ബര്‍ലിന്‍: ജര്‍മനിയിലെ ബാഡന്‍ വ്യുര്‍ട്ടംബര്‍ഗ് ആസ്ഥാനമാക്കി വേള്‍ഡ് മലയാളി കൗണ്‍സില്‍ (ഡബ്ല്യുഎംസി) പ്രൊവിന്സ് രൂപീകരിച്ചു. ജര്‍മനിയിലെ 16 സംസ്ഥാനങ്ങളിലൊന്നായ ബാഡന്‍ വുര്‍ട്ടംബര്‍ഗിലെ പുരാതനവും പ്രശസ്തവുമായ ട്യൂബിംഗന്‍ നഗരത്തിലെ ഷ്ലാട്ടര്‍ഹൗസില്‍ കൂടിയ യോഗത്തില് ഔദ്യോഗികമായി പ്രൊവിന്സ് രൂപീകരിച്ച് ഔപചാരികമായി ഉദ്ഘാടനം ചെയ്തു.
യോഗത്തില് അധ്യക്ഷത വഹിച്ച് പ്രൊവിന്സ് സംഘടനാപരമായി പ്രവര്‍ത്തനം ആരംഭിച്ചതായി ഡബ്ല്യുഎംസി യൂറോപ്പ് റീജിയൺ ചെയര്‍മാന്‍ ജോളി തടത്തില്‍ പ്രഖ്യാപിച്ചു. തുടര്‍ന്ന് ഡബ്ല്യുഎംസി യൂറോപ്പ് റീജിയൺ പ്രസിഡന്‍റ് ജോളി എം. പടയാട്ടില്‍, ഗ്ലോബല്‍ വൈസ് ചെയര്‍പേഴ്സണ്‍ മേഴ്സി തടത്തില്‍, ജര്‍മന്‍ പ്രൊവിന്സ് പ്രസിഡന്‍റ് ജോസ് കുമ്പിളുവേലില്‍, ജര്‍മന്‍ പ്രൊവിന്സ് സെക്രട്ടറി ചിനു പടയാട്ടില്‍, ബാഡന്‍ വ്യുര്‍ട്ടംബര്‍ഗ് പ്രൊവിന്സ് ചെയര്‍മാന്‍ രാജേഷ് പിള്ള, പ്രസിഡന്‍റ് ധനേഷ് കൃഷ്ണ, ഫാ. ടിജോ പറത്താനത്ത്, ജോണ്സ് എന്നിവര്‍ ചേര്‍ന്ന് ഭദ്രദീപം കൊളുത്തി ഔദ്യോഗികമായി ഉദ്ഘാടനം ചെയ്തു.
ജെന്‍സ് കുമ്പിളുവേലില്‍ (കൊളോണ്) ചടങ്ങില്‍ പങ്കെടുത്തു. ട്യൂബിംഗന്‍ മല്ലൂസിന്‍റെ ഓണാഘോഷവേളയിലാണ് ഉദ്ഘാടനം നടത്തിയത്. മുഖ്യാതിഥികളായ ജോളി തടത്തില്‍, ജോളി എം. പടയാട്ടില്‍, മേഴ്സി തടത്തില്‍, ജോസ് കുമ്പിളുവേലില്‍, ചിനു പടയാട്ടില്‍ എന്നിവര്‍ ആശംസകള്‍ നേര്‍ന്നു സംസാരിച്ചു. ഡബ്ല്യുഎംസിയുടെ കഴിഞ്ഞ 30 വര്‍ഷത്തെ ചരിത്രവും, റീജിയൺ, പ്രൊവിന്സ് തലത്തിലുള്ള പ്രവര്‍ത്തനങ്ങളും ഇതുവരെയുള്ള സാമൂഹ്യ, കാരുണ്യ പ്രവര്‍ത്തനങ്ങളെപ്പറ്റിയും നേതാക്കള്‍ ഹ്രസ്വമായി പ്രസംഗിച്ചു.
LOGIN
