുവാവ് പിടിയില്‍

പൂന്തുറ: മദ്യപിച്ചതിനു ശേഷം വാക്കുതര്‍ക്കത്തിനിടെ സുഹൃത്തിനെ കുത്തിപ്പരിക്കേല്‍പ്പിച്ച കേസില്‍ യുവാവിനെ പൂന്തുറ പോലീസ് അറസ്റ്റ് ചെയ്തു. തമിഴ്‌നാട് കന്യാകുമാരി വടശ്ശേരി സ്വദേശി വെട്രിവേല്‍ (32) ആണ് പിടിയിലായത്. ശനിയാഴ്ച പുലര്‍ച്ചെ രണ്ടുമണിയോടുകൂടി അമ്പലത്തറ പരവന്‍കുന്നിലായിരുന്നു കേസിനിടയായ സംഭവം നടന്നത്. പ്രതിയായ വെട്രിവേലും ഇയാളുടെ സുഹൃത്തായ തമിഴ്‌നാട് മധുര സ്വദേശി ലക്ഷ്മണനും (44) ഒരുമിച്ചിരുന്നു മദ്യപിച്ച ശേഷം വാക്കുതര്‍ക്കമുണ്ടാകുകയും വേട്രിവേല്‍ സമീപത്തുണ്ടായിരുന്ന മദ്യകുപ്പി പൊട്ടിച്ച് ലക്ഷ്മണന്‍റെ നെഞ്ചിന്‍റെ ഇടതുഭാഗത്ത് കുത്തിപ്പരിക്കേല്‍പ്പിക്കുകയുമായിരുന്നു. നെഞ്ചില്‍ ആഴത്തില്‍ കുത്തേറ്റ ലക്ഷ്മണന്‍ മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുകയാണ്. വെട്രിവേലിന്‍റെ ഭാര്യയെയും മക്കളെയും ഇക്കഴിഞ്ഞ 11 മുതല്‍ കാണാതായി രുന്നു. ഇതിനുപിന്നില്‍ ലക്ഷ്മണന്‍ ആണെന്നുള്ള ആരോപണം ഉന്നയിച്ചായിരുന്നു ഇരുവരും തമ്മില്‍ തര്‍ക്കമുണ്ടായതും തുടര്‍ന്ന് ആക്രമണം നടന്നതെന്നും പോലീസ് പറഞ്ഞു. ഇരുവരും വിഴിഞ്ഞത്തു മീനെടുത്ത് കച്ചവടം നടത്തിവരികയായിരുന്നു. ലക്ഷ്മണന്‍ നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണ് വെട്രിവേല്‍ പിടിയിലായത്. പൂന്തുറ എസ്ഐ സിനുലിന്‍റെ നേതൃത്വത്തില്‍ എഎസ്ഐ ഷാജി, സിപിഒ മാരായ ഷിബു, ഗിരീഷ് എന്നിവരുള്‍പ്പെട്ട പോലീസ് സംഘം അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

മുണ്ടേല ദേവരുകുളം കുരിശടി റോഡിൽ വെള്ളക്കെട്ട്: യാത്രക്കാർ ദുരിതത്തിൽ

നെടുമങ്ങാട്: മുണ്ടേല ദേവരുകുളം കുരിശടി റോഡ് തകർന്നു. ആര്യനാട്, ഉഴമലയ്ക്കൽ പഞ്ചായത്തുകളിലുള്ളവർ മുണ്ടേല, അരുവിക്കര തുടങ്ങിയ സ്ഥലങ്ങളിൽ എളുപ്പത്തിലെത്താൻ ആശ്രയിക്കുന്ന റോഡാണ് അധികൃതരുടെ അനാസ്ഥകാരണം ശോച്യാവസ്ഥയിലായത്. പ്രദേശത്ത് നാല്പതിലേറെ കുടുംബങ്ങൾ താമസിക്കുന്നുമുണ്ട്. അഞ്ചുവർഷം മുമ്പ് ജില്ലാ പഞ്ചായത്ത് 20 ലക്ഷം രൂപ ചെലവിൽ റീ ടാറിംഗ് ചെയ്ത റോഡ് ഇപ്പോൾ മെറ്റലുകളിളകി കാൽനടയാത്രയ്ക്കു പോലും കൊള്ളാത്ത അവസ്ഥയിലാണ്. ഇരുചക്രവാഹനയാത്രക്കാർ അപകടത്തിൽപ്പെടുന്നതും പതിവായി. മഴക്കാലമായതോടെ ഗട്ടറുകൾ വീണ റോഡിൽ വെള്ളക്കെട്ടും രൂക്ഷമായി. ഇതുകാരണം കാൽനടയാത്രക്കാരും ഇരുചക്രവാഹനയാത്രക്കാരും ഒരുപോലെ ദുരിതത്തിലായി. അടിയന്തിരമായി റോഡ് ഗതാഗതയോഗ്യമാക്കണമെന്ന് നാട്ടുകാർ അധികൃതരോട് ആവശ്യപ്പെട്ടു.

