ADVERTISEMENT

ADVERTISEMENT

അലിഗഡ് യൂണിവേഴ്സിറ്റി മലപ്പുറം സെന്‍റർ വികസിപ്പിക്കണമെന്ന്

പെരിന്തൽമണ്ണ: അലിഗഡ് മുസ്ലിം യൂണിവേഴ്സിറ്റി മലപ്പുറം സെന്‍റർ പൂർണതോതിലുള്ള സർവകലാശാലയായി വികസിപ്പിക്കണമെന്ന് എംഇഎസ് സംസ്ഥാന പ്രസിഡന്‍റ് ഡോ. പി.എ. ഫസൽ ഗഫൂർ. അലിഗഡ് മലപ്പുറം സെന്‍ററിൽ സർ സയ്യിദ് അഹമ്മദ് ഖാന്‍റെ 208-ാമത് ജൻമവാർഷികത്തോടനുബന്ധിച്ച് സർ സയ്യിദ് ദിനാചരണത്തിൽ മുഖ്യപ്രഭാഷണം നടത്തുകയായിരുന്നു അദ്ദേഹം. ഡയറക്ടർ പ്രഫ.എം. ഷാഹുൽ ഹമീദ് അധ്യക്ഷനായിരുന്നു.

ഒരാഴ്ച നീണ്ട സാഹിത്യ, സാംസ്കാരിക, കലാ മത്സരങ്ങളുടെ സമാപനമായാണ് ദിനാചരണം സംഘടിപ്പിച്ചത്. ജനറൽ കണ്‍വീനർ ഡോ. ബ്ലെസിത കമറുദ്ദീൻ, ഗാലിബ് നഷ്തർ, പ്രഫ. വി.യു. സീതി, അസിസ്റ്റന്‍റ് പ്രഫ. ഡോ. സി. മുഹമ്മദ് ഹാരിസ്, ഡോ. ഫെബിന സീതി, അസിസ്റ്റന്‍റ് പ്രഫ. ഡോ. സയ്യിദ് ഹയാത്ത് ബാഷ, ക്യാപ്റ്റൻ ഡോ. അബ്ദുൾ ഹമീദ്, ഗുലാം അഷ്റഫ് തൗഖീർ, സിദ്റ ഫാത്തിമ, ഡോ. വി.കെ. ഹംസ, മുഹമ്മദ് ഹംസ, മരിയ അഫ്രീദി, എ.പി. നിഷാന,

ഡോ. ജിജോ ജോർജ്, ഡോ. പി.കെ. നസീമ, ഡോ. ഷാനവാസ് അഹമ്മദ് മാലിക്, മുഹമ്മദ് അഹസം ഖാൻ തുടങ്ങിയവർ പ്രസംഗിച്ചു. സർ സയ്യിദ് അഹമ്മദ് ഖാന്‍റെ ജീവിതവും പാരന്പര്യവും ആവിഷ്കരിച്ച് നാടകാവതരണവും അരങ്ങേറി.

ADVERTISEMENT

ഡിആർ കുടിശിക അനുവദിക്കണം: കെഎസ്എസ്പിഎ

കീഴാറ്റൂർ: കേരളത്തിലെ സർവീസ് പെൻഷൻകാരുടെ കുടിശികയായ 21 ശതമാനം ഡിആർ കുടിശിക അനുവദിക്കാൻ സർക്കാർ തയാറാകണമെന്ന് കേരള സ്റ്റേറ്റ് സർവീസ് പെൻഷനേഴ്സ് അേസോസിയേഷൻ (കഐസ്എസ്പിഎ) കീഴാറ്റൂർ മണ്ഡലം സമ്മേളനം ആവശ്യപ്പെട്ടു. 2024 ജൂലൈ മുതൽ നടപ്പാക്കേണ്ടിയിരുന്ന പെൻഷൻ പരിഷ്കരണം നീട്ടിക്കൊണ്ടുപോകുന്ന സർക്കാർ നടപടിയിൽ സമ്മേളനം പ്രതിഷേധിച്ചു. കീഴാറ്റൂർ പൂന്താനം സ്മാരക എയുപി സ്കൂളിൽ നടന്ന സമ്മേളനം സംസ്ഥാന രക്ഷാധികാരി ഡി.എ. ഹരിഹരൻ ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.ടി. അബ്ദുൾ അസീസ് അധ്യക്ഷത വഹിച്ചു. സെക്രട്ടറി പി.സുരേഷ് വാർഷിക റിപ്പോർട്ടും ട്രഷറർ കെ.എം.ദാസ് വരവുചെലവ് കണക്കും അവതരിപ്പിച്ചു. കീഴാറൂർ ഗ്രാമപഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ ബിന്ദുമാത്യു, കീഴാറ്റൂർ മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് റാഫി പറന്പൂർ, നിയോജക മണ്ഡലം പ്രസിഡന്‍റ് മത്തളി ബാലകൃഷ്ണൻ, സെക്രട്ടറി ടി.രവീന്ദ്രനാഥ് തുടങ്ങിയവർ പ്രസംഗിച്ചു. ഭാരവാഹികൾ:കെ.ടി. അബ്ദുൾ അസീസ് (പ്രസിഡന്‍റ്്), പി.സുരേഷ് (സെക്രട്ടറി), പി. വേണുഗോപാലൻ (ട്രഷറർ).

ജനകീയ ആരോഗ്യ കേന്ദ്രം തുറന്നു

മാലാപറന്പ്: പുലാമന്തോൾ ഗ്രാമപഞ്ചായത്തിലെ ഒന്നാം വാർഡ് മാലാപറന്പ് ജനകീയ ആരോഗ്യ കേന്ദ്രം ഗ്രാമപഞ്ചായത്ത് പ്രസിഡന്‍റ് പി. സൗമ്യ ഉദ്ഘാടനം ചെയ്തു. ഗുണഭോക്താക്കളായ ഏഴായിരത്തോളം പേർക്ക് സേവനം നൽകുന്നതാണ് മാലാപറന്പ് ജനകീയ ആരോഗ്യ കേന്ദ്രം. ഗ്രാമപഞ്ചായത്ത് വൈസ് പ്രസിഡന്‍റ് ചന്ദ്രമോഹനൻ പനങ്ങാട് അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ ടി. സാവിത്രി, കെ. മുഹമ്മദ് മുസ്തഫ, എം.ടി. നസീറ, ബ്ലോക്ക് മെംബർ റജീന മഠത്തിൽ, ഗ്രാമപഞ്ചായത്ത് ഭരണസമിതി അംഗങ്ങളായ ലില്ലിക്കുട്ടി, കെ. ഹസീന, വി.പി. മുഹമ്മദ് ഹനീഫ, ടി. സിനിജ, ടി. സൈതാലി, പി.ടി. പ്രമീള, മുൻ മെഡിക്കൽ ഓഫീസർ ഡോ. ദൃശ്യ, ആർ. വേലു (സിപിഎം), ഷിബു ചെറിയാൻ (ഐഎൻസി), സലാം (എൻസിപി), പഞ്ചായത്ത് മുൻ വൈസ് പ്രസിഡന്‍റ് ജോസഫ്കുട്ടി, വാർഡ് മെംബർ ഷിനോസ് ജോസഫ്, മെഡിക്കൽ ഓഫീസർ ഡോ. ഫൈസൽ തുടങ്ങിയവർ പ്രസംഗിച്ചു. ആശാവർക്കർമാർ, ആരോഗ്യപ്രവർത്തകർ, നാട്ടുകാർ, ക്ലബ് ഭാരവാഹികൾ തുടങ്ങിയവർ പങ്കെടുത്തു.

കാട്ടാന ഭീതിയിൽ മൂലേപ്പാടം-തറമുറ്റം നിവാസികൾ; വീടിന് സമീപം കാട്ടാനയെത്തി

നിലന്പൂർ: മൂലേപ്പാടത്ത് കാട്ടാനകൾ ജനങ്ങളുടെ ഉറക്കം കെടുത്തുന്നു. കാട്ടാന ശല്യം പരിഹരിക്കാൻ അടിയന്തര നടപടി വേണമെന്ന് പ്രദേശവാസികളും മൂലേപ്പാടം സെന്‍റ് ജോസഫ് ഇടവക സമൂഹവും ആവശ്യപ്പെട്ടു. ചാലിയാർ പഞ്ചായത്തിലെ മൂലേപ്പാടം - തറമുറ്റം ഭാഗങ്ങളിലാണ് സന്ധ്യമയങ്ങുന്നതോടെ കാട്ടാനകൾ റോഡിലേക്ക് എത്തുന്നത്. ശനിയാഴ്ച കുടുംബ പ്രാർഥന നടക്കുകയായിരുന്ന വീടിന്‍റെ പരിസരത്തേക്ക് കാട്ടാനയെത്തി. ഇടവക വികാരി ഫാ. ഷിന്‍റോ പുലിക്കുഴി ഉൾപ്പെടെ പ്രാർഥനാ സമയത്ത് വീട്ടിലുണ്ടായിരുന്നു. വൈകുന്നേരം 6.10 ഓടെ വഴക്കുഴയിൽ തൊമ്മച്ചന്‍റെ വീട്ടിൽ പ്രാർഥന നടക്കുന്പോൾ മുന്നിലെ റോഡിലേക്കാണ് കാട്ടാന എത്തിയത്. പിന്നീട് റോഡിലൂടെ തന്നെ മുന്നോട്ട് പോവുകയായിരുന്നു. വീടിന്‍റെ പരിസരത്ത് നിന്ന് ആന പോയെന്ന് ഉറപ്പാക്കിയ ശേഷമാണ് ഇടവക വികാരി ഉൾപ്പെടെ ഇവിടെ നിന്ന് മടങ്ങിയത്. മലയോര കർഷകർ അടക്കം 50 ലേറെ കുടുംബങ്ങൾ താമസിക്കുന്ന തറമുറ്റം ഭാഗത്തേക്ക് നിലന്പൂർ - നായാടംപൊയിൽ മലയോര പാതയിൽ നിന്ന് കോണ്‍ക്രീറ്റ് റോഡാണുള്ളത്. വീതി കുറഞ്ഞ ഈ റോഡിലൂടെയാണ് രാവുംപകലും ആളുകൾ സഞ്ചരിക്കുന്നത്. ഈ റോഡിലേക്ക് കാട്ടാനകൾ എത്തുന്നത് ആശങ്ക വർധിപ്പിക്കുന്നു. മൂലേപ്പാടം സെന്‍റ് ജോസഫ് പള്ളിയുടെ സമീപം വരെ കാട്ടാനകളെത്തി കഴിഞ്ഞു. പള്ളി പരിസരത്തെ വീടുകളുടെ മുറ്റത്ത് നിർത്തിയിട്ടിരുന്ന വാഹനങ്ങൾ കേടുവരുത്തിയും കൃഷികൾ നശിപ്പിച്ചും കാട്ടാനകൾ സ്വൈര്യവിഹാരം നടത്തുകയാണ്. തറമുറ്റം മുതൽ പള്ളി പരിസരം വരെയുള്ള ഭാഗത്ത് അടിയന്തരമായി സോളാർ വൈദ്യുത തൂക്കുവേലി സ്ഥാപിക്കണമെന്ന ആവശ്യം ശക്തമാണ്. 1970 കളുടെ തുടക്കം മുതൽ മലയോര കർഷക കുടുംബങ്ങൾ തിങ്ങിപാർക്കുന്ന പ്രദേശമാണ് മൂലേപ്പാടം. നാട്ടുകാർ വിവരം അറിയിച്ചതിനെ തുടർന്ന് അകന്പാടം ഡെപ്യൂട്ടി റേഞ്ച് ഓഫീസർ വി.കെ. മുഹസിന്‍റെ നേതൃത്വത്തിൽ ശനിയാഴ്ച രാത്രിയും ഇന്നലെയും വനപാലകരെത്തി സ്ഥിതിഗതികൾ വിലയിരുത്തി. മൂലേപ്പാടത്ത് ജനകീയ സമിതി രൂപീകരിച്ച് ശക്തമായ സമരങ്ങളിലേക്ക് നീങ്ങാനാണ് മൂലേപ്പാടം - തറമുറ്റം നിവാസികളുടെ തീരുമാനം. ജീവനും കൃഷിക്കും സുരക്ഷ ഉറപ്പാക്കണമെന്നാണ് ഇവരുടെ ആവശ്യം.

പെരിന്തൽമണ്ണയിൽ നാല് കടകളിൽ മോഷണം

പെരിന്തൽമണ്ണ : പെരിന്തൽമണ്ണ നഗരത്തിൽ പട്ടാന്പി റോഡിലെ നാല് കടകളിൽ മോഷണം. ശനിയാഴ്ച രാത്രിയാണ് സംഭവം. ഫെഡറൽ ബാങ്കിന് സമീപം പട്ടാന്പി റോഡിന്‍റെ ഇരുഭാഗത്തുള്ള മെഡിക്കൽ ഷോപ്പ്, ബേക്കറി, ഫാൻസി, ഫ്രെയിംവർക്ക് കടകളിലാണ് മോഷണം നടന്നിട്ടുള്ളത്. മെഡിക്കൽ ഷോപ്പിൽ നിന്ന് 5000 രൂപ നഷ്ടപ്പെട്ടു. കുന്നപ്പള്ളി പള്ളിപ്പുറത്ത് അബൂബക്കർ, കൊളക്കട ഉണ്ണീൻകുട്ടി എന്നിവരുടെ ഉടമയിലുള്ള റോയൽ മെഡിക്കൽസിന്‍റെ ഷട്ടറിന്‍റെ പൂട്ട് തകർത്താണ് മോഷ്ടാവ് അകത്ത് കയറിത്. പുളിക്കാവ് പള്ളത്തൊടി മൊയ്തീൻകുട്ടിയുടെ ഉടമസ്ഥതയിലുള്ള പിഎംഎച്ച് ബേക്കറിയിലും മോഷണം നടന്നു. ഇവിടെയും പൂട്ട് തകർത്താണ് മോഷ്ടാവ് കടയിൽ കയറിയത്. ബേക്കറിയിലുണ്ടായിരുന്ന പണം നഷ്ടപ്പെട്ടു. കട്ടുപ്പാറ ചെമ്മല ആഷിക്കിന്‍റെ അലങ്കാർ ഫ്രെയിം ഷോപ്പിലും മോഷ്ടാവ് കയറി മേശവലിപ്പ് പരിശോധിച്ചിട്ടുണ്ട്. പുളിങ്കാവ് പള്ളത്തൊടി മുഹമ്മദ് ഷാഫിയുടെ ഷോപ്പി കളക്ഷൻ ഫാൻസി കടയുടെ ഷട്ടർ കന്പിപ്പാര കൊണ്ടുയർത്തി മുൻഭാഗത്തെ കട്ടിയുള്ള ഗ്ലാസ് പൊട്ടിച്ചാണ് മോഷ്ടാവ് കടയിൽ കയറിയത്. കന്പിപ്പാരയും മറ്റൊരു ഇരുന്പ് ആയുധവും കടയുടെ മുന്നിൽ നിന്ന് കണ്ടെടുത്തു. ഗ്ലാസ് പൊട്ടിച്ചതിൽ 15000 ത്തിലേറെ രൂപയുടെ നഷ്ടം സംഭവിച്ചു. പിഎംഎച്ച് ബേക്കറിയിലെ ജീവനക്കാരന്‍റെ ബൈക്ക് കടക്ക് സമീപം വച്ചിരുന്നു. ഈ ബൈക്കുമായാണ് കള്ളൻ കടന്നുകളഞ്ഞത്. പെരിന്തൽമണ്ണ പോലീസ് അന്വേഷണം തുടങ്ങി.

നിലന്പൂരിൽ സ്ഥാനാർഥികളെ ഇറക്കി തൃണമൂൽ കോണ്‍ഗ്രസ്

നിലന്പൂർ: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിലേക്ക് പി.വി. അൻവറിന്‍റെ തട്ടകത്തിൽ സ്ഥാനാർഥികളെ പ്രഖ്യാപിച്ച് തൃണമൂൽ കോണ്‍ഗ്രസ്. നിലന്പൂർ നഗരസഭയിൽ ചിത്രം തെളിയും മുന്പേ മൂന്ന് ഡിവിഷനിലേക്കാണ് സ്ഥാനാർഥികളെ പ്രഖ്യാപിച്ചിരിക്കുന്നത്. ചുങ്കത്തറ, വഴിക്കടവ്, മൂത്തേടം പഞ്ചായത്തുകളിലും മത്സരിക്കാനുള്ള ഒരുക്കമായി. നിലന്പൂർ നഗരസഭയിലെ മുമ്മൂളി, തോണിപൊയിൽ, മുതീരി ഡിവിഷനുകളിലാണ് വോട്ട് അഭ്യർഥിച്ച് തൃണമൂൽ കോണ്‍ഗ്രസ് സ്ഥാനാർഥികളുടെ പോസ്റ്ററുകൾ ഇറങ്ങിയിട്ടുള്ളത്. സിപിഐ പാത്തിപ്പാറ ബ്രാഞ്ച് മുൻ സെക്രട്ടറിയും നിലവിൽ തൃണമൂൽ കോണ്‍ഗ്രസ് മുനിസിപ്പൽ കോ ഓർഡിനേറ്ററുമായ ഷാജഹാൻ പാത്തിപ്പാറയാണ് മുമ്മുളി ഡിവിഷനിൽ മത്സരിക്കുന്നത്. മുതീരി ഡിവിഷനിൽ നിയാസും തോണിപൊയിൽ ഡിവിഷനിൽ അഷ്്റഫ് രാമംകുത്തുമാണ് സ്ഥാനാർഥികൾ. തൃണമൂൽ കോണ്‍ഗ്രസിന്‍റെ ഒൗദ്യോഗിക ചിഹ്നമായ പുല്ലും പൂവിലുമാണ് ഇവർ മത്സരിക്കുക. പാർട്ടി ചിഹ്നങ്ങൾ ഉൾപ്പെടെയുള്ള സ്ഥാനാർഥികളുടെ പോസ്റ്ററുകളിലാണ് വോട്ട് അഭ്യർഥനയുള്ളത്. നിലന്പൂർ നിയമസഭ ഉപതെരഞ്ഞെടുപ്പിൽ ഒറ്റക്ക് മത്സരിച്ച പി.വി. അൻവർ 20,000 ത്തോളം വോട്ടുകൾ നേടിയിരുന്നു. നിലന്പൂർ നഗരസഭയിൽ മാത്രം അൻവറിന് 2000 ത്തിലേറെ വോട്ടുകൾ ലഭിച്ചു. അതിനാൽ തൃണമൂൽ കോണ്‍ഗ്രസ് സ്ഥാനാർഥികൾ മത്സര രംഗത്തറങ്ങിയത് മുന്നണികളുടെ ഉറക്കം കെടുത്തും. നിലന്പൂർ നഗരസഭയിൽ ഉൾപ്പെടെ നിലന്പൂർ മണ്ഡലത്തിലെ ഗ്രാമപഞ്ചായത്തുകളിലും നിലന്പൂർ - കാളികാവ് ബ്ലോക്ക് പഞ്ചായത്തുകളിലും കരുത്തറിയിക്കുകയാണ് പി.വി. അൻവറിന്‍റെയും തൃണമൂൽ കോണ്‍ഗ്രസിന്‍റെയും ലക്ഷ്യം. 2020-ൽ പി.വി. അൻവറിന്‍റെ നേതൃത്വത്തിൽ രൂപം നൽകിയ വികസന മുന്നണിയുടെ ബാനറിലാണ് തുടർച്ചയായ 20 വർഷത്തെ യുഡിഎഫ് ഭരണം അവസാനിപ്പിച്ച് എൽഡിഎഫിന് നഗരസഭയിൽ ഭരണം നേടി കൊടുത്തത്. അതിനാൽ എൽഡിഎഫിന്‍റെ തുടർഭരണം തടയുകയാണ് അൻവറിന്‍റെ പ്രധാന ലക്ഷ്യം. അൻവർ എംഎൽഎ ആയിരിക്കുന്പോഴാണ് അമരന്പലത്തും പോത്തുകല്ലിലും എൽഡിഎഫിന് ഭരണം ലഭിച്ചത്.

അധ്യാപികമാരുടെ ഷോട്ട് പുട്ടിൽ ഷിനുവിന് സ്വർണം

പൂക്കോട്ടുംപാടം: പാലക്കാട് ചാത്തനൂർ ഗവണ്‍മെന്‍റ് ഗേൾസ് ഹയർ സെക്കഡറി സ്കൂൾ മൈതാനത്ത് നടന്ന മലപ്പുറം ജില്ലാ കായികമേളയോടനുബന്ധിച്ച നടന്ന അധ്യാപികമാർക്കുള്ള ഷോട്ട് പുട്ടിൽ ഷിനു ജിജോ ഒന്നാം സ്ഥാനം കരസ്ഥമാക്കി. നാൽപത് വയസിനു മുകളിലുള്ള അധ്യാപകർക്കായി നടത്തിയ മത്സരത്തിലാണ് തുടർച്ചയായി രണ്ടാം തവണ ഷിനു ജേതാവാകുന്നത്. നിലന്പൂർ സബ് ജില്ലയിലെ മാമാങ്കര സെന്‍റ് മേരീസ് യുപി സ്കൂളിലെ അധ്യാപികയാണ് ഷിനു. സംസ്ഥാന വനിത ക്രിക്കറ്റ് താരവും മലപ്പുറം ജില്ലാ വനിതാ ക്രിക്കറ്റ് കോച്ചുമായിരുന്നു. പൂക്കോട്ടുംപാടം ഉപ്പുവള്ളി സ്വദേശിയാണ്.

