ADVERTISEMENT

ADVERTISEMENT

കിഴക്കേത്തെരുവ് സെന്‍റ് മേരീസിന് ഇരട്ട മധുരം

കൊട്ടാരക്കര : എസ്എസ്എൽസി പരീക്ഷാഫലം വന്നപ്പോൾ കിഴക്കേത്തെരുവ് സെന്‍റ് മേരീസ് സ്കൂളിന് ഇരട്ടിമധുരം. ഇരട്ടകളായ ആറുപേർക്കാണ് ഫുൾ എ പ്ലസ് ലഭിച്ചത് .ഗ്രേസ് മറിയം സണ്ണി,

ക്രിസ് സണ്ണിതോമസ് ,ജാനിസ് തങ്കം തോമസ് ,ജൊഹാന മറിയം തോമസ് ,അധീന സാബു,അബീന സാബു എന്നിവരാണ് ഫുൾ എ പ്ലസ് നേടി മിന്നുന്ന വിജയം കരസ്ഥമാക്കിയത് .സ്കൂൾ മാനേജ്മെന്‍റും രക്ഷാകർതൃസമിതിയും ചേർന്ന് അഭിനന്ദിച്ചു .

ADVERTISEMENT

കിഴക്കേത്തെരുവ് സെന്‍റ് മേരീസ് ഹയർ സെക്കൻഡറി സ്കൂളിന് മിന്നും ജയം

കൊട്ടാരക്കര : കൊട്ടാരക്കര വിദ്യാഭ്യാസ ജില്ലയിൽ ഏറ്റവും കൂടുതൽ കുട്ടികളെ പരീക്ഷയ്ക്കിരുത്തിയ കിഴക്കേത്തെരുവ് സെന്‍റ്മേരീസ് സ്കൂൾ 12 ഫുൾ എ പ്ലസ് നേടി 100ശതമാനം വിജയം കരസ്ഥമാക്കി. 444 കുട്ടികളാണ് ആകെ പരീക്ഷ എഴുതിയത് .വിജയികളായവരെ സ്കൂൾ മാനേജ്മെന്‍റും രക്ഷാകർതൃ സമിതിയും അഭിനന്ദിച്ചു. ഹെഡ്മാസ്റ്റർ റെജി ലൂക്കോസ് ,പ്രിൻസിപ്പൽ ടി.ടി.ജോമി,ബർസാർ, ഫാ. ഗീവർഗീസ് എഴിയത്ത്,പിടിഎ പ്രസിഡന്‍റ് ജോർജ് ജേക്കമ്പ് ,പ്രോഗ്രാം കോഡിനേറ്റർ ഫാ. വിൽസൺ ചരുവിള , സ്റ്റാഫ് സെക്രട്ടറി ,സൈമൺ. സി.എ എന്നിവർ പ്രസംഗിച്ചു

ആര്യങ്കാവ് സെന്‍റ് മേരീസ് ഹൈസ്കുളിന് മികച്ച വിജയം

ആര്യങ്കാവ്: പരീക്ഷ എഴുതിയ 75 കുട്ടികളെ വിജയതിലകം അണിയിക്കുവാനും 12 കുട്ടികൾക്ക് എല്ലാ വിഷയങ്ങൾക്കും എ പ്ലസ് ഗ്രേഡ് കരസ്ഥമാക്കുവാനും സ്കൂളിന് സാധിച്ചു. അശ്വതി ഷാജി, ദേവനന്ദ ,ഗായത്രി , ഏയ്ഞ്ചൽ മരിയ ജോസഫ് , അന്ന മരിയ ഉമ്മൻ, ആഷ്ന ഫാത്തിമ, ജസബെൽ മരിയ ജോസഫ്, ലിയോണ ജോഷി, മഹിഷ വർധിനി,മീഖാ ജോസഫ്, സി.എ. ശിവനന്ദൻ, എം.വിഷ്ണു എന്നിവർക്കാണ് എല്ലാ വിഷയങ്ങൾക്കും എ പ്ലസ് ഗ്രേഡ് ലഭിച്ചത്. കിലോമീറ്ററുകൾ നടന്നും തുടർന്ന് ബസിൽ യാത്ര ചെയ്തും കഷ്ടതകൾ താണ്ടിയെത്തുന്ന കുട്ടികളുടെ വിജയമാണിതെന്ന് പിടിഎ ആശംസിച്ചു. എസ് എസ് എൽ സി പരീക്ഷയ്ക്ക് കുട്ടികളെ തയാറാക്കുന്നതിനായി ജനുവരി ആദ്യം മുതൽ തന്നെ സ്കൂളിൽ രാവിലെ 8.30 മുതലും വൈകുന്നേരം 5.30 വരെ പ്രത്യേക പരിശീലന ക്ലാസുകൾ നൽകിയിരുന്നു. ഉപജില്ലാ കലോത്സവത്തിലും ശാസ്ത്ര മേളയിലും കായികമേളയിലും മികച്ച പ്രകടനം കാഴ്ച വയ്ക്കുന്ന ആര്യങ്കാവ് സെന്‍റ് മേരീസ് ഹൈസ്കൂളിന് ഇരട്ടി മധുരമായി എസ് എസ് എൽ സി വിജയം. വിജയികളായ എല്ലാ കുട്ടികളെയും അവരെ വിജയത്തിലേക്ക് നയിച്ച അധ്യാപകരെയും സ്കൂൾ മാനേജർ ഫാ.ഫിലിപ്പ് തയ്യിലും, സ്കൂൾ ഹെഡ്മാസ്റ്റർ ഷാനിൽ ജോസഫും പിടിഎ പ്രസിഡന്‍റ് ഷിബു മാത്യുവും അഭിനന്ദിച്ചു .

എം-സാന്‍റ് വില്പനകേന്ദ്രത്തിലെ പൊടിശല്യം പരിശോധിക്കണം: മനുഷ്യാവകാശ കമ്മീഷൻ

കൊല്ലം: ഇരവിപുരം ആലുമൂട്ടിൽ പ്രവർത്തിക്കുന്ന പാറപ്പൊടി, എം-സാന്‍റ് വിൽല്പന കേന്ദ്രത്തിൽ നിന്നും അസഹ്യമായ പൊടി, ശബ്ദ ശല്യമുണ്ടാകുന്നതായി പരാതി ഉയർന്ന സാഹചര്യത്തിൽ മലിനീകരണ നിയന്ത്രണ ബോർഡ് സ്ഥലപരിശോധന നടത്തി വസ്തുതാ റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ അംഗം വി.ഗീത ഉത്തരവിട്ടു. മലിനീകരണ നിയന്ത്രണ ബോർഡ് (കൊല്ലം) എൻവയോൺമെന്‍റൽ എൻജിനീയർക്കാണ് കമ്മീഷൻ നിർദ്ദേശം നൽകിയത്. ഒരു മാസത്തിനകം അന്വേഷണ റിപ്പോർട്ട് സമർപ്പിക്കണം. അസഹ്യമായ പൊടിശല്യം കാരണം സ്വന്തം വീട്ടിൽ താമസിക്കാൻ കഴിയുന്നില്ലെന്നാരോപിച്ച് ആലുമ്മൂട് സ്വദേശി എസ്.രാധാകൃഷ്ണൻ സമർപ്പിച്ച പരാതിയിലാണ് ഉത്തരവ്. മൈനിംഗ് ആൻഡ് ജിയോളജി ഡയറക്ടറിൽ നിന്നും കമ്മീഷൻ റിപ്പോർട്ട് വാങ്ങി. വില്പനകേന്ദ്രം ഉടമയിൽ നിന്നും 7400 രൂപ പിഴ ഈടാക്കിയതായി റിപ്പോർട്ടിൽ പറയുന്നു. കഴിഞ്ഞ വർഷം മാർച്ച് ആറിന് ജില്ലാ ഓഫീസിൽ നടത്തിയ തെളിവെടുപ്പിൽ പരാതിക്കാരൻ എതിർകക്ഷിക്കെതിരെയുള്ള പരാതിയിൽ രേഖാമൂലം വിശദീകരണം സമർപ്പിച്ചില്ലെന്നും റിപ്പോർട്ടിൽ പറയുന്നു. പരാതിക്ക് പിന്നിൽ വ്യക്തിവൈരാഗ്യമാണെന്ന് വില്പനകേന്ദ്രം അധികൃതർ അറിയിച്ചതായും റിപ്പോർട്ടിലുണ്ട്. തുടർന്ന് 2024 മാർച്ച് 18ന് എതിർകക്ഷിക്ക് ഡീലേഴ്സ് ലൈസൻസ് നൽകിയിട്ടുണ്ടെന്നും റിപ്പോർട്ടിൽ പറയുന്നു. എന്നാൽ റിപ്പോർട്ടിലെ വസ്തുതകൾ തെറ്റാണെന്ന് പരാതിക്കാരൻ കമ്മീഷനെ അറിയിച്ചു. അസഹ്യമായ പൊടിശല്യം പരാതിക്കാരനും കുടുംബത്തിനും ആരോഗ്യപ്രശ്നങ്ങളുണ്ടാക്കുന്നതായി പരാതിക്കാരൻ അറിയിച്ചു. ഈ സാഹചര്യത്തിലാണ് കുടുതൽ അന്വേഷണങ്ങൾക്ക് കമ്മീഷൻ ഉത്തരവിട്ടത്.

മലയോര ഹൈവേയിൽ അപകടക്കെണി

കുളത്തൂപ്പുഴ : അന്തർ സംസ്ഥാന മലയോര ഹൈവേയിൽ കുടിവെള്ള വിതരണ പൈപ്പിലെ അറ്റകുറ്റപ്പണിക്കായി വാട്ടർ അഥോറിറ്റി ആഴത്തിൽ എടുത്ത കുഴി മൂടാതെ ഇട്ടിരിക്കുന്നതിനാൽ വാഹന യാത്രികർക്കും കാൽനട യാത്രികർക്കും അപകട ഭീഷണിയായി. അമ്പലക്കടവ് ക്ഷേത്രത്തിനു സമീപമാണ് കുടിവെള്ള വിതരണ പൈപ്പ് പൊട്ടി ശുദ്ധജലം പാഴായി പൊയ്ക്കൊണ്ടിരുന്നത്. കരാർ ജീവനക്കാർ പാതയോരം കുഴിച്ച് കുടിവെള്ള പൈപ്പിലെ വാൽവുകളുടെ തകരാർ പരിഹരിച്ചെങ്കിലും കുഴി മണ്ണിട്ട് മൂടാതെ പോയി .നല്ല താഴ്ചയിലും വിസ്താരത്തിലും എടുത്ത കുഴി മൂടാൻ ദിവസങ്ങൾ കഴിഞ്ഞിട്ടും അധികൃതർ തയാറാകാത്തതാണ് മലയോര ഹൈവേയിൽ കാൽനടയാത്രക്കാർക്ക് അപകടങ്ങൾ വരുത്തുന്നത്. റോഡിലേക്ക് കോരി ഇട്ടിരിക്കുന്ന മണ്ണ് നീക്കം ചെയ്യാനോ അപകടസൂചന ബോർഡുകൾ സ്ഥാപിക്കാനോ അധികൃതർക്ക് കഴിഞ്ഞിട്ടില്ല .വാഹനങ്ങൾ അടുത്തെത്തുമ്പോൾ മാത്രമാണ് ഈ അപകട കെണി അറിയാൻ കഴിയുന്നത് .രാത്രി സമയങ്ങളിൽ നല്ല വേഗതയിൽ എത്തുന്ന വാഹനങ്ങൾ സൈഡ് കൊടുക്കുമ്പോൾ കുഴിയിൽ പതിക്കാതെ കഷ്‌ടിച്ച് രക്ഷപ്പെട്ട് പോകുന്ന കാഴ്ചകൾ ഒട്ടേറെ ഉണ്ടായിട്ടുണ്ടെന്ന് നാട്ടുകാർ പറയുന്നു. കാൽനട യാത്രക്കാർക്കും കുഴി അപകട ഭീഷണിയായിട്ടുണ്ട്.മലയോര ഹൈവേ സുരക്ഷ അഥോറിറ്റി അടക്കം ഈ അപകടാവസ്ഥയ്ക്ക് നേരെ കണ്ണടയ്ക്കുന്നതായും നാട്ടുകാർ ആരോപിക്കുന്നു.

സ്റ്റെം സപ്തദിന ക്യാമ്പ് സംസ്ഥാനതല ഉദ്ഘാടനം

കൊട്ടാരക്കര:കേരള സർവകലാശാല വിദ്യാഭ്യാസ വകുപ്പും സെന്‍റർ ഫോർ ലേണിംഗ് എൻജിനീയറിംഗ് ആൻഡ് സസ്റ്റൈനബിലിറ്റി എജ്യുക്കേഷനും ന്യൂഡൽഹിയിലെ ഇന്ത്യൻ കൗൺസിൽ ഫോർ സോഷ്യൽ സയൻസ് റിസർച്ചിന്‍റെ സാമ്പത്തിക സഹായത്തോടെ പുത്തൂർ ഗവ.ഹയർ സെക്കൻഡറി സ്കൂളിൽ പെൺകുട്ടികൾക്കായി നടത്തുന്ന ഏഴ് ദിവസത്തെ ക്യാമ്പ് മന്ത്രി കെ.എൻ.ബാലഗോപാൽ ഉദ്ഘാടനം ചെയ്തു. "നൂതന ലിംഗ പ്രതികരണശേഷിയുള്ള സ്റ്റെം പെഡഗോഗിയിലൂടെ ശാസ്ത്ര തൊഴിലുകൾക്കായി സ്ത്രീകളെ ശാക്തീകരിക്കുന്നതിനുള്ള നൈപുണ്യ പരിശീലനവും വിലയിരുത്തലും' എന്നതാണ് സ്റ്റെം ക്യാമ്പിന്‍റെ ഉദ്ദേശം. പിടിഎ പ്രസിഡന്‍റ് ബി.എസ്.ഹരികുമാറിന്‍റെ അധ്യക്ഷതയിൽ ചേർന്ന യോഗത്തിൽ പ്രോജക്‌ട് ഡയറക്‌ടർ ദിവ്യ സി.സേനൻ, ജില്ലാ പഞ്ചായത്തംഗം ആർ .രശ്മി, പഞ്ചായത്തംഗം കോട്ടയ്ക്കൽ രാജപ്പൻ , എസ്എംസി ചെയർമാൻ ബിജു പൂവക്കര, എസ്എംസി വൈസ് ചെയർമാൻ കോട്ടാത്തല ശ്രീകുമാർ, എംപി ടി എ പ്രസിഡന്‍റ് എസ്. ശ്രീലത, പ്രഥമാധ്യാപിക ലിനി , പ്രിൻസിപ്പൽ ഇൻ ചാർജ് ആശാ രവി, സ്റ്റാഫ് സെക്രട്ടറി ഷാജി എം.ജോൺ,ക്യാമ്പ് കോർഡിനേറ്റർ ബി .പ്രദീപ് എന്നിവർ പ്രസംഗിച്ചു.

കൊട്ടാരക്കര സെന്‍റ് ഗ്രിഗോറിയോസ് കോളജ് വജ്രജൂബിലി; പൂർവ വിദ്യാർഥി സംഗമങ്ങൾക്ക് തുടക്കമായി

കൊട്ടാരക്കര :സെന്‍റ് ഗ്രിഗോറിയോസ് കോളജ് വജ്ര ജൂബിലി ആഘോഷങ്ങളുടെ ഭാഗമായി ജൂലൈ രണ്ടാം വാരം നടക്കുന്ന ഗ്ലോബൽ മെഗാ അലുമ്നി മീറ്റ്-ഗ്രിഗോറിയൻ സംഗമത്തിന് മുന്നോടിയായി നടക്കുന്ന പൂർവ വിദ്യാർഥി സമ്മേളനങ്ങൾക്ക് തുടക്കമായി. സ്ഥാപിതമായ 1964 മുതൽ 1974 വരെയുള്ള ബാച്ചിലെ പൂർവവിദ്യാർഥികളുടെ സംഗമമാണ് നടന്നത്. പ്രിൻസിപ്പൽ ഡോ.ജിനോ നൈനാൻ ഉദ്ഘാടനം ചെയ്തു.അലുമ്നി അസോസിയേഷൻ വൈസ് പ്രസിഡന്‍റ് കെ.ഒ.രാജുക്കുട്ടി അധ്യക്ഷത വഹിച്ചു. അഡ്വ.എൻ.സതീഷ് ചന്ദ്രൻ മുഖ്യപ്രഭാഷണം നടത്തി. ജനറൽ സെക്രട്ടറി ഡോ.മനു വാസുദേവൻ, ട്രഷറർ മാത്യു വർഗീസ്, ഒ .അച്ചൻകുഞ്ഞ്, മെനു ജോൺ, പ്രഫ. ജി.ആശ, അനിൽ കൊച്ചു പാറയ്ക്കൽ എന്നിവർ പ്രസംഗിച്ചു. 1975 -1984 ബാച്ച് യോഗം 16 നും 1985 -1994 ബാച്ച് 23 നും 1995 -2004 ബാച്ച് 27 നും 2005 -2025 ബാച്ച് 30നും നടക്കും.എല്ലാ യോഗങ്ങളും ഉച്ചയ്ക്ക് രണ്ടിന് ആരംഭിക്കും.

