ADVERTISEMENT

ADVERTISEMENT

കഞ്ചാവുമായി യുവാവ് പിടിയിൽ

ചെങ്ങന്നൂർ: എക്സൈസ് നടത്തുന്ന ഓപ്പറേഷൻ ക്ലീൻ സ്ലേറ്റ് സ്പെഷൽ ഡ്രൈവിന്‍റെ ഭാഗമായി ചെങ്ങന്നൂരിൽ ഒന്നേകാൽ കിലോ കഞ്ചാവുമായി ഒരാൾ പിടിയിലായി.

ചെങ്ങന്നൂർ എക്സൈസ് റേഞ്ച് പാർട്ടി നടത്തിയ വാഹന പരിശോധനയിലാണ് കഞ്ചാവ് കണ്ടെടുത്തത്. ചെങ്ങന്നൂർ താലൂക്കിൽ പാണ്ടനാട് വില്ലേജിൽ പണ്ടനാട് പടിഞ്ഞാറ് മുറിയിൽ ഒത്തന്‍റെ കുന്നിൽവീട്ടിൽ അനു (42) ആണ് പിടിയിലായത്. പാണ്ടനാട് ഇല്ലിമല പാലത്തിനു സമീപം ബൈക്കിൽ ചില്ലറ വിൽപ്പനയ്ക്കായി കൊണ്ടുപോവുകയായിരുന്ന കഞ്ചാവാണ് എക്സൈസ് സംഘം പിടികൂടിയത്.

മുൻപും മയക്കുമരുന്ന്, ക്രിമിനൽ കേസുകളിൽ പ്രതിയായ ഇയാൾ എക്സൈസ് സംഘത്തിന്‍റെ നിരീക്ഷണത്തിലായിരുന്നു. ചെങ്ങന്നൂർ റേഞ്ച് ഇൻസ്‌പെക്ടർ വി. സജീവിന്‍റെ നേതൃത്വത്തിലുള്ള എക്സൈസ് സംഘമാണ് പ്രതിയെ പിടികൂടിയത്.

പട്രോളിംഗ് പാർട്ടിയിൽ അസി.എക്സൈസ് ഇൻസ്‌പെക്ടർമാരായ ജോഷി ജോൺ, ബിജു പ്രകാശ്, കെ. അനി, പ്രിവന്‍റീവ് ഓഫീസർ (ഗ്രേഡ്) മാരായ അബ്ദുൾ റഫീഖ്, എസ്കെ. ആഷ്‌വിൻ, സിവിൽ എ ക്സൈസ് ഓഫീസർമാരായ രാജേഷ്, അജീഷ്കു മാർ, ശ്രീരാജ്, ജി. പ്രവീൺ, വനിത സിവിൽ എക്സൈസ് ഓഫീസർ വി. ജയലക്ഷ്മി എന്നിവരും പങ്കെടുത്തു.

കഴിഞ്ഞദിവസം ബംഗളൂരൂവിൽനിന്ന് ചെങ്ങന്നൂരിൽ വില്പനയ്ക്കെത്തിച്ച രാസലഹരിയും എക്സൈസ് സംഘം പിടികൂടിയിരുന്നു.

ADVERTISEMENT

ചിരട്ടയാണ് ഇപ്പോൾ താരം ദേവരാജൻ പൂച്ചാക്കൽ

പൂച്ചാക്കൽ: തേങ്ങയെടുത്ത് കഴിഞ്ഞാൽ അടുപ്പിലേക്കും പറമ്പിലേക്കും ചിരട്ട വലിച്ചെറിഞ്ഞ കാലമൊക്കെ കഴിഞ്ഞു. വിലയുടെ കാര്യത്തിൽ ചിരട്ട ഇപ്പോൾ മുന്നിലാണ്. ചിരട്ട നമ്മളിൽനിന്നു കൈവിട്ടുപോകുന്ന ലക്ഷണമാണ് കാണുന്നത്. കാരണം ഇപ്പോൾ ചിരട്ടയ്ക്ക് പൊന്നും വിലയാണ്. ഒരു കിലോ ചിരട്ടയുടെ വില കേട്ടാൽ ഞെട്ടും. കിലോ 40 രൂപയ്ക്കാണ് മൊത്ത കച്ചവടക്കാർ ചെറുകിട കച്ചവടക്കാരിൽനിന്ന് ചിരട്ട സംഭരിക്കുന്നത്. ഒരുകിലോ ചിരട്ടയ്ക്ക് നാട്ടിൻപുറത്തെ ആക്രിക്കടകളിൽ 20 രൂപ മുതൽ വില ലഭിക്കുന്നുണ്ട്. പാലക്കാട്ടുനിന്നു തമിഴ്നാട്ടിൽനിന്നുമെത്തുന്ന മൊത്തക്കച്ചവടക്കാരാണ് ഇത് സംഭരിച്ച് കൊണ്ടുപോകുന്നത്. പൂച്ചാക്കൽ, അരൂക്കുറ്റി ഭാഗത്തെ ആക്രിക്കടകളിൽനിന്ന് ഒരുമാസം നാല് ലോഡ് ചിരട്ടവരെ കയറ്റി അയയ്ക്കുന്നുണ്ട്. തമിഴ്നാട്ടിൽ ചിരട്ടക്കരി ഉത്പാദിപ്പിക്കുന്ന നിരവധി കമ്പനികളുണ്ട്. സൗന്ദര്യവർധക വസ്തുക്കളുടെ നിർമാണത്തിന് ഇത് ഒരു ഘടകമാണ്. ഇതിനു പുറമേ പഴച്ചാർ, പഞ്ചസാര, വെള്ളം എന്നിവ ശുദ്ധീകരിക്കുന്നതിന് ചിരട്ടക്കരി ഉപയോഗിക്കാറുണ്ട്. കൗതുകവസ്തുവായി ഓൺലൈനിൽ വാങ്ങാൻ ലഭിക്കുന്ന പോളിഷ് ചെയ്ത രണ്ടു ചിരട്ടകൾക്ക് 500 രൂപയാണ് വില. ചിരട്ടയ്ക്ക് ഇത്രയും വില ആദ്യമായിട്ടാണെന്ന് 25 വർഷമായി തേങ്ങ, ചിരട്ട വിൽപ്പന നടത്തുന്ന പാണാവള്ളി സ്വദേശി ലോറൻസ് ചേട്ടൻ പറയുന്നു.

കേരള യൂത്ത് ഫ്രണ്ട്-എം തീരദേശ സംരക്ഷണ ജാഥ ജില്ലയിൽ പര്യടനം പൂർത്തിയാക്കി

ആലപ്പുഴ: കേരള യൂത്ത്ഫ്രണ്ട്-എം സംസ്ഥാന പ്രസിഡന്‍റ് സിറിയക് ചാഴികാടൻ നയിക്കുന്ന തീരദേശ സംരക്ഷണ ജാഥയുടെ ജില്ലയിലെ പര്യടനം പൂർത്തിയാക്കി. ആലപ്പുഴ ജില്ലയിലെ വലിയഴീക്കലിൽ നടന്ന ജില്ലയിലെ പര്യടനത്തിന്‍റെ സമാപനസമ്മേളനം ജോബ് മൈക്കിൾ എംഎൽഎ ഉദ്ഘാടനം ചെയ്തു. കർഷകത്തൊഴിലാളികളുടെ പാർട്ടിയായ കേരള കോൺഗ്രസിന് മാത്രമേ സാധാരണക്കാരായ മത്സ്യത്തൊഴിലാളികളുടെ പ്രശ്‌നങ്ങൾ പരിഹരിക്കാൻ ഇത്തരത്തിൽ ഇടപെടാൻ നടത്താൻ സാധിക്കൂ എന്ന് ജോബ് മൈക്കിൾ എംഎൽഎ പറഞ്ഞു. കേരളത്തിലെ ഏറ്റവും വലിയ തൊഴിലാളി ശൃംഖലയാണ് മത്സ്യത്തൊഴിലാളികൾ. കേരളത്തിന്‍റെ തീരദേശത്തെ മാത്രം ആശ്രയിച്ചാണ് ഇവർ ജീവിക്കുന്നത്. ഇവരുടെ ജീവിതം ഇല്ലാതാക്കാൻ ആരു ശ്രമിച്ചാലും കേരള കോൺഗ്രസും യൂത്ത് ഫ്രണ്ടും പോരാട്ടത്തിനായി മുന്നിലുണ്ടാകുമെന്നും അദ്ദേഹം പറഞ്ഞു. സമാപനസമ്മേളത്തിൽ കേരള യൂത്ത്ഫ്രണ്ട്-എം ജില്ലാ പ്രസിഡന്‍റ് വർഗീസ് ആന്‍റണി അധ്യക്ഷത വഹിച്ചു. കേരള കോൺഗ്രസ്-എം സംസ്ഥാന ഉന്നതാധികാര സമിതി അംഗം ജെന്നിംഗ്സ് ജേക്കബ്, സംസ്ഥാന സ്റ്റിയറിംഗ് കമ്മിറ്റി അംഗങ്ങളായ അഡ്വ. ജോസഫ് ജോൺ, സാജൻ തൊടുക, ജില്ലാ ജനറൽ സെക്രട്ടറി തോമസ് ഫിലിപ്പോസ്, ഷേയ്ക്ക് അബ്ദുള്ള തുടങ്ങിയവർ പ്രസംഗിച്ചു.

നിയന്ത്രണം തെറ്റിയ കാർ വൈദ്യുതിത്തൂണിൽ ഇടിച്ചുതകർന്നു

ചേര്‍ത്തല: നിയന്ത്രണം തെറ്റിയ കാർ വൈദ്യുതിത്തൂണിലിടിച്ച്‌ തകർന്നു. കുറുപ്പംകുളങ്ങര-കണിച്ചുകുളങ്ങര റോഡിൽ അരിപ്പറമ്പിൽ പഞ്ചായത്ത്‌ ഓഫീസിനു സമീപം ബുധനാഴ്ച പുലർച്ചെ മൂന്നോടെയാണ് അപകടമുണ്ടായത്‌. ചെത്തി സ്വദേശി ജോസഫിന്‍റെ ഉടമസ്ഥതയിലെ കാറാണ് അപകടത്തിൽപ്പെട്ടത്‌. ഇദ്ദേഹത്തിന്‍റെ ഭാര്യയും രണ്ടു കുട്ടികളും അർത്തുങ്കൽ സ്വദേശിയായ ഡ്രൈവറുമാണ് കാറിലുണ്ടായിരുന്നത്‌. രാത്രിയില്‍ തിയറ്ററിൽ സിനിമ കണ്ടു മടങ്ങുമ്പോഴാണ് അപകടം. ഡ്രൈവര്‍ ഉറങ്ങിപ്പോയതാണ് അപകടത്തിനു കാരണമെന്ന് കരുതുന്നു. പഞ്ചായത്ത്‌ ഓഫീസിനു വടക്കുഭാഗത്തെ വളവുതിരിയാതെ എതിർവശത്തേക്കു കയറിയ കാർ റോഡിൽനിന്ന്‌ ഇറങ്ങി സമീപത്തെ കടയുടെ ചെറുഭാഗം തകർത്തു മുന്നോട്ടുനീങ്ങി വൈദ്യുതിത്തൂണിലിടിച്ച്‌ നില്‍ക്കുകയായിരുന്നു. തൂണൊടിഞ്ഞതിനാൽ അരീപ്പറമ്പ്‌ ഭാഗത്ത്‌ വൈദ്യുതിവിതരണം മുടങ്ങി. കാറിന്‍റെ മുൻഭാഗം തകർന്നു. കാറിലുണ്ടായിരുന്നവർ പരിക്കുകളില്ലാതെ തലനാരിഴയ്‌ക്ക്‌ രക്ഷപ്പെട്ടു. കെഎസ്‌ഇബി 22,000 രൂപ നഷ്ടപരിഹാരമായി ഈടാക്കി.

നൂറനാട് മേഖലയിൽ കർഷകർ ആശങ്കയിൽ

ചാരുംമൂട്: കർഷകരുടെ ഉറക്കം കെടുത്തി കാട്ടുപന്നി ശല്യത്തിനു പിന്നാലെ നൂറനാട് മേഖലയിൽ മുള്ളൻപന്നി ശല്യവും വ്യാപകമായി. പന്നിശല്യം കൊണ്ട് പൊറുതിമുട്ടിയ കർഷകരും നാട്ടുകാരും നൊട്ടോട്ടം ഓടുന്നതിനിടയിലാണ് നൂറനാട്-പാലമേൽ പഞ്ചായത്തു പ്രദേശങ്ങളിൽ മുള്ളൻപന്നി ശല്യവും രൂക്ഷമായിരിക്കുന്നത്. മറ്റപ്പള്ളി, മുതുകാട്ടുകര, തത്തംമുന്ന, ഇടക്കുന്നം ഭാഗങ്ങളിലെ കനാൽ പ്രദേശങ്ങളിലാണ് മുള്ളൻപന്നികളുടെ സാന്നിധ്യമുള്ളത്. രാത്രികാലങ്ങളിൽ ഒറ്റയ്ക്കു സഞ്ചരിക്കുന്ന മുള്ളൻപന്നികളെ തെരുവുനായ്ക്കൾ കൂട്ടം കൂടി ആക്രമിക്കുന്നതും പതിവായി. മുള്ള് നായ്ക്കളുടെ ശരീരത്തിലേക്ക് ആഴത്തിൽ ഇറക്കിയാണ് മുള്ളൻപന്നികൾ രക്ഷപ്പെടുന്നത്. കഴിഞ്ഞദിവസം ഇടക്കുന്നം സ്വദേശി വി. രാജേന്ദ്രന്‍റെ വീടിനു മുന്നിൽ മുള്ള് ആഴത്തിൽ തറച്ചുകയറിയ തെരുവുനായയെ അവശനിലയിൽ കണ്ടെത്തി. മാവേലിക്കര സ്വദേശിയും മൃഗസംരക്ഷകനുമായ ദീപുവിനെ വിവരം അറിയിച്ചതിനെത്തുടർന്ന് അദ്ദേഹം സ്ഥലത്തെത്തി നായയെ രക്ഷപ്പെടുത്തി. ഏതാനും ദിവസം മുമ്പ് സമാനമായ സംഭവം ചെട്ടികുളങ്ങര ദേവീക്ഷേത്രത്തിനു മുന്നിലെ ആലിന് സമീപം നടന്നതായി ദീപു പറഞ്ഞു. കാട്ടുപന്നികളും തെരുവുനായ്ക്കളും മനുഷ്യർക്ക് ഉപദ്രവകാരികളായി മാറിയിട്ടും സർക്കാരിന്‍റെ ഭാഗത്തുനിന്ന് യാതൊരു നടപടിയും ഇല്ലാതെ ജനം വലയുമ്പോഴാണ് മുള്ളൻപന്നികളും നാട്ടിൽ ശല്യമായി തീരുന്നത്. കാടുപിടിച്ച കെഐപി കനാലുകളാണ് ഇവയുടെയെല്ലാം താവളമെന്നാണ് നാട്ടുകാർ പറയുന്നത്.

ചര്‍ച്ചാ വേദി സാഹിത്യ ക്യാമ്പ് 10ന്

എടത്വ: തലവടി ചര്‍ച്ചാ വേദിയുടെ മൂന്നാമത് സാഹിത്യ ക്യാമ്പും ചര്‍ച്ചാ വേദി സംസ്ഥാനതലത്തില്‍ നടത്തിയ കഥ, കവിത രചനാമത്സരങ്ങളില്‍ വിജയികളാകുന്നവര്‍ക്ക് ഏര്‍പ്പെടുത്തിയിട്ടുള്ള മുട്ടാര്‍ സോമന്‍ കാവ്യപുരസ്‌കാരവും ബിയാര്‍ പ്രസാദ് കഥാപുരസ്‌കാര സമര്‍പ്പണവും 10ന് രാവിലെ ഒൻപതുമുതല്‍ വൈകിട്ട് അഞ്ചു വരെ ആനപ്രമ്പാല്‍ റിവര്‍ ബ്ലിസ് റിസോര്‍ട്ടിൽ വിവിധ പരിപാടികളോടെ നടക്കും. കേരളാ സാഹിത്യ അക്കാദമി അവാര്‍ഡ് ജേതാവ് എം.ആര്‍. രേണുകുമാര്‍ അവാര്‍ഡു ദാനം നിര്‍വഹിക്കും. ചര്‍ച്ചാ വേദി പ്രസിഡന്‍റ് പി.വി. രവീന്ദ്രനാഥ് അധ്യക്ഷത വഹിക്കും. മുട്ടാര്‍ സോമരാജ്, വിധു പ്രസാദ് എന്നിവര്‍ പ്രസംഗിക്കും. തിരുവനന്തപുരം ഗീതാ കൃഷ്ണ രചിച്ച കവിതയിലെ ബഹുവചനം എന്ന പഠന ഗ്രന്ഥവും റജിമോള്‍ മുഹമ്മ രചിച്ച ദീപ്തയാനം എന്ന കവിതാസമാഹാരവും എം.ആര്‍. രേണുകുമാര്‍ പ്രകാശനം ചെയ്യും. എം.ജി. കൊച്ചുമോന്‍, ജോസുകുട്ടി സെബാസ്റ്റ്യന്‍ എന്നിവര്‍ കൃതികള്‍ പരിചയപ്പെടുത്തും. തുടര്‍ന്ന് നടക്കുന്ന കഥയരങ്ങില്‍ ചന്ദ്രമോഹന്‍ദാസ് ഹരിപ്പാട്, ശ്രീരഞ്ജിനി മാന്നാര്‍, ഗീതാകൃഷ്ണ തിരുവനന്തപുരം, സുശീല രാജു എന്നിവര്‍ കഥകളവതരിപ്പിക്കും. ഉച്ചയ്ക്ക് രണ്ടിന് കവിയരങ്ങ് ആരംഭിക്കും. വിജയന്‍ കലവൂര്‍, ലളിതാംബിക അന്തര്‍ജനം ചങ്ങനാശേരി, ഗീതാജ്ഞലി തൈച്ചിറ, കലവൂര്‍ ലളിതാജി, ശ്രീരജ്ഞിനി മാന്നാര്‍, സിബിച്ചന്‍ നെടുമുടി, രജിമോള്‍ മുഹമ്മ, ഗീതാ ലക്ഷ്മി പള്ളിപ്പാട്, അനാമിക ഹരിപ്പാട്, സുലു ആലപ്പുഴ, ജ്യോതി ലക്ഷ്മി കരുമാടി, കണ്ണന്‍ തലവടി, പ്രകാശ് തലവടി എന്നില്‍ കവിതകളവതരിപ്പിക്കും. വൈകിട്ട് 3.30ന് സൗഹൃദ സാഹിത്യസായാഹ്ന സദസ് നടക്കും. എം.ജി. കൊച്ചുമോന്‍ അധ്യക്ഷത വഹിക്കും. പി.കെ. ഗായിക മേദിനി ഉദ്ഘാടനം നിര്‍വഹിക്കും.

യുവാവിന്‍റെ ആക്രമണത്തിൽ പഞ്ചായത്ത് പ്രസിഡന്‍റിനു പരിക്ക്

തുറവൂർ: യുവാവിന്‍റെ ആക്രമണത്തിൽ തുറവൂർ പഞ്ചായത്ത് പ്രസിഡന്‍റ് മോളി രാജേന്ദ്രന് ഗുരുതരപരിക്ക്. ആറിന് രാത്രി ഒൻപ തിനായിരുന്നു ആക്രമണം. പ്രസിഡന്‍റിന്‍റെ അയൽവാസിയായ ലക്ഷംവീട് കോളനിയിലെ രാജേഷിന്‍റെ ഭാര്യാപിതാവിനെ രാജേഷ് മർദിച്ചതിനെത്തുടർന്ന് ശബ്ദം കേട്ട് പ്രസിഡന്‍റും ഭർത്താവും ആക്രമണം തടയാൻ ശ്രമിക്കുന്നതിനിടെ രാജേഷ് പ്രകോപനമില്ലാതെ പ്രസിഡന്‍റിനെ കഴുത്തിനുപിടിച്ച് എറിയുകയായിരുന്നു. വീഴ്ചയിൽ പ്രസിഡന്‍റിന് തലയ്ക്കും കൈകാലുകൾക്കും ഗുരുതരമായി പരിക്കേൽക്കുകയും ചെയ്തു. ഓടിക്കുടിയ നാട്ടുകാർ തുറവൂർ താലൂക്ക് ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമായതിനെത്തുടർന്ന് ചേർത്തലയിലെ സ്വകാര്യ ആശുപത്രിയിൽ ചികിത്സയിലാണ്. പ്രസിഡന്‍റിന്‍റെ പരാതിയിൽ കുത്തിയതോട് പോലീസ് കേസെടുത്തു അന്വേഷണം ആരംഭിച്ചു. കോൺഗ്രസ് കമ്മിറ്റി പ്രതിഷേധിച്ചു തുറവൂർ: പഞ്ചായത്ത് പ്രസിഡന്‍റിനെ ആക്രമിച്ചതിൽ തുറവൂർ മണ്ഡലം ഈസ്റ്റ്, വെസ്റ്റ് കോൺഗ്രസ് കമ്മിറ്റികൾ പ്രതിഷേധിച്ചു. മദ്യപിച്ചും മയക്കുമരുന്ന് ഉപയോഗിച്ചും പ്രദേശത്ത് പ്രശ്നമുണ്ടാക്കുന്ന രാജേഷ് എന്ന യുവാവിനെതിരേ മുൻപും നിരവധി പരാതികൾ ഉയർന്നിട്ടും പോലീസ് നടപടിയെടുക്കാത്തതിനെത്തുടർന്നാണ് ഇത്തരത്തിലുള്ള പ്രശ്നങ്ങൾ ഉണ്ടായതെന്ന് മണ്ഡലം കോൺഗ്രസ് കമ്മിറ്റി ആരോപിച്ചു. അടിയന്തരമായി ഇയാളെ അറസ്റ്റ് ചെയ്യണമെന്നും ഇയാൾക്കെതിരേ ശക്തമായ നടപടി സ്വീകരിക്കണമെന്നും ഭാരവാഹികൾ ആവശ്യപ്പെട്ടു.