കിരീടം വീണ്ടെടുത്ത് എടപ്പാൾ : കടകശേരി ഐഡിയലിന് സ്കൂൾ ചാന്പ്യൻപട്ടം

ജില്ലാ സ്കൂൾ കായികമേളയ്ക്ക് കൊടിയിറങ്ങി ചാത്തന്നൂർ: ജില്ലാ സ്കൂൾ കായികമേളയിൽ കഴിഞ്ഞ വർഷം കൈവിട്ട കിരീടം തിരിച്ചുപിടിച്ച് എടപ്പാൾ ഉപജില്ലയുടെ മുന്നേറ്റം. 351 പോയിന്‍റുമായാണ് എടപ്പാൾ ഉപജില്ല ഓവറോൾ കിരീടം ഇത്തവണ സ്വന്തമാക്കിയത്. 15 വർഷം എടപ്പാൾ കൈവശം വച്ച ഓവറോൾ കിരീടം കഴിഞ്ഞ വർഷം തിരുനാവായ നവാമുകുന്ദ എച്ച്എസ്എസിന്‍റെയും ആലത്തിയൂർ കഐച്ച്എംഎച്ച്എസ് സ്കൂളിന്‍റെയും കരുത്തിൽ തിരൂർ സ്വന്തമാക്കിയിരുന്നു. ഒരു വർഷത്തെ ഇടവേളക്ക് ശേഷം കടകശേരി ഐഡിയൽ സ്കൂളിന്‍റെ കുതിപ്പിൽ എടപ്പാൾ ഉപജില്ല വീണ്ടും കിരീടമണിയുകയായിരുന്നു. 33 സ്വർണവും 37 വെള്ളിയും 33 വെങ്കലവുമാണ് എടപ്പാൾ ഉപജില്ല നേടിയത്. നവാമുകുന്ദയുടെയും ആലത്തിയൂരിന്‍റെയും കുതിപ്പിൽ 36 സ്വർണവും 22 വെള്ളിയും 14 വെങ്കലവുമായി 292 പോയിന്‍റോടെ തിരൂർ ഉപജില്ലക്ക് രണ്ടാം സ്ഥാനം കൊണ്ട് തൃപ്തി അടയേണ്ടിവന്നു. കഴിഞ്ഞ വർഷം 344 പോയിന്‍റുമായാണ് തിരൂർ ഉപജില്ല ഓവറോൾ കിരീടം കരസ്ഥമാക്കിയത്. 10 സ്വർണവും 11 വെള്ളിയും എട്ട് വെങ്കലവുമായി 91 പോയിന്േ‍റാടെ അരീക്കോട് മൂന്നാമതും അഞ്ച് സ്വർണവും മൂന്ന് വെള്ളിയും രണ്ട് വെങ്കലവുമായി 66.5 പോയന്‍റുമായി താനൂർ ഉപജില്ല നാലാമതുമെത്തി. കടകശേരി ഐഡിയൽ സ്കൂൾ ചാന്പ്യൻപട്ടം നിലനിർത്തി. 26 സ്വർണവും 31 വെള്ളിയും 29 വെങ്കലവുമടക്കം 252 പോയിന്‍റുമായാണ് ഐഡിയൽ ചാന്പ്യൻമാരായത്. തുടർച്ചയായി 18-ാം തവണയാണ് ഐഡിയൽ ചാന്പ്യൻപട്ടം നിലനിർത്തുന്നത്. 22 സ്വർണവും 10 വെള്ളിയും 10 വെങ്കലവുമടക്കം 150 പോയിന്േ‍റാടെ തിരുനാവായ നവാമുകുന്ദ എച്ച്എസ്എസ് രണ്ടാം സ്ഥാനം നേടി. 10 സ്വർണം എഴ് വെള്ളി മൂന്ന് വെങ്കലം അടക്കം 74 പോയിന്‍റ് കരസ്ഥമാക്കി കഐച്ച്എംഎച്ചഎസ്എസ് ആലത്തിയൂർ മൂന്നാമതായി. മൂന്ന് ദിവസങ്ങളിലായി പാലക്കാട് ജില്ലയിലെ ചാത്തന്നൂർ ഗവണ്‍മെന്‍റ് ഹയർ സെക്കൻഡറി സ്കൂളിലെ ട്രാക്കിലും ഫീൽഡിലും പിറ്റിലും കടകശേരി ഐഡിയലും തിരുനാവായ നവാമുകുന്ദയും ആലത്തിയൂർ കഐച്ച്എംഎച്ച്എസ്എസും ശക്തമായ സാന്നിധ്യമറിയിച്ചപ്പോൾ കായികമേള തീർത്തും വാശിയേറിയതായിരുന്നു. ദേശീയ നിലവാരത്തിലേക്കുയർന്നായിരുന്നു താരങ്ങളുടെ പ്രകടനങ്ങളെന്ന് കായികാധ്യപകർ വിലയിരുത്തി. നാളെ തിരുവനന്തപുരത്ത് നടക്കുന്ന സംസ്ഥാന സ്കൂൾ ഗെയിംസിൽ അത് ലറ്റിക്സിൽ ഒന്നാം സ്ഥാനത്തുള്ള മലപ്പുറം ഓവറോൾ കിരീടം നിലനിർത്തുക എന്ന ലക്ഷ്യത്തിനായിരിക്കും മൽസരത്തിനിറങ്ങുക.

ജെ.ബി. കോശി കമ്മീഷൻ റിപ്പോർട്ട് അടിയന്തരമായി നടപ്പാക്കണം: കേരള കോണ്‍ഗ്രസ്

പെരിന്തൽമണ്ണ: ക്രിസ്ത്യൻ സമുദായത്തിന്‍റെ ദുരവസ്ഥ പരിഹരിക്കുവാനുള്ള ജെ.ബി. കോശി കമ്മീഷന്‍റെ റിപ്പോർട്ട് അടിയന്തരമായി നടപ്പാക്കാനുള്ള നടപടികൾ സ്വീകരിക്കണമെന്ന് പെരിന്തൽമണ്ണയിൽ ചേർന്ന കേരള കോണ്‍ഗ്രസ് മലപ്പുറം ജില്ലാ കമ്മിറ്റി യോഗം ആവശ്യപ്പെട്ടു. വിദ്യാഭ്യാസ-ന്യൂനപക്ഷ അവകാശത്തിന് മേലുള്ള സർക്കാരിന്‍റെ കടന്നുകയറ്റവും മതസൗഹാർദത്തിന് തടസമുണ്ടാക്കുന്ന പ്രഖ്യാപനങ്ങളിൽ നിന്ന് ഗവണ്‍മെന്‍റ് പിൻവാങ്ങി, വിദ്യാഭ്യാസ മാനേജ്മെന്‍റുകളുടെ അവകാശങ്ങൾക്ക് സംരക്ഷണം നൽകണമെന്ന ആവശ്യവും യോഗം ഉന്നയിച്ചു. ജീവിക്കുവാനുള്ള മലയോര കർഷകരുടെ അവകാശങ്ങൾ നിഷേധിക്കുന്ന വനം - വന്യജീവി സംരക്ഷണ നിയമങ്ങൾ അടിയന്തരമായി പൊളിച്ചഴുതി കർഷകർക്ക് സ്വൈര്യജീവിതം ഉറപ്പുവരുത്തണമെന്നും യോഗം ആവശ്യപ്പെട്ടു. വരാൻ പോകുന്ന തെരഞ്ഞെടുപ്പിൽ കേരളത്തിൽ നിന്ന് ഇടതുഭരണത്തെ തൂത്തെറിയുവാൻ റബർ കർഷക സമൂഹം ഒറ്റക്കെട്ടായി രംഗത്തിറങ്ങണമെന്ന് യോഗം ആഹ്വാനം ചെയ്തു. 2021 ലെ പ്രകടനപത്രികയിൽ റബറിന് 250 രൂപ തറവില എന്ന മോഹന വാഗ്ദാനം നൽകി വഞ്ചിച്ചിരിക്കുകയാണ് ഈ സർക്കാരെന്ന് യോഗം ചൂണ്ടിക്കാട്ടി. തദ്ദേശ തെരഞ്ഞെടുപ്പിൽ പാർട്ടിയുടെ സ്വാധീനമുള്ള മേഖലകളിൽ യുഡിഎഫുമായി സഹകരിച്ച് സിറ്റിംഗ് സീറ്റുകളിൽ ഉൾപ്പെടെ ശക്തമായ മത്സരം കാഴ്ചവയ്ക്കാനും യോഗം തീരുമാനിച്ചു. ജില്ലാ പ്രസിഡന്‍റ് മാത്യുവർഗീസ് അധ്യക്ഷത വഹിച്ചു. നേതാക്കളായ ആലിക്കുട്ടി എറക്കോട്ടിൽ, കെ.എം. ഇഗ്നേഷ്യസ്, ടി.ഡി. ജോയി, വിൻസി അനിൽ, സതീഷ് വർഗീസ്, ഏബ്രഹാം കുര്യൻ, എ.ജെ. ആന്‍റണി, വി.ബി. സുരേഷ്, സക്കീർ ഒതള്ളൂർ, തോമസ് ടി. ജോർജ്, റോയ് ജോസഫ്, പി.കെ. മാത്തുക്കുട്ടി, നിധിൻ ചാക്കോ, ടി.ഡി. സജേഷ് ഫിലിപ്പ്, അഡ്വ. അർജുൻ സുരേഷ് തുടങ്ങിയവർ പ്രസംഗിച്ചു.

മുന്നിൽ നടന്ന് മലപ്പുറം : പൂർണമായും ശീതീകരിച്ച സർക്കാർ എൽപി സ്കൂൾ നാടിന് സമർപ്പിച്ചു

മലപ്പുറം: വിദ്യാഭ്യാസ അടിസ്ഥാന പശ്ചാത്തല സൗകര്യങ്ങളുടെ രംഗത്ത് മാതൃകയായി മലപ്പുറം. രാജ്യത്ത് ആദ്യമായി പൂർണമായും ശീതീകരിച്ച സൗകര്യങ്ങളോടുകൂടിയ സർക്കാർ എൽപി സ്കൂൾ നാടിന് സമർപ്പിച്ചു. മലപ്പുറം മേൽമുറി മുട്ടിപ്പടി ജിഎംഎൽപി സ്കൂളിന്‍റെ നൂറുവർഷം പഴക്കമുണ്ടായിരുന്ന കെട്ടിടമാണ് ആധുനിക സൗകര്യങ്ങളോടെ പുതുക്കി പണിതത്. ഉത്സവാന്തരീക്ഷത്തിൽ നടന്ന പരിപാടി ഇ.ടി. മുഹമ്മദ് ബഷീർ എംപി ഉദ്ഘാടനം ചെയ്തു. നഗരസഭ ചെയർമാൻ മുജീബ് കാടേരി അധ്യക്ഷത വഹിച്ചു. പി. ഉബൈദുള്ള എംഎൽഎ മുഖ്യാതിഥിയായിരുന്നു. നഗരസഭ വൈസ് ചെയർപേഴ്സണ്‍ ഫൗസിയ കുഞ്ഞിപ്പു, സ്ഥിരം സമിതി അധ്യക്ഷരായ പി.കെ. സക്കീർ ഹുസൈൻ, പരി അബ്ദുൾ ഹമീദ്, മറിയുമ്മ ഷരീഫ് കോണോത്തൊടി, സി.പി. ആയിഷാബി, വാർഡ് കൗണ്‍സിലർ നാജിയ ഷിഹാർ, പ്രധാന്യാപിക ബി. പത്മജ എന്നിവർ പ്രസംഗിച്ചു. എൻജിനിയറിംഗ് വിഭാഗം ഫിറ്റ്നസ് നൽകാതെ ശോചനീയാവസ്ഥയിലായ സ്കൂളിനാണ് മലപ്പുറം നഗരസഭ അത്യാധുനിക സൗകര്യങ്ങളോടുകൂടി പുതിയ കെട്ടിടം നിർമിച്ചത്. നിലവിലുണ്ടായിരുന്ന സ്ഥലത്തിന് പകരമായി നഗരസഭ പുതിയ സ്ഥലംവാങ്ങിയ ശേഷമാണ് കെട്ടിട നിർമാണം പൂർത്തിയാക്കിയത്. സ്ഥലം വാങ്ങിയത് ഉൾപ്പെടെ ആധുനിക സൗകര്യങ്ങളോടെയുള്ള സ്കൂൾ നിർമാണത്തിന് 5.51 കോടി ചെലവഴിച്ചു. 5.1 കോടിയുടെ തനത് ഫണ്ട് ഉപയോഗിച്ചും 50 ലക്ഷം പി. ഉബൈദുള്ള എംഎൽഎയുടെ ആസ്തി വികസന ഫണ്ടും ഉപയോഗപ്പെടുത്തിയാണ് നിർമാണം പൂർത്തിയാക്കിയത്. മുഴുവൻ ക്ലാസ്റൂമുകളിലും എയർകണ്ടീഷൻ സൗകര്യങ്ങൾ ഏർപ്പെടുത്തിയതിന് പുറമേ മുഴുവൻ സ്മാർട്ട് ക്ലാസിനായി പ്രോജക്ടറുകൾ, സ്ക്രീനുകൾ, ഡിജിറ്റൽ ബോർഡുകൾ, കെട്ടിടത്തിന്‍റെ മൂന്ന് നിലകളിലും പ്യൂരിഫൈഡ് വാട്ടർ കിയോസ്ക്കുകൾ, ശിശുസൗഹൃദ ബെഞ്ച്, ഡെസ്ക്കുകൾ, സ്ഥാപനത്തിൽ മൊത്തമായി മൈക്ക്, സിസിടിവി എന്നിവയും ഒരുക്കി. വൈദ്യുതി പ്രതിസന്ധി പരിഹരിക്കുന്നതിനായി സോളാർ അധിഷ്ഠിതമായിട്ടാണ് സ്കൂൾ കെട്ടിടം തയാറാക്കിയത്. പ്രധാനാധ്യാപന്‍റെ റൂം, സ്റ്റാഫ് റൂം, ലാബ്, ആധുനിക അടുക്കള സൗകര്യങ്ങൾ ഉൾപ്പെടെയാണ് എൽപി സ്കൂളിൽ ഒരുക്കിയത്. സ്ഥലം വാങ്ങി നിർമാണം ആരംഭിച്ച് ഒന്നരവർഷം കൊണ്ടാണ് ആധുനിക സൗകര്യങ്ങളോടെ കെട്ടിടം മലപ്പുറം നഗരസഭ പൂർത്തിയാക്കിയത്. ഉദ്ഘാടനത്തിന്‍റെ ഭാഗമായി ഘോഷയാത്രയും ഉണ്ടായിരുന്നു.

കാറും ഓട്ടോയും കൂട്ടിയിടിച്ച് രണ്ട് യുവാൾക്ക് ദാരുണാന്ത്യം

കുറ്റിപ്പുറം : ദേശീയപാത കുറ്റിപ്പുറം പെരുന്പറന്പിലുണ്ടായ വാഹനാപകടത്തിൽ രണ്ട് യുവാക്കൾ മരിച്ചു. ഇന്നലെ പുലർച്ചെ ഓട്ടോറിക്ഷയും കാറും തമ്മിൽ കൂട്ടിയിടിച്ചാണ് അപകടമുണ്ടായത്. ഓട്ടോറിക്ഷയിൽ സഞ്ചരിച്ച എടച്ചലം സ്വദേശി പാറക്കൽ റസാഖ് (43), പാണ്ടികശാല സ്വദേശി നടുന്പായിൽ ശ്യാം (31) എന്നിവരാണ് മരിച്ചത്. അപകടത്തിൽ തലകീഴായി മറിഞ്ഞ കാറിലുണ്ടായിരുന്ന യാത്രക്കാരെ നിസാര പരിക്കുകളോടെ കുറ്റിപ്പുറം താലൂക്ക് ആശുപത്രിയിൽ പ്രവേശിച്ചു. റസാഖിനെ കുറ്റിപ്പുറം താലൂക്ക് ആശുപത്രിയിൽ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു. ഭാര്യ: റംഷീന. മക്കൾ: ഹാഷിം, അമ്ദാൻ, അൻഫ. പിതാവ്: ഹംസ. മാതാവ്: റുഖിയ. ശ്യാമിനെ വളാഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. തുടർന്ന് ശ്യാമിന്‍റെ നില ഗുരുതരമായതോടെ കോട്ടക്കലിലെ സ്വകാര്യ ആശുപത്രിയിലേക്ക് മാറ്റിയെങ്കിലും രക്ഷിക്കാനായില്ല. ഭാര്യ: സ്മിത. അച്ഛൻ: ശശി. അമ്മ: സുമിത.

ബ്ലോക്ക് പഞ്ചായത്തുകളിലെ സംവരണ വാർഡുകളുടെ നറുക്കെടുപ്പ്

മലപ്പുറം: തദ്ദേശ തെരഞ്ഞെടുപ്പിന്‍റെ ഭാഗമായി ജില്ലയിലെ ബ്ലോക്ക് പഞ്ചായത്തുകളിലെ സംവരണ വാർഡുകളുടെ നറുക്കെടുപ്പ് ജില്ലാ തെരഞ്ഞെടുപ്പ് ഓഫീസർ കൂടിയായ കളക്ടറുടെ നേതൃത്വത്തിൽ കളക്ടറേറ്റ് കോണ്‍ഫറൻസ് ഹാളിൽ നടത്തി. വിവിധ ബ്ലോക്ക് പഞ്ചായത്തുകളിലെ സംവരണ വാർഡുകൾ താഴെ. നിലന്പൂർ ബ്ലോക്ക് പഞ്ചായത്ത്: പട്ടികജാതി സംവരണം - 05 മരുത, പട്ടികവർഗ സംവരണം -1 പനങ്കയം, വനിതാ സംവരണം- 3 ഉപ്പട, 4 പാലേമാട്, 10 മൂത്തേടം, 11 പള്ളിക്കുത്ത്, 12 ചുങ്കത്തറ, 13 പൂക്കോട്ടുമണ്ണ, 14 എരഞ്ഞിമങ്ങാട്, 15 ഇടിവണ്ണ. അരീക്കോട് ബ്ലോക്ക്: പട്ടികജാതി സംവരണം - 14 കുഴിമണ്ണ, പട്ടികജാതി വനിത- 11 പുൽപറ്റ,വനിതാ സംവരണം- 2 പത്തനാപുരം, 8 പന്നിപ്പാറ, 9 കാവനൂർ, 10 എളയൂർ, 12 പൂക്കൊളത്തൂർ, 13 തൃപ്പനച്ചി, 15 കിഴിശേരി, 16 ഓമാനൂർ, 17 ചീക്കോട്. വണ്ടൂർ ബ്ലോക്ക്: പട്ടികജാതി -17 നടുവക്കാട്, പട്ടിക ജാതി വനിത- 02 നടുവത്ത്,വനിതാ സംവരണം - 5 വാണിയന്പലം, 7 ചെറുകോട്, 11 വെട്ടിക്കാട്ടിരി, 12 മൈലൂത്ത്, 13 തൃക്കലങ്ങോട്, 14 കാരക്കുന്ന്, 15 മഞ്ഞപ്പറ്റ, 16 തിരുവാലി. കാളികാവ് ബ്ലോക്ക്: പട്ടികജാതി സംവരണം-04 പുല്ലങ്കോട്, പട്ടിക ജാതി വനിത- 11, തുവ്വൂർ വനിതാ സംവരണം- 3 പൂക്കോട്ടുംപാടം, 05 കാളികാവ്, 6 കേരള, 7 കരുവാരകുണ്ട്, 10 എടപ്പറ്റ, 13 അഞ്ചച്ചവിടി, 16 കരുളായി. പെരിന്തൽമണ്ണ ബ്ലോക്ക്: പട്ടികജാതി സംവരണം-03 മേലാറ്റൂർ, പട്ടിക ജാതി വനിതാ സംവരണം-12 കുന്നക്കാവ്, വനിതാ സംവരണം- 2 കീഴാറ്റൂർ, 4 ചെമ്മാണിയോട്, 6 വെട്ടത്തൂർ 7 അരക്കുപറന്പ്, 8 താഴെക്കോട്, 10 ആലിപ്പറന്പ്, 11 തൂത, 18 അങ്ങാടിപ്പുറം, 19 വലന്പൂർ. മങ്കട ബ്ലോക്ക്: പട്ടിക ജാതി സംവരണം- 1 പടിഞ്ഞാറ്റുമുറി, വനിതാ സംവരണം-2 വള്ളിക്കാപറ്റ, 3 വെള്ളില, 4 മങ്കട, 7 പുഴക്കാട്ടിരി, 9 വെങ്ങാട്, 11 പാങ്ങ് ചേണ്ടി, 12 പടപ്പറന്പ്, 15 കൂട്ടിലങ്ങാടി.

