പ്രമുഖ നടി സ്മൃതി ബിശ്വാസ് അന്തരിച്ചു : Deepika.com National News |

നാസിക്: പ്രമുഖ നടി സ്മൃതി ബിശ്വാസ് (100) അന്തരിച്ചു. വാർധക്യസഹജമായ രോഗങ്ങളെത്തുടർന്ന് മഹാരാഷ്‌ട്രയിലെ നാസിക്കിലെ വസതിയിലായിരുന്നു അന്ത്യം. നിരവധി ഹിന്ദി, മറാഠി, ബംഗാളി ചലച്ചിത്രങ്ങളിൽ അഭിനയിച്ചിട്ടുണ്ട്.

ബാലതാരമായാണ് സ്മൃതി ബിശ്വാസ് അഭിനയരംഗത്തെത്തിയത്. ഗുരു ദത്ത്, വി. ശാന്താറാം, മൃണാൽ സെൻ, ബിമൽ റോയി. ബി.ആർ. ചോപ്ര, രാജ് കപൂർ തുടങ്ങിയ വിഖ്യാത സംവിധായകരുടെ സിനിമകളിൽ സ്മൃതി ബിശ്വാസ് നായികയായിരുന്നു. ദേവ് ആനന്ദ്, കിഷോർകുമാർ, ബൽരാജ് സാഹ്‌നി തുടങ്ങിയ നടന്മാർക്കൊപ്പം അഭിനയിച്ചു.

ബംഗാളി സിനിമ സന്ധ്യ (1930)യിലൂടെയാണ് അരങ്ങേറ്റം. 1960ൽ പുറത്തിറങ്ങിയ മോഡൽ ഗേൾ ആണ് അവസാനം അഭിനയിച്ച ഹിന്ദിസിനിമ.

സംവിധായകൻ എസ്.ഡി. നരാംഗിനെ വിവാഹം ചെയ്തശേഷം സ്മൃതി ബിശ്വാസ് അഭിനയരംഗത്തോടു വിടപറഞ്ഞു. ഭർത്താവിന്‍റെ മരണശേഷം നാസിക്കിലേക്കു മാറി. രാജീവ്, സത്യജീത് എന്നിവരാണു മക്കൾ. ഈ വർഷം ഫെബ്രുവരി 17നാണ് നൂറാം ജന്മദിനം ആഘോഷിച്ചത്.

ഒരുകാലത്ത് ബോളിവുഡിന്‍റെ പ്രിയനായികയായിരുന്ന സ്മൃതി ബിശ്വാസ് അവസാനകാലത്ത് നാസിക്കിലെ ഒറ്റമുറി ഫ്ലാറ്റിലാണു താമസിച്ചിരുന്നത്.