ADVERTISEMENT

ADVERTISEMENT

പ്രതിഭകളെ ആദരിച്ചു

കൊട്ടാരക്കര : വിവിധ പരീക്ഷകളിൽ ഉന്നത വിജയം നേടിയ വിദ്യാർഥി കളെയും ഇന്ത്യൻ ബുക്ക്‌ ഓഫ് റിക്കാർഡ് ജേതാവ് എസ്. സുജിത്തിനെയും നീലേശ്വരം ജവഹർ വായനശാല യുടെ ആഭിമുഖ്യത്തിൽ ടിവി അവതാരകൻ നീലേശ്വരം സദാശിവൻ ആദരിച്ചു.പ്രസിഡന്‍റ് എം.ആർ. ചന്ദ്രന്‍റെ അധ്യക്ഷതയിൽ കൂടിയ സമ്മേളനം നേതൃ സമിതി കൺവീനർ കെ. ശശികുമാർ ഉദ് ഘാടനം ചെയ്തു.

ADVERTISEMENT

വിദ്യാഭ്യാസ മേഖലയില്‍ 5000 കോടിയുടെ നിര്‍മാണ പ്രവര്‍ത്തനങ്ങള്‍ നടപ്പിലാക്കി: മന്ത്രി വി. ശിവന്‍കുട്ടി

കൊല്ലം: വിദ്യാഭ്യാസമേഖലയില്‍ 5000 കോടി രൂപയുടെ നിര്‍മാണ പ്രവര്‍ത്തനങ്ങള്‍ നടപ്പിലാക്കിയെന്ന് മന്ത്രി വി. ശിവന്‍കുട്ടി. ചിതറ സര്‍ക്കാര്‍ എല്‍പി സ്‌കൂളിലെ പുതിയ ബഹുനില കെട്ടിടം ഉദ്ഘാടനം ചെയ്യുകയായിരുന്നു അദ്ദേഹം. ഭാരമേറിയ ബാഗുകളുമായി സ്‌കൂളിലെ ബഹുനില കെട്ടിടം കയറുന്നതു ബുദ്ധിമുട്ടാണെന്ന വിദ്യാര്‍ഥിയുടെ കത്തു പരിഗണിച്ച് ലിഫ്റ്റ് സംവിധാനം സ്‌കൂളുകളില്‍ ഏര്‍പ്പെടുത്തി വരികയാണ്. ഇതുവരെ 45000 സ്‌കൂളുകളില്‍ അത്യാധുനിക സംവിധാനങ്ങളോട് കൂടിയ ക്ലാസ്മുറികള്‍ ഒരുക്കി. നിര്‍മിത ബുദ്ധിയെക്കുറിച്ച് പഠിക്കാന്‍ വിദ്യാലയങ്ങളില്‍ സംവിധാനം ലഭ്യമാക്കി. ജില്ലാ അടിസ്ഥാനത്തില്‍ അധ്യാപകര്‍ക്ക് പരിശീലനവും നല്‍കി. ഒന്നു മുതല്‍ 10 വരെയുള്ള പാഠപുസ്തകങ്ങള്‍ കാലാനുസൃതമായി പരിഷ്‌കരിച്ചു. കലാരംഗത്തും കായികരംഗത്തും മികവുപുലര്‍ത്താന്‍ വിദ്യാര്‍ഥികളെ പ്രാപ്തരാക്കുമെന്നും അദ്ദേഹം അറിയിച്ചു. മന്ത്രി ജെ.ചിഞ്ചുറാണി അധ്യക്ഷയായി. എന്‍.കെ.പ്രേമചന്ദ്രന്‍ എംപി മുഖ്യപ്രഭാഷണം നടത്തി. ചിതറ പഞ്ചായത്ത് പ്രസിഡന്‍റ് മടത്തറ അനില്‍, ചടയമംഗലം ബ്ലോക്ക് പഞ്ചായത്ത് പ്രസിഡന്‍റ് ലതികാ വിദ്യാധരന്‍, ജില്ലാ പഞ്ചായത്ത് വികസന സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ജെ. നജീബത്ത് തുടങ്ങിയവര്‍ പ്രസംഗിച്ചു.

സമസ്ത മേഖലയിലും വികസന തുടര്‍ച്ച: മന്ത്രി കെ.എന്‍.ബാലഗോപാല്‍

കൊല്ലം: സമസ്തമേഖലയിലും വികസനതുടര്‍ച്ച സാധ്യമാക്കുകയാണ് സര്‍ക്കാരെന്ന് മന്ത്രി കെ.എന്‍. ബാലഗോപാല്‍. ക്ലാപ്പന പഞ്ചായത്ത് കുടുംബാരോഗ്യ കേന്ദ്രത്തിന് ശിലയിടൽ ചടങ്ങ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഏറ്റവും മെച്ചപ്പെട്ട ആരോഗ്യ സംവിധാനങ്ങളാണ് ഇവിടെയുള്ളത്. 42 ലക്ഷം കുടുംബങ്ങള്‍ക്ക് കാരുണ്യ പദ്ധതിപ്രകാരം അഞ്ചു ലക്ഷം രൂപയുടെ ചികിത്സ സൗജന്യമായിലഭ്യമാക്കുന്നു. ഏഴ് ലക്ഷത്തോളം പേര്‍ക്ക് ഹൃദയശസ്ത്രക്രിയ സൗജന്യമായി നടത്തി. കൂടുതല്‍ ചികിത്സാ സൗകര്യങ്ങള്‍ ഒരുക്കി പൊതുജനാരോഗ്യം തുടര്‍ന്നും സംരക്ഷിക്കും. ലൈഫ് മിഷന്‍ മുഖേന സ്വീകരിച്ച അഞ്ചു ലക്ഷം അപേക്ഷകളില്‍ നാല് ലക്ഷത്തിലധികം വീടുകള്‍ പൂര്‍ത്തിയാക്കിയതായും മന്ത്രി വ്യക്തമാക്കി. സി.ആര്‍ .മഹേഷ് എംഎല്‍എ അധ്യക്ഷനായി. ക്ലാപ്പന ഗ്രാമപഞ്ചായത്ത് പ്രസിഡന്‍റ് മിനിമോള്‍, ഓച്ചിറ ബ്ലോക്ക് പഞ്ചായത്ത് പ്രസിഡന്‍റ് എ. അനിരുദ്ധന്‍, ജില്ലാ പഞ്ചായത്ത് സ്ഥിരം സമിതി അധ്യക്ഷ വസന്താ രമേശ്, മത്സ്യഫെഡ് ചെയര്‍മാന്‍ ടി.മനോഹരന്‍ തുടങ്ങിയവര്‍ പങ്കെടുത്തു.

വിദ്യാഭ്യാസത്തിന്‍റെ വളര്‍ച്ച നാടിന്‍റെ അഭിവൃദ്ധിക്ക് അനിവാര്യം: എന്‍.കെ. പ്രേമചന്ദ്രന്‍ എംപി

അഞ്ചല്‍ : വിദ്യാഭ്യാസത്തിന്‍റെ വളര്‍ച്ചയും സംരക്ഷണവും നാടിന്‍റെ അഭിവൃദ്ധിക്ക് അനിവാര്യമെന്ന് എന്‍.കെ. പ്രേമചന്ദ്രന്‍ എംപി. ഏരൂര്‍ പഞ്ചായത്തിലെ പാണയം സര്‍ക്കാര്‍ വെല്‍ഫയര്‍ സ്കൂളില്‍ എന്‍.കെ. പ്രേമചന്ദ്രന്‍റെ പ്രാദേശിക വികസന ഫണ്ടില്‍ നിന്നും അനുവദിച്ച 30 ലക്ഷം രൂപ ഉപയോഗിച്ച് നിര്‍മിച്ച കെട്ടിടത്തിന്‍റെയും കെട്ടിടത്തില്‍ പഞ്ചായത്ത് അഞ്ച് ലക്ഷം രൂപ വിനിയോഗിച്ച് സജ്ജീകരിച്ച എസി സ്മാര്‍ട്ട് ക്ലാസ് റൂമിന്‍റെയും ഉദ്ഘാടനം നിർവഹിച്ച് പ്രസംഗിക്കുകയായിരുന്നു പ്രേമചന്ദ്രൻ. വൈസ് പ്രസിഡന്‍റ് വി. രാജി, ജില്ലാ പഞ്ചായത്ത് അംഗം സി. അംബികാകുമാരി, ഉപജില്ലാ വിദ്യാഭ്യാസ ഓഫീസര്‍ ജഹ്ഫറുദീന്‍, ഏരൂര്‍ സുഭാഷ്, ഡി.ബിനുരാജ്, ഗീവര്‍ഗീസ്, പി.ജി. പ്രദീപ്, സത്യരാജന്‍, നാസര്‍ഖാന്‍, സ്കൂള്‍ എച്ച്എം എച്ച്. ലിസ തുടങ്ങിയവര്‍ പ്രസംഗിച്ചു.

ഏരൂർ പഞ്ചായത്തിലെ ആംബുലൻസ് നടത്തിപ്പ് അഴിമതി ആരോപണവുമായി കോണ്‍ഗ്രസ്

അഞ്ചല്‍ : പുനലൂർ എംഎല്‍എ യുടെ ഫണ്ട് ഉപയോഗിച്ച് ഏരൂർ പഞ്ചായത്തിനു വേണ്ടി വാങ്ങിയ ആംബുലൻസിന്‍റെ നടത്തിപ്പുമായി ബന്ധപ്പെട്ട് അഴിമതി ആരോപണവുമായി കോൺഗ്രസ് രംഗത്ത്. ആംബുലൻസ് പഞ്ചായത്തിന്‍റെ അധീനതയിലുള്ള പകൽ വീട്ടിൽ ഉപയോഗിക്കാതെ കിടക്കുന്നത് ഒഴിവാക്കി പൊതുജനങ്ങൾക്ക് ഉപയോഗപ്രദമായ രീതിയിൽ പ്രവർത്തിപ്പിക്കണമെന്ന് ആവശ്യപ്പെട്ട് കോൺഗ്രസ് ഏരൂർ മണ്ഡലം കമ്മിറ്റി നടത്തിയ സമരത്തെ തുടർന്ന് കഴിഞ്ഞ വര്‍ഷം ജൂലൈയില്‍ ആംബുലൻസ് ഹോസ്പിറ്റൽ മാനേജ്മെന്‍റ് കമ്മറ്റിക്ക് കൈമാറാൻ തീരുമാനിച്ചിരുന്നു. എന്നാൽ ഹോസ്പിറ്റൽ മാനേജ്മെന്‍റ് കമ്മിറ്റി ആംബുലൻസ് ഏറ്റെടുക്കാൻ വിസമ്മതിച്ചു. തുടർന്ന് പഞ്ചായത്ത് തന്നെ ആംബുലൻസിന്‍റെ പ്രവർത്തനമേൽനോട്ടം വഹിച്ച ുപോന്നു. ഭരണപക്ഷത്തെ ചില പ്രമുഖരുടെ ഒത്താശയോടുകൂടി ആംബുലൻസ് ഡിഎംഒ യ്ക്ക് കൈമാറാൻ ശ്രമം നടന്നെങ്കിലും കോൺഗ്രസ് പഞ്ചായത്ത് പ്രതിനിധികളും മണ്ഡലം കോൺഗ്രസ് കമ്മിറ്റിയും ചേർന്ന് നടത്തിയ സമരത്തെ തുടർന്ന് ആംബുലൻസ് പഞ്ചായത്ത് സെക്രട്ടറിയുടെ ഉടമസ്ഥതയിൽ നിലനിർത്താൻ തീരുമാനിച്ചു. എന്നാൽ പഞ്ചായത്ത് കമ്മിറ്റിയുടെ മിനിട്സ് പുറത്തുവന്നപ്പോൾ ആംബുലൻസിന്‍റെ നടത്തിപ്പിനായി ജില്ലാ മെഡിക്കൽ ഓഫീസർക്ക് കത്ത് അയക്കാൻ തീരുമാനിച്ചതായാണ് രേഖപ്പെടുത്തിയിട്ടുള്ളത്. കഴിഞ്ഞ ഒരു വർഷമായി ആംബുലൻസിന്‍റെ വരവ് ചെലവ് കണക്കുകളോ ലോഗ് ബുക്ക്, ട്രിപ്പ് ഷീറ്റ് അടക്കം മറ്റു യാതൊരുവിധമായ രേഖയും പഞ്ചായത്തിൽ ലഭ്യമല്ല. 11ന് കൂടിയ ഏരൂർ പഞ്ചായത്ത് ഭരണസമിതി യോഗത്തിൽ നാളിതുവരെയുള്ള കണക്കുകൾ പരിശോധിക്കുകയോ അതിനൊരു വ്യക്തത വരുത്തുകയോ ചെയ്യാതെ ഒരു തുക പഞ്ചായത്തിൽ അടയ്ക്കുവാൻ ഭരണകക്ഷി അംഗങ്ങൾ ഏകപക്ഷീയമായി തീരുമാനമെടുത്തു. അതിനെതിരേ കോൺഗ്രസ് പഞ്ചായത്ത് മെമ്പർമാർ വിയോജനക്കുറിപ്പ് നൽകിയെങ്കിലും അത് സ്വീകരിക്കാൻ പോലും തയാറാകാതെ പഞ്ചായത്ത് സെക്രട്ടറിയും പ്രസിഡന്‍റ് അടക്കമുള്ള ആളുകളും പഞ്ചായത്ത് കമ്മിറ്റിയിൽനിന്ന് ഇറങ്ങി പോവുകയായിരുന്നു. ഇതേ തുടർന്ന് കോൺഗ്രസ് പഞ്ചായത്ത് മെമ്പർമാർ ഓൺലൈനായി പഞ്ചായത്ത് സെക്രട്ടറിക്ക് പരാതി നൽകി. തുടർന്ന് പഞ്ചായത്ത് സെക്രട്ടറിയെ നേരിൽ കണ്ട് പരാതിയുടെ കോപ്പി നൽകുകയും ചെയ്തു. കോൺഗ്രസ് പഞ്ചായത്ത് മെമ്പർമാരായ അനുരാജ്, ഷീന കൊച്ചമ്മച്ചൻ, ഏരൂർ മണ്ഡലം കോൺഗ്രസ്കമ്മിറ്റി പ്രസിഡന്‍റ് ഗീവർഗീസ്, ബ്ലോക്ക് കോൺഗ്രസ് കമ്മിറ്റിയുടെ വൈസ് പ്രസിഡന്‍റ് പി.ടി. കൊച്ചുമ്മച്ചൻ, പത്തടി സുലൈമാൻ, ബിജു, ഷറഫ് തുടങ്ങിയവർ നേതൃത്വം നൽകി.

ലൈസൻസില്ല; വെടിമരുന്ന് സൂക്ഷിച്ചിരുന്ന കെട്ടിടം പൊളിച്ചുമാറ്റി

കൊട്ടാരക്കര : ഇഞ്ചക്കാട് ആയിരവല്ലിപ്പാറയിൽ ഖനനം ചെയ്യുന്നതിനായി വെടിമരുന്ന് സൂക്ഷിച്ചിരുന്ന കെട്ടിടം പൊ ളിച്ചുമാറ്റി. ഇരുമ്പ് പെട്ടികൾ മൈലം പഞ്ചായത്ത് അധികൃതർ നീക്കം ചെയ്തു. ഇതിനിടെ ക്വാറി ഉടമ ദേഹത്ത് പെട്രോൾ ഒഴിച്ച് ആത്മഹത്യാ ഭീഷണി മുഴക്കിയത് പരിഭ്രാന്തി സൃഷ്ടിച്ചു. ഇന്നലെ രാവിലെ 11ഓടെ മൈലം ഇഞ്ചക്കാട് ആയിരവല്ലി പാറയ്ക്കു സമീപമായിരുന്നു സംഭവം. ക്വാറി യോട് ചേർന്നുള്ള പുരയിടത്തിൽ ഉടമയായ മൈലം പഞ്ചായത്തിലെ ആറാം വാർഡ് മെമ്പറായ കോട്ടൂർ സന്തോഷിന്‍റെ കെട്ടിടം പൊളിച്ച് നീക്കം ചെയ്യാനാണ് പഞ്ചായത്ത്‌ അധികൃതരും പോലീസും എത്തിയത്. ഇയാളുടെ വെടിമരുന്ന് ശാലയ്ക്ക് കെട്ടിടാനുമതി പഞ്ചായത്ത്‌ നൽകിയിരുന്നില്ല. ലൈസൻസ് ഇല്ലാതെ യുള്ള അനധികൃത കെട്ടിടം പൊളിച്ചു മാറ്റാൻ പഞ്ചായത്ത്‌ സെക്രട്ടറി രേഖാമൂലം നോട്ടീസ് നൽകിയിരുന്നു. വെടിമരുന്ന് സൂക്ഷിച്ചിരുന്ന രണ്ട് വലിയ ഇരുമ്പ് പെട്ടികൾ നാട്ടുകാരിൽ ഭീതി ഉണർത്തിയിരുന്നു. കെട്ടിടവും, ഇരുമ്പ് പെട്ടികളും നീക്കം ചെയ്യാനുള്ള കാലാവധി ശനിയാഴ്ച കഴിഞ്ഞിരുന്നു. തുടർന്ന് ഇന്നലെ രാവിലെ പഞ്ചായത്ത്‌ സെക്രട്ടറിയുംജീവനക്കാരും കൊട്ടാരക്കര പോലീസിന്‍റെ സഹായത്തോടെ പൊളിച്ചുമാറ്റുകയായിരുന്നു. ഇതിനിടെയാണ് സന്തോഷ്‌ പെട്രോൾ ശരീരത്തിൽ ഒഴിച്ച് ആത്മഹത്യ ഭീഷണി മുഴക്കിയത്.സന്തോഷിനെ പോലീസ് അറസ്റ്റ് ചെയ്തു

ബിജെപി കൗൺസിലർ കൊട്ടാരക്കര നഗരസഭ സെക്രട്ടറിയെ ഉപരോധിച്ചു

കൊട്ടാരക്കര :വാർഡിലെ തെരുവ് വിളക്കുകൾ കത്താത്തതിൽ പ്രതിഷേധിച്ച് ബിജെപി കൗൺസിലർ കൊട്ടാരക്കര നഗരസഭ സെക്രട്ടറിയെ കത്തിച്ച റാന്തലുമായി ഉപരോധിച്ചു. 17ന് മുന്പ് തെരുവ് വിളക്കുകൾക്കാവശ്യമായ ബൾബുകൾ എത്തിച്ചു പരാതി പരിഹരിക്കുമെന്ന സെക്രട്ടറിയുടെ ഉറപ്പിന്മേൽ ഉപരോധ സമരം അവസാ നിപ്പിച്ചു. ബിജെപി നഗരസഭ പാർലമെന്‍ററി നേതാവായ അരുൺ കാടാംകുളം, കൗൺസിലർ മാരായ ഗിരീഷ് കുമാർ, സബിത സതീഷ്, ബിജെപി തൃക്കണ്ണമംഗൽ ഏരിയ പ്രസിഡന്‍റ് എസ് .ഉമേഷ്‌, രാഹുൽ മണികണ്ഠേശ്വരം എന്നിവർ ഉപരോധസമരത്തിൽ പങ്കെടുത്തു.