അവകാശ സംരക്ഷണ ജാഥക്ക് എൻപിപി സ്വീകരണം നൽകി

പെരിന്തൽമണ്ണ: എകെസിസി കാസർഗോഡ് നിന്ന് ആരംഭിച്ച് സെക്രട്ടറിയേറ്റിലേക്ക് നടത്തുന്ന അവകാശ സംരക്ഷണ ജാഥയ്ക്ക് പെരിന്തൽമണ്ണയിൽ നാഷണൽ പീപ്പിൾസ് പാർട്ടി (എൻപിപി) മലപ്പുറം ജില്ലാ ഘടകം സ്വീകരണം നൽകി. ജാഥാക്യാപ്റ്റൻ പ്രഫ. രാജീവ് കൊച്ചുപറന്പിലിനെ എൻപിപി ജില്ലാ പ്രസിഡന്‍റ് ജയിംസ് തെക്കേക്കുറ്റ് ഹാരാർപ്പണം നടത്തി. ഒരു ജനവിഭാഗത്തെ മാത്രം അവഗണിച്ചുകൊണ്ടുള്ള ഇടത്,വലത് പാർട്ടികളും ഭരണവർഗവും കാണിക്കുന്ന നീചപ്രവർത്തനങ്ങൾ അവസാനിപ്പിക്കണമെന്ന് യോഗം ഉദ്ഘാടനം ചെയ്ത് ജെയിംസ് തെക്കേക്കുറ്റ് ആവശ്യപ്പെട്ടു. വൈസ് പ്രസിഡന്‍റ് എ.ജെ. സണ്ണി, ലൗജൂ ഓലിക്കര, സ്കറിയ പെരിന്തൽമണ്ണ, ജോപ്പൻ താഴെക്കോട്, ജോയി പുന്നക്കാത്തടം എന്നിവർ പ്രസംഗിച്ചു.

എഎഫ്ഡിഎം സൂപ്പർ ലീഗ് നാളെ

പെരിന്തൽമണ്ണ: ഈ വർഷത്തെ എഎഫ്ഡിഎം സൂപ്പർ ലീഗ് ഫുട്ബോൾ സീസണ്‍ 7-ന്‍റെ ടൈറ്റിൽ സ്പോണ്‍സർമാരായി പെരിന്തൽമണ്ണയിലെ പ്രമുഖ ആശുപത്രിയായ മൗലാന ആശുപത്രിയെ തെരഞ്ഞെടുത്തു. കായികരംഗത്തെ പ്രോത്സാഹിപ്പിക്കാനുള്ള മൗലാന ആശുപത്രിയുടെ പ്രതിബദ്ധത അഭിനന്ദനാർഹമാണെന്ന് വിലയിരുത്തപ്പെട്ടു. ഇതുമായി ബന്ധപ്പെട്ട് നടന്ന ലോഗോ പ്രകാശനത്തിൽ മൗലാന ആശുപത്രിയെ പ്രതിനിധീകരിച്ച് ഡെപ്യൂട്ടി ഡയറക്ടർ ഡോ. റിസ്വിൻ അഹമ്മദ്, ചീഫ് ഓപറേറ്റർ ഓഫീസർ രാംദാസ്, ഫൈസൽ സീനിയർ ഓഫീസർ എന്നിവർ പങ്കെടുത്തു. സൂപ്പർ ലീഗിനെ പ്രതിനിധീകരിച്ച് പ്രസിഡന്‍റ് മുക്താർ വണ്ടൂർ, ജനറൽ സെക്രട്ടറി റഷീദ് കൊണ്ടോട്ടി, ട്രഷറർ ജാഫർ കാരക്കുന്ന്, സൂപ്പർ ലീഗ് ചെയർമാൻ അബ്ദുള്ള അകന്പാടം, നജീബ് അരീക്കോട്, നാസർ അരീക്കോട്, ഖാലിക്ക് പുത്തൂർ പള്ളിക്കൽ ഉൾപ്പെടെയുള്ളവർ പങ്കെടുത്തു. 20 ന് മലപ്പുറം കോട്ടപ്പടി ഫുട്ബോൾ സ്റ്റേഡിയത്തിൽ സൂപ്പർ ലീഗ് സീസണ്‍-7 ന് വിസിൽ മുഴങ്ങും.

കനത്ത മഴയിൽ എടക്കര മേഖലയിൽ വ്യാപക നാശം

എടക്കര: കനത്ത മഴയയെത്തുടർന്ന് എടക്കര മേഖലയിൽ തോടുകളും പുഴകളും നിറഞ്ഞൊഴുകി വ്യാപക നാശം. വഴിക്കടവിൽ വീടുകളിൽ വെള്ളം കയറി. കോഴി ഫാമിൽ വെള്ളം കയറി ഒട്ടനവധി കോഴികൾ ചത്തു. പൂവത്തിപ്പൊയിൽ ഡീസന്‍റ്കുന്ന് പട്ടികവർഗ ഊരിലേതടക്കം പത്തോളം വീടുകളിലാണ് വെള്ളം കയറിയത്. അത്തിത്തോടിന് ചേർന്ന പുളിയക്കോടൻ കരീമിന്‍റെ കോഴിഫാമിലാണ് വെള്ളം കയറി കോഴികൾ ചത്തത്. കീടത്ത് അബ്ദുൾ ലത്തീഫിന്‍റെ ചിപ്സ് യൂണിറ്റിലും വെള്ളം കയറി നാശനഷ്ടമുണ്ടായി. അന്തർ സംസ്ഥാന പാതയായ കെഎൻജി റോഡിൽ മണിമൂളി ഭാഗത്ത് വെള്ളം കയറിയതിനെത്തുടർന്ന് ഒരു മണിക്കൂറേളം ഗതാഗതം തടസപ്പെട്ടു. കാരക്കോടൻ പുഴ, പാണ്ടിപ്പുഴ, അത്തിത്തോട് എന്നിവ നിറഞ്ഞ് കവഞ്ഞെഴുകി. പാണ്ടിപ്പുഴയുടെ മണക്കാട് പാലം വെള്ളത്തിനടിയിലായി. എടക്കര ടൗണും പരിസരവും വെള്ളക്കെട്ടിലായി. എടക്കര, പോത്തുകൽ, ചുങ്കത്തറ എന്നിവിടങ്ങളിലും കനത്ത മഴയിൽ റോഡുകൾ വെള്ളക്കെട്ടിലായി. നിരവധി കൃഷിയിടങ്ങളും വെള്ളത്തിനടിയിലായി. ഇന്നലെ വൈകുന്നേരം നാലോടെയാണ് മേഖലയിൽ അതിശക്തമായ ഇടിയും മഴയുമുണ്ടായത്.

‘ഫയർ ആൻഡ് റെസ്ക്യു ഓഫീസർമാരുടെ അംഗബലം കൂട്ടണം’

പെരിന്തൽമണ്ണ: തീപിടിത്തം ഉണ്ടാകുന്പോൾ വീതി കുറഞ്ഞ റോഡിലൂടെ സഞ്ചരിക്കുന്നതിനായി പുതിയ വാഹനം അനുവദിക്കണമെന്നും നിലവിലെ ഫയർ ആൻഡ് റെസ്ക്യു ഓഫീസർമാരുടെ അംഗബലം കൂട്ടുന്നതിനാവശ്യമായ നടപടികൾ സ്വീകരിക്കണമെന്നും കേരള ഫയർ സർവീസ് അസോസിയേഷൻ പെരിന്തൽമണ്ണ യൂണിറ്റ് സമ്മേളനം ആവശ്യപ്പെട്ടു. സംസ്ഥാന വൈസ് പ്രസിഡന്‍റ് കെ. രമേഷ് ഉദ്ഘാടനം ചെയ്തു. പ്രകാശ്, ഗിരീഷ്, സജിത്ത്, രാജേഷ്, അനി എന്നിവർ പ്രസംഗിച്ചു. ഭാരവാഹികൾ: കെ.ടി. രാജേഷ് (യൂണിറ്റ് കണ്‍വീനർ), വി.ബി. രാമദാസ് (മേഖലാ കമ്മിറ്റി അംഗം), സഫീർ (ട്രഷറർ).

പോത്തുകൽ പഞ്ചായത്ത് കൃഷിഭവന് പുതിയ കെട്ടിടം

എടക്കര: പോത്തുകൽ ഗ്രാമപഞ്ചായത്ത് കൃഷിഭവൻ കെട്ടിടം ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് വിദ്യാരാജൻ അധ്യക്ഷത വഹിച്ചു. കൃഷി ഓഫീസർ റിൻഷില റിപ്പോർട്ട് അവതരിപ്പിച്ചു. പഞ്ചായത്ത് വൈസ് പ്രസിഡന്‍റ് ഷാജി ജോണ്‍, നിലന്പൂർ ബ്ലോക്ക് കൃഷി അസിസ്റ്റന്‍റ് ഡയറക്ടർ ബിജുല ബാലൻ, ബ്ലോക്ക് പഞ്ചായത്തംഗം സോമൻ പാർലി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.എ. തോമസ്, പഞ്ചായത്ത് അംഗങ്ങളായ മറിയാമ്മ കുഞ്ഞുമോൻ, നാസർ സ്രാന്പിക്കൽ, മോൾ സി. പ്രസാദ്, സലൂബ് ജലീൽ, മിനി വെട്ടിക്കുഴ, ഹരിദാസൻ, സിഡിഎസ് ചെയർപേഴ്സണ്‍ സിന്ധു അശോകൻ, വിവിധ രാഷ്ട്രീയ പാർട്ടി പ്രതിനിധികൾ, എഡിസി പ്രതിനിധി ബിനു വർഗീസ്, സീനിയർ കൃഷി അസിസ്റ്റന്‍റ് ദീപ എന്നിവർ പ്രസംഗിച്ചു. പോത്തുകൽ ഗവണ്‍മെന്‍റ് ഹോമിയോ ഡിസ്പെൻസറി സ്ഥിതി ചെയ്യുന്ന കെട്ടിടത്തിലേക്കാണ് കൃഷിഭവൻ മാറ്റിയത്.

മഞ്ചേരിയിൽ വികസന സദസ് സംഘടിപ്പിച്ചു

മഞ്ചേരി: മഞ്ചേരി നഗരസഭയുടെ വികസന സദസ് കൗണ്‍സിൽ ഹാളിൽ സംഘടിപ്പിച്ചു. ചെയർപേഴ്സണ്‍ വി.എം. സുബൈദ ഉദ്ഘാടനം ചെയ്തു. വൈസ് ചെയർമാൻ വി.പി. ഫിറോസ് അധ്യക്ഷത വഹിച്ചു. കഴിഞ്ഞ അഞ്ച് വർഷകാലയളവിനുള്ളിലെ മികച്ച സേവനത്തിന് നഗരസഭയ്ക്ക് ഐഎസ്ഒ അംഗീകാരം ലഭിച്ചു. ആരോഗ്യ മേഖലയിൽ നഗര ആരോഗ്യകേന്ദ്രങ്ങൾ നിർമിക്കുകയും ഇതിന്‍റെ കീഴിൽ ആറു വെൽനസ് സെന്‍ററുകളും നഗരസഭയിൽ പ്രവർത്തിച്ചു വരുന്നു. അവയവം മാറ്റിവച്ച രോഗികൾക്ക് മരുന്ന് കിറ്റുകളും ഡയാലിസിസ് രോഗികൾക്ക് ഡയാലിസിസ് ചെയ്യുന്നതിനായി മാസം തോറും ഡയാലിസിസ് കിറ്റുകളും നൽകി വരുന്നു. ആരോഗ്യ സേവനങ്ങൾ ഒരു കുടക്കീഴിൽ കൊണ്ടുവരുന്നതിനായി സംസ്ഥാനത്ത് ആദ്യമായി നഗരസഭ കെട്ടിടത്തിൽ "ഹസ്തം’ ഓഫീസും ആരംഭിച്ചു. 998 പാലിയേറ്റീവ് രോഗികളെ വീട്ടിലെത്തി പരിചരിക്കുകയും ചികിത്സയും മരുന്നും നൽകി വരുന്നു. 83 ഹരിത കർമ സേനാംഗങ്ങളെ ഉപയോഗിച്ച് എല്ലാ മാസവും മാലിന്യം ശേഖരിക്കുന്നു. 92 അങ്കണവാടികളെ സ്മാർട്ട് ആക്കുകയും അങ്കണവാടികൾക്ക് ആവശ്യമായ ഫർണിച്ചർ, ഉപകരണങ്ങൾ എന്നിവ നൽകുകയും ചെയ്തു. സ്ത്രീകളെ സ്വയം പര്യാപ്തമാക്കുന്നതിന് 1000ത്തോളം വനിതാ സംരംഭങ്ങൾ ആരംഭിച്ചു. വയോജന മേഖലയിൽ പകൽവീട് നിർമിക്കുകയും ഭിന്നശേഷിക്കാർക്കായി മംഗലശേരിയിൽ ബഡ്സ് റിഹാബിലിറ്റേഷൻ സെന്‍റർ ആരംഭിക്കുകയും ചെയ്തു. വിവിധ കാര്യങ്ങൾ വികസന സദസിൽ അക്കമിട്ട് നിരത്തിയ യുഡിഎഫ് അംഗങ്ങൾ സർക്കാർ സാന്പത്തിക പ്രതിസന്ധി സൃഷ്ടിച്ചതായും കുറ്റപ്പെടുത്തി. സ്ഥിരംസമിതി ചെയർമാൻമാരായ യാഷിക് മേച്ചേരി, പി. റഹീം, സി. സക്കീന, എൻ.എം. എൽസി, എൻ.കെ. ഖൈറുന്നീസ, കൗണ്‍സിലർമാരായ കണ്ണിയൻ അബൂബക്കർ, മരുന്നൻ സാജിദ് ബാബു, സി.പി. അബ്ദുൾ കരീം, നഗരസഭാ സെക്രട്ടറി വൈ.പി മുഹമ്മദ് അഷ്റഫ്, കൗണ്‍സിൽ ക്ലർക്ക് പി.എ. സമീറലി, രാഷ്ട്രീയ പാർട്ടി പ്രതിനിധികൾ എന്നിവർ സംസാരിച്ചു. തുടർന്ന് മുദ്രാവാക്യം വിളിച്ച് ചടങ്ങ് ബഹിഷ്കരിച്ച് യുഡിഎഫ് കൗണ്‍സിലർമാരും നേതാക്കളും പ്രകടനമായി വേദിവിട്ടു. ഇതിനെതിരേ എൽഡിഎഫിന്‍റെ വനിതാ കൗണ്‍സിലർമാർ കൂകിവിളിക്കുകയും ചെയ്തു. യുഡിഎഫ് ബഹിഷ്കരിച്ചതിന് ശേഷമാണ് മുഖ്യമന്ത്രിയുടെയും തദ്ദേശ വകുപ്പ് മന്ത്രിയുടെയും വീഡിയോ സന്ദേശം പ്രദർശിപ്പിച്ചത്.

തിരുമാന്ധാംകുന്നിൽ ഭക്തിനിറവിൽ ആട്ടങ്ങയേറ്

അങ്ങാടിപ്പുറം: തിരുമാന്ധാംകുന്ന് ഭഗവതി ക്ഷേത്രത്തിൽ ഭക്തിയുടെ ആവേശമായി ആട്ടങ്ങയേറ്. പരമശിവൻ മാന്ധാതാവ് മഹർഷിക്ക് വരമായി നൽകിയ ശിവലിംഗം വീണ്ടെടുക്കാനെത്തിയ ഭദ്രകാളിയുടെ ഭൂതഗണങ്ങളും പ്രതിരോധിച്ച മാന്ധാതാവ് മഹർഷിയുടെ ശിഷ്യഗണങ്ങളും തമ്മിലുണ്ടായ ഘോരയുദ്ധത്തെ ഭക്തർ ആട്ടങ്ങയേറിലൂടെ പുനരാവിഷ്കരിച്ചു. ഭൂതപ്പടയുടെ അസ്ത്രങ്ങളെ പ്രതിരോധിക്കാൻ മഹർഷി ശിഷ്യർ പറിച്ചെറിഞ്ഞ ആട്ടങ്ങകളിലെ ഓരോ വിത്തുകളും അസ്ത്രങ്ങളായി രൂപാന്തരപ്പെട്ടുവെന്നാണ് ഐതിഹ്യം. പന്തീരടി പൂജയ്ക്ക് തൊട്ടുമുന്പായി ഭക്തജനങ്ങൾ വടക്കേ നടയിൽ പത്ത് നടയുടെ താഴെയും ക്ഷേത്രമുറ്റത്തുമായി രണ്ടു ചേരിയായി നിന്ന് ഭഗവതിയെ മനസിൽ ധ്യാനിച്ച് ആട്ടങ്ങകൊണ്ട് പരസ്പരം എറിഞ്ഞു. ചടങ്ങിൽ ഏറു കൊള്ളുന്നതും എറിയുന്നതും അനുഗ്രഹദായകമെന്നാണ് ഭക്തരുടെ വിശ്വാസം. സാധാരണയായി നിലന്പൂർ കാടുകളിൽ നിന്നാണ് ആട്ടങ്ങകൾ എത്തിക്കാറുള്ളത്. ഇത്തവണ വയനാട്ടിൽ നിന്നും ആട്ടങ്ങകൾ എത്തിച്ചു. അതേസമയം സ്ത്രീകൾ എറിയാൻ പാടില്ലെന്നുമുണ്ട്. പന്തിരടി പൂജക്ക് ശേഷം മാതൃശാലയിലേക്ക് ആട്ടങ്ങകൾ വർഷിക്കുന്നതോടെ ചടങ്ങ് പൂർത്തിയായി.

പെരിന്തൽമണ്ണയിൽ "ഉയിർപ്പ്’ ഗുണഭോക്തൃ സംഗമം നടത്തി

പെരിന്തൽമണ്ണ: പെരിന്തൽമണ്ണ ബ്ലോക്ക് പഞ്ചായത്തിന്‍റെ കീഴിൽ സൗജന്യ സംരംഭകത്വ പദ്ധതിയിൽ പരിശീലനം നേടിയവരുടെ സംഗമം നടത്തി. ജൻ ശിക്ഷണ്‍ സൻസ്ഥാൻ, എസ്എസ്‌വിഇപി പദ്ധതികളുമായി സഹകരിച്ച് വനിതകളുടെ തൊഴിൽ സാധ്യത വർധിപ്പിക്കുകയും സംരംഭകത്വത്തെ പ്രോത്സാഹിപ്പിക്കുകയും ചെയ്യുക എന്ന ലക്ഷ്യത്തോടെയാണ് പരിശീലനം നടത്തിയത്. "ഉയിർപ്പ്’ എന്ന പേരിൽ സംഘടിപ്പിച്ച പരിപാടി പി.വി. അബ്ദുൾ വഹാബ് എംപി ഉദ്ഘാടനം ചെയ്തു. കേന്ദ്ര പദ്ധതിയായ ജെഎസ്എസിന്‍റെ സാധ്യതകൾ പരമാവധി പെരിന്തൽമണ്ണ ബ്ലോക്ക് പഞ്ചായത്ത് ഉപയോഗപ്പെടുത്തിയിട്ടുണ്ടെന്നും വനിതാ ശാക്തീകരണ പദ്ധതി കൂടി ഉൾപ്പെടുത്തി വനിതകൾക്ക് സൗജന്യ തൊഴിൽ പരിശീലനവും സംരംഭകത്വത്തിനുള്ള സബ്സിഡി അനുവദിച്ചത് ഉൾപ്പെടെയുള്ള പ്രവർത്തനങ്ങൾ ഏറ്റെടുത്തത് പ്രശംസനീയമാണെന്നും അദ്ദേഹം പറഞ്ഞു. നജീബ് കാന്തപുരം എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ പ്രഭാഷണം നടത്തി. ജെഎസ്എസ് തൊഴിൽ പരിശീലനം പൂർത്തിയാക്കിയ ഗുണഭോക്താക്കൾക്ക് സർട്ടിഫിക്കറ്റ് വിതരണം അഡ്വ. യു.എ. ലത്തീഫ് എംഎൽഎ നിർവഹിച്ചു. എസ്എസ്‌വിഇപി, ഇഡിപി ട്രെയിനിംഗ് പൂർത്തിയാക്കിയവർക്കുള്ള സർട്ടിഫിക്കറ്റ് വിതരണം ബ്ലോക്ക് പഞ്ചായത്ത് വൈസ് പ്രസിഡന്‍റ് വനജ കുന്നംകുലത്ത്, കുടുംബശ്രീ മിഷൻ എഡിഎം രഗീഷ് എന്നിവർ നിർവഹിച്ചു. എംബിബിഎസിന് പ്രവേശനം ലഭിച്ച നെൻമിനി പ്രീ മെട്രിക് ഹോസ്റ്റൽ വിദ്യാർഥി എം.ആനന്ദ് രാജിനെയും ജൻശിക്ഷണ്‍ സൻസ്ഥാൻ പ്രോഗ്രാം കോ ഓർഡിനേറ്റർ പി.ടി. സാജിതയെയും ചടങ്ങിൽ ആദരിച്ചു. പഞ്ചായത്ത് പ്രസിഡന്‍റുമാരായ കെ.ടി. അഫ്സൽ, ജമീല ചാലിയത്തൊടി, ബ്ലോക്ക് സ്ഥിരം സമിതി അധ്യക്ഷരായ പി.കെ. അയമു, അഡ്വ. നജ്മ തബ്ഷീറ തുടങ്ങിയവർ പ്രസംഗിച്ചു.

