ADVERTISEMENT

ADVERTISEMENT

കലോത്സവത്തിൽ കിരീടം ചൂടി ഫാത്തിമ യുപി സ്കൂൾ

പരിയാപുരം: അങ്ങാടിപ്പുറം പഞ്ചായത്ത് സ്കൂൾ കലോത്സവത്തിൽ എൽപി വിഭാഗം അറബിക് കലാമേളയിൽ ഓവറോൾ ഒന്നാം സ്ഥാനവും ജനറൽ വിഭാഗത്തിൽ മൂന്നാം സ്ഥാനവും പരിയാപുരം ഫാത്തിമ യുപി സ്കൂൾ കരസ്ഥമാക്കി.

മേളയിൽ പങ്കെടുത്ത കുട്ടികൾക്കുള്ള ഉപഹാരങ്ങളും സർട്ടിഫിക്കറ്റുകളും വിതരണം ചെയ്തു. ചടങ്ങിൽ പഞ്ചായത്ത് അംഗം അനിൽ പുലിപ്ര അധ്യക്ഷത വഹിച്ചു.

പ്രധാനാധ്യാപിക പി.എ. അന്പിളി, അധ്യാപകരായ അബ്ദുൾ നാസർ മാന്പ്ര, പി.കെ. ഷാദിയ, ഹണി സെബാസ്റ്റ്യൻ, സാറാമ്മ, സിസ്റ്റർ ലിൻസി ഫ്രാൻസിസ് എന്നിവർ പ്രസംഗിച്ചു.

ADVERTISEMENT

വിദ്യാർഥികൾക്ക് കശുമാവിൻ തൈകൾ വിതരണം ചെയ്തു

മേലാറ്റൂർ: സംസ്ഥാന കശുമാവ് കൃഷി വികസന ഏജൻസിയുടെ ആഭിമുഖ്യത്തിൽ മേലാറ്റൂർ ചോലക്കുളം ടി.എം. ജേക്കബ് മെമ്മോറിയൽ എൽപി സ്കൂളിലെ 700 വിദ്യാർഥികൾക്ക് അത്യുത്പാദന ശേഷിയുള്ള ഹൈബ്രിഡ് കശുമാവിൻ തൈകൾ വിതരണം ചെയ്തു. സ്കൂൾ മാനേജർ മാത്യു സെബാസ്റ്റ്യൻ സ്കൂൾ ലീഡർ റിസഫാത്തിമക്ക് തൈ നൽകിയാണ് ഉദ്ഘാടനം നിർവഹിച്ചത്.പ്രധാനാധ്യപിക കെ.വനജ, ടി.എച്ച്. മുസ്ബിൻ, അഖിൽ, ആനിയമ്മ, രാജേഷ് മൂത്തേടം എന്നിവർ പ്രസംഗിച്ചു. അധ്യാപകരായ മുഹമ്മദ് സമീർ, എൻ. സുകന്യ, എൻ. ജസ്നി, എ. ശിശിര, കെ. നയന എന്നിവർ നേതൃത്വം നൽകി.

കരിങ്കൽ ക്വാറിക്കെതിരേ പ്രതിഷേധവുമായി നാട്ടുകാർ; റോഡ് നിർമാണം മുടങ്ങി

നിലന്പൂർ: മന്പാട് കാരച്ചാലിൽ കരിങ്കൽ ക്വാറിക്കെതിരേ പ്രതിഷേധവുമായി നാട്ടുകാർ. സ്ത്രീകൾ ഉൾപ്പെടെ രംഗത്തെത്തി. കാരച്ചാൽ പെരുംപാറയിൽ പുതുതായി തുടങ്ങിയ കരിങ്കൽ ക്വാറിക്കെതിരേയാണ് നാട്ടുകാരുടെ ഭാഗത്ത് നിന്ന് വലിയ തോതിൽ പ്രതിഷേധമുയർന്നത്. ഇന്നലെ രാവിലെ പത്തോടെയാണ് നാട്ടുകാർ സംഘടിച്ചത്. ഹൈക്കോടതി നിർദേശത്തിന്‍റെ അടിസ്ഥാനത്തിൽ പോലീസ് അകന്പടിയോടെയാണ് ക്വാറി ഉടമകൾ സ്വകാര്യവ്യക്തിയുടെ സ്ഥലത്ത് കൂടി കരിങ്കല്ല് കൊണ്ടുപോകാൻ റോഡ് നിർമിക്കുന്നത്. ഇതിന്‍റെ പ്രവൃത്തിക്കെതിരേയാണ് നാട്ടുകാർ പ്രതിഷേധിച്ചത്. ഇതിനിടയിൽ കരിങ്കൽ കയറ്റി വന്ന ലോറികൾ പോലീസ് സഹായത്തോടെ കടത്തിവിട്ടു. പ്രശ്നപരിഹാരവുമായി ബന്ധപ്പെട്ട് ചർച്ചകൾ നടക്കേണ്ടതിനാൽ രണ്ടു ദിവസത്തേക്ക് കരിങ്കൽ കയറ്റി പോകുന്നത് നിർത്തിവയ്ക്കാൻ പഞ്ചായത്ത് അധികൃതർ ക്വാറി ഉടമകളോട് ആവശ്യപ്പെട്ടു. പൊതുറോഡിലൂടെ കരിങ്കൽ കയറ്റി പോകുന്നതിനെ നാട്ടുകാർ എതിർക്കുന്ന സാഹചര്യത്തിലാണ് സ്വകാര്യവ്യക്തിയുടെ സ്ഥലം പാട്ടത്തിനെടുത്ത് അതിലൂടെ റോഡ് നിർമിക്കാൻ ജെസിബി ഉൾപ്പെടെയുള്ള സംവിധാനവുമായി ക്വാറി ഉടമകൾ എത്തിയത്. ദുബായിലുള്ള സ്ഥലം ഉടമ കരാർ പ്രകാരം തങ്ങൾക്ക് സ്ഥലം പാട്ടത്തിന് തന്നിട്ടുള്ളതാണെന്ന് ക്വാറി ഉടമകൾ പറഞ്ഞു. തുടർന്ന് പോലീസ് സ്ഥലം ഉടമയുടെ സഹോദരനെ വിളിച്ചുവരുത്തി. സ്ഥലം ക്വാറി ഉടമകൾക്ക് പാട്ടത്തിന് നൽകിയിട്ടുണ്ടെന്നും ഇതിന്‍റെ രേഖകൾ ഇന്ന് ഹാജരാക്കാമെന്നും അറിയിച്ചു. ഉച്ചയോടെ കാര്യങ്ങൾ അറിയാക്കാമെന്ന് നാട്ടുകാർക്ക് പോലീസ് ഉൾപ്പെടെ നൽകിയ ഉറപ്പിലാണ് പ്രതിഷേധക്കാർ പിരിഞ്ഞുപോയത്. പരിസ്ഥിതി ലോല പ്രദേശമായ ഇവിടെ 2018 ൽ ഉരുൾപൊട്ടൽ ഉണ്ടായിട്ടുണ്ടെന്നും ഏത് സമയത്തും ഉരുൾപൊട്ടൽ ഉണ്ടാകാമെന്നും നാട്ടുകാർ പറയുന്നു. നീർച്ചാൽ കടന്നുപോകുന്ന ഭാഗത്ത് ഒരു കരിങ്കൽ ക്വാറി നിലവിലുണ്ട്. ഇതിന് പുറമെയാണ് പുതിയ ക്വാറി കൂടി തുടങ്ങിയിരിക്കുന്നതെന്നും നാട്ടുകാർ പറയുന്നു. ചൂരൽമലയിലുണ്ടായ അവസ്ഥ ക്വാറി പ്രവർത്തിച്ചാൽ ഇവിടെയും സംഭവിക്കാനിടയുണ്ട്. എസ്‌സി-എസ്ടി വിഭാഗങ്ങൾ ഉൾപ്പെടെ നൂറിലധികം കുടുംബങ്ങൾ താമസിക്കുന്നു. ക്വാറി പരിസരത്ത് സുരക്ഷിതമില്ലാത്തതും തുരുന്പിച്ചതും കാലപഴക്കവുമുള്ള ഇരുന്പുപെട്ടികളിലാണ് ഉഗ്രശേഷിയുള്ള വെടിമരുന്നുകൾ ഉൾപ്പെടെ സൂക്ഷിച്ചിട്ടുള്ളതെന്നും നാട്ടുകാർ പറയുന്നു. ഈ ക്വാറികൾക്കുള്ള ലൈസൻസ് റദ്ദാക്കണമെന്നാണ് നാട്ടുകാരുടെ ആവശ്യം. നിലവിൽ ലൈസൻസുള്ള ക്വാറികൾ അടച്ചുപൂട്ടാൻ കഴിയില്ലെന്ന നിലപാടാണ് ക്വാറി ഉടമകൾ സ്വീകരിച്ചത്.

പൈപ്പുകൾ പൊട്ടി റോഡ് തകരുന്നു; ജൽജീവൻ പദ്ധതിയും ദുരിതമായേക്കും

കാളികാവ്: മലയോര ഹൈവേക്ക് ശാപമായി ചോക്കാടിലെ പുതിയ കുടിവെള്ള പദ്ധതി. മറ്റ് പല പദ്ധതികളെയും പോലെ ജൽജീവൻ പദ്ധതിയുടെ ട്രയൽ റണ്‍ നടത്തിയപ്പോഴേക്കും മൂന്നു സ്ഥലങ്ങളിൽ പൈപ്പ് പൊട്ടി റോഡ് തകർന്നു. നിർമാണം നടന്നുകൊണ്ടിരിക്കുന്ന ജൽജീവൻ പദ്ധതിയും പരാജയപ്പെടുമെന്ന ആശങ്കയിലാണ് ചോക്കാട്ടിലെ ജനങ്ങൾ. ഉദരംപൊയിൽ അങ്ങാടിക്ക് സമീപത്തെ ടർഫ് സ്റ്റേഡിയത്തിന് സമീപത്തും മുജാഹിദ് മസ്ജിദിന് മുൻവശവുമാണ് ടാറിംഗ് നടത്തിയ സ്ഥലത്ത് പൈപ്പ് പൊട്ടി റോഡ് തകർന്നത്. പുല്ലങ്കോട് അങ്ങാടിയിലും പൈപ്പ് പൊട്ടി റോഡ് തകർന്നിട്ടുണ്ട്. ജിഎസ്പി നിക്ഷേപിക്കുന്നതിന്‍റെ ഭാഗമായി ജെസിബി ഉപയോഗിച്ച് മണ്ണ് നീക്കുന്നതിനിടെയാണ് പൈപ്പ് തകർന്നതെന്നാണ് വാട്ടർ അഥോറിറ്റി പറയുന്നത്. മധുമല കുടിവെള്ള പദ്ധതിയുടെ പൈപ്പുകളും മറ്റം ഉപയോഗിച്ച് സ്രാന്പിക്കല്ലിന് സമീപത്ത് വരെയുള്ള നാല് കിലോമീറ്ററോളം ദൂരത്തിലുള്ള ഭാഗത്താണ് ട്രയൽ റണ്‍ നടത്തിയത്. അപ്പോഴേക്കും മൂന്ന് സ്ഥലങ്ങളിലാണ് പൈപ്പ് പൊട്ടി റോഡ് തകർന്നത്. മലയോര ഹൈവേയിൽ പല ഭാഗങ്ങളിലും പുറത്ത് യൂട്ടിലിറ്റി സ്പേസിലാണ് പൈപ്പ് സ്ഥാപിച്ചിട്ടുള്ളത്. എന്നാൽ കാളികാവ്, ചോക്കാട് ഭാഗങ്ങളിൽ അഴുക്കുചാലിനോട് ചേർന്ന് ടാറിംഗ് നടത്തിയ ഭാഗത്താണ് പൈപ്പുകൾ സ്ഥാപിച്ചിട്ടുള്ളത്. ഇത് ഭാവിയിൽ പൈപ്പ് പൊട്ടി റോഡ് തകർച്ചയ്ക്ക് കാരണമാകുമെന്ന് നാട്ടുകാർ ആശങ്കപ്പെടുന്നു. ചോക്കാട്ടിലെ മധുമല കുടിവെള്ള പദ്ധതി പാളിയിരുന്നു. ഈ പദ്ധതി പ്രയോജനപ്പെടുത്തി നിർമിച്ച ജലനിധി പദ്ധതിയും വിജയമായിരുന്നില്ല. ഒരു തുള്ളി വെള്ളം കൊടുക്കാൻ കഴിയാത്ത പദ്ധതിക്ക് വേണ്ടി ഏഴ് കോടിയോളം രൂപയാണ് അന്ന് ഖജനാവിൽ നിന്ന് പൊടിച്ചത്. ഇതിനു പുറമേ ഗുണഭോക്തൃ വിഹിതവും വലിയ തോതിൽ സമാഹരിക്കപ്പെട്ടു. 1700 ലധികം കുടുംബങ്ങൾക്ക് വെള്ളമെത്തിക്കുമെന്ന് പറഞ്ഞ പദ്ധതി സന്പൂർണമായ പരാജയമായി. ജൽജീവൻ പദ്ധതിയും ഇതുപോലെ വെള്ളം കിട്ടാതെ ദുരിതമാകുമോ എന്ന ആശങ്കയിലാണ് നാട്ടുകാർ.

സദ്ഗ്രാമം ഹോം ട്യൂഷൻ പദ്ധതിക്ക് തുടക്കമായി

പെരിന്തൽമണ്ണ: പട്ടികജാതി-വർഗ വിഭാഗങ്ങളുടെ സുസ്ഥിര വികസനം ലക്ഷ്യമാക്കി നജീബ് കാന്തപുരം എംഎൽഎ പെരിന്തൽമണ്ണ മണ്ഡലത്തിൽ നടപ്പാക്കുന്ന സദ്ഗ്രാമം പദ്ധതിയുടെ ഭാഗമായി കമ്മ്യൂണിറ്റി ഹോം ട്യൂഷൻ പദ്ധതിക്കും തുടക്കം കുറിച്ചു. പട്ടികജാതി-വർഗ വിഭാഗങ്ങൾ താമസിക്കുന്ന സദ്ഗ്രാമങ്ങളിൽ അവധി ദിവസങ്ങളിൽ ട്യൂഷൻ ആരംഭിക്കുന്നതാണ് പദ്ധതി. അതത് സദ്ഗ്രാമങ്ങളിലെ ബിരുദ വിദ്യാർഥികളുടെ നേതൃത്വത്തിലാണ് പദ്ധതി ആരംഭിക്കുക. ബിരുദ വിദ്യാർഥികളില്ലാത്ത സദ്ഗ്രാമങ്ങളിൽ സേവന സന്നദ്ധരായ അധ്യാപകരുടെ നേതൃത്വത്തിലായിരിക്കും ട്യൂഷൻ. നിയോജക മണ്ഡലത്തിലെ 100 സദ്ഗ്രാമങ്ങളിൽ ഒന്നാംഘട്ടത്തിൽ പദ്ധതി നടപ്പാക്കും. ഘട്ടംഘട്ടമായി നിയോജക മണ്ഡലത്തിലെ മുഴുവൻ സദ്ഗ്രാമങ്ങളിലേക്കും പദ്ധതി വ്യാപിപ്പിക്കുമെന്ന് നജീബ് കാന്തപുരം എംഎൽഎ പറഞ്ഞു. താഴെക്കോട് ഗ്രാമപഞ്ചായത്തിലെ കുന്നുമ്മൽ സദ്ഗ്രാമത്തിൽ ഹോം ട്യൂഷൻ പദ്ധതിയുടെ ഉദ്ഘാടനം എംഎൽഎ നിർവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എ.കെ. മുസ്തഫ അധ്യക്ഷത വഹിച്ചു. ഗ്രാമപഞ്ചായത്തംഗം വി.പി. റഷീദ്, രാമകൃഷ്ണൻ, ഓങ്ങല്ലൂർ ഹമീദ്, മരുതന്പാറ മുഹമ്മദലി, ഉബൈദ് ആക്കാടൻ, രവീണ, പ്രസീത, മുഹമ്മദുണ്ണി തച്ചംപറ്റ, രാജൻ, ടി. ഇസ്ഹാഖ്, സുബൈർ, സബാഹ്, റഫീഖ്, വീരാൻ പുളിക്കൽ, ബിന്ദു കുന്നുമ്മൽ തുടങ്ങിയവർ പ്രസംഗിച്ചു.

മാലിന്യനിർമാർജനത്തിന് പുതുവഴി : അങ്ങാടിപ്പുറത്ത് കൗതുകമുണർത്തി "കുപ്പിയാന’

അങ്ങാടിപ്പുറം: ഉപയോഗശൂന്യമായി വലിച്ചെറിയുന്ന കുപ്പികൾ കൊണ്ട് ആനയുടെ ശില്പം തീർത്ത് അങ്ങാടിപ്പുറം പഞ്ചായത്തിന്‍റെ മാലിന്യനിർമാർജനം ശ്രദ്ധയാകർഷിക്കുന്നു. പതിനായിരത്തോളം പ്ലാസ്റ്റിക് കുപ്പികളാണ് ശുചിത്വ ശില്പം പണിയുന്നതിനായി ഉപയോഗിച്ചത്. പഞ്ചായത്ത് പല സ്ഥലങ്ങളിലായി സ്ഥാപിച്ച 32 ബോട്ടിൽ ബൂത്തുകളിൽ നിന്ന് ശേഖരിച്ചവയാണ് പ്ലാസ്റ്റിക് കുപ്പികൾ. പെരിന്തൽമണ്ണ സബ്കളക്ടർ സാക്ഷി മോഹൻ കുപ്പിയാന ശില്പം അനാച്ഛാദനം ചെയ്തു. പഞ്ചായത്ത് പ്രസിഡന്‍റ് കെ.പി. സഈദ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ വാക്കാട്ടിൽ സുനിൽ ബാബു, ഫൗസിയ തവളേങ്ങൽ, സെലീന താണിയൻ, മെന്പർമാരായ പി.പി. ശിഹാബ്, അനിൽ പുലിപ്ര, ഷംസാദ് ബീഗം, കോറാടൻ റംല, എം.കെ. ഖദീജ, വാഹിദ, സെക്രട്ടറി സുഹാസ് ലാൽ, വ്യാപാരി വ്യവസായി ഏകോപന സമിതി പ്രസിഡന്‍റ് ജബ്ബാർ, കില ആർപി ഗോപാലൻ തുടങ്ങിയവർ പ്രസംഗിച്ചു. മാലിന്യനിർമാർജനത്തിന്‍റെ ഭാഗമായി "അഴകുള്ള അങ്ങാടിപ്പുറം’ എന്ന മുദ്രാവാക്യമുയർത്തി പഞ്ചായത്ത് നടത്തുന്ന വിവിധ പരിപാടികളുടെ ഭാഗമായാണ് മാലിന്യ ശില്പം സ്ഥാപിച്ചത്. കുപ്പിയാനയെ കാണാൻ നിരവധി പേരെത്തി. ശില്പം നിർമിച്ച വളാഞ്ചേരിയിലെ ഹംസക്കുട്ടിയെ ചടങ്ങിൽ ആദരിച്ചു.