തിരുമുക്കിലെ അടിപ്പാത: ചാത്തന്നൂരിൽ ജനകീയ ധർണ ഇന്ന്

ചാത്തന്നൂർ:ദേശീയപാതയിൽ ചാത്തന്നൂർതിരുമുക്കിൽ വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ അടിപ്പാത പുതുക്കിപ്പണിയുക, പരവൂർ കൊട്ടിയം ഭാഗങ്ങളിൽ നിന്ന് വരുന്ന എല്ലാ സ്വകാര്യ ബസുകളും ചാത്തന്നൂർ ജംഗ്ഷനിൽ എത്തുക തുടങ്ങിയ ആവശ്യങ്ങൾ ഉയർത്തിക്കൊണ്ട് ചാത്തന്നൂർ വികസന സമിതിയുടെ നേതൃത്വത്തിൽ ഇന്ന് തിരുമുക്കിൽ ജനകീയ ധർണ സംഘടിപ്പിക്കുമെന്ന് ചാത്തന്നൂർ വികസന സമിതി ചെയർമാൻ ജി.രാജശേഖരനും കൺവീനർ ജി.പി.രാജഷും സമരസമിതി കൺവീനർ കെ.കെ.നിസാറും അറിയിച്ചു. ദേശീയപാത 66 വികസന ഭാഗമായി ചാത്തന്നൂർ തിരുമുക്കിൽ നിർമിച്ചിട്ടുള്ള അടിപ്പാത വലിയ വാഹനങ്ങൾക്ക് കടന്നു പോകുന്നതിന് കഴിയുന്നതല്ല. ചാത്തന്നൂർ തിരുമുക്ക് ജില്ലയിലെ വളരെ പ്രധാനപ്പെട്ട ഒരു ജംഗ്ഷനാണ്. ഒരു സംസ്ഥാന പാത ഇവിടെ നിന്നാണ് ആരംഭിക്കുന്നത്. പരവൂർ, വർക്കല, പൂതക്കുളം, തുടങ്ങിയ സ്ഥലങ്ങളിലേക്ക് യാത്ര ദുസഹമാക്കുന്ന തരത്തിൽ അശാസ്ത്രീയമായാണ് അടിപ്പാത നിർമിച്ചിരിക്കുന്നത്. ജനങ്ങളുടെ വികസന ആവശ്യങ്ങളോ, പ്രദേശത്തിന്‍റെ പ്രത്യേകതകളോ പരിഗണിക്കാതെയാണ് വിശദ പദ്ധതി രേഖ ( ഡിപിആർ ) തന്നെ തയാറാക്കിയിരിക്കുന്നത്. തിരുമുക്കിലെ അടിപ്പാത വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ നിർമിക്കണമെന്നാവശ്യപ്പെട്ട് ചാത്തന്നൂർ വികസന സമിതിബന്ധപ്പെട്ട ദേശീയപാത അഥോറിറ്റി അധികൃതർക്കും എം പി ക്കുംകേന്ദ്ര ഉപരിതല ഗതാഗത വകുപ്പ് മന്ത്രിക്കും നിവേദനങ്ങൾ സമർപ്പിച്ചിരുന്നു.പ്രോജക്ട് ഡയറക്ടറുമായി നടത്തിയ ചർച്ചകളിൽ ഈ വിഷയം അവതരിപ്പിക്കുകയും ചെയ്തിരുന്നു . പക്ഷേ അടിപ്പാതയുടെ കാര്യത്തിൽ ജനങ്ങൾക്ക് അനുകൂലമായ ഒരു മാറ്റം ദേശീയപാത അഥോറിറ്റിയുടെ ഭാഗത്തുനിന്നും ഇതുവരെയും ഉണ്ടായിട്ടില്ല. വികസന സമിതി ബന്ധപ്പെട്ടവർക്ക് ഈ വിഷയം പരിഹരിക്കണമെന്നാവശ്യപ്പെട്ട് വീണ്ടും നിവേദനങ്ങൾ സമർപ്പിക്കുകയുണ്ടായി. സ്വകാര്യ ബസുകൾ ചാത്തന്നൂർ സ്കൂളുകളിലേക്ക് പോകേണ്ട കുട്ടികളെയടക്കം തിരുമുക്കിൽ ഇറക്കിവിട്ടിട്ട് പോകുന്ന അവസ്ഥയാണുള്ളത്.ഒരു കിലോമീറ്ററിലധികം നടന്നാണ് അവരൊക്കെ ചാത്തന്നൂരിൽ എത്തുന്നത്. അധികാരികൾ ഈ കാര്യത്തിൽ യാതൊരു വിധ ഇടപെടലും നടത്തുന്നതുമില്ല. ഈ സാഹചര്യത്തിലാണ്തിരുമുക്കിൽ വലിയ വാഹനങ്ങൾക്ക് കടന്നു പോകാൻ കഴിയുന്ന തരത്തിൽ അടിപ്പാത പുതുക്കിപ്പണിയുക, പരവൂർ കൊട്ടിയം ഭാഗങ്ങളിൽ നിന്ന് വരുന്ന എല്ലാ സ്വകാര്യ ബസുകളും ചാത്തന്നൂരിൽ എത്തുക തുടങ്ങിയ ആവശ്യങ്ങൾ ഉയർത്തി രാഷ്ട്രീയ സാമൂഹ്യ സാംസ്കാരിക പ്രസ്ഥാനങ്ങളുടെയും വ്യാപാരി വ്യവസായികളുടെയും പൊതുജനങ്ങളുടെയും പങ്കാളിത്തത്തോടെ തിരുമുക്കിൽ ജനകീയ ധർണ സംഘടിപ്പിക്കുന്നത്.

നെടുങ്ങോലം രാമറാവു ഗവ. ആശുപത്രിയിൽ വെറുതെയൊരു ഐസലേഷൻ വാർഡ്

പരവൂർ : നെടുങ്ങോലം രാമറാവു ഗവ. ആശുപത്രിയിൽ ഒന്നേ മുക്കാൽ കോടിയിലധികം രൂപ ചെലവഴിച്ച് നിർമിച്ച ഐസലേഷൻ വാർഡ് അടഞ്ഞു തന്നെ കിടക്കുന്നു.കോവിഡ് പാക്കേജിൽ ഉൾപ്പെടുത്തിയാണ് സർക്കാർ ആശുപത്രികളിൽ ആരോഗ്യ വകുപ്പ് ഐസലേഷൻ വാർഡ് പണിഞ്ഞത്. കോവിഡ് ഉൾപ്പെടെ സാംക്രമിക രോഗങ്ങൾ പടർന്നു പിടിച്ചാൽ രോഗികളെ കിടത്തി ചികിത്സിക്കാൻ സംസ്ഥാനത്തെ 140 നിയമസഭാ മണ്ഡലങ്ങളിലും എം എൽഎമാർ നിർദേശിക്കുന്ന ഓരോ സർക്കാർ ആശുപത്രികളിൽ 10 കിടക്കകളുള്ള ഐസലേഷൻ വാർഡ് പണി കഴിപ്പിക്കുന്ന പദ്ധതിയുടെ ഭാഗമായാണ് നെടുങ്ങോലം ആശുപത്രിയിലും ഐസലേഷൻ വാർഡ് നിർമിച്ചത്. ഇപ്പോഴത്തെ സർക്കാരിന്‍റെ തുടക്കത്തിലായിരുന്നു ഇത്. 1.76 കോടി രൂപയായിരുന്നു ചെലവ്. ഇതു തുല്യമായി കിഫ്ബി ഫണ്ടിൽ നിന്നും എംഎൽഎ ഫണ്ടിൽ നിന്നും കണ്ടെത്താനായിരുന്നു തീരുമാനം. പദ്ധതി നിർവഹണത്തിനു സ്പെഷൽ പർപ്പസ് വെഹിക്കിളായി തെരഞ്ഞെടുത്ത കേരള മെഡിക്കൽ സർവീസസ് കോർപറേഷൻ ഐസലേഷൻ വാർഡുകൾ നിർമിക്കാൻ തൃശൂർ ആസ്ഥാനമായ ലേബർ കോൺട്രാക്‌ട് സൊസൈറ്റിയെയാണ് ചുമതലപ്പെടുത്തിയത്. 10 കിടക്കകളുള്ള ഐസലേഷൻ വാർഡിൽ ഡോക്‌ടറുടെ മുറി, നഴ്സ‌ിംഗ് സ്‌റ്റേഷൻ, ചികിത്സാമുറി, ശുചിമുറികൾ, മെഡിക്കൽ ഗ്യാസ് പ്ലാന്‍റ് തുടങ്ങിയ സൗകര്യങ്ങൾ ഉണ്ടാകുമെന്നായിരുന്നു പ്രഖ്യാപനം. സിവിൽ- ഇലക്‌ട്രിക്കൽ ജോലികൾക്കും ഉപകരണങ്ങൾക്കും ഉൾപ്പെടെ ആകെ 1,75,96,748 യാണ് നീക്കിവച്ചത്.

തൃക്കരുവയിൽ തെരുവുനായ ശല്യം രൂക്ഷം

കൊല്ലം: അഞ്ചാലുംമൂട് തൃക്കരുവയിൽ തെരുവുനായ ശല്യത്താൽ പൊറുതിമുട്ടി ജനം. പ്രധാന ജംഗ്ഷനുകളിൽ കൂട്ടമായാണ് അക്രമകാരികളായ നായകളുടെ സഞ്ചാരം. റോഡിലൂടെ പോകുന്ന ഇരുചക്ര വാഹന യാത്രക്കാരുടെ പിറകെ ഓടുന്നതും വാഹനത്തിനു കുറുകെ ചാടി അപകടം ഉണ്ടാക്കുന്നതും പതിവു സംഭവമായി മാറി. കുട്ടികൾ ഉൾപ്പെടെ കല്ലെടുത്ത് എറിഞ്ഞ് ഓടിക്കാൻ ശ്രമിച്ചാൽ ഒന്നിന് പിറകെ ഒന്നായി എട്ടും പത്തും നായ്ക്കൾ വീതം ഇവർക്ക് പിറകെയും സംഘമായെത്തും. ഇങ്ങനെ പേടിച്ചും ഓടിയും വീണ് പരിക്കേൽക്കുന്നവർ കടിയേൽക്കുന്നവരേക്കാൾ കൂടുതലാണ്. നായകളുടെ പ്രജനനം നിയന്ത്രിക്കുന്ന എബിസി പദ്ധതി പഞ്ചായത്തിന് കീഴിൽ നിലച്ചതിനാൽ വന്ധീകരണവും വർഷങ്ങളായി നടക്കുന്നില്ലന്ന് പ്രദേശവാസികൾ പറയുന്നു. അടുത്തിടെ രണ്ട് കെഎസ്ഇബി ജീവനക്കാർക്ക് ഉൾപ്പെടെ അഞ്ചുപേർക്ക് തെരുവുനായയുടെ കടിയേറ്റിരുന്നു. ദിവസങ്ങൾക്കു മുമ്പ് പ്രാക്കുളം കാഞ്ഞാവെളി ബസ് സ്റ്റാൻഡിൽ ബസ് കാത്തുനിന്ന യുവതിക്കും നായയുടെ ആക്രമണത്തിൽ പരിക്കേറ്റു. ഹോട്ടലുകൾ, വഴിയോര മത്സ്യകച്ചവട കേന്ദ്രങ്ങൾ, അനധികൃത അറവുശാലകൾ എന്നിവിടങ്ങളാണ് ഇപ്പോൾ തെരുവുനായ്ക്കളുടെ പ്രധാന താവളങ്ങൾ. മറ്റുള്ള പ്രദേശങ്ങളിൽ നിന്ന് രാത്രി നായകളെ ഇവിടേക്ക് എത്തിച്ചു തുറന്നു വിടുന്നതായും നാട്ടുകാർ പറയുന്നു. പല പ്രദേശങ്ങളിലും തെരുവുവിളക്കുകൾ പ്രവർത്തിക്കാത്തതിനാൽ സന്ധ്യയ്ക്ക് ജോലി കഴിഞ്ഞെത്തുന്ന സ്ത്രീകൾ ഉൾപ്പെടെയുള്ളവർ ഭീതിയിലാണ്. വിഷയത്തിൽ നാട്ടുകാർ പഞ്ചായത്ത് അധികൃതർക്ക് രേഖാമൂലം പരാതി നൽകിയിട്ടും ഒരു നടപടിയുമില്ലെന്ന് ആക്ഷേപമുണ്ട്.

കണ്ണനല്ലൂർ ജംഗ്ഷൻ വികസനം മന്ദഗതിയിൽ; വ്യാപാരികളും യാത്രക്കാരും ദുരിതക്കുരുക്കിൽ

കൊല്ലം : കണ്ണനല്ലൂർ ജംഗ്ഷൻ വികസന പദ്ധതിയ്ക്ക് വേണ്ട സ്ഥലമേറ്റെടുത്ത് മാസങ്ങൾ കഴിഞ്ഞിട്ടും അധികാരികൾ തുടർ നടപടികൾ ആരംഭിക്കാത്തത് ജനത്തെ വലയ്ക്കുന്നു. ജംഗ്ഷൻ വികസനം അനിശ്ചിതത്വത്തിൽ നീളുമ്പോൾ വാഹനയാത്രക്കാരെ പോലെ പരിസരത്തെ വ്യാപാരികളും ദുരിതക്കുരുക്കിലാണ്. കൊല്ലം-ആയൂർ പാതയിലെ ഏറ്റവും തിരക്കേറിയതും പ്രധാനപ്പെട്ടതുമായ ഈ ജംഗ്ഷനിലൂടെയാണ് രണ്ട് ദേശീയപാതകളെ ബന്ധിപ്പിക്കുന്ന കൊട്ടിയം-കുണ്ടറ റോഡ് കടന്നുപോകുന്നത്. എന്നാൽ, റോഡ് വികസനവും ടാറിംഗ് ജോലികളും വൈകുന്നതിനാൽ കുഴികൾ നിറഞ്ഞ റോഡാണ് യാത്രക്കാരെ സ്വാഗതം ചെയ്യുന്നത്. ജംഗ്ഷന്‍റെ സമഗ്ര വികസനത്തിനായി സർക്കാർ കോടികളുടെ പദ്ധതി പ്രഖ്യാപിച്ചെങ്കിലും അധികൃതരുടെ താത്പര്യക്കുറവ് കാരണം ഇത് വഴിമുട്ടിയിരിക്കുകയാണ്. വികസനത്തിനായി ഏറ്റെടുത്ത ഭൂമിക്കും കെട്ടിടങ്ങൾക്കുമായി 36 കോടി രൂപയിലേറെ കഴിഞ്ഞ ഒക്‌ടോബർ-നവംബർ മാസങ്ങളിൽ ഉടമകൾക്ക് നൽകിയിരുന്നു. പിന്നാലെ കെട്ടിടങ്ങൾ ഒഴിപ്പിച്ച് താക്കോലും വാങ്ങി. എന്നിട്ടും കെട്ടിടങ്ങൾ പൊളിച്ചുമാറ്റാനുള്ള നടപടികൾ പൂർത്തിയാക്കാത്തതിനാൽ പദ്ധതിയുടെ തുടർ പ്രവർത്തനങ്ങൾ മന്ദഗതിയിലാണ്. ഇതോടെ സ്വന്തമായോ വാടകയ്ക്കോ വ്യാപാരം നടത്തിവന്നവരുടെ വരുമാനം പൂർണമായും നിലച്ചു. നിലവിൽ വികസന പദ്ധതി കഴിഞ്ഞ ആറു മാസത്തിലേറെയായി നടപടികളില്ലാതെ വഴിമുട്ടിയിരിക്കുകയാണ്. റോഡ് വികസനത്തിനായി ഏറ്റെടുത്ത കെട്ടിടങ്ങളുടെ ബാക്കി ഭാഗങ്ങൾ പൊളിച്ചുനീക്കാത്തതിനാൽ ഇവ സംരക്ഷിച്ച് വാടകയ്ക്ക് നൽകാനോ സ്വന്തമായി കച്ചവടസ്ഥാപനങ്ങൾ പുനരാരംഭിക്കാനോ വ്യാപാരികൾക്ക് കഴിയുന്നില്ല. ജില്ലയിലെ തന്നെ പ്രധാന വ്യാപാര കേന്ദ്രങ്ങളിലൊന്നായ കണ്ണനല്ലൂരിൽ, കഴിഞ്ഞ ക്രിസ്മസ്, ചെറിയ പെരുന്നാൾ, ബലിപെരുന്നാൾ തുടങ്ങിയ സീസൺ കച്ചവടങ്ങൾ വ്യാപാരികൾക്ക് നഷ്‌ടമായിരുന്നു. ഓണക്കാലം അടുത്തുവരുന്ന സാഹചര്യത്തിൽ, ഏറ്റെടുത്ത കെട്ടിട ഭാഗങ്ങൾ പൊളിച്ചുനീക്കി ശേഷിച്ച ഭാഗങ്ങൾ സംരക്ഷിച്ച് വ്യാപാരം പുനരാരംഭിക്കാൻ ആവശ്യമായ അടിയന്തര നടപടികൾ സ്വീകരിക്കണമെന്ന് വ്യാപാരികളും നാട്ടുകാരും ആവശ്യപ്പെടുന്നു. ഇതുസംബന്ധിച്ച് മുഖ്യമന്ത്രി, പൊതുമരാമത്ത് മന്ത്രി, കുണ്ടറ എംഎൽഎ, ജില്ലാ കളക്ടർ, സ്പെഷൽ തഹസിൽദാർ (കിഫ്ബി), കേരള റോഡ് ഫണ്ട് ബോർഡ് (കെആർഎഫ്ബി) എക്സിക്യൂട്ടീവ് എൻജിനിയർ എന്നിവർക്ക് വിശദമായ പരാതി നൽകിട്ടുണ്ട്. അടിയന്തിരമായി ഇതിൽ നടപടി സ്വീകരിച്ച് പദ്ധതിയുമായി ബന്ധപ്പെട്ട പ്രവർത്തികൾ ആരംഭിച്ചു മുന്നോട്ടു പോയില്ലെങ്കിൽ അവശ്യമായ നിയമനടപടികൾ സ്വീകരിക്കാൻ തങ്ങൾ നിർബന്ധിതരാവുമെന്ന് അവർ മുന്നറിയിപ്പ് നൽകി. നടപ്പാതയില്ലാത്തതും ബുദ്ധിമുട്ട് കൊല്ലം - ആയൂർ റോഡ് മുതൽ കണ്ണനല്ലൂർ ജംഗ്ഷൻ വരെ കാൽനടയാത്രക്കാർ സഞ്ചരിക്കുന്നത് ജീവഭയത്തോടെ. ഇവിടെ നടപ്പാതയില്ലാത്തതിനാൽ ബസുകളടക്കമുള്ള വലിയ വാഹനങ്ങൾ കാൽനടയാത്രക്കാരെ തൊട്ടു, തൊട്ടില്ല എന്ന മട്ടിലാണ് കടന്നു പോകുന്നത്. വളരെയധികം സാഹസപ്പെട്ടാണ് പ്രായമായവരുൾപ്പെടെ ഇതുവഴി നടക്കുന്നത്. ഇരുവശത്തുമുള്ള കടകളിൽ വിവിധ ആവശ്യങ്ങൾക്കെത്തുന്നവരുടെ ഇരുചക്രവാഹനങ്ങളും കാറുകളും മറ്റും റോഡിനോട് ചേർന്നുള്ള ഇടുങ്ങിയ നടവഴിയിൽ ആണ് നിർത്തിയിടുന്നത്. ചിലയിടത്ത് നടവഴി കൈയേറി അനധികൃതമായി ഇന്‍റർലോക്ക് പാകിയിട്ടുമുണ്ട്. ഒപ്പം വഴിയിലെ കെഎസ്ഇബി ട്രാൻസ്ഫോർമറും കാൽനടയാത്രക്കാർക്ക് ബുദ്ധിമുട്ടാണ്. ഇവിടെ ദിനംപ്രതി നടക്കുന്ന ചെറുതും വലുതുമായ അപകടങ്ങൾക്ക് കണക്കില്ല. നടവഴി സാധ്യമായില്ലെങ്കിലും അനധികൃത കൈയേറ്റങ്ങളും പാർക്കിംഗും ഒഴിവാക്കാൻ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