നൂറുശതമാനം വിജയം നേടി ചവറയിലെ സ്‌കൂളുകള്‍

ചവറ : എസ്എസ്എല്‍സി ഫലം പുറത്തുവന്നപ്പോള്‌‍ ചവറയിലെ സര്‍ക്കാര്‍ സ്‌കൂളുകള്‍ക്ക് നൂറ് ശതമാനം മിന്നും വിജയം.പന്മന മനയില്‍ ഹയര്‍ സെക്കന്‍ഡറി സ്‌കൂള്‍,കൊറ്റന്‍കുളങ്ങര വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍,പന്മന വടക്കുംതല പനയന്നാര്‍കാവ് എസ് വിപിഎംഎച്ച്എസ്,ശങ്കരമംഗലം ഗേള്‍സ് സ്‌കൂള്‍, നീണ്ടകര പുത്തന്‍ തുറ അരയ സേവാ ഹയര്‍സെക്കന്‍ഡറി സ്‌കൂള്‍,അയ്യന്‍ കോയിക്കല്‍ ഹയര്‍സെക്കന്‍ഡറി സ്‌കൂള്‍ , ശങ്കരമംഗലം സര്‍ക്കാര്‍ ഹയര്‍സെക്കന്‍ഡറി സ്‌കൂള്‍ എന്നിവിടങ്ങളിലാണ് നൂറ് ശതമാനം വിജയം. പന്മന വടക്കുംതല പനയന്നാര്‍കാവ് എസ് വിപിഎംഎച്ച്എസില്‍ 275 പേര്‍ പരീക്ഷയെഴുതിയതില്‍ 51പേര്‍ എല്ലാ വിഷയത്തിനും എപ്ലസ് നേടി.പന്മന മനയില്‍ ഹയര്‍ സെക്കന്‍ഡറി സ്‌കൂളില്‍ 200 പേര്‍ പരീക്ഷയെഴുതിയതില്‍ 45പേര്‍ എല്ലാ വിഷയത്തിനും എ പ്ലസ് നേടി.ശങ്കരമംഗലം ഗേള്‍സ് സ്‌കൂളില്‍ 29പേര്‍ പരീക്ഷയെഴുതിയതില്‍ ഏഴ് പേര്‍ എല്ലാ വിഷയത്തിനും എ പ്ലസ് നേടി.കൊറ്റന്‍കുളങ്ങര വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ 141പേര്‍ പരീക്ഷയെഴുതിയതില്‍ 51പേര്‍ക്ക് എല്ലാ വിഷയത്തിനും എ പ്ലസ് നേടാനായി. തേവലക്കര അയ്യന്‍കോയിക്കല്‍ സര്‍ക്കാര്‍ ഹയര്‍സെക്കന്‍ഡറി സ്‌കൂളില്‍ 353പേര്‍ പരീക്ഷയെഴുതിയതില്‍ 99പേര്‍ എ പ്ലസ് നേടി.നീണ്ടകര പുത്തന്‍ തുറ അരയ സേവാ ഹയര്‍സെക്കന്‍ഡറി സ്‌കൂളില്‍ 28പേര്‍ പരീക്ഷയെഴുതിയതില്‍ ആറ് പേര്‍ എല്ലാ വിഷയത്തിനും എ പ്ലസ് നേടി. ശങ്കരമംഗലം സര്‍ക്കാര്‍ ഹയര്‍സെക്കന്‍ഡറി സ്‌കൂളില്‍ 291പേര്‍ പരീക്ഷയെഴുതിയതില്‍ 63പേര്‍ എല്ലാ വിഷയത്തിനും എപ്ലസ് നേടി.

എസ്എസ്എല്‍സി പരീക്ഷാഫലം: കിഴക്കന്‍ മേഖലയിലെ സ്കൂളുകള്‍ക്ക് മിന്നും വിജയം

അഞ്ചല്‍ : എസ്എസ്എൽസി പരീക്ഷയിൽ ജില്ലയുടെ കിഴക്കന്‍ മലയോര മേഖലയിലെ സ്കൂളുകളും ഇക്കുറി മിന്നും വിജയം നേടി. ജില്ലയിലെ ഏറ്റവുമധികം കുട്ടികളെ പത്താം ക്ലാസ് പരീക്ഷ എഴുതിപ്പിച്ച സ്കൂളുകളില്‍ ഒന്നായ അഞ്ചല്‍ വെസ്റ്റ് സര്‍ക്കാര്‍ ഹയര്‍ സെക്കണ്ടറി സ്കൂൾ 99 ശതമാനം വിജയം നേടി. ഇവിടെ പരീക്ഷ എഴുതിയ 464 കുട്ടികളില്‍ 463 പേരും ഉപരി പഠനത്തിന് അര്‍ഹത നേടി. ഇതില്‍ 114 കുട്ടികള്‍ എല്ലാ വിഷയങ്ങള്‍ക്കും എ പ്ലസ് നേടി. അഞ്ചല്‍ ഈസ്റ്റ് സര്‍ക്കാര്‍ ഹയര്‍ സെക്കണ്ടറി സ്കൂളും ഇക്കുറി നേടിയത് മികച്ച വിജയമാണ്. പരീക്ഷ എഴുതിയ 134 വിദ്യാര്‍ഥികളില്‍ 133 പേരും വിജയിച്ചു 99ശതമാനം വിജയമാണ് സ്വന്തമാക്കിയത്. ഇതില്‍ 39 കുട്ടികള്‍ എല്ലാ വിഷയങ്ങള്‍ക്കും എ പ്ലസ് നേടി. അലയമണ്‍ പഞ്ചായത്തിലെ പുത്തയം ആല്‍സെയിന്‍റ് ഹൈസ്കൂളില്‍ പരീക്ഷ എഴുതിയ 39 പേരും ഉപരി പഠനത്തിന് അര്‍ഹത നേടി 100 ശതമാനം വിജയം കൈവരിച്ചു. ഇതില്‍ 11 കുട്ടികള്‍ക്ക് എല്ലാ വിഷയങ്ങള്‍ക്കും എ പ്ലസ് നേടാനായി. കരുകോണ്‍ സര്‍ക്കാര്‍ ഹയര്‍ സെക്കണ്ടറി സ്കൂളും ഇക്കുറി നേടിയത് നൂറുശതമാനം വിജയമാണ്. 78 കുട്ടികളാണ് ഇവിടെ പരീക്ഷ എഴുതിയത്. 15 കുട്ടികള്‍ എല്ലാ വിഷയങ്ങള്‍ക്കും എ പ്ലസ് നേടി. ചണ്ണപ്പേട്ട മാര്‍ത്തോമ ഹൈസ്കൂളില്‍ പരീക്ഷ എഴുതിയ 85 കുട്ടികളും വിജയിച്ചു .നൂറുശതമാനം വിജയം നേടി. 18 കുട്ടികളാണ് ഇവിടെ എല്ലാ വിഷയങ്ങള്‍ക്കും എ പ്ലസ് നേടിയത്. ഏരൂര്‍ പഞ്ചായത്തിലെ ഏരൂര്‍ സര്‍ക്കാര്‍ ഹയര്‍ സെക്കണ്ടറി സ്കൂളും ഇക്കുറി നേടിയത് മിന്നും വിജയം. 207 കുട്ടികള്‍ പരീക്ഷ എഴുതിയപ്പോള്‍ മുഴുവന്‍ കുട്ടികളെയും വിജയിപ്പിച്ച് സ്കൂള്‍ നേടിയത് നൂറുശതമാനം വിജയം. 48 കുട്ടികള്‍ എല്ലാ വിഷയങ്ങള്‍ക്കും എപ്ലസ് നേടി. അയിലറ സര്‍ക്കാര്‍ ഹൈസ്കൂളില്‍ പരീക്ഷ എഴുതിയ 11 കുട്ടികളും വിജയിച്ചു. നൂറുശതമാനം വിജയം കൈവരിച്ചു. ഇവിടെ ഒരാള്‍ക്ക് എല്ലാ വിഷയങ്ങള്‍ക്കും എ പ്ലസ് നേടാനായി. നെട്ടയം സര്‍ക്കാര്‍ ഹൈസ്കൂളില്‍ പരീക്ഷ എഴുതിയ മുഴുവന്‍ കുട്ടികളും വിജയിച്ചു നൂറുശതമാനം വിജയം നിലനിര്‍ത്തി. 41 കുട്ടികള്‍ പരീക്ഷ എഴുതുകയും ഇവരില്‍ 18 പേര്‍ എല്ലാ വിഷയങ്ങള്‍ക്കും എ പ്ലസ് നേടുകയും ചെയ്തു. കല്ലുവെട്ടാംകുഴി സര്‍ക്കാര്‍ ഹയര്‍ സെക്കണ്ടറി സ്കൂളില്‍ 66 കുട്ടികള്‍ പരീക്ഷ എഴുതിയപ്പോള്‍ 55 കുട്ടികള്‍ മാത്രമാണു വിജയിച്ചത്. 83 ശതമാനം മാത്രം വിജയം നേടിയ സ്കൂളില്‍ ആര്‍ക്കും എല്ലാ വിഷയങ്ങള്‍ക്കും എ പ്ലസ് നേടാനായില്ല.

കൊല്ലം റെയിൽവേ സ്റ്റേഷനിൽ സംയുക്ത പരിശോധന നടത്തി

കൊല്ലം: ഇന്ത്യ-പാക്കിസ്ഥാൻ സംഘർഷ പശ്ചാത്തലത്തിൽ കൊല്ലം റെയിൽവേ സ്‌റ്റേഷനിൽ ഉദ്യോഗസ്ഥ സംഘം സംയുക്ത പരിശോധന നടത്തി. ഇന്നലെ ഉച്ചകഴിഞ്ഞ് മൂന്നോടെയാണ് റെയിൽവേ പോലീസ് , ആർപിഎഫ്, കേരള പോലീസ്, ഡോഗ് സ്‌ക്വാഡ്, ബോംബ് സ്‌ക്വാഡ് എന്നിവരുടെ നേതൃത്വത്തിൽ പരിശോധന നടന്നത്. സ്‌റ്റേഷനിലെ പാഴ്‌സൽ കൗണ്ടറുകൾ, പാഴ്‌സലുകൾ, പ്രധാന പ്ലാറ്റ്ഫോമുകൾ, സ്‌റ്റേഷൻ പരിസരം, നിർത്തിയിട്ട ട്രെയിനുകൾ എന്നിവിടങ്ങളിലാണ് പരിശോധന നടത്തിയത്. സുരക്ഷയുടെ ഭാഗമായി വരും ദിവസങ്ങളിലും പരിശോധന കർശനമാക്കുമെന്ന് ആർപിഎഫ് അധികൃതർ അറിയിച്ചു.

ശാസ്താംകോട്ട തടാകതീരത്തെ മുളകള്‍ മുറിച്ചുകടത്താന്‍ നീക്കം

കൊല്ലം: സംസ്ഥാന മന്ത്രിസഭാ വാര്‍ഷികാഘോഷ മറവില്‍ ശാസ്താംകോട്ട തടാകതീരത്തെ മുളകള്‍ മുറിച്ചു കടത്താന്‍ നീക്കം. സംഭവവുമായി ബന്ധപ്പെട്ട് ഏഴു യുവാക്കളെ ശാസ്താംകോട്ട പോലിസ് കസ്റ്റഡിയിലെടുത്തു. ഇവരെ പിന്നീട് വിട്ടയച്ചു. ശാസ്താംകോട്ട ഫില്‍റ്റര്‍ ഹൗസ് ജംഗ്ഷന്‍ ഭാഗത്ത് കഴിഞ്ഞ ദിവസം രാവിലെ 11നായിരുന്നു സംഭവം. മുളകള്‍ കൂട്ടത്തോടെ മുറിച്ച് 10 അടി നീളത്തില്‍ അടുക്കുന്നത് ശ്രദ്ധയില്‍പ്പെട്ട കോൺഗ്രസ് പ്രവർത്തകരാണ് വിവരം പോലീസിൽ അറിയിച്ചത്. റോഡ്‌സ് വിഭാഗത്തിന്‍റെ നിര്‍ദേശമനുസരിച്ച് കൊല്ലത്ത് നടക്കുന്ന സര്‍ക്കാര്‍ വാര്‍ഷികത്തിനായാണ് മുള മുറിക്കുന്നതെന്നാണ് യുവാക്കള്‍ പറഞ്ഞത്. എന്നാല്‍, മുള മുറിക്കാന്‍ ആര്‍ക്കും നിര്‍ദേശം നല്‍കിയതായി അറിയില്ലെന്ന് ജില്ലാ കളക്ടര്‍ വ്യക്തമാക്കി. ഹരിത കേരളം മിഷൻ വാര്‍ഷികാഘോഷ ഭാഗമായി കൊല്ലം ആശ്രാമം മൈതാനത്ത് സ്റ്റാള്‍ കെട്ടാനും അലങ്കാര പ്രവര്‍ത്തനങ്ങള്‍ നടത്തുന്നതിനും വേണ്ടിയാണ് മുളകള്‍ മുറിച്ചതെന്ന് കോൺഗ്രസ് പ്രവർത്തകർ ആരോപിച്ചു. മുളകള്‍ മുറിച്ചു മാറ്റുന്നതിന് പൊതുമരാമത്ത് വകുപ്പ് റോഡ്‌സ് വിഭാഗത്തിന് ഇ മെയില്‍ വഴി അപേക്ഷ നല്‍കിയിരുന്നു. എന്നാല്‍ റോഡ്‌സ് വിഭാഗം തീരുമാനം എടുക്കുന്നതിന് മുന്‍പേ മരങ്ങള്‍ മുറിച്ചു മാറ്റുകയായിരുന്നു. തടാകത്തിന്‍റെ സംരക്ഷണവും വനവൽകരണ ഭാഗവുമായി വര്‍ഷങ്ങള്‍ക്കു മുമ്പ് നട്ടുപിടിപ്പിച്ച മുളകളാണ് വെട്ടി മാറ്റിയത്. വാട്ടര്‍ അഥോറിറ്റിക്ക് തെക്കുവശം പമ്പ് ഹൗസിനു സമീപം കായലിനോടും റോഡിനോടും ചേര്‍ന്ന് അഗാധമായ ഗര്‍ത്തമായിരുന്നു. നിരന്തര ആവശ്യത്തെ തുടര്‍ന്ന് വാട്ടര്‍ അഥോറിറ്റി ഇവിടെ സംരക്ഷണ ഭിത്തി കെട്ടുകയും നാട്ടുകാരും തടാക സംരക്ഷണ പ്രവര്‍ത്തകരും ചേര്‍ന്ന് പണം ചെലവഴിച്ച് മണ്ണ് നിറയ്ക്കുകയും മരങ്ങള്‍ വച്ച് പിടിപ്പിക്കുകയുമായിരുന്നു. തടാകത്തിന്‍റെ നിലനില്‍പ്പിന് ദോഷകരമായ അക്കേഷ്യ മരങ്ങള്‍ മുറിച്ചു മാറ്റിയ ശേഷമാണ് മുളകള്‍ നട്ടുപിടിപ്പിച്ചത്.

‘ഒഴുകാം ശുചിയായി പദ്ധതി’പാളി : കുളത്തൂപ്പുഴ വാഴത്തോപ്പ് കടവ് ഓര്‍മയായി

കുളത്തൂപ്പുഴ: കല്ലടയാറ്റിന്‍റെ പുരാതനമായ കുളിക്കടവ് ഒഴുകാം ശുചിയായി പദ്ധതിയിൽ പെടുത്തി ജില്ലാ പഞ്ചായത്തിന്‍റെ ഫണ്ട് ഉപയോഗിച്ച് കടവിലേക്ക് ഇറങ്ങുന്ന പാതകളും പടവുകളും നിർമിച്ച ് പൂർത്തിയാക്കാനിരുന്ന പദ്ധതി പാതിവഴിയിൽ ഉപേക്ഷിച്ചതോടെ വാഴത്തോപ്പ് കടവ് ഓര്‍മയായി. കുളത്തൂപ്പുഴ അമ്പലക്കടവിന് സമീപം മലയോരഹൈവെ ഓരത്ത് ആറ്റിലെ പ്രധാന കടവുകളിലൊന്നാണ് ഉപേക്ഷിക്കേണ്ടിവന്നത്. മലയോര ഹൈവെ കടന്നുപോകുന്ന വാഴത്തോപ്പ് കടവിലെ കലുങ്കിന്‍റെ കൈവരികള്‍ പുനര്‍ നിര്‍മാണം നടത്തി കടവുകളിലേക്ക് പടവുകളൊരുക്കിവരികയായിരുന്നു. ഇതിന്‍റെ ഭാഗമായി സമീപത്തെ വ്യക്തിയുടെ പുരയിടത്തിന്‍റെ ഭിത്തി കെട്ടി സംരക്ഷിച്ചതോടെ പടവുകളുടെ നിര്‍മാണം പാതിവഴിയില്‍ ഉപേക്ഷിച്ചു. കുളത്തൂപ്പുഴ ആറിന്‍റെ കൈവഴിയായ കുമരംകരിക്കം തോട് ആറ്റിലേക്ക് പതിക്കുന്നതിന്‍റെ സമീപത്തെ തടിമില്ലിനും കല്യാണ മണ്ഡപത്തിനും അരികിലൂടെ ഒഴുകുന്ന തോടിന്‍റെ കരകളായിരുന്നു ഇവിടേക്കുളള പാത. ഇത് ഇടിച്ച് നിരത്തി ആരംഭിച്ച നിര്‍മാണം പൂര്‍ത്തിയാക്കാത്തതാണ് കടവിലേക്ക് ഇറങ്ങാനാവാതായത്. നേരത്തെ ഇതിന്‍റെ വശങ്ങളിലൂടെ കാല്‍നടയായി ആറ്റിലേക്കിറങ്ങിയാണ് നാട്ടുകാര്‍ വർഷങ്ങളായി കടവ് ഉപയോഗിച്ച് വന്നത്. പദ്ധതി പാളിയതോടെ തോടിന്‍റെ സംരക്ഷണ ഭിത്തിയും പടവുകളുടെ നിര്‍മാണവും കടവുവരെ എത്തിക്കാതെ പാതിവഴിയില്‍ അവസാനിപ്പിച്ചു. പ്രധാന പാതയില്‍ നിന്നും തോട് ഏറെ താഴ്ചയിലാവുകയും നടവഴിപോലുമില്ലാതെ കടവ് നാട്ടുകാർക്ക് ഉപേക്ഷിക്കേണ്ടതായും വന്നു. പുറമെനിന്നും മറ്റു ശല്യങ്ങളൊന്നും ഇല്ലാത്ത വാഴത്തോപ്പ് കടവ് കാലങ്ങളായി സ്ത്രീകളും കുട്ടികളും അലക്കാനും കുളിക്കാനും ഏറെ ആശ്രയിച്ച് വന്നതാണ്. നെല്ലിമൂട്, പത്തുപറ, കുമരംകരിക്കം, ഡിപ്പോ, തുടങ്ങയ പ്രദേശവാസികളെല്ലാം വേനല്‍ക്കാലത്ത് കിണറുകളെല്ലാം വറ്റിവരളുമ്പോള്‍ വാഴത്തോപ്പ് കടവിനെയായിരുന്നു ആശ്രയിച്ചു പോന്നത്. അവിടേക്കുളള പാത ഉപയോഗശൂന്യമായി മാസങ്ങൾ കഴിഞ്ഞതോടെ പ്രദേശം കാടുമൂടി ഇഴജന്തുക്കളുടെ താവളമായി. വേനൽ കനക്കുന്നത് കൊണ്ട് കിണറുകളിലെ ജലം വറ്റുന്നതിനാൽ അടിയന്തിരമായി കടവിലേക്ക് പാതയൊരുക്കണമെന്നാണ് നാട്ടുകാർ ആവശ്യപ്പെടുന്നത്.

