നിർമല കോളജിന് 64 ലക്ഷത്തിന്റെ കേന്ദ്ര ഗ്രാന്റ്
1429620
Sunday, June 16, 2024 4:53 AM IST
മൂവാറ്റുപുഴ: നിർമല കോളജിന് (ഓട്ടോണോമസ്) കേന്ദ്ര സർക്കാർ 64 ലക്ഷം ഗ്രാന്റ് അനുവദിച്ചു. കോളജിൽ ഗവേഷണത്തിനായി അത്യാധുനിക ഉപകരണങ്ങൾ വാങ്ങുന്നതിനും നൂതന സാങ്കേതികവിദ്യകൾ സംയോജിതമായി വികസിപ്പിക്കുന്നതിനുമായി കേന്ദ്ര സയൻസ് ആന്റ് ടെക്നോളജി വകുപ്പാണ് 64 ലക്ഷത്തിന്റെ ഗ്രാന്റ് കോളജിന് അനുവദിച്ചത്.
ഗ്രാന്റ് വിദ്യാർഥികളുടെ ഇന്റേണ്ഷിപ്പിനും ഗവേഷണത്തിനും, സ്റ്റാർട്ടപ്പുകൾക്കും സഹായകരമാകുമെന്ന് പ്രിൻസിപ്പൽ റവ. ഡോ. ജസ്റ്റിൻ കണ്ണാടൻ പറഞ്ഞു. കോളജിലെ സയൻസ് വിഭാഗങ്ങൾക്കായിരിക്കും ഇതിലൂടെ കൂടുതൽ പ്രയോജനം ലഭിക്കുക. കോളജിന്റെ അക്കാദമിക ഗവേഷണ നിലവാരവും, എൻഎഎസി, എൻഐആർഎഫ് ഉയർന്ന റാങ്കിംഗുകളുമാണ് കോളജിനെ നേട്ടത്തിന് അർഹമാക്കിയത്.
രസതന്ത്ര മേഖലയിലെ കണ്ടുപിടുത്തത്തിന് കഴിഞ്ഞ ദിവസം കോളജിന് പേറ്റന്റും ലഭിച്ചിരുന്നു. കോളജ് ഓട്ടോണോമസ് പദവിയിലെത്തിയ ശേഷമുള്ള ആദ്യ ദേശീയ അംഗീകാരം കൂടിയാണ് ഈ നേട്ടം.