മാർച്ചും ധർണയും നടത്തി

കൊല്ലം : തകർന്ന് വീഴാറായ കെട്ടിടങ്ങളും ആവശ്യത്തിനുള്ള ആരോഗ്യസേവകരും ഉപകരണങ്ങളും മരുന്നുകളും ഇല്ലാതെ പ്രാഥമിക ആരോഗ്യ കേന്ദ്രങ്ങൾ മുതൽ മെഡിക്കൽ കോളജുകൾ വരെ പ്രവർത്തിക്കുമ്പോൾ മുഖ്യമന്ത്രി അമേരിക്കയിലും മറ്റു മന്ത്രിമാർ സ്വകാര്യ ആശുപത്രികളിലും പോയി ചികിത്സക്കായി കോടികൾ ചെലവിടുകയാണെന്ന് കേരള കോൺഗ്രസ് -ജേക്കബ് ചെയർമാൻ വാക്കനാട് രാധാകൃഷ്ണൻകുറ്റപ്പെടുത്തി. ആരോഗ്യ മന്ത്രി വീണാ ജോർജ് രാജിവെക്ക ണ മെന്ന് ആവശ്യപ്പെട്ട് ജില്ലാ കമ്മിറ്റിയുടെ നേതൃത്വത്തിൽ ജില്ലാ ആശുപത്രിയിലേയ്ക്ക് നടത്തിയ മാർച്ചും ധർണയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്‍റ് ആർ.രാജശേഖരൻ പിള്ള അധ്യക്ഷത വഹിച്ചു. പാർട്ടി സംസ്ഥാന ജനറൽ സെക്രട്ടറിമാരായ ചിരട്ടക്കോണം സുരേഷ്, കല്ലട ഫ്രാൻസിസ്, ജില്ലാ ഭാരവാഹികളായ കരിക്കോട് ജമീർലാൽ, നെടുവത്തൂർ ചന്ദ്രശേഖരൻ, മണി മോഹനൻ നായർ, ശ്രീനാഥ് ആർ പിള്ള ,റെയ്ച്ചൽ തോമസ്, നിയോജക മണ്ഡലം ഭാരവാഹികളായ പ്രസാദ് ചടയമംഗലം,ടി.ഡി.സിറിൾ,കെന്നഡി തുടങ്ങിയവർ പ്രസംഗിച്ചു.

റീൽസ് മത്സരത്തിലെ വിജയികൾക്ക് സമ്മാനങ്ങൾ വിതരണം ചെയ്തു

കൊല്ലം: സിറ്റി പോലീസ് പരിധിയിലെ സ്റ്റുഡന്‍റ് പോലീസ് പദ്ധതി നടപ്പിലാക്കിവരുന്ന സ്കൂളുകളെ പങ്കെടുപ്പിച്ച് കൊല്ലം സിറ്റി പോലീസ് സംഘടിപ്പിച്ച റീൽസ് മത്സരത്തിലെ വിജയികൾക്കുളള സമ്മാനദാന ചടങ്ങ് കൊല്ലം പോലീസ് ട്രെയിനിങ്ങ് സെന്‍ററിൽ നടന്നു. സഹപാഠികളിൽനിന്ന് മാനസിക സംഘർഷത്തിന് ഇടയാക്കുന്ന തരത്തിലുള്ള കളിയാക്കലുകളോ ഒറ്റപ്പെടുത്തലുകളോ ഉണ്ടായാൽ അത് അധ്യാപകരുടെ ശ്രദ്ധയിൽ കൊണ്ടുവരാൻ ധൈര്യം കാണിക്കൂ എന്ന വിഷയത്തെസംബന്ധിച്ചാണ് ഓൺലൈൻ റീൽസ് മത്സരം സംഘടിപ്പിച്ചത്. ഏറ്റവും കൂടുതൽജനശ്രദ്ധ നേടിക്കൊണ്ട് കരുനാഗപ്പള്ളി ബോയ്സ് എച്ച്എസ്എസ് ഒന്നാം സ്ഥാനവും, എം കെ എൽ എം കണ്ണനല്ലൂർ ഹയർസെക്കൻഡറി സ്കൂൾ രണ്ടാം സ്ഥാനവും, എം വി ജി എച്ച് എസ് എസ് പേരൂർ മൂന്നാംസ്ഥാനവും കരസ്ഥമാക്കി. സമ്മാനദാന ചടങ്ങ് കൊല്ലം ഈസ്റ്റ് ഐഎസ്എച്ച്ഒ അനിൽകുമാർ ഉദ്ഘാടനം ചെയ്തു. കരുനാഗപ്പള്ളി ബോയ്സ് എച്ച് എം സരിത, എസ് പി സി അസിസ്റ്റന്‍റ് ഡിസ്ട്രിക്ട് നോഡൽ ഓഫീസർ ബി.രാജേഷ്, കോർഡിനേറ്റർ എസ്. ഷഹീർ,അധ്യാപകരായ സാബുജൻ,മിഥുൻ കുമാർ ,മേഘ മാത്യു,ഷെഹിൻ,വി.ആർ. ബിന്ദു മോൾ എന്നിവർ പ്രസംഗിച്ചു . ബോയ്സ് കരുനാഗപ്പള്ളി,എം കെ എൽഎം കണ്ണനല്ലൂർ എന്നീ സ്കൂളുകളിലെ എസ്പിസി കേഡറ്റുകളും പങ്കെടുത്തു.

ഉമ്മൻചാണ്ടി ജനഹൃദയങ്ങളിൽ ജീവിക്കുന്ന നേതാവ്: പി. ജർമിയാസ്

ചവറ : ഉമ്മൻചാണ്ടി ആൾക്കൂട്ടത്തിന് നടുവിൽ വിശ്രമരഹിതമായി നിന്ന് പ്രവർത്തിച്ച് ജനഹൃദയങ്ങളിൽ സ്ഥാനം ഉറപ്പിച്ച നേതാവാണെന്ന് കെപിസിസി സെക്രട്ടറി പി. ജർമിയാസ് . കെപിഎസ്ടിഎ ചവറ ഉപജില്ലാ കമ്മിറ്റി കോയിവിള ബിഷപ് ജെറോം അഭയ കേന്ദ്രത്തിൽ അന്തേവാസികൾക്ക് ഒപ്പം നടത്തിയ ഉമ്മൻചാണ്ടി അനുസ്മരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കെപിഎസ്ടിഎ ചവറ ഉപജില്ല പ്രസിഡന്‍റ് ഉണ്ണി ഇലവിനാൽ അധ്യക്ഷനായി. ഉമ്മൻചാണ്ടി രണ്ടാം ചരമവാർഷിക അനുസ്മരണ സമ്മേളനത്തിൽ ഡിസിസി ജനറൽ സെക്രട്ടറി കല്ലട ഗിരീഷ്, പ്രിൻസി റീന തോമസ്, ബിഷപ് ജെറോം അഭയ കേന്ദ്രം മാനേജിംഗ് ട്രസ്റ്റി കുഞ്ഞച്ചൻ ആറാടൻ, ജോസ് വിമൽ രാജ്, ജയചന്ദ്രൻ പിള്ള, റോജ മാർക്കോസ്, വത്സ ജേക്കബ്, രാജ്‌ലാൽ തോട്ടുവാൽ, ബിജു ഡാനിയൽ, വരുൺലാൽ, കോളിൻസ് ചാക്കോ സോഫിയ, ഹരുൺ ലാൽ, രാജ്നാരായണൻ, ഷിജിൻ, ജേക്കബ്, ബുഷ്റാ ബീഗം തുടങ്ങിയവർ പ്രസംഗിച്ചു.

കഞ്ചാവുമായി യുവാവ് പിടിയിൽ

കൊല്ലം: ഒന്നര കിലോ കഞ്ചാവുമായി യുവാവ് പിടിയിൽ. ഇടവട്ടം സ്വദേശി ആന്‍റോ ടോണി ആണ് കഞ്ചാവുമായി കൊല്ലം റൂറൽ ഡാൻസാഫ് ടീമിന്‍റെ പിടിയിലായത്. ഒറീസയിൽ നിന്നും കടത്തികൊണ്ടു വന്ന കഞ്ചാവ് കൊല്ലം ജില്ലയിൽ പലയിടങ്ങളിൽ വില്പന നടത്തുന്നുവെന്ന രഹസ്യ വിവരത്തിന്‍റെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതി പിടിയിലായത്. കഴിഞ്ഞ പത്തു ദിവസത്തിനുള്ളിൽ കൊല്ലം റൂറൽ പോലീസിന്‍റെനേതൃത്വത്തിൽ കൂടിയ അളവിലുള്ള കഞ്ചാവ്, എംഡിഎംഎ കേസുകളിൽ പിടിക്കപ്പെടുന്ന മൂന്നാമത്തെ പ്രതിയാണ്. എഴുകോൺ സർക്കിൾ ഇൻസ്പെക്ടർ സുധീഷ് കുമാറിന്‍റെ നേതൃത്വത്തിൽ കൊല്ലം റൂറൽ ഡാൻസാഫ് എസ് ഐ ജ്യോതിഷ് ചിറവൂർ, സബ് ഇൻസ്പെക്്‌ടർ മനീഷ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

കോടതി കെട്ടിടം ഉദ്ഘാടനം ചെയ്തു

ചവറ : പന്മന സർവീസ് കോ-ഓപറേറ്റീവ് ബാങ്കിൽ പ്രവർത്തിച്ചുവന്നിരുന്ന ചവറ ജുഡീഷൽ ഒന്നാം ക്ലാസ് മജിസ്ട്രേറ്റ് കോടതി വെറ്റമുക്കിലുള്ള പാരഡിഗം ടവറിലെ നവീകരിച്ച കെട്ടിടത്തിലേക്ക് മാറി പ്രവർത്തനം ആരംഭിച്ചു. നവീകരിച്ച കോടതി കെട്ടിടത്തിന്‍റെ ഉദ്ഘാടനംന കൊല്ലം ഒന്നാം അഡീഷണൽ ഡിസ്ട്രിക്ട് ആന്‍ഡ് സെഷൻസ് ജഡ്ജി പി.എൻ.വിനോദ് ഉദ്ഘാടനം ചെയ്തു. സുജിത്ത് വിജയൻ പിള്ള എംഎൽഎ അധ്യക്ഷനായി. ചവറ കുടുംബ കോടതി ജഡ്ജ് വി. ഉദയകുമാർ , കൊല്ലം ചീഫ് ജുഡീഷൽ മജിസ്ട്രേറ്റ് കെ.വി.നൈന എന്നിവർ മുഖ്യപ്രഭാഷണം നടത്തി. ചവറ ഒന്നാം ക്ലാസ് ജുഡീഷ്യൽ മജിസ്ട്രേറ്റ് ആശാ കോശി, കൊല്ലം ബാർ അസോസിയേഷൻ പ്രസിഡന്‍റ് അഡ്വ. പി .ബി .ശിവൻ, സ്പെഷൽ പബ്ലിക് പ്രോസിക്യൂട്ടർ അഡ്വ.കെ.പി ജബാർ, പന്മന പഞ്ചായത്ത് പ്രസിഡന്‍റ് പി.ശ്രീകല, ജ്യോതിലക്ഷ്മി, അഡ്വ.എസ്. അനീഷ്, ഡി. ഹരിപ്രസാദ് എന്നിവർ പ്രസംഗിച്ചു.

കാവ്യസന്ധ്യ സംഘടിപ്പിച്ചു

ചവറ: സംസ്കാര സാഹിതി ചവറ നിയോജക മണ്ഡലം കമ്മിറ്റിയുടെ ആഭിമുഖ്യത്തിൽ മൺമറഞ്ഞു പോയ കലാ സാഹിത്യകാരന്മാർക്ക് ബാഷ്പാഞ്ജലി അർപ്പിച്ച് "ഓർമയ്ക്കൊരു സ്നേഹഗീതം’ (കാവ്യസന്ധ്യ) ചവറ തട്ടാശേരി കോൺഗ്രസ് ഭവനിൽ സംഘടിപ്പിച്ചു.കാവ്യ സന്ധ്യ സംസ്ഥാന സമിതി അംഗം ഷിജു നെല്ലിപ്പറമ്പിൽ ഉദ്ഘാടനം ചെയ്തു. സംസ്കാര സാഹിതി നിയോജക മണ്ഡലം ചെയർമാൻ എഫ്. എമേഴ്സൺ , കൺവീനർ അജി ആലുംമൂട്ടിൽ, ചവറ ഹരീഷ്, ചവറ ഗോപകുമാർ, ബിജു ഡാനിയൽ,ആസാദ് ആശീർവാദ് ,കലാകാരന്മാരായ എം.ആർ. അരവിന്ദൻ, ടൈറ്റസ് കടമ്പാട്ട്, രാധാ മോഹൻ പുതുക്കോട്,ജോസഫ് കരുത്തുറ, സാബ് മുകുന്ദപുരം, രാജേന്ദ്രകുമാർ ചവറ തുടങ്ങിയവർ പ്രസംഗിച്ചു.

കേരളാ കോൺഗ്രസ്-എം പ്രതിനിധി സമ്മേളനം

കൊല്ലം: കേരളാ കോൺഗ്രസ് -എം ശൂരനാട് വടക്ക് മണ്ഡലം പ്രതിനിധി സമ്മേളനം ജില്ലാ പ്രസിഡന്‍റ് വഴുതാനത്ത് ബാലചന്ദ്രൻ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ഇഞ്ചക്കാട് രാജൻ അധ്യക്ഷനായിരുന്നു.പാർട്ടിയുടെ സംസ്ഥാന ഫണ്ട് പിരിവ് 24 നു മുൻപ് പൂർത്തീകരിക്കാൻ തിരുമാനിച്ചു. യോഗത്തിൽ നിയോജകമണ്ഡലം വൈസ് പ്രസിഡന്‍റുമാരായ നാസർ പോരുവഴി,തോട്ടം ജയൻ , ജെ .രാധകൃഷ്ണക്കുറുപ്പ് , എ.ജി.അനിത, പി.ആർ.വിജയമോഹൻ, പതാരം ബൈജു, ശൂരനാട് ഷാജി , പ്രീത രജനീഷ്, ആർ. രാജേഷ് തുടങ്ങിയവർ പ്രസംഗിച്ചു. ഭാരവാഹികളായി സി.ജി. ജയേഷ് കുമാർ-പ്രസിഡന്‍റ്, മോഹനൻ, ശ്രീകുമാർ -വൈസ്പ്രസിഡന്‍റുമാർ, കെ.കെ. ശ്രീകുമാർ- ഓഫീസ് ചാർജ് ജനറൽ സെക്രട്ടറി, മോഹനൻ പിള്ള ജനറൽ സെക്രട്ടറി , എസ് .രാധാകൃഷ്ണ പിള്ള-ട്രഷറർ എന്നിവരെ തെരഞ്ഞെടുത്തു.

മഹാമൃത്യുഞ്ജയ ഹോമം 17ന്

കൊല്ലം : ദുരിത നിവാരണത്തിനും അപമൃത്യു വിനാശത്തിനും ആയുരാരോഗ്യ സൗഖ്യത്തിനുമായി കൊല്ലം പുതിയകാവ് ഭഗവതീ ക്ഷേത്രത്തിൽ 17ന് (കർക്കിടകം ഒന്നിന്) രാവിലെ 5.30ന് മഹാമൃത്യുഞ്ജയ ഹോമം നടത്തും. ശിവക്ഷേത്രത്തിനു മുൻപിൽ പ്രത്യേകം തയാറാക്കിയ ഹവനവേദിയിൽ ശബരിമല മുൻമേൽശാന്തി തന്ത്രരത്നം എൻ.ബാലമുരളി തന്ത്രിയുടെ മുഖ്യകാർമികത്വത്തിലാണ് നടക്കുന്നത്. ഭക്തജനങ്ങൾ പഞ്ചാക്ഷരി മന്ത്രവും മൃത്യുഞ്ജയ മന്ത്രവും ഉരുവിട്ടുകൊണ്ടു ഈ ഹോമത്തിൽ പങ്കെടുക്കാം. സമാപനത്തിൽ ദുരിത നിവാരണത്തിനായി എള്ളും ചമതയും ശിരസിലുഴിഞ്ഞു ഹോമകുണ്ഡത്തിൽ സമർപ്പിക്കാം.വഴിപാട് ബുക്ക് ചെയ്യുന്നതിന് 8301042088 ബന്ധപ്പെടുക.