വൈസ് മെൻസ് ക്ലബ് ഓഫ് ക്വയിലോൺ ; സുവർണ ജൂബിലി സമാപന സമ്മേളനം നാളെ

കൊല്ലം: വൈസ് മെൻസ് ക്ലബ് ഓഫ് ക്വയിലോണിന്‍റെ സുവർണ ജൂബിലി ആഘോഷങ്ങളുടെ സമാപന സമ്മേളനം നാളെ വൈകുന്നേരം ആറിന് കൊല്ലം സീ പാലസ് ഹോട്ടലിൽ നടക്കും. മന്ത്രി ജെ.ചിഞ്ചു റാണി ഉദ്ഘാടനം നിർവഹിക്കും. എൻ.കെ.പ്രേമചന്ദ്രൻ എംപി, എം.മുകേഷ് എംഎൽഎ, മേയർ ഹണി ബെഞ്ചമിൻ, വൈസ് മെൻ ഇന്‍റർനാഷണൽ പ്രസിഡന്‍റ് അഡ്വ. എ. ഷാനവാസ് ഖാൻ തുടങ്ങിയവർ പങ്കെടുക്കും. സമാപന സമ്മേളനത്തിൽ ക്ലബിന്‍റെ മെഗാ പ്രോജക്‌ടായ 50 പാലിയേറ്റീവ് ബെഡുകളുടെ വിതരണോദ്ഘാടനം വൈസ്മെൻ ഇന്‍റർ നാഷണൽ പ്രസിഡന്‍റ് അഡ്വ.എ.ഷാനവാസ് ഖാൻ നിർവഹിക്കും. പത്രസമ്മേളനത്തിൽ വൈസ് മെൻ ക്ലബ് ഭാരവാഹികളായ ഇഖ്ബാൽ മുഹമ്മദ്, വി. അഭിലാഷ്, യു.സി.ആരിഫ്, ഓസ്റ്റിൻ ഡഗ്ലസ് ,നരേഷ് നാരായണൻ എന്നിവർ പങ്കെടുത്തു.

അടൂർ പ്രകാശ് എംപി സി.വി.പദ്മരാജനെ സന്ദർശിച്ചു

കൊല്ലം: നിയുക്ത യുഡിഎഫ് കൺവീനർ അടൂർ പ്രകാശ് എംപി മുൻ കെപിസിസി പ്രസിഡന്‍റ് സി.വി.പദ്മരാജനെ വസതിയിലെത്തി സന്ദർശിച്ചു. തിങ്കളാഴ്ച യുഡിഎഫ് കൺവീനറായി ചാർജ് എടുക്കുന്നതിനു മുൻപ് അനുഗ്രഹം തേടിയെത്തിയതാണ് അദ്ദേഹം. കെപിസിസി രാഷ്‌ട്രീയകാര്യ സമിതി അംഗം അഡ്വ.ബിന്ദു കൃഷ്ണ, ഐഎൻടിയുസി ജില്ലാ പ്രസിഡന്‍റ് എ.കെ.ഹഫീസ് തുടങ്ങിയവർ അദ്ദേഹത്തോടൊപ്പം ഉണ്ടായിരുന്നു.

കൊല്ലം പരപ്പിൽ മണൽഖനനം അനുവദിക്കില്ല: ജെ.മേഴ്‌സിക്കുട്ടിയമ്മ

കൊല്ലം: വർക്കല മുതൽ, കൊല്ലം വഴി അമ്പലപ്പുഴ വരെ 85 കിലോമീറ്റർ ദൂരത്തിൽ 3300 ചതുരശ്ര കിലോമീറ്റർ ചുറ്റളവിലുള്ള കൊല്ലം പരപ്പിൽ നിന്നും മണൽ ഖനനം അനുവദിക്കില്ലെന്ന് മുൻ മന്ത്രി ജെ.മേഴ്‌സിക്കുട്ടിയമ്മ. കേരളാ യൂത്ത് ഫ്രണ്ട്- എം സംസ്ഥാന കമ്മിറ്റിയുടെ നേതൃത്വത്തിൽ കാസർഗോഡ് നിന്നും ആരംഭിച്ച പ്രസിഡന്‍റ് സിറിയക്ക് ചാഴിക്കാടൻ നയിക്കുന്ന തീരദേശ സംരക്ഷണ ജാഥയുടെ ജില്ലയിലെ സമാപന സമ്മേളനം കൊല്ലം പോർട്ടിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അവർ. കേരളാ കോൺഗ്രസ് -എം ജില്ലാ പ്രസിഡന്‍റ് വഴുതാനത്ത് ബാലചന്ദ്രൻ അധ്യക്ഷത വഹിച്ചു. യോഗത്തിൽ ജാഥാ ക്യാപ്റ്റൻ സിറിയക്ക് ചാഴികാടൻ, ബെന്നി കക്കാട്,അറക്കൽ ബാലകൃഷ്ണപിള്ള,അലക്സ് കോഴിമല , എ. ഇക്ബാൽ കുട്ടി, ശ്രീരാഗ് കൃഷ്ണൻ, ചവറ ഷാ ,ആദിക്കാട് മനോജ്‌ , ജോസ് മത്തായി തുടങ്ങിയവർ പ്രസംഗിച്ചു.

വേലുത്തമ്പി ദളവ മലയാള മണ്ണിലെ ആദ്യ ജനാധിപത്യവാദി: ശ്രീകുമാരൻ തമ്പി

കൊല്ലം: മലയാളമണ്ണിലെ ആദ്യ ജനാധിപത്യവാദി വേലുത്തമ്പിദളവയാണെന്ന് ഗാനരചയിതാവ് ശ്രീകുമാരന്‍തമ്പി.വേലുത്തമ്പിദളവ സ്മാരക സേവാസമിതിയുടെ വേലുത്തമ്പി പുരസ്‌കാരം ഏറ്റുവാങ്ങിയ ശേഷം പ്രസംഗിക്കുകയായിരുന്നു അദ്ദേഹം. ജനാധിപത്യം എന്താണെന്ന് പ്രായോഗികമായി കാണിച്ചുതന്ന ആദ്യത്തെ പൗരനാണ് വേലുത്തമ്പി. രാജാവിനെ കബളിപ്പിച്ച് മന്ത്രിമാരും അവരുടെ കിങ്കരന്മാരും നടത്തുന്ന ഭീമമായ കൊള്ള, നാട്ടുകൂട്ടത്തെ വിളിച്ചുകൂട്ടി നേതൃപരമായ പങ്കുവഹിച്ച് കൊട്ടാരത്തിന് മുന്നില്‍ ചെന്ന് രാജാവിന് ബോധ്യപ്പെടുത്തിയായിരുന്നു ജനാധിപത്യത്തിന്‍റെ മഹത്വം ഉയര്‍ത്തി പിടിച്ചതെന്നും ശ്രീകുമാരന്‍തമ്പി പറഞ്ഞു. ഗവര്‍ണര്‍ രാജേന്ദ്രവിശ്വനാഥ അര്‍ലേക്കര്‍ ഓണ്‍ലൈന്‍ വഴി പരിപാടിയില്‍ സംബന്ധിച്ചു. അധ്യക്ഷനായിരുന്ന സമിതി ചെയര്‍മാന്‍ ഡോ.ഇ.ചന്ദ്രശേഖരക്കുറുപ്പ് ഗവര്‍ണര്‍ക്ക് വേണ്ടി പുരസ്‌കാരം ശ്രീകുമാരന്‍തമ്പിക്ക് കൈമാറി. സാമൂഹ്യനീതി കര്‍മസമിതി സംസ്ഥാന സംയോജകന്‍ വി. സുശികുമാര്‍, സമിതി സെക്രട്ടറി എസ്.കെ. ദീപുകുമാര്‍, തപസ്യ സംസ്ഥാന ഉപാധ്യക്ഷന്‍ രാജന്‍ബാബു, പ്രഭാഷകന്‍ രാജന്‍മലനട, സമിതി സെക്രട്ടറി നരേന്ദ്രന്‍, റാങ്ക് ജേതാവ് പൂജിത എന്നിവർ പ്രസംഗിച്ചു.

വിദ്യാഭ്യാസ കോൺക്ലേവ്‌ ഇന്ന്‌

കൊട്ടാരക്കര: നിയോജകമണ്ഡലത്തിലെ സ്കൂൾ വിദ്യാർഥികൾക്കായുള്ള വിദ്യാഭ്യാസ കോൺക്ലേവ് ഇന്ന് നടക്കും. കൊട്ടാരക്കര ഗവ. ഹയർ സെക്കൻഡറി സ്‌കൂൾ ഓഡിറ്റോറിയത്തിൽ രാവിലെ ഒമ്പതിന് കോൺക്ലേവ്‌ ആരംഭിക്കും. മന്ത്രി കെ. എൻ.ബാലഗോപാലിന്‍റെ നേതൃത്വത്തിൽ ഡിസൈർ 2025 എന്ന പേരിൽ സംഘടിപ്പിക്കുന്ന പരിപാടിയിൽ ഹൈസ്കൂൾ, ഹയർസെക്കൻഡറി വിഭാഗങ്ങളിലെ ആയിരത്തോളം വിദ്യാർഥികൾ പങ്കെടുക്കും. രാവിലെ മന്ത്രി കെ.എൻ.ബാലഗോപാൽ കോൺക്ലേവ്‌ ഉദ്ഘാടനം ചെയ്യും. തുടർന്ന്‌ ഒമ്പത് സെഷനുകളിലായി വിദഗ്ധർ വിവിധ വിഷയങ്ങൾ അവതരിപ്പിക്കും. പുത്തൻ തൊഴിലുകൾ എന്നതിൽ ഡോ.അച്ചുത് ശങ്കർ ആദ്യാവതരണം നടത്തും. പുത്തൻതലമുറ ജോലി സാധ്യതകൾ, കണ്ടിട്ടില്ലാത്തവ കേട്ടിട്ടില്ലാത്തവ, ആത്മവിശ്വാസത്തോടെ മാറ്റങ്ങളെ മറികടക്കുന്ന യുവത, ശാസ്ത്രത്തിന്‍റെയും സാങ്കേതിക വിദ്യയുടെയും മാന്ത്രിക സാധ്യതകൾ, ഹരിത കേരള ചുവടുവയ്പുകൾ, അറിയാം - സൈബർ യാത്രകളെ സുരക്ഷിതമാക്കാൻ, സാമ്പത്തിക മാനേജ്മെന്‍റിലേക്ക് ഒരു ചെറിയ തുടക്കം, മാറ്റിമറിക്കാം നമുക്കീ ലോകത്തെ, ഉണരട്ടെ നിങ്ങളുടെ സർഗ ചേതനകൾ എന്നിവയിലാണ് തുടർന്നുള്ള സെഷനുകൾ. രമ്യ ഗിരിജ, അമർ രാജൻ, ഡോ. അരുൺ സുരേന്ദ്രൻ, ഷിബു കെ എൻ, ശങ്കരി ഉണ്ണിത്താൻ, നിസാറി മഹേഷ്, ശ്രീക്കുട്ടി ,കുക്കു പരമേശ്വരൻ തുടങ്ങിയവർ വിഷയങ്ങൾ അവതരിപ്പിക്കും. ഓരോ സെഷനിലും 15 മിനിട്ട് ചോദ്യോത്തര വേളയുണ്ടാകാം. വൈകുന്നേരം വരെ പരിപാടി തുടരും.

വന്ദനാദാസ് കേസ്: പ്രതിഭാഗത്തിന് പുതിയ അഭിഭാഷകനെ കണ്ടെത്താൻ അനുമതി

കൊല്ലം: ഡോ.വന്ദനദാസ് കൊലപാതകക്കേസിലെ പ്രതിഭാഗം അഭിഭാഷകനായിരുന്ന ബി.എ. ആളൂര്‍ മരിച്ച സാഹചര്യത്തില്‍ പുതിയ അഭിഭാഷകനെ കണ്ടെത്തുന്നതിനായി കോടതി സമയം അനുവദിച്ചു. കഴിഞ്ഞ മാസം 30നാണ് വൃക്കസംബന്ധമായ രോഗങ്ങളെ തുടര്‍ന്ന് ആളൂര്‍ മരിക്കുന്നത്. എറണാകുളം ലിസി ആശുപത്രിയില്‍ ആയിരുന്നു അന്ത്യം. കേസില്‍ പ്രതിഭാഗം സഹായിയായി എത്തിയിരുന്ന മുന്‍ ഗവ. പ്ലീഡര്‍ പി.ജി. മനുവിനെ ഏപ്രില്‍ 13ന് തൂങ്ങിമരിച്ച നിലയില്‍ കൊല്ലത്ത് കണ്ടെത്തിയിരുന്നു. പ്രതിഭാഗം അഭിഭാഷകരുടെ തുടര്‍ച്ചയായ മരണം കേസിന്‍റെ തുടര്‍നടപടികള്‍ വൈകാനും കാരണമാകും. അതേസമയം ഡോ. വന്ദനദാസ് കേസിലെ ഒന്നാം സാക്ഷിയായ ഡോ. മുഹമ്മദ് ഷിബിന്‍റെ ക്രോസ് വിസ്താരം കോടതിയില്‍ തുടരുകയാണ്. പ്രതി ഡോ.വന്ദനയെ ആക്രമിച്ചത് സ്വയം രക്ഷയ്ക്ക് വേണ്ടിയാണെന്ന് പ്രതിഭാഗം കോടതിയില്‍ വാദിച്ചിരുന്നു. കൂടാതെ ഡോ.വന്ദനയെ കുത്തിയത് കോടതിയില്‍ ഹാജരാക്കിയിട്ടുള്ള കത്രിക ഉപയോഗിച്ചല്ലെന്നും പ്രതിഭാഗം ക്രോസ് വിസ്താരത്തില്‍ വാദമുയര്‍ത്തി. എന്നാല്‍ സംഭവത്തില്‍ താന്‍ ദൃക്‌സാക്ഷിയാണെന്നുള്ള മൊഴിയില്‍ ഉറച്ചുനിന്ന ഒന്നാംസാക്ഷി പ്രതിഭാഗത്തിന്‍റെ വാദങ്ങള്‍ എല്ലാം കഴിഞ്ഞ വിസ്താര വേളയില്‍ നിഷേധിക്കുകയായിരുന്നു. പ്രോസിക്യൂഷന് വേണ്ടി സ്പെഷല്‍ പബ്ലിക് പ്രോസിക്യൂട്ടര്‍ പ്രതാപ് ജി. പടിക്കല്‍, അഭിഭാഷകരായ ശ്രീദേവി പ്രതാപ്, ശില്പ ശിവന്‍, ഹരീഷ് കാട്ടൂര്‍ എന്നിവരാണ് ഹാജരാകുന്നത്. 2023 മേയ് 10ന് രാത്രി കൊട്ടാരക്കര താലൂക്ക് ആശുപത്രി അത്യാഹിത വിഭാഗത്തില്‍ വൈദ്യപരിശോധനയ്ക്കായി പോലീസ് എത്തിച്ചപ്പോഴാണ് പ്രതി സന്ദീപ് ഡ്യൂട്ടി ഡോക്ടറായിരുന്ന വന്ദനയെ കുത്തിക്കൊലപ്പെടുത്തിയത്.

ആശ്രയയ്ക്ക് നൂറുമേനി വിജയം

കൊട്ടാരക്കര : ആശ്രയയിലെ കുട്ടികൾക്ക് എസ്എസ്എൽസി പരീക്ഷയിൽ നൂറുമേനി വിജയം . കലയപുരം ആശ്രയ ശിശുഭവനിലെ ആര്യ അനിൽ, ആർ.മീര, എസ്. മാളവിക, വി.എസ്.വിസ്മയ എന്നിവരാണ് വിജയം കരസ്ഥമാക്കിയത് . എസ്‌വിവിഎച്ച്എസ്എസ് താമരക്കുടി, ഡിവിവിഎച്ച്എസ്എസ് മൈലം എന്നിവിടങ്ങളിലാണ് കുട്ടികൾ പഠിച്ചത് . നഴ്സറി മുതൽ പോസ്റ്റ് ഗ്രാജുവേഷനും നഴ്സിംഗും ഹോട്ടൽ മാനേജ്‌മെന്‍റ് കോഴ്സ് വരെ പഠിക്കുന്ന നൂറിൽപ്പരം കുട്ടികളാണ് ആശ്രയയുടെ കൊട്ടാരക്കര കലയപുരം, അടൂർ പറന്തൽ ശാഖകളിലായി കഴിഞ്ഞുവരുന്നത്. രണ്ടുപേർ സിവിൽ സർവീസ് കോച്ചിംഗും നടത്തിവരുന്നു.കുട്ടികളുടെ ആഗ്രഹവും അഭിരുചിയും കണക്കിലെടുത്ത് എല്ലാവർക്കും ഉപരിപഠനത്തിനുള്ള സൗകര്യം ഒരുക്കുമെന്ന് ആശ്രയ ജനറൽ സെക്രട്ടറി കലയപുരം ജോസ് അറിയിച്ചു .

പൊൻതിളക്കവുമായി അരിപ്പ എംആർഎസ് സ്കൂൾ

കുളത്തൂപ്പുഴ : കിഴക്കൻ മലയോര മേഖലയായ കുളത്തൂപ്പുഴ പഞ്ചായത്തിൽ ഈ പ്രാവശ്യവും എസ്എസ്എൽസി പരീക്ഷ എഴുതിയ മുഴുവൻ വിദ്യാർഥികളെയും വിജയിപ്പിച്ചു നൂറുമേനി കൊയ്തെടുക്കാൻ പട്ടിക വർഗ വികസന വകുപ്പിന് കീഴിൽ പ്രവർത്തിക്കുന്ന കുളത്തൂപ്പുഴ അരിപ്പയിലുള്ള മോഡൽ റെസിഡൻഷ്യൽ സ്കൂളിന് കഴിഞ്ഞു. സ്കൂളിൽ പരീക്ഷ എഴുതിയ 29 കുട്ടികളിൽ എ.എൻ.അഥിൻ എന്ന വിദ്യാർഥി എല്ലാവിഷയത്തിലും എ പ്ലസ് നേടി. സ്കൂൾ പിടിഎ സമിതി വിജയിച്ച വിദ്യാർഥികൾക്ക് അഭിനന്ദനങ്ങൾ അറിയിക്കുകയും ചെയ്തു. സാം ഉമ്മൻ മെമ്മോറിയൽ ടെക്നിക്കൽ ഹൈസ്കൂൾ ഇക്കുറി 100ശതമാനം വിജയം കരസ്ഥമാക്കുകയും പരീക്ഷയെഴുതിയ 43 പേരിൽ എല്ലാവരും വിജയിക്കുകയും ഒരു ഫുൾ എ പ്ലസ് കരസ്ഥമാക്കുകയും ചെയ്തു. കുളത്തൂപ്പുഴ ചന്ദനക്കാവ് ബിഎംജിഎച്ച്എസ് കഴിഞ്ഞ പ്രാവശ്യം 100ശതമാനം വിജയം കരസ്ഥമാക്കിയെങ്കിലും ഇക്കുറി ഒരു വിദ്യാർഥിയുടെ തോൽവി മൂലം നൂറ് ശതമാനം വിജയം നഷ്‌ടപ്പെട്ടു. കുളത്തൂപ്പുഴ പഞ്ചായത്തിൽ ഏറ്റവും കൂടുതൽ വിദ്യാർഥികളെ എസ്എസ്എൽസി പരീക്ഷയ്ക്ക് ഇരുത്തി 215 വിദ്യാർഥികളിൽ 214 വിദ്യാർഥികളെയും വിജയിപ്പിക്കാൻ കഴിഞ്ഞു. ഇതിൽ 19 വിദ്യാർഥികൾക്ക് ഫുൾ എ പ്ലസ് നേടിക്കൊടുക്കുവാനും ബിഎംജി സ്കൂളിലെ അധ്യാപക കൂട്ടായ്മയ്ക്ക് കഴിഞ്ഞു. സ്കൂൾ പിടിഎ പ്രസിഡന്‍റ് ഷാഹുൽ ഹമീദ് വിദ്യാർഥികൾക്ക് അഭിനന്ദനങ്ങൾ അറിയിച്ചു. കുളത്തൂപ്പുഴ ഗവ.ഹൈസ്കൂളിന് ഇക്കുറി നല്ല വിജയം നേടാൻ കഴിഞ്ഞു. 66 വിദ്യാർഥികൾ പരീക്ഷയെഴുതി . ഇതിൽ 55 പേരെ വിജയിപ്പിക്കാൻ കഴിഞ്ഞതിൽ പിടിഎ പ്രസിഡന്‍റ് ഗോപകുമാർ വിദ്യാർഥികൾക്ക് അഭിനന്ദനങ്ങൾ അറിയിച്ചു.