ജില്ലാ കായികമേള; എടപ്പാൾ മുന്നോട്ട്

ചാത്തന്നൂർ: ചാത്തന്നൂർ ഗവണ്‍മെന്‍റ് ഹയർ സെക്കൻഡറി സ്കൂളിൽ നടക്കുന്ന മലപ്പുറം റവന്യു ജില്ലാ സ്കൂൾ കായികമേള രണ്ടാം ദിവസത്തിലേക്ക് കടന്നപ്പോൾ ഓവറോൾ കിരീടത്തിനായി എടപ്പാൾ, തിരൂർ ഉപജില്ലകളുടെ പോര് മുറുകുന്നു. ഇന്നലെയും കടകശേരി ഐഡിയലിന്‍റെ കരുത്തിൽ എടപ്പാൾ ഉപജില്ല തന്നെയാണ് മുന്നിലെങ്കിലും പോരാട്ടം ശക്തമാക്കി തിരൂർ ഉപജില്ല തൊട്ടുപിറകിലായിലുണ്ട്. 58 ഇനങ്ങളുടെ മത്സരഫലം വന്നപ്പോൾ 20 സ്വർണവും 23 വെള്ളിയും 18 വെങ്കലവുമടക്കം 211 പോയിന്‍റുകൾ കരസ്ഥമാക്കിയാണ് എടപ്പാളിന്‍റെ കുതിപ്പ്. 23 സ്വർണവും 15 വെള്ളിയും 10 വെങ്കലവുമടക്കം 191 പോയിന്‍റുകൾ നേടിയാണ് തിരൂർ ഉപജില്ല തൊട്ടടുത്തെത്തിയത്. ആറ് സ്വർണവും ആറ് വെള്ളിയും നാല് വെങ്കലവുമടക്കം 52 പോയിന്‍റുകളുമായി അരീക്കോട് ഉപജില്ലയും നിലകൊള്ളുന്നു. ഒരു വെങ്കലം മാത്രമായി 0.5 പോയിന്‍റുമായി വേങ്ങര ഉപജില്ലയാണ് പോയിന്‍റ് പട്ടികയിൽ ഒടുവിലുള്ളത്. സ്കൂൾ വിഭാഗത്തിൽ കിരീടം ഉറപ്പിച്ചാണ് കടകശേരി ഐഡിയലിന്‍റെ മുന്നേറ്റം. 17 സ്വർണവും 20 വെള്ളിയും 16 വെങ്കലവുമടക്കം 161 പോയിന്‍റുമായാണ് ഐഡിയൽ (എടപ്പാൾ ഉപജില്ല) ഒന്നാം സ്ഥാനത്തുള്ളത്. 14 സ്വർണവും ഏഴ് വെള്ളിയും ഏഴ് വെങ്കലവുമടക്കം 98 പോയിന്‍റുമായി നവാമുകുന്ദ എച്ച്എസ് (തിരൂർ ഉപജില്ല ) രണ്ടാം സ്ഥാനത്തും ആറ് സ്വർണവും ആറ് വെള്ളിയും മൂന്നു വെങ്കലവുമടക്കം 51 പോയിന്‍റുമായി ആലത്തിയൂർ കെഎച്ച്എംഎച്ച്എസ് (തിരൂർ ഉപജില്ല) മൂന്നാം സ്ഥാനത്തും നിൽക്കുന്നു. മീറ്റ് ഇന്ന് സമാപിക്കും. അവസാന ദിനത്തിൽ 31 ഫൈനലുകളാണ് നടക്കുക. സബ് ജൂണിയർ ബോയ്സ് ഡിസ്കസ് ത്രോ, 400 മീറ്റർ ഹർഡിൽസ്, 200 മീറ്റർ ഓട്ടം, ട്രിപ്പിൾ ജംപ്, ജൂണിയർ ബോയ്സ് പോൾ വോൾട്ട്, 400 മീറ്റർ ഹർഡിൽസ്, ട്രിപ്പിൾ ജംപ്, ഷോട്ട്പുട്ട്, 200 മീറ്റർ ഓട്ടം, 1500 മീറ്റർ ഓട്ടം, 4x100 മീറ്റർ റിലേ തുടങ്ങിയ ഫൈനലുകൾ ഇന്ന് അരങ്ങേറും. വൈകുന്നേരം അഞ്ചിനാണ് സമാപന സമ്മേളനം. കായിക അധ്യപകരുടെ വിവിധ മത്സരങ്ങളും ഇതോടൊപ്പം നടക്കും.

എസ്എഫ്ഐ ഭരണസ്വാധീനം ഉപയോഗിച്ച് യുഡിഎസ്എഫിനെ വേട്ടയാടുന്നു: മുസ്‌ലിം ലീഗ്

മലപ്പുറം: കോളജ് യൂണിയൻ തെരഞ്ഞെടുപ്പിൽ അന്പേ തോൽവിയേറ്റതിനുശേഷം എസ്എഫ്ഐ ഭരണസ്വാധീനം ഉപയോഗിച്ച് യുഡിഎസ്എഫ് പ്രവർത്തകരെ വേട്ടയാടുകയാണെന്ന് മുസ്‌ലിംലീഗ് സംസ്ഥാന ജനറൽ സെക്രട്ടറി പി.എം.എ. സലാം. പേരാന്പ്രയിലും തേഞ്ഞിപ്പലത്തും സംഭവിച്ചത് അതാണ്. പോലീസിനെ കൂട്ടുപിടിച്ച് പ്രവർത്തകരെ അക്രമിക്കുകയായിരുന്നു എസ്എഫ്ഐ. പ്രശ്ന പരിഹാരത്തിനെത്തിയ എംപിയെ പോലീസ് തലക്കടിച്ച് പരിക്കേൽപ്പിച്ചു. ഒരു ജനപ്രതിനിധിയുടെ അവസ്ഥ ഇങ്ങനെയാണെങ്കിൽ നാട്ടിലെ സാധാരണക്കാരുടെ ഗതി എന്തായിരിക്കുമെന്നും അദ്ദേഹം ചോദിച്ചു. മാന്യമായ തെരഞ്ഞെടുപ്പ് നടന്നാൽ പരാജയപ്പെടുമെന്നറിയാവുന്നതുകൊണ്ട് എസ്എഫ്ഐ അതിന് അനുവദിക്കുന്നില്ല. വ്യാജ ബാലറ്റ് കടത്തിക്കൊണ്ട് വന്ന് വിദ്യാർഥികളുടെ തെരഞ്ഞെടുപ്പ് വിധിയെ തിരുത്താനാണ് കാലിക്കട്ട് യൂണിവേഴ്സിറ്റിയിൽ ശ്രമിച്ചത്. പ്രതിഷേധങ്ങൾക്കെതിരെ ആഭ്യന്തരവകുപ്പിൽ നിന്ന് ഏകപക്ഷീയമായ നടപടിയാണുണ്ടാകുന്നത്. പ്രതിപക്ഷ വിദ്യാർഥി സംഘടനാ നേതാക്കൾ പലരും ഇപ്പോഴും ജയിലിലാണ്. രാത്രിയിൽ പോലും പലരുടെയും വീടുകളിലേക്ക് പോലീസ് ഇരച്ചുകയറുന്നു. പാർട്ടി ശക്തമായ പ്രതിഷേധം രേഖപ്പെടുത്തുന്നുവെന്നും യുഡിഎഫിന്‍റെ സംയമനം ദൗർബല്യമല്ലെന്നും നീതി ലഭിച്ചില്ലെങ്കിൽ ശക്തമായ പ്രതികരണമുണ്ടാകുമെന്നും പി.എം.എ. സലാം പറഞ്ഞു. വാർത്താസമ്മേളനത്തിൽ ലീഗ് കോഴിക്കോട് ജില്ലാ ജനറൽ സെക്രട്ടറി ടി.ടി. ഇസ്മായിൽ, സി.പി.എ. അസീസ് പേരാന്പ്ര എന്നിവർ പങ്കെടുത്തു.

‘എഴുപതേക്കർ പിഒ’ : മലമുകളിലെ തപാലാപ്പീസ് ഇനിയെത്ര നാൾ ?

ഉമ്മച്ചൻ തെങ്ങുംമൂട്ടിൽ കാളികാവ്: പ്രകൃതി രമണീയമായ കിഴക്കൻ മലമുകളിൽ അരനൂറ്റാണ്ടിനു മുന്പ് സ്ഥാപിതമായ ‘എഴുപതേക്കർ ബ്രാഞ്ച്’ എന്ന പേരിലുള്ള തപാലാപ്പീസ് പോസ്റ്റൽ വകുപ്പിന്‍റെ ലാഭ, നഷ്ടക്കണക്കനുസരിച്ച് അടച്ചുപൂട്ടൽ ഭീഷണി നേരിടുന്നു. പശ്ചിമഘട്ട മലനിരകൾക്ക് മുകളിലായി കാളികാവിലെ കുടിയേറ്റ കാർഷിക മേഖലയായ അടക്കാക്കുണ്ടിലെ എഴുപതേക്കർ എന്ന സ്ഥലത്താണ് ഈ പോസ്റ്റോഫീസ് സ്ഥിതി ചെയ്യുന്നത്. കാര്യമായ ജനസന്പർക്കമില്ലെങ്കിലും സ്ഥാപനം പ്രവർത്തിക്കുന്നു എന്നതിനാൽ ഈ പോസ്റ്റോഫീസ് ഇതരനാടുകളിൽ നിന്നെത്തുന്ന സന്ദർശകർക്ക് കൗതുക കാഴ്ചയാണ്. സമുദ്രനിരപ്പിൽ നിന്ന് ആയിരത്തി എഴുനൂറടി ഉയരത്തിലാണ് എഴുപതേക്കർ പോസ്റ്റോഫീസ് നിലകൊള്ളുന്നത്. നാട്ടുകാർ ദശാബ്ദങ്ങളായി സ്വപ്നം കാണുന്ന കാളികാവ് -ഉൗട്ടി മലന്പാതയിലേക്ക് ചെന്നുചേരുന്ന കുതിരപാത ആരംഭിക്കുന്നത് ഈ തപാലാപ്പീസിന്‍റെ സമീപത്തു നിന്നാണ്. കരിങ്കല്ലിൽ പണിത തപ്പാലാപ്പീസിന് പോയകാലത്തിന്‍റെ നഷ്ട പ്രതാപമാണ് പറയാനുള്ളത്. ഏഴു ദശകങ്ങൾക്കുമുന്പ് തെക്കൻ തിരുവിതാംകൂറിൽ നിന്നുള്ള കർഷകരുടെ കുടിയേറ്റം തുടങ്ങിയതു മുതൽ എഴുപതേക്കറിൽ ജനവാസമുണ്ട്. എണ്‍പത് കാലമായപ്പോഴേക്കും മലയോരത്ത് കുടിയേറ്റ കർഷകർ സാന്പത്തികമായി സ്വയം പര്യാപ്തരായതോടെ വാർത്താവിനിമയ സംവിധാനങ്ങളുടെ കുറവ് അനുഭവപ്പെട്ടു. അതുവരെ കത്തുകളും കന്പികളും മണിഓഡറുകളുമൊക്കെ കാളികാവ് ഹെഡ് പോസ്റ്റ് ഓഫീസിൽ നിന്ന് അഞ്ചെട്ടു കിലോമീറ്റർ ദൂരത്തുള്ള ഇവിടേക്ക് പോസ്റ്റുമാൻ എത്തിച്ചു നൽകുകയായിരുന്നു. വാഹന സൗകര്യം കുറവായതിനാൽ കത്തിടപാടുകൾക്ക് പ്രയാസം അനുഭവപ്പെട്ടതോടെയാണ് ആദ്യകാല കുടിയേറ്റ കർഷകനായ കുറ്റിയാനിക്കൽ മാത്യു തന്‍റെ സഹോദരൻമാരുമായി ചേർന്നുവാങ്ങിയ എഴുപതേക്കർ സ്ഥലത്ത് തന്‍റെ വീടിനോടു ചേർന്ന് റബർ സംസ്കരണത്തിനായി നിർമിച്ച കെട്ടിടത്തിന്‍റെ ഒരു ഭാഗം 1981 ൽ തപാലാപ്പീസ് തുടങ്ങുന്നതിന് സൗജന്യമായി നൽകിയത്. 1990 ൽ ഈ കെട്ടിടം നാട്ടുകാരുടെ സഹകരണത്തോടെ കോണ്‍ക്രീറ്റ് ചെയ്ത് പോസ്റ്റൽ ഡിപ്പാർട്ടുമെന്‍റിന് വാടകയൊന്നും കൂടാതെ സൗജന്യമായി കുറ്റിയാനിക്കൽ കുടുംബം വിട്ടുകൊടുക്കുകയും ചെയ്തു. ഇവിടെ ആദ്യത്തെ പോസ്റ്റുമാസ്റ്ററായത് മാത്യുവിന്‍റെ മകനായ സെബാസ്റ്റ്യന്‍റെ ഭാര്യ ഏലമ്മയായിരുന്നു. കത്തിടപാടുകൾ പേരിനു മാത്രമാണെങ്കിലും പോസ്റ്റോഫീസിന്‍റെ പ്രവർത്തനം ഇതുവരെ മുടങ്ങിയിട്ടില്ല. ബ്രാഞ്ച് പോസ്റ്റുമാസ്റ്ററും ഒരു അസിസ്റ്റന്‍റും മെയിൽ കാരിയറുമുൾപ്പെടെ മൂന്നു ജീവനക്കാരാണുള്ളത്. വന്യമൃഗങ്ങൾ വിഹരിക്കുന്ന വനത്തോടു ചേർന്ന മലയോര മേഖലയാണിവിടം. സ്വത്ത് നഷ്ടപ്പെട്ടാലും ജീവനെങ്കിലും സംരക്ഷിക്കാമെന്ന പ്രതീക്ഷയിൽ പല കുടുംബങ്ങളും ഇവിടെ നിന്ന് കുടിയിറങ്ങിക്കഴിഞ്ഞു. മണ്ണിൽ പൊന്നുവിളയിച്ച മലയോര കർഷകരോടുള്ള കേന്ദ്ര, സംസ്ഥാന സർക്കാരുകളുടെ പരിഗണനയുടെ പ്രതീകമായ ഏക സ്ഥാപനമാണ് മലമുകളിലെ ഈ പോസ്റ്റോഫീസ്. കൂടുതൽ സാന്പത്തിക ഇടപാടുകൾ നടന്നാൽ ഈ സ്ഥാപനത്തിന് പൂട്ടു വീഴാതിരിക്കുമെന്ന പ്രതീക്ഷയിൽ പോസ്റ്റൽ ഡിപ്പാർട്ടുമെന്‍റിനെ പരമാവധി ഉപയോഗിക്കുകയാണിന്ന് പ്രദേശവാസികൾ.

തൂതപ്പുഴയിൽ ഒഴുക്കിൽപ്പെട്ട് യുവാവിനെ കാണാതായി

പുലാമന്തോൾ: തൂതപ്പുഴയിലെ വിളയൂർ കണ്ടേങ്കാവ് കടവിൽ കുളിക്കാനിറങ്ങിയ ഇതര സംസ്ഥാന തൊഴിലാളിയെ ഒഴുക്കിൽപ്പെട്ട് കാണാതായി. ഉത്തർപ്രദേശ് സ്വദേശി വാസിദി (28)നെയാണ് കാണാതായത്. ഇയാൾക്കൊപ്പം ഒഴുക്കിൽപ്പെട്ട നാട്ടുകാരനായ ആസിഫ് ഹുസൈനെ (37) കൂടെ ഉണ്ടായിരുന്നവർ രക്ഷപ്പെടുത്തി. തുടർന്ന് ഇയാളെ പെരിന്തൽമണ്ണയിലെ സ്വകാര്യ ആശുപത്രയിൽ പ്രവേശിപ്പിച്ചു. ഇന്നലെ ഉച്ചയോടെയായിരുന്നു സംഭവം. കണ്ടേങ്കാവ് പ്രവർത്തിക്കുന്ന മെറ്റൽ കന്പനിയിലെ ഓട്ടുപാത്ര നിർമാണ തൊഴിലാളികളാണ് ഇരുവരും. മറ്റ് തൊഴിലാളികൾക്കൊപ്പം പുഴയിൽ കുളിക്കാൻ ഇറങ്ങിയതായിരുന്നു ഇവർ. പെട്ടെന്ന് ഒഴുക്കിൽപ്പെട്ടുകയായിരുന്നവെന്നാണ് പറയുന്നത്. സംഭവത്തത്തുടർന്ന് കൊപ്പം പോലീസ് സ്ഥലത്തെത്തി. പെരിന്തൽമണ്ണയിൽ നിന്ന് അഗ്നിശമന സേനയും മുങ്ങൽ വിദഗ്ധരും പുഴയിൽ തെരച്ചിൽ തുടരുകയാണ്.

കസ്റ്റഡി മരണ വിവാദം : ലഹരിക്കേസുകളിൽ പിന്നോട്ടടിച്ച് പോലീസ്

തേഞ്ഞിപ്പലം: യുവതലമുറയെ നശിപ്പിക്കുന്ന ന്യൂജൻ ലഹരിക്കെതിരായ പോരാട്ടത്തിൽ തിരിച്ചടി നേരിട്ട പോലീസിന് മനോവീര്യ തകർച്ച. എംഡിഎംഎ അടക്കമുള്ള ലഹരി ഉത്പന്നങ്ങൾ വിൽപ്പന നടത്തുകയും ഉപയോഗിക്കുകയും ചെയ്യുന്ന വ്യക്തികളെ പിടികൂടാൻ പോലീസ് നടത്തിയ റെയ്ഡിനും തുടർ നടപടികൾക്കുമിടയിൽ കസ്റ്റഡിയിലിരിക്കെ യുവാവ് മരിച്ചത് വലിയ വിവാദമായ സാഹചര്യത്തിലാണ് ലഹരി ഇടപാടും ഉപയോഗവും തടയാനുള്ള നടപടികളിൽ നിന്നാണ് പോലീസിന്‍റെ പതിയെയുള്ള പിൻമാറ്റം. താനൂർ പോലീസ് സ്റ്റേഷനിൽ കസ്റ്റഡി കൊലപാതകമുണ്ടായെന്ന ആരോപണത്തെ തുടർന്ന് സർക്കാർ അന്വേഷണം സിബിഐക്ക് കൈമാറിയിരുന്നു. താമിർ ജഫ്രിയെന്ന യുവാവിനെ പോലീസ് മർദിച്ച് കൊലപ്പെടുത്തിയെന്നാണ് കേസ്. ഈ സംഭവം വിവാദമാവുകയും മലപ്പുറം ജില്ലാ പോലീസ് മേധാവിക്കെതിരേ അച്ചടക്ക നടപടിയുണ്ടാകുകയും ചെയ്തതോടെ പോലീസ് ഉദ്യോഗസ്ഥർ ഏറെ കരുതലോടെയാണ് കേസുകളെ സമീപിക്കുന്നത്. ഇക്കാര്യങ്ങൾ പോലീസ് ഉദ്യോഗസ്ഥർ തന്നെ രഹസ്യമായി സമ്മതിക്കുന്നുണ്ട്. സർവീസ് കാലഘട്ടം സുരക്ഷിതമായി പൂർത്തിയാക്കാൻ കഴിയാവുന്ന വിധത്തിലേക്കാണ് പല പോലീസ് ഉദ്യോഗസ്ഥരുടെയും സമീപനം മാറിയിരിക്കുന്നത്. അതിനാൽ പ്രധാന ദേശീയപാത കടന്നുപോകുന്ന തേഞ്ഞിപ്പലം സ്റ്റേഷൻ പരിധിയിൽ അടക്കം ഗൗരവമേറിയ ലഹരി കേസുകളിൽ ഉൾപ്പെടെ കാര്യമായ കുറവുണ്ടായിട്ടുണ്ട്. താമിർ ജിഫ്രിയുടെ മരണത്തിൽ പോലീസ് പ്രതി സ്ഥാനത്താകുകയും രൂക്ഷമായ വിമർശനത്തിനും നവ മാധ്യമങ്ങളിലൂടെ സാമൂഹിക വിചാരണയ്ക്കും വിധേയമായിരുന്നു. ഇതോടെ കേസുകളിൽ സ്വയംരക്ഷ നോക്കിയുള്ള നടപടികൾ മതിയെന്നും ന്യായാന്യായങ്ങളിൽ ആവേശം വേണ്ടെന്നുമുള്ള പൊതുവികാരമാണ് പോലീസ് ഉദ്യോഗസ്ഥർക്കിടയിൽ ഉണ്ടായിരിക്കുന്നത്. പോലീസിൽ ഇത്തരമൊരു മാനസികാവസ്ഥ ഉണ്ടാകുന്നത് ക്രിമിനൽ സംഘങ്ങൾക്ക് തണലാണ്.

