ADVERTISEMENT

ADVERTISEMENT

എൻജിനീയേഴ്സ് ദിനത്തിൽ രക്തദാന ക്യാന്പ് നടത്തി

പെരിന്തൽമണ്ണ: ദേശീയ എൻജിനീയേഴ്സ് ദിനത്തോടനുബന്ധിച്ച് ലെൻസ്ഫെഡ് ഏരിയ കമ്മിറ്റി പെരിന്തൽമണ്ണ ജില്ലാ ആശുപത്രിയിൽ രക്തദാന ക്യാന്പ് നടത്തി.

ഡോ. കെ. സാലിം (മെഡിക്കൽ ഓഫീസർ, ബ്ലഡ് ബാങ്ക്, ജില്ലാ ഹോസ്പിറ്റൽ, പെരിന്തൽമണ്ണ ) ഉദ്ഘാടനം ചെയ്തു. ഏരിയ പ്രസിഡന്‍റ് അബ്ദുൾ അക്ബർ, സെക്രട്ടറി, മോഹൻദാസ് ട്രഷറർ മണികണ്ഠൻ, സംസ്ഥാന സമിതി അംഗം പി. ഹാരിസ്, ജില്ലാ സമിതി അംഗങ്ങളായ സേതുമാധവൻ, സിറാജ് എന്നിവർ പ്രസംഗിച്ചു.

ADVERTISEMENT

രാത്രിയിൽ റോഡ് കീഴടക്കി കാട്ടാനകൾ

നിലന്പൂർ: ഇടിവണ്ണ - മൂലേപ്പാടം നിവാസികൾ കാട്ടാന ഭീതിയിൽ. ദിവസം തോറും നശിപ്പിക്കുന്നത് ആയിരങ്ങളുടെ കാർഷിക വിളകൾ. ചാലിയാർ പഞ്ചായത്തിലെ മലയോര ഗ്രാമങ്ങളിലാണ് കൃഷിക്കും മനുഷ്യജീവനും ഭീതി വിതച്ച് കാട്ടാനകൾ നിലയുറപ്പിക്കുന്നത്. ഒരാഴ്ചക്കുള്ളിൽ പ്രദേശത്തെ 20 ലധികം കർഷകരുടെ കൃഷികളാണ് കാട്ടാനകൾ നശിപ്പിച്ചത്. വീടുകളുടെ മതിലുകളും സോളാർ വൈദ്യുത വേലികളും തകർക്കുകയാണ്. ഇന്നലെ പുലർച്ചെയാണ് റിട്ടയേർഡ് ജവാനും എരഞ്ഞിമങ്ങാട് വേട്ടേക്കോട് സ്വദേശിയുമായ കല്ലുവെട്ടിപറന്പിൽ പത്മനാഭന്‍റെ ഇടിവണ്ണ എച്ച് ബ്ലോക്കിലെ കൃഷിയിടത്തിൽ കാട്ടാനകൾ വ്യാപക നാശം വിതച്ചത്. കായ്ഫലമുള്ള 11 തെങ്ങുകളും അറുപതിലേറെ കൂലച്ച വാഴകൾ, ജാതി മരങ്ങൾ തുടങ്ങിയവയാണ് നശിപ്പിച്ചത്. കഴിഞ്ഞ രണ്ട് ദിവസങ്ങളിലായി തന്‍റെ കൃഷിയിടം തരിശ് നിലമാക്കി മാറ്റിയിരിക്കുകയാണെന്നും പത്്മനാഭൻ പറയുന്നു. ഇടിവണ്ണ എച്ച് ബ്ലോക്ക് മുതൽ മൂലേപ്പാടം പാലം വരെ രാത്രിയായാൽ കാട്ടാനകൾ എത്തുകയാണ്. വനം വകുപ്പ് അടിയന്തരമായി ഇടപെടണമെന്നും കർഷകർക്ക് കൃഷി ചെയ്ത് ജീവിക്കാനും ഭയമില്ലാതെ വീടുകളിൽ കിടന്നുറങ്ങാനും അവസരം ഒരുക്കണമെന്ന് ചാലിയാർ ഗ്രാമപഞ്ചായത്ത് മുൻ അംഗവും വനിതാ കർഷകയുമായ അച്ചാമ്മ ജോസഫ് പാലാത്ത് പറഞ്ഞു. നിലന്പൂർ - നായാടംപൊയിൽ മലയോര ഹൈവേയോട് ചേർന്ന് കിടക്കുന്ന സ്ഥലങ്ങളിലാണ് കാട്ടാനകൾ എത്തുന്നത്. കായ്ഫലമുള്ള തെങ്ങുകൾ ഉൾപ്പെടെ നശിപ്പിക്കുന്നതിനാൽ കർഷകർക്ക് ഓരോ ദിവസവും വലിയ നഷ്ടമാണുണ്ടാക്കുന്നത്. പത്മനാഭന്‍റെ കൃഷിയിടത്തിൽ നിറയെ നാളികേരവുമായി നിന്ന തെങ്ങുകളാണ് നശിപ്പിച്ചത്. ഒരാഴ്ചക്കുള്ളിൽ ഇടിവണ്ണ മൂലേപ്പാടം ഭാഗങ്ങളിലായി കാട്ടാനകൾ നശിപ്പിച്ചത് നൂറിലേറെ തെങ്ങുകളും 1500 ലേറെ വാഴകളും 600 ലേറെ കപ്പകളും മറ്റ് കാർഷിക വിളകളുമാണ്. രാത്രികാലങ്ങളിൽ മേഖലയിൽ മുഴുവൻ സമയ പട്രോളിംഗ് ഏർപ്പെടുത്തണമെന്നും അച്ചാമ്മ ജോസഫ് ആവശ്യപ്പെട്ടു. മൂവായിരം വനമേഖലയിൽ നിന്ന് കുറുവൻപുഴ കടന്നാണ് കാട്ടാനകൾ കൃഷിയിടങ്ങളിലേക്ക് എത്തുന്നത്. പന്തീരായിരം ഉൾവനത്തിലേക്ക് കാട്ടാനകളെ കയറ്റിവിട്ടാൽ മാത്രമേ കർഷകരുടെ പ്രശ്നങ്ങൾ പരിഹരിക്കാനാകൂ. പന്തീരായിരം വനമേഖലയോട് ചേർന്ന് വനം വകുപ്പ് സ്ഥാപിച്ചിരുന്ന വൈദ്യുത സോളാർ വേലികൾ പ്രവർത്തനരഹിതമാണ്.

റേഷൻ കടകൾ കേന്ദ്രീകരിച്ചുള്ളവിജിലൻസ് സമിതികൾ യോഗം ചേരണം: ഭക്ഷ്യ കമ്മീഷൻ

മലപ്പുറം: പൊതുവിതരണ സന്പ്രദായം താഴെക്കിടയിൽ ഫലപ്രദമായി നടക്കുന്നുവെന്ന് ഉറപ്പു വരുത്താൻ റേഷൻ കടകളുടെ തലത്തിൽ രൂപീകരിച്ച വിജിലൻസ് കമ്മിറ്റികൾ കൃത്യമായ ഇടവേളകളിൽ യോഗം ചേരണമെന്ന് സംസ്ഥാന ഭക്ഷ്യ കമ്മീഷൻ അംഗം സബീത ബീഗം. മലപ്പുറം കളക്ടറേറ്റ് കോണ്‍ഫറൻസ് ഹാളിൽ നടത്തിയ ജില്ലാതല ഭക്ഷ്യ കമ്മീഷൻ സിറ്റിംഗ് ഉദ്ഘാടനം ചെയ്ത് സംസാരിക്കുകയായിരുന്നു അവർ. പതിനഞ്ചു ദിവസത്തിനകം ഈ കമ്മിറ്റികൾ ചേരുകയും റിപ്പോർട്ട് ലഭ്യമാക്കുകയും വേണം. പൊതുവിതരണ സന്പ്രദായത്തിലെ പരാതികൾ താഴെക്കിടയിൽ നിന്നു തന്നെ പരിഹരിച്ച് പോകണം. അതിനായി രൂപീകരിച്ച റേഷൻകടതല വിജിലൻസ് കമ്മിറ്റികൾ കൃത്യമായി യോഗം ചേരുകയും പ്രവർത്തനങ്ങൾ വിലയിരുത്തുകയും വേണം. ഐസിഡിഎസ് മുഖേന നടപ്പാക്കുന്ന ഗർഭിണികൾക്കും മൂന്നു വയസുവരെയുള്ള കുഞ്ഞുങ്ങൾക്കും നൽകിവരുന്ന പോഷകാഹാരപദ്ധതി, സ്കൂളുകളിലെ ഉച്ചഭക്ഷണ പദ്ധതി, പൊതുവിതരണ സന്പ്രദായം എന്നിവ ജില്ലയിൽ കുറ്റമറ്റ രീതിയിലാണ് നടക്കുന്നതെന്ന് ബന്ധപ്പെട്ട ഉദ്യോഗസ്ഥർ ഉറപ്പുവരുത്തണമെന്ന് സബീത ബീഗം നിർദേശിച്ചു. അങ്കണവാടികളിലും സ്കൂളുകളിലും പുതുതായി ഏർപ്പെടുത്തിയ ഭക്ഷണമെനു കൃത്യമായി നടപ്പാക്കുന്നുണ്ടെന്നും സർക്കാർ നിർദേശങ്ങൾ പാലിക്കുന്നുണ്ടെന്നും ഉറപ്പാക്കണം. 2013ലെ ഭക്ഷ്യ സുരക്ഷാ നിയമം കൃത്യമായി ജില്ലയിൽ നടപ്പാക്കുന്നുവെന്ന് ഉറപ്പുവരുത്തണം. ഇവ സംബന്ധിച്ച പരാതികൾ ഡിജിആർഒ (ജില്ലാതല പരാതി പരിഹാര ഓഫിസർ) കൂടിയായ എഡിഎമ്മിന് നൽകണം. ജില്ലാതലത്തിൽ പരിഹരിക്കാനാവാത്ത പരാതികൾ അർധ ജുഡീഷ്യൽ അധികാരമുള്ള ഭക്ഷ്യ കമ്മീഷന് കൈമാറണം. ജില്ലയിൽ ഭക്ഷ്യപൊതുവിതരണ സന്പ്രദായം കൃത്യമായി നടക്കുന്നുണ്ടെന്നും ഓണക്കാലത്ത് പരാതികൾക്കിടയില്ലാത്ത വിധം സംഭരണവും വിതരണവും പൂർത്തീകരിച്ചെന്നും ജില്ലാ സപ്ലൈ ഓഫീസർ കമ്മീഷനെ അറിയിച്ചു. ആദിവാസി മേഖലകളിൽ പൊതുവിതരണ സന്പ്രദായം സുഗമമാക്കുന്നതിനായി ആരംഭിച്ച സഞ്ചരിക്കുന്ന മാവേലി സ്റ്റോറുകൾ ഫലപ്രദമായി നടക്കുന്നു. പുതുതായി നാലു മാവേലി സ്റ്റോറുകൾ കൂടി ആരംഭിക്കുന്നതിനുള്ള പ്രൊപ്പോസലുകൾ ലഭിച്ചിട്ടുണ്ട്. എഡിഎം എൻ.എം. മെഹറലി അധ്യക്ഷത വഹിച്ചു. ജില്ലാ കളക്ടർ വി.ആർ. വിനോദ്, ഡെപ്യൂട്ടി കളക്ടർ കെ.ലത, ജില്ലാ സപ്ലൈ ഓഫീസർ എ. സജാദ്, വിവിധ താലൂക്ക് സപ്ലൈ ഓഫീസർമാർ, വിവിധ വകുപ്പുകളിലെ ജില്ലാതല ഉദ്യോഗസ്ഥർ തുടങ്ങിയവർ പങ്കെടുത്തു.

ലീഗ് നേതാക്കൾക്കെതിരെ അന്വേഷണം വേണം: എൻസിപി-എസ്

മലപ്പുറം:അഴിമതിയിലൂടെ കുറ്റാരോപണം നേരിടുന്ന മുസ്ലീംലീഗ്, യൂത്ത് ലീഗ് നേതാക്കൾ, എന്നിവർക്കെതിരെ സമഗ്രമായ അനേഷണം നടത്തി കുറ്റക്കാർക്കെതിരെ കർശന നടപടികൾ സ്വീകരിക്കണമെന്ന് എൻസിപി-എസ് പ്രവർത്തകർ ജില്ലാ പഞ്ചായത്തിലേക്ക് നടത്തിയ മാർച്ചിൽ ആവശ്യപ്പെട്ടു. ജനങ്ങളെ കബളിപ്പിക്കുന്ന നേതാക്കളെ പാർട്ടിയിൽ നിന്ന് പുറത്താക്കാൻ ലീഗ് നേതൃത്വംചങ്കൂറ്റം കാണിക്കണം. മാർച്ച് സംസ്ഥാന സെക്രട്ടറി രഘു കെ. മാരാത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് കെ.പി.രാമനാഥൻ അധ്യക്ഷത വഹിച്ചു. ആലീസ് മാത്യു, ഇ.എ.മജീദ്, പാറപ്പുറത്ത് കുഞ്ഞുട്ടി, എം.സി.ഉണ്ണികൃഷ്ണൻ, പി.മധു, ഹംസ പാലൂർ, സി.പി.രാധാകൃഷ്ണൻ, അബുലൈസ് തേഞ്ഞിപ്പലം, കെ. മധുസൂദനൻ, കെ.ടി.മുജീബ്ബ്. ഷെബിൻ തൂത, പുലിയോടൻ മുഹമ്മദ് ലീന മുഹമ്മദലി എന്നിവർ പ്രസംഗിച്ചു.

ഷൊർണൂർ-നിലന്പൂർ പാതയിൽ ടിക്കറ്റ് പരിശോധന: 95,225 രൂപ പിഴ ചുമത്തി

നിലന്പൂർ: ഷൊർണൂർ-നിലന്പൂർ സെക്ഷനിൽ പാലക്കാട് റെയിൽവേ ഡിവിഷൻ നടത്തിയ പ്രത്യേക ടിക്കറ്റ് പരിശോധനയിൽ ടിക്കറ്റില്ലാതെ യാത്ര ചെയ്ത 294 യാത്രക്കാരെ കണ്ടെത്തി. ഇവരിൽ നിന്ന് 95,225 രൂപ പിഴ ഈടാക്കി. രാജ്യറാണി എക്സ്പ്രസ്, കോട്ടയം -നിലന്പൂർ എക്സ്പ്രസ്, ആറ് പാസഞ്ചർ ട്രെയിനുകൾ എന്നിവ ഉൾപ്പെടെ നിരവധി ട്രെയിൻ സർവീസുകളിലാണ് പരിശോധന നടത്തിയത്. റെയിൽവേ പ്രൊട്ടക്ഷൻ ഫോഴ്സ് (ആർപിഎഫ്), ഗവണ്‍മെന്‍റ് റെയിൽവേ പോലീസ് (ജിആർപി), വാണിജ്യ വകുപ്പ് എന്നിവ സംയുക്തമായാണ് പരിശോധന നടത്തിയത്. ടിക്കറ്റില്ലാതെ യാത്ര ചെയ്യുന്നവർക്കെതിരെ കർശന നടപടി തുടരുമെന്ന് റെയിൽവേ അധികൃതർ പറഞ്ഞു. എല്ലാ യാത്രക്കാർക്കും സുരക്ഷിതവും സുഗമവുമായ യാത്ര ഉറപ്പാക്കുകയും റെയിൽവേ ശൃംഖലയിലെ നിയമവിരുദ്ധ പ്രവർത്തനങ്ങൾ തടയുകയുമാണ് പ്രത്യേക പരിശോധനയുടെ ലക്ഷ്യം. യാത്രക്കാർ ടിക്കറ്റ് കൈവശം വച്ച് റെയിൽവേ ജീവനക്കാരുമായി സഹകരിക്കണമെന്ന് അധികൃതർ അഭ്യർഥിച്ചു. റെയിൽവേ നിയമങ്ങളും ക്രമവും പാലിക്കുന്നതിനായി ഇത്തരം പരിശോധനകൾ ഇടയ്ക്കിടെ നടത്തുമെന്ന് അധികൃതർ അറിയിച്ചു.

21 പേര്‍ കഴിയുന്നത് ഒരു വീട്ടില്‍!; കുറുമ്പിയുടെ ദുരിതമറിഞ്ഞ് ഉദ്യോഗസ്ഥര്‍ വീട്ടിലെത്തി

നിലമ്പൂര്‍: ചാലിയാര്‍ പഞ്ചായത്തിലെ ഇടിവണ്ണ പാറേക്കാട് നഗറിലെ കുറുമ്പിയുടെ വീട്ടില്‍ 21 പേര്‍ താമസിക്കുന്നതിന്‍റെ ദുരിതം ദീപിക റിപ്പോര്‍ട്ട് ചെയ്തതിനെ തുടര്‍ന്ന് ഇടപെട്ട് പട്ടികവര്‍ഗ വകുപ്പ്. പട്ടികവര്‍ഗ വകുപ്പ് ജില്ലാ പ്രോജക്ട് ഓഫീസര്‍ പി. ഇസ്മായിലിന്‍റെ നേതൃത്വത്തില്‍ ഉദ്യോഗസ്ഥര്‍ കുറുമ്പിയുടെ വീട്ടിലെത്തി. കാര്യങ്ങള്‍ പഠിച്ച് റിപ്പോര്‍ട്ട് ചെയ്യാമെന്ന പതിവ് മറുപടി നല്‍കി ഉദ്യോഗസ്ഥര്‍ മടങ്ങി. അടിയന്തര നടപടി സ്വീകരിക്കുമോ എന്ന ചോദ്യത്തിന് വ്യക്തമായ മറുപടി നല്‍കാനും പ്രോജക്ട് ഓഫീസര്‍ തയാറായില്ല. വിഷയത്തില്‍ പി.കെ. ബഷീര്‍ എംഎല്‍എ അടിയന്തര ഇടപെടല്‍ നടത്തിയതോടെയാണ് പട്ടികവര്‍ഗ വകുപ്പ് പ്രോജക്ട് ഓഫീസറുടെ സന്ദര്‍ശനം. അതിനിടെ, മരിക്കും മുമ്പ് നല്ലൊരു വീട്ടില്‍ കിടന്നുറങ്ങാമെന്ന് പ്രതീക്ഷയില്ലെന്ന് 88 കാരിയായ കുറുമ്പി പ്രതികരിച്ചു. മൂന്ന് മുറികള്‍ മാത്രമുള്ള വീട്ടില്‍ 21 ആളുകള്‍ താമസിക്കുന്നതിന്‍റെ ദുരിത വാര്‍ത്തയാണ് ദീപിക പുറത്തുവിട്ടത്. വര്‍ഷങ്ങളായി താനും മക്കളും ദുരിതജീവിതം നയിക്കുകയാണ്. മക്കളില്‍ ഒരാള്‍ക്കെങ്കിലും ഒരു വീട് എന്ന ആവശ്യത്തിനായി കഴിഞ്ഞ 15 വര്‍ഷമായി കയറിയിറങ്ങുകയാണ്. പട്ടികവര്‍ഗ വകുപ്പ് കനിഞ്ഞ് ഒരു വീട് കിട്ടുവോളം താന്‍ ജീവിച്ചിരിക്കുമോ എന്നറിയില്ലെന്നും കുറുമ്പി പറഞ്ഞു. അഞ്ച് കുടുംബങ്ങളാണ് ഈ വീട്ടിലുള്ളത്. പഞ്ചായത്ത് നല്‍കിയ ആട്ടിന്‍ കൂട്ടിലും വീടിന്‍റെ ടെറസിലുമായാണ് മക്കളില്‍ പലരും കഴിയുന്നത്. വയറിംഗ് തകരാര്‍ കാരണം വീട്ടില്‍ വൈദ്യുതിയുമില്ല. പ്ലസ്‌വണ്‍, എസ്എസ്എല്‍സി ക്ലാസുകളില്‍ പഠിക്കുന്ന കുട്ടികളുമുണ്ട്. ആദിവാസി ക്ഷേമത്തിനായി ഒരുവകുപ്പും മന്ത്രിയുമുള്ള നാട്ടിലാണ് ഈ ആദിവാസി കുടുംബത്തിന്‍റെ ദുരിത ജീവിതം.