എസ്എസ്എല്‍സി പരീക്ഷാഫലം: ജില്ലയില്‍ 99.41 ശതമാനം വിജയം

കൊല്ലം : എസ്എസ്എല്‍സി പരീക്ഷയില്‍ ജില്ലയില്‍ 99.41 ശതമാനം വിജയം. 30062 വിദ്യാര്‍ഥികള്‍ പരീക്ഷ എഴുതിയതില്‍ 29,886 പേര്‍ ഉന്നത പഠനത്തിന് അര്‍ഹരായി. ഇതില്‍ 15,255 ആണ്‍കുട്ടികളും 14,631 പെണ്‍കുട്ടികളും ഉള്‍പ്പെടുന്നു. എല്ലാ വിഷയങ്ങളിലും എ പ്ലസ് നേടിയവര്‍ - 6101. ആണ്‍കുട്ടികൾ - 2255, പെണ്‍കുട്ടികൾ - 3846. കൊട്ടാരക്കര, പുനലൂര്‍, കൊല്ലം വിദ്യാഭ്യാസ ജില്ലകളില്‍ യഥാക്രമം 99.5, 99.38, 99.39 എന്നിങ്ങനെയാണ് വിജയശതമാനം. കൊട്ടാരക്കര വിദ്യാഭ്യാസ ജില്ലയില്‍ 7579 പേരില്‍ 7541 പേര്‍ വിജയിച്ചു. 798 ആണ്‍കുട്ടികള്‍ക്കും 1208 പെണ്‍കുട്ടികള്‍ക്കും സമ്പൂര്‍ണ എ പ്ലസ് ലഭിച്ചു. പുനലൂരില്‍ 6339 വിദ്യാര്‍ഥികളില്‍ പരീക്ഷ എഴുതിയതില്‍ 6300 പേര്‍ വിജയിച്ചു. 447 ആണ്‍കുട്ടികളും 783 പെണ്‍കുട്ടികളും മുഴുവന്‍ എ പ്ലസ് നേടി. കൊല്ലം വിദ്യാഭ്യാസ ജില്ലയില്‍ 16144 വിദ്യാര്‍ഥികളില്‍ 16045 പേരും ജയിച്ചു. 1010 ആണ്‍കുട്ടികളും 1855 പെണ്‍കുട്ടികളും മുഴുവന്‍ വിഷയങ്ങളില്‍ എ പ്ലസ് നേടി.

ട്രെയിൻ തട്ടി പോത്തുകൾ ചത്തു

കൊല്ലം: ട്രെയിൻ ഇടിച്ച് പോത്തുകൾ ചത്തു. കൊല്ലം -പുനലൂർ റെയിൽവേ പാതയിൽ ചന്ദനത്തോപ്പിനും കിളികൊല്ലൂർ റെയിൽവേ സ്റ്റേഷനും മധ്യേ ഇന്നലെ രാവിലെ എട്ടോടെയായിരുന്നു സംഭവം. ചന്ദനത്തോപ്പ് പത്തായക്കല്ല് സ്വദേശിയുടെ രണ്ടു പോത്തുകളാണ് ചത്തത്. വീട്ടിൽ കെട്ടിയിരുന്ന പോത്തുകൾ റെയിൽവേ ട്രാക്കിൽ എത്തിയപ്പോൾ ട്രെയിൻ ഇടിക്കുകയായിരുന്നു. പോത്തുകൾ എങ്ങനെ ട്രാക്കിൽ എത്തിയെന്ന കാര്യത്തിൽ വ്യക്തതയില്ല. ആരെങ്കിലും മോഷ്ടിക്കാൻ ശ്രമിച്ചപ്പോൾ ഓടിപ്പോയതാണോ എന്ന് സംശയിക്കുന്നു.

യുഡിഎഫ് രാപകൽ സമരം നടത്തി

കൊട്ടാരക്കര: യുഡിഎഫ് സംസ്ഥാന ഏകോപന സമിതിയുടെ തീരുമാന പ്രകാരം കൊട്ടാരക്കര നിയോജക മണ്ഡലത്തിലെ കുളക്കട ഗ്രാമ പഞ്ചായത്തിൽ 29 മണിക്കൂർ രാപകൽ സമരം നടത്തി. കോൺഗ്രസ് പ്രവർത്തക സമിതി അംഗം കൊടിക്കുന്നിൽ സുരേഷ് എം പി ഉദ്ഘാടനം ചെയ്തു. രാപകൽ സമരത്തിൽ ജവഹർ ബാലമഞ്ച് ദേശീയ ചെയർമാൻ ഡോ. ജി .ബി .ഹരി,കെപിസിസി വക്താവ് ഡോ .ജിന്‍റോ ജോൺ,കെപിസിസി സെക്രട്ടറി ബിന്ദു ജയൻ ,സംസ്കാര സാഹിതി ജില്ലാ ചെയർമാൻ എബി പാപ്പച്ചൻ എന്നിവർ പ്രസംഗിച്ചു. സമാപന സമ്മേളനം എഐസിസി സെക്രട്ടറി പി.സി .വിഷ്ണുനാഥ് ഉദ്ഘാടനം ചെയ്തു.യുഡിഎഫ് ചെയർമാൻ പൂവറ്റൂർ സുരേന്ദ്രൻ അധ്യക്ഷത വഹിച്ചു .

വാഗ്ദാനത്തിലൊതുങ്ങി ആയുർവേദ വില്ലേജ്

നെയ്യാർഡാം: സംസ്ഥാന സർക്കാർ നടപ്പിലാക്കാൻ ഉദ്ദേശിച്ചിരുന്ന ബജറ്റ് വാഗ്ദാനമായിരുന്ന ആയുർവേദ വില്ലേജ് ഇനിയും യാഥാർഥ്യമായില്ല. 2016 ലും 2021ലും 2024 ലും ബജറ്റ് വാഗ്ദാനമായിരുന്നു നെയ്യാർ ആയുർവേദ വില്ലേജ്. വിശദമായ പഠന റിപ്പോർട്ട് തയാറാക്കി ഇതിനായി നടപടികൾ സ്വീകരിക്കുമെന്നായിരുന്നു വാഗ്ദാനം. ഔഷധ സസ്യങ്ങളുടെ കലവറ എന്നു വിശേഷിപ്പിക്കുന്ന അഗസ്ത്യമലയ്ക്ക് അടിവാരത്തു തന്നെ ആയുർവേദ വില്ലേജ് സ്ഥാപിക്കണമെന്ന വിദഗ്ധ നിർദേശം സർക്കാരിന് മുന്നിൽ സമർപ്പിച്ചിരുന്ന പശ്ചാത്തലത്തിലാണ് പ്രഖ്യാപനം വന്നത്. നെയ്യാർവന്യജീവി സങ്കേതത്തിൽപ്പെടുന്ന അപൂർവവും വംശനാശം നേരിടുന്നതുമായ സസ്യങ്ങളെ സംരക്ഷിക്കാനും നട്ടുവളർത്താനും അതു പുറംനാട്ടിൽ വിൽക്കാനും പഠന-ഗവേഷങ്ങൾക്കുമാണ് പദ്ധതി തയാറാക്കിയത്. അഗസ്ത്യമലയിലെ അപൂർവസസ്യങ്ങൾ ശേഖരിക്കുകയും ആദിവാസികളായ കാണിക്കാരുടെ സഹായത്തോടെ അത് നട്ടുവളർത്താനുമായിരുന്നു പദ്ധതി. ഇതു പ്രകാരം നിരവധി സസ്യങ്ങളാണ് കണ്ടെത്തിയത്. ഇതിനായി ഏതാണ്ട് അഞ്ചു ഹെക്ടറോളം സ്ഥലം വേർതിരിക്കുകയും അവിടെ കമ്പിവേലി കെട്ടി സുരക്ഷിതമാക്കാനും നിർദേശം നൽകിയെങ്കിലും അതു പ്രാഥമിക നടപടിയിൽ തന്നെ നിലച്ചു. കാണിക്കാരെ നിയോഗിച്ച് കാട്ടിൽനിന്നും ഔഷധങ്ങളെ കണ്ടെത്തി നാട്ടുകാരെ കൂടി ഉൾപ്പെടുത്തിയുള്ള പദ്ധതിക്കാണ് പ്ലാനിട്ടത്. നിരവധി തൊഴിൽ അവസരങ്ങൾ വാഗ്ദാനം ചെയ്ത പദ്ധതിയായിരുന്നു ഇത്. ആയുർവേദ ഔഷധനിർമാതക്കളെ സമീപിച്ച് ഔഷധങ്ങളുടെ കച്ചവടവും ഉറപ്പിച്ചു. പഠിക്കാനും ഗവേഷണം നടത്താനും പദ്ധതി രേഖയിലുണ്ട്. എന്നാൽ മുടക്കിയ പണം പാഴായി എന്നു മാത്രം. വില്ലേജ് നെയ്യാർവന്യജീവി സങ്കേതത്തിൽ മതിയെന്നു കേന്ദ്ര സർക്കാരും നിഷ്‌കർശിച്ചിരുന്നു. ആ പദ്ധതിയാണ് ഫയലിൽ ഉറങ്ങുന്നത്. ആയുർവേദ വില്ലേജിനായി വേണ്ടത്ര സ്ഥലം ഇവിടെ തന്നെയുണ്ട്. അതിനായി ഭൂമി ഏറ്റെടുക്കേണ്ട കാര്യവുമില്ല. അഗസ്ത്യമലയിലെ അപൂർവവും എന്നാൽ ഔഷധ ഗുണവുമുള്ള മരുന്നു ചെടികൾ നശിക്കുകയും അതു അശാസ്ത്രീയമായി പറിച്ചെടുത്ത് കടത്തുകയും ചെയ്യുകയാണ് ഇപ്പോൾ. അത് ഒഴിവാക്കാൻ കഴിയുമായിരുന്ന പദ്ധതിയാണ് ഇല്ലാതെയായത്. ടൂറിസത്തിനും മുതൽകൂട്ടാകുന്ന ഒന്നായിരുന്നു ആയുർവേദ വില്ലേജ്.

എസ്ജി കോളജ്: കോമേഴ്സ് പൂർവ വിദ്യാർഥി സംഗമം നാളെ

കൊട്ടാരക്കര: സെന്‍റ് ഗ്രീഗോറിയോസ് കോളജിലെ കോമേഴ്സ് പൂർവവിദ്യാർഥി സംഗമം നാളെ രാവിലെ 10.30ന് കോളജ് സെമിനാർ ഹാളിൽ നടക്കും. കോളജിൽ കൊമേഴ്സ് വിഭാഗം ആരംഭിച്ച 1967 മുതലുള്ള പ്രീഡിഗ്രി, ബി കോം, എം കോം പൂർവ വിദ്യാർഥികൾ സമ്മേളനത്തിൽ പങ്കെടുക്കും. കൊമേഴ്സ് വിഭാഗം മുൻ മേധാവി പ്രഫ. റ്റി.ജി. രാജന്‍റെ അധ്യക്ഷതയിൽ കൂടുന്ന സമ്മേളനത്തിൽ മലങ്കര ഓർത്തഡോക്സ് സഭ കൽക്കട്ട ഭദ്രാസനാധിപനും , കോളജിലെ പൂർവ വിദ്യാർഥിയുമായ അലക്സിയോസ് മാർ യൗസേബിയോസ് മെത്രാപ്പോലീത്ത സമ്മേളനം ഉദ്ഘാടനം ചെയ്യും. കെ. എൽ. ജോൺകുട്ടി മുഖ്യപ്രഭാഷണം നടത്തും. കോളജ് മാനേജർ ഫാ. കെ.സഖറിയ റമ്പാൻ വജ്റ ജൂബിലി സന്ദേശം നൽകും. ബാച്ച് തിരിച്ച് അധ്യാപകരുമായി കൂടി കാഴ്ച നടത്തുന്നതിനുള്ള ക്രമീകരണങ്ങളും ഒരുക്കിയിട്ടുണ്ട്. പൂർവവിദ്യാർഥികളുടേയും, കുടുംബാംഗങ്ങളുടെയും കലാപരിപാടികളും ഉണ്ടായിരിക്കും. പൂർവവിദ്യാർഥികളായ കോശി,സന്തോഷ് സി ഡാനിയൽ, ജോർജ് പണിക്കർ, ബേബി കുട്ടി , മാത്യു ജോർജ് എന്നിവരുടെ നേതൃത്വത്തിൽ സംഘാടക സമിതി പ്രവർത്തിച്ചു വരുന്നു. കൂടുതൽ വിവരങ്ങൾക്ക് താഴെ കാണുന്ന ഫോൺ നമ്പരുകളിൽ ബന്ധപ്പെടണം 94957011 46 9744235940

വ്യാപാരി വ്യവസായി സഹ. സംഘം ഹെഡ് ഓഫീസ് ഉദ്ഘാടനം ചെയ്തു

കൊല്ലം: വ്യാപാരി വ്യവസായി സംഘത്തിന്‍റെ നവീകരിച്ച ഹെഡ് ഓഫീസിന്‍റെഉദ്ഘാടനം എം .നൗഷാദ് എംഎൽഎ നിർവഹിച്ചു. ലോക്കർ റൂമിന്‍റെ ഉദ്ഘാടനം വ്യാപാരി വ്യവസായി സമിതി സംസ്ഥാന സെക്രട്ടറി ഇ .എസ്. ബിജുവും നിക്ഷേപം സ്വീകരിക്കൽ സ്പോർട്സ് കൗൺസിൽ പ്രസിഡന്‍റ് എക്സ് ഏണസ്റ്റും നിർവഹിച്ചു. ഉപഹാര സമർപ്പണം വ്യാപാരി വ്യവസായി സമിതി ജില്ലാ പ്രസിഡന്‍റ് ആർ. രാധാകൃഷ്ണൻ, സെക്രട്ടറി മഞ്ജു സുനിൽ എന്നിവർചേർന്ന്‌ നിർവഹിച്ചു. സംഘം പ്രസിഡന്‍റ് പീറ്റർ എഡ്വിൻ അധ്യക്ഷനായി. സെക്രട്ടറി വിനീത മനോജ് റിപ്പോർട്ട് അവതരിപ്പിച്ചു. കെ .കെ .നിസാർ, ആർ .അനില, സന്തോഷ്, വൈ .രാജൻ, കമാൽ പിഞ്ഞാണിക്കട, സുനിൽ പനയറ ,സംഘം വൈസ് പ്രസിഡന്‍റ് വിജയകുമാർ പ്രണവം ,ദിനേശ് റാവു എന്നിവർ പ്രസംഗിച്ചു.

‘അരുത് ലഹരി’ കുട്ടി പോലീസി‍ന്‍റെ പോരാട്ടം

കൊട്ടിയം :നിത്യസഹായ മാതാ ഗേൾസ് ഹൈസ്കൂളിലെ സ്റ്റുഡന്‍റ് പോലീസ് കേഡറ്റിന്‍റെ ദ്വിദിന സമ്മർ ക്യാമ്പ് അവസാനിച്ചു. ലഹരിക്കെതിരെയുള്ള പ്രവർത്തനങ്ങളിൽ കേഡറ്റുകളെ കൂടി പ്രാപ്തരാക്കുക എന്നുള്ള ഉദ്ദേശം മുൻനിർത്തി സംഘടിപ്പിച്ച ക്യാമ്പ് ആദിച്ചനല്ലൂർ പഞ്ചായത്ത് പ്രസിഡന്‍റ് രേഖ.എസ്.ചന്ദ്രൻ ഉദ്ഘാടനം ചെയ്തു. പ്രഥമാധ്യാപിക വൈ. ജൂഢിത്ത്‌ ലത അധ്യക്ഷത വഹിച്ചു. സംസ്ഥാന അധ്യാപക അവാർഡ് ജേതാവ് സാബു ജോയ് മുഖ്യ അതിഥിയായി.പോലീസ് ഓഫീസർമാരായ വൈ.സാബു, രമ്യ, എയ്ഞ്ചൽ മേരി, അനില ,അധ്യാപകരായ ജിസ്മി ഫ്രാങ്ക്ലിൻ, വിനീത, മഞ്ജു, സവിത എന്നിവർ പ്രസംഗിച്ചു. ലഹരിവിരുദ്ധ ബോധവത്്കരണത്തെക്കുറിച്ച് കൊട്ടിയം സബ്ഇൻസ്പെക്ടർ നിതിൻ നളൻ ,സൈബർ സുരക്ഷയെ കുറിച്ച് എസ് ഐ ശ്യാംകുമാർ, കുട്ടികൾക്ക് വരയും കുറിയുമായി പാച്ചൻ കൊട്ടിയം ആരോഗ്യത്തെക്കുറിച്ച് ജയപ്രകാശ് എന്നിവർ ക്ലാസുകൾ നയിച്ചു. കേഡറ്റുകൾ സ്കൂൾ പരിസരത്ത് ലഹരി വിരുദ്ധ റാലിയും ഫ്ലാഷ് മോബും സംഘടിപ്പിച്ചു.

