ADVERTISEMENT

ADVERTISEMENT

വീടിന്‍റെ താക്കോൽ ദാനം നടത്തി

അമ്പലപ്പുഴ: കോണ്‍ഗ്രസിന്‍റെ വിദേശ മലയാളി സംഘടനയായ ഒഐസിസി പുറക്കാട് പഞ്ചായത്ത് 16-ാം വാര്‍ഡില്‍ നിർമിച്ചു നല്‍കിയ വീടിന്‍റെ താക്കോല്‍ ദാന ഉദ്ഘാടനം എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി നിര്‍വഹിച്ചു. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ടി.എ. ഹാമിദ് അധ്യക്ഷത വഹിച്ചു.

കെപിസിസി ജനറല്‍ സെക്രട്ടറി എം.ജെ. ജോബ്, എം. ലിജു, അനില്‍ ബോസ്, ടിജിന്‍ ജോസഫ്, എസ്. സുബാഹു, പി. സാബു, എ.ആര്‍. കണ്ണന്‍, എം.വി. രഘു, ആര്‍.വി. ഇടവന, എന്‍. ഷിനോയ, പി.കെ. മോഹനന്‍, സിറാജ് പുറക്കാട്, എസ്. രാധാകൃഷ്ണന്‍, കമലോല്‍ഭവന്‍, വി. ദില്‍ജിത്ത്, സിനോ വിജയരാജ് തുടങ്ങിയവര്‍ പ്രസംഗിച്ചു.

ADVERTISEMENT

രാഷ്‌ട്രീയ, ഭരണ രംഗങ്ങളില്‍ ചെറുപ്പക്കാര്‍ കടന്നുവരണം: മാര്‍ തോമസ് തറയില്‍

ചങ്ങനാശേരി: രാഷ്‌ട്രീയ, ഭരണ രംഗങ്ങളില്‍ പ്രബുദ്ധരും പ്രഗത്ഭരുമായ ചെറുപ്പക്കാര്‍ കടന്നുവരണമെന്ന് ആര്‍ച്ച്ബിഷപ് മാര്‍ തോമസ് തറയില്‍. അതിരൂപത കത്തോലിക്ക കോണ്‍ഗ്രസ് എക്‌സലന്‍ഷ്യ സീസണ്‍ -3 മെറിറ്റ് അവാര്‍ഡ്-2025, മാര്‍ ജോസഫ് പവ്വത്തില്‍ സ്മാരക ഹെറിറ്റേജ് ക്വിസ് മത്സരത്തിലെ വിജയികള്‍ക്കുള്ള സമ്മാനങ്ങളും നൽകു ന്നതോടനുബന്ധിച്ചുള്ള സമ്മേളനം ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ എന്നിവര്‍ മുഖ്യപ്രഭാഷണങ്ങള്‍ നടത്തി. അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല അനുമോദനസന്ദേശം നല്‍കി. ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, ടോമിച്ചന്‍ അയ്യരുകുളങ്ങര, കുഞ്ഞ് കളപ്പുര, ഷിജി ജോണ്‍സണ്‍, രാജേഷ് ജോണ്‍, ജേക്കബ് നിക്കോളാസ്, ജോര്‍ജുകുട്ടി മുക്കത്ത്, റോസിലിന്‍ കുരുവിള, സെബാസ്റ്റ്യന്‍ വര്‍ഗീസ് എന്നിവര്‍ പ്രസംഗിച്ചു.

അമ്പലപ്പുഴ സിപിഐയിൽ പൊട്ടിത്തെറി

അമ്പലപ്പുഴ: മണ്ഡലം സമ്മേളനത്തിനു പിന്നാലെ അമ്പലപ്പുഴ സിപിഐയില്‍ പൊട്ടിത്തെറി. നിരവധി പ്രവര്‍ത്തകര്‍ പാര്‍ട്ടി വിടാനൊരുങ്ങുന്നു. പുതിയ മണ്ഡലം സെക്രട്ടറിയുമായുള്ള അഭിപ്രായ വ്യത്യാസത്തെത്തുടര്‍ന്നാണ് ഭൂരിഭാഗം ലോക്കല്‍ കമ്മിറ്റികളില്‍നിന്നും അംഗങ്ങള്‍ രാജിവയ്ക്കാന്‍ തയാറെടുക്കുന്നത്. പാര്‍ട്ടിക്ക് വിധേയമാകാതെ പ്രവര്‍ത്തിച്ച മുന്‍ പഞ്ചായത്ത് പ്രസിഡന്‍റ് കൂടിയായ വനിതാ പ്രവര്‍ത്തകയെ ഏകപക്ഷീയമായി ലോക്കല്‍ കമ്മിറ്റി സെക്രട്ടറിയാക്കിയതാണ് ഇപ്പോഴത്തെ പൊട്ടിത്തെറിക്ക് കാരണം. മണ്ഡലം സെക്രട്ടറിയാണ് ഇതിനു പിന്നിലെന്നാണ് പാര്‍ട്ടിപ്രവര്‍ത്തകര്‍ ആരോപിക്കുന്നത്. പഞ്ചായത്ത് പ്രസിഡന്‍റായിരുന്നപ്പോഴും അമ്പലപ്പുഴ ക്ഷേത്രോപദേശക സമിതി പ്രസിഡന്‍റായിരുന്നപ്പോഴും പാര്‍ട്ടിയോട് കൂടിയാലോചനയില്ലാതെയാണ് ഇവര്‍ പ്രവര്‍ത്തിച്ചിരുന്നതെന്ന ആരോപണം നിലനില്‍ക്കെയാണ് ഈ വനിതാ പ്രവര്‍ത്തകയെ ലോക്കല്‍ കമ്മിറ്റി സെക്രട്ടറിയാക്കിയത്. ഇവര്‍ക്ക് കാരണം കാണിക്കല്‍ നോട്ടീസ് നല്‍കിയെങ്കിലും ഇതിന് മറുപടി പോലും നല്‍കിയിട്ടില്ല. ഇതിനിടയിലാണ് എല്‍സി സെക്രട്ടറിയാക്കിയത്. പലയിടങ്ങളിലെയും നിലം നികത്തല്‍ ചോദ്യം ചെയ്ത ഏതാനും അംഗങ്ങളെ പുതിയ മണ്ഡലം കമ്മിറ്റിയില്‍ ഉള്‍പ്പെടുത്താതിരുന്നതും മണ്ഡലം സെക്രട്ടറിയാണെന്നാണ് അതൃപ്തരായ അണികള്‍ പറയുന്നത്. മണ്ഡലം സമ്മേളനത്തിന് മുന്‍പ് കൂടിയ മണ്ഡലം കമ്മിറ്റിക്കിടെ ജില്ലാക്കമ്മിറ്റിയംഗം, മറ്റൊരു നേതാവ് എന്നിവരെ മറ്റൊരു നേതാവ് മര്‍ദിച്ചിട്ടും യാതൊരു നടപടിയും സ്വീകരിച്ചില്ല. മണ്ഡലം സമ്മേളനത്തില്‍ പങ്കെടുക്കേണ്ട പ്രതിനിധികളുടെ എണ്ണം കുറഞ്ഞത് മണ്ഡലം സെക്രട്ടറിയുമായുള്ള അഭിപ്രായ വ്യത്യാസത്തെത്തുടര്‍ന്നാണ്. മുന്‍ ജില്ലാ പഞ്ചായത്തംഗം ഉള്‍പ്പെടെ പല മുതിര്‍ന്ന നേതാക്കളും പാര്‍ട്ടി വിട്ടു പോകാന്‍ കാരണമായത് ഈ അഭിപ്രായ വ്യത്യാസം മൂലമാണെന്നാണ് പ്രവര്‍ത്തകര്‍ പറയുന്നത്. കൂടാതെ പാര്‍ട്ടിയില്‍ സാമ്പത്തിക അച്ചടക്കം തീരെയില്ലാതായതും വിമര്‍ശനത്തിന് കാരണമായിട്ടുണ്ട്. അവധിയെടുത്ത കാലയളവിലെ അലവന്‍സ് കൃത്യമായി സെക്രട്ടറി വാങ്ങിയെന്നാണ് ആരോപണം. പാര്‍ട്ടിയിലെ ഈ അഭിപ്രായ വ്യത്യാസം വരുന്ന തദ്ദേശ സ്വയം ഭരണ തെരഞ്ഞെടുപ്പില്‍ പാര്‍ട്ടിയെ പ്രതികൂലമായി ബാധിക്കുമെന്നാണ് പ്രവര്‍ത്തകര്‍ പറയുന്നത്. പുറക്കാട്, തോട്ടപ്പള്ളി, പുന്നപ്ര തുടങ്ങിയ ലോക്കല്‍ കമ്മിറ്റികളില്‍നിന്ന് നിരവധി പ്രവര്‍ത്തകര്‍ പാര്‍ട്ടി വിടാന്‍ തീരുമാനിച്ചിരിക്കുകയാണ്. അമ്പലപ്പുഴ തെക്ക്, പുറക്കാട്, തോട്ടപ്പള്ളി എന്നിവിടങ്ങളിലെ മുതിര്‍ന്ന നേതാക്കള്‍ മണ്ഡലം സെക്രട്ടറിയുമായുള്ള അഭിപ്രായഭിന്നതയെത്തുടര്‍ന്ന് മണ്ഡലം കമ്മിറ്റിയില്‍നിന്ന് ഒഴിവായിരിക്കുകയാണ്. മറ്റ് ചിലര്‍ രാജിസന്നദ്ധതയും അറിയിച്ചിരിക്കുകയാണ്. മുതിര്‍ന്ന നേതാക്കളടക്കം പാര്‍ട്ടി വിടാന്‍ തീരുമാനിച്ചിട്ടും ജില്ലാ നേതൃത്വം ഒരു ഇടപെടലും നടത്തിയിട്ടില്ല എന്നാണ് പ്രവര്‍ത്തകരുടെ പരാതി.

വൈദികര്‍ക്കെതിരേ കേസെടുത്ത നടപടി പിന്‍വലിക്കണം: ഫാ.സേവ്യര്‍ കുടിയാംശേരി

ആലപ്പുഴ: കടൽകയറ്റം മൂലം ദുരിതമനുഭവിക്കുന്ന തീരദേശവാസികള്‍ക്കായി കൊച്ചി ബിഒടി പാലത്തിനരുകില്‍ ആലപ്പുഴ, കൊച്ചി രൂപതകളിലെ വൈദികര്‍ സമാധാനപരമായി ഉപവാസമിരുന്നതിന് കേസെടുത്തതു പോലീസിന്‍റെ ഭാഗത്തുനിന്നുള്ള ധിക്കാരപരമായ നടപടിയാണ്. ആര്‍ക്കും ഒരുപദ്രവവും സൃഷ്ടിക്കാതെ ഉപവാസമിരിക്കുന്നവര്‍ക്കെതിരേ ലോകത്തെവിടെയെങ്കിലും കേസെടുക്കുമോ. പോലീസിന്‍റെ ഭാഗത്തുനിന്നുണ്ടായ തെറ്റായ നടപടി തിരുത്താന്‍ സര്‍ക്കാര്‍ ഇടപെടണമെന്നും അദ്ദേഹം ആവശ്യപ്പെട്ടു. മാത്രമല്ല വൈദികരെ ഇങ്ങനെയൊരു ഉപവാസത്തിലേക്കു വലിച്ചിഴച്ച സാഹചര്യം പഠിച്ച് തീരജനതയേയും തീരത്തേയും സംരക്ഷിക്കുകയാണു വേണ്ടത്. കടല്‍ഭിത്തി ഇല്ലാത്ത ഇടങ്ങളില്‍ കടല്‍ഭിത്തി നിര്‍മിക്കാന്‍ ആവശ്യമായ നടപടി സ്വീകരിക്കണം. തീരവാസികളുടെ പേരിലുള്ള സ്ഥലം കടലെടുത്തുപോയതിന് സര്‍ക്കാര്‍ നഷ്ടപരിഹാരം നല്‍കേണ്ടതാണ്. കപ്പലപകടംമൂലം കടലിന്‍റെ ആവാസവ്യവസ്ഥ തകര്‍ന്നിരിക്കുന്നു. കടലില്‍ മീനില്ലാതായി. കപ്പലപകടംമൂലം കടലില്‍ കറങ്ങിനടക്കുന്ന കണ്ടെയ്‌നറുകളുടെ അവശിഷ്ടങ്ങളില്‍ തട്ടി വലകള്‍ നഷ്ടപ്പെടുന്നു. മഴയും കാറ്റും കടല്‍കയറ്റവും ദുരിതങ്ങള്‍ക്കുമേല്‍ ദുരിതം വിതയ്ക്കുന്നു. മീന്‍പിടുത്തക്കാര്‍ക്കുണ്ടാകുന്ന നിരവധിയായ പ്രശ്‌നങ്ങള്‍ക്കെല്ലാം കാരണം മനുഷ്യനിര്‍മിതമായ ദുരന്തങ്ങളാണെന്നും അദ്ദേഹം ചൂണ്ടിക്കാട്ടി. ഇതറിയാമായിരുന്നിട്ടും ഉറക്കം നടിക്കുന്ന സര്‍ക്കാരിനെ ഉണര്‍ത്താന്‍ വേണ്ടി സമാധാനപരമായി ഉപവാസമിരുന്ന വൈദികര്‍ക്കെതിരേ എടുത്ത കേസുകള്‍ പിന്‍വലിക്കുകയും തീരവാസികളേയും തീരത്തേയും കടലിനേയും സംരക്ഷിക്കുകയും ചെയ്യാന്‍ സര്‍ക്കാര്‍ തയാറാകണമെന്നും ഫാ. കുടിയാംശേരി പ്രസ്താവനയില്‍ ചൂണ്ടിക്കാട്ടി.

വൈദ്യുതാഘാതമേറ്റ് പോത്തുകൾ ചത്തു

തുറവൂര്‍: മരം വീണ് മറിഞ്ഞ വൈദ്യുതിത്തൂണിലെ കമ്പികളില്‍നിന്ന് വൈദ്യുതാഘാതമേറ്റ് പോത്തുകള്‍ ചത്തു. കോടംതുരുത്ത് പഞ്ചായത്ത് അഞ്ചാം വാര്‍ഡ് നെടുംചിറ നികര്‍ത്ത് ബാബുവിന്‍റെ രണ്ടു പോത്തുകളാണ് ചത്തത്. വീടിനു സമീപത്തെ പുരയിടത്തില്‍ കെട്ടിയിരുന്ന പോത്തുകളാണ് ശനിയാഴ്ച പുലര്‍ച്ചെ ചത്തുകിടക്കുന്നത് കണ്ടത്. പുലര്‍ച്ചെയുണ്ടായ കാറ്റിലാണ് അടയ്ക്കാമരം വീണ് വൈദ്യുതി തൂണുകള്‍ മറിഞ്ഞത്. കമ്പികള്‍ പൊട്ടാതിരുന്നതാണ് വൈദ്യുതാഘാതമേല്‍ക്കാന്‍ കാരണം.

റോബോട്ടിക്‌സ് പഠനം പത്താം ക്ലാസിലെ കുട്ടികള്‍ക്ക് ഉറപ്പാക്കും: കൈറ്റ് സിഇഒ

ആലപ്പുഴ: ഈ അധ്യയനവര്‍ഷം പത്താം ക്ലാസിലെ മുഴുവന്‍ കുട്ടികള്‍ക്കും നിര്‍മിത ബുദ്ധിയും റോബോട്ടിക്‌സും പഠിക്കാനും പ്രായോഗിക പരീക്ഷണങ്ങള്‍ നടത്താനും അവസരമൊരുക്കിയിട്ടുണ്ടെന്ന് കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) സിഇഒ കെ. അന്‍വര്‍ സാദത്ത് പറഞ്ഞു. ആലപ്പുഴ സെന്‍റ് ജോസഫ്‌സ് ഗേള്‍സ് ഹയര്‍ സെക്കൻഡറി സ്‌കൂളില്‍ ലിറ്റില്‍ കൈറ്റ്‌സ് നോഡല്‍ ഓഫീസര്‍മാര്‍ക്കള്ള ജില്ലാതല ശില്പശാലയില്‍ മുഖ്യപ്രഭാഷണം ഓണ്‍ലൈനായി നടത്തുകയായിരുന്നു അദ്ദേഹം. പൊതുവിദ്യാലയങ്ങളിലെ കുട്ടികളുടെ ഐടി കൂട്ടായ്മയായ ലിറ്റില്‍ കൈറ്റ്‌സ് ഐ.ടി ക്ലബ്ബുകള്‍ വഴി ഭിന്നശേഷി വിഭാഗം കുട്ടികള്‍ക്ക് ഡിജിറ്റല്‍ സംവിധാനങ്ങളുപയോഗിച്ച് കൈത്താങ്ങ് ഒരുക്കുന്നതിന് മുന്തിയ പരിഗണന നല്‍കുമെന്നുംഅദ്ദേഹം പറഞ്ഞു. ജില്ലയില്‍ പ്രവര്‍ത്തിക്കുന്ന 158 യൂണിറ്റുകളില്‍നിന്നു 316 മാസ്റ്റര്‍/മിസ്ട്രസ്മാര്‍ പങ്കെടുത്തു. ലിറ്റില്‍ കൈറ്റ്‌സ് യൂണിറ്റുകളുടെ ഈ വര്‍ഷത്തെ പ്രവര്‍ത്തനങ്ങള്‍ക്ക് ദിശാബോധം നല്‍കുന്ന തരത്തിലുള്ള വിവിധ അവതരണങ്ങളും സെഷനുകളും ഉള്‍പ്പെട്ടതായിരുന്നു ശില്പശാല. ജില്ലാതലത്തിലെയും സംസ്ഥാനതലത്തിലെയും മികച്ച ലിറ്റില്‍ കൈറ്റ്‌സ് പ്രവര്‍ത്തന മാതൃകകള്‍, ആശയ പ്രചാരണരംഗത്ത് സ്‌കൂള്‍ വിക്കിയുടെ പ്രസക്തി, വിദ്യാലയ പ്രവര്‍ത്തനങ്ങളില്‍ ലിറ്റില്‍ കൈറ്റ്‌സിന്‍റെ സ്ഥാനം തുടങ്ങി വിവിധ അവതരണങ്ങളും ചര്‍ച്ചകളും നടന്നു. വിദ്യാലയങ്ങളിലെ റോബോട്ടിക്‌സ് പഠനത്തിന് ലിറ്റില്‍ കൈറ്റ്‌സ് യൂണിറ്റുകള്‍ ചെയ്യേണ്ട പിന്തുണാപ്രവര്‍ത്തനങ്ങളെക്കുറിച്ചും വിശദമായി ചര്‍ച്ച ചെയ്തു. ചര്‍ച്ചകളില്‍ ഉയര്‍ന്നുവന്ന നിര്‍ദേശങ്ങള്‍ക്ക് സമാപന സെഷനില്‍ കൈറ്റ് സിഇഒ വിശദീകരണം നല്‍കി. കൈറ്റ് ജില്ലാ കോ-ഓര്‍ഡിനേറ്റര്‍ എം. സുനില്‍കുമാര്‍, മാസ്റ്റര്‍ ട്രെയിനര്‍ ടി. സജിത്ത് തുടങ്ങിയവര്‍ പ്രസംഗിച്ചു.

