ADVERTISEMENT

ADVERTISEMENT

സെവൻസ് ഫുട്ബോൾ ടൂർണമെന്‍റ് നവംബറിൽ കരിങ്കല്ലത്താണിയിൽ

മണ്ണാർക്കാട്: സെവൻസ് ഫുട് ബോൾ അസോസിയേഷൻ അംഗീകാരമുള്ള സംസ്ഥാനത്തെ ആദ്യ സെവൻസ് ഫുട്ബോൾ ടൂർണമെന്‍റ് നവംബർ 11 മുതൽ കരിങ്കല്ലത്താണിയിൽ തുടങ്ങും.
ഐഡിയൽ ആർട്സ് ആൻഡ് സ്പോർട്സ് ക്ലബിന്‍റെ നേതൃത്വത്തിൽ കരിങ്കല്ലത്താണി എഫ്എം ഹൈസ്കൂൾ മൈതാനിയിലാണ് മത്സരം.

അഖിലേന്ത്യാ സെവൻസ് ഫുട്ബോൾ ടൂർണമെന്‍റിന്‍റെ ലോഗോ പ്രകാശനം താഴേക്കോടു നടന്ന പരിപാടിയിൽ മന്ത്രി മുഹമ്മദ് റിയാസ് എസ്എഫ്എ സംസ്ഥാന പ്രസിഡന്‍റ് മുഹമ്മദ് ചെറൂട്ടിക്ക് നൽകി നിർവഹിച്ചു.

താഴേക്കോട് ഗ്രാമപഞ്ചായത്ത് പ്രസിഡന്‍റ് സോഫിയ ടീച്ചർ, ഗ്രാമ പഞ്ചായത്ത് വൈസ് പ്രസിഡന്‍റ് മൊയ്തുപ്പു പുലാക്കൽ, എസ്എഫ്എ ജില്ലാ പ്രസിഡന്‍റ് ഫിറോസ് ബാബു, ജില്ലാ സെക്രട്ടറി ഫിറോസ് കഞ്ഞിച്ചാലിൽ, ജില്ലാ കമ്മറ്റി അംഗങളായ പി.ടി. സലാം കരിങ്കല്ലത്താണി, ഐഡിയൽ ക്ലബ് ഭാരവാഹികളായ നജീബ് പൊന്നേത്ത് , അബ്ദു പിലാക്കൽ, കെ. കബീർ, പി.ടി. നിസാർ, ടി.ടി. മുഹമ്മദലി പങ്കെടുത്തു.

ADVERTISEMENT

കർഷകന്‍റെ ആത്മഹത്യ: അട്ടപ്പാടി താലൂക്ക് ഓഫീസ് ഉപരോധിച്ചു

അഗളി: തണ്ടപ്പേര് ലഭിക്കാത്തതിനെ തുടർന്ന് കാവുണ്ടിക്കൽ സ്വദേശിയായ കർഷകൻ ആത്മഹത്യ ചെയ്തതിൽ പ്രതിഷേധിച്ച് കോണ്‍ഗ്രസ്, ബിജെപി പ്രവർത്തകർ അട്ടപ്പാടി താലൂക്ക് ഓഫീസ് ഉപരോധിച്ചു. കാവുണ്ടിക്കൽ സ്വദേശി കൃഷ്ണസ്വാമിയാണ് റവന്യു വകുപ്പിന്‍റെ ധാർഷ്ട്യത്തിന് ഇരയായി ആത്മഹത്യ ചെയ്തത്. ഇതിൽ പ്രതിഷേധിച്ച് ഇന്നലെ രാവിലെ 9.30ഓടെ സ്ഥലത്തെത്തിയ കോണ്‍ഗ്രസ് പ്രവർത്തകർ താലൂക്ക് ഓഫീസിന്‍റെ രണ്ട് ഗേറ്റും ഉപരോധിച്ചു. അട്ടപ്പാടിയിൽ നിരവധി പേർ റവന്യൂ വകുപ്പിന്‍റെ ധാർഷ്ട്യത്തിന്‍റെ ഇരകളായി മാറിക്കഴിഞ്ഞതായി നാട്ടുകാർ പറയുന്നു. ഉദ്യോഗസ്ഥർ പ്രമാണികളെ പോലെയാണ് പെരുമാറുന്നത്. എല്ലാ പ്രമാണങ്ങളും ഉള്ള പതിറ്റാണ്ടുകളായി കൈവശമുള്ള ഭൂമിയിൽ അന്യർക്ക് തണ്ടപ്പേര് നൽകുന്നത് നോക്കിനിൽക്കേണ്ട അവസ്ഥയാണ് നാട്ടുകാർക്കുള്ളത്. വില്ലേജിന്‍റെയും താലൂക്കിന്‍റെയും അനാസ്ഥ മൂലം ഒറ്റ ദിവസം കൊണ്ട് ഭൂഉടമകൾ ഭൂരഹിതരാകുന്ന വിചിത്രമായ ഭരണമാണ് റവന്യൂ വകുപ്പിൽ നടക്കുന്നത്. നിരവധിപേർ ആത്മഹത്യയുടെ വക്കിലാണ്. റവന്യൂ വകുപ്പിന്‍റെ ഉദ്യോഗസ്ഥരാജിനെതിരെയാണ് കോണ്‍ഗ്രസ് സമരം എന്നും മരണപ്പെട്ട കൃഷ്ണസ്വാമിയുടെ കുടുംബത്തിനും പ്രദേശവാസികൾക്കും നീതി കിട്ടുംവരെ സമരം തുടരുമെന്നും ഉപരോധസമരം ഉദ്ഘാടനം ചെയ്ത ഷിബു സിറിയക്ക് മുന്നറിയിപ്പ് നൽകി. കോണ്‍ഗ്രസ് ബ്ലോക്ക് പ്രസിഡന്‍റ് പി.എം. ഹനീഫ അധ്യക്ഷനായിരുന്നു. തുടർന്ന് സബ് കളക്ടറുമായി നടത്തിയ ചർച്ചയിൽ സമരക്കാർ ഉന്നയിച്ച വിഷയങ്ങളിൽ ജില്ലാ കളക്ടറുമായി ആലോചിച്ച് പരിഹാരം ഉണ്ടാക്കാമെന്ന ഉറപ്പിലാണ് സമരം അവസാനിപ്പിച്ചത്. സമരക്കാർ ഉന്നയിച്ച ആവശ്യങ്ങളെ തുടർന്ന് കൃഷ്ണസ്വാമിയുടെ വീട്ടിലെത്തി സബ് കളക്ടറും തഹസിൽദാരും ഭൂരേഖ തഹസിൽദാരും പ്രമാണങ്ങൾ പരിശോധിച്ച് നടപടികൾ സ്വീകരിക്കാമെന്ന് ഉറപ്പ് നൽകി. വീഴ്ചവരുത്തിയ ഉദ്യോഗസ്ഥർക്കെതിരെ നടപടിയും സമരക്കാർ ആവശ്യപ്പെട്ടിട്ടുണ്ട്. കൂടാതെ സമാനകേസുകൾ സ്പെഷൽ പാക്കേജ് ആയി പരിഗണിച്ചുകൊണ്ട് രണ്ടാഴ്ചയ്ക്കകം മറ്റുള്ളവർക്കും ആവശ്യമായ രേഖകൾ നൽകാമെന്നും അധികൃതർ ഉറപ്പ് നൽകി. അതോടൊപ്പം തന്നെ അഗളി വില്ലേജ് വിഭജിക്കുന്നതിനായുള്ള പ്രൊപ്പോസൽ സർക്കാരിലേക്ക് സമർപ്പിക്കാം എന്നും സമരക്കാരെ അറിയിച്ചു. സബ് കളക്ടർ ഇക്കാര്യങ്ങളിൽ ഉറപ്പുനൽകിയതോടെയാണ് സമരം അവസാനിപ്പിച്ചത്. കെപിസിസി അംഗം പി.സി. ബേബി, ഡിസിസി അംഗം എം.ആർ. സത്യൻ, നേതാക്കളായ എസ്. അല്ലൻ, എൻ.കെ. രഘൂത്തമൻ, സെന്തിൽ കുമാർ, ജോബി കുരീക്കാട്ടിൽ, എം. കനകരാജ്, ചെല്ലൻ മൂപ്പൻ, കെ.ടി. ബെന്നി, എം.സി. ഗാന്ധി, വിശ്വനാഥൻ കോട്ടത്തറ, കെ.എൻ. സുകുമാരൻ, യു.എ. മത്തായി, എം.എം.തോമസ്, തങ്കച്ചൻ കട്ടേക്കാട്, സന്തോഷ് ആനക്കട്ടി, സുബ്രഹ്മണ്യൻ ആനക്കട്ടി, ശ്രീജിത്ത് കുമാർ, പി.പി. മുഹമ്മദ്, എ.കെ. സതീഷ്, വി. കനകരാജ്, ചന്ദ്രൻ ചീരക്കടവ്, രംഗൻ അബ്ബന്നൂർ, രാജേന്ദ്രൻ ആനക്കല്ല്, നാരായണൻ അബ്ബന്നൂർ എന്നിവർ പങ്കെടുത്തു.

സൃഷ്ടിവൈഭവം തെളിയിച്ച് എൻഎസ്എസ് വോളന്‍റിയർമാർ

വടക്കഞ്ചേരി: നാഷണൽ സർവീസ് സ്കീമിന്‍റെ 21 ദിവസത്തെ ജീവിതോത്സവ ചലഞ്ചിൽ തനതായ സൃഷ്ടിവൈഭവങ്ങൾ തെളിയിച്ച് എൻഎസ്എസ് വോളന്‍റിയർമാർ. മദ്യം, മയക്കുമരുന്നുകൾക്കെതിരെയുള്ള ചിത്രമതിൽ ഒരുക്കൽ, നല്ല ശീലങ്ങൾ എഴുതി തൂക്കിയുള്ള ഒപ്പുമരം, ചങ്ങാത്തം കൂടൽ, ഡിജിറ്റൽ ഉപവാസം, നൃത്തപരിശീലനം, ഭരണഘടന പരിചയപ്പെടൽ, സ്റ്റാറ്റസ് മേള, പൂച്ചെടി നടീൽ, ഗാനാലാപനം, ഭക്ഷണം പങ്കുവയ്ക്കൽ, നാട്ടുവഴികളിലൂടെ നടന്നുള്ള നാട്ടറിവ് സമ്പാദനം, യോഗ പരിശീലനം, ചോദ്യവേള അങ്ങനെ 21 ദിവസവും വ്യത്യസ്തമായ വിഷയങ്ങളെ കേന്ദ്രീകരിച്ചായിരുന്നു പ്രവർത്തനങ്ങൾ. ആരോഗ്യകരവും സൃഷ്ടിപരവും സന്തോഷകരവുമായ പ്രവർത്തനങ്ങളിൽ ഏർപ്പെട്ട് മനസിനെയും ശരീരത്തെയും സ്വതന്ത്രമാക്കുക എന്നതായിരുന്നു 21 ദിന ചലഞ്ചിന്‍റെ ലക്ഷ്യം. വണ്ടാഴി സിവിഎം ഹയർ സെക്കൻഡറി സ്കൂളിൽ പൊതുജനങ്ങൾക്ക് കൂടി കാണാവുന്ന വിധമായിരുന്നു മയക്കുമരുന്നിനെതിരെ എൻഎസ്എസ് വോളന്‍റിയർമാർ ചിത്രമതിൽ ഒരുക്കിയത്. കോ-ഓർഡിനേറ്റർ സ്മിത ടീച്ചർ, ലീഡർ അബൂബക്കർ എന്നിവരുടെ നേതൃത്വത്തിൽ ഹിജാസ്, അനന്തകൃഷ്ണൻ, ഫാത്തിമ സിദ്ധിഹ, സാന്ദ്ര തുടങ്ങിയ വിദ്യാർഥി കൂട്ടമാണ് ലഹരിക്കെതിരെ കരവിരുതിന്‍റെ സൃഷ്ടി വൈഭവം തീർത്തത്.

മാതൃവേദി ഫൊറോന കലോത്സവം; കണക്കൻതുരുത്തി രാജഗിരി ജേതാക്കൾ

വടക്കഞ്ചേരി: ചെറുപുഷ്പം സ്കൂളിൽ നടന്ന മാതൃവേദി വടക്കഞ്ചേരി ഫൊറോന തല കലോത്സവത്തിൽ കണക്കൻതുരുത്തി രാജഗിരി തിരുഹൃദയ പള്ളി യൂണിറ്റിന് കിരീടം. വടക്കഞ്ചേരി ലൂർദ്മാതാ ഫൊറോന യൂണിറ്റിനാണ് രണ്ടാം സ്ഥാനം. തച്ചനടി ക്രൈസ്റ്റ് യൂണിറ്റ് മൂന്നാം സ്ഥാനവും കരസ്ഥമാക്കി. വിജയികൾക്ക് ഫൊറോന വികാരി ഫാ.അഡ്വ. റെജി പെരുമ്പിള്ളിൽ, ചെറുപുഷ്പം ഇംഗ്ലീഷ് മീഡിയം യുപി സ്കൂൾ പ്രധാനാധ്യാപിക സിസ്റ്റർ റോസ്മിൻ വർഗീസ് എന്നിവർ ട്രോഫികൾ വിതരണം ചെയ്തു. രാജഗിരി യൂണിറ്റിലെ അനിറ്റ് ജിജോയാണ് ജൂണിയർ വിഭാഗത്തിലെ സാഹിത്യ പ്രതിഭ. സീനിയർ വിഭാഗത്തിൽ തച്ചനടി യൂണിറ്റിലെ സിമി ജോസും സാഹിത്യപ്രതിഭയായി തെരഞ്ഞെടുക്കപ്പെട്ടു. വചനഗിരി സെന്‍റ് ജോർജ് പള്ളി യൂണിറ്റിലെ ടിനു ഷാജിയാണ് ജൂണിയർ വിഭാഗത്തിലെ കലാപ്രതിഭ. വടക്കഞ്ചേരി ലൂർദ് മാതാ യൂണിറ്റിലെ ഷീബ ജോയ് സീനിയർ വിഭാഗത്തിലും കലാപ്രതിഭയായി.

ആദ്യഘട്ടം അഞ്ചു കിലോമീറ്റർ ടാറിംഗ് നടത്താൻ തീരുമാനം

അലനല്ലൂർ: ജില്ലയിലൂടെ കടന്നുപോകുന്ന മലയോര ഹൈവേയുടെ ആദ്യ റീച്ചിലെ അഞ്ച് കിലോമീറ്റർ ദൂരത്തിൽ ഡിസംബറിൽ ടാറിംഗ് പൂർത്തിയാക്കാൻ എൻ. ഷംസുദീൻ എംഎൽഎയുടെ അധ്യക്ഷതയിൽ ചേർന്ന യോഗം തീരുമാനിച്ചു. കോട്ടോപ്പാടം മുതൽ അലനല്ലൂർ വരെയുള്ള ഭാഗത്താണ് ഒന്നാംഘട്ട ടാറിംഗ് നടത്തുക. ഇതിനായി കോട്ടോപ്പാടം, ഭീമനാട്, കാട്ടുകുളം ഭാഗത്ത് ഉപരിതല പ്രവൃത്തികൾ നടന്നുവരികയാണ്. കാലാവസ്ഥ അനുകൂലമായാൽ കോട്ടോപ്പാടം മുതൽ ഭീമനാട് വരെ രണ്ട് കിലോമീറ്റർ ദൂരത്തിൽ ഈ മാസം അവസാനത്തോടെ ടാറിംഗ് നടത്തുമെന്ന് കരാർ കമ്പനി അധികൃതർ അറിയിച്ചു. കാഞ്ഞിരംപാറ മുതൽ കുമരംപുത്തൂർ വരെയുള്ള 18.1 കിലോമീറ്ററിൽ മെയ് 31 നകം ടാറിംഗ് പൂർത്തിയാക്കണമെന്ന നിർദേശവും യോഗത്തിൽ ഉയർന്നു. ഇത്രയും ദൂരത്തിൽ 20 ബസ്ബേ നിർമിക്കും. കോട്ടോപ്പാടം, ആര്യമ്പാവ് റോഡ് ജംഗ്ഷൻ, കല്യാണക്കാപ്പ്, മേലെ അരിയൂർ, ഭീമനാട്, പാലക്കാഴി, ഉണ്ണ്യാൽ, ആലുങ്ങൽ, കാഞ്ഞിരംപാറ എന്നിവിടങ്ങളിൽ റോഡിന്‍റെ ഇരുവശത്തുമായാണ് ബസ്ബേകൾ നിർമിക്കുക. കൂടുതൽ സ്ഥലങ്ങളിൽ ബസ്ബേ വേണമെന്ന ആവശ്യവും ഉയർന്നിട്ടുണ്ട്. വ്യാപാരസ്ഥാപനങ്ങളുടെ മുമ്പിൽ റോഡ് പണി നടത്തുമ്പോൾ നാലുദിവസം മുന്പെങ്കിലും അറിയിപ്പ് നൽകണമെന്നും ആവശ്യമുയർന്നു. കോട്ടോപ്പാടം, അലനല്ലൂർ, ഉണ്ണ്യാൽ തുടങ്ങിയ സ്ഥലങ്ങളിൽ ഭൂമി അളന്നു തിട്ടപ്പെടുത്തി നൽകുന്ന നടപടികൾ വേഗത്തിലാക്കണമെന്ന് റവന്യൂവകുപ്പ് അറിയിച്ചു. ഒഴിഞ്ഞുകിടക്കുന്ന സ്ഥലങ്ങളിൽ പൂന്തോട്ടം, വിശ്രമകേന്ദ്രം, ഓപ്പൺ ജിം എന്നിവ ഒരുക്കണമെന്ന നിർദേശവുമുയർന്നു. ഗ്രാമീണ റോഡുകളിലേക്ക് പ്രവേശിക്കുന്ന ഭാഗങ്ങളിൽ പ്രവൃത്തി നടക്കുമ്പോൾ തന്നെ റോഡുകൾ തമ്മിൽ ശാസ്ത്രീയമായി യോജിപ്പിക്കണം. ജലനിധി പോലെയുള്ള കുടിവെള്ള പദ്ധതിയുടെ പൈപ്പ് ലൈനുകൾ തകരാറിലായാൽ അടിയന്തരമായി തന്നെ പുന:സ്ഥാപിക്കാൻ നടപടിയുണ്ടാവണം. പ്രവർത്തി നടക്കുന്ന ഭാഗത്ത് വീടുകളിലേക്ക് വാഹനങ്ങൾ പോകുന്നതിന് സൗകര്യമൊരുക്കുക, കാഞ്ഞിരംപാറ പൊതുക്കുളത്ത് റോഡ് നിലവിലുള്ള നിരപ്പിൽ നിന്നും ഉയർത്തി ചെയ്യുക, കൾവർട്ട് നിർമിക്കുക, ഭീമനാട് ജംഗ്ഷനിലെ ഹൈമാസ്റ്റ് ലൈറ്റ് റോഡ് നവീകരിക്കുന്നതോടെ ഉചിതമായ സ്ഥലത്തേക്ക് മാറ്റി സ്ഥാപിക്കുക തുടങ്ങിയ ആവശ്യങ്ങളും യോഗത്തിൽ ഉയർന്നു.