മണ്ണാർമലയിൽ വീണ്ടും പുലി സാന്നിധ്യം; പുലിയുടെ ചിത്രം കാമറയിൽ പതിഞ്ഞു

മണ്ണാർമല: മണ്ണാർമലയിലെ ജനവാസ മേഖലയിൽ വീണ്ടും പുലി സാന്നിധ്യം. പ്രദേശത്ത് നാട്ടുകാർ സ്ഥാപിച്ച കാമറയിൽ ഇന്നലെ പുലർച്ചെ മൂന്നിന് പുലിയുടെ ദൃശ്യം പതിഞ്ഞു. ഒരു മാസത്തിനിടെ നിരവധി തവണയാണ് പുലിയുടെ ദൃശ്യം കാമറയിൽ പതിയുന്നത്. പുലിയെ പിടിക്കാൻ ആടിനെ കൂട്ടിലാക്കി കെണി വച്ചിട്ടുണ്ടെങ്കിലും കെണിയിലേക്ക് നോക്കി പുലി തിരിച്ചു പോകുന്ന ദൃശ്യമാണ് കാമറയിൽ പതിഞ്ഞത്. ഒരേ സ്ഥലത്ത് പുലിയെ പലതവണ കണ്ടിട്ടും പുലിക്കെണി സ്ഥാപിച്ചതല്ലാതെ പുലിയെ പിടികൂടാൻ വനംവകുപ്പ് നടപടി സ്വീകരിക്കാത്തതിൽ നാട്ടുകാർ കടുത്ത പ്രതിഷേധത്തിലാണ്. മാനത്തുമംഗലം-കാര്യവട്ടം പാതയിൽ മാട് റോഡ് ഭാഗത്താണ് പുലി സ്ഥിരമായി എത്തുന്നത്. പുലി കടന്നുപോകുന്ന സ്ഥലത്തിന് തൊട്ടടുത്തുള്ള പ്രദേശങ്ങളായ മണ്ണാർമല പള്ളിപ്പടി, മാനത്ത്മംഗലം, കക്കൂത്ത് എന്നിവിടങ്ങളിൽ നൂറുക്കണക്കിന് വീടുകളുണ്ട്. ഇവിടങ്ങളിലെ കുടുംബങ്ങൾ മാസങ്ങളായി ഭീതിയിലാണ് കഴിയുന്നത്. പുലി റോഡിന് കുറുകെ ഓടി ബൈക്കിൽ തട്ടി മറിഞ്ഞ് യാത്രക്കക്കാരന് പരിക്കേറ്റിരുന്നു. മാട് റോഡിൽ "വന്യജീവികൾ കുറുകെ ഓടും സൂക്ഷിക്കുക’ എന്ന സൂചനാ ബോർഡും നാട്ടുകാരുടെ നേതൃത്വത്തിൽ സ്ഥാപിച്ചിട്ടുണ്ട്. പുലി സാന്നിധ്യമുള്ള മണ്ണാർമലയിൽ വനംവകുപ്പ് സത്വര നടപടികൾ കൈക്കൊള്ളണമെന്ന് നാട്ടുകാർ ആവശ്യപ്പെട്ടു.

വയോധികയുടെ മാല കവര്‍ന്ന യുവാവ് പോലീസ് പിടിയില്‍

പെരുവണ്ണാമൂഴി: പന്തിരിക്കരയില്‍ വയോധികയുടെ മാല കവര്‍ന്ന സംഭവത്തില്‍ യുവാവ് അറസ്റ്റില്‍. ചങ്ങരോത്ത് വെള്ളച്ചാലില്‍ മേമണ്ണില്‍ ജയ്സണ്‍ (31) ആണ് അറസ്റ്റിലായത്. ശനിയാഴ്ച രാവിലെ 10.15 ഓടെയാണ് സംഭവം. പന്തിരിക്കര ഒറ്റക്കണ്ടം റോഡില്‍ പുല്ലാനി മുക്ക് ഭാഗത്ത് ബൈക്കിലെത്തിയ പ്രതി, ആസ്യ എന്ന സ്ത്രീയുടെ മാല കവരുകയായിരുന്നു. പെരുവണ്ണാമൂഴി പോലീസ് ഇന്‍സ്പക്ടര്‍ പി. അജിത് കുമാറിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. പേരാമ്പ്രയിലെ സ്വകാര്യ ധനകാര്യ സ്ഥാപനത്തില്‍ പ്രതി പണയം വച്ച മാല പോലീസ് കണ്ടെടുത്തു. പ്രതിയുമായി ഇവിടെ തെളിവെടുപ്പ് നടത്തുകയും ചെയ്തു. പ്രതിയെ കോടതി റിമാൻഡ് ചെയ്തു.

സംസ്ഥാന വനിതാ ഹോക്കിയിൽ പാങ്ങ് സ്കൂളിന് വെങ്കലം

മങ്കട : ജവഹർലാൽ നെഹ്റു സംസ്ഥാന വനിതാ ഹോക്കി ടൂർണമെന്‍റിൽ പാങ്ങ് ഗവണ്‍മെന്‍റ് ഹയർ സെക്കൻഡറി സ്കൂൾ മൂന്നാം സ്ഥാനം നേടി. സെമി ഫൈനലിൽ ജിവി രാജ സ്പോർട്സ് സ്കൂളിനോട് പരാജയപ്പെട്ട പാങ്ങിന്‍റെ പെണ്‍കുട്ടികൾ ലൂസേഴ്സ് ഫൈനലിൽ പത്തനംതിട്ട ജില്ലയെ പ്രതിനിധീകരിച്ച എസ്‌സിഎസ്എച്ച്എസ്എസ് തിരുവല്ലയെ എതിരില്ലാത്ത രണ്ട് ഗോളുകൾക്കാണ് തോൽപ്പിച്ചത്. മത്സരത്തിൽ കെ. ഫാത്തിയ വഫ, പി. ഫാത്തിമ മുസ്ഫിറ എന്നിവരാണ് ഗോൾ നേടിയത്. പെണ്‍കുട്ടികളുടെ വിഭാഗത്തിൽ മലപ്പുറം ജില്ലയിൽ നിന്ന് ആദ്യമായാണ് ഒരു സ്കൂൾ ടീം മൂന്നാം സ്ഥാനം നേടുന്നത്. പാങ്ങ് ഗവണ്‍മെന്‍റ് ഹയർ സെക്കൻഡറി സ്കൂളിലെ പി. ഫാത്തിമ സിയ ടൂർണമെന്‍റിലെ മികച്ച ഗോൾ കീപ്പറായി തെരഞ്ഞെടുക്കപ്പെട്ടു. പി. ഹിബയാണ് ക്യാപ്റ്റൻ. മുഖ്യപരിശീലകൻ പി. ഷാരൂണും സഹപരിശീലകൻ അരിക്കത്ത് ഷാഫിയും ടീം മാനേജർ റസീന ബീവിയുമാണ്. സംസ്ഥാന സ്കൂൾ ഗെയിംസിൽ വനിതാ ഹോക്കി വിവിധ വിഭാഗങ്ങളിൽ മലപ്പുറം ജില്ലാ ടീമിൽ ശക്തമായ സാന്നിധ്യമാണ് പാങ്ങ് ജിഎച്ച്എച്ച്എസ്. സംസ്ഥാന ടീമിലേക്ക് രണ്ടു പേർ തെരഞ്ഞെടുക്കപ്പെട്ടിട്ടുണ്ട്.

തെരുവു നായ്ക്കളുടെ ആക്രമണത്തിൽ മസ്ജിദ് ജീവനക്കാരന് ഗുരുതര പരിക്കേറ്റു

പെരിന്തൽമണ്ണ: പെരിന്തൽമണ്ണയിൽ തെരുവുനായ്ക്കളുടെ ആക്രമണത്തിൽ മസ്ജിദ് ജീവനക്കാരന് ഗുരുതര പരിക്കേറ്റു. തറയിൽ ബസ് സ്റ്റാൻഡിന് സമീപത്തെ മസ്ജിദുൽ മാജിദൈൻ ജുമാ മസ്ജിദിലെ ശുചീകരണ ജീവനക്കാരൻ വഴിപ്പാറ സ്വദേശി കുരംകുറ്റി സൂപ്പി (64) ക്കാണ് പരിക്കേറ്റത്. ഇദ്ദേഹം മഞ്ചേരി മെഡിക്കൽ കോളജ് ആശുപത്രിയിൽ ചികിത്സയിലാണ്. മസ്ജിദിലെ ജോലി കഴിഞ്ഞ് ഇന്നലെ രാവിലെ 10 ന് മടങ്ങിപോകുന്പോഴാണ് ഏഴിലധികം തെരുവ് നായ്ക്കൾ പിറകിലൂടെയെത്തി കൂട്ടമായി ആക്രമിച്ചത്. നായ കാലിൽ കടിച്ച് തൂങ്ങിയ നിലയിലായിരുന്നു. നാട്ടുകാരും ഇതരസംസ്ഥാന തൊഴിലാളികളും ചേർന്ന് സൂപ്പിയെ പെരിന്തൽമണ്ണ ജില്ലാ ആശുപത്രിയിലെത്തിച്ചുവെങ്കിലും പ്രാഥമിക ശുശ്രൂഷക്കും കുത്തിവയ്പിനും ശേഷം മഞ്ചേരി മെഡിക്കൽ കോളജ് ആശുപത്രിയിലേക്ക് മാറ്റി.

അറബിയുടെ സഹായം വാഗ്ദാനം ചെയ്ത് മോഷണം : 66 കാരൻ അറസ്റ്റിൽ

മഞ്ചേരി : ഉംറ നിർവഹിക്കുന്നതിന് അറബിയിൽ നിന്ന് സഹായം വാങ്ങിച്ചു നൽകാമെന്ന് പറഞ്ഞ് വിശ്വസിപ്പിച്ച് വീട്ടമ്മയുടെ ആഭരണം കവർന്ന കേസിലെ പ്രതിയെ മഞ്ചേരി പോലീസ് അറസ്റ്റ് ചെയ്തു. അരീക്കോട് ഉൗർങ്ങാട്ടിരി തച്ചണ്ണ നടുവത്ത്ചാലിൽ അസൈനാർ (66)നെയാണ് മഞ്ചേരി പോലീസ് സബ് ഇൻസ്പെക്ടർ എൻ. സുബാഷ് അറസ്റ്റ് ചെയ്തത്. കൊണ്ടോട്ടി പുത്തൂർ പള്ളിക്കൽ സ്വദേശിനിയായ വീട്ടമ്മയാണ് പരാതിക്കാരി. ഇക്കഴിഞ്ഞ അഞ്ചിന് ഉച്ചക്ക് ഒന്നരക്ക് അറബിയെ പരിചയപ്പെടുത്തി തരാമെന്നും സഹായം വാങ്ങിത്തരാമെന്നും പറഞ്ഞ് വിശ്വസിപ്പിച്ച് മഞ്ചേരി രാജീവ് ഗാന്ധി ബൈപ്പാസിലെ ഹോട്ടലിലേക്ക് കൊണ്ടുപോവുകയായിരുന്നു. ഹോട്ടലിലെ മുറിയിൽ അറബിയുണ്ടെന്നും അണിഞ്ഞിരിക്കുന്ന ആഭരണങ്ങൾ കണ്ടാൽ അറബി സഹായിക്കില്ലെന്നും പറഞ്ഞ് സ്വർണ മാലയും മോതിരവും അഴിച്ച് ബാഗിൽ വപ്പിച്ചു. തുടർന്ന് ഇരുവരും ഹോട്ടലിൽ നിന്ന് ചായ കുടിക്കുകയും ഓർഡർ ചെയ്ത പാർസൽ വാങ്ങാനായി വീട്ടമ്മ പോയ തക്കത്തിന് ബാഗിൽ നിന്ന് 3.75 പവൻ സ്വർണാഭരണങ്ങളെടുത്ത് പ്രതി മുങ്ങുകയുമായിരുന്നു. മലപ്പുറം എടപ്പറ്റ കണ്ടൻചോല നിസാ മൻസിൽ എന്ന വിലാസത്തിലുള്ള തിരിച്ചറിയൽ രേഖയും പ്രതിയിൽ നിന്ന് പോലീസ് കണ്ടെടുത്തിട്ടുണ്ട്. കാസർഗോഡ്, കോഴിക്കോട് പോലീസ് സ്റ്റേഷനുകളിലടക്കം എട്ടോളം സമാനമായ കേസുകളിലും ഇയാൾ പ്രതിയാണെന്ന് പോലീസ് പറഞ്ഞു. മഞ്ചേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി പ്രതിയെ 14 ദിവത്തേക്ക് റിമാൻഡ് ചെയ്തു.

പോലീസിനെ മുഖ്യമന്ത്രി നിയന്ത്രിക്കണം: ബിജെപി

നിലന്പൂർ:പോലീസിനെ നിയന്ത്രിക്കാൻ മുഖ്യമന്ത്രി തയാറാകണമെന്ന് ബിജെപി സംസ്ഥാന വൈസ് പ്രസിഡന്‍റ് സി. കൃഷ്ണകുമാർ. ബിജെപി മലപ്പുറം ഈസ്റ്റ് ജില്ലാ കമ്മിറ്റി നടത്തിയ നിലന്പൂർ ഡിവൈഎസ്പി ഓഫീസ് പ്രതിഷേധ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. ഇൻഷ്വറൻസ് പോളിസി എടുത്തതിന് ശേഷം മാത്രമേ പോലീസ് സ്റ്റേഷനിൽ കയറാവൂ എന്ന നിലയിലാണിപ്പോൾ കാര്യങ്ങൾ. പിണറായി സർക്കാർ അധികാരമേറ്റതിന് ശേഷം 16 കസ്റ്റഡി മരണങ്ങളാണ് കേരളത്തിൽ ഉണ്ടായിരിക്കുന്നത്. ഇതിന് പുറമേയാണ് കള്ളക്കേസിൽ കുടുക്കിയതിനെ തുടർന്നുണ്ടായിട്ടുള്ള ആത്മഹത്യകൾ. 3500 ഓളം പരാതികളാണ് പോലീസ് കംപ്ലയിന്‍റ് അഥോറിറ്റിക്ക് ലഭിച്ചിട്ടുള്ളത്. പോലീസ് സംവിധാനം നോക്കുകുത്തിയായി മാറിയിരിക്കുകയാണ്. പരിശോധിച്ച 1500 പരാതികളിൽ ഒരു നടപടിയും ഉണ്ടായിട്ടുമില്ല. കമ്മ്യൂണിസ്റ്റ് പാർട്ടിയിലെ ഒരു വിഭാഗമാണ് പോലീസിനെ നിയന്ത്രിക്കുന്നത്. നട്ടെല്ലില്ലാത്ത പ്രതിപക്ഷവും ഇക്കാര്യത്തിൽ കുറ്റക്കാരാണെന്നും അദ്ദേഹം പറഞ്ഞു. മലപ്പുറം ഈസ്റ്റ് ജില്ലാ പ്രസിഡന്‍റ് പി.ആർ. രശ്മിൽനാഥ് അധ്യക്ഷത വഹിച്ചു. ജില്ലാ പ്രഭാരി സജി ശങ്കർ, ബിജു എം. ശാമുവൽ എന്നിവർ പ്രസംഗിച്ചു. അഡ്വ. ടി.കെ. അശോക് കുമാർ, അഡ്വ. കെ.പി. ബാബുരാജ്, അഡ്വ. മോഹൻ ജോർജ്, കെ.സി. വേലായുധൻ, ഡോ.പി.സി. വിജയൻ, ഡോ. ഗീതാ കുമാരി, സുധീഷ് ഉപ്പട, സുനിൽ ബോസ്, ജിഷ സജിത്, മോർച്ച പ്രസിഡന്‍റുമാരായ സി.പി. അറുമുഖൻ, സി.പി. കൃഷ്ണൻ, സുനിത എളങ്കൂർ, അഖിൽ സായ്, സുബീഷ് വള്ളിക്കാടൻ എന്നിവർ നേതൃത്വം നൽകി. നിലന്പൂർ ബസ് സ്റ്റാൻഡിൽ നിന്നാരംഭിച്ച പ്രതിഷേധ മാർച്ച് നിലന്പൂർ ഡിവൈഎസ്പി ഓഫീസിന് സമീപം പോലീസ് ബാരിക്കേഡ് വച്ച് തടഞ്ഞു.