വിദ്യാർഥികൾക്ക് കശുമാവിൻ തൈകൾ വിതരണം ചെയ്തു

മേലാറ്റൂർ: സംസ്ഥാന കശുമാവ് കൃഷി വികസന ഏജൻസിയുടെ ആഭിമുഖ്യത്തിൽ മേലാറ്റൂർ ചോലക്കുളം ടി.എം. ജേക്കബ് മെമ്മോറിയൽ എൽപി സ്കൂളിലെ 700 വിദ്യാർഥികൾക്ക് അത്യുത്പാദന ശേഷിയുള്ള ഹൈബ്രിഡ് കശുമാവിൻ തൈകൾ വിതരണം ചെയ്തു. സ്കൂൾ മാനേജർ മാത്യു സെബാസ്റ്റ്യൻ സ്കൂൾ ലീഡർ റിസഫാത്തിമക്ക് തൈ നൽകിയാണ് ഉദ്ഘാടനം നിർവഹിച്ചത്.പ്രധാനാധ്യപിക കെ.വനജ, ടി.എച്ച്. മുസ്ബിൻ, അഖിൽ, ആനിയമ്മ, രാജേഷ് മൂത്തേടം എന്നിവർ പ്രസംഗിച്ചു. അധ്യാപകരായ മുഹമ്മദ് സമീർ, എൻ. സുകന്യ, എൻ. ജസ്നി, എ. ശിശിര, കെ. നയന എന്നിവർ നേതൃത്വം നൽകി.

കരിങ്കൽ ക്വാറിക്കെതിരേ പ്രതിഷേധവുമായി നാട്ടുകാർ; റോഡ് നിർമാണം മുടങ്ങി

നിലന്പൂർ: മന്പാട് കാരച്ചാലിൽ കരിങ്കൽ ക്വാറിക്കെതിരേ പ്രതിഷേധവുമായി നാട്ടുകാർ. സ്ത്രീകൾ ഉൾപ്പെടെ രംഗത്തെത്തി. കാരച്ചാൽ പെരുംപാറയിൽ പുതുതായി തുടങ്ങിയ കരിങ്കൽ ക്വാറിക്കെതിരേയാണ് നാട്ടുകാരുടെ ഭാഗത്ത് നിന്ന് വലിയ തോതിൽ പ്രതിഷേധമുയർന്നത്. ഇന്നലെ രാവിലെ പത്തോടെയാണ് നാട്ടുകാർ സംഘടിച്ചത്. ഹൈക്കോടതി നിർദേശത്തിന്‍റെ അടിസ്ഥാനത്തിൽ പോലീസ് അകന്പടിയോടെയാണ് ക്വാറി ഉടമകൾ സ്വകാര്യവ്യക്തിയുടെ സ്ഥലത്ത് കൂടി കരിങ്കല്ല് കൊണ്ടുപോകാൻ റോഡ് നിർമിക്കുന്നത്. ഇതിന്‍റെ പ്രവൃത്തിക്കെതിരേയാണ് നാട്ടുകാർ പ്രതിഷേധിച്ചത്. ഇതിനിടയിൽ കരിങ്കൽ കയറ്റി വന്ന ലോറികൾ പോലീസ് സഹായത്തോടെ കടത്തിവിട്ടു. പ്രശ്നപരിഹാരവുമായി ബന്ധപ്പെട്ട് ചർച്ചകൾ നടക്കേണ്ടതിനാൽ രണ്ടു ദിവസത്തേക്ക് കരിങ്കൽ കയറ്റി പോകുന്നത് നിർത്തിവയ്ക്കാൻ പഞ്ചായത്ത് അധികൃതർ ക്വാറി ഉടമകളോട് ആവശ്യപ്പെട്ടു. പൊതുറോഡിലൂടെ കരിങ്കൽ കയറ്റി പോകുന്നതിനെ നാട്ടുകാർ എതിർക്കുന്ന സാഹചര്യത്തിലാണ് സ്വകാര്യവ്യക്തിയുടെ സ്ഥലം പാട്ടത്തിനെടുത്ത് അതിലൂടെ റോഡ് നിർമിക്കാൻ ജെസിബി ഉൾപ്പെടെയുള്ള സംവിധാനവുമായി ക്വാറി ഉടമകൾ എത്തിയത്. ദുബായിലുള്ള സ്ഥലം ഉടമ കരാർ പ്രകാരം തങ്ങൾക്ക് സ്ഥലം പാട്ടത്തിന് തന്നിട്ടുള്ളതാണെന്ന് ക്വാറി ഉടമകൾ പറഞ്ഞു. തുടർന്ന് പോലീസ് സ്ഥലം ഉടമയുടെ സഹോദരനെ വിളിച്ചുവരുത്തി. സ്ഥലം ക്വാറി ഉടമകൾക്ക് പാട്ടത്തിന് നൽകിയിട്ടുണ്ടെന്നും ഇതിന്‍റെ രേഖകൾ ഇന്ന് ഹാജരാക്കാമെന്നും അറിയിച്ചു. ഉച്ചയോടെ കാര്യങ്ങൾ അറിയാക്കാമെന്ന് നാട്ടുകാർക്ക് പോലീസ് ഉൾപ്പെടെ നൽകിയ ഉറപ്പിലാണ് പ്രതിഷേധക്കാർ പിരിഞ്ഞുപോയത്. പരിസ്ഥിതി ലോല പ്രദേശമായ ഇവിടെ 2018 ൽ ഉരുൾപൊട്ടൽ ഉണ്ടായിട്ടുണ്ടെന്നും ഏത് സമയത്തും ഉരുൾപൊട്ടൽ ഉണ്ടാകാമെന്നും നാട്ടുകാർ പറയുന്നു. നീർച്ചാൽ കടന്നുപോകുന്ന ഭാഗത്ത് ഒരു കരിങ്കൽ ക്വാറി നിലവിലുണ്ട്. ഇതിന് പുറമെയാണ് പുതിയ ക്വാറി കൂടി തുടങ്ങിയിരിക്കുന്നതെന്നും നാട്ടുകാർ പറയുന്നു. ചൂരൽമലയിലുണ്ടായ അവസ്ഥ ക്വാറി പ്രവർത്തിച്ചാൽ ഇവിടെയും സംഭവിക്കാനിടയുണ്ട്. എസ്‌സി-എസ്ടി വിഭാഗങ്ങൾ ഉൾപ്പെടെ നൂറിലധികം കുടുംബങ്ങൾ താമസിക്കുന്നു. ക്വാറി പരിസരത്ത് സുരക്ഷിതമില്ലാത്തതും തുരുന്പിച്ചതും കാലപഴക്കവുമുള്ള ഇരുന്പുപെട്ടികളിലാണ് ഉഗ്രശേഷിയുള്ള വെടിമരുന്നുകൾ ഉൾപ്പെടെ സൂക്ഷിച്ചിട്ടുള്ളതെന്നും നാട്ടുകാർ പറയുന്നു. ഈ ക്വാറികൾക്കുള്ള ലൈസൻസ് റദ്ദാക്കണമെന്നാണ് നാട്ടുകാരുടെ ആവശ്യം. നിലവിൽ ലൈസൻസുള്ള ക്വാറികൾ അടച്ചുപൂട്ടാൻ കഴിയില്ലെന്ന നിലപാടാണ് ക്വാറി ഉടമകൾ സ്വീകരിച്ചത്.

പൈപ്പുകൾ പൊട്ടി റോഡ് തകരുന്നു; ജൽജീവൻ പദ്ധതിയും ദുരിതമായേക്കും

കാളികാവ്: മലയോര ഹൈവേക്ക് ശാപമായി ചോക്കാടിലെ പുതിയ കുടിവെള്ള പദ്ധതി. മറ്റ് പല പദ്ധതികളെയും പോലെ ജൽജീവൻ പദ്ധതിയുടെ ട്രയൽ റണ്‍ നടത്തിയപ്പോഴേക്കും മൂന്നു സ്ഥലങ്ങളിൽ പൈപ്പ് പൊട്ടി റോഡ് തകർന്നു. നിർമാണം നടന്നുകൊണ്ടിരിക്കുന്ന ജൽജീവൻ പദ്ധതിയും പരാജയപ്പെടുമെന്ന ആശങ്കയിലാണ് ചോക്കാട്ടിലെ ജനങ്ങൾ. ഉദരംപൊയിൽ അങ്ങാടിക്ക് സമീപത്തെ ടർഫ് സ്റ്റേഡിയത്തിന് സമീപത്തും മുജാഹിദ് മസ്ജിദിന് മുൻവശവുമാണ് ടാറിംഗ് നടത്തിയ സ്ഥലത്ത് പൈപ്പ് പൊട്ടി റോഡ് തകർന്നത്. പുല്ലങ്കോട് അങ്ങാടിയിലും പൈപ്പ് പൊട്ടി റോഡ് തകർന്നിട്ടുണ്ട്. ജിഎസ്പി നിക്ഷേപിക്കുന്നതിന്‍റെ ഭാഗമായി ജെസിബി ഉപയോഗിച്ച് മണ്ണ് നീക്കുന്നതിനിടെയാണ് പൈപ്പ് തകർന്നതെന്നാണ് വാട്ടർ അഥോറിറ്റി പറയുന്നത്. മധുമല കുടിവെള്ള പദ്ധതിയുടെ പൈപ്പുകളും മറ്റം ഉപയോഗിച്ച് സ്രാന്പിക്കല്ലിന് സമീപത്ത് വരെയുള്ള നാല് കിലോമീറ്ററോളം ദൂരത്തിലുള്ള ഭാഗത്താണ് ട്രയൽ റണ്‍ നടത്തിയത്. അപ്പോഴേക്കും മൂന്ന് സ്ഥലങ്ങളിലാണ് പൈപ്പ് പൊട്ടി റോഡ് തകർന്നത്. മലയോര ഹൈവേയിൽ പല ഭാഗങ്ങളിലും പുറത്ത് യൂട്ടിലിറ്റി സ്പേസിലാണ് പൈപ്പ് സ്ഥാപിച്ചിട്ടുള്ളത്. എന്നാൽ കാളികാവ്, ചോക്കാട് ഭാഗങ്ങളിൽ അഴുക്കുചാലിനോട് ചേർന്ന് ടാറിംഗ് നടത്തിയ ഭാഗത്താണ് പൈപ്പുകൾ സ്ഥാപിച്ചിട്ടുള്ളത്. ഇത് ഭാവിയിൽ പൈപ്പ് പൊട്ടി റോഡ് തകർച്ചയ്ക്ക് കാരണമാകുമെന്ന് നാട്ടുകാർ ആശങ്കപ്പെടുന്നു. ചോക്കാട്ടിലെ മധുമല കുടിവെള്ള പദ്ധതി പാളിയിരുന്നു. ഈ പദ്ധതി പ്രയോജനപ്പെടുത്തി നിർമിച്ച ജലനിധി പദ്ധതിയും വിജയമായിരുന്നില്ല. ഒരു തുള്ളി വെള്ളം കൊടുക്കാൻ കഴിയാത്ത പദ്ധതിക്ക് വേണ്ടി ഏഴ് കോടിയോളം രൂപയാണ് അന്ന് ഖജനാവിൽ നിന്ന് പൊടിച്ചത്. ഇതിനു പുറമേ ഗുണഭോക്തൃ വിഹിതവും വലിയ തോതിൽ സമാഹരിക്കപ്പെട്ടു. 1700 ലധികം കുടുംബങ്ങൾക്ക് വെള്ളമെത്തിക്കുമെന്ന് പറഞ്ഞ പദ്ധതി സന്പൂർണമായ പരാജയമായി. ജൽജീവൻ പദ്ധതിയും ഇതുപോലെ വെള്ളം കിട്ടാതെ ദുരിതമാകുമോ എന്ന ആശങ്കയിലാണ് നാട്ടുകാർ.

സദ്ഗ്രാമം ഹോം ട്യൂഷൻ പദ്ധതിക്ക് തുടക്കമായി

പെരിന്തൽമണ്ണ: പട്ടികജാതി-വർഗ വിഭാഗങ്ങളുടെ സുസ്ഥിര വികസനം ലക്ഷ്യമാക്കി നജീബ് കാന്തപുരം എംഎൽഎ പെരിന്തൽമണ്ണ മണ്ഡലത്തിൽ നടപ്പാക്കുന്ന സദ്ഗ്രാമം പദ്ധതിയുടെ ഭാഗമായി കമ്മ്യൂണിറ്റി ഹോം ട്യൂഷൻ പദ്ധതിക്കും തുടക്കം കുറിച്ചു. പട്ടികജാതി-വർഗ വിഭാഗങ്ങൾ താമസിക്കുന്ന സദ്ഗ്രാമങ്ങളിൽ അവധി ദിവസങ്ങളിൽ ട്യൂഷൻ ആരംഭിക്കുന്നതാണ് പദ്ധതി. അതത് സദ്ഗ്രാമങ്ങളിലെ ബിരുദ വിദ്യാർഥികളുടെ നേതൃത്വത്തിലാണ് പദ്ധതി ആരംഭിക്കുക. ബിരുദ വിദ്യാർഥികളില്ലാത്ത സദ്ഗ്രാമങ്ങളിൽ സേവന സന്നദ്ധരായ അധ്യാപകരുടെ നേതൃത്വത്തിലായിരിക്കും ട്യൂഷൻ. നിയോജക മണ്ഡലത്തിലെ 100 സദ്ഗ്രാമങ്ങളിൽ ഒന്നാംഘട്ടത്തിൽ പദ്ധതി നടപ്പാക്കും. ഘട്ടംഘട്ടമായി നിയോജക മണ്ഡലത്തിലെ മുഴുവൻ സദ്ഗ്രാമങ്ങളിലേക്കും പദ്ധതി വ്യാപിപ്പിക്കുമെന്ന് നജീബ് കാന്തപുരം എംഎൽഎ പറഞ്ഞു. താഴെക്കോട് ഗ്രാമപഞ്ചായത്തിലെ കുന്നുമ്മൽ സദ്ഗ്രാമത്തിൽ ഹോം ട്യൂഷൻ പദ്ധതിയുടെ ഉദ്ഘാടനം എംഎൽഎ നിർവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ അധ്യക്ഷത വഹിച്ചു. ഗ്രാമപഞ്ചായത്തംഗം വി.പി. റഷീദ്, രാമകൃഷ്ണൻ, ഓങ്ങല്ലൂർ ഹമീദ്, മരുതന്പാറ മുഹമ്മദലി, ഉബൈദ് ആക്കാടൻ, രവീണ, പ്രസീത, മുഹമ്മദുണ്ണി തച്ചംപറ്റ, രാജൻ, ടി. ഇസ്ഹാഖ്, സുബൈർ, സബാഹ്, റഫീഖ്, വീരാൻ പുളിക്കൽ, ബിന്ദു കുന്നുമ്മൽ തുടങ്ങിയവർ പ്രസംഗിച്ചു.

മാലിന്യനിർമാർജനത്തിന് പുതുവഴി : അങ്ങാടിപ്പുറത്ത് കൗതുകമുണർത്തി "കുപ്പിയാന’

അങ്ങാടിപ്പുറം: ഉപയോഗശൂന്യമായി വലിച്ചെറിയുന്ന കുപ്പികൾ കൊണ്ട് ആനയുടെ ശില്പം തീർത്ത് അങ്ങാടിപ്പുറം പഞ്ചായത്തിന്‍റെ മാലിന്യനിർമാർജനം ശ്രദ്ധയാകർഷിക്കുന്നു. പതിനായിരത്തോളം പ്ലാസ്റ്റിക് കുപ്പികളാണ് ശുചിത്വ ശില്പം പണിയുന്നതിനായി ഉപയോഗിച്ചത്. പഞ്ചായത്ത് പല സ്ഥലങ്ങളിലായി സ്ഥാപിച്ച 32 ബോട്ടിൽ ബൂത്തുകളിൽ നിന്ന് ശേഖരിച്ചവയാണ് പ്ലാസ്റ്റിക് കുപ്പികൾ. പെരിന്തൽമണ്ണ സബ്കളക്ടർ സാക്ഷി മോഹൻ കുപ്പിയാന ശില്പം അനാച്ഛാദനം ചെയ്തു. പഞ്ചായത്ത് പ്രസിഡന്‍റ് കെ.പി. സഈദ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ വാക്കാട്ടിൽ സുനിൽ ബാബു, ഫൗസിയ തവളേങ്ങൽ, സെലീന താണിയൻ, മെന്പർമാരായ പി.പി. ശിഹാബ്, അനിൽ പുലിപ്ര, ഷംസാദ് ബീഗം, കോറാടൻ റംല, എം.കെ. ഖദീജ, വാഹിദ, സെക്രട്ടറി സുഹാസ് ലാൽ, വ്യാപാരി വ്യവസായി ഏകോപന സമിതി പ്രസിഡന്‍റ് ജബ്ബാർ, കില ആർപി ഗോപാലൻ തുടങ്ങിയവർ പ്രസംഗിച്ചു. മാലിന്യനിർമാർജനത്തിന്‍റെ ഭാഗമായി "അഴകുള്ള അങ്ങാടിപ്പുറം’ എന്ന മുദ്രാവാക്യമുയർത്തി പഞ്ചായത്ത് നടത്തുന്ന വിവിധ പരിപാടികളുടെ ഭാഗമായാണ് മാലിന്യ ശില്പം സ്ഥാപിച്ചത്. കുപ്പിയാനയെ കാണാൻ നിരവധി പേരെത്തി. ശില്പം നിർമിച്ച വളാഞ്ചേരിയിലെ ഹംസക്കുട്ടിയെ ചടങ്ങിൽ ആദരിച്ചു.

ചുങ്കത്തറ ബ്ലോക്ക് കുടുംബാരോഗ്യ കേന്ദ്രത്തിൽ ഡെന്‍റൽ ഒപിയും കിടത്തി ചികിത്സയും ആരംഭിച്ചു

എടക്കര: ചുങ്കത്തറ ബ്ലോക്ക് കുടുംബാരോഗ്യ കേന്ദ്രത്തിൽ ഡെന്‍റൽ ഒപിയും കിടത്തി ചികിത്സയും കെട്ടിടവും ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്തു. നിലന്പൂർ ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി രണ്ട് കോടി രൂപ ചെവലഴിച്ചാണ് കെട്ടിടം ഉൾപ്പടെ പദ്ധതികൾ നടപ്പാക്കിയത്. ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി അധ്യക്ഷത വഹിച്ചു. വൈസ് പ്രസിഡന്‍റ് പാത്തുമ്മ ഇസ്മായിൽ, സ്റ്റാൻഡിംഗ് കമ്മിറ്റി അധ്യക്ഷരായ സൂസൻ മത്തായി, സജ്ന അബ്ദുറഹ്മാൻ, വാളപ്ര റഷീദ്, ബ്ലോക്ക് അംഗങ്ങളായ സി.കെ. സുരേഷ്, സോമൻ പാർലി, സഹിൽ അകന്പാടം, പഞ്ചായത്തംഗം എ.കെ. വിനോദ്, എച്ച്എംസി അംഗങ്ങളായ പറന്പിൽ ബാവ, പാനായിൽ ജേക്കബ്, കെ. രാധാകൃഷ്ണൻ, സി.ആർ. ഗോപാലൻ, ജയിംസ് വർക്കി, മെഡിക്കൽ ഓഫീസർ ഡോ. പി.കെ. ബഹാവുദ്ദീൻ, ലിസി എന്നിവർ പ്രസംഗിച്ചു. ബുധൻ, വെള്ളി ദിവസങ്ങളിലാണ് ഡെന്‍റൽ ഒപി പ്രവർത്തിക്കുക. 25 കിടക്കകളുമായാണ് കിടത്തി ചികിത്സക്ക് സൗകര്യമൊരുക്കിയിട്ടുള്ളത്.

കലോത്സവത്തിൽ കിരീടം ചൂടി ഫാത്തിമ യുപി സ്കൂൾ

പരിയാപുരം: അങ്ങാടിപ്പുറം പഞ്ചായത്ത് സ്കൂൾ കലോത്സവത്തിൽ എൽപി വിഭാഗം അറബിക് കലാമേളയിൽ ഓവറോൾ ഒന്നാം സ്ഥാനവും ജനറൽ വിഭാഗത്തിൽ മൂന്നാം സ്ഥാനവും പരിയാപുരം ഫാത്തിമ യുപി സ്കൂൾ കരസ്ഥമാക്കി. മേളയിൽ പങ്കെടുത്ത കുട്ടികൾക്കുള്ള ഉപഹാരങ്ങളും സർട്ടിഫിക്കറ്റുകളും വിതരണം ചെയ്തു. ചടങ്ങിൽ പഞ്ചായത്ത് അംഗം അനിൽ പുലിപ്ര അധ്യക്ഷത വഹിച്ചു. പ്രധാനാധ്യാപിക പി.എ. അന്പിളി, അധ്യാപകരായ അബ്ദുൾ നാസർ മാന്പ്ര, പി.കെ. ഷാദിയ, ഹണി സെബാസ്റ്റ്യൻ, സാറാമ്മ, സിസ്റ്റർ ലിൻസി ഫ്രാൻസിസ് എന്നിവർ പ്രസംഗിച്ചു.