മത്സ്യത്തൊഴിലാളികളുടെ ക്ഷേമത്തിന് സര്‍ക്കാര്‍ ചെലവഴിച്ചത് 165 കോടി: മന്ത്രി സജി ചെറിയാന്‍

ആലപ്പുഴ: കഴിഞ്ഞ സാമ്പത്തിക വര്‍ഷം മാത്രം 165 കോടിരൂപ മത്സ്യത്തൊഴിലാളികളുടെ ക്ഷേമത്തിനായി വിനിയോഗിച്ചതായി മന്ത്രി സജി ചെറിയാന്‍ പറഞ്ഞു. മത്സ്യത്തൊഴിലാളികളുടെയും അനുബന്ധ തൊഴിലാളികളുടെയും കുട്ടികള്‍ക്ക് കേരള മത്സ്യത്തൊഴിലാളി ക്ഷേമനിധി ബോര്‍ഡ് നല്‍കിവരുന്ന 2024-25 വര്‍ഷത്തെ വിദ്യാഭ്യാസ, കായിക പ്രോത്സാഹന അവാര്‍ഡ് വിതരണം ലിയോ തേര്‍ട്ടീന്ത് എച്ച്എസ്എസ് ഓഡിറ്റോറിയത്തില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. മത്സ്യത്തൊഴിലാളികളുടെ മക്കള്‍ വിദ്യാഭ്യാസരംഗത്ത് ചരിത്രനേട്ടമാണ് കൈവരിച്ചത്. അഞ്ചു വര്‍ഷത്തിനുള്ളില്‍ വിദ്യാകിരണം പദ്ധതിയുടെ ഭാഗമായി 53.52 കോടി രൂപ സംസ്ഥാന സര്‍ക്കാര്‍ ചെലവഴിച്ചിട്ടുണ്ട്. മെഡിക്കല്‍, എന്‍ജിനിയറിംഗ്, മറ്റ് അനുബന്ധ കോഴ്‌സുകളിലേക്ക് മത്സ്യത്തൊഴിലാളി മേഖലയില്‍നിന്ന് ആയിരക്കണക്കിന് കുട്ടികളാണ് കടന്നുവന്നതെന്നും മന്ത്രി കൂട്ടിച്ചേർത്തു. പഠനത്തിലും കായിക മത്സരങ്ങളിലും ഉന്നതവിജയം കരസ്ഥമാക്കുന്നതിന് പ്രചോദനം നല്‍കുക എന്ന ലക്ഷ്യത്തോടുകൂടിയാണ് മത്സ്യത്തൊഴിലാളി ക്ഷേമനിധി ബോര്‍ഡ് കുട്ടികള്‍ക്ക് അവാര്‍ഡുകള്‍ നല്‍കി വരുന്നത്. ജില്ലയില്‍ എസ്എസ്എല്‍സിക്ക് മുഴുവന്‍ വിഷയങ്ങള്‍ക്കും എ പ്ലസ് നേടിയ 222 വിദ്യാര്‍ഥികള്‍, ഒന്‍പത് എ പ്ലസ് നേടിയ 83 വിദ്യാര്‍ഥികള്‍, എട്ട് എ പ്ലസ് നേടിയ 75 വിദ്യാര്‍ഥികള്‍, പ്ലസ് ടുവിന് എല്ലാ വിഷയങ്ങള്‍ക്കും എ പ്ലസ് നേടിയ 60 വിദയാര്‍ഥികള്‍, കായിക രംഗത്ത് മികവ് പുലര്‍ത്തിയ ഏഴു കുട്ടികള്‍ എന്നിവര്‍ക്കാണ് അവാര്‍ഡുകള്‍ വിതരണം ചെയ്തത്. പി.പി. ചിത്തരഞ്ജന്‍ എംഎല്‍എ അധ്യക്ഷനായി. ജില്ലാ ആന്‍റി നര്‍ക്കോട്ടിക് സെല്‍ ഉദ്യോഗസ്ഥന്‍ ജി. ശാന്തകുമാര്‍ ലഹരി ബോധവത്കരണ ക്ലാസ് നയിച്ചു. നഗരസഭാ ചെയര്‍പെഴ്‌സണ്‍ കെ.കെ. ജയമ്മ, മത്സ്യബോര്‍ഡ് ചെയര്‍മാന്‍ കൂട്ടായി ബഷീര്‍, മത്സ്യബോര്‍ഡ് കമ്മീഷണര്‍ എച്ച്. സലീം, മത്സ്യബോര്‍ഡ് അംഗങ്ങളായ സക്കീര്‍ അലങ്കാരത്ത്, കെ.കെ. രമേശന്‍ തുടങ്ങിയവര്‍ പങ്കെടുത്തു.

മാന്നാറിൽ തെരുവുനായ്ക്കൾ വിലസുന്നു

മാന്നാര്‍: തെരുവുനായ ആക്രമണത്തിനു വിധേയരാകുന്നവരുടെ എണ്ണം ദിനംപ്രതി വര്‍ധിക്കുന്നു. അടുത്തനാളുകളില്‍ തെരുവുനായ അക്രമത്തില്‍ പരിക്കേറ്റ് ചികിത്സതേടിയത് ഒരു ഡസനിലധികം പേരാണ്. മാന്നാറില്‍ തെരുവുനായ ശല്യം അതിരൂക്ഷമായിരിക്കുകയാണ്. മാന്നാര്‍ പഞ്ചായത്ത് നാലാം വാര്‍ഡില്‍ ടെലഫോണ്‍ എക്‌സ്‌ചേഞ്ചിന് തെക്കുവശത്തായി കൊല്ലശേരി, പൂന്തോണി, കുറ്റിയില്‍ ഭാഗങ്ങളിലും മാന്നാര്‍ ടൗണിലും തെരുവുനായകള്‍ അലഞ്ഞുതിരിഞ്ഞ് നടക്കുന്നത് പതിവു കാഴ്ചയാണ്. ഏത് നിമിഷവും ഇത്തരം നായകള്‍ ആക്രമണകാരികളായി മാറാം. നാട്ടുകാര്‍ ഭീതിയിലാണ് കഴിയുന്നത്. തെരുവുനായ ഇന്നലെ നിരവധിപ്പേരെ ആക്രമിച്ച് പരിക്കേല്‍പ്പിച്ചു. മാന്നാര്‍ കുട്ടംമ്പേരൂര്‍ കുറ്റിയില്‍ താഴ്ചയില്‍ രാജേന്ദ്രന്‍ ഉള്‍പ്പെടെ അഞ്ചുപേർക്ക് നായയുടെ കടിയേറ്റു. ഇവര്‍ മാവേലിക്കര ജില്ലാ ആശുപത്രിയില്‍ ചികിത്സതേടി. തൊഴിലുറപ്പ് തൊഴിലാളിയായ 65 വയസുള്ള പൂന്തോണിക്കിഴക്കേതില്‍ ശങ്കരിയമ്മക്ക് കഴിഞ്ഞ ആഴ്ചയിലാണ് കടിയേറ്റത്. മാന്നാര്‍ സാമൂഹ്യ ആരോഗ്യ കേന്ദ്രത്തില്‍നിന്ന് ഐഡിആര്‍വി എടുത്തശേഷം മാവേലിക്കര ജില്ലാ ആശുപത്രിയില്‍ സിറം എടുക്കാന്‍ ടെസ്റ്റ് ചെയ്തപ്പോള്‍ അലര്‍ജി ആയതിനാല്‍ ആലപ്പുഴ മെഡിക്കല്‍ കോളജിലെത്തി നാലായിരം രൂപ മുടക്കി മെഡിക്കല്‍ സ്റ്റോറില്‍നിന്നു മരുന്നു വാങ്ങി ഇഞ്ചക്ഷന്‍ എടുക്കേണ്ടിവന്നു. തൊഴിലുറപ്പ് തൊഴിലാളിയായ എഴുപത്താറ് വയസുള്ള കുറ്റിയില്‍ വീട്ടില്‍ ഓമനാമ്മ, എഴുപതു വയസുള്ള ആന്‍റണി, തേയില വില്‍ക്കാനായി എത്തിയയാള്‍ തുടങ്ങി നിരവധി പേര്‍ക്ക് പട്ടിയുടെ കൈയേറ്റിട്ടുണ്ട്. സ്‌കൂളുകളില്‍ പോകുന്ന കുട്ടികള്‍ക്കും വഴിയാത്രക്കാര്‍ക്കും നാട്ടുകാര്‍ക്കും ഭീഷണിയായ തെരുവുനായ ശല്യത്തിന് അറുതി വരുത്താന്‍ അടിയന്തര നടപടികള്‍ ഉണ്ടാകണമെന്നാണ് പൊതു ആവശ്യം.

ഫാ. മാർട്ടിൻ വാഴച്ചിറ ചരമവാര്‍ഷികവും അനുസ്മരണ സമ്മേളനവും

പുളിങ്കുന്ന്: സ്‌കോര്‍ട്‌ലന്‍ഡില്‍ മരിച്ച ഫാ. മാര്‍ട്ടിന്‍ വാഴച്ചിറ ചരമവാര്‍ഷികവും അനുസ്മരണ സമ്മേളനവും അദ്ദേഹത്തിന്‍റെ ഇടവക പള്ളിയായ പുളിങ്കുന്ന് സെന്‍റ് മേരീസ് ഫൊറോന വലിയ പള്ളിയില്‍ നടത്തി. ചങ്ങനാശേരി എസ്ബി കോളജ് പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍ സമ്മേളനം ഉദ്ഘാടനം ചെയ്തു. ഫൊറോനാ വികാരി റവ.ഡോ. ടോം പുത്തന്‍കളം അധ്യക്ഷത വഹിച്ചു. ചടങ്ങിനോടനുബന്ധിച്ചു പുളിങ്കുന്ന് സെന്‍റ് ജോസഫ് ഹയര്‍ സെക്കന്‍ഡറി സ്‌കൂള്‍ പ്രധാനാധ്യാപകന്‍ ഫാ. ജോസഫ് കുറുപ്പശേരി പ്ലസ്ടു പരീക്ഷയില്‍ മികച്ച വിജയം നേടിയ കുട്ടികളെയും പുളിങ്കുന്ന് ഫൊറോനാ അസിസ്റ്റന്‍റ് വികാരി ഫാ. ടിബിന്‍ ഒറ്റാറയ്ക്കല്‍ എസ്എസ്എല്‍സി പരീക്ഷയില്‍ മികച്ച വിജയം കൈവരിച്ച കുട്ടികളെയും ആദരിച്ചു. പുളിങ്കുന്ന് പഞ്ചായത്ത് സെക്രട്ടറി ആഷ്‌ലി നായര്‍ സിവില്‍ സര്‍വീസ് പരീക്ഷയില്‍ മികച്ച വിജയം നേടിയ അഞ്ജലി പ്രദീപിനെ ആദരിച്ചു. ഫെറോനാ അസിസ്റ്റന്‍റ് വികാരി ഫാ. വര്‍ഗീസ് താന്നിക്കാപ്പാറ കുട്ടികള്‍ക്കു പഠനോപകരണങ്ങള്‍ വിതരണം ചെയ്തു. പുളിങ്കുന്ന് സെന്‍റ് സെബാസ്റ്റ്യന്‍സ് ആശ്രമം പ്രിയോര്‍ ഫാ. ജോസ് കോനാട്ട്, കെ. ഗോപകുമാര്‍, ബാബു വലിയവീടന്‍, ജോസഫ് കെ. നെല്ലുവേലി, ജോസഫ് ചേക്കോടന്‍, സുധീപ് വി. നായര്‍, ലാല്‍ വയലാര്‍, കെ.പി. മാത്യു കളത്തില്‍, സംഘാടക സമിതി കണ്‍വീനര്‍ ജോഷി കൊല്ലാറ, ചെയര്‍മാന്‍ ജോണ്‍ സി. ടിറ്റോ എന്നിവര്‍ പ്രസംഗിച്ചു. ഇന്നു ഭൗതിക ശരീരം അടക്കം ചെയ്തിട്ടുള്ള ചെത്തിപ്പുഴ തിരുഹ്യദയ പള്ളിയില്‍ രാവിലെ ഏഴിനു വിശുദ്ധ കുര്‍ബാനയും മറ്റു തിരുക്കര്‍മങ്ങളും നടക്കും.

ടികെ റോഡില്‍ കുരുക്ക്; തിരുവല്ല യാത്ര ദുരിതത്തില്‍

തിരുവല്ല: പത്തനംതിട്ട ജില്ലയുടെ ഹൃദയ പാതയായ ടികെ റോഡില്‍ നിന്നും എംസി റോഡിലേക്കുള്ള യാത്ര ദുരിതപൂര്‍ണം. ടികെ റോഡില്‍ കറ്റോട് - മഞ്ഞാടി ഭാഗത്തെ കലുങ്കുപണികള്‍ കാരണമാണ് ടികെ റോഡ് കുരുക്കിലായത്. മാസങ്ങള്‍ക്കു മുമ്പ് ആരംഭിച്ചതാണ് പണികൾ. മഴക്കാലമായതോടെ ഇത് ഇഴയുകയാണ്. ഒരുഭാഗത്തെ ഗതാഗതം തടസപ്പെടുത്തി നിര്‍മാണം നടത്താനായിരുന്നു തീരുമാനമെങ്കിലും നടപടികള്‍ പ്രായോഗികായില്ല. തിരുവല്ലയിലേക്കുള്ള വാഹനങ്ങള്‍ മനയ്ക്കച്ചിറയില്‍ വഴിതിരിച്ചുവിടാന്‍ നിര്‍ദേശമുണ്ടായെങ്കിലും ബസുകള്‍ ഉള്‍പ്പെടെ തിരിഞ്ഞുപോകാന്‍ തയാറാകാതെ വന്നതോടെ കുരുക്ക് വര്‍ധിച്ചു. മനയ്ക്കച്ചിറ വഴി കിഴക്കന്‍മുത്തൂരിലെത്തി തിരുവല്ല ബൈപാസ് കടന്ന് ടൗണിലെത്തുമ്പോഴുണ്ടാകുന്ന കാലതാമസവും കുരുക്കും കാരണമാണ് ടികെ റോഡുവഴി തന്നെ വാഹനങ്ങള്‍ നീങ്ങിയത്. ഇതോടെ മണിക്കൂറുകള്‍ നീളുന്ന ഗതാഗതക്കുരുക്ക് മിക്കദിവസങ്ങളിലും ഉണ്ടാകുന്നു.

നവജാത ശിശുവിന്‍റെ മരണം: സമഗ്ര അന്വേഷണത്തിനു നിര്‍ദേശം

പത്തനംതിട്ട: നവജാതശിശുവിന്‍റെ മരണത്തിൽ സമഗ്ര അന്വേഷണം നിര്‍ദേശിച്ച് മുഖ്യമന്ത്രിയുടെ ഓഫീസ്. പത്തനംതിട്ട മെഴുവേലിയില്‍ ഒരു ദിവസം മാത്രം പ്രായമുള്ള നവജാത ശിശുവിനെ മരിച്ചനിലയില്‍ കണ്ടെത്തിയ സംഭവത്തില്‍ സമഗ്ര അന്വേഷണത്തിന് മുഖ്യമന്ത്രിയുടെ ഓഫീസ് നിര്‍ദേശം നല്‍കി. നവജാതശിശുവിനെ കൊലപ്പെടുത്തിയ സംഭവത്തിലെ മുഴുവന്‍ ദുരൂഹതകളിലും സമഗ്ര അന്വേഷണത്തിനു പ്രത്യേക അന്വേഷണ സംഘത്തെ നിയോഗിക്കമെന്നാവശ്യപ്പെട്ട് ഹൈക്കോടതി അഭിഭാഷകനും പൊതു പ്രവര്‍ത്തകനുമായ കുളത്തൂര്‍ ജയ്സിംഗ് നല്‍കിയ പരാതിയിന്‍മേല്‍ ആവശ്യമായ നടപടി സ്വീകരിക്കുവാന്‍ സംസ്ഥാന പോലീസ് മേധാവിക്കു മുഖ്യമന്ത്രിയുടെ ഓഫീസ നിര്‍ദേശം നല്‍കുകയായിരുന്നു. സംഭവത്തില്‍ ഇലവുംതിട്ട പോലീസ് കുഞ്ഞിന്‍റെ അമ്മയ്‌ക്കെതിരേ കൊലക്കുറ്റം ചുമത്തി കേസ് എടുത്തിട്ടുണ്ട്. അവിവാഹിതയായ സ്ത്രീ പ്രസവിച്ച ഒരു ദിവസം പ്രായമുള്ള നവജാത ശിശുവിനെ വലിച്ചെറിഞ്ഞു കൊലപ്പെടുത്താന്‍ മറ്റാരുടെയെങ്കിലും പ്രേരണയോ പ്രോത്സാഹനമോ ഭീഷണിയോ ഉണ്ടായിട്ടുണ്ടോയെന്നതടക്കം സംഭവത്തിലെ മുഴുവന്‍ ദുരൂഹതകളുംഅന്വേഷിക്കണമെന്നാണ് അഡ്വ. കുളത്തൂര്‍ ജയ്സിംഗിന്‍റെ പരാതിയില്‍ ആവശ്യപ്പെടുന്നത്.

നില്‍പ്പ് സമരം

ആലപ്പുഴ: വെള്ളക്കെട്ട് രൂക്ഷമായ സാഹചര്യത്തില്‍ പള്ളിക്കൂട്ടുമ്മ-നീലംപേരൂര്‍ റോഡ് ഉയര്‍ത്തി നിര്‍മിച്ച് ഗതാഗതതടസം നീക്കാന്‍ അടിയന്തര നടപടി സ്വകരിക്കണമെന്ന് കേരള കോണ്‍ഗ്രസ് ഉന്നതാധികരസമിതിയഗം ജോസ് കോയിപ്പള്ളി. ചമ്പക്കുളം യുഡിഎഫ് പ്രവര്‍ത്തകര്‍ നടത്തിയ നില്‍പ്പ് സമരം ഉദ്ഘാടനം ചെയ്യകയായിരുന്നു അദ്ദേഹം. മോളി അലക്‌സ്, മാത്തുക്കുട്ടി ജോസഫ്, ആന്‍റോ കെ.സി, കെ. വി. ജോസഫ്, തങ്കച്ചന്‍ വലിയവീട്, ദിലീപ് പുതുശേരി, ബാബുക്കുട്ടി തന്നിയത്, ജോജോ കെ.സി, ലീനാ മാത്യു തുടങ്ങിയവര്‍ സമരത്തിനു നേതൃത്വം നല്‍കി.

വെള്ളം കയറി; റെയില്‍വേ അടിപ്പാതകള്‍ അടച്ചു

തിരുവല്ല: കുറ്റൂര്‍ -മനയ്ക്കച്ചിറ റോഡിലെയും തിരുമൂലപുരം -കറ്റോട് റോഡിലെയും റെയില്‍വേ അടിപ്പാതകളില്‍ വെള്ളം കയറിയതിനെതുടര്‍ന്ന് അടച്ചിട്ട റോഡ് ആഴ്ചകള്‍ കഴിഞ്ഞിട്ടും തുറന്നു കൊടുക്കാനായിട്ടില്ല. നിത്യേന നൂറുകണക്കിന് വാഹനങ്ങള്‍ കടന്നുപോകുന്ന പാതകളില്‍ ഈ വാഹനങ്ങള്‍ കൂടാതെ ടികെ റോഡില്‍ മഞ്ഞാടിയില്‍ നടക്കുന്ന കലുങ്ക് നിര്‍മാണത്തെ തുടര്‍ന്ന് വലിയ വാഹനങ്ങള്‍ ഉള്‍പ്പെടെ തിരിച്ചുവിട്ടിരുന്നതും ഈ റോഡുകളിലൂടെ ആയിരുന്നു. അടിപ്പാതയില്‍ വെള്ളം കയറിയതിനെ തുടര്‍ന്ന ഇതുവഴിയുള്ള ഗതാഗതം റെയില്‍വേ ഗേറ്റിട്ട് നിരോധിച്ചിരിക്കുകയാണ്. മഴ തുടരുന്നതിനാല്‍ അടിപ്പാതയിലെ വെള്ളം കുറഞ്ഞിട്ടില്ല. മോട്ടോര്‍ ഉപയോഗിച്ച് വെള്ളം വറ്റിക്കാന്‍ റെയില്‍വേ തയാറാകാത്തതിനാല്‍ ഇപ്പോഴും ഗേറ്റുകള്‍ അടഞ്ഞു കിടക്കുകയാണ്. നടപ്പാതകളിലൂടെ ഇരുചക്രവാഹനങ്ങള്‍ കടന്നുപോകുന്നുണ്ട്. കുറ്റൂര്‍ റെയില്‍വേ അടിപ്പാതയില്‍ റോഡിന് തെക്കുവശത്തായി വീതി കൂട്ടിയ ഫുട്പാത്തിലൂടെ വലിയ കാറുകള്‍ ഉള്‍പ്പെടെ കടത്തി വിടാനാകുമെങ്കിലും ഈ ഭാഗത്തും രൂക്ഷമായ ഗതാഗതക്കുരുക്കും തര്‍ക്കങ്ങളും പതിവായി മാറിയിരിക്കുകയാണ്. തിരുമൂലപുരം ഇരുവെള്ളിപ്ര റെയില്‍വേ ഗേറ്റും അടഞ്ഞുകിടക്കുകയാണ്. മഞ്ഞാടിയില്‍നിന്ന് ഇതുവഴി എംസി റോഡിലേക്ക് എത്തിക്കൊണ്ടിരുന്ന വാഹനങ്ങള്‍ തിരുവല്ല ടൗണ്‍ ചുറ്റി സഞ്ചരിക്കുയാണ്.