കുട്ടനാടിന് നെല്ലും കൂണും: ട്രാവന്‍കോ കൂണ്‍കൃഷി പദ്ധതിക്ക് തകഴിയില്‍ തുടക്കം

എടത്വ: കുട്ടനാട്ടിലെ 64 പഞ്ചായത്തുകളിലെ നെല്‍കര്‍ഷകര്‍ക്കു നെല്‍കൃഷിയോടൊപ്പം ഒരു അധികവരുമാനം വിഭാവനം ചെയ്യുക എന്ന ലക്ഷ്യത്തോടെ അടൂര്‍ ആസ്ഥാനമാക്കി പ്രവര്‍ത്തിക്കുന്ന ട്രാവന്‍കൂര്‍ റൂറല്‍ ഡെവലപ്മെന്‍റ് പ്രൊഡ്യൂസര്‍ കമ്പനിയുടെയും (ട്രാവന്‍കോ) വിവിധ തദ്ദേശ സ്വയംഭരണ സ്ഥാപനങ്ങളുടെയും കൃഷിവകുപ്പിന്‍റെയും സംയുക്ത സംരംഭം ട്രാവന്‍കോ-പ്രോജെക്ട് സണ്‍ റൈസിന് തകഴി പഞ്ചായത്തില്‍ തുടക്കമായി. തകഴി പഞ്ചായത്തു പ്രസിഡന്‍റ് എസ്. അജയകുമാര്‍ അധ്യക്ഷത വഹിച്ച കൂണ്‍ കൃഷി പദ്ധതി വിശദീകരണയോഗം ട്രാവന്‍കോ ചെയര്‍മാൻ സി. ദിവാകരന്‍ ഉദ്ഘാടനം ചെയ്തു. വൈറ്റമിന്‍ സമ്പുഷ്ടമായ ഗുണമേന്മ ഏറെയുള്ള ഭക്ഷ്യവസ്തുവായ കൂണിന് മികച്ച അന്തരാഷ്ട്ര വിപണി സുസ്ഥിരമായി നിലനില്‍ക്കുന്നു. ഇന്ത്യയില്‍ ഉത്പാദിപ്പിക്കുന്ന കൂണിന്‍റെ ഏറിയ പങ്കും വിദേശ രാജ്യങ്ങളിലേക്കു കയറ്റി അയക്കപ്പെടുന്നു. ആഭ്യന്തരവിപണി ലക്ഷ്യം വയ്ക്കുന്നതിനൊപ്പം കൂണിന്‍റെ ഈ അന്താരാഷ്ട്ര വിപണിയിലേക്കാണ് കുട്ടനാട്ടിലെ കര്‍ഷകരെ ട്രാവന്‍കോ കൈപിടിച്ച് നടത്തുന്നതെന്ന് അദ്ദേഹം പറഞ്ഞു. കേരളത്തിലാകമാനം നടപ്പില്‍ വരുത്താനുദ്ദേശിക്കുന്ന പദ്ധതിയിലേക്ക് രാജ്യത്തെ ദേശസാല്‍കൃത ബാങ്കുകളെ ഭാഗവാക്കാക്കുവാനുള്ള ചര്‍ച്ചകള്‍ ദ്രുതഗതിയില്‍ പുരോഗമിക്കുന്നതായി പദ്ധതി അവതരണം നടത്തിയ ട്രാവന്‍കോ ചീഫ് എക്‌സിക്യൂട്ടീവ് ഓഫീസര്‍ എം.ആര്‍. സേതു അറിയിച്ചു. പഞ്ചായത്ത് വൈസ് പ്രസിഡന്‍റ് അംബികാ ഷിബു, സെക്രട്ടറി വി. സുരേഷ്, വികസനകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ കെ. ശശാങ്കന്‍, ക്ഷേമകാര്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ സിന്ധു ജയപ്പന്‍, വാര്‍ഡ് മെംബര്‍മാരായ ജയചന്ദ്രന്‍ കല്ലശേരി, മഞ്ജു വിജയകുമാര്‍, ഗീതാഞ്ജലി തുടങ്ങിയവര്‍ പ്രസംഗിച്ചു. നെല്‍കൃഷിയില്‍ വ്യാപൃതരായിരിക്കുന്ന കുട്ടനാട്ടിലെ 64 പഞ്ചായത്തുകളിലെ നെല്‍കര്‍ഷകര്‍ക്ക് ഒരധികവരുമാനം എന്ന നിലയിലാണ് പ്രോജക്ട് സണ്‍ റൈസ് വിഭാവനം ചെയ്യപ്പെട്ടിട്ടുള്ളത്. കര്‍ഷകര്‍ക്് കൂണ്‍കൃഷി തുടങ്ങുന്നതിനാവശ്യമായ ഇന്‍ഫ്രാസ്ട്രക്ചര്‍, സാങ്കേതിക വിദ്യ, പരിശീലനം, ശാസ്ത്രീയമായ നിരന്തര മൂല്യനിര്‍ണയം, സാമ്പത്തിക പിന്തുണ എന്നിവയ്ക്കു പുറമേ ഉത്പാദിപ്പിക്കുന്ന കൂണിന് വിപണി വില നല്‍കി ട്രാവന്‍കോ ഏറ്റെടുക്കുകയും ചെയ്യുമെന്ന് ട്രാവന്‍കോ ഭാരവാഹികള്‍ പറഞ്ഞു.

ക്ലാസിക്കുകളും മെഗാഹിറ്റുകളും കോര്‍ത്തിണക്കി ഫിലിം ഫെസ്റ്റിവല്‍

ആലപ്പുഴ: ഒരിക്കല്‍കൂടി തിയറ്ററില്‍ കാണണമെന്ന് കൊതിക്കുന്ന പഴയ ക്ലാസിക്, ഹിറ്റ് സിനിമകളുണ്ടോ നിങ്ങളുടെ ഓര്‍മകളുടെ വെള്ളിത്തിരയില്‍..എങ്കില്‍ ആലപ്പുഴ ബീച്ചില്‍ നടക്കുന്ന എന്‍റെ കേരളം പ്രദര്‍ശനമേളയിലേക്ക് വരൂ...പതിറ്റാണ്ടുകള്‍ക്ക് മുമ്പ് തിയറ്ററുകളെ പൂരപ്പറമ്പാക്കി മാറ്റിയ ജനപ്രിയ സിനിമകള്‍ മുതല്‍ ലോകസിനിമയ്ക്ക് മലയാളം സമ്മാനിച്ച ക്ലാസിക് ചിത്രങ്ങള്‍ വരെയുള്ള അപൂര്‍വപ്രദര്‍ശനമാണ് എന്‍റെ കേരളത്തിലെ മിനി തിയറ്ററില്‍ ഒരുക്കിയിരിക്കുന്നത്. ചെമ്മീനും കൊടിയേറ്റവും നിർമാല്യവും സ്വയംവരവും പെരുന്തച്ചനും പോലുള്ള മലയാള സിനിമയിലെ എവര്‍ഗ്രീന്‍ ക്ലാസിക്കുകള്‍ മുതല്‍ ഗോഡ്ഫാദറും കിരീടവും പ്രാഞ്ചിയേട്ടനും വരെയുള്ള ജനപ്രിയ സിനിമകളുമുണ്ട് മിനി തിയറ്റര്‍ പ്രദര്‍ശനപ്പട്ടികയില്‍. സംസ്ഥാന ചലച്ചിത്രവികസന കോർപറേഷനാണ് (കെഎസ്എഫ്ഡിസി) ഇതാദ്യമായി എന്‍റെ കേരളം പ്രദര്‍ശനവിപണനമേളയില്‍ സിനിമപ്രേമികള്‍ക്കായി മിനി തിയറ്റര്‍ അനുഭവം ഒരുക്കിയത്. 21.5 അടി നീളവും 11.5 അടി ഉയരവുമുള്ള എൽഇഡി സ്‌ക്രീനും അത്യാധുനിക സൗണ്ട് സിസ്റ്റവും മികച്ച സാങ്കേതിക വിദ്യകളുമായി നിർമിച്ച താത്കാലിക മിനി തിയറ്ററിൽ ഒരേ സമയം 70ലധികം ആളുകൾക്ക് സിനിമ ആസ്വദിക്കാം. അന്തരിച്ച സംവിധായകൻ ഷാജി എൻ. കരുൺ അനുസ്മരണത്തിന്‍റെ ഭാഗമായി ചൊവ്വാഴ്ച ഫിലിം ഫെസ്റ്റിവലിൽ അദ്ദേഹം സംവിധാനം ചെയ്ത മമ്മൂട്ടി ചിത്രം കുട്ടി സ്രാങ്ക് പ്രദർശിപ്പിച്ചു. ചെറിയാച്ചന്‍റെ ക്രൂരകൃത്യങ്ങൾ, ഒഴിമുറി, തനിയാവർത്തനം, ന്യൂസ് പേപ്പര്‍ ബോയ്, എലിപ്പത്തായം, അനുഭവങ്ങള്‍ പാളിച്ചകള്‍, കുമ്മാട്ടി, വൈശാലി, 1921, ഭൂതക്കണ്ണാടി, കാവ്യമേള, ബി 32 മുതല്‍ 44 വരെ, നിഷിദ്ധോ, നഖക്ഷതങ്ങള്‍ തുടങ്ങിയ ഒട്ടേറെ സിനിമകളാണ് മേയ് 12 വരെ നടക്കുന്ന എന്‍റെ കേരളം പ്രദര്‍ശനമേളയില്‍ പ്രേക്ഷകരെ കാത്തിരിക്കുന്നത്. ദിവസവും നാലു സിനിമകൾ വീതമാണ് പ്രദർശനം.

എന്‍റെ കേരളം പ്രദര്‍ശനവിപണന മേള; മാഗസിൻ മുഖചിത്രമാകാം; 360 ഡിഗ്രിയില്‍ വീഡിയോയും എടുക്കാം

ആലപ്പുഴ: ഒരു മാഗസിന്‍ മുഖചിത്രമാകാന്‍ ആര്‍ക്കാണാഗ്രഹമില്ലാത്തത്? അതും മലയാളി ഹൃദയത്തോട് എന്നെന്നും ചേര്‍ത്തുവയ്ക്കുന്ന സ്വന്തം നാടിന്‍റെ പേരിലുള്ള മാഗസിനായാലോ...? എങ്കില്‍ ആലപ്പുഴ ബീച്ചില്‍ നടക്കുന്ന എന്‍റെ കേരളം പ്രദര്‍ശനവിപണന മേളയിലേക്ക് പോരൂ... വിവര പൊതുജന സമ്പർക്കവകുപ്പ് ഒരുക്കിയ പവലിയനിലാണ് സെല്‍ഫിക്കാലത്തെ പുതുരസങ്ങളായ മാഗസിന്‍ മുഖചിത്ര ഫ്രെയിമും ത്രീ സിക്സ്റ്റി സെൽഫി വീഡിയോ സംവിധാനവുമുള്ളത്. രണ്ടാം പിണറായി വിജയൻ മന്ത്രിസഭയുടെ നാലാം വാർഷികത്തിന്‍റെ ഭാഗമായി 12 വരെയാണ് ബീച്ചില്‍ മേള നടക്കുന്നത്. പ്രദര്‍ശനനഗരിയുടെ കവാടത്തോട് ചേര്‍ന്നുള്ള പിആര്‍ഡിയുടെ പവലിയനിലെ ഫോട്ടോ പോയിന്‍റിലെത്തിയാൽ ഓരോരുത്തര്‍ക്കും മാഗസിൻ മുഖചിത്രമാകാൻ അവസരമൊരുക്കുന്ന ഫ്രെയിം കാണാം. ഇനി ഇഷ്ട പോസില്‍നിന്ന് പടമെടുക്കുകയേ വേണ്ടൂ...നിങ്ങളായി എന്‍റെ കേരളം കവര്‍ ചിത്രം. എന്‍റെ കേരളം എന്ന ഹാഷ് ടാഗോടെ സാമൂഹിക മാധ്യമങ്ങളിൽ ചിത്രം അപ്‌ലോഡ് ചെയ്യാം. പവലിയന്‍റെ പ്രവേശന കവാടത്തിനു സമീപം തന്നെ ഒരുക്കിയിരിക്കുന്ന 360 ഡിഗ്രിയിൽ വീഡിയോ എടുക്കുന്നതിനുള്ള സംവിധാനവും ഒട്ടേറെ പേരെ ആകര്‍ഷിക്കുന്നുണ്ട്. സ്റ്റാന്‍ഡില്‍ കയറി ചെറുചിരിയോടെനിന്നാല്‍ കാമറയും ലൈറ്റും 360 ഡിഗ്രിയില്‍ കറങ്ങി രസകരമായ വീഡിയോ സമ്മാനിക്കും. സർക്കാരിന്‍റെ വികസന നേട്ടങ്ങളിലൂടെയുള്ള ഹ്രസ്വസഞ്ചാരമാണ് പിആർഡി പവലിയൻ. കഴിഞ്ഞ ഒൻപതുവർഷത്തിനുള്ളിൽ സംസ്ഥാനം കൈവരിച്ച നേട്ടങ്ങൾ ഫോട്ടോകളിലൂടെയും എൽഇഡി വോളുകളിലൂടെയും വിശദമായി കണ്ടു മനസിലാക്കാനുള്ള അവസരം സ്റ്റാളിലുണ്ട്. കേരളത്തിന്‍റെ വികസനങ്ങളുടെ വിവരങ്ങൾ, ചിത്രങ്ങൾ എന്നിവ ഒറ്റ ടച്ചിൽ കാണാൻ കഴിയുന്ന ഡിജിറ്റൽ ബുക്കിന്‍റെ മാതൃകയും അവതരിപ്പിച്ചിട്ടുണ്ട്. കൃഷി, വിദ്യാഭ്യാസം, ആരോഗ്യം എന്നിങ്ങനെ രേഖപ്പെടുത്തിയിരിക്കുന്ന നേട്ടങ്ങളുടെ ക്യൂബും (റൊട്ടേറ്റ് ദ് ക്യൂബ്) ഇവിടെയുണ്ട്. ഇവയിൽ ഏതിനെക്കുറിച്ചാണോ കൂടുതൽ അറിയേണ്ടത് ആ ഭാഗം അടിയിൽ വരത്തക്കവിധം സ്റ്റാൻഡിൽ ക്യൂബ് വച്ചാൽ അതേക്കുറിച്ചുള്ള ഹ്രസ്വ വീഡിയോ സ്‌ക്രീനിൽ തെളിയും. കുട്ടികളും മുതിർന്നവരും ഉൾപ്പെടെ നിരവധിപ്പേരാണ് വിജ്ഞാനവും വിനോദവും പകരുന്ന പവലിയന്‍ സന്ദർശിച്ച് മടങ്ങുന്നത്.

ചെറിയനാട് റെയിൽവേ അടിപ്പാതയിലെ വെള്ളക്കെട്ടിനു പരിഹാരമാകുന്നു

ചെങ്ങന്നൂർ: ചെറിയനാട് റെയിൽവേ അടിപ്പാതയിലെ ദുരിതത്തിനൊടുവിൽ പരിഹാരമാകുന്നു. ചെങ്ങന്നൂർ-മാവേലിക്കര-കോഴഞ്ചേരി റോഡിലെ ചെറിയനാട് റെയിൽവേ അടിപ്പാതയിലെ വെള്ളക്കെട്ട് ഒഴിവാക്കുന്നതിനുള്ള പ്രവർത്തനങ്ങൾ ആരംഭിച്ചു. ചെറിയ മഴയിൽ പോലും അടിപ്പാതയിൽ വെള്ളം നിറയുന്നത് പതിവായതോടെ ചെറിയനാട് പഞ്ചായത്ത് എട്ടു ലക്ഷം രൂപ ചെലവഴിച്ച് ഓട നിർമിച്ചിരുന്നു. എന്നാൽ, ഈ ഓടയിലേക്ക് വെള്ളം ഒഴുകിയെത്താനുള്ള സൗകര്യമില്ലാതിരുന്നത് വീണ്ടും വെള്ളക്കെട്ടിനു കാരണമായി. ഇപ്പോൾ, ആ പ്രശ്നം പരിഹരിക്കാനുള്ള പണികളാണ് ആരംഭിച്ചിരിക്കുന്നത്. നിർമാണ പ്രവർത്തനങ്ങൾ നടക്കുന്നു എന്ന ശരിയായ അറിയിപ്പ് ബോർഡ് സ്ഥാപിക്കാത്തതിനാൽ ഇവിടെ പണി നടക്കുന്നുവെന്ന് അറിയാതെ രാത്രികാലങ്ങളിൽ ചെങ്ങന്നൂർ ഭാഗത്തുനിന്ന് വരുന്ന വാഹനങ്ങൾ ഇവിടെ വെളിച്ചക്കുറവ് കാരണം അപടത്തിൽപ്പെടാൻ സാധ്യതയുണ്ടെന്ന് നാട്ടുകാർ പറയുന്നു. ഏകദേശം അഞ്ചു വർഷം മുൻപ് എംകെ റോഡ് നവീകരിച്ചതിനുശേഷമാണ് പാലത്തിന്‍റെ ഇരുവശവും ഉയർന്നത്. വലിയ കുഴികൾ ഇതാണ് ഇരുവശങ്ങളിൽനിന്നുമുള്ള വെള്ളം അടിപ്പാതയിലേക്ക് ഒഴുകിയെത്തുന്നതിനും വെള്ളക്കെട്ട് രൂപപ്പെടുന്നതിനും പ്രധാന കാരണം. ഇത് കണ്ടെത്തിയതിനെത്തുടർന്ന് ഏകദേശം പതിനഞ്ചു മാസങ്ങൾക്കു മുൻപ് ഈ ഭാഗം ലെവൽ ചെയ്ത് ടാർ ചെയ്തിരുന്നു. എന്നിരുന്നാലും ചെറിയ മഴയിൽ പോലും ഇവിടെ വെള്ളം കെട്ടി നിൽക്കുകയും അടിപ്പാതയിൽ വലിയ കുഴികൾ രൂപപ്പെടുകയും ചെയ്തു. ഈ കുഴികളിൽ വീണ് ഇരുചക്രവാഹന യാത്രക്കാർ ഉൾപ്പെടെ നിരവധിപേർക്ക് അപകടങ്ങൾ സംഭവിച്ചിട്ടുണ്ട്. അടിപ്പാതയിൽ എത്തുന്ന വെള്ളം ഒഴുകിപ്പോകാൻ ശരിയായ ഒരു സംവിധാനം ഇല്ലാത്തതായിരുന്നു ഇവിടത്തെ പ്രധാന പ്രശ്നം. ചെളിവെള്ളം തെറിച്ച് ഇരുചക്രവാഹന യാത്രക്കാരുടെയും കാൽനട യാത്രക്കാരുടെയും ദേഹത്ത് വീഴുന്നത് ഇവിടെ പതിവാണ്. ഇതു പലപ്പോഴും തർക്കങ്ങൾക്ക് ഇടയാക്കിയിട്ടുണ്ട്. ഓടയിലേക്ക് വെള്ളം ഇരുവശത്തുനിന്നും വളഞ്ഞു വരുന്ന വാഹനങ്ങൾ പെട്ടെന്നാണ് വെള്ളക്കെട്ട് കാണുന്നത്. റോഡ് പരിചയമില്ലാത്ത ഡ്രൈവർമാർ പെട്ടെന്ന് ബ്രേക്ക് ചെയ്യുമ്പോൾ പിന്നാലെ വരുന്ന വാഹനങ്ങൾ ഇടിച്ചുണ്ടാകുന്ന അപകടങ്ങളും ഇവിടെ നിത്യസംഭവമായിരുന്നു. അധ്യയനവർഷം ആരംഭിക്കുമ്പോൾ വിജേശ്വരി ഹൈസ്കൂൾ, ദേവസ്വം ബോർഡ്സ് ഹയർ സെക്കൻഡറി സ്കൂൾ, സെന്‍റ് ജോസഫ് ഇംഗ്ലീഷ് മീഡിയം സ്കൂൾ, ആല ഗവ. ഹയർ സെക്കൻഡറി സ്കൂൾ, ചെറിയനാട് എസ്എൻ ട്രസ്റ്റ് ഹയർ സെക്കൻഡറി സ്കൂൾ എന്നിവിടങ്ങളില വദ്യാർഥികൾ സൈക്കിളിലും കാൽനടയായും ഈ വഴിയിലൂടെയാണ് പോകുന്നത്. ഇവർക്ക് വെള്ളക്കെട്ട് വലിയ ദുരിതമായിരുന്നു സൃഷ്ടിച്ചിരുന്നത്. എന്നാൽ, ഇപ്പോൾ ഓടയിലേക്ക് വെള്ളം ഒഴുക്കുന്നതിനുള്ള നടപടികൾ ആരംഭിച്ചതോടെ ഒരു വലിയ ആശ്വാസമായിരിക്കുകയാണ്. ഇവിടത്തെ ദുരിതത്തെക്കുറിച്ചുള്ള വാർത്തകൾ ശ്രദ്ധയിൽപ്പെട്ടതിനെ തുടർന്ന് ചെങ്ങന്നൂർ എംഎൽഎയും മന്ത്രിയുമായ സജി ചെറിയാനും മാവേലിക്കര എംപി കൊടിക്കുന്നിൽ സുരേഷും ശക്തമായി ഇടപെട്ടതിനെത്തുടർന്നാണ് റെയിൽവേ അധികൃതർ അടിയന്തരമായി വെള്ളക്കെട്ട് ഒഴിവാക്കുന്നതിനുള്ള പ്രവർത്തനങ്ങൾ ആരംഭിച്ചത്.