ചുങ്കത്തറ ബ്ലോക്ക് കുടുംബാരോഗ്യ കേന്ദ്രത്തിൽ ഡെന്‍റൽ ഒപിയും കിടത്തി ചികിത്സയും ആരംഭിച്ചു

എടക്കര: ചുങ്കത്തറ ബ്ലോക്ക് കുടുംബാരോഗ്യ കേന്ദ്രത്തിൽ ഡെന്‍റൽ ഒപിയും കിടത്തി ചികിത്സയും കെട്ടിടവും ആര്യാടൻ ഷൗക്കത്ത് എംഎൽഎ ഉദ്ഘാടനം ചെയ്തു. നിലന്പൂർ ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി രണ്ട് കോടി രൂപ ചെവലഴിച്ചാണ് കെട്ടിടം ഉൾപ്പടെ പദ്ധതികൾ നടപ്പാക്കിയത്. ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി അധ്യക്ഷത വഹിച്ചു. വൈസ് പ്രസിഡന്‍റ് പാത്തുമ്മ ഇസ്മായിൽ, സ്റ്റാൻഡിംഗ് കമ്മിറ്റി അധ്യക്ഷരായ സൂസൻ മത്തായി, സജ്ന അബ്ദുറഹ്മാൻ, വാളപ്ര റഷീദ്, ബ്ലോക്ക് അംഗങ്ങളായ സി.കെ. സുരേഷ്, സോമൻ പാർലി, സഹിൽ അകന്പാടം, പഞ്ചായത്തംഗം എ.കെ. വിനോദ്, എച്ച്എംസി അംഗങ്ങളായ പറന്പിൽ ബാവ, പാനായിൽ ജേക്കബ്, കെ. രാധാകൃഷ്ണൻ, സി.ആർ. ഗോപാലൻ, ജയിംസ് വർക്കി, മെഡിക്കൽ ഓഫീസർ ഡോ. പി.കെ. ബഹാവുദ്ദീൻ, ലിസി എന്നിവർ പ്രസംഗിച്ചു. ബുധൻ, വെള്ളി ദിവസങ്ങളിലാണ് ഡെന്‍റൽ ഒപി പ്രവർത്തിക്കുക. 25 കിടക്കകളുമായാണ് കിടത്തി ചികിത്സക്ക് സൗകര്യമൊരുക്കിയിട്ടുള്ളത്.

ജില്ലാ സ്കൂൾ കായികമേളക്ക് തുടക്കം : എടപ്പാൾ മുന്നേറ്റം തുടങ്ങി

ചാത്തന്നൂർ (പാലക്കാട്) : മലപ്പുറം ജില്ലാ സ്കൂൾ കായികമേളയ്ക്ക് പാലക്കാട് ജില്ലയിലെ ചാത്തന്നൂർ ഗവണ്‍മെന്‍റ് ഹയർ സെക്കൻഡറി സ്കൂളിലെ സിന്തറ്റിക് ട്രാക്കിൽ തുടക്കമായി. സാധാരണ മലപ്പുറം ജില്ലാ സ്കൂൾ കായികമേള നടന്നുവരാറുള്ളത് കാലിക്കട്ട് യൂണിവേഴ്സിറ്റിയിലെ സിന്തറ്റിക് ട്രാക്കിലാണ്. സമീപ കാലത്ത് ഈ ട്രാക്ക് തകർച്ച നേരിട്ടതിനാലാണ് ഇത്തവണ അയൽ ജില്ലയായ പാലക്കാട് ചാത്തന്നൂരിലേക്ക് കായികമേള മാറ്റേണ്ടിവന്നത്. ഇന്നലെ ആരംഭിച്ച മേളയുടെ ആദ്യദിനം അവസാനിക്കുന്പോൾ 57 പോയിന്‍റോടെ എടപ്പാൾ ഉപജില്ലയാണ് മുന്നിൽ. ആറ് സ്വർണം, ആറ് വെള്ളി, ഒന്പത് വെങ്കലം നേടിയാണ് എടപ്പാൾ ഒന്നാം സ്ഥാനത്തുള്ളത്. എടപ്പാളിന് വെല്ലുവിളിയായി കഴിഞ്ഞ റവന്യു ജില്ലയിലെ ജേതാക്കളായ തിരൂർ ഉപജില്ല തൊട്ടുപിറകിലുണ്ട്. 45 പോയിന്‍റാണ് തിരൂർ നേടിയിരിക്കുന്നത്. ആറ് സ്വർണം കരസ്ഥമാക്കിയ തിരൂർ നാലു വെള്ളിയും മൂന്ന് വെങ്കലവും നേടിയിട്ടുണ്ട്. 30 പോയിന്‍റുമായി അരീക്കോട് ഉപജില്ലയാണ് മൂന്നാം സ്ഥാനത്ത്. നാല് സ്വർണവും മൂന്ന് വെള്ളിയും ഒരു വെങ്കലവുമാണ് അരീക്കോടിന്‍റെ സന്പാദ്യം. വണ്ടൂർ, താനൂർ ഉപജില്ലകളാണ് നാല്, അഞ്ച് സ്ഥാനങ്ങളിൽ. ഒരു സ്വർണവും രണ്ട് വെള്ളിയും നേടി 11 പോയിന്‍റാണ് വണ്ടൂരിനുള്ളത്. രണ്ട് സ്വർണം നേടി 10 പോയിന്‍റാണ് താനൂർ സ്വന്തമാക്കിയിരിക്കുന്നത്. സ്കൂളുകളിൽ കടകശേരി ഐഡിയൽ ഇഎച്ച്എസ്എസ് ആണ് മുന്നിൽ. ആറ് സ്വർണവും ആറ് വെള്ളിയും ഒന്പത് വെങ്കലവും ആദ്യദിനം തന്നെ ഐഡിയൽ നേടിയെടുത്തു. 57 പോയിന്‍റാണ് ഐഡിയലിനുള്ളത്. എടപ്പാൾ ഉപജില്ലയുടെ മുന്നേറ്റത്തിനുള്ള പ്രധാനകാരണം ഐഡിയലിന്‍റെ മികച്ച പ്രകടനമാണ്. തിരൂർ ഉപജില്ലയിലെ തിരുനാവായ നവാമുകുന്ദ എച്ച്എസ്എസ് ആണ് രണ്ടാം സ്ഥാനത്തുള്ളത്. നാല് സ്വർണവും മൂന്ന് വെള്ളിയും മൂന്ന് വെങ്കലവുമടക്കം 32 പോയിന്‍റാണ് സ്കൂൾ നേടിയിരിക്കുന്നത്. അരീക്കോട് ഉപജില്ലയിലെ എസ്എസ്എച്ച്എസ്എസ് മൂർക്കനാട് ആണ് മൂന്നാം സ്ഥാനത്തുള്ളത്. മൂന്ന് സ്വർണവും രണ്ട് വെള്ളിയുമടക്കം 21 പോയിന്‍റാണ് മൂർക്കനാട് കരസ്ഥമാക്കിയിരിക്കുന്നത്. ആലത്തിയൂർ കെഎച്ച്എംഎച്ച്എസ് 13 പോയന്‍റുമായി നാലാം സ്ഥാനത്ത് തുടരുന്നു. രണ്ട് സ്വർണവും ഒരു വെങ്കലവുമാണ് അവർക്ക് ലഭിച്ചത്. കായികമേളയ്ക്ക് തുടക്കമായി മലപ്പുറം വിദ്യാഭ്യാസ ഉപഡയറക്ടർ പി.വി. റഫീഖ് പതാകയുയർത്തി. മലപ്പുറം ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ ഉദ്ഘാടനം ചെയ്തു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ നസീബ അസീസ് അധ്യക്ഷത വഹിച്ചു. ഗ്രാമപഞ്ചായത്ത് അംഗം ടി. പ്രേമ, ഹയർ സെക്കൻഡറി സ്കൂൾ കോ ഓർഡിനേറ്റർ ഇസ്ഹാഖ്, ജില്ലാ സ്പോർട്സ് കോ ഓർഡിനേറ്റർ ഡോ.എസ്. സന്ദീപ്, പി.പി. സാജൻദാസ്, പി.പി. വിനയൻ, എ. ശിവപ്രസാദ് എന്നിവർ സംസാരിച്ചു. വിവിധ ഇനങ്ങളിലായി മൂവായിരത്തോളം കായിക പ്രതിഭകളാണ് പങ്കെടുക്കുന്നത്. കായികമേള നാളെ സമാപിക്കും.

രജത ജൂബിലി ആഘോഷവുമായി ബിഎസ്എന്‍എല്‍

മഞ്ചേരി : രണ്ടായിരാമാണ്ട് ഒക്‌ടോബര്‍ ഒന്നിന് കേന്ദ്ര സര്‍ക്കാര്‍ അധീനതയില്‍ സ്ഥാപിതമായ ഭാരത് സഞ്ചാര്‍ നിഗം ലിമിറ്റഡ് രജത ജൂബിലി ആഘോഷത്തിന്‍റെ ഭാഗമായി ജില്ലയില്‍ വിവിധ പരിപാടികള്‍ സംഘടിപ്പിക്കുന്നു. ഇതിനോടനുബന്ധിച്ച് മഞ്ചേരി ബിഎസ്എന്‍എല്‍ ശനിയാഴ്ച ആഘോഷ പരിപാടി തുടങ്ങും. രാവിലെ ഒമ്പതിന് പാണ്ടിക്കാട് നഗരത്തില്‍ നിന്നും ആരംഭിക്കുന്ന റോഡ് ഷോ തിരുവാലി, എടവണ്ണ, അരീക്കോട്, കാവനൂര്‍ എന്നിവിടങ്ങളിലെ സ്വീകരണത്തിന് ശേഷം വൈകീട്ട് അഞ്ചിന് മഞ്ചേരിയിലെത്തും. ഓരോ സ്ഥലങ്ങളിലും പൊതുജനങ്ങള്‍ക്കായി വിവിധയിനം കലാകായിക പരിപാടികളും ആസൂത്രണം ചെയ്തതായി സംഘാടകര്‍ അറിയിച്ചു. മഞ്ചേരിയില്‍ നടക്കുന്ന പൊതു സമ്മേളനം ഇ.ടി. മുഹമ്മദ് ബഷീര്‍ ഉദ്ഘാടനം ചെയ്യും. അഡ്വ. യു.എ. ലത്തീഫ് എംഎല്‍എ, നഗരസഭാധ്യക്ഷ വി.എം. സുബൈദ, മലപ്പുറം ടെലികോം അഡ്‌വൈസറി കമ്മിറ്റി അംഗങ്ങളായ പി.പി. സഫറുളള, കെ.കെ. അബ്ദുല്‍ നാസര്‍, പി.എച്ച്. ഷമീര്‍ ബാബു, അഡ്വ. അബ്ദുല്ലക്കുട്ടി എന്നിവര്‍ പങ്കെടുക്കും. ബിഎസ്എന്‍എല്‍ മലപ്പുറം സീനിയര്‍ ജനറല്‍ മാനേജര്‍ സാനിയ അബ്ദുള്‍ ലത്തീഫ് അധ്യക്ഷത വഹിക്കും. രജതജൂബിലി ആഘോഷങ്ങളുടെ ഭാഗമായി നടത്തിയ ചിത്രരചനയില്‍ വിജയികളായവര്‍ക്കുള്ള സമ്മാനദാനവും നടക്കും.

‘ആവശ്യം വന്നാൽ നിയമം കൈയിലെടുക്കാൻ മറക്കില്ല’

നിലമ്പൂർ: സിപിഎംനേതാവ് ഇ.പി. ജയരാജന് മറുപടിയുമായി മുൻ കെപിസിസി പ്രസിഡന്‍റ് കെ. മുരളീധരൻ. വേണ്ടി വന്നാൽ നിയമം കൈയിലെടുക്കാനും കോൺഗ്രസ് മടിക്കില്ലെന്നും കെ. മുരളിധരൻ മുന്നറിയിപ്പ് നൽകി. പേരമ്പ്രയിൽ കോൺഗ്രസ് പ്രവർത്തകർ സ്ഫോടക വസ്തുവെറിഞ്ഞുവെന്നത് സിപിഎമ്മിന്‍റെ തിരക്കഥയാണെന്നും കെ. മുരളീധരൻ പറഞ്ഞു. വിശ്വാസ സംരക്ഷണ ജാഥക്ക് നിലമ്പൂരിൽ നൽകിയ സ്വീകരണയോഗത്തിൽ പങ്കെടുക്കാൻ എത്തിയപ്പോൾ മാധ്യമ പ്രവർത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഷാഫി പറമ്പിൽ എംപിയുടെ മുക്കിന്‍റെ എല്ലിന് മാത്രമാണ് ഇപ്പോൾ പരിക്കേറ്റതെന്നും ശരീരത്തിനും പരിക്കേൽക്കുമെന്ന ഇ.പി. ജയരാജന്‍റെ പ്രസ്താവന കലാപത്തിനുള്ള ആഹ്വാനമാണ്. കോൺഗ്രസ് നേതാക്കളുടെയോ പ്രവർത്തകരുടെയോ ദേഹത്ത്തൊട്ടാൽ വിവരം അറിയുമെന്നും ടി.പി. രാമകൃഷ്ണനും ഇ.പി. ജയരാജനും കെ. മുരളിധരൻ മുന്നറിയിപ്പ് നൽകി. 75 വയസ് പിന്നിട്ട ഇ.പി. ജയരാജന് പാർട്ടി സ്ഥാനങ്ങൾ നഷ്ടമായതോടെ പിണറായി വിജയന്‍റെ കടാക്ഷം ലഭിക്കാനാണ് ഇത്തരം പ്രസ്താവനകൾ നടത്തുന്നത്. ഷാഫി പറമ്പിൽ എംപിക്ക് നേരേ നടന്ന പോലീസ് നടപടിയിൽ പാളിച്ച സംഭവിച്ചുവെന്ന റൂറൽ എസ്പിയുടെ പരാമർശം വന്നതോടെയാണ് സിപിഎം പോലീസിനെ ഭീഷണി പെടുത്തുന്ന അവസ്ഥയിലേക്ക് എത്തിയിരിക്കുന്നത്. ഷാഫി പറമ്പിൽ എംപിയെ മർദിച്ച പോലീസുകാർക്ക് എതിരേ നടപടി ഉണ്ടാകുന്ന വരെ യുഡിഎഫ് സമരം തുടരമെന്നും അദേഹം പറഞ്ഞു. കോൺഗ്രസ് സംസ്ഥാന പ്രസിഡന്‍റ് ജനീഷിന്‍റെ നേതൃത്വത്തിൽ ഒറ്റക്കെട്ടായി യൂത്ത്കോൺഗ്രസ് മുന്നോട്ട് പോകുമെന്നും അദ്ദേഹം പറഞ്ഞു.

ശബരിമലയെ കൊള്ളയടിച്ച പിണറായി സർക്കാർ കേരളത്തിന് അപമാനം: ദീപാദാസ് മുൻഷി

നിലമ്പൂർ: രാജ്യത്തിന് തന്നെ അഭിമാനമായ ശബരിമലയെ കൊള്ളയടിക്കുന്ന പിണറായി സർക്കാർ രാജ്യത്തിന് അപമാനമെന്ന്കേരളത്തിന്‍റെ ചുമതലയുള്ള എഐസിസി ജനറൽ സെക്രട്ടറി ദീപാ ദാസ് മുൻഷി. കെ. മുരളീധരൻ നയിക്കുന്ന വിശ്വാസ സംരക്ഷണയാത്രക്ക് നിലമ്പൂരിൽ നൽകിയ സ്വീകരണ യോഗം ഉദ്ഘാടനം ചെയ്തു സംസാരിക്കുകയായിരുന്നു അവർ. മുന്ന് തവണ ശരണം വിളിച്ച ശേഷമാണ് അവർ ഉദ്ഘാടന പ്രസംഗം ആരംഭിച്ചത്. സംസ്ഥാന സർക്കാറും. മന്ത്രിയും ദേവസ്വം ബോർഡും അറിയാതെ ഈ സ്വർണ കൊള്ള നടക്കില്ല. ദേവസ്വം വകുപ്പ് മന്ത്രി രാജി വയ്ക്കണമെന്നും അവർ ആവശ്യപ്പെട്ടു. ശബരിമലയിലെ സ്വര്‍ണ കവർച്ച ഹൈക്കോടതി മേല്‍നോട്ടത്തില്‍ സിബിഐ അന്വേഷിക്കണമെന്ന് മുന്‍ കെപിസിസി പ്രസിഡന്‍റും. ജാഥാ ക്യാപ്റ്റനുമായ കെ. മുരളീധരന്‍ ആവശ്യപ്പെട്ടു. വിശ്വാസ സംരക്ഷണ ജാഥക്ക് നിലമ്പൂരില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം . പവിത്രമായ ശബരമലയില്‍ കൊള്ള നടത്താന്‍ കൂട്ട് നിന്ന ദേവസ്വം മന്ത്രി രാജിവയ്ക്കണമെന്നും ദേവസ്വം ബോര്‍ഡ് പിരിച്ചുവിടണമെന്നും കെ. മുരളീധരന്‍ ആവശ്യപ്പെട്ടു. ശബരമലയില്‍ സ്വര്‍ണ കൊള്ള മാത്രമല്ല ആചാര ലംഘനവും നടന്നിട്ടുണ്ട്. അയ്യപ്പനോട് കളിച്ചവര്‍ക്ക് തിരിച്ചടിയുണ്ടാവും. മുഖ്യമന്ത്രിക്ക് അയ്യപ്പന്‍റെ ശാപം കിട്ടിയിട്ടുണ്ടോയെന്ന് സംശയമുണ്ട്. ഭിന്ന ശേഷിക്കാര്‍ക്കെതിരേയും നീളം കുറഞ്ഞവര്‍ക്കെതിരേയും മുഖ്യമന്ത്രി നടത്തിയ പരാമര്‍ശം അതാണ് സൂചിപ്പിക്കുന്നത്. ദേവസം ബോർഡ് പണം ഉപയോഗിച്ച് സര്‍ക്കാര്‍ നടത്തിയ അയ്യപ്പ സംഗമം കോണ്‍ഗ്രസ് ആരോപിച്ചതു പോലെ നാടകമാണെന്ന് ഇപ്പോള്‍ എല്ലാവര്‍ക്കും ബോധ്യമായെന്നും കെ. മുരളീധരന്‍ പറഞ്ഞു. കാഞ്ഞങ്ങാട് നിന്ന് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്ത ജാഥക്കാണ് നിലമ്പൂരില്‍ സ്വീകരണം നല്‍കിയത്. എഐസിസി ജനറല്‍ സെക്രട്ടറി ദീപാ ദാസ് മുന്‍ഷി യോഗം ഉദ്ഘാടനം ചെയ്തു. ആര്യാടന്‍ ഷൗക്കത്ത് എംഎല്‍എ അധ്യക്ഷത വഹിച്ചു. ലീഗ് ദേശീയ ട്രഷറര്‍ പി.വി. അബ്ദുല്‍ വഹാബ് എംപി, ജാഥാ വൈസ് ക്യാപ്റ്റന്‍ ടി. സിദ്ദീഖ് എംഎല്‍എ, എ.പി. അനില്‍കുമാര്‍ എംഎല്‍എ ,ഡിസിസി പ്രസിഡന്‍റ് വി.എസ്. ജോയി, ജാഥാ മാനേജര്‍ പി.എം. നിയാസ്, ലീഗ് ജില്ലാ വൈസ് പ്രസിഡന്‍റ് ഇസ്മായീല്‍ മൂത്തേടം, ബാലകൃഷ്ണന്‍ പെരിയ, എന്‍ സുബ്രമണ്യന്‍, കെപിസിസി സെക്രട്ടറി കെ. പി. നൗഷാദലി,അജീഷ് എടാലത്ത്, എ ഗോപിനാഥ് എന്നിവർ സംസാരിച്ചു.