ശാസ്ത്രോത്സവം ലോഗോ പ്രകാശനം

അങ്ങാടിപ്പുറം : അങ്ങാടിപ്പുറം തരകൻ എച്ച്എസ്എസിൽ ഒക്ടോബർ 14, 15, 16 തിയതികളിൽ നടക്കുന്ന മങ്കട സബ്ജില്ലാ ശാസ്ത്രോത്സവ ലോഗോ പ്രകാശനം ചെയ്തു. സ്കൂൾ മാനേജർ വി.കെ. വേണുഗോപാലൻ സ്കൂൾ ലീഡർ ഷനൂപിന് നൽകിയാണ് പ്രകാശന കർമം നിർവഹിച്ചത്. പ്രിൻസിപ്പൽ എച്ച്.എം. അനൂപ്, ഐ. രാജശ്രീ, പിടിഎ വൈസ് പ്രസിഡന്‍റ് ടി. അസൈനാർ, ആരിഫ് കൂട്ടിൽ, ശാസ്ത്രമേളയുമായി ബന്ധപ്പെട്ട വിവിധ കമ്മിറ്റി കണ്‍വീനർമാർ എന്നിവർ പങ്കെടുത്തു. സ്കൂൾ പൂർവ വിദ്യാർഥിയായ ഷാജിയാണ് ലോഗോ രൂപകൽപ്പന ചെയ്തത്.

ഉവൈസിന് ജൻമനാട്ടിൽ ആവേശകരമായ സ്വീകരണം

നിലന്പൂർ:ഇന്ത്യൻ ഫുട്ബോൾ താരം മുഹമ്മദ് ഉവൈസിന് ജൻമനാടിന്‍റെ സ്നേഹോഷ്മളമായ സ്വീകരണം. നിലന്പൂർ നഗരസഭയുടെ നേതൃത്വത്തിലാണ് ചന്തക്കുന്ന് ബസ് സ്റ്റാൻഡ് പരിസരത്ത് ആവേശകരമായ സ്വീകരണം നൽകിയത്. നിലന്പൂരിൽ നിന്ന്് ആദ്യമായി ഇന്ത്യൻ ഫുട്ബോൾ ടീമിൽ ഇടം തേടിയ മുഹമ്മദ് ഉവൈസ് ഫുട്ബോൾ പരീശീലകനായ മയ്യംന്താനി സ്വദേശി മോയിക്കൽ കമാലുദ്ദീന്‍റെ മകനാണ്. ദോഹയിൽ നടന്ന കാഫ നാഷൻസ് കപ്പിൽ ഇന്ത്യയെ മൂന്നാം സ്ഥാനത്തെത്തിച്ച് വെങ്കല മെഡലിൽ മുത്തമിട്ട ശേഷം ജൻമനാട്ടിലേക്ക് എത്തിയ മുഹമ്മദ് ഉവൈസ് വൈകുന്നേരം 5.20 തോടെയാണ് നിലന്പൂർ താഴെ ചന്തക്കുന്നിലേക്ക് എത്തിയത്. അവിടെ നിന്ന് തുറന്ന വാഹനത്തിലാണ് ചന്തക്കുന്ന് ബസ് സ്റ്റാൻഡ് പരിസരത്തേക്ക് എത്തിച്ചത്. 11 അംഗ ഇന്ത്യൻ ടീമിൽ ഇടം നേടിയ മുഹമ്മദ് ഉവൈസ് നാടിന് അഭിമാനമായി മാറി കഴിഞ്ഞു. സ്വീകരണ ചടങ്ങ് നിലന്പൂർ നഗരസഭ ചെയർമാൻ മാട്ടുമ്മൽ സലീം ഉദ്ഘാടനം ചെയ്തു. നഗരസഭ വികസന സ്റ്റാൻഡിംഗ് കമ്മിറ്റി ചെയർമാൻ പി.എം.ബഷീർ അധ്യക്ഷത വഹിച്ചു. കൗണ്‍സിലർമാരായ സ്കറിയ ക്നാംതോപ്പിൽ, പാലോളി മെഹബൂബ്, വി.എ.കരീം, സാലി ബിജു, റനീഷ് കുപ്പായി, കമാലുദ്ദീൻ മേയിക്കൽ തുടങ്ങിയവർ സംസാരിച്ചു. നഗരസഭയുടെ ആദരം ചെയർമാൻ കൈമാറി. വിവിധ ക്ലബുകളും ആദരം കൈമാറി. ഇന്ത്യൻടീം ഇക്കുറി കാഫ നാഷൻസ് ക്ലബിൽ മിന്നുന്ന പ്രകടനമാണ് കാഴ്ചവച്ചത്. മത്സരത്തിൽ മികച്ച പ്രകടനം നടത്താനും ഉവൈസിന് സാധിച്ചു.

17 മുതൽ ഗ്രാൻഡ് കോണ്‍ഫറൻസ് നബിദിനാഘോഷത്തിന് സമാപനം

മഞ്ചേരി: മുഹമ്മദ് നബിയുടെ 1500 -ാം ജൻമദിനത്തിന്‍റെ ഒരു വർഷം നീണ്ടു നിന്ന ആഘോഷ പരിപാടികൾ മഞ്ചേരി ദാറുസുന്ന കാന്പസിൽ 17,18,19 തിയതികളിൽ നടക്കുന്ന ഗ്രാൻഡ് കോണ്‍ഫറൻസോടെ സമാപനമാകുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. ദിവ്യപ്രകാശമാണ് അണയില്ല എന്ന ശീർഷകത്തിൽ ദാറുസുന്നയിലെ ഇസ്ലാമിക് ദ അ് വാ ഫാക്കൽറ്റി നടത്തുന്ന സെമിനാറാണ് ഒന്നാം ദിവസത്തിലെ പ്രധാന പരിപാടി. ഫാക്കൽറ്റി മേധാവി മൗലാന എ. നജീബ് മൗലവിയുടെ നേതൃത്വത്തിൽ നടക്കുന്ന സെമിനാർ പാണക്കാട് മുനവറലി ശിഹാബ് തങ്ങൾ ഉദ്ഘാടനം ചെയ്യും. തിരുനബിക്കെതിരെ പതിനഞ്ച് നൂറ്റാണ്ടിനകം ഉയർന്നുവന്ന ആരോപണങ്ങളും അധിക്ഷേപങ്ങളും വിലയിരുത്തി നബിയുടെ സംശുദ്ധ ജീവിതം അനാവരണം ചെയ്യുന്ന സെമിനാറിൽ മതപണ്ഡിതൻമാർ പ്രബന്ധങ്ങളവതരിപ്പിക്കും. വിവിധ സെഷനുകളിലായി വഹ് യ്- നുബുവ്വത്ത്, പ്രമാണങ്ങൾ സുരക്ഷിതം, തിരുജീവിതം: ആരോപണങ്ങൾ മറുപടികൾ തുടങ്ങിയ വിഷയങ്ങൾ അവതരിപ്പിക്കും. രണ്ടാം ദിനം നടക്കുന്ന വിഷണറി മീറ്റിൽ പാണക്കാട് സയ്യിദ് സാദിഖലി ശിഹാബ് തങ്ങൾ, മന്ത്രി വി. അബ്ദുറഹ്മാൻ എന്നിവർ പങ്കെടുക്കും. തുടർന്ന് ബിരുദ ദാന സമ്മേളനത്തിൽ എം.പി. അബ്ദുസമദ് സമദാനി എംപി പങ്കെടുക്കും. 19ന് കലാപരിപാടികൾക്കു ശേഷം സ്വലാത്ത്, പ്രാർഥനാ മജ് ലിസോടെ ഗ്രാന്‍റ് കോണ്‍ഫൻസിനു തിരശീല വീഴും. വാർത്താ സമ്മേളനത്തിൽ ഇ.പി. അഷ്റഫ് ബാഖവി, ഇ.കെ. അബ്ദുറശീദ് മുഈനി, പി.ടി. അബ്ദുൾ ലത്തീഫ് മൗലവി, യു. ജഅ്ഫർ അലി വഹബി, എം. ശബീർ വഹബി എന്നിവർ പങ്കെടുത്തു.

ബിരിയാണി സ്റ്റോറിൽ നിന്ന് നിരോധിത പുകയില ഉത്പന്നങ്ങൾ പിടകൂടി

മങ്കട: പുഴിക്കുന്ന് എൽപി സ്കൂളിന് സമീപത്തെ അമാന ബിരിയാണി സ്റ്റോറിൽ നിന്ന് മങ്കട പോലീസ് നിരോധിത പുകയില ഉത്പന്നങ്ങൾ പിടികൂടി. പൊതുജനങ്ങൾക്ക് വിൽപ്പന നടത്താൻ സൂക്ഷിച്ചിട്ടുണ്ടെന്ന് സബ് ഇൻസ്പെക്ടർ ഷരീഫ് തോടേങ്ങലിന് ലഭിച്ച വിവരത്തെത്തുടർന്ന് നടത്തിയ പരിശോധനയിലാണ് നിരോധിത പുകയില ഉത്പ്പന്നങ്ങളായ ഹാൻസും കൂൾ ലിപ് പാക്കറ്റുകളും പിടികൂടിയത്. കടയുടമക്കെതിരേ കേസെടുത്തു. എഎസ്ഐ സബിത്ത്, സിപിഒ പ്രജീഷ് എന്നിവരും അന്വേഷണ സംഘത്തിലുണ്ടായിരുന്നു.

വാഹനാപകടങ്ങളിൽ പരിക്കേറ്റു

പെരിന്തൽമണ്ണ: തൂതയിൽ സ്കൂട്ടിയിൽ നിന്ന് വീണ് തൂത പൊയ്യക്കൊടി അൻഷാദ് (18), കൊണ്ടോട്ടിപ്പടി ആഞ്ഞിലങ്ങാടിയിൽ ബൈക്കും ബസും കൂട്ടിയിടിച്ച് വെള്ളിയഞ്ചേരി മടത്തൊടി ഉസ്മാൻ (62), പേരമകൻ ഐസിൻ (രണ്ട്), എടക്കരയിൽ സ്കൂട്ടിയും ബസും കൂട്ടിയിടിച്ച് എടക്കര മുരിങ്ങാക്കോടൻ മുഹമ്മദ് (65), കുന്നപ്പള്ളിയിൽ കാറും ബൈക്കും കൂട്ടിയിടിച്ച് ചേലക്കാട് സ്വദേശികളായ ചീനിക്കുണ്ടിൽ മൂസ (65), ഭാര്യ ഫാത്തിമത്ത് സുഹ്റ (50), ഉച്ചാരക്കടവിൽ ബൈക്കും ബസും കൂട്ടിയിടിച്ച് വണ്ടൂർ മേലേപാടം റാഷിദ് (23) എന്നിവരെ പരിക്കുകളോടെ പെരിന്തൽമണ്ണ മൗലാന ആശുപത്രിയിൽ പ്രവേശിപ്പിച്ചു.

ട്രെയിൻ തട്ടി യുവാവ് മരിച്ചു

പെരിന്തൽമണ്ണ: അങ്ങാടിപ്പുറത്ത് വച്ച് ട്രെയിൻ തട്ടി യുവാവ് മരിച്ചു. മന്പാട് ചെന്പൻകാട് കളത്തിങ്ങൽ സീതിക്കോയ മൗലവിയുടെ മകൻ അമീൻ നസീഹ് (33) ആണ് മരിച്ചത്. നിലന്പൂരിൽ നിന്ന് ഷൊർണൂരിലേക്ക് പോകുന്ന ട്രെയിനാണ് ഇന്നലെ രാവിലെ 7.45 ഓടെ തട്ടിയത്. ഭാര്യ : കാളികാവ് അന്പലക്കടവ്. ബേബി ഷംന. മകൾ : അബയ നസീഹ്. മൃതദേഹം പെരിന്തൽമണ്ണ ജില്ലാ ആശുപത്രിയിൽ പോസ്റ്റ്മോർട്ടത്തിന് ശേഷം മന്പാട് വലിയ ജുമാമസ്ജിദിൽ ഖബറടക്കി.

സഹായ ഹസ്തവുമായി ഫുജൈറ കെഎംസിസി

പെരിന്തൽമണ്ണ: നാട്ടിലും വിദേശത്തും ഒട്ടേറെ ജീവകാരുണ്യ പ്രവർത്തനങ്ങൾക്ക് നേതൃത്വം നൽകുന്ന ഫുജൈറ കഐംസിസി മലപ്പുറം ജില്ലാ കമ്മിറ്റി ജില്ലയിലെ സിഎച്ച് സെന്‍ററുകൾ, പാലിയേറ്റീവ് സെന്‍ററുകൾ, അവശത അനുഭവിക്കുന്നവർക്കുള്ള വ്യക്തിഗത സഹായങ്ങൾ വിതരണം നൽകി. പെരിന്തൽമണ്ണ സിഎച്ച് സെന്‍ററിൽ നടന്ന വിതരണോദ്ഘാടനം പാണക്കാട് സയ്യിദ് റാജിഹ് അലി ശിഹാബ് തങ്ങൾ നിർവഹിച്ചു. ഫുജൈറ കെഎംസിസി സംസ്ഥാന പ്രസിഡന്‍റ് മുബാറക് കോക്കൂർ അധ്യക്ഷനായിരുന്നു. വിവിധ സെന്‍റർ ഭാരവാഹികൾ സഹായം ഏറ്റുവാങ്ങി. ഖുറാൻ മനഃപാഠമാക്കിയ മുഹമ്മദ് നാഹിലിനെ റാജിഹ് അലി തങ്ങൾ ഉപഹാരം നൽകി അനുമോദിച്ചു. നജീബ് കാന്തപുരം എംഎൽഎ മുഖ്യപ്രഭാഷണം നടത്തി. മുസ്ലിം ലീഗ് ജില്ലാ ട്രഷറർ അഷ്റഫ് കോക്കൂർ, മണ്ഡലം പ്രസിഡന്‍റ് എ.കെ. നാസർ, ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ, മുസ്ലിം ലീഗ് മണ്ഡലം സെക്രട്ടറി അഡ്വ.സലാം, എം.എസ്. അലവി ഹാജി എന്നിവർ പ്രസംഗിച്ചു. ഫുജൈറ കഐംസിസി ജില്ലാ സെക്രട്ടറി ജാഫർ കപ്പൂർ, പെരിന്തൽമണ്ണ മണ്ഡലം പ്രസിഡന്‍റ് മൊയതീൻകുട്ടി, യൂത്ത് ലീഗ് മുനിസിപ്പൽ പ്രസിഡന്‍റ് നിസാം, സെക്രട്ടറി ഉനൈസ് കക്കൂത്ത്, പെരിന്തൽമണ്ണ മുനിസിപ്പൽ ഗ്ലോബൽ കഐംസിസി പ്രസിഡന്‍റ് റഷീദ് കിഴിശേരി, ദുബായ് കഐംസിസി പെരിന്തൽമണ്ണ മണ്ഡലം സെക്രട്ടറി റിയാസ് ചെറുകര, വൈസ് പ്രസിഡന്‍റ് ഷിബിയാസ് തുടങ്ങിയവർ നേതൃത്വം നൽകി.

ഒപി ടിക്കറ്റ് ചാർജ് വർധന പിൻവലിക്കണം: മഹിള അസോസിയേഷൻ

പെരിന്തൽമണ്ണ: ജില്ലാ ആശുപത്രിയിലെ ഒപി ടിക്കറ്റ് ചാർജ് വർധന പിൻവലിക്കണമെന്നും നിലന്പൂർ-ഷൊർണൂർ റെയിൽവെ ലൈനിലെ ട്രെയിനുകളുടെ പുതുക്കിയ സമയക്രമം മാറ്റണമെന്നും ജനാധിപത്യ മഹിളാ അസോസിയേഷൻ പെരിന്തൽമണ്ണ ഏരിയാ സമ്മേളനം ആവശ്യപ്പെട്ടു. കേന്ദ്ര കമ്മിറ്റി അംഗം അഡ്വ.കെ.പി. സുമതി ഉദ്ഘാടനം ചെയ്തു. സി.ടി. ഗീത, എച്ച്. സരോജിനി, കെ.ടി. ഷീജ എന്നിവരടങ്ങിയ പ്രസീഡിയം സമ്മേളനം നിയന്ത്രിച്ചു. ഏരിയാ സെക്രട്ടറി നിഷി അനിൽരാജ് പ്രവർത്തന റിപ്പോർട്ടും ജില്ലാ സെക്രട്ടറി വി.ടി.സോഫിയ സംഘടനാ റിപ്പോർട്ടും അവതരിപ്പിച്ചു. ജില്ലാ എക്സിക്യൂട്ടീവ് കമ്മിറ്റി അംഗം പി.പി. സുഹ്റാബി പ്രസംഗിച്ചു. സമ്മേളനം 13 അംഗ എക്സിക്യൂട്ടീവ് അടക്കം 36 അംഗ ഏരിയാ കമ്മിറ്റിയെ തെരഞ്ഞെടുത്തു. ഭാരവാഹികൾ: എ. നസീറ (പ്രസിഡന്‍റ്), പി. സൗമ്യ (സെക്രട്ടറി), സി.ടി. ഗീത (ട്രഷറർ).

പോരൂരിൽ വടംവലി മത്സരം നടത്തി

പോരൂർ: പോരൂർ ഗ്രാമപഞ്ചായത്ത് കേരളത്സവത്തിന് ആവേശകരമായ വടംവലി മത്സരത്തോടെ തുടക്കമായി. ചെറുകോട് അങ്ങാടിയിൽ നടത്തിയ വടംവലി മത്സരം പ്രസിഡന്‍റ് എൻ. മുഹമ്മദ് ബഷീർ ഉദ്ഘാടനം ചെയ്തു. ചെറുകോട് ടൗണ്‍ ടീം ജേതാക്കളായി. വൈസ് പ്രസിഡന്‍റ് ടി.പി. സക്കീന അധ്യക്ഷത വഹിച്ചു. വി. മുഹമ്മദ് റാഷിദ്, പി. ശങ്കരനാരായണൻ, പി.അൻവർ, പി. ജയ്യിദ, കെ. റംലത്ത്, പി. സുലൈഖ, കെ. സാബിറ, ഹെൽത്ത് ഇൻസ്പെക്ടർ അഖിൽ, പോരൂർ ഗ്രാമപഞ്ചായത്ത് ക്ലർക്ക് രാജേഷ് തുടങ്ങിയവർ പങ്കെടുത്തു.