രാമപുരം ലെയിന്‍ റോഡിലെ ഇന്‍റര്‍ലോക്കുകള്‍ തകര്‍ന്ന നിലയില്‍

പേരൂര്‍ക്കട: നഗരസഭയുടെ കിണവൂര്‍ വാര്‍ഡില്‍ ഉള്‍പ്പെടുന്ന രാമപുരം ലെയിന്‍ റോഡിലെ ഇന്‍റര്‍ലോക്കുകള്‍ തകര്‍ന്ന നിലയില്‍. നാലു വര്‍ഷത്തിനു മുമ്പാണ് ഇവിടെ ഇന്‍റര്‍ലോക്ക് സ്ഥാപിച്ചത്. പിന്നീട് അറ്റകുറ്റപ്പണി ഉണ്ടായിട്ടില്ല. നിരന്തരം ഊറ്റുവെള്ളം ഇറങ്ങുന്നതുകൊണ്ടാണ് ടാറിംഗ് ഒഴിവാക്കി 200 മീറ്ററോളം ദൂരത്തില്‍ ഇന്‍റര്‍ലോക്ക് ചെയ്തത്. ഇപ്പോള്‍ ടൈലുകള്‍ പൂര്‍ണമായി ഇളകിയ നിലയിലാണ്. വയലിക്കടയില്‍നിന്ന് 400 മീറ്റര്‍ സഞ്ചരിച്ചശേഷം ഇന്‍റര്‍ലോക്ക് സ്ഥാപിച്ച ഈ ഇടറോഡിലൂടെയാണ് അമ്പലമുക്ക്, കുടപ്പനക്കുന്ന്, പേരൂര്‍ക്കട ഭാഗങ്ങളിലേക്കു സഞ്ചരിക്കാന്‍ സാധിക്കുന്നത്. വാഹനത്തിരക്കു കുറഞ്ഞ സ്ഥലമായതിനാല്‍ നിരവധി ഇരുചക്ര വാഹനയാത്രക്കാര്‍ ഈ പാത തെരഞ്ഞെടുക്കുന്നുണ്ട്. എന്നാല്‍ ടൈലുകള്‍ ഇളകിക്കിടക്കുന്നതിനാല്‍ വളവു തിരിഞ്ഞു മെയിന്‍ റോഡില്‍നിന്നു രാമപുരത്തേക്ക് പ്രവേശിക്കുമ്പോള്‍ വാഹനങ്ങള്‍ തെന്നിവീഴാനുള്ള സാധ്യത കൂടുതലാണ്. നിരന്തരം ഇവിടെ വാഹനാപകടങ്ങള്‍ ഉണ്ടാകുന്നതായി പ്രദേശവാസികള്‍ സാക്ഷ്യപ്പെടുത്തുന്നു. ടൈലുകള്‍ക്കിടയിലെ മിശ്രിതം ഇളകിയതോടെ വാഹനങ്ങള്‍ കയറുമ്പോള്‍ ടൈലുകള്‍ കുത്തനെ ഇളകിമറിയുന്നതായി വാഹനയാത്രികരും പറയുന്നു. ടൈലുകള്‍ മറിഞ്ഞുകിടക്കുന്നതു കാണുന്നവരാണ് ഇതിനെ പൂർവാവസ്ഥയില്‍ വയ്ക്കുന്നത്. ഫണ്ട് ഇല്ലാത്തതിനാലാണ് ഇന്‍റര്‍ലോക്കിന്‍റെ അറ്റകുറ്റപ്പണി നടത്താന്‍ സാധിക്കാത്തതെന്നാണ് അധികൃതര്‍ പറയുന്നത്. രാത്രികാലങ്ങളില്‍ ഇന്‍റര്‍ലോക്കുകളില്‍ കയറുന്ന വാഹനങ്ങള്‍ ചരിഞ്ഞുവീഴുന്നത് ഒഴിവാക്കാനാവശ്യമായ താല്‍ക്കാലിക നടപടിയെങ്കിലും വേണമെന്നാണ് ആവശ്യം.