മത്സ്യത്തൊഴിലാളികളെയും തീരദേശവാസികളെയും സർക്കാർ ദുരിതത്തിലാക്കുന്നു: മഹിളാ കോൺഗ്രസ്

ആലപ്പുഴ: സംസ്ഥാനത്തിന്‍റെ സൈന്യം എന്ന് വിശേഷിപ്പിക്കപ്പെട്ട മത്സ്യത്തൊഴിലാളികളെയും തീരദേശവാസികളെയും പിണറായി സർക്കാർ ദുരിതത്തിൽ മുക്കിക്കൊല്ലുകയാണെന്ന് മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എം പി. മഹിള സാഹസ് കേരള യാത്രയ്ക്ക് അരൂർ, എഴുപുന്ന, കോടം തുരുത്ത്, കുത്തിയതോട്, തുറവൂർ അരൂക്കുറ്റി, പെരുമ്പളം, പാണാവള്ളി, തൈക്കാട്ടുശേരി, പള്ളിപ്പുറം എന്നിവിടങ്ങളിലെ സ്വീകരണ യോഗങ്ങളിൽ പ്രസംഗി ക്കുകയായിരുന്നു അവർ. തീരദേശം മുഴുവൻ കടലാക്രമണ ഭീഷണിയിലകപ്പെട്ടിട്ടും സർക്കാർ മത്സ്യത്തൊഴിലാളികൾക്കും തീരദേശവാസികൾക്കും യാതൊരു സഹായവും നൽകുന്നില്ല. ദുരിതമനുഭവിക്കുന്ന മത്സ്യത്തൊഴിലാളികളെ ആശ്വസിപ്പിക്കാൻ മുഖ്യമന്ത്രിയോ വകുപ്പു മന്ത്രിയോ പോകാത്തത് ദുഃഖകരമാണ്. കടലാക്രമണത്തിൽ വീടും വഞ്ചിയും വള്ളവും നഷ്ടപ്പെട്ടവർക്ക് സഹായം നൽകണം. സൗജന്യ റേഷൻ, ധനസഹായം, പ്രത്യേക പാക്കേജ് എന്നിവ ഉടൻ നടപ്പിൽ വരുത്തണമെന്നും അവർ ആവശ്യപ്പെട്ടു. രാഷ്‌ട്രീയകാര്യസമിതിയംഗം ഷാനിമോൾ ഉസ്മാൻ, കെപിസിസി വൈസ് പ്രസിഡന്‍റ് വി. പി. സജീന്ദ്രൻ, കെപിസിസി ജനറൽ സെക്രട്ടറി എ.എ. ഷുക്കൂർ, കെപിസിസി ജനറൽ സെക്രട്ടറി എം. ജെ. ജേക്കബ്, സെക്രട്ടറി എസ്. ശരത് എന്നിവർ വിവിധ സ്വീകരണ സമ്മേളനങ്ങൾ ഉദ്ഘാടനം ചെയ്തു. ജില്ലയിൽ ഇന്നലെ ആരംഭിച്ച യാത്ര 138 മണ്ഡലങ്ങളിൽ പര്യടനം പൂർത്തിയാക്കി 30ന് ചെങ്ങന്നൂരിൽ സമാപിക്കും.

അനൂപിന്‍റെ വീട് എന്ന സ്വപ്നം സഫലമാക്കി മാവേലിക്കര എംവിഡി

മാവേലിക്കര: ഉപജീവനമാർഗമായി ലോട്ടറി വ്യാപാരം നടത്തുന്ന ഭിന്നശേഷി യുവാവ് അനൂപിന്‍റെ സ്വന്തമായ ഒരു വീട് എന്ന സ്വപ്നം പൂവണിയുന്നു. എല്ലുകൾ പൊടിയുന്ന അപൂർവ രോഗം ബാധിച്ച അനൂപ് ഇലക്‌ട്രിക് വീൽചെയറിൽ മാവേലിക്കര ആർടി ഓഫീസിലും പരിസരത്തും ലോട്ടറി വില്പന നടത്തിയാണ് ഉപജീവനമാർഗം കണ്ടെത്തുന്നത്. അതോടൊപ്പം ആർടി ഓഫീസിൽ എത്തുന്ന പൊതുജനങ്ങൾക്ക് റോഡ് സുരക്ഷാ സന്ദേശം നൽകുന്നതിലൂടെ അനൂപ് ശ്രദ്ധേയനായിരുന്നു. അനൂപിന്‍റെ നിസഹായാവസ്ഥ മനസിലാക്കിയ മാവേലിക്കര ജോയിന്‍റ് ആർടിഒയും ഉദ്യോഗസ്ഥരും മുൻകൈയെടുത്ത് വിവിധ സംഘടനകൾവഴി അനൂപിന്‍റെ ഇലക്‌ട്രിക് വീൽചെയറിന് റെയിൻ ഷീൽഡ്, പുതിയ ടയറുകൾ എന്നിവ നൽകിയിരുന്നു. ഗതാഗത മന്ത്രി ഗണേഷ് കുമാർ മാവേലിക്കരയിൽ എത്തിയപ്പോൾ അനൂപിനെ കാണുകയും ലോട്ടറി റാക്ക് സമ്മാനിക്കുകയും ചെയ്തിരുന്നു. ചെറിയൊരു വാടകവീട്ടിൽ ഒരുപാട് യാതനകൾ സഹിച്ചാണ് അനൂപ് ജീവിതം തള്ളിനീക്കിയിരുന്നത്. വെള്ളക്കെട്ട് നിറഞ്ഞ ഇടുങ്ങിയ വഴിയിലൂടെയാണ് അനൂപ് വീട്ടിലേക്ക് പൊയ്ക്കൊണ്ടിരുന്നത്. മഴപെയ്താൽ വെള്ളത്തിൽ മുങ്ങിയിരുന്ന വഴി ആയതിനാൽ ആഴ്ചകളോളം യാതൊരു വരുമാനവും ഇല്ലാതെ വീട്ടിൽ ഇരിക്കേണ്ട സ്ഥിതിയായിരുന്നു. അനൂപിന്‍റെ ദുരവസ്ഥ ജോയിന്‍റ് ആർടിഒയുടെയും ഉദ്യോഗസ്ഥരുടെയും കണ്ണിൽപ്പെട്ടു. അനൂപിന് സ്വന്തമായൊരു വീട് എന്ന സ്വപ്നം സാക്ഷാത്കരിക്കാൻ ശ്രമങ്ങൾ തുടങ്ങി. അനൂപിന്‍റെ കഥയറിഞ്ഞ് സുമനസുകൾ വസ്തുവും വീട് നിർമിക്കാൻ സഹായവും വാഗ്ദാനം ചെയ്തു. കട്ടച്ചിറ ജോൺ എഫ്. കെന്നഡി മെമ്മോറിയൽ സ്കൂൾ മാനേജ്മെന്‍റും അധ്യാപകരും കുട്ടികളും ചേർന്ന് വസ്തുവിനുള്ള പണം സ്വരൂപിച്ചു. പാലക്കാട് ഒറ്റപ്പാലത്തുള്ള ചാരിറ്റബിൾ ഓർഗനൈസേഷൻ സിഎംഎൻ ട്രസ്റ്റ് വീട് നിർമിച്ചു നൽകാമെന്ന് ഉറപ്പു നൽകി. കരുനാഗപ്പള്ളിയിലെ ഗ്രാൻഡ് ടെക് ബിൽഡേഴ്സ് വീടിന്‍റെ നിർമാണച്ചുമതല ഏറ്റെടുത്തതോടെ അനൂപിന്‍റെ സ്വപ്നം പൂവണിയുകയായി. ജൂലൈ ആദ്യവാരം വീടിന്‍റെ നിർമാണപ്രവർത്തനങ്ങൾ ആരംഭിക്കുമെന്ന് മാവേലിക്കര ജോയിന്‍റ് ആർടിഒ എം.ജി. മനോജ് അറിയിച്ചു. അനൂപിന്‍റെ സ്വപ്നം സാക്ഷാത്കരിക്കാൻ സുമനസുകൾ കഴിയുന്ന സേവനങ്ങൾ ചെയ്യണമെന്നും അദ്ദേഹം കൂട്ടിച്ചേർത്തു.

കുട്ടനാട്ടില്‍ ജീവിതം വഴിമുട്ടി

എടത്വ: മഴയുടെ ശക്തി കുറഞ്ഞതോടെ കുട്ടനാട്ടില്‍ ജലനിരപ്പ് താഴ്ന്നുതുടങ്ങി. എന്നാൽ വെള്ളക്കെട്ടില്‍ പൊറുതിമുട്ടിയിരിക്കുകയാണ് കുട്ടനാടന്‍ ജനത. നിനച്ചിരിക്കാതെ രണ്ടാമതുമെത്തിയ ശക്തമായ മഴയിലും കിഴക്കന്‍ വെള്ളത്തിന്‍റെ വരവിലും കുട്ടനാട് വീണ്ടും മുങ്ങി. ദുരിതബാധിതരായ കുട്ടനാടന്‍ ജനതയുടെ ദൈനംദിന ജീവിതം വഴിമുട്ടിയ അവസ്ഥയിലാണ്. കുട്ടനാട്ടിലെ നാമമാത്ര പ്രദേശങ്ങള്‍ ഒഴിച്ചാല്‍ ഒട്ടുമിക്ക സ്ഥലങ്ങളും വെള്ളക്കെട്ടിലാണ്. വാഹന ഗതാഗതം നിലച്ചിരിക്കുകയാണ്. വീയപുരം-എടത്വ, നീരേറ്റുപുറം-മുട്ടാര്‍-കിടങ്ങറ റോഡുകള്‍ വെള്ളത്തില്‍ മുങ്ങിയതോടെ കെഎസ്ആര്‍ടിസി സര്‍വീസുകള്‍ നിര്‍ത്തി. ചെറുവാഹനങ്ങളുട സര്‍വീസുകള്‍ നിലച്ചിട്ട് ദിവസങ്ങള്‍ പിന്നിടുന്നു. വീടുകളില്‍ വെള്ളം കയറിയെങ്കിലും ദുരിതാശ്വാസ ക്യാമ്പുകള്‍ ഇക്കുറി ആരംഭിച്ചില്ല. കുട്ടനാട്ടിലെ നിര്‍മാണമേഖലകള്‍ ഉള്‍പ്പെടെയുള്ള തൊഴില്‍മേഖലകള്‍ വെള്ളപ്പൊക്കത്തത്തുടര്‍ന്ന് അടഞ്ഞതോടെ സാധാരണക്കാരുടെ ജീവിതം വഴിമുട്ടിയിരി ക്കുകയാണ്. ദുരിത മേഖലകളില്‍ ഭക്ഷണം എത്തിക്കുന്നതിനോ കഞ്ഞിവീഴ്ത്തല്‍ കേന്ദ്രങ്ങള്‍ ആരംഭിക്കുന്നതിനോ സര്‍ക്കാര്‍തലത്തില്‍ യാതൊരു നടപടിയും സ്വീകരിക്കുന്നില്ല. നിരന്തരമായ വെള്ളപ്പൊക്കത്തെ പ്രതിരോധിക്കാന്‍ കഴിയാതെ എല്ലാം ഇട്ടെറിഞ്ഞ് ബന്ധുവീടുകളില്‍ അഭയം തേടുന്നവരാണ് കുട്ടനാട്ടില്‍ അധികവും. നിരന്തര വെള്ളപ്പൊക്കം മൂലം ക്ഷീരകര്‍ഷകരും തൊഴിലില്‍നിന്ന് പിന്‍മാറുന്ന സാഹചര്യമാണ്. നാല്‍ക്കാലികളെ സംരക്ഷിക്കാന്‍ യാതൊരു സംവിധാനവും ഇല്ലാത്തതിനാല്‍ വിറ്റു കാശാക്കുകയാണ് കര്‍ഷകര്‍. പാടശേഖര താമസക്കാരും കടുത്ത പ്രതിസന്ധിയാണ് നേരിടുന്നത്. ചില പാടശേഖരങ്ങള്‍ വെള്ളത്തില്‍ മുങ്ങിയാല്‍ അടുത്ത കൃഷിക്ക് പമ്പിംഗ് ആരംഭിക്കുന്നതുവരെ പ്രദേശവാസികള്‍ വെള്ളത്തിലാകും. പാടശേഖര പുറംബണ്ടുകള്‍ ബലപ്പെടുത്തിയും ജലാശയങ്ങള്‍ ആഴംകൂട്ടിയും വെള്ളപ്പൊക്കത്തെ ഒരു പരിധിവരെ പ്രതിരോധിക്കാമെന്നിരിക്കെ വകുപ്പു തലത്തില്‍ കുട്ടനാട്ടുകാരെ സഹായിക്കാന്‍ യാതൊരു സംവിധാനവും ഏര്‍പ്പെടുത്തുന്നില്ല. ഇക്കുറി കുട്ടനാട്ടില്‍നിന്ന് വെള്ളം ഒഴുകിപ്പോകാന്‍ താമസിക്കുന്നതും ദുരിതം ഇരട്ടിച്ചിട്ടുണ്ട്. ഒരാഴ്ചയായി ഇതേ ദുരിതം അനുഭവിക്കുകയാണ്. തോട്ടപ്പള്ളി സ്പില്‍വേ വഴി കടലിലേക്കുള്ള ഒഴുക്ക് കുറഞ്ഞിട്ടുണ്ട്. പൊഴിയില്‍ മണ്ണടിഞ്ഞ് ഒഴുക്ക് തടസപ്പെടുന്നതാണ് കുട്ടനാട്ടിലെ ജലനിരപ്പിന് കാര്യമായ മാറ്റം സംഭവിക്കാത്തതെന്ന് ആരോപണമുണ്ട്.

ദേശീയപാതയിൽ മൂന്നു കോടിയുടെ കവർച്ച: രണ്ടു പേർ പിടിയിൽ

കായംകുളം: ദേശീയപാതയിൽ ചേപ്പാട് സിനിമാ സ്‌റ്റൈലിൽ മൂന്നുകോടി തട്ടിയെടുത്ത സംഭവത്തിൽ രണ്ടു പേർ പിടിയിൽ.തമിഴ്നാട് തിരുപ്പൂർ സ്വദേശികളായ രണ്ടു പേരെയാണ് സിസിടിവി കേന്ദ്രീകരിച്ച് നടത്തിയ അന്വേഷണത്തിനൊടുവിൽ പിടികൂടിയത്. ഇവർ നിരവധി തട്ടിപ്പ്, കവർച്ച ക്വട്ടേഷൻ ആക്രമണ കേസുകളിലെ പ്രതികളാണന്നു പോലീസ് കണ്ടെത്തി. പ്രതികളെ കായംകുളം ഡിവൈഎസ്പി ബാബുക്കുട്ടന്‍റെ നേതൃത്വത്തിലുള്ള പോലീസ് സംഘം ചോദ്യംചെയ്തു വരികയാണ്. കഴിഞ്ഞയാഴ്ചയാണ് കോയമ്പത്തൂരിൽനിന്ന് കൊല്ലത്തേക്ക് പാഴ്സൽ ലോറിയിൽ കൊണ്ടുപോയ മൂന്നു കോടിയോളം രൂപ രണ്ടു കാറുകളിലായെത്തിയ സംഘം തട്ടിയെടുത്തത്. ചേപ്പാട് രാമപുരത്ത് കഴിഞ്ഞയാഴ്ച പുലർച്ചെ നാലിനായിരുന്നു സംഭവം. ലോറിക്കു കുറുകെ കാർ നിർത്തിയ സംഘം ഡ്രൈവറെ ആക്രമിച്ച ശേഷമാണ് പണം തട്ടിയെടുത്തത്. ഇവർ രക്ഷപ്പെട്ടതിനു ശേഷം ഡ്രൈവർ ലോറിയുമായി കൊല്ലത്തെത്തി പണം ഏറ്റുവാങ്ങാനിരുന്ന കൊല്ലത്തെ ജ്വല്ലറി ഉടമയെ വിവരം അറിയിച്ചു. ഇയാൾ കരീലക്കുളങ്ങര പോലീസിൽ പരാതി നൽകിയതോടെയാണ് സംഭവം പുറംലോകമറിഞ്ഞത്. കരീലക്കുളങ്ങര പോലീസും ജില്ലാ പോലീസ് മേധാവിയുടെ സ്ക്വാഡ് ഉൾപ്പെടെയുള്ള സംഘവും പണം തട്ടിയെടുത്ത സംഘത്തക്കുറിച്ച് അന്വേഷണം നടത്തിയെങ്കിലും സൂചനയൊന്നും ലഭിച്ചില്ല. കോയമ്പത്തൂർ സ്വദേശിയായ ഡ്രൈവറെ പോലീസ് ചോദ്യം ചെയ്തെങ്കിലും ഇയാളിൽനിന്നു ലഭിച്ച വിവരങ്ങൾ പൂർണമായി വിശ്വാസത്തിലെടുക്കാതെയാണ് അന്വേഷണം നടത്തിയത്. പാഴ്സലിൽ പണമാണെന്ന് ഡ്രൈവർക്ക് നേരത്തേ അറിയാമായിരുന്നോ എന്നതടക്കമുള്ള വിശദാംശങ്ങളും പോലീസ് പരിശോധിച്ചു. കൊല്ലത്തെ വ്യാപാരി കോയമ്പത്തൂരിൽ സ്വർണ വ്യാപാരവുമായി ബന്ധമുള്ളവരുമായി നടത്തിയ ഇടപാടിന്‍റെ ഭാഗമായാണ് അവിടെനിന്ന് പാഴ്സൽ എന്ന വ്യാജേന ചാക്കിൽ പണം അയച്ചതെന്നാണ് പോലീസിന്‍റെ നിഗമനം. സംഭവസ്ഥലത്തെ സിസിടിവി ദൃശ്യങ്ങൾ പോലീസ് പരിശോധിച്ചതിൽനിന്നു ലഭിച്ച നിർണായക വിവരങ്ങളുടെ അടിസ്ഥാനത്തിലാണ് രണ്ട് പ്രതികൾ വലയിലായത്.