പുല്ലങ്കോട് എസ്റ്റേറ്റിലെ മലീനകരണത്തിന് പരിഹാരം കാണണമെന്ന്

കാളികാവ്: പുല്ലങ്കോട് എസ്റ്റേറ്റിൽ നിന്നുള്ള മലിനീകരണം അസഹ്യമെന്ന് പരാതി. ഇതേത്തുടർന്ന് നാട്ടുകാർ പുല്ലങ്കോട് എസ്റ്റേറ്റിനെതിരേ രംഗത്തെത്തി. നിയമങ്ങൾ കാറ്റിൽ പറത്തിയാണ് എസ്റ്റേറ്റ് പ്രവർത്തിക്കുന്നതെന്നാണ് നാട്ടുകാർ പറയുന്നത്. എസ്റ്റേറ്റ് പുറത്തേക്കൊഴുക്കുന്ന മാലിന്യങ്ങൾ കാരണം പരിസരത്തെ കിണറുകൾ ഉൾപ്പെടെയുള്ള ജലസ്രോതസുകൾ ഉപയോഗിക്കാൻ കഴിയുന്നില്ലെന്നാണ് പരിസരവാസികൾ പരാതിപ്പെടുന്നത്. നാട്ടുകാരുട പരാതിയിൽ ഹൈക്കോടതി മലപ്പുറം മലിനീകരണ നിയന്ത്രണ ബോർഡിനോട് വേണ്ട നടപടികൾ സ്വീകരിക്കാൻ നിർദേശിച്ചിട്ടുണ്ട്. എസ്റ്റേറ്റിലെ ശുദ്ധീകരിക്കുന്ന പ്ലാന്‍റ് മുഴുവനായും മഴവെള്ളം അകത്ത് കടക്കാത്ത രീതിയിൽ സുതാര്യമായി മേൽക്കൂര നിർമിക്കുക, മലിന ജലം ശുദ്ധീകരിച്ച ശേഷം പുറത്തുവിടാവൂ എന്നിങ്ങനെയാണ് നിർദേശം നൽകിയിരിക്കുന്നത്. ശുദ്ധീകരണ പ്ലാന്‍റിലെ സംഭരണി മഴ വെള്ളമോ മറ്റൊന്നും തന്നെയും കടക്കാത്ത വിധം മുഴുവനായും ഭദ്രമായി കവർ ചെയ്ത് സുരക്ഷിതമാക്കുകയും വേണം. ശുദ്ധീകരണ യൂണിറ്റിൽ നിന്ന് പുറത്തേക്കൊഴുക്കുന്ന ജലം പരിശോധിച്ചതിൽ പരിധിക്കപ്പുറം മാലിന്യ ഘടകങ്ങൾ ഉണ്ടെന്നും അതുകൊണ്ട് ശുദ്ധീകരണ പ്ലാന്‍റ് മാനദണ്ഡങ്ങൾക്കനുസരിച്ച് മലിനജലം ശുദ്ധീകരിക്കുന്ന രീതിയിൽ പുനർനിർമിക്കണമെന്നുമാണ് മറ്റൊരു നിർദേശം. ശുദ്ധീകരണ പ്ലാന്‍റിൽ നിന്ന് പുറന്തള്ളപ്പെടുന്ന മാലിന്യം ഉപയോഗിച്ച് ജൈവവളം നിർമിക്കുന്നത് അനുവദനീയമല്ല. എസ്റ്റേറ്റിന്‍റെ ഫാക്ടറി നടത്തിപ്പ് മൂലം പ്രദേശത്തുള്ള ദുർഗന്ധം തടയാൻ അനുയോജ്യമായ സംവിധാനം സ്ഥാപിക്കണമെന്നും കോടതി ആവശ്യപ്പെട്ടിട്ടുണ്ട്. നൂറുക്കണക്കിനു തൊഴിലാളി കുടുംബങ്ങൾ ആശ്രയിച്ച് ജീവിക്കുന്ന പുല്ലങ്കോട് എസ്റ്റേറ്റുമായി ബന്ധപ്പെട്ടുണ്ടാകുന്ന പ്രശ്നങ്ങളിൽ മേഖലയിലെ രാഷ്ടീയ സാമൂഹ്യരംഗം ഉത്കണ്ഠയിലാണ്.

സ്റ്റാർട്ട് അപ്പ് വില്ലേജ് എന്‍റർപ്രണർഷിപ്പ് പ്രോഗ്രാമിന് തുടക്കമായി

പെരിന്തൽമണ്ണ: കേന്ദ്ര ഗ്രാമീണ വികസന മന്ത്രാലയവും സംസ്ഥാന സർക്കാരും കുടുംബശ്രീ മുഖേന നടപ്പാക്കുന്ന സ്റ്റാർട്ട് അപ്പ് വില്ലേജ് എന്‍റർപ്രണർഷിപ്പ് പ്രോഗ്രാമിന് പെരിന്തൽമണ്ണ ബ്ലോക്കിൽ തുടക്കമായി. എസ്വിഇപി പദ്ധതിയുടെയും ഇൻക്യുബേഷൻ സെന്‍ററിന്‍റെയും ഉദ്ഘാടനം നജീബ് കാന്തപുരം എംഎൽഎ നിർവഹിച്ചു. സ്വന്തമായി സംരംഭങ്ങൾ ആരംഭിക്കാനും വിജയകരമായി മുന്നോട്ടു കൊണ്ടുപോകാനും ആഗ്രഹമുള്ള ഗ്രാമീണ ജനതയ്ക്ക് ആവശ്യമായ പരിശീലനങ്ങൾ, ശേഷി വികസനം, മാർഗനിർദേശങ്ങൾ, സാങ്കേതിക പിന്തുണകൾ, ധനസഹായങ്ങൾ എന്നിവ ലഭ്യമാക്കുക എന്നതാണ് പദ്ധതിയുടെ ലക്ഷ്യം. ജില്ലയിൽ മികച്ച രീതിയിൽ പ്രവർത്തിച്ചുവരുന്ന യൂണിറ്റുകളെ തെരഞ്ഞെടുത്ത് സംരംഭകരാകാൻ താത്പര്യമുള്ളവർക്ക് പരിശീലനം നൽകി യൂണിറ്റുകൾ ആരംഭിക്കുന്നതിനുള്ള സഹായം ലഭ്യമാക്കുക എന്നതാണ് ഇൻക്യുബേഷൻ സെന്‍റർ വഴി ലക്ഷ്യമിടുന്നത്. താഴെക്കോട് പഞ്ചായത്തിലെ സഞ്ജീവനി ന്യൂട്രിമിക്സ് യൂണിറ്റിനെയാണ് ഫുഡ് പ്രോസസിംഗ് മേഖലയിൽ ഇൻക്യുബേഷൻ ഹബ്ബ് ആയി തെരഞ്ഞെടുത്തിട്ടുള്ളത്. പരിശീലനാർഥികൾക്കുള്ള ക്ലാസ്റൂം, പ്രാക്ടിക്കൽ സംവിധാനം എന്നീ സൗകര്യങ്ങൾ ഇൻക്യുബേഷൻ സെൻററിൽ ലഭ്യമാണ്. ഉദ്ഘാടന ചടങ്ങിൽ ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ അധ്യക്ഷത വഹിച്ചു. എസ് വിഇപി പദ്ധതിയുടെ വിശദമായ രൂപരേഖയായ ഡിപിആർ നജീബ് കാന്തപുരം എംഎൽഎ പ്രകാശനം ചെയ്തു. ഇതോടൊപ്പം സിഇഎഫ് ലോണ്‍ വിതരണ ഉദ്ഘാടനവും നിർവഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ ബി. സുരേഷ് കുമാർ പദ്ധതി വിശദീകരിച്ചു. വിവിധ പഞ്ചായത്ത് പ്രസിഡന്‍റുമാർ,ബ്ലോക്ക്, പഞ്ചായത്ത് ഭരണസമിതി അംഗങ്ങൾ, സ്ഥിരകാര്യ കമ്മിറ്റി ചെയർപേഴ്സണ്‍മാർ, സിഡിഎസ് ചെയർപേഴ്സണ്‍മാർ, കുടുംബശ്രീ പ്രോഗ്രാം മാനേജർമാർ, ബ്ലോക്ക് കോ ഓർഡിനേറ്റർമാർ തുടങ്ങിയവർ പങ്കെടുത്തു. പെരിന്തൽമണ്ണ ബ്ലോക്ക് പഞ്ചായത്ത് വൈസ് പ്രസിഡന്‍റ് വനജ കുന്നംകുലത്ത് സ്വാഗതവും കുടുംബശ്രീ അസിസ്റ്റന്‍റ് ജില്ലാ മിഷൻ കോ ഓർഡിനേറ്റർ ആർ. രഗീഷ് നന്ദിയും പറഞ്ഞു.

മയിൽപ്പീലി അഴകുമായി ശോഭായാത്ര

മലപ്പുറം: നഗര വീഥികളെ അന്പാടിയാക്കി ഉണ്ണിക്കണ്ണൻമാർ നിറഞ്ഞപ്പോൾ നാടാകെ ദ്വാപരയുഗ സ്മരണകളിലലിഞ്ഞു. കൂടെ രാധയും തോഴിമാരും നിശ്ചലദൃശ്യങ്ങളും അണിനിരന്നപ്പോൾ ശ്രീകൃഷ്ണ ജയന്തി ഘോഷയാത്രകൾക്ക് മയിൽപ്പീലിയഴക്. ആയിരത്തിലധികം ശോഭായാത്രകൾ ജില്ലയുടെ വീഥികളെ മനോഹരമാക്കി. ബാലഗോകുലത്തിന്‍റെ നേതൃത്വത്തിൽ നടന്ന ശോഭായാത്രകളിൽ കൃഷ്ണലീലകളും അവതാര കഥകളും ഇതിഹാസ കഥകളും നിശ്ചല ദൃശ്യങ്ങളിലൂടെ പുനർജനിച്ചു. നാമജപ സങ്കീർത്തനങ്ങളും ഭജന കീർത്തനങ്ങളും ഗോപികാനൃത്തവും അകന്പടിയായി. കൂടാതെ, ഗോവർധന മർദനം, ശരശയ്യ, പൂതനാമോക്ഷം, മത്സ്യാവതാരം, കൂർമാവതാരം, വസുദേവരുടെ യാത്ര, അനന്തശയനം, അസുരവധം എന്നിവയും അരങ്ങേറി. വീഥികളുടെ ഇരുവശവും നിരന്ന ജനാവലി ആന്ദനം കൊണ്ടപ്പോൾ ശ്രീകൃഷ്ണ ജയന്തി നാടിന് ആഘോഷമായി. ഉറിയടികൾ, സാംസ്കാരിക സമ്മേളനങ്ങൾ എന്നിവയും നടന്നു. ഗ്രാമം തണലൊരുക്കട്ടെ, ബാല്യം സഫലമാകട്ടെ എന്ന സന്ദേശം ഉയർത്തിയായിരുന്നു ശ്രീകൃഷ്ണ ജയന്തി ആഘോഷം. നിലന്പൂർ: നിലന്പൂർ മേഖലയിൽ ചക്കാലക്കൂത്ത്, വീട്ടിക്കുത്ത്, മണലൊടി, കോവിലകത്തുമുറി, തെക്കുംപാടം എന്നീ സ്ഥലങ്ങളിൽ നിന്നുള്ള ശോഭയാത്രകൾ നടുവിലക്കളം ശ്രീസുബ്രഹ്മണ്യസ്വാമി ക്ഷേത്രാങ്കണത്തിൽ എത്തിച്ചേർന്നു. തുടർന്ന നൃത്തനൃത്ത്യങ്ങളോടും ഭജനയോടും കൂടി മഹാശോഭയാത്രയായി ശ്രീവിരാഡപുരി അയ്യപ്പ ഭജനമഠത്തിൽ സമാപിച്ചു. തുടർന്ന് പ്രസാദ വിതരണം ഉണ്ടായിരുന്നു. മഹാശോഭയാത്രയിൽ വാദ്യഘോഷ അകന്പടിയോടു കൂടി ശ്രീകൃഷ്ണ വേഷധാരികളായ ബാലികാബാലൻമാരും കണ്ണന്‍റെ നിശ്ചലദൃശ്യങ്ങളും ശ്രദ്ധേയമായി. ആഘോഷപ്രമുഖ് കെ. രജീഷ്, ഗോപീകൃഷ്ണൻ, കെ. ശശികുമാർ, വൈകാശ് തടങ്ങിയവർ നേതൃത്വം നൽകി. എടക്കര: ചുങ്കത്തറയിൽ കുസൃതികളുമായി ഉണ്ണിക്കണ്ണൻമാരും ഗോപികമാരും അണിനിരന്ന മഹാശോഭ യാത്ര വർണാഭമായി. നഗരവീഥികളെ അന്പാടിയാക്കി നടന്ന ഘോഷയാത്രയിൽ രാധാകൃഷ്ണ വേഷമണിഞ്ഞ കുട്ടികൾ, ഗോപികമാർ, മുത്തക്കുടകൾ, മേളങ്ങൾ എന്നിവയുമൊക്കെ മഹാശോഭയാത്രക്ക് മിഴിവേകി. ജയന്തിയോടനുബന്ധിച്ച് ക്ഷേത്രങ്ങളിൽ പ്രത്യേക പൂജകളും നടന്നു. കാവുംപാടം ധർമശാസ്താ ക്ഷേത്രം, മണ്ണാത്തി ദുർഗാക്ഷേത്രം, പുലിമുണ്ട അയ്യപ്പ ക്ഷേത്രം, കോട്ടേപ്പാടം ധർമശാസ്ത ക്ഷേത്രം, പടിഞ്ഞാറ്റിയംപാടം നാരായണ ധർണശാസ്താ ക്ഷേത്രം, കുന്നത്ത് വരാഹ മൂർത്തി ക്ഷേത്രം, പള്ളിക്കുത്ത് തൃപുരാന്തക ക്ഷേത്രം, മണലി പാടിപ്പൊയിൽ എന്നിവിടങ്ങളിൽ നിന്നെത്തിയ ഘോഷയാത്രകൾ ചുങ്കത്തറ ശ്രീനാരായണ ഗുരു വിഘ്നേശ്വര ക്ഷേത്രത്തിൽ സംഗമിച്ച് മഹാശോഭയാത്രയായി നഗര പ്രദക്ഷിണം നടത്തിയ ശേഷം വൈകിട്ടോടെ നെടുന്പുഴായി ക്ഷേത്രത്തിൽ സമാപിച്ചു. ശോഭയാത്ര കണ്‍വീനർ വി.എസ്. സത്യൻ, ചെയർമാൻ കെ.പി. ബിജുമോൻ, വി.എസ്. പ്രസാദ് എന്നിവർ നേതൃത്വം നൽകി. എടക്കരയിൽ കൗക്കാട്, വെള്ളാരംകുന്ന് എസ്എൻഡിപി എന്നിവിടങ്ങളിലെ ക്ഷേത്രങ്ങളിൽ നിന്ന്ആരംഭിച്ച ശോഭയാത്രകൾ സംഗമിച്ച് മഹാശോഭയാത്രയായി എടക്കര ദുർഗാ ഭഗവതി ക്ഷേത്രത്തിൽ സമാപിച്ചു. കരുവാരകുണ്ട് : ശ്രീകൃഷ്ണ ജയന്തി കരുവാരകുണ്ടിലെ വിവിധ ക്ഷേത്രങ്ങളിൽ ഉത്സാഹപൂർവം ആഘോഷിച്ചു. ഭവനംപറന്പ് ശിവൻ -വിഷ്ണു ക്ഷേത്രത്തിൽ ഭഗവാന് പ്രത്യേക പൂജകളും പ്രസാദ സദ്യയുമൊരുക്കിയിരുന്നു. കുട്ടത്തി മഹാശിവക്ഷേത്രം, കക്കറ ആലുങ്ങൽ മഹാദേവ ക്ഷേത്രം, നീലാങ്കുറുശി അയ്യപ്പ ക്ഷേത്രം, കുത്തനഴി ശിവക്ഷേത്രം, പവനപുരം ശ്രീരാമ -ഹനുമാൻസ്വാമി ക്ഷേത്രം, തുടങ്ങിയ വിവിധ ക്ഷേത്രങ്ങളിൽ നിന്നുള്ള ശോഭായാത്രകൾ വൈകിട്ട് ആരിന് ഭവനംപറന്പ് ശിവൻ -വിഷ്ണു ക്ഷേത്രത്തിൽ സംഗമിച്ചു. ഭക്തർ കൃഷ്ണ ഭഗവാനെ ദർശിച്ച് സായൂജ്യമടഞ്ഞു. എല്ലാവർക്കും അവിൽ നിവേദ്യം പ്രസാദമായി നൽകി. വിവിധ ക്ഷേത്ര പ്രതിനിധികൾക്കൊപ്പം തത്ത്വമസി ഹൈന്ദവ സേവാ ട്രസ്റ്റ് ഭാരവാഹികളായ കെ. മാധവൻകുട്ടി, കെ. ഗോപാലകൃഷ്ണൻ, ടി.കെ അയ്യപ്പൻ, ഇ.പി രാജശേഖരൻ, പി.പി വിശ്വനാഥൻ, സി.സുരേഷ്കുമാർ, കൃഷ്ണകുമാർ, എ. മനോജ്, കെ.എൻ. രതീഷ് എന്നിവർ നേതൃത്വം നൽകി.