തൃപ്പാളൂർ ശിവക്ഷേത്രം തൂക്കുപാലത്തിന്‍റെ കൈവരികൾ തകർന്നു

ആലത്തൂർ: അഞ്ച് കോടി രൂപ ചെലവഴിച്ച് നിർമിച്ച തൃപ്പാളൂർ ശിവക്ഷേത്രം തൂക്കുപാലത്തിന്‍റെ കൈവരികളിൽ ചിലത് ഉദ്ഘാടനം കഴിഞ്ഞ് ഇരുപത്തിനാലുമണിക്കൂറിനുള്ളിൽ വെൽഡിംഗ് അടർന്ന് താഴെവീണു. തിങ്കളാഴ്ച ഉച്ചയോടെയാണ് തൃപ്പാളൂർ ശിവക്ഷേത്രം തൂക്കുപാലം കെ. രാധാകൃഷ്ണൻ എംപി ഉദ്ഘാടനം ചെയ്തത്. ഉദ്ഘാടനത്തിന്‍റെ പിറ്റേദിവസംതന്നെ കൈവരികളിൽ ചിലത് അടർന്നുവീണത് നാണക്കേടായി. കുട്ടികളടക്കം കടന്നുപോകുന്ന തൂക്കുപാലത്തിന്‍റെ വശങ്ങളിൽ സുരക്ഷാനെറ്റ് സ്ഥാപിച്ചിട്ടില്ല. ഇതും സുരക്ഷാകുറവിന് ഉദാഹരണമാണ്. എരിമയൂർ ഗ്രാമപഞ്ചായത്തിൽ ഗായത്രിപ്പുഴയ്ക്ക് കുറുകെയാണ് തൂക്കുപാലം നിർമിച്ചിരിക്കുന്നത്. ഞായറാഴ്ച തുടങ്ങിയ തൃപ്പാളൂർ ശിവക്ഷേത്രത്തിലെ ദീപാവലി വാവുത്സവം ചൊവ്വാഴ്ചയാണ് സമാപിച്ചത്. ഈ ദിവസങ്ങളിൽ വാവുത്സവത്തിൽ പങ്കെടുക്കാൻ ധാരാളം ആളുകൾ തൂക്കുപാലത്തിലൂടെ കടന്നുപോയിരുന്നു.

തിരുബാലസഖ്യം രൂപത കലോത്സവം

പാലക്കാട്: തിരുബാലസഖ്യം രൂപത കലോത്സവം പാസ്റ്ററൽ സെന്‍ററിൽ നടത്തി. വാശിയേറിയ മത്സരത്തിൽ താവളം, പൊന്നംകോട്, പാലക്കാട് ഫൊറോനകൾ 55 പോയിന്‍റുകൾവീതം നേടി ഒന്നാംസ്ഥാനം പങ്കിട്ടു. പൊന്നങ്കോട് ഫൊറോനയിലെ തച്ചന്പാറ ഇടവകാംഗമായ ഫെബിൻ പ്രസാദാണ് കലാപ്രതിഭ. രൂപത വികാരി ജനറാൾ മോൺ. ജിജോ ചാലയ്ക്കൽ കലോത്സവം ഉദ്ഘാടനംചെയ്ത് പതാക ഉയർത്തി. ബിഷപ് മാർ പീറ്റർ കൊച്ചുപുരയ്ക്കൽ സമ്മാനദാനം നിർവഹിച്ചു. തിരുബാലസഖ്യം രൂപത ഡയറക്ടർ ഫാ. ജെയിംസ് ചക്യത്ത്, അസി. ഡയറക്ടർ ഫാ. ഫ്രെഡി അരിക്കാടൻ, രൂപത ആനിമേറ്റർ സിസ്റ്റർ ജോഫിയ തെരേസ് സിഎച്ച്എഫ്, ഫൊറോനാ ഡയറക്ടർമാർ എന്നിവർ പരിപാടികൾക്കു നേതൃത്വം നൽകി.

ടീ സ്റ്റാളിൽ പാചകവാതകം ചോർന്ന് തീപിടിത്തം

ചിറ്റൂർ: അണിക്കോടിന് സമീപം ടീസ്റ്റാളിൽ പാചകവാതകം ചോർന്ന് തീപിടിച്ചു. കവറമേട് ഏറാട്ട് വീട്ടിൽ മോഹൻദാസിന്‍റെ പാഞ്ചാലി ടീ സ്റ്റാളിലാണ് തീപിടിത്തമുണ്ടായത്. ചിറ്റൂർ അഗ്നിരക്ഷാസേനയെത്തി തീയണച്ചു. വ്യാപാരസ്ഥാപനത്തിലുണ്ടായിരുന്ന ഭക്ഷണസാധനങ്ങളും ഉപകരണങ്ങളും നശിച്ചു. ഇന്നലെ ഉച്ചയ്ക്ക് 12 നായിരുന്നു തീപിടിത്തമുണ്ടായത്. എസ്എഫ്ആർഒ സജിത്ത് മോൻ, എഎസ്ടി ഒ മധു, എഫ്ആർഒമാരായ മുഹമ്മദ് ബഷീർ, സന്തോഷ് കുമാർ, കൃഷ്ണദാസ്, സുധീഷ് എന്നിവരടങ്ങിയ സേനയാണ് തീയണച്ചത്.

അഞ്ചുമൂർത്തിമംഗലം കൊല്ലത്തറയിൽ അപകടങ്ങൾ ഒഴിയുന്നില്ല; രണ്ടു യുവാക്കളുടെ ജീവൻകൂടി നഷ്ടപ്പെട്ടു

വടക്കഞ്ചേരി: 2022 ഒക്ടോബർ അഞ്ചിന് പാതിരാത്രിയോടടുത്ത് അഞ്ച് വിദ്യാർഥികളടക്കമുള്ള ഒമ്പതു പേരെ നിത്യതയിലേക്ക് കൂട്ടികൊണ്ടുപോയ ദേശീയപാത വടക്കഞ്ചേരി അഞ്ചുമൂർത്തിമംഗലം കൊല്ലത്തറയിൽ തിങ്കളാഴ്ച രാത്രിയും രണ്ട് യുവാക്കളുടെ ജീവൻ പൊലിഞ്ഞു. ദേശീയപാതക്കടുത്ത് തെക്കെത്തറ പാഞ്ഞാംപറമ്പ് ഷിബു (28), കൂട്ടുകാരനും പല്ലാവൂർ ചെമ്മണംകാട് സ്വദേശിയുമായ കിഷോർ (28) എന്നിവരാണ് കാറിടിച്ച് (ഥാർ) മരിച്ചത്. വീട്ടിലേക്ക് പോകാൻ ദേശീയപാത തൃശൂർ ലൈൻ മുറിച്ചു കടക്കുന്നതിനിടെ പാലക്കാട് ഭാഗത്തുനിന്നും വന്ന കാർ ഇരുവരേയും ഇടിച്ച് തെറിപ്പിക്കുകയായിരുന്നു. സമീപത്തെ ആശുപത്രിയിലെത്തിച്ചെങ്കിലും യുവാക്കളെ രക്ഷിക്കാനായില്ല. 2022 ഒക്ടോബർ അഞ്ചിന് അർധരാത്രി എറണാകുളം മുളന്തുരുത്തി വെട്ടിക്കൽ ബസേലിയോസ് വിദ്യാനികേതൻ സീനിയർ സെക്കൻഡറി സ്കൂളിൽ നിന്നും കുട്ടികളുമായി ഊട്ടിയിലേക്ക് വിനോദയാത്ര പോയിരുന്ന ടൂറിസ്റ്റ് ബസ് അതേദിശയിൽ പോയിരുന്ന കെഎസ്ആർടിസി ബസിനു പിറകിൽ ഇടിച്ചായിരുന്നു അന്ന് ദുരന്തം സംഭവിച്ചത്. ടൂറിസ്റ്റ് ബസിലെ അധ്യാപകനും അഞ്ചു വിദ്യാർഥികളും കെഎസ്ആർടിസി ബസിലെ മൂന്ന് യാത്രക്കാരുമാണ് അന്നത്തെ അപകടത്തിൽ മരിച്ചത്. കൊട്ടാരക്കരയിൽ നിന്നും പാലക്കാട് ലൈനിലൂടെ കോയമ്പത്തൂരിലേക്ക് പോവുകയായിരുന്ന കെഎസ്ആർടിസിയുടെ സൂപ്പർഫാസ്റ്റ് ബസിന്‍റെ പിറകിലാണ് ടൂറിസ്റ്റ് ബസ് ഇടിച്ച് പാതയോരത്തെ മാലിന്യ കൂമ്പാരത്തിലേക്ക് മറിഞ്ഞത്. അപകടത്തിൽ അമ്പതിലേറെ പേർക്ക് പരിക്കേൽക്കുകയും ചെയ്തിരുന്നു. ടൂറിസ്റ്റ് ബസിന്‍റെ അമിതവേഗതയാണ് അപകടത്തിലേക്ക് നയിച്ചതെന്നായിരുന്നു അന്നത്തെ കണ്ടെത്തൽ. റോഡിലെ വളവും ചാറ്റൽ മഴയും വെളിച്ച കുറവും കെഎസ്ആർടിസി ബസിന്‍റെ വേഗതകുറവുമെല്ലാം അപകടത്തിന് കാരണമായതായി കണ്ടെത്തുകയുണ്ടായി. കേരളത്തിലെയാകെ ഞെട്ടിച്ച വൻ ദുരന്തം മൂന്ന് വർഷം പിന്നീടുമ്പോഴും കൊല്ലത്തറയിൽ അപകടമരണങ്ങൾ തുടരുകയാണ്. മൂന്ന് വർഷത്തിനിടെ നിരവധി വാഹനാപകട മരണങ്ങൾ ഇവിടെ സംഭവിച്ചിട്ടുണ്ട്. ഒക്ടോബർ മാസമാകുമ്പോൾ മരണനിരക്ക് കൂടുന്നതും പ്രദേശത്തുക്കാർക്ക് പേടി കൂടുകയാണ്. സുരക്ഷാ പരിശോധനകളെല്ലാം പേരിനുമാത്രമായി ചുരുങ്ങുന്നതാണ് അപകടങ്ങൾ വർധിക്കാൻ കാരണമെന്ന് ചൂണ്ടിക്കാട്ടുന്നു. ദേശീയപാതയുടെ ഇരുഭാഗത്തും തിങ്ങിനിറഞ്ഞ് വീടുകളുള്ള സ്ഥലങ്ങളാണ്. ആളുകൾക്ക് യാത്രചെയ്യാനും മറ്റു ആവശ്യങ്ങൾക്കുമെല്ലാം ദേശീയപാത മുറിച്ചുകടക്കണം. എന്നാൽ ഈ ഭാഗത്ത് മതിയായ സുരക്ഷാ സംവിധാനങ്ങളില്ല. ദേശീയപാതയിൽ സർവീസ് ബസുകൾക്ക് നിർത്തുന്നതിന് ബസ് ബേ ഇല്ലാത്തതും അപകടങ്ങൾക്ക് കാരണമാകുന്നുണ്ട്. ബസുകൾ യാത്രക്കാരെ ഇറക്കാനും കയറ്റാനും നിർത്തുന്നത് ദേശീയപാതയിൽ തന്നെയാണ്. ഇതിനാൽ പിറകിൽ നിന്നും വേഗതയിൽ വരുന്ന വാഹനങ്ങളുടെ കൂട്ടിയിടിക്ക് ഇത് വഴിവക്കുകയാണ്.

ജില്ലാ പഞ്ചായത്ത് സംവരണ‌ ഡിവിഷനുകൾ

പാലക്കാട്: 2025ലെ തദ്ദേശ സ്വയംഭരണ പൊതു തെരഞ്ഞെടുപ്പിനോടനുബന്ധിച്ച് പാലക്കാട് ജില്ലാ പഞ്ചായത്തിലെ ഡിവിഷനുകൾ സംവരണം ചെയ്യുന്നതിനുള്ള നറുക്കെടുപ്പ് പൂർത്തിയായി. ജില്ലാ കളക്ടറേറ്റ് കോണ്‍ഫറൻസ് ഹാളിൽ നടന്ന ചടങ്ങിൽ ജില്ലാ കളക്ടർ എം.എസ്. മാധവിക്കുട്ടി ആണ് നറുക്കെടുപ്പ് നിർവഹിച്ചത്. ജില്ലാ പഞ്ചായത്തിലുള്ള ഉദ്യോഗസ്ഥരും വിവിധ രാഷ്ട്രീയ പാർട്ടി പ്രതിനിധികളും ജില്ലാ തെരഞ്ഞെടുപ്പ് വിഭാഗത്തിലെ ഉദ്യോഗസ്ഥരും നറുക്കെടുപ്പിൽ പങ്കെടുത്തു.ജില്ലാ പഞ്ചായത്തിൽ ആകെയുള്ള 31 ഡിവിഷനുകളിലേക്കുള്ള സംവരണ ഡിവിഷനുകൾ കണ്ടെത്തുന്നതിനായുള്ള നറുക്കെടുപ്പാണ് നടന്നത്. ആകെയുള്ള 31 ഡിവിഷനുകളിൽ 13 എണ്ണം വനിതകൾക്കായി സംവരണം ചെയ്തു. കൂടാതെ, 3 പട്ടികജാതി വനിതാ സംവരണ ഡിവിഷനുകളും, 2 പട്ടികജാതി സംവരണ ഡിവിഷനുകളും നറുക്കെടുപ്പിലൂടെ കണ്ടെത്തി. വനിത ജനറൽ: തെങ്കര, കാഞ്ഞിരപ്പുഴ, കോങ്ങാട്, പറളി, പുതുപ്പരിയാരം, കോഴിപ്പാറ, തരൂർ, ആലത്തൂർ, കോട്ടായി, അന്പലപ്പാറ, വാണിയംകുളം, തിരുവേഗപ്പുറ, ശ്രീകൃഷ്ണപുരം. പട്ടികജാതി സംവരണം: പുതുശേരി, ചാലിശേരി. പട്ടികജാതി സ്ത്രീ സംവരണം: കടന്പഴിപ്പുറം, പൊൽപ്പുള്ളി, വാടാനാംകുറിശി. പട്ടികവർഗ സംവരണം: കിഴക്കഞ്ചേരി. ജനറൽ വിഭാഗം: അലനല്ലൂർ, അട്ടപ്പാടി, മലന്പുഴ, മീനാക്ഷിപുരം, കൊടുവായൂർ, കൊല്ലങ്കോട്, നെന്മാറ, പല്ലശന, കിഴക്കഞ്ചേരി, കുഴൽമന്ദം, കപ്പൂർ, മുതുതല, ചളവറ.