നിക്ഷേപ തട്ടിപ്പ് കേസില്‍ കോടികളുമായി മുങ്ങിയ പ്രധാന പ്രതി എടക്കര പോലീസിന്‍റെ പിടിയിലായി

എടക്കര : നിക്ഷേപകരെ കബളിപ്പിച്ച് കോടികളുമായി മുങ്ങിയ പ്രധാന നിക്ഷേപ തട്ടിപ്പ് കേസിലെ പ്രധാന പ്രതി കൊച്ചിയില്‍ എടക്കര പോലീസിന്‍റെ പിടിയിലായി. നെടുംപറമ്പില്‍ നിധി ലിമിറ്റഡ് സ്ഥാപന ഉടമ കൊച്ചി നെട്ടൂര്‍ പനങ്ങാട് ഐഎന്‍.റ്റിയുസി ജംഗ്ഷന്‍ ജോഹന്‍ ജോര്‍ജി ജെയിംസ് 39 നെയാണ് എടക്കര പോലീസ് കൊച്ചിയില്‍ നിന്നും അറസ്റ്റ് ചെയ്തത്. ഉയര്‍ന്ന പലിശ വാഗ്ദാനം ചെയ്ത് കോടികള്‍ നിക്ഷേപമായി സ്വീകരിച്ച് കാലാവധി എത്തിയിട്ടും പണം തിരികെ നല്‍കാതെ കബളിപ്പിച്ച കേസില്‍ എടക്കര പോലീസ് സ്റ്റേഷനില്‍ രജിസ്റ്റര്‍ ചെയ്ത കേസിലാണ് ഇയാളെ അറസ്റ്റ് ചെയ്തത്. തട്ടിപ്പ് നടത്തിയ ശേഷം മുബൈ ബംഗളൂരു, ഹൈദരാബാദ് എന്നിവിടങ്ങളില്‍ ഒളിവില്‍ കഴിഞ്ഞ് വരികയായിരുന്ന ജോഹാന്‍ രണ്ടുദിവസം മുന്‍പാണ് ഹൈദരാബാദില്‍ നിന്നും നെട്ടൂരിലുള്ള ഫ്‌ളാറ്റില്‍ എത്തിയത്. എടക്കര പോലിസ് രജിസ്റ്റര്‍ ചെയ്ത പത്ത് കേസുകളില്‍ മാത്രം മൂന്ന് കോടിയുടെ തട്ടിപ്പാണ് ഇയാള്‍ നടത്തിയിട്ടുള്ളത്. രണ്ടുമാസം മുമ്പ് സ്ഥാപനത്തിന്‍റെ ചുങ്കത്തറ ബ്രാഞ്ച് മാനേജര്‍ സി.എ. മാത്യുവിനെ എടക്കര പോലീസ് അറസ്റ്റ് ചെയ്തിരുന്നു. ഇതോടെ കൊച്ചിയിലെ ആഡംബര കോര്‍പറേറ്റ് ഓഫീസ് (നെഡ് സ്റ്റാര്‍) എന്ന പേരില്‍ ഉള്ള ഓഫീസ് പൂട്ടി മുങ്ങിയ ഉടമ ജോഹന്‍ ജോര്‍ജി ജെയിംസ് മുന്‍കൂര്‍ ജാമ്യത്തിനായി ഹൈ കോടതിയെ സമീപിച്ചെങ്കിലും കോടതി ജാമ്യം നിഷേധിച്ചു. ജില്ലാ പോലീസ് മേധാവി ആര്‍. വിശ്വനാഥിന്‍റെ നിര്‍ദേശ പ്രകാരം നിലമ്പൂര്‍ ഡിവൈഎസ്പി സാജു കെ. എബ്രഹാം, എടക്കര ഇന്‍സ്‌പെക്ടര്‍ കമറുദ്ധീന്‍ വള്ളിക്കാടന്‍ എന്നിവരുടെ നേതൃത്വത്തിലുള്ള അഞ്ചംഗ സംഘം എറണാംകുളത്ത് ക്യാമ്പ് ചെയ്ത് നടത്തിയ അന്വേഷണത്തിലാണ് പ്രതി പിടിയിലായത്. എസ്.ഐമാരായ എം. അസൈനാര്‍, എസ് സതീഷ്‌കുമാര്‍, എ.എസ്.ഐ ഷീജ, സീനിയര്‍ സിപിഒ വി. അനൂപ്, സിപിഒ നജ്മുദീന്‍ മുണ്ടേരി, പനങ്ങാട് എസ്ഐ മുനീര്‍, സിപിഒ ശ്രീജേഷ് എന്നിവരടങ്ങിയ സംഘമാണ് കൊച്ചി നെട്ടൂര്‍ പള്ളിക്ക് സമീപത്തു നിന്നും പ്രതിയെ സഹസികമായി പിടികൂടിയത്. അന്‍പതിനായിരം രൂപ വാടകയുള്ള ഫെെറ്റില്‍ നിന്നും പ്രതിയുടെ മൊബൈല്‍ ഫോണുകളും, ലാപ്‌ടോപ്പുകളും, പ്രതി ഉപയോഗിച്ചിരുന്ന എടിഎം, ക്രെഡിറ്റ്, ഡെബിറ്റ് ഇന്‍റര്‍നാഷണല്‍ കാര്‍ഡുകളും, കാറും പോലീസ് കസ്റ്റഡിയില്‍ എടുത്തു. ജോഹന്‍റെ പിതാവടക്കമുള്ള കൂട്ട് പ്രതികള്‍ വിദേശത്തേക്ക് കടന്നതായും വിവരം ലഭിച്ചിട്ടുണ്ട്. ജില്ലയില്‍ എടക്കര പോലീസ് സ്റ്റേഷന് പുറമെ നിലമ്പൂര്‍, വഴിക്കടവ്, പോത്തുകല്‍, എടവണ്ണ പോലീസ് സ്റ്റേഷനുകളിലും സമാന കേസുകള്‍ രജിസ്റ്റര്‍ ചെയ്തിട്ടുണ്ട്. പ്രതിയെ നിലമ്പൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു. സംസ്ഥാനത്തെ മറ്റ് പോലീസ് സ്റ്റേഷനുകളില്‍ രജിസ്റ്റര്‍ ചെയ്ത കേസുകളില്‍് പ്രതിയെ പോലീസ് കസ്റ്റഡിയില്‍ വാങ്ങി തെളിവെടുപ്പ് നടത്തും.

ലോകഹൃദയ പുനരുജീവന ദിനാഘോഷം നടത്തി

പെരിന്തൽമണ്ണ: ലോക ഹൃദയ പുനരു ജീവന ദിനമായ ഒക്ടോബർ 16ന് മൗലാന ആശുപത്രിയിൽ വിവിധ ആരോഗ്യ ബോധവൽക്കരണ ക്ലാസുകൾ നടത്തി. പൊതുജനങ്ങൾക്കായി ഒരുക്കിയ സി.പി. ആർ ട്രെയിനിങ് ബൂത്തിന്‍റെ ഔപചാരികമായ ഉദ്ഘാടനം പെരിന്തൽമണ്ണ മുൻസിപ്പൽ ചെയർമാൻ. പി. ഷാജി ഉദ്ഘാടനം നിർവഹിച്ചു. കാലത്ത് 8:00 മണി മുതൽ ഉച്ചയ്ക്ക് ഒരു മണിവരെ പൊതുജനങ്ങൾക്കായി നടത്തിയ സിപിആർ പരിശീലന പരിപാടിയിൽ ഇരുന്നൂറിലധികം പേർ പങ്കെടുത്ത് സിപിആർ പരിശീലനം നേടി. പരിപാടികൾക്ക് മൗലാന ആശുപത്രി ചീഫ് ഓപറേഷൻ ഓഫീസർ ഓഫീസർ രാംദാസ്, മാനേജർ- മൗലാന ഗ്രൂപ്പ് ഓഫ് കമ്പനീസ് വിനു. കെ, മാർക്കറ്റിംഗ് ഓഫീസർമാരായ പ്രകാശ്, ഫൈസൽ, നൗഫൽ, സന്തോഷ് എന്നിവർ നേതൃത്വം നൽകി.മൗലാന അനസ്ത്യോളജിസ്റ്റ് ഡോ.ശശനിധരൻ ക്ളാസെടുത്തു.

അസ്ഥികൂടം : പോലീസ് അന്വേഷണം തുടങ്ങി

മഞ്ചേരി : ചെരണിയിൽ കെട്ടിടത്തിന്‍റെ ടെറസിനു മുകളിൽ രണ്ട് മാസത്തോളം പഴക്കമുള്ള പുരുഷന്‍റെ അസ്ഥികൂടം കണ്ടെത്തിയ സംഭവത്തിൽ പോലീസ് അന്വേഷണം തുടങ്ങി. കെട്ടിടത്തിൽ താമസിച്ചിരുന്നവരെയും സമീപത്തെ പ്രദേശങ്ങളിലെ അതിഥി തൊഴിലാളികളെയും കഴിഞ്ഞ ദിവസം ചോദ്യം ചെയ്യുന്നു. അന്വേഷണത്തിനായി പ്രത്യേക സംഘം രൂപീകരിക്കും. മെഡിക്കൽ കോളജ് മോർച്ചറിയിലേക്ക് മാറ്റിയ അസ്ഥികൂടത്തിന്‍റെ ഫൊറൻസിക് പരിശോധന തുടങ്ങിയിട്ടില്ല. അസ്ഥികൂടം പ്രത്യേക ലായനി ഉപയോഗിച്ചു കഴുകി വൃത്തിയാക്കിയ ശേഷമായിരിക്കും പരിശോധന തുടങ്ങുക. നിലവിൽ വെള്ളത്തിൽ സൂക്ഷിച്ചിരിക്കുകയാണ്. അസ്ഥികളിൽ എന്തെങ്കിലും പരുക്കുണ്ടോ, ഡിഎൻഎ പരിശോധന ആവശ്യമാണോ തുടങ്ങിയവ അറിയാൻ ശാസ്ത്രീയ പരിശോധന നടത്തണമെന്ന് ഫൊറൻസിക് അധികൃതർ പറഞ്ഞു. ചെരണി പ്ലൈവുഡ് റോഡിനു സമീപത്തെ കെട്ടിടത്തിന്‍റെ ടെറസിലാണ് ചൊവ്വ വൈകിട്ട് എട്ടരയോടെ അസ്ഥികൂടം കണ്ടെത്തിയത്.

പ്രായപൂര്‍ത്തിയാവാത്ത പെണ്‍കുട്ടിയെ ലോഡ്ജിലെത്തിച്ച് പീഡിപ്പിച്ച കേസില്‍ ഒരാള്‍ കൂടി അറസ്റ്റില്‍

പെരിന്തല്‍മണ്ണ: പ്രായപൂര്‍ത്തിയാവാത്ത പെണ്‍കുട്ടിയെ ലോഡ്ജിലെത്തിച്ച് പീഡിപ്പിച്ച കേസില്‍ ഒത്താശ ചെയ്ത ഒരാള്‍ കൂടി അറസ്റ്റില്‍. പെരിന്തല്‍മണ്ണയിലെ ലോഡ്ജ് നടത്തിപ്പുകാരനെയാണ് കുട്ടികള്‍ക്കെതിരേയുള്ള ലൈംഗിക കുറ്റകൃത്യങ്ങളില്‍ നിന്നുള്ള സംരക്ഷണ നിയമപ്രകാരം അറസ്റ്റ് ചെയ്തത്. പ്രായപൂർത്തിയാവാത്ത പെൺകുട്ടിയെ മാതാവിന്‍റെ സഹായത്തോടെ പ്രലോഭിപ്പിച്ച് ലോഡ്ജ് മുറിയിൽ എത്തിച്ച് ലൈംഗികമായി പീഡിപ്പിച്ച കേസില്‍ ഒരാളെ കൂടി പോലീസ് അറസ്റ്റ് ചെയ്തു. ലോഡ്ജ് നടത്തിപ്പുകാരനായ താഴേക്കോട് സ്വദേശി കുന്നപ്പള്ളി വീട്ടിൽ അൻഷാദ് (33) എന്നയാളെയാണ് പെരിന്തൽമണ്ണ ഡിവൈഎസ്പി എ. പ്രേംജിത്തിന്‍റെ നേതൃത്വത്തില്‍ പ്രത്യേക അന്വേഷണസംഘം അറസ്റ്റ് ചെയ്തത്. ഈ കേസില്‍ മുഖ്യപ്രതികളായ കുട്ടിയുടെ മാതാവുള്‍പ്പടെ രണ്ടുപേരെ നേരത്തേ അറസ്റ്റ് ചെയ്തിരുന്നു. ഇവർ റിമാൻഡിൽ ആണ്. പെൺകുട്ടിയെ പല ദിവസങ്ങളിലായി പ്രലോഭിപ്പിച്ച് ലോഡ്ജിലെത്തിക്കുകയും പീഡനത്തിനിരയാക്കുകയും ചെയ്തതായി പെൺകുട്ടി പരാതിയില്‍ പറഞ്ഞിരുന്നു. പ്രതികളെ കൂടുതൽ അന്വേഷണത്തിന്‍റെ ഭാഗമായി പെരിന്തൽമണ്ണ ഡിവൈഎസ്പിയുടെ നേതൃത്വത്തിലുള്ള പ്രത്യേക അന്വേഷണസംഘം കഴിഞ്ഞദിവസം കസ്റ്റഡിയിലെടുത്തിരുന്നു കൂടുതൽ ചോദ്യം ചെയ്തതിലാണ് പെരിന്തൽമണ്ണ മാനത്തുമംഗലം ബൈപ്പാസ് ജംഗ്ഷനിലുള്ള ലോഡ്ജിലെ മാനേജരും നടത്തിപ്പുകാരനുമായ അൻഷാദ് എന്നയാളെ അറസ്റ്റ് ചെയ്തത്. പ്രായപൂര്‍ത്തിയാവാത്ത പെണ്‍കുട്ടിയെ പ്രതി ലോഡ്ജിലേക്ക് കൂട്ടിക്കൊണ്ടുവന്ന സമയത്ത് തിരിച്ചറിയല്‍രേഖകള്‍ വാങ്ങാതെയും പരിശോധിക്കാതെയും റൂം കൊടുക്കുകയും പ്രതിക്ക് സഹായം ചെയ്തുകൊടുക്കുകയും ചെയ്തതായി പ്രാഥമിക അന്വേഷണത്തില്‍ തന്നെ പോലീസ് സംഘത്തിന് ബോധ്യപ്പെട്ടിരുന്നു. കുട്ടികള്‍ക്കെതിരേയുള്ള ലൈംഗിക കുറ്റകൃത്യങ്ങളില്‍ നിന്നുള്ള സംരക്ഷണ നിയമവും ഭാരതീയന്യായസംഹിത വകുപ്പുകളുമാണ് പ്രതിയ്ക്കെതിരേ ചുമത്തിയിട്ടുള്ളത്. പ്രതിയെ പെരിന്തല്‍മണ്ണ കോടതിയില്‍ ഹാജരാക്കി. പെരിന്തല്‍മണ്ണ ടൗണിലും പരിസരങ്ങളിലുമുള്ള ലോഡ്ജുകളിലും റിസോര്‍ട്ടുകളിലും പോലീസ് പരിശോധന ശക്തമായിതന്നെ തുടരുമെന്നും തിരിച്ചറിയല്‍ രേഖകള്‍ വാങ്ങാതെ നിയമവിരുദ്ധപ്രവര്‍ത്തനങ്ങളിലേര്‍പ്പെടാന്‍ സഹായം ചെയ്യുന്ന ലോഡ്ജ് നടത്തിപ്പുകാരുടെ പേരില്‍ കര്‍ശനനടപടികള്‍ സ്വീകരിക്കുമെനനും പെരിന്തല്‍മണ്ണ ഡിവൈസ്പി എ. പ്രേംജിത്ത് അറിയിച്ചു.

അങ്കണവാടി കലോത്സവം സംഘടിപ്പിച്ചു

എടക്കര: ചുങ്കത്തറ ഗ്രാമപഞ്ചായത്തിന്‍റെ ആഭിമുഖ്യത്തില്‍ അങ്കണവാടി കലോത്സവം സംഘടിപ്പിച്ചു. വിടരും മൊട്ടുകള്‍ എന്ന പേരില്‍ സംഘടിപ്പിച്ച കലോത്സവത്തില്‍ പഞ്ചായത്തിലെ 32 അങ്കണവാടികളില്‍ നിന്നുള്ള കുരുന്നുപ്രതിഭകള്‍ പങ്കാളികളായി. ഗ്രാമപഞ്ചായത്ത് പ്രസിഡന്‍റ് വത്സമ്മ സെബാസ്റ്റ്യന്‍ കലോത്സവം ഉദ്ഘാടനം ചെയ്തു. വൈസ് പ്രസിഡന്‍റ് സൈനബ മാമ്പള്ളി അധ്യക്ഷത വഹിച്ചു. പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ബിന്ദു സത്യന്‍, ബ്ലോക്ക് പഞ്ചായത്ത് അംഗം സീനത്ത് നൗഷാദ്, പഞ്ചായത്തംഗങ്ങളായ ഷാജഹാന്‍ ചേലൂര്‍, കെ.പി. സക്കീന, നിഷിദ മുഹമ്മദലി, ബുഷ്‌റ, സി.എം. ചന്ദ്രന്‍, എം. രതീഷ്, മുജീബ് തറമ്മല്‍, അങ്കണവാടി അധ്യാപികമാരായ രുഗ്മിണി, കെ. റഹിയാനത്ത് എന്നിവര്‍ സംസാരിച്ചു.

കാളികാവിൽ ഹരിതം കിസാൻ മേള സംഘടിപ്പിച്ചു

കാളികാവ് : കാർഷിക വിജ്ഞാന പൊലിമ തീർത്ത് കാളികാവിൽ ഹരിതം കിസാൻ മേള സംഘടിപ്പിച്ചു. കാർഷിക വികസന കർഷക ക്ഷേമ വകുപ്പിന്‍റെയും കാളികാവ് ബ്ലോക്ക് പഞ്ചായത്തിന്‍റെയും സംയുക്താഭിമുഖ്യത്തിലാണ് ഹരിതം കിസാൻ മേള സംഘടിപ്പിച്ചത്. കാളികാവ് വി.പി. ആർക്കേഡിൽ നടന്ന മേള ബ്ലോക്ക് പഞ്ചായത്ത് പ്രസിഡന്‍റ് കെ. തങ്കമ്മു ഉദ്ഘാടനം ചെയ്തു. രണ്ട് ദിവസത്തെ കാർഷിക വിജ്ഞാന വ്യാപന പ്രദർശന വിപണന മേളയാണ് സംഘടിപ്പിച്ചത്. ഉദ്ഘാടനത്തിന് മുന്നോടിയായി, കർഷകരും ജനപ്രതിനിധികളും ഉദ്യോഗസ്ഥരും കുടുംബശ്രീ പ്രവർത്തകരും ചേർന്ന്, കാളികാവ് ബസ്സ് സ്റ്റാൻഡ് ജംഗ്ഷൻ മുതൽ മേള നഗരിവരെ, വാദ്യാഘോഷങ്ങളോടെ വിളംബര ഘോഷയാത്രയും സംഘടിപ്പിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് നസീമ ബീഗം അധ്യക്ഷത വഹിച്ചു. കാർഷിക സെമിനാറിൽ, ‘ഭക്ഷ്യ സംസ്ക്കരണം’ എന്ന വിഷയത്തിൽ വണ്ടൂർ സർക്കിൾ ഭക്ഷ്യ സുരക്ഷാ ഓഫീസർ ജസീല ഷുക്കൂർ ക്ലാസെടുത്തു. ഹൈസ്കൂൾ വിദ്യാർഥികൾക്കായി നടത്തിയ പ്രശ്നോത്തരി മത്സരത്തിൽ അഞ്ചച്ചവിടി ഗവ. ഹൈസ്കൂളിലെ പി.കെ. നിഷാൻ, മുഹമ്മദ് റയാൻ എന്നിവർ ഒന്നാംസ്ഥാനം നേടി. തുവ്വൂർ ജിഎച്ച്എസിലെ ടി.പി. മുഹമ്മദ് അഫ്നാൻ , പി.എം. പ്രവീൺ ദാസ്. എന്നിവർ രണ്ടും വെള്ളിയഞ്ചേരി എഎസ്എം ഹൈസ്കൂളിലെ പി.കെ. ഫൈഹ, കെ.കെ. മർവ്വഷെറിൻ എന്നിവർ മൂന്നാം സ്ഥാനവും നേടി. കൃഷി ഡെപ്യൂട്ടി ഡയറക്ടർ മിനി ജോസഫ്, കാളികാവ് ബ്ലോക്ക് പഞ്ചായത്ത് ക്ഷേമ കാര്യ സ്ഥിരം സമിതി അധ്യക്ഷൻ എം. ലത്തീഫ്. ബ്ലോക്ക് പഞ്ചായത്ത് ആരോഗ്യകാര്യ സ്ഥിരം സമിതി അധ്യക്ഷ റഫീഖ മറ്റത്തൂർ, കാളികാവ് ബ്ലോക്ക് പഞ്ചായത്ത് അംഗങ്ങളായ പി. ശ്രീജ , സിബി വർഗീസ്, കെ. രാജൻ, പി.കെ. ഷൈലേഷ്, കൃഷി അസിസ്റ്റന്‍റ് ഡയറക്ടർ എസ്. സുധ, കാളികാവ് കൃഷി ഓഫീസർ വി.എം. സമീർ തുടങ്ങിയവർ പ്രസംഗിച്ചു.