ജില്ലാ സ്കൂൾ കായികമേളക്ക് തുടക്കം : എടപ്പാൾ മുന്നേറ്റം തുടങ്ങി

ചാത്തന്നൂർ (പാലക്കാട്) : മലപ്പുറം ജില്ലാ സ്കൂൾ കായികമേളയ്ക്ക് പാലക്കാട് ജില്ലയിലെ ചാത്തന്നൂർ ഗവണ്‍മെന്‍റ് ഹയർ സെക്കൻഡറി സ്കൂളിലെ സിന്തറ്റിക് ട്രാക്കിൽ തുടക്കമായി. സാധാരണ മലപ്പുറം ജില്ലാ സ്കൂൾ കായികമേള നടന്നുവരാറുള്ളത് കാലിക്കട്ട് യൂണിവേഴ്സിറ്റിയിലെ സിന്തറ്റിക് ട്രാക്കിലാണ്. സമീപ കാലത്ത് ഈ ട്രാക്ക് തകർച്ച നേരിട്ടതിനാലാണ് ഇത്തവണ അയൽ ജില്ലയായ പാലക്കാട് ചാത്തന്നൂരിലേക്ക് കായികമേള മാറ്റേണ്ടിവന്നത്. ഇന്നലെ ആരംഭിച്ച മേളയുടെ ആദ്യദിനം അവസാനിക്കുന്പോൾ 57 പോയിന്‍റോടെ എടപ്പാൾ ഉപജില്ലയാണ് മുന്നിൽ. ആറ് സ്വർണം, ആറ് വെള്ളി, ഒന്പത് വെങ്കലം നേടിയാണ് എടപ്പാൾ ഒന്നാം സ്ഥാനത്തുള്ളത്. എടപ്പാളിന് വെല്ലുവിളിയായി കഴിഞ്ഞ റവന്യു ജില്ലയിലെ ജേതാക്കളായ തിരൂർ ഉപജില്ല തൊട്ടുപിറകിലുണ്ട്. 45 പോയിന്‍റാണ് തിരൂർ നേടിയിരിക്കുന്നത്. ആറ് സ്വർണം കരസ്ഥമാക്കിയ തിരൂർ നാലു വെള്ളിയും മൂന്ന് വെങ്കലവും നേടിയിട്ടുണ്ട്. 30 പോയിന്‍റുമായി അരീക്കോട് ഉപജില്ലയാണ് മൂന്നാം സ്ഥാനത്ത്. നാല് സ്വർണവും മൂന്ന് വെള്ളിയും ഒരു വെങ്കലവുമാണ് അരീക്കോടിന്‍റെ സന്പാദ്യം. വണ്ടൂർ, താനൂർ ഉപജില്ലകളാണ് നാല്, അഞ്ച് സ്ഥാനങ്ങളിൽ. ഒരു സ്വർണവും രണ്ട് വെള്ളിയും നേടി 11 പോയിന്‍റാണ് വണ്ടൂരിനുള്ളത്. രണ്ട് സ്വർണം നേടി 10 പോയിന്‍റാണ് താനൂർ സ്വന്തമാക്കിയിരിക്കുന്നത്. സ്കൂളുകളിൽ കടകശേരി ഐഡിയൽ ഇഎച്ച്എസ്എസ് ആണ് മുന്നിൽ. ആറ് സ്വർണവും ആറ് വെള്ളിയും ഒന്പത് വെങ്കലവും ആദ്യദിനം തന്നെ ഐഡിയൽ നേടിയെടുത്തു. 57 പോയിന്‍റാണ് ഐഡിയലിനുള്ളത്. എടപ്പാൾ ഉപജില്ലയുടെ മുന്നേറ്റത്തിനുള്ള പ്രധാനകാരണം ഐഡിയലിന്‍റെ മികച്ച പ്രകടനമാണ്. തിരൂർ ഉപജില്ലയിലെ തിരുനാവായ നവാമുകുന്ദ എച്ച്എസ്എസ് ആണ് രണ്ടാം സ്ഥാനത്തുള്ളത്. നാല് സ്വർണവും മൂന്ന് വെള്ളിയും മൂന്ന് വെങ്കലവുമടക്കം 32 പോയിന്‍റാണ് സ്കൂൾ നേടിയിരിക്കുന്നത്. അരീക്കോട് ഉപജില്ലയിലെ എസ്എസ്എച്ച്എസ്എസ് മൂർക്കനാട് ആണ് മൂന്നാം സ്ഥാനത്തുള്ളത്. മൂന്ന് സ്വർണവും രണ്ട് വെള്ളിയുമടക്കം 21 പോയിന്‍റാണ് മൂർക്കനാട് കരസ്ഥമാക്കിയിരിക്കുന്നത്. ആലത്തിയൂർ കെഎച്ച്എംഎച്ച്എസ് 13 പോയന്‍റുമായി നാലാം സ്ഥാനത്ത് തുടരുന്നു. രണ്ട് സ്വർണവും ഒരു വെങ്കലവുമാണ് അവർക്ക് ലഭിച്ചത്. കായികമേളയ്ക്ക് തുടക്കമായി മലപ്പുറം വിദ്യാഭ്യാസ ഉപഡയറക്ടർ പി.വി. റഫീഖ് പതാകയുയർത്തി. മലപ്പുറം ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ ഉദ്ഘാടനം ചെയ്തു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ നസീബ അസീസ് അധ്യക്ഷത വഹിച്ചു. ഗ്രാമപഞ്ചായത്ത് അംഗം ടി. പ്രേമ, ഹയർ സെക്കൻഡറി സ്കൂൾ കോ ഓർഡിനേറ്റർ ഇസ്ഹാഖ്, ജില്ലാ സ്പോർട്സ് കോ ഓർഡിനേറ്റർ ഡോ.എസ്. സന്ദീപ്, പി.പി. സാജൻദാസ്, പി.പി. വിനയൻ, എ. ശിവപ്രസാദ് എന്നിവർ സംസാരിച്ചു. വിവിധ ഇനങ്ങളിലായി മൂവായിരത്തോളം കായിക പ്രതിഭകളാണ് പങ്കെടുക്കുന്നത്. കായികമേള നാളെ സമാപിക്കും.

രജത ജൂബിലി ആഘോഷവുമായി ബിഎസ്എന്‍എല്‍

മഞ്ചേരി : രണ്ടായിരാമാണ്ട് ഒക്‌ടോബര്‍ ഒന്നിന് കേന്ദ്ര സര്‍ക്കാര്‍ അധീനതയില്‍ സ്ഥാപിതമായ ഭാരത് സഞ്ചാര്‍ നിഗം ലിമിറ്റഡ് രജത ജൂബിലി ആഘോഷത്തിന്‍റെ ഭാഗമായി ജില്ലയില്‍ വിവിധ പരിപാടികള്‍ സംഘടിപ്പിക്കുന്നു. ഇതിനോടനുബന്ധിച്ച് മഞ്ചേരി ബിഎസ്എന്‍എല്‍ ശനിയാഴ്ച ആഘോഷ പരിപാടി തുടങ്ങും. രാവിലെ ഒമ്പതിന് പാണ്ടിക്കാട് നഗരത്തില്‍ നിന്നും ആരംഭിക്കുന്ന റോഡ് ഷോ തിരുവാലി, എടവണ്ണ, അരീക്കോട്, കാവനൂര്‍ എന്നിവിടങ്ങളിലെ സ്വീകരണത്തിന് ശേഷം വൈകീട്ട് അഞ്ചിന് മഞ്ചേരിയിലെത്തും. ഓരോ സ്ഥലങ്ങളിലും പൊതുജനങ്ങള്‍ക്കായി വിവിധയിനം കലാകായിക പരിപാടികളും ആസൂത്രണം ചെയ്തതായി സംഘാടകര്‍ അറിയിച്ചു. മഞ്ചേരിയില്‍ നടക്കുന്ന പൊതു സമ്മേളനം ഇ.ടി. മുഹമ്മദ് ബഷീര്‍ ഉദ്ഘാടനം ചെയ്യും. അഡ്വ. യു.എ. ലത്തീഫ് എംഎല്‍എ, നഗരസഭാധ്യക്ഷ വി.എം. സുബൈദ, മലപ്പുറം ടെലികോം അഡ്‌വൈസറി കമ്മിറ്റി അംഗങ്ങളായ പി.പി. സഫറുളള, കെ.കെ. അബ്ദുല്‍ നാസര്‍, പി.എച്ച്. ഷമീര്‍ ബാബു, അഡ്വ. അബ്ദുല്ലക്കുട്ടി എന്നിവര്‍ പങ്കെടുക്കും. ബിഎസ്എന്‍എല്‍ മലപ്പുറം സീനിയര്‍ ജനറല്‍ മാനേജര്‍ സാനിയ അബ്ദുള്‍ ലത്തീഫ് അധ്യക്ഷത വഹിക്കും. രജതജൂബിലി ആഘോഷങ്ങളുടെ ഭാഗമായി നടത്തിയ ചിത്രരചനയില്‍ വിജയികളായവര്‍ക്കുള്ള സമ്മാനദാനവും നടക്കും.

‘ആവശ്യം വന്നാൽ നിയമം കൈയിലെടുക്കാൻ മറക്കില്ല’

നിലമ്പൂർ: സിപിഎംനേതാവ് ഇ.പി. ജയരാജന് മറുപടിയുമായി മുൻ കെപിസിസി പ്രസിഡന്‍റ് കെ. മുരളീധരൻ. വേണ്ടി വന്നാൽ നിയമം കൈയിലെടുക്കാനും കോൺഗ്രസ് മടിക്കില്ലെന്നും കെ. മുരളിധരൻ മുന്നറിയിപ്പ് നൽകി. പേരമ്പ്രയിൽ കോൺഗ്രസ് പ്രവർത്തകർ സ്ഫോടക വസ്തുവെറിഞ്ഞുവെന്നത് സിപിഎമ്മിന്‍റെ തിരക്കഥയാണെന്നും കെ. മുരളീധരൻ പറഞ്ഞു. വിശ്വാസ സംരക്ഷണ ജാഥക്ക് നിലമ്പൂരിൽ നൽകിയ സ്വീകരണയോഗത്തിൽ പങ്കെടുക്കാൻ എത്തിയപ്പോൾ മാധ്യമ പ്രവർത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഷാഫി പറമ്പിൽ എംപിയുടെ മുക്കിന്‍റെ എല്ലിന് മാത്രമാണ് ഇപ്പോൾ പരിക്കേറ്റതെന്നും ശരീരത്തിനും പരിക്കേൽക്കുമെന്ന ഇ.പി. ജയരാജന്‍റെ പ്രസ്താവന കലാപത്തിനുള്ള ആഹ്വാനമാണ്. കോൺഗ്രസ് നേതാക്കളുടെയോ പ്രവർത്തകരുടെയോ ദേഹത്ത്തൊട്ടാൽ വിവരം അറിയുമെന്നും ടി.പി. രാമകൃഷ്ണനും ഇ.പി. ജയരാജനും കെ. മുരളിധരൻ മുന്നറിയിപ്പ് നൽകി. 75 വയസ് പിന്നിട്ട ഇ.പി. ജയരാജന് പാർട്ടി സ്ഥാനങ്ങൾ നഷ്ടമായതോടെ പിണറായി വിജയന്‍റെ കടാക്ഷം ലഭിക്കാനാണ് ഇത്തരം പ്രസ്താവനകൾ നടത്തുന്നത്. ഷാഫി പറമ്പിൽ എംപിക്ക് നേരേ നടന്ന പോലീസ് നടപടിയിൽ പാളിച്ച സംഭവിച്ചുവെന്ന റൂറൽ എസ്പിയുടെ പരാമർശം വന്നതോടെയാണ് സിപിഎം പോലീസിനെ ഭീഷണി പെടുത്തുന്ന അവസ്ഥയിലേക്ക് എത്തിയിരിക്കുന്നത്. ഷാഫി പറമ്പിൽ എംപിയെ മർദിച്ച പോലീസുകാർക്ക് എതിരേ നടപടി ഉണ്ടാകുന്ന വരെ യുഡിഎഫ് സമരം തുടരമെന്നും അദേഹം പറഞ്ഞു. കോൺഗ്രസ് സംസ്ഥാന പ്രസിഡന്‍റ് ജനീഷിന്‍റെ നേതൃത്വത്തിൽ ഒറ്റക്കെട്ടായി യൂത്ത്കോൺഗ്രസ് മുന്നോട്ട് പോകുമെന്നും അദ്ദേഹം പറഞ്ഞു.

ശബരിമലയെ കൊള്ളയടിച്ച പിണറായി സർക്കാർ കേരളത്തിന് അപമാനം: ദീപാദാസ് മുൻഷി

നിലമ്പൂർ: രാജ്യത്തിന് തന്നെ അഭിമാനമായ ശബരിമലയെ കൊള്ളയടിക്കുന്ന പിണറായി സർക്കാർ രാജ്യത്തിന് അപമാനമെന്ന്കേരളത്തിന്‍റെ ചുമതലയുള്ള എഐസിസി ജനറൽ സെക്രട്ടറി ദീപാ ദാസ് മുൻഷി. കെ. മുരളീധരൻ നയിക്കുന്ന വിശ്വാസ സംരക്ഷണയാത്രക്ക് നിലമ്പൂരിൽ നൽകിയ സ്വീകരണ യോഗം ഉദ്ഘാടനം ചെയ്തു സംസാരിക്കുകയായിരുന്നു അവർ. മുന്ന് തവണ ശരണം വിളിച്ച ശേഷമാണ് അവർ ഉദ്ഘാടന പ്രസംഗം ആരംഭിച്ചത്. സംസ്ഥാന സർക്കാറും. മന്ത്രിയും ദേവസ്വം ബോർഡും അറിയാതെ ഈ സ്വർണ കൊള്ള നടക്കില്ല. ദേവസ്വം വകുപ്പ് മന്ത്രി രാജി വയ്ക്കണമെന്നും അവർ ആവശ്യപ്പെട്ടു. ശബരിമലയിലെ സ്വര്‍ണ കവർച്ച ഹൈക്കോടതി മേല്‍നോട്ടത്തില്‍ സിബിഐ അന്വേഷിക്കണമെന്ന് മുന്‍ കെപിസിസി പ്രസിഡന്‍റും. ജാഥാ ക്യാപ്റ്റനുമായ കെ. മുരളീധരന്‍ ആവശ്യപ്പെട്ടു. വിശ്വാസ സംരക്ഷണ ജാഥക്ക് നിലമ്പൂരില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം . പവിത്രമായ ശബരമലയില്‍ കൊള്ള നടത്താന്‍ കൂട്ട് നിന്ന ദേവസ്വം മന്ത്രി രാജിവയ്ക്കണമെന്നും ദേവസ്വം ബോര്‍ഡ് പിരിച്ചുവിടണമെന്നും കെ. മുരളീധരന്‍ ആവശ്യപ്പെട്ടു. ശബരമലയില്‍ സ്വര്‍ണ കൊള്ള മാത്രമല്ല ആചാര ലംഘനവും നടന്നിട്ടുണ്ട്. അയ്യപ്പനോട് കളിച്ചവര്‍ക്ക് തിരിച്ചടിയുണ്ടാവും. മുഖ്യമന്ത്രിക്ക് അയ്യപ്പന്‍റെ ശാപം കിട്ടിയിട്ടുണ്ടോയെന്ന് സംശയമുണ്ട്. ഭിന്ന ശേഷിക്കാര്‍ക്കെതിരേയും നീളം കുറഞ്ഞവര്‍ക്കെതിരേയും മുഖ്യമന്ത്രി നടത്തിയ പരാമര്‍ശം അതാണ് സൂചിപ്പിക്കുന്നത്. ദേവസം ബോർഡ് പണം ഉപയോഗിച്ച് സര്‍ക്കാര്‍ നടത്തിയ അയ്യപ്പ സംഗമം കോണ്‍ഗ്രസ് ആരോപിച്ചതു പോലെ നാടകമാണെന്ന് ഇപ്പോള്‍ എല്ലാവര്‍ക്കും ബോധ്യമായെന്നും കെ. മുരളീധരന്‍ പറഞ്ഞു. കാഞ്ഞങ്ങാട് നിന്ന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്ത ജാഥക്കാണ് നിലമ്പൂരില്‍ സ്വീകരണം നല്‍കിയത്. എഐസിസി ജനറല്‍ സെക്രട്ടറി ദീപാ ദാസ് മുന്‍ഷി യോഗം ഉദ്ഘാടനം ചെയ്തു. ആര്യാടന്‍ ഷൗക്കത്ത് എംഎല്‍എ അധ്യക്ഷത വഹിച്ചു. ലീഗ് ദേശീയ ട്രഷറര്‍ പി.വി. അബ്ദുല്‍ വഹാബ് എംപി, ജാഥാ വൈസ് ക്യാപ്റ്റന്‍ ടി. സിദ്ദീഖ് എംഎല്‍എ, എ.പി. അനില്‍കുമാര്‍ എംഎല്‍എ ,ഡിസിസി പ്രസിഡന്‍റ് വി.എസ്. ജോയി, ജാഥാ മാനേജര്‍ പി.എം. നിയാസ്, ലീഗ് ജില്ലാ വൈസ് പ്രസിഡന്‍റ് ഇസ്മായീല്‍ മൂത്തേടം, ബാലകൃഷ്ണന്‍ പെരിയ, എന്‍ സുബ്രമണ്യന്‍, കെപിസിസി സെക്രട്ടറി കെ. പി. നൗഷാദലി,അജീഷ് എടാലത്ത്, എ ഗോപിനാഥ് എന്നിവർ സംസാരിച്ചു.

നിക്ഷേപ തട്ടിപ്പ് കേസില്‍ കോടികളുമായി മുങ്ങിയ പ്രധാന പ്രതി എടക്കര പോലീസിന്‍റെ പിടിയിലായി

എടക്കര : നിക്ഷേപകരെ കബളിപ്പിച്ച് കോടികളുമായി മുങ്ങിയ പ്രധാന നിക്ഷേപ തട്ടിപ്പ് കേസിലെ പ്രധാന പ്രതി കൊച്ചിയില്‍ എടക്കര പോലീസിന്‍റെ പിടിയിലായി. നെടുംപറമ്പില്‍ നിധി ലിമിറ്റഡ് സ്ഥാപന ഉടമ കൊച്ചി നെട്ടൂര്‍ പനങ്ങാട് ഐഎന്‍.റ്റിയുസി ജംഗ്ഷന്‍ ജോഹന്‍ ജോര്‍ജി ജെയിംസ് 39 നെയാണ് എടക്കര പോലീസ് കൊച്ചിയില്‍ നിന്നും അറസ്റ്റ് ചെയ്തത്. ഉയര്‍ന്ന പലിശ വാഗ്ദാനം ചെയ്ത് കോടികള്‍ നിക്ഷേപമായി സ്വീകരിച്ച് കാലാവധി എത്തിയിട്ടും പണം തിരികെ നല്‍കാതെ കബളിപ്പിച്ച കേസില്‍ എടക്കര പോലീസ് സ്റ്റേഷനില്‍ രജിസ്റ്റര്‍ ചെയ്ത കേസിലാണ് ഇയാളെ അറസ്റ്റ് ചെയ്തത്. തട്ടിപ്പ് നടത്തിയ ശേഷം മുബൈ ബംഗളൂരു, ഹൈദരാബാദ് എന്നിവിടങ്ങളില്‍ ഒളിവില്‍ കഴിഞ്ഞ് വരികയായിരുന്ന ജോഹാന്‍ രണ്ടുദിവസം മുന്‍പാണ് ഹൈദരാബാദില്‍ നിന്നും നെട്ടൂരിലുള്ള ഫ്‌ളാറ്റില്‍ എത്തിയത്. എടക്കര പോലിസ് രജിസ്റ്റര്‍ ചെയ്ത പത്ത് കേസുകളില്‍ മാത്രം മൂന്ന് കോടിയുടെ തട്ടിപ്പാണ് ഇയാള്‍ നടത്തിയിട്ടുള്ളത്. രണ്ടുമാസം മുമ്പ് സ്ഥാപനത്തിന്‍റെ ചുങ്കത്തറ ബ്രാഞ്ച് മാനേജര്‍ സി.എ. മാത്യുവിനെ എടക്കര പോലീസ് അറസ്റ്റ് ചെയ്തിരുന്നു. ഇതോടെ കൊച്ചിയിലെ ആഡംബര കോര്‍പറേറ്റ് ഓഫീസ് (നെഡ് സ്റ്റാര്‍) എന്ന പേരില്‍ ഉള്ള ഓഫീസ് പൂട്ടി മുങ്ങിയ ഉടമ ജോഹന്‍ ജോര്‍ജി ജെയിംസ് മുന്‍കൂര്‍ ജാമ്യത്തിനായി ഹൈ കോടതിയെ സമീപിച്ചെങ്കിലും കോടതി ജാമ്യം നിഷേധിച്ചു. ജില്ലാ പോലീസ് മേധാവി ആര്‍. വിശ്വനാഥിന്‍റെ നിര്‍ദേശ പ്രകാരം നിലമ്പൂര്‍ ഡിവൈഎസ്പി സാജു കെ. എബ്രഹാം, എടക്കര ഇന്‍സ്‌പെക്ടര്‍ കമറുദ്ധീന്‍ വള്ളിക്കാടന്‍ എന്നിവരുടെ നേതൃത്വത്തിലുള്ള അഞ്ചംഗ സംഘം എറണാംകുളത്ത് ക്യാമ്പ് ചെയ്ത് നടത്തിയ അന്വേഷണത്തിലാണ് പ്രതി പിടിയിലായത്. എസ്.ഐമാരായ എം. അസൈനാര്‍, എസ് സതീഷ്‌കുമാര്‍, എ.എസ്.ഐ ഷീജ, സീനിയര്‍ സിപിഒ വി. അനൂപ്, സിപിഒ നജ്മുദീന്‍ മുണ്ടേരി, പനങ്ങാട് എസ്ഐ മുനീര്‍, സിപിഒ ശ്രീജേഷ് എന്നിവരടങ്ങിയ സംഘമാണ് കൊച്ചി നെട്ടൂര്‍ പള്ളിക്ക് സമീപത്തു നിന്നും പ്രതിയെ സഹസികമായി പിടികൂടിയത്. അന്‍പതിനായിരം രൂപ വാടകയുള്ള ഫെെറ്റില്‍ നിന്നും പ്രതിയുടെ മൊബൈല്‍ ഫോണുകളും, ലാപ്‌ടോപ്പുകളും, പ്രതി ഉപയോഗിച്ചിരുന്ന എടിഎം, ക്രെഡിറ്റ്, ഡെബിറ്റ് ഇന്‍റര്‍നാഷണല്‍ കാര്‍ഡുകളും, കാറും പോലീസ് കസ്റ്റഡിയില്‍ എടുത്തു. ജോഹന്‍റെ പിതാവടക്കമുള്ള കൂട്ട് പ്രതികള്‍ വിദേശത്തേക്ക് കടന്നതായും വിവരം ലഭിച്ചിട്ടുണ്ട്. ജില്ലയില്‍ എടക്കര പോലീസ് സ്റ്റേഷന് പുറമെ നിലമ്പൂര്‍, വഴിക്കടവ്, പോത്തുകല്‍, എടവണ്ണ പോലീസ് സ്റ്റേഷനുകളിലും സമാന കേസുകള്‍ രജിസ്റ്റര്‍ ചെയ്തിട്ടുണ്ട്. പ്രതിയെ നിലമ്പൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു. സംസ്ഥാനത്തെ മറ്റ് പോലീസ് സ്റ്റേഷനുകളില്‍ രജിസ്റ്റര്‍ ചെയ്ത കേസുകളില്‍് പ്രതിയെ പോലീസ് കസ്റ്റഡിയില്‍ വാങ്ങി തെളിവെടുപ്പ് നടത്തും.