ഇടിമിന്നലുണ്ടാവും, വേണം അതിജാഗ്രത

പാലക്കാട്: കേരളത്തിൽ ഒറ്റപ്പെട്ടയിടങ്ങളിൽ വെള്ളിയാഴ്ചവരെ ഇടിമിന്നലോടുകൂടിയ മഴയ്ക്കും മണിക്കൂറിൽ 30 മുതൽ 40 കിലോമീറ്റർവരെ വേഗതയിൽ ശക്തമായ കാറ്റിനും സാധ്യതയുണ്ടെന്നാണ് കേന്ദ്ര കാലാവസ്ഥാവകുപ്പിന്‍റെ മുന്നറിയിപ്പ്. കഴിഞ്ഞ ദിവസങ്ങളിൽ സംസ്ഥാനത്തെന്പാടും അനിഷ്ടസംഭവങ്ങൾ റിപ്പോർട്ടു ചെയ്തിട്ടുണ്ട്. ജില്ലയിലെ കൂറ്റനാട്ടും ഇടിമിന്നലേറ്റു യുവതിക്കു പരിക്കേറ്റിരുന്നു. പാലിക്കാം, ഈ നിർദേശങ്ങൾ *ഇടിമിന്നൽ അപകടകാരികളാണ്. മനുഷ്യന്‍റെയും മൃഗങ്ങളുടെയും ജീവനും വൈദ്യുത- ആശയവിനിമയശൃംഖലകൾക്കും വൈദ്യുതചാലകങ്ങളുമായി ബന്ധിപ്പിച്ചിട്ടുള്ള വീട്ടുപകരണങ്ങൾക്കും വലിയ നാശനഷ്ടം സൃഷ്ടിക്കും. കാർമേഘങ്ങൾ മൂടിത്തുടങ്ങിയാൽ മുൻകരുതലുകൾ സ്വീകരിക്കണം. ഇടിമിന്നൽ എപ്പോഴും ദൃശ്യമാകണമെന്നില്ല. *ഇടിമിന്നലിന്‍റെ ആദ്യ ലക്ഷണം കണ്ടുകഴിഞ്ഞാൽ ഉടൻതന്നെ സുരക്ഷിതമായ കെട്ടിടത്തിനുള്ളിലേക്കു മാറുക. തുറസായ സ്ഥലങ്ങളിൽ തുടരുന്നത് ഇടിമിന്നലേൽക്കാനുള്ള സാധ്യത വർധിപ്പിക്കും. *ശക്തമായ കാറ്റിനും ഇടിമിന്നലിനും സാധ്യതയുള്ള ഘട്ടത്തിൽ ജനലും വാതിലും അടച്ചിടുക. വാതിലിനും ജനലിനും അടുത്ത് നിൽക്കാതെയിരിക്കുക. കെട്ടിടത്തിനകത്തുതന്നെ ഇരിക്കുകയും പരമാവധി ഭിത്തിയിലോ തറയിലോ സ്പർശിക്കാതിരിക്കുകയോ ചെയ്യുക. *ഗൃഹോപകരണങ്ങളുടെ വൈദ്യുതിബന്ധം വിഛേദിക്കുക. വൈദ്യുതോപകരണങ്ങളുമായുള്ള സാമീപ്യം ഇടിമിന്നലുള്ള സമയത്ത് ഒഴിവാക്കുക. *ഇടിമിന്നലുള്ള സമയത്ത് ടെലിഫോൺ ഉപയോഗിക്കുന്നത് ഒഴിവാക്കണം. മൊബൈൽ ഫോൺ ഉപയോഗിക്കുന്നതും ശ്രദ്ധയോടെ വേണം. *അന്തരീക്ഷം മേഘാവൃതമാണെങ്കിൽ തുറസായ സ്ഥലത്തും ടെറസിലും, കുട്ടികൾ ഉൾപ്പെടെ, കളിക്കുന്നത് ഒഴിവാക്കുക. *ഇടിമിന്നലുള്ള സമയത്ത് വൃക്ഷങ്ങളുടെ ചുവട്ടിൽ നിൽക്കരുത്‌. വാഹനങ്ങൾ മരച്ചുവട്ടിൽ പാർക്ക് ചെയ്യുകയുമരുത്. *ഇടിമിന്നലുള്ള സമയത്ത് വാഹനത്തിനകത്തുതന്നെ തുടരുക. കൈകാലുകൾ പുറത്തിടാതിരിക്കുക. വാഹനത്തിനകത്തു സുരക്ഷിതരായിരിക്കുക. സൈക്കിൾ, ബൈക്ക്, ട്രാക്ടർ തുടങ്ങിയ വാഹനങ്ങളിലുള്ള യാത്ര ഇടിമിന്നൽ സമയത്ത് ഒഴിവാക്കുകയും ഇടിമിന്നൽ അവസാനിക്കുന്നതുവരെ സുരക്ഷിതമായ കെട്ടിടത്തിൽ അഭയംതേടുകയും വേണം. *മഴക്കാറുകാണുമ്പോൾ തുണികളെടുക്കാൻ ടെറസിലേക്കോ, മുറ്റത്തേക്കോ ഇടിമിന്നലുള്ള സമയത്ത് പോകരുത്. *കാറ്റിൽ മറിഞ്ഞു വീഴാൻ സാധ്യതയുള്ള വസ്തുക്കൾ കെട്ടിവയ്ക്കുക. *ഇടിമിന്നലുള്ള സമയത്ത് കുളിക്കുന്നത്‌ ഒഴിവാക്കുക. ടാപ്പുകളിൽ നിന്ന് വെള്ളം ശേഖരിക്കുന്നതും ഒഴിവാക്കുക. പൈപ്പിലൂടെ മിന്നൽമൂലമുള്ള വൈദ്യുതിപ്രവാഹമുണ്ടായേക്കാം. *ഇടിമിന്നലുണ്ടാകുമ്പോൾ ജലാശയത്തിൽ മീൻ പിടിക്കാനോ കുളിക്കാനോ ഇറങ്ങുവാൻ പാടില്ല. ചൂണ്ടയിടുന്നതും വലയെറിയുന്നതും ഇടിമിന്നലുള്ള സമയത്ത് നിർത്തിവയ്ക്കണം. *പട്ടം പറത്തുന്നത് ഒഴിവാക്കുക. *ഇടിമിന്നലുള്ള സമയത്ത്‌ ടെറസിലോ മറ്റ്‌ ഉയരമുള്ള സ്ഥലങ്ങളിലോ വൃക്ഷക്കൊമ്പിലോ ഇരിക്കുന്നത്‌ അപകടകരമാണ്‌. *വളർത്തുമൃഗങ്ങളെ തുറസായ സ്ഥലത്ത് ഈ സമയത്തു കെട്ടരുത്. അവയെ അഴിക്കുവാനും സുരക്ഷിതമായി മാറ്റിക്കെട്ടുവാനും മഴമേഘം കാണുന്ന സമയത്ത് പോകരുത്. ഇത് ഇടിമിന്നലേൽക്കാൻ കാരണമായേക്കാം. *ഇടിമിന്നലിൽനിന്ന് സുരക്ഷിതമാക്കാൻ കെട്ടിടങ്ങൾക്കു മുകളിൽ മിന്നൽ രക്ഷാചാലകം സ്ഥാപിക്കാം. വൈദ്യുതോപകരണങ്ങളുടെ സുരക്ഷയ്ക്കായി സർജ് പ്രൊട്ടക്ടർ ഘടിപ്പിക്കാം. *മിന്നലിന്‍റെ ആഘാതത്താൽ പൊള്ളൽ ഏൽക്കുകയോ കാഴ്ചയോ കേൾവിയോ നഷ്ടമാവുകയോ ഹൃദയാഘാതം സംഭവിക്കുകയോ വരെ ചെയ്യാം. മിന്നലാഘാതമേറ്റ ആളിന്‍റെ ശരീരത്തിൽ വൈദ്യുതപ്രവാഹം ഇല്ല എന്നുറപ്പിക്കണം. മിന്നലേറ്റ ആളിനു പ്രഥമശുശ്രൂഷ നൽകാൻ മടിക്കരുത്‌. മിന്നൽ ഏറ്റാൽ ആദ്യ മുപ്പതു സെക്കൻഡ് ജീവൻ രക്ഷിക്കാനുള്ള സുവർണനിമിഷങ്ങളാണ്. മിന്നലേറ്റ ആളിന് ഉടൻ വൈദ്യസഹായം എത്തിക്കുക.

സംസ്ഥാനതല കരാട്ടെ ചാമ്പ്യൻഷിപ്പിൽ പാലക്കാടിന് ഓവറോൾ കിരീടം

പാലക്കാട്: സംസ്ഥാനതല കരാട്ടെ ചാമ്പ്യൻഷിപ്പിൽ പാലക്കാട് ടീമിന് ഓവറോൾ കിരീടം. ജപ്പാൻ ഗിമ- ഹാ ഇന്‍റർനാഷണൽ കരാട്ടെ- ഡോ ഫെഡറേഷൻ ഓഫ് ഇന്ത്യയുടെ ആഭിമുഖ്യത്തിൽ ഗിമ ഹാ കപ്പ് 2025 സംസ്ഥാനതല കരാട്ടെ ചാമ്പ്യൻഷിപ്പിലാണ് പാലക്കാടിന്‍റെ നേട്ടം. കഴിഞ്ഞദിവസം ചന്ദ്രനഗറിലെ ഭാരത്‌മാതാ ഹയർ സെക്കൻഡറി സ്കൂളിലായിരുന്നു മത്സരങ്ങൾ. അഡ്വ.കെ. പ്രേംകുമാർ എംഎൽഎ ഉദ്‌ഘാടനം നിർവഹിച്ചു. ജോബി വി. ചുങ്കത്ത് അധ്യക്ഷത വഹിച്ചു. ക്യോഷി എൻ. എം. തോമസ് പ്രസംഗിച്ചു. സമ്മാനദാനം ഭാരത്‌മാതാ പബ്ലിക് സ്കൂൾ പ്രിൻസിപ്പൽ ഫാ. ലിന്‍റേഷ് ആന്‍റണി നിർവഹിച്ചു. വി.എ. ഓഗസ്റ്റിൻ നന്ദി പറഞ്ഞു.

ചെമ്മണാന്പതിയിൽ റോഡിൽ ദുരിതമായി വെള്ളക്കെട്ട്

മുതലമട: ബൈക്ക് യാത്രികർക്കടക്കം ദുരിതമായി ചെമ്മണാമ്പതി റോഡിലെ വെള്ളക്കെട്ട്. റോഡിലുണ്ടായ വെള്ളക്കെട്ടിൽ മൂന്നു ബൈക്കുകൾ നിയന്ത്രണം വിട്ടുമറിഞ്ഞു. ഞായറാഴ്ച രാത്രിയാണ് സംഭവം. കാറുകളുടെ എൻജിനുകളിൽ വെള്ളംകയറി റോഡിൽ ഓഫായത് നാട്ടുകാരെത്തി തള്ളി നീക്കിയാണ് വെള്ളക്കെട്ടിൽ നിന്നും പുറത്തുകൊണ്ടുവന്നത്. റോഡിനടിയിലൂടെയുള്ള ഓവുപാലം അടഞ്ഞതാണ് വെള്ളക്കെട്ടുണ്ടാവാൻ കാരണമായതെന്നു പരിസരവാസികൾ പറഞ്ഞു. ചെറിയ മഴയുണ്ടായാൽപ്പോലും വെള്ളക്കെട്ട് രൂക്ഷമാവുകയാണ്. റോഡിനടിയിലെ ഓവുപാലത്തിലെ തടസങ്ങൾ നീക്കണമെന്നാവശ്യപ്പെട്ടു നാട്ടുകാർ പൊതുമരാമത്ത് വകുപ്പ് റോഡ് വിഭാഗം അധികൃതർക്ക് പരാതി നൽകിയിട്ടുണ്ട്.

തിരുവേഗപ്പുറ ഗ്രാമപഞ്ചായത്തിലെ നവീകരിച്ച റോഡുകളുടെ ഉദ്ഘാടനം

പട്ടാന്പി: തിരുവേഗപ്പുറ ഗ്രാമപഞ്ചായത്തിലെ നവീകരിച്ച ഗ്രാമീണ റോഡുകളുടെ ഉദ്ഘാടനം മുഹമ്മദ് മുഹ്സിൻ എംഎൽഎ നിർവഹിച്ചു. 25 ലക്ഷം രൂപ ചെലവിൽ നവീകരിച്ച കോളപ്രത്തോടി - പൊറ്റക്കാട്ട് തൊടി റോഡ്, 15 ലക്ഷം രൂപ ചെലവിൽ ഓടുപാറ - എയര്‍പോര്‍ട്ട്‌ പറമ്പ് റോഡ്‌ എന്നിവയുടെ ഉദ്ഘാടനമാണ് എംഎൽഎ നിർവഹിച്ചത്. ഈ രണ്ടു ഗ്രാമീണ റോഡുകളും മുഖ്യമന്ത്രിയുടെ ഗ്രാമീണ റോഡ് പുനരുദ്ധാരണ പദ്ധതിയിൽ ഉൾപ്പെടുത്തിയാണ് നവീകരിച്ചത്.

കൊട്ടേക്കാട് റോഡ് ഇനി ഗുരുദേവൻ റോഡ്

പാലക്കാട്: കല്ലേപ്പുള്ളി കൊട്ടേക്കാട് റോഡിന് ഗുരുദേവൻ റോഡ് എന്ന് നാമകരണം ചെയ്തു. എസ്എൻഡിപി പാലക്കാട് യൂണിയൻ സെക്രട്ടറി കെ.ആർ. ഗോപിനാഥിന്‍റെ അധ്യക്ഷതയിൽ നഗരസഭാ ചെയർപേഴ്സൺ പ്രമീള ശശിധരൻ നാമകരണോദ്ഘാടനം നിർവഹിച്ചു. മരുതറോഡ് പഞ്ചായത്ത് പ്രസിഡന്‍റ് പി. ഉണ്ണികൃഷ്ണൻ മുഖ്യപ്രഭാഷണം നടത്തി. ആർ. രാജഗോപാലൻ, കൗൺസിലർമാരായടി.എസ്. മീനാക്ഷി, ഡി. ഷജിത്ത്കുമാർ, യൂണിയൻ പ്രസിഡന്‍റ് അഡ്വ.കെ. രഘു, കെ. ഉണ്ണികൃഷ്ണൻ, സി. രാമകൃഷ്ണൻ, ഉണ്ണികൃഷ്ണൻ പൂത്തുമ്പി എന്നിവർ പ്രസംഗിച്ചു.

മുനിയറകൾ തകർത്ത സംഭവം: അന്വേഷണം വേഗത്തിലാക്കണമെന്നു വോയ്സ് ഓഫ് വടക്കഞ്ചേരി

വടക്കഞ്ചേരി: കിഴക്കഞ്ചേരി കൊന്നക്കൽകടവ് ആനയടിയൻപരുതയിൽ മുനിയറകൾ തകർത്ത സംഭവത്തിൽ അന്വേഷണം വേഗത്തിലാക്കി കുറ്റക്കാരെ നിയമത്തിനുമുന്നിൽ കൊണ്ടുവരണമെന്നു വോയ്സ് ഓഫ് വടക്കഞ്ചേരി ആവശ്യപ്പെട്ടു. കിഴക്കഞ്ചേരി, വടക്കഞ്ചേരി പഞ്ചായത്തുകളുടെ മുൻ പ്രസിഡന്‍റുമാരായ കെ. ബാലൻ, പി. ഗംഗാധരൻ എന്നിവരുടെ നേതൃത്വത്തിൽ സ്ഥലം സന്ദർശിച്ചാണ് ഈ ആവശ്യം ഉന്നയിച്ചത്. ചരിത്രസ്മാരകങ്ങൾ രാജ്യത്തിന്‍റെ സമ്പത്താണെന്നും അതു സംരക്ഷിക്കേണ്ടതു സർക്കാരിന്‍റേതെന്നപോലെ പൗരന്മാരുടെയും കടമയാണെന്നു സംഘടനാ ഭാരവാഹികൾ പറഞ്ഞു. മഹാശിലായുഗ കാലഘട്ടത്തിലെ ശേഷിപ്പുകളാണ് മുനിയറകൾ. അതുകൊണ്ടുതന്നെ മുനിയറകൾ സംരക്ഷിക്കുന്നതിന് പഞ്ചായത്തും ആവശ്യമായ അടിയന്തര നടപടി സ്വീകരിക്കണം. മന്ദഗതിയിലുള്ള അന്വേഷണത്തിനെതിരേ ജില്ലാ പോലീസ് സൂപ്രണ്ടിനും കളക്ടർക്കും ഡിജിപിക്കും പരാതിനൽകുമെന്നും ഭാരവാഹികൾ അറിയിച്ചു.

മാലിന്യം വലിച്ചെറിയുന്നവർക്കു പിഴശിക്ഷ: വീടുകളിലെത്തി പിഴയീടാക്കും

കോയമ്പത്തൂർ: കോർപറേഷൻ പ്രദേശങ്ങളിൽ വാഹനങ്ങളിലെത്തി മാലിന്യം തള്ളുന്നവരെ നിയന്ത്രിക്കുന്നതിനായി, വാഹന രജിസ്ട്രേഷൻ രേഖപ്പെടുത്തിയ നമ്പറുള്ള വീടുകളിലെത്തി പിഴ ചുമത്താൻ തീരുമാനം. പരിധിയിലെ 100 വാർഡുകളിലുമായി പ്രതിദിനം 1,200 ടൺ വരെ മാലിന്യം കോർപറേഷൻ ശേഖരിക്കുന്നുണ്ട്. ജൈവ, അജൈവ മാലിന്യത്തിനു പുറമെ ഇ- വേസ്റ്റും വെല്ലുവിളിയാണ്. വർഷങ്ങളായി വെള്ളലൂർ മാലിന്യക്കൂമ്പാരത്തിൽ ഇ- മാലിന്യം അടിഞ്ഞുകൂടുന്നതിനാൽ പ്രദേശത്തെ ജനങ്ങൾ പരാതിയുമായി രംഗത്തെത്തിയിരുന്നു. തുടർന്നാണ് കോർപറേഷൻ മാലിന്യ സംസ്കരണ പ്രവർത്തനങ്ങൾ ഊർജിതമാക്കിയത്. പുതിയ തീരുമാന പ്രകാരം വാഹന രജിസ്ട്രേഷൻ നമ്പർ അടിസ്ഥാനമാക്കി നിയമലംഘകർക്ക് 1,000 രൂപ മുതൽ 10,000 രൂപ വരെ പിഴ ചുമത്തുമെന്നു കോർപ്പറേഷൻ ഭരണകൂടം മുന്നറിയിപ്പു നൽകി. സിസി ടിവി കാമറകളുണ്ടെങ്കിലും പൊതുജനങ്ങൾക്കിടയിൽ മാലിന്യം തള്ളുന്നതിനെതിരേ ബോധവത്കരണം ഫലപ്രദമല്ല. വൃത്തിയുള്ള നഗരം സൃഷ്ടിക്കാൻ പൊതുജനങ്ങളുടെ സഹകരണം ആവശ്യമാണെന്നു കോർപറേഷൻ അധികൃതർ അറിയിച്ചു.

പുതിയ വന്ദേഭാരത്: പ്രതീക്ഷയോടെ കോയന്പത്തൂരിലെ യാത്രികർ

തിരുപ്പൂർ: ബംഗളൂരു - എറണാകുളം വന്ദേഭാരത് പുതിയ ട്രെയിൻ കോയമ്പത്തൂർ വഴി സർവീസ് നടത്തും. വ്യാഴാഴ്ച ഒഴികെ എല്ലാ ദിവസവും കോയമ്പത്തൂരിൽ നിന്ന് തിരുപ്പൂർ, ഈറോഡ്, സേലം വഴി ബാംഗ്ലൂരിലേക്ക് വന്ദേഭാരത് ട്രെയിൻ സർവീസ് നടത്തും. നവംബർ മുതൽ സർവീസ് നടത്താനും റെയിൽവേ മന്ത്രാലയം അംഗീകരിച്ചു. ബുധനാഴ്ച ഒഴികെ ആഴ്ചയിൽ ആറുദിവസത്തേക്ക് കോയമ്പത്തൂരിൽനിന്ന് തിരുപ്പൂർ, ഈറോഡ്, സേലം വഴി ചെന്നൈയിലേക്ക് വന്ദേഭാരത് ട്രെയിൻ സർവീസ് നടത്തുന്നുണ്ട്. പുതിയ സർവീസ് ആരംഭിക്കുന്നതോടെ കോയമ്പത്തൂർ റൂട്ടിൽ സർവീസ് നടത്തുന്ന വന്ദേ ഭാരത് ട്രെയിനുകളുടെ എണ്ണം മൂന്നായി വർധിക്കും. ടിക്കറ്റ് ബുക്കിംഗുകൾക്കനുസരിച്ച് പുതിയ വന്ദേ ഭാരത് ട്രെയിൻ സർവീസ് നടത്തുന്ന ദിവസങ്ങൾ തീരുമാനിക്കുമെന്ന് റെയിൽവേ അധികൃതർ പറഞ്ഞു.

പൊള്ളാച്ചി കന്നുകാലിച്ചന്തയിൽ നവീകരണം ദ്രുതഗതിയിൽ

പൊള്ളാച്ചി: പൊള്ളാച്ചി മുനിസിപ്പാലിറ്റിയുടെ കന്നുകാലിച്ചന്തയിൽ നവീകരണം ദ്രുതഗതിയിൽ. ഷെഡ് സ്ഥാപിക്കുന്നത് ഉൾപ്പെടെയുള്ള നവീകരണ പ്രവർത്തനങ്ങളാണ് പുരോഗമിക്കുന്നത്. കന്നുകാലിചന്ത ബിസിനസിനെ ബാധിക്കാത്ത വിധത്തിലാണ് പ്രവൃത്തി നടക്കുന്നത്. പണി വേഗത്തിൽ പൂർത്തിയാക്കി ഉപയോഗത്തിൽ വരുത്തണമെന്ന് വ്യാപാരികൾ നഗരസഭാ ഭരണകൂടത്തോട് അഭ്യർത്ഥിച്ചു. തുടർന്ന് നഗരസഭാ കമ്മീഷണറും ഉദ്യോഗസ്ഥരും പരിശോധന നടത്തി പ്രവൃത്തി വേഗത്തിലാക്കാൻ ഉത്തരവിട്ടു. അതനുസരിച്ച് ഷെഡ് നിർമാണ പ്രവർത്തനങ്ങൾ വേഗത്തിലാക്കിയിട്ടുണ്ട്. 10 ഏക്കർ വിസ്തൃതി പ്രദേശത്ത് 50 വർഷത്തിലേറെയായി കന്നുകാലി ചന്ത പ്രവർത്തിച്ചു വരുന്നു. ചൊവ്വ, വ്യാഴം ദിവസങ്ങളിലാണ് കന്നുകാലിചന്ത നടക്കുന്നത്. ആന്ധ്രാപ്രദേശ്, കർണാടക എന്നിവിടങ്ങളിൽനിന്നടക്കം വിവിധയിനം കന്നുകാലികളാണ് വില്പനക്കായി ചന്തയിലെത്തിക്കുന്നത്.