സി-ക്യാമ്പ് എഎംആർ ചാലഞ്ചിൽ വിജയികളായി അമൃത വിശ്വവിദ്യാപീഠം

അമൃതപുരി (കൊല്ലം): സി - ക്യാമ്പ് ആന്‍റി മൈക്രോബയൽ റെസിസ്റ്റൻസ് ചാലഞ്ചിൽ അമൃത വിശ്വവിദ്യാപീഠത്തിനെ വിജയികളായി തെരഞ്ഞെടുത്തു. അമൃത വിശ്വവിദ്യാപീഠം അമൃതപുരി കാമ്പസിലെ അമൃത സ്കൂൾ ഓഫ് ബയോടെക്നോളജിയാണ് സെന്‍റർ ഫോർ സെല്ലുലാർ ആന്‍റ് മോളിക്യുലാർ പ്ലാറ്റ്‌ഫോംസ് (സി - ക്യാമ്പ്) ഗ്ലോബൽ എ എം ആർ ഇന്നോവേഷൻ ഫണ്ടുമായി സഹകരിച്ച് സംഘടിപ്പിച്ച ഈ വർഷത്തെ ആന്‍റി മൈക്രോബയൽ റെസിസ്റ്റൻസ് ചാലഞ്ചിൽ വിജയികളായത്. എ എം ആർ നിരീക്ഷണത്തിനായി അമൃത വിശ്വവിദ്യാപീഠം കോയമ്പത്തൂർ കാമ്പസിലെ സ്കൂൾ ഓഫ് ഫിസിക്കൽ സയൻസസുമായി ചേർന്ന് അമൃത സ്കൂൾ ഓഫ് ബയോടെക്നോളജിയിലെ ഡോ. ബിപിൻ നായരും സംഘവും വികസിപ്പിച്ചെടുത്ത പോയിന്‍റ് ഓഫ് ടെസ്റ്റിംഗ് എന്ന ഉപകരണത്തിനാണ് പുരസ്കാരം. മൈക്രോഫ്ലൂയിഡിക് സാങ്കേതികവിദ്യ ലൈറ്റിക് ഫേജ് ഡിറ്റെക്ഷനുമായി സംയോജിപ്പിച്ച് നിർമിച്ചിരിക്കുന്ന ഉപകരണം രോഗകാരികളെ കുറഞ്ഞചെലവിൽ വേഗത്തിലും കൃത്യമായും തിരിച്ചറിയാനാണ് ഉപയോഗിക്കുന്നത്. ആന്‍റി മൈക്രോബയൽ റെസിസ്റ്റൻസ് നേരിടുന്നതിനുള്ള നൂതന കണ്ടുപിടുത്തങ്ങൾ തിരിച്ചറിയുന്നതിനും പിന്തുണയ്ക്കുന്നതിനും ലക്ഷ്യമിട്ടുള്ള ദേശീയ സംരംഭമായ സി - ക്യാമ്പ്, വർഷം തോറും നടത്തിവരുന്ന എ എം ആർ ചാലഞ്ചിൽ എ എം ആറിനെ ചെറുക്കുന്നതിനായി മികച്ച പ്രവർത്തനങ്ങൾ കാഴ്ച വെക്കുന്ന സ്ഥാപനങ്ങളെയാണ് വിജയികളായി തെരഞ്ഞെടുക്കുന്നത്. ആഗോളതലത്തിൽ മത്സരിച്ച ഇരുന്നൂറിലധികം സ്ഥാപനങ്ങളെ പിന്നിലാക്കിയാണ് അമൃത സ്കൂൾ ഓഫ് ബയോടെക്നോളജി ഈ വർഷത്തെ എ എം ആർ ചാലഞ്ചിൽ വിജയികളായത്. പരിസ്ഥിതിയിലെ രോഗകാരികളെ വേഗത്തിൽ കണ്ടെത്തുന്നതിനായി ചെലവുകുറഞ്ഞതും കൃത്യതയുള്ളതുമായ ഒരു സംവിധാനം വികസിപ്പിക്കുന്നതിനുള്ള അമൃതയിലെ ഞങ്ങളുടെ ശ്രമങ്ങളെ ഈ അവാർഡിലൂടെ അംഗീകരിച്ചത് ഞങ്ങൾക്കൊരു പ്രചോദനമാണെന്ന് അമൃത സ്കൂൾ ഓഫ് ബയോടെക്നോളജി ഡീൻ ഡോ. ബിപിൻ നായർ പറഞ്ഞു. കാൺപൂർ ഐഐടി, ലഖ്‌നൗവിലെ സെൻട്രൽ ഡ്രഗ് റിസർച്ച് ഇൻസ്റ്റിറ്റ്യൂട്ട് (സിഡിആർഐ) എന്നിവയുമായി സഹകരിച്ച് നടത്തിയ പ്രവർത്തനങ്ങളിലൂടെ അമൃത സ്കൂൾ ഓഫ് ബയോടെക്നോളജിയെ എഎംആർ ഗവേഷണത്തിനുള്ള മികവിന്‍റെ കേന്ദ്രമായി ശാസ്ത്ര സാങ്കേതിക വകുപ്പ് തെരഞ്ഞെടുത്തിട്ടുണ്ട്.

ആറ്റിൽ കണ്ടെത്തിയ കടുവയുടെ ജഡം സംസ്കരിച്ചു

കാട്ടുപോത്തിന്‍റെ ആക്രമണത്തിൽ പരിക്കേറ്റതാകാം മരണകാരണം എന്ന് പ്രാഥമിക നിഗമനം കുളത്തൂപ്പുഴ: കഴിഞ്ഞദിവസം കുളത്തൂപ്പുഴ നെടുവന്നൂർ കടവ് പൂമ്പാറ പ്രദേശത്ത് ആറ്റിൽ കണ്ട കടുവയുടെ ജഡം മൃഗസംരക്ഷണ ,വനം വകുപ്പ് ഉദ്യോഗസ്ഥരുടെ നേതൃത്വത്തിൽ പോസ്റ്റ്മോർട്ടം നടപടികൾ പൂർത്തിയാക്കിയശേഷം സംസ്കരിച്ചു. ഡോ. അരുണ ദേവിയുടെ മേൽനോട്ടത്തിൽ മൃഗസംരക്ഷണ ഡോക്ടർമാരുടെ സംഘം നാഷണൽ ടൈഗർ കൺസർവേഷൻ അഥോറിറ്റിയുടെ മാനദണ്ഡങ്ങൾ (എൻ ടി സി എ)പാലിച്ചാണ് കടുവയുടെ പോസ്റ്റുമോർട്ടം നടത്തിയത്. തെന്മല വനം റേഞ്ചിൽ കല്ലുവരമ്പ് സെക്ഷനിൽ ആണ് കടുവയുടെ ജഡം കണ്ടത് . അഞ്ചു വയസ് പ്രായം വരുന്ന പെൺ കടുവയുടെ ജഡത്തിന് രണ്ടുദിവസത്തെ പഴക്കമുള്ളതായും കാലിൽ മുറിവേറ്റതായും കണ്ടെത്തി. കാട്ടുപോത്തുമായുണ്ടായ സംഘർഷത്തിലാകാം ശരീരത്തിലെ പരിക്കുകളെന്നും ഇതാവാം മരണകാരണമെന്നുമാണ് പ്രാഥമിക നിഗമനം. ശരീര സാമ്പിളുകൾ കൂടുതൽ പരിശോധനയ്ക്കായി ലാബിൽ അയച്ചിട്ടുണ്ട്. ഇവയുടെ ഫലം വന്നാലേ മരണകാരണം വ്യക്തമായി പറയാൻ കഴിയുകയുള്ളൂ എന്ന് തെന്മല, പുനലൂർ ഡി എഫ് മാരായ അനിൽ ആന്‍റണി, വൈ.എം .ഷാജി കുമാർഎന്നിവർ അറിയിച്ചു. ഡോക്ടർമാരായ എസ് .കെ. അരുൺകുമാർ(കോട്ടൂർതിരുവനന്തപുരം) ,എ.അനസ് (കഴുതുരുട്ടി മൃഗ ആശുപത്രി) ,മണി മോഹൻ ( ഏരൂർ മൃഗാശുപത്രി ) ,എൻ ജി ഒ പ്രതിനിധി പ്രദീപ് ,കുളത്തൂപ്പുഴ ഗ്രാമപഞ്ചായത്ത് മെമ്പർ മേഴ്സി ജോർജ് തുടങ്ങിയവരുടെ സാന്നിധ്യത്തിൽ ആയിരുന്നു നടപടികൾ .

മലയോര ഹൈവേയിൽ മരംവീണു ഗതാഗതം മുടങ്ങി

കുളത്തൂപ്പുഴ: കുളത്തൂപ്പുഴ ടൗണിന് സമീപം വർഷങ്ങൾ പഴക്കമുള്ള മാവിന്‍റെ ശിഖരങ്ങൾ ഒടിഞ്ഞുവീണ് ഗതാഗതം തടസപ്പെട്ടു. കഴിഞ്ഞദിവസം രാത്രിയിലായിരുന്നു സംഭവം. കുളത്തൂപ്പുഴ ടൗണിലുള്ള പൊതുമരാമത്ത് ഗസ്റ്റ് ഹൗസിനോട് ചേർന്നുള്ള വൈദ്യുതി വകുപ്പിന്‍റെ ഉടമസ്ഥയിലുള്ള ഭൂമിയിലെ മാവാണ് കഴിഞ്ഞദിവസം വൻ ശബ്ദത്തോടെ ഒടിഞ്ഞ് റോഡിൽ വീണത്. വാഹനങ്ങൾ ഇല്ലാത്തത് വൻ അപകടം ഒഴിവാക്കി. ശബ്ദം കേട്ട് ഓടിയെത്തിയ പരിസരവാസികളാണ് മരത്തിന്‍റെ ശിഖരങ്ങൾ റോഡിന് കുറുകെ കിടക്കുന്നത് കണ്ടതും ഉടനെ തന്നെ കുളത്തപ്പുഴ പോലീസിലറിയിച്ചതും. പോലീസെത്തി അയൽ സംസ്ഥാനങ്ങളിൽ നിന്നും എത്തിയ ചരക്ക് വാഹനങ്ങളും യാത്രാ വാഹനങ്ങളും നാട്ടുകാരുടെ സഹായത്തോടെ സമാന്തരപാതയിലൂടെ കടത്തിവിട്ടു. മരച്ചില്ലകൾ പൂർണമായും മുറിച്ചു നീക്കി ഗതാഗതം പുനസ്ഥാപിക്കുകയും ചെയ്തു. മലയോര ഹൈവേയിൽ അപക ടാവസ്ഥയിൽ നിൽ ക്കുന്ന മരങ്ങൾ മുറിച്ചു നീക്കണമെന്ന് ആവശ്യപ്പെട്ടിട്ടും അതിനൊന്നും നടപടി ഉണ്ടായില്ല.റോഡ് സൈഡിൽ അപകട ഭീഷണിയായി നിൽക്കുന്ന മരങ്ങൾ ഒഴിവാക്കി നാട്ടുകാരുടെയും യാത്രക്കാരുടെയും സുരക്ഷിതത്വം ഉറപ്പാക്കണമെന്നാണ് നാട്ടുകാരുടെ ആവശ്യം.

ശ്രീനാരായണ ഗുരു സാഹിത്യോത്സവം ഇന്നുമുതൽ ചാത്തന്നൂരിൽ

ചാത്തന്നൂർ: ശ്രീനാരായണ ഗുരുവിന്‍റെ കൃതികളും ദർശനങ്ങളും പ്രചരിപ്പിക്കുന്നതിനു രൂപം കൊണ്ട അറിവ് ത്രൂ ദ് സോൾ ഓഫ് ഗുരു വിന്‍റെ മൂന്നാമത് ശ്രീ നാരായണ ഗുരു സാഹിത്യോത്സവം ഇന്നുമുതൽ 11 വരെ ചാത്തന്നൂർകാഞ്ഞിരംവിള ക്ഷേത്രാങ്കണത്തിൽ നടക്കും. ഇന്ന് രാവിലെഒന്പതിന് കാർഷിക മേള, പുസ്‌തകമേള, ഫോട്ടോ പ്രദർശനം. കാർഷിക മേള എൻ. കെ.പ്രേമചന്ദ്രൻ എംപി ഉദ്ഘാടനം ചെയ്യും. പുസ്തകമേള ജി.എസ്. ജയലാൽ എംഎൽഎ ഉദ്ഘാടനം ചെയ്യും.സപി.ബി.ലാൽജിഅധ്യക്ഷത വഹിക്കും. കർഷകരായ പോളയിൽ രാമചന്ദ്രൻ പിള്ള, സി.വൈ.മീരാഭായി, ആർ.മുരളീധരൻ, എസ്.ജയമോഹന കുരുക്കൾ, കർഷക സംരംഭകൻ ജി. രവി എന്നിവരെ അനുമോദിക്കും. ഉച്ചകഴിഞ്ഞ് മൂന്നിന് സമൂഹ കീർത്തനാലാപനം. 3.40 ന് ഉദ്ഘാടന സഭ. നാരായണ ഗുരുകുലത്തിലെ സ്വാമി ത്യാഗീശ്വരൻ ദീപ പ്രകാശനം ചെയ്യും. മുൻ എംഎൽഎ കെ.എൻ.എ.ഖാദർ ഉദ്ഘാടനം ചെയ്യും. ചാത്തന്നൂർ സെന്‍റ് ജോർജ് ഓർത്തഡോക്സ് വലിയപള്ളി വികാരി ഫാ.കെ.ജി.ജേക്കബ് പണിക്കർ അനുഗ്രഹ പ്രഭാഷണം നടത്തും. 10ന് രാവിലെ ഒന്പതിന് നാരായണ ഗുരുകൃതികളുടെ ആലാപന മത്സരം, 10.30ന് ഡോ.പി.കെ. സാബുവിന്‍ പ്രഭാഷണം, 12.10ന് കൊട്ടിയം എസ്എൻ പോളിടെക്നിക് പ്രിൻസിപ്പൽ സന്ദീപിന്‍റെ പ്രഭാഷണം. ഉച്ചകഴിഞ്ഞ് ചിത്രരചനാ മത്സരം,മുല്ലക്കര രത്നാകരന്‍റെ പ്രഭാഷണം. 11ന് രാവിലെഒന്പതിന് പ്രശ്നോത്തരി, 10.15ന് ഡോ. സി.നാരായണപിള്ളയുടെ പ്രഭാഷണം. 11.40ന് നിമിഷ ജിബിലാഷിന്‍റെ പ്രഭാഷണം, ഉച്ചകഴിഞ്ഞ് കുട്ടികളുടെ കവിയരങ്ങ്,മൂന്നിന് യോഗ ഡാൻസ്, 3.30ന് സമാപന സഭ വയലാർ അവാർഡ് ജേതാവ് കെ.വി.മോഹൻകുമാർ ഉദ്ഘാടനം ചെയ്യും.അറിവ് പ്രസിഡന്‍റ് ബി. സജൻലാൽ, ജനറൽ സെക്രട്ടറി ജി. ഹസ്ത‌ാമലകൻ, ഡോ. ടി.ജെ.അജിത് ബി.പ്രസാ ദ്, പി.ബി.ലാൽജി എന്നിവർ പത്രസമ്മേളനത്തിൽ പങ്കെടുത്തു.

കൊല്ലം പുസ്തകോത്സവം നാളെ മുതൽ

കൊല്ലം: ജില്ലാ ലൈബ്രറി വികസന സമിതിയുടെ ആഭിമുഖ്യത്തിലുള്ള കൊല്ലം പുസ്തകോത്സവം നാളെ മുതൽ 13 വരെ കൊല്ലം ബോയ്സ് ഹൈസ്കൂൾ മൈതാനത്ത് നടക്കും. രാവിലെ ഒമ്പത് മുതൽ വൈകുന്നേരം ആറു വരെയാണ് മേള.നാളെ രാവിലെ പത്തിന് എഴുത്തുകാരൻ വി.ഷിനിലാൽ പുസ്തകോത്സവം ഉദ്ഘാടനം ചെയ്യും. മേയർ ഹണി ബഞ്ചമിൻ ദീപം തെളിക്കും. സിവിൽ സർവീസ് പരീക്ഷയിൽ ജില്ലയിൽ നിന്ന് മികച്ച വിജയം കൈവരിച്ചവരെയും സംസ്ഥാന വായന മത്സരത്തിൽ വിജയികളായവരെയും ജില്ലാ പഞ്ചായത്ത് പ്രസിഡന്‍റ് പി.കെ. ഗോപൻ ആദരിക്കും. ജില്ലാ ലൈബ്രറി കൗൺസിൽ പ്രസിഡന്‍റ് കെ.ബി.മുരളീകൃഷ്ണന്‍റെ അധ്യക്ഷതയിൽ ചേരുന്ന യോഗത്തിൽ സംസ്ഥാന ലൈബ്രറി കൗൺസിൽ എക്സിക്യൂട്ടീവ് കമ്മിറ്റി അംഗം എസ്.നാസർ മുഖ്യപ്രഭാഷണം നടത്തും. 11 ന് രാവിലെ പത്തിന് വി. സാംബശിവൻ സ്മാരക കഥാപ്രസംഗ മത്സരം കോർപറേഷൻ ഡെപ്യൂട്ടി മേയർ എസ്. ജയൻ ഉദ്ഘാടനം ചെയ്യും. താലൂക്ക് ലൈബ്രറി കൗൺസിൽ പ്രസിഡന്‍റ് പാരിപ്പള്ളി ശ്രീകുമാർ അധ്യക്ഷത വഹിക്കും. ഉച്ചകഴിഞ്ഞ് 2.30 ന് ജില്ലാ തല സെമിനാർ എം. നൗഷാദ് എംഎൽഎ ഉദ്ഘാടനം ചെയ്യും. മതേതരത്വം, വർഗീയത എന്ന വിഷയം അജിത് കൊളാടി അവതരിപ്പിക്കും. വൈകുന്നേരം അഞ്ചിന് ഡോ. കെ.ബി. ശെൽവമണി എം.ടി. വാസുദേവൻ നായർ അനുസ്മരണ പ്രഭാഷണം നടത്തും.12 ന് രാവിലെ പത്തിന് നോവൽ സമീക്ഷ എന്ന സെമിനാറിൽ എസ്.ആർ. ലാൽ പ്രഭാഷണം നടത്തും. 11.30 ന് നടക്കുന്ന ചലച്ചിത്ര സെമിനാറിൽ ഡോ.എ .എസ്. പ്രതീഷ്, ഉമേഷ് ഓമനക്കുട്ടൻ എന്നിവർ പങ്കെടുക്കും. വൈകുന്നേരം നാലിന് പാറപ്പുറത്ത് ജന്മശതാബ്ദി അനുസ്മരണ സമ്മേളനത്തിൽ ഡോ. വള്ളിക്കാവ് മോഹൻദാസ്, പി.കെ.അനിൽ കുമാർ എന്നിവർ പ്രസംഗിക്കും. 13 ന് ഉച്ചകഴിഞ്ഞ് മൂന്നിന് പുസ്തകോത്സവം സമാപിക്കും. കേരളത്തിലെ 100 ൽ അധികം പ്രസാധകർ പങ്കെടുക്കും. 112 സ്റ്റാളുകൾ ഉണ്ടായിരിക്കും. ജില്ലയിലെ 860 ലൈബ്രറികൾക്ക് 2024-25 ൽ 1, 66,58,250 രൂപ പുസ്തക ഗ്രാന്‍റായി അനുവദിച്ചിട്ടുണ്ട്. ഇതിന്‍റെ 35 ശതമാനം കമ്മീഷൻ തുക കൂടി ഉൾപ്പെടുത്തി ഗ്രന്ഥശാലകൾക്ക് പുസ്തകം വാങ്ങാൻ അവസരം ലഭിക്കുമെന്ന് ലൈബ്രറി കൗൺസിൽ ഭാരവാഹികളായ ഡോ. പി.കെ. ഗോപൻ, കെ.ബി.മുരളീകൃഷ്ണൻ, ഡി. സുകേശൻ എന്നിവർ പത്രസമ്മേളനത്തിൽ പറഞ്ഞു.

