മാർ തോമസ് തറയിലിന്‍റെ സ്ഥാനാരോഹണം : Deepika.com Nattu Visesham

KOTTAYAM

മാർ തോമസ് തറയിലിന്‍റെ സ്ഥാനാരോഹണം

Thursday, October 31, 2024 5:46 AM IST

ചങ്ങനാശേരി: ചങ്ങനാശേരിക്ക് ആത്മീയവും ബൗദ്ധികവും സാംസ്‌കാരികവുമായ പ്രഭ ചൊരിയുന്ന അതിരൂപതയ്ക്ക് പുതിയ ഇടയന്‍റെ സ്ഥാനാരോഹണം അഭിമാനനിമിഷം. ധന്യവും പവിത്രവുമായ ചടങ്ങിന് ചങ്ങനാശേരി നഗരവും മെത്രാസനമന്ദിരവും സെന്‍റ് മേരീസ് മെത്രാപ്പോലീത്തന്‍ പള്ളിയും ഒരുങ്ങിക്കഴിഞ്ഞു.

സ്വാഗത കമാനങ്ങളാലും തോരണങ്ങളാലും നാടും നഗരവും കമനീയമാക്കി. ആദരവും ആഹ്ലാദവും കൃതജ്ഞതയുമായാണ് ചങ്ങനാശേരി ജനാവലി സ്ഥാനാരോഹണ ശുശ്രൂഷകള്‍ക്കായി കാത്തിരിക്കുന്നത്.

2007 മാര്‍ച്ച് 19ന് മാര്‍ ജോസഫ് പെരുന്തോട്ടത്തിന്‍റെ സ്ഥാനാരോഹണം കഴിഞ്ഞ് 17 വര്‍ഷത്തിനുശേഷമാണ് മെത്രാപ്പോലീത്തന്‍പള്ളിയില്‍ ആര്‍ച്ച്ബിഷപ്പായി മാര്‍ തോമസ് തറയിലിന്‍റെ സ്ഥാനാരോഹണം നടക്കുന്നത്. മഹാജൂബിലി വര്‍ഷമായ 2000ല്‍ വത്തിക്കാന്‍ ന്യുണ്‍ഷ്യോ ആര്‍ച്ച്ബിഷപ് മാര്‍ ജോര്‍ജ് കോച്ചേരിയുടെ മെത്രാഭിഷേകം അതിവിപുലമായ ആഘോഷമായിരുന്നു.

മെത്രാപ്പോലീത്തന്‍ പള്ളി അങ്കണത്തില്‍ നിര്‍മിച്ച എട്ടുപട്ട മണ്ഡപത്തിലായിരുന്നു ചടങ്ങുകള്‍. മാര്‍ തോമസ് തറയിലിന്‍റെ മെത്രാഭിഷേകം 2017 ഏപ്രില്‍ 17നു നടന്നു.

അതിരൂപതയ്ക്ക് ധന്യത: പ്രമുഖർ എത്തിച്ചേരും

ചങ്ങനാശേരി: അതിരൂപതാധ്യക്ഷനായി സ്ഥാനമേല്‍ക്കുന്ന മാര്‍ തോമസ് തറയിലിന് ആശംസകള്‍ അര്‍പ്പിക്കുന്നതിനും സ്ഥാനമൊഴിയുന്ന മാര്‍ ജോസഫ് പെരുന്തോട്ടത്തിനു നന്ദിയര്‍പ്പിക്കുന്നതിനുമുള്ള വേദി അനേകരുടെ സ്നേഹസംഗമമായി മാറും. കേരളത്തിനകത്തും പുറത്തും വിദേശത്തുനിന്നും മെത്രന്മാര്‍, വൈദികര്‍, സന്യാസിനികള്‍, രാഷ്ട്രീയ, സാമൂഹിക സാമുദായിക നേതാക്കള്‍ എന്നിവര്‍ ആശംസകളും പ്രാര്‍ഥനകളുമായെത്തും.

സമ്മേളനത്തില്‍ മാര്‍ ജോസഫ് പെരുന്തോട്ടത്തിന് നന്ദി പ്രകാശിപ്പിച്ച് എസ്ഡി സന്യാസിനീസമൂഹം പ്രൊവിന്‍ഷ്യല്‍ സുപ്പീരിയര്‍ ഡോ. സിസ്റ്റര്‍ ദീപ്തി ജോസും മാര്‍ തോമസ് തറയിലിന് ഭാവുകങ്ങള്‍ നേര്‍ന്ന് പാസ്റ്ററല്‍ കൗണ്‍സില്‍ സെക്രട്ടറി ഡോ. രേഖാ മാത്യുവും പ്രസംഗിക്കും. മാര്‍ ജോസഫ് പെരുന്തോട്ടത്തിന് ഉപഹാരം സമര്‍പ്പിക്കും.

ജര്‍മനിയിലെ ബാംബര്‍ഗ് ആര്‍ച്ച് ബിഷപ് ഹെര്‍വിഗ് ഗൊസല്‍, ജോഷ്വാ മാര്‍ ഇഗ്‌നാത്തിയോസ്, പ്രതിപക്ഷ നേതാവ് വി.ഡി. സതീശന്‍, മന്ത്രിമാരായ റോഷി അഗസ്റ്റിന്‍, വി.എന്‍. വാസവന്‍, കൊടിക്കുന്നേല്‍ സുരേഷ് എംപി, ജോബ് മൈക്കിള്‍ എംഎല്‍എ, മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ എന്നിവര്‍ ആശംസാപ്രസംഗം നടത്തും. മാര്‍ ജോസഫ് പെരുന്തോട്ടവും മാര്‍ തോമസ് തറയിലും മറുപടിപ്രസംഗം നടത്തും. വികാരി ജനറാള്‍ മോണ്‍. ജയിംസ് പാലയ്ക്കല്‍ നന്ദി പറയും.

അന്‍പതിലേറെ മെത്രാന്മാര്‍,വിദേശ സഭാപ്രതിനിധികള്‍

ചങ്ങനാശേരി: മാര്‍ തോമസ് തറയിലിന്‍റെ സ്ഥാനാരോഹണ ചടങ്ങുകള്‍ക്ക് വത്തിക്കാന്‍ ന്യുണ്‍ഷ്യോയും യൂറോപ്യന്‍ സഭാ പ്രതിനിധികളും ഉള്‍പ്പെടെ അന്‍പതിലേറെ മെത്രാന്‍മാര്‍ പങ്കെടുക്കും.

മാര്‍ തോമസ് തറയിലിന്‍റെ മാതാവ് മറിയാമ്മയും കുടുംബാംഗങ്ങളും ബന്ധുക്കളും മാര്‍ ജോസഫ് പെരുന്തോട്ടത്തിന്‍റെ കുടുംബാംഗങ്ങളും ചടങ്ങില്‍ പങ്കെടുക്കും. വിവിധ ഇടവകകളില്‍നിന്ന് പതിനായിരത്തിലധികം പേര്‍ സന്നിഹിതരാകും. അതിരൂപത സംബന്ധമായ വിവിധ പ്രഖ്യാപനങ്ങള്‍ സമ്മേളനത്തിലുണ്ടാകും.