ആരോപണങ്ങൾ അടിസ്ഥാനരഹിതം: ഗഫൂർ കോൽക്കളത്തിൽ

മണ്ണാർക്കാട്: അരിയൂർ സർവീസ് സഹകരണ ബാങ്കിന് താൻ ലക്ഷങ്ങൾ നൽകാനുണ്ടെന്ന പ്രചരണം അടിസ്ഥാനരഹിതമെന്നു ജില്ലാ പഞ്ചായത്ത് മെംബർ ഗഫൂർ കോൽക്കളത്തിൽ മണ്ണാർക്കാട് വാർത്താസമ്മേളനത്തിൽ പറഞ്ഞു. തനിക്കെതിരെയുള്ള ആരോപണം തെളിയിക്കാനായാൽ രാഷ്ട്രീയ ജീവിതം അവസാനിപ്പിക്കുമെന്നും പറഞ്ഞു. തന്‍റെ പിതാവ് ബാങ്കിൽനിന്ന് വായ്പ എടുത്തിട്ടുണ്ട്. അദ്ദേഹം താൻ ജനിക്കുന്നതിന് മുമ്പു തന്നെ വായ്പ എടുക്കലും തിരിച്ചടയ്ക്കലും തുടങ്ങിയതാണ്. അവസാനമായി എടുത്ത വായ്പ 10.5 ലക്ഷം രൂപമാത്രമാണ്. ഇതിന്‍റെ പകുതി തുക തിരിച്ചടച്ചിട്ടുണ്ട്. ബാക്കിയുള്ളത് വൈകാതെ തിരിച്ചടയ്ക്കും. അല്ലാതെ തനിക്ക് ബാങ്കിൽ വായ്പയില്ലെന്നും ഗഫൂർ കോൽളളത്തിൽ വ്യക്തമാക്കി. ബാങ്കിൽ പ്രമോഷനായി വ്യാജ സർട്ടിഫിക്കറ്റ് നൽകി ബാങ്കിന് സാമ്പത്തിക ബാധ്യത വരുത്തി എന്നെല്ലാമുള്ള പ്രചാരണവും അടിസ്ഥാനരഹിതമാണ്. 12 വർഷങ്ങൾക്കു മുമ്പ് ബാങ്ക് തനിക്ക് പ്രമോഷൻ തന്നിരുന്നു. അതിനുള്ള അധികാരം ഭരണസമിതിക്കുണ്ട്. ഭരണസമിതി അത് റദ്ദാക്കിയപ്പോൾ നൽകിയ ശന്പളവും ബാങ്കിന് തിരിച്ചടച്ചിട്ടുണ്ടെന്നും ഗഫൂർ പറഞ്ഞു. ബാങ്കിനോ മറ്റു വ്യക്തികൾക്കോ യാതൊരു നഷ്sവും വരുത്തിയിട്ടില്ലന്നിരിക്കെ ഇത്തരം കുപ്രചരണങ്ങൾ തന്‍റെ രാഷ്ട്രീയ ജീവിതത്തിന് കളങ്കമേൽപ്പിക്കാനാണ്. ഇത് ജനങ്ങൾക്കിടയിൽ വിലപ്പോകില്ലെന്നും ഗഫൂർ കോൽക്കളത്തിൽ പറഞ്ഞു.

അവകാശദിനം ആചരിച്ചു

പാലക്കാട്: സെക്യൂരിറ്റി ആൻഡ് അലൈഡ് വർക്കേഴ്സ് യൂണിയൻ അഖിലേന്ത്യ കോ- ഓർഡിനേഷൻ കമ്മിറ്റി (സിഐടിയു) അഖിലേന്ത്യാ അവകാശദിനം ആചരിച്ചു. സെക്യൂരിറ്റി ആൻഡ് ഹൗസ് കീപ്പിംഗ് തൊഴിലാളികളുടെ മിനിമം വേതനം 26,000 രൂപയാക്കി പുതുക്കി നിശ്ചയിക്കുക, ഏജൻസികൾ മാറിയാലും തൊഴിലാളികളെ മാറ്റാതിരിക്കുക, ഹൗസ് കീപ്പിംഗ് തൊഴിലാളികളുടെ ശമ്പളം ഏകീകരിക്കുക, കരാർ തൊഴിലാളികൾക്ക് സ്ഥിരം തൊഴിലാളികൾക്ക് നൽകുന്ന വേതനം നൽകുക തുടങ്ങിയ ആവശ്യങ്ങൾ ഉന്നയിച്ച് പാലക്കാട് ഹെഡ് പോസ്റ്റ് ഓഫീസിന് മുന്നിൽ പ്രകടനവും ധർണയും നടത്തി. സിഐടിയു സംസ്ഥാന കമ്മിറ്റി അംഗം ടി.കെ. അച്യുതൻ ഉദ്ഘാടനം ചെയ്തു. ജില്ലാ പ്രസിഡന്‍റ് കെ.അജയൻ അധ്യക്ഷത വഹിച്ചു.

അന്പലക്കുളത്തിൽ യുവാവ് മുങ്ങിമരിച്ചു

ശ്രീകൃഷ്ണപുരം: മണ്ണന്പറ്റ പച്ചായിൽ അന്പലക്കുളത്തിൽ യുവാവിനെ മരിച്ചനിലയിൽ കണ്ടെത്തി. മണ്ണന്പറ്റ ഇല്ലിക്കോട്ടിൽ ദീപക്(22) ആണ് മരിച്ചത്. ശ്രീകൃഷ്ണപുരം പഞ്ചായത്ത് ആശാവർക്കർ ദീപയുടെയും പരേതനായ രാമദാസന്‍റെയും മകനാണ്. തിങ്കളാഴ്ച രാത്രി പന്ത്രണ്ടരവരെ ദീപക് വീട്ടിലുണ്ടായിരുന്നതായി ബന്ധുക്കൾ പറഞ്ഞു. പുലർച്ചെ ദീപക്കിനെ കാണാതായതിനെതുടർന്ന് ശ്രീകൃഷ്ണപുരം പോലീസിൽ പരാതി നൽകുകയും തുടർന്നു നാട്ടുകാർ തെരച്ചിൽ നടത്തുകയുമായിരുന്നു. പച്ചായി അന്പലക്കുളത്തിന്‍റെ കുളിക്കടവിൽ ദീപക്കിന്‍റെ ചെരിപ്പും ഫോണും ടീഷർട്ടും കണ്ടതിനെതുടർന്ന് ഫയർഫോഴ്സിനെ വിവരം അറിയിച്ചു. ഫയർഫോഴ്സ് എത്തി നടത്തിയ തെരച്ചിലിൽ മൃതദേഹം കണ്ടെത്തി. ആത്മഹത്യയാണെന്നാണ് പ്രാഥമികനിഗമനം. സഹോദരി: ദീപ്തി.

അപകടമരണം; യുവാക്കളുടെ മൃതദേഹങ്ങൾ സംസ്കരിച്ചു

വടക്കഞ്ചേരി: തൃശൂർ-പാലക്കാട് ദേശീയപാതയിൽ അഞ്ചുമൂർത്തിമംഗലത്തു വാഹനാപകടത്തിൽ മരിച്ച യുവാക്കളുടെ മൃതദേഹം പോസ്റ്റ്മോർട്ടത്തിനുശേഷം സംസ്കരിച്ചു. പാലക്കാട് ജില്ലാ ആശുപത്രിയിലായിരുന്നു പോസ്റ്റ്മോർട്ടം. അഞ്ചുമൂർത്തിമംഗലം തെക്കേത്തറ പാഞ്ഞാംപറമ്പ് രാജന്‍റെ മകൻ ഷിബു (28), പല്ലാവൂർ ചെമ്മണംകാട് കൃഷ്ണന്‍റെ മകൻ കിഷോർ (28) എന്നിവരാണ് മരിച്ചത്. തിങ്കളാഴ്ച രാത്രി അഞ്ചുമൂർത്തിമംഗലം കൊല്ലത്തറ ബസ് സ്റ്റോപ്പിനു സമീപമായിരുന്നു അപകടം. ഷിബുവും കിഷോറും വീട്ടിലേക്കു പോകാൻ ദേശീയപാത മുറിച്ചുകടക്കുന്നതിനിടെ പാലക്കാടുനിന്നും തൃശൂർ ഭാഗത്തേക്കു പോയിരുന്ന ഥാർ ജീപ്പ് ഇരുവരെയും ഇടിച്ചുതെറിപ്പിക്കുകയായിരുന്നു. ഗുരുതരമായി പരിക്കേറ്റ യുവാക്കളെ ഉടൻ ഇരട്ടക്കുളത്തെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പാഞ്ഞാംപറമ്പിലുള്ള അമ്മാവന്‍റെ വീട്ടിൽ വന്നതായിരുന്നു കിഷോർ. ഷിബുവിന്‍റെ വീടിനടുത്താണ് കിഷോറിന്‍റെ അമ്മാവന്‍റെ വീട്. ഇരുവരും അടുത്ത സുഹൃത്തുക്കളാണ്. ഡ്രൈവറാണ് ഷിബു. പോസ്റ്റ്മോർട്ടത്തിനുശേഷം ഷിബുവിന്‍റെ മൃതദേഹം വീട്ടിൽ കൊണ്ടുവന്ന് വൈകീട്ട് തിരുവില്വാമല ഐവർമഠത്തിൽ സംസ്കരിച്ചു. പല്ലാവൂരിലെ ചുമട്ടുതൊഴിലാളിയാണ് കിഷോർ. കിഷോറിന്‍റെ മൃതദേഹം പല്ലാവൂരിലെ വീട്ടിലേക്കു കൊണ്ടുപോയി. ഷിബുവിന്‍റെ അമ്മ: ബാലാമണി. ഭാര്യ: നന്ദന. മകൻ: ഇഷാൻ. കിഷോറിന്‍റെ അമ്മ: വത്സല. സഹോദരങ്ങൾ: കിരൺ, കീർത്തി. അമിതവേഗത്തിലും അശ്രദ്ധമായും വാഹനം ഓടിച്ചതിനു ജീപ്പ് ഡ്രൈവർ ആലപ്പുഴ സ്വദേശി ലൂയിസ് ജോർജി(37)നെതിരേ വടക്കഞ്ചേരി പോലീസ് കേസെടുത്തു.

ദേവാലയശില്പി കടപ്പാറ ജോബിന്‍റെ പാത പിന്തുടർന്ന് മൂന്നു മക്കളും

ഫ്രാൻസിസ് തയ്യൂർ മംഗലംഡാം: ആലത്തൂർ ഉപജില്ലാ ശാസ്ത്രോത്സവത്തിൽ ദേവാലയശില്പി കടപ്പാറ തോണിപ്പാറ വീട്ടിലെ ജോബിന്‍റെ മൂന്നുമക്കൾക്കും മരത്തിലെ നിർമാണപ്രവൃത്തികൾക്ക് സമ്മാനം. മൂത്തയാൾ മംഗലംഡാം ലൂർദ് മാതാഹയർ സെക്കൻഡറി സ്കൂളിൽ എട്ടാംക്ലാസിൽ പഠിക്കുന്ന ആരോൺ ടി. ജോബിൻ, രണ്ടാമത്തെ മകൻ പൊൻകണ്ടം മംഗലഗിരി സെന്‍റ് മേരീസ് എൽപി സ്കൂളിലെ നാലാം ക്ലാസുകാരൻ ജിയോൺ ടി. ജോബിൻ, ഇതേ സ്കൂളിൽ പഠിക്കുന്ന ഇളയയാൾ രണ്ടാം ക്ലാസുകാരൻ ഡിയോൺ ജോബിൻ എന്നിവരാണ് ശില്പ നിർമാണത്തിലും മരപ്പണിയിലും തിളങ്ങി സ്കൂളിന് അഭിമാനമായത്. ആരോണിനും ജിയോണിനും മരത്തിലെ കൊത്തുപണിയിൽ ഫസ്റ്റ് എ ഗ്രേഡും മൂന്നാമത്തെയാൾ ഡിയോണിന് മരപ്പണിയിൽ സെക്കൻഡ് എ ഗ്രേഡുമുണ്ട്. ആരോണും ജിയോണും മുൻ വർഷങ്ങളിലേയും താരങ്ങളാണ്. രണ്ടാം ക്ലാസുകാരൻ ഡിയോൺ ആദ്യമായാണ് മത്സരത്തിനെത്തിയത്. വീടുകളിൽ ഉപയോഗയോഗ്യമായ ഏതെങ്കിലും അഞ്ച് ഐറ്റങ്ങളുടെ നിർമാണമായിരുന്നു രണ്ടാംക്ലാസുകാരന് ചെയ്യാനുണ്ടായിരുന്നത്. തത്സമയം ചേയ്യേണ്ടതാണ് ഇതെല്ലാം. സ്റ്റൂളും ചിരവയും മൊബൈൽ സ്റ്റാൻഡ് ഉൾപ്പെടെ നിർമിച്ചാണ് ഡിയോൺ വിധികർത്താക്കളെ ഞെട്ടിച്ചത്. ഡിസൈൻ തന്ന് അതിൽ കൊത്തുപണി നടത്തി പോളിഷ് ചെയ്ത് ഫിനിഷിംഗ് ഉൾപ്പെടെ ചെയ്യാനായിരുന്നു ആരോണിനും ജിയോണിനുമുള്ള മത്സരം. സംസ്ഥാന സ്കൂൾ ശാസ്ത്രോത്സവം പാലക്കാട് തന്നെയായതിനാൽ ഡിസൈൻ കടുപ്പം കൂടിയതായിരുന്നെന്ന് ആരോൺ പറയുന്നു. പട്ടാമ്പിയിൽ നടക്കുന്ന റവന്യു ശാസ്ത്രോത്സവത്തിൽ മത്സരിക്കുന്നതിനുള്ള പരിശീലനത്തിലാണ് ഇപ്പോൾ ആരോൺ. വീട്ടിൽ പഠനം കഴിഞ്ഞുള്ള സമയം കൊത്തുപണികൾക്കാണ് മൂന്ന് പേർക്കും താത്പര്യം. അതിന് സ്കൂളിൽ നിന്നുള്ള പിന്തുണ കൂടിയായപ്പോൾ അപൂർവമായ കഴിവുകൾ പ്രകടിപ്പിക്കാൻ മക്കൾക്കും അവസരങ്ങളായെന്ന് ജോബിൻ പറഞ്ഞു. മൂന്നുപേരുടെയും കരവിരുതിലെ വിസ്മയങ്ങൾ കണ്ട് അയൽവാസിയായ ലൂർദ്മാതാ എച്ച്എസ്എസിലെ ഏഴാം ക്ലാസുകാരൻ ശ്രീജിത്തും ഇപ്പോൾ ഒഴിവുദിവസങ്ങളിൽ ഇവർക്കൊപ്പം ശില്പനിർമാണപുരയിലുണ്ടാകും.ശ്രീജിത്തിനും ശില്പ നിർമാണത്തിൽ ശാസ്ത്രോത്സവത്തിൽ ഫസ്റ്റ് എ ഗ്രേഡുണ്ട്. എട്ടാം ക്ലാസുകാരൻ ആരോണാണ് കൂട്ടുകാരനായ ശ്രീജിത്തിന്‍റെ ഗുരു. ശില്പ നിർമാണ വിദഗ്ദനാണ് ജോബിൻ. ദേവാലയ ശില്പങ്ങളിലെ സ്പെഷലിസ്റ്റാണ്. അതിസൂക്ഷ്മതയും ക്ഷമയും വേണ്ട പണികളാണ് മരപ്പണിയെന്ന് ജോബിൻ പറയുന്നു. ഏറ്റവും പൂജ്യമായ സ്ഥലങ്ങളിൽ സ്ഥാപിക്കപ്പെടേണ്ട കുരിശുൾപ്പെടെയുള്ള വസ്തുക്കളുടെ നിർമാണമാകുമ്പോൾ അതിന് കൂടുതൽ കരുതലും വിശുദ്ധിയും വേണം. കടപ്പാറ സെന്‍റ് മേരീസ് പള്ളി റോഡിലുള്ള ഇവരുടെ വീടിനോട് ചേർന്ന് തന്നെയാണ് ശില്പവിസ്മയങ്ങളുടെ പണിപ്പുര. നാനോ ശില്പനിർമാണത്തിലാണ് ജോബിന് കൂടുതൽ നൈപുണ്യം. മരത്തിലുള്ള വാഹനങ്ങളുടെ ഗിയർ നോബ്, ബൈബിൾ സ്റ്റാൻഡ്, രൂപകൂടുകൾ, കുരിശുകൾ, വചനമേശ, ബലിപീഠം തുടങ്ങിയവയാണ് നിർമിക്കുന്നത്. വീടുകളിലേക്കുള്ള പ്രാർഥനാപീഠം, സ്റ്റാൻഡുകൾ, മരത്തിൽ തീർത്ത സ്പോട്ട് ലൈറ്റുകൾ, വേരുകളിലെ വിസ്മയ പണികൾ, കുരിശിന്‍റെ വഴിയിലെ 14 സ്ഥലങ്ങൾ തുടങ്ങി ദേവാലയങ്ങളിലേക്കുള്ള എല്ലാ മരസാധനങ്ങളും ഏറ്റവും പെർഫെക്ഷനിൽ ജോബിന്‍റെ കരവിരുതിൽ ജന്മമെടുക്കും. ശില്പ കലയിൽ അക്കാദമിക് പഠനങ്ങളില്ലെങ്കിലും കരവിരുതിലെ ആശാൻ തന്നെയാണ് 69 കാരനായ ജോബിന്‍റെ ചാച്ചൻ തോമസും. വീട്ടുപണികളെല്ലാം കഴിഞ്ഞാൽ ജോബിന്‍റെ ഭാര്യ ഷീനയും ശില്പനിർമാണത്തിൽ സഹായിയായുണ്ടാകും. ഓട്ടോ ഡ്രൈവർ കൂടിയാണ് ജോബിൻ.