ലോകഹൃദയ പുനരുജീവന ദിനാഘോഷം നടത്തി

പെരിന്തൽമണ്ണ: ലോക ഹൃദയ പുനരു ജീവന ദിനമായ ഒക്ടോബർ 16ന് മൗലാന ആശുപത്രിയിൽ വിവിധ ആരോഗ്യ ബോധവൽക്കരണ ക്ലാസുകൾ നടത്തി. പൊതുജനങ്ങൾക്കായി ഒരുക്കിയ സി.പി. ആർ ട്രെയിനിങ് ബൂത്തിന്‍റെ ഔപചാരികമായ ഉദ്ഘാടനം പെരിന്തൽമണ്ണ മുൻസിപ്പൽ ചെയർമാൻ. പി. ഷാജി ഉദ്ഘാടനം നിർവഹിച്ചു. കാലത്ത് 8:00 മണി മുതൽ ഉച്ചയ്ക്ക് ഒരു മണിവരെ പൊതുജനങ്ങൾക്കായി നടത്തിയ സിപിആർ പരിശീലന പരിപാടിയിൽ ഇരുന്നൂറിലധികം പേർ പങ്കെടുത്ത് സിപിആർ പരിശീലനം നേടി. പരിപാടികൾക്ക് മൗലാന ആശുപത്രി ചീഫ് ഓപറേഷൻ ഓഫീസർ ഓഫീസർ രാംദാസ്, മാനേജർ- മൗലാന ഗ്രൂപ്പ് ഓഫ് കമ്പനീസ് വിനു. കെ, മാർക്കറ്റിംഗ് ഓഫീസർമാരായ പ്രകാശ്, ഫൈസൽ, നൗഫൽ, സന്തോഷ് എന്നിവർ നേതൃത്വം നൽകി.മൗലാന അനസ്ത്യോളജിസ്റ്റ് ഡോ.ശശനിധരൻ ക്ളാസെടുത്തു.

അസ്ഥികൂടം : പോലീസ് അന്വേഷണം തുടങ്ങി

മഞ്ചേരി : ചെരണിയിൽ കെട്ടിടത്തിന്‍റെ ടെറസിനു മുകളിൽ രണ്ട് മാസത്തോളം പഴക്കമുള്ള പുരുഷന്‍റെ അസ്ഥികൂടം കണ്ടെത്തിയ സംഭവത്തിൽ പോലീസ് അന്വേഷണം തുടങ്ങി. കെട്ടിടത്തിൽ താമസിച്ചിരുന്നവരെയും സമീപത്തെ പ്രദേശങ്ങളിലെ അതിഥി തൊഴിലാളികളെയും കഴിഞ്ഞ ദിവസം ചോദ്യം ചെയ്യുന്നു. അന്വേഷണത്തിനായി പ്രത്യേക സംഘം രൂപീകരിക്കും. മെഡിക്കൽ കോളജ് മോർച്ചറിയിലേക്ക് മാറ്റിയ അസ്ഥികൂടത്തിന്‍റെ ഫൊറൻസിക് പരിശോധന തുടങ്ങിയിട്ടില്ല. അസ്ഥികൂടം പ്രത്യേക ലായനി ഉപയോഗിച്ചു കഴുകി വൃത്തിയാക്കിയ ശേഷമായിരിക്കും പരിശോധന തുടങ്ങുക. നിലവിൽ വെള്ളത്തിൽ സൂക്ഷിച്ചിരിക്കുകയാണ്. അസ്ഥികളിൽ എന്തെങ്കിലും പരുക്കുണ്ടോ, ഡിഎൻഎ പരിശോധന ആവശ്യമാണോ തുടങ്ങിയവ അറിയാൻ ശാസ്ത്രീയ പരിശോധന നടത്തണമെന്ന് ഫൊറൻസിക് അധികൃതർ പറഞ്ഞു. ചെരണി പ്ലൈവുഡ് റോഡിനു സമീപത്തെ കെട്ടിടത്തിന്‍റെ ടെറസിലാണ് ചൊവ്വ വൈകിട്ട് എട്ടരയോടെ അസ്ഥികൂടം കണ്ടെത്തിയത്.

പ്രായപൂര്‍ത്തിയാവാത്ത പെണ്‍കുട്ടിയെ ലോഡ്ജിലെത്തിച്ച് പീഡിപ്പിച്ച കേസില്‍ ഒരാള്‍ കൂടി അറസ്റ്റില്‍

പെരിന്തല്‍മണ്ണ: പ്രായപൂര്‍ത്തിയാവാത്ത പെണ്‍കുട്ടിയെ ലോഡ്ജിലെത്തിച്ച് പീഡിപ്പിച്ച കേസില്‍ ഒത്താശ ചെയ്ത ഒരാള്‍ കൂടി അറസ്റ്റില്‍. പെരിന്തല്‍മണ്ണയിലെ ലോഡ്ജ് നടത്തിപ്പുകാരനെയാണ് കുട്ടികള്‍ക്കെതിരേയുള്ള ലൈംഗിക കുറ്റകൃത്യങ്ങളില്‍ നിന്നുള്ള സംരക്ഷണ നിയമപ്രകാരം അറസ്റ്റ് ചെയ്തത്. പ്രായപൂർത്തിയാവാത്ത പെൺകുട്ടിയെ മാതാവിന്‍റെ സഹായത്തോടെ പ്രലോഭിപ്പിച്ച് ലോഡ്ജ് മുറിയിൽ എത്തിച്ച് ലൈംഗികമായി പീഡിപ്പിച്ച കേസില്‍ ഒരാളെ കൂടി പോലീസ് അറസ്റ്റ് ചെയ്തു. ലോഡ്ജ് നടത്തിപ്പുകാരനായ താഴേക്കോട് സ്വദേശി കുന്നപ്പള്ളി വീട്ടിൽ അൻഷാദ് (33) എന്നയാളെയാണ് പെരിന്തൽമണ്ണ ഡിവൈഎസ്പി എ. പ്രേംജിത്തിന്‍റെ നേതൃത്വത്തില്‍ പ്രത്യേക അന്വേഷണസംഘം അറസ്റ്റ് ചെയ്തത്. ഈ കേസില്‍ മുഖ്യപ്രതികളായ കുട്ടിയുടെ മാതാവുള്‍പ്പടെ രണ്ടുപേരെ നേരത്തേ അറസ്റ്റ് ചെയ്തിരുന്നു. ഇവർ റിമാൻഡിൽ ആണ്. പെൺകുട്ടിയെ പല ദിവസങ്ങളിലായി പ്രലോഭിപ്പിച്ച് ലോഡ്ജിലെത്തിക്കുകയും പീഡനത്തിനിരയാക്കുകയും ചെയ്തതായി പെൺകുട്ടി പരാതിയില്‍ പറഞ്ഞിരുന്നു. പ്രതികളെ കൂടുതൽ അന്വേഷണത്തിന്‍റെ ഭാഗമായി പെരിന്തൽമണ്ണ ഡിവൈഎസ്പിയുടെ നേതൃത്വത്തിലുള്ള പ്രത്യേക അന്വേഷണസംഘം കഴിഞ്ഞദിവസം കസ്റ്റഡിയിലെടുത്തിരുന്നു കൂടുതൽ ചോദ്യം ചെയ്തതിലാണ് പെരിന്തൽമണ്ണ മാനത്തുമംഗലം ബൈപ്പാസ് ജംഗ്ഷനിലുള്ള ലോഡ്ജിലെ മാനേജരും നടത്തിപ്പുകാരനുമായ അൻഷാദ് എന്നയാളെ അറസ്റ്റ് ചെയ്തത്. പ്രായപൂര്‍ത്തിയാവാത്ത പെണ്‍കുട്ടിയെ പ്രതി ലോഡ്ജിലേക്ക് കൂട്ടിക്കൊണ്ടുവന്ന സമയത്ത് തിരിച്ചറിയല്‍രേഖകള്‍ വാങ്ങാതെയും പരിശോധിക്കാതെയും റൂം കൊടുക്കുകയും പ്രതിക്ക് സഹായം ചെയ്തുകൊടുക്കുകയും ചെയ്തതായി പ്രാഥമിക അന്വേഷണത്തില്‍ തന്നെ പോലീസ് സംഘത്തിന് ബോധ്യപ്പെട്ടിരുന്നു. കുട്ടികള്‍ക്കെതിരേയുള്ള ലൈംഗിക കുറ്റകൃത്യങ്ങളില്‍ നിന്നുള്ള സംരക്ഷണ നിയമവും ഭാരതീയന്യായസംഹിത വകുപ്പുകളുമാണ് പ്രതിയ്ക്കെതിരേ ചുമത്തിയിട്ടുള്ളത്. പ്രതിയെ പെരിന്തല്‍മണ്ണ കോടതിയില്‍ ഹാജരാക്കി. പെരിന്തല്‍മണ്ണ ടൗണിലും പരിസരങ്ങളിലുമുള്ള ലോഡ്ജുകളിലും റിസോര്‍ട്ടുകളിലും പോലീസ് പരിശോധന ശക്തമായിതന്നെ തുടരുമെന്നും തിരിച്ചറിയല്‍ രേഖകള്‍ വാങ്ങാതെ നിയമവിരുദ്ധപ്രവര്‍ത്തനങ്ങളിലേര്‍പ്പെടാന്‍ സഹായം ചെയ്യുന്ന ലോഡ്ജ് നടത്തിപ്പുകാരുടെ പേരില്‍ കര്‍ശനനടപടികള്‍ സ്വീകരിക്കുമെനനും പെരിന്തല്‍മണ്ണ ഡിവൈസ്പി എ. പ്രേംജിത്ത് അറിയിച്ചു.

അങ്കണവാടി കലോത്സവം സംഘടിപ്പിച്ചു

എടക്കര: ചുങ്കത്തറ ഗ്രാമപഞ്ചായത്തിന്‍റെ ആഭിമുഖ്യത്തില്‍ അങ്കണവാടി കലോത്സവം സംഘടിപ്പിച്ചു. വിടരും മൊട്ടുകള്‍ എന്ന പേരില്‍ സംഘടിപ്പിച്ച കലോത്സവത്തില്‍ പഞ്ചായത്തിലെ 32 അങ്കണവാടികളില്‍ നിന്നുള്ള കുരുന്നുപ്രതിഭകള്‍ പങ്കാളികളായി. ഗ്രാമപഞ്ചായത്ത് പ്രസിഡന്‍റ് വത്സമ്മ സെബാസ്റ്റ്യന്‍ കലോത്സവം ഉദ്ഘാടനം ചെയ്തു. വൈസ് പ്രസിഡന്‍റ് സൈനബ മാമ്പള്ളി അധ്യക്ഷത വഹിച്ചു. പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ബിന്ദു സത്യന്‍, ബ്ലോക്ക് പഞ്ചായത്ത് അംഗം സീനത്ത് നൗഷാദ്, പഞ്ചായത്തംഗങ്ങളായ ഷാജഹാന്‍ ചേലൂര്‍, കെ.പി. സക്കീന, നിഷിദ മുഹമ്മദലി, ബുഷ്‌റ, സി.എം. ചന്ദ്രന്‍, എം. രതീഷ്, മുജീബ് തറമ്മല്‍, അങ്കണവാടി അധ്യാപികമാരായ രുഗ്മിണി, കെ. റഹിയാനത്ത് എന്നിവര്‍ സംസാരിച്ചു.

കാളികാവിൽ ഹരിതം കിസാൻ മേള സംഘടിപ്പിച്ചു

കാളികാവ് : കാർഷിക വിജ്ഞാന പൊലിമ തീർത്ത് കാളികാവിൽ ഹരിതം കിസാൻ മേള സംഘടിപ്പിച്ചു. കാർഷിക വികസന കർഷക ക്ഷേമ വകുപ്പിന്‍റെയും കാളികാവ് ബ്ലോക്ക് പഞ്ചായത്തിന്‍റെയും സംയുക്താഭിമുഖ്യത്തിലാണ് ഹരിതം കിസാൻ മേള സംഘടിപ്പിച്ചത്. കാളികാവ് വി.പി. ആർക്കേഡിൽ നടന്ന മേള ബ്ലോക്ക് പഞ്ചായത്ത് പ്രസിഡന്‍റ് കെ. തങ്കമ്മു ഉദ്ഘാടനം ചെയ്തു. രണ്ട് ദിവസത്തെ കാർഷിക വിജ്ഞാന വ്യാപന പ്രദർശന വിപണന മേളയാണ് സംഘടിപ്പിച്ചത്. ഉദ്ഘാടനത്തിന് മുന്നോടിയായി, കർഷകരും ജനപ്രതിനിധികളും ഉദ്യോഗസ്ഥരും കുടുംബശ്രീ പ്രവർത്തകരും ചേർന്ന്, കാളികാവ് ബസ്സ് സ്റ്റാൻഡ് ജംഗ്ഷൻ മുതൽ മേള നഗരിവരെ, വാദ്യാഘോഷങ്ങളോടെ വിളംബര ഘോഷയാത്രയും സംഘടിപ്പിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് നസീമ ബീഗം അധ്യക്ഷത വഹിച്ചു. കാർഷിക സെമിനാറിൽ, ‘ഭക്ഷ്യ സംസ്ക്കരണം’ എന്ന വിഷയത്തിൽ വണ്ടൂർ സർക്കിൾ ഭക്ഷ്യ സുരക്ഷാ ഓഫീസർ ജസീല ഷുക്കൂർ ക്ലാസെടുത്തു. ഹൈസ്കൂൾ വിദ്യാർഥികൾക്കായി നടത്തിയ പ്രശ്നോത്തരി മത്സരത്തിൽ അഞ്ചച്ചവിടി ഗവ. ഹൈസ്കൂളിലെ പി.കെ. നിഷാൻ, മുഹമ്മദ് റയാൻ എന്നിവർ ഒന്നാംസ്ഥാനം നേടി. തുവ്വൂർ ജിഎച്ച്എസിലെ ടി.പി. മുഹമ്മദ് അഫ്നാൻ , പി.എം. പ്രവീൺ ദാസ്. എന്നിവർ രണ്ടും വെള്ളിയഞ്ചേരി എഎസ്എം ഹൈസ്കൂളിലെ പി.കെ. ഫൈഹ, കെ.കെ. മർവ്വഷെറിൻ എന്നിവർ മൂന്നാം സ്ഥാനവും നേടി. കൃഷി ഡെപ്യൂട്ടി ഡയറക്ടർ മിനി ജോസഫ്, കാളികാവ് ബ്ലോക്ക് പഞ്ചായത്ത് ക്ഷേമ കാര്യ സ്ഥിരം സമിതി അധ്യക്ഷൻ എം. ലത്തീഫ്. ബ്ലോക്ക് പഞ്ചായത്ത് ആരോഗ്യകാര്യ സ്ഥിരം സമിതി അധ്യക്ഷ റഫീഖ മറ്റത്തൂർ, കാളികാവ് ബ്ലോക്ക് പഞ്ചായത്ത് അംഗങ്ങളായ പി. ശ്രീജ , സിബി വർഗീസ്, കെ. രാജൻ, പി.കെ. ഷൈലേഷ്, കൃഷി അസിസ്റ്റന്‍റ് ഡയറക്ടർ എസ്. സുധ, കാളികാവ് കൃഷി ഓഫീസർ വി.എം. സമീർ തുടങ്ങിയവർ പ്രസംഗിച്ചു.

പെരിന്തൽമണ്ണ നഗരസഭയിൽ സീറോ റാബീസ് കാമ്പയിന് തുടക്കമായി

പെരിന്തൽമണ്ണ:"പേവിഷ വിമുക്ത പെരിന്തൽമണ്ണ' എന്ന ലക്ഷ്യം മുൻനിർത്തി പെരിന്തൽമണ്ണ നഗരസഭ 2025-26 വാർഷിക പദ്ധതിയിൽ നടപ്പിലാക്കുന്ന തെരുവുനായ്ക്കൾക്കുള്ള പേവിഷ പ്രതിരോധകുത്തി വയ്പ് കാമ്പയിന് തുടക്കമായി. നഗരസഭ ചെയർപേഴ്സൺ പി. ഷാജി കാമ്പയിൻ ഉദ്ഘാടനം ചെയ്തു.സീനിയർ വെറ്ററിനറി സർജൻ ഡോ. മുജീ ബ്റഹിമാൻ, ഡോ.അഖിൽ, ലൈവ്സ്റ്റോക്ക് ഇൻസ്‌പെക്ടർ ശ്രീ. ബിനോയ്‌. വി എന്നിവർ നേതൃത്വം നൽകി. പരിശീലനം ലഭിച്ച ഡോഗ് കാച്ചർമാരുടെ സഹായത്തോടെയാണ് തെരുവുനായ്ക്കൾക്ക് കുത്തിവെയ്പ്പ് നൽകുന്നത്. നാല് ദിവസം കൊണ്ട് നഗരസഭ പരിധിയിലെ എല്ലാ തെരുവു നായ്ക്കൾക്കും വാക്സിനേഷൻ നൽകുമെന്ന് ചെയർപേഴ്സൺ പി.ഷാജി പറഞ്ഞു.

ജീവിതോത്സവം 2025 ന് സമാപനമായി

എടക്കര: പൊതുവിദ്യാഭ്യാസ വകുപ്പിന്‍റെ ആഭിമുഖ്യത്തില്‍ ചുങ്കത്തറ മര്‍ത്തോമ ഹയര്‍ സെക്കന്‍ഡറി സ്‌കൂളിലെ നാഷനല്‍ സര്‍വീസ് സ്‌കീം സംഘടിപ്പിച്ച ജീവിതോത്സവം 2025 ന് സമാപനമായി. "അനുദിനം കരുത്തരാകാം കരുതലേകാം' എന്ന മുദ്രാവാക്യം ഉയര്‍ത്തി വ്യത്യസ്ത പ്രവര്‍ത്തനങ്ങളിലൂടെ എന്‍എസ്എസ് നടപ്പിലാക്കുന്ന 21 ദിന ചലഞ്ചാണ് ജീവിതോത്സവം 2025. സെപ്റ്റംബര്‍ 24 ന് തുടക്കം കുറിച്ച കാമ്പയിനില്‍ അറിയാം രാജ്യത്തിന്‍റെ ഭരണഘടന, അറിഞ്ഞും പറഞ്ഞും അതിജീവന കഥകള്‍, ഏകദിന ഡിജിറ്റല്‍ ഉപവാസം, ലഹരി വിരുദ്ധ ചിത്ര മതില്‍, മധുര മനോഹര ലോകത്തിനായ് ഞങ്ങളുണ്ട്, വയോജനങ്ങള്‍ക്കായ് ഒരുക്കാം ആഹ്ലാദ ചുവടുകള്‍, പുസ്തകത്തിന്‍റെ ആത്മാവ് തേടി തുടങ്ങി 21 പ്രവര്‍ത്തനങ്ങളാണ് ഓരോ ദിവസങ്ങളിലായി സംഘടിപ്പിച്ചത്. സ്‌കൂള്‍ ഓഡിറ്റോറിയത്തില്‍ നടന്ന സമാപന ചടങ്ങ് പിടിഎ പ്രസിഡന്‍റ് പി.ബി. സുഭാഷ് ഉദ്ഘാടനം ചെയ്തു. പ്രിന്‍സിപ്പല്‍ ഉമ്മന്‍ മാത്യു അധ്യക്ഷത വഹിച്ചു. ക്ലസ്റ്റര്‍ കോഡിനേറ്റര്‍ പ്രദീപ് ബാബു, പ്രോഗ്രാം ഓഫീസര്‍ എല്‍. ബിജുമോന്‍, പിടിഎ വൈസ് പ്രസിഡന്‍റ് സി. പ്രദീപ്, വോളന്‍റിയര്‍ തീർഥ, നദ പര്‍വീന്‍, നിദ ഷെറിന്‍ എന്നിവര്‍ സംസാരിച്ചു.