പെരിന്തൽമണ്ണ നഗരസഭയിൽ സീറോ റാബീസ് കാമ്പയിന് തുടക്കമായി

പെരിന്തൽമണ്ണ:"പേവിഷ വിമുക്ത പെരിന്തൽമണ്ണ' എന്ന ലക്ഷ്യം മുൻനിർത്തി പെരിന്തൽമണ്ണ നഗരസഭ 2025-26 വാർഷിക പദ്ധതിയിൽ നടപ്പിലാക്കുന്ന തെരുവുനായ്ക്കൾക്കുള്ള പേവിഷ പ്രതിരോധകുത്തി വയ്പ് കാമ്പയിന് തുടക്കമായി. നഗരസഭ ചെയർപേഴ്സൺ പി. ഷാജി കാമ്പയിൻ ഉദ്ഘാടനം ചെയ്തു.സീനിയർ വെറ്ററിനറി സർജൻ ഡോ. മുജീ ബ്റഹിമാൻ, ഡോ.അഖിൽ, ലൈവ്സ്റ്റോക്ക് ഇൻസ്‌പെക്ടർ ശ്രീ. ബിനോയ്‌. വി എന്നിവർ നേതൃത്വം നൽകി. പരിശീലനം ലഭിച്ച ഡോഗ് കാച്ചർമാരുടെ സഹായത്തോടെയാണ് തെരുവുനായ്ക്കൾക്ക് കുത്തിവെയ്പ്പ് നൽകുന്നത്. നാല് ദിവസം കൊണ്ട് നഗരസഭ പരിധിയിലെ എല്ലാ തെരുവു നായ്ക്കൾക്കും വാക്സിനേഷൻ നൽകുമെന്ന് ചെയർപേഴ്സൺ പി.ഷാജി പറഞ്ഞു.

ജീവിതോത്സവം 2025 ന് സമാപനമായി

എടക്കര: പൊതുവിദ്യാഭ്യാസ വകുപ്പിന്‍റെ ആഭിമുഖ്യത്തില്‍ ചുങ്കത്തറ മര്‍ത്തോമ ഹയര്‍ സെക്കന്‍ഡറി സ്‌കൂളിലെ നാഷനല്‍ സര്‍വീസ് സ്‌കീം സംഘടിപ്പിച്ച ജീവിതോത്സവം 2025 ന് സമാപനമായി. "അനുദിനം കരുത്തരാകാം കരുതലേകാം' എന്ന മുദ്രാവാക്യം ഉയര്‍ത്തി വ്യത്യസ്ത പ്രവര്‍ത്തനങ്ങളിലൂടെ എന്‍എസ്എസ് നടപ്പിലാക്കുന്ന 21 ദിന ചലഞ്ചാണ് ജീവിതോത്സവം 2025. സെപ്റ്റംബര്‍ 24 ന് തുടക്കം കുറിച്ച കാമ്പയിനില്‍ അറിയാം രാജ്യത്തിന്‍റെ ഭരണഘടന, അറിഞ്ഞും പറഞ്ഞും അതിജീവന കഥകള്‍, ഏകദിന ഡിജിറ്റല്‍ ഉപവാസം, ലഹരി വിരുദ്ധ ചിത്ര മതില്‍, മധുര മനോഹര ലോകത്തിനായ് ഞങ്ങളുണ്ട്, വയോജനങ്ങള്‍ക്കായ് ഒരുക്കാം ആഹ്ലാദ ചുവടുകള്‍, പുസ്തകത്തിന്‍റെ ആത്മാവ് തേടി തുടങ്ങി 21 പ്രവര്‍ത്തനങ്ങളാണ് ഓരോ ദിവസങ്ങളിലായി സംഘടിപ്പിച്ചത്. സ്‌കൂള്‍ ഓഡിറ്റോറിയത്തില്‍ നടന്ന സമാപന ചടങ്ങ് പിടിഎ പ്രസിഡന്‍റ് പി.ബി. സുഭാഷ് ഉദ്ഘാടനം ചെയ്തു. പ്രിന്‍സിപ്പല്‍ ഉമ്മന്‍ മാത്യു അധ്യക്ഷത വഹിച്ചു. ക്ലസ്റ്റര്‍ കോഡിനേറ്റര്‍ പ്രദീപ് ബാബു, പ്രോഗ്രാം ഓഫീസര്‍ എല്‍. ബിജുമോന്‍, പിടിഎ വൈസ് പ്രസിഡന്‍റ് സി. പ്രദീപ്, വോളന്‍റിയര്‍ തീർഥ, നദ പര്‍വീന്‍, നിദ ഷെറിന്‍ എന്നിവര്‍ സംസാരിച്ചു.

ബോധവത്കരണ ക്ലാസ് നടത്തി

പെരിന്തൽമണ്ണ: പെരിന്തൽമണ്ണ ലയൻസ് ക്ലബും മലപ്പുറം ജില്ല ലേഡി സർക്കിളും സംയുക്തമായി പ്രസന്‍റേഷൻ ഹയർ സെക്കൻഡറി സ്കൂളിൽ പെരിന്തൽമണ്ണ പ്ലസ് വൺ വിദ്യാർഥികൾക്ക് മാനസിക ആരോഗ്യ ബോധവത്കരണ ക്ലാസ് സംഘടിപ്പിച്ചു. മാനസിക സംഘർഷങ്ങൾ എങ്ങനെ ലഖുക്കരിക്കാം എന്ന് പ്രാക്റ്റിക്കൽ എക്സ്പീരിയൻസിലൂടയും, മെഡിറ്റേഷൻ, വ്യായാമങ്ങൾ തുടങ്ങി വിവിധ മേഖലകളിലൂടെ പ്രശസ്ത മനഃശാസ്ത്ര വിദക്ധനും മെന്‍റൽ ഹെൽത്ത്‌ ഡിസ്ട്രിക്റ്റ് കോർഡിനേറ്ററും ആയ ലയൺ ഡോ രജിത് വിശദീകരിച്ചു. സ്കൂൾ പ്രിൻസിപ്പൽ സിസ്റ്റർ ജസ്മി തോമസ് അധ്യക്ഷത വഹിച്ച ചടങ്ങ് ഡിസ്ട്രിക്റ്റ് ലേഡി സർക്കിൾ പ്രസിഡന്‍റ് ലയൺ ഫെമി വിജി ഉദ്ഘാടനം ചെയ്തു, ലേഡി സർക്കിൾ ട്രഷറര്‍ ലയൺ മേഖ അനൂപ്, ഡയബേറ്റിക് ഡിസ്ട്രിക്റ്റ് കോർഡിനേറ്റർ ലയൺ ഡോ കൊച്ചു എസ് മണി, റീജിയൻ ചെയർമാൻ ലയൺ ഡോക്ടർ നഈമു റഹുമാൻ, സോൺ ചെയർമാൻ ലയൺ അനൂപ്, ഡിസ്ട്രിക്റ്റ് എഡിറ്റർ ലയൺ ഓ കെ റോയി, ക്ലബ്‌ പ്രസിഡന്‍റ് ലയൺ വർ‌ഗീസ് തെക്കേ കൂട്ട് , ലയൺ വിജി, ലയൺ ലൈസ ജോസ്, ലേഡി സർക്കിൾ സെക്രട്ടറി ലയൺ ഷീജ റോയി എന്നിവർ ആശംസ അർപ്പിച്ചു.

തിരിച്ചടിയായി നേന്ത്രക്കാവിലയിടിവ് : ഇറക്കുമതിയും ഉത്പാദന വർധനവും കർഷകർക്ക് വിനയായി

കരുവാരകുണ്ട്: നേന്ത്രക്കാവിലയിടിവിൽ മനംനൊന്ത് മലയോര കർഷകർ. അടുത്ത കാലത്തൊന്നും അനുഭവപ്പെടാത്ത വിലത്തകർച്ചയാണ് ഇന്ന് നേന്ത്രക്കാക്ക് അനുഭവപ്പെടുന്നത്. വില തകർച്ചയെ തുടർന്ന് മുടക്കുമുതൽ പോലും ലഭിക്കില്ലന്നാണ് കർഷകർ പറയുന്നത്. ഉത്പാദനം വർധിച്ചതും ഇതര സംസ്ഥാനങ്ങളിൽ നിന്നും കേരളത്തിലേക്കുള്ള നേന്ത്രക്കാ ഇറക്കുമതിയുമാണ് കർഷകർക്ക് വിനയായത്. കഴിഞ്ഞ ഓണത്തിനു മുമ്പ് ഒരു കിലോ നേന്ത്രക്കാക്ക് 50 മുതൽ 55 രൂപ വരെ വില ലഭിച്ചിരുന്നു.എന്നാൽ ഇന്ന്അതേ സ്ഥാനത്ത് മുന്തിയ ഇനം നേന്ത്രക്കാ ഒരു കിലോക്ക് 18 രൂപാ പ്രകാരമാണ് കർഷകരിൽ നിന്നും വ്യാപാരികൾ ശേഖരിക്കുന്നത്. എന്നാൽ ഇത് വില്ക്കുന്നത് 50 രൂപക്കും. ചില ദിവസങ്ങളിൽ ഈ വിലക്കും വാങ്ങാൻ വ്യാപാരികൾ തയാറാകുന്നില്ല. അമിതകൂലി നൽകി നഷ്ടം സഹിച്ച് പ്രതികൂല കാലാവസ്ഥയെ തരണം ചെയ്ത് വാഴകൃഷി നടത്തി വിളവെടുപ്പ് തുടങ്ങിയപ്പോൾ നേന്ത്രക്കാക്ക് ഉല്പാദന ചിലവു പോലും ലഭിക്കാത്ത സാഹചര്യത്തിലായതോടെ കർഷകർ വൻ സാമ്പത്തിക പ്രതിസന്ധിയിലായെന്ന് കർഷകർ ചൂണ്ടി കാട്ടുന്നു. ഇതേത്തുടർന്ന് കൃഷി വകുപ്പ് കർഷകർക്ക് നഷ്ടപരിഹാരം നൽകണമെന്ന ആവശ്യവുമായി വിവിധ കർഷക സംഘടനകളും രംഗത്ത് വന്നിട്ടുണ്ട്. പ്രതികൂല സാഹചര്യങ്ങളെ തരണം ചെയ്ത് വാഴ കൃഷി നടത്തുകയും അതിന്‍റെ വിളവെടുപ്പ് തുടങ്ങിയപ്പോൾ തന്നെ മാന്യമായ വിലക്ക് ഉത്പന്നം വിറ്റഴിക്കാൻ കർഷകർക്കാകുന്നില്ല. നേന്ത്രക്കാ വാങ്ങാൻ ആളില്ലാതായതിനെ തുടർന്ന് കർഷകർ നേന്ത്രകുലകൾ മലയോര ഗ്രാമങ്ങളിലെ റോഡരികിൽ കൂട്ടിയിട്ട് തുച്ഛമായ വിലക്ക് പൊതുജനങ്ങൾക്ക് വില്പന നടത്തുന്നവരെയും കാണാം. ഇപ്പോഴത്തെ വില തകർച്ച കർഷകരെ കടുത്ത സാമ്പത്തിക പ്രതിസന്ധിയിലാക്കുന്നു. കനത്ത മഴയെത്തുടർന്ന് തൊഴിലവസരങ്ങൾ നഷ്ടപ്പെട്ട സാധാരണ ജനങ്ങളും തൊഴിലാളികളും സാമ്പത്തിക ഞെരുക്കത്തിലായതാണ് നേന്ത്ര പഴ വിപണിയിൽ മാന്ദ്യം സൃഷ്ടിക്കാൻ മറ്റൊരു കാരണമായി വ്യാപാരികൾ ചൂണ്ടി കാട്ടുന്നത്. കാലവർഷത്തിൽ അനുഭവപ്പെട്ട കാറ്റിലും മഴയിലും വൻതോതിൽ നേന്ത്ര വാഴകൃഷി നശിച്ചിരുന്നു. രാസവളത്തിന്‍റെയും മറ്റും വില വർധനവിനെ തുടർന്ന് മലയോര ജനത വൻ തുക ചിലവഴിച്ചാണ് നേന്ത്രവാഴ കൃഷിയിൽ ഏർപ്പെടുന്നത്. കാട്ടാന, കാട്ടുപന്നി, കാട്ടുപോത്ത്, വാനരപട തുടങ്ങിയ വന്യജീവികൾ കൃഷിക്കാർക്ക് ഇന്ന് പേടി സ്വപ്നമാണ്. ഇവയുടെ ശല്യത്തിൽ നിന്നും കൃഷിയെ സംരക്ഷിക്കാൻ രാവും പകലും കാവലിരുന്നാണ് കർഷകർ വാഴ കൃഷിയെ സംരക്ഷിക്കുന്നത്. ഇതിനു തന്നെ വൻ തുക ചിലവഴിക്കണം. വാഴ തോട്ടത്തിനു ചുറ്റും താത്ക്കാലിക സൗരോർജ വേലി നിർമിച്ചാലും കാട്ടാനകൾ നിമിഷ നേരം കൊണ്ട് നാശം വരുത്തുമെന്നും കർഷകർ പറയുന്നു. പാട്ടത്തിന് സ്ഥലമെടുത്ത് വാഴകൃഷി നടത്തുന്നവരാണ് ഭൂരിപക്ഷവും.

ക്രസന്‍റ് സ്കൂൾ ചാന്പ്യൻമാർ

വണ്ടൂർ: വണ്ടൂർ ഉപജില്ലാ ശാസ്ത്രോത്സവത്തിൽ 1022 പോയിന്േ‍റാടെ കാളികാവ് അടക്കാക്കുണ്ട് ക്രസന്‍റ് ഹയർ സെക്കൻഡറി സ്കൂൾ ചാന്പ്യൻമാരായി. 661 പോയിന്‍റുമായി വണ്ടൂർ വിഎംസി ആണ് രണ്ടാം സ്ഥാനത്ത്. 616 പോയിന്േ‍റാടെ എഎച്ച്എസ് പാറൽ മന്പാട്ടുമൂല മൂന്നാംസ്ഥാനം കരസ്ഥമാക്കി. സമാപന ചടങ്ങ് ജില്ലാ പഞ്ചായത്ത് അംഗം കെ.ടി. അജ്മൽ ഉദ്ഘാടനം ചെയ്തു. പോരൂർ ഗവണ്‍മെന്‍റ് ഹയർ സെക്കൻഡറി സ്കൂളിലും ചെറുകോട് കഐംഎംഎ, എയുപിഎസിലും റോസ് ഹിൽ ഓഡിറ്റോറിയത്തിലുമായി മൂന്ന് ദിവസങ്ങളിലാണ് മേള നടന്നത്. ചടങ്ങിൽ ഗ്രാമപഞ്ചായത്ത് പ്രസിഡന്‍റ് എൻ. മുഹമ്മദ് ബഷീർ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ടി.പി. സക്കീന, ബ്ലോക്ക് അംഗം വി.ശിവശങ്കരൻ, പഞ്ചായത്ത് അംഗങ്ങളായ ഗിരീഷ് കാലടി, പി.കെ. ഭാഗ്യലക്ഷ്മി, പി. അൻവർ, പി. ശങ്കരനാരായണൻ, പി. സുലൈഖ, ഡിഇഒ വി. അനിത, എഇഒ കെ. പ്രമാനന്ദ്, ബിപിസി ഷൈജി ടി.മാത്യു, എച്ച്എം ഫോറം കണ്‍വീനർ സി.കെ. ജയരാജ് തുടങ്ങിയവർ പങ്കെടുത്തു.

കളഞ്ഞുകിട്ടിയ പണം ഉടമസ്ഥന് നൽകി യുവാക്കൾ മാതൃകയായി

രാമപുരം: കുറുവ കൂട്ടിലങ്ങാടി സ്വദേശിയായ ബൈക്ക് യാത്രികനിൽ നിന്ന് റോഡിൽ വീണ പണവും പഴ്സും ഉടമസ്ഥനെ കണ്ടെത്തി തിരിച്ചു നൽകി യുവാക്കൾ മാതൃകയായി. ദേശീയപാത രാമപുരം നാറാണത്ത് വച്ചാണ് കഴിഞ്ഞ ദിവസം വൈകിട്ട് പണവും പഴ്സും വിലപ്പെട്ട രേഖകളും റോഡിൽ കിടക്കുന്ന നിലയിൽ യുവാക്കൾക്ക് ലഭിച്ചത്. തുടർന്ന് വിലാസം അന്വേഷിച്ച് ഉടമസ്ഥനെ കണ്ടെത്തി തിരികെ നൽകി രാമപുരം സ്വദേശികളായ കിഴക്കേതിൽ അബ്ദുൾ സലീമും കളത്തുംപടിയൻ അബ്ദുൾകരീമും മാതൃകയായി. പെരിന്തൽമണ്ണയിൽ നിന്ന് തിരിച്ചുവരുന്പോഴാണ് ബൈക്കുക്കാരന്‍റെ പഴ്സ് റോഡിൽ വീണ് അതിലുണ്ടായിരുന്ന പണം റോഡിൽ ചിന്നിചിതറിയ നിലയിൽ സലീമിന്‍റെ ശ്രദ്ധയിൽപ്പെട്ടത്. മേൽവിലാസം അന്വേഷിച്ചപ്പോൾ പണം നഷ്ടപ്പെട്ട ആൾ കുറുവ കൂട്ടിലങ്ങാടി സ്വദേശിയാണെന്ന് അറിഞ്ഞപ്പോൾ ഉടൻ സുഹൃത്തിനു വിളിച്ചറിയിച്ചു. പിന്നീട് ഉടമസ്ഥനെ കണ്ടെത്തി അവ കൈമാറി.

എച്ച്എംസി രൂപീകരിക്കാൻ നഗരസഭയ്ക്ക് ആരോഗ്യവകുപ്പ് ഡയറക്ടറുടെ കത്ത്

മഞ്ചേരി : മഞ്ചേരി ജനറൽ ആശുപത്രിയിൽ എച്ച്എംസി രൂപീകരിക്കാൻ നഗരസഭക്ക് ആരോഗ്യ വകുപ്പ് ഡയറക്ടറുടെ കത്ത്. 2016ൽ ആശുപത്രിയുടെ നടത്തിപ്പ് ചുമതല നഗരസഭക്ക് വിട്ടു നൽകി സർക്കാർ ഉത്തരവുണ്ട്. ഇതനുസരിച്ച് ആശുപത്രിയിൽ എച്ച്എംസി രൂപീകരിക്കാവുന്നതാണ്. ഇനി മറ്റൊരു ഉത്തരവിന്‍റെ ആവശ്യം ഇല്ലെന്നും വ്യക്തമാക്കിയാണ് ആരോഗ്യവകുപ്പ് ഉത്തരവിറക്കിയത്. കത്തിന്‍റെ പകർപ്പ് മുൻസിപ്പൽ സെക്രട്ടറിക്കും കൈമാറി. എച്ച്എംസി രൂപീകരിക്കുന്നതിന് അനുമതി ഇല്ലാതിരുന്നതാണ് ആശുപത്രി ഏറ്റെടുക്കാതിരുന്നതെന്ന് ചൂണ്ടിക്കാട്ടി യുഡിഎഫ് നേതാക്കൾ സൂപ്രണ്ടിനെ ഉപരോധിച്ചിരുന്നു. ഇതേതുടർന്നാണ് ആരോഗ്യ വകുപ്പിന്‍റെ നടപടി. ഓഗസ്റ്റിൽ വിവിധ പദ്ധതികളുടെ ഉദ്ഘാടനം കഴിഞ്ഞിറങ്ങിയ മന്ത്രി വീണാജോർജ് 2016-ലെ സർക്കാർ ഉത്തരവ് എടുത്തുയർത്തി വായിച്ചു. ഉത്തരവ് പ്രകാരം സംസ്ഥാനത്തെ 15 ജനറൽ ആശുപത്രികളും അതത് തദ്ദേശ സ്ഥാപനങ്ങൾക്ക് കൈമാറി. അതിൽ പതിനൊന്നാമതായി മഞ്ചേരിയിലെ പാണക്കാട് മുഹമ്മദലി ശിഹാബ് തങ്ങൾ സ്മാരക ജനറൽ ആശുപത്രിയാണെന്നും മന്ത്രി വ്യക്തമാക്കിയിരുന്നു. ആ ഉത്തരവിൽപ്പെട്ട മറ്റ് 14 ജനറൽ ആശുപത്രികളും അതത് തദ്ദേശ സ്ഥാപനങ്ങൾ ഏറ്റെടുത്ത് പ്രവർത്തനം ആരംഭിച്ചു. എന്നാൽ മഞ്ചേരി നഗരസഭയും എംഎൽഎയും കഴിഞ്ഞ എട്ട് വർഷമായി തുടർനടപടി സ്വീകരിച്ചിരുന്നില്ല. എച്ച്എംസി രൂപീകരിക്കാൻ സർക്കാർ അനുമതി ലഭിച്ചില്ലെന്നായിരുന്നു നഗരസഭയുടെ വാദം. ഇതിനിടെയാണ് ആരോഗ്യ വകുപ്പ് വീണ്ടും ഉത്തരവിറക്കിയത്.