നെല്ലിയാമ്പതിയിൽ പോളി ഹൗസ് കൃഷിയുടെ വിളവെടുപ്പ് ഉദ്ഘാടനം

നെല്ലിയാമ്പതി: കാർഷികവികസന കർഷകക്ഷേമ വകുപ്പിന്‍റെ കീഴിലുള്ള നെല്ലിയാമ്പതി ഗവ. ഓറഞ്ച് ആൻഡ് വെജിറ്റബിൾ ഫാമിലെ ഓഫ് സീസണിൽ പോളിഹൗസുകളിൽ കൃഷിയിറക്കിയ ശീതകാലപച്ചക്കറികളായ ബ്രോക്കോളി, കാബേജ് എന്നിവയുടെയും സിയാറാ ഇനം പച്ചമുളക് എന്നിവയുടെയും വിളവെടുപ്പ് ഉദ്ഘാടനം ജില്ലാ പഞ്ചായത്ത്‌ വികസന സ്റ്റാൻഡിംഗ് കമ്മിറ്റി ചെയർപേഴ്സൺ നീതു നിർവഹിച്ചു. ജില്ലാ കൃഷി ഡെപ്യൂട്ടി ഡയറക്ടർ ആർ. ആശ അധ്യക്ഷത വഹിച്ചു. ഫാം സൂപ്രണ്ട് പി. സാജിദലി, ഫാം മാനേജർ ദേവി കീർത്തന, മറ്റു തൊഴിലാളികൾ, ജീവനക്കാർ പങ്കെടുത്തു. പത്തു സെന്‍റ് വീതമുള്ള മൂന്നു പോളി ഹൗസുകളിൽ ആണ് ഇത്തരത്തിൽ പരീക്ഷണാടിസ്ഥാനത്തിൽ കൃഷി ചെയ്തിട്ടുള്ളത്. ഓറഞ്ചിനും മറ്റു നാരക വർഗവിളകൾക്കും ഇടയിൽ ഓപ്പൺ പ്രിസിഷൻ ഫാമിംഗ് രീതിയിൽ വിവിധ ഇനം ശീതകാല പച്ചക്കറികൾ കൃഷി ഇറക്കുന്നതിനുള്ള പ്രവർത്തനങ്ങൾ ഫാമിൽ തകൃതിയായി നടന്നുവരികയാണ്.

നെല്ലിയാമ്പതിയിൽ വിനോദസഞ്ചാരികളുടെ തിരക്ക്

നെന്മാറ: ദീപാവലി അവധിയോടനുബന്ധിച്ച് കഴിഞ്ഞ രണ്ടു ദിവസവും നെല്ലിയാമ്പതിയിൽ വിനോദസഞ്ചാരികളുടെ തിരക്ക് അനുഭവപ്പെട്ടു. ഇരുചക്രവാഹനം ഉൾപ്പെടെ ശരാശരി 4000 വാഹനങ്ങൾ പോത്തുണ്ടി ചെക്ക്പോസ്റ്റിലൂടെ കടന്നുപോയെന്ന് ചെക്ക്പോസ്റ്റ് അധികൃതർ പറഞ്ഞു. അതുപ്രകാരം പതിനയ്യായിരത്തിലേറെ ആളുകൾ ഓരോ ദിവസവും നെല്ലിയാമ്പതി സന്ദർശിച്ചതായാണ് കണക്ക്. നെല്ലിയാമ്പതി ചുരംപാതയിലും വീതി കുറഞ്ഞ സീതാർകുണ്ട്, കാരപ്പാറ, റൂട്ടുകളിലും ഗതാഗതക്കുരുക്ക് അനുഭവപ്പെട്ടു. കേശവൻപാറ സന്ദർശകരുടെ വാഹനങ്ങളുടെ നീണ്ടനിര പാർക്കിംഗ് ഗ്രൗണ്ടും നിറഞ്ഞ് റോഡരികിലേക്ക് നീണ്ടു. പുലയമ്പാറയിൽ സഫാരി ജീപ്പ് സർവീസുകാരും വിനോദസഞ്ചാരികളുടെ വാഹനത്തിരക്കും ഗതാഗതക്കുരുക്കിന് ഇടയാക്കി. വൈകുന്നേരം നാലിനുശേഷം ഉണ്ടായ മഴ തിരിച്ചിറങ്ങുന്ന വിനോദസഞ്ചാരികൾക്ക് ഏറെ ബുദ്ധിമുട്ടുണ്ടാക്കി. ഇടയ്ക്ക് മഴയെ തുടർന്നുണ്ടായ കോടയും വാഹനഗതാഗതത്തിന് വേഗത കുറയാൻ ഇടയാക്കി. നെല്ലിയാമ്പതിയിലെ റിസോർട്ടുകളിലും മറ്റു താമസസ്ഥലങ്ങളിലും റൂമുകൾ നേരത്തെ ബുക്ക് ചെയ്തിരുന്നു. ഞായർ, തിങ്കൾ ദിവസങ്ങളിൽ എത്തിയ വിനോദസഞ്ചാരികളിൽ ബഹുഭൂരിപക്ഷം പേരും താമസസൗകര്യം ലഭ്യമല്ലാത്തതിനാൽ വൈകുന്നേരത്തോടെ മടങ്ങി. വിനോദസഞ്ചാരവാഹനങ്ങളുടെ ഇടവിടാതെയുള്ള തിരക്ക് ചുരം റോഡിൽ ഉണ്ടായെങ്കിലും തിരക്ക് വകവയ്ക്കാതെ കാട്ടാനക്കൂട്ടം റോഡിൽ എത്തി ഏറെനേരം ഗതാഗതതടസവും ഉണ്ടാക്കി.

മണ്ണാർക്കാട് എയ്ഡഡ് സ്കൂൾ കോ-ഓപ്പറേറ്റീവ് സൊസൈറ്റി കെട്ടിടം ഉദ്ഘാടനംചെയ്തു

മണ്ണാർക്കാട്: എയ്ഡഡ് സ്കൂൾ എംപ്ലോയീസ് കോ-ഓപ്പറേറ്റീവ് ക്രെഡിറ്റ് സൊസൈറ്റിയുടെ പുതിയ ഓഫീസ് കെട്ടിടം സഹകരണ വകുപ്പ് മന്ത്രി വി.എൻ. വാസവൻ ഓൺലൈനായി ഉദ്ഘാടനം ചെയ്തു. സഹകരണമേഖലയെ ശക്തിപ്പെടുത്താനുള്ള പ്രവർത്തനങ്ങളാണ് സംസ്ഥാന സർക്കാർ ചെയ്യുന്നതെന്ന് മന്ത്രി പറഞ്ഞു. എൻ. ഷംസുദ്ദീൻ എംഎൽഎ അധ്യക്ഷത വഹിച്ചു. സ്ട്രോംഗ് റൂമിന്‍റെ ഉദ്ഘാടനം കെ. ശാന്തകുമാരി എംഎൽഎ നിർവഹിച്ചു. എൻ.കെ. നാരായണൻകുട്ടി, യു.ടി. രാമകൃഷ്ണൻ, ടി.ആർ. സെബാസ്റ്റ്യൻ, സി. വിമല, എ.എം. അജിത്, കെ. താജുദ്ദീൻ, ടി. ജയഭാരതി, കെ. ഗീതാകുമാരി, സി. അബൂബക്കർ, കെ.കെ. മണികണ്ഠൻ, എം. പുരുഷോത്തമൻ, എസ്.ആർ. ഹബീബുള്ള, കെ.ടി. ഭക്തഗിരീഷ്, പി.യൂസഫ്, ഗിരീഷ്, എം. പ്രദീപ്, സലിം നാലകത്ത്, എം.എൻ. രാമകൃഷ്ണപിള്ള പി.എൻ. മോഹനൻ, പി.എം. മധു, സി. ബാലകൃഷ്ണൻ, മിനി ജോൺ തുടങ്ങിയവർ പ്രസംഗിച്ചു.

എൻസിപി- എസ് ജില്ലാ നേതൃയോഗം

പാലക്കാട്: എൻസിപി- എസ് ജില്ലാ നേതൃയോഗം സംസ്ഥാന ജനറൽ സെക്രട്ടറി ടി.എൻ. ശിവശങ്കരൻ ഉദ്ഘാടനം ചെയ്തു. ജില്ലാ പ്രസിഡന്‍റ് എ. രാമസ്വാമി അധ്യക്ഷത വഹിച്ചു. സംസ്ഥാന ജനറൽ സെക്രട്ടറി പി.എ. റസാഖ് മൗലവി, സംസ്ഥാന നേതാക്കളായ ഓട്ടൂർ ഉണ്ണികൃഷ്ണൻ, കാപ്പിൽ സൈതലവി, പി അബ്ദുൽ റഹ്്മാൻ, ഷനിൻ മന്ദിരാട്, ഷൗക്കത്തലി കുളപ്പാടം, ജില്ലാ ഭാരവാഹികളായ പി. മൊയ്തീൻകുട്ടി, എം.എൻ. സൈഫുദ്ദീൻ കിച്ച്ലു, പൊന്നിൽ വേണു, റെജി ഉള്ളരിക്കൽ തുടങ്ങിയവർ പ്രസംഗിച്ചു.

സ്റ്റിച്ചിംഗ് ട്രെയിനിംഗ് ബാച്ചിന്‍റെ സർട്ടിഫിക്കറ്റ് വിതരണം

മണ്ണാർക്കാട്: പാലക്കാട് രൂപതയുടെ ഔദ്യോഗിക സാമൂഹ്യസേവന സംഘടനയായ പീപ്പിൾസ് സർവീസ് സൊസൈറ്റി പാലക്കാട് സംഘടിപ്പിച്ച സ്ത്രീ ശാക്തീകരണവും, തൊഴിൽപരിശീലനവും സംരംഭകത്വ വികസനം ലക്ഷ്യമാക്കിയ സ്റ്റിച്ചിംഗ് ട്രെയിനിംഗ് ബാച്ചിന്‍റെ സർട്ടിഫിക്കറ്റ് വിതരണവും മണ്ണാർക്കാട് പെരിന്പടാരി ഹോളി സ്പിരിറ്റ് ഫൊറോനാ പള്ളിയിൽ നടത്തി. ഹോളി സ്പിരിറ്റ് ഫൊറോന പള്ളി വികാരി ഫാ. രാജു പുളിക്കത്താഴെ ഉദ്ഘാടനം ചെയ്ത് സർട്ടിഫിക്കറ്റുകൾ വിതരണംചെയ്തു. പിഎസ്എസ്പി എക്സിക്യൂട്ടീവ് സെക്രട്ടറി ഫാ. സീജോ കാരിക്കാട്ടിൽ അധ്യക്ഷത വഹിച്ചു. ജെൻഡർ കോ-ഓർഡിനേറ്റർ കെ.എൽ. അരുണ്‍ സ്വാഗതം പറഞ്ഞു. പ്രോജക്ട് ഓഫീസർ പി. ബോബി, ആനിമേറ്റർ വൽസമ്മ എന്നിവർ പ്രസംഗിച്ചു. തൊഴിൽരംഗത്ത് സ്ത്രീകളുടെ സാന്പത്തിക സ്വാതന്ത്ര്യത്തിനും സംരംഭകത്വ വളർച്ചക്കും വഴിതെളിയിക്കുന്ന തരത്തിൽ കരൂർ വൈശ്യ ബാങ്ക് ഉദ്യോഗസ്ഥർ ബാങ്കിംഗ്, ഫിനാൻഷ്യൽ ലിറ്ററസി വിഷയത്തിൽ ബോധവത്കരണ ക്ലാസെടുത്തു.

തണ്ണീരങ്കാട് ജിജെബി സ്കൂൾകെട്ടിട ഉദ്ഘാടനം നാളെ

പാലക്കാട്: മാത്തൂർ പഞ്ചായത്തിലെ തണ്ണീരങ്കാട് ജിജെബി സ്കൂളിൽ പുതിയ കെട്ടിടത്തിന്‍റെ ഉദ്ഘാടനം നാളെ ഉച്ചയ്ക്കുശേഷം മൂന്നിന് രാഹുൽ മാങ്കൂട്ടത്തിൽ എംഎൽഎ നിർവഹിക്കും. ഷാഫി പറമ്പിൽ എംഎൽഎയുടെയും രാഹുൽ മാങ്കൂട്ടത്തിൽ എംഎൽഎയുടെയും ആസ്തി വികസനഫണ്ടിൽനിന്നും മൂന്നുഘട്ടങ്ങളിലായി 1.32 കോടി രൂപ ചെലവഴിച്ചാണ് കെട്ടിടത്തിന്‍റെ നിർമാണം പൂർത്തീകരിച്ചത്. 498 ചതുരശ്ര അടിയിൽ രണ്ടുനിലയായിട്ടാണ് കെട്ടിടം പൂർത്തീകരിച്ചിരിക്കുന്നത്. രണ്ടു ക്ലാസ്മുറികളും, ഓഫീസ് മുറിയും, വരാന്തയും, ടോയ്‌ലറ്റ് ബ്ലോക്കും അടങ്ങുന്നതാണ് ഗ്രൗണ്ട് ഫ്ലോർ. ഒന്നാംനിലയിൽ മൂന്ന് ക്ലാസ് മുറികളും, വരാന്തയും, ടോയ്‌ലറ്റ് ബ്ലോക്കും ഉൾപ്പെട്ടിട്ടുണ്ട്. ക്ലാസ് മുറികളും ടോയ്‌ലറ്റും നൂതന സാങ്കേതികവിദ്യ പ്രയോജനപ്പെടുത്തിയാണ് നിർമിച്ചിരിക്കുന്നത്. മാത്തൂർ പഞ്ചായത്ത് പ്രസിഡന്‍റ് പ്രവിത മുരളീധരൻ അധ്യക്ഷത വഹിക്കുന്ന ചടങ്ങിൽ പഞ്ചായത്ത് വൈസ് പ്രസിഡന്‍റ് പി.ആർ. പ്രസാദ്, ജില്ലാ പഞ്ചായത്ത് അംഗം ശ്രീധരൻ, ജില്ലാ വിദ്യാഭ്യാസ ഓഫീസർ ആസിഫ് അലിയാർ, വികസന സ്റ്റാൻഡിംഗ് കമ്മിറ്റി ചെയർപേഴ്സൺ നാദിറ ഇസ്മയിൽ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പ്രേമ ദാസൻ, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ജയശ്രീ പ്രകാശൻ, ബ്ലോക്ക് പഞ്ചായത്ത് അംഗം സോമദാസൻ, വാർഡ് മെംബർ അനിത കലാധരൻ, ഉപജില്ലാ വിദ്യാഭ്യാസ ഓഫീസർ കെ. വിക്ടർ ഡേവിഡ് എന്നിവർ പങ്കെടുക്കും.

മത്സ്യസംസ്കരണ കന്പനിക്കെതിരേ നിയമപരമായി മുന്നോട്ടുനീങ്ങാൻ ഗ്രാമസഭകളിൽ തീരുമാനം

വേലന്താവളം: വടകരപ്പതി ആട്ടയാംപതിയിൽ പ്രവർത്തിക്കുന്ന മത്സ്യസംസ്‌കരണ കമ്പനിക്കെതിരേ നിയമപരമായി മുന്നോട്ടുപോകാൻ തീരുമാനം. കഴിഞ്ഞ മൂന്നുദിവസങ്ങളിലായി ചേർന്ന ആട്ടയാംപതി, ഒഴലപ്പതി, കിണർപ്പള്ളം എന്നീ വാർഡുകളിലെ പ്രത്യേക ഗ്രാമസഭയിലാണ് ഇക്കാര്യത്തിൽ തീരുമാനമായത്. കമ്പനി പ്രവർത്തിക്കുന്ന സമയത്ത് ദുർഗന്ധം പരക്കുന്നതു പ്രദേശവാസികൾക്കു ദുരിതമായതിനെതുടർന്നാണ് നടപടി ആവശ്യപ്പെട്ടു പ്രത്യേക ഗ്രാമസഭകൾ വിളിച്ചു ചേർത്തത്. കമ്പനി സ്ഥിതി ചെയ്യുന്നതിനു ചുറ്റുമുള്ള അഞ്ച്, ആറ്, ഒമ്പത് വാർഡുകളിലാണ് പ്രത്യേക ഗ്രാമസഭ ചേർന്നത്. ഗ്രാമസഭാ യോഗങ്ങളിൽ പഞ്ചായത്ത് പ്രസിഡന്‍റ് ഡി. ജോസി ബ്രിട്ടോ നേതൃത്വം വഹിച്ചു. വലിയ കമ്പനി നിലവിൽവന്നാൽ പ്രദേശത്തെ ജനങ്ങൾക്കു തൊഴിൽ ലഭിക്കുമെന്ന ഉദ്ദേശത്തോടെയാണ് അനുകൂലിച്ചതെന്നതെന്നായിരുന്നു പഞ്ചായത്ത് അംഗങ്ങളുടെ മറുപടി. നിയമപരമായ തെളിവുകൾ ചൂണ്ടിക്കാട്ടി കോടതിയെ സമീപിക്കണമെന്നതാണ് യോഗത്തിൽ പങ്കെടുത്തവർ അഭിപ്രായം അറിയിച്ചത്. ഇത്തരത്തിലുള്ളകമ്പനി തുടങ്ങുന്നതിനു മുൻപ് ഗ്രാമസഭ വിളിച്ചുചേർത്ത് അറിയിപ്പു കൊടുക്കണമെന്ന നിബന്ധന പാലിച്ചിട്ടില്ല. പഞ്ചായത്തിന്‍റെ ഭാഗത്തു നിന്നുണ്ടായ വീഴ്‌ച മിനിറ്റ്സിൽ രേഖപ്പെടുത്തിക്കൊണ്ടുതന്നെ കോടതിയെ സമീപിക്കാനും തീരുമാനമായി. അടുത്ത ഭരണസമിതിക്കും കേസുമായി മുന്നോട്ടു പോകാൻ ഉതകുന്നതരത്തിലായിരിക്കണം ഇടപെടലുകൾ വേണ്ടതെന്നും ഗ്രാമസഭ ഏകകണ്ഠമായി തീരുമാനിച്ചു. പഞ്ചായത്ത് സെക്രട്ടറി എ. മേരി ബിബിയാന, പഞ്ചായത്തംഗം ആർ. ബിന്ദു, ആർ. ശശികുമാർ, കെ. ചിന്നസ്വാമി എന്നിവർ പ്രസംഗിച്ചു.