ബോധവത്കരണ ക്ലാസ് നടത്തി

പെരിന്തൽമണ്ണ: പെരിന്തൽമണ്ണ ലയൻസ് ക്ലബും മലപ്പുറം ജില്ല ലേഡി സർക്കിളും സംയുക്തമായി പ്രസന്‍റേഷൻ ഹയർ സെക്കൻഡറി സ്കൂളിൽ പെരിന്തൽമണ്ണ പ്ലസ് വൺ വിദ്യാർഥികൾക്ക് മാനസിക ആരോഗ്യ ബോധവത്കരണ ക്ലാസ് സംഘടിപ്പിച്ചു. മാനസിക സംഘർഷങ്ങൾ എങ്ങനെ ലഖുക്കരിക്കാം എന്ന് പ്രാക്റ്റിക്കൽ എക്സ്പീരിയൻസിലൂടയും, മെഡിറ്റേഷൻ, വ്യായാമങ്ങൾ തുടങ്ങി വിവിധ മേഖലകളിലൂടെ പ്രശസ്ത മനഃശാസ്ത്ര വിദക്ധനും മെന്‍റൽ ഹെൽത്ത്‌ ഡിസ്ട്രിക്റ്റ് കോർഡിനേറ്ററും ആയ ലയൺ ഡോ രജിത് വിശദീകരിച്ചു. സ്കൂൾ പ്രിൻസിപ്പൽ സിസ്റ്റർ ജസ്മി തോമസ് അധ്യക്ഷത വഹിച്ച ചടങ്ങ് ഡിസ്ട്രിക്റ്റ് ലേഡി സർക്കിൾ പ്രസിഡന്‍റ് ലയൺ ഫെമി വിജി ഉദ്ഘാടനം ചെയ്തു, ലേഡി സർക്കിൾ ട്രഷറര്‍ ലയൺ മേഖ അനൂപ്, ഡയബേറ്റിക് ഡിസ്ട്രിക്റ്റ് കോർഡിനേറ്റർ ലയൺ ഡോ കൊച്ചു എസ് മണി, റീജിയൻ ചെയർമാൻ ലയൺ ഡോക്ടർ നഈമു റഹുമാൻ, സോൺ ചെയർമാൻ ലയൺ അനൂപ്, ഡിസ്ട്രിക്റ്റ് എഡിറ്റർ ലയൺ ഓ കെ റോയി, ക്ലബ്‌ പ്രസിഡന്‍റ് ലയൺ വർ‌ഗീസ് തെക്കേ കൂട്ട് , ലയൺ വിജി, ലയൺ ലൈസ ജോസ്, ലേഡി സർക്കിൾ സെക്രട്ടറി ലയൺ ഷീജ റോയി എന്നിവർ ആശംസ അർപ്പിച്ചു.

തിരിച്ചടിയായി നേന്ത്രക്കാവിലയിടിവ് : ഇറക്കുമതിയും ഉത്പാദന വർധനവും കർഷകർക്ക് വിനയായി

കരുവാരകുണ്ട്: നേന്ത്രക്കാവിലയിടിവിൽ മനംനൊന്ത് മലയോര കർഷകർ. അടുത്ത കാലത്തൊന്നും അനുഭവപ്പെടാത്ത വിലത്തകർച്ചയാണ് ഇന്ന് നേന്ത്രക്കാക്ക് അനുഭവപ്പെടുന്നത്. വില തകർച്ചയെ തുടർന്ന് മുടക്കുമുതൽ പോലും ലഭിക്കില്ലന്നാണ് കർഷകർ പറയുന്നത്. ഉത്പാദനം വർധിച്ചതും ഇതര സംസ്ഥാനങ്ങളിൽ നിന്നും കേരളത്തിലേക്കുള്ള നേന്ത്രക്കാ ഇറക്കുമതിയുമാണ് കർഷകർക്ക് വിനയായത്. കഴിഞ്ഞ ഓണത്തിനു മുമ്പ് ഒരു കിലോ നേന്ത്രക്കാക്ക് 50 മുതൽ 55 രൂപ വരെ വില ലഭിച്ചിരുന്നു.എന്നാൽ ഇന്ന്അതേ സ്ഥാനത്ത് മുന്തിയ ഇനം നേന്ത്രക്കാ ഒരു കിലോക്ക് 18 രൂപാ പ്രകാരമാണ് കർഷകരിൽ നിന്നും വ്യാപാരികൾ ശേഖരിക്കുന്നത്. എന്നാൽ ഇത് വില്ക്കുന്നത് 50 രൂപക്കും. ചില ദിവസങ്ങളിൽ ഈ വിലക്കും വാങ്ങാൻ വ്യാപാരികൾ തയാറാകുന്നില്ല. അമിതകൂലി നൽകി നഷ്ടം സഹിച്ച് പ്രതികൂല കാലാവസ്ഥയെ തരണം ചെയ്ത് വാഴകൃഷി നടത്തി വിളവെടുപ്പ് തുടങ്ങിയപ്പോൾ നേന്ത്രക്കാക്ക് ഉല്പാദന ചിലവു പോലും ലഭിക്കാത്ത സാഹചര്യത്തിലായതോടെ കർഷകർ വൻ സാമ്പത്തിക പ്രതിസന്ധിയിലായെന്ന് കർഷകർ ചൂണ്ടി കാട്ടുന്നു. ഇതേത്തുടർന്ന് കൃഷി വകുപ്പ് കർഷകർക്ക് നഷ്ടപരിഹാരം നൽകണമെന്ന ആവശ്യവുമായി വിവിധ കർഷക സംഘടനകളും രംഗത്ത് വന്നിട്ടുണ്ട്. പ്രതികൂല സാഹചര്യങ്ങളെ തരണം ചെയ്ത് വാഴ കൃഷി നടത്തുകയും അതിന്‍റെ വിളവെടുപ്പ് തുടങ്ങിയപ്പോൾ തന്നെ മാന്യമായ വിലക്ക് ഉത്പന്നം വിറ്റഴിക്കാൻ കർഷകർക്കാകുന്നില്ല. നേന്ത്രക്കാ വാങ്ങാൻ ആളില്ലാതായതിനെ തുടർന്ന് കർഷകർ നേന്ത്രകുലകൾ മലയോര ഗ്രാമങ്ങളിലെ റോഡരികിൽ കൂട്ടിയിട്ട് തുച്ഛമായ വിലക്ക് പൊതുജനങ്ങൾക്ക് വില്പന നടത്തുന്നവരെയും കാണാം. ഇപ്പോഴത്തെ വില തകർച്ച കർഷകരെ കടുത്ത സാമ്പത്തിക പ്രതിസന്ധിയിലാക്കുന്നു. കനത്ത മഴയെത്തുടർന്ന് തൊഴിലവസരങ്ങൾ നഷ്ടപ്പെട്ട സാധാരണ ജനങ്ങളും തൊഴിലാളികളും സാമ്പത്തിക ഞെരുക്കത്തിലായതാണ് നേന്ത്ര പഴ വിപണിയിൽ മാന്ദ്യം സൃഷ്ടിക്കാൻ മറ്റൊരു കാരണമായി വ്യാപാരികൾ ചൂണ്ടി കാട്ടുന്നത്. കാലവർഷത്തിൽ അനുഭവപ്പെട്ട കാറ്റിലും മഴയിലും വൻതോതിൽ നേന്ത്ര വാഴകൃഷി നശിച്ചിരുന്നു. രാസവളത്തിന്‍റെയും മറ്റും വില വർധനവിനെ തുടർന്ന് മലയോര ജനത വൻ തുക ചിലവഴിച്ചാണ് നേന്ത്രവാഴ കൃഷിയിൽ ഏർപ്പെടുന്നത്. കാട്ടാന, കാട്ടുപന്നി, കാട്ടുപോത്ത്, വാനരപട തുടങ്ങിയ വന്യജീവികൾ കൃഷിക്കാർക്ക് ഇന്ന് പേടി സ്വപ്നമാണ്. ഇവയുടെ ശല്യത്തിൽ നിന്നും കൃഷിയെ സംരക്ഷിക്കാൻ രാവും പകലും കാവലിരുന്നാണ് കർഷകർ വാഴ കൃഷിയെ സംരക്ഷിക്കുന്നത്. ഇതിനു തന്നെ വൻ തുക ചിലവഴിക്കണം. വാഴ തോട്ടത്തിനു ചുറ്റും താത്ക്കാലിക സൗരോർജ വേലി നിർമിച്ചാലും കാട്ടാനകൾ നിമിഷ നേരം കൊണ്ട് നാശം വരുത്തുമെന്നും കർഷകർ പറയുന്നു. പാട്ടത്തിന് സ്ഥലമെടുത്ത് വാഴകൃഷി നടത്തുന്നവരാണ് ഭൂരിപക്ഷവും.

ക്രസന്‍റ് സ്കൂൾ ചാന്പ്യൻമാർ

വണ്ടൂർ: വണ്ടൂർ ഉപജില്ലാ ശാസ്ത്രോത്സവത്തിൽ 1022 പോയിന്േ‍റാടെ കാളികാവ് അടക്കാക്കുണ്ട് ക്രസന്‍റ് ഹയർ സെക്കൻഡറി സ്കൂൾ ചാന്പ്യൻമാരായി. 661 പോയിന്‍റുമായി വണ്ടൂർ വിഎംസി ആണ് രണ്ടാം സ്ഥാനത്ത്. 616 പോയിന്േ‍റാടെ എഎച്ച്എസ് പാറൽ മന്പാട്ടുമൂല മൂന്നാംസ്ഥാനം കരസ്ഥമാക്കി. സമാപന ചടങ്ങ് ജില്ലാ പഞ്ചായത്ത് അംഗം കെ.ടി. അജ്മൽ ഉദ്ഘാടനം ചെയ്തു. പോരൂർ ഗവണ്‍മെന്‍റ് ഹയർ സെക്കൻഡറി സ്കൂളിലും ചെറുകോട് കഐംഎംഎ, എയുപിഎസിലും റോസ് ഹിൽ ഓഡിറ്റോറിയത്തിലുമായി മൂന്ന് ദിവസങ്ങളിലാണ് മേള നടന്നത്. ചടങ്ങിൽ ഗ്രാമപഞ്ചായത്ത് പ്രസിഡന്‍റ് എൻ. മുഹമ്മദ് ബഷീർ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ടി.പി. സക്കീന, ബ്ലോക്ക് അംഗം വി.ശിവശങ്കരൻ, പഞ്ചായത്ത് അംഗങ്ങളായ ഗിരീഷ് കാലടി, പി.കെ. ഭാഗ്യലക്ഷ്മി, പി. അൻവർ, പി. ശങ്കരനാരായണൻ, പി. സുലൈഖ, ഡിഇഒ വി. അനിത, എഇഒ കെ. പ്രമാനന്ദ്, ബിപിസി ഷൈജി ടി.മാത്യു, എച്ച്എം ഫോറം കണ്‍വീനർ സി.കെ. ജയരാജ് തുടങ്ങിയവർ പങ്കെടുത്തു.

കളഞ്ഞുകിട്ടിയ പണം ഉടമസ്ഥന് നൽകി യുവാക്കൾ മാതൃകയായി

രാമപുരം: കുറുവ കൂട്ടിലങ്ങാടി സ്വദേശിയായ ബൈക്ക് യാത്രികനിൽ നിന്ന് റോഡിൽ വീണ പണവും പഴ്സും ഉടമസ്ഥനെ കണ്ടെത്തി തിരിച്ചു നൽകി യുവാക്കൾ മാതൃകയായി. ദേശീയപാത രാമപുരം നാറാണത്ത് വച്ചാണ് കഴിഞ്ഞ ദിവസം വൈകിട്ട് പണവും പഴ്സും വിലപ്പെട്ട രേഖകളും റോഡിൽ കിടക്കുന്ന നിലയിൽ യുവാക്കൾക്ക് ലഭിച്ചത്. തുടർന്ന് വിലാസം അന്വേഷിച്ച് ഉടമസ്ഥനെ കണ്ടെത്തി തിരികെ നൽകി രാമപുരം സ്വദേശികളായ കിഴക്കേതിൽ അബ്ദുൾ സലീമും കളത്തുംപടിയൻ അബ്ദുൾകരീമും മാതൃകയായി. പെരിന്തൽമണ്ണയിൽ നിന്ന് തിരിച്ചുവരുന്പോഴാണ് ബൈക്കുക്കാരന്‍റെ പഴ്സ് റോഡിൽ വീണ് അതിലുണ്ടായിരുന്ന പണം റോഡിൽ ചിന്നിചിതറിയ നിലയിൽ സലീമിന്‍റെ ശ്രദ്ധയിൽപ്പെട്ടത്. മേൽവിലാസം അന്വേഷിച്ചപ്പോൾ പണം നഷ്ടപ്പെട്ട ആൾ കുറുവ കൂട്ടിലങ്ങാടി സ്വദേശിയാണെന്ന് അറിഞ്ഞപ്പോൾ ഉടൻ സുഹൃത്തിനു വിളിച്ചറിയിച്ചു. പിന്നീട് ഉടമസ്ഥനെ കണ്ടെത്തി അവ കൈമാറി.

എച്ച്എംസി രൂപീകരിക്കാൻ നഗരസഭയ്ക്ക് ആരോഗ്യവകുപ്പ് ഡയറക്ടറുടെ കത്ത്

മഞ്ചേരി : മഞ്ചേരി ജനറൽ ആശുപത്രിയിൽ എച്ച്എംസി രൂപീകരിക്കാൻ നഗരസഭക്ക് ആരോഗ്യ വകുപ്പ് ഡയറക്ടറുടെ കത്ത്. 2016ൽ ആശുപത്രിയുടെ നടത്തിപ്പ് ചുമതല നഗരസഭക്ക് വിട്ടു നൽകി സർക്കാർ ഉത്തരവുണ്ട്. ഇതനുസരിച്ച് ആശുപത്രിയിൽ എച്ച്എംസി രൂപീകരിക്കാവുന്നതാണ്. ഇനി മറ്റൊരു ഉത്തരവിന്‍റെ ആവശ്യം ഇല്ലെന്നും വ്യക്തമാക്കിയാണ് ആരോഗ്യവകുപ്പ് ഉത്തരവിറക്കിയത്. കത്തിന്‍റെ പകർപ്പ് മുൻസിപ്പൽ സെക്രട്ടറിക്കും കൈമാറി. എച്ച്എംസി രൂപീകരിക്കുന്നതിന് അനുമതി ഇല്ലാതിരുന്നതാണ് ആശുപത്രി ഏറ്റെടുക്കാതിരുന്നതെന്ന് ചൂണ്ടിക്കാട്ടി യുഡിഎഫ് നേതാക്കൾ സൂപ്രണ്ടിനെ ഉപരോധിച്ചിരുന്നു. ഇതേതുടർന്നാണ് ആരോഗ്യ വകുപ്പിന്‍റെ നടപടി. ഓഗസ്റ്റിൽ വിവിധ പദ്ധതികളുടെ ഉദ്ഘാടനം കഴിഞ്ഞിറങ്ങിയ മന്ത്രി വീണാജോർജ് 2016-ലെ സർക്കാർ ഉത്തരവ് എടുത്തുയർത്തി വായിച്ചു. ഉത്തരവ് പ്രകാരം സംസ്ഥാനത്തെ 15 ജനറൽ ആശുപത്രികളും അതത് തദ്ദേശ സ്ഥാപനങ്ങൾക്ക് കൈമാറി. അതിൽ പതിനൊന്നാമതായി മഞ്ചേരിയിലെ പാണക്കാട് മുഹമ്മദലി ശിഹാബ് തങ്ങൾ സ്മാരക ജനറൽ ആശുപത്രിയാണെന്നും മന്ത്രി വ്യക്തമാക്കിയിരുന്നു. ആ ഉത്തരവിൽപ്പെട്ട മറ്റ് 14 ജനറൽ ആശുപത്രികളും അതത് തദ്ദേശ സ്ഥാപനങ്ങൾ ഏറ്റെടുത്ത് പ്രവർത്തനം ആരംഭിച്ചു. എന്നാൽ മഞ്ചേരി നഗരസഭയും എംഎൽഎയും കഴിഞ്ഞ എട്ട് വർഷമായി തുടർനടപടി സ്വീകരിച്ചിരുന്നില്ല. എച്ച്എംസി രൂപീകരിക്കാൻ സർക്കാർ അനുമതി ലഭിച്ചില്ലെന്നായിരുന്നു നഗരസഭയുടെ വാദം. ഇതിനിടെയാണ് ആരോഗ്യ വകുപ്പ് വീണ്ടും ഉത്തരവിറക്കിയത്.

മാനസികരോഗ്യം : ശില്പശാല സംഘടിപ്പിച്ചു

പെരിന്തൽമണ്ണ : മാനസികാരോഗ്യ കാന്പയിന്‍റെ ഭാഗമായി നാഷണൽ സർവീസ് സൊസൈറ്റി സർവീസ് പ്രോവൈഡിംഗ് സെന്‍റർ, എൻഎസ്എസ് കമ്മ്യൂണിറ്റി കോളജ്, സിസിജിസി പ്രൊജക്ട് എന്നിവയുടെ ആഭിമുഖ്യത്തിൽ പെരിന്തൽമണ്ണ വ്യാപാരി ഭവൻ ഓഡിറ്റോറിയത്തിൽ ശില്പശാല നടത്തി. ഫാ. ജെ. വിക്ടർ ഉദ്ഘാടനം ചെയ്തു. മണ്ണാർക്കാട് എംഇഎസ് കോളജ് റിട്ടയേർഡ് പ്രിൻസിപ്പൽ ടി.ടി. സൈതലവി അധ്യക്ഷത വഹിച്ചു. റെയിൽവേ ഹോസ്പിറ്റൽ നഴ്സിംഗ് സൂപ്രണ്ട് സ്വപ്ന ശശിധരൻ, എൻഎസ്എസ് സ്റ്റേറ്റ് പ്രൊജക്ട്സ് സെൽ ചെയർമാൻ കെ.എം. ഫിറോസ് ഖാൻ, ഐസിഡിഎസ് കോഴിക്കോട് നോഡൽ ഓഫീസർ പി.എ. രാജേഷ്, ഡോ. പി. അനിത, കണ്‍സൾട്ടന്‍റ് സൈക്കോളജിസ്റ്റ് ശുഭശ്രീ രാമൻ, ക്ലിനിക്കൽ സൈക്കോളജിസ്റ്റ് മുനവിറ നസ് റിൻ എന്നിവർ വിഷയമവതരിപ്പിച്ചു. ശില്പശാലയിൽ മികച്ച അവതരണം നടത്തിയവരെ ആദരിച്ചു.

കാർ തെങ്ങിലിടിച്ച് അപകടം

നിലന്പൂർ:നിയന്ത്രണം വിട്ട കാർ തെങ്ങിൽ ഇടിച്ചു. യാത്രക്കാർ രക്ഷപ്പെട്ടു. നിലന്പൂർ - നായാടംപൊയിൽ മലയോര പാതയിൽ ഇടിവണ്ണ കരിന്പായിതണ്ടിൽ ചൊവ്വാഴ്ച രാത്രി പത്തുമണിയോടെയാണ് കാർ അപകടത്തിൽപ്പെട്ടത്. നിലന്പൂർ ഭാഗത്ത് നിന്ന് കക്കാടംപൊയിൽ ഭാഗത്തേക്ക് പോവുകയായിരുന്നു കാർ. റോഡിന് വളവുള്ള ഭാഗമാണിവിടെ. വളവിൽ നിയന്ത്രണം വിട്ട കാർ റോഡരികിലെ വൈദ്യുത തൂണിൽ ഇടിച്ച ശേഷം കുത്തനെയുള്ള ഭാഗത്തേക്ക് നീങ്ങുകയായിരുന്നു. തുടർന്ന് സമീപത്തെ കമുക് ഇടിച്ച് വീഴ്ത്തി തൊട്ടടുത്ത തെങ്ങിൽ ഇടിച്ചു നിൽക്കുകയായിരുന്നു. തെങ്ങാണ് രക്ഷയായി മാറിയത്. അല്ലെങ്കിൽ സമീപത്തെ കുറുവൻപുഴയുടെ പാറക്കെട്ടിലേക്ക് കാർ മറിയുമായിരുന്നു. വണ്ടൂർ സ്വദേശികളായ മൂന്ന് പേരാണ് കാറിലണ്ടായിരുന്നത്. ഇവിടെയുള്ള റോഡിൽ മുൻപരിചയമില്ലാത്തതിനാലാണ് അപകടം ഉണ്ടായതെന്നാണ് കരുതുന്നത്. കാറിൽ എയർബാഗ് ഉള്ളതിനാൽ യാത്രക്കാർ പരിക്കേൽക്കാതെ രക്ഷപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]