കോൺക്രീറ്റ് മിക്സുമായി വന്ന ലോറി നടുറോഡിൽ തകരാറിലായി

അമ്പലപ്പുഴ: കോൺക്രീറ്റ് മിക്സുമായി വന്ന ലോറി നടുറോഡിൽ തകരാറിലായി. ദേശീയപാതയിൽ മണിക്കൂറുകളാളം ഗതാഗതക്കുരുക്ക്. അമ്പലപ്പുഴ കച്ചേരിമുക്കിൽ ഇന്നലെ ഉച്ചയ്ക്ക് 12 നായിരുന്നു സംഭവം. വടക്കു ഭാഗത്തേക്ക് പോയ കർണാടക രജിസ്ട്രേഷൻ ലോറിയാണ് നടുറോഡിൽ തകരാറിലായത്. ഇതോടെ കെഎസ്ആർടിസി ബസുകൾ ഉൾപ്പെടെ നിരവധി വാഹനങ്ങൾ ഗതാഗതക്കുരുക്കിൽപ്പെട്ടു. പിന്നീട് ജെസിബിയെത്തിച്ച് ദേശീയപാത നിർമാണത്തിന്‍റെ ഭാഗമായി സ്ഥാപിച്ച സ്ളാബുകൾ നീക്കം ചെയ്താണ് ലോറി മാറ്റി ഗതാഗതം പുനഃസ്ഥാപിച്ചത്.

കണ്ടെയ്നർ ലോറിയിടിച്ച് ബൈക്ക് യാത്രികൻ മരിച്ചു

ആലുവ: കണ്ടെയ്നർ ലോറിയിടിച്ച് ബൈക്ക് യാത്രികൻ മരിച്ചു. മുപ്പത്തടം വെള്ളയിൽ വീട്ടിൽ സെബാസ്റ്റ്യൻ (60) ആണ് മരിച്ചത്. പെരുന്പാവൂർ ദേശസാത്കൃത റോഡിൽ ചാലക്കലിൽ ഇന്നലെ ഉച്ചക്ക് രണ്ടോടെയാണ് അപകടം. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കെട്ടിട നിർമാണ കരാറുകാരനായ സെബാസ്റ്റ്യൻ സൈറ്റിൽനിന്ന് വീട്ടിലേക്ക് വരുന്പോഴാണ് അപകടം. തലയടിച്ച് വീണതാണ് മരണകാരണം. മൃതദേഹം ആലുവ ജില്ലാ ആശുപത്രി മോർച്ചറിയിലേക്ക് മാറ്റി. ഇന്ന് പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുകൊടുക്കും. ഭാര്യ: വിജി. മക്കൾ: ബർട്ടിൻ, മെറിൻ.

തൈക്കാട്ടുശേരി റൂട്ട് മറന്ന് കെഎസ്ആർടിസി; സർവീസ് നിലച്ചിട്ട് വർഷങ്ങൾ

പൂച്ചാക്കൽ: തൈക്കാട്ടുശേരിയിൽനിന്നു എംഎൽഎ റോഡ് വഴിയുള്ള കെഎസ്ആർടിസി സർവീസുകൾ നിലച്ചിട്ട് വർഷങ്ങൾ കഴിയുന്നു. തൈക്കാട്ടുശേരിയിൽനിന്നു രാവിലെ അഞ്ചിന് ആരംഭിച്ച് കോട്ടയം മെഡിക്കൽ കോളജ് വരെ ഉണ്ടായിരുന്ന കെഎസ്ആർടിസി സർവീസ് ഉൾപ്പെടെ നിരവധി ബസുകളാണ് സർവീസ് നിർത്തിയത്. കോവിഡ് കാലത്താണ് ഇതുവഴിയുള്ള സർവീസുകൾ നിർത്തിവച്ചത്. എൻഎസ്എസ് കോളജ് വഴി തൃച്ചാറ്റുകുളം വരെ എത്തുന്ന എംഎൽഎ റോഡ് വഴി പോയിരുന്ന എല്ലാ സർവീസുകൾക്കും വളരെ നല്ല കളക്ഷൻ ലഭിച്ചിരുന്നു. പള്ളിപ്പുറത്തുള്ള ഇൻഫോപാർക്കിലും ഫുട്പാർക്കിലും 5000 ൽ അധികം തൊഴിലാളികൾ ജോലി ചെയ്യുന്ന സ്ഥാപനങ്ങളുണ്ട്. ബസ് സർവീസുകൾ നിർത്തലാക്കിയതിനെത്തുടർന്ന് വാഹന സൗകര്യം ഇല്ല എന്ന കാരണത്താൽ ഇൻഫോപാർക്കിലെ ചില സ്ഥാപനങ്ങൾ കൊച്ചിയിലേക്ക് തിരികെ പോവുകയുണ്ടായി. തുറവൂർ - തൈക്കാട്ടുശേരി പാലം തുറന്നാൽ തുറവൂരിൽനിന്നു തൈക്കാട്ടുശേരി വഴി ചേർത്തല വരെ പോകുന്ന സർവീസുകൾ ആരംഭിക്കുമെന്ന് അന്ന് അധികൃതർ പ്രഖ്യാപിച്ചെങ്കിലും പ്രഖ്യാപനം ജലരേഖയാകുകയാണ്. വിളക്കുമരം പാലം തുറന്നുകൊടുക്കുമ്പോൾ ചേർത്തലയിൽനിന്നു പള്ളിപ്പുറം തൈക്കാട്ടുശേരി മേഖലകളുമായി ബന്ധിപ്പിച്ച് പുതിയ സർവീസുകൾ ഉൾപ്പെടെ നിർത്തിവച്ച എല്ലാ സർവീസുകളും ആരംഭിച്ചിച്ചില്ലെങ്കിൽ സമരപരിപാടികൾ സംഘടിപ്പിക്കുമെന്ന് തൈക്കാട്ടുശേരി കേന്ദ്രമായി പ്രവർത്തിക്കുന്ന പാസഞ്ചേഴ്സ് അസോസിയേഷൻ ഭാരവാഹികളായ പ്രസിഡന്‍റ് പി. ശശികല, സെക്രട്ടറി വി.എൻ. ഷണ്മുഖൻ, കെ.പി. ഉദയപ്പൻ, പി.ആർ. വിജയ പ്രസാദ് എന്നിവർ പറഞ്ഞു.

കേരള യൂത്ത് ഫ്രണ്ട്-എം തീരദേശ സംരക്ഷണ ജാഥ

ആലപ്പുഴ: കേരള യൂത്ത് ഫ്രണ്ട്-എം തീരദേശ സംരക്ഷണ ജാഥ ആലപ്പുഴ ജില്ലയിൽ പര്യടനം നടത്തി. ഇന്നലെ രാവിലെ ജില്ലയിൽ പ്രവേശിച്ച ജാഥയ്ക്ക് മത്സ്യത്തൊഴിലാളികളും നാട്ടുകാരും ചേർന്ന് സ്വീകരണം നൽകി. ജാഥാ ക്യാപ്റ്റൻ സിറിയക് ചാഴികാടനെ മാലയിട്ടും ഹർഷാരവങ്ങളോടെയുമാണ് സ്വീകരിച്ചത്. മത്സ്യത്തൊഴിലാളികളുടെ പ്രതിസന്ധിയിൽ എന്നും കേരള കോൺഗ്രസും യൂത്ത് ഫ്രണ്ടും ഒപ്പമുണ്ടാകുമെന്ന് സിറിയക് ചാഴികാടൻ പറഞ്ഞു. കേരളം മുഴുവൻ ഒറ്റക്കെട്ടായി മത്സ്യത്തൊഴിലാളികൾക്കുവേണ്ടി രംഗത്തിറങ്ങും. കേന്ദ്രസർക്കാരിന് കേരളത്തിന്‍റെ ജനകീയ പ്രതിഷേധങ്ങൾക്കൊടുവിൽ മത്സത്തൊഴിലാളികളെ സംരക്ഷിക്കേണ്ടിവരുമെന്നും അദ്ദേഹം പറഞ്ഞു. കേരള യൂത്ത്ഫ്രണ്ട്-എം ജില്ലാ പ്രസിഡന്‍റ് വർഗീസ് ആന്‍റണി അധ്യക്ഷത വഹിച്ചു. വിവിധ സ്വീകരണ കേന്ദ്രങ്ങളിൽ കേരള കോൺഗ്രസ്-എം ജില്ലാ പ്രസിഡന്‍റ് വി.സി. ഫ്രാൻസിസ്, കേരള കോൺഗ്രസ്-എം രാഷ്ട്രീയകാര്യസമിതി അംഗം വി.ടി. ജോസഫ്, ജെന്നിംഗ്സ് ജേക്കബ്, വിജി എം. തോമസ്, സാജൻ തൊടുക, ജോസഫ് കെ. നെല്ലുവേലി, ഷേയ്ക്ക് അബ്ദുള്ള, അജിതാ സോണി തുടങ്ങിയവർ വിവിധ കേന്ദ്രങ്ങളിൽ പ്രസംഗിച്ചു.

സമ്പൂര്‍ണ കുടിവെള്ള പദ്ധതി: ടെന്‍ഡറിന് അംഗീകാരം

ചെങ്ങന്നൂര്‍: സമ്പൂര്‍ണ കുടിവെള്ള പദ്ധതി ചെറിയനാട് തുരുത്തിമേല്‍ ഉപരിതല ജലസംഭരണി ഉള്‍പ്പെടുന്ന പദ്ധതിയുടെ ടെന്‍ഡറിന് അംഗീകാരം. സംസ്ഥാന സര്‍ക്കാര്‍ നടപ്പാക്കുന്ന ചെങ്ങന്നൂര്‍ സമ്പൂര്‍ണ കുടിവെള്ള പദ്ധതിയുടെ ഭാഗമായി ആലാ, പുലിയൂര്‍, ബുധനൂര്‍, പാണ്ടനാട്, മുളക്കുഴ, വെണ്‍മണി, തിരുവന്‍വണ്ടൂര്‍ പഞ്ചായത്തുകളിലേക്കും ചെങ്ങന്നൂര്‍ മുനിസിപ്പാലിറ്റിയിലേക്കുമുള്ള 520 കോടി രൂപയുടെ ജലവിതരണ പദ്ധതിക്ക് സര്‍ക്കാര്‍ മുൻപുതന്നെ അനുമതി ലഭ്യമാക്കിയതനുസരിച്ച് വിവിധ പഞ്ചായത്തുകളില്‍ പൈപ്പ്‌ലൈൻ സ്ഥാപിക്കുന്നത് ഉള്‍പ്പെടെയുള്ള ജോലികള്‍ പുരോഗമിച്ചു വരുന്നു. ചെറിയനാട്, പുലിയൂര്‍, ബുധനൂര്‍, പാണ്ടനാട് പഞ്ചായത്തുകളില്‍ ഉന്നതതല ജലസംഭരണികളും 213 കിലോമീറ്റർ പൈപ്പ് ലൈനും സ്ഥാപിക്കുന്നതിനുള്ള ടെന്‍ഡറുക ള്‍ സര്‍ക്കാര്‍ അനുമതിക്ക് സമര്‍പ്പിച്ചിരുന്നു. ഇതില്‍ ചെറിയനാട് തുരുത്തിമേല്‍ നിര്‍മിക്കുന്ന 3.6 ലക്ഷം ലിറ്റര്‍ ഉപരിതല ജലസംഭരണിയും 250 എംഎംഡി എൻക്ലിയര്‍ വാട്ടര്‍ പമ്പിംഗ് മെയിന്‍ തുരുത്തിമേല്‍ ടാങ്കിലേക്കുള്ള പ്രവൃത്തിയുടെ ടെന്‍ഡര്‍ അധിക നിരക്കിന് സര്‍ക്കാര്‍ അംഗീകാരം നല്‍കി. ചെറിയനാട് പഞ്ചായത്തിലെയും സമീപ പഞ്ചായത്തുകളിലെയും ഉയര്‍ന്ന പ്രദേശങ്ങളില്‍ ജലവിതരണം സാധ്യമാക്കുന്നതിന് തുരുത്തിമേല്‍ ഉപരിതല ജലസംഭരണിയുടെ നിര്‍മാണം അനിവാര്യമാണ്. പ്രവൃത്തി ഏറ്റെടുക്കാന്‍ ആരും തയാറാകാത്തതിനാല്‍ പദ്ധതി നഷ്ടപ്പെടുമെന്ന സാഹചര്യത്തില്‍ മന്ത്രി സജി ചെറിയാന്‍റെ ഇടപെടലിനെത്തുടര്‍ന്നാണ് പ്രവൃത്തി നടപ്പിലാക്കാനുള്ള അനുമതി ഇപ്പോള്‍ ലഭ്യമായിട്ടുള്ളത്.

ഗതാഗതതടസമായി ഉപയോഗശൂന്യമായ ഓഫീസ് കെട്ടിടവും ശുചിമുറിയും

പൂച്ചാക്കൽ: പാണാവള്ളി ജെട്ടി റോഡിൽ ഓഫീസ് കെട്ടിടവും ശുചിമുറിയും ഗതാഗതത്തിനു തടസമാകുന്നു. പാണാവള്ളി ബോട്ട് ജെട്ടിയിലാണ് റോഡിനോട് ചേർന്ന് ജലഗതാഗതവകുപ്പിന്‍റെ പഴയ ഓഫീസ് കെട്ടിടവും പൊതുജനങ്ങൾക്കായി വർഷങ്ങൾക്ക് മുൻപ് നിർമിച്ച ശുചിമുറിയും യാത്രക്കാർക്ക് മാർഗതടസമാകുന്നത്. ജെട്ടിയോട് ചേർന്ന് പുതിയ ഓഫീസ് കെട്ടിടം നിർമിക്കുകയും പ്രവർത്തനങ്ങൾ തുടങ്ങി വർഷങ്ങൾ കഴിഞ്ഞിട്ടും തകർന്ന പഴയ കെട്ടിടം പൊളിച്ചുമാറ്റുന്നതിന് അധികൃതർ നടപടി സ്വീകരിച്ചില്ല. പാണാവള്ളി ബോട്ട് ജെട്ടിയിൽനിന്ന് പെരുമ്പളം, പൂത്തോട്ട, നോർത്ത് പറവൂർ തുടങ്ങിയ സ്ഥലങ്ങളിലേക്ക് നൂറുകണക്കിന് ആളുകളാണ് ദിവസേന യാത്ര ചെയ്യുന്നത്. പാണാവള്ളി - പെരുമ്പളം ജങ്കാർ സർവീസ് കൂടി ഉള്ളതിനാൽ ഇവിടെ വാഹനങ്ങളുടെ തിരക്കും വർധിച്ചു. രാവിലെയും വൈകിട്ടും വലിയ ലോറികൾ വരെ ജങ്കാറിൽ കയറ്റി പെരുമ്പളത്തേക്ക് കൊണ്ടുപോകാവുന്നതിനാൽ ബോട്ട് ജെട്ടിയിൽ വലിയ തിരക്കാണ് അനുഭവപ്പെടുന്നത്. പെരുമ്പളം കവലയിൽനിന്നു ജെട്ടി വരെയുള്ള വീതി കുറഞ്ഞ റോഡിൽ വാഹനങ്ങൾ തിരിക്കാൻ പോലും സ്ഥലമില്ല. നിലവിൽ ഉപയോഗശൂന്യമായ കെട്ടിടങ്ങൾ പൊളിച്ചുനീക്കിയാൽ വാഹനങ്ങൾ പാർക്ക് ചെയ്യാനുള്ള സ്ഥലം ലഭിക്കുകയും ഗതാഗതക്കുരുക്കില്ലാതെ വാഹനങ്ങൾ കടന്നുപോകാനും സാധിക്കുമെന്ന് നാട്ടുകാർ പറഞ്ഞു. ബോട്ട് യാത്രക്കാരുടെ ഇരുചക്രവാഹനങ്ങൾ അധികവും റോഡിന്‍റെ വശങ്ങളിലാണ് പാർക്ക് ചെയ്തിരിക്കുന്നത്. സർക്കാർ ചെലവിൽ മദ്യവും മയക്കുമരുന്നും ഉപയോഗിക്കുന്നവർക്ക് സൗകര്യമൊരുക്കുന്ന ഇടമായി മാറി പഴയ ഓഫിസ് കെട്ടിടം എന്ന ആക്ഷേപവും ഉയരുന്നുണ്ട്. രാത്രികാലങ്ങളിൽ ഇവിടെ സാമൂഹ്യവിരുദ്ധരുടെ ശല്യവും രൂക്ഷമാണ്.

അതിരൂപത ദിനാചരണം വിളംബര ദീപം തെളിഞ്ഞു

ചങ്ങനാശേരി: 20ന് മെത്രാപ്പോലീത്തന്‍ പള്ളിയങ്കണത്തില്‍ നടക്കുന്ന 139-ാമത് ചങ്ങനാശേരി അതിരൂപത ദിനാചരണത്തിനു മുന്നോടിയായി നടന്ന വിളംബര സമ്മേളനം അതിരൂപത വികാരി ജനറാള്‍ മോൺ. ആന്‍റണി എത്തയ്ക്കാട്ട് ഉദ്ഘാടനം ചെയ്തു. മെത്രാപ്പോലീത്തന്‍ പള്ളിയില്‍ നടന്ന ചടങ്ങില്‍ വികാരി ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. അതിരൂപത ദിന കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍, ഫൊറോന കൗണ്‍സില്‍ സെക്രട്ടറി സൈബി അക്കര തുടങ്ങിയവര്‍ പ്രസംഗിച്ചു. പരിപാടികളുടെ വിജയത്തിനായി വികാരി ജനറാള്‍ ജനറല്‍ മോണ്‍. ആന്‍റണി എത്തയ്ക്കാട് ജനറല്‍ കണ്‍വീനറായി 501 അംഗ സ്വാഗതസംഘത്തിനു രൂപം നല്‍കിയിട്ടുണ്ട്. ഫാ. ജോബിന്‍ ആനക്കല്ലുങ്കല്‍, ഫാ. ചെറിയാന്‍ കക്കുഴി, ഫാ. ജിന്‍സ് ചോരേട്ട് ചാമക്കാല, (കോ-ഓർഡിനേറ്റര്‍മാര്‍), മെത്രാപ്പോലീത്തന്‍പള്ളി വികാരി ഫാ. ജോസഫ് വാണിയപ്പുരയ്ക്കല്‍, ഫാ. ജോഷി പുത്തന്‍പുരയ്ക്കല്‍, ഫാ. മാത്യൂ നടമുഖത്ത്, ഫാ. ഐബിന്‍ പകലോമറ്റം, ഫാ. തോമസ് കൊറ്റത്തില്‍, ഫാ. മിന്‍റു മൂന്നുപറയില്‍, ഫാ. ജിന്‍റോ മുര്യങ്കരി, ഫാ. ജേക്കബ് പാറയ്ക്കല്‍, ഫാ. ജിജോ മാറാട്ടുകളം തുടങ്ങിയവര്‍ വിവിധ കമ്മിറ്റികളുടെ കണ്‍വീനർമാരാണ്.

നടൻ ശ്രീനാഥ് ഭാസി ചേർത്തല കോടതിയിൽ മൊഴി നൽകി

ചേർത്തല: ഹൈബ്രിഡ് കഞ്ചാവ്‌ കേസിൽ നടൻ ശ്രീനാഥ് ഭാസി ചേർത്തല കോടതിയിലെത്തി മൊഴി നൽകി. കേസിലെ മുഖ്യപ്രതി തസ്‌ലിമ സുൽത്താനെതിരേ ശ്രീനാഥ് ഭാസി രഹസ്യമൊഴി നൽകിയെന്നാണ് സൂചന. ആലപ്പുഴയിലെ രണ്ടു കോടിയുടെ ഹൈബ്രിഡ് കഞ്ചാവ് കേസിൽ നടൻ ശ്രീനാഥ് ഭാസി ചേർത്തല ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി ഒന്നിൽ ഷെറിൻ കെ. ജോർജ് മുമ്പാകെ ഹാജരായി മൊഴി നൽകിയത്. ബുധനാഴ്ച ഉച്ചകഴിഞ്ഞ് മൂന്ന് മണിയോടെയാണ് എക്സൈസ് സംഘം ശ്രീനാഥ് ഭാസിയെ ചേർത്തല കോടതിയിലെത്തിച്ചത്. കേസിൽ ശ്രീനാഥ് ഭാസിയെ എക്സൈസ് സാക്ഷിയാക്കിയിരുന്നു. ഇതിനു പിന്നാലെയാണ് മൊഴി നൽകാനായി എത്തിയത്. ഒരു മണിക്കൂറിനുള്ളിൽ മൊഴി നൽകിയ ശേഷം ശ്രീനാഥ് ഭാസി സ്വന്തം വാഹനത്തിലാണ് മടങ്ങിയത്.