ചിറക്കരയിൽ ആർആർഎഫ് കെട്ടിടം ഉദ്ഘാടനം ചെയ്തു

ചാത്തന്നൂർ: നഗര സഞ്ചയ പദ്ധതിയിൽ നിന്നും ചിറക്കര പഞ്ചായത്തിന് ലഭിച്ച 50 ലക്ഷം രൂപ ഉപയോഗിച്ച് നിർമിച്ച കെട്ടിടം ജി.എസ്. ജയലാൽ എംഎൽഎ ഉദ്ഘാടനം ചെയ്തു. ആർആർഎഫ് ഉള്ള ജില്ലയിലെ ആദ്യ പഞ്ചായത്തായി ചിറക്കര. മാലിന്യ നിർമാർജന പ്രവർത്തനങ്ങൾ മാതൃകാപരമായി നടത്തുന്ന പഞ്ചായത്താണ് ചിറക്കരയെന്ന്ജയലാൽ എംഎൽഎ പറഞ്ഞു. ആർആർ എഫി ന്‍റെ പ്രവത്തനം പൂർണതോതിലാകുമ്പോൾ ഒരു വ്യവസായ യൂണിറ്റായി മാറുമെന്നുംഅദ്ദേഹംകൂട്ടിച്ചേർത്തു.ചിറക്കര പഞ്ചായത്ത് പ്രസിഡന്‍റ് ടി.ആർ.സജില അധ്യക്ഷയായിരുന്നു.വിവിധ വാർഡുകളിൽ നിന്നും ശേഖരിക്കുന്ന പ്ലാസ്റ്റിക്ക് തരം തിരിക്കുന്നതിനും വിവിധ ഉൽപ്പന്നങ്ങളാക്കി മാറ്റുന്നതിനുമുള്ള യന്ത്ര സാമഗ്രികൾ കൂടി സ്ഥാപിച്ച് വ്യവസായ യൂണിറ്റാക്കി മാറ്റാനാണ് പഞ്ചായത്ത് ഉദ്ദേശിക്കുന്നത്. പഞ്ചായത്ത് വൈസ് പ്രസിഡന്‍റ് കെ.സുജയ്കുമാർ, ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷ ശകുന്തള, പഞ്ചായത്ത് സ്ഥിരംസമിതി അധ്യക്ഷന്മാരായ സുബി പരമേശ്വരൻ ,ദിലീപ് ഹരിദാസൻ, സി.സുശീലാദേവി, ദേവദാസ്, സുചിത്ര ജയകുമാർ, വിനിതാദിപു, മേരി റോസ്, ബി. സുദർശനൻ പിള്ള , കെ. സുരേന്ദ്രൻ, റീജാ ബാലചന്ദ്രൻ, സെക്രട്ടറി ആർ. സുനിൽകുമാർ എന്നിവർ പ്രസംഗിച്ചു.

ചാത്തന്നൂർ ആസ്ഥാനമാക്കി താലൂക്ക് അനുവദിക്കണമെന്ന്

ചാത്തന്നൂർ : ചാത്തന്നൂർ കേന്ദ്ര മാക്കി റവന്യൂ താലൂക്ക് അനുവദിക്കണമെന്ന് എൻ എസ് എസ് ചാത്തന്നൂർ താലൂക്ക് യൂണിയന്‍റെ വാർഷിക പൊതുയോഗം ആവശ്യപ്പെട്ടു. യൂണിയൻ പൊതു യോഗത്തിൽ അവതരിപ്പിച്ച പ്രമേയത്തിലാണ് ഈ ആവശ്യം ഉന്നയിച്ചത്. ഇ ഡബ്ല്യു എസ് സർട്ടിഫിക്കറ്റ് സമയ ബന്ധിതമായി അപേക്ഷകർക്ക് നൽകണമെന്നുളള പ്രമേയവും യോഗത്തിൽ പാസാക്കി. യൂണിയൻ പ്രസിഡന്‍റ് ചാത്തന്നൂർ മുരളി അധ്യക്ഷതവഹിച്ചു. സെക്രട്ടറി പി.എം. പ്രകാശ്കുമാർ 2024-25 വർഷത്തെ പ്രവർത്തന റിപ്പോർട്ടും വരവുചെലവു കണക്കുകളും അവതരിപ്പിച്ചു. 2025-26 ലെ ബജറ്റുംഅവതരിപ്പിച്ചു. ചർച്ചകൾക്കുശേഷം യോഗം ബജറ്റും വരവ് ചെലവ് കണക്കുകളും ഐക്യകണ്ഠേന പാസാക്കി . യൂണിയൻ വൈസ് പ്രസിഡന്‍റ് പരവൂർ മോഹൻദാസ് ,എൻഎസ്എസ് ഇൻസ്പെക്‌ടർ കെ.ആർ. രാകേഷ് എന്നിവർ പ്രസംഗിച്ചു.

എം.എ. അഷറഫ് രക്താസാക്ഷി ദിനാചരണത്തിന് ഇന്ന് തുടക്കം

അഞ്ചല്‍ : എന്‍ഡിഎഫ് പ്രവര്‍ത്തകരാല്‍ കൊല്ലപ്പെട്ട സിപിഎം പുനലൂര്‍ ഏരിയാ കമ്മിറ്റി അംഗമായിരുന്ന എം.എ. അഷറഫിന്‍റെ 24-ാം രക്തസാക്ഷി ദിനാചരണ പരിപാടികള്‍ക്ക് ഇന്ന് തുടക്കം. 2002 ജൂലൈയിലാണ് കൊല്ലപ്പെട്ടത്. ഇന്ന് അറയ്ക്കല്‍ സര്‍വീസ് സഹകരണ ബാങ്ക് ഹാളില്‍ ചേരുന്ന സമകാലിക സംഗമത്തോടെയാകും പരിപാടികള്‍ക്ക് തുടക്കം. 16,17 ദിവസങ്ങളില്‍ കിടപ്പ് രോഗികള്‍ക്ക് വീട്ടിലെത്തി ഡോക്ടര്‍മാര്‍ ഉള്‍പ്പടെയുള്ളവരുടെ സേവനം ലഭ്യമാക്കിയുള്ള സാന്ത്വന പരിചരണ പ്രവര്‍ത്തനങ്ങള്‍, രക്തദാന സേന രൂപീകരണം, പ്രതിഭകളെ ആദരിക്കല്‍ ഉള്‍പ്പടെയുള്ളവ നടക്കും. അഷറഫ് കൊല്ലപ്പെട്ട ജൂലൈ 18 നു ഏരിയാ തലത്തിലുള്ള മുഴുവന്‍ ബ്രാഞ്ച് കമ്മിറ്റികളിലും പുഷ്പാര്‍ച്ചന നടത്തും. വൈകുന്നേരം അഞ്ചിന് നടക്കുന്ന അനുസ്മരണ റാലിയും പൊതുസമ്മേളനവും കേന്ദ്ര കമ്മിറ്റി അംഗവും മന്ത്രിയുമായ പി. രാജീവ് ഉദ്ഘാടനം ചെയ്യും.

പ്രിൻസ് ലൂക്കോസ് അനുസ്മരണം

ആയൂർ:വൈഎംസിഎ കൊല്ലം സബ് റീജണൽ ചെയർമാനുംസാമൂഹ്യ സാംസ്കാരിക പ്രവർത്തകനും അധ്യാപകനുമായിരുന്ന പ്രിൻസ് ലൂക്കോസ് മൂന്നാമത് അനുസ്മരണ സമ്മേളനവും ചെറുവക്കൽ വൈഎംസിഎയുടെ ആഭിമുഖ്യത്തിൽ നടന്നു. വൈഎംസിഎ മുൻ സംസ്ഥാന ചെയർമാൻ അഡ്വ.ജോസഫ് ജോൺ ഉദ്ഘാടനം ചെയ്തു. പ്രസിഡന്‍റ് എ.കെ. സന്തോഷ് ബേബി അധ്യക്ഷത വഹിച്ചു. നാഷണൽ എക്സിക്യൂട്ടീവ് മുൻ അംഗം കെ.ഒ.രാജുക്കുട്ടി അനുസ്മരണ പ്രഭാഷണം നടത്തി. ഇടവക വികാരിമാരായ സാമുവേൽ മാത്യു കോർ എപ്പിസ്കോപ്പ,ഫാ.ജേക്കബ് പണിക്കർ,ഫാ.വി.കെ. തോംസൺ, ഫാ.ഫിലിപ്പ് ഐസക്, ഫാ.ഷിനോ.കെ. തോമസ്, മുൻ സബ് റീജിയൻ ചെയർമാൻ അഡ്വ.ബേബി പുഞ്ചക്കോണം,ജി .ബിജു,കൺവീനർ കെ.കെ.കുര്യൻ, സി.അലക്സ്,അഡ്വ.ഒ.ജോൺസൺ, ഐവാൻ പ്രിൻസ് ലൂക്കാ എന്നിവർ പ്രസംഗിച്ചു.

സംസ്ഥാന വനിതാ കമ്മീഷൻ സെമിനാർ സംഘടിപ്പിച്ചു

നെയ്യാറ്റിന്‍കര : വനിതാ കമ്മീഷന്‍റെ മുന്നിലെത്തുന്ന ഭൂരിപക്ഷം കേസുകളും കുടുംബജീവിതത്തിലെ താളം തെറ്റലുകളാല്‍ സംഭവിച്ചതാണെന്നും ആരോഗ്യകരമായ ബന്ധങ്ങൾ സംബന്ധിച്ചു ബോധവത്കരണം നല്‍കേണ്ടത് വളരെ അനിവാര്യമാണെന്നും വനിതാ കമ്മീഷൻ ചെയർപേഴ്‌സൺ അഡ്വ. പി. സതീദേവി പറഞ്ഞു. സംസ്ഥാന വനിതാ കമ്മീഷന്‍റെ സഹകരണത്തോടെ "ആരോഗ്യകരമായ കുടുംബബന്ധങ്ങൾ' എന്ന വിഷയത്തിൽ ലൈഫ് ഫൗണ്ടേഷന്‍ കേരള സംഘടിപ്പിച്ച സെമിനാര്‍ ഉദ്ഘാടനം ചെയ്യുകയായിരുന്നു അവർ. നഗരസഭയിലെ ആശാ വർക്കർമാർക്കും കുടുംബശ്രീ അംഗങ്ങൾക്കുമായി നടത്തിയ സെമിനാറില്‍ പ്രഫ. സുജ സൂസൻ ജോർജ് മുഖ്യാതിഥിയായി. നഗരസഭ വൈസ് ചെയർപേഴ്സൺ പ്രിയാ സുരേഷ് അധ്യക്ഷയായി. കേരള ചരിത്ര ഗവേഷണ കൗൺസിൽ പബ്ലിക്കേഷൻ അസിസ്റ്റന്‍റ് എസ്.എൻ. സന്ധ്യ ക്ലാസ് നയിച്ചു. നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ എൻ.കെ. അനിതകുമാരി, ലൈഫ് ഫൗണ്ടേഷൻ ഡയറക്ടർ എസ്.ജി. ബീനമോൾ എന്നിവര്‍ സംബന്ധിച്ചു.

തലയല്‍ കേശവൻനായരുടെ സ്മരണകള്‍ക്ക് പത്താണ്ട്

നെയ്യാറ്റിന്‍കര: സ്വദേശാഭിമാനി കള്‍ച്ചറല്‍ സെന്‍റര്‍, നിംസ് ലിറ്റററി ക്ലബ് എന്നിവ സംയുക്താഭിമുഖ്യത്തിൽ തലയല്‍ കേശവന്‍നായരുടെ പത്താം ചരമവാര്‍ഷികത്തോടനുബന്ധിച്ച് വിദ്യാര്‍ഥികള്‍ക്കായി യുവജനോത്സവം സംഘടിപ്പിച്ചു. രചന വേലപ്പൻനായർ യുവജനോത്സവം ഉദ്ഘാടനം ചെയ്തു. നിംസില്‍ നടന്ന ചടങ്ങില്‍ അഡ്വ. കെ. വിനോദ് സെന്‍ അധ്യക്ഷനായി. തലയല്‍ കേശവൻനായരുടെ ചരമദിനത്തിൽ നെയ്യാറ്റിൻകര സർക്കാർ ആശുപത്രിയിലെ രോഗികളോടൊത്താണ് നെയ്യാറ്റിന്‍കരയിലെ റസിഡന്‍റ്സ് അസോസിയേഷനുകളുടെ കേന്ദ്രസംഘടനയായ ഫ്രാൻ അനുസ്മരണം സംഘടിപ്പിക്കുന്നതെന്നു പ്രസിഡന്‍റ് എസ്.കെ. ജയകുമാര്‍ പറഞ്ഞു. ഇന്നു രാവിലെ 7.30 ന് നെയ്യാറ്റിൻകര ജനറൽ ആശുപത്രിയിൽ ഫ്രാൻ നടത്തുന്ന തലയല്‍ അനുസ്മരണ യോഗം കെ. ആൻസലൻ എംഎല്‍എ ഉദ്ഘാടനം ചെയ്യും.

പ്രകൃതി സൗഹൃദ സഞ്ചികൾ നിർമിച്ച് വിദ്യാർഥികൾ

വിതുര: പ്ലാസ്റ്റിക് മാലിന്യം കുറയ്ക്കുന്നതിന്‍റെയും പരിസ്ഥിതിക്കുദോഷം വരുത്താത്ത പേപ്പർ ബാഗുകളുടെ ഉപയോഗം പ്രോത്സാഹിപ്പിക്കുന്നതിന്‍റെയും ഭാഗമായി പൊന്മുടി ഗവ. യുപി സ്കൂളിൽ ലോക പേപ്പർ ബാഗ് ദിനം സംഘടിപ്പിച്ചു. ഹെഡ്മാസ്റ്റർ അബ്ദുൽ ജവാദ് ദിനാചരണം ഉദ്ഘാടനം ചെയ്തു. അധ്യാപകരുടെ നേതൃത്വത്തിൽ പേപ്പർ ബാഗ് നിർമാണ ശില്പശാലയും സംഘടിപ്പിച്ചു. കുട്ടികൾ സ്വന്തമായി നിർമിച്ച പേപ്പർ ബാഗുകൾ കമ്പിമൂട്ടിലെ വിവിധ കടകളിൽ സൗജന്യമായി വിതരണം ചെയ്തു. പ്ലാസ്റ്റിക് കവറുകൾക്കു പകരം പേപ്പർ ബാഗുകൾ ഉപയോഗിക്കാൻ ജനങ്ങളെ പ്രോത്സാഹിപ്പിക്കാനും ബോധവത്കരിക്കാനും ഈ ഉദ്യമത്തിലൂടെ കുട്ടികൾക്ക് സാധിച്ചുവെന്നു വാർഡ് മെമ്പർ രാധാമണി പറഞ്ഞു. പ്ലാസ്റ്റിക് മുക്ത സമൂഹം എന്ന ലക്ഷ്യത്തോടെ നടന്ന ഈ പരിപാടിയിൽ എസ്എംസി ചെയർമാൻ പൊന്മുടി പ്രകാശ്, രക്ഷിതാക്കൾ തുടങ്ങിയവർ പങ്കെടുത്തു.

