ADVERTISEMENT

ADVERTISEMENT

എൻസിപി- എസ് ജില്ലാ നേതൃയോഗം

പാലക്കാട്: എൻസിപി- എസ് ജില്ലാ നേതൃയോഗം സംസ്ഥാന ജനറൽ സെക്രട്ടറി ടി.എൻ. ശിവശങ്കരൻ ഉദ്ഘാടനം ചെയ്തു.

ജില്ലാ പ്രസിഡന്‍റ് എ. രാമസ്വാമി അധ്യക്ഷത വഹിച്ചു. സംസ്ഥാന ജനറൽ സെക്രട്ടറി പി.എ. റസാഖ് മൗലവി, സംസ്ഥാന നേതാക്കളായ ഓട്ടൂർ ഉണ്ണികൃഷ്ണൻ, കാപ്പിൽ സൈതലവി, പി അബ്ദുൽ റഹ്്മാൻ, ഷനിൻ മന്ദിരാട്, ഷൗക്കത്തലി കുളപ്പാടം, ജില്ലാ ഭാരവാഹികളായ പി. മൊയ്തീൻകുട്ടി, എം.എൻ. സൈഫുദ്ദീൻ കിച്ച്ലു, പൊന്നിൽ വേണു, റെജി ഉള്ളരിക്കൽ തുടങ്ങിയവർ പ്രസംഗിച്ചു.

ADVERTISEMENT

ദേവാലയശില്പി കടപ്പാറ ജോബിന്‍റെ പാത പിന്തുടർന്ന് മൂന്നു മക്കളും

ഫ്രാൻസിസ് തയ്യൂർ മംഗലംഡാം: ആലത്തൂർ ഉപജില്ലാ ശാസ്ത്രോത്സവത്തിൽ ദേവാലയശില്പി കടപ്പാറ തോണിപ്പാറ വീട്ടിലെ ജോബിന്‍റെ മൂന്നുമക്കൾക്കും മരത്തിലെ നിർമാണപ്രവൃത്തികൾക്ക് സമ്മാനം. മൂത്തയാൾ മംഗലംഡാം ലൂർദ് മാതാഹയർ സെക്കൻഡറി സ്കൂളിൽ എട്ടാംക്ലാസിൽ പഠിക്കുന്ന ആരോൺ ടി. ജോബിൻ, രണ്ടാമത്തെ മകൻ പൊൻകണ്ടം മംഗലഗിരി സെന്‍റ് മേരീസ് എൽപി സ്കൂളിലെ നാലാം ക്ലാസുകാരൻ ജിയോൺ ടി. ജോബിൻ, ഇതേ സ്കൂളിൽ പഠിക്കുന്ന ഇളയയാൾ രണ്ടാം ക്ലാസുകാരൻ ഡിയോൺ ജോബിൻ എന്നിവരാണ് ശില്പ നിർമാണത്തിലും മരപ്പണിയിലും തിളങ്ങി സ്കൂളിന് അഭിമാനമായത്. ആരോണിനും ജിയോണിനും മരത്തിലെ കൊത്തുപണിയിൽ ഫസ്റ്റ് എ ഗ്രേഡും മൂന്നാമത്തെയാൾ ഡിയോണിന് മരപ്പണിയിൽ സെക്കൻഡ് എ ഗ്രേഡുമുണ്ട്. ആരോണും ജിയോണും മുൻ വർഷങ്ങളിലേയും താരങ്ങളാണ്. രണ്ടാം ക്ലാസുകാരൻ ഡിയോൺ ആദ്യമായാണ് മത്സരത്തിനെത്തിയത്. വീടുകളിൽ ഉപയോഗയോഗ്യമായ ഏതെങ്കിലും അഞ്ച് ഐറ്റങ്ങളുടെ നിർമാണമായിരുന്നു രണ്ടാംക്ലാസുകാരന് ചെയ്യാനുണ്ടായിരുന്നത്. തത്സമയം ചേയ്യേണ്ടതാണ് ഇതെല്ലാം. സ്റ്റൂളും ചിരവയും മൊബൈൽ സ്റ്റാൻഡ് ഉൾപ്പെടെ നിർമിച്ചാണ് ഡിയോൺ വിധികർത്താക്കളെ ഞെട്ടിച്ചത്. ഡിസൈൻ തന്ന് അതിൽ കൊത്തുപണി നടത്തി പോളിഷ് ചെയ്ത് ഫിനിഷിംഗ് ഉൾപ്പെടെ ചെയ്യാനായിരുന്നു ആരോണിനും ജിയോണിനുമുള്ള മത്സരം. സംസ്ഥാന സ്കൂൾ ശാസ്ത്രോത്സവം പാലക്കാട് തന്നെയായതിനാൽ ഡിസൈൻ കടുപ്പം കൂടിയതായിരുന്നെന്ന് ആരോൺ പറയുന്നു. പട്ടാമ്പിയിൽ നടക്കുന്ന റവന്യു ശാസ്ത്രോത്സവത്തിൽ മത്സരിക്കുന്നതിനുള്ള പരിശീലനത്തിലാണ് ഇപ്പോൾ ആരോൺ. വീട്ടിൽ പഠനം കഴിഞ്ഞുള്ള സമയം കൊത്തുപണികൾക്കാണ് മൂന്ന് പേർക്കും താത്പര്യം. അതിന് സ്കൂളിൽ നിന്നുള്ള പിന്തുണ കൂടിയായപ്പോൾ അപൂർവമായ കഴിവുകൾ പ്രകടിപ്പിക്കാൻ മക്കൾക്കും അവസരങ്ങളായെന്ന് ജോബിൻ പറഞ്ഞു. മൂന്നുപേരുടെയും കരവിരുതിലെ വിസ്മയങ്ങൾ കണ്ട് അയൽവാസിയായ ലൂർദ്മാതാ എച്ച്എസ്എസിലെ ഏഴാം ക്ലാസുകാരൻ ശ്രീജിത്തും ഇപ്പോൾ ഒഴിവുദിവസങ്ങളിൽ ഇവർക്കൊപ്പം ശില്പനിർമാണപുരയിലുണ്ടാകും.ശ്രീജിത്തിനും ശില്പ നിർമാണത്തിൽ ശാസ്ത്രോത്സവത്തിൽ ഫസ്റ്റ് എ ഗ്രേഡുണ്ട്. എട്ടാം ക്ലാസുകാരൻ ആരോണാണ് കൂട്ടുകാരനായ ശ്രീജിത്തിന്‍റെ ഗുരു. ശില്പ നിർമാണ വിദഗ്ദനാണ് ജോബിൻ. ദേവാലയ ശില്പങ്ങളിലെ സ്പെഷലിസ്റ്റാണ്. അതിസൂക്ഷ്മതയും ക്ഷമയും വേണ്ട പണികളാണ് മരപ്പണിയെന്ന് ജോബിൻ പറയുന്നു. ഏറ്റവും പൂജ്യമായ സ്ഥലങ്ങളിൽ സ്ഥാപിക്കപ്പെടേണ്ട കുരിശുൾപ്പെടെയുള്ള വസ്തുക്കളുടെ നിർമാണമാകുമ്പോൾ അതിന് കൂടുതൽ കരുതലും വിശുദ്ധിയും വേണം. കടപ്പാറ സെന്‍റ് മേരീസ് പള്ളി റോഡിലുള്ള ഇവരുടെ വീടിനോട് ചേർന്ന് തന്നെയാണ് ശില്പവിസ്മയങ്ങളുടെ പണിപ്പുര. നാനോ ശില്പനിർമാണത്തിലാണ് ജോബിന് കൂടുതൽ നൈപുണ്യം. മരത്തിലുള്ള വാഹനങ്ങളുടെ ഗിയർ നോബ്, ബൈബിൾ സ്റ്റാൻഡ്, രൂപകൂടുകൾ, കുരിശുകൾ, വചനമേശ, ബലിപീഠം തുടങ്ങിയവയാണ് നിർമിക്കുന്നത്. വീടുകളിലേക്കുള്ള പ്രാർഥനാപീഠം, സ്റ്റാൻഡുകൾ, മരത്തിൽ തീർത്ത സ്പോട്ട് ലൈറ്റുകൾ, വേരുകളിലെ വിസ്മയ പണികൾ, കുരിശിന്‍റെ വഴിയിലെ 14 സ്ഥലങ്ങൾ തുടങ്ങി ദേവാലയങ്ങളിലേക്കുള്ള എല്ലാ മരസാധനങ്ങളും ഏറ്റവും പെർഫെക്ഷനിൽ ജോബിന്‍റെ കരവിരുതിൽ ജന്മമെടുക്കും. ശില്പ കലയിൽ അക്കാദമിക് പഠനങ്ങളില്ലെങ്കിലും കരവിരുതിലെ ആശാൻ തന്നെയാണ് 69 കാരനായ ജോബിന്‍റെ ചാച്ചൻ തോമസും. വീട്ടുപണികളെല്ലാം കഴിഞ്ഞാൽ ജോബിന്‍റെ ഭാര്യ ഷീനയും ശില്പനിർമാണത്തിൽ സഹായിയായുണ്ടാകും. ഓട്ടോ ഡ്രൈവർ കൂടിയാണ് ജോബിൻ.

നെല്ലിയാമ്പതിയിൽ പോളി ഹൗസ് കൃഷിയുടെ വിളവെടുപ്പ് ഉദ്ഘാടനം

നെല്ലിയാമ്പതി: കാർഷികവികസന കർഷകക്ഷേമ വകുപ്പിന്‍റെ കീഴിലുള്ള നെല്ലിയാമ്പതി ഗവ. ഓറഞ്ച് ആൻഡ് വെജിറ്റബിൾ ഫാമിലെ ഓഫ് സീസണിൽ പോളിഹൗസുകളിൽ കൃഷിയിറക്കിയ ശീതകാലപച്ചക്കറികളായ ബ്രോക്കോളി, കാബേജ് എന്നിവയുടെയും സിയാറാ ഇനം പച്ചമുളക് എന്നിവയുടെയും വിളവെടുപ്പ് ഉദ്ഘാടനം ജില്ലാ പഞ്ചായത്ത്‌ വികസന സ്റ്റാൻഡിംഗ് കമ്മിറ്റി ചെയർപേഴ്സൺ നീതു നിർവഹിച്ചു. ജില്ലാ കൃഷി ഡെപ്യൂട്ടി ഡയറക്ടർ ആർ. ആശ അധ്യക്ഷത വഹിച്ചു. ഫാം സൂപ്രണ്ട് പി. സാജിദലി, ഫാം മാനേജർ ദേവി കീർത്തന, മറ്റു തൊഴിലാളികൾ, ജീവനക്കാർ പങ്കെടുത്തു. പത്തു സെന്‍റ് വീതമുള്ള മൂന്നു പോളി ഹൗസുകളിൽ ആണ് ഇത്തരത്തിൽ പരീക്ഷണാടിസ്ഥാനത്തിൽ കൃഷി ചെയ്തിട്ടുള്ളത്. ഓറഞ്ചിനും മറ്റു നാരക വർഗവിളകൾക്കും ഇടയിൽ ഓപ്പൺ പ്രിസിഷൻ ഫാമിംഗ് രീതിയിൽ വിവിധ ഇനം ശീതകാല പച്ചക്കറികൾ കൃഷി ഇറക്കുന്നതിനുള്ള പ്രവർത്തനങ്ങൾ ഫാമിൽ തകൃതിയായി നടന്നുവരികയാണ്.

നെല്ലിയാമ്പതിയിൽ വിനോദസഞ്ചാരികളുടെ തിരക്ക്

നെന്മാറ: ദീപാവലി അവധിയോടനുബന്ധിച്ച് കഴിഞ്ഞ രണ്ടു ദിവസവും നെല്ലിയാമ്പതിയിൽ വിനോദസഞ്ചാരികളുടെ തിരക്ക് അനുഭവപ്പെട്ടു. ഇരുചക്രവാഹനം ഉൾപ്പെടെ ശരാശരി 4000 വാഹനങ്ങൾ പോത്തുണ്ടി ചെക്ക്പോസ്റ്റിലൂടെ കടന്നുപോയെന്ന് ചെക്ക്പോസ്റ്റ് അധികൃതർ പറഞ്ഞു. അതുപ്രകാരം പതിനയ്യായിരത്തിലേറെ ആളുകൾ ഓരോ ദിവസവും നെല്ലിയാമ്പതി സന്ദർശിച്ചതായാണ് കണക്ക്. നെല്ലിയാമ്പതി ചുരംപാതയിലും വീതി കുറഞ്ഞ സീതാർകുണ്ട്, കാരപ്പാറ, റൂട്ടുകളിലും ഗതാഗതക്കുരുക്ക് അനുഭവപ്പെട്ടു. കേശവൻപാറ സന്ദർശകരുടെ വാഹനങ്ങളുടെ നീണ്ടനിര പാർക്കിംഗ് ഗ്രൗണ്ടും നിറഞ്ഞ് റോഡരികിലേക്ക് നീണ്ടു. പുലയമ്പാറയിൽ സഫാരി ജീപ്പ് സർവീസുകാരും വിനോദസഞ്ചാരികളുടെ വാഹനത്തിരക്കും ഗതാഗതക്കുരുക്കിന് ഇടയാക്കി. വൈകുന്നേരം നാലിനുശേഷം ഉണ്ടായ മഴ തിരിച്ചിറങ്ങുന്ന വിനോദസഞ്ചാരികൾക്ക് ഏറെ ബുദ്ധിമുട്ടുണ്ടാക്കി. ഇടയ്ക്ക് മഴയെ തുടർന്നുണ്ടായ കോടയും വാഹനഗതാഗതത്തിന് വേഗത കുറയാൻ ഇടയാക്കി. നെല്ലിയാമ്പതിയിലെ റിസോർട്ടുകളിലും മറ്റു താമസസ്ഥലങ്ങളിലും റൂമുകൾ നേരത്തെ ബുക്ക് ചെയ്തിരുന്നു. ഞായർ, തിങ്കൾ ദിവസങ്ങളിൽ എത്തിയ വിനോദസഞ്ചാരികളിൽ ബഹുഭൂരിപക്ഷം പേരും താമസസൗകര്യം ലഭ്യമല്ലാത്തതിനാൽ വൈകുന്നേരത്തോടെ മടങ്ങി. വിനോദസഞ്ചാരവാഹനങ്ങളുടെ ഇടവിടാതെയുള്ള തിരക്ക് ചുരം റോഡിൽ ഉണ്ടായെങ്കിലും തിരക്ക് വകവയ്ക്കാതെ കാട്ടാനക്കൂട്ടം റോഡിൽ എത്തി ഏറെനേരം ഗതാഗതതടസവും ഉണ്ടാക്കി.

മണ്ണാർക്കാട് എയ്ഡഡ് സ്കൂൾ കോ-ഓപ്പറേറ്റീവ് സൊസൈറ്റി കെട്ടിടം ഉദ്ഘാടനംചെയ്തു

മണ്ണാർക്കാട്: എയ്ഡഡ് സ്കൂൾ എംപ്ലോയീസ് കോ-ഓപ്പറേറ്റീവ് ക്രെഡിറ്റ് സൊസൈറ്റിയുടെ പുതിയ ഓഫീസ് കെട്ടിടം സഹകരണ വകുപ്പ് മന്ത്രി വി.എൻ. വാസവൻ ഓൺലൈനായി ഉദ്ഘാടനം ചെയ്തു. സഹകരണമേഖലയെ ശക്തിപ്പെടുത്താനുള്ള പ്രവർത്തനങ്ങളാണ് സംസ്ഥാന സർക്കാർ ചെയ്യുന്നതെന്ന് മന്ത്രി പറഞ്ഞു. എൻ. ഷംസുദ്ദീൻ എംഎൽഎ അധ്യക്ഷത വഹിച്ചു. സ്ട്രോംഗ് റൂമിന്‍റെ ഉദ്ഘാടനം കെ. ശാന്തകുമാരി എംഎൽഎ നിർവഹിച്ചു. എൻ.കെ. നാരായണൻകുട്ടി, യു.ടി. രാമകൃഷ്ണൻ, ടി.ആർ. സെബാസ്റ്റ്യൻ, സി. വിമല, എ.എം. അജിത്, കെ. താജുദ്ദീൻ, ടി. ജയഭാരതി, കെ. ഗീതാകുമാരി, സി. അബൂബക്കർ, കെ.കെ. മണികണ്ഠൻ, എം. പുരുഷോത്തമൻ, എസ്.ആർ. ഹബീബുള്ള, കെ.ടി. ഭക്തഗിരീഷ്, പി.യൂസഫ്, ഗിരീഷ്, എം. പ്രദീപ്, സലിം നാലകത്ത്, എം.എൻ. രാമകൃഷ്ണപിള്ള പി.എൻ. മോഹനൻ, പി.എം. മധു, സി. ബാലകൃഷ്ണൻ, മിനി ജോൺ തുടങ്ങിയവർ പ്രസംഗിച്ചു.

സ്റ്റിച്ചിംഗ് ട്രെയിനിംഗ് ബാച്ചിന്‍റെ സർട്ടിഫിക്കറ്റ് വിതരണം

മണ്ണാർക്കാട്: പാലക്കാട് രൂപതയുടെ ഔദ്യോഗിക സാമൂഹ്യസേവന സംഘടനയായ പീപ്പിൾസ് സർവീസ് സൊസൈറ്റി പാലക്കാട് സംഘടിപ്പിച്ച സ്ത്രീ ശാക്തീകരണവും, തൊഴിൽപരിശീലനവും സംരംഭകത്വ വികസനം ലക്ഷ്യമാക്കിയ സ്റ്റിച്ചിംഗ് ട്രെയിനിംഗ് ബാച്ചിന്‍റെ സർട്ടിഫിക്കറ്റ് വിതരണവും മണ്ണാർക്കാട് പെരിന്പടാരി ഹോളി സ്പിരിറ്റ് ഫൊറോനാ പള്ളിയിൽ നടത്തി. ഹോളി സ്പിരിറ്റ് ഫൊറോന പള്ളി വികാരി ഫാ. രാജു പുളിക്കത്താഴെ ഉദ്ഘാടനം ചെയ്ത് സർട്ടിഫിക്കറ്റുകൾ വിതരണംചെയ്തു. പിഎസ്എസ്പി എക്സിക്യൂട്ടീവ് സെക്രട്ടറി ഫാ. സീജോ കാരിക്കാട്ടിൽ അധ്യക്ഷത വഹിച്ചു. ജെൻഡർ കോ-ഓർഡിനേറ്റർ കെ.എൽ. അരുണ്‍ സ്വാഗതം പറഞ്ഞു. പ്രോജക്ട് ഓഫീസർ പി. ബോബി, ആനിമേറ്റർ വൽസമ്മ എന്നിവർ പ്രസംഗിച്ചു. തൊഴിൽരംഗത്ത് സ്ത്രീകളുടെ സാന്പത്തിക സ്വാതന്ത്ര്യത്തിനും സംരംഭകത്വ വളർച്ചക്കും വഴിതെളിയിക്കുന്ന തരത്തിൽ കരൂർ വൈശ്യ ബാങ്ക് ഉദ്യോഗസ്ഥർ ബാങ്കിംഗ്, ഫിനാൻഷ്യൽ ലിറ്ററസി വിഷയത്തിൽ ബോധവത്കരണ ക്ലാസെടുത്തു.