ചങ്ങനാശേരി എസ്ബി എച്ച്എസ്എസ് കാമ്പസില്‍ വളകിലുങ്ങും

പ്ലസ്ടു വിഭാഗത്തില്‍ പെണ്‍കുട്ടികളെ പ്രവേശിപ്പിക്കാന്‍ മാനേജ്‌മെന്‍റ് തീരുമാനം ചങ്ങനാശേരി: ചങ്ങനാശേരിയിലെ ആണ്‍കുട്ടികളുടെ പ്രശസ്ത വിദ്യാലയമായ എസ്ബി ഹയര്‍ സെക്കന്‍ഡറി സ്‌കൂളിലെ പ്ലസ്ടു വിഭാഗത്തില്‍ 2025-26 വര്‍ഷം പെണ്‍കുട്ടികള്‍ക്കുകൂടി പ്രവേശനം നല്‍കാന്‍ മാനേജ്‌മെന്‍റ് തീരുമാനം. മാനേജ്‌മെന്‍റിന്‍റെ ആവശ്യപ്രകാരം ഹയര്‍ സെക്കന്‍ഡറി വിഭാഗം ഡയറക്ടർ ഇതുസംബന്ധിച്ച ഉത്തരവിറക്കി. പെണ്‍കുട്ടികള്‍ക്കുള്ള എല്ലാ സൗകര്യങ്ങളും ഏര്‍പ്പെടുത്തിയിട്ടുണ്ട്. 1891ല്‍ മെട്രിക്കുലേഷന്‍ ക്ലാസും അതിനു തൊട്ടുതാഴെയുള്ള ഫിഫ്ത് ക്ലാസും (ഇന്നത്തെ പ്ലസ്ടു, പ്ലസ് വണ്‍) ആരംഭിച്ചുകൊണ്ട് തുടക്കംകുറിച്ച ചങ്ങനാശേരി ബര്‍ക്ക്മാന്‍സ് കോളജ് സ്‌കൂള്‍ കേരളത്തിലെ സുറിയാനി ക്രിസ്ത്യാനികളുടെ ആദ്യത്തെ ഉന്നതവിദ്യാഭ്യാസ കേന്ദ്രമാണ്. പടിപടിയായി വളര്‍ന്ന് സര്‍വകലാശാലയായി മാറണമെന്ന് ആഗ്രഹത്തോടെ ബിഷപ് മാർ ചാള്‍സ് ലവീഞ്ഞ് സ്ഥാപിച്ചതാണ് സ്‌കൂള്‍. 1922ല്‍ ഡിഗ്രി ക്ലാസുകള്‍ ആരംഭിച്ചു. തുടര്‍ന്ന് സ്‌കൂളില്‍ നടന്നിരുന്ന മെട്രിക്കുലേഷന്‍ ക്ലാസ് കോളജിന്‍റെ ഭാഗമായി മാറി. എസ്ബി സ്‌കൂളിന്‍റെ വനിതാവിഭാഗമാണ് ചങ്ങനാശേരിയിലെ പ്രശസ്തമായ സെന്‍റ് ആന്‍സ് സ്‌കൂളായി വളര്‍ന്നത്. ഹയര്‍ സെക്കന്‍ഡറി ആരംഭിച്ചിട്ട് 27 വര്‍ഷം പിന്നിടുമ്പോള്‍ പെണ്‍കുട്ടികള്‍ക്ക് അവസരം ചങ്ങനാശേരി മേഖലയില്‍ ഹയര്‍സെക്കന്‍ഡറി വിഭാഗത്തില്‍ പെണ്‍കുട്ടികള്‍ക്ക് പഠിക്കാനുള്ള സീറ്റുകളുടെ ദൗര്‍ലഭ്യം കണക്കിലെടുത്താണ് ചങ്ങനാശേരി അതിരൂപത നേരിട്ടു നിയന്ത്രിക്കുന്ന എസ്ബി സ്‌കൂളിനെ മിക്‌സഡ്‌ സ്‌കൂളാക്കി മാറ്റാന്‍ തീരുമാനിക്കുകയും ഇക്കാര്യത്തിന് സര്‍ക്കാരിന്‍റെ അംഗീകാരം വാങ്ങുകയും ചെയ്തത്. 1998ല്‍ കോളജുകളില്‍നിന്ന് പ്രീഡിഗ്രി ഡീലിങ്ക് ചെയ്തപ്പോഴാണ് എസ്ബി സ്‌കൂള്‍ ഹയര്‍ സെക്കന്‍ഡറിയായി ഉയര്‍ത്തപ്പെട്ടത്. ബയോളജി, കമ്പ്യൂട്ടര്‍, കൊമേഴ്‌സ് എന്നീ വിഷയങ്ങളില്‍ രണ്ടു ബാച്ചുകളിലായി മുന്നൂറു വിദ്യാര്‍ഥികള്‍ക്കാണ് ഇവിടെ പ്രവേശനം ലഭിക്കുന്നത്. ശാന്തമായ കാമ്പസ്, ആധുനിക സൗകര്യങ്ങൾ, ഉന്നത പഠനനിലവാരം ശാന്തമായ അന്തരീക്ഷമുള്ള കാമ്പസ്, മികച്ച പഠനമുറികള്‍, ലബോറട്ടറികള്‍, ലൈബ്രറി, പ്ലേ ഗ്രൗണ്ടുകള്‍ എന്നിവകൊണ്ട് അനുഗ്രഹീതമായ സ്‌കൂള്‍ ചങ്ങനാശേരി അതിരൂപത നേരിട്ടു നടത്തുന്ന ഏക എയ്ഡഡ് ഹയര്‍ സക്കന്‍ഡറി സ്‌കൂളാണ്. ആര്‍ച്ച്ബിഷപ് മാര്‍ തോമസ് തറയില്‍ രക്ഷാധികാരിയും ഫാ. ടോണി ചെത്തിപ്പുഴ ലോക്കല്‍ മാനേജരുമായുള്ള സമിതിയാണ് സ്‌കൂളിന്‍റെ ഭരണച്ചുമതല നിര്‍വഹിക്കുന്നത്. ഫാ. ആന്‍റണി മൂലയില്‍ കോര്‍പറേറ്റ് മാനേജറുമാണ്. 1891ല്‍ മദ്രാസ് സര്‍വകലാശാലയോട് അഫിലിയേറ്റ് ചെയ്താണ് ഇന്നത്തെ ഹയര്‍ സെക്കന്‍ഡറിക്കു തുല്യമായതും അക്കാലത്ത് സര്‍വകലാശാല നടത്തിയിരുന്നതുമായ മെട്രിക്കുലേഷന്‍ ക്ലാസ് തുടങ്ങിക്കൊണ്ട് വിശുദ്ധ സെന്‍റ് ബര്‍ക്കുമാന്‍സിന്‍റെ നാമധേയത്തില്‍ വിദ്യാലയത്തിനു തുടക്കംകുറിച്ചത്. സുറിയാനി ക്രിസ്ത്യാനികള്‍ക്കുവേണ്ടി ആരംഭിച്ച വിദ്യാലയത്തില്‍ എല്ലാ ജാതി-മതസ്ഥരേയും ഒരേബെഞ്ചിലിരുത്തി പഠിപ്പിച്ചപ്പോള്‍ എസ്ബി സ്‌കൂള്‍ ചരിത്രത്തില്‍ വേറിട്ട വിദ്യാലയമായി മാറിയതിനൊപ്പം മധ്യതിരുവിതാംകൂറിലെ ഉന്നത വിദ്യാഭ്യാസ കേന്ദ്രമായി വളര്‍ന്നു പന്തലിക്കുകയും ചെയ്തു. അതിരൂപതയുടെ കീഴിലുള്ള എസ്ബി, അസംപ്ഷന്‍ കോളജുകളില്‍ കഴിഞ്ഞ അധ്യയനവര്‍ഷം മിക്‌സഡ് കലാലയമാക്കിയിരുന്നു.

കായൽപ്പുറം പള്ളിയിൽ തിരുനാൾ

മങ്കൊമ്പ്: പുളിങ്കുന്ന് കായൽപ്പുറം സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പിതാവിന്‍റെ തിരുനാളിന്‍റെ ഭാഗമായി ഇന്നു രാവിലെ 6.45ന് സപ്ര, വൈകുന്നേരം 4.30ന് ജപമാല, വിശുദ്ധ കുർബാന. നാളെ വൈകുന്നേരം 4.30ന് ജപമാല, വിശുദ്ധ കുർബാന, സന്ദേശം, മധ്യസ്ഥപ്രാർഥന, രാത്രി ഏഴിന് നാടകം. പത്തിന് വിശുദ്ധ കുർബാന സ്വീകരണം, രാവിലെ 6.45ന് സപ്ര, വിശുദ്ധ കുർബാന, സന്ദേശം, വൈകുന്നേരം മൂന്നിന് തിരുസ്വരൂപം പ്രധാന കവാടത്തിൽ എഴുന്നള്ളിച്ചുവയ്ക്കുന്നു. തുടർന്ന് വാഹനവെഞ്ചരിപ്പ്, 3.30ന് ജപമാല, വിശുദ്ധ കുർബാന, ദിവ്യകാരുണ്യ ആരാധന, 5.30ന് ദിവ്യകാരുണ്യ പ്രദക്ഷിണം, തുടർന്ന മധ്യസ്ഥപ്രാർഥന, ലദീഞ്ഞ്, തുറവശേരി ജംഗ്ഷനിലേക്ക് പ്രദക്ഷിണം. പ്രധാന തിരുനാൾ ദിനമായ 11ന് രാവിലെ ആറിന് വിശുദ്ധ കുർബാന, വചനസന്ദേശം, ഫാ. ജയ്‌സൺ മാവേലിൽ, എട്ടിനും 12നും വൈകുന്നേരം 3.30നും നടക്കുന്ന വിശുദ്ധ കുർബാനകൾക്ക് റവ.ഡോ. ടോം പുത്തൻകളം, ഫാ. ജോബി പരുവപ്പറമ്പിൽ, ഫാ. ജേക്കബ് കാട്ടടി എന്നിവർ മുഖ്യകാർമികത്വം വഹിക്കും. 10ന് തിരുനാൾ കുർബാന ഫാ. ജിജോ കുറിയന്നൂർപറമ്പിൽ, വൈകുന്നേരം അഞ്ചിന് മധ്യസ്ഥപ്രാർഥന, തിരുനാൾ പ്രദക്ഷിണം, ഫാ. ജയിംസ് കണിക്കുന്നേൽ, ആറിന് കൊടിയിറക്ക്. വികാരി ഫാ. അഗസ്റ്റിൻ പൊങ്ങനാംതടത്തിൽ, കൈക്കാരൻ ജോസഫ് ജോസഫ് തെക്കേവയലാറ്റ്, തിരുനാൾ കമ്മിറ്റി പ്രസിഡന്‍റ് സാബു കോയിപ്പള്ളി, സാബു പുന്നൂർ, ജോസ് ആക്കാത്തറ, അനോജ് മൂലേപ്പറമ്പിൽ തുടങ്ങിയവർ നേതൃത്വം നൽകും. കണ്ണാടി സെന്‍റ് റീത്താസ് പള്ളിയിൽ തിരുനാൾ പുളിങ്കുന്ന്: കണ്ണാടി സെന്‍റ് റീത്താസ് പള്ളിയിൽ ഇടവക മധ്യസ്ഥയായ വിശുദ്ധ റീത്തായുടെ തിരുനാൾ നാളെ മുതൽ 18 വരെ ആഘോഷിക്കും. നാളെ വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജോൺ മഠത്തിപ്പറന്പിൽ. പത്തിന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, കുട്ടികളുടെ വിശുദ്ധ കുർബാന സ്വീകരണം, സന്ദേശം-ഫാ. ജോസഫ് മാലിത്തറ. 11ന് രാവിലെ 6.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം- റവ.ഡോ. അലക്സ് കൊല്ലംകളം, ഫാ. ചാക്കോ ആക്കാത്തറ സിഎംഐ. 12ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജേക്കബ് കാട്ടടി. 13ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജോസ് കോനാട്ട് സിഎംഐ. 14ന് വൈകുന്നേരം 4.30ന് കൊടിയേറ്റ്, ലദീഞ്ഞ്-വികാരി ഫാ. ചക്കുപുരയ്ക്കൽ. മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. സിറിയക് പഴയമഠം. തുടർന്ന് ഇടവകദിനം, പൂർവികസ്മരണ, കലാസന്ധ്യ. 15ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-ഫാ. ജസ്റ്റിൻ കായംകുളത്തുശേരി, ഫാ. ജെന്നി കായംകുളത്തുശേരി. തുടർന്ന് ദിവ്യകാരുണ്യ പ്രദക്ഷിണം. തീർഥാടന ദിനമായ 16ന് രാവിലെ 8.30ന് പുളിങ്കുന്ന് ഫൊറോന പള്ളിയിൽനിന്നു തീർഥാടനം ആരംഭിക്കും. തുടർന്ന് 10.45ന് തീർഥാടകർക്ക് സ്വീകരണം. സന്ദേശം - ആർച്ച്ബിഷപ് എമിരറ്റസ് മാർ ജോസഫ് പെരുന്തോട്ടം. തുടർന്ന് സമൂഹബലി-റവ.ഡോ. ടോം പുത്തൻകളം മുഖ്യകാർമികത്വം വഹിക്കും. മധ്യസ്ഥപ്രാർഥന, നേർച്ചഭക്ഷണം. രാത്രി ഏഴിന് കാഞ്ഞിരപ്പള്ളി അമലയുടെ നാടകം "തച്ചൻ'. 17ന് വൈകുന്നേരം 4.30ന് മധ്യസ്ഥപ്രാർഥന, വിശുദ്ധ കുർബാന, സന്ദേശം-അതിരൂപത വികാരി ജനറാൾ ഫാ. ആന്‍റണി എത്തക്കാട്ട്. തുടർന്ന് തിരുനാൾ പ്രദക്ഷിണം-ഫാ. റ്റിബിൻ ഒറ്റാറയ്ക്കൽ. തിരുനാൾദിനമായ 18ന് രാവിലെ ആറിന് വിശുദ്ധ കുർബാന. 9.30ന് തിരുനാൾ കുർബാന, സന്ദേശം-ഫാ. ജോർജ് നെടുംപറന്പിൽ ഒഎഫ്എം ക്യാപ്. തുടർന്ന് പ്രദക്ഷിണം, കൊടിയിറക്ക്.

നിയമക്കുരുക്കുകൾ മറികടന്ന് അർത്തുങ്കൽ മത്സ്യബന്ധന തുറമുഖം യാഥാർഥ്യത്തിലേക്ക്

ചേർത്തല: നിയമക്കുരുക്കുകൾ തരണം ചെയ്ത് അർത്തുങ്കൽ മത്സ്യബന്ധന തുറമുഖത്തിന്‍റെ പുലിമുട്ട് നിർമാണ ടെൻഡറിന് സംസ്ഥാന മന്ത്രിസഭ അംഗീകാരം നൽകിയതായി കൃഷിമന്ത്രി പി. പ്രസാദ് അറിയിച്ചു. പുലിമുട്ടുകളുടെ ശേഷിക്കുന്ന നിർമാണത്തിന് 103 കോടി രൂപയുടെ കരാറിനാണ് അംഗീകാരം. തീരദേശത്തിന്‍റെ സ്വപ്നപദ്ധതിയായ അർത്തുങ്കൽ മത്സ്യബന്ധന തുറമുഖത്തിന്‍റെ ഏറ്റവും പ്രധാനപ്പെട്ട ഭാഗമായ പുലിമുട്ട് നിർമാണത്തിന്‍റെ കരാർ നിയമക്കുരുക്കുകളിൽ അകപ്പെട്ടിരുന്നു. ഫിഷറീസ് മന്ത്രി സജി ചെറിയാനുമായി ചേർന്ന് നടത്തിയ നിരന്തര പരിശ്രമഫലമായാണ് നിയമതടസങ്ങളെല്ലാം മറികടന്ന് കരാറിന് അംഗീകാരമായത്. രണ്ടുഘട്ടങ്ങളായി അനുവദിച്ച പണം ഉപയോഗിച്ച് നിര്‍മാണം പൂർത്തിയാക്കാൻ സാധിച്ചിരുന്നില്ല. നിലവിൽ വടക്കേ പുലിമുട്ട് 260 മീറ്ററും തെക്കേ പുലിമുട്ട് 510 മീറ്ററുമണ് പൂർത്തിയായിട്ടുള്ളത്. രാജ്യത്ത് ആദ്യമായി കടലിലെ ചെളി മൂലമുള്ള സിങ്കേജ് കാരണം പണി മുടങ്ങുമെന്ന ഘട്ടത്തിൽ കൃഷിമന്ത്രിയുടെയും ഫിഷറീസ് മന്ത്രിയുടെയും ഇടപെടലിന്‍റെ ഫലമായി രാജ്യത്ത് ആദ്യമായി എഫ്ഐഡിഎഫ് പദ്ധതിയിൽ ഉൾപ്പെടുത്തി നബാർഡ് മുഖേന വായ്പ ലഭിച്ചതാണ് പദ്ധതിക്ക് പുനർജന്മമേകിയത്. പൂർണമായും തിരിച്ചടയ്ക്കേണ്ട വായ്പയായി ലഭിക്കുന്ന പണം ഉപയോഗിച്ചുള്ള കരാറിനാണ് ഇപ്പോൾ അംഗീകാരം ലഭിച്ചത്. 5.07% വാർഷിക പലിശയിൽ ലഭിക്കുന്ന തുകയ്ക്ക് രണ്ട് വർഷത്തെ മൊറട്ടോറിയം ഉൾപ്പെടെ 12 വർഷമാണ് തിരിച്ചടവ് കാലാവധി. പണി പൂർത്തിയാക്കാനുള്ള സമയപരിധി മേയ് 2025 ആയിരുന്നെങ്കിലും പിന്നീട് അത് 2027 വരെ ദീർഘിപ്പിച്ചു നൽകിയിട്ടുണ്ട്. പുലിമുട്ട് നിർമാണം പുനരാരംഭിക്കുന്നതിന് ഹാർബർ എന്‍ജിനിയറിംഗ് വകുപ്പ് ടെൻഡർ ചെയ്തെങ്കിലും ഒരു കരാറുകാരൻ കോടതിയെ സമീപിച്ചതോടെ മുന്നോട്ട് പോയില്ല. ടെൻഡർ റദ്ദാക്കി പുതിയതു ക്ഷണിച്ചെങ്കിലും നിയമ പ്രശ്നങ്ങൾ തുടർന്നു. തുടർന്ന് അഡ്വക്കറ്റ് ജനറലിന്‍റെ നിയമോപദേശത്തിന്‍റെ അടിസ്ഥാനത്തിലാണ് മന്ത്രിസഭാ തീരുമാനം. കരാർ നടപടികൾ ഇതോടെ ഇനി നിർമിക്കാനുള്ള 655 മീറ്റർ തെക്കേ പുലിമുട്ട്, 190 മീറ്റർ വടക്കേ പുലിമുട്ട് എന്നിവയുടെ നിർമാണം ഉടൻ ആരംഭിക്കുവാൻ സാധിക്കും. കൂടാതെ പദ്ധതിയുടെ ഭാഗമായുള്ള ടോയ്‌ലറ്റ് ബ്ലോക്ക്, ലോക്കർ റൂം, ഫിഷ് ലാൻഡിംഗ് സെന്‍റർ - ഫിഷിംഗ് ഹാർബർ റോഡ് തുടങ്ങിയവയുടെ നിർമാണം ഏകദേശം പൂർത്തിയായിട്ടുണ്ട്. ഓവർഹെഡ് വാട്ടർ ടാങ്ക് നിർമാണം, ഐസ് പ്ലാന്‍റ്, ഹൈഡ്രോഗ്രാഫിക് സർവേയറുടെ കാര്യാലയം എന്നിവയുടെ കരാർ നടപടികൾ പുരോഗമിക്കുകയുമാണ്.

എടത്വ പള്ളിയില്‍ ദര്‍ശന സായൂജ്യമേകി തിരുനാള്‍ പ്രദക്ഷിണം

തമിഴ് മക്കള്‍ മടങ്ങി, ഇനി നാട്ടുകാരുടെ തിരുനാള്‍ എടത്വ: ഭക്തിനിറവില്‍ ഭക്തലക്ഷങ്ങള്‍ക്ക് ദര്‍ശനസായൂജ്യമേകി എടത്വ സെന്‍റ് ജോര്‍ജ് ഫൊറോനാ പള്ളിയില്‍ വിശുദ്ധ ഗീവര്‍ഗീസിന്‍റെ അത്ഭുത തിരുസ്വരൂപവും വഹിച്ചുള്ള തിരുനാള്‍ പ്രദക്ഷിണം നടന്നു. പ്രദക്ഷിണം തുടങ്ങുമ്പോള്‍ വഴികളെല്ലാം എടത്വ പള്ളിയെന്ന ലക്ഷ്യത്തിലേക്ക് നീളുകയായിരുന്നു. ആണ്ട് വട്ടത്തില്‍ ഒരിക്കല്‍ മാത്രമാണ് വിശുദ്ധ ഗീവര്‍ഗീസ് സഹദായുടെ പുണ്യരൂപം പുറത്തേക്ക് എഴുന്നള്ളിക്കുന്നത്. പ്രദക്ഷിണത്തില്‍ പങ്കെടുക്കാന്‍ രാവിലെ മുതല്‍ പള്ളിയങ്കണത്തിലേക്ക് വിശ്വാസികളുടെ പ്രവാഹമായിരുന്നു. ചെണ്ടയും ബാന്‍റുകളും ദ്രുതതാളം മീട്ടി. വൈദ്യുതദീപാലങ്കാരങ്ങളാല്‍ അലംകൃതമായ പള്ളി അഭൗമതേജസില്‍ ആറാടിനിന്നു. വിശുദ്ധന്‍റെ തിരുസ്വരൂപത്തില്‍ വെറ്റിലകളും പൂക്കളും വാരിയെറിഞ്ഞ് വിശ്വാസികള്‍ പ്രാര്‍ഥനാനിരതരായി. പാരീഷ് കമ്മിറ്റി അംഗങ്ങളും സ്‌പെഷല്‍ കമ്മിറ്റി അംഗങ്ങളും കൈവലയം തീര്‍ത്ത് തിരുസ്വരൂപത്തിനു സംരക്ഷണമേകി. പള്ളിക്ക് പ്രദക്ഷിണം വച്ച വിശുദ്ധ ഗീവര്‍ഗീസിന്‍റെ തിരുസ്വരൂപം ഏഴിന് ദേവാലയത്തിന്‍റെ പ്രധാന കവാടത്തിലെത്തിയപ്പോള്‍ പ്രത്യേക പ്രാര്‍ഥനാശുശ്രൂഷകളോടെ തിരുനാള്‍ പ്രദക്ഷിണത്തിനു സമാപനമായി. തമിഴ് മക്കള്‍ മടങ്ങിയതോടെ നാട്ടുകാരുടെ തിരുനാളിനു തുടക്കമായി. ഇനി കേരളത്തിന്‍റെ ഇതര ഭാഗങ്ങളില്‍നിന്നുള്ള തീര്‍ഥാടകരാണ് എത്തുക. 14നാണ് എട്ടാമിടം. അന്ന് വൈകുന്നേരം നാലിന് വിശുദ്ധ ഗീവര്‍ഗീസിന്‍റെ ചെറിയ രൂപവും വഹിച്ചുകൊണ്ടുള്ള പ്രദക്ഷിണം കുരിശടിയിലേക്ക് നടക്കും. രാത്രി ഒന്‍പതിന് വിശുദ്ധ ഗീവര്‍ഗീസ് സഹദായുടെ അദ്ഭുത തിരുസ്വരൂപം പ്രധാന നടയില്‍ പ്രതിഷ്ഠിക്കുന്നതോടെ തിരുനാള്‍ കാലത്തിനു സമാപനമാവും. എടത്വ പള്ളിയില്‍ ഇന്ന് രാവിലെ 5.30ന് സപ്രാ, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ജോസഫ് വെമ്പേനിക്കല്‍, 7.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. ജോസഫ് പുതുവീട്ടില്‍കളം, 10ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. മാത്യു താന്നിയത്ത്, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. സേവ്യര്‍ വെട്ടിത്താനം, 5.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന-ഫാ. വര്‍ക്കി മണക്കളം. ഏഴിന് മധ്യസ്ഥപ്രാര്‍ഥന (കുരിശടിയില്‍).