യുവാവിന്‍റെ മുഖത്ത് ഗ്ലാസുകൊണ്ട് മർദിച്ചയാൾ അറസ്റ്റിൽ

പേരൂര്‍ക്കട: യുവാവിനെ ഗ്ലാസുകൊണ്ട് മുഖത്തിടിച്ചു പരിക്കേല്‍പ്പിച്ചയാള്‍ അറസ്റ്റില്‍. മുട്ടത്തറ കൊച്ചുതോപ്പ് ഫാത്തിമമാത പള്ളിക്കു സമീപം ലിസിയ കോട്ടേജില്‍ വാടകയ്ക്കു താമസിക്കുന്ന മുഹമ്മദ് ഗസ്‌നി (24) ആണ് അറസ്റ്റിലായത്. സെപ്തംബര്‍ എട്ടിനായിരുന്നു കേസിനാസ്പദമായ സംഭവം. വലിയതുറ ബാലനഗര്‍ സ്വദേശി വിഷ്ണു (25) ആണ് ആക്രമണത്തിനിരയായത്. ഇരുവരും സുഹൃത്തുക്കളാണ്. ഇരുവരും തങ്ങളുടെ സുഹൃത്തുക്കള്‍ക്കൊപ്പം കവടിയാര്‍ ഗോള്‍ഫ് ലിംഗ്‌സിനു പിറകുവശത്തെ ഒഴിഞ്ഞ ഭാഗത്തിരുന്നു മദ്യപിക്കുകയായിരുന്നു. മദ്യലഹരിയിലുണ്ടായ വിരോധമാണ് ആക്രമണത്തിന് കാരണം. മദ്യപിച്ചുകൊണ്ടിരുന്ന ഗ്ലാസ് ഉപയോഗിച്ച് വിഷ്ണുവിന്‍റെ മുഖത്ത് മുഹമ്മദ് ഗസ്‌നി ഇടിക്കുകയായിരുന്നു. വിഷ്ണു ആദ്യം ശാസ്തമംഗലം ശ്രീരാമകൃഷ്ണ ആശുപത്രിയിലും തുടര്‍ന്നു തിരുവനന്തപുരം മെഡിക്കല്‍കോളജിലും ചികിത്സ തേടി. പരാതിയെത്തുടര്‍ന്നു പേരൂര്‍ക്കട പോലീസ് നടത്തിയ അന്വേഷണത്തില്‍ വഞ്ചിയൂര്‍ ഭാഗത്തുനിന്നാണു പ്രതിയെ കസ്റ്റഡിയിലെടുത്തത്. എസ്ഐ ജഗ്‌മോഹന്‍ ദത്തന്‍, സിപിഒമാരായ അനീഷ്, അരുണ്‍, രഞ്ജിത്ത് എന്നിവര്‍ അന്വേഷണസംഘത്തില്‍ ഉണ്ടായിരുന്നു. പ്രതിയെ ഞായറാഴ്ച മജിസ്‌ട്രേറ്റിനു മുന്നില്‍ ഹാജരാക്കും.