ആശാൻ കലുങ്ക്-മാവിളപ്പടി റോഡിൽ ഒരാഴ്ചയ്ക്കിടെ നാല് അപകടം

ചാരുംമൂട്: നിർമാണം നടന്നുവരുന്ന പാലമേൽ ആശാൻ കലുങ്ക് - മാവിളപ്പടി റോഡിൽ അപകടങ്ങൾ വർധിച്ചു. ഒരാഴ്ചയ്ക്കിടെ നടന്നത് നാല് അപകടങ്ങളാണ്. കഴിഞ്ഞ ദിവസം കോടംപറമ്പ് ഗുരുമന്ദിരത്തിനു സമീപത്തെ ചപ്പാത്തിൽ കഴിഞ്ഞദിവസം രാത്രി നിയന്ത്രണം വിട്ട സ്‌കൂട്ടർ മറിഞ്ഞ് ഒരാൾക്ക് ഗുരുതര പരിക്കേറ്റിരുന്നു. അടൂർ പഴകുളം ബിന്ദു ഭവനത്തിൽ ബിനു (48) ഗുരുതര പരിക്കുകളോടെ ആശുപത്രിയിലാണ്. ശക്തമായ കാറ്റും മഴയും ഉണ്ടായിരുന്നതിനാൽ റോഡിലെ വെള്ളം നിറഞ്ഞു കിടന്ന ചപ്പാത്തിൽ സ്‌കൂട്ടർ മറിയുകയായിരുന്നു. സമീപവാസികളാണ് ഇയാളെ ഉടൻ ആശുപത്രിയിൽ എത്തിച്ചത്. അശാസ്ത്രീയ റോഡ് നിർമാണം ഈ ഭാഗത്ത് മുന്നറിയിപ്പു ബോർഡുകളോ അപായസൂചനയോ ഇല്ല. റോഡിന്‍റെ നിർമാണം തുടങ്ങിയനാൾ മുതൽ അശാസ്ത്രീയമായ റോഡ് നിർമാണത്തിനെതിരേ റോഡിനെക്കുറിച്ചുള്ള ആക്ഷേപങ്ങളും ഉയർന്നിരുന്നു. കഴിഞ്ഞ ദിവസം മറ്റപ്പള്ളി നല്ലവീട്ടിൽ രാജൻ (71) വെറ്റിലയുമായി പന്തളം ചന്തയിലേക്ക് സ്‌കൂട്ടറിൽ പോകുന്നതിനിടെ റോഡിൽ തെന്നി വീണ് കൈകാലുകൾ ഒടിഞ്ഞു. പ്രധാനമന്ത്രി ഗ്രാമീണ സഡക് യോജന പദ്ധതിയിൽപ്പെടുത്തി 4.80 കോടി രൂപ മുടക്കി റോഡു നിർമാണം ആരംഭിച്ചിട്ട് ഒന്നര വർഷമായെങ്കിലും കരാറുകാരൻ വേഗത്തിൽ നിർമാണം നടത്തുന്നില്ലെന്ന പരാതിയുണ്ട്. ഒത്തുകളി മാവിളപ്പടി - ആശാൻ കലുങ്ക്, മാമ്മൂട്-പയ്യനല്ലൂർ എന്നീ റോഡുകളാണ് നിർമാണത്തിലുള്ളത്. ഇതിൽ ഒന്നാം സെ‌ക‌്ഷൻ മാവിളപ്പടി ആശാൻ കലുങ്ക് റോഡിന്‍റെ ടാറിംഗ് ഏറെക്കുറെ പൂർത്തിയാക്കി. മാമ്മൂട് - പയ്യനല്ലൂർ റോഡിന്‍റെ നിർമാണം ഇപ്പോൾ നടക്കുന്നില്ല. ഇതുവഴി യാത്ര ചെയ്യുന്നവർ ദുരിതത്തിലാണ്. അശാസ്ത്രീയമായ റോഡുനിർമാണത്തിൽ കരാറുകാരനും ഉദ്യോഗസ്ഥരും ഒത്തുകളിക്കുകയാണെന്നും ജില്ലാ കളക്ടർ അടിയന്തരമായി ഇടപെടണമെന്നും നാട്ടുകാർ ആവശ്യപ്പെട്ടു. നിർ മാണം പൂർത്തിയായ സ്ഥലത്ത് ഒരു മാസം തികയുംമുമ്പേ ടാറിംഗ് ഇളകിയത് നാട്ടുകാരുടെ പ്രതിഷേധത്തിന് ഇടയാക്കിയിരുന്നു.

കായിപ്പുറം-പൂജവെളി റോഡ് തകർന്നു; നാട്ടുകാർ ദുരിതത്തിൽ

മുഹമ്മ: മുഹമ്മ പഞ്ചായത്ത് മൂന്നാം വാർഡിലെ പൂജവെളി മഹാവിഷ്ണു ക്ഷേത്രം - കായിപ്പുറം അനന്തശയനേശ്വര ക്ഷേത്രം റോഡ് നാട്ടുകാരുടെ നടുവൊടിക്കുന്നു. പത്തു വർഷത്തിലധികമായി തകർന്നു കിടക്കുന്ന റോഡിലൂടെ സ്കൂൾ കുട്ടികൾ ഉൾപ്പെടെ നൂറുകണക്കിനാളുകളാണ് ദിവസവും സഞ്ചരിക്കുന്നത്. കുണ്ടും കുഴിയും നിറഞ്ഞ റോഡിൽ വിദ്യാർഥികൾ അപകടത്തിൽപ്പെടുന്നതായുള്ള പരാതികൾ വർധിക്കുകയാണെങ്കിലും നടപടി കടലാസിലാണ്. മഴ കനത്തതോടെ ക്ഷേത്രങ്ങളിലേക്കും സിഎംഎസ് എൽപി സ്കൂളിലേക്കുമുള്ളവർ റോഡിലൂടെ നീന്തിയാണ് സഞ്ചരിക്കുന്നത്. പല ഭാഗങ്ങളും കുളം പോലെയാണ്. മത്സ്യ - കയർ മേഖലകളുമായി ബന്ധപ്പെട്ട വാഹനങ്ങളും മേഖലയിൽ എത്താനാവാതെ വിഷമിക്കുന്നു. ഒന്നര കിലോമീറ്ററുള്ള റോഡ് ഇരുളിലായിരുന്നു. നാട്ടുകാരുടെ പരാതി ഏറിയതിനെത്തുടർന്ന് കഴിഞ്ഞയിടെയാണ് ലൈറ്റുകൾ സ്ഥാപിച്ചത്. റോഡുപണി നടത്തിയില്ലെങ്കിൽ സമരം തുടങ്ങുമെന്ന് നാട്ടുകാർ പറയുന്നു.

കൗൺസിൽ മിനിറ്റ്സിലെ തിരുത്തൽ: നഗരസഭ മുൻ ചെയർപേഴ്സൺ കോടതിയിൽ കീഴടങ്ങി

ചെങ്ങന്നൂർ: ചെങ്ങന്നൂർ നഗരസഭയുടെ മുൻ യുഡിഎഫ് ചെയർപേഴ്സണും 27-ാം വാർഡ് കോൺഗ്രസ് അംഗവുമായ മറിയാമ്മ ജോൺ ഫിലിപ്പ്, കൗൺസിലിന്‍റെ മിനിറ്റ്സ് വ്യാജമായി നിർമിച്ച കേസിൽ ചെങ്ങന്നൂർ ജുഡീഷൽ ഫസ്റ്റ് ക്ലാസ് മജിസ്ട്രേട്ട് കോടതിയിൽ കീഴടങ്ങി. ഔദ്യോഗിക രേഖകൾ വ്യാജമായി നിർമിച്ചു എന്ന് കാണിച്ച് അന്നത്തെ നഗരസഭാ സെക്രട്ടറിയായിരുന്ന സ്റ്റാലിൻ നാരായണൻ നൽകിയ സ്വകാര്യ അന്യായത്തിലാണ് ക്രിമിനൽ നടപടി സ്വീകരിച്ചത്. കേസിനാസ്പദമായ സംഭവം നഗരസഭയുടെ ഉടമസ്ഥതയിലുള്ള ശാസ്താംപുറം മാർക്കറ്റ് ഷോപ്പിംഗ് കോംപ്ലക്സിലെ കടമുറികളിൽ നടന്ന അനധികൃത നിർമാണവുമായി ബന്ധപ്പെട്ടാണ്. നഗരസഭാ യുഡിഎഫ് അംഗവും കേരള കോൺഗ്രസ് ജോസഫ് വിഭാഗം സംസ്ഥാന നേതാവുമായ രാജൻ കണ്ണാട്ടിന്‍റെ മകൻ മാത്യു കെ. തോമസ് ലൈസൻസിയായ കടമുറികളിലാണ് പ്രശ്നങ്ങൾ ഉടലെടുത്തത്. കടമുറികളിലെ ഇന്‍റീരിയർ ജോലികൾ ചെയ്യുന്നതിനെന്ന പേരിൽ മാത്യു കെ. തോമസ് നഗരസഭയിൽ അപേക്ഷ നൽകിയിരുന്നു. എന്നാൽ, അപേക്ഷയ്ക്ക് വിരുദ്ധമായി മുറികളുടെ ഘടനതന്നെ മാറ്റുന്നു എന്ന പരാതി ലഭിച്ചു. ഇതേത്തുടർന്ന്, 2021 മാർച്ച് 31ന് ചേർന്ന കൗൺസിൽ യോഗത്തിൽ എൽഡിഎഫ്, ബിജെപി അംഗങ്ങൾ പ്രതിഷേധമുയർത്തി. വിഷയത്തിൽ റിപ്പോർട്ട് നൽകുന്നതിനായി എൻജിനിയറിംഗ് വിഭാഗം ഉദ്യോഗസ്ഥരും കൗൺസിൽ അംഗങ്ങളും അടങ്ങുന്ന ഒൻപതംഗ സബ് കമ്മിറ്റി രൂപീകരിച്ചു. നഗരസഭയ്ക്ക് നൽകിയ അപേക്ഷയ്ക്ക് വിരുദ്ധമായി അനധികൃത നിർമാണം നടന്നതായി സബ് കമ്മിറ്റി കണ്ടെത്തി. ഈ റിപ്പോർട്ട് ലഭിക്കുന്നതിനു മുൻപ്, മാത്യു കെ. തോമസിന് അനുകൂലമായി കൗൺസിൽ മിനിറ്റ്സ് തിരുത്തുന്നതിന് ചെയർപേഴ്സൺ സെക്രട്ടറിയോട് ആവശ്യപ്പെട്ടു. എന്നാൽ, സെക്രട്ടറി ഇതിനെ എതിർത്തു. തുടർന്ന്, കൗൺസിൽ നടപടികൾക്കുള്ള മിനിറ്റ്സ് തിരുത്തുകയും മിനിറ്റ്സ് തയാറാക്കുന്ന ഔദ്യോഗിക സോഫ്റ്റ്‌വെയർ ഉപയോഗിക്കാതെ നിയമവിരുദ്ധമായ മിനിറ്റ്സ് നൽകാൻ ഉത്തരവിടുകയും ചെയ്തു എന്നാണ് കേസ്. നേരത്തേ കോടതിയിൽ ഹാജരാകാൻ നിർദേശിച്ചെങ്കിലും മറിയാമ്മ ജോൺ ഹാജരാകാതിരുന്നതിനെത്തുടർന്നാണ് വാറണ്ട് പുറപ്പെടുവിച്ചത്. ഇതേത്തുടർന്നാണ് ഇന്നലെ അവർ ചെങ്ങന്നൂർ ജുഡീഷൽ ഫസ്റ്റ് ക്ലാസ് മജിസ്ട്രേട്ട് കോടതിയിൽ കീഴടങ്ങിയത്.

സുവർണതൂലിക പുരസ്‌കാരം ഉണ്ണിക്കൃഷ്ണൻ മുതുകുളത്തിന്

ഹരിപ്പാട്: മികച്ച നാടകരചനയ്ക്കുള്ള സുവർണതൂലിക പുരസ്‌കാരം ഉണ്ണിക്കൃഷ്ണൻ മുതുകുളം രചിച്ച നീലാംബരിക്ക് ലഭിച്ചു. പുലിറ്റ്സർ ബുക്സ് ആണ് ഈ നാടകംപ്രസിദ്ധീകരിച്ചത്. കവിയുംഎഴുത്തുകാരനുമായ ഉണ്ണിക്കൃഷ്ണൻ മുതുകുളം, കാവ്യസമാഹാരങ്ങൾ, നോവൽ, പഠനം, ബാലസാഹിത്യം, ഫോക്‌ലോർ, നാടകം എന്നീ മേഖലകളിൽ ഇരുപത്തിയൊന്നു കൃതികളുടെ രചയിതാവാണ്. അടു ത്തമാസം കൊല്ലത്തു നടക്കുന്ന സമ്മേളനത്തിൽ പുരസ്‌കാരം സമ്മാനിക്കും.

ബന്ദിപ്പൂവ്, വാടാമല്ലി കൃഷി ആരംഭിച്ചു

ചെങ്ങന്നൂർ: ഓണം ലക്ഷ്യമിട്ട് ചെങ്ങന്നൂർ നഗരസഭയുടെ ഒമ്പതാം വാർഡിൽ ബന്ദിപ്പൂവും വാടാമല്ലി കൃഷിയും ആരംഭിച്ചു. ഇടനാട് വെൽനസ് സെന്‍ററിനും ഇടനാട് ജെബി സ്കൂളിനും സമീപമുള്ള ഒരേക്കർ സ്ഥലത്താണ് തൊഴിലുറപ്പ് പദ്ധതിയുടെ കീഴിൽ പൂക്കൃഷി നടത്തുന്നത്. നഗരസഭാ ചെയർപേഴ്സൺ അഡ്വ. ശോഭ വർഗീസ് തൊഴിലുറപ്പ് തൊഴിലാളികൾക്ക് ബന്ദിപ്പൂ തൈകൾ കൈമാറി പദ്ധതി ഉദ്ഘാടനം ചെയ്തു. വൈസ് ചെയർമാൻ കെ. ഷിബുരാജൻ അധ്യക്ഷനായി.

മിഷൻ ചൈതന്യം പ്രസരിപ്പിക്കുന്നവരായി മിഷൻലീഗ് അംഗങ്ങൾ മാറണം: മാർ ജോസഫ് പെരുന്തോട്ടം

ആലപ്പുഴ: മിഷൻ ചൈതന്യം പ്രസരിപ്പിക്കുന്നവരായി മിഷൻ ലീഗ് അംഗങ്ങൾ മാറണമെന്ന് ആർച്ച് ബിഷപ് മാർ ജോസഫ് പെരുന്തോട്ടം. ആലപ്പുഴ മേഖല ചെറുപുഷ്പ മിഷൻ ലീഗ് പ്രവർത്തനവർഷം ഉദ്ഘാടനവും പുതിയ ഭാരവാഹികളുടെ സത്യപ്രതിജ്ഞയും ഈ വർഷം വിശുദ്ധ കുർബാന സ്വീകരിച്ച കുട്ടികളുടെ സംഗമമായ എയ്ഞ്ചൽസ് മീറ്റും ഉന്നതവിജയം കരസ്ഥമാക്കിയ മിഷൻ ലീഗ് പ്രവർത്തകർക്ക് അനുമോദനവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചെറുപുഷ്പ മിഷൻലീഗിലൂടെ അനേകം വൈദികരെയും സന്യാസിനികളെയും മിഷൻ ചൈതന്യമുള്ള അനേകം അല്മായ മിഷനറിമാരെയും സഭയ്ക്കും സമൂഹത്തിനും നൽകാൻ കഴിഞ്ഞിട്ടുണ്ടെന്ന് അദ്ദേഹം പ്രസ്താവിച്ചു. പഴവങ്ങാടി മാർ സ്ലീവ ഫൊറോന പള്ളിയിൽ നടന്ന പരിപാടിയിൽ മിഷൻ ലീഗ് ആലപ്പുഴ മേഖല പ്രസിഡന്‍റ് മാസ്റ്റർ ആഞ്ചലോ മൈക്കിൾ അധ്യക്ഷത വഹിച്ചു. പുതിയ വർഷത്തെ മാർഗരേഖ മാർ ജോസഫ് പെരുന്തോട്ടം ഫൊറോന വികാരി ഫാ.മാത്യു നടമുഖത്തിന് നൽകി പ്രകാശനം ചെയ്തു. ഫാ.മാത്യു നടമുഖത്ത് അനുഗ്രഹ പ്രഭാഷണം നടത്തി. അതിരൂപത ഓർഗനൈസിംഗ് സെക്രട്ടറി എബിൻ ജോസഫ്, മുൻ മേഖലാ ഓർഗനൈസിംഗ് പ്രസിഡന്‍റ് ജെറിൻ ജോസഫ്, ഫാ.യോഹന്നാൻ കട്ടത്തറ, ഫാ.സെബാസ്റ്റ്യൻ മാമ്പ്ര, സി.മെറിൻ മൂന്നാറ്റും മുഖം, സിറിയക് തലച്ചെല്ലൂർ, സ്റ്റെഫിൻ ചാക്കോ തുടങ്ങിയവർ പ്രസംഗിച്ചു.

റോഡും തോടും തിരിച്ചറിയാതെ പാരേത്തോട്-വട്ടടി റോഡ്

എടത്വ: വെള്ളം ഉയര്‍ന്നാല്‍ ഉടന്‍ റോഡ് തോടായി മാറും. പാരേത്തോട്-വട്ടടി റോഡില്‍ യാത്ര ദുഷ്‌കരം. പ്രധാനമന്ത്രി ഗ്രാമീണ സഡക്ക് യോജന പദ്ധതി പ്രകാരം നിര്‍മിച്ച പാരേത്തോട്-വട്ടടി റോഡാണ് വെള്ളത്തില്‍ മുങ്ങുന്നത്. അടിക്കടിയുണ്ടാവുന്ന വെള്ളക്കെട്ടുമൂലം തലവടി തെക്ക് ഭാഗത്തുള്ളവര്‍ക്ക് എടത്വ-ആലംതുരുത്തി റോഡിലും എടത്വ-പൊടിയാടി റോഡിലും എത്താന്‍ സാധിക്കാതായിരിക്കുകയാണ്. തലവടി ഹയര്‍ സെക്കൻഡറി സ്‌കൂളിലെ നിരവധി വിദ്യാര്‍ഥികള്‍ ഈ റോഡിനെയാണ് ആശ്രയിക്കുന്നത്. മറ്റു സ്ഥലങ്ങളില്‍ വെള്ളം ഇറങ്ങിയാലും ഇവിടെനിന്ന് വെള്ളം ഇറങ്ങാറില്ല. മാത്രമല്ല റോഡിന്‍റെ ഒരു വശം തോടായതിനാല്‍ റോഡും തോടും തിരിച്ചറിയാത്ത അവസ്ഥയുമാണ്. റോഡിന്‍റെ വശങ്ങള്‍ ഇടിഞ്ഞ് അപകടം ഒഴിവാക്കാന്‍ അധികൃതര്‍ നടപടി സ്വീകരിക്കണമെന്ന് പൊതു പ്രവര്‍ത്തകന്‍ ഡോ. ജോണ്‍സണ്‍ വി. ഇടിക്കുള ആവശ്യപ്പെട്ടു.

ആരോഗ്യ ബോധവത്കരണ കാമ്പയിൻ സമാപിച്ചു

അമ്പലപ്പുഴ: പുന്നപ്ര തെക്ക് പഞ്ചായത്തും കുടുംബാരോഗ്യ കേന്ദ്രവും സംയുക്തമായി സംഘടിപ്പിച്ച ആരോഗ്യ ബോധവത്കരണ കാമ്പയിൻ സമാപിച്ചു. പഞ്ചായത്തിലെ മുഴുവൻ സ്കൂളുകളിലേയും വിദ്യാർഥികളെ പങ്കെടുപ്പിച്ച് ‘മുളയിലെ നുള്ളാം ജീവിതശൈലി രോഗങ്ങളെ സുഖകരമാക്കാം ഭാവി ജീവിതത്തെ’ എന്ന പേരിൽ നടത്തിയ കാമ്പയിന്‍റെ സമാപനം എച്ച്.സലാം എം എൽ എ ഉദ്ഘാടനം ചെയ്തു. പുന്നപ്ര ഗവ. ജെ.ബി സ്കൂൾ ഓഡിറ്റോറിയത്തിൽ സംഘടിപ്പിച്ച പരിപാടിയിൽ പ്രസിഡന്‍റ് പി. ജി. സൈസ് അധ്യക്ഷനായി.

