പറഞ്ഞുപറഞ്ഞ് കാടും മലയും കയറിപ്പോകുന്നതാണ് അദ്ദേഹത്തിന്റെ രീതി. ഫാക്ട് ചെക്ക് എന്ന പേരില് പ്രമുഖ മാധ്യമങ്ങള് ട്രംപ് നടത്തുന്ന വ്യാജ അവകാശവാദങ്ങളും അബദ്ധങ്ങളുമെല്ലാം ഉടനടി പൊളിച്ചടുക്കുന്നതും പതിവാണ്.
ട്രംപിന്റേതില്നിന്നു തികച്ചും വ്യത്യസ്തമാണ് കമല ഹാരിസിന്റെ സമീപനം. അവര് പ്രസിഡന്റ് സ്ഥാനാര്ഥിയായശേഷം പത്രസമ്മേളനം നടത്തിയിട്ട് ആഴ്ചകള് പിന്നിട്ടു. പത്രസമ്മേളനം നടത്താന് കമലയ്ക്ക് അറിയില്ല, ഭയമാണ് എന്നുവരെ ട്രംപ് ആക്ഷേപിക്കുന്നുണ്ട്. അതില് വസ്തുകളുണ്ടുതാനും. ഈ മാസം രണ്ടു തവണ കവര്ചിത്രവുമായി ടൈം വാരിക ഇറങ്ങിയിട്ടും അവര്ക്ക് അഭിമുഖം നല്കാന് കമല വിസമ്മതിച്ചു.
കമലയെ അനുകൂലിക്കുന്ന വാഷിംഗ്ടണ് പോസ്റ്റ് പത്രം മീഡിയയെ ഒഴിവാക്കുന്നതിനെതിരേ വിമര്ശനവുമായി രംഗത്തു വന്നു. മീഡിയയോടു സംസാരിച്ചാല് തീപിടിക്കുമോ എന്നുപോലും കമലയോട് സിബിഎസ് ന്യൂസ് റിപ്പോര്ട്ടര് ചോദിച്ചു.
ഷിക്കാഗോയില് ആരംഭിച്ച ഡെമോക്രാറ്റുകളുടെ ത്രിദിന കണ്വന്ഷന്, സെപ്റ്റംബര് 10ന് നടക്കുന്ന പ്രസിഡന്ഷ്യല് സംവാദം തുടങ്ങിയവയിലും പിന്നീടുള്ള പ്രചാരണങ്ങളിലും കമല ഹാരിസിനു മീഡിയയെ ഒഴിവാക്കാന് കഴിയില്ല. അതിന്റെ തിരക്കിലാണ് അവരെന്നാണ് ഡെമോക്രാറ്റുകള് പറയുന്നത്.
ഇതിനിടെ, വാഷിംഗ്ടണ് പോസ്റ്റ്- എബിസി ന്യൂസ് സര്വേയിലും കമല മുന്നേറ്റം തുടരുന്നു. ട്രംപിനേക്കാള് നാലു ശതമാനമാണ് ലീഡ്. ദേശീയ കണ്വന്ഷനില് ഡെമോക്രാറ്റുകള്ക്ക് കൂടുതല് ആത്മവിശ്വാസം നല്കുന്നതാണ് ഈ സര്വേ ഫലം.