മാനസികരോഗ്യം : ശില്പശാല സംഘടിപ്പിച്ചു

പെരിന്തൽമണ്ണ : മാനസികാരോഗ്യ കാന്പയിന്‍റെ ഭാഗമായി നാഷണൽ സർവീസ് സൊസൈറ്റി സർവീസ് പ്രോവൈഡിംഗ് സെന്‍റർ, എൻഎസ്എസ് കമ്മ്യൂണിറ്റി കോളജ്, സിസിജിസി പ്രൊജക്ട് എന്നിവയുടെ ആഭിമുഖ്യത്തിൽ പെരിന്തൽമണ്ണ വ്യാപാരി ഭവൻ ഓഡിറ്റോറിയത്തിൽ ശില്പശാല നടത്തി. ഫാ. ജെ. വിക്ടർ ഉദ്ഘാടനം ചെയ്തു. മണ്ണാർക്കാട് എംഇഎസ് കോളജ് റിട്ടയേർഡ് പ്രിൻസിപ്പൽ ടി.ടി. സൈതലവി അധ്യക്ഷത വഹിച്ചു. റെയിൽവേ ഹോസ്പിറ്റൽ നഴ്സിംഗ് സൂപ്രണ്ട് സ്വപ്ന ശശിധരൻ, എൻഎസ്എസ് സ്റ്റേറ്റ് പ്രൊജക്ട്സ് സെൽ ചെയർമാൻ കെ.എം. ഫിറോസ് ഖാൻ, ഐസിഡിഎസ് കോഴിക്കോട് നോഡൽ ഓഫീസർ പി.എ. രാജേഷ്, ഡോ. പി. അനിത, കണ്‍സൾട്ടന്‍റ് സൈക്കോളജിസ്റ്റ് ശുഭശ്രീ രാമൻ, ക്ലിനിക്കൽ സൈക്കോളജിസ്റ്റ് മുനവിറ നസ് റിൻ എന്നിവർ വിഷയമവതരിപ്പിച്ചു. ശില്പശാലയിൽ മികച്ച അവതരണം നടത്തിയവരെ ആദരിച്ചു.

കാർ തെങ്ങിലിടിച്ച് അപകടം

നിലന്പൂർ:നിയന്ത്രണം വിട്ട കാർ തെങ്ങിൽ ഇടിച്ചു. യാത്രക്കാർ രക്ഷപ്പെട്ടു. നിലന്പൂർ - നായാടംപൊയിൽ മലയോര പാതയിൽ ഇടിവണ്ണ കരിന്പായിതണ്ടിൽ ചൊവ്വാഴ്ച രാത്രി പത്തുമണിയോടെയാണ് കാർ അപകടത്തിൽപ്പെട്ടത്. നിലന്പൂർ ഭാഗത്ത് നിന്ന് കക്കാടംപൊയിൽ ഭാഗത്തേക്ക് പോവുകയായിരുന്നു കാർ. റോഡിന് വളവുള്ള ഭാഗമാണിവിടെ. വളവിൽ നിയന്ത്രണം വിട്ട കാർ റോഡരികിലെ വൈദ്യുത തൂണിൽ ഇടിച്ച ശേഷം കുത്തനെയുള്ള ഭാഗത്തേക്ക് നീങ്ങുകയായിരുന്നു. തുടർന്ന് സമീപത്തെ കമുക് ഇടിച്ച് വീഴ്ത്തി തൊട്ടടുത്ത തെങ്ങിൽ ഇടിച്ചു നിൽക്കുകയായിരുന്നു. തെങ്ങാണ് രക്ഷയായി മാറിയത്. അല്ലെങ്കിൽ സമീപത്തെ കുറുവൻപുഴയുടെ പാറക്കെട്ടിലേക്ക് കാർ മറിയുമായിരുന്നു. വണ്ടൂർ സ്വദേശികളായ മൂന്ന് പേരാണ് കാറിലണ്ടായിരുന്നത്. ഇവിടെയുള്ള റോഡിൽ മുൻപരിചയമില്ലാത്തതിനാലാണ് അപകടം ഉണ്ടായതെന്നാണ് കരുതുന്നത്. കാറിൽ എയർബാഗ് ഉള്ളതിനാൽ യാത്രക്കാർ പരിക്കേൽക്കാതെ രക്ഷപ്പെട്ടു.

കിണറ്റിൽ വീണ പോത്തിനെ രക്ഷപ്പെടുത്തി

കരുവാരകുണ്ട്: വിരണ്ടോടി കിണറ്റിൽ വീണ പോത്തിനെ അഗ്നിരക്ഷാ സേന രക്ഷപ്പെടുത്തി. തുവൂർ വാരിയത്ത് ’ഉന്നതി’യിലെ രാമന്‍റെ പോത്താണ് കെട്ടിയിട്ട കയർ പൊട്ടിച്ച് വിരണ്ടോടി ഒരു കിലോമീറ്റർ അപ്പുറത്തുള്ള കൂരിക്കുന്നിലെ കിണറ്റിൽ വീണത്. വിവരമറിഞ്ഞെത്തിയ മഞ്ചേരി അഗ്നിരക്ഷാ സേനയാണ് പോത്തിനെ രക്ഷപ്പെടുത്തിയത്. രാമൻ മഞ്ചേരി കാലിച്ചന്തയിൽ നിന്ന് വാങ്ങിയ പോത്തിനെ ഉച്ചയ്ക്ക് 12 ഓടെയാണ് വീട്ടുമുറ്റത്ത് കെട്ടിയിട്ടത്. വാഹനത്തിൽ നിന്നിറങ്ങിയ പോത്ത് പരാക്രമം കാണിച്ചിരുന്നു. തുടർന്ന് കെട്ടിയ കയർ പൊട്ടിച്ച് വിരണ്ടോടി ഒരു കിലോമീറ്റർ അകലെയുള്ള കൂരിക്കുന്നിലെ നാരായണന്‍റെ കിണറ്റിൽ വീഴുകയായിരുന്നു. ആൾമറയില്ലാത്ത കിണറിന് പത്ത് മീറ്ററിലേറെ താഴ്ചയുണ്ടായിരുന്നു. പോത്തിനെ പുറത്തെത്തിക്കാൻ നാട്ടുകാർ ശ്രമിച്ചെങ്കിലും കഴിഞ്ഞില്ല. തുടർന്ന് മഞ്ചേരി അഗ്നിരക്ഷാ സേനയെത്തി ഒരു മണിക്കൂർ നേരത്തെ ശ്രമത്തിനൊടുവിലാണ് പോത്തിനെ പുറത്തെടുത്തത്. ചെറിയ മുറിവുകളൊഴിച്ചാൽ കാര്യമായ പരിക്കുകളൊന്നുമില്ല. അസിസ്റ്റന്‍റ് സ്റ്റേഷൻ ഓഫീസർ കെ.വി.ജയകുമാർ, ഉദ്യോഗസ്ഥരായ സലീം കണ്ണൂക്കാരൻ, വിപിൻ, അനൂപ് മുണ്ടക്കൻ, സുരേഷ് പുതുക്കുടി, ഗണേഷ്, മെഹബൂബ് റഹ്മാൻ എന്നിവർ രക്ഷാപ്രവർത്തനത്തിന് നേതൃത്വം നൽകി.

പെരിന്തൽമണ്ണ ഗേൾസ് സ്കൂളിൽ എആർ ലാബ് ഒരുക്കി നഗരസഭ

പെരിന്തൽമണ്ണ: പെരിന്തൽമണ്ണ നഗരസഭ ഗേൾസ് സ്കൂളിൽ സജ്ജമാക്കിയ ജില്ലയിലെ ആദ്യത്തെ ഓഗ്മെന്‍റഡ് റിയാലിറ്റി ലാബ് (എആർ) ചെയർമാൻ പി.ഷാജി ഉദ്ഘാടനം ചെയ്തു. വൈസ് ചെയർപേഴ്സണ്‍ എ. നസീറ അധ്യക്ഷത വഹിച്ചു. പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സണ്‍ കെ. ഉണ്ണികൃഷ്ണൻ, സെക്രട്ടറി ജെ.ആർ.ലാൽകുമാർ, പ്രിൻസിപ്പൽ സി.എം. ലത, സ്റ്റാഫ് സെക്രട്ടറി കെ.ടി. ഷാജിമോൻ എന്നിവർ പ്രസംഗിച്ചു. സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ അന്പിളി മനോജ്, മുണ്ടുമ്മൽ മുഹമ്മദ് ഹനീഫ, അഡ്വ. ഷാൻസി, മൻസൂർ നെച്ചിയിൽ, കൗണ്‍സിലർമാരായ സക്കീന സൈദ്, പി. സീനത്ത്, ഷാഹുൽ ഹമീദ്, സി.പി. ഷെർളിജ, പിടിഎ പ്രസിഡന്‍റ് മനോജ് മുല്ലശേരി, പിടിഎ മുൻ പ്രസിഡന്‍റ് കിനാതിയിൽ സ്വാലിഹ്, എംപിടിഎ പ്രസിഡന്‍റ് സക്കീന സത്താർ തുടങ്ങിയവർ പങ്കെടുത്തു. നൂതന എആറിന്‍റെ സാങ്കേതികവിദ്യകൾ ഉപയോഗിച്ച് പ്രായോഗിക പഠനം നടത്തുവാനുള്ള സൗകര്യമാണ് ഓഗ്മെന്‍റഡ് റിയാലിറ്റി ലാബ്. വിദ്യാഭ്യാസം, വിനോദം തുടങ്ങിയ വിവിധ മേഖലകൾക്കായുള്ള സംവേദനാത്മക സിമുലേഷനുകളും ആപ്ലിക്കേഷനുകളും സൃഷ്ടിക്കുന്നതിനും പരീക്ഷിക്കുന്നതിനുമായി ഉയർന്ന പ്രകടനമുള്ള കന്പ്യൂട്ടറുകൾ, എആർ, വിആർ ഹെഡ്സെറ്റുകൾ, വികസന പ്ലാറ്റ്ഫോമുകൾ എന്നിവ ലാബിലുണ്ട്. കൂടാതെ ത്രീഡി മോഡലിംഗ്, ഗെയിം വികസനം എന്നിവയിൽ കുട്ടികളുടെ കഴിവുകൾ വികസിപ്പിക്കുന്നതിനുള്ള ശ്രമം കൂടിയാണ് എആർ ലാബ് സജ്ജമാക്കിയതോടെ നഗരസഭ മുന്നിൽകാണുന്നത്.

കരുത്ത് തെളിയിച്ച് വനിതാ മാർച്ച്

മലപ്പുറം : ഇന്ത്യൻ ഭരണഘടന വിഭാവനം ചെയ്ത സ്ത്രീ സ്വാതന്ത്ര്യവും തുല്യതയും സ്ത്രീയുടെ സുരക്ഷയും ഉറപ്പുവരുത്തണമെന്ന് അഡ്വ. സുജാതവർമ അഭിപ്രായപ്പെട്ടു. ബിംബവത്കരിക്കേണ്ടതോ ദേവദാസി സങ്കല്പം നൽകി ആരാധിക്കേണ്ടതോ അല്ല സ്ത്രീകളെന്നും സമൂഹത്തിന്‍റെ ഭാഗമായി ചുമതലകൾ ഏറ്റെടുത്ത് പ്രവർത്തിക്കേണ്ടവരാണ് സ്ത്രീകളെന്നും ജോയിന്‍റ് കൗണ്‍സിൽ ജില്ലാ വനിതാ കമ്മിറ്റി മലപ്പുറത്ത് നടത്തിയ ’കരുത്ത് വനിതാ മാർച്ച്’ ഉദ്ഘാടനം ചെയ്ത് അവർ അഭിപ്രായപ്പെട്ടു. ജോയിന്‍റ് കൗണ്‍സിൽ സംസ്ഥാന വനിതാ കമ്മിറ്റി അംഗം കവിതസദൻ അധ്യക്ഷത വഹിച്ചു. സർവീസ് രംഗത്തെ വനിതകൾ ഉത്തരവാദിത്വങ്ങൾ ഏറ്റെടുത്ത് സ്വയം ശാക്തീകരിക്കപ്പെടണമെന്ന് മുഖ്യപ്രഭാഷണം നടത്തിയ ജോയിന്‍റ് കൗണ്‍സിൽ സംസ്ഥാന വനിതാ കമ്മിറ്റി പ്രസിഡന്‍റ് കെ. അജിന പറഞ്ഞു. ജോയിന്‍റ് കൗണ്‍സിൽ സംസ്ഥാന സെക്രട്ടറിയറ്റ് അംഗം എ. ഗ്രേഷ്യസ്, സംസ്ഥാന കമ്മിറ്റിയംഗം എം. ഗിരിജ, ജില്ലാ സെക്രട്ടറി എസ്. മോഹനൻ, സംസ്ഥാന കമ്മിറ്റി അംഗം കെ.സി. സുരേഷ് ബാബു, ജില്ലാ പ്രസിഡന്‍റ് എ.പി. കുഞ്ഞാലിക്കുട്ടി, ജില്ലാ വനിതാ കമ്മിറ്റി പ്രസിഡന്‍റ് പുഷ്പ കുമാരി, സെക്രട്ടറി അഷിതഎന്നിവർ പ്രസംഗിച്ചു.

സംവരണ വാർഡുകളുടെ നറുക്കെടുപ്പ്

മലപ്പുറം: തദ്ദേശ തെരഞ്ഞെടുപ്പുമായി ബന്ധപ്പെട്ട് ജില്ലയിലെ വിവിധ ബ്ലോക്ക് പഞ്ചായത്തുകളുടെ കീഴിലുള്ള ഗ്രാമപഞ്ചായത്തുകളിലെ സംവരണ വാർഡുകളുടെ നറുക്കെടുപ്പ് ഇന്നലെ നടത്തി. അരീക്കോട്, കാളികാവ്(കരുളായി പഞ്ചായത്ത് ഒഴികെ), പെരിന്തൽമണ്ണ ബ്ലോക്കുകൾക്ക് കീഴിലെ വിവിധ ഗ്രാമപഞ്ചായത്തുകളിലെ സംവരണ വാർഡുകളുടെ നറുക്കെടുപ്പാണ് നടത്തിയത്. പെരിന്തൽമണ്ണ ബ്ലോക്കിന് കീഴിലെ പഞ്ചായത്തുകളും സംവരണ വാർഡുകളും: ആലിപറന്പ് പഞ്ചായത്ത്: പട്ടികജാതി സംവരണം (09 വട്ടപറന്പ് ) പട്ടികജാതി സ്ത്രീ സംവരണം (10 കോരംകോട്, 19 കൂത്തുപറന്പ് ), സ്ത്രീ സംവരണം (01 ചെത്തനാംകുറുശി, 04 ഒടമല, 05 എടത്തറ, 07 വാഴേങ്കട, 08 ബിടാത്തി, 13 കാന്പ്രം, 14 കൊടക്കാപറന്പ്, 17 തൂത നോർത്ത്, 18 തൂത സൗത്ത്, 21 ഈസ്റ്റ് മണലായ). ഏലംകുളം പഞ്ചായത്ത്: പട്ടികജാതി സംവരണം (01 ചെറുകര) പട്ടികജാതി സ്ത്രീ സംവരണം (05 ചങ്ങണംപറ്റ) സ്ത്രീ സംവരണം (02 ആലുംകൂട്ടം, 04 പാറക്കൽമുക്ക്, 06 ഈത്തേപറന്പ്, 07 ചേനാംപറന്പ്, 10 മലയങ്ങാട്, 12 കോരകുത്ത്, 13 തെക്കുംപുറം, 18 പുളിങ്കാവ്). മേലാറ്റൂർ പഞ്ചായത്ത്: പട്ടികജാതി സംവരണം (14 ചെമ്മാണിയോട് വെസ്റ്റ്) പട്ടികജാതി സ്ത്രീ സംവരണം (15 ചെമ്മാണിയോട് ) സ്ത്രീ സംവരണം (01 എടയാറ്റൂർ, 03 ഒലിപ്പുഴ, 07 വലിയപറന്പ് സൗത്ത്, 08 വെള്ളിയാർ, 09 ഉച്ചാരക്കടവ്, 12 വളയപ്പുറം, 16 മേലറ്റൂർ ടൗണ്‍, 18 കാട്ടുചിറ). കീഴാറ്റൂർ പഞ്ചായത്ത്: പട്ടികജാതി സംവരണം (04 കൊണ്ടിപറന്പ്) പട്ടികജാതി സ്ത്രീ സംവരണം (13 പട്ടിക്കാട് ഈസ്റ്റ് )സ്ത്രീ സംവരണം (05 ആക്കപ്പറന്പ്, 06 ചെമ്മന്തട്ട, 07 പൂന്താവനം, 08 19-ാം മൈൽ, 11 കണ്ണ്യാല, 14 പട്ടിക്കാട് വെസ്റ്റ്, 16 മുള്ള്യാകുർശി നോർത്ത്, 18 നെൻമേനി വെസ്റ്റ്, 19 നെൻമേനി ഈസ്റ്റ്, 21 തച്ചിങ്ങനാടം). താഴേക്കോട് പഞ്ചായത്ത്: പട്ടികജാതി സംവരണം (11 കാഞ്ഞിരത്തടം) പട്ടികജാതി സ്ത്രീ സംവരണം (13 മടാന്പാറ, 22 മരുതല) സ്ത്രീ സംവരണം (01 പാണന്പി, 02 കൊടികുത്തി, 09 കൊന്പാക്കൽകുന്ന്, 10 കുന്നത്ത് വട്ട, 14 മാന്തോണികുന്ന്, 15 മാട്ടറക്കൽ, 16 നെല്ലിപറന്പ്, 18 കാപ്പുപറന്പ്, 20 താഴേക്കോട്, 21 മുതിരമണ്ണ) വെട്ടത്തൂർ പഞ്ചായത്ത്: പട്ടികജാതി സംവരണം (16 ഈസ്റ്റ് മണ്ണാർമല) പട്ടികജാതി സ്ത്രീ സംവരണം (09 ഏഴുതല, 17 പീടികപ്പിടി) സ്ത്രീ സംവരണം (02 ആലുങ്ങൽ, 04 പച്ചീരി, 06 കാപ്പ്, 08 ഹൈസ്കൂൾകുന്ന്, 12 തെക്കൻമല, 13 കരുവാത്തകുന്ന്, 15 ചെരങ്ങരക്കുന്ന്, 18 മണ്ണാർമല ) പുലാമന്തോൾ പഞ്ചായത്ത്:പട്ടികജാതി സംവരണം (11 പാലൂർ ചേലാർക്കുന്ന്) പട്ടികജാതി സ്ത്രീ സംവരണം (19 കുന്നത്ത് പള്ള്യാലിൽകുളന്പ് ) സ്ത്രീ സംവരണം (01 മാലാപറന്പ്, 04 കട്ടുപാറ, 06 തിരുനാരായണപുരം, 07 പുലാമന്തോൾ യുപി, 08 പുലാമന്തോൾ, 09 ചോലപറന്പ്, 12 വടക്കൻപാലൂർ, 14 രണ്ടാം മൈൽ, 18 വളപുരം വെസ്റ്റ്, 21 കുണ്ടറക്കൽപടി, 23 പൂശാരികുളന്പ്). അങ്ങാടിപ്പുറം പഞ്ചായത്ത്: പട്ടികജാതി സംവരണം (02 മേലെ അരിപ്ര) പട്ടികജാതി സ്ത്രീ സംവരണം (10 ഓരാടംപാലം) സ്ത്രീ സംവരണം (07 പൂപ്പലം, 08 ചാത്തനല്ലൂർ, 09 ഏറാന്തോട്, 12 കോട്ടപ്പറന്പ്, 14 അങ്ങാടിപ്പുറം സൗത്ത്, 15 കായക്കുണ്ട് , 17 പരിയാപുരം, 19 ചോലയിൽകുളന്പ്, 20 പുത്തനങ്ങാടി പള്ളിപ്പടി, 22 ചെരക്കാപറന്പ്, 24 താഴെഅരിപ്ര).