കിന്‍ഡര്‍ ആശുപത്രിയില്‍ യോഗ ദിനാചരണം

ചേർത്തല: കിൻഡർ ആശുപത്രിയുടെ നേതൃത്യത്തിൽ അന്താരാഷ്ട്ര യോഗദിനത്തോടനുബന്ധിച്ച് ഗർഭിണികൾക്കായുള്ള പ്രിനറ്റൽ യോഗ ക്ലബ്ബിന്‍റെ ഉദ്ഘാടനവും യോഗാദിനാചരണവും യോഗ കോ-ഓർഡിനേറ്റർ ഡോ. നിമ്മി അലക്സാണ്ടർ നിര്‍വഹിച്ചു. രോഗികളുടെ ശാരീരികമായ ആരോഗ്യം മാത്രമല്ല മാനസിക ആരോഗ്യവും മെച്ചപ്പെടുത്തുക എന്ന ലക്ഷ്യത്തോടുകൂടിയാണ് യോഗ ദിനത്തിൽ ഗർഭിണികളുടെ പ്രിനറ്റൽ യോഗ ക്ലബ് ആരംഭിച്ചത്. എല്ലാ ശനിയാഴ്ചകളിലും ഗർഭിണികൾക്കുവേണ്ടിയുള്ള യോഗ സെഷനുകൾ നടത്തും. സൗജന്യമായി നടത്തപ്പെടുന്ന യോഗ ക്ലബ്ബിലേക്ക് കിൻഡറിലെ ഗർഭിണികൾക്ക് മാത്രമല്ല മറ്റ് ആശുപത്രിയിലെ ഗർഭിണികൾക്കും പങ്കുചേരാമെന്നും ഓൺലൈൻ യോഗ ചെയ്യുന്നതിനുള്ള ലിങ്കുകൾ വാട്സ്ആപ്പ് ഗ്രൂപ്പുകളിലൂടെ ഷെയർ ചെയ്യുമെന്നും ആശുപത്രി അധികൃതർ അറിയിച്ചു.

വോട്ടര്‍മാരെ സ്വാധീനിക്കാൻ ക്ഷേമപെന്‍ഷന്‍ പ്രഖ്യാപനം: കെ.സി. വേണുഗോപാല്‍

അന്പലപ്പുഴ: ധനമന്ത്രിയുടെ ക്ഷേമപെന്‍ഷന്‍ പ്രഖ്യാപനം നിലമ്പൂരിലെ വോട്ടര്‍മാരെ സ്വാധീനിക്കാനും തെരഞ്ഞെടുപ്പിനെ ദുരുപയോഗം ചെയ്യാനുമെന്ന് കെ.സി. വേണുഗോപാല്‍ എംപി. ഈമാസം 20 മുതല്‍ ക്ഷേമപെന്‍ഷന്‍ നല്‍കുമെന്നാണ് ധനമന്ത്രിയുടെ പ്രഖ്യാപനം. ഇത് തെരഞ്ഞെടുപ്പ് പെരുമാറ്റച്ചട്ടങ്ങളുടെ നഗ്നമായ ലംഘനമാണ്. തെരഞ്ഞെടുപ്പ് കമ്മീഷനിത് ഗൗരവമായി കാണണം. പരാതി നല്‍കുന്നതിനെക്കുറിച്ച് യുഡിഎഫ് ആലോചിക്കും. ജനങ്ങളെ തുടര്‍ച്ചയായി കബളിപ്പിക്കുന്ന സര്‍ക്കാരിന്‍റെ കള്ളക്കളി അവസാനിപ്പിക്കണമെന്നും കെ.സി.വേണുഗോപാല്‍ പറഞ്ഞു. ക്ഷേമ പെന്‍ഷന്‍ കുടിശികയാക്കി വിതരണം ചെയ്യുന്ന രീതിയെയാണ് നിലമ്പൂര്‍ ഉപതെരഞ്ഞെടുപ്പ് സമയത്ത് താന്‍ ശക്തമായി വിമര്‍ശിച്ചത്. ക്ഷേമ പെന്‍ഷന്‍ സാധാരണക്കാരന്‍റെ അവകാശമാണ്. നിലമ്പൂര്‍ ഉപതെരഞ്ഞെടുപ്പില്‍ വിജയിക്കുമെന്ന് യുഡ്എഫിന് ആത്മവിശ്വാസമുണ്ട്. അത് ഉറപ്പായതിനാലാകണം എല്‍ഡിഎഫ് പെന്‍ഷന്‍ നല്‍കാത്തത്. യുഡിഎഫില്‍ ഇത്രയധികം ഐക്യമുണ്ടായ മറ്റൊരു തെരഞ്ഞെടുപ്പ് ഉണ്ടായിട്ടില്ല. കോണ്‍ഗ്രസിനേക്കാളേറെ ആവേശമുണ്ടായിരുന്നു മുസ്‌ലിംലീഗിന്. ശശി തരൂര്‍ കോണ്‍ഗ്രസിന്‍റെ അവിഭാജ്യഘടകമാണ്. കോണ്‍ഗ്രസ് അഭിപ്രായ സ്വാതന്ത്ര്യം ഉറപ്പാക്കുന്ന പാര്‍ട്ടിയാണ്. ആരുടെയും അഭിപ്രായ സ്വാതന്ത്ര്യത്തെയും സഞ്ചാര സ്വാതന്ത്ര്യത്തെയും ലംഘിക്കുന്ന പാര്‍ട്ടിയല്ല കോണ്‍ഗ്രസെന്നും കെ.സി.വേണുഗോപാല്‍ പറഞ്ഞു.

വേഴപ്ര-കൊടുപ്പുന്ന-തായങ്കരി റോഡ് നിര്‍മാണത്തിലെ അപാകത: കളക്ടര്‍ സ്ഥലം സന്ദര്‍ശിക്കണം

എടത്വ: ആറുകോടിയില്‍പരം രൂപ മുടക്കി നിര്‍മിക്കുന്ന വേഴപ്ര-കൊടുപ്പുന്ന-തായങ്കരി റോഡ് അശാസ്ത്രീയമായിട്ടാണെന്നും റോഡിന്‍റെ നിര്‍മാണ പ്രവര്‍ത്തനങ്ങള്‍ നേരിട്ട് കണ്ട് മനസിലാക്കാന്‍ കളക്ടര്‍ സ്ഥലം സന്ദര്‍ശിക്കണമെന്നും ആലപ്പുഴ ജില്ല കോണ്‍ഗ്രസ് കമ്മിറ്റി ജനറല്‍ സെക്രട്ടറിയും വെളിയനാട് ബ്ലോക്ക് പഞ്ചായത്ത് അംഗവുമായ പ്രമോദ് ചന്ദ്രന്‍ ആവശ്യപ്പെട്ടു. പഴുതിക്ഷേത്രം മുതല്‍ വേഴപ്ര കുരിശടി വരെയുള്ള ഭാഗം പുതിയതായി ഉയര്‍ത്തിയെങ്കിലും റോഡിന് സംരക്ഷണഭിത്തി കെട്ടാത്തതുമൂലം പാടശേഖരത്തിലെ ഓളമടിച്ചു റോഡ് ഒരു മീറ്ററോളം ഒലിച്ചു പോയി. അഞ്ച് മാസമായി പഴുതി ക്ഷേത്രം മുതല്‍ മാമ്പറ പാലം വരെ നിലവിലെ റോഡ് കുത്തിപ്പൊളിച്ചിട്ടിരിക്കുന്നതു കാരണം കാല്‍നടയാത്രക്കാര്‍ക്ക് പോലും യാത്ര ചെയ്യാന്‍ പറ്റാത്ത അവസ്ഥയായി. കരാറുകാരും ഉദ്യോഗസ്ഥരും തമ്മിലുള്ള അവിശുദ്ധ കൂട്ടുകെട്ടിന്‍റെ ഉത്തമ ഉദാഹരണമാണ് ഈ റോഡ്. നിര്‍മാണം നടക്കുന്ന വേളയില്‍ തന്നെ അപാകതകള്‍ ചൂണ്ടികാണിക്കുമ്പോള്‍ അത് പരിഹരിച്ച് മുമ്പോട്ട് പോകുകയാണങ്കില്‍ ഈ റോഡ് കൊണ്ട് ജനങ്ങള്‍ക്ക് പ്രയോജനം ലഭിക്കും. മറിച്ചാണെങ്കില്‍ ഉദ്യോഗസ്ഥര്‍ക്കും കരാറുകാരും കൂടി ലാഭം കൊയ്‌തെടുക്കാം. കുറ്റമറ്റ രീതിയില്‍ റോഡ് നിര്‍മിക്കുകയാണങ്കില്‍ തായങ്കരി, കണ്ടങ്കരി, ചങ്ങങ്കരി, ചമ്പക്കുളം, കൊടുപ്പുന്ന, വേഴപ്ര പ്രദേശങ്ങളിലെ ജനങ്ങള്‍ക്ക് വെള്ളപ്പൊക്കക്കാലത്ത് എസി റോഡില്‍ എത്തിച്ചേരാന്‍ സാധിക്കും. പ്രശ്‌നത്തിൽ കളക്ടര്‍ അടിയന്തിരമായി ഇടപെടണമെന്ന് ആവശ്യപെട്ട് പ്രമോദ് ചന്ദ്രന്‍ കളക്ടര്‍ക്ക് കത്ത് നല്‍കി.

വള്ളം മറിഞ്ഞ് കാണാതായ തൊഴിലാളിയുടെ മൃതദേഹം കണ്ടെടുത്തു

അമ്പലപ്പുഴ: മത്സ്യബന്ധനത്തിനു പോയ വള്ളം മറിഞ്ഞ് കാണാതായ തൊഴിലാളിയുടെ മൃതദേഹം കണ്ടെടുത്തു. തോട്ടപ്പള്ളി പൊഴിയിൽ നിന്നു മത്സ്യ ബന്ധനത്തിന് പോയ പമ്പാ ഗണപതി എന്ന വളളത്തിലെ തൊഴിലാളിയായ പല്ലന പടീറ്റേടത്ത് സുഖദേവാ(70)ണ് മരണമടഞ്ഞത്. ഇന്നലെ രാവിലെ ഏഴിനായിരുന്നു അപകടം. പൊഴിയിൽനിന്നു കടലിലേക്ക് പോകുന്നതിനിടെ തിരയിൽപ്പെട്ട് വള്ളം മറിഞ്ഞാണ് അപകടമുണ്ടായത്. തോട്ടപ്പള്ളി തീരദേശ പോലീസും മറ്റ് മത്സ്യത്തൊഴിലാളികളും ചേർന്ന് നടത്തിയ തെരച്ചിലിൽ പല്ലനയിൽനിന്നാണ് മൃതദേഹം കണ്ടെടുത്തത്. മൃതദേഹം ആലപ്പുഴ മെഡിക്കൽ കോളജ് ആശുപത്രി മോർച്ചറിയിൽ. ഭാര്യ: ശാന്തകുമാരി. മക്കൾ: സുജിത്, സഞ്ജിത്, ശാലിനി. അപകടത്തിൽ പരിക്കേറ്റ തോട്ടപ്പള്ളി വെട്ടുവിന്ധ്യപ്പറമ്പ് കുഞ്ഞുമോൻ (55), പല്ലന പെരുമളത്ത് അനിയൻ കുഞ്ഞ് (49), പല്ലന മോഡൻ തറയിൽ പ്രകാശ് (51), പല്ലന ഇടയാടി തെക്കത് മനോജ് (44), പല്ലന പെരുമളത്ത് സന്തോഷ് (48), പല്ലന പടീച്ചടത്ത് ബിജുമോൻ (50) എന്നിവരെ ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

പാഠ്യപദ്ധതി പരിഷ്കരണം അപലപനീയം: എഎച്ച്എസ്ടിഎ

ആലപ്പുഴ: വേണ്ടത്ര കൂടിയാലോചനകളില്ലാതെ പാഠ്യപദ്ധതി പരിഷ്കരണം നടപ്പാക്കുന്നത് ഹയർ സെക്കൻഡറി മേഖലയെ അവതാളത്തിലാക്കുമെന്ന് എഎച്ച്എസ്ടിഎ ആലപ്പുഴ ജില്ലാ കമ്മിറ്റി. ഒന്നാം ക്ലാസ് മുതൽ കുട്ടികളുടെ എണ്ണം കുറയാനുള്ള പ്രധാന കാരണം ഒന്നു മുതൽ പത്തുവരെയുള്ള പഴയകാല ഡിപിഇപി പദ്ധതിയുടെ പുതിയ ആവിഷ്കരണം നടപ്പാക്കിയതാണ്. ഹയർസെക്കൻഡറി മേഖല തകർക്കാനുള്ള ഗൂഢനീക്കം സർക്കാർ ഉപേക്ഷിക്കണമെന്നും യോഗം ആവശ്യപ്പെട്ടു. സംസ്ഥാന ജനറൽ സെക്രട്ടറി എസ്. മനോജ് ഉദ്ഘാടനം ചെയ്തു. ജില്ലാ പ്രസിഡന്‍റ് അജു പി ബെഞ്ചമിൻ അധ്യക്ഷത വഹിച്ചു.

കടൽക്ഷോഭത്തെ അവഗണിച്ച് കടലിൽ പോയവർക്കു നിരാശ മാത്രം ബാക്കി

അന്പലപ്പുഴ: ട്രോളിംഗ് നിരോധന സമയത്ത് ശക്തമായ കടൽക്ഷോഭത്തെ അവഗണിച്ചു കടലിൽ പോയ മത്സ്യത്തൊഴിലാളികൾക്കു നിരാശ മാത്രം ബാക്കി. തോട്ടപ്പള്ളി ഹാർബറിൽനിന്നു പോയ മത്സ്യത്തൊഴിലാളികൾക്കാണ് ചെമ്മീൻ കിട്ടിയിട്ടും ആവശ്യത്തിന് വില ലഭിക്കാഞ്ഞത്. ഇന്നലെ പ്രതികൂലമായ കാലാവസ്ഥയെ അവഗണിച്ചു തോട്ടപ്പള്ളി ഹാർബറിൽനിന്ന് മത്സ്യബന്ധനത്തിനു പോയ ചില വള്ളങ്ങൾക്ക് ചെമ്മീൻ കിട്ടിയെങ്കിലും മൊത്തക്കച്ചവടക്കാർ എടുക്കാത്ത അവസ്ഥയായി രുന്നു. രാജ്യാന്തര വിപണിയിൽ കയറ്റുമതിക്ക് കോവിഡ് കാലത്ത് ഉണ്ടായ വിലക്ക് ചെമ്മീനിന് ഇപ്പോഴും നിലനിൽക്കുന്നതാണ് മൊത്തവ്യാപാരത്തെ ബാധിച്ചത് . ഇന്നലെ ചെമ്മീനിന് 150 രൂപ വച്ചാണ് തോട്ടപ്പള്ളിയിൽ തൂക്കിയത്. ഇതും കറിക്കുവേണ്ടി മറ്റു സ്ഥലങ്ങളിൽനിന്നു വന്നവർക്കു തൂക്കിക്കൊടുക്കുകയായിരുന്നു. എന്നാൽ മത്തിക്ക് ആവശ്യക്കാർ ഏറെയാണെങ്കിലും രണ്ടു ദിവസമായി മത്തി കിട്ടാത്തതു വള്ളങ്ങൾക്കു തിരിച്ചടിയായി. തോട്ടപ്പള്ളിയിൽ ചാകര തുടങ്ങിയതു മുതൽ ആദ്യം കിട്ടിയത് വളർച്ചയെത്തിയ മാംസവും രുചിയും മുട്ടയും നെയ്യുംവച്ച മത്തിയായിരുന്നു. എന്നാൽ കാലാവസ്ഥാ വ്യതിയാനം മത്സ്യത്തൊഴിലാളികളുടെ പ്രതീക്ഷകൾക്കു മങ്ങലേൽപ്പിച്ചു.

ലഹരിമുക്ത നവകേരളം ജില്ലാതല ഉദ്ഘാടനം

മാവേലിക്കര: കേരള സ്റ്റേറ്റ് ഭാരത് സ്കൗട്ട്സ് ആൻഡ് ഗൈഡ്സ് ജില്ലാ അസോസിയേഷന്‍റെ നേതൃത്വത്തിൽ ലഹരിമുക്ത നവകേരളം ജില്ലാതല ഉദ്ഘാടനം മാവേലിക്കര നഗരസഭാ ചെയർമാൻ നൈനാൻ സി. കുറ്റിശേരിൽ നിർവഹിച്ചു. മാവേലിക്കര ടിടിഐയിൽ നടന്ന പരിപാടിയിൽ ഡിസി ഗൈഡ് എസ്. ലീലാമ്മ അധ്യക്ഷത വഹിച്ചു. ലഹരിമുക്ത കേരളത്തിനായി തയാറാക്കിയ കാൻവാസിൽ ലഹരിക്കെതിരേ ചിത്രം വരച്ചു. ചെങ്ങുന്നൂർ ഡിവൈഎസ്പി ഡി . ബിനുകുമാർ മുഖ്യപ്രഭാഷണം നടത്തി. ഡിഒസി സ്കൗട്ട് എൻ. ശ്രീകുമാർ പദ്ധതി വിശദീകരണവും സ്കൗട്ട് മാസ്റ്റർ അഗസ്റ്റിൻ ജോർജ് പ്രതിജ്ഞയും ചൊല്ലിക്കൊടുത്തു. മാവേലിക്കര എഇഒ എസ്. ദീപ, റ്റിറ്റിഐ പ്രിൻസിപ്പൽ ജയകുമാരപ്പണിക്കർ, ഡിറ്റിസി ബി. രേണുക, ജില്ലാ സെക്രട്ടറി രവികൃഷ്ണൻ എം, ജില്ലാ ട്രഷറർ അഭിലാഷ്കുമാർ തുടങ്ങിയവർ പ്രസംഗിച്ചു.

അഴീക്കൽ കുടുംബാരോഗ്യ കേന്ദ്രത്തിന് 15 ലക്ഷം

കായംകുളം: കെ.സി. വേണുഗോപാൽ എംപിയുടെ അഭ്യർഥനപ്രകാരം ഐആർഇ സാമൂഹ്യ സുരക്ഷാ ഫണ്ടിൽനിന്ന് അഴീക്കൽ കുടുംബാരോഗ്യ കേന്ദ്രത്തിന് 15 ലക്ഷം രൂപ അനുവദിച്ചു. കുടുംബാരോഗ്യ കേന്ദ്രത്തിലെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും ചികിത്സാ ഉപകരണങ്ങൾ വാങ്ങുന്നതിനുമായാണ് തുക അനുവദിച്ചിരിക്കുന്നത്. സാമൂഹ്യ സുരക്ഷാ ഫണ്ടിൽ നിന്നു ധനസഹായം ആവശ്യപ്പെട്ട് കെ.സി. വേണുഗോപാൽ എംപി ഐആർഇക്ക് നേരത്തേ കത്തു നൽകിയിരുന്നു. ഇതിന്‍റെ അടിസ്ഥാനത്തിലാണ് തുക അനുവദിച്ചത്. സ്തനാർബുദ പരിശോധനയ്ക്കുള്ള ഉപകരണത്തിനായി 6 ലക്ഷം രൂപയും അഞ്ച് ഓക്സിജൻ കോൺസൺട്രേറ്ററുകൾക്കായി 4,25,000 രൂപയും നെബുലൈസർ, വാട്ടർ ബെഡ്, ഗ്ലൂക്കോമീറ്റർ സ്ട്രിപ്പ് എന്നീ മെഡിക്കൽ ഉപകരണങ്ങൾക്കായി 46,900 രൂപയും വകയിരുത്തിയിട്ടുണ്ട്. ശേഷിക്കുന്ന തുക കുടുംബാരോഗ്യ കേന്ദ്രത്തിലേക്കുള്ള ലാപ്ടോപ്പുകൾക്കും ഓഫീസ് ഉപകരണങ്ങൾക്കുമായി വകയിരുത്തി. ആശുപത്രികളുടെ നവീകരണം, ആരോഗ്യ മേഖലയിൽ മെച്ചപ്പെട്ട ചികിത്സാ സൗകര്യങ്ങൾ ഒരുക്കുക തുടങ്ങിയ ആവശ്യങ്ങൾക്കായി ഇത്തരത്തിൽ കൂടുതൽ പൊതുമേഖലാ സ്ഥാപനങ്ങളിൽനിന്ന് സാമൂഹ്യ സുരക്ഷാ ഫണ്ടുകൾ ലഭ്യമാക്കുന്നതിന് ആവശ്യമായ നടപടികൾ സ്വീകരിക്കുമെന്നു കെ.സി. വേണുഗോപാൽ എംപി പറഞ്ഞു.