ചെങ്ങന്നൂർ റെയിൽവേ സ്റ്റേഷൻ നവീകരണം ; 98.46 കോടി രൂപയുടെ പദ്ധതിക്ക് അന്തിമ അംഗീകാരം

ചെങ്ങന്നൂർ: റെയിൽവേ സ്റ്റേഷന്‍റെ സമഗ്ര നവീകരണത്തിന് 98.46 കോടി രൂപയുടെ പദ്ധതിക്ക് അന്തിമ അംഗീകാരം ലഭിച്ചതായി കൊടിക്കുന്നിൽ സുരേഷ് എംപി അറിയിച്ചു. നിരവധി തീർഥാടകരുടെയും യാത്രക്കാരുടെയും പ്രധാന ഗതാഗതകേന്ദ്രമായ ചെങ്ങന്നൂരിനെ ആധുനിക സൗകര്യങ്ങളോടെയും ഉയർന്ന നിലവാരത്തോടെയും പ്രാപ്തമാക്കുകയാണ് പദ്ധതിയിലൂടെ ലക്ഷ്യമിടുന്നത്. ശബരിമലയുടെ കവാടം എന്ന നിലയിൽ കേരളത്തിന്‍റെ പാരമ്പര്യ വാസ്തു ശില്പ പാരമ്പര്യം ഉറപ്പാക്കുന്ന തരത്തിലുള്ള രീതിയിലാണ് സ്റ്റേഷന്‍റെ പുനർനിർമാണം. സ്റ്റേഷൻ വികസനത്തിന്‍റെ ഭാഗമായി പുതിയ ടെർമിനൽ ബിൽഡിംഗ്, തീർഥാടന കേന്ദ്രം, ഓഫീസുകൾ, റെയിൽവേ ക്വാർട്ടേഴ്സ് എന്നിവ നിർമിക്കും. ആറു മീറ്റർ വീതിയുള്ള പുതിയ ഫുട് ഓവർ ബ്രിഡ്ജ്, 12 മീറ്റർ വീതിയുള്ള എയർ കോൺകോഴ്‌സ് എന്നിവയും ഒരുക്കും. വാഹനങ്ങൾക്കായി കവർ ചെയ്ത ഡ്രൈവ് വേ, ഓട്ടോ, ടാക്‌സി പ്രവേശനം, തീർഥാടന കാലത്തേക്ക് പ്രത്യേക ബസുകൾക്കുള്ള പ്രവേശന മാർഗം എന്നിവയും ഉണ്ടായിരിക്കും. പുറപ്പെടുന്നവരുടെയും എത്തുന്നവരുടെയും യാത്രാ ദിശകൾ വേർതിരിച്ച് സംവിധാനങ്ങൾ, പ്ലാറ്റ്ഫോമുകളുടെ നവീകരണം, 12 യൂണിറ്റ് റെയിൽവേ ക്വാർട്ടേഴ്സ്, നിലവിലെ രണ്ടു ലിഫ്റ്റുകൾക്ക് പുറമേ 9 ലിഫ്റ്റുകളും നിലവിലെ രണ്ടു എസ്കലേറ്ററുകൾക്ക് പുറമേ ആറ് എസ്കലേറ്ററുകളും സ്ഥാപിക്കും. മണ്ഡലത്തിലെ യാത്രാസൗകര്യങ്ങളുടെ പുരോഗതിക്കായി എടുത്ത നടപടികളുടെ ഭാഗമാണിതെന്നും പദ്ധതിയുടെ കൃത്യമായ പരിഗണനയും സമയബന്ധിതമായ പൂര്‍ത്തീകരണവും ഉറപ്പാക്കുമെന്നും കൊടിക്കുന്നിൽ സുരേഷ് എംപി അറിയിച്ചു. തീർഥാടകരുടെയും നാട്ടുകാരുടെയും സൗകര്യത്തിനായി ഏറെ ക്കാലമായി ആവശ്യപ്പെട്ടിരുന്ന വികസനമാണ് ഇപ്പോള്‍ യാഥാർഥ്യമാകുന്നതെന്നും എംപി കൂട്ടിച്ചേർത്തു.

പത്തിയൂർ പാലത്തിന്‍റെ പുനർനിർമാണം; പാലം പൊളിക്കുന്നതിനുള്ള നടപടി തുടങ്ങി

കായംകുളം: പത്തിയൂർ പാലം പുനർനിർമിക്കുന്നതിനു മുന്നോടിയായി നിലവിലെ പാലം പൊളിക്കുന്നതിനുള്ള നടപടി തുടങ്ങി. കരിപ്പുഴ തോടിനു കുറുകെയാണ് പത്തിയൂർ പാലം നിർമിച്ചിരിക്കുന്നത്. പാലം പൊളിക്കുമ്പോൾ യാത്രക്കാർക്ക് നടന്നുപോകുന്നതിന് സംവിധാനമൊരുക്കുമെന്ന് അധികൃതർ പറഞ്ഞു. ആറുമാസത്തിനുള്ളിൽ പാലം പണി പൂർത്തിയാകുമെന്നാണ് പ്രതീക്ഷിക്കുന്നത്. പാലം നിർമിക്കുന്നതിന് 2.78 കോടി രൂപ അനുവദിച്ചിട്ടുണ്ട്. പാലത്തിന് 27 മീറ്റർ നീളവും രണ്ടുവരി ഗതാഗതത്തിനാവശ്യമായ 7.5 മീറ്റർ കാര്യേജ് വേയും ഇരുവശങ്ങളിൽ നടപ്പാതയുമുൾപ്പെടെ 11 മീറ്ററാണ് ആകെ വീതി. കിഫ്ബി പദ്ധതിയിലുൾപ്പെടുത്തി ഭഗവതിപ്പടി - കരീലക്കുളങ്ങര മല്ലിക്കാട് കടവ് റോഡിന്‍റെ പുനർനിർമാണത്തിന്‍റെ അനുബന്ധമായി പത്തിയൂർപാലം നിർമാണവും ഉൾപ്പെട്ടിരുന്നു. പദ്ധതിക്കായി 20.24 കോടി രൂപയാണ് അനുവദിച്ചിരുന്നത്. ഡിസൈൻ ലഭ്യമാക്കുന്നതിലും യൂട്ടിലിറ്റി ഷിഫ്റ്റിംഗിനുള്ള കാലതാമസവും പാലം നിർമാണം വൈകുന്നതിന് കാരണമായി. തുടർന്ന് റോഡ് നിർമാണപ്രവർത്തനങ്ങൾ പൂർത്തിയായ ശേഷം പാലം നിർമാണത്തിനായി 2.78 കോടി രൂപയുടെ സാങ്കേതികാനുമതി നൽകി പുതിയ കമ്പനിക്ക് കരാർ നൽകുകയായിരുന്നു. കേരള റോഡ് ഫണ്ട് ബോർഡിനാണ് നിർമാണച്ചുമതല. പാലം പൊളിക്കുന്നതിനു മുന്നോടിയായി ഇതുവഴിയുള്ള വാഹനഗതാഗതം നിരോധിച്ചിരിക്കുകയാണ്. കരീലക്കുളങ്ങര ഭാഗത്ത് നിന്ന് ഭഗവതിപ്പടി ഭാഗത്തേക്കു പോകേണ്ട വാഹനങ്ങൾ ചീറ്റാകേരി ജംഗ്ഷനിൽനിന്ന് വലത്തോട്ടുതിരിഞ്ഞ് എരുവ പാലം കയറി ഇടത്തോട്ടുതിരിഞ്ഞ് പത്തിയൂർ ആൽത്തറ വഴി ഭഗവതിപ്പടി ഭാഗത്തേക്കു പോകേണ്ടതാണ്. ഭഗവതിപ്പടി ഭാഗത്തുനിന്ന് കരീലക്കുളങ്ങര ഭാഗത്തേക്കുപോകേണ്ട വാഹനങ്ങളും ഇതേവഴി ഉപയോഗിക്കണം. താത്കാലിക സംവിധാനം ഒരുക്കണം: യൂത്ത് കോൺഗ്രസ് പത്തിയൂർ പാലം പൊളിച്ചുമാറ്റുന്നതിനു മുമ്പ് താത്കാലിക സംവിധാനം ഒരുക്കണമെന്ന് യൂത്ത് കോൺഗ്രസ് ആവശ്യപ്പെട്ടു. സമാന്തരമായി താത്കാലിക പാലം പണിതില്ലെങ്കിൽ ആൾക്കാർ രണ്ടു കിലോമീറ്റർ ചുറ്റിക്കറങ്ങി യാത്ര ചെയ്യേണ്ടിവരും.

വനിതാ ഡോക്ടറുടെ മ്യൂറൽ പെയിന്‍റിംഗുകൾ വേറിട്ട കാഴ്ചയാകുന്നു

അമ്പലപ്പുഴ: വനിതാ ഡോക്ടർ വരച്ച മ്യൂറൽ പെയിന്‍റിംഗുകൾ വേറിട്ട കാഴ്ചയാകുന്നു. അമ്പലപ്പുഴ പടിഞ്ഞാറേ നടയിൽ സൗഗന്ധികം വീട്ടിൽ ഡോ. വി.വേണുഗോപാലിന്‍റെ ഭാര്യ ഡോ. ഉമാ വേണുഗോപാലാണ് മ്യൂറൽ പെയിന്‍റിംഗിൽ വിസ്മയം തീർത്തത്. 10 വർഷമായി ആലപ്പുഴ സതീഷ് വാഴവേലിൽ, സുനിൽ വാക ഗുരുവായൂർ എന്നിവരുടെ ശിക്ഷണത്തിലാണ് ചുവർച്ചിത്ര പഠനം നടത്തുന്നത്. 50 ലേറെ ചിത്രങ്ങൾ വരച്ചിട്ടുണ്ട്. 10ഓളം ചിത്രങ്ങൾ മറ്റുള്ളവർക്ക് സമ്മാനിച്ചിട്ടുണ്ട്. അമ്പലപ്പുഴ ക്ഷേത്രത്തിൽ സമർപ്പിച്ച കാളിയ മർദനം, ഗുരുവായൂരപ്പൻ എന്നീ ചിത്രങ്ങൾ നാടകശാലയിൽ പ്രദർശിപ്പിച്ചു പോരുന്നു. അമ്പലപ്പുഴ കുഞ്ചൻ നമ്പ്യാർ സ്മാരകത്തിന്‍റെ ഉദ്ഘാടനത്തോടനുബന്ധിച്ച് 40ലേറെ ചിത്രങ്ങൾ ഉൾപ്പെടുത്തിയ പ്രദർശനവും സംഘടിപ്പിച്ചിരുന്നു. ശ്രീകൃഷ്ണന്‍റെ പല ഭാവത്തിലുള്ള ചിത്രങ്ങൾ കൂടാതെ അനന്ത ശയനം, ഗണപതി, സരസ്വതി, മഹാലക്ഷ്‌മി, ശിവൻ, ഹനുമാൻ, യേശുക്രിസ്തു, കന്യാമറിയം, മദർ തെരേസ, കഥകളി, തെയ്യം എന്നിവയെല്ലാം ചിത്രരചനയ്ക്കു വിഷയമായിട്ടുണ്ട്. വസ്ത്രങ്ങളിലും ക്ലോക്ക്, ഫ്ലവർ വേസ് എന്നിവയിലും മ്യൂറൽ പെയിന്‍റ് ചെയ്തിട്ടുണ്ട്.

തെരുവുനായശല്യം രൂക്ഷം: എബിസി പദ്ധതി അട്ടിമറിച്ചതിനെതിരേ യുഡിഎഫ്

കായംകുളം: തെരുവുനായ്ക്കളുടെ ഭീഷണിയെ നേരിടുന്നതിനായി സർക്കാർ ആവിഷ്കരിച്ച എബിസി പദ്ധതി കായംകുളം നഗരസഭയും മുതുകുളം ബ്ലോക്ക് പഞ്ചായത്തും അട്ടിമറിച്ചെന്ന് യുഡിഎഫ് നേതാക്കൾ ആരോപിച്ചു. കഴിഞ്ഞ നാലുവർഷമായി എല്ലാവർഷവും അഞ്ച് ലക്ഷം രൂപ വീതമാണ് തെരുവുനായ്ക്കളുടെ ഭീഷണിയെ പ്രതിരോധിക്കാൻ കായംകുളം നഗരസഭ മുതുകുളം ബ്ലോക്ക് പഞ്ചായത്തിന് നൽകുന്നത്. കായംകുളം നഗരസഭയും സമീപത്തെ ആറു പഞ്ചായത്തുകളും ചേർന്നാണ് ഈ പദ്ധതി നടപ്പിലാക്കേണ്ടത്. എന്നാൽ, നാളിതുവരെ ഒരു രൂപ പോലും പഞ്ചായത്തുകളും നഗരസഭയും ചെലവഴിച്ചിട്ടില്ലെന്ന് യുഡിഎഫ് പാർലമെന്‍ററി പാർട്ടി ലീഡർ സി.എസ്. ബാഷ ആരോപിച്ചു. നാട് മുഴുവൻ തെരുവ് നായ്ക്കളുടെ ആക്രമണം നടക്കുമ്പോഴാണ് എബിസി പദ്ധതി ഇവിടെ അട്ടിമറിക്കപ്പെടുന്നതെന്നാണ് ആക്ഷേപം. കൂടാതെ വർഷം തോറും രണ്ട് ലക്ഷം രൂപയാണ് കായംകുളം നഗരസഭ താലൂക്ക് ആശുപത്രിയിൽ വാക്‌സിനേഷന് നൽകുന്നത്. തെരുവുനായ ആക്രമിച്ചാൽ മരുന്നില്ലെന്നു പറഞ്ഞ് ആശുപത്രിയിൽ എത്തുന്നവരെ ആലപ്പുഴ മെഡിക്കൽ കോളജിലേക്ക് റെഫർ ചെയ്യുകയാണെന്നും ആരോപണമുണ്ട്. കഴിഞ്ഞ മൂന്നുമാസത്തിനിടെ അമ്പതോളം പേരെയാണ് തെരുവുനായ്ക്കൾ ആക്രമിച്ചത്. അതിനാൽ താലൂക്ക് ആശുപത്രിയിൽ ആവശ്യത്തിന് വാക്സിൻ മരുന്നുകൾ ലഭ്യമാക്കണമെന്ന ആവശ്യവും ശക്തമാണ്.

മില്ലുടമകൾ നെല്ല് സംഭരിച്ചില്ല, കൃഷി ഓഫീസറെ ഉപരോധിച്ചു

മാന്നാർ: കൊയ്തെടുത്ത നെല്ല് ചാക്കിൽക്കെട്ടി സൂക്ഷിക്കാൻ തുടങ്ങിയിട്ട് ആഴ്ചകളായി. എന്നാൽ, ഇവ സംഭരിക്കാൻ മില്ലുടമകൾ എത്താത്തത് പ്രതിഷേധങ്ങൾക്കു കാരണമായി. നെല്ല് സംഭരിക്കാൻ മില്ലുടമകൾ എത്തുമെന്ന പ്രതീക്ഷയിൽ നെല്ല് ചാക്കിൽ നിറച്ച് കാത്തിരുന്ന കർഷകരോട് നെല്ല് വേണ്ടെന്ന് മില്ലുടമകൾ പറഞ്ഞതോടെ കർഷകർ പ്രതിസന്ധിയിലായി. സംഭവമറിഞ്ഞ് എത്തിയ കൃഷി ഓഫീസറെ കർഷകർ ഉപരോധിച്ചു. അപ്പർകുട്ടനാടൻ മേഖലയിൽ മാന്നാർ കൃഷിഭവന്‍റെ കീഴിലുള്ള കുരട്ടിശേരി പുഞ്ചയിലെ വേഴത്താർ പാടശേഖരത്തിലാണ് നാടകീയരംഗങ്ങൾ അരങ്ങേറിയത്. കൊയ്ത് പത്തുദിവസം കഴിഞ്ഞ നെല്ല് കിഴിവ് പറഞ്ഞ് എടുക്കാൻ മില്ലുടമകൾ തയാറാവുകയും വാഹനം എത്തുന്നതും പ്രതീക്ഷിച്ച് പുറത്തുനിന്ന് ചാക്ക് എത്തിച്ച്, നെല്ല് നിറച്ച് ബണ്ടിൽ തയാറാക്കി വയ്ക്കുകയും ചെയ്തു. എന്നാൽ, വേഴത്താർ പാടശേഖരത്തിലെ കർഷരോട് ഇനി നെല്ല് വേണ്ടായെന്ന് മില്ലുടമകൾ അറിയിച്ചതോടെയാണ് കർഷകർ സംഘടിച്ചത്. വിവരം അറിഞ്ഞ് പരിശോധിക്കാൻ വന്ന മാന്നാർ കൃഷി ഓഫീസർ പി.സി. ഹരികുമാർ, അസി. കൃഷി ഓഫീസർ സുധീർ എന്നിവരെയാണ് കർഷകർ പാടശേഖരത്ത് ഉപരോധിച്ചത്. കർഷകരുമായി ചർച്ച നടത്തിയ കൃഷി ഓഫീസർ ഉയർന്ന ഉദ്യോഗസ്ഥരെ വിവരം അറിയിച്ച് നെല്ല് സംഭരണത്തിനുവേണ്ട നടപടികൾ കൈക്കൊള്ളുമെന്ന് അറിയിച്ചതിനെത്തുടർന്നാണ് കർഷകർ ഉപരോധം അവസാനിപ്പിച്ചത്. അടുത്തദിവസങ്ങളിൽ നെല്ലുസംഭരണം നടന്നില്ലെങ്കിൽ നെല്ല് മുഴുവൻ പഞ്ചായത്തിലും കൃഷി ഓഫീസിലും എത്തിച്ച് പ്രതിഷേധിക്കുമെന്ന് കർഷകർ അറിയിച്ചു. ഇനിയും സംഭരണം നടന്നില്ലെങ്കിൽ തുടർച്ചയായ മഴയിൽ നെല്ല് നശിക്കാനും സാധ്യതയുണ്ടെന്ന് കർഷകർ പറയുന്നു. എത്രയും വേഗം നെല്ലുസംഭരണത്തിനുള്ള നടപടികൾ കൈക്കൊള്ളണമെന്ന് പാടശേഖരസമിതി ഭാരവാഹികളും കർഷകരുടെ പ്രതിസന്ധി പരിഹരിക്കുന്നതിന് കൃഷിവകുപ്പ് ഉന്നത ഉദ്യോഗസ്ഥർ അടിയന്തര ഇടപെടലുകൾ നടത്തണമെന്ന് സംയുക്ത പാടശേഖരസമിതി പ്രസിഡന്‍റ് ബിജു ഇക്ബാൽ, സെക്രട്ടറി ഷുജാബുദ്ദീൻ എന്നിവരും ആവശ്യപ്പെട്ടു.