വയലിക്കട വളവിലെ അപകടം; സുരക്ഷാ നിര്‍ദേശങ്ങള്‍ നടപ്പായില്ല

ഏറ്റവും ഒടുവിലത്തെ അപകടം നടന്നത് ആറിന് പേരൂര്‍ക്കട: വയലിക്കട വളവിലെ നിരന്തരമുള്ള അപകടങ്ങള്‍ കുറയ്ക്കുന്നതിനുള്ള സുരക്ഷാ നിര്‍ദേശങ്ങള്‍ ഇനിയും നടപ്പായില്ല. മുട്ടട ജംഗ്ഷനില്‍ നിന്ന് അമ്പലമുക്കിലേക്കു വരുന്ന റോഡില്‍ 300 മീറ്റര്‍ പിന്നിടുമ്പോഴാണ് ആലപ്പുറം കുളത്തിനു സമീപം വലിയ വളവ് സ്ഥിതിചെയ്യുന്നത്. ഒരു വര്‍ഷം മുമ്പാണ് അത്യാധുനിക രീതിയില്‍ പരുത്തിപ്പാറ-അമ്പലമുക്ക് റോഡ് നവീകരിച്ചത്. എന്നാല്‍ അതിനുശേഷം രണ്ടുമാസം പിന്നിട്ടതുമുതല്‍ ചെറുതും വലുതുമായ അപകടങ്ങള്‍ ഇവിടെ പതിവായി. മാസങ്ങള്‍ക്ക് മുമ്പ് എന്‍സിസി റോഡ് സ്വദേശിയായ യുവാവ് ബൈക്ക് നിയന്ത്രണംവിട്ടു മറിഞ്ഞു സാരമായി പരിക്കേറ്റിരുന്നു. ആലപ്പുറം കുളത്തിനു തൊട്ടടുത്തായിരുന്നു അപകടം. ഏകദേശം ഒരുവര്‍ഷത്തിനു മുമ്പ് ഒരു ജീപ്പ് കുളത്തിനു സമീപം റോഡരികിലെ ഒരു വീടിന്‍റെ മതില്‍ ഇടിച്ചു തകര്‍ത്തിരുന്നു. അത്യാധുനിക രീതിയില്‍ റോഡ് നിര്‍മിച്ചിട്ടുണ്ടെങ്കിലും ആവശ്യമായ സുരക്ഷാ മുന്നറിയിപ്പുകള്‍ ഈ ഭാഗത്ത് സ്ഥാപിക്കാത്തതാണ് അപകടങ്ങള്‍ക്കു കാരണമെന്ന് ആക്ഷേപമുണ്ട്. ആവശ്യമായ റിഫ്‌ളക്ടറുകള്‍ സ്ഥാപിച്ചും അപകടസാധ്യതാ മേഖലയെന്ന മുന്നറിയിപ്പ് ബോര്‍ഡുകള്‍ സ്ഥാപിച്ചും പ്രശ്‌നപരിഹാരമുണ്ടാക്കുമെന്നു സ്ഥലം സന്ദര്‍ശിച്ച വി.കെ. പ്രശാന്ത് എംഎല്‍എ അറിയിച്ചിരുന്നു. എന്നാല്‍ സംഭവം നടന്ന് ഒരാഴ്ചയാകുന്ന ഈ വേളയിലും യാതൊരു നടപടിയും ഉണ്ടായിട്ടില്ല. കുത്തനെയുള്ള ഇറക്കത്തിനുശേഷമാണു കൊടുംവളവുള്ളത്. ഈ വളവില്‍ ഏകദേശം ആറു വീടുകള്‍ റോഡുവശത്ത് സ്ഥിതിചെയ്യുന്നുണ്ട്. ഏറ്റവുമൊടുവില്‍ കാര്‍ മതിലിലിടിച്ചു വീടിനുള്ളിലേക്കു കടന്നു പോര്‍ച്ചില്‍ പാര്‍ക്കു ചെയ്തിരുന്ന കാറും തകര്‍ക്കുകയുണ്ടായി. രാജേഷ്‌കുമാറിന്‍റെ വീടിന്‍റെ മതിലാണ് തകര്‍ക്കപ്പെട്ടത്. അപകടസാധ്യതാ മേഖലയെന്ന വലിയ ബോര്‍ഡ് സ്ഥാപിച്ചാല്‍ ഡ്രൈ വര്‍മാര്‍ ഇതു ശ്രദ്ധിക്കുകയും റോഡിന്‍റെ അവസ്ഥ മനസിലാക്കുകയും ചെയ്യും. അതേസമയം വയലിക്കട നിന്നു മുട്ടടയിലേക്കു പോകുന്ന വാഹനങ്ങള്‍ക്കും വ്യക്തമായി അറിയാന്‍ സാധിക്കുന്നവിധം ബോര്‍ഡുകള്‍ സ്ഥാപിക്കണമെന്ന ആവശ്യമുണ്ട്. മുട്ടടയിലേക്കു പോകുന്ന വാഹനങ്ങള്‍ ചില അവസരങ്ങളില്‍ വലതുവശം ചേര്‍ന്നുപോകുന്നതിനു കാരണം കൊടുംവളവാണ്. എതിര്‍വശത്തുനിന്നു ഹെവി വാഹനങ്ങള്‍ എത്തിയാല്‍ ഇവര്‍ അപകടത്തില്‍പ്പെടുമെന്ന കാര്യം ഉറപ്പാണ്. പകല്‍സമത്തുപോലും ചെറുതും വലുതുമായ വാഹനാപകടങ്ങള്‍ ഇവിടെയുണ്ടാകുന്നുണ്ട്. മുട്ടട ജംഗ്ഷന്‍, വയലിക്കട വളവ്, വയലിക്കട ജംഗ്ഷന്‍ എന്നിവിടങ്ങളില്‍ രാത്രികാഴ്ചയ്ക്ക് റിഫ്‌ളക്ടര്‍ സ്റ്റഡ് പിടിപ്പിച്ച റമ്പിള്‍ സ്ട്രിപ്പുകള്‍ സ്ഥാപിക്കുമെന്നതും വാഗ്ദാനമായിരുന്നു. അതും ഇതുവരെയും നടപ്പാക്കപ്പെട്ടിട്ടില്ല. നിരന്തരം വാഹനാപകടങ്ങള്‍ ഉണ്ടാകുകയും അതു വിവാദമാകുകയും ചെയ്യുന്ന അവസരങ്ങളില്‍പ്പോലും നടപടികള്‍ ഉണ്ടാകുന്നത് വൈകിപ്പിക്കുന്നതു പൊതുജനങ്ങളുടെയും വാഹനഡ്രൈവര്‍മാരുടെയും ജീവനു ഭീഷണിയുണ്ടാക്കും. മതില്‍ ഇടിഞ്ഞ ഭാഗത്ത് ടെന്‍ഡ് കെട്ടിയിരിക്കുന്നും ഇഷ്ടികകള്‍ ഇളക്കിവച്ചിരിക്കുന്നതും മാത്രമാണു നിലവില്‍ ഇവിടെ അപകടമുണ്ടായി എന്നുമനസിലാക്കുന്നതിനുള്ള ഏകമാർഗം.