വിവാദങ്ങൾ തീർന്നു : കൊട്ടാരക്കര ശ്രീധരൻ നായരുടെ പ്രതിമ അനാച്ഛാദനം ചെയ്തു

കൊട്ടാരക്കര: വിവാദങ്ങൾക്ക് വിരാമമിട്ട് അഭിനയ പ്രതിഭ കൊട്ടാരക്കര ശ്രീധരൻ നായരുടെ പ്രതിമ കൊട്ടാരക്കരയിൽ അനാച്ഛാദനം ചെയ്തു. പടിഞ്ഞാറ്റിൻകര ക്ഷേത്രത്തിന് സമീപത്തെ താലൂക്ക് ലൈബ്രറി കൗൺസിൽ ആസ്ഥാന വളപ്പിലാണ് കൊട്ടാരക്കരയുടെ പ്രതിമ സ്ഥാപിച്ചത്. ഇന്നലെ രാവിലെ മന്ത്രി കെ.എൻ.ബാലഗോപാൽ പ്രതിമയുടെ അനാച്ഛാദനം നിർവഹിച്ചു. നഗരസഭ ചെയർപേഴ്സൺ കെ.ഉണ്ണിക്കൃഷ്ണ മേനോൻ അധ്യക്ഷത വഹിച്ചു. ലൈബ്രറി കൗൺസിൽ താലൂക്ക് പ്രസിഡന്‍റ് എ.എസ്.ഷാജി, സെക്രട്ടറി ബി.എസ്.ഗോപകുമാർ, എസ്.ആർ.രമേശ്, പ്രഫ.ബി.ശിവദാസൻ പിള്ള, എം.ബാലചന്ദ്രൻ, ബീന സജീവ്, ഫൈസൽ ബഷീർ, അരുൺ കാടാംകുളം എന്നിവർ പ്രസംഗിച്ചു. മലയാള സിനിമയുടെ തലപ്പൊക്കം നോക്കിയാൽ അതിനൊപ്പം നിൽക്കുന്ന അഭിനയ പ്രതിഭയാണ് കൊട്ടാരക്കര ശ്രീധരൻ നായർ. മലയാളികളുടെ മനസിൽ അര നൂറ്റാണ്ടിലധികമായി നീന്തിത്തുടിക്കുന്ന ചെമ്മീൻ എന്ന ചിത്രത്തിലെ ചെമ്പൻകുഞ്ഞ് എന്ന കഥാപാത്രം കൊണ്ട് മാത്രം ശ്രീധരൻ നായരിലെ അഭിനയ പ്രതിഭയുടെ കഴിവ് എത്രത്തോളമെന്ന് ഇന്ത്യൻ സിനിമയിൽ അടയാളപ്പെടുത്തിയിട്ടുള്ളതാണ്. പ്രസന്ന മുതൽ മിഴിനീർപ്പൂവുകൾ വരെയുള്ള 160 ചിത്രങ്ങളിൽ ഈ നടൻ അഭിനയത്തിന്‍റെ പകർന്നാട്ടം നടത്തിയിട്ടുണ്ട്. അരനാഴികനേരത്തിലെ അഭിനയത്തിന് 1970-ൽ സംസ്ഥാന സർക്കാരിന്‍റെ മികച്ച നടനുള്ള പുരസ്കാരം നേടി. 1986 ഒക്‌ടോബർ 19ന് അദ്ദേഹം ഓർമയിലേക്ക് മറഞ്ഞു. കടന്നുപോയി മൂന്നര പതിറ്റാണ്ട് പിന്നിട്ടപ്പോഴാണ് ജന്മനാട് അദ്ദേഹത്തിന്‍റെ ഓർമയ്ക്കായി പ്രതിമസ്ഥാപിച്ചത്. ശ്രീധരൻ നായരുടെ പേരിലാണ് ലൈബ്രറി കൗൺസിൽ ആസ്ഥാനം പ്രവർത്തിക്കുന്നത്. ശ്രീധരൻ നായരുടെയും ഭരത് മുരളിയുടെയും പേരിൽ തീയേറ്റർ കോംപ്ലക്സും ഉടൻ സ്ഥാപിക്കുമെന്ന് മന്ത്രി കെ.എൻ.ബാലഗോപാൽ അനാച്ഛാദന ചടങ്ങിൽ പറഞ്ഞു. ശ്രീധരൻനായരുടെ പ്രതിമ സ്ഥാപിക്കാൻ കൊട്ടാരക്കര നഗരസഭ വർഷങ്ങൾക്ക് മുൻപ് തീരുമാനിച്ചിരുന്നു. എ.ഷാജു നഗരസഭ ചെയർപേഴ്സണായിരിക്കെ ശില്പി ബിജു ചക്കുവരയ്ക്കലിന്‍റെ നേതൃത്വത്തിലാണ് പ്രതിമ നിർമിക്കുന്നത്. തുടർന്ന് കച്ചേരിമുക്കിൽ പൊലീസ് സ്റ്റേഷന് എതിർവശത്തായി മൂന്നുവിളക്കിനോട് ചേർന്ന് പ്രതിമ സ്ഥാപിച്ചു. ഉദ്ഘാടന ചടങ്ങ് ആലോചിച്ചപ്പോഴേക്കും എതിർപ്പുകൾ ഉണ്ടായി. ദേവസ്വംബോർഡിന്‍റെ ഉടമസ്ഥതയിലുള്ളതാണ് ഈ സ്ഥലമെന്നായിരുന്നു വാദം. ദേവസ്വം ബോർഡും ഹിന്ദു സംഘടനകളും പ്രതിമ സ്ഥാപിക്കുന്നതിനെതിരെ കോടതിയെ സമീപിച്ചതോടെ അനാവരണ ചടങ്ങ് മാറ്റി പ്രതിമ മൂടിവച്ചു. ഹൈക്കോടതി നിർദേശത്തെ തുടർന്നാണ് പ്രതിമ മാറ്റി സ്ഥാപിക്കാൻ നഗരസഭ തുടർന്ന് തീരുമാനിക്കുന്നത്. അനുയോജ്യമായ മറ്റ് സ്ഥലം കണ്ടെത്താനാകാഞ്ഞതോടെ ലൈബ്രറി കൗൺസിൽ ആസ്ഥാന മന്ദിരത്തോട് ചേർന്ന് സ്ഥാപിച്ചുവെങ്കിലും ഏറെക്കാലം മൂടിക്കെട്ടിവെച്ചിരിക്കുകയായിരുന്നു. കൊട്ടാരക്കര ശ്രീധരൻ നായരുടെ മകൾ പൊതുവേദിയിൽ ഈ വിഷയം ആക്ഷേപമായി ഉന്നയിച്ചത് വലിയ മാധ്യമ ശ്രദ്ധ നേടി. ലൈബ്രറി കൗൺസിലിന് പുതിയ ഭാരവാഹികൾ ചുമതലയേറ്റയുടൻ പ്രതിമ അനാച്ഛാദനത്തെപ്പറ്റി ആലോചിച്ചു. നഗരസഭയുടെ അനുമതിയോടെ പ്രതിമയുടെ ചുറ്റൊരുക്ക് സാന്‍റോ സന്തോഷിനെ നിയോഗിച്ച് ഭംഗിയാക്കി. തുടർന്നായിരുന്നു അനാച്ഛാദനം.

രാജസ്ഥാൻ സ്വദേശി കടത്തിക്കൊണ്ടുവന്ന 27പവൻ സ്വർണം പിടികൂടി

കൊല്ലം: രാജസ്ഥാൻ സ്വദേശി ബൈക്കിൽ കടത്തി കൊണ്ടുവന്ന 27 പവൻ സ്വർണം കണ്ണനല്ലൂർ പോലീസ് പിടികൂടി. നല്ലില മജിസ്ട്രേറ്റ് മുക്കിൽ വാഹന പരിശോധന നടത്തുന്നതിനിടെ രാജസ്ഥാൻ രാജ്പുരബലാന പറമ്പ ഗള്ളി സ്വദേശി ഹിതേഷ് കുമാർ (21) ആണ് സ്വർണവുമായി അറസ്റ്റിലായത്. ഹിതേഷിനൊപ്പം ഒരു 15 കാരനും ഉണ്ടായിരുന്നു. പോലീസി െ ന്‍റ അന്വേഷണത്തിൽ 15 കാരൻ ലിഫ്റ്റ് ചോദിച്ചു കേറിയതാണെന്നാണ് അറിയാനായത്. ഹിതേഷ് കുമാറിൽ നിന്നും രേഖകൾ ഇല്ലാത്ത 50,000 രൂപയും, 216 ഗ്രാം സ്വർണവുമാണ് പോലീസ് പിടികൂടിയത്. 162. 84 ഗ്രാം തൂക്കം വരുന്ന 56 സ്വർണ മോതിരങ്ങളായും 53.340 ഗ്രാം തൂക്കം വരുന്ന തങ്കകട്ടിയായുമാണ് സ്വർണം ഉണ്ടായിരുന്നത്. ഐഎസ്എച്ച്ഒ ശ്രീകുമാർ എസ് ഐമാരായ ജിബി, ഹരി സോമൻ, എ എസ് ഐ ജ്യോതിഷ് എന്നിവർ ചേർന്നാണ് സ്വർണം പിടികൂടിയത്. ഹിതേഷ് കുമാറിനെ ചോദ്യം ചെയ്തു വരുകയാണ്.

വിനോദിന്‍റെ സത്യസന്ധതയ്ക്ക് പൊൻതിളക്കം

കുണ്ടറ : കളഞ്ഞുകിട്ടിയ രണ്ടര പവൻ സ്വർണ ചെയിൻ ഉടമയ്ക്ക് തിരിച്ചുനൽകി മാതൃകയായി കുണ്ടറ മുളവന സ്വദേശി വിനോദ്. ചെയിൻ പോലീസ് സ്റ്റേഷനിൽ ഉണ്ടെന്ന വിവരം ഉടമ അറിഞ്ഞത് സോഷ്യൽ മീഡിയയിലൂടെ. മുളവന തുണ്ടിൽ കിഴക്കതിൽ വീട്ടിൽ വിനോദിനാണ് മുളവന മാടൻകാവിനു സമീപത്തു നിന്നും രാത്രിയിൽ രണ്ടര പവൻ തൂക്കം വരുന്ന സ്വർണ ചെയിൻ കളഞ്ഞുകിട്ടിയത്. ജൂലൈ 11 നാണ് സംഭവം. 12ന് രാവിലെ വിനോദ് കുണ്ടറ പോലീസ് സ്റ്റേഷനിൽ എത്തി സിഐ രാജേഷിന്‍റെ കൈ യിൽ ചെയിൻ ഏൽപ്പിക്കുകയും ചെയ്തു. ഈ വിവരം സിഐ സമൂഹമാധ്യമങ്ങളിൽ പങ്കുവെച്ചു. മണിക്കൂറുകൾക്കകം ചെയിനിന്‍റെ ഉടമയായ മുളവന പള്ളിമുക്ക് സ്വദേശി സുബിന്‍റെ സുഹൃത് ഫേസ്ബുക്ക്‌ പോസ്റ്റ് കാണുകയും ആ വിവരം സുബിനെ അറിയിക്കുകയും ചെയ്തു. ഇന്നലെ വൈകുന്നേരം സ്വർണ ചെയിൻ കിട്ടിയ വിനോദിനെയും ഉടമ സുബിനെയും സ്റ്റേഷനിൽ വിളിച്ചു വരുത്തി സിഐയുടെ സാന്നിധ്യത്തിൽ വിനോദിനെ കൊണ്ടുതന്നെ ഉടമയ്ക്ക് ചെയിൻ കൊടുപ്പിക്കുകയും ചെയ്തു. ചെയിൻ തിരിച്ചുകിട്ടുമെന്നുള്ള ഒരു പ്രതീക്ഷയും ഉണ്ടായിരുന്നില്ലെന്ന് സുബിൻ പറഞ്ഞു.

ലഹരിക്കെതിരേ വിശ്വാസികൾ ഒറ്റക്കെട്ടായി പോരാടണം: ഡോ.ജോസഫ് മാർ ദിവന്നാസിയോസ് മെത്രാപ്പോലീത്ത

കൊല്ലം : ലഹരി ഉൾപ്പെടെയുള്ള സാമൂഹിക വിപത്തുകൾക്കെതിരെ വിശ്വാസികൾ ഒറ്റക്കെട്ടായി പോരാടണമെന്നു കൊല്ലം ഭദ്രാസനാധിപൻ ഡോ. ജോസഫ് മാർ ദിവന്നാസിയോസ്. മലങ്കര ഓർത്തഡോക്സ് സഭാ കൊല്ലം ഭദ്രാസന വാർഷിക യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഭദ്രാസനത്തിന്‍റെ നവീകരിച്ച വെബ്സൈറ്റിന്‍റെ ഉദ്ഘാടനവും ചടങ്ങിൽ അദ്ദേഹം നിർവഹിച്ചു. കോറെപ്പിസ്കോപ്പമാരായ ജോൺ ചാക്കോ, രാജു തോമസ്, പി.ഒ.തോമസ് പണിക്കർ, എം.എം.വൈദ്യൻ, ബാബു ജോർജ്, നെൽസൺ ജോൺ എന്നിവരെ ആദരിച്ചു. ചടങ്ങിൽ 2025-26 ബജറ്റ് അവതരിപ്പിച്ചു. ഭദ്രാസന സെക്രട്ടറി ഫാ. പി.ടി.ഷാജൻ, വൈദിക സംഘം സെക്രട്ടറി ഫാ.ജോൺ ടി. വർഗീസ്, ഭദ്രാസന കൗൺസിൽ അംഗങ്ങളായ റവ.ബാബു ജോർജ്, കോർ എപ്പിസ്കോപ്പ ഫാ.ആൻഡ്രൂസ് വർഗീസ് ,തോമസ്, ലാലു മോൻ മഞ്ഞക്കാല, മാത്യു ജോൺ കല്ലുംമൂട്ടിൽ, ഡോ.ഡി. പൊന്നച്ചൻ, സിബിൻ തേവലക്കര, ഫാ.മാത്യു ഏബ്രഹാം തലവൂർ, ഫാ.ഐപ്പ് നൈനാൻ, ഡോ.ജോൺസൺ കല്ലട, സാജു വർഗീസ്, റോബിൻ പി.അലക്സ്, ജോൺ സി.ഡാനിയേൽ ഫാ.ഏബ്രഹാം വർഗീസ് എന്നിവർ പ്രസംഗിച്ചു.

മാർ ഈവാനിയോസ് ചരിത്ര പ്രദർശനം നടത്തി

കൊട്ടാരക്കര: മലങ്കര കാത്തലിക് അസോസിയേഷൻ തിരുവനന്തപുരം മേജർ അതിഭദ്രാസന സമിതിയുടെ ആഭിമുഖ്യത്തിൽ കൊട്ടാരക്കര കിഴക്കേ തെരുവ് സെന്‍റ് മേരീസ് ഹയർ സെക്കൻഡറി സ്കൂളിൽ മാർ ഈവാനിയോസ് ചരിത്ര പ്രദർശനവും പദയാത്രയ്ക്ക് സ്വീകരണവും നടത്തി. എംസിഎ പ്രസിഡന്‍റ് എസ്.ആർ.ബൈജു ഉദ്ഘാടനം ചെയ്തു. എംസിഎമേജർ അതി ഭദ്രാസന പ്രസിഡന്‍റ് റെജി മോൻ വർഗീസ് അധ്യക്ഷത വഹിച്ചു. ജില്ലാ വികാരി ഫാ.ജോസഫ് കടകംപള്ളിൽ, റവ. ജോൺസൺ പള്ളി പടിഞ്ഞാറ്റേതിൽ, അതിഭദ്രാസന സെക്രട്ടറി രാജുമോൻ ഏഴംകുളം, ട്രഷറർ ജോൺ അരശുംമൂട് ,ജെസി ദിലീപ്, പ്രിൻസിപ്പൽ ജോമി തോമസ് എന്നിവർ പ്രസംഗിച്ചു. മാർ ഈവാനിയോസിന്‍റെ നൂറിലധികം വ്യത്യസ്ത ചിത്രങ്ങളും വിദേശപര്യടന ചിത്രങ്ങളും പ്രദർശനത്തിന് മാറ്റ് കൂട്ടി.

വെള്ളംകുടി ബാബു പിടിയില്‍

അഞ്ചല്‍ : നൂറിലധികം മോഷണ കേസുകളില്‍ പ്രതിയായ വെള്ളംകുടി ബാബു പിടിയില്‍. കഴിഞ്ഞ ദിവസമാണ് രാത്രി പട്രോളിങ്ങിനിടെ അഞ്ചല്‍ പോലീസിനെ കണ്ട് ഓടിയ വെള്ളംകൂടി ബാബുവിനെ പിന്തുടര്‍ന്നു പിടികൂടിയത്. കസ്റ്റഡിയില്‍ എടുക്കുന്ന സമയം ഇയാളുടെ പക്കല്‍ നിന്നും ഉളി, ചുറ്റിക, വെട്ടുകത്തി ഉള്‍പ്പടെ ആയുധങ്ങള്‍ പോലീസ് കണ്ടെത്തി. അടുത്തിടെ ജാമ്യത്തിലിറങ്ങിയ ബാബു മോഷണ ശ്രമത്തിനിടെയാണ് പിടിയിലാകുന്നത്. ഒരാഴ്ചയായി മലയോര മേഖലയില്‍ പ്രത്യേകിച്ചു അഞ്ചല്‍ ,ഏരൂര്‍ പോലീസ് സ്റ്റേഷന്‍ പരിധിയില്‍ വ്യാപകമായി മോഷണം നടന്നിരുന്നു. കഴിഞ്ഞ ദിവസം മാത്രം ഏരൂരിലെ പത്തടിയില്‍ അടുത്തടുത്ത നാല് വ്യാപാര സ്ഥാപനങ്ങളിലാണ് കവര്‍ച്ച നടത്തിയത്. ഈകേസില്‍ ഉള്‍പ്പെടെ പോലീസ് അന്വേഷണം ഊര്‍ജിതമാക്കിയിരിക്കെയാണ് വെള്ളംകുടി ബാബു പിടിയിലാകുന്നത്. ഇയാളെ പിടികൂടാന്‍ കഴിഞ്ഞത് പോലീസിനെ സംബന്ധിച്ച് വലിയ ആശ്വാസമാണ്.

കരുനാഗപ്പള്ളിയിലും അഞ്ചാലുംമൂട്ടിലും ലഹരിവേട്ട : രണ്ടുപേർ അറസ്റ്റിൽ

കൊല്ലം:കരുനാഗപ്പള്ളിയിലും അഞ്ചാലുംമൂട്ടിലും എക്സൈസിന്‍റെ ലഹരിവേട്ട. രണ്ടുപേർ രണ്ടു സംഭവങ്ങളിലായി അറസ്റ്റിലായി. കരുനാഗപ്പള്ളി തൊടിയൂരിൽ 227 ഗ്രാം എംഡിഎംഎയുമായി പുലിയൂർ വഞ്ചി കിഴക്ക് ദേശത്ത് മഠത്തിൽ വടക്കത്തിൽ വീട്ടിൽ അനന്തു ( 27), മെത്താംഫെറ്റാമൈനുമായി കൊല്ലം തൃക്കരുവാ കായൽവാരത്ത് വീട്ടിൽ കെ. നൗഫൽ ( 32) എന്നിവരാണ് അറസ്റ്റിലായത്. കൊല്ലം എക്സൈസ് എൻഫോഴ്സ്മെന്‍റ് ആൻഡ് ആന്‍റി നർകോട്ടിക് സ്പെഷൽ സ്‌ക്വാഡ് പാർട്ടി എക്സൈസ് ഇൻസ്പെക്ടർ സി.പി.ദിലീപിന്‍റെ നേതൃത്വത്തിൽ കരുനാഗപ്പള്ളി തൊടിയൂർ ഭാഗത്ത് നടത്തിയ പരിശോധനയിലാണ് 227 ഗ്രാം എംഡിഎംഎയുമായി അനന്തു അറസ്റ്റിലാവുന്നത്. ജില്ലയിൽ സമീപകാലത്ത് പിടികൂടുന്ന ഏറ്റവും വലിയ അളവിലുള്ള മയക്കുമരുന്ന് വേട്ടയാണിതെന്നും, പ്രതി മുൻപും സമാനമായ രീതിയിൽ എംഡിഎംഎയുമായി പിടിയിലായിട്ടുണ്ടെന്നും എക്സൈസ് പറഞ്ഞു. ബംഗ്ലൂരിൽ നിന്നും എംഡി എം എ വൻതോതിൽ ഇറക്കുമതി ചെയ്ത് വിൽപ്പന നടത്തുന്ന മൊത്തവിതരണക്കാരനാണ് അറസ്റ്റിലായ അനന്തു. ഇയാളുടെ ഇടനിലക്കാരെയും ഉപഭോക്താക്കളെയും പറ്റി വിവരങ്ങൾ എക്സൈസിന് ലഭ്യമായിട്ടുണ്ട്. പിടിച്ചെടുത്ത മയക്കുമരുന്നിന് വിപണിയിൽ 15 ലക്ഷത്തോളം രൂപ വില വരും. റെയ്ഡിൽ അസിസ്റ്റന്‍റ് എക്സൈസ് ഇൻസ്പെക്ടർ ശ്രീകുമാർ, ഐബി പ്രിവന്‍റീവ് ഓഫീസർ മനു, സിവിൽ എക്സൈസ് ഓഫീസർമാരായ അജിത്ത്, അനീഷ് ജൂലിയൻ ക്രൂസ്,ബാലു സുന്ദർ,സൂരജ് എന്നിവരാണ് ഉണ്ടായിരുന്നത്. അഞ്ചാലുംമൂട് സി കെ പിയിൽ നടത്തിയ പരിശോധനയിൽ ഒരു കാറിൽ നിന്ന് 3.915 ഗ്രാം മെത്താംഫെറ്റാമൈനും നൗഫലിന്‍റെ വീട്ടിൽ നിന്ന് 10.257 ഗ്രാം മെത്താംഫെറ്റാമൈനുമാണ് എക്സൈസ് പിടികൂടിയത്. വീടിന്‍റെ സിറ്റ് ഔട്ടിലോട്ടു തുറക്കാവുന്ന ബെഡ്‌റൂമിലാണ്10.257 ലഹരിമരുന്ന് നൗഫൽ ഒളിപ്പിച്ചിരുന്നത്. കൊല്ലം എക്സൈസ് റേഞ്ച്‌ ഇൻസ്‌പെക്ടർ പി. ശങ്കറിന്‍റെ നേതൃത്വത്തിൽ നടന്ന മയക്ക് മരുന്ന് വേട്ടയിൽ ഇൻസ്‌പെക്ടർ ആർ. ജി.വിനോദ് , ഷഹലുദ്ദീൻ, ബിനുലാൽ, ആസിഫ്, പ്രദീഷ്, ജിത്തു, ട്രീസ, സിവിൽ എക്സൈസ് ഓഫീസർ ഡ്രൈവർ സന്തോഷ് കുമാർ എന്നിവർ പങ്കെടുത്തു.