കണ്ടഭാവമില്ലാതെ അധികൃതർ

ചെങ്ങന്നൂർ: ചെങ്ങന്നൂർ റെയിൽവേ ഇരുപത്തിയഞ്ചാം വാർഡിലെ കോതാലിൽ-വടക്കേമുറി പാലത്തിന്‍റെ അപ്രോച്ച് റോഡ് തകർന്ന് നാലുവർഷം പിന്നിട്ടിട്ടും അധികൃതർ കണ്ടില്ലെന്ന് നടിക്കുന്നു. പാലത്തിന്‍റെ കൽക്കെട്ട് ഇടിഞ്ഞുവീണ് തോട്ടിലേക്ക് പതിച്ചതോടെ യാത്രക്കാരും സമീപവാസികളും ഒരുപോലെ അപകടഭീഷണിയിലാണ്. നാലുവർഷം മുൻപ് തകർന്നുവീണ ഭാഗം ഇപ്പോൾ അപകടത്തുരുത്തായിരിക്കുകയാണ്. ഇറിഗേഷൻ വകുപ്പ് മൂന്നുതവണ സ്ഥലത്തെത്തി എസ്റ്റിമേറ്റ് തയാറാക്കിയെങ്കിലും തുടർ നടപടികൾ ഉണ്ടായില്ലെന്ന് വാർഡ് കൗൺസിലർ സിനി ബിജു പറയുന്നു. ആദ്യം ഒൻപതു ലക്ഷം രൂപയും പിന്നീട് 16 ലക്ഷം രൂപയും ഒടുവിൽ 20 ലക്ഷം രൂപയുമാണ് കണക്കാക്കിയിട്ടുള്ളത്. എന്നാൽ, നിലവിലെ സാഹചര്യത്തിൽ സുരക്ഷാഭിത്തിയും റോഡും വീണ്ടും തകർന്നുവീഴാൻ സാധ്യതയുള്ളതിനാൽ ഈ തുക മതിയാകില്ലെന്ന് പറയപ്പെടുന്നു. നാലു വർഷത്തിലേറെയായിട്ടും തകർന്ന റോഡ് പുനർനിർമിക്കാത്തതിൽ പ്രദേശവാസികൾക്കു കടുത്ത അമർഷമുണ്ട്. ചെങ്ങന്നൂർ എംഎൽഎയും മന്ത്രിയുമായ സജി ചെറിയാനുൾപ്പെടെയുള്ള അധികൃതർക്കു പരാതി നൽകിയിട്ടും ഫണ്ടില്ലെന്ന കാരണം പറഞ്ഞ് അധികൃതർ ഒഴിഞ്ഞുമാറുകയാണെന്ന് നാട്ടുകാർ ആരോപിക്കുന്നു. അതിനിടയിൽ ഈ അപകടകരമായ റോഡിലൂടെ സഞ്ചരിക്കവേ സ്കൂട്ടറുകളും കാറുകളും ഉൾപ്പെടെ നിരവധി വാഹനങ്ങൾ തോട്ടിലേക്ക് മറിഞ്ഞ് അപകടങ്ങൾ സംഭവിച്ചിട്ടുണ്ട്. മതിലുകളില്ലാത്ത നിരവധി വീടുകളാണ് തോടിന്‍റെ സമീപത്തുള്ളത്. സ്കൂൾ കുട്ടികൾ ഉൾപ്പെടെ നിരവധി പേരാണ് ഈ വഴിയിലൂടെ ദിവസവും യാത്ര ചെയ്യുന്നത്. കോട്ടയം എറാണകുളം ഭാഗത്തുനിന്നു വരുന്നവർക്ക് ചെങ്ങന്നൂർ റെയിൽവേ സ്റ്റേഷനിലേക്കു പോകാനുള്ള എളുപ്പവഴിയാണിത്. കാലവർഷം ആരംഭിക്കുന്നതോടെ ഇവിടത്തെ സ്ഥിതി കൂടുതൽ ഗുരുതരമാകും. റോഡ് ഒരുവശത്തേക്ക് ചരിഞ്ഞുകിടക്കുന്നതിനാൽ സമീപത്തെ വീടുകൾക്കും ഇത് ഭീഷണിയായി മാറിയിരിക്കുകയാണെന്ന് നാട്ടുകാർ പറയുന്നു. അടിയന്തരമായി അധികൃതർ ഇടപെട്ട് തകർന്ന അപ്രോച്ച് റോഡ് പുനർനിർമിക്കണമെന്നാണ് നാട്ടുകാരുടെ ആവശ്യം. ഇനിയും അപകടങ്ങൾ സംഭവിക്കുന്നതിന് മുൻപ് അധികാരികൾ കണ്ണുതുറക്കുമോ എന്ന് നാട്ടുകാർ ആശങ്കയോടെ ചോദിക്കുന്നു.

മന്ത്രിയുടെ പ്രഖ്യാപനം നടപ്പായില്ല ജില്ലയിൽ ഷെൽട്ടറില്ലാതെ തെരുവുനായ്ക്കൾ

ആലപ്പുഴ: തെരുവുനായ ആക്രമണവും പേവിഷബാധയേറ്റുള്ള മരണവും കൂടുമ്പോഴും ജില്ലയിൽ തെരുവുനായ്ക്കൾക്കായി ഹോമില്ല. എല്ലാ തദ്ദേശ സ്ഥാപനങ്ങളിലും തെരുവുനായ ഷെൽട്ടർ ഹോം സ്ഥാപിക്കുമെന്നു മന്ത്രി എം.ബി. രാജേഷ് നേരത്തേ പ്രഖ്യാപിച്ചിരുന്നു. എന്നിട്ടും 78 തദ്ദേശ സ്ഥാപനങ്ങളുള്ള ജില്ലയിൽ ഒരു ഷെൽട്ടർ ഹോം പോലും സജ്ജമാക്കാനായിട്ടില്ല. ജില്ലയിൽ മുൻപു രണ്ടു തെരുവുനായ വന്ധ്യംകരണ കേന്ദ്രങ്ങളുണ്ടായിരുന്നതിൽ ഒരെണ്ണത്തിനു മാത്രമാണു പുതുക്കിയ മാനദണ്ഡങ്ങൾ പ്രകാരം അനുമതി ലഭിച്ചിട്ടുള്ളത്. ഇവിടെ ദിവസം പത്തോളം നായ്ക്കളെയാണു വന്ധ്യംകരിക്കാനാകുക. ശസ്ത്രക്രിയയ്ക്കുശേഷം ഏകദേശം 50 നായ്ക്കളെ പാർപ്പിക്കാനുള്ള സൗകര്യവുമുണ്ട്. രണ്ടു ബ്ലോക്ക് പഞ്ചായത്തുകൾക്ക് ഒന്നെന്ന രീതിയിൽ വന്ധ്യംകരണ കേന്ദ്രം വേണമെന്നുമെന്നാണ് സർക്കാർ നിർദേശം. വന്ധ്യംകരണ കേന്ദ്രങ്ങൾക്കുള്ള നടപടികളിൽ പുരോഗതിയുണ്ടെങ്കിലും ഷെൽട്ടർ ഹോമുകളുടെ കാര്യത്തിൽ അനക്കമില്ലാത്ത സ്ഥിതിയാണ്. ഷെൽട്ടർ ഹോം ഉണ്ടെങ്കിൽ ഉപദ്രവകാരികളായ തെരുവുനായ്ക്കളെ മാറ്റിപ്പാർപ്പിക്കാമെന്നും ഇതിലൂടെ കൂടുതൽ നായ്ക്കളിലേക്കു പേവിഷബാധയെത്തുന്നതു തടയാമെന്നും മൃഗസംരക്ഷണവകുപ്പ് അധികൃതർ തന്നെ പറയുന്നു.

വിളക്കുമരം -നെടുമ്പ്രക്കാട് പാലം വികസനപാതയിലേക്ക്

ചേർത്തല: 20 വർഷത്തോളമുള്ള കാത്തിരിപ്പിനു വിരാമം. വിളക്കുമരം-നെടുമ്പ്രക്കാട് പാലം നിർമാണം പൂർത്തിയായി. നാടിനെ വികസനത്തിലേക്ക് നയിക്കാൻ പര്യാപ്തമായ ഈ പാലം പള്ളിപ്പുറത്ത് പ്രവർത്തിക്കുന്ന ചേർത്തല ഇൻഫോപാർക്കിലേക്ക് പുതിയ സംരംഭകർ എത്തുന്നത് ഉൾപ്പെടെയുള്ള കാര്യങ്ങൾക്ക് ഗുണകരമാകുമെന്നാണ് പ്രതീക്ഷിക്കുന്നത്. ചേർത്തലയുടെ വടക്ക് പടിഞ്ഞാറൻ മേഖലയിലെ (പള്ളിപ്പുറം, തൈക്കാട്ടുശേരി, പാണാവള്ളി, അരൂക്കുറ്റി പഞ്ചായത്തുകളുടെ പടിഞ്ഞാറൻ തീരമേഖല) ജനങ്ങൾക്കാകെ വിളക്കുമരം-നെടുമ്പ്രക്കാട് പാലം പ്രയോജനപ്രദമാകും. എംഎൽഎ റോഡുമായി ബന്ധിപ്പിച്ചുള്ള പുതിയ പാത-അതാണ് വിളക്കുമരം പാലം വിഭാവന ചെയ്യുന്നത്. പാലം വഴി തൃച്ചാറ്റുകുളം, തുറവൂർ മേഖലയിലേക്ക് യാത്ര എളുപ്പമാകും. പാലം നിർമാണം തുടങ്ങിയതിനുശേഷം നീണ്ട കാത്തിരിപ്പിനൊടുവിലാണ് പൂർത്തിയായതിന്‍റെ വാർത്ത നാട്ടുകാർ ഏറ്റെടുക്കുന്നത്.

പെരുമ്പളം പാലം സെപ്റ്റംബറിൽ തുറന്നേക്കും: കായലിലെ ഏറ്റവും നീളമേറിയ പാലം

പൂച്ചാക്കൽ: പെരുമ്പളം പാലം നിർമാണം പൂർത്തിയാക്കി സെപ്റ്റംബറിൽ തുറന്നു നൽകാൻ കഴിഞ്ഞേക്കുമെന്നു സൂചന. പാലം നിർമാണം 95 ശതമാനത്തോളം പൂർത്തിയായി. പാലത്തിന്‍റെ പടിഞ്ഞാറേ കരയായ വടുതല ജെട്ടി ഭാഗത്തെയും കിഴക്കേകരയായ പെരുമ്പളം പൂവംതറ ഭാഗത്തെയും അപ്രോച്ച് റോഡ് നിർമാണമാണ് ഇപ്പോൾ നടക്കുന്നത്. പൂവംതറഭാഗം ചതുപ്പ് പ്രദേശമായതിനാൽ തെങ്ങുംകുറ്റി, ഗ്രാവൽ തുടങ്ങിയവ ഉപയോഗിച്ച് 150 മീറ്റർ നീളം ഉയർത്തിയശേഷമാണ് അപ്രോച്ച് റോഡ് നിർമാണം നടത്തുന്നത്. ഗ്രാവലും തെങ്ങിൻകുറ്റികളും ഇറക്കി ജോലികൾ പുരോഗമിക്കുകയാണ്. വടുതല ജെട്ടി ഭാഗത്തെ അപ്രോച്ച് റോഡ് നിർമാണവും പുരോഗമിക്കുകയാണ്. വടുതല ജെട്ടി ഭാഗത്ത് അപ്രോച്ച് റോഡ് നിർമാണത്തിനായി 79 സെന്‍റ് സ്ഥലം ഏറ്റെടുത്തിട്ടുണ്ട്. 300 മീറ്റർ റോഡ്, ഇരുവശത്തും ഓട, ഒരു കലുങ്ക് എന്നിവ നിർമിക്കുന്നുണ്ട്. പൂവംതറ ഭാഗത്ത് 189 സെന്‍റ് സ്ഥലം അപ്രോച്ച് റോഡിനായി ഏറ്റെടുത്തിട്ടുണ്ട്. ഇവിടെയും 300 മീറ്റർ നീളത്തിൽ റോഡ് നിർമിക്കും. ഒരു കലുങ്കും നിർമിക്കും.

വിദ്യാഭ്യാസം ജീവിത പ്രതിസന്ധിയെ നേരിടാനുള്ള മാർഗം: മന്ത്രി സജി ചെറിയാൻ

ആലപ്പുഴ: കേരളത്തിലെ സാമൂഹ്യ സാമ്പത്തിക മേഖലകളിൽ വലിയ സംഭാവനകൾ നൽകിയ തൊഴിലാളി പ്രസ്ഥാനമാണ് ചെത്തുതൊഴിലാളികളുടേതെന്ന് മന്ത്രി സജി ചെറിയാൻ. കേരള കള്ളുവ്യവസായ തൊഴിലാളി ക്ഷേമനിധി അംഗങ്ങളുടെ മക്കൾക്കുള്ള പഠന അവാർഡുകളുടെ വിതരണത്തിന്‍റെ സംസ്ഥാനതല ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി. ആറാട്ടുവഴി റോയല്‍ ഓഡിറ്റോറിയത്തില്‍ നടന്ന ചടങ്ങിൽ കേരള കള്ളുവ്യവസായ തൊഴിലാളി ക്ഷേമനിധി അംഗങ്ങളുടെ മക്കൾക്കുള്ള ലാപ്ടോപ്പുകളുടെ വിതരണ ഉദ്ഘാടനം മന്ത്രി പി. പ്രസാദ് നിർവഹിച്ചു. കേരളത്തെ ഇന്നു കാണുന്ന കേരളമാക്കാനുള്ള ചരിത്ര സമരങ്ങളിൽ വലിയ പങ്കുകൾ വഹിച്ചവരാണ് ചെത്തുതൊഴിലാളികളെന്ന് മന്ത്രി പറഞ്ഞു. ചരിത്ര പാരമ്പര്യവും പൈതൃകവും ഇത്രയേറെ ചേർന്നുനിൽക്കുന്ന സമൂഹം പരമ്പരാഗത തൊഴിൽ മേഖലയിൽ വേറെയില്ല. ഈ വ്യവസായം നിലനിർത്തേണ്ടത് അനിവാര്യമാണ്. അതിനായി നിയമപരമായ സംരക്ഷണം, സാമൂഹിക അംഗീകാരം, ആധുനിക മാർക്കറ്റിംഗ് രീതികൾ എന്നിവ അവലംബിച്ച് വ്യവസായത്തെ നിലനിർത്താനുള്ള ഇടപെടലുകൾ വേഗത്തിലാകണമെന്നും മന്ത്രി പറഞ്ഞു.

ലഹരിക്കെതിരായ പോരാട്ടം ശക്തമാകണം: മാർ തോമസ് തറയിൽ

മങ്കൊമ്പ്: ലഹരിക്കെതിരായ പോരാട്ടം വിദ്യാലയങ്ങളിലും സമൂഹത്തിലും ശക്തമാകണമെന്ന് ചങ്ങനാശേരി ആർച്ച്ബിഷപ് മാർ തോമസ് തറയിൽ. അധ്യാപകർ സമൂഹത്തോട് കൂടുതൽ പ്രതിബദ്ധത കാട്ടുകയും കുട്ടികളിൽ സാമൂഹിക അവബോധം വളർത്തുകയും വേണമെന്നും അദ്ദേഹം പറഞ്ഞു. ചങ്ങനാശേരി അതിരൂപത ടീച്ചേഴ്‌സ് ഗിൽഡ് ചമ്പക്കുളം മേഖല സമ്മേളനത്തിൽ അനുഗ്രഹ പ്രഭാഷണം നടത്തുകയായിരുന്നു അദ്ദേഹം. സെന്‍റ് മേരീസ് ബസിലിക്ക സഹവികാരി ഫാ. സച്ചിൻ കുന്നത്ത് സമ്മേളനം ഉദ്ഘാടനം ചെയ്തു. കോർപറേറ്റ് മാനേജർ ഫാ. ജോബി മൂലയിൽ അധ്യക്ഷത വഹിച്ച ചടങ്ങിൽ അതിരൂപത വികാരി ജനറാൾ മോൺ. ആന്‍റണി എത്തയ്ക്കാട് മുഖ്യപ്രഭാഷണം നടത്തി. കോർപറേറ്റ് മാനേജ്‌മെന്‍റ് നടപ്പിലാക്കുന്ന ലഹരിവിരുദ്ധ പദ്ധതിയായ അമൃതത്തിന്‍റെ ഉദ്ഘാടനവും അദ്ദേഹം നിർവഹിച്ചു. ടീച്ചേഴ്‌സ് ഗിൽഡ് മേഖല പ്രസിഡന്‍റ് പ്രകാശ് ജെ. തോമസ്, വൈസ് പ്രസിഡന്‍റ് വി.വി. ആന്‍റണി, ചമ്പക്കുളം സെന്‍റ് മേരീസ് സ്‌കൂൾ പ്രിൻസിപ്പൽ സിബിച്ചൻ ജോർജ്, അന്നമ്മ ജോസഫ്, ജോസഫ് ചാക്കോ, സിജോ ജോൺ, ബാബു വർഗീസ്, ത്രേസ്യാമ്മ കുര്യൻ, ടിബിൻ ജോസഫ്, ജോഖേഷ് വർഗീസ് എന്നിവർ പ്രസംഗിച്ചു. ഫാ. അനീഷ് ഈറ്റകക്കുന്നേൽ, ഫാ. ജിസൺ പോൾ വേങ്ങാശേരി എന്നിവർ വിവിധ വിഷയങ്ങളിൽ ക്ലാസുകളെടുത്തു.

ചെങ്ങന്നൂരിൽനിന്ന് മുണ്ടക്കയത്തേക്ക് ബസ് സർവീസ്

ചെങ്ങന്നൂർ: ചെങ്ങന്നൂരിൽനിന്ന് മുണ്ടക്കയത്തേക്ക് പുതിയ കെഎസ്ആർടിസി ബസ് സർവീസ് ആരംഭിച്ചു. ചെങ്ങന്നൂർ കെഎസ്ആർടിസി ഡിപ്പോയിൽ മന്ത്രി സജി ചെറിയാൻ പുതിയ സർവീസ് ഫ്ലാഗ് ഓഫ് ചെയ്തു. നടൻ മോഹൻ അയിരൂർ, അയിരൂർ പഞ്ചായത്ത് പ്രസിഡന്‍റ് അമ്പിളി പ്രഭാകരൻ നായർ, തോട്ടപ്പുഴശേരി പഞ്ചായത്ത് മെംബർ ടി.കെ. രാമചന്ദ്രൻ നായർ, പത്തനംതിട്ട ജില്ലാ കഥകളി ക്ലബ് വർക്കിംഗ് പ്രസിഡന്‍റ് ജോൺസൺ മാത്യു, ചെങ്ങന്നൂർ അസിസ്റ്റന്‍റ് ട്രാൻസ്പോർട്ട് ഓഫീസർ കെ.ആർ. അജീഷ് കുമാർ എന്നിവർ പ്രസംഗിച്ചു. പഴയകാല ഗ്രാമീണ ബസ് സർവീസുകൾ നിലച്ചുപോയതു മൂലം യാത്രാക്ലേശം അനുഭവിച്ചിരുന്ന ഗ്രാമീണ മേഖലയിലുള്ളവർക്ക് ഏറെ പ്രയോജനകരമാകുന്ന സർവീസാണിത്. മന്ത്രി കെ.ബി. ഗണേഷ്കുമാറിന്‍റെ പ്രത്യേക പദ്ധതിയിൽ ഉൾപ്പെടുത്തിയാണ് പുതിയ സർവീസ് ആരംഭിച്ചിരിക്കുന്നത്. സമയക്രമം: രാവിലെ 6.30ന് മുണ്ടക്കയത്തുനിന്ന് പുറപ്പെടുന്ന ബസ് എരുമേലി, റാന്നി, പ്ലാങ്ക മൺ, തേക്കുങ്കൽ, മതാപ്പാറ, ചെറുകോൽപ്പുഴ, പുളിമുക്ക്, തോണിപ്പുഴ, പുല്ലാട്, കുമ്പനാട്, ആറാ ട്ടുപുഴ വഴി 9.20ന് ചെങ്ങന്നൂർ റെയിൽവേ സ്റ്റേഷനിൽ എത്തും. വൈകിട്ട് 4.30ന് ചെങ്ങന്നൂർ റെയിൽവേ സ്റ്റേഷനിൽനിന്ന് പുറപ്പെടുന്ന ബസ് 7.30ന് മുണ്ടക്കയത്ത് എത്തും.

നഴ്സസ് വാരാഘോഷത്തിനു തുടക്കം

അമ്പലപ്പുഴ: നഴ്സസ് വാരാഘോഷത്തിനു തുടക്കമായി. ആലപ്പുഴ ജനറൽ ആശുപത്രിയിൽ നടന്ന ചടങ്ങ് എച്ച്. സലാം എംഎൽഎ ഉദ്ഘാടനം ചെയ്തു. ജില്ലാ നഴ്സിംഗ് ഓഫീസർ ഇൻ ചാർജ് പി.ജി. രാജേശ്വരി അധ്യക്ഷയായി. ഡെപ്യൂട്ടി ഡിഎംഒ ഡോ. അനു വർഗീസ്, ജനറൽ ആശുപത്രി ഡെപ്യൂട്ടി സൂപ്രണ്ട് ഡോ. വേണുഗോപാൽ, ആർഎംഒ ഡോ. ആശാ മോഹൻദാസ്, ആലപ്പുഴ മെഡിക്കൽ കോളജ് ആശുപത്രി നഴ്സിംഗ് സൂപ്രണ്ട് നളിനി പ്രസാദ്, ദീപ, റസി, മോളി, ഷീനാ ലാൽ എന്നിവർ പ്രസംഗിച്ചു. ജനറൽ ആശുപത്രി നഴ്സുമാരുടെ വിവിധ കലാരൂപങ്ങളും ദിനാചരണത്തിന്‍റെ ഭാഗമായി അരങ്ങേറി.