ബിഎഐ ഭാരവാഹികളുടെ സ്ഥാനാരോഹണം നാളെ

കൊല്ലം: ബില്‍ഡേഴ്‌സ് അസോസിയേഷന്‍ ഓഫ് ഇന്ത്യ - ബിഎഐയുടെ കൊല്ലം സെന്‍ററിന്‍റെ പുതിയ ഭാരവാഹികളുടെ സ്ഥാനാരോഹണം നാളെ നടക്കും. അഷ്ടമുടി ലീല റാവിസ് ഹോട്ടലിൽ വൈകുന്നേരം ഏഴിനാണ് പരിപാടി. പ്രശസ്ത ആര്‍ക്കിടെക്റ്റ് പത്മശ്രീ ജി.ശങ്കര്‍ ഉദ്ഘാടനം ചെയ്യും. ബിഎഐ സെന്‍റര്‍ ചെയര്‍മാന്‍ പീര്‍ മുഹമ്മദ് അധ്യക്ഷത വഹിക്കും. സി. ആര്‍. മഹേഷ് എംഎല്‍എ മുഖ്യാതിഥിയായിരിക്കും. സ്ഥാനാരോഹണച്ചടങ്ങുകള്‍ക്ക് ബിഎഐ സംസ്ഥാന ചെയര്‍മാന്‍ കെ. എ. ജോണ്‍സണ്‍, ബിഎഐ മുന്‍ സംസ്ഥാന ചെയര്‍മാന്‍ സുരേഷ് പൊറ്റെക്കാട്ട് എന്നിവര്‍ നേതൃത്വം നല്‍കും. ഈ വർഷത്തെ പുതിയ പദ്ധതികളുടെ പ്രഖ്യാപനവും ചടങ്ങില്‍ നടക്കും. പി. എന്‍. സുരേഷ് പാലക്കോട്ട് - ചെയര്‍മാന്‍, ആര്‍ക്കിടെക്റ്റ് ആസാദ് ജമാല്‍ - വൈസ് ചെയര്‍മാന്‍, സാജു മാത്യു - സെക്രട്ടറി, സുനില്‍ കുമാര്‍ - ജോയിന്‍റ് സെക്രട്ടറി, അഖില്‍ വിനായക് - ട്രഷറര്‍, എന്നിവരാണ് പുതിയ ഭാരവാഹികൾ. സംസ്ഥാനത്തെ 22 സെന്‍ററുകളില്‍ നിന്നായി 250 പ്രതിനിധികള്‍ ചടങ്ങില്‍ പങ്കെടുക്കും. നൂതനവും വ്യത്യസ്തവുമായ നിര്‍മാണസാമഗ്രികളും വിവിധ നിര്‍മാണ രീതികളും സാങ്കേതിക വിദ്യകളും സേവനങ്ങളും പരിചയപ്പെടുത്തുന്ന സ്റ്റാളുകളുടെ പ്രദര്‍ശനവും ഉണ്ടാവും.

സിപിഐ ചാത്തന്നൂർ ടൗൺലോക്കൽ സമ്മേളനം

ചാത്തന്നൂർ: സിപിഐ ചാത്തന്നൂർ ടൗൺ ലോക്കൽ സമ്മേളനം പ്രകടനത്തോടെ ആരംഭിച്ചു. തിരുമുക്കിൽ നിന്നും പ്രകടനം ടൗൺ ചുറ്റി ചാത്തന്നൂർ ജംഗ്ഷനിലെ പൊതുയോഗ വേദിയിൽ സമാപിച്ചു. പൊതുസമ്മേളനം സംസ്ഥാന എക്സി. കമ്മിറ്റി അംഗം അഡ്വ. ആർ. രാജേന്ദ്രൻ ഉദ്ഘാടനം ചെയ്തു. സംഘാടക സമിതി ചെയർമാൻ അഡ്വ. കെ. എസ്. ഷൈൻ അധ്യക്ഷത വഹിച്ചു. ജി.എസ്. ജയലാൽ എംഎൽഎ, ലോക്കൽ കമ്മിറ്റി സെക്രട്ടറി വി.രാധാകൃഷ്ണൻ, മണ്ഡലം സെക്രട്ടറി ആർ. ദിലീപ് കുമാർ, കെ. ആർ. മോഹനൻ പിള്ള, ശ്രീജ ഹരീഷ്, അജയകുമാർ, മണ്ഡലം സെക്രട്ടേറിയറ്റ് അംഗങ്ങളായ ജെയിൻ കുമാർ, എൻ. രവീന്ദ്രൻ പഞ്ചായത്ത്‌ പ്രസിഡന്‍റ് എസ്. കെ. ചന്ദ്രകുമാർ, ടി. എൻ. പ്രമീള, നിർമല വർഗീസ്, സജീന നജീം, ബി. സന്തോഷ്‌ ബാബു എന്നിവർ പ്രസംഗിച്ചു.

ജി.പി. നന്ദനയെ അനുമോദിച്ചു

ഓയൂർ: സിവിൽ സർവീസ് പരീക്ഷയിൽ ദേശീയതലത്തിൽ 47 ാമത് റാങ്കും സംസ്ഥാന തലത്തിൽ രണ്ടാം സ്ഥാനവും ലഭിച്ച ജി.പി. നന്ദനയെ കുടവട്ടൂർ ദേശസേവിനി വായനശാല അനുമോദിച്ചു. മന്ത്രി കെ.എൻ.ബാലഗോപാൽ അനുമോദനയോഗം ഉദ്ഘാടനം ചെയ്തു. സംസ്ഥാന എൻട്രൻസ് കമ്മീഷണറും സാമൂഹ്യനീതി വകുപ്പു ഡയറക്ടറുമായ ഡോ.അരുൺ എസ്. നായർ മുഖ്യപ്രഭാഷണം നടത്തി. കൊട്ടാരക്കര ബ്ലോക്ക് പ്രസിഡന്‍റ് എ.അഭിലാഷ്, വെളിയം പഞ്ചായത്ത് പ്രസിഡന്‍റ് ആർ. പ്രശാന്ത്, കൊട്ടാരക്കര താലൂക്ക് ലൈബ്രറി കൗൺസിൽ സെക്രട്ടറി പി.കെ. ജോൺസൺ, ജില്ലാ പഞ്ചായത്ത് മെമ്പർ ജയശ്രീ വാസുദേവൻ പിള്ള, ബ്ലോക്ക് പഞ്ചായത്തു മെമ്പർ ദിവ്യാ സജിത്, വാർഡ് മെമ്പർ കെ. രമണി, വെളിയം പഞ്ചായത്ത് തല ഗ്രന്ഥശാല സമിതി കൺവീനർ പി. അനീഷ് എന്നിവർ പ്രസംഗിച്ചു.

ബൈക്ക് മോഷണക്കേസ്; യുവാവിനെ അറസ്റ്റ് ചെയ്തു

പേരൂര്‍ക്കട: തിരുമല ഷോപ്പിംഗ് കോംപ്ലക്‌സിനു മുന്‍വശത്തു പാര്‍ക്ക് ചെയ്തിരുന്ന ബൈക്ക് മോഷ്ടിച്ചയാളെ പൂജപ്പുര പോലീസ് അറസ്റ്റുചെയ്തു. തിരുമല സൗമ്യ തിയേറ്ററിന് എതിര്‍വശം ഓടാങ്കുഴി ലെയിന്‍ ടി.സി 8/533 (3) മേലെ പുത്തന്‍വീട്ടില്‍ രഞ്ജിത്ത് (40) ആണ് അറസ്റ്റിലായത്. ബുധനാഴ്ച രാവിലെയായിരുന്നു സംഭവം. വേട്ടമുക്ക് അബു മന്‍സിലില്‍ അബുവിന്റെ ബൈക്കാണ് കവര്‍ച്ച ചെയ്യപ്പെട്ടത്. സി.സി.ടി.വി പരിശോധിച്ചപ്പോള്‍ മോഷണബൈക്കുമായി സഞ്ചരിക്കുന്ന രഞ്ജിത്തിന്റെ ദൃശ്യങ്ങള്‍ പോലീസിന് ലഭിച്ചു. തിരുവനന്തപുരം സിറ്റിയിലെ ഒരു ആക്രിക്കടയില്‍ ബൈക്ക് വില്‍പ്പനയ്ക്ക് കൊണ്ടുവന്ന രഞ്ജിത്തിനെ ഇവിടെവച്ചാണ് പോലീസ് പിടികൂടിയത്. ബൈക്ക് മോഷണത്തിന് ഇയാളെ മുമ്പും പോലീസ് പിടികൂടിയിട്ടുണ്ട്. പൂജപ്പുര സി.ഐ ഷാജിമോന്റെ നേതൃത്വത്തില്‍ എസ്.ഐ അഭിജിത്ത്, എസ്.സി.പി.ഒ അനുരാഗ്, സി.പി.ഒമാരായ അരുണ്‍, ഉണ്ണികൃഷ്ണന്‍ എന്നിവര്‍ അന്വേഷണസംഘത്തില്‍ ഉണ്ടായിരുന്നു. പ്രതിയെ കോടതി റിമാന്‍ഡ് ചെയ്തു.

ഗ്യാസ് ഏജൻസി ഉടമയുടെ പണം തെട്ടിയെടുത്ത അഭിഭാഷകൻ അറസ്റ്റിൽ

തിരുവനന്തപുരം: ട്രാവൻടൂർ ഗ്യാസ് ഏജൻസി ഉടമയെ പറ്റിച്ച് 23 ലക്ഷത്തോളം രൂപ തട്ടിയെടുത്ത കേസിൽ മാനേജരായ അഭിഭാഷകൻ അറസ്റ്റിൽ. ഊരൂട്ടന്പലം അയണിമൂട് സ്വദേശി അഡ്വ. എം.എസ് അനിൽ വസാദാണ് അറസ്റ്റിലായത്. ഗ്യാസ് സിലിണ്ടറുകൾ വിതരണം ചെയ്ത വകയിൽ നേരിട്ടും ഗൂഗിൾപേ മുഖേനയും ലഭിക്കേണ്ട 23 ലക്ഷം രൂപ തട്ടിയെടുത്തെന്ന കേസിലാണ് മാനേജർ ആയിരുന്ന അനിൽ വസാദിനെ അറസ്റ്റ് ചെയ്തത്. അക്കൗണ്ടന്‍റായ രണ്ടാം പ്രതിയുമായി ഒത്തുകളിച്ചു പണം തട്ടിയെന്ന കേസിലാണ് വലിയതുറ എസ്ഐയുടെ നേതൃത്വത്തിൽ പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കി 15 ദിവസത്തേക്ക് റിമാർഡ് ചെയ്തു. പ്രതിക്കെതിരെ കന്‍റോണ്‍മെന്‍റ്, തന്പാനൂർ പോലീസ് സ്റ്റേഷനുകളിൽ സമാനമായ കേസ് നിലവിലുണ്ടെന്നു പോലീസ് അറിയിച്ചു.

അഞ്ചുവയസുകാരിയെ പീഡിപ്പിച്ച പ്രതിക്ക് 40 വർഷം കഠിനതടവ്

കൊട്ടാരക്കര: അഞ്ച് വയസുകാരിയെ ലൈംഗികമായി പീഡിപ്പിച്ച കേസിൽ പ്രതിക്ക് 40 വർഷം കഠിന തടവും 30000 രുപ പിഴയും ശിക്ഷിച്ച് കോടതി. 2019 ൽ നടന്ന സംഭവത്തിൽ മുരളീധരനെയാണ് ശിക്ഷിച്ചത്. അതിജീവിതയെ പ്രതി വീട്ടിൽ വിളിച്ചു കൊണ്ടുപോയി പീഡിപ്പിച്ചു എന്നതാണ് കേസ്. ഫാസ്റ്റ് ട്രാക്ക് കോടതി ജഡ്ജി അഞ്ജു മീര ബിർളയാണ് ശിക്ഷ വിധിച്ചത്. പൂയപ്പള്ളി ഇൻസ്പെക്ടർ ആർ. വിനോദ് ചന്ദ്രൻ എഫ്ഐആർ രജിസ്റ്റർ ചെയ്തു അന്വേഷണം പൂർത്തിയാക്കി ചാർജ് ഷീറ്റ് ഹാജരാക്കിയ കേസിൽ പിഴത്തുക അതിജീവിതയ്ക്ക് നഷ്ടപരിഹാരമായി നൽകാനാണ് വിധി. പിഴ ഒടുക്കിയില്ലെങ്കിൽ ഒരു വർഷം കൂടി തടവ് അനുഭവിക്കണമെന്നും കോടതി വിധിയിൽ പറയുന്നു.

ലോക റെഡ്ക്രോസ് ദിനം ആചരിച്ചു

കൊല്ലം : ഇന്ത്യൻ റെഡ്ക്രോസ് സൊസൈറ്റി കൊല്ലം ജില്ലയുടെയും ജൂനിയർ റെഡ് ക്രോസിന്‍റെയും, താലൂക്ക് ബ്രാഞ്ചുകളുടെയും ആഭിമുഖ്യത്തിൽ ലോക റെഡ്ക്രോസ് ദിനം ആചരിച്ചു. അനുദിനം വിഭാഗീയത പരത്തുന്ന ലോകത്തിൽ മനുഷ്യത്വത്തിന് ശക്തി പകരുക, കരുണ ഉള്ളവരാക്കുക, എന്നുള്ളതാണ് ഈ വർഷത്തെ ചിന്താവിഷയം. റെഡ് ക്രോസ് ദിനം ജില്ലാ ചെയർമാൻ ഡോ. മാത്യു ജോൺ ഉദ്ഘാടനം ചെയ്തു. സംസ്ഥാന സെക്രട്ടറി എസ്. അജയകുമാർ അധ്യക്ഷത വഹിച്ച യോഗത്തിൽ ജൂനിയർ റെഡ് ക്രോസ് ജില്ലാ കോഡിനേറ്റർ മുഹമ്മദ് യാസിൻ മുഖ്യ സന്ദേശം നൽകി. ജൂനിയർ റെഡ് ക്രോസ് അധ്യാപക കൗൺസിലർമാരായി വിരമിച്ച അധ്യാപകർക്കുള്ള മൊമെന്‍റോ, മികച്ച ജെആർസി കേഡറ്റുകൾക്കുള്ള സമ്മാന വിതരണം എന്നിവ നടന്നു. ദിനാചരണത്തോടനുബന്ധിച്ച് നടന്ന സൗജന്യ നേത്ര പരിശോധന ക്യാമ്പ് റെഡ് ക്രോസ് പെട്രൺ ആർ. പ്രകാശൻ പിള്ള ഉദ്ഘാടനം ചെയ്തു. ട്രഷറർ നേതാജി ബി. രാജേന്ദ്രൻ, ബി. സുരേഷ് ബാബു, രാജു, വിജയൻ, പ്രശോഭ് തുടങ്ങിയവർ പ്രസംഗിച്ചു. റെഡ് ക്രോസ് ദിനത്തിനോട് അനുബന്ധിച്ച് ജില്ലയിലെ താലൂക്ക് ബ്രാഞ്ചുകളുടെ ആഭിമുഖ്യത്തിൽ വിവിധ ജീവകാരുണ്യ പ്രവർത്തനങ്ങൾ നടത്തി.

കിപ്സിൽ സപ്തദിന വ്യക്തിത്വ വികസന ക്യാമ്പ് സമാപിച്ചു

കൊട്ടാരക്കര : വിവിധ സംഘടനകളുടെ സംയുക്താഭിമുഖ്യത്തിൽ കരിക്കം ഇന്‍റർനാഷണൽ പബ്ലിക് സ്കൂളിൽ നടന്ന സപ്തദിന വ്യക്തിത്വ വികസന ക്യാമ്പ് സമാപിച്ചു. ഡോ.ഏബ്രഹാം കരിക്കം, പി.കെ. രാമചന്ദ്രൻ, നീലേശ്വരം സദാശിവൻ, രാജൻ കോസ്മിക്, കെ.ജി. മത്തായിക്കുട്ടി, പ്രഫ.ആർദ്ര.പി.മനോജ്, ഹരിപ്രിയ എന്നിവർ ക്ലാസുകൾക്ക് നേതൃത്വം നൽകി. സമാപന സമ്മേളനം കേരള കാവ്യ കലാസാഹിതി പ്രസിഡന്‍റ് പ്രഫ.ജോൺ കുരാക്കാർ ഉദ്ഘാടനം ചെയ്തു. വൈഎംസിഎ പ്രസിഡന്‍റ് കെ.ഒ.രാജുക്കുട്ടി അധ്യക്ഷത വഹിച്ചു. ഡയറക്ടർ സൂസൻ ഏബ്രഹാം മുഖ്യപ്രഭാഷണം നടത്തി. നിഷ.വി.രാജൻ, ഷിബി ജോൺസൺ, പി.ജോൺ, എം.തോമസ്, ജെഫ്ന സാജൻ, ലിഖിത മറിയം യോഹന്നാൻ എന്നിവർ പ്രസംഗിച്ചു. പ്രഫ.മോളി കുരാക്കാർ സമ്മാനദാനം നിർവഹിച്ചു.