മന്ത്രി പിൻമാറിയതോടെ കുടിവെള്ള പദ്ധതിക്ക് ജനകീയ ഉദ്ഘാടനം

മഞ്ചേരി : പയ്യനാട് തടപ്പറന്പ് കുടിവെള്ള പദ്ധതി ഉദ്ഘാടന ചടങ്ങിൽ നിന്ന് മന്ത്രി പിൻമാറിയതോടെ സിപിഎമ്മിന്‍റെ നേതൃത്വത്തിൽ ജനകീയമായി ഉദ്ഘാടനം ചെയ്തു. എൽഡിഎഫ്, യുഡിഎഫ് തർക്കത്തെ തുടർന്നാണ് മന്ത്രി ചടങ്ങിൽ നിന്ന് വിട്ടുനിന്നത്. ഘോഷയാത്രയോടെ ഉത്സവാന്തരീക്ഷത്തിലായിരുന്നു പയ്യനാട് ചോലക്കലിൽ സിപിഎമ്മിന്‍റെ നേതൃത്വത്തിലുള്ള ഉദ്ഘാടനം. പ്രാദേശിക മുസ്ലിം ലീഗ് പ്രവർത്തകരെ കൂടി പങ്കെടുപ്പിച്ചായിരുന്നു ചടങ്ങ്. നഗരസഭാധ്യക്ഷ ഉൾപ്പെടെയുള്ളവർ പദ്ധതി മുടക്കാൻ പലതവണ ശ്രമം നടത്തിയെന്ന് സിപിഎം നേതാക്കൾ പറഞ്ഞു. പദ്ധതിക്കായി ഭൂമി വിട്ടു നൽകാൻ തയാറായവരെ പിന്തിരിപ്പിച്ചു. കുടിവെള്ള പദ്ധതിയുടെ അജണ്ട കൗണ്‍സിൽ യോഗത്തിൽ വയ്ക്കാതെ നീട്ടിക്കൊണ്ടുപോകാൻ ശ്രമം നടത്തി. പ്രതിഷേധം ഉയർന്നതോടെയാണ് കൗണ്‍സിൽ യോഗത്തിൽ അജണ്ട വച്ചതെന്നും കൗണ്‍സിലർ മരുന്നൻ സാജിദ് ബാബു പറഞ്ഞു. പദ്ധതിക്കായി ഭൂമി വിട്ടു നൽകിയ ഹസൻ കുഞ്ഞിമൊയ്തീൻ കുരിക്കൾ ഉദ്ഘാടനം നിർവഹിച്ചു. നഗരസഭ മുൻ അധ്യക്ഷൻ അസൈൻ കാരാട്ട് അധ്യക്ഷത വഹിച്ചു. ഫാ. നിധിൻ കരിതോളിൽ, കെ. ഉബൈദ്, വി.പി. അസ്കർ, എഡ്വിൻ തോമസ്, ജസീൽ, മാനു തങ്ങൾ, പി.എൻ. ഹനീഫ, ഡോ. ഫായിസ്, നഗരസഭാ എൽഡിഎഫ് കൗണ്‍സിലർമാർ പങ്കെടുത്തു. ജലവിഭവ വകുപ്പ് മന്ത്രി റോഷി അഗസ്റ്റിൻ പദ്ധതി ഉദ്ഘാടനം ചെയ്യാനായിരുന്നു തീരുമാനം. സ്വാഗതസംഘ രൂപീകരണത്തിനായി ചേർന്ന യോഗത്തിൽ ഉദ്ഘാടന വേദിയെച്ചൊല്ലി എൽഡിഎഫ്, യുഡിഎഫ് കൗണ്‍സിലർമാർ തമ്മിൽ തർക്കമുണ്ടായതോടെ മന്ത്രി ഉദ്ഘാടന ചടങ്ങിൽ നിന്ന് പിൻമാറുകയായിരുന്നു. തർക്കം തീരാതെ ചടങ്ങ് നടത്തേണ്ടെന്ന് മന്ത്രിയുടെ ഓഫീസിൽ നിന്ന് വാട്ടർ അഥോറിറ്റി പ്രൊജക്ട് വിഭാഗത്തിന് നിർദേശവും ലഭിച്ചു. ഇതോടെയാണ് കഴിഞ്ഞദിവസം ജില്ലയിൽ മൂന്നിടങ്ങളിൽ മന്ത്രി റോഷി അഗസ്റ്റിന് കുടിവെള്ള പദ്ധതികളുടെ ഉദ്ഘാടന ചടങ്ങുകളിൽ പങ്കെടുത്തിട്ടും മഞ്ചേരിയിൽ നിന്ന് വിട്ടുനിന്നത്.

ആട്യാ പാട്യാ ചാന്പ്യൻഷിപ്പ്; കോഴിക്കോടിന് ഇരട്ടക്കീരിടം

നിലന്പൂർ: മലപ്പുറം ജില്ലാ ആട്യാ പാട്യാ അസോസിയേഷന്‍റെ നേതൃത്വത്തിൽ നിലന്പൂരിൽ നടത്തിയ 22-ാമത് സംസ്ഥാന പുരുഷ, വനിതാ ആട്യ പാട്യാ ചാന്പ്യൻഷിപ്പിൽ വനിതാ വിഭാഗത്തിലും പുരുഷ വിഭാഗത്തിലും കിരീടം കോഴിക്കോടിന്. രണ്ടാം സ്ഥാനം വനിതാ വിഭാഗത്തിലും പുരുഷ വിഭാഗത്തിലും പാലക്കാട് നേടി. മൂന്നാം സ്ഥാനത്ത് രണ്ട് വിഭാഗത്തിലും രണ്ട് ടീമുകൾ വീതമാണ് വിജയികളായത്. വനിതാ വിഭാഗത്തിൽ മൂന്നാം സ്ഥാനം ആലപ്പുഴയും എറണാകുളവും നേടിയപ്പോൾ പുരുഷ വിഭാഗത്തിൽ തൃശൂരും കാസർഗോഡും പങ്കുവച്ചു. നിലന്പൂർ എംഎസ് എൻഎസ്എസ് ഹയർ സെക്കൻഡറി സ്കൂളിലാണ് മത്സരം നടന്നത്. 14 ജില്ലകളെയും പ്രതിനിധീകരിച്ച് 28 ടീമുകളിലായി 600ലേറെ കായിക താരങ്ങളും 75 ഓളം ഒഫീഷലുകളും പങ്കെടുത്തു. സമാപന സമ്മേളനം നിലന്പൂർ എംഎസ് എൻഎസ്എസ് ഹയർ സെക്കൻഡറി സ്കൂൾ മാനേജർ ആർ. സുരേഷ് കുമാർ ഉദ്ഘാടനം ചെയ്തു. വിജയികൾക്കുള്ള സമ്മാനദാനവും അദ്ദേഹം നിർവഹിച്ചു. അസോസിയേഷൻ സംസ്ഥാന പ്രസിഡന്‍റ് ടി.എം. അബ്ദുറഹ്മാൻ, സംസ്ഥാന സ്പോർട്സ് കൗണ്‍സിൽ സ്റ്റാൻഡിംഗ് കമ്മിറ്റി അംഗം ശ്രീകുമാർ തുടങ്ങിയവർ പങ്കെടുത്തു.

കാട്ടാനകളുടെ ആക്രമണത്തിൽ നിന്ന് ടാപ്പിംഗ് തൊഴിലാളി രക്ഷപ്പെട്ടത് തലനാരിഴയ്ക്ക്

നടുക്കം മാറാതെ അബ്ബാസ് നിലന്പൂർ: കാട്ടാനകളുടെ ആക്രമണത്തിൽ നിന്ന് അബ്ബാസ് രക്ഷപ്പെട്ടത് തലനാരിഴയ്ക്ക്. ചാലിയാർ പഞ്ചായത്തിലെ അകന്പാടം സ്വദേശി കൂരി അബ്ബാസ് (50) ആണ് കാട്ടാനകളുടെ മുന്നിൽ നിന്ന് രക്ഷപ്പെട്ടത്. കഴിഞ്ഞ ദിവസം പുലർച്ചെയാണ് സംഭവം. റബർ ടാപ്പിംഗ് തൊഴിലാളിയായ അബ്ബാസ് മൂലേപ്പാടം 150 തിലുള്ള റബർ തോട്ടത്തിലേക്ക് ടാപ്പിംഗിനായി ബൈക്കിൽ പോവുകയായിരുന്നു. മൂലേപ്പാടം ഭാഗത്ത് എത്തിയതോടെ റോഡിൽ നിൽക്കുകയായിരുന്ന കാട്ടാനയുടെ മുന്നിൽപ്പെട്ടു. ബൈക്ക് പെട്ടെന്ന് നിർത്തി അബ്ബാസ് ഇറങ്ങിയോടി. എന്നാൽ കാട്ടാന പിന്നാലെ എത്തിയതോടെ അബ്ബാസ് റോഡിൽ വീണു. അടുത്ത നിമിഷം കാട്ടാന തൊട്ടടുത്ത് എത്തിയതോടെ പേടിച്ച് വിറച്ച അദ്ദേഹം റോഡിലൂടെ ആനയുടെ ചവിട്ടേൽക്കാതെ ഉരുണ്ടുമറിയുകയായിരുന്നു. ഇതിനിടയിൽ അബ്ബാസിനെ ചവിട്ടാനായി കാട്ടാന കാൽ ഉയർത്തിയെങ്കിലും പിന്നീട് പിന്തിരിയുകയായിരുന്നു. ആനയുടെ ചവിട്ടേറ്റ് താൻ മരിച്ചുവെന്നു തന്നെയാണ് കരുതിയത്. വീട്ടിലുള്ളവരുടെ ഭാഗ്യം കൊണ്ടുമാത്രമാണ് രക്ഷപ്പെട്ടത്. ആന പിന്തിരിഞ്ഞ് പോയ സമയത്താണ് പിറകിൽ മറ്റൊരു കാട്ടാന നിൽക്കുന്നത് കണ്ടത്. ആദ്യത്തെ ആന പോയ ഭാഗത്തേക്ക് തന്നെ രണ്ടാമത്തെ ആനയും പോയതോടെയാണ് അബ്ബാസിന് ജീവൻ തിരിച്ചുകിട്ടിയത്. വീഴ്ചയിൽ കാൽമുട്ടിനും വിരലിനും തുടകൾക്കും ഉൾപ്പെടെ സാരമായി അബ്ബാസിന് പരിക്കേറ്റിട്ടുണ്ട്. അബ്ബാസിന് ചികിത്സാ സഹായം നൽകുമെന്ന് വനംവകുപ്പ് അധികൃതർ അറിയിച്ചു. നിരവധി ടാപ്പിംഗ് തൊഴിലാളികൾ കടന്നുപോകുന്ന ഇടിവണ്ണ - മൂലേപ്പാടം റോഡിൽ ഏതാനും ദിവസങ്ങളായി കാട്ടാനകൾ നിലയുറപ്പിച്ചിരിക്കുകയാണ്.

ലോറി കുളത്തിൽ വീണ് ഡ്രൈവർ മരിച്ചു

മഞ്ചേരി: ആമയൂർ പുളിങ്ങോട്ടുപുറത്ത് കരിങ്കൽ ക്വാറിക്ക് സമീപത്തെ കുളത്തിലേക്ക് ലോറി മറിഞ്ഞ് ഡ്രൈവർക്ക് ദാരുണാന്ത്യം. അരീക്കോട് തോട്ടുമുക്കം സ്വദേശി കൂനുമ്മത്തൊടി സലീമിന്‍റെ മകൻ മുഹമ്മദ് റാഷിദ് (27) ആണ് മരിച്ചത്. ഞായറാഴ്ച രാവിലെ പത്തോടെ റഹ്മത്ത് ക്രഷറിന് സമീപമാണ് അപകടമുണ്ടായത്. ടിപ്പറിലെത്തിച്ച പാറ പൊട്ടിച്ച വേസ്റ്റ് കുളത്തിലേക്ക് തള്ളുന്നതിനിടെയാണ് അപകടം. നിയന്ത്രണം വിട്ട ലോറി വെള്ളത്തിലേക്ക് മറിയുകയായിരുന്നു. ലോറിയിലുണ്ടായിരുന്ന മറ്റൊരാൾ വിവരം അറിയിച്ചതിനെ തുടർന്ന് സ്ഥലത്തെത്തിയ നാട്ടുകാർ ഉടനെ രക്ഷാപ്രവർത്തനം ആരംഭിച്ചെങ്കിലും യുവാവിന്‍റെ ജീവൻ രക്ഷിക്കാനായില്ല. ലോറി പൂർണമായും വെള്ളത്തിൽ മുങ്ങിയിരുന്നു. ലോറി മറിഞ്ഞ് അരമണിക്കൂറോളം കഴിഞ്ഞാണ് ഡ്രൈവറെ പുറത്തെടുക്കാനായത്. ഇതിനിടയിൽ ക്രെയിൻ ഉപയോഗിച്ച് ലോറി ഉയർത്തിയെങ്കിലും ലോറിക്കകത്ത് ഡ്രൈവർ ഉണ്ടായിരുന്നില്ല. നാട്ടുകാർ ഏറെനേരം നടത്തിയ തെരച്ചിലിനൊടുവിലാണ് മൃതദേഹം കണ്ടെത്താനായത്. 15 അടിയോളം താഴ്ചയുള്ള ക്വാറിയിൽ നിന്ന് വലിയ ക്രെയിൻ ഉപയോഗിച്ചാണ് ടിപ്പർ ലോറി കരകയറ്റിയത്. മഞ്ചേരി ഗവണ്‍മെന്‍റ് മെഡിക്കൽ കോളജ് ആശുപത്രിയിൽ പോസ്റ്റ്മോർട്ടം നടത്തിയ മൃതദേഹം തോട്ടുമുക്കം ജുമാമസ്ജിദിൽ ഖബറടക്കി. മൂന്ന് വർഷമായി ഡ്രൈവർ ജോലി ചെയ്തുവരികയായിരുന്ന മുഹമ്മദ് റാഷിദ് പാലിയേറ്റീവ് കെയറിന്‍റെ ആംബുലൻസ് ഡ്രൈവറായും സേവനമനുഷ്ഠിച്ചിട്ടുണ്ട്. മാതാവ് : നസീറ. സഹോദരങ്ങൾ : സുമയ്യ, സുഹാന.

ദേശീയ ലോക് അദാലത്തില്‍ മൂവായിരത്തിലേറെ കേസുകള്‍ക്ക് തീര്‍പ്പ്

മഞ്ചേരി: ജില്ലാ നിയമസേവന അഥോറിറ്റിയുടെ ആഭിമുഖ്യത്തില്‍ ജില്ലയില്‍ ഇന്നലെ നടന്ന ദേശീയ ലോക് അദാലത്തില്‍ മൂവായിരത്തിലേറെ കേസുകള്‍ ഒത്തുതീര്‍പ്പാക്കി. ജില്ലയിലെ മജിസ്ട്രേറ്റ് കോടതികളില്‍ കെട്ടിക്കിടന്നതും പിഴയൊടുക്കി തീര്‍ക്കാവുന്നതുമായ കേസുകള്‍, വാഹനാപകട നഷ്ടപരിഹാര കേസുകള്‍, ബാങ്കിടപാടുകള്‍ സംബന്ധിച്ചത്, സിവില്‍ കേസുകള്‍, ഇലക്ട്രിസിറ്റി ഒപികള്‍, മറ്റ് വിവിധ കേസുകള്‍ ഉള്‍പ്പെടെയുള്ള വ്യവഹാരങ്ങളാണ് തീര്‍പ്പാക്കിയത്. പ്രിന്‍സിപ്പല്‍ ജില്ലാ ജഡ്ജ് കെ. സനില്‍കുമാര്‍, ജില്ലാ നിയമ സേവന അഥോറിറ്റി സെക്രട്ടറിയും സീനിയര്‍ ഡിവിഷന്‍ സിവില്‍ ജഡ്ജുമായ എം. ഷാബിര്‍ ഇബ്രാഹിം എന്നിവര്‍ അദാലത്തിന് നേതൃത്വം നല്‍കി. ജഡ്ജുമാരായ കെ. മധു, എം. തുഷാര്‍, എസ്. രശ്മി, കെ.പി. ജോയ്, സുബിത ചിറക്കല്‍, എം.പി. ഷൈജല്‍, സബ് ജഡ്ജ് ടി.വി. വിന്‍സി, മുന്‍സിഫുമാരായ വിഷ്ണു സുഭാഷ്, അശ്വിനി നളിന്‍, സി. സാനു എന്നിവരും അദാലത്തിന്‍റെ നടത്തിപ്പിനുണ്ടായിരുന്നു.

വചനവര്‍ഷ സമാപനസമ്മേളനം

എടക്കര: മലങ്കര സുറിയാനി കത്തോലിക്കാ സഭ 2030 പുനരൈക്യ ശതാബ്ദി ആഘോഷങ്ങളുടെ ഭാഗമായുള്ള വചനവര്‍ഷ സമാപനം സമ്മേളനം എടക്കര സെന്‍റ് ജോര്‍ജ് മലങ്കര കത്തോലിക്കാ ദേവാലയത്തില്‍ നടന്നു. ബത്തേരി രൂപതാ വികാരി ജനറാള്‍ ഡോ. മോണ്‍. ജേക്കബ് ഓലിക്കല്‍ ഉദ്ഘാടനം ചെയ്തു. മലപ്പുറം ജില്ലാ എപ്പിസ്‌കോപ്പല്‍ വികാരി ഫാ. തോമസ് കല്ലൂര്‍ അധ്യക്ഷത വഹിച്ചു. മണിമൂളി പാസ്റ്ററല്‍ സെന്‍റര്‍ ഡയറക്ടര്‍ ഫാ. പ്രിന്‍സ് തെക്കേതില്‍ വചന വര്‍ഷ സമാപന സന്ദേശം നല്‍കി. ഫാ. ജോണ്‍ ചരുവിള അനുഗ്രഹ പ്രഭാഷണം നടത്തി. ഫാ. തോമസ് ചാപ്രത്ത് വചന വര്‍ഷ സന്ദേശം നല്‍കി. വചന പ്രതിഷ്ഠക്ക് ഫാ.ഡോ. ജോണ്‍ ശങ്കരത്തില്‍ നേതൃത്വം നല്‍കി. ഫാ. പോള്‍സണ്‍ ആറ്റുപുറം ആമുഖപ്രഭാഷണം നടത്തി. ടി.ജി. രാജു ക്ലാസെടുത്തു. സിസ്റ്റര്‍ മേരി കാഞ്ചന എസ്ഐസി, സാബു പൊന്‍മേലില്‍, റെന്നി വര്‍ഗീസ, ചാക്കോ നരിമറ്റം, വിജില്‍ എന്നിവര്‍ സംസാരിച്ചു. സിസ്റ്റര്‍ രാജിത എസ്ഐസി, സിസ്റ്റര്‍ ശുഭ ജോസ് ഡി.എം, വി.പി. മത്തായി, എം.ഐ .ഏലിയാസ് എന്നിവര്‍ നേതൃത്വം നല്‍കി. വിന്‍സന്‍റ് ഡി പോള്‍ സെസൈറ്റിയുടെ നേതൃത്വത്തിലാണ് വചനവര്‍ഷ സമാപന സമ്മേളനം സംഘടിപ്പിച്ചത്.