പാലക്കാട് വലിയങ്ങാടി : അണിഞ്ഞൊരുങ്ങും പുതുമോടിയിൽ

പാലക്കാട്: വലിയങ്ങാടി അണിഞ്ഞൊരുങ്ങും പുതുമോടിയിൽ. ജില്ലയിലെ പ്രധാന വ്യാപാരകേന്ദ്രമായ പാലക്കാട് വലിയങ്ങാടിയുടെ സമഗ്ര വികസനത്തിന് 140 കോടി രൂപയുടെ കേന്ദ്രപദ്ധതിക്കാണ് അംഗീകാരമായത്. കേന്ദ്ര സർക്കാരിന്‍റെ വികസന പദ്ധതി സ്പെഷൽ അസിസ്റ്റന്‍റ്സ് ടു സ്റ്റേറ്റ് ഫോർ ക്യാപ്പിറ്റൽ ഇൻവെസ്റ്റ് (എസ്എഎസ്‌സിഐ) പദ്ധതിയിൽ ഉൾപ്പെടുത്തി ആദ്യഘട്ടത്തിൽ 50 കോടിയും രണ്ടാംഘട്ടമായി 90 കോടി രൂപയുമാണു വികസനത്തിനായി ലഭിക്കുക. ഇതിന്‍റെ ഭാഗമായുള്ള സർവേ നടപടികളിൽ 80 ശതമാനം പൂർത്തിയായിട്ടുണ്ട്. വിശദാംശങ്ങൾ ശേഖരിച്ച് നവംബർ ആദ്യവാരം സംസ്ഥാനസർക്കാർ മുഖേന കേന്ദ്രത്തിന് റിപ്പോർട്ട് നൽകാനാണു നഗരസഭ ലക്ഷ്യമിടുന്നത്. 60 ഹെക്ടർ വരുന്ന വലിയങ്ങാടി പ്രദേശത്തിന്‍റെ അടിസ്ഥാന സൗകര്യ വികസനം മെച്ചപ്പെടുത്തി വ്യാപാരത്തിനും ഷോപ്പിംഗിനും വിനോദത്തിനും ഒരുപോലെ ആധുനിക സൗകര്യം ലഭ്യമാക്കിയായിരിക്കും വികസനം. പച്ചക്കറി, മീൻ മാർക്കറ്റുകൾ, പരിസരത്തെ സ്കൂളുകൾ, നഗരസഭാ കെട്ടിടം, പോലീസ് സ്റ്റേഷൻ, വില്ലേജ് ഓഫിസ് തുടങ്ങിയവയുടെ നവീകരണമടക്കം പദ്ധതിയുടെ ഭാഗമായിരിക്കും. പ്രദേശത്തെ കുളം, കനാൽ എന്നിവ നവീകരിച്ച് ഇതിനോടു ചേർന്ന് പാർക്ക്, ഫുഡ് സ്ട്രീറ്റ്, വാഹന പാർക്കിംഗ് സൗകര്യങ്ങൾ ഒരുക്കും. വലിയങ്ങാടിയുടെ വ്യാപാരചരിത്രം ഒട്ടുംചോരാതെയായിരുന്നു വലിയങ്ങാടിയുടെ വികസനം. പ്രദേശത്തെ പ്രത്യേക ബ്ലോക്കുകളായി തിരിച്ച് കൂടുതൽ വിപുലമായ സൗകര്യങ്ങളോടെ പുതിയ കെട്ടിടവും വ്യാപാര സൗകര്യവും ഒരുക്കുന്നതാണു പ്രധാന പദ്ധതി. ഇതിനായി സ്ഥലം ഏറ്റെടുക്കില്ല. ലഭ്യമായ സ്ഥലത്താകും നിർമാണം. കാലപ്പഴക്കം ഏറെയുള്ള സുരക്ഷിതമല്ലാത്ത കെട്ടിടങ്ങളെല്ലാം നവീകരിക്കും. ഉപഭോക്താക്കൾക്കു നവീന ഷോപ്പിംഗ് അനുഭവം പ്രദാനം ചെയ്യുകയെന്നതാണ് പദ്ധതിയിലൂടെ ലക്ഷ്യമിടുന്നത്.

മണ്ണുമാന്തിയന്ത്രങ്ങളുടെ വാടക വർധിപ്പിക്കണമെന്ന് അസോസിയേഷൻ

പാലക്കാട്: മണ്ണുമാന്തി യന്ത്രങ്ങളുടെ വാടക വർധനവ് ആവശ്യപ്പെട്ടു കഴിഞ്ഞ ദിവസം കൺസ്ട്രക്്ഷൻ എക്യുപ്മെന്‍റ്സ് ഓണേഴ്സ് അസോസിയേഷൻ യന്ത്രങ്ങളുടെ വാഹനറാലി നടത്തി. കഞ്ചിക്കോട് മുതൽ പാലക്കാട് മെഡിക്കൽ കോളജ്‌വരെ നടന്ന പ്രകടനവും യോഗവും സംസ്ഥാന ജനറൽ സെക്രട്ടറി ഷമീർബാബു ഉദ്ഘാടനം ചെയ്തു. കിഴക്കൻ മേഖല കൺവീനർ സോമി കുര്യൻ സ്വാഗതം പറഞ്ഞു. മേഖല പ്രസിഡന്‍റ് ഷാജി അധ്യക്ഷത വഹിച്ചു. ജില്ലാ പ്രസിഡന്‍റ് വിജയകുമാർ, ജില്ലാസെക്രട്ടറി റഷീദ്, ഷാജി എന്നിവർ പ്രസംഗിച്ചു.

പോലീസ് അന്വേഷണത്തിനു തുടക്കം

വടക്കഞ്ചേരി: കിഴക്കഞ്ചേരി ആനയടിയൻപരുതയിൽ മുനിയറകൾ തകർത്ത സംഭവത്തിൽ മംഗലംഡാം പോലീസ് അന്വേഷണം ആരംഭിച്ചു. ഇന്നലെ വൈകുന്നേരം സിഐയുടെ നേതൃത്വത്തിലുള്ള സംഘം സ്ഥലത്തെത്തി പ്രാഥമിക പരിശോധന നടത്തി. അന്വേഷണം നടത്തി കുറ്റക്കാർക്കെതിരെ ശക്തമായ നടപടിയുണ്ടാകുമെന്ന് പോലീസ് നാട്ടുകാർക്ക് ഉറപ്പുനൽകിയിട്ടുണ്ട്. മുനിയറകൾ തകർത്തവുമായി ബന്ധപ്പെട്ട് കഴിഞ്ഞ വ്യാഴാഴ്ചയാണ് നാട്ടുകാർ പൊതുതാത്പര്യ പരാതി മംഗലംഡാം പോലീസിൽ നൽകിയത്. എന്നാൽ പരാതി നൽകി മൂന്നു ദിവസം പിന്നിട്ടിട്ടും പോലീസ് സ്ഥലത്തെത്തി പ്രാഥമിക പരിശോധന പോലും നടത്താത്തതിനെതിരെ ഇന്നലെ നാട്ടുകാരുടെ ഭാഗത്തുനിന്നും വലിയ പ്രതിഷേധങ്ങളണ്ടായിരുന്നു. ഇതിനു പിന്നാലെ ഇന്നലെ ഏറെവൈകി വൈകുന്നേരം ആറുമണിയോടെയാണ് പോലീസ് സംഘം സ്ഥലത്ത് പരിശോധനക്കെത്തിയത്.

വീഴുമലയെ പ്ലാസ്റ്റിക് വിമുക്തമാക്കി ആയക്കാട് സ്കൂളിലെ സ്കൗട്ട്സ് ആൻഡ് ഗൈഡ്സ്

ആലത്തൂർ: വീഴുമലയെ പ്ലാസ്റ്റിക് വിമുക്തമാക്കി ആയക്കാട് സിഎ ഹയർ സെക്കഡറി സ്കൂളിലെ സ്കൗട്ട്സ് ആൻഡ് ഗൈഡ്സ് വിദ്യാർഥികൾ. വീഴുമലയിൽ സംഘടിപ്പിച്ച പ്ലാസ്റ്റിക് വിമുക്ത കാമ്പയിൻ കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. വീഴുമലയുടെ താഴ്‌വാരത്തിൽ അലക്ഷ്യമായി വലിച്ചെറിഞ്ഞ പ്ലാസ്റ്റിക് കുപ്പികൾ, പ്ലാസ്റ്റിക് കടലാസുകൾ, പ്ലാസ്റ്റിക് കവറുകൾ എന്നിവ പെറുക്കി എടുത്ത് ഹരിതകർമസേനക്കു കൈമാറി. മൂന്നു ദിവസങ്ങളിലായി നടക്കുന്ന യൂണിറ്റ് ക്യാമ്പിന്‍റെ ഭാഗമായിട്ടാണ് വീഴുമല ഹൈക്കും, ശുചീകരണവും ചെയ്തത്. ഫോറസ്റ്റ് ഓഫീസർ നാസർ , സ്കൗട്ട് മാസ്റ്റർ ഷിനു. വി. ദേവ്, ഗൈഡ് ക്യാപ്റ്റൻ കെ. ഉമ്മുകുൽസു എന്നിവർ നേതൃത്വം നൽകി. ഫോറസ്റ്റ് ഓഫീസർമാരായ നന്ദിനി, ധന്യ, അഖിൽ, ഗിന്നസ്, കേഡറ്റുമാരായ നിവേദ്യ , കെ. അതുല്യ എന്നിവർ പ്രസംഗിച്ചു.

മായവരം, തഞ്ചാവൂർ, കുംഭകോണം ക്ഷേത്രങ്ങൾ സന്ദർശിച്ച് രഥോത്സവ ക്ഷേത്രപ്രതിനിധികൾ

പാലക്കാട്: കല്പാത്തി രഥോത്സവ ഒരുക്കങ്ങൾ തകൃതിയിൽ. ഉത്സവത്തിന്‍റെ പ്രഭവകേന്ദ്രമായ മായവരത്തെ ആദരവോടെ സ്മരിച്ച് കല്പാത്തി നിവാസികൾ. ഇതിന്‍റെ ഭാഗമായി അഗ്രഹാരങ്ങളിലെ ക്ഷേത്രഭാരവാഹികൾ കഴിഞ്ഞദിവസം തമിഴ്നാട്ടിലെ മായവരം (മയിലാടുംതുറൈ) മയൂരനാഥപുരം ക്ഷേത്രം സന്ദർച്ചു. തുലാം ഒന്നിനായിരുന്നു മായവരം മയൂരനാഥ ക്ഷേത്രത്തിലും കല്പാത്തി ശ്രീവിശാലാക്ഷീ സമേത വിശ്വനാഥസ്വാമി ക്ഷേത്രത്തിലും ഒരുമാസംനീളുന്ന തീർത്ഥോത്സവം ആരംഭിക്കുന്നത്. മാസാവസാനം പത്തു ദിനങ്ങളിലായാണ് രഥോത്സവം. കല്പാത്തി സംയുക്തരഥോത്സവ പത്രികയുടെ തമിഴ് പരിഭാഷ മായവരം ക്ഷേത്രത്തിൽ സമർപ്പിച്ച് ക്ഷേത്ര പുരോഹിതരേയും അവിടത്തെ അഗ്രഹാര നിവാസികളേയും കല്പാത്തി രഥോത്സവത്തിലേയ്ക്ക് ക്ഷണിച്ചു. കല്പാത്തി ശിവക്ഷേത്രം മാനേജിംഗ് ട്രസ്റ്റി വി.കെ. സുജിത്കുമാർ വർമ, ചാത്തപ്പുരം പ്രസന്ന ഗണപതി ക്ഷേത്രം കാര്യദർശി സി.വി. മുരളീ രാമനാഥൻ, ട്രഷറർ എ.വി. വാസുദേവൻ, മന്ദക്കര ശ്രീ മഹാഗണപതി ക്ഷേത്രം അധ്യക്ഷൻ കെ.എസ്. കൃഷ്ണ, പഴയ കല്പാത്തി ശ്രീലക്ഷ്മീ നാരായണ പെരുമാൾ ക്ഷേത്രം ട്രസ്റ്റി സി.വി. ശ്രീകൃഷ്ണൻ എന്നിവരുടെ നേതൃത്വത്തിലുള്ള പ്രതിനിധി സംഘമാണ് മായവരം ക്ഷേത്രം സന്ദർശിച്ചത്.

സ്റ്റാഫ് പാറ്റേൺ ഏകീകരിക്കണം: ഹോമിയോ ഫാർമസിസ്റ്റ് സമ്മേളനം

ഒറ്റപ്പാലം: ആയുഷ് ഹോമിയോപ്പതി വകുപ്പിൽ സ്റ്റാഫ് പാറ്റേൺ ഏകീകരിക്കണമെന്ന് കേരള ഗവ. ഹോമിയോ ഫാർമസിസ്റ്റ്സ് ഓർഗനൈസേഷൻ ജില്ലാ സമ്മേളനം ആവശ്യപ്പെട്ടു. സംസ്ഥാന പ്രസിഡന്‍റ് ടി. കെ. അനിൽകുമാർ ഉദ്ഘാടനം ചെയ്ത സമ്മേളനത്തിൽ ജില്ലാ മെഡിക്കൽ ഓഫീസർ ഡോ.സി.പി. കവിത മുഖ്യാതിഥിയായിരുന്നു. ജില്ലാ പ്രസിഡന്‍റ് വി. ഹരീഷ് അധ്യക്ഷത വഹിച്ചു. ജില്ലാ സെക്രട്ടറി മഹേഷ് മോഹൻ, സംസ്ഥാന ജോയിന്‍റ് സെക്രട്ടറി പ്രവീൺ, പി.കെ. ബോധിഷ് എന്നിവർ പ്രസംഗിച്ചു. ഭാരവാഹികളായി വി. ഹരീഷ്- പ്രസിഡന്‍റ്, അനുജ സുകുമാരൻ- വൈസ് പ്രസിഡന്‍റ്, എം.എസ്. ധന്യ- സെക്രട്ടറി, പി.കെ. ബോധിഷ്- ട്രഷറർ എന്നിവരെയും തെരഞ്ഞെടുത്തു.

തൃപ്പാളൂർ തൂക്കുപാലം ഇന്ന് നാടിനു സമർപ്പിക്കും

ആലത്തൂർ: നിയോജകമണ്ഡലത്തിലെ എരിമയൂർ ഗ്രാമപഞ്ചായത്തിൽ ഗായത്രിപ്പുഴയ്ക്ക് കുറുകെ നിർമിച്ച തൃപ്പാളൂർ ശിവക്ഷേത്രം തൂക്കുപാലം ഇന്നുരാവിലെ 11 ന് നാടിന് സമർപ്പിക്കും. പാലത്തിന്‍റെ ഉദ്ഘാടനം ദേവസ്വം, സഹകരണ, തുറമുഖമന്ത്രി വി.എൻ. വാസവൻ നിർവഹിക്കും. സംസ്ഥാന സർക്കാർ ബജറ്റ് വിഹിതമായി അനുവദിച്ച അഞ്ചുകോടി രൂപ ഉപയോഗിച്ചാണ് തൂക്കുപാലവും അനുബന്ധ സൗകര്യങ്ങളും ചെയ്തത്. പുഴയ്ക്ക് കുറുകെയുള്ള തൂക്കുപാലം കൂടാതെ മിനിമാസ്റ്റ് ലൈറ്റുകൾ, കുളിക്കടവ്, ഓപ്പൺ സ്റ്റേജ്, കുട്ടികളുടെ കളിസ്ഥലം, കോഫി ഷോപ്പ്, ടോയ്‌ലറ്റ് ബ്ലോക്ക് എന്നിവ ഉൾപ്പെടുന്ന ടേക്ക് ബ്രേക്ക് സംവിധാനവും പദ്ധതിയുടെ ഭാഗമായി സജ്ജീകരിച്ചിട്ടുണ്ട്. തൃപ്പാളൂർ ശിവക്ഷേത്ര പരിസരത്ത് നടക്കുന്ന പരിപാടിയിൽ കെ.ഡി. പ്രസേനൻ എംഎൽഎ അധ്യക്ഷനാകും. കെ. രാധാകൃഷ്ണ‌ൻ എം പി, മലബാർ ദേവസ്വം ബോർഡ് പ്രസിഡന്‍റ് ഒ.കെ. വാസുമാസ്റ്റർ എന്നിവർ മുഖ്യാതിഥിയാകും.

തൃത്താല മണ്ഡലത്തിൽ ദേവഹരിതം പദ്ധതിക്കു തുടക്കം

തൃത്താല: ഹരിതകേരള മിഷന്‍റെയും സുസ്ഥിര തൃത്താല പദ്ധതിയുടെയും പദ്ധതികളിലൊന്നായ ദേവഹരിതം പദ്ധതിക്ക് തൃത്താല മണ്ഡലത്തിൽ തുടക്കമായി. പദ്ധതിയുടെ ഉദ്ഘാടനം ആനക്കര ഗ്രാമപഞ്ചായത്തിലെ പെരുമ്പലം ശ്രീകൃഷ്ണ ക്ഷേത്രത്തിൽ മന്ത്രി എം.ബി. രാജേഷ് നിർവഹിച്ചു. കാലാവസ്ഥാ വ്യതിയാനം, ഭൂഗർഭ ജലശോഷണം എന്നിവയ്ക്ക് പരിഹാരമായി പരിസ്ഥിതി പുനഃസ്ഥാപനത്തിനായി ദേവാലയങ്ങളിൽ സൃഷ്ടിക്കുന്ന ചെറുവനങ്ങളാണ് ദേവഹരിതം പച്ചത്തുരുത്തുകൾ. മണ്ഡലത്തിലെ സാധ്യമായ എല്ലാ ആരാധനാലയങ്ങളിലും തദ്ദേശ സ്ഥാപനങ്ങളുടെയും ജനങ്ങളുടെയും പിന്തുണയോടെ പദ്ധതി നടപ്പിലാക്കാനാണ് ഹരിത കേരള മിഷൻ ഉദ്ദേശിക്കുന്നത്. പരിപാടിയിൽ ആനക്കര ഗ്രാമപഞ്ചായത്ത് പ്രസിഡന്‍റ് കെ. മുഹമ്മദ് അധ്യക്ഷനായി. ഹരിതകേരള മിഷൻ ബ്ലോക്ക് കോ-ഓർഡിനേറ്റർ നീരജ രാമദാസ് പദ്ധതി വിശദീകരിച്ചു. വാർഡ് മെംബർ ജ്യോതിലക്ഷ്മി, ക്ഷേത്രം അധികൃതർ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.

തിണ്ടില്ലം ജലവൈദ്യുത പദ്ധതി പ്രവർത്തനം ഈവർഷംതന്നെ

വടക്കഞ്ചേരി: പാലക്കുഴി മലയോരവാസികളുടെ സ്വപ്നപദ്ധതിയായ തിണ്ടില്ലം മിനി ജലവൈദ്യുത പദ്ധതി ഈവർഷംതന്നെ കമ്മീഷൻ ചെയ്തു വൈദ്യുതി ഉത്പാദനം ആരംഭിക്കാൻ ലക്ഷ്യമിട്ട് പ്രവൃത്തികൾ ദ്രുതഗതിയിൽ. പദ്ധതിയുടെ ഏറ്റവും പ്രയാസകരമായ പൈപ്പ് സ്ഥാപിക്കലും അന്തിമഘട്ടത്തിലാണെന്നു സൈറ്റ് എൻജിനീയർ ഷാരോൺ സാം പറഞ്ഞു. മൂന്നുനാല് ലൊക്കേഷൻ കേന്ദ്രീകരിച്ചാണ് കുത്തനെയുള്ള മലഞ്ചെരിവിൽ വലിയ പൈപ്പുകൾ സ്ഥാപിക്കുന്നത്. കോഴിക്കോട് നിന്നുള്ള നാല്പതംഗ ഖലാസികളാണ് വർക്ക് ചെയ്യുന്നത്. ഏറെ പ്രയാസകരമായ പ്രവൃത്തിയാണിത്. പാലക്കുഴിയിലെ ചെക്ക്ഡാമിൽനിന്നും താഴെ കൊന്നക്കൽക്കടവിലെ പവർഹൗസ് വരെയും പൈപ്പുകൾ എത്തിച്ചു കഴിഞ്ഞിട്ടുണ്ടെന്ന് ഷാരോൺസാം പറഞ്ഞു. വെൽഡ് ചെയ്ത് സ്ഥാപിക്കുന്ന ജോലികളാണ് നടന്നു വരുന്നത്. കോൺക്രീറ്റ് തൂണുകൾ കെട്ടിയും പൈപ്പുകളുടെ തന്നെ സഹായത്തോടെയുമാകും ചെങ്കുത്തായ മലമുകളിൽ പൈപ്പുകൾ ഉറപ്പിക്കുന്നത്. പവർഹൗസിലെ മെക്കാനിക്കൽ വർക്കുകളെല്ലാം പൂർത്തിയായിട്ടുണ്ട്. പദ്ധതി ഈ വർഷം തന്നെ പ്രവർത്തനക്ഷമമാക്കുമെന്ന് ഇക്കഴിഞ്ഞ ജൂണിൽ സ്ഥലം സന്ദർശിച്ച് ജില്ലാ പഞ്ചായത്ത് പ്രസിഡന്‍റ് കെ .ബിനുമോളും കമ്പനി ചീഫ് എൻജിനീയർ പ്രസാദ് മാത്യുവും പറഞ്ഞിരുന്നു. നിന്നും 294 മീറ്റർ ദൂരത്തിൽ ലൊ പ്രഷർ പൈപ്പും തുടർന്ന് പവർഹൗസ് വരെയുള്ള 438 മീറ്റർ ദൂരത്തിൽ ഹൈ പ്രഷർ പെൻസ്റ്റോക്ക് പൈപ്പുകളുമാണ് സ്ഥാപിച്ചു വരുന്നത്. ജില്ലാ പഞ്ചായത്തിന്‍റെ രണ്ടാമത്തെ ജലവൈദ്യുത പദ്ധതിയാണിത്. പാലക്കാട് സ്മോൾ ഹൈഡ്രോ കമ്പനി എന്ന പേരിൽ ജില്ലാ പഞ്ചായത്തിന്‍റ് കീഴിലുള്ള കമ്പനിയാണ് പദ്ധതി നടപ്പിലാക്കുന്നത്.