നൂറുമേനി ഗ്രാൻഡ് ഫിനാലെ: ടീമുകളെ പ്രഖ്യാപിച്ചു

ചങ്ങനാശേരി: അതിരൂപത ബൈബിൾ അപ്പൊസ്തലേറ്റും മാക് ടിവിയും ശാലോമും ചേർന്ന് നടത്തുന്ന നൂറുമേനി സീസണ്‍ ത്രീ ബൈബിൾ വചനപഠന മത്സരത്തില്‍ കുടുംബ കൂട്ടായ്മ, ഇടവക, ഫൊറോന, റീജണ്‍ തലങ്ങളില്‍ ഒരു ലക്ഷം പേര്‍ പങ്കെടുത്ത മത്സരത്തിന്‍റെ അവസാന റൗണ്ട്, ഗ്രാൻഡ് ഫിനാലെയിലേക്കുളള അഞ്ചു ടീമുകളെ അതിരൂപതാ കേന്ദ്രത്തിൽ നടന്ന പത്രസമ്മേളനത്തിൽ പ്രഖ്യാപിച്ചു. അതിരൂപതയുടെ അഞ്ചു റീജണുകളിലായി നടന്ന മത്സരങ്ങളിൽ ഒന്നാമതെത്തിയ കുടുംബങ്ങളാണ് ഗ്രാൻഡ്ഫിനാലെയിലേക്ക് തെരഞ്ഞെടുക്കപ്പെട്ടിരിക്കുന്നത്. തിരുവനന്തപുരം റീജണിൽ നിന്നും ഡോ. അഭിലാഷ് കെ. തോമസ്, ഡോ. പി. റോണ ജോസഫ്, സെബാസ്റ്റ്യന്‍ തോമസ് കുഴിക്കാട്ടില്‍ (പൊങ്ങുമ്മൂട് സെന്‍റ് അല്‍ഫോന്‍സ ഇടവക), കോട്ടയം റീജണിൽനിന്നും ഡോ. സുജിത്ത് ജോ മാത്യു, ഡോ. അനു വര്‍ഗീസ്, മരിയ റോസ് ജോ മണിയങ്ങാട്ട് (അരുവിക്കുഴി ലൂര്‍ദ് മാതാ ഇടവക), നെടുംകുന്നം റീജണിൽനിന്നും സോജി ചാക്കോ, മരിയ മാത്യു കൂനാനിക്കല്‍ (വായ്പൂര് ന്യൂ സെന്‍റ് ജോസഫ് ഇടവക), ചങ്ങനാശേരി റീജണിൽ നിന്നും ജയിംസ് കെ. ജേക്കബ്, ഷൈനി സെബാസ്റ്റ്യന്‍ കോലോത്ത് (പാറേല്‍ സെന്‍റ് മേരീസ് ഇടവക), കുട്ടനാട് റീജണിൽ നിന്നും മാത്യു തോമസ്, മേരിക്കുട്ടി തോമസ്, ഡോ. മെര്‍ലി ആന്‍ മാത്യു തറയില്‍ (പുളിങ്കുന്ന് കാനാച്ചേരി സെന്‍റ് മേരീസ് ഫൊറോന) യുമാണ് തെരഞ്ഞെടുക്കപ്പെട്ടിരിക്കുന്നത്. പത്രസമ്മേളനത്തിൽ അതിരൂപതാ വികാരി ജനറാള്‍ മോണ്‍. മാത്യു ചങ്ങങ്കരി ഫലപ്രഖ്യാപനം നടത്തി. അതിരൂപതാ ഡയറക്ടര്‍ ഫാ.ജോര്‍ജ് മാന്തുരുത്തിൽ, നൂറുമേനി ചെയര്‍മാന്‍ സണ്ണി തോമസ് ഇടിമണ്ണിക്കല്‍, മറിയം പൊട്ടുകളം, ടോമിച്ചന്‍ കൈതപ്പറമ്പില്‍ എന്നിവര്‍ പങ്കെടുത്തു.

ബാഡ്മിന്‍റണ്‍ ചാമ്പ്യന്‍ഷിപ്പിനു തുടക്കം

ചേര്‍ത്തല: ഐഎംഎ ചേര്‍ത്തല ആതിഥേയത്വം വഹിക്കുന്ന ഐഎംഎ കേരള സ്റ്റേറ്റ് ബാഡ്മിന്‍റണ്‍ ചാമ്പ്യന്‍ഷിപ്പ് തുടങ്ങി. ചേര്‍ത്തല എന്‍സിആര്‍സി ഇന്‍ഡോര്‍ ബാഡ്മിന്റണ്‍ കോര്‍ട്ടില്‍ ആരംഭിച്ച മത്സരങ്ങൾ ഐഎംഎ സംസ്ഥാന പ്രസിഡന്‍റ് ഡോ.കെ.എ. ശ്രീവിലാസന്‍ ഉദ്ഘാടനം ചെയ്തു. സ്പോര്‍ട്സ് കമ്മിറ്റി ചെയര്‍പേഴ്സണ്‍ ഡോ.ഷേര്‍ലി ഫിലിപ് അധ്യക്ഷത വഹിച്ചു. നഗരസഭാ ചെയർപേഴ്സൺ ഷേർളി ഭാർഗവൻ, ഡോ.എ.പി. മുഹമ്മദ്, ഡോ.ഉമ്മന്‍ വര്‍ഗീസ്, ഫാ. ജിസ്മോന്‍ മഠത്തില്‍ തുട ങ്ങിയവർ പ്രസംഗിച്ചു.

ജോഷ്വാ മാർ ഇഗ‌്നാത്തിയോസിന് ഇന്ന് സ്നേഹാദരവ്

കറ്റാനം : എംസിഎ മാവേലിക്കര ഭദ്രാസന സമിതിയുടെ നേതൃത്വത്തിൽ ബിഷപ് സ്ഥാനത്തുനിന്നു വിരമിക്കുന്ന ഡോ. ജോഷ്വാ മാർ ഇഗ‌്നാത്തിയോസിന് ഇന്ന് സ്നേഹാദരവ് നൽകും. ഇതോടൊപ്പം എംസിഎ പരിസ്ഥിതി ദിനാഘോഷവും കർഷകശ്രീ അവാർഡ് വിതരണവും സ്വയംതൊഴിൽ സഹായധന വിതരണോദ്ഘാടനവും നടക്കും. ഉച്ചകഴിഞ്ഞു രണ്ടിന് കറ്റാനം സെന്‍റ് സ്റ്റീഫൻസ് മലങ്കര കത്തോലിക്കാ ദേവാലയത്തിൽ നടക്കുന്ന പരിപാടിയിൽ. എംസിഎ ഭദ്രാസന പ്രസിഡന്‍റ് അഡ്വ. അനിൽ ബാബു അധ്യക്ഷതവഹിക്കും. എംസിഎ സഭാതല പ്രസിഡന്‍റ് എസ്.ആർ. ബൈജു സ്വയംതൊഴിൽ സഹായവിതരണം ഉദ്ഘാടനംചെയ്യും.ബിഷപ് ഡോ. ജോഷ്വാ മാർ ഇ‌ഗ‌്നാത്തിയോസ് സമ്മേളനം ഉദ്ഘാടനം ചെയ്യും.

ലഹരിക്കെതിരേ പള്ളിപ്പുറത്ത് മനുഷ്യച്ചങ്ങല

പൂച്ചാക്കൽ: അന്താരാഷ്‌ട്ര ലഹരിവിരുദ്ധ ദിനത്തിൽ ചേന്നം പള്ളിപ്പുറം പഞ്ചായത്തിന്‍റെ നേതൃത്വത്തിൽ ലഹരിക്കെതിരേ മനുഷ്യച്ചങ്ങല സംഘടിപ്പിക്കും. പഞ്ചായത്ത് അതിർത്തിയായ കൃഷിഭവൻ മുതൽ ചെങ്ങണ്ട പാലം വരെ 26നു രാവിലെ 11ന് മനുഷ്യച്ചങ്ങല തീർക്കുമെന്ന് ഭാരവാഹികൾ അറിയിച്ചു. ഇതിന്‍റെ ഭാഗമായി ലഹരിവിരുദ്ധ ദീപം തെളിക്കൽ നടക്കും. തുടർന്ന് തെരുവുനാടകം, ഫ്ളാഷ് മോബ്, ബോധവത്കരണ ക്ലാസുകൾ, രചനാ മത്സരങ്ങൾ, വാർഡുതല ജാഗ്രതാ സമിതി യോഗങ്ങൾ എന്നിവ നടക്കും. മനുഷ്യച്ചങ്ങലയിൽ മന്ത്രി സജി ചെറിയാൻ ആദ്യ കണ്ണിയും മന്ത്രി പി. പ്രസാദ് അവസാന കണ്ണിയുമാകും.

യോഗദിനാചരണം നടത്തി

മങ്കൊമ്പ്: അന്താരാഷ്‌ട്ര യോഗ ദിനാചരണത്തോടനുബന്ധിച്ച് ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂളിൽ നടന്ന യോഗ ദിനാചരണ പരിപാടികൾ നെടുമുടി പഞ്ചായത്ത് പ്രസിഡന്‍റ് മിനി മന്മഥൻ നായർ ഉദ്ഘാടനം ചെയ്തു. ചാക്കോച്ചൻ ജെ. മെതിക്കളം പരിശീലനത്തിന് നേതൃത്വം നൽകി. ഹൈസ്‌കൂളിലെ എൻസിസി, സ്‌കൗട്ട് ആൻഡ് ഗൈഡ്‌സ്, ജൂണിയർ റെഡ് ക്രോസ്, ലിറ്റിൽ കൈറ്റ്‌സ് എന്നീ സംഘടനകളിലെ വിദ്യാർഥികൾ യോഗാഭ്യാസത്തിൽ പങ്കെടുത്തു. മങ്കൊമ്പ് ഉപജില്ല വിദ്യാഭ്യാസ ഓഫീസർ എൽ. അനുപമ അധ്യക്ഷത വഹിച്ച ചടങ്ങിൽ സ്‌കൂൾ മാനേജർ റവ. ഡോ. ജയിംസ് പാലയ്ക്കൽ യോഗാദിന സന്ദേശം നൽകി. മങ്കൊമ്പ്: രാമങ്കരി എൻഎസ്എസ് കരയോഗത്തിലെ പൗർണമി വനിതാസമാജത്തിന്‍റെ ആഭിമുഖ്യത്തിൽ അന്താരാഷ്ട്ര യോഗ ദിനാചരണം നടത്തി. എൻഎസ്എസ് കുട്ടനാട് യൂണിയൻ വൈസ് പ്രസിഡന്‍റ് രാധാകൃഷ്ണൻ നായർ പരിപാടി ഉദ്ഘാടനം ചെയ്തു. കരയോഗം പ്രസിഡന്‍റ് ആർ. വിജയകുമാർ അധ്യക്ഷത വഹിച്ച യോഗത്തിൽ വെളിയനാട് ബ്ലോക്കുപഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ പ്രീതി സജി മുഖ്യാതിഥിയായി രുന്നു. മാന്നാർ:10 കേരള എൻ സി സി യുടെ നേതൃത്വത്തിൽ മാന്നാർ നായർ സമാജം സ്കൂളിൽ അന്താരാഷ്‌ട്ര യോഗ ദിനം ആഘോഷിച്ചു. സ്കൂൾ പ്രിൻസിപ്പൽ വി. മനോജ് മുഖ്യാതിഥിയായിരുന്നു. യോഗത്തിൽ യോഗ പരിശീലകനും എൻ സി സി ഓഫീസറുമായ ഗോപകുമാർ, എസ്പിസി ഓഫീസർ ഗിരീഷ് എന്നിവർ പരിശീലനം നൽകി. എൻസിസി ഓഫീസർമാരായ ആർ. അനൂപ് ,സനീഷ് സുബേദാർ സജീവ് എസ് എന്നിവർ യോഗദിന സന്ദേശം നൽകി.

കരുവാറ്റ മാലിയില്‍-തോപ്പില്‍ കുടിവെള്ളപദ്ധതി ഉദ്ഘാടനം

ആലപ്പുഴ: കരുവാറ്റ ഗ്രാമപഞ്ചായത്തിലെ മാലിയില്‍-തോപ്പില്‍ കുടിവെള്ള പദ്ധതിയുടെ ഉദ്ഘാടനം ഹരിപ്പാട് ബ്ലോക്ക് പഞ്ചായത്ത് പ്രസിഡന്‍റ് രുഗ്മിണി രാജു നിര്‍വഹിച്ചു. ഹരിപ്പാട് ബ്ലോക്ക് പഞ്ചായത്ത് ജനകീയാസൂത്രണ പദ്ധതിയില്‍ ഉള്‍പ്പെടുത്തി വിവിധ സാമ്പത്തിക വര്‍ഷങ്ങളിലായി 23 ലക്ഷം രൂപ വിനിയോഗിച്ചാണ് നിര്‍മാണം പൂര്‍ത്തീകരിച്ചത്. കരുവാറ്റ ഗ്രാമപഞ്ചായത്ത് മൂന്നാം വാര്‍ഡില്‍ നടന്ന ചടങ്ങില്‍ പഞ്ചായത്ത് പ്രസിഡന്‍റ് സനില്‍കുമാര്‍ അധ്യക്ഷനായി. ബ ്ലോക്ക് പഞ്ചായത്ത് വൈസ് പ്രസിഡന്‍റ് പി. ഓമന, ഹരിപ്പാട് ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ എം.എം. അനസ് അലി, ടി.ആര്‍. വത്സല, പി. ശാന്തികൃഷ്ണ, ബ്ലോക്ക് പഞ്ചായത്ത് സെക്രട്ടറി ജി. സുനില്‍കുമാര്‍, കരുവാറ്റ ഗ്രാമപഞ്ചായത്ത് സെക്രട്ടറി പി. ഹരിദാസ് തുടങ്ങിയവര്‍ പങ്കെടുത്തു.

കുട്ടനാട്ടുകാർക്ക് യാത്രാക്ലേശം

കുട്ടനാട്: ജലഗതാഗത വകുപ്പിന്‍റെ ബോട്ടുകളെ മാത്രം ആശ്രയിച്ച് യാത്രചെയ്യുന്ന കുട്ടനാട്ടുകാർ യാത്രാക്ലേശത്താൽ വലയുന്നു. പ്രധാന സർവീസുകൾ താറുമാറായി. അറ്റകുറ്റപ്പണിക്കായി കയറ്റുന്ന ബോട്ടുകൾ സമയബദ്ധമായി പണി പൂർത്തിയാക്കി ഇറക്കാത്തതും പകരം ബോട്ടിടാത്തതുമാണ് പ്രതിസന്ധിക്കു കാരണമെന്ന് യാത്രക്കാർ പറയുന്നു. കൈനകരി, കുട്ടമംഗലം, കുപ്പപ്പുറം, കായൽ മേഖലകളിലുള്ളവരാണ് ഏറെ പ്രതിസന്ധിയിലായിരിക്കുന്നത്. രാവിലത്തെ സമയങ്ങളിൽ ഈ പ്രദേശങ്ങളെ ബന്ധപ്പെടുത്തി സർവീസ് നടത്തിയിരുന്ന എ-47, എ-84 എന്നീ ബോട്ടുകൾ അറ്റകുറ്റപ്പണിക്കായി കയറ്റിയതോടെയാണ് പ്രതിസന്ധി രൂക്ഷമായത്. എ-47 ബോട്ട് പുലർച്ചെ നെടുമുടിയിൽനിന്ന് പുറപ്പെട്ട് ഏഴുമണിയോടെ ആലപ്പുഴയിൽ എത്തുന്ന നിലയിലാണ് സർവീസ് നടത്തിയിരുന്നത്. എ-87 ബോട്ട് നെടുമുടിയിൽനിന്ന് പുറപ്പെട്ട് കായൽപ്പുറത്തുവന്ന് അവിടെനിന്ന് ആലപ്പുഴയിൽ എത്തുന്ന നിലയിലുമാണ് സർവീസ് നടത്തിയിരുന്നത്. കൈനകരിയിലെ ഉൾപ്രദേശങ്ങളിലും കായൽ മേഖലയിലുമുള്ളവർക്കും ആലപ്പുഴയിൽ എത്തുന്നതിനും സമയബദ്ധമായി ട്രെയിനിൽ എറണാകുളത്തുൾപ്പെടെ പോയി ജോലിചെയ്യുന്നവർക്കും ഏറെ ഗുണകരമായിരുന്നു ഈ സർവീസുകൾ. എ-47 ബോട്ട് സർവീസ് നിർത്തിയിട്ട് മൂന്നാഴ്ചയോളമായി. പകരം ബോട്ടുണ്ടെങ്കിലും പ്രയോജനകരമല്ല. ഇരുമ്പുബോട്ടാണത്. സമയത്ത് ഓടിയെത്താത്തതിനാൽ യാത്രക്കാർ ഏറെ ബുദ്ധിമുട്ടിലാണ്. എ-87 ബോട്ട് ഒരാഴ്ചയോളമായി പിൻവലിച്ചിട്ട്. പകരം ബോട്ട് ഇട്ടിട്ടുമില്ല. ഇപ്പോൾ കുട്ടനാട്ടിൽ ഉണ്ടായിട്ടുള്ള വെള്ളപ്പൊക്ക കെടുതിക്കൊപ്പം ബോട്ട് സർവീസുകൾകൂടി മുടങ്ങിയതോടെ കുട്ടനാട്ടിലെ യാത്രക്കാർക്ക് ഇരുട്ടടിയായിരിക്കുകയാണ്.

മഴ: ജില്ലയില്‍ പനി പടരുന്നു

ആലപ്പുഴ: മഴക്കാലമായതോടെ ജില്ലയില്‍ പനി പടരുന്നു. ദിവസേന 300-350 പേര്‍ പനിക്ക് ചികിത്സ തേടിയിരുന്ന സ്ഥാനത്ത് ഇപ്പോഴത് 500-നു മുകളിലെത്തി. എലിപ്പനി സംശയത്തോടെ ചികിത്സയിലായിരുന്ന ചേര്‍ത്തല പള്ളിത്തോട് സ്വദേശി ബുധനാഴ്ച മരിച്ചു. 45 വയസ്സുള്ളയാളാണ് മരിച്ചത്. കഴിഞ്ഞദിവസം കോവിഡ് ബാധിച്ച് രണ്ടുപേര്‍ മരിച്ചിരുന്നു. എച്ച്1 എന്‍1, ഡെങ്കിപ്പനി, എലിപ്പനി, കോവിഡ്, ചിക്കന്‍പോക്‌സ്, മഞ്ഞപ്പിത്തം, മലമ്പനി എന്നിവയ്ക്കു പിന്നാലെ ചെള്ളുപനിയും സ്ഥിരീകരിച്ചത് ആശങ്കയ്ക്കിടയാക്കി. ചൊവ്വാഴ്ചയാണ് ഒരാള്‍ക്ക് ചെള്ളുപനി ബാധിച്ചത്. ഏറെനാളുകള്‍ക്കുശേഷമാണ് രോഗബാധ. ഓറിയന്‍ഷ്യ സൂസുഗാമുഷി എന്ന ബാക്ടീരിയ മൂലമുണ്ടാകുന്നതാണ് ചെള്ളുപനി. മണ്ണിനടിയിലെ ചെള്ളില്‍നിന്നാണ് ഇവ പടരുന്നത്. എലി, അണ്ണാന്‍, മുയല്‍ തുടങ്ങിയവയില്‍നിന്ന് രോഗം പകരാം. അവയുടെ ശരീരത്തിലെ ചെള്ളുകള്‍ മനുഷ്യരെ കടിക്കുമ്പോഴാണ് പകരുന്നത്. ചെള്ളുകടിയേറ്റാല്‍ 10-12 ദിവസമാകുമ്പോള്‍ ലക്ഷണം കണ്ടുതുടങ്ങും. കടിയേറ്റ ഭാഗത്ത് ചുവന്ന പാടുകള്‍ രൂപപ്പെടും. പിന്നീട് കറുത്ത വ്രണമായി മാറും. നേരത്തേ കണ്ടെത്തിയാല്‍ ആന്റി ബയോട്ടിക് ഉപയോഗിച്ച് ചികിത്സിക്കാം. ഗുരുതരാവസ്ഥയിലെത്തിയാല്‍ മരിക്കാം. വ്യക്തിശുചിത്വവും പരിസര ശുചിത്വവുമാണ് രോഗം വരാതിരിക്കാനുള്ള പോംവഴി. വേനല്‍ക്കാലത്ത് വ്യാപകമാകുന്ന ചിക്കന്‍പോക്‌സും മഴക്കാലത്ത് റിപ്പോര്‍ട്ടു ചെയ്യുന്നുണ്ട്. കഴിഞ്ഞദിവസം അഞ്ചുപേര്‍ക്കാണ് രോഗം ബാധിച്ചത്. ജില്ലയില്‍ വ്യാഴാഴ്ച 10 പേര്‍ക്ക് കോവിഡ് സ്ഥിരീകരിച്ചു. ഇതോടെ രോഗബാധിതരുടെ എണ്ണം 398 ആയി. കോവിഡിനൊപ്പം മറ്റു പനികളും വരുന്നത് ആളുകളെ ആശങ്കയിലാക്കിയിട്ടുണ്ട്. സാധാരണ വൈറല്‍ പനി പിടിപെട്ടാല്‍ പോലും കോവിഡാണെന്ന പേടിയിലാണ് ആളുകള്‍.