എടത്വ പള്ളി തിരുനാള്‍ ഇന്ന്

എടത്വ: സെന്‍റ് ജോര്‍ജ് ഫൊറോനാ പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാള്‍ ഇന്നു നടക്കും. വൈകുന്നേരം നാലിന് വിശുദ്ധന്‍റെ അദ്ഭുത തിരുസ്വരൂപവും എഴുന്നള്ളിച്ചുള്ള ചരിത്രപ്രസിദ്ധമായ പ്രദക്ഷിണം ദേവാലയത്തിനു ചുറ്റും നടക്കും. കന്യാകുമാരി ചിന്നമുട്ടം തുറക്കാരാണ് ഇന്നത്തെ പ്രദക്ഷിണത്തിനു രൂപങ്ങള്‍ വഹിക്കുന്നതും നേതൃത്വം നല്‍കുന്നതും. സഹദായുടെ ചെറിയ രൂപവും വഹിച്ചുള്ള ചെറിയ പ്രദക്ഷിണം ഇന്നലെ നടന്നു. കൊടിയേറ്റു മുതല്‍ പള്ളിയില്‍ വ്രതനിഷ്ഠയോടെ താമസിച്ചൊരുങ്ങിയ തമിഴ്നാട്ടിലെ രാജാക്കമംഗലം തുറക്കാരാണ് പ്രദക്ഷിണത്തിന് രൂപങ്ങളും കുരിശുകളും മുത്തുക്കുടകളും വഹിച്ചത്. പ്രദക്ഷിണത്തിന് ഫാ. യോഹന്നാന്‍ കട്ടത്തറ മുഖ്യകാര്‍മികനായി. രാജാക്കമംഗലം തുറയില്‍ നിന്നെത്തിയ നൂറുകണക്കിന് വിശ്വാസികള്‍ പള്ളിയില്‍നിന്ന് അവകാശ നേര്‍ച്ചകളായ ഉപ്പ്, നല്ലമുളക്, മലര്, വലയില്‍ ചേര്‍ക്കാനുള്ള തലനൂല്‍ എന്നിവ വികാരി ഫാ. ഫിലിപ്പ് വൈക്കത്തുകാരന്‍റെ കൈയില്‍നിന്ന് സ്വീകരിച്ച് രാത്രിയോടെ മടങ്ങി. വികാരി ഫാ. ഫിലിപ്പ് വൈക്കത്തുകാരന്‍, തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍, അസി. വികാരിമാരായ ഫാ. കുര്യന്‍ പുത്തന്‍പുര, ഫാ. തോമസ് കാരക്കാട്, ഫാ. കുര്യാക്കോസ് പീടിയേക്കല്‍, ഫാ. സെബാസ്റ്റ്യന്‍ മഞ്ചേരിക്കളം, ഫാ. ജോസഫ് കാമിച്ചേരി, ഫാ. സെബാസ്റ്റ്യന്‍ മനയത്ത്, ഫാ. ജോസഫ് വെമ്പേനിക്കല്‍ എന്നിവര്‍ സഹകാര്‍മികരായിരുന്നു. കൈക്കാരന്മാരായ പി.എസ്. ടോമിച്ചന്‍ പറപ്പള്ളി, കെ.എം. ജയിംസ് കളത്തൂര്‍, വിന്‍സന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, പബ്ലിസിറ്റി കണ്‍വീനര്‍ സോജന്‍ സെബാസ്റ്റ്യന്‍ കണ്ണന്തറ, റോബിന്‍ ടി. കളങ്ങര, ജയിന്‍ മാത്യു എന്നിവര്‍ നേതൃത്വം നല്‍കി. ഇന്നു രാവിലെ 4.30 മുതല്‍ തമിഴിലും മലയാളത്തിലും വിശുദ്ധ കുര്‍ബാനയും മധ്യസ്ഥപ്രാര്‍ഥനയും നടക്കും. മൂന്നിന് തമിഴ് കുര്‍ബാനയ്ക്ക് തൂത്തുക്കുടി രൂപത മെത്രാന്‍ ഡോ. സ്റ്റീഫന്‍ ആന്‍റണി പിള്ളൈ കാര്‍മികത്വം വഹിക്കും. തുടര്‍ന്ന് വൈകുന്നേരം നാലിനാണ് തിരുനാള്‍പ്രദക്ഷിണം. മൂന്നിന് വിശുദ്ധരൂപം ദേവാലയകവാടത്തില്‍ പ്രതിഷ്ഠിച്ചതോടെ തിരുനാളിന് തിരക്ക് തുടങ്ങിയിരുന്നു. നാളെ മുതല്‍ 14ന് എട്ടാമിടം വരെ നാട്ടുകാരുടെ തിരുനാളാണ്.

ഗുരുതര അഴിമതിയില്‍നിന്നു രക്ഷനേടാൻ വിഴിഞ്ഞത്ത് മോദി-പിണറായി ബാന്ധവം: എം.എം. ഹസന്‍

ആലപ്പുഴ: വിഴിഞ്ഞം തുറമുഖത്തിന്‍റെ പിതൃത്വത്തെക്കുറിച്ച് സിപിഎം തര്‍ക്കം ഉന്നയിക്കേണ്ടതില്ല അത് കുഞ്ഞൂഞ്ഞിന്‍റെ കുഞ്ഞാണെന്ന് കണ്‍വീനര്‍ എം.എം. ഹസന്‍ പറഞ്ഞു. വിഴിഞ്ഞം തുറമുഖത്തിന്‍റെ ഉദ്ഘാടനം സംസ്ഥാനത്തിന്‍റെ വാര്‍ഷികാഘോഷങ്ങളുടെ ഭാഗമാക്കിയതും പ്രധാനമന്ത്രിയെ തെറ്റിദ്ധരിപ്പിച്ച് അതില്‍ പങ്കെടുപ്പിച്ചതും മുഖ്യമന്ത്രി പിണറായി വിജയനെതിരേ പ്രതിപക്ഷം ഉന്നയിച്ചിട്ടുള്ള അതീവഗുരുതരമായ അഴിമതി ആരോപണങ്ങളില്‍നിന്നു ശ്രദ്ധ തിരിച്ചുവിടാനുള്ള അടവാണെന്നും എം.എം.ഹസന്‍ കൂട്ടിച്ചേര്‍ത്തു. മകള്‍ വീണാ വിജയന്‍ എസ്എഫ്ഐഒയുടെ കേസില്‍ പ്രതിസ്ഥാനത്തുവരികയും മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിക്കെതിരേ സിബിഐ കേസെടുക്കുകയും ചെയ്തതിലൂടെ പിണറായിയുടെ കാലത്ത് അഴിമതിരാജ് ആണെന്ന് കേരളം തിരിച്ചറിഞ്ഞു എം.എം. ഹസന്‍ പറഞ്ഞു. വരവില്‍കവിഞ്ഞ സ്വത്ത് സമ്പാദിച്ച മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറി ഡോ.കെ.എം.ഏബ്രഹാമിനെ സംരക്ഷിക്കുന്ന, കരിമണല്‍ മാഫിയായില്‍നിന്ന് മാസപ്പടി കൈപ്പറ്റിയതിന്‍റെ പേരില്‍ എസ്എഫ്ഐഒ, എഫ്.ഐ.ആറില്‍ പ്രതിയായ മകള്‍ വീണാ വിജയനെ സംരക്ഷിക്കുന്ന, ലൈഫ് പദ്ധതിയിലെ അഴിമതിക്കു നേതൃത്വം കൊടുത്ത പ്രൈവറ്റ് സെക്രട്ടറി ശിവശങ്കരന്‍ ജയിലില്‍ കിടന്നിട്ടും അധികാരത്തില്‍ കടിച്ചു തൂങ്ങുന്ന പിണറായി രാജിവയ്ക്കുക എന്നാവശ്യപ്പെട്ട് ആലപ്പുഴ ഡിസിസിയുടെ നേതൃത്വത്തില്‍ സംഘടിപ്പിച്ച കളക്‌ടറേറ്റ് മാര്‍ച്ച് ഉദ്ഘാടനം ചെയ്യുകയായിരുന്നു എം.എം. ഹസന്‍. ഡിസിസി പ്രസിഡന്‍റ് ബി. ബാബുപ്രസാദ് അധ്യക്ഷത വഹിച്ചു. കെപിസിസി സെക്രട്ടറിമാരായ എ.എ. ഷുക്കൂര്‍, എം.ജെ. ജോബ്, അഡ്വ.കെ.പി. ശ്രീകുമാര്‍, രാഷ്ട്രീയകാര്യ സമിതിയംഗം ജോണ്‍സണ്‍ ഏബ്രഹാം, യുഡിഎഫ് കണ്‍വീനര്‍ സി.കെ. ഷാജിമോഹന്‍ തുടങ്ങിയവര്‍ പ്രസംഗിച്ചു.

ആരവമുയർത്തി എന്‍റെ കേരളം വിളംബരജാഥ

ആലപ്പുഴ: സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി സംഘടിപ്പിക്കുന്ന എന്‍റെ കേരളം പ്രദർശന വിപണനമേളയുടെ വരവറിയിച്ച് നഗരത്തില്‍ ആയിരങ്ങള്‍ അണിനിരന്ന വിളംബര ജാഥ. ആറു മുതൽ 12 വരെ ആലപ്പുഴ ബീച്ചിലാണ് പ്രദര്‍ശനമേള നടക്കുന്നത്. കളക്ടറേറ്റില്‍നിന്ന് വൈകിട്ട് 4.30ന് ആരംഭിച്ച ജാഥ മന്ത്രി സജി ചെറിയാൻ ഫ്ലാഗ് ഓഫ് ചെയ്തു. വാദ്യമേളങ്ങളുടെ അകമ്പടിയോടെ ആരംഭിച്ച ജാഥ പ്രദർശന നഗരിയായ ആലപ്പുഴ ബീച്ചിൽ സമാപിച്ചു. കേരളത്തിന്‍റെ സാംസ്കാരിക തനിമ വിളിച്ചോതുന്ന വിവിധ കലാരൂപങ്ങളും അണിനിരന്ന ജാഥ നഗരവീഥികള്‍ക്ക് ഉത്സവഛായ പകര്‍ന്നു. പി.പി. ചിത്തരഞ്ജൻ എംഎൽഎ, ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി, ജില്ലാ കളക്ടർ അലക്സ് വർഗീസ്, നഗരസഭാധ്യക്ഷ കെ.കെ. ജയമ്മ, എഡിഎം ആശ സി. ഏബ്രഹാം, സബ് കളക്ടർ സമീർ കിഷൻ തുടങ്ങിയവര്‍ ജാഥയ്ക്കു നേതൃത്വം നൽകി.

വില കുത്തനെ ഇടിഞ്ഞു; വെറ്റില കർഷകർക്ക് കണ്ണീർക്കാലം

ചാരുംമൂട:് കൃഷിയിടത്തില്‍ വിയര്‍പ്പൊഴുക്കി വെറ്റില കൃഷി നടത്തുന്ന കര്‍ഷകര്‍ക്ക് ഇത് കണ്ണീര്‍ക്കാലം. കൃഷി സജീവമായി വരുമ്പോള്‍ വെറ്റിലയുടെ വില കുത്തനെ ഇടിഞ്ഞത് കര്‍ഷകരെ പതിസന്ധിയിലാക്കുന്നു. ഒരാഴ്ച മുമ്പ് ഒരുകെട്ട് വെറ്റിലയ്ക്ക് 60 രൂപ വിലയുണ്ടായിരുന്നു. ഇപ്പോള്‍ 10 രൂപയ്ക്കു പോലും വാങ്ങാന്‍ ആളില്ലാത്ത സ്ഥിതിയിലാണ്. ഉയര്‍ന്ന പരിപാലനച്ചെലവ്, ഈറ്റ ക്ഷാമം തുടങ്ങിയവ നേരിടേണ്ടിവരുമ്പോഴാണ് വിലയും കുത്തനെ ഇടിഞ്ഞത്. തെക്കന്‍ ജില്ലകളിലെ വെറ്റില കര്‍ഷകരാണ് വില ഇടിവുമൂലം തീരാദുരിതം നേരിടുന്നത്. ഭൂരിപക്ഷം കര്‍ഷകരും വില ഇടിവിനെത്തുടര്‍ന്ന് കൃഷി വിട്ടൊഴിയുകയാണ്. ഒരു വര്‍ഷം മുമ്പ് ഒരുകെട്ട് വെറ്റിലയ്ക്ക് 220 രൂപ മുതല്‍ 240 വരെ വില കര്‍ഷകന് കിട്ടിയിരുന്നു. ഇതരസംസ്ഥാനങ്ങളില്‍നിന്ന് വെറ്റില കൂടുതലായി എത്തുന്നതും കര്‍ഷകര്‍ക്ക് ഇരുട്ടടിയായി. കൂടാതെ ഇടനിലക്കാരുടെ കടുത്ത ചൂഷണവും കര്‍ഷകര്‍ക്ക് വില ലഭിക്കാതിരിക്കാന്‍ കാരണമായി. നിത്യേനയുള്ള പരിചരണം കൊണ്ടാണ് വെറ്റില കൃഷി മെച്ചപ്പെടുന്നത്. ഉയര്‍ന്നകൂലി കാരണം കുടുംബാംഗങ്ങളെയും സഹായികളാക്കിയാണ് മിക്കകര്‍ഷകരും കൃഷി മുന്നോട്ടുകൊണ്ടുപോകുന്നത്. വിളവെടുത്ത് അടുക്കി ചന്തയില്‍ എത്തിക്കണമെങ്കില്‍ നാലുപേരുടെ സഹായം വേണം. ചരിത്രത്തില്‍ ആദ്യ മായിട്ടാണ് വെറ്റിലയുടെ വില ഇത്രയും ഇടിയുന്നതെന്ന് കര്‍ഷകര്‍ പറയുന്നു. പറക്കോട്, പന്തളം, താമരക്കുളം മാര്‍ക്കറ്റുകളില്‍ 10 രൂപയ്ക്കു പോലും വെറ്റില എടുക്കാന്‍ ആളില്ലാത്ത സാഹചര്യം വന്നതില്‍ കര്‍ഷകര്‍ ഏറെ ആശങ്കയിലുമാണ്. ഓണാട്ടുകരയിലാണ് ഏറ്റവും കൂടുതല്‍ വെറ്റില കൃഷി യുള്ള സ്ഥലങ്ങള്‍. വായ്പ എടുത്തും കടം വാങ്ങിയും കൃഷി ഇറക്കിയ വെറ്റില കര്‍ഷകര്‍ ഇന്ന് ആത്മഹത്യയുടെ വക്കിലാണ്. കച്ചവടക്കാര്‍ മനഃപൂര്‍വം വെറ്റില എടുക്കാതെ മാറിനിന്ന് വെറ്റിലയുടെ വില ഇടിക്കുന്നതായും കര്‍ഷകര്‍ ആരോപിക്കുന്നുണ്ട്. വെറ്റില കര്‍ഷകരുടെ രക്ഷയ്ക്കായി കൃഷിവകുപ്പും സര്‍ക്കാരും അടിയന്തരമായ ഇടപെടല്‍ ഉണ്ടാകണമെന്ന് കര്‍ഷകര്‍ ആവശ്യപ്പെടുന്നു.

കഠിന വെയിലും പൊടിശല്യവും; ജനജീവിതം ദുഃസഹം

തുറവൂർ: കഠിനവെയിലിനെയും റോഡിലെ പൊടിശല്യത്തെയും തുടർന്നു ദേശീയപാതയോരത്തെ ജനങ്ങളുടെ ജീവിതം ദുഃസഹമാക്കുന്നു. രാത്രി മഴയെത്തുടർന്ന് റോഡിലേക്ക് ഒഴുകുന്ന ചെളിയും മെറ്റൽപ്പൊടിയും ശക്തമായ വെയിലിൽ ഉണങ്ങുകയും വാഹനങ്ങൾ പോകുമ്പോൾ ഇത് അന്തരീക്ഷത്തിലേക്കു പടരുകയും ചെയ്യുന്നു. യാത്രക്കാർക്കും ദേശീയപാതയുടെ ഇരുവശത്തുമുള്ള താമസക്കാർക്കും വ്യാപാരികൾക്കും വളരെയധികം ബുദ്ധിമുട്ടാണ് ഉണ്ടാക്കുന്നത്. സിമന്‍റ് മിശ്രിതമായ പൊടിയാണ് അന്തരീക്ഷത്തിൽ നടക്കുന്നത്. ഇതുമൂലം കുട്ടികളിലും വയോജനങ്ങളിലും ശ്വാസകോശസംബന്ധമായ രോഗങ്ങളും വ്യാപിച്ചുകൊണ്ടിരിക്കുകയാണ്. അരൂർ മുതൽ ആലപ്പുഴ വരെ ഇരുചക്രവാഹനത്തിലും ബസിലും യാത്ര ചെയ്യുന്നവരും വൻ ദുരിതമാണ് അനുഭവിക്കുന്നത്. അരൂർ- തുറവൂർ ഉയരപാത നിർമാണവുമായി ബന്ധപ്പെട്ട് കുഴിച്ചെടുത്ത മണ്ണും ചെളിയും മറ്റു വസ്തുക്കളും റോഡിൽ തള്ളിയിരിക്കുന്നത് മൂലം ശക്തമായ വെയിലിൽ ഉണങ്ങി അന്തരീക്ഷത്തിൽ പടരുന്നത് പ്രദേശത്തെ വ്യാപാരികളെയും താമസക്കാരെയും ബുദ്ധിമുട്ടിലാക്കിയിരിക്കുകയാണ്. പൊടിശല്യവും ചെളിവെള്ളവും മൂലം ഒട്ടുമിക്കവ്യാപാരികളും കടകൾ അടച്ചിട്ടിരിക്കുകയാണ്. ദേശീയപാതയോരത്തെ വീടുകളിൽ താമസിക്കുന്നവരും പൊടി ശല്യവും മറ്റും മൂലം മറ്റു ബന്ധുവീടുകളിലേക്ക് താത്കാലികമായി താമസം മാറ്റിയിരിക്കുകയാണ്. കൂടാതെ ദേശീയപാതയോരത്തെ വൻ മതിലുകളും ജനജീവിതത്തെ ദുഃസഹമാക്കിയിരിക്കുകയാണ്. റോഡ് നിർമാണം നടക്കുന്ന സ്ഥലങ്ങളിൽ ഇട്ടിരിക്കുന്ന സിമന്‍റ് മിശ്രിതം വാഹനങ്ങൾ കടന്നുപോകുമ്പോൾ കാറ്റിൽ പടരുന്നതുമൂലവും ജനങ്ങൾ ദുരിതമനുഭവിക്കുകയാണ്. തുടർച്ചയായി ദേശീയപാത വിഭാഗം തന്നെ ഈ പ്രദേശങ്ങളിൽ വാഹനങ്ങളിൽ വെള്ളം പാമ്പ് ചെയ്യണമെന്നുള്ള ആവശ്യം ജനങ്ങൾ ഉയർത്തിയെങ്കിലും ദേശീയപാത നിർമാണക്കമ്പനി ഇത് ചെവിക്കൊള്ളുന്നില്ല. ഇരുചക്രവാഹനങ്ങളിലും ബസിലും മറ്റും യാത്ര ചെയ്യുന്നവരും ഏറെ ദുരിതമാണ് അനുഭവിക്കുന്നത്. ദിവസവും ആലപ്പുഴ മുതൽ അരൂർ വരെ യാത്ര ചെയ്യുമ്പോൾ തന്നെ പലരും വിവിധങ്ങളായ രോഗങ്ങൾ പിടിപെടുന്ന അവസ്ഥയാണ്. ദേശീയപാതയിലെ പൊടിശല്ല്യം നിയന്ത്രിക്കാനുള്ള നടപടി സ്വീകരിക്കണമെന്ന ആവശ്യം ശക്തമാകുന്നു.

പാസിംഗ് ഔട്ട് പരേഡ്

കറ്റാനം: കുറത്തികാട് പോലീസ് സ്റ്റേഷൻ പരിധിയിലുള്ള എസ്പിസി യൂണിറ്റുകളുടെ പാസിംഗ് ഔട്ട് പരേഡ് നടന്നു. കറ്റാനം പോപ്പ് പയസ് എച്ച്എസ്എസ്, സിഎംഎസ്എച്ച്എസ് എന്നീ സ്കൂളുകളുടെ സംയുക്ത പാസിംഗ് ഔട്ട് പരേഡാണ് കറ്റാനം പോപ്പ് പയസ് എച്ച്എസ്എസ് ഇൻഡോർ ഓഡിറ്റോറിയത്തിൽ സംഘടിപ്പിച്ചത്. കുറത്തികാട് സിഐയും എസ്പിസിയുടെ പിഎസ്എൽഒയുമായ പി.കെ. മോഹിത് മുഖ്യാതിഥിയായി സല്യൂട്ട് സ്വീകരിച്ചു. ഭരണിക്കാവ് പഞ്ചായത്ത് പ്രസിഡന്‍റ് ദീപ, സബ് ഇൻസ്‌പെക്ടർ എം.എസ്. എബി, കറ്റാനം പോപ്പ് പയസ് എച്ച്എസ്എസ് ഹെഡ്മാസ്റ്റർ ടി.കെ. സാബു, സിഎംഎസ്എച്ച്എസ് ഹെഡ്മിസ്ട്രസ് ശോശാമ്മ ജോഷ്വാ, മെംബർമാരായ മാത്യു ഫിലിപ്പ്, എ. തമ്പി, പിടിഎ പ്രസിഡന്‍റുമാരായ വർഗീസ് മത്തായി, എം.ഡി. ബിജു എന്നിവർ പ്രസംഗിച്ചു. കുറത്തികാട് എഎസ്‌ഐ രജീന്ദ്ര ദാസ്. എസ്, ഷിതിൻ രാജ്, രഞ്ചു ആർ. പിള്ള, കമ്യൂണിറ്റി പോലീസ് ഓഫീസർമാരായ ടോണി മാത്യൂസ് പണിക്കർ, ജെയ്സി ജോസ്, ശാന്തി ജോൺ, ആൻസി ജോസ് എന്നിവരുടെ നേതൃത്വത്തിലാണ് പാസിംഗ് ഔട്ട് പരേഡിന് നേതൃത്വം നൽകിയത്.

