പ്രാദേശിക രാഷ്‌ട്രീയകാര്യ സമിതികള്‍ രൂപീകരിക്കാൻ കെആര്‍എല്‍സിസി
Monday, July 14, 2025 3:20 AM IST
കൊച്ചി: ആസന്നമായ തെരഞ്ഞെടുപ്പുകളുടെ പശ്ചാത്തലത്തില്‍ വ്യക്തമായ രാഷ്‌ട്രീയ സമീപനം കൈക്കൊള്ളാന്‍ കെആര്‍എല്‍സിസി ജനറല്‍ അസംബ്ലി തീരുമാനിച്ചു. പഞ്ചായത്ത്, മുനിസിപ്പാലിറ്റി, കോര്‍പറേഷന്‍ തലങ്ങളില്‍ പ്രാദേശിക രാഷ്‌ട്രീയകാര്യസമിതികള്‍ രൂപീകരിച്ചു പ്രവര്‍ത്തനങ്ങള്‍ ഏകോപിപ്പിക്കും.
ലത്തീന്‍ കത്തോലിക്കര്‍ക്ക് സമുദായ സര്‍ട്ടിഫിക്കറ്റ് ലഭ്യമാക്കുന്നതിലെ തടസങ്ങള്‍ പരിഹരിക്കണമെന്ന ആവശ്യം ഉന്നയിച്ച് പ്രത്യക്ഷ സമരപരിപാടികള്‍ ആരംഭിക്കാന്‍ സമ്മേളനം തീരുമാനിച്ചു. ജസ്റ്റീസ് ജെ.ബി. കോശി കമ്മീഷന്‍ റിപ്പോര്‍ട്ട് പ്രസിദ്ധീകരിക്കാത്തത് ദുരൂഹമാണ്. മുനമ്പത്തെ കുടുംബങ്ങള്‍ക്ക് അവരുടെ ഭൂമിയിന്മേലുള്ള റവന്യു അവകാശങ്ങള്‍ ഉടനടി പുനഃസ്ഥാപിക്കണം.
ചെല്ലാനം മുതല്‍ ഫോര്‍ട്ടുകൊച്ചി വരെയുള്ള പ്രദേശങ്ങളിലെ കടല്‍ഭിത്തി നിര്‍മാണം പൂര്‍ത്തിയാക്കാന്‍ നടപടികളും ആവശ്യമായ ഫണ്ടും അനുവദിക്കണം. വിദ്യാഭ്യാസസ്ഥാപനങ്ങള്‍ നടത്തുവാനുള്ള മതന്യൂനപക്ഷങ്ങളുടെ അവകാശത്തിന്മേല്‍ കടന്നുകയറാനുള്ള സര്‍ക്കാര്‍ ശ്രമങ്ങളെ സമ്മേളനം അപലപിച്ചു. കെആര്‍എല്‍സിസി വൈസ് പ്രസിഡന്‍റെ ജോസഫ് ജൂഡ് രാഷ്‌ട്രീയപ്രമേയം അവതരിപ്പിച്ചു. പ്രവര്‍ത്തനറിപ്പോര്‍ട്ട് ജനറല്‍ സെക്രട്ടറി റവ. ഡോ. ജിജു ജോര്‍ജ് അറക്കത്തറയും അവതരിപ്പിച്ചു.
ട്രഷറര്‍ ബിജു ജോസി സാമ്പത്തിക റിപ്പോര്‍ട്ടും കെഎല്‍സിഎ സംസ്ഥാന പ്രസിഡന്‍റ് അഡ്വ. ഷെറി ജെ.തോമസ് രാഷ്‌ട്രീയകാര്യസമിതി റിപ്പോര്‍ട്ടും അവതരിപ്പിച്ചു. സമാപനസമ്മേളനത്തില്‍ കെആര്‍എല്‍സിസി വൈസ് പ്രസിഡന്‍റ് ബിഷപ് ഡോ. സെബാസ്റ്റ്യന്‍ തെക്കത്തെച്ചേരില്‍ സന്ദേശം നല്‍കി. കെആര്‍എല്‍സിബിസി വിശ്വാസ പരിശീലന കമ്മീഷന്‍റെ സ്‌കോളര്‍ഷിപ്പുകള്‍ വിതരണം ചെയ്തു.