ഡിസാസ്റ്റർ മാനേജ്മെന്‍റ്, പാലിയേറ്റീവ് പരിശീലനം

കൊല്ലം : വി കെയർ പാലിയേറ്റീവ് ആന്‍റ് ചാരിറ്റബിൾ ട്രസ്റ്റിന്‍റെ ആഭിമുഖ്യത്തിൽ കിടപ്പുരോഗികളെ പരിചരിക്കുക, ദുരന്ത മേഖലയിലും അപകടമേഖലയിലും രക്ഷാപ്രവർത്തനം നടത്തുക തുടങ്ങി വിവിധ രോഗീപരിചരണ മേഖലയിലെ ആവശ്യങ്ങൾ പരിഗണിച്ചു രണ്ടു ദിവസത്തെ ബേസിക് ക്രിട്ടിക്കൽ കെയർ മാനേജ്മെന്‍റ് ഫോർ ഹെൽത്ത്കെയർ പ്രോവൈഡേഴ്‌സ് എന്ന പരിശീലനം സംഘടിപ്പിക്കുന്നു. റൈൽസ് ട്യൂബ് ഇൻസർഷൻ, കതീറ്റർ കെയർ, കെയർ ഓഫ് ബെഡ് റിഡൻ പേഷ്യന്‍റ് , സിപിആർ, ചോക്കിംഗ്, ഫസ്റ്റ് എയ്ഡ്, കോമൺ എമർജൻസിസ്, സേഫ് ട്രാൻസ്‌പോർറ്റേഷൻ ഓഫ് പേഷ്യന്‍റ് , ട്രാക്കിയോസ്ടമി കെയർ, സ്റ്റെറിലൈസേഷൻ, ഇൻഫെക്‌ഷൻ കൺട്രോൾ, വൂണ്ട് കെയർ, ബിപി, പൾസ്, ഓക്സിജൻ ലെവൽ സാചുറേഷൻ എന്നിവ അടങ്ങുന്ന വൈറ്റൽസ് മോണിറ്ററിംഗ് , ഡിസാസ്റ്റർ മാനേജ്മെന്‍റ് എന്നീ വിഷയങ്ങളിൽ തിയറിക്ക് പുറമെ പ്രാക്റ്റിക്കൽ ക്ലാസുകളും ഉണ്ടാകും. 24, 25 തീയതികളിൽ രാവിലെ 9.30 മുതൽ ഉച്ചകഴിഞ്ഞ് 3.30 വരെ കൊല്ലം ഹൈസ്കൂൾ ജംഗ്ഷന് സമീപം കരുതൽ സുമ്പ, യോഗ ആൻഡ് കരാട്ടെ സെന്‍ററിൽ പരിശീലനങ്ങൾ നടക്കും. ഡോ. ആതുരദാസ്, യുഎൻഎ സംസ്ഥാന വൈസ് പ്രസിഡന്‍റ് മുകേഷ് എന്നിവരുടെ നേതൃത്വത്തിൽ ഡോക്ടർമാരും നഴ്സുമാരും അടങ്ങുന്ന ടീം ആണ് പരിശീലനത്തിന് നേതൃത്വം നൽകുന്നത്. 9387676757, 8089802884, 9387045116 എന്നീ നമ്പറുകളിൽ വിളിച്ചോ കഴ്‌സൻ റോഡിലുള്ള കരുതൽ അക്കാഡമിയിൽ എത്തിയോ പേര് രജിസ്റ്റർ ചെയ്യാം.

ലഹരിക്കെതിരേ കുടുംബശ്രീയുടെ ബാലസംഘവും

കൊല്ലം: കുടുംബശ്രീയുടെ കുട്ടിക്കൂട്ടം ജില്ലാ കളക്ടര്‍ക്ക് മുന്നിലെത്തി കലാപ്രകടനങ്ങളുമായി. ലഹരിക്കെതിരെ പുതുതലമുറയെ ജാഗരൂകരാക്കുന്നതിനായി സംഘടിപ്പിച്ച ക്യാമ്പിന്‍റെ സമാപന ഭാഗമായിരുന്നു പ്രകടനം. കഴിഞ്ഞ ദിവസങ്ങളിലായി കൊട്ടാരക്കര കിലയില്‍ ഒത്തുകൂടി ലഹരിയെന്ന വിപത്തിനെ അകറ്റുന്നതിനായി ആര്‍ജിച്ച അറിവുകളും കുട്ടികള്‍ പങ്കിട്ടു. അപകടഘട്ടങ്ങളിലും ലഹരിപോലുള്ള വിപത്തുകളുടെ വ്യാപനവേളയിലും കുട്ടികള്‍ അപായസൂചനയുമായി മുന്നിലെത്തുന്നത് മാതൃകാപരമാണെന്ന് ജില്ലാ കളക്ടര്‍ പറഞ്ഞു. കുടുംബശ്രീയുടെ പ്രവര്‍ത്തനങ്ങളുടെ വ്യാപ്തികൂടിയാണ് ഇത്തരം കൂട്ടായ്മകളിലൂടെ സമൂഹമധ്യത്തിലെത്തുന്നതെന്നും കൂട്ടിച്ചേര്‍ത്തു. ബ്ലോക്-സിഡിഎസ് തലങ്ങളില്‍ തെരഞ്ഞെടുത്ത 50 കുട്ടികളാണ് ക്യാമ്പില്‍ പങ്കെടുത്തത്. ഇവര്‍ക്കൊപ്പം രക്ഷിതാക്കളും ജില്ലാ കളക്ടറുടെ ചേംബറിലെത്തി. എഡിഎം ജി. നിര്‍മല്‍ കുമാര്‍, കുടുംബശ്രീ ജില്ലാ മിഷന്‍ കോ-ഓഡിനേറ്റര്‍ വിമല്‍ ചന്ദ്രന്‍, ജില്ലാ അസിസ്റ്റന്‍റ് മിഷന്‍ കോ-ഓര്‍ഡിനേറ്റര്‍മാരായ അനിസ, മുഹമ്മദ് ഹാരിഫ്, ജില്ലാ പ്രോഗ്രാം മാനേജര്‍മാരായ സിന്ദുഷ, വിഷ്ണുപ്രസാദ് , ബ്ലോക്ക് കോ-ഓഡിനേറ്റര്‍മാരായ പാര്‍വതി, അനു, ബാലസഭാ ജില്ലാ റിസോഴ്‌സ്‌പേഴ്‌സണ്‍മാര്‍, ലയോറ ക്യാമ്പ് റിസോഴ്‌സ് പേഴ്‌സണ്‍മാര്‍, സിഡി എസ് ഭാരവാഹികള്‍ തുടങ്ങിയവര്‍ പങ്കെടുത്തു.

മൃഗചികിത്സ വീട്ടുപടിക്കലേക്ക് എത്തും: മന്ത്രി ജെ.ചിഞ്ചുറാണി

കൊല്ലം: ജില്ലയില്‍ മൃഗചികിത്സ വീട്ടുപടിക്കലേക്കെത്തുമെന്ന് മന്ത്രി ജെ.ചിഞ്ചുറാണി. സംസ്ഥാനത്താകെ ആരംഭിച്ച മൊബൈല്‍ വെറ്ററിനറി യൂണിറ്റുകളുടെയും സര്‍ജറി യൂണിറ്റുകളുടെയും ഫ്‌ളാഗ് ഓഫ് ജില്ലാ വെറ്ററിനറി കേന്ദ്രത്തില്‍ നിര്‍വഹിക്കുകയായിരുന്നു മന്ത്രി. 1962 ടോള്‍ ഫ്രീ കോള്‍ സെന്‍റര്‍ നമ്പറിലേക്ക് വിളിച്ചാല്‍ സേവനം വീട്ടിലെത്തും. ഇത്തിക്കര, കൊട്ടാരക്കര, ചവറ ബ്ലോക്കുകളില്‍ മൊബൈല്‍ യൂണിറ്റുകളും കൊല്ലം കേന്ദ്രീകരിച്ച് ഒരു സര്‍ജറി യൂണിറ്റുമാണ് പ്രവര്‍ത്തനം തുടങ്ങുന്നത്. പ്രത്യേക പരിശീലനം നേടിയ ഡോക്ടര്‍മാരും ഡ്രൈവര്‍ കം അറ്റന്‍ഡന്‍ററും മൊബൈല്‍ യൂണിറ്റില്‍ ഉണ്ടാവും. ഇവരുടെ തെരഞ്ഞെടുപ്പ് നടപടികള്‍ പൂര്‍ത്തിയായി. ചവറ ബ്ലോക്കിലെ വാഹനം അരിനല്ലൂര്‍ മൃഗാശുപത്രിയിലും ഇത്തിക്കരയിലെ വാഹനം ചാത്തന്നൂര്‍ മൃഗാശുപത്രിയിലും കൊട്ടാരക്കര യൂണിറ്റ് കുഴിക്കാട് വെറ്ററിനറി ഡിസ്പന്‍സറിയിലുമാണ് ക്യാമ്പ് ചെയ്യുക. വൈകുന്നേരം ആറ് മുതല്‍ രാവിലെ അഞ്ച് വരെയാണ് പ്രവര്‍ത്തനം. വാഹനത്തില്‍ സജ്ജമാക്കിയ ക്യൂ ആര്‍ കോഡ് സ്‌കാന്‍ ചെയ്ത് കര്‍ഷകര്‍ക്ക് ബില്‍ അടയ്ക്കാം. നിലവില്‍ ചടയമംഗലം, അഞ്ചല്‍ ബ്ലോക്കുകളില്‍ മൊബൈല്‍ യൂണിറ്റുകള്‍ പ്രവര്‍ത്തിക്കുന്നുണ്ട്. ജില്ലാ വെറ്ററിനറി കേന്ദ്രത്തില്‍ പുതിയ സര്‍ജറി യൂണിറ്റും ഇതോടൊപ്പം ആരംഭിക്കുമെന്ന് മന്ത്രി പറഞ്ഞു. ബ്ലോക്ക് പഞ്ചായത്തുകള്‍ പദ്ധതി വിഹിതമുപയോഗിച്ച് മരുന്നുകള്‍ കൂടി വാങ്ങി നല്‍കുന്നത് കര്‍ഷകര്‍ക്ക് ഏറെ ആശ്വാസകരമാകുമെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് ഡോ. പി. കെ. ഗോപന്‍ അധ്യക്ഷനായി. സുജിത്ത് വിജയന്‍പിള്ള എംഎല്‍എ, ചവറ ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, കൊട്ടാരക്കര ബ്ലോക്ക് പഞ്ചായത്ത് പ്രസിഡന്‍റ് എ. അഭിലാഷ്, നഗരസഭാ കൗണ്‍സിലര്‍ ബി.ഷൈലജ, ഡോ. ഡി. ഷൈന്‍കുമാര്‍, ഡോ. എ.എല്‍. അജിത്, ഡോ. എസ്. പ്രമോദ്, ഡെപ്യൂട്ടി ഡയറക്ടര്‍ ഡോ. ഷീബ.പി.ബേബി, ഡോ. ആര്‍. ബിന്ദു തുടങ്ങിയവര്‍ പ്രസംഗിച്ചു.

നന്തൻകോട് കൂട്ടക്കൊല: വിധി തിങ്കളാഴ്ച

തിരുവനന്തപുരം: നന്തൻകോട് കൂട്ടക്കൊല കേസിന്‍റെ വിധി പറയുന്നത് തിങ്കളാഴ്ചയിലേക്കു മാറ്റി. തിരുവനന്തപുരം ആറാം അഡീഷണൽ സെഷൻസ് കോടതിയാണുവിധി പറയുക. 2017 ഏപ്രിൽ എട്ടിനാണ് കേഡൽ ജിൻസണ്‍ രാജയുടെ മാതാപിതാക്കളും സഹോദരിയും ബന്ധുവും അതിദാരുണമായി കൊല്ലപ്പെട്ടത്. മുഖ്യപ്രതിയായ കേഡലിനെതിരേ കൊലപാതകം, തെളിവ് നശിപ്പിക്കൽ, മാരകായുധങ്ങൾ ഉപയോഗിച്ച് പരിക്കേൽപ്പിക്കുക, വീട് നശിപ്പിക്കൽ എന്നീ ഇന്ത്യൻ ശിക്ഷാ നിയമത്തിലെ വകുപ്പുകളാണ് പ്രതിക്കെതിരെ ചുമത്തിയിട്ടുണ്ട്. ക്ലിഫ് ഹൗസിനു സമീപത്തുള്ള ബെയ്ൻസ് കോന്പൗണ്ടിലെ 117ാം നന്പർ വീട്ടിലാണ് പ്രഫ. രാജ തങ്കം, ഭാര്യ ഡോ. ജീൻ പത്മ, മകൾ കരോലിൻ, ബന്ധു ലളിത എന്നിവരെ കൊല്ലപ്പെട്ട നിലയിൽ കണ്ടെത്തിയത്.

സംസ്ഥാന മന്ത്രിസഭാ വാര്‍ഷികാഘോഷം: മേള സൗജന്യ സേവനങ്ങളുടെ കേന്ദ്രമാകും

കൊല്ലം: സംസ്ഥാന മന്ത്രിസഭാ വാര്‍ഷികാഘോഷ ഭാഗമായി ആശ്രാമം മൈതാനത്ത് 11 ന് തുടങ്ങി 17 വരെ നടക്കുന്ന എന്‍റെ കേരളം പ്രദര്‍ശന - വിപണന മേളയ്‌ക്കൊപ്പം വിവിധ സര്‍ക്കാര്‍ സേവനങ്ങള്‍ സൗജന്യമായി ലഭിക്കും. ആധാര്‍ എന്‍റോള്‍മെന്‍റ് അപ്‌ഡേഷന്‍, ആധാര്‍ കാര്‍ഡ് പ്രിന്‍റിംഗ്, അഞ്ച് വയസിൽ താഴെയുള്ള കുട്ടികളുടെ ആധാര്‍ രജിസ്ട്രേഷന്‍, സംശയ നിവാരണം, പ്രമേഹം, രക്താദിമര്‍ദം, ഹീമോഗ്ലോബിന്‍ പരിശോധന, ന്യൂട്രീഷ്യന്‍ കൗണ്‍സിലിംഗ്, മാനസികാരോഗ്യം നിലനിര്‍ത്തുന്നതിനുള്ള പ്രവര്‍ത്തനങ്ങള്‍, ഇ-ഹെല്‍ത്ത് സേവനങ്ങള്‍, മണ്ണ്പരിശോധന, തുടങ്ങിയ ഒട്ടേറെ സേവനങ്ങളാണ് ഒരിടത്തുതന്നെ സൗജന്യമായി ലഭിക്കുക. കൃഷി-മൃഗസംരക്ഷണം, പോലീസ്, ഫയര്‍ ആൻഡ് റെസ്‌ക്യൂ, എക്‌സൈസ്, വനം, പൊതുമരാമത്ത്, കിഫ്ബി, വാട്ടര്‍ അഥോറിറ്റി, ജലസേചനം, കെ എസ് ഇ ബി, കെ-ഫോണ്‍, വ്യവസായം, കയര്‍, തൊഴില്‍, ലോട്ടറി, ജി എസ് ടി, റവന്യൂ തുടങ്ങിയ വകുപ്പുകളുടെ തീം സ്റ്റാളുകളും സജ്ജമാക്കും. ഇതുവഴി വകുപ്പുകളുടെ പ്രവര്‍ത്തനപരമ്പര തിരിച്ചറിയാനാണ് അവസരം ഒരുക്കുന്നത്. ഇന്‍ഫര്‍മേഷന്‍ - പബ്ലിക് റിലേഷന്‍സ് വകുപ്പിന്‍റെ ഏകോപനത്തില്‍ കിഫ്ബിയുടെ പങ്കാളിത്തത്തോടെ ജില്ലാ ഭരണകൂടവും സര്‍ക്കാരിന്‍റെ വിവിധ വകുപ്പുകള്‍, മിഷനുകള്‍, ബോര്‍ഡുകള്‍, കോര്‍പ്പറേഷനുകള്‍ എന്നിവയും ചേര്‍ന്നാണ് പ്രദര്‍ശനം ഒരുക്കുന്നത്. സര്‍ക്കാര്‍ വകുപ്പുകളുടെയും ഏജന്‍സികളുടെയും തീം - സേവന സ്റ്റാളുകള്‍, വ്യവസായം, സഹകരണം, കുടുംബശ്രീ തുടങ്ങിയ വകുപ്പുകളുടെ നേതൃത്വത്തിലുള്ള വിപണനസ്റ്റാളുകള്‍, കുടുംബശ്രീ ഏകോപിപ്പിക്കുന്ന ഫുഡ്‌കോര്‍ട്ട്, വിവിധസമ്മേളനങ്ങള്‍ക്കും സെമിനാറുകള്‍ക്കും കലാപരിപാടികള്‍ക്കുമുള്ള വിശാലമായവേദി എന്നിങ്ങനെയാണ് പ്രദര്‍ശനത്തിനു ഒരുക്കിയിട്ടുളളത്. സ്റ്റാളുകള്‍ ഇന്ന് മുതല്‍ സജ്ജമാക്കും.