പി.സി. അബ്ദുറഹ്മാൻ മികച്ച പഞ്ചായത്ത് പ്രസിഡന്‍റ്

മഞ്ചേരി: ജില്ലയിലെ മികച്ച പഞ്ചായത്ത് പ്രസിഡന്‍റിനുള്ള മൂന്നാമത് കടന്പോട്ട് ബാപ്പു ഹാജി സ്മാരക അവാർഡിന് പുൽപ്പറ്റ പഞ്ചായത്ത് പ്രസിഡന്‍റ് പി.സി. അബ്ദുറഹ്മാൻ അർഹനായി. പഞ്ചായത്തിൽ അഞ്ച് വർഷത്തിനുള്ളിൽ നടന്ന വ്യത്യസ്തങ്ങളായ പ്രവർത്തനങ്ങൾ വിലയിരുത്തിയാണ് അവാർഡിനായി തെരഞ്ഞെടുത്തത്. സി.പി. സൈതലവി, അഡ്വ. ഹനീഫ പുതുപറന്പ്, സി.കെ.എ. റസാഖ് എന്നിവരാണ് ജൂറി അംഗങ്ങൾ. കൗമാരക്കാരായ കുട്ടികൾക്കായി നടപ്പാക്കിയ ചങ്ങാത്തം പുൽപ്പറ്റ, ലോകത്തിലെ ആദ്യത്തെ എംജിയു3എ പഞ്ചായത്ത് എന്ന പദവി, പഠന പ്രയാസം അനുഭവിക്കുന്ന കുട്ടികൾക്കായി നടപ്പാക്കിയ ഒപ്പം ഒപ്പത്തിനൊപ്പം, ഭിന്നശേഷിക്കാരുടെ വിനോദയാത്ര, വിപുലമായ ബഡ്സ് സ്കൂൾ ആൻഡ് റിഹാബിലിറ്റേഷൻ സെന്‍റർ എന്നിവയെല്ലാം അഞ്ച് വർഷത്തിനുള്ളിൽ പ്രസിഡന്‍റിന്‍റെ നേതൃത്വത്തിൽ പുൽപ്പറ്റ പഞ്ചായത്തിൽ നടന്ന നൂതന പ്രവർത്തനങ്ങളാണ്. 2013 ൽ സംസ്ഥാനത്തെ മികച്ച പഞ്ചായത്ത് പ്രസിഡന്‍റിനുള്ള ഗ്രാമസ്വരാജ് അവാർഡും പി.സി. അബ്ദുറഹ്മാന് ലഭിച്ചിട്ടുണ്ട്. ഒക്ടോബർ അവസാന വാരം ഒതുക്കുങ്ങലിൽ അവാർഡ് വിതരണം ചെയ്യുമെന്ന് കടന്പോട്ട് ബാപ്പു ഹാജി ഫൗണ്ടേഷൻ അംഗങ്ങളായ പാലേരി മുഹമ്മദ്, സി.ടി. അഹമ്മദ് കുട്ടി, കെ.പി. മുഹമ്മദ്കുട്ടി, കടന്പോട്ട് മൂസഹാജി, ടി.ടി. ബാവ, കെ.സി. നാസർ, ടി. ഫസലുറഹ്മാൻ എന്നിവർ അറിയിച്ചു.

കിണർ ഇടിഞ്ഞ് താഴ്ന്നു: വീട് ഭീഷണിയിൽ

കാളികാവ് : കഴിഞ്ഞദിവസം വൈകുന്നേരമുണ്ടായ കനത്ത മഴയിൽ ഉദരംപൊയിലിൽ കിണർ ഇടിഞ്ഞ് താഴ്ന്നു. ബാലവാടിപ്പടിയിലെ വള്ളിയിൽ ഹംസയുടെ വീടിനോട് ചേർന്നുള്ള കിണറാണ് താഴ്ന്നത്. ഇതോടെ വീട് ഭീഷണിയിലായി. ഇരുപത്തി രണ്ട് റിംഗുകളുള്ള കിണർ മോട്ടോർ പന്പും അടക്കമാണ് ഇടിഞ്ഞ് താഴ്ന്നത്. വീടിന്‍റെ ചുമർ ഇടിഞ്ഞുവീണ് വലിയ അപകടം ഉണ്ടാകുമോ എന്ന ആശങ്കയിലാണ് കുടുംബം.

കാത്തിരിപ്പിന് വിരാമം; ചന്തക്കുന്ന് ബസ് സ്റ്റാൻഡ് നിർമാണോദ്ഘാടനം 21ന്

നിലന്പൂർ: ഏഴ് വർഷത്തെ കാത്തിരിപ്പിനൊടുവിൽ നിലന്പൂർ ചന്തക്കുന്ന് ബസ് സ്റ്റാൻഡ് നിർമാണോദ്ഘാടനം നടത്താൻ തീരുമാനം. 21ന് നോർക്ക ചെയർമാനും മുൻ സ്പീക്കറുമായ പി. ശ്രീരാമകൃഷ്ണൻ ഉദ്ഘാടനം ചെയ്യുമെന്ന് നഗരസഭാ ചെയർമാൻ മാട്ടുമ്മൽ സലീം വാർത്താ സമ്മേളനത്തിൽ അറിയിച്ചു. കേരള അർബൻ ആൻഡ് റൂറൽ ഡവലപ്മെന്‍റ് കേർപ്പറേഷന്‍റെ (കെയുആർഡിഎഫ്സി) സഹകരണത്തോടെ അഞ്ച് കോടി രൂപ ചെലവിലാണ് ബസ് സ്റ്റാൻഡ് ആദ്യഘട്ട നിർമാണം നടത്തുന്നത്. സർക്കാർ ഏജൻസിയായ സിൽക്കിനാണ് നിർമാണ ചുമതല. ബസ് ബേ പാർക്കിംഗ്, മയ്യന്താനി ഭാഗത്തേക്കുള്ള റോഡ് എന്നിവയാണ് ആദ്യഘട്ടത്തിൽ നിർമിക്കുക. തുടർന്ന് അഞ്ച് കോടി രൂപ കൂടി ഫണ്ട് വകയിരുത്തി ഷോപ്പിംഗ് കോംപ്ലക്സും നിർമിക്കും. മൾട്ടി തിയേറ്റർ, കോണ്‍ഫറൻസ് ഹാൾ, വയോജന, ഭിന്നശേഷി സൗഹൃദഹാൾ, തൊഴിൽ അന്വേഷണ-പരിശീലന കേന്ദ്രം തുടങ്ങിയവയും ഷോപ്പിംഗ് കോംപ്ലക്സിൽ നിർമിക്കുമെന്ന് ചെയർമാൻ പറഞ്ഞു. ചന്തക്കുന്ന് പഴയ ബസ് സ്റ്റാൻഡ് മുന്നൊരുക്കങ്ങളില്ലാതെ യുഡിഎഫ് മുൻ ഭരണ സമിതി പൊളിച്ചിടുകയായിരുന്നുവെന്നും തുടർന്ന് വന്ന എൽഡിഎഫ് ഭരണസമിതി പിപിപി, ബിഒടി അടിസ്ഥാനത്തിൽ സ്റ്റാൻഡ് നിർമിക്കാൻ ശ്രമം നടത്തിയപ്പോൾ യുഡിഎഫ് തുരങ്കം വച്ചുവെന്നും അവസാന ശ്രമം എന്ന നിലയിലാണ് കെയുആർഡിഎഫ്സിയിൽ നിന്ന് വായ്പയെടുത്ത് പദ്ധതി യാഥാർഥ്യമാക്കാൻ നഗരസഭ തീരുമാനിച്ചതെന്നും മാട്ടുമ്മൽ സലീം പറഞ്ഞു. സ്റ്റാൻഡിംഗ് കമ്മറ്റി ചെയർപേഴ്സണ്‍മാരായ കക്കാടൻ റഹീം, സ്കറിയ കിനാംതോപ്പിൽ എന്നിവരും വാർത്താസമ്മേളനത്തിൽ പങ്കെടുത്തു. അതേ സമയം 2020ൽ എൽഡിഎഫ് ഭരണസമിതി അധികാരത്തിൽ വന്നാൽ ചന്തക്കുന്ന് ബസ് സ്റ്റാൻഡ് മൂന്ന് മാസത്തിനുള്ളിൽ തുടങ്ങുമെന്ന പ്രഖ്യാപനമാണ് ഇപ്പോൾ തെരഞ്ഞെടുപ്പ് പ്രഖ്യാപനത്തിന് ദിവസങ്ങൾ മാത്രം ബാക്കി നിൽക്കെ ഭരണ സമിതി തുടക്കം കുറിക്കുന്നത്. യുഡിഎഫ് ഭരണ സമിതിയുടെ കാലത്ത് ചന്തക്കുന്ന് ബസ് സ്റ്റാൻഡ് പൊളിച്ചതിനാൽ കഴിഞ്ഞ ഏഴ് വർഷമായി യാത്രക്കാർ ദുരിതം അനുഭവിക്കുകയാണ്.

കൗണ്‍സിലറുടെ ഇടപെടൽ ഫലം കണ്ടു : ഇതര സംസ്ഥാന തൊഴിലാളികളുടെ കുട്ടികൾക്ക് തുള്ളിമരുന്ന് നൽകി

നിലന്പൂർ: ഇതര സംസ്ഥാന തൊഴിലാളി കുടുംബത്തിലെ കുരുന്നുകൾക്ക് നഗരസഭ കൗണ്‍സിലറുടെ ഇടപെടലിൽ പോളിയോ തുള്ളിമരുന്ന് നൽകി. മരന്നു നൽകാനുള്ള പേടി മൂലം രക്ഷിതാക്കൾ വീട് അകത്ത് നിന്ന് താഴിട്ടു പൂട്ടിയിരിക്കുകയായിരുന്നു. നിലന്പൂർ ചക്കാലക്കുത്താണ് സംഭവം. വാടക ക്വാർട്ടേഴ്സിൽ താമസിക്കുന്ന ബംഗാൾ സ്വദേശികളായ കുടുംബത്തിലെ അഞ്ച് വയസുള്ള ഇരട്ടക്കുട്ടികൾക്കാണ് രക്ഷിതാക്കൾ തുള്ളിമരുന്ന് നൽകാതിരുന്നത്. അങ്കണവാടിയിൽ 12 ന് ഒരുക്കിയ പൾസ് പോളിയോ ബൂത്തിൽ കുട്ടികളെ കൊണ്ടുവന്നില്ല. തുടർന്ന് ആശാവർക്കർ സി.കെ. അജിതയും സന്നദ്ധ പ്രവർത്തകരും രണ്ട് തവണ ഇവർ താമസിക്കുന്ന ക്വാർട്ടേഴ്സിലെത്തി. കുട്ടികൾ ഇവിടെ ഇല്ലെന്നായിരുന്നു മാതാവിന്‍റെ മറുപടി. തുടർന്ന് ആശാപ്രവർത്തക, കൗണ്‍സിലർ ഡെയ്സി ചാക്കോയെ വിവരം അറിയിച്ചു. ഹിന്ദി വശമുള്ള വിമുക്ത ഭടൻ കെ. അയ്യപ്പൻകുട്ടിയെയും കൂട്ടി കൗണ്‍സിലർ ക്വാർട്ടേഴ്സിലെത്തി. ആശാപ്രവർത്തക ഒപ്പമുണ്ടയിരുന്നു. വാതിൽ തട്ടിവിളിച്ചിട്ടും മാതാവ് പുറത്തുവരാൻ ആദ്യം തയാറായില്ല. ഏറെ നേരത്തിന് ശേഷം വരാന്തയിൽ വന്നു. അതിനിടെ കുട്ടികൾ അകത്ത് നിന്ന് തല നീട്ടി നോക്കി. കൗണ്‍സിലർ കൈയിൽ കരുതിയ മിഠായികൾ നീട്ടിയതും കുട്ടികൾ ഓടി വന്നു വാതിലിന്‍റെ വിടവിലൂടെ മിഠായി വാങ്ങി. ഈസമയം അയ്യപ്പൻകുട്ടി ഹിന്ദിയിൽ മാതാവിനോട് കാര്യങ്ങൾ വിശദീകരിച്ചു. ഒടുവിൽ എല്ലാവരുടെയും സ്നേഹനിർബന്ധത്തിന് വഴങ്ങി മാതാവ് വാതിൽ തുറന്നു. ആശാവർക്കർ നൽകിയ മരുന്ന് കുട്ടികൾ ഒരു മടിയുമില്ലാതെ സ്വീകരിച്ചു.

പെരിന്പലം സ്കൂൾ പുകയില രഹിതം

മഞ്ചേരി: പെരിന്പലം ക്രസന്‍റ് എയുപി സ്കൂളിനെ പുകയില രഹിത വിദ്യാഭ്യാസ സ്ഥാപനമായി പ്രഖ്യാപിച്ചു. പുകയില വിരുദ്ധ പോസ്റ്റർ ഹെഡ്മാസ്റ്റർ കെ.പി. മുഹമ്മദ് ബഷീറിന് നൽകി ഗ്രാമപഞ്ചായത്ത് മെന്പർ ടി. ബുഷ്റ ഹംസ ഉദ്ഘാടനം ചെയ്തു. പിടിഎ പ്രസിഡന്‍റ് എൻ. സത്താർ അധ്യക്ഷത വഹിച്ചു. കണ്‍വീനർ കൃഷ്ണപ്രിയ പ്രസംഗിച്ചു.

അമരന്പലം പഞ്ചായത്ത് വികസന സദസ് സമാപിച്ചു

പൂക്കോട്ടുംപാടം: അമരന്പലം ഗ്രാമപഞ്ചായത്തിലെ വികസന സദസ് സമാപിച്ചു. പൂക്കോട്ടുംപാടം പിവിഎം ഓഡിറ്റോറിയത്തിൽ നടത്തിയ പരിപാടി അമരന്പലം ഗ്രാമപഞ്ചായത്ത് പ്രസിഡന്‍റ് ഇല്ലിക്കൽ ഹുസൈൻ ഉദ്ഘാടനം ചെയ്തു. സംസ്ഥാന സർക്കാരിന്‍റെ ലൈഫ് ഭവന പദ്ധതിയിലൂടെ നിരവധി പേർക്കാണ് വീട് നിർമിച്ച് നൽകിയത്. ഗ്രാമപഞ്ചായത്തിലെ സബ്സെന്‍ററുകളുടെ നിലവാരം മെച്ചപ്പെടുത്തി. 500 പാലിയേറ്റീവ് രോഗികളുള്ള പഞ്ചായത്തിൽ വീട്ടിലെത്തി പരിചരണം നൽകിവരുന്നു. സർക്കാരിന്‍റെ വിദ്യാകിരണം പദ്ധതിയിൽ ഉൾപ്പെടുത്തി പുതിയ സ്കൂൾ കെട്ടിടം നിർമിച്ചു. നിരവധി മേഖലയിൽ വികസന പ്രവർത്തനങ്ങൾ നടത്താൻ പഞ്ചായത്തിന് സാധിച്ചെന്നും അദ്ദേഹം പറഞ്ഞു. വൈസ് പ്രസിഡന്‍റ് അനിതരാജു അധ്യക്ഷത വഹിച്ചു. ആസൂത്രണ സമിതി ഉപാധ്യക്ഷൻ വി.കെ. അനന്തകൃഷ്ണൻ, സ്ഥിരം സമിതി ചെയർമാൻമാരായ അനീഷ്, ഹമീദ്, ബ്ലോക്ക് പഞ്ചായത്ത് അംഗങ്ങളായ പി.എം. ബിജു, രാജൻ, വാർഡ് അംഗങ്ങൾ എന്നിവർ പങ്കെടുത്തു. അസിസ്റ്റന്‍റ് സെക്രട്ടറി ശിവദാസൻ പഞ്ചായത്ത് വികസന രേഖ അവതരിപ്പിച്ചു.

വനിതാ ഹോക്കി സംസ്ഥാന ടീമിൽ ഇടം നേടി മഹജിബിനും ഫാത്തിമ മുർഷിദയും

മങ്കട: ഉത്തരാഖണ്ഡിലെ റാഞ്ചിയിൽ നടക്കുന്ന അണ്ടർ 17 വനിതാ ഹോക്കിയിൽ കേരളാ ടീമിൽ ഇടം നേടി മലപ്പുറം ജില്ലയിലെ പാങ്ങ് ഗവണ്‍മെന്‍റ് ഹയർ സെക്കൻഡറി വിദ്യാലയത്തിലെ രണ്ടു വിദ്യാർഥിനികൾ. പി.ടി. മഹജിബിൻ, ടി. ഫാത്തിമ മുർഷിദ എന്നിവരാണ് ഈ മിടുക്കികൾ. ഈ വർഷം ജവഹർലാൽ നെഹ്റു വനിതാ ഹോക്കി ടൂർണമെന്‍റിൽ ഇവർ അംഗങ്ങളായ പാങ്ങ് ജിഎച്ച്എസ്എസിന് മൂന്നാം സ്ഥാനം ലഭിച്ചിരുന്നു. വനിതാ ഹോക്കിയിൽ വർഷങ്ങളായി മികച്ച പ്രകടനവുമായി മുന്നേറുകയാണ്പാങ്ങ് ഗവണ്‍മെന്‍റ് ഹയർ സെക്കൻഡറി സ്കൂൾ. മഹജിബിന്‍റെ പിതാവ് മെഹബൂബ് ക്വാറി തൊഴിലാളിയും മുർഷിദയുടെ പിതാവ് താജുദ്ദീൻ തെങ്ങുകയറ്റ തൊഴിലാളിയുമാണ്. വനിതാ ഹോക്കിയിൽ കഴിഞ്ഞ വർഷം പാങ്ങ് ജിഎച്ച്എസ്എസിൽ നിന്ന് കെ. ഫാത്തിമ സിയ, എം. ഷഹാന തസ്നി എന്നിവർ സംസ്ഥാന ടീമിൽ അംഗങ്ങളായിരുന്നു. മലപ്പുറം സ്വദേശിയായ പി. ഷാരൂണ്‍ ആണ് പരിശീലകൻ.

വിദ്യാർഥികൾക്ക് മർദനം: ഒന്പതുപേർ അറസ്റ്റിൽ

മഞ്ചേരി: വിദ്യാർഥികളെ സംഘം ചേർന്ന് മർദിച്ച ഒന്പതു പേരെ മഞ്ചേരി പോലീസ് ഇൻസ്പെക്ടർ വി. പ്രതാപ് കുമാർ അറസ്റ്റ് ചെയ്തു. ഇക്കഴിഞ്ഞ 13ന് വൈകുന്നേരം 4.30നാണ് കേസിനാസ്പദമായ സംഭവം. വള്ളുവന്പ്രം അത്താണിക്കൽ എംഐസി കോളജിലെ വിദ്യാർഥികളായ റോഷൻ, മുഹമ്മദ് യാസീൻ, ഹനീൻ എന്നിവരെയും സുഹൃത്തുക്കളെയുമാണ് പ്രദേശവാസികളായ പ്രതികൾ സംഘം ചേർന്ന് അക്രമിച്ചത്. വിറകുകൊള്ളി കൊണ്ട് തലയ്ക്കടിച്ചു പരിക്കേൽപ്പിച്ചുവെന്നാണ് കേസ്. കോടതിയിൽ ഹാജരാക്കിയ വള്ളുവന്പ്രം സ്വദേശികളായ സൽമാൻ, യാസിർ എന്നിവരുൾപ്പെടെ ഒന്പതുപ്രതികളെ 14 ദിവസത്തേക്ക് റിമാൻഡ് ചെയ്തു.