പുന്നപ്രയിലെ കുടിവെള്ളപ്രശ്നത്തിന് പരിഹാരമായി കുഴൽക്കിണർ

അമ്പലപ്പുഴ: പുന്നപ്ര വടക്ക് പഞ്ചായത്തിലെ വിവിധ വാർഡുകളിൽ കുടിവെള്ള പ്രശ്നം പരിഹാരിക്കാൻ കുഴൽക്കിണറിന്‍റെ പ്രവർത്തനത്തിന് തുടക്കം. പഞ്ചായത്തിലെ ഏഴു മുതൽ 11 വരെയുള്ള വാർഡുകളിലും പുന്നപ്ര തെക്ക് പഞ്ചായത്തിലെ കരിമ്പാവളവ് ഉൾപ്പെടുന്ന കിഴക്കൻ ഭാഗങ്ങളിലും ഇതോടെ ഒരു പരിധിവരെ ശുദ്ധജലം ലഭ്യമാകും. എച്ച്. സലാം എംഎൽഎയുടെ ഫണ്ടിൽനിന്ന് 5,14,617 രൂപയും പഞ്ചായത്തിന്‍റെ വാർഷികപദ്ധതിയിൽ ഉൾപ്പെടുത്തി 5.25 ലക്ഷം രൂപയുമടക്കം ആകെ 10,39,617 രൂപ ചെലവിലാണ് വാട്ടർ വർക്സ് പമ്പ് ഹൗസിൽ കുഴൽക്കിണർ പ്രവർത്തന സജ്ജമാക്കിയത്. എച്ച്. സലാം എംഎൽഎ ഇതിന്‍റെ പ്രവർത്തനോദ്ഘാടനം നിർവഹിച്ചു. പ്രസിഡന്‍റ് സജിത സതീശൻ അധ്യക്ഷയായി. വൈസ് പ്രസിഡന്‍റ് എ.പി. സരിത, സ്ഥിരംസമിതി അധ്യക്ഷ അജിത ശശി, വാട്ടർ അഥോറിറ്റി എക്സിക്യൂട്ടീവ് എൻജിനിയർ കെ.എൽ. ഗിരീഷ്, അസിസ്റ്റന്‍റ് എക്സിക്യൂട്ടീവ് എൻജിനിയർ ഷിനോ മെറിൻ ജോൺ, കെ. മോഹൻ കുമാർ, കെ.പി. സത്യകീർത്തി, രതീഷ് കുമാർ, പി. പ്രീത് എന്നിവർ സംസാരിച്ചു.

അന്പലപ്പുഴ റെയിൽവേ സ്റ്റേഷൻ പരിസരത്ത് നായശല്യം രൂക്ഷം

അമ്പലപ്പുഴ: റെയിൽവേ സ്റ്റേഷൻ പരിസരത്ത് നായശല്യം അതിരൂക്ഷമാണ്. സ്ത്രീകളും കുട്ടികളുമടക്കം റെയിൽവേ സ്റ്റേഷനിലേക്ക് വരുന്നവർക്കും തിരികെ പോകുന്നവർക്കും ഇതു മൂലം വളരെ ബുദ്ധിമുട്ട് അനുഭവിക്കുകയാണ്. റെയിൽവേ സ്റ്റേഷന്‍റെ പടിഞ്ഞാറു ഭാഗത്ത് പട്ടികൾ റോഡിൽ വിലസുന്നതുമൂലം ഇതുവഴി വരുന്ന യാത്രക്കാർക്കും റെയിവേ സ്റ്റേഷനിലേക്ക് വരുന്നവർക്കും നായയുടെ കടിയേൽക്കാൻ സാധ്യത കൂടുതലാണ്. രാവിലെ ജോലിക്കായും മറ്റും പോയി രാത്രിയോടെ എത്തുന്ന യാത്രക്കാർക്കും കുടുംബത്തോടൊപ്പം യാത്രകഴിഞ്ഞ് എത്തുന്ന മറ്റു യാത്രക്കാർക്കും വയോജനങ്ങൾ, സ്ത്രീകൾ, കുട്ടികൾ തുടങ്ങി നിലവിൽ വടക്കു പടിഞ്ഞാറു ഭാഗത്തുകൂടി പോകേണ്ടിവരുന്നവർ കൂടുതലായും ഭീതിയോടെയാണ് അമ്പലപ്പുഴ റെയിൽവേ സ്റ്റേഷനിൽ വന്നു വീടുകളിലെക്കു മടങ്ങുന്നത്.

ഒരു ഗ്രാമത്തിന്‍റെ സാമൂഹ്യമാറ്റത്തിന് നാന്ദികുറിച്ച പരുമല ടാഗോര്‍ വായനശാല@76

മാന്നാര്‍: ഒ‌രു ഗ്രാമത്തിന്‍റെ കലാ-കായിക, സാമൂഹ്യ, സാംസ്‌കാരിക മുന്നേറ്റത്തിന് നാന്ദികുറിച്ച ഒരു പ്രസ്ഥാനമാണ് പരുമല ടാഗോര്‍ വായനശാല. ഇതിലൂടെ വളര്‍ന്നത് ഒരു പുത്തന്‍ വായന സംസ്‌കാരം കൂടിയാണ്. പരുമലയുടെ ഹൃദയഭാഗത്തു തലയുയര്‍ത്തി നില്‍ക്കുന്ന ഈ വായനശാല പരുമലയുടെ എല്ലാ തലങ്ങളിലുമുള്ള പുരോഗതിയുടെ പ്രഭവകേന്ദ്രം കൂടിയാണ്. വായനശാലയെന്നു കേള്‍ക്കുമ്പോള്‍ പത്രം വായിക്കാനും പുസ്തകങ്ങളെടുത്ത് വായിക്കാനുമുള്ള കേന്ദ്രം എന്നാണ് സാധാരണയായി മനസിലാക്കുക. എന്നാല്‍, ഈ പ്രകിയകള്‍ക്കൊപ്പം നാടിന്‍റെ വികസനക്കുതിപ്പിന്‍റെ ചര്‍ച്ചകളും വിവിധ പൊതുയോഗങ്ങള്‍ക്കും വേദിയാകുന്നതും ഇവിടമാണ്. മറ്റിടങ്ങളില്‍നിന്നും വ്യത്യസ്തമായി പുലര്‍ച്ചെതന്നെ വായനശാല സജീവമാകുന്നു. രാവിലെ എട്ടിന് മാത്രമേ വായനാഹാളും ഓഫീസും മറ്റും തുറക്കുകയുള്ളൂവെങ്കിലും പുലര്‍ച്ചേതന്നെ വായനശാലയുടെ വരാന്തയില്‍ പത്രവായനക്കാര്‍ സജീവമാകും. വായനശാലയുടെ അടുത്തുള്ള കടയില്‍നിന്നു ചായയും കുടിച്ച് ഒന്നിലധികം പത്രവും വായിച്ച് പോകുന്ന നിരവധിപേര്‍ ഇപ്പോഴുണ്ടെന്നതാണ് ഈ വായനശാലയുടെ പ്രത്യേകത. വിവിധ വിഭാഗങ്ങളിലായി 10000 പുസ്തകങ്ങളുടെ ശേഖരം ഇവിടെയുണ്ട്. വായന മരിക്കുന്നുവെന്ന പ്രചാരണം ഈ വായനശാലയെ സംബന്ധിച്ചിടത്തോളം ശരിയല്ല. യുവാക്കളും വിദ്യാര്‍ഥികളും അടക്കം നിരവധി പേരാണ് ഇവിടെ പുസ്തകമെടുക്കാന്‍ എത്തുന്നത്. നിരവധി റെഫറന്‍സ് ഗ്രന്ഥങ്ങള്‍ ഇവിടെ ഉള്ളതിനാല്‍ ധാരാളം പേര്‍ ഇതിനായും ഇവിടെയെത്തുന്നു. വായനശാലയില്‍ പുസ്തകമെടുക്കാനും പത്രം വായിക്കാനും റെഫറന്‍സ് ഗ്രന്ഥങ്ങള്‍ നോക്കാനും മറ്റുമായി എത്തുന്നവര്‍ക്ക് എല്ലാ സഹായ സഹകരണവുമായി ലൈബ്രേറിയന്‍ ടി.കെ.രാജന്‍ രാവിലെ എട്ടു മുതല്‍ വൈകുന്നേരം ഏഴു വരെ ഇവിടെയുണ്ട്. 1949 ല്‍ സ്ഥാപിതമായ ഈ വായനശാല പല തവണ പുനര്‍നിര്‍മിച്ചു. ഇന്നത്തെ രീതിയില്‍ ആധുനിക സൗകര്യങ്ങളോടെ ഇരുനിലകളിലായി പുനര്‍നിര്‍മിച്ചത് 2006ലാണ്. വായനഹാള്‍, പുസ്തകങ്ങള്‍ സൂക്ഷിക്കുന്ന വലിയ ഹാള്‍, ഓഫീസ് റൂം, കോണ്‍ഫറന്‍സ് ഹാള്‍ എന്നിവ ഉള്‍കൊള്ളുന്നതാണ് ഈ വായനശാല. ഇപ്പോഴും എല്ലാ മാസത്തിലും പുസ്തചര്‍ച്ചകളും കുട്ടികളിലും യുവാക്കളിലും വയനാശീലം വര്‍ധിപ്പിക്കാനുള്ള വിവിധ പരിപാടികളുമായി ഇന്നും സജീവമാണ് പരുമല ഗ്രാമത്തിലെ ടാഗോര്‍ വായനശാല. പ്രഫ. എ.ലോപ്പസ് പ്രസിഡന്‍റും ഇ.ജി. ഹരികുമാര്‍ സെക്രട്ടറിയുമായുള്ള കമ്മിറ്റി പ്രവര്‍ത്തിച്ചുവരുന്നു.

പ്രവര്‍ത്തനവര്‍ഷ ഉദ്ഘാടനവും എയ്ഞ്ചല്‍സ് മീറ്റും ഇന്ന്

ആലപ്പുഴ: ഏഷ്യയിലെ ഏറ്റവും വലിയ അല്‍മായ സംഘടനയായ ചെറുപുഷ്പ മിഷന്‍ ലീഗിന്‍റെ ആലപ്പുഴ മേഖല പ്രവര്‍ത്തനവര്‍ഷ ഉദ്ഘാടനവും ഭാരവാഹികളുടെ സത്യപ്രതിജ്ഞയും ഈ വര്‍ഷം ആഘോഷപൂര്‍വമായ വിശുദ്ധ കുര്‍ബാന സ്വീകരിച്ച കുട്ടികളുടെ സംഗമമായ എയ്ഞ്ചല്‍സ് മീറ്റും ഈ വര്‍ഷം പത്താം ക്ലാസ് പരീക്ഷകളില്‍ ഉന്നത വിജയം കരസ്ഥമാക്കിയ മിഷന്‍ ലീഗ് പ്രവര്‍ത്തകര്‍ക്ക് അനുമോദനവും ഇന്ന് രാവിലെ ഒന്പതു മുതല്‍ പഴവങ്ങാടി മാര്‍ സ്ലീവ ഫൊറോന ദേവാലയത്തില്‍ നടത്തും. ചങ്ങനാശേരി അതിരൂപതയുടെ മുന്‍ അധ്യക്ഷന്‍ മാര്‍ ജോസഫ് പെരുന്തോട്ടം മെത്രാപ്പോലീത്ത അര്‍പ്പിക്കുന്ന വിശുദ്ധ കുര്‍ബാനയെത്തുടര്‍ന്ന് സമ്മേളനം ഉദ്ഘാടനം ചെയ്യും. മിഷന്‍ ലീഗ് ആലപ്പുഴ മേഖല പ്രസിഡന്‍റ് മാസ്റ്റര്‍ ആഞ്ചലോ മൈക്കിള്‍ അധ്യക്ഷത വഹിക്കും. ഫൊറോന വികാരി ഫാ. മാത്യു നടമുഖത്ത് അനുഗ്രഹ പ്രഭാഷണം നടത്തും. ഫാ. യോഹന്നാന്‍ കട്ടത്തറ, ഫാ. സെബാസ്റ്റ്യന്‍ മാമ്പ്ര, സിസ്റ്റർ മെറിന്‍ മൂന്നാറ്റുംമുഖം, ആലപ്പുഴ മേഖല ഓര്‍ഗനൈസിംഗ് പ്രസിഡന്‍റ് സിറിയക് തലച്ചെല്ലൂര്‍, സ്റ്റെഫിന്‍ ചാക്കോ, ജെഫിന്‍ ജോസഫ്, ഷിന്‍സണ്‍ വര്‍ഗീസ് , ത്രേസ്യാമ്മ ജയിംസ് തുടങ്ങിയവര്‍ പ്രസംഗിക്കും. മരിയ ജോസ്, ലിനിമോള്‍ അലക്‌സ്, ജോമോള്‍ ജയിംസ് തുടങ്ങിയവര്‍ നേതൃത്വം നല്‍കും.

കിടങ്ങറ-കുന്നങ്കരി പിഡബ്ല്യുഡി റോഡ് ഉയർത്തണമെന്ന് പൗരാവലി

കുട്ടനാട്: വെളിയനാട് പഞ്ചായത്തിലെ മൂന്നു മുതൽ ആറുവരെ വാർഡുകളിലെ ജനങ്ങളുടെ ഏകയാത്രാമാർഗമായ കിടങ്ങറ- കുന്നങ്കരി റോഡ് ചെറിയ വെള്ളപ്പൊക്കത്തിൽപ്പോലും നാലടി വെള്ളം കെട്ടിക്കിടക്കുന്ന സാഹചര്യമാണ് നിലനിൽക്കുന്നത്. നൂറുകണക്കിന് സ്വകാര്യ വാഹനങ്ങൾ കൂടാതെ ഇരുപതിനു മുകളിൽ സ്കൂൾ ബസുകളും കുന്നങ്കരി ബേത്‌ലഹേം പള്ളി ജംഗ്ഷനിൽ എത്തിയാണ് കുട്ടികളെ ചങ്ങനാശേരിക്കും കുട്ടനാട്ടിലെ വിവിധ സ്കൂളുകളിലേക്കും എത്തിക്കുന്നത്. തുടരെ വെള്ളപ്പൊക്കം ഉണ്ടാകുന്നതിനാൽ കുട്ടികളുടെ പഠനം ആഴ്ചകളോളും മുടങ്ങുന്ന സാഹചര്യവും ഉണ്ട്. കൂടാതെ പള്ളികൾ, ക്ഷേത്രങ്ങൾ, വില്ലേജ്, പഞ്ചായത്ത്, സപ്ലൈകോ എന്നീ സ്ഥലങ്ങളിലേക്കും പോകാൻ ഏക മാർഗം കിടങ്ങറ-കുന്നങ്കരി റോഡാണ്. ഈ റോഡ് അടിയന്തരമായി ഉയർത്തി നിർമിക്കണമെന്നും ഇതിനായി ആവശ്യമായ ഫണ്ട് അനുവദിക്കാൻ പിഡബ്ലു ഡി വകുപ്പ് തയാറാകണമെന്നും കുട്ടനാട് എംഎൽഎ അടിയന്തര ഇടപെടൽ നടത്തണമെന്നും കിടങ്ങറ- കുന്നങ്കരി പൗരാവലി ആവശ്യപ്പെട്ടു. റോഡിന്‍റെ നിർമാണത്തിന് ഫണ്ട് അനുവദിക്കാത്തപക്ഷം ശക്തമായ സമരപരിപാടികൾക്ക് രൂപം നൽകാനും കുന്നങ്കരിൽ ചേർന്ന പൗരാവലിയുടെ യോഗത്തിൽ തീരുമാനിച്ചു. പ്രസിഡന്‍റ് എ.കെ. സലിം അരീശേരിൽ അധ്യക്ഷത വഹിച്ചു. ജനറൽ സെക്രട്ടറി ഔസേപ്പച്ചൻ ചെറുകാട്, ട്രഷറർ റജി കൊച്ചുപറമ്പിൽ, ജോണി പത്രോസ് പുലിമുഖം, ബേബിച്ചൻ കണിയാംപറമ്പിൽ, ബിജു വേലങ്കേരിച്ചിറ,രാമു മെതികളം, അജികുമാർ അജിഭവനം, ജോയിച്ചൻ കളത്തിൽ, പ്രദീപ് കിഴക്കേക്കുറ്റ് എന്നിവർ പ്രസംഗിച്ചു.

ഗവര്‍ണര്‍ പദവിക്കു നിരക്കാത്ത പ്രവര്‍ത്തനങ്ങള്‍ നടത്തുന്നു: കൊടിക്കുന്നില്‍ സുരേഷ്

മാവേലിക്കര: ഗവര്‍ണര്‍ പദവിക്കു നിരക്കാത്ത പ്രവര്‍ത്തനങ്ങള്‍ തുടര്‍ച്ചയായി നടത്തുന്നതു മൂലം രാജ്ഭവന്‍ ആര്‍എസ്എസിന്‍റെ ആസ്ഥാനമായി മാറുകയാണെന്ന് കോണ്‍ഗ്രസ് പ്രവര്‍ത്തകസമിതി അംഗവും മാവേലിക്കര എംപിയുമായ കൊടിക്കുന്നില്‍ സുരേഷ്. ഭരണഘടനാപരമായ ഉത്തരവാദിത്വം നിറവേറ്റേണ്ട സ്ഥാനം രാഷ്ട്രീയരംഗത്തുള്ള ആര്‍എസ്എസ് തിട്ടൂരങ്ങള്‍ നടപ്പാക്കുന്നതിനു വേണ്ടി ദുരുപയോഗം ചെയ്യുകയാണ് ഗവര്‍ണര്‍ രാജേന്ദ്ര അര്‍ലേക്കര്‍. ഗവര്‍ണര്‍ പദവിയില്‍ പ്രവേശിക്കുന്നതിനു മുമ്പ് രാഷ്ട്രീയപ്രവര്‍ത്തനം ഉണ്ടായിരിക്കാം. പക്ഷേ, ഭരണഘടനാതലത്തില്‍ ഉയര്‍ന്ന ഉത്തരവാദിത്വം വഹിക്കേണ്ട സാഹചര്യത്തില്‍ ആര്‍എസ്എസിന്‍റെ ഏജന്‍റാകുന്നതിന് യാതൊരു നീതീകരണവും ഇല്ല. സംസ്ഥാനത്തെ സുപ്രധാന ഭരണഘടനാ സ്ഥാനമായ ഗവര്‍ണര്‍പദവി മുതലെടുത്ത് ഒരു വ്യക്തി ജനാധിപത്യ തത്വങ്ങളെ ചോദ്യംചെയ്യുന്ന രീതിയില്‍ സംസാരിക്കുകയാണ്. രാജേന്ദ്ര അര്‍ലേക്കര്‍ മനഃപൂര്‍വം രാജ്ഭവനെ വിവാദത്തിലേക്കു വലിച്ചിഴയ്ക്കുകയാണ്. ഇത് അപകടകരമായ പ്രവണതകള്‍ക്ക് വഴിവയ്ക്കും. ഇത്തരത്തില്‍ ഗവര്‍ണര്‍ ഭരണഘടനാ വിരുദ്ധ പ്രവര്‍ത്തനങ്ങള്‍ക്ക് നേതൃത്വം നല്‍കുമ്പോള്‍ മുഖ്യമന്ത്രി എന്തുകൊണ്ട് രാഷ്ട്രപതിയുടെ ശ്രദ്ധയിലേക്ക് ഇതു കൊണ്ടുചേരുന്നില്ല എന്നതും വലിയ ചോദ്യമാണ്. മന്ത്രിമാര്‍ രാജ്ഭവനില്‍ പോകുന്നത് നാടകങ്ങളായി മാറുകയാണ്. ഗവര്‍ണറുടെ നടപടി പൊതുജന താത്പര്യത്തിനെതിരാണെന്നും എന്നാല്‍ മുഖ്യമന്ത്രിക്കും സര്‍ക്കാരിനും ഗവര്‍ണറെ തുറന്ന് എതിര്‍ക്കാനുള്ള ധൈര്യം ഇല്ലെന്നും കൊടിക്കുന്നില്‍ സുരേഷ് കുറ്റപ്പെടുത്തി. കേന്ദ്രസര്‍ക്കാരിന്‍റെ ഇത്തരം നിലപാടുകള്‍ക്കെതിരേ പ്രതികരിക്കാന്‍ പോലും ഭയക്കുന്ന മുഖ്യമന്ത്രി പിണറായി വിജയനും സര്‍ക്കാരും ശക്തമായ നീതിനിഷേധത്തിന്‍റെ ഭാഗമാണ്. ആര്‍എസ്എസിന്‍റെ അജണ്ടകളില്‍ വഴങ്ങാനും ഭരണഘടനാ സ്ഥാപനങ്ങളുടെ നിഷേധത്തില്‍ പങ്കാളിയാകാനും തയാറാണ് ഇപ്പോഴത്തെ ഇടതുപക്ഷ സര്‍ക്കാര്‍. ഇതു ജനാധിപത്യത്തെ ചവിട്ടിമെതിക്കുന്ന അപമാനകരമായ സാഹചര്യമാണെന്നും എംപി പറഞ്ഞു.