തണ്ണീരങ്കാട് ജിജെബി സ്കൂൾകെട്ടിട ഉദ്ഘാടനം നാളെ

പാലക്കാട്: മാത്തൂർ പഞ്ചായത്തിലെ തണ്ണീരങ്കാട് ജിജെബി സ്കൂളിൽ പുതിയ കെട്ടിടത്തിന്‍റെ ഉദ്ഘാടനം നാളെ ഉച്ചയ്ക്കുശേഷം മൂന്നിന് രാഹുൽ മാങ്കൂട്ടത്തിൽ എംഎൽഎ നിർവഹിക്കും. ഷാഫി പറമ്പിൽ എംഎൽഎയുടെയും രാഹുൽ മാങ്കൂട്ടത്തിൽ എംഎൽഎയുടെയും ആസ്തി വികസനഫണ്ടിൽനിന്നും മൂന്നുഘട്ടങ്ങളിലായി 1.32 കോടി രൂപ ചെലവഴിച്ചാണ് കെട്ടിടത്തിന്‍റെ നിർമാണം പൂർത്തീകരിച്ചത്. 498 ചതുരശ്ര അടിയിൽ രണ്ടുനിലയായിട്ടാണ് കെട്ടിടം പൂർത്തീകരിച്ചിരിക്കുന്നത്. രണ്ടു ക്ലാസ്മുറികളും, ഓഫീസ് മുറിയും, വരാന്തയും, ടോയ്‌ലറ്റ് ബ്ലോക്കും അടങ്ങുന്നതാണ് ഗ്രൗണ്ട് ഫ്ലോർ. ഒന്നാംനിലയിൽ മൂന്ന് ക്ലാസ് മുറികളും, വരാന്തയും, ടോയ്‌ലറ്റ് ബ്ലോക്കും ഉൾപ്പെട്ടിട്ടുണ്ട്. ക്ലാസ് മുറികളും ടോയ്‌ലറ്റും നൂതന സാങ്കേതികവിദ്യ പ്രയോജനപ്പെടുത്തിയാണ് നിർമിച്ചിരിക്കുന്നത്. മാത്തൂർ പഞ്ചായത്ത് പ്രസിഡന്‍റ് പ്രവിത മുരളീധരൻ അധ്യക്ഷത വഹിക്കുന്ന ചടങ്ങിൽ പഞ്ചായത്ത് വൈസ് പ്രസിഡന്‍റ് പി.ആർ. പ്രസാദ്, ജില്ലാ പഞ്ചായത്ത് അംഗം ശ്രീധരൻ, ജില്ലാ വിദ്യാഭ്യാസ ഓഫീസർ ആസിഫ് അലിയാർ, വികസന സ്റ്റാൻഡിംഗ് കമ്മിറ്റി ചെയർപേഴ്സൺ നാദിറ ഇസ്മയിൽ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പ്രേമ ദാസൻ, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ജയശ്രീ പ്രകാശൻ, ബ്ലോക്ക് പഞ്ചായത്ത് അംഗം സോമദാസൻ, വാർഡ് മെംബർ അനിത കലാധരൻ, ഉപജില്ലാ വിദ്യാഭ്യാസ ഓഫീസർ കെ. വിക്ടർ ഡേവിഡ് എന്നിവർ പങ്കെടുക്കും.

മത്സ്യസംസ്കരണ കന്പനിക്കെതിരേ നിയമപരമായി മുന്നോട്ടുനീങ്ങാൻ ഗ്രാമസഭകളിൽ തീരുമാനം

വേലന്താവളം: വടകരപ്പതി ആട്ടയാംപതിയിൽ പ്രവർത്തിക്കുന്ന മത്സ്യസംസ്‌കരണ കമ്പനിക്കെതിരേ നിയമപരമായി മുന്നോട്ടുപോകാൻ തീരുമാനം. കഴിഞ്ഞ മൂന്നുദിവസങ്ങളിലായി ചേർന്ന ആട്ടയാംപതി, ഒഴലപ്പതി, കിണർപ്പള്ളം എന്നീ വാർഡുകളിലെ പ്രത്യേക ഗ്രാമസഭയിലാണ് ഇക്കാര്യത്തിൽ തീരുമാനമായത്. കമ്പനി പ്രവർത്തിക്കുന്ന സമയത്ത് ദുർഗന്ധം പരക്കുന്നതു പ്രദേശവാസികൾക്കു ദുരിതമായതിനെതുടർന്നാണ് നടപടി ആവശ്യപ്പെട്ടു പ്രത്യേക ഗ്രാമസഭകൾ വിളിച്ചു ചേർത്തത്. കമ്പനി സ്ഥിതി ചെയ്യുന്നതിനു ചുറ്റുമുള്ള അഞ്ച്, ആറ്, ഒമ്പത് വാർഡുകളിലാണ് പ്രത്യേക ഗ്രാമസഭ ചേർന്നത്. ഗ്രാമസഭാ യോഗങ്ങളിൽ പഞ്ചായത്ത് പ്രസിഡന്‍റ് ഡി. ജോസി ബ്രിട്ടോ നേതൃത്വം വഹിച്ചു. വലിയ കമ്പനി നിലവിൽവന്നാൽ പ്രദേശത്തെ ജനങ്ങൾക്കു തൊഴിൽ ലഭിക്കുമെന്ന ഉദ്ദേശത്തോടെയാണ് അനുകൂലിച്ചതെന്നതെന്നായിരുന്നു പഞ്ചായത്ത് അംഗങ്ങളുടെ മറുപടി. നിയമപരമായ തെളിവുകൾ ചൂണ്ടിക്കാട്ടി കോടതിയെ സമീപിക്കണമെന്നതാണ് യോഗത്തിൽ പങ്കെടുത്തവർ അഭിപ്രായം അറിയിച്ചത്. ഇത്തരത്തിലുള്ളകമ്പനി തുടങ്ങുന്നതിനു മുൻപ് ഗ്രാമസഭ വിളിച്ചുചേർത്ത് അറിയിപ്പു കൊടുക്കണമെന്ന നിബന്ധന പാലിച്ചിട്ടില്ല. പഞ്ചായത്തിന്‍റെ ഭാഗത്തു നിന്നുണ്ടായ വീഴ്‌ച മിനിറ്റ്സിൽ രേഖപ്പെടുത്തിക്കൊണ്ടുതന്നെ കോടതിയെ സമീപിക്കാനും തീരുമാനമായി. അടുത്ത ഭരണസമിതിക്കും കേസുമായി മുന്നോട്ടു പോകാൻ ഉതകുന്നതരത്തിലായിരിക്കണം ഇടപെടലുകൾ വേണ്ടതെന്നും ഗ്രാമസഭ ഏകകണ്ഠമായി തീരുമാനിച്ചു. പഞ്ചായത്ത് സെക്രട്ടറി എ. മേരി ബിബിയാന, പഞ്ചായത്തംഗം ആർ. ബിന്ദു, ആർ. ശശികുമാർ, കെ. ചിന്നസ്വാമി എന്നിവർ പ്രസംഗിച്ചു.

പാലക്കാട് വലിയങ്ങാടി : അണിഞ്ഞൊരുങ്ങും പുതുമോടിയിൽ

പാലക്കാട്: വലിയങ്ങാടി അണിഞ്ഞൊരുങ്ങും പുതുമോടിയിൽ. ജില്ലയിലെ പ്രധാന വ്യാപാരകേന്ദ്രമായ പാലക്കാട് വലിയങ്ങാടിയുടെ സമഗ്ര വികസനത്തിന് 140 കോടി രൂപയുടെ കേന്ദ്രപദ്ധതിക്കാണ് അംഗീകാരമായത്. കേന്ദ്ര സർക്കാരിന്‍റെ വികസന പദ്ധതി സ്പെഷൽ അസിസ്റ്റന്‍റ്സ് ടു സ്റ്റേറ്റ് ഫോർ ക്യാപ്പിറ്റൽ ഇൻവെസ്റ്റ് (എസ്എഎസ്‌സിഐ) പദ്ധതിയിൽ ഉൾപ്പെടുത്തി ആദ്യഘട്ടത്തിൽ 50 കോടിയും രണ്ടാംഘട്ടമായി 90 കോടി രൂപയുമാണു വികസനത്തിനായി ലഭിക്കുക. ഇതിന്‍റെ ഭാഗമായുള്ള സർവേ നടപടികളിൽ 80 ശതമാനം പൂർത്തിയായിട്ടുണ്ട്. വിശദാംശങ്ങൾ ശേഖരിച്ച് നവംബർ ആദ്യവാരം സംസ്ഥാനസർക്കാർ മുഖേന കേന്ദ്രത്തിന് റിപ്പോർട്ട് നൽകാനാണു നഗരസഭ ലക്ഷ്യമിടുന്നത്. 60 ഹെക്ടർ വരുന്ന വലിയങ്ങാടി പ്രദേശത്തിന്‍റെ അടിസ്ഥാന സൗകര്യ വികസനം മെച്ചപ്പെടുത്തി വ്യാപാരത്തിനും ഷോപ്പിംഗിനും വിനോദത്തിനും ഒരുപോലെ ആധുനിക സൗകര്യം ലഭ്യമാക്കിയായിരിക്കും വികസനം. പച്ചക്കറി, മീൻ മാർക്കറ്റുകൾ, പരിസരത്തെ സ്കൂളുകൾ, നഗരസഭാ കെട്ടിടം, പോലീസ് സ്റ്റേഷൻ, വില്ലേജ് ഓഫിസ് തുടങ്ങിയവയുടെ നവീകരണമടക്കം പദ്ധതിയുടെ ഭാഗമായിരിക്കും. പ്രദേശത്തെ കുളം, കനാൽ എന്നിവ നവീകരിച്ച് ഇതിനോടു ചേർന്ന് പാർക്ക്, ഫുഡ് സ്ട്രീറ്റ്, വാഹന പാർക്കിംഗ് സൗകര്യങ്ങൾ ഒരുക്കും. വലിയങ്ങാടിയുടെ വ്യാപാരചരിത്രം ഒട്ടുംചോരാതെയായിരുന്നു വലിയങ്ങാടിയുടെ വികസനം. പ്രദേശത്തെ പ്രത്യേക ബ്ലോക്കുകളായി തിരിച്ച് കൂടുതൽ വിപുലമായ സൗകര്യങ്ങളോടെ പുതിയ കെട്ടിടവും വ്യാപാര സൗകര്യവും ഒരുക്കുന്നതാണു പ്രധാന പദ്ധതി. ഇതിനായി സ്ഥലം ഏറ്റെടുക്കില്ല. ലഭ്യമായ സ്ഥലത്താകും നിർമാണം. കാലപ്പഴക്കം ഏറെയുള്ള സുരക്ഷിതമല്ലാത്ത കെട്ടിടങ്ങളെല്ലാം നവീകരിക്കും. ഉപഭോക്താക്കൾക്കു നവീന ഷോപ്പിംഗ് അനുഭവം പ്രദാനം ചെയ്യുകയെന്നതാണ് പദ്ധതിയിലൂടെ ലക്ഷ്യമിടുന്നത്.

മണ്ണുമാന്തിയന്ത്രങ്ങളുടെ വാടക വർധിപ്പിക്കണമെന്ന് അസോസിയേഷൻ

പാലക്കാട്: മണ്ണുമാന്തി യന്ത്രങ്ങളുടെ വാടക വർധനവ് ആവശ്യപ്പെട്ടു കഴിഞ്ഞ ദിവസം കൺസ്ട്രക്്ഷൻ എക്യുപ്മെന്‍റ്സ് ഓണേഴ്സ് അസോസിയേഷൻ യന്ത്രങ്ങളുടെ വാഹനറാലി നടത്തി. കഞ്ചിക്കോട് മുതൽ പാലക്കാട് മെഡിക്കൽ കോളജ്‌വരെ നടന്ന പ്രകടനവും യോഗവും സംസ്ഥാന ജനറൽ സെക്രട്ടറി ഷമീർബാബു ഉദ്ഘാടനം ചെയ്തു. കിഴക്കൻ മേഖല കൺവീനർ സോമി കുര്യൻ സ്വാഗതം പറഞ്ഞു. മേഖല പ്രസിഡന്‍റ് ഷാജി അധ്യക്ഷത വഹിച്ചു. ജില്ലാ പ്രസിഡന്‍റ് വിജയകുമാർ, ജില്ലാസെക്രട്ടറി റഷീദ്, ഷാജി എന്നിവർ പ്രസംഗിച്ചു.

പോലീസ് അന്വേഷണത്തിനു തുടക്കം

വടക്കഞ്ചേരി: കിഴക്കഞ്ചേരി ആനയടിയൻപരുതയിൽ മുനിയറകൾ തകർത്ത സംഭവത്തിൽ മംഗലംഡാം പോലീസ് അന്വേഷണം ആരംഭിച്ചു. ഇന്നലെ വൈകുന്നേരം സിഐയുടെ നേതൃത്വത്തിലുള്ള സംഘം സ്ഥലത്തെത്തി പ്രാഥമിക പരിശോധന നടത്തി. അന്വേഷണം നടത്തി കുറ്റക്കാർക്കെതിരെ ശക്തമായ നടപടിയുണ്ടാകുമെന്ന് പോലീസ് നാട്ടുകാർക്ക് ഉറപ്പുനൽകിയിട്ടുണ്ട്. മുനിയറകൾ തകർത്തവുമായി ബന്ധപ്പെട്ട് കഴിഞ്ഞ വ്യാഴാഴ്ചയാണ് നാട്ടുകാർ പൊതുതാത്പര്യ പരാതി മംഗലംഡാം പോലീസിൽ നൽകിയത്. എന്നാൽ പരാതി നൽകി മൂന്നു ദിവസം പിന്നിട്ടിട്ടും പോലീസ് സ്ഥലത്തെത്തി പ്രാഥമിക പരിശോധന പോലും നടത്താത്തതിനെതിരെ ഇന്നലെ നാട്ടുകാരുടെ ഭാഗത്തുനിന്നും വലിയ പ്രതിഷേധങ്ങളണ്ടായിരുന്നു. ഇതിനു പിന്നാലെ ഇന്നലെ ഏറെവൈകി വൈകുന്നേരം ആറുമണിയോടെയാണ് പോലീസ് സംഘം സ്ഥലത്ത് പരിശോധനക്കെത്തിയത്.

വീഴുമലയെ പ്ലാസ്റ്റിക് വിമുക്തമാക്കി ആയക്കാട് സ്കൂളിലെ സ്കൗട്ട്സ് ആൻഡ് ഗൈഡ്സ്

ആലത്തൂർ: വീഴുമലയെ പ്ലാസ്റ്റിക് വിമുക്തമാക്കി ആയക്കാട് സിഎ ഹയർ സെക്കഡറി സ്കൂളിലെ സ്കൗട്ട്സ് ആൻഡ് ഗൈഡ്സ് വിദ്യാർഥികൾ. വീഴുമലയിൽ സംഘടിപ്പിച്ച പ്ലാസ്റ്റിക് വിമുക്ത കാമ്പയിൻ കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. വീഴുമലയുടെ താഴ്‌വാരത്തിൽ അലക്ഷ്യമായി വലിച്ചെറിഞ്ഞ പ്ലാസ്റ്റിക് കുപ്പികൾ, പ്ലാസ്റ്റിക് കടലാസുകൾ, പ്ലാസ്റ്റിക് കവറുകൾ എന്നിവ പെറുക്കി എടുത്ത് ഹരിതകർമസേനക്കു കൈമാറി. മൂന്നു ദിവസങ്ങളിലായി നടക്കുന്ന യൂണിറ്റ് ക്യാമ്പിന്‍റെ ഭാഗമായിട്ടാണ് വീഴുമല ഹൈക്കും, ശുചീകരണവും ചെയ്തത്. ഫോറസ്റ്റ് ഓഫീസർ നാസർ , സ്കൗട്ട് മാസ്റ്റർ ഷിനു. വി. ദേവ്, ഗൈഡ് ക്യാപ്റ്റൻ കെ. ഉമ്മുകുൽസു എന്നിവർ നേതൃത്വം നൽകി. ഫോറസ്റ്റ് ഓഫീസർമാരായ നന്ദിനി, ധന്യ, അഖിൽ, ഗിന്നസ്, കേഡറ്റുമാരായ നിവേദ്യ , കെ. അതുല്യ എന്നിവർ പ്രസംഗിച്ചു.