കാര്‍ ഉപേക്ഷിക്കപ്പെട്ട നിലയില്‍

മഞ്ചേരി: കാര്‍ ഉപേക്ഷിക്കപ്പെട്ട നിലയില്‍. മഞ്ചേരി ബോയ്‌സ് ഹൈസ്‌കൂള്‍ ഗ്രൗണ്ടില്‍ നിന്നും ഐജിബിടി ബസ് സ്റ്റാൻഡിലേക്കുള്ള റോഡില്‍ താഴെ സ്‌കൂള്‍ കെട്ടിടത്തിനു പരിസരത്താണ് ദിവസങ്ങളായി കാര്‍ ഉപേക്ഷിക്കപ്പെട്ട നിലയിലുള്ളത്. കഴിഞ്ഞ 15 ദിവസത്തിലേറെയായി കാര്‍ ഇവിടെ കാണപ്പെടുന്നതായി പരിസരവാസികള്‍ പറയുന്നു. ആര്‍ടിഒ രേഖകള്‍ പ്രകാരം 2012 മോഡല്‍ ഡീസല്‍ കാറാണിത്. ഇക്കഴിഞ്ഞ മാര്‍ച്ചില്‍ പുക പരിശോധന നടത്തിയിട്ടുണ്ടെങ്കിലും 2024 ഒക്‌ടോബറിന് 9ന് ശേഷം ഇന്‍ഷ്വറന്‍സ് പുതുക്കിയിട്ടില്ല. പ്രാദേശിക വാട്‌സ് ആപ്പ് ഗ്രൂപ്പുകളിലും മറ്റും കാര്‍ സംബന്ധിച്ച വാര്‍ത്തകള്‍ പ്രചരിക്കുന്നുണ്ടെങ്കിലും ഇതുവരെ ഉടമസ്ഥര്‍ എത്തിയിട്ടില്ല.

സീതാറാം യെച്ചൂരി അനുസ്മരണം

മങ്കട: സിപിഎം അങ്ങാടിപ്പുറം പഞ്ചായത്ത് കമ്മിറ്റി സീതാറാം യെച്ചൂരി അനുസ്മരണം സംഘടിപ്പിച്ചു. സിപിഎം ജില്ലാ കമ്മിറ്റി അംഗം വി.ടി. സോഫിയ ഉദ്ഘാടനം ചെയ്തു. മങ്കട ഏരിയാ കമ്മിറ്റി അംഗം കെ.ടി. നാരായണൻ അധ്യക്ഷത വഹിച്ചു. ഏരിയ കമ്മിറ്റി അംഗങ്ങളായ അഡ്വ. ടി.കെ. റഷീദലി, സി. സജി, ബ്ലോക്ക് പഞ്ചായത്ത് അംഗം കെ. ദിലീപ്, കെ. ശ്രീജ, സീമ, പ്രമീള, ലോക്കൽ കമ്മിറ്റി സെക്രട്ടറി എസ്. സുരേന്ദ്രൻ, ലോക്കൽ കമ്മിറ്റി അംഗം കെ. സലീം എന്നിവർ സംസാരിച്ചു. പിഎം മൂർക്കനാട് പഞ്ചായത്ത് കമ്മിറ്റി കൊളത്തൂരിൽ സംഘടിപ്പിച്ച യെച്ചൂരി അനുസ്മരണ യോഗം അഡ്വ. സി.എച്ച്. ആഷിഖ് ഉദ്ഘാടനം ചെയ്തു.

തേനീച്ചക്കൂട് നീക്കം ചെയ്തു

അങ്ങാടിപ്പുറം: അങ്ങാടിപ്പുറം രാവറമണ്ണ കിഷോർ പുന്നശേരിയുടെ വീടിന്‍റെ പരിസരത്ത് വീട്ടുകാർക്കും പരിസരവാസികൾക്കും അപകട ഭീഷണി ഉയർത്തിനിന്ന തേനീച്ചക്കൂട് മലപ്പുറം ജില്ലാ ട്രോമാ കെയർ പെരിന്തൽമണ്ണ സ്റ്റേഷൻ യൂണിറ്റ് പ്രവർത്തകർ സുരക്ഷിതമായി നീക്കം ചെയ്തു. സ്റ്റേഷൻ യൂണിറ്റ് ലീഡർ ജബ്ബാർ ജൂബിലിയുടെ നേതൃത്വത്തിൽ സുമേഷ് വലമ്പൂർ, ഹുസ്സൻ കക്കൂത്ത്, ഫാറൂഖ് പൂപ്പലം, സുധീഷ് ഒലിങ്കര എന്നിവർ സ്ഥലത്തെത്തിയാണ് തേനീച്ചക്കൂട് നീക്കം ചെയ്തത്.

തൃക്കലങ്ങോട് പഞ്ചായത്ത് യൂത്ത്‌ലീഗ് സമ്മേളനം സമാപിച്ചു

മഞ്ചേരി: തൃക്കലങ്ങോട് പഞ്ചായത്ത് മുസ്‌ലിം യൂത്ത്‌ലീഗ് സമ്മേളനം സമാപിച്ചു. യൂത്ത് ലീഗ് മെമ്പര്‍ഷിപ്പിന്‍റെ ഭാഗമായി യൂണിറ്റ് സമ്മേളനങ്ങള്‍ നടത്തിയതിന്ശേഷം എളങ്കൂര്‍ സാജ് ഓഡിറ്റോറിയത്തില്‍ നടന്ന സമ്മേളനം അഡ്വ. യു.എ. ലത്തീഫ് എം എല്‍എ ഉദ്ഘാടനം ചെയ്തു. പ്രസിഡന്‍റ് മുഹമ്മദ് നഷീദ് തോട്ടുപൊയില്‍ അധ്യക്ഷത വഹിച്ചു. എംഎസ്എഫ് സംസ്ഥാന പ്രസിഡന്‍റ് പി.കെ. നവാസ് മുഖ്യപ്രഭാഷണം നടത്തി. എലമ്പ്ര ബാപ്പുട്ടി, ഇ.എ .സലാം, ഇ.ടി. മോയിന്‍ കുട്ടി, എന്‍.പി. മുഹമ്മദ്, സൈജല്‍ ആമയൂര്‍, വി.ടി. ഷഫീഖ്, ഫിറോസ് പള്ളിപ്പടി, ഹസ്‌ക്കര്‍ ആമയൂര്‍, എസ്. അബ്ദുസലാം, ജംഷാദ് നാണി, എന്‍.പി. ജലാല്‍, ജാഫര്‍ മഞ്ഞപ്പറ്റ, കെ.ടി. ജലീല്‍, റഹീം എന്നിവര്‍ സംസാരിച്ചു. കൗണ്‍സില്‍ യോഗം 19ന് പഞ്ചായത്ത് മുസ്‌ലിം ലീഗ് ഓഫീസില്‍ നടക്കും.

ടെറ്റ് യോഗ്യത: പ്രതിഷേധ സംഗമം നടത്തി

മങ്കട: ടെറ്റ് യോഗ്യത നിർബന്ധമാക്കി കൊണ്ടുള്ള സുപ്രീം കോടതി വിധിയിൽ നിന്നും സർവീസിലിരിക്കുന്ന അധ്യാപകരെ സംരക്ഷിക്കണമെന്ന് ആവശ്യപ്പെട്ട് കെപിഎസ്ടിഎ സംസ്ഥാന കമ്മിറ്റിയുടെ ആഹ്വാനപ്രകാരം സംസ്ഥാനത്തെ മുഴുവൻ എഇഒകൾക്ക് മുന്നിലും പ്രതിഷേധ സംഗമം നടത്തുന്നത്തിന്‍റെ ഭാഗമായി മങ്കട ഉപജില്ലാ കെപിഎസ്ടിഎ കമ്മിറ്റി മങ്കട എഇഒ ഓഫീസിന് മുന്നിൽ പ്രതിഷേധ സംഗമം നടത്തി. സംസ്ഥാന നിർവാഹക സമിതി അംഗം കെ.വി. മനോജ്കുമാർ ഉദ്ഘാടനം ചെയ്തു. സി.കെ. ഗോപകുമാർ മുഖ്യാതിഥിയായിരുന്നു. സബ് ജില്ലാ പ്രസിഡന്‍റ് കെ.ടി. അബ്ദുൾ ഷുക്കൂർ അധ്യക്ഷത വഹിച്ചു. സംസ്ഥാന കൗൺസിലർ വി.എൽ. ജെയ്സി, റവന്യു ജില്ലാ വൈസ് പ്രസിഡന്‍റ് യു.കെ. അബുബക്കർ, സി.ആർ. ഹരീഷ്, ഒ. രാജഗോപാൽ , ആർ. ഷാജി എന്നിവർ പ്രസംഗിച്ചു.

മലബാർ ഗോൾഡ് ആൻഡ് ഡയമണ്ട്സ് ഏറ്റവും പുതിയ ആഭരണ ശ്രേണിയായ "വ്യാന' പുറത്തിറക്കി

പെരിന്തൽമണ്ണ: മലബാർ ഗോൾഡ് ആൻഡ് ഡയമണ്ട്സ് ഏറ്റവും പുതിയ ജെംസ്റ്റോൺ കളക്‌ഷൻ "വ്യാന' പുറത്തിറക്കി. ഓരോ സ്ത്രീയും പരസ്‌പരം വ്യത്യസ്തരെന്നപോല ഓരോ രത്നവും വ്യത്യസ്തമാണെന്ന വിശ്വാസത്തിൽനിന്ന് പ്രചോദനം ഉൾക്കൊണ്ടാണ് "വ്യാന' രത്നാഭരണശേഖരം രൂപകല്പന ചെയ്തിരിക്കുന്നത്. 18, 22 കാരറ്റ് സ്വർണത്തിൽ വൈവിധ്യമാർന്നതും ചാരുതയുള്ളതുമായ അമൂല്യരത്നങ്ങൾ ഉൾച്ചേർത്തുകൊണ്ട് ലൈറ്റ്‌വെയ്റ്റിൽ ട്രെൻഡി, ബോൾഡ് ഡിസൈനുകളിൽ അതി മനോഹരമായാണ് ഇവ നിർമിച്ചിട്ടുള്ളത്. പരമ്പരാഗതവും ഏറ്റവും പുതിയതുമായ ഡിസൈനുകൾ ഇഷ്ടപ്പെടുന്ന സ്ത്രീകൾക്ക് ഏറ്റവും അനുയോജ്യമായ രത്നാഭരണ കളക്‌ഷനാണിത്. ചടങ്ങിൽ സോണൽ ഹെഡ് ടി.കെ. അഷ്മാർ അധ്യക്ഷത വഹിച്ചു. ആദ്യ വില്പന അനു അനൂപിന് നൽകി സ്മിത മേനോൻ നിർവഹിച്ചു ഡോ. അമ്മു ശശി, ഷാൻസി, ദേവിക, കൗൺസിലർ നിഷ, റീന ജലാൽ, കവിത, കീർത്തന, സനീന തുടങ്ങിയവർ ചേർന്ന് ആഭരണങ്ങൾ പുറത്തിറക്കി. ചടങ്ങിൽ മലബാർ ഗോൾഡ് ജീവനക്കാരും നിരവധി ഉപഭോക്താക്കളും സന്നിഹിതരായിരുന്നു.

മീലാദ് റാലിയിൽ ദഫ്മുട്ട് കളിച്ച് താരമായി വൈഷ്ണവ്

കരുവാരകുണ്ട്: മദ്രസാ വിദ്യാർഥികളോടൊപ്പം ദഫ്മുട്ട് കളിച്ച് നാട്ടുകാരുടെ താരമായി മാറി വൈഷ്ണവ്. കരുവാരകുണ്ട് പുൽവട്ട കരിങ്കന്തോണി മദ്രസയുടെ നബിദിന റാലിയിലാണ് കരിങ്കന്തോണി അനിൽകുമാറിന്‍റെ മകൻ വൈഷ്ണവും പങ്കെടുത്തത്. മതസൗഹാർദത്തിനും സഹിഷ്ണുതയ്ക്കും കേളികേട്ട കരുവാരകുണ്ടുകാർക്ക് ഇത് പുതുമയല്ലെങ്കിലും വൈഷ്ണവിന്‍റെ ദഫുകളി വൈഭവം നാടിനെയൊന്നാകെ ആകർഷിച്ചു. രാവിലും ഇരവിലും കൂടെ കൂടി നടക്കുന്ന കൂട്ടുകാർ ദഫ്മുട്ട് പരിശീലിക്കാൻ മദ്രസയിലേക്ക് പോയപ്പോൾ കളിയിലും ചിരിയിലും ഒരുമിച്ചു കൂടുന്ന വൈഷ്ണവും കൂടെ പോയി. മദ്രസയിൽ കുട്ടികളുടെ കൂടെ വൈഷ്ണവും വന്നപ്പോൾ ഉസ്താദ് അവനെയും അവന്‍റെ ആഗ്രഹപ്രകാരം ദഫ് പരിശീലിപ്പിച്ചു. ഇന്നലെ നടന്ന മീലാദ് റാലിയിൽ കൂട്ടുകാരോടൊപ്പം തലയിൽ തൊപ്പി വച്ചും ജുബ്ബ ധരിച്ചും പ്രവാചക സ്നേഹത്തിന്‍റെ ആഘോഷ നിമിഷങ്ങളിൽ മതിമറന്ന് വൈഷ്ണവും അലിഞ്ഞു ചേർന്നു. വൈഷ്ണവിന്‍റെ ആത്മാർഥതയും താൽപര്യവും കൂട്ടുകാരോടുള്ള സ്നേഹവും ബന്ധവും കൂടിയാണ് കളിയിൽ ചുവടുപിഴക്കാതെ താളം പിടിച്ച് നല്ലൊരു കളിക്കാരനായി മാറ്റിയതെന്ന് പരിശീലകരായ ഉസ്താദുമാരും പറഞ്ഞു. കരിങ്കന്തോണി അനിൽകുമാറിന്‍റെയും വിനീതയുടെയും മകനാണ് വൈഷ്ണവ്.

കുണ്ടുവഴിയിൽ ഒരുകോടി രൂപയുടെ വികസന ഉദ്ഘാടനം

ഊർങ്ങാട്ടിരി: കുണ്ടുവഴി വാർഡിൽ വിവിധ ഫണ്ട്‌ ഉപയോഗിച്ച് പൂർത്തീകരിച്ച പ്രവൃത്തികളുടെ ഉദ്ഘാടനം പി.കെ. ബഷീർ എംഎൽഎ നിർവഹിച്ചു. ഗ്രാമപഞ്ചായത്ത് പ്രസിഡന്‍റ് സി. ജിഷ അധ്യക്ഷത വഹിച്ചു. വെടിയോട് കുണ്ടുവഴികുളം കാവുങ്ങൽ റോഡ്-30 ലക്ഷം, കുണ്ടുവഴി നെല്ലിക്കുന്ന് റോഡ്- രണ്ടു ലക്ഷം, ഉണ്ണിമുറ വന്നിലപറമ്പ് കുണ്ടുവഴി ആലിൻച്ചുവട് റോഡ് നവീകരണം- അഞ്ചുലക്ഷം, വന്നിലപറമ്പ് കുണ്ടുവഴി റോഡ് ഡ്രൈനെജ്- രണ്ടുലക്ഷം, കുണ്ടുവഴി ചുണ്ടത്തു റോഡ് പാർശ്വ സംരക്ഷണം- മൂന്നുലക്ഷം, വന്നിലപറമ്പ് നഗർ ഭവനസുരക്ഷ- 2.5 ലക്ഷം, വന്നിലപറമ്പ് ഭീമൻ കുഴി റോഡ്- 25 ലക്ഷം, ആലിൻച്ചുവട് കുണ്ടുവഴി റോഡ് ഡ്രൈനെജ്- അഞ്ചുലക്ഷം, ആലിൻച്ചുവട് മുഹമ്മദ്‌ അലി ഹാജിറോഡ്- ഒരുലക്ഷം എന്നിങ്ങനെയാണ് പദ്ധതികൾക്കായി ചെലവഴിച്ചത്. 25 ലക്ഷം രൂപ ചെലവഴിച്ച് പൂർത്തീകരിച്ച ചേലക്കോട് അങ്കണവാടി യുടെ ഉദ്ഘാടനം 26ന് നടക്കും. ഗ്രാമപഞ്ചായത്ത് വൈസ് പ്രസിഡന്‍റ് ഷിജോ ആന്‍റണി, സ്ഥിരം സമിതി അധ്യക്ഷരായ കെ. ഹലീമ, കെ. കെ. ഹസ്നത്ത്, കെ.ടി. മുഹമ്മദ്‌ കുട്ടി, ബ്ലോക്ക് മെമ്പർ ജമീല അയ്യൂബ്, മെമ്പർമാരായ അനുരൂപ്, സത്യൻ രായിൻകുട്ടി കെ. സൈനബ, ജമീല, ആസൂത്രണ സമിതി അംഗങ്ങളായ അനൂബ് മൈത്ര, പി.കെ. അബ്ദുറഹ്മാൻ, സി.ടി. റഷീദ്, എൻ.കെ. യൂസുഫ്, സി.ടി. അബ്ദുറഹ്മാൻ, രാഷ്ട്രീയ പാർട്ടി പ്രതിനിധികളായ കെ. ബിച്ചൂട്ടി, കെ. മുഹമ്മദ്‌ അബൂബക്കർ, ടി. മുജീബ് റഹ്മാൻ, കെ.കെ. സുജേഷ്, കെ.പി. രംഗനാഥൻ, യു. ഹനീഫ സംബന്ധിച്ചു.

"ആവശ്യങ്ങള്‍ക്കായി മുന്നിലെത്തുന്ന മനുഷ്യരോട് കാരുണ്യത്തോടെ പെരുമാറാന്‍ ഉദ്യോഗസ്ഥര്‍ക്ക് സാധിക്കണം'

പെരിന്തല്‍മണ്ണ: വിവിധ ആവശ്യങ്ങള്‍ക്കായി മുന്നിലെത്തുന്ന മനുഷ്യരോട് കാരുണ്യത്തോടെ പെരുമാറാന്‍ ഉദ്യോഗസ്ഥര്‍ക്ക് സാധിക്കണമെന്നും യുവതലമുറയില്‍ നിന്ന് സര്‍വീസിലെത്തുന്ന ഉദ്യോഗസ്ഥരുടെ ഭാഗത്ത് നിന്ന് ഇക്കാര്യത്തില്‍ മാതൃകാപരമായ സമീപനം ഉണ്ടാകുമെന്ന പ്രതീക്ഷയുണ്ടെന്നും പാണക്കാട് സയ്യിദ് സാദിഖലി ശിഹാബ് തങ്ങള്‍ പറഞ്ഞു. പെരിന്തല്‍മണ്ണ ഹൈദരലി ശിഹാബ് തങ്ങള്‍ ക്രിയ സിവില്‍ സര്‍വീസ് അക്കാദമിയില്‍ നിന്നും ഗ്രാമപഞ്ചായത്ത്, മുനിസിപ്പല്‍ സെക്രട്ടറിമാരായി സെലക്‌ഷന്‍ ലഭിച്ചവര്‍ക്കുള്ള അനുമോദന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ചടങ്ങില്‍ അക്കാദമി ചെയര്‍മാന്‍ നജീബ് കാന്തപുരം എംഎല്‍എ അധ്യക്ഷത വഹിച്ചു. ഫാത്തിമ ഹെല്‍ത്ത് കെയര്‍ ഗ്രൂപ്പ് ചെയര്‍മാന്‍ ഡോ. കെ.പി. ഹുസ്സയിന്‍, ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ, എ.കെ. നാസര്‍, അഡ്വ. എസ്. അബ്ദുസലാം, ലതിക സതീഷ്, ഡോ. രാംദാസ്, ചമയം ബാപ്പു, എ.വി. റഫീഖ്, റാഫി ഗള്‍ഫോണ്‍, ഡോ. ഖലീല്‍, തറയില്‍ മുസ്തഫ, ലത്തീഫ് കാപ്പുങ്ങല്‍, അസീസ് കൊളക്കാടന്‍, അഡ്വ. മുഹമ്മദ് റോഷിന്‍ സംസാരിച്ചു.