സ്മാർട്ട് ഇന്ത്യ ഹാക്കത്തൺ 2025 പ്രിലിമിനറി

നാലാഞ്ചിറ: കേന്ദ്ര വിദ്യാഭ്യാസ മന്ത്രാലയത്തിന്‍റെ ഇന്നൊവേഷൻ സെല്ലിന്‍റെ ആഭിമുഖ്യത്തിൽ നടക്കുന്ന സ്മാർട്ട് ഇന്ത്യ ഹാക്കത്തൺ 2025-ന്‍റെ പ്രിലിമിനറി റൗണ്ട് മാർ ബസേലിയോസ് കോളജ് ഓഫ് എൻജിനീയറിംഗ് ആൻഡ് ടെക്നോളജിയിൽ നടന്നു. നൂതനമായ പ്രശ്നപരിഹാരങ്ങൾ കണ്ടെത്താൻ വിദ്യാർഥികളെ പ്രോത്സാഹിപ്പിക്കുന്നതിനുള്ള രാജ്യവ്യാപകമായ ഈ സംരംഭത്തിൽ 34 ടീമുകളായി 204 വിദ്യാർഥികൾ പങ്കെടുത്തു. വിദ്യാർഥികളിൽ കണ്ടുപിടുത്തത്തിന്‍റെയും പ്രായോഗിക പ്രശ്നപരിഹാരത്തിന്‍റെയും സംസ്കാരം വളർത്തുക എന്ന ലക്ഷ്യത്തോടെയാണു ഹാക്കത്തൺ സംഘടിപ്പിച്ചത്. വിവിധ മേഖലകളിലെ പ്രഗത്ഭരായ വിധികര്‍ത്താക്കള്‍ മികച്ച ടീമുകളെ തെരഞ്ഞെടുത്തു.