മായവരം, തഞ്ചാവൂർ, കുംഭകോണം ക്ഷേത്രങ്ങൾ സന്ദർശിച്ച് രഥോത്സവ ക്ഷേത്രപ്രതിനിധികൾ

പാലക്കാട്: കല്പാത്തി രഥോത്സവ ഒരുക്കങ്ങൾ തകൃതിയിൽ. ഉത്സവത്തിന്‍റെ പ്രഭവകേന്ദ്രമായ മായവരത്തെ ആദരവോടെ സ്മരിച്ച് കല്പാത്തി നിവാസികൾ. ഇതിന്‍റെ ഭാഗമായി അഗ്രഹാരങ്ങളിലെ ക്ഷേത്രഭാരവാഹികൾ കഴിഞ്ഞദിവസം തമിഴ്നാട്ടിലെ മായവരം (മയിലാടുംതുറൈ) മയൂരനാഥപുരം ക്ഷേത്രം സന്ദർച്ചു. തുലാം ഒന്നിനായിരുന്നു മായവരം മയൂരനാഥ ക്ഷേത്രത്തിലും കല്പാത്തി ശ്രീവിശാലാക്ഷീ സമേത വിശ്വനാഥസ്വാമി ക്ഷേത്രത്തിലും ഒരുമാസംനീളുന്ന തീർത്ഥോത്സവം ആരംഭിക്കുന്നത്. മാസാവസാനം പത്തു ദിനങ്ങളിലായാണ് രഥോത്സവം. കല്പാത്തി സംയുക്തരഥോത്സവ പത്രികയുടെ തമിഴ് പരിഭാഷ മായവരം ക്ഷേത്രത്തിൽ സമർപ്പിച്ച് ക്ഷേത്ര പുരോഹിതരേയും അവിടത്തെ അഗ്രഹാര നിവാസികളേയും കല്പാത്തി രഥോത്സവത്തിലേയ്ക്ക് ക്ഷണിച്ചു. കല്പാത്തി ശിവക്ഷേത്രം മാനേജിംഗ് ട്രസ്റ്റി വി.കെ. സുജിത്കുമാർ വർമ, ചാത്തപ്പുരം പ്രസന്ന ഗണപതി ക്ഷേത്രം കാര്യദർശി സി.വി. മുരളീ രാമനാഥൻ, ട്രഷറർ എ.വി. വാസുദേവൻ, മന്ദക്കര ശ്രീ മഹാഗണപതി ക്ഷേത്രം അധ്യക്ഷൻ കെ.എസ്. കൃഷ്ണ, പഴയ കല്പാത്തി ശ്രീലക്ഷ്മീ നാരായണ പെരുമാൾ ക്ഷേത്രം ട്രസ്റ്റി സി.വി. ശ്രീകൃഷ്ണൻ എന്നിവരുടെ നേതൃത്വത്തിലുള്ള പ്രതിനിധി സംഘമാണ് മായവരം ക്ഷേത്രം സന്ദർശിച്ചത്.

സ്റ്റാഫ് പാറ്റേൺ ഏകീകരിക്കണം: ഹോമിയോ ഫാർമസിസ്റ്റ് സമ്മേളനം

ഒറ്റപ്പാലം: ആയുഷ് ഹോമിയോപ്പതി വകുപ്പിൽ സ്റ്റാഫ് പാറ്റേൺ ഏകീകരിക്കണമെന്ന് കേരള ഗവ. ഹോമിയോ ഫാർമസിസ്റ്റ്സ് ഓർഗനൈസേഷൻ ജില്ലാ സമ്മേളനം ആവശ്യപ്പെട്ടു. സംസ്ഥാന പ്രസിഡന്‍റ് ടി. കെ. അനിൽകുമാർ ഉദ്ഘാടനം ചെയ്ത സമ്മേളനത്തിൽ ജില്ലാ മെഡിക്കൽ ഓഫീസർ ഡോ.സി.പി. കവിത മുഖ്യാതിഥിയായിരുന്നു. ജില്ലാ പ്രസിഡന്‍റ് വി. ഹരീഷ് അധ്യക്ഷത വഹിച്ചു. ജില്ലാ സെക്രട്ടറി മഹേഷ് മോഹൻ, സംസ്ഥാന ജോയിന്‍റ് സെക്രട്ടറി പ്രവീൺ, പി.കെ. ബോധിഷ് എന്നിവർ പ്രസംഗിച്ചു. ഭാരവാഹികളായി വി. ഹരീഷ്- പ്രസിഡന്‍റ്, അനുജ സുകുമാരൻ- വൈസ് പ്രസിഡന്‍റ്, എം.എസ്. ധന്യ- സെക്രട്ടറി, പി.കെ. ബോധിഷ്- ട്രഷറർ എന്നിവരെയും തെരഞ്ഞെടുത്തു.

തൃപ്പാളൂർ തൂക്കുപാലം ഇന്ന് നാടിനു സമർപ്പിക്കും

ആലത്തൂർ: നിയോജകമണ്ഡലത്തിലെ എരിമയൂർ ഗ്രാമപഞ്ചായത്തിൽ ഗായത്രിപ്പുഴയ്ക്ക് കുറുകെ നിർമിച്ച തൃപ്പാളൂർ ശിവക്ഷേത്രം തൂക്കുപാലം ഇന്നുരാവിലെ 11 ന് നാടിന് സമർപ്പിക്കും. പാലത്തിന്‍റെ ഉദ്ഘാടനം ദേവസ്വം, സഹകരണ, തുറമുഖമന്ത്രി വി.എൻ. വാസവൻ നിർവഹിക്കും. സംസ്ഥാന സർക്കാർ ബജറ്റ് വിഹിതമായി അനുവദിച്ച അഞ്ചുകോടി രൂപ ഉപയോഗിച്ചാണ് തൂക്കുപാലവും അനുബന്ധ സൗകര്യങ്ങളും ചെയ്തത്. പുഴയ്ക്ക് കുറുകെയുള്ള തൂക്കുപാലം കൂടാതെ മിനിമാസ്റ്റ് ലൈറ്റുകൾ, കുളിക്കടവ്, ഓപ്പൺ സ്റ്റേജ്, കുട്ടികളുടെ കളിസ്ഥലം, കോഫി ഷോപ്പ്, ടോയ്‌ലറ്റ് ബ്ലോക്ക് എന്നിവ ഉൾപ്പെടുന്ന ടേക്ക് ബ്രേക്ക് സംവിധാനവും പദ്ധതിയുടെ ഭാഗമായി സജ്ജീകരിച്ചിട്ടുണ്ട്. തൃപ്പാളൂർ ശിവക്ഷേത്ര പരിസരത്ത് നടക്കുന്ന പരിപാടിയിൽ കെ.ഡി. പ്രസേനൻ എംഎൽഎ അധ്യക്ഷനാകും. കെ. രാധാകൃഷ്ണ‌ൻ എം പി, മലബാർ ദേവസ്വം ബോർഡ് പ്രസിഡന്‍റ് ഒ.കെ. വാസുമാസ്റ്റർ എന്നിവർ മുഖ്യാതിഥിയാകും.

തൃത്താല മണ്ഡലത്തിൽ ദേവഹരിതം പദ്ധതിക്കു തുടക്കം

തൃത്താല: ഹരിതകേരള മിഷന്‍റെയും സുസ്ഥിര തൃത്താല പദ്ധതിയുടെയും പദ്ധതികളിലൊന്നായ ദേവഹരിതം പദ്ധതിക്ക് തൃത്താല മണ്ഡലത്തിൽ തുടക്കമായി. പദ്ധതിയുടെ ഉദ്ഘാടനം ആനക്കര ഗ്രാമപഞ്ചായത്തിലെ പെരുമ്പലം ശ്രീകൃഷ്ണ ക്ഷേത്രത്തിൽ മന്ത്രി എം.ബി. രാജേഷ് നിർവഹിച്ചു. കാലാവസ്ഥാ വ്യതിയാനം, ഭൂഗർഭ ജലശോഷണം എന്നിവയ്ക്ക് പരിഹാരമായി പരിസ്ഥിതി പുനഃസ്ഥാപനത്തിനായി ദേവാലയങ്ങളിൽ സൃഷ്ടിക്കുന്ന ചെറുവനങ്ങളാണ് ദേവഹരിതം പച്ചത്തുരുത്തുകൾ. മണ്ഡലത്തിലെ സാധ്യമായ എല്ലാ ആരാധനാലയങ്ങളിലും തദ്ദേശ സ്ഥാപനങ്ങളുടെയും ജനങ്ങളുടെയും പിന്തുണയോടെ പദ്ധതി നടപ്പിലാക്കാനാണ് ഹരിത കേരള മിഷൻ ഉദ്ദേശിക്കുന്നത്. പരിപാടിയിൽ ആനക്കര ഗ്രാമപഞ്ചായത്ത് പ്രസിഡന്‍റ് കെ. മുഹമ്മദ് അധ്യക്ഷനായി. ഹരിതകേരള മിഷൻ ബ്ലോക്ക് കോ-ഓർഡിനേറ്റർ നീരജ രാമദാസ് പദ്ധതി വിശദീകരിച്ചു. വാർഡ് മെംബർ ജ്യോതിലക്ഷ്മി, ക്ഷേത്രം അധികൃതർ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.

തിണ്ടില്ലം ജലവൈദ്യുത പദ്ധതി പ്രവർത്തനം ഈവർഷംതന്നെ

വടക്കഞ്ചേരി: പാലക്കുഴി മലയോരവാസികളുടെ സ്വപ്നപദ്ധതിയായ തിണ്ടില്ലം മിനി ജലവൈദ്യുത പദ്ധതി ഈവർഷംതന്നെ കമ്മീഷൻ ചെയ്തു വൈദ്യുതി ഉത്പാദനം ആരംഭിക്കാൻ ലക്ഷ്യമിട്ട് പ്രവൃത്തികൾ ദ്രുതഗതിയിൽ. പദ്ധതിയുടെ ഏറ്റവും പ്രയാസകരമായ പൈപ്പ് സ്ഥാപിക്കലും അന്തിമഘട്ടത്തിലാണെന്നു സൈറ്റ് എൻജിനീയർ ഷാരോൺ സാം പറഞ്ഞു. മൂന്നുനാല് ലൊക്കേഷൻ കേന്ദ്രീകരിച്ചാണ് കുത്തനെയുള്ള മലഞ്ചെരിവിൽ വലിയ പൈപ്പുകൾ സ്ഥാപിക്കുന്നത്. കോഴിക്കോട് നിന്നുള്ള നാല്പതംഗ ഖലാസികളാണ് വർക്ക് ചെയ്യുന്നത്. ഏറെ പ്രയാസകരമായ പ്രവൃത്തിയാണിത്. പാലക്കുഴിയിലെ ചെക്ക്ഡാമിൽനിന്നും താഴെ കൊന്നക്കൽക്കടവിലെ പവർഹൗസ് വരെയും പൈപ്പുകൾ എത്തിച്ചു കഴിഞ്ഞിട്ടുണ്ടെന്ന് ഷാരോൺസാം പറഞ്ഞു. വെൽഡ് ചെയ്ത് സ്ഥാപിക്കുന്ന ജോലികളാണ് നടന്നു വരുന്നത്. കോൺക്രീറ്റ് തൂണുകൾ കെട്ടിയും പൈപ്പുകളുടെ തന്നെ സഹായത്തോടെയുമാകും ചെങ്കുത്തായ മലമുകളിൽ പൈപ്പുകൾ ഉറപ്പിക്കുന്നത്. പവർഹൗസിലെ മെക്കാനിക്കൽ വർക്കുകളെല്ലാം പൂർത്തിയായിട്ടുണ്ട്. പദ്ധതി ഈ വർഷം തന്നെ പ്രവർത്തനക്ഷമമാക്കുമെന്ന് ഇക്കഴിഞ്ഞ ജൂണിൽ സ്ഥലം സന്ദർശിച്ച് ജില്ലാ പഞ്ചായത്ത് പ്രസിഡന്‍റ് കെ .ബിനുമോളും കമ്പനി ചീഫ് എൻജിനീയർ പ്രസാദ് മാത്യുവും പറഞ്ഞിരുന്നു. നിന്നും 294 മീറ്റർ ദൂരത്തിൽ ലൊ പ്രഷർ പൈപ്പും തുടർന്ന് പവർഹൗസ് വരെയുള്ള 438 മീറ്റർ ദൂരത്തിൽ ഹൈ പ്രഷർ പെൻസ്റ്റോക്ക് പൈപ്പുകളുമാണ് സ്ഥാപിച്ചു വരുന്നത്. ജില്ലാ പഞ്ചായത്തിന്‍റെ രണ്ടാമത്തെ ജലവൈദ്യുത പദ്ധതിയാണിത്. പാലക്കാട് സ്മോൾ ഹൈഡ്രോ കമ്പനി എന്ന പേരിൽ ജില്ലാ പഞ്ചായത്തിന്‍റ് കീഴിലുള്ള കമ്പനിയാണ് പദ്ധതി നടപ്പിലാക്കുന്നത്.

ആനയടിയൻപരുതയിലെ മുനിയറകൾ നശിപ്പിച്ച സംഭവത്തിൽ പ്രതിഷേധവുമായി നാട്ടുകാർ

വടക്കഞ്ചേരി: കിഴക്കഞ്ചേരി കൊന്നക്കൽകടവ് ആനയടിയൻപരുതയിൽ മഹാശിലായുഗ കാലഘട്ടത്തിലെ മനുഷ്യനിർമിതങ്ങളായ മുനിയറകൾ നശിപ്പിച്ചതിനെതിരെ ശക്തമായ പ്രതിഷേധവുമായി നാട്ടുകാർ. സംഭവത്തിനു പിന്നിൽ പ്രവർത്തിച്ചവർക്കെതിരെ കടുത്ത ശിക്ഷാനടപടിയുണ്ടാകണമെന്നാണ് ആവശ്യം. മുഖ്യമന്ത്രിക്ക് നൽകിയ പരാതിയിൽ തൃശൂരിൽ നിന്നുള്ള പുരാവസ്തു വകുപ്പ് ഉദ്യോഗസ്ഥൻ ഫോണിലൂടെ വിവരങ്ങൾ അന്വേഷിച്ചിട്ടുണ്ടെന്നും അടുത്തദിവസംതന്നെ അധികൃതർ എത്തുമെന്ന പ്രതീക്ഷയാണുള്ളതെന്നും നാട്ടുകാർ പറഞ്ഞു. പഞ്ചായത്ത് മെംബർ റോയ് മാസ്റ്റർ, ചരിത്ര ഗവേഷകനും പട്ടാമ്പി ഗവ. കോളജിലെ ചരിത്ര വിഭാഗം പ്രഫസറുമായ കെ. രാജൻ, മൂന്നര പതിറ്റാണ്ടായി കൊന്നക്കൽക്കടവിലെ സാമൂഹിക സാംസ്കാരിക രംഗത്ത് പ്രവർത്തിക്കുന്ന ഫീനിക്സ് ക്ലബിന്‍റെ പ്രസിഡന്‍റ് ബെന്നി വെട്ടുകല്ലാംകുഴി, മുനിയറകൾപ്പോലെയുള്ള ചരിത്ര സ്മാരകങ്ങളുടെ സംരക്ഷണ രംഗത്ത് പ്രവർത്തിക്കുന്ന എം. ഹരിദാസ് എന്നിവരുടെ നേതൃത്വത്തിൽ സ്ത്രീകൾ ഉൾപ്പെടെയുള്ള നാട്ടുകാർ ഇന്നലെ മുനിയറകളുള്ള ആനയടിയൻപരുതയിലെ കുന്നിൻപ്പുറത്തെത്തിയിരുന്നു. മദ്യപസംഘങ്ങളോ സാമൂഹ്യ വിരുദ്ധരോ അല്ല കൃത്യത്തിനുപിന്നില്ലെന്നും ബോധപൂർവമായി ആസൂത്രണം ചെയ്ത് നടത്തിയ പ്രവൃത്തിയാണ് നശിപ്പിക്കലിനു പിന്നിലെന്ന വിലയിരുത്തലാണുള്ളത്. വലിയ കായികാധ്വാനമുള്ള ജോലിയായതിനാൽ വിദഗ്ദ്ധരായ കരിങ്കൽ പണിക്കാരുടെ സഹായത്തോടെയാകണം മുനിയറകൾ തകർത്തതെന്ന നിഗമനമാണുള്ളതെന്ന് എം. ഹരിദാസ് പറഞ്ഞു. പാറപ്പുറങ്ങൾ നിറഞ്ഞ ആളൊഴിഞ്ഞ സ്ഥലമായതിനാൽ ഏറെ സമയമെടുത്താണ് മുനിയറയുടെ കുത്തുകല്ലുകളും മൂടിക്കല്ലും നശിപ്പിച്ചിട്ടുള്ളത്. പതിനേഴര ഏക്കർ വരുന്ന വിരിച്ച പാറപ്പുറമായ ഈ കുന്നിൻപ്പുറത്ത് ഇരുപതിലേറെ മുനിയറകളുടെ ശേഷിപ്പുകളുണ്ടായിരുന്നെന്നാണ് പറയപ്പെടുന്നത്. ഇതിൽ പൂർണതോതിലുണ്ടായിരുന്ന മുനിയറയാണ് കഴിഞ്ഞദിവസം തകർത്തത്. സ്ഥലം ഏറ്റെടുക്കുന്നതുമായി ബന്ധപ്പെട്ട് തൃശൂരിൽനിന്നും പുരവസ്തുവകുപ്പ് സ്ഥലത്തെത്തി പരിശോധന നടത്തി തുടർ നടപടികൾ നടക്കുന്നതിനിടെയാണ് ഈ സംഭവം. പാലക്കുഴി മലയിൽ പോത്തുമട ഭാഗത്തും ഇത്തരം കല്ലറ എന്നറിയപ്പെടുന്ന മുനിയറകളുണ്ട്. മൂന്ന് വലിയ പാറകല്ലുകൾ കുത്തിനാട്ടി അതിനു മുകളിൽ വലിയ വലുപ്പമുള്ള ഭീമൻ പാറപ്പലക സ്ഥാപിച്ചാണ് മുനിയറ നിർമിക്കുന്നത്.