നവ കിരൺ പദ്ധതി പാളുന്നു : വനംവകുപ്പിന് നൽകിയ ഭൂമിയുടെ വില ലഭിക്കാതെ 23 കുടുംബങ്ങൾ

നിലമ്പൂർ: നവ കിരൺ പദ്ധതി പാളുന്നു.സ്വന്തം ഭൂമി വനംവകുപ്പിന് വിട്ടുനൽകിയ കുടുംബങ്ങൾക്ക് നാലുവർഷം കഴിഞ്ഞിട്ടും പണം ലഭിച്ചില്ല. വന വിസ്തൃതി കൂട്ടുക എന്ന ലക്ഷ്യത്തിന്‍റെ ഭാഗമായി സംസ്ഥാന സർക്കാർ 2021ൽ കൊണ്ടുവന്ന നവ കിരൺ പദ്ധതിയിൽ സ്വന്തം ഭൂമി വിട്ടു നൽകിയവരാണ് പെരുവഴിയിലായിരിക്കുന്നത്. പദ്ധതിയുടെ നടപടിക്രമങ്ങൾ ഒച്ചിന്‍റെ വേഗതയിലാണ് നീങ്ങുന്നത്. ഭൂമികൾ ഏറ്റെടുക്കാൻ തിടുക്കം കാണിച്ച വനംവകുപ്പ് ഭൂമിയുടെ നഷ്ടപരിഹാര തുക നൽകാതെ വട്ടം കറക്കുകയാണ്. മലപ്പുറംജില്ലയിലെ ചാലിയാർ പഞ്ചായത്തിലെ മലോടി നിവാസികളായ 23 കുടുംബങ്ങളാണ് തങ്ങളുടെ ഭൂമിയുടെ വില ലഭിക്കാതെ ദുരിതത്തിലായിരിക്കുന്നത്. ഒരു സെന്‍റ് മുതൽ മുതൽ അഞ്ചേക്കർ വരെയുള്ള സ്ഥലത്തിന് ഒരു കുടുംബത്തിന് വനംവകുപ്പ് നൽകുന്നത് 15 ലക്ഷം രൂപയാണ്. ഇതിൽ വീടുകൾ ഉണ്ടെങ്കിൽ അതിന് പണം ലഭിക്കുകയില്ല. വനത്തിലൂടെ കെഎസ്ഇബി വൈദ്യുത തൂണുകൾ സ്ഥാപിച്ചെങ്കിലും വനംവകുപ്പ് ഇതിന് അനുമതി നൽകിയില്ല. ഇതേ തുടർന്നാണ് ഒരു നിർവാഹവുമില്ലാതെ ഏക്കറിന് കുറഞ്ഞത് 30 ലക്ഷം രൂപ വരെ ലഭിക്കാൻ സാധ്യതയുണ്ടായിരുന്ന സ്ഥലങ്ങൾ വെറും 15 ലക്ഷം രൂപക്ക് ഓരോ കുടുംബവും നൽകാൻ തയാറായത്. ഉടൻ പണം ലഭിക്കും, അതിനാൽ റബർ ഉൾപ്പെടെയുള്ള മരങ്ങൾ വെട്ടി നീക്കാൻ വനംവകുപ്പ് ആവശ്യപ്പെട്ടതോടെ ടാപ്പിംഗ് നടത്തുകയായിരുന്ന റബർ മരങ്ങൾ ഉൾപ്പെടെ സ്ഥലം ഉടമകൾ കിട്ടിയ വിലയ്ക്ക് മുറിച്ചുനൽകി. ആറ് മാസത്തിനുള്ളിൽ പണം നൽകാമെന്ന വനം ഉദ്യോഗസ്ഥരുടെ വാക്കിൽ വിശ്വസിച്ചാണ് പുള്ളിപ്പാടം വില്ലേജിലെ മലോടി നിവാസികൾ 2021 നവംബർ 26ന് വനംവകുപ്പ് നിർദേശപ്രകാരം ഭൂമി നൽകാൻ തയാറാണെന്ന് കാണിച്ച് വനംവകുപ്പിന് അപേക്ഷ നൽകിയത്. ഇതിനുശേഷം നാല് തവണ വനംവകുപ്പ് ആവശ്യപ്പെട്ട രേഖകൾ ഉണ്ടാക്കാൻ ഓരോ കുടുംബത്തിനും 8000 രൂപ വീതം ചെലവായി. എന്നാൽ ഇപ്പോൾ നാലുവർഷം പിന്നിട്ടിട്ടും നഷ്ടപരിഹാരം മാത്രം ലഭിച്ചില്ല. അതേസമയം പദ്ധതിയിൽപ്പെട്ട കുടുംബൾക്ക് രണ്ട് മാസത്തിനുള്ളിൽ പണം നൽകാൻ കഴിയുമെന്ന് വനംവകുപ്പ് അധികൃതർ പറയുന്നു. പദ്ധതിക്ക് കേരളത്തിൽ ആകെ ഒരു തഹസിൽദാർ മാത്രമാണുള്ളതെന്നും അതാണ് കാലതാമസത്തിന് ഇടയാക്കിയതെന്നും മലോടിയിലെ 23 കുടുംബങ്ങൾക്ക് നൽകാനുള്ള പണം കിഫ് ബി ഫണ്ടിൽ ഉണ്ടെന്നുമാണ് വനംവകുപ്പിന്‍റെ വിശദീകരണം. എന്നാൽ വനംവകുപ്പിനെ വിശ്വസിച്ച് ഭൂമി നൽകാൻ തയാറായ കുടുംബങ്ങളാണ് വാടകവീടുകളിലും ബന്ധുവീടുകളിലുമായി കഴിയുന്നത്. പലരും പണമില്ലാത്തതിനാൽ ചികത്സ പോലും നടത്താൻ കഴിയാത്ത അവസ്ഥയിലാണ്. ബീരാൻകുട്ടിയും കമലയും വത്സലയും നാരായണിയും സന്തോഷും ഷൗക്കത്തും ലത്തീഫുമെല്ലാം ആവശ്യപ്പെടുന്നത് തങ്ങളുടെ ഭൂമിയുടെ ന്യായവിലയാണ്.

നായ കുറുകെ ചാടി ബൈക്ക് മറിഞ്ഞ് പരിക്കേറ്റ യുവതി മരിച്ചു

മേലാറ്റൂർ: മകന്‍റെ കൂടെ ബൈക്കിൽ സഞ്ചരിക്കവേ നായ കുറകെ ചാടി ബൈക്ക് മറിഞ്ഞ് പരിക്കേറ്റ യുവതി മരിച്ചു. മേലാറ്റൂർ കിഴക്കുംപാടം കട്ടിലശേരി ഉമ്മർ മുസ്ല്യാരുടെ ഭാര്യ സലീന (40) യാണ് മരിച്ചത്. വ്യാഴാഴ്ച രാത്രി അലനല്ലൂരിൽ വച്ചാണ് അപകടം സംഭവിച്ചത്. മകന്‍റെ കൂടെ ബൈക്കിൽ സഞ്ചരിക്കവേ റോഡിന് കുറുകെ ഓടിയ നായയെ തട്ടി ബൈക്ക് മറിയുകയായിരുന്നു. ഉടൻ തന്നെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിച്ചെങ്കിലും ഇന്നലെ രാവിലെ മരിക്കുക‍യായിരുന്നു. മക്കൾ: മുഹമ്മദ് ഷമ്മാസ് ഹുദവി, ഷംസാദ് അബ്ദുള്ള, ഷാൻ അഹമ്മദ്.

ബസിടിച്ച് പരിക്കേറ്റ യുവാവ് മരിച്ചു

മഞ്ചേരി: ബസ്ടിച്ച് പരിക്കേറ്റ് ചികിത്സയിലായിരുന്ന യുവാവ് മരിച്ചു. മരണപ്പെട്ടയാളെ തിരിച്ചറിയാനായിട്ടില്ല. ഇക്കഴിഞ്ഞ 11ന് രാത്രി ഒമ്പതു മണിയോടെ മഞ്ചേരി പുല്ലാര മൂച്ചിക്കലിലാണ് അപകടം. റോഡില്‍ അലഞ്ഞു തിരിഞ്ഞ് നടക്കുകയായിരുന്ന യുവാവ് ബസിനു മുന്നിലേക്ക് എടുത്തുചാടുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. മഞ്ചേരിയില്‍ നിന്നും കോഴിക്കോട്ടേക്ക് പോകുകയായിരുന്ന ബാബു ബസിന് മുന്നിലേക്കാണ് ഇയാള്‍ ചാടിയത്. ഉടന്‍ ഓടിക്കൂടിയ നാട്ടുകാര്‍ യുവാവിനെ ആദ്യം മഞ്ചേരി മെഡിക്കല്‍ കോളജ് ആശുപത്രിയിലും തുടര്‍ന്ന് കോഴിക്കോട് മെഡിക്കല്‍ കോളജ് ആശുപത്രിയിലും എത്തിച്ചെങ്കിലും വെള്ളിയാഴ്ച ഉച്ചയോടു കൂടി മരണം സംഭവിക്കുകയായിരുന്നു. മാനസികാസ്വാസ്ഥ്യം പ്രകടിപ്പിച്ചിരുന്ന യുവാവിന് ഏകദേശം നാല്പതു വയസു തോന്നിക്കും. ജഡ പിടിച്ച നീണ്ട കറുത്ത മുടിയും താടിയുമുള്ള യുവാവിന് 174 സെന്‍റി മീറ്റര്‍ ഉയരവുമുണ്ട്. മഞ്ചേരി എസ്ഐ എന്‍. സുഭാഷ് ഇന്‍ക്വസ്റ്റ് ചെയ്ത മൃതദേഹം പോസ്റ്റ്‌മോര്‍ട്ടത്തിന് ശേഷം കോഴിക്കോട് മെഡിക്കല്‍ കോളജ് മോര്‍ച്ചറിയില്‍ സൂക്ഷിച്ചിരിക്കയാണ്. ഇയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ 9497990103 (ഡിവൈഎസ്പി, മലപ്പുറം), 7907478809 (എസ്ഐ, മഞ്ചേരി), 0483 2766852 (മഞ്ചേരി പൊലീസ് സ്റ്റേഷന്‍) എന്നീ നമ്പരുകളില്‍ ബന്ധപ്പെടണം.

വാഹന ഗതാഗതം നിരോധിച്ചു

മലപ്പുറം: ജില്ലയിൽ 6, 17 തിയതികളിൽ എക്സൈസ് ആൻഡ് പ്രൊഹിബിഷൻ വകുപ്പിൽ സിവിൽ എക്സൈസ് ഓഫീസർ (ട്രെയിനി) (കാറ്റഗറി നന്പർ 743/2024), സിവിൽ എക്സൈസ് ഓഫീസർ (ട്രെയിനി) (രണ്ട്- എൻസിഎ ഒബിസി) (കാറ്റഗറി നന്പർ 455/2024), വനിത സിവിൽ എക്സൈസ് ഓഫീസർ (ട്രെയിനി) (രണ്ട്- എൻസിഎ-എസ്ടി) (കാറ്റഗറി നന്പർ 515/2023) എന്നീ തസ്തികകളുടെ തെരഞ്ഞെടുപ്പിനായി പ്രസിദ്ധീകരിച്ച ചുരുക്കപ്പട്ടികയിൽ ഉൾപ്പെട്ട ഉദ്യോഗാർഥികൾക്കുള്ള എൻഡ്യൂറൻസ് ടെസ്റ്റ് നടക്കും. പരീക്ഷാ സമയം തീരുന്നതുവരെ കോട്ടക്കൽ ബൈപാസ് ഫസ്റ്റ് ആൻഡ് സെക്കൻഡ് റീച്ച് റോഡിൽ പുത്തൂർ ജംഗ്ഷൻ മുതൽ രണ്ടര കിലോമീറ്റർ ദൂരം വാഹന ഗതാഗതം നിരോധിച്ചു. വാഹനങ്ങൾ തിരൂർ-മലപ്പുറം റോഡ് വഴി തിരിഞ്ഞു പോകണം. പയ്യനങ്ങാടി-പനന്പാലം റോഡിൽ നിർമാണ പ്രവൃത്തികൾ ആരംഭിക്കുന്നതിനാൽ ഈ റോഡിലൂടെയുള്ള വാഹനഗതാഗതം ഇന്ന് മുതൽ പ്രവൃത്തി പൂർത്തീകരിക്കുന്നത് വരെ പൂർണമായും നിരോധിച്ചു. ഇതുവഴി പോകേണ്ട വാഹനങ്ങൾ പയ്യനങ്ങാടി-വൈലത്തൂർ- കടുങ്ങാത്തുകുണ്ട് വഴി പോകണം.

മക്കരപ്പറന്പിൽ വെൽഫെയർ ഹോം സമർപ്പിച്ചു

മക്കരപ്പറന്പ്: ഭൂമി നിഷേധിക്കപ്പെട്ട അധഃസ്ഥിത പിന്നാക്ക വിഭാഗങ്ങളുൾപ്പെടെ മുഴുവൻ ഭൂരഹിതർക്കും ഭൂമി അനുവദിച്ച് നൽകാൻ സർക്കാർ തയാറാകണമെന്നും അതിനായി കുത്തകകൾ കൈവശപ്പെടുത്തിയ ഹെക്ടർ കണക്കിന് ഭൂമി പിടിച്ചെടുക്കണമെന്നും വെൽഫെയർ പാർട്ടി അഖിലേന്ത്യാ വൈസ് പ്രസിഡന്‍റ് ഹമീദ് വാണിയന്പലം ആവശ്യപ്പെട്ടു. വെൽഫെയർ പാർട്ടി മക്കരപ്പറന്പ് പഞ്ചായത്ത് കമ്മിറ്റി ചെട്ടിയാരങ്ങാടിയിൽ വിധവയായ സ്ത്രീക്ക് നിർമിച്ചു നൽകിയ വീടിന്‍റെ താക്കോൽദാനം നിർവഹിച്ച് സംസാരിക്കുകയായിരുന്നു അദ്ദേഹം. ചടങ്ങിൽ വെൽഫെയർ പാർട്ടി മക്കരപ്പറന്പ് പഞ്ചായത്ത് പ്രസിഡന്‍റ് ജാബിർ വടക്കാങ്ങര അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് ആരിഫ് ചുണ്ടയിൽ, കോണ്‍ഗ്രസ് ബ്ലോക്ക് വൈസ് പ്രസിഡന്‍റ് പി. ശിവദാസൻ, വെൽഫെയർ പാർട്ടി മങ്കട മണ്ഡലം പ്രസിഡന്‍റ് കെ.പി. ഫാറൂഖ്, മക്കരപ്പറന്പ് ഗ്രാമപഞ്ചായത്ത് വികസന സ്ഥിരംസമിതി അധ്യക്ഷൻ പട്ടാക്കൽ ഹബീബുള്ള, വാർഡ് മെന്പർമാരായ സാബിറ കുഴിയേങ്ങൽ, കെ. സുഹ്റ, സി.കെ. സുധീർ, ചെട്ടിയാരങ്ങാടി യൂണിറ്റ് പ്രസിഡന്‍റ് സഹദ് എന്നിവർ പ്രസംഗിച്ചു.

അട്യാ പാട്യാ സംസ്ഥാന ചാന്പ്യൻഷിപ്പ് ഇന്ന് മുതൽ

നിലന്പൂർ: മലപ്പുറം ജില്ലാ അട്യാ പാട്യാ അസോസിയേഷന്‍റെ നേതൃത്വത്തിൽ നിലന്പൂരിൽ നടക്കുന്ന സംസ്ഥാന പുരുഷ, വനിതാ ചാന്പ്യൻഷിപ്പിന് എംഎസ് എൻഎസ്എസ് ഹയർ സെക്കൻഡറി സ്കൂളിൽ ഇന്ന് രാവിലെ ഒന്പതിന് സംസ്ഥാന പ്രസിഡന്‍റ് അബ്ദുൾ റഹ്മാൻ പതാക ഉയർത്തുന്നതോടെ തുടക്കമാകും. ജില്ലാ പതാക ജില്ലാ അട്യാ പാട്യാ അസോസിയേഷൻ വൈസ് പ്രസിഡന്‍റുമാരായ വി.എ. അനിൽകുമാർ, ജോണ്‍സണ്‍ ടി. സൈമണ്‍ എന്നിവർ ചേർന്ന് ഉയർത്തും. 8.30 മുതൽ മത്സരങ്ങൾ തുടങ്ങും. വൈകുന്നേരം 3.30ന് ആര്യാടൻ ഷൗക്കത്ത് എംഎൽഎ എൻഎസ്എസ് സ്കൂൾ പരിസരത്ത് മേള ഉദ്ഘാടനം ചെയ്യും. സ്കൂൾ മാനേജർ സുരേഷ് കുമാർ അധ്യക്ഷത വഹിക്കും. അസോസിയേഷൻ സംസ്ഥാന പ്രസിഡന്‍റ് ടി.എം. അബ്ദുറഹ്മാൻ മുഖ്യപ്രഭാഷണം നടത്തും. സംസ്ഥാന സ്പോർട്സ് കൗണ്‍സിൽ സ്റ്റാൻഡിംഗ് കമ്മിറ്റി അംഗം ശ്രീകുമാർ മുഖ്യാതിഥി ആയിരിക്കും. കനത്ത ചൂട് കാരണം രാവിലെ തുടങ്ങുന്ന മത്സരങ്ങൾ ഉച്ചയ്ക്ക് 11 ന് സമാപിക്കും.ഫൈനൽ മത്സരങ്ങൾ ഞായറാഴ്ചയാണ്. സമാപന സമ്മേളനം നിലന്പൂർ നഗരസഭാധ്യക്ഷൻ മാട്ടുമ്മൽ സലീം ഉദ്ഘാടനം ചെയ്യും.

