നാളെ നഗരത്തിലെ കൊളോണിയൽ സെന്‍ററിൽ ആഘോഷമായ വിശുദ്ധ കുർബാനയോടെയും പരസ്യ ആരാധനയോടെയുമാണ് ദിവ്യകാരുണ്യ കോൺഗ്രസിന് തുടക്കമാകുക. 1600 കുട്ടികൾക്കു പ്രഥമദിവ്യകാരുണ്യ സ്വീകരണവും ഇതോടനുബന്ധിച്ചു നടക്കും.
ദിവ്യകാരുണ്യ കോൺഗ്രസിനോടനുബന്ധിച്ച് വിപുലമായ ഒരുക്കങ്ങളാണ് ഇക്വഡോറിന്‍റെ വിവിധ ഭാഗങ്ങളിൽ ഏതാനും മാസമായി നടന്നുവരുന്നത്. ദിവ്യകാരുണ്യത്തെ ആസ്പദമാക്കിയുള്ള പ്രദർശനങ്ങൾ, പ്രഭാഷണങ്ങൾ, ദിവ്യകാരുണ്യ ആരാധന, ആത്മീയ സംഗീതവിരുന്ന് എന്നിവ സംഘടിപ്പിച്ചിട്ടുണ്ട്. 1881ൽ ഫ്രാൻസിലെ ലില്ലെയിലാണ് ഫ്രഞ്ച് അല്മായരുടെ നേതൃത്വത്തിൽ ആദ്യ അന്താരാഷ്‌ട്ര ദിവ്യകാരുണ്യ കോൺഗ്രസ് നടന്നത്.
ഫ്രഞ്ച് വിപ്ലവത്തിന്‍റെ സാഹചര്യത്തിൽ വിശ്വാസവും ഭക്തിയും ആഴപ്പെടുത്താൻ ഉദ്ദേശിച്ചായിരുന്നു ഇതു സംഘടിപ്പിച്ചത്. തുടർന്നിങ്ങോട്ട് എല്ലാ അഞ്ചു വർഷം കൂടുന്പോഴും അന്താരാഷ്‌ട്ര ദിവ്യകാരുണ്യ കോൺഗ്രസ് സംഘടിപ്പിച്ചുവരുന്നുണ്ട്. ഏറ്റവുമൊടുവിൽ ഹംഗറിയിലെ ബുഡാപെസ്റ്റിൽ 2021ലായിരുന്നു ദിവ്യകാരുണ്യ കോൺഗ്രസ് നടന്നത്.