‘ശബരിമലയിൽ നടന്നത് ആസൂത്രിത കൊള്ള’

നിലന്പൂർ: സർക്കാർ അനുമതിയോടെ ദേവസ്വം ബോർഡ് അറിഞ്ഞ് നടത്തിയ ആസൂത്രിത സ്വർണ കൊള്ളയാണ് ശബരിമലയിൽ നടന്നതെന്ന് ആര്യാടൻ ഷൗക്കത്ത് എംഎൽഎ. വിഷയം നിയമസഭയിൽ ഉന്നയിച്ചപ്പോൾ കൊള്ളക്കെതിരേ പ്രതികരിക്കുന്നതിന് പകരം പ്രതിപക്ഷാംഗങ്ങൾക്കെതിരേ മോശം പരാമർശം നടത്താനാണ് മുഖ്യമന്ത്രി എഴുന്നേറ്റത്. കോണ്‍ഗ്രസ് പ്രവർത്തകസമിതി അംഗം കൂടിയായ ഷാഫി പറന്പിൽ എംപിയെ മർദിച്ചത് പോലീസിനെ അഴിച്ചുവിട്ട് സമരങ്ങളെ അടിച്ചമർത്തുന്ന പിണറായിസത്തിന്‍റെ ഭാഗമാണെന്ന് നിലന്പൂരിൽ നിയോജകമണ്ഡലം കോണ്‍ഗ്രസ് പ്രവർത്തക കണ്‍വൻഷൻ ഉദ്ഘാടനം ചെയ്ത് ഷൗക്കത്ത് എംഎൽഎ പറഞ്ഞു. തോപ്പിൽ ബാബു അധ്യക്ഷത വഹിച്ചു. പാലോളി മെഹബൂബ്, എ.ഗോപിനാഥ്, വി.എ. കരീം, അസീസ് പുളിയഞ്ചാലി, ബാബു മോഹനക്കുറുപ്പ്, പി.പുഷ്പവല്ലി, ഷീബ പൂഴിക്കുത്ത്, ഒ.ടി. ജെയിംസ്, പി. ഉസ്മാൻ, പാണായി ജേക്കബ് എന്നിവർ പ്രസംഗിച്ചു.

സിബിഎസ്ഇ ജില്ലാ ശാസ്ത്ര മേള: ലോഗോ പ്രകാശനം ചെയ്തു

മലപ്പുറം: മലപ്പുറം സെൻട്രൽ സഹോദയയുടെ സയൻസ് എക്സിബിഷൻ ഊരകം സെന്‍റ് അൽഫോൻസ പബ്ലിക് സ്കൂളിൽ നവംബർ ഒന്നിന് നടക്കും. സയൻസ് എക്സിബിഷന്‍റെ ഭാഗമായി മലപ്പുറം സെൻട്രൽ സഹോദയയുടെ വിവിധ സ്കൂളുകളിൽ നിന്നുള്ള പ്രിൻസിപ്പൽമാരും സയൻസ് അധ്യാപകരും പങ്കുചേർന്ന അക്കാഡമിക് വിസിറ്റ് ഒറ്റപ്പാലം നെഹ്റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സ്ഥാപനങ്ങളിലേക്ക് നടത്തി. മലപ്പുറം ജില്ലാതല ശാസ്ത്രമേളയുടെ ലോഗോ നെഹ്റു ഗ്രൂപ്പ് ഓഫ് ഇൻസ്റ്റിറ്റ്യൂഷൻ ചെയർമാൻ ഡോ. അഡ്വ. പി. കൃഷ്ണദാസ് പ്രകാശനം ചെയ്തു. മലപ്പുറം സെൻട്രൽ സഹോദയ പ്രസിഡന്‍റ് നൗഫൽ പുത്തൻപീടിക്കൽ അധ്യക്ഷത വഹിച്ചു. സയൻസ് എക്സിബിഷൻ കോ ഓർഡിനേറ്റർ ഡോ. എൻ.പി. ദിവ്യ, ഷുഹൈബ് ആലുങ്ങൽ, അബ്ദുൾ സമദ്, സിസ്റ്റർ ഡോ. സിജി, സി. ജുബൈരിയ, ടി.മുഹമ്മദാലി, യു.എ. ലത്തീഫ്, ഷാഹുൽ ഹമീദ്, ഫാ. ജീവൻ ജോസഫ്, ശഹല ബീഗം, ചിത്രകല, സിസ്റ്റർ ഷേർലി ജോസഫ്, സെക്രട്ടറി സി.സി. അനീഷ് കുമാർ, പ്രോഗ്രാം കണ്‍വീനർ ഫാ. തോമസ് ജോസഫ് പ്രസംഗിച്ചു.

മെഗാ മെഡിക്കൽ ക്യാന്പ് നടത്തി

ചെമ്മലശേരി: സിപിഎം ചെമ്മലശേരിയും പെരിന്തൽമണ്ണ എംഇഎസ് മെഡിക്കൽ കോളജും സംയുക്തമായി മെഗാ മെഡിക്കൽ ക്യാന്പ് സംഘടിപ്പിച്ചു. ഇർഷാദ് സ്വിബിയാൻ മദ്രസയിൽ നടത്തിയ ക്യാന്പിൽ ജനറൽ, നേത്രരോഗം, ഇഎൻടി വിഭാഗങ്ങളിലായി ചികിത്സ ഒരുക്കിയിരുന്നു. വിവിധ രോഗനിർണയവും ലഭ്യമാക്കി. സ്ത്രീകളും കുട്ടികളും ഉൾപ്പെടെ ഇരുനൂറിലധികം പേർ ക്യാന്പിൽ പങ്കെടുത്തു. സിപിഎം ഏരിയ സെക്രട്ടറി ഇ. രാജേഷ്, ഏരിയ കമ്മിറ്റിയംഗം വി.പി. മുഹമ്മദ് ഹനീഫ, ഗ്രാമപഞ്ചായത്ത് മെന്പർമാരായ മുസ്തഫ, എൻ.പി. റാബിയ തുടങ്ങിയവർ ക്യാന്പ് സന്ദർശിച്ചു.

‘നിലന്പൂർ നഗരസഭ ഭരണമാറ്റം എൽഡിഎഫിൽ ഒരു വിഭാഗം ആഗ്രഹിക്കുന്നു’

നിലന്പൂർ: നിലന്പൂർ നഗരസഭയിലെ ഭരണമാറ്റം എൽഡിഎഫ് അണികൾ തന്നെ ആഗ്രഹിക്കുന്നുവെന്ന് ആര്യാടൻ ഷൗക്കത്ത് എംഎൽഎ. കെപിസിസി മുൻ പ്രസിഡന്‍റ് കെ. മുരളീധരൻ നയിക്കുന്ന വിശ്വാസ സംരക്ഷണയാത്രക്ക് 16ന് നിലന്പൂരിൽ നൽകുന്ന സ്വീകരണ യോഗത്തിന്‍റെ ഭാഗമായി സംഘടിപ്പിച്ച കോണ്‍ഗ്രസ് മുനിസിപ്പൽ കണ്‍വൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യുഡിഎഫുകാർ മാത്രമല്ല ഒരു വിഭാഗം കമ്മ്യൂണിസ്റ്റുകാരും നഗരസഭയിലെ ഭരണമാറ്റത്തിന് കാത്തിരിക്കുകയാണെന്നും അദ്ദേഹം പറഞ്ഞു. മുനിസിപ്പൽ കോണ്‍ഗ്രസ് കമ്മിറ്റി പ്രസിഡന്‍റ് അഡ്വ. ഷെറി ജോർജ് അധ്യക്ഷത വഹിച്ചു. കെപിസിസി അംഗം വി.എ.കരീം, ബ്ലോക്ക് കോണ്‍ഗ്രസ് പ്രസിഡന്‍റ് പാലോളി മൊബൂബ്, എം.കെ.ബാലകൃഷ്ണൻ, അജ്മൽ ഏനാന്തി, ഷാനവാസ് പട്ടിക്കാടൻ, ഷീബു പാടിക്കുന്ന്, ഗീരിഷ് മോളൂർ മഠത്തിൽ എന്നിവർ പ്രസംഗിച്ചു.

പെരിന്തൽമണ്ണയിൽ പാലിയേറ്റീവ് സ്റ്റോർ തുറന്നു

പെരിന്തൽമണ്ണ: പെരിന്തൽമണ്ണ നഗരസഭ ഓഫീസ് കെട്ടിടത്തിൽ ആരംഭിച്ച പാലിയേറ്റീവ് സ്റ്റോർ ചെയർമാൻ പി. ഷാജി ഉദ്ഘാടനം ചെയ്തു. നഗരസഭാ നിവാസികൾക്ക് താത്കാലികാവശ്യങ്ങൾക്ക് ഉപയോഗിക്കാൻ വീൽചെയർ, വാക്കർ, വാക്കിംഗ് സ്റ്റിക്, സിറ്റിംഗ് കമോഡ്, കട്ടിൽ, എയർബെഡ്, വാട്ടർ ബെഡ്, ഓക്സിജൻ സിലിണ്ടർ തുടങ്ങിയവ സൗജന്യമായി ലഭിക്കുന്നതിനുള്ള സംവിധാനമാണ് പാലിയേറ്റീവ് സ്റ്റോർ. വൈസ് ചെർപേഴ്സണ്‍ എ.നസീറ അധ്യക്ഷത വഹിച്ചു. കുന്നപ്പള്ളി സ്വദേശി പള്ളിയാൽതൊടി അബ്ദുറഹ്മാൻ പാലിയേറ്റീവ് സ്റ്റോറിലേക്ക് നൽകിയ ബെഡ്, വീൽചെയർ, കട്ടിൽ തുടങ്ങിയവ ചെയർമാൻ ഏറ്റുവാങ്ങി. ചടങ്ങിൽ സ്റ്റാൻഡിംഗ് കമ്മിറ്റി ചെയർപേഴ്സണ്‍മാർ, കൗണ്‍സിലർമാർ, നഗരസഭ സെക്രട്ടറി ജെ.ആർ. ലാൽകുമാർ, ഹെൽത്ത് ഇൻസ്പെക്ടർ റഫീഖ്, പിഎച്ച്ഐ ടി. രാജീവൻ, പാലിയേറ്റീവ് സിസ്റ്റർ വസന്ത, പിഎംസി അംഗം എം.കെ. ശ്രീധരൻ, കുടുംബശ്രീ പ്രവർത്തകർ തുടങ്ങിയവർ പങ്കെടുത്തു.

കഞ്ചാവുമായി യുവാവ് അറസ്റ്റിൽ

എടക്കര: 200 ഗ്രാം കഞ്ചാവുമായി യുവാവ് പിടിയിൽ. മൂത്തേടം വള്ളിക്കാട് പുത്തൻപുരക്കൽ അമീറിനെയാണ് (33) എടക്കര പോലീസും ഡാൻസാഫ് ടീമും ചേർന്ന് പിടികൂടിയത്. സ്കൂട്ടറിൽ കഞ്ചാവ് വിൽപ്പന നടത്തുന്നുവെന്ന വിവരത്തെ തുടർന്ന് എസ്ഐ പി. ജയകൃഷ്ണന്‍റെ നേതൃത്വത്തിൽ നടത്തിയ പരിശോധനയിൽ കലാസാഗറിൽ വച്ചാണ് ഇയാൾ പിടിയിലായത്. സീനിയർ സിപിഒ എം. ബിജിത, സിപിഒ എം.സി. സർജാസ്, ഡാൻസാഫ് അംഗങ്ങളായ സുനിൽ മന്പാട്, അഭിലാഷ് കൈപ്പിനി, ആഷിഫ് അലി, ടി. നിബിൻദാസ് എന്നിവർ അന്വേഷണ സംഘത്തിലുണ്ടായിരുന്നു.

വലന്പൂരിൽ സ്റ്റേഡിയം വികസനത്തിന് 47 ലക്ഷം

മങ്കട: അങ്ങാടിപ്പുറം പഞ്ചായത്ത് അഞ്ചാം വാർഡിലെ വലന്പൂർ സുന്ദരൻ മാസ്റ്റർ സ്മാരക മിനി സ്റ്റേഡിയത്തിന്‍റെ വികസനത്തിന് കായിക യുവജനകാര്യ വകുപ്പ് ഡെപ്യൂട്ടി ഡയറക്ടർ 47 ലക്ഷം രൂപയുടെ വികസനകാര്യ എസ്റ്റിമേറ്റിന് അംഗീകാരം നൽകി. വലന്പൂർ വികസന സമിതി കഴിഞ്ഞ ഫെബ്രുവരിയിൽ കായിക മന്ത്രി വി. അബ്ദുറഹ്മാന് നൽകിയ നിവേദനത്തെ തുടർന്നാണ് തുക അനുവദിച്ചത്. കായിക യുവജനകാര്യ വകുപ്പ് ഡെപ്യൂട്ടി ഡയറക്ടർ, എൻജിനിയർ എന്നിവർ സ്റ്റേഡിയം സന്ദർശിച്ചാണ് 50 മീറ്റർ ഗാലറി, ഫ്ളഡ്‌ലിറ്റ് എന്നിവയ്ക്കായി എസ്റ്റിമേറ്റ് തയാറാക്കിയത്. തദ്ദേശ സ്ഥാപനങ്ങൾ, എംഎൽഎ, എംപി, യുവജന ക്ഷേമ വകുപ്പ് എന്നിവയിൽ നിന്ന് ശേഷിക്കുന്ന ഫണ്ട് കൂടി ലഭ്യമായാൽ വികസന പ്രവർത്തനങ്ങൾ പൂർത്തിയാക്കാൻ കഴിയുമെന്ന് വലന്പൂർ വികസന സമിതി കണ്‍വീനർ സുന്ദരൻ മുണ്ടക്കൽ, ചെയർമാൻ കുഞ്ഞുകൃഷ്ണൻ എന്നിവർ പറഞ്ഞു.

താഴെക്കോട്ടെ കാൽനട യാത്രക്കാർക്ക് "ശുഭയാത്ര'യുമായി പോലീസ്

പെരിന്തൽമണ്ണ: കാൽനട യാത്രക്കാർ വാഹനാപകടങ്ങളിൽപെടുന്ന സംഭവങ്ങൾ തടയാൻ പെരിന്തൽമണ്ണ ട്രാഫിക് പോലീസിന്‍റെ നേതൃത്വത്തിൽ ബോധവത്കരണം നടത്തി. 3500 ലധികം വിദ്യാർഥികൾ പഠിക്കുന്ന താഴെക്കോട് പിടിഎം ഹയർ സെക്കൻഡറി സ്കൂളിന് മുൻവശത്ത് വച്ച് വിദ്യാർഥികൾക്കും ഡ്രൈവർമാർക്കും സീബ്രാലൈനിന്‍റെ പ്രാധാന്യത്തെക്കുറിച്ചും ഫുട്ട്പാത്തിലെ അനധികൃത വാഹന പാർക്കിംഗ്, കാൽനട യാത്രക്കാരുടെ വഴി തടസപ്പെടുത്തിക്കൊണ്ടുള്ള പരസ്യ ബോർഡുകൾ നീക്കം ചെയ്യേണ്ടതിന്‍റെ പ്രാധാന്യം എന്നിവ പോലീസ് ബോധ്യപ്പെടുത്തി. റോഡ് മുറിച്ച് കടക്കുന്നത് ഏങ്ങനെയെന്ന് വിദ്യാർഥികളെ ധരിപ്പിച്ചു. അധ്യാപകർ, വിദ്യാർഥികൾ, പൊതുജനങ്ങൾ എന്നിവർ പരിപാടിയ്ക്ക് പിന്തുണ നൽകി. സ്കൗട്ട് ആൻഡ് ഗൈഡ്സ് സ്കൂൾ, ഹയർ സെക്കൻഡറി വിഭാഗം, പദ്ധതിയുമായി ബന്ധപ്പെട്ട അധ്യാപകർ, ട്രാഫിക് വാർഡൻമാർ പങ്കെടുത്തു. ജില്ലാ പോലീസ് മേധാവി ആർ. വിശ്വനാഥിന്‍റെ നിർദേശ പ്രകാരം പെരിന്തൽമണ്ണ ഡിവൈഎസ്പി എ. പ്രേംജിത്തിന്‍റെ കീഴിലാണ് ബോധവത്കരണം സംഘടിപ്പിച്ചത്. ട്രാഫിക് സബ് ഇൻസ്പെക്ടർമാരായ കബീർ, മനോജ് മംഗലശേരി, എഎസ്ഐ നാസർ, പോലീസ് ഡ്രൈവർ സബിത് എന്നിവർ നേതൃത്വം നൽകി. വരും ദിവസങ്ങളിൽ ഓട്ടോറിക്ഷ സ്റ്റാൻഡുകൾ കേന്ദ്രീകരിച്ച് ഡ്രൈവർമാർക്ക് ഇത്തരം ക്ലാസുകൾ സംഘടിപ്പിക്കുമെന്ന് പോലീസ് അറിയിച്ചു.

ശാസ്ത്രമേളയുടെ ലോഗോ പ്രകാശനം ചെയ്തു

എടക്കര: നിലന്പൂർ ഉപജില്ല ശാസ്ത്രമേളയുടെ ലോഗോ പ്രകാശനം ജില്ലാ പഞ്ചായത്ത് അംഗം ഷെറോണ റോയ് നിർവഹിച്ചു. ഈ മാസം 24, 25 തിയതികളിൽ പോത്തുകൽ സിഎച്ച്എസ്എസ്, ഞെട്ടിക്കുളം എയുപി സ്കൂൾ എന്നിവിടങ്ങളിലാണ് നിലന്പൂർ ഉപജില്ല ശാസ്ത്രമേള നടക്കുന്നത്. മൊടപൊയ്ക എഎൽപി സ്കൂളിലെ സി.എസ്. രഞ്ജിത ആണ് ലോഗോ തയാറാക്കിയത്. പോത്തുകൽ ഗ്രാമപഞ്ചായത്ത് പ്രസിഡന്‍റ് വിദ്യാരാജൻ അധ്യക്ഷത വഹിച്ചു. പ്രോഗ്രാം കണ്‍വീനർ ബിനോ വി. ഇഞ്ചപ്പാറ, ഗ്രാമപഞ്ചായത്തഗം മിനി വെട്ടിക്കുഴ, പി. രജനി, കെ. അജീഷ്, വി.വി. രാജേഷ്, സന്തോഷ്, ക്ലബ് കണ്‍വീനർമാരായ വി.എം. നിഖിൽ, ബി. ബിജു, പി. പ്രശാന്ത്, ഫർസാന, എ. ജംഷീർ, ജനറൽ കണ്‍വീനർ വി.ജെ. ഏബ്രഹാം, ടി. ഹരിലാൽ എന്നിവർ പ്രസംഗിച്ചു.