എംഎൽഎ ഫണ്ട് ഉപയോഗിച്ചുള്ള പ്രവൃത്തിയിൽ അഴിമതി ആരോപണം

വണ്ടൂർ: വണ്ടൂർ അങ്ങാടിയിൽ ഗ്രാമപഞ്ചായത്തിന്‍റെ ഉടമസ്ഥതയിലുള്ള സ്ഥലത്ത് എംഎൽഎ ഫണ്ട് വിനിയോഗിച്ച് നടക്കുന്ന പ്രവൃത്തിയിൽ അശാസ്ത്രീയതയും അഴിമതിയും ആരോപിച്ച് മോട്ടോർ തൊഴിലാളി യൂണിയൻ സിഐടിയു രംഗത്ത്. ബ്ലോക്ക്, ഗ്രാമപഞ്ചായത്തുകൾ അറിയാതെ അക്രഡിറ്റഡ് ഏജൻസി വഴി നടത്തുന്ന പ്രവൃത്തിയിൽ അഴിമതി മുന്നിൽ കണ്ടുള്ള അവസരമാണ് എംഎൽഎ ഒരുക്കിയിരിക്കുന്നതെന്നും നേതാക്കൾ ആരോപിച്ചു. നിലവിൽ ടാക്സി സ്റ്റാൻഡായി ഉപയോഗിച്ചുവരുന്ന പഞ്ചായത്തിന്‍റെ ഉടമസ്ഥതയിലുള്ള പഴയ ബസ് സ്റ്റാൻഡ് സ്ഥലത്താണ് എംഎൽഎ ഫണ്ടിൽ നിന്ന് 40 ലക്ഷം വകയിരുത്തിയുള്ള പ്രവൃത്തി ആരംഭിച്ചിട്ടുള്ളത്. മണ്ണുമാന്തി ഉപയോഗിച്ച് നിരപ്പാക്കുന്ന ജോലിയാണ് നടക്കുന്നത്. ഇതോടെ ഇവിടം ടാക്സി സ്റ്റാൻഡായി ഉപയോഗിച്ച് വരുന്ന ഡ്രൈവർമാർ ദുരിതത്തിലായിരിക്കുകയാണ്. പ്രവൃത്തി പൂർത്തിയായാൽ പഴയപടി തങ്ങളുടെ വാഹനങ്ങൾ അവിടെ പാർക്ക് ചെയ്യാനുള്ളഅവസരം ഉണ്ടാകണമെന്നാണ് ഇവരുടെ ആവശ്യം. ഏകദേശം നാൽപ്പതോളം വാഹനങ്ങളാണ് പാർക്ക് ചെയ്തിരുന്നത്. ടാക്സി ഡ്രൈവർമാരുടെ പ്രതിഷേധം ശക്തമായതോടെയാണ് മോട്ടോർ തൊഴിലാളി യൂണിയൻ സിഐടിയു ഭാരവാഹികൾ രംഗത്തെത്തിയത്. ഇവരുടെ നേതൃത്വത്തിൽ പ്രവൃത്തികൾ നടക്കുന്ന സ്ഥലം സന്ദർശിച്ചു. ഉയരത്തിന്‍റെ കാര്യത്തിൽ അടക്കം മാറ്റങ്ങൾ വരുത്തണമെന്ന് കരാറുകാരോട് നിർദേശിച്ചിട്ടുണ്ട്. തുടർന്ന് ബ്ലോക്ക്, ഗ്രാമപഞ്ചായത്ത് അധികൃതർക്ക് നിവേദനം നൽകി. എന്നാൽ നിർമാണത്തിന്‍റെ മറവിൽ തീവെട്ടി കൊള്ള നടത്തുകയാണെന്ന് സിഐടിയു നേതാവ് എം. മോഹൻദാസ് ആരോപിച്ചു. നിലവിൽ നടക്കുന്ന പ്രവൃത്തികൾ അശാസ്ത്രീയമാണെന്നും ഇത് പൊതുജനങ്ങൾക്ക് ഉപയോഗിക്കാൻ കഴിയില്ലെന്നും അഡ്വ. അനിൽ ആരോപിച്ചു.

സ്വകാര്യ ധനകാര്യ സ്ഥാപനങ്ങളിൽ പെണ്‍കുട്ടികൾ അരക്ഷിതരെന്ന്

വനിതാ കമ്മീഷൻ സിറ്റിംഗ് നടത്തി മലപ്പുറം: സംസ്ഥാന വനിതാ കമ്മീഷൻ അംഗം വി.ആർ. മഹിളാമണിയുടെ നേതൃത്വത്തിൽ മലപ്പുറം കളക്ടറേറ്റ് കോണ്‍ഫറൻസ് ഹാളിൽ നടത്തിയ വനിതാ കമ്മീഷൻ അദാലത്തിൽ 50 പരാതികൾ പരിഗണിച്ചു. 17 പരാതികൾ തീർപ്പാക്കി. 23 പരാതികൾ അടുത്ത സിറ്റിംഗിലേക്ക് മാറ്റിവച്ചു. രണ്ട് പരാതികൾ ജാഗ്രത സമിതിയുടെ റിപ്പോർട്ട് തേടി. എട്ട് കേസുകൾ പോലീസ് റിപ്പോർട്ടിനായി നൽകി. വിവാഹ ശേഷം ദന്പതികൾ തമ്മിൽ അകന്നുപോകുന്ന പ്രവണത കൂടുന്നു. വിവാഹത്തിന് മുന്പും ശേഷവും കൗണ്‍സിലിംഗ് നിർബന്ധമാക്കണം. സ്വകാര്യധനകാര്യ സ്ഥാപനങ്ങളിൽ പെണ്‍കുട്ടികൾ അരക്ഷിതരാണ്. പല വലിയ സാന്പത്തിക തട്ടിപ്പും സ്ഥാപന മേധാവികളേക്കാൾ ബാധിക്കുന്നത് അവിടെ ജോലി ചെയ്യുന്ന പെണ്‍കുട്ടികളെയാണെന്നും ഈ വിഷയത്തിൽ സമഗ്രമായ പഠനം ആവശ്യമാണെന്നും കമ്മീഷൻ അംഗം വി.ആർ. മഹിളാമണി പറഞ്ഞു. അദാലത്തിൽ അഡ്വ. സുകൃത, ഫാമിലി കൗണ്‍സിലർ പി.പി. ഷൈനി, വനിത കമ്മീഷൻ സിഐ ജോസ് കുര്യൻ, വനിതാ സെൽ പോലീസ് ഉദ്യോഗസ്ഥർ, കമ്മീഷൻ ഓഫീസ് ജീവനക്കാർ എന്നിവർ പങ്കെടുത്തു.

അനധികൃത ചെങ്കൽ ഖനനത്തിനെതിരേ സിപിഎം മാർച്ച് നടത്തി

മങ്കട: അനധികൃത ചെങ്കൽ ഖനനത്തിനെതിരേ പുഴക്കാട്ടിരി ഗ്രാമപഞ്ചായത്ത് ഓഫീസിലേക്ക് സിപിഎം പഞ്ചായത്ത് കമ്മിറ്റിയുടെ നേതൃത്വത്തിൽ ബഹുജന മാർച്ച് നടത്തി. ഏരിയ കമ്മിറ്റി അംഗം വി.പി. അയ്യപ്പൻ ഉദ്ഘാടനം ചെയ്തു. ലോക്കൽ കമ്മിറ്റി അംഗം കെ.ടി. ജയദേവൻ അധ്യക്ഷത വഹിച്ചു. പ്രദേശവാസികൾക്ക് ദുരിതമുണ്ടാക്കുന്ന പാലൂർകോട്ടയിലെ ചെങ്കൽ ക്വാറി ഖനനം നിർത്തി വയ്ക്കാൻ യുഡിഎഫ് ഭരണസമിതി തയാറാകണമെന്നാവശ്യപ്പെട്ടായിരുന്നു മാർച്ച്. പാരിസ്ഥിതിക സന്തുലിതാവസ്ഥ തകർക്കുന്ന ഖനനത്തിനെതിരേ കോടതിയെ സമീപിക്കാൻ ഭരണസമിതി തയാറകണമെന്ന് വി.പി. അയ്യപ്പൻ ആവശ്യപ്പെട്ടു. സർക്കാരിനെ പഴിചാരി പഞ്ചായത്ത് ഭരണസമിതി ഉത്തരവാദിത്വത്തിൽ നിന്ന് ഒഴിഞ്ഞുനിൽക്കുന്നത് ജനങ്ങളെ വഞ്ചിക്കാനാണെന്നും അദ്ദേഹം ചൂണ്ടിക്കാട്ടി. ഉണ്ണി പാതിരിക്കോട്, സി. ശശികുമാർ, കെ.ടി. അബ്ദുസമദ്, സിപിഎം ലോക്കൽ സെക്രട്ടറി എൻ. ഗോപാലകൃഷ്ണൻ, കെ.പി. അബ്ദുൾ ഗഫൂർ എന്നിവർ പ്രസംഗിച്ചു.

ഏലംകുളത്ത് "ഹർ ഘർ ജൽ’ പ്രഖ്യാപനം മന്ത്രി നിർവഹിച്ചു

ഏലംകുളം: ഏലംകുളം ഗ്രാമപഞ്ചായത്തിലെ ഹർ ഘർ ജൽ പ്രഖ്യാപനം ജലവിഭവ മന്ത്രി റോഷി അഗസ്റ്റിൻ നിർവഹിച്ചു. പഞ്ചായത്തിലെ എല്ലാ വീടുകളിലും അങ്കണവാടികളിലും സ്കൂളുകളിലും കുടിവെള്ളം ലഭ്യമാക്കിയതിന്‍റെ പ്രഖ്യാപനമാണ് മന്ത്രി നടത്തിയത്. കേന്ദ്ര, സംസ്ഥാന പദ്ധതിയായ ജൽ ജീവൻ മിഷൻ പ്രവൃത്തിയിൽ ഉൾപ്പെടുത്തിയാണ് പദ്ധതി നടപ്പാക്കിയത്. ഏലംകുളം ലിഫ്റ്റ് ഇറിഗേഷൻ പദ്ധതിക്ക് ഒരുകോടി രൂപ അനുവദിച്ചതായും മന്ത്രി ചടങ്ങിൽ പ്രഖ്യാപിച്ചു. ഏലംകുളം സർവീസ് സഹകരണ ബാങ്ക് ഹാളിൽ നടന്ന പരിപാടിയിൽ നജീബ് കാന്തപുരം എംഎൽഎ അധ്യക്ഷത വഹിച്ചു. ഏലംകുളം ഗ്രാമപഞ്ചായത്ത് പ്രസിഡന്‍റ് പി. സുധീർ ബാബു, പെരിന്തൽമണ്ണ ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ, ഏലംകുളം പഞ്ചായത്ത് വൈസ് പ്രസിഡന്‍റ് അനിത പള്ളത്ത്, വികസന സ്റ്റാൻഡിംഗ് കമ്മിറ്റി ചെയർമാൻ എൻ.പി. ഉണ്ണികൃഷ്ണൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ഫസീല മാജിദ്, വാട്ടർ അഥോറിറ്റി ഉത്തരമേഖല ചീഫ് എൻജിനിയർ പി.എസ്. പ്രദീപ്, സൂപ്രണ്ടന്‍റ് എൻജിനിയർ എസ്. സത്യവിത്സൻ, വിവിധ രാഷ്ട്രീയപാർട്ടി പ്രതിനിധികൾ എന്നിവർ ചടങ്ങിൽ സംസാരിച്ചു.

ആർദ്ര കേരളം പുരസ്കാരം; വഴിക്കടവ് പഞ്ചായത്തിന് ഒന്നാംസ്ഥാനം

എടക്കര: ആരോഗ്യ മേഖലയിൽ മികച്ച പ്രവർത്തനങ്ങൾ കാഴ്ചവച്ച തദ്ദേശ സ്ഥാപനങ്ങൾക്കുള്ള ആർദ്ര കേരളം പുരസ്കാരത്തിൽ നേട്ടവുമായി വഴിക്കടവ് ഗ്രാമപഞ്ചായത്ത്. മലപ്പുറം ജില്ലയിൽ ഒന്നാം സ്ഥാനം നേടിയാണ് വഴിക്കടവ് ഗ്രാമപഞ്ചായത്ത് മികവ് കാട്ടിയത്. ആരോഗ്യ മേഖലയിൽ ചെലവഴിച്ച തുക, സാന്ത്വന പരിചരണ പരിപാടികൾ, കായകൽപ്പ് സ്കോർ, ഹെൽത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവർത്തനങ്ങൾ എന്നിവ പരിഗണിച്ചാണ് പുരസ്കാരത്തിനായി വഴിക്കടവിനെ തെരഞ്ഞെടുത്തത്. കൂടാതെ പ്രതിരോധ കുത്തിവയ്പ്, വാർഡുതല പ്രവർത്തനങ്ങൾ, പ്രാദേശിക ആരോഗ്യ ആവശ്യങ്ങൾക്ക് അനുസൃതമായ നൂതന ഇടപെടലുകൾ, സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങൾ ഒരുക്കൽ, ആധുനിക മരുന്നുകൾ, ആയുർവേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും പുരസ്കാരത്തിനായി പരിഗണിക്കപ്പെട്ടു. അഞ്ച് ലക്ഷം രൂപയും പ്രശംസാപത്രവുമാണ് പുരസ്കാരമായി ലഭിക്കുക. ചാലിയാർ ഗ്രാമപഞ്ചായത്ത് രണ്ടാം സ്ഥാനവും പോത്തുകൽ ഗ്രാമപഞ്ചായത്ത് മൂന്നാം സ്ഥാനവും നേടി.

പ്രദീപിന്‍റേത് മികവിന്‍റെ അംഗീകാരം

നിലന്പൂർ: ജില്ലയിലെ വനം വിജിലൻസിന് മികവിന്‍റെ അംഗീകാരം. പ്രദീപിന് ഇത് പ്രവർത്തന മികവിന്‍റെ അംഗികാരവും. മുഖ്യമന്ത്രിയുടെ 2025 വർഷത്തെ ഫോറസ്റ്റ് മെഡലിന് അർഹരായവരിൽ നിലന്പൂർ വനം വിജിലൻസിലെ ബീറ്റ് ഫോറസ്റ്റ് ഓഫീസർ എൻ.പി. പ്രദീപ് കുമാറുമുണ്ട്. സംസ്ഥാനത്തെ മികച്ച വന സംരക്ഷണ പ്രവർത്തനങ്ങൾ കാഴ്ചവച്ച 26 പേരാണ് ഇക്കുറി മുഖ്യമന്ത്രിയുടെ ഫോറസ്റ്റ് മെഡലിന് അർഹത നേടിയത്. ജില്ലയിൽ രണ്ട് പേർ മാത്രമാണ് ഇതിൽ ഇടം പിടിച്ചിട്ടുള്ളത്. അതിൽ ഒരാളാകാൻ കഴിഞ്ഞതിൽ വനം വിജിലൻസ് വിഭാഗത്തിന് അഭിമാനിക്കാം. ജില്ലാ ആസ്ഥാനത്തിനോട് ചേർന്ന് കിടക്കുന്ന പഴമള്ളൂർ എന്ന ഗ്രാമത്തിലെ ഒരു സാധാരണ കുടുംബത്തിൽ ജനിച്ച അവാർഡ് ജേതാവ് രസതന്ത്രത്തിൽ ബിരുദാനന്തര ബിരുദവും അധ്യാപക പരീശീലനവും നേടിയ ശേഷം അധ്യാപക ജോലിയിലായിരിക്കുന്പോഴാണ് വനം-വന്യജീവി വകുപ്പിൽ ജോലിയിൽ പ്രവേശിക്കുന്നത്. പരിസ്ഥിതിയോടും പ്രകൃതിയോടും വനത്തിനോടുമുള്ള താൽപര്യം കൊണ്ടാണ് വനംവകുപ്പിലെ ജോലി തെരഞ്ഞെടുത്തത്. ഒരു വ്യാഴവട്ടത്തോളമായി വനം വകുപ്പിൽ പ്രമാദമായ ഒട്ടനവധി കേസുകൾ കൈകാര്യം ചെയ്യുന്നതിന്‍റെ അമരക്കാരനായും രഹസ്യാന്വേഷണത്തിലും സുപ്രധാന വിവരശേഖരണത്തിലും തന്‍റേതായ കഴിവ് തെളിയിച്ച വ്യക്തിയാണ്. കൂടാതെ നിരവധി ചന്ദന കേസുകൾ, വന്യമൃഗവേട്ട കേസുകൾ എന്നിവ പിടികൂടുന്നതിലും കുറ്റകൃത്യങ്ങൾക്ക് പിന്നിൽ പ്രവർത്തിക്കുന്നവരെ നിയമത്തിന് മുന്നിൽ കൊണ്ടുവരുന്നതിനും ഈ ചെറിയ കാലയളവിലെ നേട്ടമായി കാണുന്നു. നിഷ്പക്ഷമായും നിയമാനുസൃതമായും തന്നിലേൽപ്പിക്കുന്ന ഉത്തരവാദിത്വങ്ങൾ നിർവഹിക്കുന്ന ജില്ലയിലെ തന്നെ സൗമ്യനായ വനം ഉദ്യോസ്ഥനാണ് പ്രദീപ് കുമാർ. കോഴിക്കോട് വനം വിജിലൻസ് ഡിവിഷനു കീഴിൽ ജില്ലയിലെ നിലന്പൂർ ആസ്ഥാനമായാണ് ഇപ്പോൾ പ്രവർത്തിക്കുന്നത്. മങ്കട- കുറുവ ഗ്രാമപഞ്ചായത്തിലെ പഴമള്ളൂർ ചെണ്ടക്കോട്ട് പറന്പിൽ ഗോപാലൻ-സുലോചന ദന്പതിമാരുടെ മക്കളിൽ മൂന്നാമത്തെയാളാണ് അവാർഡിന് അർഹനായ എൻ.പി. പ്രദീപ് കുമാർ. ഭാര്യ രഷ്ലി. ആർഷ്യ, ആയുഷ് എന്നിവർ മക്കളുമാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]