ദേശീയപാതയിലെ യാത്രാക്ലേശത്തിന് ബദലായ റോഡിലും കുണ്ടും കുഴിയും

തുറവൂര്‍: ദേശീയപാതയിലെ അരൂര്‍ -തുറവൂര്‍ ഉയരപ്പാത നിര്‍മാണവുമായി ബന്ധപ്പെട്ടുള്ള ഗതാഗതക്കുരുക്ക് ഒഴിവാക്കാന്‍ വാഹനങ്ങള്‍ വഴിതിരിച്ചു വിടുന്ന റോഡുകളിലും യാത്രക്കാരെ കാത്തിരിക്കുന്നത് അപകടക്കുഴികള്‍. നിലവില്‍ വാഹനങ്ങള്‍ വഴിതിരിച്ചു വിടുന്ന തുറവൂര്‍ തൈക്കാട്ടുശേരി, കുമ്പളങ്ങി -തുറവൂര്‍ റോഡുകള്‍ പലയിടത്തും തകര്‍ന്ന നിലയിലാണ്. അരൂര്‍ -തുറവൂര്‍ ദേശീയപാതയിലെ കുഴികളില്‍നിന്നു രക്ഷതേടി സമാന്തര റോഡുകള്‍ തെരഞ്ഞെടുത്താലും കുഴികളില്‍നിന്നു കുഴികളിലേക്കു സഞ്ചരിക്കാനാണു യാത്രക്കാരുടെ വിധി. രണ്ടു റോഡുകളും പൊതുമരാമത്ത് വകുപ്പിന്‍റെ കീഴിലാണെങ്കിലും കഴിഞ്ഞ വര്‍ഷത്തെ മഴക്കാലത്തു ദേശീയപാതയുടെ നിര്‍മാണച്ചുമതലയുള്ള കരാര്‍ കമ്പനി ഈ റോഡുകളിലെ കുഴികളടച്ച് അറ്റകുറ്റപ്പണി നടത്തിയിരുന്നു. മഴക്കാലത്ത് ദേശീയപാത തകര്‍ന്നു യാത്രക്കാരുടെ പ്രതിഷേധം രൂക്ഷമായതോടെ കലക്ടറുടെ നിര്‍ദേശപ്രകാരമായിരുന്നു ഈ നടപടി. എന്നാല്‍ ഇതോടെ റോഡ് അറ്റകുറ്റപ്പണിയില്‍നിന്നു പൊതുമരാമത്ത് വകുപ്പ് പിന്മാറി. പൊതുമരാമത്ത് വകുപ്പിന്‍റെ റോഡ് അറ്റകുറ്റപ്പണി നടത്തേണ്ടത് തങ്ങളല്ലെന്നാണു ദേശീയപാതയുടെ കരാര്‍ കമ്പനിയുടെ ഇപ്പോഴത്തെ നിലപാട്. ഇതോടെ വഴിയില്ലാതെ പെരുവഴിയിലായതു യാത്രക്കാര്‍. എഴുപുന്ന പാറായിക്കവല മുതല്‍ കുമ്പളങ്ങി പാലം വരെയുള്ള ഭാഗത്താണു ഏറ്റവും കൂടുതല്‍ കുഴികള്‍. മഴ തുടങ്ങിയതോടെ വെള്ളം നിറഞ്ഞ കുഴികള്‍ അപകടഭീഷണിയുയര്‍ത്തുന്നു. തോപ്പുംപടി, എറണാകുളം ഭാഗത്തേക്കു പോകുന്ന യാത്രക്കാരില്‍ ഭൂരിഭാഗവും തുറവൂര്‍ - കുമ്പളങ്ങി റോഡ് വഴിയാണ് പോകുന്നത്. തുറവൂര്‍ ജംഗ്ഷനു പടിഞ്ഞാറു ഭാഗത്തെ വളവിലും തുറവൂര്‍-ടിഡി റെയില്‍വേ ഗേറ്റിലും വന്‍ കുഴികളാണ്. തുറവൂര്‍ -കുമ്പളങ്ങി റോഡില്‍ എഴുപുന്ന ഭാഗത്തെ കുഴികള്‍ക്ക് ഒരടി വരെ ആഴമുണ്ട്. ടിഡി റെയില്‍വേ ഗേറ്റിന് അരികിലുള്ള കുഴിയില്‍ നാട്ടുകാര്‍ മെറ്റലും മണ്ണും ഉപയോഗിച്ചു അടച്ചിരുന്നെങ്കിലും വാഹനങ്ങള്‍ കയറിയിറങ്ങി എല്ലാം പഴയ സ്ഥിതിയായി. വെള്ളം കെട്ടിനില്‍ക്കുന്നതിനാല്‍ രാത്രി ആഴമറിയാതെ വാഹനങ്ങള്‍ കുഴിയില്‍ വീഴുന്നതും പതിവായി. നാലുകുളങ്ങര, വല്ലേത്തോട്, കരുമാഞ്ചേരി, എഴുപുന്ന, കുമ്പളങ്ങി പാലത്തിനു തെക്കുഭാഗത്തും വലിയ കുഴികള്‍ നിറഞ്ഞു. തുറവൂര്‍ ആലപ്പുഴ-എറണാകുളം ജില്ലകളെ തീരദേശവുമായി ബന്ധിപ്പിക്കുന്ന എഴുപുന്ന-കുമ്പളങ്ങി പാലത്തിന്‍റെ തെക്കുഭാഗത്തെ അപ്രോച്ച് റോഡ് പൂര്‍ണമായും തകര്‍ന്നു.

വായനാദിനാചരണം: പുസ്തകവണ്ടി പര്യടനം നടത്തി

മങ്കൊമ്പ്: വായനാദിനാചരണത്തിന്‍റെ ഭാഗമായി ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂൾ, ലിയോ തേർട്ടീന്ത് വായനശാല എന്നിവയുടെ സംയുക്താഭിമഖ്യത്തിൽ പുസ്തകവണ്ടി പര്യടനം നടത്തി. കൊണ്ടാക്കൽ, പടഹാരം, ചമ്പക്കുളം ബസ് സ്റ്റാൻഡ്, തെക്കേക്കര, പള്ളിക്കൂട്ടുമ്മ, നസ്രത്ത്, പൊങ്ങ, നർബോനപുരം എന്നിവിടങ്ങളിൽ പര്യടനം നടത്തിയ വണ്ടി വിദ്യാർഥികൾക്ക് പുസ്തകങ്ങൾ വിതരണം ചെയ്യുകയും വായനശാലയുടെ സൗജന്യ അംഗത്വ കാർഡുകൾ നൽകുകയും ചെയ്തു. ബാലസാഹിത്യകൃതികൾ അടങ്ങുന്ന എണ്ണൂറോളം പുസ്തകങ്ങളായിരുന്നു പുസ്തകവണ്ടിയിലുണ്ടായിരുന്നത്. സ്‌കൂൾ അങ്കണത്തിൽ നടന്ന വായന മാസാചരണ സമ്മേളനം നെടുമുടി ഗ്രാമപഞ്ചായത്ത് വൈസ് പ്രസിഡന്‍റ് സാജു ആന്‍റണി ഉദ്ഘാടനം ചെയ്തു. ഗ്രാമപഞ്ചായത്തംഗം സോഫിയമ്മ മാത്യു അധ്യക്ഷത വഹിച്ച ചടങ്ങിൽ കുട്ടനാട് താലൂക്ക് ലൈബ്രറി കൗൺസിൽ പ്രസിഡന്‍റ് കെ. ഗോപകുമാർ പി.എൻ. പണിക്കർ അനുസ്മരണം നടത്തി. വായനശാല പ്രസിഡന്‍റ് ടോമി ജോസഫ്, കവി ഫിലിപ്പോസ് തത്തംപള്ളി, വായനശാല ലൈബ്രേറിയൻ ജേക്കബ് ആന്‍റണി, ഹെഡ്മാസ്റ്റർ പ്രകാശ്. ജെ. തോമസ്, സീനിയർ അധ്യാപിക പി.വി. ഷൈനി, കോ-ഓർഡിനേറ്റർ ജോമോൻ വർഗീസ് തുടങ്ങിയവർ പ്രസംഗിച്ചു.

റോഡുകളിലെ വെള്ളക്കെട്ടിനെതിരേ വള്ളംകളി സമരം നടത്തി

മങ്കൊമ്പ് : വെള്ളക്കെട്ടിനെത്തുടർന്ന് ഗ്രാമീണ റോഡുകളിൽ ആഴ്ചകളായി ഗതാഗതം തടസപ്പെടുന്നതിൽ പ്രതിഷേധിച്ച് യുഡിഎഫ് വെളിയനാട് മണ്ഡലം കമ്മിറ്റിയുടെ നേതൃത്വത്തിൽ റോഡിൽ വള്ളംകളി മത്സരം നടത്തി. വെളിയനാട് പുളിഞ്ചുവട് ജംഗ്ഷനിലെ റോഡിൽ നടത്തിയ ചെറുവള്ളംകളി മത്സരം കെപിസിസി സെക്രട്ടറി കറ്റാനം ഷാജി ഉദ്ഘാടനം നടത്തി. സ്വാമിനാഥൻ കമ്മീഷൻ റിപ്പോർട്ട് പ്രകാരം കായലുകളും ആറുകളും തോടുകളും ആഴംകൂട്ടൽ പദ്ധതി നടപ്പിലാക്കാത്ത ഇടതു സർക്കാരിന്‍റെ ക്രൂരമായ നിസംഗതയാണ് കുട്ടനാട്ടുകാർ ഇന്നനുഭവിക്കുന്ന ദുരിതത്തിനു കാരണമെന്ന് അദ്ദേഹം പറഞ്ഞു. കേരള കോൺഗ്രസ് ജില്ലാ പ്രസിഡന്‍റ് ജേക്കബ് ഏബ്രഹാം വിജയികൾക്ക് സമ്മാനങ്ങൾ വിതരണം ചെയ്തു. യുഡിഎഫ് മണ്ഡലം ചെയർമാൻ ടി.ഡി. അലക്‌സാണ്ടർ അധ്യക്ഷത വഹിച്ച ചടങ്ങിൽ സി.വി. രാജീവ്, സാബു തോട്ടുങ്കൽ, ജി. സൂരജ്, എ.കെ. കുഞ്ചറിയ, സന്തോഷ് തോമസ്, റോഫിൻ ജേക്കബ്, ജോർജ് ചന്ദ്രത്തുവാക്കൽ, സനിൽകുമാർ മൂലയിൽ തുടങ്ങിയവർ പ്രസംഗിച്ചു.

ലതികയ്ക്ക് നാല്‍പ്പതാണ്ടിന്‍റെ യോഗയുടെ കരുത്തില്‍ എഴുപതിന്‍റെ ചെറുപ്പം

ആര്‍. മനു മാവേലിക്കര: ഈ എഴുപത്തൊന്നുകാരി ഇന്നും പതിനെട്ടിന്‍റെ ചെറുപ്പത്തിലാണ്. രഹസ്യം തിരക്കിയപ്പോള്‍ അതു യോഗയാണത്രെ. മാവേലിക്കര കൊറ്റാര്‍കാവ് പാറയില്‍ നാട്ടകത്ത് ലതികാ രാജനാണ് നാലു പതിറ്റാണ്ടു കാലത്തെ യോഗചര്യകൊണ്ട് മറ്റു പലര്‍ക്കും അദ്ഭുതം തോന്നത്തക്ക വിധത്തില്‍ ചുറുചുറുക്കോടെ നടക്കുന്നത്. 31-ാം വയസില്‍ അഞ്ചാം ക്ലാസുകാരനായ മൂത്തമകന്‍ രാജേഷില്‍നിന്നാണ് ലതിക യോഗാഭ്യാസം പഠിച്ചുതുടങ്ങുന്നത്. രാജേഷ് അന്ന് പാലക്കാട് കല്ലേക്കാട് വ്യാസ വിദ്യാപീഠത്തില്‍ അഞ്ചാം ക്ലാസ് വിദ്യാര്‍ഥിയായിരിക്കേ അവിടുത്തെ പാഠ്യപദ്ധതിയില്‍ യോഗ പരിശീലനവുമുണ്ടായിരുന്നു. അന്നുമുതല്‍ ഇന്നുവരെ ലതികയുടെ ദിനചര്യയുടെ ഭാഗമാണ് യോഗ. പിന്നീട് പല മാധ്യമങ്ങള്‍ വഴിയും ലതിക യോഗയെ ക്കുറിച്ച് കൂടുതല്‍ അറിയുകയും തന്‍റെ യോഗചര്യയെ മെച്ചപ്പെടുത്തുകയും ചെയ്തു. യോഗ കൂടാതെ ഒരു ജിംനാസ്റ്റിക് ട്രൈയിനികൂടിയാണ് ലതിക. പുന്നമൂട് പ്രവര്‍ത്തിക്കുന്ന വനിതകള്‍ക്കു മാത്രമായി സജ്ജീകരിച്ചിരിക്കുന്ന ജിമ്മില്‍ ചെറുപ്പക്കാരികളെക്കാള്‍ വലിയ പ്രകടനമാണ് എഴുപതിന്‍റെ കരുത്തില്‍ ലതിക കാഴ്ചവയ്ക്കുന്നത്. ഇരുപത് പുഷ് അപ്, പത്ത് ചിന്നിംഗുകള്‍, മൂന്ന് സെറ്റായി അറുപതോളം ചെസ്റ്റ് പ്രസ്, കൂടാതെ സാമാന്യം തരക്കേടില്ലാത്ത ഭാരത്തില്‍ ലെഗ്പ്രസും ചെയ്യുമെന്ന് സഹ ജിംനാസ്റ്റിക് പരിശീലകരും സാക്ഷ്യപ്പെടുത്തുന്നു. കേവലം ആറുമാസമായിട്ടേയുള്ളു തന്‍റെ ജിംനാസ്റ്റിക് പരിശീലനത്തിനെന്ന് ലതിക പറയുന്നു. കൂടാതെ സൂംബ ഡാന്‍സ്, തിരുവാതിര എന്നിവയുമുണ്ട് ലതികയുടെ ലിസ്റ്റില്‍. ആഴ്ചയില്‍ ഒരിക്കലാണ് സൂംബ പരിശീലനമെങ്കില്‍ ദിവസവും രാവിലത്തെ യോഗയും ജിമ്മും കഴിഞ്ഞ് വൈകിട്ട് നാലു മുതല്‍ മുള്ളികുളങ്ങര എന്‍എസ്എസ് കരയോഗം ഹാളില്‍ തിരുവാതിര പരിശീലനവുമുണ്ട്. ഇതിനിടയ്ക്കുള്ള സമയം മുള്ളിക്കുളങ്ങരയും മാവേലിക്കരയുമുള്ള വീട്ടിലെ കാര്യങ്ങളും നോക്കിനടത്തുന്നതുകൊണ്ട് വലിയ തിരക്കിലാണെപ്പോഴും ലതിക. എഴുപത്തിയൊന്നാം വയസിലും തന്‍റെ ഇന്നോവാ ക്രിസ്റ്റ കാറുമായി എന്താവശ്യത്തിനും പുറത്തുപോകുന്നതും ലതിക തന്നെയാണ്. ഈ പ്രായത്തില്‍ ജിമ്മൊക്കെ എങ്ങനെ ചെയ്യുന്നു എന്ന ചോദ്യത്തിന് യോഗ പകര്‍ന്നുതന്ന മനോധൈര്യവും കരുത്തുമുണ്ടെങ്കില്‍ എനിക്ക് എന്തുമാകുമെന്നതായിരുന്നു ഉത്തരം. പുലര്‍ച്ചെ മൂന്നിനാരംഭിക്കുന്ന ദിനചര്യയാണ് ലതികയുടേത്. ഒരു മണിക്കൂര്‍ യോഗയും രണ്ടു മണിക്കൂര്‍ ജിം പരിശീലനവും ഒന്നര മണിക്കൂര്‍ നീളുന്ന തിരവാതിര പരിശീലനവും ചേരുന്നതാണ് ഒരു ദിവസത്തെ വ്യായാമ ദിനചര്യയെന്നും ഇതിനൊപ്പം ഭക്ഷണ ക്രമീകരണവും ചേരുന്നതാണ് തന്‍റെ ആരോഗ്യ രഹസ്യമെന്നും ലതികവെളിപ്പെടുത്തുന്നു. എല്ലാവരും ഇത്തരത്തില്‍ യോഗയുമൊത്തുള്ള ഒരു ജീവിതക്രമം മുന്‍പോട്ടു കൊണ്ടുപോകുകയാണെങ്കില്‍ ജീവിതം സന്തോഷപ്രദവും ആരോഗ്യപൂര്‍ണവുമാക്കാമെന്നതാണ് ലതികയുടെ നിലപാട്. മാവേലിക്കര ബുദ്ധ ജംഗ്ഷനു സമീപമുള്ള വീട്ടില്‍ മൂന്നാം നിലയിലേക്കും മറ്റും പോകാന്‍ ലിഫ്റ്റുണ്ടെങ്കിലും കോണിപ്പടികള്‍ കയറി മാത്രമേ ലതിക പോകാറുള്ളു. മൂന്നാം നിലയിലാണ് യോഗാചര്യക്കും മറ്റുമായുള്ള മുറി സ്ഥിതിചെയ്യുന്നത്. വ്യാപാരിയായ ഭര്‍ത്താവ് രാജശേഖരനും പ്രവാസികളായ മകന്‍ രാജേഷും മകള്‍ ലക്ഷ്മിയും അഭിഭാഷകനായ ഇളയമകന്‍ കൃഷ്ണനുണ്ണിയും ലതികയുടെ ജീവിതക്രമത്തിന് പൂര്‍ണ പിന്തുണയുമായി കൂടെയുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]