ജിഐഎസ് മാപ്പിംഗ് പൂർത്തിയാക്കി തൃക്കടീരി പഞ്ചായത്ത്

പട്ടാന്പി: തൃക്കടീരി ഗ്രാമ പഞ്ചായത്തിന്‍റെ സമഗ്രവികസനം ലക്ഷ്യമാക്കി നടത്തിയ ജിഐഎസ് മാപ്പിംഗ് പൂർത്തീകരിച്ചു. ഇതോടെ ജില്ലയിൽ ഗ്രാമപഞ്ചായത്ത് തലത്തിൽ ജിഐഎസ് മാപ്പിംഗ് പൂർത്തീകരിച്ച ആദ്യ ഗ്രാമപഞ്ചായത്തായി തൃക്കടീരി മാറി. ജിഐഎസ് മാപ്പിംഗിലൂടെ ലഭിച്ച വിവരങ്ങൾ ലഭ്യമാവുന്ന വെബ്പോർട്ടലും ഗ്രാമപഞ്ചായത്ത് ഒരുക്കിയിട്ടുണ്ട്. ഈ വെബ് പോർട്ടൽവഴി കെട്ടിടങ്ങൾ, റോഡുകൾ, തണ്ണീർത്തടങ്ങൾ, തരിശുഭൂമികൾ, ആരോഗ്യ സ്ഥാപനങ്ങൾ തുടങ്ങി ഗ്രാമപഞ്ചായത്തിന്‍റെ പരിധിയിലെ മുഴുവൻ വസ്തുക്കളുടെയും വിവരങ്ങൾ ചിത്രങ്ങൾ ഉൾപ്പടെ വെബ്പോർട്ടലിൽ ലഭിക്കും. ഡ്രോണ്‍ സർവേ, ഡിജിപിഎസ് സർവേ, ജിപിഎസ് സർവേ, പ്രത്യേക മൊബൈൽ ആപ്പിന്‍റെ സഹായത്തോടെയുള്ള കെട്ടിട സർവേ തുടങ്ങിയ വിവിധ സർവേകളിലൂടെ ഗ്രാമപഞ്ചായത്തിന്‍റെ മുഴുവൻ വിവരങ്ങളും ലഭിക്കും. കൂടാതെ വിവിധ കാലഘട്ടങ്ങളിലെ ഭൂവിനിയോഗ വിവരങ്ങൾ, വിവിധ ആസൂത്രണ സംബന്ധിയായ വിവരങ്ങൾ, യൂട്ടിലിറ്റി നെറ്റ്‌വർക്കുകൾ എന്നിവയെല്ലാം വെബ്പോർട്ടലിൽ ലഭ്യമാണ്.

ബാങ്ക് വായ്പ മുടങ്ങിയവർക്കു കൈത്താങ്ങാകാൻ ഒറ്റപ്പാലം അർബൻ ബാങ്കിന്‍റെ ഒറ്റത്തവണ തീർപ്പാക്കൽ പദ്ധതി

ഒറ്റപ്പാലം: വായ്പ കുടിശികയായവരെ സഹായിക്കാൻ ഒറ്റപ്പാലം കോ- ഓപ്പറേറ്റീവ് അർബൻ ബാങ്കിന്‍റെ ഒറ്റത്തവണ തീർപ്പാക്കൽ പദ്ധതി. കോവിഡ് മഹാമാരി, പ്രളയം, പ്രകൃതിദുരന്തങ്ങൾ, മാറാരോഗങ്ങൾ, വായ്പയെടുത്തു മരണപ്പെട്ടവർ എന്നീ കാരണങ്ങൾ മൂലം കേരളത്തിലെ സഹകരണ ബാങ്കിംഗ് മേഖലയിൽനിന്നും വായ്പ എടുത്തിട്ടുള്ള പലരുടെയും തിരിച്ചടവ് മുടങ്ങുന്ന സാഹചര്യത്തിൽ ഇവരെ സഹായിക്കുന്നതിനു വേണ്ടി വിവിധതരത്തിലുള്ള കുടിശിക നിവാരണ പ്രവർത്തനങ്ങൾ നടപ്പാക്കിയെങ്കിലും പലർക്കും അത് പ്രയോജനപ്പെടുത്താനും വായ്പ തിരിച്ചടക്കാനും കഴിഞ്ഞിട്ടില്ല. ഇത്തരത്തിൽ നിയമ നടപടികൾ നേരിടുന്നവരെ സഹായിക്കാൻ വേണ്ടിയും കുടിശികക്കാരെ ജപ്തി നടപടികളിൽനിന്ന് ഒഴിവാക്കുന്നതിനും റിസർവ് ബാങ്ക് നിർദേശിക്കുന്ന പ്രകാരം ബാങ്കിലെ കിട്ടാക്കടം ക്രമീകരിക്കുന്നതിനും ഒറ്റപ്പാലം കോ-ഓപ്പറേറ്റീവ് അർബൻ ബാങ്കിന്‍റെ ഭരണസമിതി നെഗോഷിയേറ്റഡ്‌ സെറ്റൽമെന്‍റ് / വൺ ടൈം സെറ്റിൽമെൻറ് പോളിസിക്ക് രൂപം നൽകിയിട്ടുണ്ട്. ഇതിന്‍റെ ഭാഗമായി കുടിശികക്കാരുടെ സാമ്പത്തിക പ്രയാസങ്ങൾ കണ്ടറിഞ്ഞുകൊണ്ട് കൃത്യമായ ശുപാർശ സമർപ്പിക്കാൻ ബ്രാഞ്ച് മാനേജർമാരോട് നിർദേശിച്ചിട്ടുണ്ട്. 22, 23, 24 തീയതികളിൽ ബാങ്കിന്‍റെ 12 മണിക്കൂർബ്രാഞ്ച് ഹാളിൽ അദാലത്ത്‌ നടക്കും. ബ്രാഞ്ച് മാനേജർമാരുടെ ശുപാർശകൾ പരിഗണിച്ച് ഒറ്റത്തവണ തീർപ്പാക്കലിന് വേണ്ടി ബാങ്ക് അംഗീകരിച്ച മാനദണ്ഡം അനുസരിച്ച് ഇളവ് അനുവദിക്കുകയും , ഇത്തരത്തിൽ നടത്തുന്ന അദാലത്തിലെ ശുപാർശകൾ ബാങ്ക് ഭരണ സമിതി അംഗീകരിക്കുകയും, വായ്പകളിൽ ലഭിച്ച ഇളവ് പ്രയോജനപ്പെടുത്തി കുടിശികയിൽനിന്നും മോചിതരാകാൻ അവസരം ഒരുക്കുകയും ചെയ്യുക എന്നതാണ് ലക്ഷ്യമിട്ടിട്ടുള്ളത്. 2024 ലും ബാങ്ക് ഒറ്റത്തവണ തീർപ്പാക്കൽ പദ്ധതി നടപ്പിലാക്കിയിരുന്നു. ഇതിലൂടെ 129 വായ്പക്കാർക്ക് 2.28 കോടി രൂപയുടെ ഇളവ് നൽകിയിരുന്നു.

നെല്ലുണക്കാനാവാതെ കർഷകർ നട്ടംതിരിയുന്നു

വണ്ടിത്താവളം: നെല്ലുണക്കാനാവാതെ കർഷകർ വലയുന്നു. മഴവന്നാൽ പെട്ടെന്നു നെല്ല് ശേഖരിക്കാൻ കഴിയാത്തതാണ് കർഷകർക്കു വിനയാകുന്നത്. വീണ്ടും തൊഴിലാളികൾക്ക് കൂലിനൽകിവേണം ഉണക്കാൻ. ഈർപ്പമുണ്ടായാൽ നെല്ലുസംഭരണത്തിൽ കുറവുണ്ടാകുമെന്നതും കർഷകരെ വെട്ടിലാക്കുന്നു. ഏറെ പ്രതീക്ഷകളോടെ കൊയ്തെടുത്ത നെല്ല് സമയോചിതമായി ഉണക്കാൻ കഴിയാത്തതിൽ ചില കർഷകർ വിഷമിക്കുമ്പോൾ മഴയിൽ യന്ത്രക്കൊയ്ത്തു മുടങ്ങിയ സങ്കടത്തിലാണ് മറ്റുള്ളവർ.

മണ്ണാർക്കാട് എയ്ഡഡ് സ്കൂൾ എംപ്ലോയീസ് കോ- ഓപ്പറേറ്റീവ് ക്രെഡിറ്റ് സൊസൈറ്റി കെട്ടിടോദ്ഘാടനം ഇന്ന്

മണ്ണാർക്കാട്: മണ്ണാർക്കാട് എയ്ഡഡ് സ്കൂൾ എംപ്ലോയീസ് കോ- ഓപ്പറേറ്റീവ് ക്രെഡിറ്റ് സൊസൈറ്റിയുടെ പുതിയ ഓഫീസ് കെട്ടിടം 20ന് സഹകരണമന്ത്രി വി.എൻ. വാസവൻ ഉദ്ഘാടനം ചെയ്യും. ഉച്ചയ്ക്കുശേഷം മൂന്നിനു നടക്കുന്ന ചടങ്ങിൽ മണ്ണാർക്കാട് എംഎൽഎ അഡ്വ.എൻ. ഷംസുദ്ദീൻ അധ്യക്ഷത വഹിക്കും. സ്ട്രോംഗ് റൂമിന്‍റെ ഉദ്ഘാടനം കോങ്ങാട് എംഎൽഎ കെ. ശാന്തകുമാരി നിർവഹിക്കും. 1990 ൽ എയ്ഡഡ് സ്കൂൾ ജീവനക്കാരുടെയും അധ്യാപകരുടെയും സഹകരണ സംഘമായി മണ്ണാർക്കാട് പ്രവർത്തനമാരംഭിച്ച സൊസൈറ്റി 1995 മുതൽ തുടർച്ചയായി ലാഭത്തിൽ പ്രവർത്തിച്ചുവരികയാണെന്നു ഭാരവാഹികൾ പറഞ്ഞു. മണ്ണാർക്കാട്, അട്ടപ്പാടി താലൂക്കുകളിലായി 58 വിദ്യാലയങ്ങളിൽ നിന്നായി 800 ലധികം എയ്ഡഡ് സ്കൂൾ ജീവനക്കാർ സംഘത്തിൽ അംഗങ്ങളാണ്. നിരവധി തവണ താലൂക്കിലെ ഏറ്റവും മികച്ച എംപ്ലോയീസ് സഹകരണ സംഘത്തിനുള്ള സർക്കിൾ സഹകരണ യൂണിയന്‍റെ അംഗീകാരവും നേടാൻ സംഘത്തിനായിട്ടുണ്ട്. ജീവനക്കാർക്ക് നൽകുന്ന വായ്പകൾക്കു പുറമേ മറ്റു ഇടപാടുകാർക്ക് സ്വർണപ്പണയമായി വായ്പ സൗകര്യം സംഘത്തിൽ ലഭ്യമാണ്. മണ്ണാർക്കാട് പോലീസ് സ്റ്റേഷന്‍റെ എതിർവശത്തുള്ള ആധുനിക സൗകര്യങ്ങളോടു കൂടിയ പുതിയ കെട്ടിടത്തിലേക്കാണ് സൊസൈറ്റി പ്രവർത്തനം മാറ്റുന്നത്. ഉദ്ഘാടന ചടങ്ങിൽ രാഷ്ട്രീയ, സാമൂഹിക, സഹകരണ മേഖലയിലെ പ്രമുഖർ പങ്കെടുക്കും. മുൻകാല സംഘംപ്രസിഡന്‍റുമാരെ ചടങ്ങിൽ ആദരിക്കും.

മണ്ണാർക്കാട് മണ്ഡലത്തിൽ ഗ്രാമീണറോഡ് നിർമാണത്തിനു ഫണ്ട് അനുവദിച്ചു

മണ്ണാർക്കാട്: മണ്ണാർക്കാട് മണ്ഡലത്തിൽ ഗ്രാമീണറോഡ് നിർമാണത്തിനു ഫണ്ട് അനുവദിച്ചു. കോട്ടോപ്പാടം പഞ്ചായത്തിലെ അരിയൂർ പടുവിൽ കുളമ്പ് റോഡിന് 10ലക്ഷം രൂപ, മണ്ണാർക്കാട് മുൻസിപ്പാലിറ്റിയിലെ നടമാളിക അരകുർശ്ശി എതൃപ്പണം കെടിഎം സ്കൂൾ റോഡിന് 10ലക്ഷം രൂപ, അലനല്ലൂർ പഞ്ചായത്തിലെ വട്ടമണ്ണപ്പുറം അണയംകോട് ചേരിപ്പറമ്പ് റോഡിന് 10ലക്ഷം രൂപ, കുമരംപുത്തൂർ പഞ്ചായത്തിലെ അക്കിപ്പാടം കുളിക്കടവ് പുഴ റോഡിന് 10ലക്ഷം രൂപ, ഷോളയൂർ പഞ്ചായത്തിലെ പെട്ടിക്കൽ ജംഗ്ഷൻ ഇൻഫന്‍റ് ജീസസ് സ്കൂൾ റോഡിന് 10ലക്ഷം രൂപ എന്നിങ്ങനെയാണ് മണ്ഡലത്തിൽ ഗ്രാമീണ റോഡുകൾക്ക് വെള്ളപ്പൊക്ക ദുരിതാശ്വാസ ഫണ്ടിൽ നിന്ന് പണമനുവദിച്ചതെന്ന് എൻ. ഷംസുദ്ദീൻ എംഎൽഎ പറഞ്ഞു. എംഎൽഎ ഫണ്ടിൽനിന്നും മണ്ണാർക്കാട് മുൻസിപ്പാലിറ്റിയിലെ അരകുർശ്ശി എതൃപ്പണം വടക്കേക്കര ലിങ്ക് റോഡിന് 19.50ലക്ഷം രൂപ, പള്ളിപ്പടി പെരിഞ്ചോളം ബൈപ്പാസ് റോഡിന് 20ലക്ഷം രൂപ, അലനല്ലൂർ ഗ്രാമപഞ്ചായത്തിലെ പാക്കത്തക്കുളമ്പ് മേലെ കളയൻ തോണിപ്പാടം റോഡിന് 15ലക്ഷം രൂപ, കോട്ടോപ്പാടം പഞ്ചായത്തിലെ ഭീമനാട് ചിറ്റടിക്കുളമ്പ് റോഡിന് 10ലക്ഷം രൂപ,തെങ്കര പഞ്ചായത്തിലെ കൈനിക്കോട് ആശാരിക്കുന്ന് സോമൻപടി റോഡിന് 10ലക്ഷം രൂപ എന്നിങ്ങനെയും തുക അനുവദിച്ചിട്ടുണ്ട്. അഗളി പോലീസ് സ്റ്റേഷനിൽ കംപ്യൂട്ടർ, പ്രിന്‍റർ, സ്കാനർ, അനുബന്ധ സാധന സാമഗ്രികൾ സ്ഥാപിക്കുന്നതിന് രണ്ടുലക്ഷംരൂപയും അനുവദിച്ചതായും എംഎൽഎ അറിയിച്ചു.

പാലിയേറ്റീവ് കെയർ യൂണിറ്റിന് ഓക്സിജൻ സിലിണ്ടർ റെഗുലേറ്റർ സമ്മാനിച്ചു

അലനല്ലൂർ: പാലിയേറ്റിവ് കെയർ യൂണിറ്റിന് ഓക്സിജൻ സിലിണ്ടർ റെഗുലേറ്റർ സമ്മാനിച്ച് അലനല്ലൂർ ഗവ. വെക്കേഷണൽ ഹയർസെക്കൻഡറി സ്കൂൾ വിഎച്ച്എസ്ഇ നാഷണൽ സർവീസ് സ്കീം വിദ്യാർഥികൾ. സ്കൂളിൽ മൂന്നുദിവസങ്ങളിലായി നടന്ന മണ്ണാർക്കാട് ഉപജില്ല സ്കൂൾ ഒളിമ്പിക്സിലെ ഫുഡ് കോർണറിൽ വീടുകളിലുണ്ടാക്കി കൊണ്ടുവന്ന പലഹാരങ്ങൾ വിറ്റുലഭിച്ച തുക ഉപയോഗിച്ചാണ് വിദ്യാർഥികൾ ഓക്സിജൻ സിലിണ്ടർ റെഗുലേറ്റർ വാങ്ങിയത്. സ്കൂളിൽ നടന്ന ചടങ്ങിൽ പാലിയേറ്റീവ് കെയർ ജനറൽ സെക്രട്ടറി കെ.പി. അഷ്റഫ് ഓക്സിജൻ സിലിണ്ടർ റെഗുലേറ്റർ ഏറ്റുവാങ്ങി. പ്രിൻസിപ്പൽ പി.കെ. ഉഷ, എൻഎസ്എസ് കോ- ഓർഡിനേറ്റർ എൻ. ഷാജി, അധ്യാപകരായ എം. സജ്‌ന, വി.ആർ. രതീഷ്, ടി. ഷംന, കെ. സൗമ്യ, കെ. പ്രകാശ്, വിദ്യാർഥികളായ പി. അഭിനന്ദ്, ടി. നിഹാൽ അഹമ്മദ്, എ. അനാം മുഹമ്മദ്, പി. അഷിൽ, സി.പി. സിയാൻ, പി.കെ. ഫിദാൻ, സി. മുഹമ്മദ് ലിയാൻ എന്നിവർ പങ്കെടുത്തു.