സ്മാർട്ട് അങ്കണവാടി ഉദ്ഘാടനം

ഹരിപ്പാട്: മുതുകുളം പഞ്ചായത്ത് രണ്ടാം വാർഡിൽ, ആലപ്പുഴ ജില്ലാ പഞ്ചായത്ത് 2022 -2023 വാർഷിക പദ്ധതിയിൽ ഉൾപ്പെടുത്തി നിർമിച്ച സമാർട്ട് അങ്കണവാടിയുടെ ഉദ്ഘാടനം രമേശ് ചെന്നിത്തല എംഎൽഎ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി അധ്യക്ഷത വഹിച്ചു. ജില്ലാ പഞ്ചായത്ത് പ്രതിപക്ഷ നേതാവ് ജോൺ തോമസ് താക്കോൽദാനം നിർവഹിച്ചു. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ അഡ്വ. ടി.എസ്‌. താഹ മുഖ്യപ്രഭാഷണം നടത്തി. മുതുകുളം ബ്ലോക്ക്‌ പഞ്ചായത്ത് മെംബർ ഗീത ശ്രീജി, മുതുകുളം പഞ്ചായത്തംഗങ്ങളായ യു. പ്രകാശ്, ശുഭ ഗോപകുമാർ, ബിന്ദു, ശ്രീജ ഇളങ്ങല്ലൂർ, സുസ്മിത, ഷീജ, മഞ്ജു അനിൽകുമാർ, ശ്രീലത, സുനിത, ജി. ലാൽമാളവ്യ, എ. അനസ് എന്നിവർ പ്രസംഗിച്ചു.

കാക്കത്തുരുത്ത് ടൂറിസം വികസന പ്രവർത്തനങ്ങൾ തുടങ്ങി

തുറവൂർ: കാക്കത്തുരുത്ത് ദ്വീപിനെ വർണാഭമാക്കാൻ എഴുപുന്ന പഞ്ചായത്തും സംസ്ഥാന ടൂറിസം വകുപ്പും സംയുക്തമായി ഏറ്റെടുത്ത കാക്കത്തുരുത്ത് ടൂറിസം ഡെസ്റ്റിനേഷൻ പ്രോജക്റ്റിന്‍റെ ശിലാസ്ഥാപനം പഞ്ചായത്ത് പ്രസിഡന്‍റ് ആർ. പ്രദീപ് നിർവഹിച്ചു. ടൂറിസം ഭൂപടത്തിൽ സ്ഥാനംപിടിച്ച കാക്കത്തുരുത്തിന്‍റെ അടിസ്ഥാന സൗകര്യ വികസനങ്ങളും ടൂറിസം സാധ്യതകളും വർധിപ്പിക്കാനായി പഞ്ചായത്തും ടൂറിസം വകുപ്പും ചേർന്ന് ഒരു കോടി രൂപയുടെ പദ്ധതിയിലൂടെ തീരദേശ നടപ്പാതയുടെ നിർമാണ പ്രവർത്തനങ്ങൾക്ക് തുടക്കം കുറിച്ചു. കാക്കത്തുരുത്ത് പ്രധാന കടവിൽനിന്നു തെക്കോട്ട് ഏകദേശം അഞ്ഞൂറ് മീറ്ററോളം നീളം കൽക്കെട്ട് ഉയർത്തി ഇന്‍റർലോക്ക് കട്ടവിരിച്ച നടപ്പാതയും കൈവരികളോടു ചേർന്ന് അലങ്കാര വിളക്കുകൾ, ഇരിപ്പിടം എന്നിവയോടെയുമുള്ള നിർമാണം പൂർത്തിയാക്കുന്നതോടെ വിനോദ സഞ്ചാരികളെ ദ്വീപിലേക്ക് ആകർഷിക്കാനും അതിലൂടെ ദ്വീപ് നിവാസികൾക്ക് മെച്ചപ്പെട്ട വരുമാനം ലഭ്യമാക്കാനും കഴിയുമെന്ന് പ്രസിഡന്‍റ് ആർ. പ്രദീപ് പറഞ്ഞു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ. മധുക്കുട്ടൻ അധ്യക്ഷത വഹിച്ചു.

സ്കൂൾ മാർക്കറ്റ് 2025 ആരംഭിച്ചു

അമ്പലപ്പുഴ: സ്കൂൾ മാർക്കറ്റ് 2025 ആരംഭിച്ചു. ആലപ്പുഴ ജില്ലാ പോലീസ് സഹകരണ സംഘം നടത്തുന്ന ഈ വർഷത്തെ സ്കൂൾ മാർക്കറ്റ് ജനറൽ ഹോസ്പിറ്റൽ ജംഗ്ഷനിലെ ടിഡി സ്കൂളിൽ ആരംഭിച്ചു. ആലപ്പുഴ ഡിവൈഎസ്പി മധു ബാബു ഉദ്ഘാടനം നിർവഹിച്ചു. ടിഡി ഹയർ സെക്കൻഡറി സ്കൂൾ പ്രിൻസിപ്പൽ കെ.എൻ. പത്മം, എസ്ബിഐ മാനേജർ സുജാത, പോലീസ് സംഘടനാ ഭാരവാഹികൾ എന്നിവർ പങ്കെടുത്തു. പോലീസ് ഉദ്യോഗസ്ഥർക്കു പുറമേ പൊതുജനങ്ങൾക്കും ഇവിടെനിന്ന് 50 ശതമാനം വരെ വിലക്കുറവിൽ പഠനോപകരണങ്ങൾ വാങ്ങാവുന്നതാണ്. കേരള സർക്കാരിന്‍റെയും സഹകരണവകുപ്പിന്‍റെയും നിർദേശപ്രകാരം കഴിഞ്ഞ അഞ്ചു വർഷമായി സ്കൂൾ വിപണിയിലെ വില നിയന്ത്രിക്കാനായി പോലീസ് സഹകരണസംഘം സ്കൂൾ മാർക്കറ്റ് നടത്തിവരുന്നു.

ഉയരപ്പാത നിർമാണം: എംപിയുടെ പ്രസ്താവന തെറ്റെന്ന് സിപിഎം

തുറവൂർ: ഉയരപ്പാത നിർമാണവുമായി ബന്ധപ്പെട്ട് ആലപ്പുഴ എംപിയുടേതായി വന്ന വാർത്ത വസ്തുതാവിരുദ്ധമാണെന്ന് സിപിഎം നേതാവ് സി.ബി. ചന്ദ്രബാബു. 2022ലെ എഗ്രിമെന്‍റ് പ്രകാരം ഗതാഗതം തിരിച്ചുവിടുന്ന തുറവൂർ -കുമ്പളങ്ങി റോഡും തുറവൂർ-മാക്കേക്കടവ് റോഡും അറ്റകുറ്റപ്പണി നടത്തുന്നതിനാണ് എൻഎച്ച്എഐ പണം അനുവദിച്ചത്. ഇവിടെ ജനങ്ങൾ സമരരംഗത്തു വന്നതിനെത്തുടർന്ന് ഗവ. നിർദേശപ്രകാരം പൊതുമരാമത്ത് വകുപ്പ്, എൻഎച്ച്എഐ ഉദ്യോഗസ്ഥർ സംയുക്ത പരിശോധന നടത്തി നൽകിയ റിപ്പോർട്ട്‌ പ്രകാരമാണ് എൻഎച്ച്എഐ പ്രോജക്റ്റ്‌ ഡയറക്ടർ തയാറാക്കിയ എസ്റ്റിമേറ്റ് കൈമാറിയത്. 24 ഒക്ടോബറിലാണ് എംപി സ്ഥലം സന്ദർശിച്ചത്. അതിനു മുൻപേ നടപടികൾ നീങ്ങിയിരുന്നു. 2025 മാർച്ചിൽ വിശദമായ എസ്ടിമേറ്റ് എൻഎച്ച്എഐ അടക്കമുള്ള ഏജൻസികളുടെ അംഗീകാരത്തിനു സമർപ്പിച്ചു. അനുമതി ലഭിച്ചാൽ മാത്രമേ ടെൻഡർ നടപടിയിലേക്ക് കടക്കാൻ കഴിയൂ. അതുവരെ റണ്ണിംഗ് കോൺട്രാക്ട് വഴി കൂടുതൽ പ്രശ്നങ്ങളുള്ള ഭാഗത്ത്‌ പൊതുമരാമത്ത് വകുപ്പ് ഇന്‍റർലോക്ക് ടൈൽസ് വിരിച്ചും മറ്റ് തരത്തിലും യാത്രാസൗകര്യം ഏർപ്പെടുത്തുന്നുണ്ട്. മേൽപ്പറഞ്ഞ രണ്ടു റോഡുകൾ നന്നാക്കുന്ന കാര്യത്തിൽ മാത്രമേ എൻഎച്ച്എഐ നടപടിയുള്ളൂ. മറ്റ് ഇടറോഡുകൾ നന്നാക്കുന്ന കാര്യത്തിൽ ഇനിയും തീരുമാനമായില്ല. ആരോപണം രാഷ്ട്രീയ ലക്ഷ്യം വച്ചുള്ളതാണെന്നും സിപിഎം നേതാവ് പറഞ്ഞു.

നീറ്റ്: ഫോട്ടോ മാറി; സ്റ്റുഡിയോ തേടി വിദ്യാർഥികളുടെ നെട്ടോട്ടം

ആലപ്പുഴ∙ ഫോട്ടോ ചെറുതായി. സംഗതി കുടുങ്ങി. പോസ്റ്റ് കാർഡ് വലുപ്പത്തിലുള്ള ഫോട്ടോയ്ക്കു പകരം പാസ്പോർട്ട് വലുപ്പത്തിലുള്ള ഫോട്ടോയുമായി എത്തിയവരാണു കുടുങ്ങിയത്. ഒടുവിൽ സ്റ്റുഡിയോ തേടി അലച്ചിലായി. നീറ്റ് യുജി പരീക്ഷാകേന്ദ്രങ്ങൾക്കു സമീപം സ്റ്റുഡിയോ അന്വേഷിച്ചു വിദ്യാർഥികളുടെയും മാതാപിതാക്കളുടെയും നെട്ടോട്ടം. വിദ്യാർഥികൾ കൈവശം സൂക്ഷിക്കേണ്ട രേഖകൾക്കായി അവസാന നിമിഷങ്ങളിൽ പ്രിന്‍റ് എടുക്കാനായി ഡിടിപി കടകൾ തേടിയും വിദ്യാർഥികൾ ഓടി. അവധി ദിവസമായിരുന്നതിനാൽ കടകൾ കുറവായതും ബുദ്ധിമുട്ടായി. ജില്ലയിൽ ഏഴായിരത്തിലേറെ വിദ്യാർഥികൾ നീറ്റ് പരീക്ഷയെഴുതി. 27 കേന്ദ്രങ്ങളിലായിരുന്നു പരീക്ഷ. 8427 വിദ്യാർഥികളാണു പരീക്ഷയ്ക്കു രജിസ്റ്റർ ചെയ്തിരുന്നെങ്കിലും കുറച്ചുപേർ പരീക്ഷയ്ക്ക് എത്തിയില്ല. രാവിലെ 11നു തന്നെ വിദ്യാർഥികളുടെ തിരക്കായി. പരിശോധനകൾ പൂർത്തിയാക്കി ഒരുമണിയോടെ പരീക്ഷാ ഹാളിലെത്തി. രണ്ടു മുതൽ വൈകിട്ട് അഞ്ചുവരെയായിരുന്നു പരീക്ഷ. 12നു പരീക്ഷാ ഹാളിൽ പ്രവേശിച്ച വിദ്യാർഥികൾ കടുത്ത ചൂടിൽ തളർന്നു. പരീക്ഷാ കേന്ദ്രത്തിനു പുറത്തു കാത്തുനിന്ന മാതാപിതാക്കളും ചൂടിൽ വലഞ്ഞു.

മാവേലിക്കര നഗരസഭാ സ്ഥിരം സമിതിയിലേക്ക് മുന്‍ ചെയര്‍മാന് നറുക്കെടുപ്പിലൂടെ ജയം

മാവേലിക്കര: നഗരസഭ വികസന കാര്യ സ്ഥിരംസമിതിയില്‍ ഒഴിവുള്ള സ്ഥാനത്തേക്ക് കഴിഞ്ഞമാസം അവിശ്വാസത്തിലൂടെ പുറത്താക്കപ്പെട്ട നഗരസഭാ ചെയര്‍മാന്‍ കെ.വി. ശ്രീകുമാര്‍ നറുക്കെടുപ്പിലൂടെ തെരഞ്ഞെടുക്കപ്പെട്ടു. വികസന സ്ഥിരം സമിതി അധ്യക്ഷനായിരുന്ന നൈനാന്‍ സി. കുറ്റിശേരില്‍ നഗരസഭാധ്യക്ഷനായി തെരഞ്ഞെടുക്കപ്പെട്ട സാഹചര്യത്തിലാണ് വികസന സ്ഥിരം സമിതിയില്‍ ഒഴിവ് ഉണ്ടായത്. തിങ്കളാഴ്ച നടന്ന തെരഞ്ഞെടുപ്പില്‍ സിപിഎം പ്രതിനിധിയായി കെ.വി. ശ്രീകുമാറും കോണ്‍ഗ്രസ് പ്രതിനിധിയായി കെ. ഗോപനും മത്സരിച്ചു. ഇരുവര്‍ക്കും ഒന്‍പത് വോട്ടുകള്‍ വീതം ലഭിച്ചു. തുടര്‍ന്നു നടന്ന നറുക്കെടുപ്പില്‍ കെ.വി. ശ്രീകുമാര്‍ തെരഞ്ഞെടുക്കപ്പെടുകയായിരുന്നു. ഒന്‍പത് ബിജെപി കൗണ്‍സിലര്‍മാര്‍ യോഗത്തില്‍നിന്ന് വിട്ടുനിന്നു. കെ.വി. ശ്രീകുമാറിനെ പുറത്താക്കാനുള്ള അവിശ്വാസത്തെ പിന്തുണയ്ക്കുകയും നഗരസഭാ ചെയര്‍മാന്‍ തെരഞ്ഞെടുപ്പില്‍ നൈനാന്‍ സി. കുറ്റിശേരിലിന് അനുകൂലമായി വോട്ട് രേഖപ്പെടുത്തുകയും ചെയ്ത ബിനു വര്‍ഗീസ് തിങ്കളാഴ്ച കൗണ്‍സിലില്‍ ഹാജരായില്ല. കോണ്‍ഗ്രസ് കൗണ്‍സിലര്‍ ഫോണില്‍ ബന്ധപ്പെട്ടിട്ടും ബിനു വര്‍ഗീസ് എത്താന്‍ കൂട്ടാക്കിയില്ല. ഇതേത്തുടര്‍ന്നാണ് സിപിഎം, കോണ്‍ഗ്രസ് സ്ഥാനാര്‍ഥികള്‍ക്ക് തുല്യവോട്ട് ലഭിക്കുന്ന സാഹചര്യം ഉണ്ടായത്. വികസന സ്ഥിരം സമിതി അധ്യക്ഷസ്ഥാനത്തേക്കുളള തെരഞ്ഞെടുപ്പ് 12ന് നടക്കും. വികസനകാര്യ സ്ഥിരം സമിതിയില്‍ സിപിഎമ്മിന് ഭൂരിപക്ഷമായതോടെ അധ്യക്ഷ സ്ഥാനം കോണ്‍ഗ്രസിനു നഷ്ടമാകാന്‍ സാധ്യതയുണ്ട്. സ്ഥിര സമിതിയില്‍ കോണ്‍ഗ്രസ് പ്രതിനിധികളായി അനി വര്‍ഗീസ്, ലളിത രവീന്ദ്രനാഥ്, സിപിഎം പ്രതിനിധികളായി തോമസ് മാത്യു, ചിത്ര അശോക്, സ്വതന്ത്ര കൗണ്‍സിലര്‍ കെ.വി. ശ്രീകുമാര്‍ എന്നിവരാണ് ഇപ്പോഴുള്ളത്. ശ്രീകുമാര്‍ ഇപ്പോള്‍ സിപിഎം അനുകൂല നിലപാടിലാണ്.

മൂലം ജലോത്സവം: ആലോചനാ യോഗം

മങ്കൊമ്പ്: 2025 ജൂലൈ ഒൻപതിനു നടക്കുന്ന ചമ്പക്കുളം മൂലം ജലോത്സവത്തിന്‍റെ ആലോചനാ യോഗം ചമ്പക്കുളം ബ്ലോക്ക് പഞ്ചായത്ത് ഹാളിൽ നടന്നു. ചമ്പക്കുളം ബ്ലോക്ക് പഞ്ചായത്ത് പ്രസിഡന്‍റ് ജിൻസി ജോളിയുടെ അധ്യക്ഷതയിൽ കൂടിയ യോഗത്തിൽ മുൻ എംഎൽഎ കെ.കെ. ഷാജു മുഖ്യാതിഥിയായി. ജലോത്സവ സമിതിയുടെ നിലവിലെ സാമ്പത്തിക സ്ഥിതിയും വള്ളംകളി കുറ്റമറ്റ നടത്തിപ്പും സംബന്ധിച്ച് തഹസിൽദാർ പി.ഡി. സുധി പ്രസംഗിച്ചു. വള്ളംകളിയുടെ സുഗമമായ നടത്തിപ്പിനായി 85 അംഗ എക്‌സിക്യൂട്ടീവ് കമ്മിറ്റിയെ തെരഞ്ഞെടുത്തു. ചമ്പക്കുളം പഞ്ചായത്ത് പ്രസിഡന്‍റ് .ടി.ജി. ജലജാകുമാരി, നെടുമുടി പഞ്ചായത്ത് പ്രസിഡന്‍റ് മിനി മൻമഥൻ നായർ, ഹെഡ് ക്വാർട്ടേഴ്‌സ് ഡെപ്യൂട്ടി തഹസിൽദാർ എസ്. ഷൈല, സീനിയർ ക്ലർക്ക് സി. ജോസഫ് തുടങ്ങിയവർ പ്രസംഗിച

പാചകവാതക സിലിണ്ടര്‍ പൊട്ടിത്തെറിച്ച് വീട് തകര്‍ന്നു

ചേര്‍ത്തല: പുതിയ പാചകവാതക സിലിണ്ടര്‍ യോജിപ്പിച്ചശേഷം സ്റ്റൗ കത്തിക്കുന്നതിനിടെ പൊട്ടിത്തെറിച്ച് വീടിന്‍റെ ഒരുഭാഗം തകര്‍ന്നു. വീട്ടിലുണ്ടായിരുന്നവര്‍ അത്ഭുതകരമായി രക്ഷപ്പെട്ടു. കടക്കരപ്പള്ളി പഞ്ചായത്ത് 10-ാം വാര്‍ഡ് ആലുങ്കല്‍ ജംഗ്ഷനു സമീപം കണിയാംവെളിയില്‍ ടി.വി. ദാസപ്പന്‍റെ വീട്ടില്‍ കഴിഞ്ഞ ദിവസം രാവിലെയാണ് അപകടം. വീടിന്‍റെ അടുക്കളയോടു ചേര്‍ന്ന ഒരു ഭാഗവും ജനാലയും വാതിലുകളും ഫ്രിഡ്ജും വാഷിംഗ് മെഷീനും തയ്യല്‍മെഷീനും തകര്‍ന്നു. അപകട സമയത്ത് ദാസപ്പനും ഭാര്യ കനകമ്മയും മകന്‍ വിമലും വീട്ടിലുണ്ടായിരുന്നു. പൊട്ടിത്തെറി ശബ്ദം കേട്ടയുടനെ ഇവര്‍ പുറത്തേക്കോടി രക്ഷപ്പെടുകയായിരുന്നു. തീ സമീപമുള്ള പുരയിടത്തിലെ മരങ്ങളിലേക്കും പടര്‍ന്നു. ചേര്‍ത്തലയില്‍നിന്ന് അഗ്‌നിരക്ഷാസേനയെത്തി രക്ഷാപ്രവര്‍ത്തനം നടത്തി. ഏകദേശം അഞ്ചുലക്ഷം രൂപയുടെ നാശനഷ്ടമുണ്ടായതായി കണക്കാക്കുന്നു.

ആലപ്പുഴയില്‍ ആരവമുയര്‍ത്തി എന്‍റെ കേരളം വിളംബരജാഥ

ആലപ്പുഴ: എന്‍റെ കേരളം പ്രദര്‍ശന വിപണനമേളയുടെ വരവറിയിച്ച് നഗരത്തില്‍ ആയിരങ്ങള്‍ അണിനിരന്ന വര്‍ണാഭമായ വിളംബര ജാഥ. ഇന്നുമുതല്‍ 12 വരെ ആലപ്പുഴ ബീച്ചിലാണ് പ്രദര്‍ശനമേള നടക്കുന്നത്. കളക്ടറേറ്റില്‍നിന്ന് വൈകിട്ട് 4.30ന് ആരംഭിച്ച ജാഥ മന്ത്രി സജി ചെറിയാന്‍ ഫ്‌ളാഗ് ഓഫ് ചെയ്തു. ജാഥ പ്രദര്‍ശന നഗരിയായ ആലപ്പുഴ ബീച്ചില്‍ സമാപിച്ചു. പി.പി. ചിത്തരഞ്ജന്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി, ജില്ലാ കളക്ടര്‍ അലക്‌സ് വര്‍ഗീസ്, നഗരസഭ അധ്യക്ഷ കെ.കെ. ജയമ്മ, എഡിഎം ആശ സി. ഏബ്രഹാം, സബ് കളക്ടര്‍ സമീര്‍ കിഷന്‍, ജില്ലാ ഇന്‍ഫര്‍മേഷന്‍ ഓഫീസര്‍ കെ. എസ്. സുമേഷ്, ജില്ലാ പഞ്ചായത്തംഗങ്ങള്‍, നഗരസഭാംഗങ്ങള്‍, മറ്റ് ജനപ്രതിനിധികള്‍ തുടങ്ങിയവര്‍ നേതൃത്വം നൽകി. ഏഴു ദിവസം നീളുന്ന എന്‍റെ കേരളം മെഗാ പ്രദര്‍ശനം ഇന്നു വൈകുന്നേരം മൂന്നിന്് ആലപ്പുഴ ബീച്ചിലെ വേദിയില്‍ കൃഷിമന്ത്രി പി. പ്രസാദ് ഉദ്ഘാടനം ചെയ്യും. മന്ത്രി സജി ചെറിയാൻ അധ്യക്ഷത വഹിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]