വീടുകയറി ആക്രമിച്ചതായി പരാതി

ചവറ : അഞ്ചംഗ സംഘം വീട്ടില്‍ അതിക്രമിച്ച് കയറി ആക്രമണം നടത്തിയതായി പരാതി.ആക്രമണത്തില്‍ വയോധികയുള്‍പ്പെടെയുള്ളവര്‍ക്ക് പരിക്കേറ്റു. ചവറ മേനാമ്പള്ളി കുഴീത്തറ കിഴക്ക് വീട്ടില്‍ മറിയം ബീവി (65), മകന്‍ റിയാസ് (43), മരുമകള്‍ മാജിദ (35),മക്കളായ അദില (10), അദിനാന്‍(14),എന്നിവര്‍ക്കാണ് പരിക്കേറ്റത്. ഇവര്‍ ആശുപത്രിയില്‍ ചികിത്സയിലാണ്.ശനിയാഴ്ച രാത്രിയായിരുന്നു സംഭവം.റിയാസിന്‍റെ മകന്‍ അദിനാന്‍ സൈക്കിളില്‍ കാറ്റ്‌ നിറയ്ക്കുന്നതിന് നാസറിന്‍റെ കടയിലെത്തുകയും അതുമായി ബന്ധപ്പെട്ട വാക്ക് തര്‍ക്കമാണ് വീടുകയറിയുള്ള ആക്രമണത്തിന് കാരണമെന്ന് പരാതിയില്‍ പറയുന്നു. മാജിദ കൊല്ലത്തെ സ്വകാര്യ ആശുപത്രിയില്‍ തീവ്ര പരിചരണ വിഭാഗത്തില്‍ ചികിത്സയിലാണ്. പരാതിയുടെ അടിസ്ഥാനത്തില്‍ ചവറ പോലീസ് നാസറുള്‍പ്പെടെ കണ്ടാലറിയാവുന്ന അഞ്ച് പേര്‍ക്കെതിരെ കേസെടുത്തു .

22 ലക്ഷവുമായി മുങ്ങിയയാളെ 20 വര്‍ഷത്തിന് ശേഷം പിടികൂടി

അഞ്ചൽ: മൂന്നുപേരില്‍ നിന്നുമായി 22 ലക്ഷം രൂപ വാങ്ങിയ ശേഷം തിരികെ കൊടുക്കാതെ മുങ്ങിയ പ്രതിയെ 20 വര്‍ഷത്തിന് ശേഷം പിടികൂടി. നെടുമണ്‍കാവ് തെക്കേക്കര അങ്ങാടിയില്‍ ബിജുവിനെയാണ് അഞ്ചല്‍ പോലീസ് പിടികൂടിയത്. 2005 ലാണ് ബിജു കൂടല്‍ സ്വദേശികളായ രണ്ടുപേരില്‍ നിന്നും അടൂര്‍ സ്വദേശിയായ ഒരാളില്‍ നിന്നുമായി 22 ലക്ഷം രൂപ വാങ്ങി തിരികെ നല്‍കാതെ മുങ്ങിയത്. തുടര്‍ന്നു പണം നഷ്ടമായവര്‍ പോലീസില്‍ പരാതിനൽകി. പിന്നീട് ഇയാളെകുറിച്ച് ഒരുവിവരവും പോലീസിന് ലഭിച്ചിരുന്നില്ല. ഇതിനിടെ 2009-ല്‍ ബിജുവിനെ പുനലൂര്‍ കോടതി പിടികിട്ടാപ്പുള്ളിയായി പ്രഖ്യാപിക്കുകയും ചെയ്തു. പലയിടങ്ങളിലായി മാറിമാറി താമസിച്ചുവന്ന ബിജു കര്‍ണകയിലെ മൈസൂരില്‍ ഉണ്ടെന്ന രഹസ്യ വിവരത്തിന്‍റെ അടിസ്ഥാനത്തില്‍ ഒരുമാസത്തെ അന്വേഷണത്തിനൊടുവില്‍ കഴിഞ്ഞ ദിവസം പിടികൂടുകയായിരുന്നു. അഞ്ചലില്‍ എത്തിച്ച പ്രതിയെ അറസ്റ്റ് രേഖപ്പെടുത്തി വൈദ്യ പരിശോധനയും പൂര്‍ത്തിയാക്കി കോടതിയില്‍ ഹാജരാക്കി റിമാന്‍ഡ് ചെയ്തു. അഞ്ചല്‍ എസ്എച്ച്ഒ ഹരീഷ്, എസ്ഐ പ്രജീഷ്കുമാര്‍, സീനിയര്‍ സിവില്‍ പോലീസ് ഓഫീസര്‍മാരായ വിനോദ് കുമാര്‍, വിഷ്ണു എന്നിവരടങ്ങുന്ന സംഘമാണ് പ്രതിയെ പിടികൂടിയത്.

ദൈവകരങ്ങൾ മനുഷ്യരിലൂടെ നിമിഷ പ്രിയയുടെ മോചനം സാധ്യമാക്കും: ഫാ. റോൾഡൻ ജേക്കബ്

കൊല്ലം : യമൻ ജയിലിൽ മരണത്തെ മുഖാമുഖം കണ്ട് കഴിയുന്ന നിമിഷ പ്രിയയുടെ ജീവൻ രക്ഷിക്കാൻ ദൈവത്തിന്‍റെ കരങ്ങൾ മനുഷ്യരിലൂടെ പ്രവർത്തിച്ച് നിമിഷയുടെ മോചനം സാധ്യമാക്കുമെന്ന് ഫാ. റോൾഡൻ ജേക്കബ് കേരള പ്രവാസി വെൽഫെയർ ഓർഗനൈസേഷൻ സംസ്ഥാന കമ്മറ്റിയുടെ ആഭിമുഖ്യത്തിൽ നീണ്ടകര സെന്‍റ് സെബാസ്റ്റ്യൻ പള്ളിയങ്കണത്തിൽ നടന്ന പ്രാർഥനാദിനത്തിൽ വിളക്ക് തെളിയിച്ച് സംസാരിക്കുകയായിരുന്നു അദ്ദേഹം. ചടങ്ങിൽ ഫാ. റോൾഡൻ ജേക്കബ് ദീപം തെളിയിച്ച് എൻ. എസ്. വിജയന് കൈമാറി.നിമിഷയുടെ മോചനം സാധ്യമാക്കാൻ കേന്ദ്ര സംസ്ഥാന സർക്കാരുകൾ ഒരുമിച്ച് പ്രവർത്തിച്ച് യുദ്ധകാലാടിസ്ഥാനത്തിൽ വേണ്ട നടപടികൾ എടുക്കണമെന്ന് കേരള പ്രവാസി വെൽഫെയർ ഓർഗനൈസേഷൻ സംസ്ഥാന ചെയർമാൻ എൻ. എസ്. വിജയൻ ആവശ്യപ്പെട്ടു. പ്രസന്ന അലക്സാണ്ടർ,അലക്സ് നെപ്പോളിയൻ, അഡ്വ. ഫ്രാൻസിസ് ജെ. നെറ്റോ, കുരീപ്പുഴ ഷാനവാസ്‌, കെ.വി. ജ്യോതിലാൽ, അഗസ്റ്റിൻ സേവ്യർ, ജാക്സൺ നീണ്ടകര, ക്ലീറ്റസ് ആന്‍റണി, കുരീപ്പുഴ യഹിയ, ആസാദ് ആശിർവാദ്, മരുത്തടി കൃഷ്ണകുമാർ, ജയിംസ് കാർലോസ്, കെ.എ. ജോളി, ഷിജി ജോസഫ്, സെബാസ്റ്റ്യൻ ജോർജ്, ഷാജി പീറ്റർ, സന്തോഷ്‌ കുരീപ്പുഴ, കാവനാട് ഫ്രാൻസിസ്, ഹരി നീണ്ടകര, കൊല്ലം അലക്സാണ്ടർ തുടങ്ങിയവർ ചടങ്ങിൽ പ്രസംഗിച്ചു.

ആര്യങ്കാവിൽ കർഷകസംഗമം നടത്തി

ആര്യങ്കാവ്: കർഷക കോൺഗ്രസിന്‍റെ നേതൃത്വത്തിൽ ആര്യങ്കാവിൽ നടന്ന കർഷകസംഗമം ജില്ലാ കോൺഗ്രസ് കമ്മിറ്റി ജനറൽ സെക്രട്ടറിയും തെന്മല പഞ്ചായത്ത് പ്രസിഡന്‍റുമായ കെ. ശശിധരൻ ഉദ്ഘാടനം ചെയ്തു. കർഷക കോൺഗ്രസ് സംസ്ഥാന എക്സിക്യൂട്ടീവ് അംഗം സണ്ണി ജോസഫ് അധ്യക്ഷത വഹിച്ചു. കർഷക കോൺഗ്രസ് സംസ്ഥാന ജനറൽ സെക്രട്ടറി വിളക്കുപാറ ദാനിയേൽ മുഖ്യപ്രഭാഷണം നടത്തി. ഡിസിസി ജനറൽ സെക്രട്ടറി എസ്.ഇ.സഞ്‌ജയ്ഖാൻ ,കോൺഗ്രസ് ബ്ളോക്ക് കമ്മിറ്റി വൈസ് പ്രസിഡന്‍റുമാരായ ബിനു ശിവപ്രസാദ്, തോമസ് മൈക്കിൾ, ഐഎൻടിയൂസി മണ്ഡലം പ്രസിഡന്‍റ് അച്ചൻകോവിൽ ശ്രീരാജ്, യൂത്ത് കോൺഗ്രസ് മണ്ഡലം പ്രസിഡന്‍റ് അജോ മറ്റത്തിൽ,വനിതാ കോൺഗ്രസ് മണ്ഡലം പ്രസിഡന്‍റ് ശിവകാമി, നേതാക്കളായ അബ്‌ദുൾ മനാഫ് ,വി.എസ്.ശിവദാസൻ, പ്രിൻസ് നെടുമ്പാറ, തോമസ് വർക്കി,ഷാജഹാൻ എന്നിവർ പ്രസംഗിച്ചു. ഇടക്കാലത്ത് പാർട്ടി വിട്ടു പോയി തിരിച്ചുവന്ന ഇടപ്പാളയം സുരേഷ്, ഗിരിജ സുരേഷ് എന്നിവരെ യോഗത്തിൽ സ്വീകരിച്ചു. കിഴക്കൻ മേഖലയിൽ വന്യജീവി ആക്രമണം മൂലം കർഷകർ അനുഭവിക്കുന്ന ദുരിതങ്ങൾ യോഗം ചർച്ച ചെയ്തു. കൃഷി ചെയ്യുന്നത് കർഷകനും വിളവെടുക്കുന്നത് വന്യജീവിയും എന്ന അവസ്ഥയ്ക്ക് പരിഹാരം ഉണ്ടാകണമെന്നും വന്യജീവി ആക്രമണത്തിന് ഇരയായവർക്ക് അർഹിക്കുന്ന നഷ്‌ടപരിഹാരം നൽകണമെന്നും യോഗം ആവശ്യപ്പെട്ടു . ഈ ആവശ്യം ഉന്നയിച്ച് വനം ഓഫീസ് പടിക്കൽ സമരം സംഘടിപ്പിക്കാനും തീരുമാനിച്ചു.

യുവാവിനെ കൊലപ്പെടുത്താൻ ശ്രമം; ഒളിവിലായിരുന്ന പ്രതി പിടിയിൽ

കൊല്ലം: യുവാവിനെ കുത്തിക്കൊലപ്പെടുത്താൻ ശ്രമിച്ച ശേഷം ഒളിവിൽ കഴിഞ്ഞുവന്ന പ്രതി പോലീസ് പിടിയിലായി. പാരിപ്പള്ളി കോട്ടെക്കേറം രാജുവിലാസത്തിൽ കൊച്ചുമോൻ എന്ന നിതിൻ(34) ആണ് പാരിപ്പള്ളി പോലീസിന്‍റെ പിടിയിലായത്. ജൂണ്‍ 24ന് അർധരാത്രി പാരിപ്പള്ളി ആലുവിള ക്ഷേത്രത്തിന് സമീപം നിൽക്കുകയായിരുന്ന ഉളിയനാട് സ്വദേശി സൈജുവിന്‍റെ കൈവശമുണ്ടായിരുന്ന മൊബൈൽ ഫോണ്‍ ഇയാൾ തട്ടിയെടുക്കാൻ ശ്രമിക്കുകയായിരുന്നു. എതിർത്തതോടെ പ്രതി പൊട്ടിയ ബിയർകുപ്പി ഉപയോഗിച്ച് സൈജുവിനെ കവിളിലും വയറിലും നെഞ്ചിന്‍റെ പല ഭാഗങ്ങളിലുമായി ആഴത്തിൽ കുത്തി പരിക്കേൽപ്പിച്ചു. പ്രതിയുടെ ആക്രമണത്തിൽ ഗുരതരമായി പരിക്കേറ്റ സൈജുവിനെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരുന്നു. സംഭവ ശേഷം ഒളിവിൽപോയ നിതിനെതിരെ വധശ്രമത്തിന് കേസ് രജിസ്റ്റർ ചെയ്ത് അന്വേഷണം അരംഭിച്ചെങ്കിലും പിടികൂടാൻ കഴിഞ്ഞിരുന്നില്ല. അന്വേഷണം നടന്ന് വരവെ ചാത്തന്നൂർ എസിപി അലക്സാണ്ടർ തങ്കച്ചന് ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ ഇയാളെ കഴിഞ്ഞ ദിവസം പോലീസ് സംഘം പിടികൂടുകയായിരുന്നു. പാരിപ്പള്ളി, ചാത്തന്നൂർ, കൊട്ടിയം, പൂയപ്പള്ളി, ആറ്റിങ്ങൽ എന്നീ പോലീസ് സ്റ്റേഷനുകളിൽ രജിസ്റ്റർ ചെയ്തിട്ടുള്ള നിരവധി ക്രിമിനൽ കേസുകളിൽ പ്രതിയാണ് പിടിയിലായ നിതിൻ. പൂയപ്പള്ളിയിലേയും ആറ്റിങ്ങലിലേയും കേസുകളിൽ പിടികിട്ടാപ്പുള്ളിയായി ഒളിവിൽ കഴിഞ്ഞ് വരുന്നതിനിടയിലാണ് പാരിപ്പള്ളി പോലീസിന്‍റെ വലയിലാകുന്നത്. പാരിപ്പള്ളി ഇൻസ്പെക്‌ടർ നിസാറിന്‍റെ നേതൃത്വത്തിൽ എസ്ഐ മാരായ അബീഷ്, അഖിലേഷ്, രമേശ്, ബിജു എന്നിവരടങ്ങിയ പോലീസ് സംഘമാണ്് പ്രതിയെ പിടികൂടിയത്.

അനുഷ്ഠാന കലാകാരന്മാരെ സർക്കാർ അവഗണിക്കുന്നു: ഐഎൻഎയുസി

കൊല്ലം: അനുഷ്ഠാന പരമ്പരാഗത കലാകാരന്മാരെ സർക്കാർ അവഗണിക്കുന്നതായി ഇന്ത്യൻ നാഷണൽ ആർട്ടിസ്റ്റ് യൂണിയൻ കോൺഗ്രസ് (ഐഎൻഎയുസി) ജില്ലാ ജനറൽബോഡി ആരോപിച്ചു. ഐഎൻഎയുസിയെ കോൺഗ്രസ് പാർട്ടിയുടെ പോഷക സംഘടനയായ കെപിസിസി സംസ്കാര സാഹിതിയുമായി ലയിപ്പിക്കാൻ തീരുമാനിച്ചു. ലയനത്തിന് കൊല്ലം ജില്ലാ ജനറൽ ബോഡിയുടെ അംഗീകാരം നേടി. 26ന് കോഴിക്കോട് ഡിസിസി ഹാളിൽ നടക്കുന്ന ലയന സമ്മേളനത്തിൽ 100 പ്രവർത്തകരെ പങ്കെടുപ്പിക്കുവാൻ യോഗം തീരുമാനിച്ചു. ഐഎൻഎയുസി ജില്ലാ പ്രസിഡന്‍റ് ് ഷാജി ആനക്കോട്ടൂരിന്‍റെ അധ്യക്ഷതയിൽ കൂടിയ യോഗം സംസ്ഥാന സെക്രട്ടറി ഒ .ബി .രാജേഷ് ഉദ്ഘാടനം ചെയ്തു. ജില്ലാ സംസ്ഥാന ഭാരവാഹികളായ സിദ്ധാർഥൻ ആശാൻ, വടക്കേവിള അഷറഫ്, ബിനോയി ഷാനൂര്‍, സിന്ധു പട്ടത്താനം, ബൈജു ആലുംമൂട്ടിൽ, എസ് .ആർ .ബിന്ദു, ഒ .ജയശ്രീ, അജിത, സുശീല, പ്രതാപൻ മണവാട്ടി, ബിജി, സൈതലി, സിന്ധു പ്രശാന്ത്, അനിൽ സി കാരിക്കൽ എന്നിവർ പ്രസംഗിച്ചു.