തൃത്താല മണ്ഡലത്തില്‍ 1.63 കോടിയുടെ മണ്ണ്, ജലസംരക്ഷണ പദ്ധതി ഉദ്ഘാടനം 25ന്

തൃത്താല: സുസ്ഥിര തൃത്താല പദ്ധതിയുടെ ഭാഗമായി 1.63 കോടി രൂപയുടെ പുതിയ മണ്ണ്, ജല സംരക്ഷണ പദ്ധതികള്‍ക്ക് മണ്ഡലത്തില്‍ തുടക്കമാകുന്നു. മണ്ണ് പര്യവേക്ഷണ സംരക്ഷണ വകുപ്പിന് 2025-26 സാമ്പത്തിക വര്‍ഷത്തില്‍ അനുവദിച്ച 1.63 കോടി രൂപയുടെ അഞ്ച് ചെറുനീര്‍ത്തട പദ്ധതികള്‍ക്കാണ് തുടക്കമാകുന്നത്. തൃത്താല ഗ്രാമപഞ്ചായത്തില്‍ ഉള്ളന്നൂര്‍ നീര്‍ത്തടത്തിലെ കണ്ണന്നൂര്‍ തോട് നവീകരണം, പട്ടിത്തറ ഗ്രാമപഞ്ചായത്തില്‍ പട്ടിശ്ശേരി നീര്‍ത്തടത്തിലെ ചേരാഞ്ചിറ തോട് നവീകരണം, ചാലിശേരി ഗ്രാമപഞ്ചായത്തില്‍ പട്ടിശേരി-2 നീര്‍ത്തടത്തിലെ പാലക്കല്‍ തോട് നവീകരണം, കപ്പൂര്‍ ഗ്രാമപഞ്ചായത്തില്‍ കുമരനെല്ലൂര്‍ നീര്‍ത്തടത്തിലെ പൂണൂല്‍കുളം നവീകരണം, പരുതൂര്‍ ഗ്രാമപഞ്ചായത്തില്‍ കാരമ്പത്തൂര്‍ നീര്‍ത്തടത്തിലെ ആര്‍ത്തിക്കുളം നവീകരണം എന്നീ പദ്ധതികള്‍ക്കാണ് ഈ സാമ്പത്തിക വര്‍ഷത്തില്‍ പുതിയതായി അനുമതി ലഭിച്ചിട്ടുള്ളത്. 2023- 24 സാമ്പത്തിക വര്‍ഷം മുതല്‍ അനുവദിച്ച പ്രത്യേക ബജറ്റ് വിഹിതം ഉപയോഗിച്ച് മണ്ഡലത്തില്‍ എട്ട് ചെറുനീര്‍ത്തടങ്ങളിലായി 1.88 കോടി രൂപ ചെലവഴിച്ച് മണ്ണ് ജല ജൈവസമ്പത്ത് സംരക്ഷണ പ്രവര്‍ത്തനങ്ങള്‍ പൂര്‍ത്തീകരിച്ചിട്ടുണ്ട്. ഇതിന്‍റെ തുടര്‍ച്ചയായാണ് പുതിയ പദ്ധതികള്‍ നടപ്പാക്കുന്നത്. പദ്ധതികളുടെ പ്രവര്‍ത്തനോദ്ഘാടനം മന്ത്രി എം.ബി. രാജേഷ് 25ന് ഉച്ചയ്ക്കുശേഷം മൂന്നിന് തൃത്താല ഗ്രാമപഞ്ചായത്ത് കമ്യൂണിറ്റി ഹാളില്‍ നിര്‍വഹിക്കും.തൃത്താല ഗ്രാമപഞ്ചായത്ത് പ്രസിഡന്‍റ് പി.കെ. ജയ അധ്യക്ഷയാകും.

അക്ഷയ കേന്ദ്രങ്ങളിൽ ജനം വലയുന്നു

വടക്കഞ്ചേരി: രേഖകൾ സംഘടിപ്പിക്കാൻ അക്ഷയകേന്ദ്രങ്ങൾ കയറിയിറങ്ങി ജനങ്ങൾ വലയുന്നു. ബന്ധപ്പെട്ട വകുപ്പ് ഓഫീസുകളെല്ലാം നോക്കുകുത്തിയാകുംവിധമാണ് നടപടിക്രമങ്ങളെല്ലാം. എന്തിനും ഏതിനും ഇപ്പോൾ അക്ഷയകേന്ദ്രത്തിൽ പോകണം. സർക്കാർ നടപടികൾ കൂടുതൽ സുതാര്യമാക്കി എന്ന് അവകാശപ്പെടുമ്പോഴാണ് ജനത്തിന് ദുരിതം മാത്രമാകുന്നത്. അപേക്ഷ നൽകിയാൽ പഞ്ചായത്ത് ഓഫീസിൽ നിന്നോ വില്ലേജ് ഓഫീസിൽനിന്നോ അപ്പോൾതന്നെ അനുവദിക്കാവുന്ന സർട്ടിഫിക്കറ്റുകൾക്കാണ് ജനങ്ങളെ ഇത്തരത്തിൽ വട്ടംകറങ്ങുന്നത്. ജോലികളഞ്ഞ് ദിവസംമുഴുവൻ പണം നഷ്ടവുമായി എന്തെങ്കിലും സർട്ടിഫിക്കറ്റ് തരപ്പെടുത്താൻ അക്ഷയ കേന്ദ്രത്തിൽ കാത്തുനിൽക്കേണ്ട ഗതികേടിലാണ് ജനങ്ങൾ. അഴിമതി ഇല്ലാതാക്കാനും കൈക്കൂലിക്കാരെ ഒഴിവാക്കാനുമാണ് ഓഫീസുകൾ സ്മാർട്ടാകുന്നതെന്ന് പറയുമ്പോൾ തങ്ങൾക്കുണ്ടാകുന്ന കഷ്ടപ്പാടുകൾ ആരും കാണുന്നില്ലെന്നാണ് അക്ഷയകേന്ദ്രങ്ങളിലെത്തുന്നവർ പറയുന്നത്. അക്ഷയകേന്ദ്രത്തിൽ പോയി രേഖകൾ അപ്‌ലോഡ് ചെയ്യുന്നതിൽ തെറ്റു വന്നാൽ പിന്നേയും എല്ലാം ആവർത്തിക്കണം. പ്ലസ് ടു കഴിഞ്ഞ് തുടർപഠനത്തിന് ഫീസാനുകൂല്യത്തിനും സ്കോളർഷിപ്പുകൾക്കുമെല്ലാം രേഖകൾ സംഘടിപ്പിക്കാൻ രക്ഷിതാക്കൾക്കും കുട്ടികൾക്കുമുണ്ടാകുന്ന കഷ്ടപ്പാടുകളും ചെറുതല്ല. പട്ടിയെ വളർത്താനും പെടാപ്പാട് വീടിനു ചുറ്റും സിസി ടിവി കാമറ സ്ഥാപിക്കാൻ പണമില്ലാത്തവർ മോഷ്ടാക്കളിൽനിന്നുള്ള സുരക്ഷയ്ക്കായി വീട്ടിൽ ഒരു നാടൻപട്ടിയെ വളർത്താമെന്നുവച്ചാൽ അതും ഇപ്പോൾ എളുപ്പമുള്ള കാര്യമല്ല. പട്ടിയെ വളർത്തുന്നതിനുള്ള ലൈസൻസിനായി അക്ഷയകേന്ദ്രത്തിൽ പോയി ലൈസൻസിന് അപേക്ഷിക്കണം. നേരത്തേ ഇതു പഞ്ചായത്തിൽനിന്ന് നേരിട്ടു നൽകിയിരുന്നതാണ്. ഇപ്പോൾ അതുമാറി. അക്ഷയകേന്ദ്രത്തിൽ പോകണം. പട്ടിയുടെ വയസ്, നിറം, തിരിച്ചറിയാനുള്ള അടയാളം, പട്ടിയുടെ പേര്, ആണോ പെണ്ണോ, പട്ടിയുടെ ഫോട്ടോ, വെറ്ററിനറി ഡോക്ടറുടെ സർട്ടിഫിക്കറ്റ് തുടങ്ങി സകലമാന വിവരങ്ങളും പട്ടിയെ വളർത്തുന്നതിനുള്ള ലൈസൻസിനായി നൽകണം. കെ- സ്മാർട്ടിന്‍റെ ഭാഗമായിട്ടാണത്രെ ഇതെല്ലാം. പേവിഷബധക്കെതിരെ പട്ടികൾക്കുള്ള കുത്തിവയ്പ്പ് സർക്കാർ വെറ്ററിനറി ആശുപത്രികളിൽ സൗജന്യമാണെന്ന് കരുതിയാലും തെറ്റി. ഇൻജക്്ഷൻ മരുന്ന് ഉൾപ്പെടെ എല്ലാം ആശുപത്രിക്കടുത്തുള്ള മെഡിക്കൽ ഷോപ്പുകളിൽ നിന്നും വാങ്ങണം. എല്ലാം വാങ്ങിക്കൊണ്ട് ചെന്നാൽ ഇൻജക്്ഷൻ ചെയ്തുതരും. ഈ സേവനം മാത്രമേ സൗജന്യമുള്ളു.വാഹനം വിളിച്ച് പട്ടിയെ ആശുപത്രിയിൽ എത്തിക്കുന്നതു മുതൽക്കുള്ള ചെലവുകളും ഭാരിച്ചതാണ്. ഇതൊക്കെ ചെയ്ത് ഒരു വർഷത്തേക്കുള്ള ലൈസൻസ് മാത്രമാണ് കിട്ടുക. അതുകഴിഞ്ഞാൽ വീണ്ടും ഈ പണികളെല്ലാം ആവർത്തിക്കണം.

പണിതിട്ടും പണിതിട്ടും പണിതീരാതെ വെള്ളപ്പനയിലെ ലൈഫ്മിഷൻ ഫ്ലാറ്റ്

തത്തമംഗലം: വെള്ളപ്പനയിൽ ലൈഫ്മിഷൻ ഫ്ലാറ്റ് നിർമാണം പൂർണതയിലെത്താൻ ഇനിയും വൈകും. വീടുകൾ ലഭിക്കാൻ അർഹതപ്പെട്ടവർ നിരാശയിൽ. ഏറെ വിവാദങ്ങൾക്കൊടുവിൽ നാലുവർഷം മുന്പാണ് നിർമാണം തുടങ്ങിയത്. സമയോചിതമായി ബിൽ പാസായില്ലെന്നു കാരണംപറഞ്ഞ് ആദ്യം നിർമാണ കരാറെടുത്ത ഏജൻസി ഒഴിഞ്ഞു. പിന്നീട് നിർമാണച്ചുമതല ഏറ്റെടുത്ത അടുത്ത കരാറുരൻ ഫ്ലാറ്റ് നിർമാണം അന്തിമഘട്ടത്തിലെത്തിച്ചെങ്കിലും ഇനിയും പൂർത്തീകരിക്കാൻ കഴിഞ്ഞിട്ടില്ല . ഈ സ്ഥലത്ത് താമസിച്ചിരുന്ന പത്തോളം കുടുംബങ്ങളെകുടി ഒഴിപ്പിച്ച് ഫ്ലാറ്റുകൾ ലഭിക്കുമെന്ന് വാഗ്ദാനം നൽകിയാണ് ഫ്ലാറ്റ് നിർമാണം രണ്ടു മന്ത്രിമാരെ ഉൾപ്പെടുത്തി ആഡംബര ഉദ്ഘാടനം നടത്തിയത്. കുടിയൊഴിപ്പിക്കപ്പെട്ടവർ വാസസ്ഥലമില്ലാതെ വാടകവീടുകളിൽ അഭയം തേടിയിരിക്കുകയാണ്. ഗുണഭോക്താക്കളിൽ മൂന്നുപേർ ഇതിനകം മരണപ്പെട്ടു. ഫ്ലാറ്റിൽ 41 കുടുംബങ്ങൾക്ക് വീടുകൾ, അങ്കണവാടി ഉൾപ്പെടെയുണ്ടാവുമെന്നാണ് ലൈഫ്മിഷൻ അധികൃതരുടെ വാഗ്ദാനം. ഇനിയും എത്രകാലം കാത്തിരിക്കണമെന്നതാണ് കുടികൊഴിപ്പിക്കപ്പെട്ടവരുടെ ആശങ്ക.

കുളത്തിൽ മരിച്ചനിലയിൽ

കൊല്ലങ്കോട് : എലവഞ്ചേരിയിൽ കുളിക്കാനിറങ്ങിയയാൾ കുളത്തിൽ മരിച്ചനിലയിൽ കണ്ടെത്തി. കരിങ്കുളം കിടങ്ങരക്കുന്ന് ഉണ്ണികൃഷ്ണൻ മകൻ ബാബു(50) ആണ് മരിച്ചത്. കുളിക്കാൻ പോയ ആൾ ഏറെ സമയമായിട്ടും തിരിച്ചെത്താതിനെ തുടർന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്. ജില്ലാ ആശുപത്രി മോർച്ചറിയിലെത്തിച്ച മൃതദേഹം ഇന്നു രാവിലെ പോസ്റ്റുമോർട്ടം നടത്തും. കൊല്ലങ്കോട് പോലീസ് മേൽനടപടി സ്വീകരിച്ചു. മരിച്ചയാൾക്ക് അപസ്മാരം ഉള്ളതായി കുടുംബക്കാർ പറഞ്ഞു. ഭാര്യ: സുജാത. മകൾ; വിവി, പ്രിൻസി, റിൻസി. മരുമകൻ: ജയപ്രസാദ്.

കിഴക്കഞ്ചേരി ആനയടിയൻപരുതയിലെ മുനിയറകൾ നശിപ്പിച്ച നിലയിൽ

വടക്കഞ്ചേരി: കിഴക്കഞ്ചേരി പഞ്ചായത്തിലെ കൊന്നക്കൽകടവ് ആനയടിയൻ പരുതയിൽ മഹാ ശിലായുഗ കാലഘട്ടത്തിലെ മനുഷ്യനിർമിതങ്ങളായ മുനിയറകൾ വ്യാപകമായി നശിപ്പിച്ചതായി പരാതി. 2500 വർഷങ്ങൾക്കു മുമ്പുള്ള ചരിത്ര സ്മാരകങ്ങളാണ് നശിപ്പിക്കപ്പെട്ടിട്ടുള്ളത്. ഇതു സംബന്ധിച്ച് പ്രദേശവാസിയായ ഹരിദാസൻ മംഗലംഡാം പോലീസിൽ പൊതുതാത്പര്യ പരാതി നൽകിയിട്ടുണ്ട്. പതിനേഴര ഏക്കർ വരുന്ന പാറപ്പുറമായ ഈ കുന്നിൻപ്പുറത്ത് ഇരുപതിലേറെ മുനിയറകളുടെ ശേഷിപ്പുകൾ ഉണ്ടായിരുന്നെന്നാണ് പറയപ്പെടുന്നത്. ഇതിൽ പൂർണതോതിലുണ്ടായിരുന്ന മുനിയറയാണ് കഴിഞ്ഞദിവസം തകർത്തത്. പ്രദേശത്തിന്‍റെ ചരിത്ര പ്രാധാന്യം കണക്കിലെടുത്ത് സംസ്ഥാന പുരാവസ്തു വകുപ്പും ചരിത്രഗവേഷകരും ചരിത്രപഠന വിദ്യാർഥികളുമെല്ലാം ഇടക്കിടെ എത്തുന്ന സ്ഥലത്തെ ചരിത്രശേഷിപ്പുകളാണ് ഇല്ലാതാക്കിയിട്ടുള്ളത്. സ്ഥലം ഏറ്റെടുക്കുന്നതുമായി ബന്ധപ്പെട്ട് പുരാവസ്തു വകുപ്പിന്‍റെ നടപടികൾ നടക്കുന്നതിനിടെയാണ് ഇത്തരത്തിൽ ചരിത്രശേഷിപ്പുകൾ നശിപ്പിക്കുന്ന സംഭവം ഉണ്ടാകുന്നത് എന്നതും ശ്രദ്ധേയമാണ്. ശിലായുഗ കാലഘട്ടത്തിൽ ഒന്നാംഘട്ട മൃത സംസ്കാര ചടങ്ങുകൾക്കു ശേഷം ശേഷിക്കുന്ന മൃതശരീരാവശിഷ്ടങ്ങൾ മൺകുടങ്ങളിലാക്കി ഇത്തരം മുറിയറകളിൽ സൂക്ഷിക്കാറുണ്ടെന്നാണ് ചരിത്ര ഗവേഷകർ കണ്ടെത്തിയിട്ടുള്ളത്. ഇതിനാൽ ഇത്തരം ശേഷിപ്പുകൾ നിലനിൽക്കേണ്ടതും ചരിത്രസംഭവങ്ങൾ പുതുതലമുറകൾക്ക് പാഠ്യ വിഷയമാക്കാനും ഏറെ ഉപകാരപ്പെടും. ഇതിനാൽ മുനിയറകൾ സംരക്ഷിക്കപ്പെടണമെന്ന ആവശ്യവും ശക്തമായിട്ടുണ്ട്. ചരിത്ര ഗവേഷകനും പട്ടാമ്പി ഗവൺമെന്‍റ് കോളജിലെ ചരിത്ര വിഭാഗം പ്രഫസറുമായ കെ. രാജൻ, വിദ്യാഭ്യാസ വകുപ്പിൽ നിന്നും റിട്ടയർ ചെയ്ത ഡെപ്യൂട്ടി ഡയറക്ടർ വി. രാമചന്ദ്രൻ എന്നിവർ ഇന്നലെ സ്ഥലത്തെത്തി പരിശോധന നടത്തി. ചരിത്രസ്മാരകങ്ങൾ ഇത്തരത്തിൽ തകർക്കപ്പെടുന്നത് ഗൗരവമായി കാണണമെന്നും ഇത്തരം പ്രവൃത്തികൾ ആവർത്തിക്കാതിരിക്കാൻ വേണ്ട നടപടികൾ ബന്ധപ്പെട്ടവർ സ്വീകരിക്കണമെന്നും പ്രഫ.കെ.രാജൻ പറഞ്ഞു. ഈ കുന്നിൻപ്പുറത്തു നിന്നുള്ള വിദൂരകാഴ്ചകളും അതിമനോഹരമാണ്. പാലക്കുഴി തിണ്ടില്ലം വെള്ളച്ചാട്ടത്തിന്‍റെ താഴെയാണ് ഈ പ്രദേശം. പാലക്കുഴി മലയിൽ പോത്തുമട ഭാഗത്തും ഇത്തരം പെരുംകല്ലറ എന്നറിയപ്പെടുന്ന മുനിയറകളുണ്ട്.