ശ്രീകൃഷ്ണ ജയന്തി ആഘോഷം: മഹാശോഭായാത്ര ഇന്ന്

തിരുവനന്തപുരം: ശ്രീകൃഷ്ണ ജയന്തി ബാലദിനാഘോഷങ്ങളുടെ സമാപനംകുറിച്ച് ഇന്നു നടക്കുന്ന മഹാശോഭായാത്ര അനന്തപുരിയെ അന്പാടിയാക്കും. മയിൽപ്പീലിചൂടി പാൽപ്പുഞ്ചിരിയുമായി ഉണ്ണിക്കണ്ണന്മാരും ഗോപികമാരും അണിനിരക്കുന്ന ചെറുതും വലുതുമായ ആയിരത്തോളം ശോഭയാത്രകളാണ് ഇന്ന് വൈകുന്നേരത്തോടെ നഗര, ഗ്രാമങ്ങളിൽ വീഥികളിൽ കാഴ്ചയുടെ വിരുന്നൊരുക്കുന്നത്. വാദ്യമേളങ്ങളുടെയും നിശ്ചല ദൃശ്യങ്ങളുടെയും അകന്പടിയിൽ ഉണ്ണിക്കണ്ണന്മാർക്ക് പുറമെ ദേവ വേഷധാരികളും ഗോപികാനൃത്തവും കൃഷ്ണലീലകളുമെല്ലാം ശോഭയാത്രയെ വർണാഭമാക്കും. ജില്ലയിലെ ശ്രീകൃഷ്ണ ക്ഷേത്രങ്ങൾക്ക് പുറമെ മറ്റു ക്ഷേത്രങ്ങളും ശോഭയാത്രയെ വരവേൽക്കാനുള്ള ഒരുക്കത്തിലാണ്. 80 കേന്ദ്രങ്ങളിലെ ശോഭയാത്രയാണ് പാളയം മഹാഗണപതി ക്ഷേത്രത്തിനു മുന്നിൽ സംഗമിക്കുന്നത്. അവിടെനിന്നും മഹാശോഭയാത്രയായി പഴവങ്ങാടി ഗണപതി ക്ഷേത്രത്തിലേക്ക് തിരിക്കും. വൈകുന്നേരം നാലിന് അശ്വതി തിരുനാൾ ഗൗരി ലക്ഷ്മിബായി മഹാശോഭയാത്ര പാളയം മഹാഗണപതി ക്ഷേത്രത്തിനു മുന്നിൽ ഉദ്ഘാടനം ചെയ്യും. ബാലഗോകുലം സംസ്ഥാന അധ്യക്ഷൻ ആർ. പ്രസന്നകുമാർ ശ്രീകൃഷ്ണ ജയന്തി സന്ദേശം നൽകും. ജില്ലാ അധ്യക്ഷൻ പ്രഫ. ടി.എസ്. രാജൻ അധ്യക്ഷനാകും. കഴക്കൂട്ടത്ത് 100ലധികം സ്ഥലങ്ങളിലും തിരുവല്ലത്ത് 60 ഇടങ്ങളിലും നെയ്യാറ്റിൻകര, കാട്ടാക്കട, നെടുമങ്ങാട്, പാലോട്, വെള്ളനാട്, അരുവിക്കര, കിളിമാനൂർ, വർക്കല, ആറ്റിങ്ങൽ, കല്ലന്പലം, പോത്തൻകോട് എന്നിവിടങ്ങളിലും ശോഭയാത്ര നടക്കും. ഓരോ ശോഭയാത്രാ കേന്ദ്രങ്ങളിലും കലാ, സാംസ്കാരിക, സാമൂഹിക പ്രവർത്തകർ ശോഭയാത്രകളുടെ ഭാഗമാകും. "ഗ്രാമം തണലൊരുക്കട്ടെ...ബാല്യം സഫലമാകട്ടെ' എന്ന സന്ദേശവുമായുള്ള ഈവർഷത്തെ ശ്രീകൃഷ്ണ ജയന്തി ആഘോഷങ്ങളുടെ ഭാഗമായി ശോഭയാത്രയ്ക്ക് മുന്നോടിയായി കുട്ടികളുടെ സാംസ്കാരിക സമ്മേളങ്ങൾ, പതാക ദിനാചരണം, ഗോമാതാപൂജ, വൃക്ഷപൂജ, നദീപൂജ, ഗോപികാനൃത്തം തുടങ്ങിയവയും നിരവധി കേന്ദ്രങ്ങളിൽ ഉറിയടിയും സംഘടിപ്പിച്ചു.