സ്കൂട്ടർ യാത്രക്കാരനെ കാട്ടുപന്നി ആക്രമിച്ചു

കുളത്തൂപ്പുഴ : മലയോര ഹൈവേയിൽ സ്കൂട്ടർ യാത്രക്കാരന് കാട്ടുപന്നിയുടെ ആക്രമണത്തിൽ ഗുരുതര പരിക്ക്. കഴിഞ്ഞദിവസം രാത്രി ജോലി കഴിഞ്ഞ് സ്കൂട്ടറിൽ വരികയായിരുന്ന കല്ലുവെട്ടാൻകുഴി അശ്വതി ഭവനിൽ ജ്യോതിഷ് ബാബുവിനാണ് പരിക്ക്. തിങ്കൾക്കരിക്കം പ്രദേശത്ത് വെച്ച് റോഡ് മുറിച്ച് കടന്നുവന്ന കാട്ടുപന്നികൾ കൂട്ടത്തോടെ വന്ന് ഇടിച്ചതിനെ തുടർന്ന് ജ്യോതിഷ്ബാബു സ്കൂട്ടറിൽനിന്ന് തെറിച്ച് റോഡിലേക്ക് വീഴുകയായിരുന്നു. വീഴ്ചയിൽ കൈയ്ക്കും തലയ്ക്കും ഗുരുതരമായ പരിക്കേൽക്കുകയും പല്ലുകൾ നഷ്‌ടപ്പെടുകയും ചെയ്തു . ഇതുവഴി കടന്നുവന്ന കെഎസ്ആർടിസി ബസിലെ ഡ്രൈവറും കണ്ടക്‌ടറും യാത്രക്കാരും ചേർന്ന് റോഡിൽ വീണു കിടന്ന ജ്യോതിഷ് ബാബുവിനെ അഞ്ചൽ മിഷൻ ഹോസ്പിറ്റലിൽ എത്തിച്ചു. അവിടത്തെ പ്രഥമ ശുശ്രൂഷയ്ക്ക് ശേഷം പാരിപ്പള്ളി മെഡിക്കൽ കോളജിലേക്ക് മാറ്റി. ഈ പ്രദേശങ്ങളിൽ കാട്ടുപന്നികളുടെ ശല്യമേറിയിരിക്കുകയാണ്. ഇതിനെതിരെ യാതൊരു നടപടിയും ഫോറസ്റ്റ് ഉദ്യോഗസ്ഥർ കൈക്കൊള്ളുന്നില്ല .ആറു മാസം മുമ്പ് കടമാൻകോട് പ്രദേശത്ത് നിന്നും കുളത്തൂപ്പുഴ കെഎസ്ആർടിസി ഡിപ്പോയിലേക്ക് ജോലിക്ക് വരികയായിരുന്ന കണ്ടക്‌ടർക്കും കാട്ടുപന്നി ആക്രമണം മൂലം ഗുരുതരമായി പരിക്കേറ്റിരുന്നു. മലയോര ഹൈവേയിൽ രാത്രികാലങ്ങളിൽ ടൂവീലറിൽ യാത്ര ചെയ്യുന്നവർ വന്യജീവികൾ മുഖാന്തരം വൻ അപകടങ്ങളിലാണ് ചെന്ന് പെടുന്നതെന്ന് നാട്ടുകാർ പറയുന്നു.

‘വിസ്കിയ്ക്ക് ’സ്മൃതികുടീരം ഒരുക്കും : വളർത്തുനായയുടെ സഞ്ചയനം നടത്തി വീട്ടുകാർ

കുണ്ടറ : വളർത്തുനായയുടെ സഞ്ചയനം ആദര സൂചകമായി നടത്തി പ്രിയപ്പെട്ടവർ. കശുവണ്ടി വ്യവസായി കൊല്ലം കടപ്പാക്കട സ്വാസ്‌തികയിൽ സോമരാജ െ ന്‍റയും കുടുംബത്തി െ ന്‍റയും വളർത്തുനായ കുട്ടപ്പായി എന്ന വിസ്കിയുടെ സഞ്ചയനമാണ് പ്രിയപ്പെട്ടവരെയെല്ലാം ക്ഷണിച്ച് നടത്തിയത്. സഞ്ചയന കത്തിലെ വരികൾ ഇങ്ങനെ. ‘ഞങ്ങളുടെ മാലാഖ വിസ്കി - കുട്ടപ്പായിയുടെ സ്നേഹസ്‌മരണയ്ക്ക്... സോമരാജൻ ,അച്ഛൻ, രജിത, അമ്മ, വൈശാഖ്, സഹോദരൻ, നിള, സഹോദരി'.'അവൻ ഞങ്ങൾക്ക് നായക്കുട്ടിയല്ലായിരുന്നു. ഇളയ മകൻ തന്നെയായിരുന്നു. അത്രയ്ക്കു ഞങ്ങൾ അവനെ സ്നേഹി ച്ചു. അവൻ തിരിച്ചും. രജിതയുടെ വാക്കുകളിൽ സ്നേഹത്തി െ ന്‍റ ' കണ്ണീർ നനവാണ് ഉള്ളത്. ചീരാങ്കാവ് നിള ഇൻ ഹോട്ടലിലായിരുന്നു വിസികിയുടെ സഞ്ചയന ചടങ്ങ് നടന്നത്. ആദ്യം പ്രാർഥന, പിന്നെ അവ െ ന്‍റ ഓർമകൾ പങ്കുവച്ച് പ്രാതൽ. കുട്ടപ്പായിയെ സ്നേഹിച്ചവരെയെല്ലാം കത്തിലൂടെ അച്ഛനും അമ്മയും സഹോദരങ്ങളും ക്ഷണിച്ചിരുന്നു. സോമരാജ െ ന്‍റ കുടുംബത്തിലെ ഒരു അംഗമായിരുന്നു കുട്ടപ്പായി എന്ന നായ. പഗ് ഇനത്തിൽപെട്ട അവനെ 45 ദിവസം പ്രായമുള്ളപ്പോൾ സോമരാജന്‍റെ മകൻ വൈശാഖ് എറണാകുളത്തു നിന്നു കൊണ്ടുവന്നതാണ്. നല്ല തിരിച്ചറിവും വകതിരിവും ഉണ്ടായിരുന്ന നായക്കുട്ടിക്ക് അവർ 'വിസ്കി' എന്നു പേരിട്ടു. ഓമനപ്പേര് ‘കുട്ടപ്പായി'. അന്നുമുതൽ ഊണും ഉറക്കവും എല്ലാം വീട്ടുകാർക്ക് ഒപ്പമായിരുന്നു കുട്ടപ്പായി. വാരിക്കൊടുത്താലേ ഭക്ഷണം കഴിക്കൂ. കുടുംബത്തി െന്‍റ എല്ലാ യാത്രകളിലും വിസ്കിയും കൂടെ ഉണ്ടാവും.അവന്‍റെ എല്ലാ പിറന്നാളുകളും കുടുംബത്തിന് ആഘോഷമായിരുന്നു. ഇടയ്ക്ക് സോമരാജനും ഭാര്യ രജിതയും ഫാക്‌ടറികളിൽ പോകുമ്പോൾ അവർക്കൊപ്പം വിസ്കിയും ഉണ്ടാവും. തൊഴിലാളികൾക്കും അവൻ പ്രിയപ്പെട്ടവനായിരുന്നു. കഴിഞ്ഞ ചൊവ്വാഴ്ച്‌യായിരുന്നു 11 വയസുള്ള അവ െ ന്‍റ വിയോഗം. രാവിലെ ഒരു ശ്വാസംമുട്ടൽ, പതിവ് ഡോക്‌ടറെ വിളിച്ചു മരുന്നു നൽകി. ഉച്ചയ്ക്കു ഭക്ഷണം കഴിക്കാൻ മടി കാണിച്ചു. എന്നിട്ടും വാരിക്കൊടുത്തതു കഴിച്ച ശേഷം തലതാഴ്ത്തി അവൻ കിടന്നു. പിന്നെ കണ്ണു തുറന്നില്ല. പ്രായാധിക്യം കൊണ്ടുള്ള ഹൃദയാ ഘാതമായിരുന്നു മരണകാരണം. പെട്ടിയിലായിരുന്നു അടക്കം. കർമങ്ങളും നടത്തി. 16 കഴിഞ്ഞാൽ പറശിനിക്കടവ് മുത്തപ്പ െ ന്‍റ സന്നിധിയിൽ അവന്‍റെ ഒരു വെള്ളിരൂപം സമർപ്പിക്കാനിരിക്കുകയാണ് കുടുംബം. കുട്ടപ്പായിയെ സംസ്ക‌രിച്ച സ്ഥലത്ത് സ്മൃതി കുടീരവും ഒരുക്കുന്നുണ്ട്. അവിടെ വയ്ക്കാൻ കുട്ടപ്പായിയുടെ കുഞ്ഞു പ്രതിമ സോമരാജന്‍റെ മകൾ നിള ഓർഡർ ചെയ്തിരിക്കുകയാണ്.

മുണ്ടയ്ക്കല്‍ കച്ചിക്കടവ് പാലത്തിനായി 27.97 കോടി രൂപ അനുവദിച്ചു: മന്ത്രി

കൊല്ലം : ഇരവിപുരം മണ്ഡലത്തിലെ മുണ്ടയ്ക്കല്‍ കച്ചിക്കടവ് പാലത്തിന്‍റെ നിര്‍മാണത്തിനായി 27.97 കോടി രൂപ അനുവദിച്ചതായി മന്ത്രി കെ. എന്‍. ബാലഗോപാല്‍ അറിയിച്ചു. ടി എസ് കനാലിന് കുറുകെ നിര്‍മിക്കുന്ന പാലത്തിനും അപ്രോച്ച് റോഡിന്‍റെ സ്ഥലം ഏറ്റെടുക്കലും അടക്കമുള്ളതാണ് പദ്ധതി. 7.95 കോടി രൂപയായിരുന്നു പദ്ധതിയുടെ ആദ്യ അടങ്കല്‍. പിന്നീട് സ്ഥലം ഏറ്റെടുക്കലും, പൊതുമരാമത്ത് നിരക്ക് മാറ്റവും അടക്കമുള്ള ഘടകങ്ങളും ഉള്‍പ്പെട്ടതോടെയാണ് അധിക തുകയ്ക്കുള്ള പുതുക്കിയ അടങ്കലിന് ധനാനുമതി നല്‍കിയത്. 147.5 മീറ്റര്‍ നീളത്തില്‍ ഒമ്പത് സ്പാനുകള്‍ ഉള്‍പ്പെട്ടതാണ് പാലത്തിന്‍റെ നിര്‍മിതി. ചായക്കട മുക്കില്‍ തുടങ്ങി തീരദേശ ഭാഗത്തുമായി അപ്രോച്ച് റോഡ് നിര്‍മിക്കും. പാലത്തിന്‍റെ ഇരുഭാഗത്തും മൂന്നര മീറ്റര്‍ വീതിയില്‍ സര്‍വീസ് റോഡുണ്ടാകും. അപ്രോച്ച് റോഡ് നിര്‍മാണത്തിന് 104 സെന്‍റ് സ്ഥലമാണ് ഏറ്റെടുക്കേണ്ടത്. ഇതിന് 11 കോടി രൂപ അടങ്കലിലുണ്ട്.

ഹോട്ടല്‍ഭക്ഷണത്തില്‍ ഭക്ഷ്യവിഷബാധയെന്നു സംശയം; മൂന്നുപേര്‍ ആശുപത്രിയില്‍

പേരൂര്‍ക്കട: ഹോട്ടല്‍ഭക്ഷണത്തില്‍ ഭക്ഷ്യവിഷബാധയെന്നു സംശയം, ദേഹാസ്വാസ്ഥ്യമനുഭവപ്പെട്ട മൂന്നുപേര്‍ ആശുപത്രിയില്‍ ചികിത്സ തേടി. മണക്കാട് മഹാറാണി ജംഗ്ഷനിലെ ഹോട്ടലില്‍നിന്ന് അല്‍ഫാം കഴിച്ചവര്‍ക്കാണ് ഛര്‍ദിയും ശരീരത്തളര്‍ച്ചയും അനുഭവപ്പെട്ടത്. ഇന്നലെ ഉച്ചതിരിഞ്ഞാണ് കല്ലാട്ടുമുക്ക് സ്വദേശികളായ 39 വയസുകാരിക്കും 21കാരനും അല്‍ഫാം കഴിച്ചതിനെത്തുടര്‍ന്ന് അസ്വസ്ഥതയനുഭവപ്പെട്ടത്. അമ്പലത്തറയില്‍നിന്ന് ആഹാരം കഴിക്കാന്‍ ഇതേ ഹോട്ടലിലെത്തിയ ഒരു 15-കാരനും ശാരീരിക അവശത അനുഭവപ്പെട്ടതിനെത്തുടര്‍ന്ന് ചികിത്സ തേടി. മൂവരും അമ്പലത്തറ അല്‍-അരീഫ് ആശുപത്രിയില്‍ പ്രാഥമിക ചികിത്സ തേടി. പരാതിയെത്തുടര്‍ന്ന് ആരോഗ്യവകുപ്പ് അധികൃതര്‍ സ്ഥലത്തെത്തി പരിശോധന നടത്തി. ഭക്ഷണത്തിന്‍റെ സാമ്പിളുകള്‍ ശേഖരിച്ചിട്ടുണ്ട്. പരിശോധന പൂര്‍ത്തിയാക്കിയ അധികൃതര്‍ ഹോട്ടല്‍ അടപ്പിച്ചു.

പോലീസ് ഉദ്യോഗസ്ഥനെ ഉപദ്രവിച്ച പ്രതി അറസ്റ്റില്‍

പൂന്തുറ: പോലീസ് ഉദ്യോഗസ്ഥനെ ശാരീരികമായി ഉപദ്രവിച്ച കേസിലെ പ്രതിയെ പൂന്തുറ പോലീസ് അറസ്റ്റ് ചെയ്തു. പൂന്തുറ മദര്‍തേരേസ കോളനിയില്‍ താമസിക്കുന്ന ജോസിനെ (39) ആണ് പോലീസ് അറസ്റ്റ് ചെയ്തത്. ദിവസങ്ങള്‍ക്കുമുമ്പു വിഴിഞ്ഞം കോസ്റ്റല്‍ പോലീസ് സ്റ്റേഷനില്‍ നിന്നും ഡ്യൂട്ടിയുടെ ഭാഗമായി തിരുവല്ലം ഇടയാര്‍ ഭാഗത്തെത്തിയ സിപിഒ ബിനുവിനെയാണ് ജോസ് ദേഹോപദ്രവം ഏല്‍പ്പിച്ചത്. സംശയകരമായ സാഹചര്യത്തില്‍ കണ്ട ജോസിനെ മഫ്തിയില്‍ എത്തിയ ബിനു ചോദ്യം ചെയ്തതാണ് ആക്രമണത്തില്‍ കലാശിച്ചത്. കൂടാതെ മുമ്പു പൂന്തുറ സ്റ്റേഷന്‍ പരിധിയിലുളള ക്ഷേത്രത്തിലെ കാണിക്കവഞ്ചി കവര്‍ന്ന കേസില്‍ ജോസ് പ്രതിയായിരുന്നതായി പോലീസ് പറഞ്ഞു. ആ സംഭവവുമായി ബന്ധപ്പെട്ട് ജോസിനെ കസ്റ്റഡിയിലെടുത്ത സംഘത്തില്‍ ബിനു ഉണ്ടായിരുന്നതായും പറയുന്നു. പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ എസ്ഐ സുനില്‍, ജൂണിയര്‍ എസ്ഐ നവീൻ, സിപിഒമാരായ ദീപക്, രാജേഷ്, സനല്‍ എന്നിവരുള്‍പ്പെട്ട പോലീസ് സംഘമാണ് ജോസിനെ അറസ്റ്റ് ചെയ്തത്. കോടതി പ്രതിയെ റിമാന്‍ഡ് ചെയ്തു.

എംഡിഎംഎയുമായി യുവാവ് പിടിയിൽ

കൊല്ലം: എം ഡി എം എ യുമായി യുവാവ് കൊട്ടിയം പോലീസിന്‍റെ പിടിയിലായി. തൃക്കോവിൽവട്ടം പുതുച്ചിറ ജെ.ജെ .ഭവനത്തിൽ ജിജുമോൻ (28) ആണ് പിടിയിലായത്. ചാത്തന്നൂർ എസിപി അലക്സാണ്ടർ തങ്കച്ചന് ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ കൊട്ടിയം പോലീസ് നടത്തിയ പരിശോധനയിൽ ഡിസന്‍റ് ജംഗ്ഷന് സമീപമുള്ള പമ്പ് ഹൗസ് പരിസരത്തുനിന്നാണ് 760 മില്ലിഗ്രാം എം ഡി എം എയുമായി പിടികൂടിയത്. കൊട്ടിയം പോലീസ് ഇൻസ്പെക്ടർ പ്രദീപിന്‍റെ നേതൃത്വത്തിൽ എസ് ഐ മാരായ നിഥിൻ നളൻ, സോമരാജൻ, സിപിഒ മാരായ ശഭു, ഷമീർ, ഷാനീർ എന്നിവരടങ്ങിയ പോലീസ് സംഘമാണ് പ്രതിയെ പിടികൂടിയത്.

സ്തനാര്‍ബുദ നിര്‍ണയ ക്യാമ്പ് സംഘടിപ്പിച്ചു

കൊല്ലം: കൊല്ലം സിറ്റി പോലീസ്‌, സ്നേഹിത വിമന്‍സ്‌ ഹെല്‍ത്ത്‌ ഫൗണ്ടേഷന്‍റെ സഹകരണത്തോടെ ‘പരിശോധിക്കുക, കണ്ടെത്തുക, സുരക്ഷിതരാവുക' എന്ന ലക്ഷൃത്തോടെ, ഏറ്റവും നല്ല സംരക്ഷണം നേരത്തെയുള്ള കണ്ടെത്തലാണ്എന്ന പ്രമേയവുമായി സ്തനാര്‍ബുദ നിർണയ ക്യാമ്പും ബോധവത്കരണവും സംഘടിപ്പിച്ചു. ജില്ലാ പോലീസ്‌ ആസ്ഥാനത്തെ പോലീസ്‌ ഹോസ്പിറ്റലില്‍ നടന്ന ക്യാമ്പ്‌ സബ്‌ ജഡ്ജും ജില്ലാ ലീഗല്‍ സര്‍വീസ്‌ അഥോറിറ്റി സെക്രട്ടറിയുമായ ഡോ. അമൃത ഭദ്ര ദീപം കൊളുത്തി ഉദ്ഘാടനം ചെയ്തു. ജില്ലാ പോലീസ്‌ മേധാവി കിരണ്‍ നാരായണ്‍ അധ്യക്ഷത വഹിച്ചു. പരിശോധന ക്യാമ്പ് സ്നേഹിത ഹെല്‍ത്ത്‌ ഫൗണ്ടേഷന്‍റെ ഡയറക്‌ടറും ഗോകുലം മെഡിക്കല്‍ കോളജിലെ കമ്യുണിറ്റി മെഡിസിന്‍ പ്രഫസറുമായ ഡോ.റെജി ജോസ്‌ നയിച്ചു. ജില്ലാ പോലീസ്‌ മേധാവിയും സബ്‌ ജഡ്ജും കരുനാഗപ്പള്ളി എ എസ്‌ പിയും പരിശോധനയില്‍ ആദ്യം തന്നെ പങ്കെടുത്തത്‌ ക്യാമ്പിലെത്തിയ മറ്റ്‌ വനിതകള്‍ക്ക്‌ ആത്മവിശ്വാസം ഉണ്ടാക്കി. കൊല്ലം സിറ്റി പോലീസ്‌ ജില്ലയിലെ വനിതാ പോലീസ്‌ ഉദ്യോഗസ്ഥര്‍, വനിതാ മിനിസ്റ്റീരിയല്‍ ജീവനക്കാര്‍, മറ്റ്‌ ഉദ്യോഗസ്ഥരുടെ ഭാര്യമാര്‍ എന്നിവരുള്‍പ്പെടെ ഉദ്യോഗസ്ഥരും കുടുംബാംഗങ്ങളും ക്യാമ്പില്‍ പങ്കെടുത്തു. കരുനാഗപ്പള്ളി എഎസ്‌പി അഞ്ജലി ഭാവന, സബ്‌ ഇന്‍സ്പെക്ടര്‍ സരിത എന്നിവർ പ്രസംഗിച്ചു.