ആനയടിയൻപരുതയിലെ മുനിയറകൾ നശിപ്പിച്ച സംഭവത്തിൽ പ്രതിഷേധവുമായി നാട്ടുകാർ

വടക്കഞ്ചേരി: കിഴക്കഞ്ചേരി കൊന്നക്കൽകടവ് ആനയടിയൻപരുതയിൽ മഹാശിലായുഗ കാലഘട്ടത്തിലെ മനുഷ്യനിർമിതങ്ങളായ മുനിയറകൾ നശിപ്പിച്ചതിനെതിരെ ശക്തമായ പ്രതിഷേധവുമായി നാട്ടുകാർ. സംഭവത്തിനു പിന്നിൽ പ്രവർത്തിച്ചവർക്കെതിരെ കടുത്ത ശിക്ഷാനടപടിയുണ്ടാകണമെന്നാണ് ആവശ്യം. മുഖ്യമന്ത്രിക്ക് നൽകിയ പരാതിയിൽ തൃശൂരിൽ നിന്നുള്ള പുരാവസ്തു വകുപ്പ് ഉദ്യോഗസ്ഥൻ ഫോണിലൂടെ വിവരങ്ങൾ അന്വേഷിച്ചിട്ടുണ്ടെന്നും അടുത്തദിവസംതന്നെ അധികൃതർ എത്തുമെന്ന പ്രതീക്ഷയാണുള്ളതെന്നും നാട്ടുകാർ പറഞ്ഞു. പഞ്ചായത്ത് മെംബർ റോയ് മാസ്റ്റർ, ചരിത്ര ഗവേഷകനും പട്ടാമ്പി ഗവ. കോളജിലെ ചരിത്ര വിഭാഗം പ്രഫസറുമായ കെ. രാജൻ, മൂന്നര പതിറ്റാണ്ടായി കൊന്നക്കൽക്കടവിലെ സാമൂഹിക സാംസ്കാരിക രംഗത്ത് പ്രവർത്തിക്കുന്ന ഫീനിക്സ് ക്ലബിന്‍റെ പ്രസിഡന്‍റ് ബെന്നി വെട്ടുകല്ലാംകുഴി, മുനിയറകൾപ്പോലെയുള്ള ചരിത്ര സ്മാരകങ്ങളുടെ സംരക്ഷണ രംഗത്ത് പ്രവർത്തിക്കുന്ന എം. ഹരിദാസ് എന്നിവരുടെ നേതൃത്വത്തിൽ സ്ത്രീകൾ ഉൾപ്പെടെയുള്ള നാട്ടുകാർ ഇന്നലെ മുനിയറകളുള്ള ആനയടിയൻപരുതയിലെ കുന്നിൻപ്പുറത്തെത്തിയിരുന്നു. മദ്യപസംഘങ്ങളോ സാമൂഹ്യ വിരുദ്ധരോ അല്ല കൃത്യത്തിനുപിന്നില്ലെന്നും ബോധപൂർവമായി ആസൂത്രണം ചെയ്ത് നടത്തിയ പ്രവൃത്തിയാണ് നശിപ്പിക്കലിനു പിന്നിലെന്ന വിലയിരുത്തലാണുള്ളത്. വലിയ കായികാധ്വാനമുള്ള ജോലിയായതിനാൽ വിദഗ്ദ്ധരായ കരിങ്കൽ പണിക്കാരുടെ സഹായത്തോടെയാകണം മുനിയറകൾ തകർത്തതെന്ന നിഗമനമാണുള്ളതെന്ന് എം. ഹരിദാസ് പറഞ്ഞു. പാറപ്പുറങ്ങൾ നിറഞ്ഞ ആളൊഴിഞ്ഞ സ്ഥലമായതിനാൽ ഏറെ സമയമെടുത്താണ് മുനിയറയുടെ കുത്തുകല്ലുകളും മൂടിക്കല്ലും നശിപ്പിച്ചിട്ടുള്ളത്. പതിനേഴര ഏക്കർ വരുന്ന വിരിച്ച പാറപ്പുറമായ ഈ കുന്നിൻപ്പുറത്ത് ഇരുപതിലേറെ മുനിയറകളുടെ ശേഷിപ്പുകളുണ്ടായിരുന്നെന്നാണ് പറയപ്പെടുന്നത്. ഇതിൽ പൂർണതോതിലുണ്ടായിരുന്ന മുനിയറയാണ് കഴിഞ്ഞദിവസം തകർത്തത്. സ്ഥലം ഏറ്റെടുക്കുന്നതുമായി ബന്ധപ്പെട്ട് തൃശൂരിൽനിന്നും പുരവസ്തുവകുപ്പ് സ്ഥലത്തെത്തി പരിശോധന നടത്തി തുടർ നടപടികൾ നടക്കുന്നതിനിടെയാണ് ഈ സംഭവം. പാലക്കുഴി മലയിൽ പോത്തുമട ഭാഗത്തും ഇത്തരം കല്ലറ എന്നറിയപ്പെടുന്ന മുനിയറകളുണ്ട്. മൂന്ന് വലിയ പാറകല്ലുകൾ കുത്തിനാട്ടി അതിനു മുകളിൽ വലിയ വലുപ്പമുള്ള ഭീമൻ പാറപ്പലക സ്ഥാപിച്ചാണ് മുനിയറ നിർമിക്കുന്നത്.

ജിഐഎസ് മാപ്പിംഗ് പൂർത്തിയാക്കി തൃക്കടീരി പഞ്ചായത്ത്

പട്ടാന്പി: തൃക്കടീരി ഗ്രാമ പഞ്ചായത്തിന്‍റെ സമഗ്രവികസനം ലക്ഷ്യമാക്കി നടത്തിയ ജിഐഎസ് മാപ്പിംഗ് പൂർത്തീകരിച്ചു. ഇതോടെ ജില്ലയിൽ ഗ്രാമപഞ്ചായത്ത് തലത്തിൽ ജിഐഎസ് മാപ്പിംഗ് പൂർത്തീകരിച്ച ആദ്യ ഗ്രാമപഞ്ചായത്തായി തൃക്കടീരി മാറി. ജിഐഎസ് മാപ്പിംഗിലൂടെ ലഭിച്ച വിവരങ്ങൾ ലഭ്യമാവുന്ന വെബ്പോർട്ടലും ഗ്രാമപഞ്ചായത്ത് ഒരുക്കിയിട്ടുണ്ട്. ഈ വെബ് പോർട്ടൽവഴി കെട്ടിടങ്ങൾ, റോഡുകൾ, തണ്ണീർത്തടങ്ങൾ, തരിശുഭൂമികൾ, ആരോഗ്യ സ്ഥാപനങ്ങൾ തുടങ്ങി ഗ്രാമപഞ്ചായത്തിന്‍റെ പരിധിയിലെ മുഴുവൻ വസ്തുക്കളുടെയും വിവരങ്ങൾ ചിത്രങ്ങൾ ഉൾപ്പടെ വെബ്പോർട്ടലിൽ ലഭിക്കും. ഡ്രോണ്‍ സർവേ, ഡിജിപിഎസ് സർവേ, ജിപിഎസ് സർവേ, പ്രത്യേക മൊബൈൽ ആപ്പിന്‍റെ സഹായത്തോടെയുള്ള കെട്ടിട സർവേ തുടങ്ങിയ വിവിധ സർവേകളിലൂടെ ഗ്രാമപഞ്ചായത്തിന്‍റെ മുഴുവൻ വിവരങ്ങളും ലഭിക്കും. കൂടാതെ വിവിധ കാലഘട്ടങ്ങളിലെ ഭൂവിനിയോഗ വിവരങ്ങൾ, വിവിധ ആസൂത്രണ സംബന്ധിയായ വിവരങ്ങൾ, യൂട്ടിലിറ്റി നെറ്റ്‌വർക്കുകൾ എന്നിവയെല്ലാം വെബ്പോർട്ടലിൽ ലഭ്യമാണ്.

ബാങ്ക് വായ്പ മുടങ്ങിയവർക്കു കൈത്താങ്ങാകാൻ ഒറ്റപ്പാലം അർബൻ ബാങ്കിന്‍റെ ഒറ്റത്തവണ തീർപ്പാക്കൽ പദ്ധതി

ഒറ്റപ്പാലം: വായ്പ കുടിശികയായവരെ സഹായിക്കാൻ ഒറ്റപ്പാലം കോ- ഓപ്പറേറ്റീവ് അർബൻ ബാങ്കിന്‍റെ ഒറ്റത്തവണ തീർപ്പാക്കൽ പദ്ധതി. കോവിഡ് മഹാമാരി, പ്രളയം, പ്രകൃതിദുരന്തങ്ങൾ, മാറാരോഗങ്ങൾ, വായ്പയെടുത്തു മരണപ്പെട്ടവർ എന്നീ കാരണങ്ങൾ മൂലം കേരളത്തിലെ സഹകരണ ബാങ്കിംഗ് മേഖലയിൽനിന്നും വായ്പ എടുത്തിട്ടുള്ള പലരുടെയും തിരിച്ചടവ് മുടങ്ങുന്ന സാഹചര്യത്തിൽ ഇവരെ സഹായിക്കുന്നതിനു വേണ്ടി വിവിധതരത്തിലുള്ള കുടിശിക നിവാരണ പ്രവർത്തനങ്ങൾ നടപ്പാക്കിയെങ്കിലും പലർക്കും അത് പ്രയോജനപ്പെടുത്താനും വായ്പ തിരിച്ചടക്കാനും കഴിഞ്ഞിട്ടില്ല. ഇത്തരത്തിൽ നിയമ നടപടികൾ നേരിടുന്നവരെ സഹായിക്കാൻ വേണ്ടിയും കുടിശികക്കാരെ ജപ്തി നടപടികളിൽനിന്ന് ഒഴിവാക്കുന്നതിനും റിസർവ് ബാങ്ക് നിർദേശിക്കുന്ന പ്രകാരം ബാങ്കിലെ കിട്ടാക്കടം ക്രമീകരിക്കുന്നതിനും ഒറ്റപ്പാലം കോ-ഓപ്പറേറ്റീവ് അർബൻ ബാങ്കിന്‍റെ ഭരണസമിതി നെഗോഷിയേറ്റഡ്‌ സെറ്റൽമെന്‍റ് / വൺ ടൈം സെറ്റിൽമെൻറ് പോളിസിക്ക് രൂപം നൽകിയിട്ടുണ്ട്. ഇതിന്‍റെ ഭാഗമായി കുടിശികക്കാരുടെ സാമ്പത്തിക പ്രയാസങ്ങൾ കണ്ടറിഞ്ഞുകൊണ്ട് കൃത്യമായ ശുപാർശ സമർപ്പിക്കാൻ ബ്രാഞ്ച് മാനേജർമാരോട് നിർദേശിച്ചിട്ടുണ്ട്. 22, 23, 24 തീയതികളിൽ ബാങ്കിന്‍റെ 12 മണിക്കൂർബ്രാഞ്ച് ഹാളിൽ അദാലത്ത്‌ നടക്കും. ബ്രാഞ്ച് മാനേജർമാരുടെ ശുപാർശകൾ പരിഗണിച്ച് ഒറ്റത്തവണ തീർപ്പാക്കലിന് വേണ്ടി ബാങ്ക് അംഗീകരിച്ച മാനദണ്ഡം അനുസരിച്ച് ഇളവ് അനുവദിക്കുകയും , ഇത്തരത്തിൽ നടത്തുന്ന അദാലത്തിലെ ശുപാർശകൾ ബാങ്ക് ഭരണ സമിതി അംഗീകരിക്കുകയും, വായ്പകളിൽ ലഭിച്ച ഇളവ് പ്രയോജനപ്പെടുത്തി കുടിശികയിൽനിന്നും മോചിതരാകാൻ അവസരം ഒരുക്കുകയും ചെയ്യുക എന്നതാണ് ലക്ഷ്യമിട്ടിട്ടുള്ളത്. 2024 ലും ബാങ്ക് ഒറ്റത്തവണ തീർപ്പാക്കൽ പദ്ധതി നടപ്പിലാക്കിയിരുന്നു. ഇതിലൂടെ 129 വായ്പക്കാർക്ക് 2.28 കോടി രൂപയുടെ ഇളവ് നൽകിയിരുന്നു.

നെല്ലുണക്കാനാവാതെ കർഷകർ നട്ടംതിരിയുന്നു

വണ്ടിത്താവളം: നെല്ലുണക്കാനാവാതെ കർഷകർ വലയുന്നു. മഴവന്നാൽ പെട്ടെന്നു നെല്ല് ശേഖരിക്കാൻ കഴിയാത്തതാണ് കർഷകർക്കു വിനയാകുന്നത്. വീണ്ടും തൊഴിലാളികൾക്ക് കൂലിനൽകിവേണം ഉണക്കാൻ. ഈർപ്പമുണ്ടായാൽ നെല്ലുസംഭരണത്തിൽ കുറവുണ്ടാകുമെന്നതും കർഷകരെ വെട്ടിലാക്കുന്നു. ഏറെ പ്രതീക്ഷകളോടെ കൊയ്തെടുത്ത നെല്ല് സമയോചിതമായി ഉണക്കാൻ കഴിയാത്തതിൽ ചില കർഷകർ വിഷമിക്കുമ്പോൾ മഴയിൽ യന്ത്രക്കൊയ്ത്തു മുടങ്ങിയ സങ്കടത്തിലാണ് മറ്റുള്ളവർ.

മണ്ണാർക്കാട് എയ്ഡഡ് സ്കൂൾ എംപ്ലോയീസ് കോ- ഓപ്പറേറ്റീവ് ക്രെഡിറ്റ് സൊസൈറ്റി കെട്ടിടോദ്ഘാടനം ഇന്ന്

മണ്ണാർക്കാട്: മണ്ണാർക്കാട് എയ്ഡഡ് സ്കൂൾ എംപ്ലോയീസ് കോ- ഓപ്പറേറ്റീവ് ക്രെഡിറ്റ് സൊസൈറ്റിയുടെ പുതിയ ഓഫീസ് കെട്ടിടം 20ന് സഹകരണമന്ത്രി വി.എൻ. വാസവൻ ഉദ്ഘാടനം ചെയ്യും. ഉച്ചയ്ക്കുശേഷം മൂന്നിനു നടക്കുന്ന ചടങ്ങിൽ മണ്ണാർക്കാട് എംഎൽഎ അഡ്വ.എൻ. ഷംസുദ്ദീൻ അധ്യക്ഷത വഹിക്കും. സ്ട്രോംഗ് റൂമിന്‍റെ ഉദ്ഘാടനം കോങ്ങാട് എംഎൽഎ കെ. ശാന്തകുമാരി നിർവഹിക്കും. 1990 ൽ എയ്ഡഡ് സ്കൂൾ ജീവനക്കാരുടെയും അധ്യാപകരുടെയും സഹകരണ സംഘമായി മണ്ണാർക്കാട് പ്രവർത്തനമാരംഭിച്ച സൊസൈറ്റി 1995 മുതൽ തുടർച്ചയായി ലാഭത്തിൽ പ്രവർത്തിച്ചുവരികയാണെന്നു ഭാരവാഹികൾ പറഞ്ഞു. മണ്ണാർക്കാട്, അട്ടപ്പാടി താലൂക്കുകളിലായി 58 വിദ്യാലയങ്ങളിൽ നിന്നായി 800 ലധികം എയ്ഡഡ് സ്കൂൾ ജീവനക്കാർ സംഘത്തിൽ അംഗങ്ങളാണ്. നിരവധി തവണ താലൂക്കിലെ ഏറ്റവും മികച്ച എംപ്ലോയീസ് സഹകരണ സംഘത്തിനുള്ള സർക്കിൾ സഹകരണ യൂണിയന്‍റെ അംഗീകാരവും നേടാൻ സംഘത്തിനായിട്ടുണ്ട്. ജീവനക്കാർക്ക് നൽകുന്ന വായ്പകൾക്കു പുറമേ മറ്റു ഇടപാടുകാർക്ക് സ്വർണപ്പണയമായി വായ്പ സൗകര്യം സംഘത്തിൽ ലഭ്യമാണ്. മണ്ണാർക്കാട് പോലീസ് സ്റ്റേഷന്‍റെ എതിർവശത്തുള്ള ആധുനിക സൗകര്യങ്ങളോടു കൂടിയ പുതിയ കെട്ടിടത്തിലേക്കാണ് സൊസൈറ്റി പ്രവർത്തനം മാറ്റുന്നത്. ഉദ്ഘാടന ചടങ്ങിൽ രാഷ്ട്രീയ, സാമൂഹിക, സഹകരണ മേഖലയിലെ പ്രമുഖർ പങ്കെടുക്കും. മുൻകാല സംഘംപ്രസിഡന്‍റുമാരെ ചടങ്ങിൽ ആദരിക്കും.