സിവില്‍ സ്റ്റേഷനിൽ അധിക സുരക്ഷ

കൊല്ലം: സര്‍ക്കാര്‍ സ്ഥാപനങ്ങളെ കേന്ദ്രീകരിച്ചുള്ള ഭീഷണി സന്ദേശങ്ങളുടെ പശ്ചാത്തലത്തില്‍ സിവില്‍ സ്റ്റേഷനിലെ സുരക്ഷാക്രമീകരണങ്ങള്‍ കൂടുതല്‍ വര്‍ധിപ്പിക്കുമെന്ന് ജില്ലാ കളക്ടര്‍ എന്‍. ദേവിദാസ്. സുരക്ഷാസംവിധാനങ്ങള്‍ വിലയിരുത്തുന്നതിനായി ചേര്‍ന്ന ജില്ലാതല ഉദ്യോഗസ്ഥരുടെ യോഗത്തില്‍ വിവിധ വകുപ്പുകള്‍ക്ക് ആവശ്യമായ നിര്‍ദ്ദേശങ്ങളും കളക്ടർ നല്‍കി. ദുരന്തനിവാരണ വകുപ്പ് നടത്തിയ സുരക്ഷാഓഡിറ്റിന്‍റെ അടിസ്ഥാനത്തില്‍ കണ്ടെത്തിയ പ്രശ്‌നങ്ങളും പരിഹാരമാര്‍ഗങ്ങളും യോഗത്തിൽ ചര്‍ച്ച ചെയ്തു. സിവില്‍ സ്റ്റേഷനിൽ പൊതുജനങ്ങള്‍ക്ക് അസൗകര്യമാകാത്ത നിയന്ത്രണങ്ങളാണുണ്ടാകുക. കളക്‌ട്രേറ്റിന്‍റെ മുന്‍വശത്ത് പോലീസ് ഔട്ട് പോസ്റ്റ് സ്ഥാപിക്കും. മറ്റുസൗകര്യങ്ങള്‍ ഒരുക്കുന്നതിന് ബന്ധപ്പെട്ട വകുപ്പുകള്‍ സംയുക്ത പരിശോധന നടത്തും. എയ്ഡ്‌പോസ്റ്റ് സ്ഥാപിക്കുന്നതിനുള്ള സാഹചര്യമൊരുക്കാന്‍ പൊതുമരാമത്ത് വകുപ്പിന് ചുമതല നല്‍കി. കളക്ടറേറ്റ് കേന്ദ്രീകരിച്ച് 30 സിസിടിവി കാമറകളും കോടതി പരിസരത്ത് 20 സിസിടിവി കാമറകളും സ്ഥാപിച്ചിട്ടുണ്ട്. പ്രവേശനകവാടത്തിന്‍റെ ദൃശ്യപരിധി ഉറപ്പാക്കി കാമറ സ്ഥാപിക്കും. കോടതി ഉള്‍പ്പെടെ 55 ഓഫീസുകളാണ് സിവില്‍ സ്റ്റേഷനില്‍ പ്രവര്‍ത്തിക്കുന്നത്. മാലിന്യനിര്‍മാര്‍ജനം മാനദണ്ഡങ്ങള്‍ പാലിച്ചു നടപ്പാക്കണം. കളക്ടറേറ്റ് പരിസരത്ത് വിവിധ ഇടങ്ങളിലായി കൂട്ടിയിട്ടിരിക്കുന്ന ഉപയോഗശൂന്യമായ ഫര്‍ണിച്ചറുകള്‍, അലമാര, ഷെല്‍ഫ് തുടങ്ങിയവ ഉടന്‍നീക്കും. ഇലക്ട്രോണിക് മാലിന്യങ്ങള്‍ ഉള്‍പ്പെടെ ക്ലീന്‍ കേരള കമ്പനിക്ക് കൈമാറും. ദീര്‍ഘകാലമായി നിര്‍ത്തിയിട്ടിരിക്കുന്ന വാഹനങ്ങളും സിവില്‍ സ്റ്റേഷനിൽ നിന്നും മാറ്റും. അഗ്നിസുരക്ഷാ വകുപ്പ് നടത്തിയ ഫയര്‍ സേഫ്റ്റി ഓഡിറ്റ് റിപ്പോര്‍ട്ട് പ്രകാരമുള്ള ക്രമീകരണങ്ങള്‍ ഏര്‍പ്പെടുത്താന്‍ വകുപ്പ് മേധാവികള്‍ക്ക് നിര്‍ദേശം നല്‍കി. അഗ്നിശമന ഉപകരണങ്ങള്‍ നിര്‍ബന്ധമായും സ്ഥാപിക്കണമെന്നും യഥാസമയം റീഫില്‍ ചെയ്ത് സൂക്ഷിക്കണമെന്നും നിര്‍ദ്ദേശിച്ചു. എമര്‍ജന്‍സി എക്‌സിറ്റില്‍ സഞ്ചാരം തടസപ്പെടുത്തുന്ന രീതിയില്‍ വസ്തുക്കള്‍ സ്ഥാപിക്കരുതെന്നും നിർദേശിച്ചിട്ടുണ്ട്. ജില്ലാ കളക്ടറുടെ ചേബറില്‍ ചേര്‍ന്ന യോഗത്തില്‍ എഡിഎം ജി. നിര്‍മല്‍കുമാര്‍, സബ് കളക്ടര്‍ നിഷാന്ത് സിഹാര, ഡെപ്യൂട്ടി കളക്ടര്‍മാര്‍, ജില്ലാതല ഉദ്യോഗസ്ഥര്‍, കോടതി ജീവനക്കാര്‍ തുടങ്ങിയവര്‍ പങ്കെടുത്തു.

കാപ്പാ പ്രകാരം യുവാവ് അറസ്റ്റില്‍

പാങ്ങോട്. കാപ്പ നിയമ പ്രകാരം നിരവധി കേസുകളിലെ പ്രതി അറസ്റ്റില്‍. ഭരതന്നൂര്‍ കാഞ്ചിനട കൊച്ചാലുംമൂട് തോട്ടിന്‍പുറത്തു വീട്ടില്‍ ഇര്‍ഷാദാണ് (45) അറസ്റ്റിലായത്. തിരുവനന്തപുരം ജില്ലയിലെ പൂന്തുറ, കിളിമാനൂര്‍, ചിറയിന്‍കീഴ് വെഞ്ഞാറമൂട്, പാലോട്, കരമന, വലിയമല പോലീസ് സ്റ്റേഷനുകളിലും, കായംകുളം പോലീസ് സ്റ്റേഷനുകളിലുമായി ഇരുപതോളം കേസുകളിലെ പ്രതിയാണിയാള്‍. കരമന പോലീസ് സ്റ്റേഷന്‍ പരിധിയില്‍ പണമിടപാട് സ്ഥാപനത്തില്‍ മുക്കുവണ്ടം പണയംവച്ചു പണം തട്ടിയതിനെത്തുടര്‍ന്നു രജിസ്റ്റര്‍ ചെയ്തകേസില്‍ ജാമ്യത്തിലായിരുന്നു. ഇതിനിടയിലാണ് ജില്ലാ കളക്ടറുടെ കാപ്പ ഉത്തരവുണ്ടാവുന്നത്. തുടര്‍ന്നു പോലീസ് നടത്തിയ അന്വേഷണത്തില്‍ കണ്ടെത്തിയെങ്കിലും ഓടി രക്ഷപ്പെട്ടു. പാങ്ങോട് എസ്എച്ച്ഒയുടെ നേതൃത്വത്തിലുള്ള പോലീസ് സംഘം പിന്തുടര്‍ന്നു പിടികൂടുകയും ആറു മാസത്തേക്ക് തിരുവനന്തപുരം സെന്‍ട്രല്‍ ജയിലില്‍ പാര്‍പ്പിക്കുന്നതിന് എത്തിക്കുകയും ചെയ്തു.

യൂത്ത് കോൺഗ്രസ് കാല്‍നട പ്രചരണ ജാഥ

വെള്ളറട: അഴിമതിക്കും വര്‍ഗീയതയ്ക്കും ലഹരി മാഫിയകൾക്കുമെതിരെ യൂത്ത് കോൺഗ്രസ് ജില്ലാ പ്രസിഡന്‍റ് നേമം ഷജീറിന്‍റെ നേതൃത്വത്തിൽ നടത്തുന്ന കാല്‍നട പ്രചാരണ ജാഥ വെള്ളറടയില്‍ പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്തു. എല്‍ഡിഎഫ് ഭരണം ആരംഭിച്ചതു മുതല്‍ ലഹരി മാഫിയകള്‍ പ്രദേശമാകെ ആക്രമണങ്ങള്‍ അഴിച്ചുവിടുന്നു. കോട്ടയം തിരുവാതില്‍ക്കല്‍ ഭാര്യയെയും ഭര്‍ത്താവിനെയും ലഹരി മാഫിയ വെട്ടിക്കൊന്നു. വയനാട് വെറ്റിനറി കോളജില്‍ സിദ്ധാര്‍ഥിനെ മയക്കുമരുന്നു മാഫിയകള്‍ കൊലപ്പെടുത്തി. നിരവധി ആക്രമണ സംഭവങ്ങളാണ് എല്‍ഡിഎഫ് ഭരണം ആരംഭിച്ചത് മുതല്‍ ഇതുവരെയും നടന്നുകൊണ്ടിരിക്കുന്നതെന്നും അദ്ദേഹം ചൂണ്ടിക്കാട്ടി. എംഎല്‍എമാരായ എം. വിന്‍സന്‍റ്, രാഹുൽ മാങ്കൂട്ടത്തിൽ, മുൻ എംഎൽഎ എ.ടി. ജോര്‍ജ്, മര്യാപുരം ശ്രീകുമാര്‍, നെയ്യാറ്റിന്‍കര സനല്‍, ഡോ. ആര്‍. വത്സലന്‍, ബ്രഹ്മയിന്‍ ചന്ദ്രന്‍, അന്‍സജിതാ റസല്‍, എ.കെ. ശശി, എല്‍.വി. അജയകുമാര്‍, പി. എ. അബ്രഹാം, സോമന്‍കുട്ടി നായര്‍, പാറശാല സുധാകരന്‍, കൊറ്റാമം വിനോദ്, ഗോപു, ആര്‍.ആര്‍. അരുണ്‍, അഡ്വ. ജോണ്‍, അഡ്വ. ഗിരീഷ് കുമാര്‍, കെ. ദസ്തഗീര്‍, ഐര സുരേന്ദ്രന്‍, മാരായമുട്ടം സുരേഷ്, അഡ്വ. അനൂപ്, ജോബിന്‍, കൃഷ്ണകുമാര്‍, സതീഷ് കോട്ടുകോണം, ശ്യാം വെള്ളറട, അജിന്‍, ഗോപന്‍, വിജയശ്രീ, എം. രാജ് മോഹന്‍, കാനക്കോട് അജയന്‍, കോറ്റാമം ലിജിത്, മലയില്‍ രാധാകൃഷ്ണന്‍, കെ.ജി. മംഗള്‍ദാസ, ഷിജുതടത്തില്‍ തുടങ്ങി നിരവധി നേതാക്കള്‍ പ്രസംഗിച്ചു. വെള്ളറടയില്‍ സൈനികര്‍ക്ക് ഐക്യദാര്‍ഢ്യം പ്രഖ്യാപിച്ച് അഭിവാദ്യങ്ങള്‍ അര്‍പ്പിച്ച ശേഷമാണ് യോഗ നടപടികള്‍ ആരംഭിച്ചത്. വെള്ളറടയില്‍ നടന്ന യോഗം ഉദ്ഘാടനം ചെയ്തശേഷം കാല്‍നട പ്രചാരണ ജാഥയുടെ ഫ്‌ലാഗ് ഓഫ് കര്‍മവും വി.ഡി. സതീശന്‍ നിർവഹിച്ചു.

സർക്കാർ പ്രസുകൾ അടച്ചുപൂട്ടൽ ഭീഷണിയിൽ: ജി.സുബോധൻ

തിരുവനന്തപുരം: ഇടതുഭരണത്തിൽ സർക്കാർ പ്രസുകൾ അടച്ചുപൂട്ടാനും തസ്തികകൾ മരവിപ്പിക്കാനുമുള്ള ഗൂഢനീക്കം നടക്കുന്നതായി കെപിസിസി ജനറൽ സെക്രട്ടറി ജി. സുബോധൻ പ്രസ്താവിച്ചു. സർക്കാർ പ്രസുകൾ നിർത്തലാക്കുന്നതിന്‍റെ ഭാഗമായി അച്ചടി ജോലികൾ സ്വകാര്യ പ്രസുകൾക്ക് എം പാനൽ ചെയ്ത് വിട്ടുകൊടുത്തിരുന്നു. ഏറ്റവും ഒടുവിൽ പിഎസ്‌സി പരീക്ഷയുടെ ഒഎംആർ ഷീറ്റ് അച്ചടി പോലും സർക്കാർ പ്രസിൽനിന്നും മാറ്റി ഉത്തരവായിരിക്കുന്നു. രഹസ്യ സ്വഭാവമുള്ള പല അച്ചടി ജോലികളും സർക്കാർ പ്രസിൽനിന്ന് മാറ്റിയതിനാൽ സുതാര്യത നഷ്ടപ്പെട്ടിരിക്കുന്നു. ദിവസേന മൂന്നു ഷിഫ്റ്റുകൾ പ്രവർത്തിപ്പിച്ചിരുന്ന തിരുവനന്തപുരത്തെ സ്റ്റാമ്പ് മാനുഫാക്ടറി പ്രസിൽ ഉൾപ്പെടെ ഇപ്പോൾ ഒരു ജനറൽ ഷിഫ്റ്റ് മാത്രമാണ് പ്രവർത്തിപ്പിക്കുന്നത്. തനിക്കു കീഴിൽ ഇങ്ങിനെയൊരു വകുപ്പുതന്നെ ഉണ്ടോയെന്ന് പിണറായി വിജയന് അറിയില്ലെന്നും അദ്ദേഹം കുറ്റപ്പെടുത്തി. കേരള ഗവ. പ്രസ് വർക്കേഴ്സ് കോൺഗ്രസ് ഐഎൻടിയുസി കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. യൂണിറ്റ് പ്രസിഡന്‍റ് വഞ്ചിയൂർ രാധാകൃഷ്ണൻ അധ്യക്ഷത വഹിച്ചു. അനിൽ കരമന, വൈ. സന്തോഷ്,സന്തോഷ് കുമാർ, വി. ബി ജോൺ, റജി വിത്സൻ, സീന പോൾ, ഷാജി, നുജും, അഞ്ചു എസ്. വിൽഫ്രഡ്, കുമാരി ജൈല, അമൃത എന്നിവർ പ്രസംഗിച്ചു. സർവീസിൽനിന്നു വിരമിക്കുന്ന സി. കുമാരി ജൈലയെ ആദരിച്ചു.

വസ്തു വാങ്ങിയിട്ട് പതിനഞ്ചുവർഷം : പൊതുശ്മശാനം ഇന്നും സ്വപ്നങ്ങളിൽ

കുറ്റിച്ചൽ: സ്ഥലം വാങ്ങി, ജില്ലാ പഞ്ചായത്ത് ശ്രമങ്ങളും നടത്തി; പക്ഷേ കുറ്റിച്ചലിലെ പൊതുശ്മശാനം ഇന്നും സ്വപ്നം മാത്രമായി തുടരുന്നു. പഞ്ചായത്ത് പരിധിയിൽ ആരെങ്കിലും മരിച്ചാൽ ഇപ്പോഴും മൃതദേഹം സംസ്‌കരിക്കണമെങ്കിൽ വേറെ വഴി തേടണം. കുറ്റിച്ചൽ പഞ്ചായത്തിലെ കോട്ടൂരിൽ ചിലന്തിക്കുഴിയിൽ 50 സെന്‍റ് ഭൂമി പൊതുശ്മശാനത്തിനായി പഞ്ചായത്ത് വാങ്ങിയിട്ടിട്ട് 15 വർഷത്തിലധികമായി. ചിലന്തിക്കുഴിയിലെ ഭൂമിയിലേക്കു വാഹനമെത്തുന്ന വഴിയില്ല എന്നതാണ് പ്രധാന പ്രശ്നം. ഇപ്പോഴുള്ള നടവഴിയിലൂടെ മൃതദേഹങ്ങൾ സംസ്‌കരിക്കാനായി എത്തിക്കണമെങ്കിൽ വളരെ ദൂരം ചുമക്കണം. വഴിയോ, ചുറ്റുമതിലോ, അത്യാവശ്യ സൗകര്യങ്ങളോ ഇല്ലാത്തതിനാൽ അടുത്തുള്ള ഒരു കോളനിക്കാരൊഴികെ മറ്റാരും ഇവിടേക്ക് മൃതദേഹവുമായി എത്താറില്ല. ചുറ്റുമതിൽ ഇല്ലാത്തതിനാൽ മൃതദേഹം സംസ്‌കരിച്ചുകഴിഞ്ഞാൽ കുഴിമാടങ്ങൾ കാട്ടുപന്നി നശിപ്പിക്കുന്നതും പതിവാണ്. കുറ്റിച്ചൽ പഞ്ചായത്തിൽ ശ്മശാനം ഇല്ലാത്തതിനാൽ കോവിഡ് വ്യാപനകാലത്ത് വീട്ടുമുറ്റത്തും വീടിന്‍റെ ഭാഗം പൊളിച്ചും അയൽക്കാരന്‍റെ പറമ്പിലുമൊക്കെ ശവസംസ്‌കാരം നടത്തിയ സംഭവങ്ങളുമുണ്ടായിരുന്നു. പഞ്ചായത്തിന്‍റെ അവഗണനയാണ് പദ്ധതി നടപ്പാക്കാൻ വൈകുന്നതെന്ന് ആക്ഷേപുണ്ട്. മാറനല്ലൂർ പഞ്ചായത്തിൽ നിലവിൽ ഒരു വൈദ്യുതിശ്മശാനമുണ്ട്. ഈ മാതൃകയിൽ ത്രിതല പഞ്ചായത്തുകളുടെയും സ്ഥലം എംഎൽഎയുടെയും ഫണ്ടുകൾ ഉപയോഗിച്ചാൽ വഴിയും മികച്ച സൗകര്യങ്ങളുമുള്ള ശ്മശാനം ഇവിടെ ഒരുക്കാനാകും. 2010ൽ ജില്ലാപഞ്ചായത്ത് ഇതിനായി ചില ശ്രമങ്ങൾ ആരംഭിച്ചിരുന്നെങ്കിലും തുടർനടപടിയുണ്ടായില്ല. സമീപത്തെ പല പഞ്ചായത്തുകളിലും ശ്മശാനം ഒരുക്കാൻ ഭൂമി കണ്ടെത്താൻ ബുദ്ധിമുട്ടുമ്പോൾ ഇവിടെ ഉള്ള ഭൂമി ഉപയോഗപ്പെടുത്താൻ ശ്രമം ഉണ്ടാകുന്നില്ലെന്നാണ് ആക്ഷേപം.

വലയിൽ കുടുങ്ങിയ പെരുന്പാന്പിനെ വനത്തിൽ വിട്ടു

കുളത്തൂപ്പുഴ: ജനവാസ മേഖലയിലെ കൃഷിയിടത്തിൽ കാട്ടുപന്നികളെ പ്രതിരോധിക്കാനായി വേലിയിൽ മറച്ച പ്ലാസ്റ്റിക് വലയിൽ കുരുങ്ങിയ പെരുമ്പാമ്പിനെ ആർ ആർ ടി സംഘമെത്തി പിടികൂടി. കുളത്തൂപ്പുഴ ചോഴിയക്കോട് മിൽപ്പാലം സലീം മൽസിലിൽ അബ്ദുൽ സലാമിന്‍റെ ഉടമസ്ഥയിലുള്ള റബർ തോട്ടത്തിന്‍റെ വേലിയിൽ കാട്ടു മൃഗങ്ങൾ കടക്കാതിരിക്കാനായി സ്ഥാപിച്ച പ്ലാസ്റ്റിക് വലയിലാണ് പാമ്പ് കുടുങ്ങിയത്. രാവിലെ റബർ തോട്ടത്തിൽ മരങ്ങൾ ടാപ്പിംഗ് ചെയ്യാൻ എത്തിയ തൊഴിലാളികളാണ് പാമ്പിനെ കണ്ടത്. കുളത്തപ്പുഴ റെയ്ഞ്ച് ഓഫീസറെ വിവരം അറിയിച്ചതിനെതുടർന്ന് അവർ പാലോട് വനം ആർ ആർ ടി സെക്ഷൻ ഫോറസ്റ്റ് ജീവനക്കാരെ വിവരം അറിയിച്ചു. ബാബു, വിനോദ്, മനീഷ് , ശംഖിലി സെക്ഷൻ ഫോറസ്റ്റ് ഓഫീസർ അജിത് കുമാർ, ബീറ്റ് ഫോറസ്റ്റ് ഓഫീസർ മേരിദാസ്, വാച്ചർമാരായ ശശാങ്കൻ, അനുമോൻ എന്നിവരുടെ നേതൃത്വത്തിലെത്തിയ സംഗം വലമുറിച്ച് പാമ്പിനെ പിടികൂടി ശംഖിലി വനമേഖലയിൽവിടുകയായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]