ഗവർണർ സ്വീകരിക്കുന്നത് വിദ്യാർഥികളുടെ ഭാവി തകർക്കുന്ന നിലപാട് : കെ.സി. വേണുഗോപാൽ എംപി

കൊല്ലം: ഉന്നതവിദ്യാഭ്യാസ മേഖലയിൽ വിദ്യാർഥികളുടെ ഭാവി തകർക്കുന്ന നിലപാടാണ് ഗവർണർ സ്വീകരിക്കുന്നതെന്ന് കെ.സി. വേണുഗോപാൽ എംപി. കേരള സർവകലാശാലയിലെ ഗുരുതരമായ കൃത്യവിലോപത്തിലെ ഒന്നാം പ്രതി ഗവർണറാണെന്നും അദ്ദേഹം പറഞ്ഞു. കേരള ഗസറ്റഡ് ഓഫിസേഴ്സ് യൂണിയൻ സ്ഥാപകദിന സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു എംപി. ഭാരതാംബയുടെ കൈയിൽ കാവിക്കൊടി കൊടുക്കാൻ ശ്രമിച്ചാൽ അതിന് സമ്മതിക്കില്ല. കേരളത്തിലെ സർവകലാശാലകൾ സ്തംഭിച്ചു കിടക്കുകയാണ്. എത്ര പേരുടെ ഭാവി കൊണ്ടാണ് ഇവർ പന്താടുന്നത്? ഗവർണർക്കെതിരേ എങ്ങനെ സംസാരിക്കണമെന്ന് പിണറായി വിജയൻ തമിഴ്നാട് മുഖ്യമന്ത്രി സ്റ്റാലിനെ കണ്ടു പഠിക്കണം. സർവകലാശാലകളിലെ പ്രശ്നങ്ങൾ പരിഹരിക്കുന്നതിനു മുഖ്യമന്ത്രിയും ഗവർണറും ഉടൻ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു. കീം റാങ്ക് പട്ടികയിലെ വിഷയത്തിൽ വിദ്യാർഥികളെ പല റാങ്കുകളിലാക്കി ആശയക്കുഴപ്പം സൃഷ്‌ടിച്ചതിൽ ഒന്നാം പ്രതി സംസ്ഥാന സർക്കാരാണ്. സംസ്ഥാന ജീവനക്കാരെ ഇത്രയധികം ദ്രോഹിച്ച മറ്റൊരു സർക്കാരുണ്ടായിട്ടില്ല. കുടിശിക സർക്കാരാണ് ഇപ്പോൾ സംസ്ഥാനം ഭരിക്കുന്നത്. ജീവനക്കാർക്കിടയിൽ ഇപ്പോൾ ഒരു തെരഞ്ഞെടുപ്പ് നടത്തിയാൽ പിണറായിക്കെതിരെ ഭൂരിഭാഗം പേരും വിധിയെഴുതും. ഇംഗ്ലിഷ് ഭാഷ ഇല്ലാതാക്കുമെന്ന് പറയുന്ന അമിത് ഷായ്ക്ക് കേരളത്തിൽ വന്ന് അത് പറയാൻ ധൈര്യമുണ്ടോ?. എല്ലാ ഭാഷകളും പഠിക്കുകയാണ് വേണ്ടത്. മതത്തിന്‍റെയും ജാതിയുടെയും ഭാഷയുടെയും പേരിൽ രാജ്യത്തെ ജനങ്ങളെ ഭിന്നിപ്പിക്കാനാണ് ശ്രമമെന്നും കെ.സി. വേണുഗോപാൽ പറഞ്ഞു. യൂണിയൻ സംസ്ഥാന പ്രസിഡന്‍റ് കെ.സി.സുബ്രഹ്മണ്യൻ അധ്യക്ഷത വഹിച്ചു. കൊടിക്കുന്നിൽ സുരേഷ് എംപി, ഡിസിസി പ്രസിഡന്‍റ് പി.രാജേന്ദ്രപ്രസാദ്, കെപിസിസി രാഷ്‌ട്രീയകാര്യ സമിതി അംഗം ബിന്ദു കൃഷ്ണ, ജോൺസൺ ഏബ്രഹാം, കെപിസിസി ജനറൽ സെക്രട്ടറി ജി.സുബോധൻ, എം.എം.നസീർ, സെക്രട്ടറി സൂരജ് രവി, പി.ജർമിയാസ്, സെറ്റോ ചെയർമാൻ ചവറ ജയകുമാർ തുടങ്ങിയവർ പ്രസംഗിച്ചു.

മാർ ഈവാനിയോസിന്‍റെ തീർഥാടന പദയാത്രയ്ക്ക് സ്വീകരണം നൽകി

കൊട്ടാരക്കര: മാർ ഈവാനിയോസിന്‍റെ കബറിങ്കലേക്കുള്ള തീർഥാടന പദയാത്രയ്ക്ക് കിഴക്കേത്തെരുവ് സെന്‍റ് മേരീസ് ഹയർസെക്കൻഡറി സ്കൂളിൽ സ്വീകരണം നൽകി. ബർസാർ ഫാ. ഗീവർഗീസ് എഴിയത്ത് ഹാരമണിയിച്ച് സ്വീകരിച്ചു. സ്കൂൾ പ്രിൻസിപ്പൽ ടി. ടി. ജോമി, ഹെഡ്മാസ്റ്റർ ടി. രാജു, പ്രോഗ്രാം കൺവീനർ ഫാ. ജോർജ് ഭട്ടശേരിൽ, സ്റ്റാഫ് സെക്രട്ടറി ബിനിൽ ജോൺ, പിടിഎ സെക്രട്ടറി കോശി കെ ബാബു, സി. എ. സൈമൺ, രാജീവ്‌ രാജൻ തുടങ്ങിയവർ നേതൃത്വം നൽകി.

വിദ്യാലയങ്ങളില്‍ പഠനനിലവാരം ഉയര്‍ത്തുന്നതിൽ സര്‍ക്കാര്‍ പ്രതിജ്ഞാബദ്ധം: മന്ത്രി വി. ശിവന്‍കുട്ടി

കൊല്ലം: വിദ്യാലയങ്ങളില്‍ ഭൗതികസാഹചര്യം മെച്ചപ്പെടുത്തുന്നതിനൊപ്പം പഠനനിലവാരം ഉയര്‍ത്തുന്നതിലും സര്‍ക്കാര്‍ പ്രതിജ്ഞാബദ്ധമെന്ന് മന്ത്രി വി. ശിവന്‍കുട്ടി. കോട്ടപ്പുറം സര്‍ക്കാര്‍ എല്‍ പി സ്‌കൂളില്‍ നിര്‍മിച്ച ബഹുനില കെട്ടിടം ഉദ്ഘാടനം ചെയ്യുകയായിരുന്നു അദ്ദേഹം. ഓരോ വിദ്യാര്‍ഥിക്കും മികച്ച വിദ്യാഭ്യാസം ലഭ്യമാക്കുകയാണ്. പരീക്ഷകള്‍ നടത്തി അക്കാദമിക മികവ് വിലയിരുത്തും. പഠനം സന്തോഷകരമായ അനുഭവമാക്കാന്‍ നൂതനവിദ്യകളിലൂടെ പുതിയ പാഠ്യപദ്ധതി കൊണ്ടുവന്നു. അക്കാദമിക മികവിനോടൊപ്പം ശാരീരികവും മാനസികവുമായ വളര്‍ച്ചയ്ക്കും പ്രാധാന്യം നല്‍കും. ദേശീയ സര്‍വേയില്‍ വിദ്യാഭാസ രംഗത്ത് 16-ാമത് സ്ഥാനത്തായിരുന്ന കേരളം നിലവില്‍ രണ്ടാം സ്ഥാനത്താണെന്നും മന്ത്രി പറഞ്ഞു. കിഫ്ബി ഫണ്ടില്‍ നിന്നും ഒരു കോടി ഏഴ് ലക്ഷം രൂപ ചെലവഴിച്ചാണ് കോട്ടപ്പുറം സര്‍ക്കാര്‍ എല്‍ പി സ്‌കൂളിന് കെട്ടിടം നിര്‍മിച്ചത്. തീരദേശ വികസന കോര്‍പറേഷനായിരുന്നു നിര്‍മാണച്ചുമതല. ജി.എസ് ജയലാല്‍ എംഎല്‍എ അധ്യക്ഷതവഹിച്ചു. നഗരസഭ ചെയര്‍പേഴ്‌സണ്‍ പി. ശ്രീജ, വൈസ് ചെയര്‍പേഴ്‌സണ്‍ എ. സഫര്‍ കയാല്‍, സ്റ്റാന്‍ഡിംഗ് കമ്മിറ്റി അധ്യക്ഷരായ വി. അംബിക, എസ്. ഗീത, എസ്. ശ്രീലാല്‍, എസ്. മിനി, ജെ. ഷെരീഫ്, ഡി ഡി ഇ കെ.ഐ. ലാല്‍, ചാത്തന്നൂര്‍ എ ഇ ഒ എലിസബത്ത് ഉമ്മന്‍, എക്സിക്യൂട്ടീവ് എന്‍ജിനിയര്‍ ഐ.ജി. ഷിലു, രാഷ്്‌ട്രീയപാര്‍ട്ടി പ്രതിനിധികള്‍, അധ്യാപകന്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു.

പത്തടിയിലെ വ്യാപാര സ്ഥാപനങ്ങളിലെ മോഷണം : അന്വേഷണം ഊര്‍ജിതമാക്കി പോലീസ്

അഞ്ചല്‍ : ഏരൂര്‍ പത്തടിയില്‍ പ്രവര്‍ത്തിക്കുന്ന നാല് വ്യാപാര സ്ഥാപനങ്ങളിൽ കഴിഞ്ഞ ദിവസം നടന്ന കവര്‍ച്ച സംബന്ധിച്ച് അന്വേഷണം ഊർജിതമാക്കി പോലീസ്. പച്ചക്കറി, പലചരക്ക്, വളം, മീന്‍ വില്‍പ്പന കേന്ദ്രം ഉള്‍പ്പെടെ നാലിടങ്ങളില്‍ നടന്ന കവര്‍ച്ചയിലായി രണ്ടുലക്ഷത്തോളം രൂപയുടെ നഷ്‌ടമാണ് കണക്കാക്കുന്നത്. പത്തടി സ്വദേശിയായ മിഗ്ദാദിന്‍റെ പച്ചക്കറി കടയുടെ മുന്‍വശത്തെ ഗ്രില്ലിന്‍റെ പൂട്ടുകള്‍ തകര്‍ത്ത് അകത്തു കടന്ന മോഷ്‌ടാവ് മേശക്കുള്ളില്‍ ബാഗില്‍ സൂക്ഷിച്ചിരുന്ന 55,000 രൂപയും വൈദ്യുതി ബില്ലും വാടകയും കൊടുക്കാന്‍ മറ്റൊരിടത്ത് സൂക്ഷിരുന്ന മൂവായിരം രൂപയും ഉള്‍പ്പെടെയുള്ളവ കവര്‍ച്ച ചെയ്യുകയായിരുന്നു. ബാങ്കില്‍ നിന്നും കഴിഞ്ഞ ദിവസം ലോണ്‍ എടുത്ത തുകയായിരുന്നു കടയില്‍ സൂക്ഷിച്ചിരുന്നതെന്ന് കടയുടമ മിഗ്ദാദ് പറഞ്ഞു. മേശകളുടെ പൂട്ട് കുത്തിപ്പൊളിച്ചായിരുന്നു മോഷണം. ഇവിടെ നിന്നും ഏതാനും മീറ്റര്‍ മാത്രം ദൂരത്തുള്ള ഒരേ കെട്ടിടത്തില്‍ പ്രവര്‍ത്തിക്കുന്ന നൗഷാദിന്‍റെ വളം വില്പനശാലയിലും, നസീറിന്‍റെ പലചരക്ക് കടയിലും ഒപ്പം മോഷണം നടന്നിട്ടുണ്ട്. പലചരക്ക് കടയില്‍ നിന്നും മൂന്നുപെട്ടി വെളിച്ചെണ്ണ, രണ്ടു പെട്ടി സണ്‍ഫ്ലവര്‍, ഒരു പെട്ടി പാംഓയില്‍, ബേക്കറി സാധനങ്ങള്‍ ഉള്‍പ്പടെയുള്ളവ മോഷ്‌ടിതച്ചു. വളം കടയില്‍ നിന്നും പതിനായിരത്തോളം രൂപയും എതിര്‍ ദിശയിലേ മീന്‍ കടയില്‍ നിന്നും 600 രൂപയും ത്രാസും മോഷണം പോയിട്ടുണ്ട്. പച്ചക്കറി കടയില്‍ നിന്നും പൂട്ടുപൊളിക്കാന്‍ ഉപയോഗിച്ച ചുറ്റിക, മോഷ്ടാവിന്‍റെ എന്നു കരുത്തുന്ന കൈലി, കുട എന്നിവ പോലീസ് കണ്ടെത്തിയിട്ടുണ്ട്. കടകളില്‍ നിന്നും നശിപ്പിച്ച പൂട്ടുകള്‍ പാതയോരത്ത് നിന്നും കണ്ടെത്തിയിട്ടുണ്ട്. കടയുടമകളുടെ പരാതിയില്‍ സ്ഥലത്തെത്തിയ ഏരൂര്‍ പോലീസ് മോഷണം സംബന്ധിച്ച് അന്വേഷണം ആരംഭിച്ചു. കൊല്ലത്ത് നിന്നും ഡോഗ് സ്ക്വാഡും വിരലടയാള വിദഗ്ധരും സ്ഥലത്തെത്തി തെളിവുകള്‍ ശേഖരിച്ചിട്ടുണ്ട്. പ്രദേശത്തെ മറ്റ് സ്ഥാപനങ്ങളുടെ സിസിടിവി ദൃശ്യങ്ങള്‍ പോലീസ് ശേഖരിച്ചു.

അഷ്‌ടമുടി തണ്ണീർത്തട അഥോറിറ്റി യാഥാർഥ്യത്തിലേക്ക്

കൊല്ലം: അഷ്‌ടമുടി കായൽ സംരക്ഷണത്തിനു ശാശ്വത പരിഹാരമായി പരിസ്ഥിതി സംഘടകളും കൊല്ലം നിവാസികളും പ്രതീക്ഷ വെക്കുന്ന അഷ്‌ടമുടി തണ്ണീർത്തട അഥോറിറ്റി യാഥാർഥ്യത്തിലേക്ക്. അഷ്‌ടമുടി തണ്ണീർത്തട അഥോറിറ്റിയുടെ ഘടന സംബന്ധിച്ച് ഹർജികക്ഷികളായ അഡ്വ .ബോറിസ് പോൾ, ഹെൽപ് ഫൗണ്ടേഷൻ സി ഇ ഒ പീറ്റർ പ്രദീപ് എന്നിവരുടെ നിർദേശങ്ങൾ പരിഗണിച്ച് സംസ്ഥാന സർക്കാരും സ്റ്റേറ്റ്‌ വെറ്റ് ലാൻഡ് അഥോറിറ്റിയും സമർപ്പിച്ച വിശദമായ ശുപാർശ അംഗീകരിക്കുന്നതായി ഹർജിക്കാരുടെ അഭിഭാഷകൻ കോടതിയെ അറിയിച്ചിരിക്കുകയാണ്. അഷ്‌ടമുടി കായൽ സംരക്ഷണക്കേസിൽ ഹർജികക്ഷികളുടെയും വിവിധ സർക്കാർ വകുപ്പുകളുടെയും വിശദമായ വാദം ഹൈക്കോടതിയിൽ നടന്നു. കേസിൽ ഹൈക്കോടതി 29ന് വിധി പറയാനിരിക്കുകയാണ്. അഷ്‌ടമുടി തണ്ണീർത്തട അഥോറിറ്റിയിലേക്ക് വിദഗ്ധഅംഗങ്ങളെ നാമനിർദേശം ചെയ്യാനും സമിതിക്ക് വേണ്ടി പ്രത്യേകം ഭരണ സംവിധാനം ഒരുക്കുന്നതിനും ധനവകുപ്പിന്‍റെ അനുമതി വേണമെന്നും ആയതിന് രണ്ടു മാസത്തെ സമയം വേണമെന്നുമാണ് സർക്കാർ അഭിഭാഷകൻ കോടതിയിൽ പറഞ്ഞിട്ടുള്ളത്. പുതുതായി രൂപീകരിക്കുന്ന അഥോറിറ്റിയുടെ ആദ്യയോഗം മൂന്ന് മാസത്തിനകം കൊല്ലത്ത് ചേരണമെന്നും അഷ്ടമുടി കായലിന് വേണ്ടിയുള്ള പ്രത്യേക ആക്ഷൻ പ്ലാൻ ആറ് മാസത്തിനകം പൂർത്തിയാക്കാനും വാദത്തിനിടെ കോടതി വാക്കാൽ പറഞ്ഞിട്ടുണ്ട്. ഹർജികക്ഷികൾക്ക് വേണ്ടി അഭിഭാഷകരായ എ.അജ്മൽ, പ്രിയങ്ക ശർമ ,അഡ്വ. എം.ജി.അനന്യ എന്നിവരാണ് ഹാജരായത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]