ഇഎൻടി വിദഗ്ധരുടെ സംസ്ഥാന സമ്മേളനം 19 മുതൽ

തിരുവനന്തപുരം: സംസ്ഥാനത്തെ ഇഎൻടി വിദഗ്ധരുടെ 23-ാം സംസ്ഥാന സമ്മേളനം "കെന്‍റ്കോണ്‍ 25' 19 മുതൽ 21 വരെ തിരുവനന്തപുരത്ത് നടക്കും. അസോസിയേഷൻ ഓഫ് ഓട്ടോലാരിങ്കോളജിസ്റ്റ്സ് ഓഫ് ഇന്ത്യ (എഒഐ) തിരുവനന്തപുരം ചാപ്റ്ററും സൊസൈറ്റി ഓഫ് ട്രിവാൻഡ്രം ഇഎൻടി സർജൻസും (സ്റ്റെന്‍റ്സ്) ചേർന്നാണ് സമ്മേളനം സംഘടിപ്പിക്കുന്നത്. കാര്യവട്ടം ട്രാവൻകൂർ ഇന്‍റർനാഷനൽ കണ്‍വൻഷൻ സെന്‍ററിൽ നടക്കുന്ന സമ്മേളനത്തിൽ കേരളത്തിൽ നിന്നും മറ്റു സംസ്ഥാനങ്ങളിൽ നിന്നുമായി 600 ഡോക്ടർമാർ പങ്കെടുക്കുമെന്ന് സംഘാടക സമിതി ചെയർമാൻ ഡോ. എം. സുരേഷ് കുമാർ, സെക്രട്ടറി ഡോ. സഹീർ എൻ. അബ്ദുള്ള എന്നിവർ അറിയിച്ചു. രാജ്യത്തെ വിവിധ മെഡിക്കൽ കോളജുകളിൽ നിന്നുമായി മുന്നോറോളം പിജി വിദ്യാർഥികളും സമ്മേളനത്തിനെത്തും. 19നു വൈകുന്നേരം ആറിനു സമ്മേളനം എഒഐ ദേശീയ പ്രസിഡന്‍റ് ഡോ. ദ്വൈപായൻ മുഖർജി ഉദ് ഘാടനം ചെയ്യും. സംസ്ഥാന പ്രസിഡന്‍റ് ഡോ. ശങ്കർ മഹാദേവൻ അധ്യക്ഷത വഹിക്കും. എഒഐ കേരള ചാപ്റ്ററിന്‍റെ പുതിയ ഭാരവാഹികളുടെ സ്ഥാനാരോഹണവും ചടങ്ങിൽ നടക്കും. 20ന് വൈകുന്നേരം അഞ്ചിന് എഒഐ സംസ്ഥാന കൗണ്‍സിൽ യോഗം നടക്കും. സംഘടനാ കാര്യങ്ങളെക്കുറിച്ച് വിശദമായ ചർച്ചകളും അവലോകനങ്ങളും യോഗത്തിൽ നടക്കും. മൂന്നു ദിവസങ്ങളിലായി നടക്കുന്ന സമ്മേളനത്തിൽ വിദഗ്ധർ മുപ്പതോളം പ്രബന്ധങ്ങൾ അവതരിപ്പിക്കും. ഇതിനു പുറമെ ഇഎൻടിയുമായി ബന്ധപ്പെട്ട വിവിധ വിഷയങ്ങളിൽ ചർച്ചകളും ശിൽപ്പശാലകളും നടക്കും. സമ്മേളനത്തിന്‍റെ ഭാഗമായി പിജി വിദ്യാർഥികൾ പോസ്റ്ററുകൾ അവതരിപ്പിക്കും. മികച്ച പോസ്റ്ററിന് അവാർഡും നൽകും. പിജി വിദ്യാർഥികൾക്കായി ക്വിസ് മത്സരവും സംഘടിപ്പിക്കും. ആരോഗ്യരംഗത്തെ വിവിധ മേഖലകളെ സമന്വയിപ്പിച്ച് 30 സ്റ്റാളുകളും ഒരുക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]