നോർക്ക പദ്ധതിയിൽ പങ്കാളിയായി ഒറ്റപ്പാലം കോ-ഓപ്പറേറ്റീവ് അർബൻ ബാങ്കും

ഒറ്റപ്പാലം: പ്രവാസികൾക്കായുള്ള നോർക്ക ഡിപ്പാർട്ട്മെന്‍റ് പ്രോജക്ട് ഫോർ റിട്ടേണ്‍ഡ് എമിഗ്രന്‍റ്സ് (എൻഡിപിആർഇഎം) പുനരധിവാസപദ്ധതിയിൽ പങ്കാളിയായി ഒറ്റപ്പാലം കോ-ഓപ്പറേറ്റീവ് അർബൻ ബാങ്ക് ലിമിറ്റഡ്. തിരുവനന്തപുരം തൈക്കാട് നോർക്ക സെന്‍ററിൽ നടന്ന ചടങ്ങിൽ നോർക്ക റൂട്ട്സിനു വേണ്ടി ചീഫ് എക്സിക്യൂട്ടീവ് ഓഫീസർ അജിത് കോളശേരിയും ഒറ്റപ്പാലം കോ-ഓപ്പറേറ്റീവ് അർബൻ ബാങ്കിനുവേണ്ടി മാനേജിംഗ് ഡയറക്ടർ ഡോ.എം. രാമനുണ്ണിയും തമ്മിൽ കരാർ കൈമാറി. ചടങ്ങിൽ നോർക്ക റൂട്ട്സ് ജനറൽ മാനേജർ ടി. രശ്മി, നോർക്ക റൂട്ട്സ് പ്രതിനിധികൾ എന്നിവരും സംബന്ധിച്ചു. മൂന്നു വർഷത്തേയ്ക്കാണ് കരാർ. ഇതിന്‍റെ ഭാഗമായി എൻഡിപിആർഇഎം പദ്ധതിയിലെ സേവനങ്ങൾ ഇനി ഒറ്റപ്പാലം കോ-ഓപ്പറേറ്റീവ് അർബൻ ബാങ്കിന്‍റെ ഒൻപതു ശാഖകളിൽ നിന്നും പ്രവാസിസംരംഭകർക്ക് ലഭ്യമാകും. തിരിച്ചെത്തിയ പ്രവാസികളുടെ പുനരധിവാസത്തിനായി സംസ്ഥാന സർക്കാർ നോർക്ക റൂട്ട്സ് വഴി നടപ്പിലാക്കിവരുന്ന സംരംഭക വായ്പാ പദ്ധതിയാണ് എൻഡിപിആർഇഎം. ഒറ്റപ്പാലം കോ-ഓപ്പറേറ്റീവ് അർബൻ ബാങ്ക് ഉൾപ്പെടെ സംസ്ഥാനത്തെ 17 ബാങ്കിംഗ്, ധനകാര്യസ്ഥാപനങ്ങൾ വഴിയാണ് പദ്ധതി നടപ്പിലാക്കിവരുന്നത്. രണ്ടു വർഷമെങ്കിലും വിദേശത്ത് ജോലി ചെയ്തു മടങ്ങിയെത്തിയ പ്രവാസി കൾക്ക് സംരംഭങ്ങൾ ആരംഭിക്കുന്നതിനും നിലവിലുളളവയുടെ വിപുലീകരണത്തിനും പദ്ധതി പ്രയോജനപ്പെടുത്താം. സംരംഭങ്ങൾക്ക് 30 ലക്ഷം രൂപവരെയുളള വായ്പകൾ പദ്ധതിവഴി ലഭിക്കും. കൃത്യമായ വായ്പാ തിരിച്ചടവിന് 15 ശതമാനം മൂലധന സബ്സിഡിയും മുന്നു ശതമാനം പലിശ സബ്സിഡിയും ലഭിക്കും. നോർക്ക റൂട്ട്സിന്‍റെ വെബ്സൈറ്റു വഴി അപേക്ഷ നൽകാം.

ചിറ്റൂരിലെ വികസനപദ്ധതികൾക്കു പിന്തുണ നൽകും: മന്ത്രി മുഹമ്മദ് റിയാസ്

ചിറ്റൂർ: നിയോജക മണ്ഡലത്തിലെ വികസനപദ്ധതികൾക്ക് എല്ലാ പിന്തുണയും നൽകുമെന്ന് പൊതുമരാമത്ത് ടൂറിസം വകുപ്പ് മന്ത്രി പി.എ. മുഹമ്മദ് റിയാസ്. വിളയോടി-വേന്പ്ര-പാട്ടികുളം റോഡ് ബിഎം ആൻഡ് ആർസി നിലവാരത്തിലേക്കുയർത്തുന്നതിന്‍റെ നിർമാണ ഉദ്ഘാടനം, പാലക്കാട്-തത്തമംഗലം-പൊള്ളാച്ചി റോഡിൽ വണ്ടിത്താവളം ഡ്രൈനേജ് ഒന്നാംഘട്ട പൂർത്തീകരണ ഉദ്ഘാടനവും രണ്ടാംഘട്ട നിർമാണ ഉദ്ഘാടനവും ഓണ്‍ലൈനായി നിർവഹിച്ച് പ്രസംഗിക്കുകയായിരുന്നു മന്ത്രി. ചിറ്റൂർ ഗ്രാമീണ അന്തരിക്ഷത്തിന്‍റെ മുഖഛായ മാറ്റുന്ന പദ്ധതികളാണ് സർക്കാർ നടപ്പാക്കിയതെന്നും മന്ത്രി കൂട്ടിച്ചേർത്തു. വിളയോടി ജംഗ്ഷനിൽ നടന്ന പരിപാടിയിൽ വൈദ്യുതി വകുപ്പ് മന്ത്രി കെ. കൃഷ്ണൻകുട്ടി അധ്യക്ഷത വഹിച്ചു. പൊതുമരാമത്ത് വകുപ്പ് നിരത്ത് ഉപവിഭാഗം അസിസ്റ്റന്‍റ് എക്സിക്യൂട്ടീവ് എൻജിനീയർ സുബൈർ അലി റിപ്പോർട്ട് അവതരിപ്പിച്ചു. ജില്ലാ പഞ്ചായത്ത് മെംബർ മാധുരി പത്മനാഭൻ, പെരുമാട്ടി ഗ്രാമപഞ്ചായത്ത് പ്രസിഡന്‍റ് ഷീബാ രാധകൃഷ്ണൻ, കെഎസ്ഇബി സ്വതന്ത്ര ഡയറക്ടർ അഡ്വ. മുരുകദാസ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ കെ. സുരേഷ്, മറ്റു മെംബർമാർ എന്നിവർ പങ്കെടുത്തു.

താനൂർ ബോട്ടപകടം; ജസ്റ്റിസ് മോഹനൻ കമ്മീഷൻ തെളിവെടുപ്പ് നടത്തി

പാലക്കാട്: താനൂർ ബോട്ടപകടവുമായി ബന്ധപ്പെട്ട് നിയമിക്കപ്പെട്ട ജസ്റ്റിസ് വി.കെ. മോഹനൻ ജുഡീഷ്യൽ കമീഷൻ സംസ്ഥാന വ്യാപകമായി നടത്തുന്ന രണ്ടാംഘട്ട പൊതുതെളിവെടുപ്പും ഹിയറിംഗും ജില്ലയിൽ നടന്നു. ജസ്റ്റിസ് വി.കെ. മോഹനൻ അധ്യക്ഷനായി. വിനോദസഞ്ചാരം, ഉൾനാടൻ ജലഗതാഗതം, മത്സ്യബന്ധനം തുടങ്ങിയ വിഷയങ്ങളിലാണ് തെളിവെടുപ്പ് നടന്നത്. ജലഗതാഗത മേഖലയിൽ ഇത്തരം അപകടങ്ങൾ ആവർത്തിക്കാതിരിക്കാൻ പരിഹാരമാർഗങ്ങൾ ശുപാർശ ചെയ്യുക, നിലവിലുള്ള ലൈസൻസിംഗ് എൻഫോഴ്സ്മെന്‍റ് സംവിധാനങ്ങൾ പര്യാപ്തമാണോയെന്ന് പരിശോധിക്കുക, മുൻകാലങ്ങളിലുണ്ടായ ബോട്ടപകടങ്ങളെ തുടർന്ന് നിയോഗിച്ച അന്വേഷണ കമ്മീഷനുകൾ സമർപ്പിച്ച റിപ്പോർട്ടുകളിൽ വകുപ്പുകൾ സ്വീകരിച്ച നടപടികൾ അവലോകനം ചെയ്യുക തുടങ്ങിയ ലക്ഷ്യങ്ങളോടെയാണ് തെളിവെടുപ്പ് നടക്കുന്നത്. വിവിധ വകുപ്പ് ഉദ്യോഗസ്ഥർ, പൊതുജനങ്ങൾ, വിവിധ സംഘടനാ പ്രതിനിധികൾ എന്നിവർ അഭിപ്രായങ്ങളും നിർദേശങ്ങളും സമർപ്പിച്ചു. കളക്ടറേറ്റ് കോണ്‍ഫറൻസ് ഹാളിൽ നടന്ന തെളിവെടുപ്പിൽ കമ്മീഷൻ അംഗവും കുസാറ്റ് ഷിപ്പ് ബിൽഡിംഗ് ടെക്നോളജി വിഭാഗം റിട്ട. പ്രഫസറുമായ ഡോ. കെ.പി. നാരായണൻ ആമുഖപ്രഭാഷണം നടത്തി. കമ്മീഷൻ മെംബർ സെക്രട്ടറി റിട്ട. ജില്ലാ ജഡ്ജി ടി.കെ. രമേഷ് കുമാർ, കോർട്ട് ഓഫീസർ റിട്ട. മജിസ്ട്രേറ്റ് ജി. ചന്ദ്രശേഖരൻ, കമ്മീഷൻ അഭിഭാഷകൻ അഡ്വ.ടി.പി. രമേശ് എന്നിവർ പങ്കെടുത്തു.

റോഡിന്‍റെ സംരക്ഷണഭിത്തി തകർന്നു

കണ്ടമംഗലം: ചോലയിൽകുളമ്പ് റോഡിന്‍റെ സംരക്ഷണഭിത്തി തകർന്നു. ഇലവുങ്കൽ ജോസ്, ചള്ളപ്പുറത്ത് പ്രഭാകരൻ എന്നിവരുടെ വീടിന്‍റെ മുറ്റത്തേക്കാണ് കഴിഞ്ഞദിവസം രാത്രി സംരക്ഷണഭിത്തി തകർന്നു വീണത്. 10 അടിയോളം ഉയരമുള്ള സംരക്ഷണഭിത്തിയാണ് തകർന്നുവീണത്. ഇതോടെ ഈവഴിയുള്ള ഗതാഗതം മുടങ്ങി. സമീപപ്രദേശങ്ങളിലുള്ള വീടുകളുടെ മുമ്പിലും സമാനരീതിയിലാണ് റോഡിന്‍റെ സംരക്ഷണഭിത്തിയുള്ളത്. പ്രദേശത്ത് മഴ കനത്ത് പെയ്യുന്നതിനാൽ ഈ സംരക്ഷണഭിത്തിയും തകർന്നു വീഴുമോ എന്ന ആശങ്കയിലാണ് നാട്ടുകാർ. രാത്രി 12 മണിയോടെയാണ് ഭിത്തി തകർന്നുവീണത്. അതിനാൽ ദുരന്തമൊഴിവായി. പകൽസമയങ്ങളിൽ കുട്ടികൾ മുറ്റത്താണ് കളിക്കാറുള്ളതെന്ന് ജോസ് ഭീതിയോടെ പറഞ്ഞു. കോട്ടോപ്പാടം ഗ്രാമപഞ്ചായത്ത് അധികൃതരെ വിവരമറിയിച്ചു. സംരക്ഷണഭിത്തി പുനർനിർമിക്കുന്നതിനാവശ്യമായ നടപടി സ്വീകരിക്കുമെന്ന് പഞ്ചായത്ത് അധികൃതർ നാട്ടുകാർക്ക് ഉറപ്പ് നൽകി.

മാലിന്യച്ചാക്കുകൾ ഗ്രാമപഞ്ചായത്ത് ഓഫീസിൽ കൊണ്ടുവന്നിട്ട്് പഞ്ചായത്തംഗം പ്രതിഷേധിച്ചു

മലമ്പുഴ: ഹരിതകർമസേനാ അംഗങ്ങൾ വീടുകളിൽനിന്നും അമ്പതുരൂപ വാങ്ങി മാലിന്യങ്ങൾ ശേഖരിച്ചത് വഴിയോരങ്ങളിൽ കൂട്ടിയിട്ട് ആഴ്ചകൾ കഴിഞ്ഞിട്ടും മാറ്റാത്തതിൽ പ്രതിഷേധിച്ച് പഞ്ചായത്തംഗം മാധവദാസ് ഈ മാലിന്യചാക്കുകൾ ഓട്ടോറിക്ഷയിൽ കയറ്റി മലമ്പുഴ ഗ്രാമപഞ്ചായത്ത് ഓഫീസിലെ കവാടത്തിൽ കൊണ്ടുവന്നിട്ട് പ്രതിഷേധിച്ചു. മാധവദാസ് തന്നെയാണ് പെട്ടി ഓട്ടോയിൽ കയറ്റിയതും ഓട്ടോ ഓടിച്ച് കൊണ്ടുവന്നതും. പഞ്ചായത്ത് സെക്രട്ടറിയെ വിളിച്ചറിയിച്ചപ്പോൾ മോശമായ സംസാരമാണ് ഫോണിലൂടെ ഉണ്ടായതെന്നും മാധവദാസ് പറഞ്ഞു.

ഷൊർണൂർ നഗരത്തിലെ അപകടകരമായ കുഴികളടയ്ക്കാൻ 10 ലക്ഷം അനുവദിച്ചു

ഷൊർണൂർ: വാരിക്കുഴികളടയ്ക്കാൻ 10 ലക്ഷം. ഷൊർണൂർ നഗരത്തിലെ അപകടകരമായ കുഴികളടക്കാനാണ് പൊതുമരാമത്ത് വകുപ്പ് 10 ലക്ഷം രൂപ അനുവദിച്ചത്. പട്ടണത്തിലെയും നഗരസഭയ്ക്കു മുമ്പിലെയുമുൾപ്പെടെയുള്ള സ്ഥലങ്ങളിലെ കുഴിയടക്കാനാണ് തുക അനുവദിച്ചത്. ബസ് സ്റ്റാൻഡിന്‍റെ മുൻവശം, കോ-ഓപ്പറേറ്റീവ് ബാങ്കിനു സമീപം, കോൺവന്‍റിനു മുൻവശം, നഗരസഭയ്ക്കുസമീപം എന്നിവിടങ്ങളിലാണ് വലിയ കുഴികളുള്ളത്. 10 ലക്ഷം രൂപയുടെ പ്രവൃത്തികളുടെ ദർഘാസ് ക്ഷണിക്കുമെന്ന് പൊതുമരാമത്ത് വകുപ്പ് എൻജിനീയർ അറിയിച്ചു. പി. മമ്മിക്കുട്ടി എംഎൽഎയുടെ നിർദേശപ്രകാരമാണ് 10 ലക്ഷം രൂപകൂടി അനുവദിച്ചത്. കുളപ്പുള്ളി മുതൽ കുളഞ്ചീരിക്കുളംവരെയുള്ള പ്രദേശങ്ങളിലെ കുഴിയടക്കാൻ 25 ലക്ഷം രൂപ അനുവദിച്ചിരുന്നു. എന്നാൽ പട്ടണത്തിലെ കുഴിയടച്ചിരുന്നില്ല. വലിയ കുഴികളാണിവിടെയുള്ളത്. കുളപ്പുള്ളിമുതൽ ഷൊർണൂർ ടൗൺചുറ്റി റെയിൽവേ സ്റ്റേഷനുമുൻമ്പിലൂടെ എസ്എംപി കവലയിലെത്തുന്ന പാതയുടെ പണി കരാറുകാരൻ ഉപേക്ഷിച്ചതോടെ താത്കാലിക അറ്റകുറ്റപ്പണികൾ നടത്തുന്നുണ്ട്. പാതിവഴിയിലായ പണി പുനരാരംഭിക്കാനുള്ള നടപടികളും പൊതുമരാമത്ത് വകുപ്പ് ആരംഭിച്ചിട്ടുണ്ട്. നിലവിലെ കരാറുകാർക്ക് തന്നെ പ്രവൃത്തികൾ നൽകാൻ മാത്രമാണ് നിലവിലെ വ്യവസ്ഥ. കരാർപ്രകാരമുള്ള വ്യവസ്ഥകൾ ലംഘിച്ചാൽ നിയമനടപടിയെടുക്കുകയും അവരുടെ ചെലവിലും ഉത്തരവാദിത്വത്തിലും പണി പൂർത്തിയാക്കണമെന്നുമാണു നിബന്ധന. ഇതനുസരിച്ചുള്ള നടപടികളും ആരംഭിക്കുകയാണ്. പട്ടാമ്പി ഐപിടിവരെയുള്ള പാതയുടെ പണി കുളപ്പുള്ളിവരെയാക്കി നീട്ടിയതിനാൽ കുളപ്പുള്ളി ടൗൺമുതൽ കണയംറോഡ് ജംഗ്ഷൻവരെയുള്ള പാതയുടെ പണി ഷൊർണൂരിലെ കരാറുകാരനിൽനിന്ന് ഒഴിവാക്കും. ഇതോടെ പഴയ കരാറുകാർക്ക് പണി ഏറ്റെടുക്കാനാവുമോ എന്നും പരിശോധിക്കുന്നുണ്ട് . നഗരത്തിൽ അപകടകരമായി തീർന്ന കുഴികളടക്കണമെന്ന് വ്യാപകമായി ആവശ്യമുയുർന്നിരുന്നു.

വയലിൽ ഞാറുപാകിയതിനു പച്ചപ്പുതപ്പിട്ടത് കൗതുകകാഴ്ച

പുതുനഗരം: പന്നിശല്യം കാരണം ഞാറു സംരക്ഷിക്കാൻ ചുറ്റും മറയുണ്ടാക്കിയത് കൗതുകകാഴ്ച. രാത്രി സമയങ്ങിലെത്തുന്ന പന്നികളെ തുരത്താൻ പഠിച്ച പണിയെല്ലാം പയറ്റിയിട്ടും ലക്ഷ്യം കാണാതെ കർഷകർ ദുരിതത്തിലാണ്. മുൻപ് വയലുകളിൽ ചാളകെട്ടി കാവൽ തൊഴിലാളികളെ ഏർപ്പെടുത്തുന്ന സമ്പ്രദായം നിലവിലുണ്ടായിരുന്നു . രാത്രിസമയങ്ങളിൽ പടക്കം പൊട്ടിച്ച് ശബ്ദം മുണ്ടാക്കിയാണ് വന്യമൃഗത്തെ തിരിച്ചോടിക്കുന്നത്. എന്നാൽ കാലക്രമത്തിൽ കാവൽക്കാരെ ലഭിക്കാതെ വന്നപ്പോൾ ഈ ശ്രമം കർഷകർ ഒഴിവാക്കുകയായിരുന്നു. ശല്യക്കാരായ പന്നികളെ ഒഴിവാക്കാൻ വെടിവെച്ചുകൊല്ലാൻ പഞ്ചായത്തുകൾക്ക് വനംവകുപ്പ് അനുമതി നൽകിയിട്ടും ഇത് നടപ്പിലാക്കുന്നതിൽ വീഴ്ച ഉണ്ടാവുന്നതായ ആരോപണവും ബലപ്പെട്ടിരിക്കുകയാണ്. ഞാറു പാകുന്നതു മുതൽ കൊയ്ത്തു തുടങ്ങുന്നതുവരെയും പന്നിവിളയാട്ടം ഒഴിയാബാധയാവുന്നതിനു കൃഷി, വനംവകുപ്പുകൾ സംയുക്തനടപടികൾ സ്വീകരിക്കേണ്ടത് അനിവാര്യമായിരിക്കുകയാണ്.