മണ്ണാർക്കാട് മണ്ഡലത്തിൽ ഗ്രാമീണറോഡ് നിർമാണത്തിനു ഫണ്ട് അനുവദിച്ചു

മണ്ണാർക്കാട്: മണ്ണാർക്കാട് മണ്ഡലത്തിൽ ഗ്രാമീണറോഡ് നിർമാണത്തിനു ഫണ്ട് അനുവദിച്ചു. കോട്ടോപ്പാടം പഞ്ചായത്തിലെ അരിയൂർ പടുവിൽ കുളമ്പ് റോഡിന് 10ലക്ഷം രൂപ, മണ്ണാർക്കാട് മുൻസിപ്പാലിറ്റിയിലെ നടമാളിക അരകുർശ്ശി എതൃപ്പണം കെടിഎം സ്കൂൾ റോഡിന് 10ലക്ഷം രൂപ, അലനല്ലൂർ പഞ്ചായത്തിലെ വട്ടമണ്ണപ്പുറം അണയംകോട് ചേരിപ്പറമ്പ് റോഡിന് 10ലക്ഷം രൂപ, കുമരംപുത്തൂർ പഞ്ചായത്തിലെ അക്കിപ്പാടം കുളിക്കടവ് പുഴ റോഡിന് 10ലക്ഷം രൂപ, ഷോളയൂർ പഞ്ചായത്തിലെ പെട്ടിക്കൽ ജംഗ്ഷൻ ഇൻഫന്‍റ് ജീസസ് സ്കൂൾ റോഡിന് 10ലക്ഷം രൂപ എന്നിങ്ങനെയാണ് മണ്ഡലത്തിൽ ഗ്രാമീണ റോഡുകൾക്ക് വെള്ളപ്പൊക്ക ദുരിതാശ്വാസ ഫണ്ടിൽ നിന്ന് പണമനുവദിച്ചതെന്ന് എൻ. ഷംസുദ്ദീൻ എംഎൽഎ പറഞ്ഞു. എംഎൽഎ ഫണ്ടിൽനിന്നും മണ്ണാർക്കാട് മുൻസിപ്പാലിറ്റിയിലെ അരകുർശ്ശി എതൃപ്പണം വടക്കേക്കര ലിങ്ക് റോഡിന് 19.50ലക്ഷം രൂപ, പള്ളിപ്പടി പെരിഞ്ചോളം ബൈപ്പാസ് റോഡിന് 20ലക്ഷം രൂപ, അലനല്ലൂർ ഗ്രാമപഞ്ചായത്തിലെ പാക്കത്തക്കുളമ്പ് മേലെ കളയൻ തോണിപ്പാടം റോഡിന് 15ലക്ഷം രൂപ, കോട്ടോപ്പാടം പഞ്ചായത്തിലെ ഭീമനാട് ചിറ്റടിക്കുളമ്പ് റോഡിന് 10ലക്ഷം രൂപ,തെങ്കര പഞ്ചായത്തിലെ കൈനിക്കോട് ആശാരിക്കുന്ന് സോമൻപടി റോഡിന് 10ലക്ഷം രൂപ എന്നിങ്ങനെയും തുക അനുവദിച്ചിട്ടുണ്ട്. അഗളി പോലീസ് സ്റ്റേഷനിൽ കംപ്യൂട്ടർ, പ്രിന്‍റർ, സ്കാനർ, അനുബന്ധ സാധന സാമഗ്രികൾ സ്ഥാപിക്കുന്നതിന് രണ്ടുലക്ഷംരൂപയും അനുവദിച്ചതായും എംഎൽഎ അറിയിച്ചു.

പാലിയേറ്റീവ് കെയർ യൂണിറ്റിന് ഓക്സിജൻ സിലിണ്ടർ റെഗുലേറ്റർ സമ്മാനിച്ചു

അലനല്ലൂർ: പാലിയേറ്റിവ് കെയർ യൂണിറ്റിന് ഓക്സിജൻ സിലിണ്ടർ റെഗുലേറ്റർ സമ്മാനിച്ച് അലനല്ലൂർ ഗവ. വെക്കേഷണൽ ഹയർസെക്കൻഡറി സ്കൂൾ വിഎച്ച്എസ്ഇ നാഷണൽ സർവീസ് സ്കീം വിദ്യാർഥികൾ. സ്കൂളിൽ മൂന്നുദിവസങ്ങളിലായി നടന്ന മണ്ണാർക്കാട് ഉപജില്ല സ്കൂൾ ഒളിമ്പിക്സിലെ ഫുഡ് കോർണറിൽ വീടുകളിലുണ്ടാക്കി കൊണ്ടുവന്ന പലഹാരങ്ങൾ വിറ്റുലഭിച്ച തുക ഉപയോഗിച്ചാണ് വിദ്യാർഥികൾ ഓക്സിജൻ സിലിണ്ടർ റെഗുലേറ്റർ വാങ്ങിയത്. സ്കൂളിൽ നടന്ന ചടങ്ങിൽ പാലിയേറ്റീവ് കെയർ ജനറൽ സെക്രട്ടറി കെ.പി. അഷ്റഫ് ഓക്സിജൻ സിലിണ്ടർ റെഗുലേറ്റർ ഏറ്റുവാങ്ങി. പ്രിൻസിപ്പൽ പി.കെ. ഉഷ, എൻഎസ്എസ് കോ- ഓർഡിനേറ്റർ എൻ. ഷാജി, അധ്യാപകരായ എം. സജ്‌ന, വി.ആർ. രതീഷ്, ടി. ഷംന, കെ. സൗമ്യ, കെ. പ്രകാശ്, വിദ്യാർഥികളായ പി. അഭിനന്ദ്, ടി. നിഹാൽ അഹമ്മദ്, എ. അനാം മുഹമ്മദ്, പി. അഷിൽ, സി.പി. സിയാൻ, പി.കെ. ഫിദാൻ, സി. മുഹമ്മദ് ലിയാൻ എന്നിവർ പങ്കെടുത്തു.

തൃത്താല മണ്ഡലത്തില്‍ 1.63 കോടിയുടെ മണ്ണ്, ജലസംരക്ഷണ പദ്ധതി ഉദ്ഘാടനം 25ന്

തൃത്താല: സുസ്ഥിര തൃത്താല പദ്ധതിയുടെ ഭാഗമായി 1.63 കോടി രൂപയുടെ പുതിയ മണ്ണ്, ജല സംരക്ഷണ പദ്ധതികള്‍ക്ക് മണ്ഡലത്തില്‍ തുടക്കമാകുന്നു. മണ്ണ് പര്യവേക്ഷണ സംരക്ഷണ വകുപ്പിന് 2025-26 സാമ്പത്തിക വര്‍ഷത്തില്‍ അനുവദിച്ച 1.63 കോടി രൂപയുടെ അഞ്ച് ചെറുനീര്‍ത്തട പദ്ധതികള്‍ക്കാണ് തുടക്കമാകുന്നത്. തൃത്താല ഗ്രാമപഞ്ചായത്തില്‍ ഉള്ളന്നൂര്‍ നീര്‍ത്തടത്തിലെ കണ്ണന്നൂര്‍ തോട് നവീകരണം, പട്ടിത്തറ ഗ്രാമപഞ്ചായത്തില്‍ പട്ടിശ്ശേരി നീര്‍ത്തടത്തിലെ ചേരാഞ്ചിറ തോട് നവീകരണം, ചാലിശേരി ഗ്രാമപഞ്ചായത്തില്‍ പട്ടിശേരി-2 നീര്‍ത്തടത്തിലെ പാലക്കല്‍ തോട് നവീകരണം, കപ്പൂര്‍ ഗ്രാമപഞ്ചായത്തില്‍ കുമരനെല്ലൂര്‍ നീര്‍ത്തടത്തിലെ പൂണൂല്‍കുളം നവീകരണം, പരുതൂര്‍ ഗ്രാമപഞ്ചായത്തില്‍ കാരമ്പത്തൂര്‍ നീര്‍ത്തടത്തിലെ ആര്‍ത്തിക്കുളം നവീകരണം എന്നീ പദ്ധതികള്‍ക്കാണ് ഈ സാമ്പത്തിക വര്‍ഷത്തില്‍ പുതിയതായി അനുമതി ലഭിച്ചിട്ടുള്ളത്. 2023- 24 സാമ്പത്തിക വര്‍ഷം മുതല്‍ അനുവദിച്ച പ്രത്യേക ബജറ്റ് വിഹിതം ഉപയോഗിച്ച് മണ്ഡലത്തില്‍ എട്ട് ചെറുനീര്‍ത്തടങ്ങളിലായി 1.88 കോടി രൂപ ചെലവഴിച്ച് മണ്ണ് ജല ജൈവസമ്പത്ത് സംരക്ഷണ പ്രവര്‍ത്തനങ്ങള്‍ പൂര്‍ത്തീകരിച്ചിട്ടുണ്ട്. ഇതിന്‍റെ തുടര്‍ച്ചയായാണ് പുതിയ പദ്ധതികള്‍ നടപ്പാക്കുന്നത്. പദ്ധതികളുടെ പ്രവര്‍ത്തനോദ്ഘാടനം മന്ത്രി എം.ബി. രാജേഷ് 25ന് ഉച്ചയ്ക്കുശേഷം മൂന്നിന് തൃത്താല ഗ്രാമപഞ്ചായത്ത് കമ്യൂണിറ്റി ഹാളില്‍ നിര്‍വഹിക്കും.തൃത്താല ഗ്രാമപഞ്ചായത്ത് പ്രസിഡന്‍റ് പി.കെ. ജയ അധ്യക്ഷയാകും.

അക്ഷയ കേന്ദ്രങ്ങളിൽ ജനം വലയുന്നു

വടക്കഞ്ചേരി: രേഖകൾ സംഘടിപ്പിക്കാൻ അക്ഷയകേന്ദ്രങ്ങൾ കയറിയിറങ്ങി ജനങ്ങൾ വലയുന്നു. ബന്ധപ്പെട്ട വകുപ്പ് ഓഫീസുകളെല്ലാം നോക്കുകുത്തിയാകുംവിധമാണ് നടപടിക്രമങ്ങളെല്ലാം. എന്തിനും ഏതിനും ഇപ്പോൾ അക്ഷയകേന്ദ്രത്തിൽ പോകണം. സർക്കാർ നടപടികൾ കൂടുതൽ സുതാര്യമാക്കി എന്ന് അവകാശപ്പെടുമ്പോഴാണ് ജനത്തിന് ദുരിതം മാത്രമാകുന്നത്. അപേക്ഷ നൽകിയാൽ പഞ്ചായത്ത് ഓഫീസിൽ നിന്നോ വില്ലേജ് ഓഫീസിൽനിന്നോ അപ്പോൾതന്നെ അനുവദിക്കാവുന്ന സർട്ടിഫിക്കറ്റുകൾക്കാണ് ജനങ്ങളെ ഇത്തരത്തിൽ വട്ടംകറങ്ങുന്നത്. ജോലികളഞ്ഞ് ദിവസംമുഴുവൻ പണം നഷ്ടവുമായി എന്തെങ്കിലും സർട്ടിഫിക്കറ്റ് തരപ്പെടുത്താൻ അക്ഷയ കേന്ദ്രത്തിൽ കാത്തുനിൽക്കേണ്ട ഗതികേടിലാണ് ജനങ്ങൾ. അഴിമതി ഇല്ലാതാക്കാനും കൈക്കൂലിക്കാരെ ഒഴിവാക്കാനുമാണ് ഓഫീസുകൾ സ്മാർട്ടാകുന്നതെന്ന് പറയുമ്പോൾ തങ്ങൾക്കുണ്ടാകുന്ന കഷ്ടപ്പാടുകൾ ആരും കാണുന്നില്ലെന്നാണ് അക്ഷയകേന്ദ്രങ്ങളിലെത്തുന്നവർ പറയുന്നത്. അക്ഷയകേന്ദ്രത്തിൽ പോയി രേഖകൾ അപ്‌ലോഡ് ചെയ്യുന്നതിൽ തെറ്റു വന്നാൽ പിന്നേയും എല്ലാം ആവർത്തിക്കണം. പ്ലസ് ടു കഴിഞ്ഞ് തുടർപഠനത്തിന് ഫീസാനുകൂല്യത്തിനും സ്കോളർഷിപ്പുകൾക്കുമെല്ലാം രേഖകൾ സംഘടിപ്പിക്കാൻ രക്ഷിതാക്കൾക്കും കുട്ടികൾക്കുമുണ്ടാകുന്ന കഷ്ടപ്പാടുകളും ചെറുതല്ല. പട്ടിയെ വളർത്താനും പെടാപ്പാട് വീടിനു ചുറ്റും സിസി ടിവി കാമറ സ്ഥാപിക്കാൻ പണമില്ലാത്തവർ മോഷ്ടാക്കളിൽനിന്നുള്ള സുരക്ഷയ്ക്കായി വീട്ടിൽ ഒരു നാടൻപട്ടിയെ വളർത്താമെന്നുവച്ചാൽ അതും ഇപ്പോൾ എളുപ്പമുള്ള കാര്യമല്ല. പട്ടിയെ വളർത്തുന്നതിനുള്ള ലൈസൻസിനായി അക്ഷയകേന്ദ്രത്തിൽ പോയി ലൈസൻസിന് അപേക്ഷിക്കണം. നേരത്തേ ഇതു പഞ്ചായത്തിൽനിന്ന് നേരിട്ടു നൽകിയിരുന്നതാണ്. ഇപ്പോൾ അതുമാറി. അക്ഷയകേന്ദ്രത്തിൽ പോകണം. പട്ടിയുടെ വയസ്, നിറം, തിരിച്ചറിയാനുള്ള അടയാളം, പട്ടിയുടെ പേര്, ആണോ പെണ്ണോ, പട്ടിയുടെ ഫോട്ടോ, വെറ്ററിനറി ഡോക്ടറുടെ സർട്ടിഫിക്കറ്റ് തുടങ്ങി സകലമാന വിവരങ്ങളും പട്ടിയെ വളർത്തുന്നതിനുള്ള ലൈസൻസിനായി നൽകണം. കെ- സ്മാർട്ടിന്‍റെ ഭാഗമായിട്ടാണത്രെ ഇതെല്ലാം. പേവിഷബധക്കെതിരെ പട്ടികൾക്കുള്ള കുത്തിവയ്പ്പ് സർക്കാർ വെറ്ററിനറി ആശുപത്രികളിൽ സൗജന്യമാണെന്ന് കരുതിയാലും തെറ്റി. ഇൻജക്്ഷൻ മരുന്ന് ഉൾപ്പെടെ എല്ലാം ആശുപത്രിക്കടുത്തുള്ള മെഡിക്കൽ ഷോപ്പുകളിൽ നിന്നും വാങ്ങണം. എല്ലാം വാങ്ങിക്കൊണ്ട് ചെന്നാൽ ഇൻജക്്ഷൻ ചെയ്തുതരും. ഈ സേവനം മാത്രമേ സൗജന്യമുള്ളു.വാഹനം വിളിച്ച് പട്ടിയെ ആശുപത്രിയിൽ എത്തിക്കുന്നതു മുതൽക്കുള്ള ചെലവുകളും ഭാരിച്ചതാണ്. ഇതൊക്കെ ചെയ്ത് ഒരു വർഷത്തേക്കുള്ള ലൈസൻസ് മാത്രമാണ് കിട്ടുക. അതുകഴിഞ്ഞാൽ വീണ്ടും ഈ പണികളെല്ലാം ആവർത്തിക്കണം.

പണിതിട്ടും പണിതിട്ടും പണിതീരാതെ വെള്ളപ്പനയിലെ ലൈഫ്മിഷൻ ഫ്ലാറ്റ്

തത്തമംഗലം: വെള്ളപ്പനയിൽ ലൈഫ്മിഷൻ ഫ്ലാറ്റ് നിർമാണം പൂർണതയിലെത്താൻ ഇനിയും വൈകും. വീടുകൾ ലഭിക്കാൻ അർഹതപ്പെട്ടവർ നിരാശയിൽ. ഏറെ വിവാദങ്ങൾക്കൊടുവിൽ നാലുവർഷം മുന്പാണ് നിർമാണം തുടങ്ങിയത്. സമയോചിതമായി ബിൽ പാസായില്ലെന്നു കാരണംപറഞ്ഞ് ആദ്യം നിർമാണ കരാറെടുത്ത ഏജൻസി ഒഴിഞ്ഞു. പിന്നീട് നിർമാണച്ചുമതല ഏറ്റെടുത്ത അടുത്ത കരാറുരൻ ഫ്ലാറ്റ് നിർമാണം അന്തിമഘട്ടത്തിലെത്തിച്ചെങ്കിലും ഇനിയും പൂർത്തീകരിക്കാൻ കഴിഞ്ഞിട്ടില്ല . ഈ സ്ഥലത്ത് താമസിച്ചിരുന്ന പത്തോളം കുടുംബങ്ങളെകുടി ഒഴിപ്പിച്ച് ഫ്ലാറ്റുകൾ ലഭിക്കുമെന്ന് വാഗ്ദാനം നൽകിയാണ് ഫ്ലാറ്റ് നിർമാണം രണ്ടു മന്ത്രിമാരെ ഉൾപ്പെടുത്തി ആഡംബര ഉദ്ഘാടനം നടത്തിയത്. കുടിയൊഴിപ്പിക്കപ്പെട്ടവർ വാസസ്ഥലമില്ലാതെ വാടകവീടുകളിൽ അഭയം തേടിയിരിക്കുകയാണ്. ഗുണഭോക്താക്കളിൽ മൂന്നുപേർ ഇതിനകം മരണപ്പെട്ടു. ഫ്ലാറ്റിൽ 41 കുടുംബങ്ങൾക്ക് വീടുകൾ, അങ്കണവാടി ഉൾപ്പെടെയുണ്ടാവുമെന്നാണ് ലൈഫ്മിഷൻ അധികൃതരുടെ വാഗ്ദാനം. ഇനിയും എത്രകാലം കാത്തിരിക്കണമെന്നതാണ് കുടികൊഴിപ്പിക്കപ്പെട്ടവരുടെ ആശങ്ക.

കുളത്തിൽ മരിച്ചനിലയിൽ

കൊല്ലങ്കോട് : എലവഞ്ചേരിയിൽ കുളിക്കാനിറങ്ങിയയാൾ കുളത്തിൽ മരിച്ചനിലയിൽ കണ്ടെത്തി. കരിങ്കുളം കിടങ്ങരക്കുന്ന് ഉണ്ണികൃഷ്ണൻ മകൻ ബാബു(50) ആണ് മരിച്ചത്. കുളിക്കാൻ പോയ ആൾ ഏറെ സമയമായിട്ടും തിരിച്ചെത്താതിനെ തുടർന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്. ജില്ലാ ആശുപത്രി മോർച്ചറിയിലെത്തിച്ച മൃതദേഹം ഇന്നു രാവിലെ പോസ്റ്റുമോർട്ടം നടത്തും. കൊല്ലങ്കോട് പോലീസ് മേൽനടപടി സ്വീകരിച്ചു. മരിച്ചയാൾക്ക് അപസ്മാരം ഉള്ളതായി കുടുംബക്കാർ പറഞ്ഞു. ഭാര്യ: സുജാത. മകൾ; വിവി, പ്രിൻസി, റിൻസി. മരുമകൻ: ജയപ്രസാദ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]