മരങ്ങാട്ടുപിള്ളി: മരങ്ങാട്ടുപിള്ളി പഞ്ചായത്തിന്‍റെ ആഭിമുഖ്യത്തില്‍ കൃഷിവകുപ്പ്, മൃഗസംരക്ഷണ വകുപ്പ്, കാര്‍ഷിക വികസനസമിതി, മരങ്ങാട്ടുപിള്ളി സഹകരണബാങ്ക്, കര്‍ഷക കൂട്ടായ്മകള്‍, ക്ഷീരവികസന വകുപ്പ്, കുടുംബശ്രീ, വായനശാലകള്‍ എന്നിവയുടെ സഹകരണത്തോടെ നവംബര്‍ ആറുമുതല്‍ ഒന്‍പതുവരെ സെന്‍റ് ഫ്രാന്‍സിസ് അസീസി പാരിഷ് ഹാളില്‍ കാര്‍ഷികോത്സവം സംഘടിപ്പിക്കും.
കലവറ നിറയ്ക്കല്‍ ഘോഷയാത്ര, വിളംബര റാലി, കാര്‍ഷിക സെമിനാര്‍, മുതിര്‍ന്ന കര്‍ഷകരുടെ സംഗമം, ചേറ്റില്‍ ഓട്ടം, അടുക്കളത്തോട്ടം മത്സരം, വയോജനങ്ങളുടെ നടത്തമത്സരം, ഞാറുനടീല്‍ മത്സരം, കിടാരി-പോത്ത്-എരുമ മത്സരങ്ങള്‍, ജില്ലാതല കാര്‍ഷിക ക്വിസ്, വിള പ്രദര്‍ശനവും, സൗജന്യ പച്ചക്കറിത്തൈവിതരണം, പ്രദര്‍ശന വിപണനമേള, വിദ്യാര്‍ഥികള്‍ക്കും കര്‍ഷകര്‍ക്കും ക്വിസ്, സാംസ്‌കാരിക ഘോഷയാത്ര, കലാസന്ധ്യ തുടങ്ങിയ പരിപാടികള്‍ ഉണ്ടായിരിക്കും. വിവിധ ഡിപ്പാര്‍ട്ട്‌മെന്‍റുകളുടെ സ്റ്റാളുകള്‍, സൗജന്യ മെഡിക്കല്‍ ക്യാമ്പ് എന്നിവ പരിപാടിയുടെ ഭാഗമാകും.
പഞ്ചായത്ത് വൈസ് പ്രസിഡന്‍റ് ഉഷാ രാജുവിന്‍റെ അധ്യക്ഷതയില്‍ കൂടിയ യോഗം പഞ്ചായത്ത് പ്രസിഡന്‍റ് ബെല്‍ജി ഇമ്മാനുവല്‍ ഉദ്ഘാടനം ചെയ്തു.101 അംഗ സംഘാടക സമിതി രൂപീകരിച്ചു. കൃഷി ഓഫീസര്‍ ഡെന്നീസ് ജോര്‍ജ്, കണ്‍വീനര്‍ റോബിന്‍ കല്ലോലില്‍, കൃഷി ഓഫീസര്‍ ഡെന്നീസ് ജോര്‍ജ്, പഞ്ചായത്ത് സെക്രട്ടറി ശ്രീകുമാര്‍ എസ്. കൈമള്‍, പഞ്ചായത്ത് മെംബർമാർ, കാര്‍ഷികവികസന സമിതി അംഗങ്ങള്‍ തുടങ്ങിയവര്‍ പ്രസംഗിച്ചു.