നെല്ലുസംഭരണം നീളുന്നതിൽ കർഷകർക്ക് ആശങ്കയേറുന്നു

വണ്ടിത്താവളം: നെല്ലുസംഭരണം നീളുന്നതിനാൽ കൊയ്തെടുത്ത നെല്ല് ചാക്കിലാക്കി വീട്ടുമുറ്റത്ത് നിരത്തി കർഷകർ. ഇടയ്ക്കിടെ മഴ പെയ്യുന്നതിനാൽ കളപ്പുരകളില്ലാത്ത കർഷകർ വീടിനകത്ത് ഉപയോഗിച്ചുവരുന്ന മുറിയിൽ സാധനങ്ങൾ മാറ്റി നെല്ലുചാക്കുകൾ സൂക്ഷിച്ചിരിക്കുകയാണ്. അയ്യൻവീട്ടുചള്ള പാടശേഖരസമിതിയിൽ 50ൽപ്പരം കർഷകരിൽ ഇരുപതിൽപ്പരം കർഷകരുടെ കൊയ്ത്ത് കഴിഞ്ഞിരിക്കുകയാണ്. മഴയും തണുത്ത കാലാവസ്ഥയും കാരണം നെല്ലിലെ ഈർപ്പം മാറ്റാൻ ഒന്നിലധികം തവണ വെയിലിൽ നിരത്തിയാണ് ചാക്കിൽ നിറച്ചിരിക്കുന്നത്. സർക്കാർ മില്ലുകാർക്ക് നെല്ലുസംഭരണത്തിനുള്ള നിർദേശം നൽകിയിട്ടില്ലെന്നാണ് കർഷകർ ആരോപിക്കുന്നത്. അയ്യപ്പൻചള്ള കർഷകൻ കാശുവിന്‍റെ 80 ചാക്ക് നെല്ല് വീട്ടിലെ മുറിക്കത്തും സ്ഥലയില്ലാത്തതിനാൽ മറ്റുള്ളവ വരാന്തയിലുമാണ് സൂക്ഷിച്ചിരിക്കുന്നത്. നെല്ല് സംഭരണം എന്ന് തുടങ്ങുമെന്നറിയാനെ കർഷകൻ ആശങ്കയിലാണ്. താലൂക്കിൽ ഇടക്കിടെ ചാറ്റൽമഴ‍യും മൂടിക്കെട്ടിയ അന്തരീക്ഷവുമെന്നതിനാൽ നെല്ലിന് ഈർപ്പം ഉണ്ടാവുമോ എന്നതിലും കർഷകർ അങ്കലാപ്പിലാണ്.

യുവക്ഷേത്ര കോളജിൽ കൊമേഴ്സ് അസോസിയേഷൻ ഉദ്ഘാടനം

മുണ്ടൂർ: യുവക്ഷേത്ര കോളജ് കോമേഴ്സ് അസോസിയേഷൻ പാലക്കാട് മാനേജ്മെന്‍റ് അസോസിയേഷൻ പ്രസിഡന്‍റ് സി.എ. വിമൽ വേണു ഉദ്ഘാടനം ചെയ്തു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ അധ്യക്ഷനായിരുന്നു ഡയറക്ടർ റവ.ഡോ. മാത്യു ജോർജ് വാഴയിൽ മുഖ്യപ്രഭാഷണം നിർവഹിച്ചു. അസിസ്റ്റന്‍റ് ഡയറക്ടറും ട്രെയിനിംഗ് ആൻഡ് പ്ലേസ്മെന്‍റ് ഓഫീസറുമായ റവ.ഡോ. ലിനോ സ്റ്റീഫൻ ഇമ്മട്ടി ആശംസകളർപ്പിച്ചു. കലാകായിക മത്സരങ്ങളിൽ മികച്ച പ്രകടനം കാഴ്ചവച്ച വിദ്യാർഥികളെ മൊമെന്‍റോ നൽകി ആദരിച്ചു. കൊമേഴ്സ് വിഭാഗം മേധാവി ഡോ.എം.എസ്. കീർത്തി സ്വാഗതവും അസോസിയേഷൻ സെക്രട്ടറി ആൽബിൻ എസ്. ടോമി നന്ദിയും പറഞ്ഞു. തുടർന്ന് നടന്ന മോട്ടിവേഷൻ സെമിനാറിൽ സി.എ. വിമൽ വേണു ക്ലാസ് എടുത്തു. വിദ്യാർഥികളുടെ വിവിധ കലാപരിപാടികളും ഉണ്ടായിരുന്നു.

കാട്ടാനശല്യം രൂക്ഷം; വ്യാപകകൃഷിനാശം

കല്ലടിക്കോട്: മലയോരമേഖലയിലെ ജനവാസമേഖലയിൽ കാട്ടാന ഒരാഴ്ചത്തോളമായി നിത്യസന്ദശകനായി. കല്ലടിക്കോട് ചക്കാംതൊടി, കളപ്പാറ, മുട്ടിയൻകാട് എന്നി പ്രദേശങ്ങളിലാണ് കാട്ടാന സ്ഥിരം കൃഷിനാശം വിതക്കുന്നത്. സ്ഥിരമായി രാത്രി പന്ത്രണ്ടു മണിയോടെ ഇറങ്ങുന്ന ആന നേരം പുലരുന്നവരെ ഉണ്ടാകാറുണ്ട്. വ്യാഴാഴ്ച ഇറങ്ങിയ ആന പാങ്ങ്, കല്ലംതോട്, അയ്യപ്പൻകോട്ട ഭാഗത്ത് എത്തി തെങ്ങ്, കവുങ്ങ് വാഴ എന്നിവയെല്ലാം നശിപ്പിച്ചു. ചവിട്ടിമറിച്ച തെങ്ങ് മുകളിലൂടെ വീണ് ഒരുകുടുംബ ക്ഷേത്രത്തിന്‍റെ വശവും തകർന്നു. കളപ്പാറയിൽ മോഹനന്‍റെ തെങ്ങുകൾ, കവുങ്ങ് തൈകൾ, വാഴകൾ ചുങ്കം അമ്മാളുകുട്ടിയുടെ 500 ലധികം കവുങ്ങുകൾ എന്നിവയെല്ലാം കാട്ടാന നശിപ്പിച്ചു.

ലോഗോ പ്രകാശനംചെയ്തു

മണ്ണാർക്കാട്: നവംബർ 1, 3, 4, 5 തിയതികളിൽ കെടിഎം സ്കൂൾ, എഎൽപി സ്കൂൾ, ജിഎംയുപി സ്കൂൾ എന്നിവിടങ്ങളിൽ നടക്കുന്ന മണ്ണാർക്കാട് ഉപജില്ല സ്കൂൾ കലോത്സവത്തിന്‍റെ ലോഗോ പ്രകാശനം ചെയ്തു. മണ്ണാർക്കാട് മുൻസിപ്പൽ ചെയർമാൻ സി. മുഹമ്മദ് ബഷീർ ഉപജില്ലാ വിദ്യഭ്യാസ ഓഫിസർ സി. അബുബക്കറിന് നൽകിയാണ് പ്രകാശനം ചെയ്തത്. ഈ വർഷം വിദ്യാർഥികളിൽ നിന്നാണ് ലോഗോ ക്ഷണിച്ചത്. എംഇടി സ്കൂളിലെ അദിനവ് കെ. അശോക് തയ്യാറാക്കിയ ലോഗോയാണ് കലോത്സവത്തിന് വേണ്ടി ഉപയോഗിക്കുന്നത്. വൈസ് ചെയർപേഴ്സൺ കെ. പ്രസീത, ജനറൽ കൺവീനർ എ.കെ. മനോജ് കുമാർ, അക്കാദമിക് കൗൺസിൽ കൺവീനർ എസ്.ആർ. ഹബീബുള്ള , പ്രധാന അധ്യാപകരായ സി. മിനി ജോൺ, സി. നാരായണൻ, പ്രചരണ കമ്മിറ്റി കൺവീനർ പി. ജയരാജ് തുടങ്ങിയവർ പങ്കെടുത്തു.

ദീപാവലി അവധി: ബസ് സ്റ്റാൻഡുകളിലും റെയിൽവേ സ്റ്റേഷനുകളിലും വൻതിരക്ക്

കോയന്പത്തൂർ: ദീപാവലി അവധി പ്രമാണിച്ച് ബസ് സ്റ്റാൻഡുകളിലും റെയിൽവേ സ്റ്റേഷനുകളിലും വൻ തിരക്ക്. സിസി ടിവി കാമറകളും ഡ്രോണുകളും ഉപയോഗിച്ച് പോലീസ് നിരീക്ഷണം ശക്തമാക്കി. ദീപാവലിക്ക് രണ്ട് ദിവസം മാത്രം ശേഷിക്കെ മറ്റ് ജില്ലകളിൽ നിന്നും സംസ്ഥാനങ്ങളിൽ നിന്നും കോയമ്പത്തൂരിൽ ജോലി ചെയ്യുന്ന ആളുകൾ സ്വന്തം നാട്ടിലേക്ക് മടങ്ങാൻ ബസ് സ്റ്റാൻഡിലേക്കും റെയിൽവേ സ്റ്റേഷനിലേക്കും ഒഴുകിയെത്തുകയാണ്. കോയമ്പത്തൂർ റെയിൽവേ സ്റ്റേഷനിൽ തിരക്ക് കൂടിയതിനാൽ റെയിൽവേ പോലീസ് കൂടുതൽ ഉദ്യോഗസ്ഥരെ നിയമിക്കുകയും സുരക്ഷാ നടപടികൾ ശക്തമാക്കുകയും ചെയ്തിട്ടുണ്ട്. റെയിൽവേ സ്റ്റേഷനിലുടനീളം നിരീക്ഷണ കാമറകൾ വഴി ആളുകളുടെയും യാത്രക്കാരുടെയും നീക്കം സൂക്ഷ്മമായി നിരീക്ഷിക്കുന്നുണ്ട്. യാത്രക്കാർ അവരുടെ സാധനങ്ങൾ സുരക്ഷിതമായി സൂക്ഷിക്കണമെന്നും അജ്ഞാതർക്ക് സാധനങ്ങൾ കൈമാറരുതെന്നും റെയിൽവേ പോലീസ് നിർദേശം നൽകി.

കല്ലഞ്ചിറ റോഡ് തകർന്ന് അപകടഭീഷണി

തത്തമംഗലം: ചെന്തമാര -കല്ലഞ്ചിറ റോഡ് തകർന്ന് വാഹനസഞ്ചാരം അപകടഭീതിയിൽ. കഴിഞ്ഞവർഷം ഗർത്തത്തിൽ ഇടിച്ചിറങ്ങി വീണ് ബൈക്ക് യാത്രികൻ ഗുരുതരമായ പരിക്കുപറ്റിയതുൾപ്പെടെ നിരവധി അപകടങ്ങൾ നടന്നിട്ടുണ്ട്. തത്തമംഗലത്ത് നിന്നും പെരുവെമ്പ് ഭാഗത്തേക്ക് പോകുന്നതിന് ദൂരക്കുറവുള്ള ബൈപ്പാസ് എന്നതിനാൽ കൂടുതൽ വാഹന സഞ്ചാരമുള്ള പാതയാണിത്. ചരക്കുലോറികളും മറ്റു വലിയ വാഹനങ്ങളും കുഴികളിലിടിച്ചിറങ്ങി ലീഫുകൾ ഒടിഞ്ഞും മറ്റു തരാറുണ്ടായി വഴിയിലകപ്പെടുന്നതും പതിവായിരിക്കുകയാണ്. ഒരു മാസംമുന്പ് നാട്ടുകാർ ശ്രമദാനത്തിലൂടെമണ്ണിട്ട് കുഴികൾ അടച്ചതും ഇക്കഴിഞ്ഞ ദിവസങ്ങളിലുണ്ടായ മഴയിൽ ഒഴുകിപ്പോയി . വാഹനങ്ങൾ സഞ്ചരിക്കുമ്പോൾ റോഡിൽ പരന്നുകിടക്കുന്ന കല്ലുകൾ വ്യാപാരസ്ഥാപനങ്ങളിലേക്കും കാൽനടയാത്രക്കാരുടെ ദേഹത്തും വീഴാറുണ്ട്. പത്ത് വർഷം മുന്പ് നിർമിച്ച റോഡ് തകർന്നത് നവീകരിക്കണമെന്ന് ആവശ്യപ്പെട്ട് നാട്ടുകാർ പൊതുമരാമത്ത് അധികൃതർക്ക് പരാതി നൽകിയിരിക്കുകയാണ്.

ആലത്തൂരിൽ ബാങ്കേഴ്സ് മീറ്റ് നടത്തി

ആലത്തൂർ: കേരള സർക്കാർ വാണിജ്യ വ്യവസായ വകുപ്പ്, ജില്ലാ വ്യവസായ കേന്ദ്രം, ആലത്തൂർ താലൂക്ക് വ്യവസായ ഓഫീസ് എന്നിവയുടെ സംയുക്താഭിമുഖ്യത്തിൽ ബാങ്കേഴ്സ് മീറ്റ് സംഘടിപ്പിച്ചു. പരിപാടിയുടെ ഉദ്ഘാടനം ലീഡ് ഡിസ്ട്രിക് മാനേജർ പി.ടി. അനിൽകുമാർ നിർവഹിച്ചു. ബാങ്കുകൾ നയിക്കുന്ന വിവിധ ക്ലാസുകൾ, സംരംഭകർക്ക് ആവശ്യമായ ഹെൽപ്പ് ഡെസ്ക്, ഉദ്യം രജിസ്ട്രേഷൻ, കെ-സ്വിഫ്റ്റ് മുതലായ ലൈസൻസ് എടുക്കുന്നതിനും അവസരം ഒരുക്കുക എന്നിവയാണ് ബാങ്കേഴ്സ് മീറ്റിലൂടെ നടത്തിയത്. പരിപാടിയിൽ ജില്ലാ വ്യവസായ കേന്ദ്രം മാനേജർ കെ.രാജൻ, ആലത്തൂർ താലൂക്ക് വ്യവസായ ഓഫീസ് എഡിഐഒ സജ്ജാദ് ബഷീർ, കുഴൽമന്ദം ബ്ലോക്ക് ഐഇ ഒ.പി. ദീപ, ആലത്തൂർ ബ്ലോക്ക് വ്യവസായ വികസന ഓഫീസർ കെ.വി. രാഹുൽ വിജയ്, വിവിധ പഞ്ചായത്തിലെ ബിസിനസ് ഡെവലപ്മെന്‍റ് സർവീസ് പ്രൊവൈഡർമാർ, ആലത്തൂർ താലൂക്ക് പരിധിയിലെ വിവിധ ബാങ്ക് പ്രതിനിധികൾ, ബാങ്ക് മാനേജർമാർ, വിവിധ ഉദ്യോഗസ്ഥർ എന്നിവർ പങ്കെടുത്തു.

ഭവനപദ്ധതി: സംഘാടകസമിതി യോഗം ചേര്‍ന്നു

പാലക്കാട്: സംസ്ഥാന ഭാഗ്യക്കുറിയുടെ ലൈഫ് വിഷു ബംബര്‍ 2021 ഭാഗ്യക്കുറിയുടെ ലാഭവിഹിതം ഉപയോഗിച്ച് ക്ഷേമനിധി ബോര്‍ഡിലെ ഭവനരഹിത അംഗങ്ങള്‍ക്കായി നല്‍കുന്ന ഭവന നിര്‍മാണപദ്ധതിയുടെ നിര്‍മാണോദ്ഘാടനം 28 ന് ധനകാര്യവകുപ്പ് മന്ത്രി കെ.എന്‍. ബാലഗോപാല്‍ നിര്‍വഹിക്കും. ഇതിനോടനുബന്ധിച്ച് സംഘാടകസമിതി ചേര്‍ന്നു. യോഗം ഭാഗ്യക്കുറി ബോര്‍ഡ് ചെയര്‍മാന്‍ ടി.ബി. സുബൈര്‍ നിര്‍വഹിച്ചു. യോഗത്തില്‍ ചെയര്‍പേഴ്‌സണ്‍, ചെയര്‍മാന്‍ തുടങ്ങി 100 അംഗ കമ്മിറ്റിയാണ് രൂപീകരിച്ചത്. യോഗത്തില്‍ ട്രേഡ് യൂണിയന്‍ നേതാക്കാളായ അഡ്വ. തോലന്നൂര്‍ ശശിധരന്‍, സി. ബാബു, അമര്‍നാഥ്, മധുസൂദനന്‍, ഇബ്രാഹിം, ഭാഗ്യക്കുറി ഏജന്‍റുമാരായ പി.എ. സന്തോഷ്, വീരാന്‍ സാഹിബ്, മധുസൂദനന്‍, ജയ്‌സണ്‍, ശരവണന്‍, സുരേഷ്, കാജാഹുസൈന്‍, ഭുവനേഷ് എന്നിവരും പങ്കെടുത്തു.

യന്ത്രവാടകനിരക്ക് വർധിപ്പിക്കണം

കൊഴിഞ്ഞാമ്പാറ: കേരളകൺസ്ട്രക്ഷൻ എക്യുപ്മെന്‍റ്സ് ഓണേഴ്സ് അസോസിയേഷൻ മേഖല സമ്മേളനവും മണ്ണുമാന്തിയന്ത്രവാഹന റാലിയും നടത്തി. സംസ്ഥാന ജനറൽ സെക്രട്ടറി ഷമീർ ബാബു ഉദ്ഘാടനം ചെയ്തു. മേഖല പ്രസിഡന്‍റ് ഷാജി അധ്യക്ഷത വാഹിച്ചു. ജില്ലാ പ്രസിഡന്‍റ് വിജയകുമാർ ,ജോയിന്‍റ് സെക്രട്ടറി റഷീദ്, ഷാജി കുര്യൻ എന്നിവർ പ്രസംഗിച്ചു. വാഹന റാലിയിൽ 30 ജെസിബി ഉൾപ്പെടെ മറ്റു നിർമാണ യന്ത്രങ്ങളും അണി നിരത്തി. ജെസിബി വാടക 1600 രൂപയും ഹിറ്റാച്ചിക്കു 1400 രൂപയും നിരക്കിൽ വാടക ഉയർത്തണമെന്നും ആവശ്യം ഉന്നയിച്ചു.

കുടുംബമേള നടത്തി

മണ്ണാർക്കാട്: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ മണ്ണാർക്കാട് യൂണിറ്റ് കുടുംബമേള നടത്തി. ദേശീയ ചലച്ചിത്ര പുരസ്കാര ജേതാവ് പി. മോഹൻദാസ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് സി. രാമചന്ദ്രൻ അധ്യക്ഷനായി. സെക്രട്ടറി പി. രാമചന്ദ്രൻ, ജില്ല കമ്മിറ്റി അംഗങ്ങളായ കെ. മോഹൻദാസ്, അംബുജാക്ഷി, ബ്ലോക്ക് ജോയിന്‍റ് സെക്രട്ടറി പി.എ. ഹസ്സൻ മുഹമ്മദ്, ട്രഷറർ ടി. സദാനന്ദൻ തുടങ്ങിയവർ പ്രസംഗിച്ചു. ദേശീയ ചലച്ചിത്ര പുരസ്കാര ജേതാവ് പി. മോഹൻദാസനെ ആദരിച്ചു. തുടർന്ന് കലാവിരുന്നും ഉണ്ടായിരുന്നു.

അധ്യാപകരുടെ സാമൂഹിക ഉത്തരവാദിത്വം വലുത്: വനിതാ കമ്മീഷൻ

പാലക്കാട്: അധ്യാപകരുടെ സാമൂഹിക ഉത്തരവാദിത്വം വളരെ വലുതാണെന്ന് വനിതാകമ്മീഷൻ അംഗം വി.ആർ. മഹിളാമണി. ജില്ലാ പഞ്ചായത്ത്ഹാളിൽ വനിതാ കമ്മീഷൻ അദാലത്തിന് ശേഷം സംസാരിക്കുകയായിരുന്നു അവർ. അറിവ് പകരുക എന്നതിലുപരി വിദ്യാർഥികളുടെ വ്യക്തിഗത കഴിവുകൾ തിരിച്ചറിഞ്ഞ് അവരുടെ സമഗ്രവളർച്ചയ്ക്ക് വഴിയൊരുക്കേണ്ട ചുമതല അധ്യാപകർക്കുണ്ട്. അധ്യാപകർ കക്ഷികളായിട്ടുള്ള പരാതികൾ കമ്മീഷന് മുന്നിൽ വരുന്പോൾ കുട്ടികളുടെ പഠനസമയം നഷ്ടപ്പെടുത്താൻ കാരണമാകും. ഇത്തരം വിഷയങ്ങൾ കഴിവതും ഒത്തുതീർപ്പാക്കേണ്ടതും കുട്ടികളുടെ വിദ്യാഭ്യാസം തടസപ്പെടുത്തുന്ന സാഹചര്യം ഒഴിവാക്കേണ്ടതുമാണ്. വിദ്യാലയങ്ങളുടെ ഭൗതികസാഹചര്യങ്ങൾ മെച്ചപ്പെടുത്തുന്ന കാര്യങ്ങളിൽ മാത്രം സ്കൂൾ മാനേജ്മെന്‍റുകൾ ശ്രദ്ധ കേന്ദ്രീകരിച്ചാൽ മതിയാകുമെന്നും കമ്മീഷൻ കൂട്ടിച്ചേർത്തു. 43 കേസുകളാണ് അദാലത്തിൽ പരിഗണിച്ചത്. ഇതിൽ ഏഴ് കേസുകൾ തീർപ്പാക്കി. 24 കേസുകൾ അടുത്ത സിറ്റിംഗിൽ പരിഗണിക്കും. അഡ്വ. ഷീബ, ഫാമിലി കൗണ്‍സിലർമാരായ ഡിന്പിൾ, സ്റ്റെഫി, വിമണ്‍സെൽ ഓഫീസർമാരായ യാസ്മിന ബാനു, അനിത പങ്കെടുത്തു.

പോപ്പുലർ ഫിനാൻസ് തട്ടിപ്പ്: സ്വത്തുക്കൾ ജപ്തിചെയ്ത് ജില്ലാ കളക്ടറുടെ ഉത്തരവ്

പാലക്കാട്: ബഡ്സ് നിയമം 2019 പ്രകാരം പോപ്പുലർ ഫിനാൻസ് കന്പനി ലിമിറ്റഡിന്‍റെയും കുറ്റാരോപിതരുടെയും പേരിലുള്ള സ്വത്തുക്കൾ താത്കാലികമായി കണ്ടുകെട്ടി ജില്ലാ കളക്ടറും അസിസ്റ്റന്‍റ് കോംപീറ്റന്‍റ് അഥോറിറ്റിയുമായ എം.എസ്. മാധവിക്കുട്ടി ഉത്തരവിട്ടു. സ്ഥാപനത്തിന്‍റെ ജില്ലയിലെ പാലക്കാട്, മണ്ണാർക്കാട് എന്നീ താലൂക്കുകളിലെ ബ്രാഞ്ചുകളിൽ നിന്നാണ് സ്വത്തുക്കൾ കണ്ടുകെട്ടിയിട്ടുള്ളത്. പൊതുജനങ്ങൾക്ക് അമിതപലിശ വാഗ്ദാനം ചെയ്ത് നിക്ഷേപം സ്വീകരിക്കുകയും, കാലാവധി കഴിഞ്ഞിട്ടും മുതലോ പലിശയോ വാഗ്ദാനം ചെയ്തിട്ടുള്ള തുകയോ നിക്ഷേപകർക്ക് നൽകാതെ കബളിപ്പിച്ചതായുള്ള പരാതികളിലാണ് നടപടി സ്വീകരിച്ചിരിക്കുന്നത്. പല ജില്ലകളിലെയും വിവിധ പോലീസ് സ്റ്റേഷനുകളിൽ സ്ഥാപനത്തിനെതിരെ കേസുകൾ ഫയൽ ചെയ്തിട്ടുണ്ട്. സ്ഥാപനത്തിന്‍റെ ബ്രാഞ്ചുകൾ അടച്ചുപൂട്ടാനും സ്ഥാപനത്തിന്‍റെ- കുറ്റാരോപിതരുടെ പേരിലുള്ള സ്ഥാവര ജംഗമ വസ്തുക്കൾ കണ്ടുകെട്ടുന്നതിനും ഗവണ്‍മെന്‍റ് സെക്രട്ടറി നേരത്തെ നിർദേശം നൽകിയിരുന്നു. ഇതിന്‍റെ അടിസ്ഥാനത്തിലാണ് ജില്ലാ കളക്ടറുടെ ഉത്തരവ്.

നീതി എല്ലാ സമുദായങ്ങൾക്കും ഒരുപോലെ നൽകണം: മാർ പീറ്റർ കൊച്ചുപുരയ്ക്കൽ

മണ്ണാർക്കാട്: നീതി എന്ന അവകാശം എല്ലാ സമുദായങ്ങളിലേക്കും ഒരുപോലെ ഒഴുകി ഇറങ്ങാൻ നേതൃത്വം കൊടുത്തില്ലെങ്കിൽ അങ്ങനെയുള്ള ഭരണകൂടങ്ങളുടേത് ദുർഭരണമാണെന്ന് ബിഷപ് മാർ പീറ്റർ കൊച്ചുപുരയ്ക്കൽ പറഞ്ഞു. കത്തോലിക്ക കോൺഗ്രസിന്‍റെ അവകാശ സംരക്ഷണയാത്രയ്ക്ക്് മണ്ണാർക്കാട് നൽകിയ സ്വീകരണ പൊതുസമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പി.ആർ. രാജീവ് കൊച്ചുപറമ്പിലിന്‍റെ നേതൃത്വത്തിൽ "നീതി ഔദാര്യമല്ല അവകാശമാണ്’ എന്ന മുദ്രാവാക്യം ഉയർത്തി കാസർകോഡ് മുതൽ തിരുവനന്തപുരം വരെ നടത്തുന്ന അവകാശസംരക്ഷണയാത്രയ്ക്കാണ് ഇന്നലെ രാവിലെ 9.30 ന് മണ്ണാർക്കാട് കുടു കോംപ്ലക്സ് മൈതാനിയിൽ സ്വീകരണം നൽകിയത്. മണ്ണാർക്കാട് ഹോളി ട്രിനിറ്റി ഫൊറോന വികാരി ഫാ. രാജു പുളിക്കത്താഴെ, കത്തോലിക്ക കോൺഗ്രസ് രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, ജോസുകുട്ടി ഒഴുകയിൽ, രൂപത പ്രസിഡന്‍റ് അഡ്വ. ബോബി പൂവത്തുങ്കൽ, ഗ്ലോബൽ വൈസ് പ്രസിഡന്‍റ് തോമസ് ആന്‍റണി, ജനറൽ സെക്രട്ടറി ആന്‍റണി കുറ്റിക്കാടൻ, ഫാ. ബിജു കല്ലിങ്കൽ, കൺവീനർ ഷിബു കാട്ട്റുകുടിയിൽ എന്നിവർ പ്രസംഗിച്ചു. ജില്ലയുടെ വിവിധ ഭാഗങ്ങളിൽ നിന്നുള്ള കത്തോലിക്ക കോൺഗ്രസ് പ്രവർത്തകർ പരിപാടിയിൽ പങ്കെടുത്തു.

അവകാശസംരക്ഷണയാത്രയ്ക്ക് വടക്കഞ്ചേരിയിൽ സ്വീകരണം

വടക്കഞ്ചേരി: വിവിധ ആവശ്യങ്ങൾ ഉന്നയിച്ച് കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ നയിക്കുന്ന അവകാശസംരക്ഷണയാത്രയ്ക്ക് ജില്ലയുടെ സമാപനകേന്ദ്രമായ വടക്കഞ്ചേരിയിൽ ഉജ്വലസ്വീകരണം. മേഖലയിലെ വിവിധ യൂണിറ്റുകളിൽനിന്നായി സ്ത്രീകൾ ഉൾപ്പെടെ നിരവധി പ്രവർത്തകർ സ്വീകരണ പരിപാടികളിൽ പങ്കെടുത്തു. മന്ദത്തുനടന്ന സ്വീകരണസമ്മേളനം മംഗലംഡാം സെന്‍റ് സേവിയേഴ്സ് ഫൊറോന വികാരി ഫാ. സുമേഷ് നാൽപതാംകളം ഉദ്ഘാടനം ചെയ്തു. സർക്കാരുകൾ ചെയ്യേണ്ട കാര്യങ്ങൾ ചെയ്യാതെ ജനങ്ങളെ സമരത്തിനു തള്ളിവിട്ട് ഉത്പാദന സമയം പാഴാക്കുന്ന തലതിരിഞ്ഞ ഭരണസംവിധാനമാണ് നാട്ടിൽ നിലനിൽക്കുന്നതെന്ന് ഫാ. സുമേഷ് നാൽപതാംകളം പറഞ്ഞു. ജനങ്ങൾ പണിപ്പെട്ടു ഉണ്ടാക്കുന്ന രേഖകളിൽ ഒപ്പിടുന്ന ഉദ്യോഗസ്ഥർക്ക് ശമ്പളവും ജനത്തിന് ശകാരവുമാണ് ഇപ്പോൾ ലഭിക്കുന്നത്. വനാതിർത്തികളിൽ കൃഷിചെയ്ത് അതിൽ നിന്നുള്ള വരുമാനം കൊണ്ട് വനംവകുപ്പ് ജീവനക്കാർക്ക് ശമ്പളം കണ്ടെത്തുന്ന സംവിധാനം ഉണ്ടായാൽ പിന്നെ വന്യമൃഗശല്യം നാട്ടിലുണ്ടാകില്ല. കാട്ടുമൃഗങ്ങളെയെല്ലാം നാട്ടിലിറക്കി കർഷകരെ ഓടിക്കാനുള്ള തന്ത്രങ്ങളാണ് കൈയിലെങ്കിൽ ആ കടലാസ് പല ആവർത്തി മടക്കി പോക്കറ്റിൽ വച്ചാൽ മതിയെന്ന് ഫാ.സുമേഷ് നാൽപതാംകളം രാഷ്ട്രീയ നേതൃത്വങ്ങളെ ഓർമിപ്പിച്ചു. രൂപത വൈസ് പ്രസിഡന്‍റ് ജോസ് വടക്കേക്കര അധ്യക്ഷത വഹിച്ചു. ഗ്ലോബൽ ഡയറക്ടർ ഫാ.ഫിലിപ്പ് കവിയിൽ, ഗ്ലോബൽ സെക്രട്ടറിമാരായ പ്രഫ.ജോസുകുട്ടി ഒഴുകയിൽ, ഡെന്നി തെങ്ങുംപിള്ളി, രൂപത പ്രസിഡന്‍റ് അഡ്വ.ബോബി ബാസ്റ്റിൻ, ഫാ. സജി വട്ടുകളത്തിൽ, ഫാ. റെജി പെരുമ്പിള്ളിൽ, രൂപത ജനറൽ സെക്രട്ടറി ആന്‍റണി കുറ്റിക്കാടൻ, രൂപത മുൻ പ്രസിഡന്‍റ് തോമസ് ആന്‍റണി, ട്രീസ ലിസ് സെബാസ്റ്റ്യൻ, ബെന്നി ആന്‍റണി, ജിനി ജോസഫ്, ജിജോ അറയ്ക്കൽ, വിൽസൺ കൊള്ളന്നൂർ, ബെന്നി മറ്റപ്പള്ളിൽ, ദീപ ബൈജു, ടെന്നി തുറുവേലിൽ തുടങ്ങിയവർ പ്രസംഗിച്ചു.

കേരളത്തിലെ എല്ലാ റേഷൻ കടകളും കെ-സ്റ്റോർ ആക്കും: മന്ത്രി അനിൽ

അഗളി: കേരളത്തിലെ എല്ലാ റേഷൻകടകളും കെ-സ്റ്റോർ ആക്കുമെന്ന് മന്ത്രി ജി.ആർ . അനിൽ. ഭക്ഷ്യധാന്യങ്ങൾമാത്രം ലഭ്യമാക്കുന്നതിലുപരി മറ്റ് സേവനങ്ങൾ ലഭിക്കുന്ന ഇടമായി റേഷൻ കടകൾ മാറുമെന്നും മന്ത്രി പറഞ്ഞു. അട്ടപ്പാടി താലൂക്ക് സപ്ലൈ ഓഫീസിന്‍റെയും മുത്തിക്കുളം, ശിങ്കപ്പാറ, തടിക്കുണ്ട്, കിണറ്റുക്കര, മുരുഗള എന്നീ ഉന്നതികളിലേക്കുള്ള സഞ്ചരിക്കുന്ന റേഷൻ കടകളുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. സർക്കാരിന്‍റെ പൊതുമേഖല സ്ഥാപനങ്ങളിൽ നിന്നുള്ള കൂടുതൽ ഉത്പന്നങ്ങൾ കൂടി കെ സ്റ്റോറുകളിൽ ലഭ്യമാക്കും. അട്ടപ്പാടിയിൽ നിലവിൽ രണ്ടുമാസത്തിൽ ഒരിക്കൽ ലഭ്യമാവുന്ന സഞ്ചരിക്കുന്ന മാവേലി സ്റ്റോറുകളുടെ സേവനം മാസത്തിലൊരിക്കലാക്കുമെന്നും മന്ത്രി പറഞ്ഞു. അട്ടപ്പാടിയിൽ എല്ലാമേഖലയിലും ഘട്ടംഘട്ടമായുള്ള വികസനങ്ങൾ യാഥാർഥ്യമാക്കുക എന്നതാണ് സർക്കാരിന്‍റെ ലക്ഷ്യം. മുൻഗണന കാർഡിനുള്ള അപേക്ഷകൾ വേഗത്തിൽ പരിഗണിക്കുന്നുണ്ട്. ജനങ്ങളുമായുള്ള അകലം കുറക്കുകയാണ് സർക്കാരിന്‍റെ ലക്ഷ്യമെന്നും മന്ത്രി പറഞ്ഞു. അട്ടപ്പാടി താലൂക്കിൽ ആകെ 21550 റേഷൻ കാർഡുകളിലായി 64103 ഗുണഭോക്താക്കൾക്ക് 500 മെട്രിക് ടണ്‍ ഭക്ഷ്യധാന്യങ്ങളാണ് വിതരണംചെയ്യുന്നത്. നിലവിൽ ആനവായി, മേലെതുടുക്കി, താഴെ തുടുക്കി, ഗലസി, കടുകമണ്ണ എന്നീ ഉന്നതികളിൽ 132 കുടുംബങ്ങൾക്ക് സഞ്ചരിക്കുന്ന റേഷൻകട വഴി ഭക്ഷ്യധാന്യം ലഭിക്കുന്നുണ്ട്. ഇതിന് പുറമെ 114 കുടുംബങ്ങൾക്ക് കൂടി പുതിയ സഞ്ചരിക്കുന്ന റേഷൻകടയുടെ പ്രയോജനം ലഭിക്കുമെന്നും മന്ത്രി കൂട്ടിച്ചേർത്തു. അഗളി ഇഎംഎസ് ഓഡിറ്റോറിയത്തിൽ നടന്ന പരിപാടിയിൽ അഡ്വ.എൻ. ഷംസുദീൻ എംഎൽഎ അധ്യക്ഷനായി. അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ, വൈസ് പ്രസിഡന്‍റ് കെ.കെ. മാത്യു, കെ. ഹിമ, അംബിക ലക്ഷ്മണൻ, പി. രാമമൂർത്തി, ജ്യോതി അനിൽകുമാർ, എ.എസ്. ബീന, ബി. ജ്യോതി കൃഷ്ണ തുടങ്ങിയവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]