തദ്ദേശ സ്ഥാപനങ്ങളിലെ സംവരണ വാർഡ് നറുക്കെടുപ്പ്

മലപ്പുറം: തദ്ദേശ തെരഞ്ഞെടുപ്പിന്‍റെ ഭാഗമായി വിവിധ തദ്ദേശ സ്ഥാപനങ്ങളിലെ സംവരണ വാർഡുകളെ ജില്ലാ തെരഞ്ഞെടുപ്പ് ഓഫീസർ കൂടിയായ കളക്ടറുടെ നേതൃത്വത്തിൽ നറുക്കെടുപ്പിലൂടെ തെരഞ്ഞെടുത്തു. മങ്കട, കൊണ്ടോട്ടി, തിരൂരങ്ങാടി, കുറ്റിപ്പുറം ബ്ലോക്കുകളുടെ പരിധിയിൽ ഉൾപ്പെട്ട സംവരണ വാർഡുകളാണ് ഇന്നലെ നറുക്കെടുത്തത്. നറുക്കെടുപ്പ് ഇന്നും തുടരും. മങ്കട ബ്ലോക്ക് പരിധിയിലെ പഞ്ചായത്തുകളിലെ സംവരണ വാർഡുകൾ കുറുവ ഗ്രാമപഞ്ചായത്ത്: പട്ടികജാതി സംവരണം-15- ചേണ്ടി. സ്ത്രീ സംവരണ വാർഡുകൾ: 1-മുല്ലപ്പള്ളി 2- കുറുവ, 3-സമൂസപ്പടി, 6-കരിഞ്ചാപാടിവെസ്റ്റ്, 8-പടപ്പറന്പ്, 9- ചന്തപ്പറന്പ്, 11-തോറ, 12- വാഴേങ്ങൽ, 14- അന്പലപ്പറന്പ്, 17- ചന്ദനപ്പറന്പ്. 21- മേക്കുളന്പ്, 22- തെക്കുംകുളന്പ്. പുഴക്കാട്ടിരി പഞ്ചായത്ത്: പട്ടികജാതി സംവരണം: 1-രാമപുരം നോർത്ത്. സ്ത്രീ സംവരണം: 3- പനങ്ങാങ്ങര, 38, 5- രാമപുരം ഉടുന്പനാശേരി, 6- കട്ടിലശേരി, 8- പാതിരമണ്ണ ഈസ്റ്റ്, 9- പുഴക്കാട്ടിരി ഈസ്റ്റ്, 11- കോട്ട് വാട് വെസ്റ്റ്, 13- പള്ള്യാൽ കടുങ്ങപുരം ഈസ്റ്റ്, 15- പൊട്ടിപ്പാറ, 16- പരവക്കൽ, 18- കട്ടിലശേരി നോർത്ത്. കൂട്ടിലങ്ങാടി പഞ്ചായത്ത്: പട്ടികജാതി സംവരണം: 17- പാറടി. സ്ത്രീ സംവരണ വാർഡുകൾ: 1- പടിഞ്ഞാറ്റും മുറി, 2 പടിഞ്ഞാറ്റുംമുറി ടൗണ്‍, 7 കാഞ്ഞമണ്ണ, 8 വള്ളിക്കാപറ്റ, 10 വെണ്ണക്കോട്, 11 കൊഴിഞ്ഞിൽ, 12- കുളപറന്പ്, 14- ചെലൂർ, 15- കടുപ്പുറം, 20- മെരുവിൽകുന്ന്, 22- പടിഞ്ഞാറ്റുംമുറി വെസ്റ്റ്. മൂർക്കനാട് പഞ്ചായത്ത്: പട്ടികജാതി സ്ത്രീ സംവരണം: 22- കൊളത്തൂർ പടിഞ്ഞാറെകുളന്പ്. പട്ടികജാതി ജനറൽ സംവരണം: 20- വേങ്ങാട് ഇല്ലിക്കോട്. സ്ത്രീ സംവരണം: 4- കൊളത്തൂർ കറുപ്പത്താൽ, 6- കൊളത്തൂർ സ്റ്റേഷൻ പടി, 7- കൊളത്തൂർ ഓണപ്പുട, 8- കൊളത്തൂർ അന്പലപ്പടി, 9- കൊളത്തൂർ ആലിൻ കൂട്ടം, 10- വേങ്ങാട് കിഴക്കേക്കര, 11- പുന്നക്കാട്, 13- മൂർക്കനാട് ഇയ്യക്കാട്, 15- മൂർക്കനാട് പടിഞ്ഞാറ്റുംപുറം, 19- വെങ്ങാട് പള്ളിപ്പടി. മക്കരപ്പറന്പ് പഞ്ചായത്ത്: പട്ടികജാതി സംവരണം: 9- തടത്തിൽകുണ്ട്. സ്ത്രീ സംവരണം: 1- കാച്ചിനിക്കാട്, 2-പേട്ടപ്പടി, 3- വെള്ളാട്ടു പറന്പ്, 4- ചെട്ടാരങ്ങാടി, 7- വടക്കേ കുളന്പ്, 8-വടക്കാങ്ങര, 13- മക്കരപ്പറന്പ് അന്പലപ്പടി,14- കുഴിയേങ്ങൽ. മങ്കടപഞ്ചായത്ത്: പട്ടികജാതി സ്ത്രീ സംവരണം: 18- മഞ്ചേരിതോട്. പട്ടികജാതി സംവരണം: 7- ചേരിയം വെസ്റ്റ്. സ്ത്രീ സംവരണം: 2- വെള്ളില നിരവ്, 3- കോഴിക്കോട്ട് പറന്പ്, 4- കടന്നമണ്ണ, 5- വേരും പുലാക്കൽ, 8- ചേരിയം ഈസ്റ്റ്, 10- കൂട്ടിൽ, 14- മങ്കട ടൗണ്‍, 15- മങ്കട, 16- കർക്കിടകം, 20- പുളിശേരിക്കുന്ന്. തേഞ്ഞിപ്പലം പഞ്ചായത്ത്: പട്ടികജാതി സംവരണം: 12- പാണന്പ്ര. പട്ടിക ജാതി സ്ത്രീ സംവരണം: 3- ഇല്ലത്ത്. സ്ത്രീ സംവരണ വാർഡുകൾ: 5- യൂണിവേഴ്സിറ്റി, 7-ദേവതിയാൽ , 8-കൊയപ്പ, 10- പുഞ്ചപ്പാടം, 11- ചുള്ളോട്ട് പറന്പ്, 15- ആലുങ്ങൽ, 17- കൊളത്തോട്, 19- ചെനക്കലങ്ങാടി, 20- പാടാട്ടാൽ. വള്ളിക്കുന്ന് പഞ്ചായത്ത്: പട്ടികജാതി സംവരണം: 22- റെയിൽവേ സ്റ്റേഷൻ. പട്ടിക ജാതി സ്ത്രീ സംവരണം: 15- മണ്ണട്ടാംപ്പാറ. സ്ത്രീ സംവരണ വാർഡുകൾ: 1- കടലുണ്ടി നഗരം, 3-കീഴയിൽ, 5-ആനയറ ങ്ങാടി , 8-മുണ്ടിയംകാവ് പറന്പ്, 9- മഠത്തിൽ പുറായി, 10-അത്താണിക്കൽ, 11- കച്ചേരിക്കുന്ന്, 13- കരുമരക്കാട്, 16- കൊടക്കാട്, 17- ആലിൻചുവട് , 24- ആനങ്ങാടി. പെരുവള്ളൂർ പഞ്ചായത്ത്: പട്ടികജാതി സംവരണം: 14- പറച്ചിനപ്പുറായ. പട്ടിക ജാതി സ്ത്രീ സംവരണം: 19-വലിയപ്പറന്പ്. സ്ത്രീ സംവരണ വാർഡുകൾ: 2-ചാത്രത്തൊടി , 3- കാക്കത്തടം, 4- കാടപ്പടി , 5-കരുവാൻകല്ല്, 6-നടുക്കര, 10-പൊറ്റമ്മൽ മാട്, 15-ചെനക്കൽ, 16-പൂവത്തൻമാട്, 17- കൂമണ്ണ, 18- സൂപ്പർ ബസാർ.

‘സൗരോർജ വേലി പ്രവൃത്തി തടസപ്പെടുത്തുന്നവർക്കെതിരേ നടപടി’

വന്യജീവി ആക്രമണം തടയാൻ യോഗം ചേർന്നു മലപ്പുറം: വന്യമൃഗശല്യം ലഘൂകരികരിക്കുന്നതിന്‍റെ ഭാഗമായി സൗരോർജ വേലികൾ സ്ഥാപിക്കുന്നത് ആരെങ്കിലും തടസപ്പെടുത്തിയാൽ കർശനമായ നിയമനടപടികൾ സ്വീകരിക്കുമെന്ന് ജില്ലാ കളക്ടർ വി.ആർ. വിനോദ്. വന്യജീവി ശല്യം കുറയ്ക്കുന്നതിന്‍റെ ഭാഗമായി വനംവകുപ്പിന്‍റെ നേതൃത്വത്തിൽ നടക്കുന്ന 45 ദിവസത്തെ തീവ്രയജ്ഞ പരിപാടിയുടെ ഭാഗമായി കളക്ടറുടെ അധ്യക്ഷതയിൽ ചേർന്ന നിലന്പൂർ നോർത്ത് ഡിവിഷൻ ഫോറസ്റ്റ് ഉദ്യോഗസ്ഥരുടെയും വിവിധ വകുപ്പ് ഉദ്യോഗസ്ഥരുടെയും സംയുക്ത യോഗത്തിലാണ് കളക്ടറുടെ നിർദേശം. നിലന്പൂർ നോർത്ത് ഡിഎഫ്ഒ പി. ധനേഷ്കുമാർ ആദ്യഘട്ടത്തിൽ ലഭിച്ച പരാതികളിൽ ജില്ലാതലത്തിൽ പരിഹാര നടപടികൾ ആവശ്യമായ വിഷയങ്ങൾ യോഗത്തിൽ അവതരിപ്പിച്ചു. ഫെൻസിംഗ് പരിപാലനം ഉറപ്പാക്കുന്നതിന് പഞ്ചായത്തുകൾ ഇന്നോവേറ്റീവ് പ്രോജക്ടിൽ ഉൾപ്പെടുത്തി വാച്ചർമാരെ നിയമിക്കണമെന്നും തെരഞ്ഞെടുത്ത വാച്ചർമാർക്ക് വനംവകുപ്പ് പരിശീലനം നൽകണമെന്നും കളക്ടർ നിർദേശിച്ചു. മുണ്ടേരി സീഡ് ഫാമിലെ തൊഴിലാളികളെ റൊട്ടേഷൻ അടിസ്ഥാനത്തിൽ ഫെൻസിംഗ് പരിപാലന പ്രവർത്തനങ്ങൾക്ക് വിനിയോഗിക്കാനും അവർക്ക് ആവശ്യമായ പരിശീലനം നൽകാനും തീരുമാനമായി. ദുരന്ത നിവാരണ വിഭാഗം ഡെപ്യൂട്ടി കളക്ടർ സ്വാതി ചന്ദ്രമോഹൻ, മിഷൻ ഫെൻസിംഗ് സ്റ്റേറ്റ് ലെവൽ നോഡൽ ഓഫീസർ എം.കെ. സമീർ, വിവിധ വകുപ്പ് പ്രതിനിധികൾ എന്നിവർ യോഗത്തിൽ പങ്കെടുത്തു. പ്രധാന തീരുമാനങ്ങൾ സ്വകാര്യ തോട്ടങ്ങളിലെ കാട് വെട്ടണം വനമേഖലയോട് ചേർന്നുള്ള സ്വകാര്യതോട്ടങ്ങളിൽ കാട് വെട്ടാതെ കിടക്കുന്നത് വന്യമൃഗ ശല്യത്തിന് കാരണമാകുന്നതായി യോഗം വിലയിരുത്തി. ഇത്തരം സ്ഥലങ്ങളുടെ ഉടമകൾക്ക് കാട് വെട്ടാനുള്ള നോട്ടീസ് നൽകാനും നിർദേശങ്ങൾ അവഗണിച്ചാൽ പഞ്ചായത്തിന്‍റെ ചെലവിൽ കാട് വെട്ടി തുക ഉടമയിൽ നിന്ന് ഈടാക്കുമെന്നും കളക്ടർ പറഞ്ഞു. വർഷങ്ങളായി ഉടമകളില്ലാതെ കാട് മൂടി കിടക്കുന്ന സ്ഥലങ്ങൾ കൃഷിക്ക് ഉപയോഗപ്പെടുത്താനുള്ള സാധ്യതകൾ പരിശോധിക്കുമെന്നും കളക്ടർ അറിയിച്ചു. ദുരന്തങ്ങൾ അറിയിക്കാൻ സൗകര്യമൊരുക്കും വനംവകുപ്പിന്‍റെ വിവിധ സംഘർഷ ലഘൂകരണ പ്രവർത്തനങ്ങൾക്ക് സിഎസ്ആർ ഫണ്ട് ലഭ്യമാക്കുന്നതിന് അത്തരം സ്ഥാപനങ്ങൾക്ക് ജില്ലാ കളക്ടർ കത്ത് നൽകും. വനംവകുപ്പിന്‍റെ ജില്ലാ എമർജൻസി ഓപറേഷൻ സെന്‍റർ ജില്ലാ ഭരണകൂടത്തിന്‍റെ സെന്‍ററുമായി ബന്ധിപ്പിച്ച് പൊതുജനങ്ങൾക്ക് വന്യമൃഗ ആക്രമണം ഉൾപ്പെടെ ദുരന്തങ്ങൾ അറിയിക്കാൻ ഒരൊറ്റ നന്പറിൽ വിളിക്കാനുള്ള സൗകര്യം ഒരുക്കാനും തീരുമാനിച്ചു. നാടുകാണി ചുരത്തിൽ മാലിന്യം നിക്ഷേപിക്കുന്നത് തടയാൻ സ്ക്വാഡ് നാടുകാണി ചുരത്തിൽ മാലിന്യം നിക്ഷേപിക്കുന്നത് തടയാൻ വനംവകുപ്പും പഞ്ചായത്തും ചേർന്ന് പ്രത്യേക സ്ക്വാഡ് രൂപീകരിക്കാനും നിയമലംഘകരിൽ നിന്ന് കനത്ത പിഴ ഈടാക്കാനും യോഗം തീരുമാനിച്ചു. വനമേഖലയിലെ വിനോദസഞ്ചാരികൾ പ്ലാസ്റ്റിക് പാത്രങ്ങൾ ഉപയോഗിക്കുന്നത് തടയാൻ ചെക്ക് പോസ്റ്റുകളിൽ പരിശോധന ശക്തമാക്കുകയും പിടിച്ചെടുക്കുന്ന പാത്രങ്ങൾ ഹരിത കർമസേന മുഖേന സ്റ്റീൽ പ്ലേറ്റുകളാൽ പകരം വയ്ക്കുകയും ചെയ്യും. കൂടാതെ, ഊട്ടി മാതൃകയിൽ വിനോദ സഞ്ചാരികളിൽ നിന്ന് ഗ്രീൻ ടാക്സ് ഈടാക്കി ലഭ്യമാകുന്ന തുക മനുഷ്യ-വന്യജീവി സംഘർഷ ലഘൂകരണ പ്രവർത്തനങ്ങൾക്ക് ഉപയോഗിക്കുന്നതിനുള്ള അനുമതിക്കായി സർക്കാരിനോട് ശിപാർശ ചെയ്യുവാൻ യോഗം തീരുമാനിച്ചു. കാട്ടുപന്നികളെ വെടിവയ്ക്കുന്നതിന് പ്രതിഫലം വർധിപ്പിക്കാൻ ശിപാർശ ചെയ്യും കാടിനകത്ത് കുളം, ചെക്ക് ഡാം, വൈദേശിക സസ്യനിർമാർജനം തുടങ്ങിയ പ്രവർത്തനങ്ങൾ എൻആർഇജിഎസ് പദ്ധതിയിൽ ഉൾപ്പെടുത്താൻ പഞ്ചായത്തുകൾക്ക് കളക്ടർ നിർദേശം നൽകി. കാട്ടുപന്നികളുടെ നിയന്ത്രണവുമായി ബന്ധപ്പെട്ട് ഷൂട്ടർമാരുടെ പ്രതിഫലം വർധിപ്പിക്കുന്ന കാര്യം പരിഗണിക്കുന്നതിനായി അടിയന്തര യോഗം വിളിക്കാനും സാമൂഹ്യസേവനത്തിന്‍റെ ഭാഗമായും ഈ പ്രവർത്തനം കാണണമെന്ന് കളക്ടർ ആവശ്യപ്പെട്ടു. കാട്ടുപന്നികളെ വെടിവയ്ക്കുന്നതിനും സംസ്കരിക്കുന്നതിനും അനുവദിക്കുന്ന ഫണ്ട് വർധിപ്പിക്കാൻ സർക്കാരിനോട് ശിപാർശ ചെയ്യുമെന്നും അറിയിച്ചു.

ആസ്തി രജിസ്റ്ററിൽ നിന്ന് കിണർ അപ്രത്യക്ഷമായി; ആദിവാസി കുടുംബങ്ങൾ പഞ്ചായത്ത് സെക്രട്ടറിയെ ഉപരോധിച്ചു

കാളികാവ്: ചോക്കാട് നെല്ലിയാംപാടം ആദിവാസി നഗറിലെ കുടിവെള്ള പദ്ധതിയുടെ ദശാബ്ദങ്ങളായി ഉപയോഗത്തിലിരുന്ന കിണർ ആസ്തി രജിസ്റ്ററിൽ നിന്ന് അപ്രത്യക്ഷമായി. ഇതേത്തുടർന്ന് കുടിവെള്ള പദ്ധതിയുടെ അറ്റകുറ്റപ്പണിക്കായി അനുവദിച്ച ഫണ്ട് പാഴായി പോകുമെന്ന് ആശങ്കയിലായ നെല്ലിയാംപാടം ആദിവാസി നഗറിലെ കുടുംബങ്ങൾ ഗ്രാമപഞ്ചായത്തിലെത്തി സെക്രട്ടറിയെ ഏറെ നേരം ബന്ദിയാക്കി. പതിറ്റാണ്ടുകളോളം പ്രദേശത്തുകാർ ഉപയോഗിച്ച പൊതുകിണർ പഞ്ചായത്തിന്‍റെ ആസ്തി രജിസ്റ്ററിൽ കാണാനില്ലാത്തതാണ് പ്രശ്നമായത്. ജില്ലാ പഞ്ചായത്തും ഗ്രാമപഞ്ചായത്തും കുടിവെള്ള പദ്ധതി പ്രകാരം ഒന്നിലധികം തവണ ഫണ്ട് ചെലവഴിച്ച് നിർമിച്ചതും മറ്റു പ്രവൃത്തികൾ നടത്തുകയും ചെയ്ത കിണറാണ് ഇപ്പോൾ പഞ്ചായത്തിന്‍റെ ആസ്തി രജിസ്റ്ററിൽ നിന്ന് അപ്രത്യക്ഷമായത്. ഇതോടെ ജില്ലാ പഞ്ചായത്ത് നിർമിച്ച നിലവിലെ കുടിവെള്ള വിതരണ പദ്ധതി പാടെ തകരാറിലായിട്ടുണ്ട്. പദ്ധതിയുടെ റിപ്പയറിംഗിനു വേണ്ടി ഗ്രാമപഞ്ചായത്ത് ഫണ്ട് വകയിരുത്തിയ ഘട്ടത്തിലാണ് ആസ്തി രജിസ്റ്ററിൽ നിന്ന് കിണർ അപ്രത്യക്ഷമായ വിവരം ബന്ധപ്പെട്ടവർ അറിയുന്നത്. കുടിവെള്ളത്തിനായി മറ്റു മാർഗങ്ങളില്ലാതെ പ്രയാസപ്പെടുന്ന നെല്ലിയാന്പാടത്തുകാർ പഞ്ചായത്തിന്‍റെ അനാസ്ഥക്കെതിരേ രംഗത്ത് വരികയായിരുന്നു. വാർഡ് മെന്പർ കെ.ടി. സലീന, സിപിഎം ലോക്കൽ സെക്രട്ടറി കെ.ടി. മുജീബ്, മെന്പർമാരായ കെ. ഷാഹിനാബാനു, എം. അൻവർ എന്നിവരുടെ നേതൃത്വത്തിലാണ് പഞ്ചായത്ത് സെക്രട്ടറിയെ ബന്ദിയാക്കി ഉപരോധിച്ചത്. ഒടുവിൽ വിഷയം പരിശോധിച്ച് രണ്ടു ദിവസത്തിനകം പരിഹരിക്കാമെന്ന വ്യവസ്ഥയിൽ ഉപരോധം അവസാനിപ്പിക്കുകയായിരുന്നു. കാളികാവ് എസ്ഐ ഇല്ലിക്കൽ അൻവർ സാദത്തിന്‍റെ നേതൃത്വത്തിൽ പോലീസ് സ്ഥലത്തെത്തിയിരുന്നു.

പെരുവന്പാടത്തെ റോഡുകൾ ഉദ്ഘാടനം ചെയ്തു

നിലന്പൂർ: പെരുവന്പാടത്ത് വിവിധ റോഡുകളുടെ ഉദ്ഘാടനവും പ്രവൃത്തി ഉദ്ഘാടനവും നടത്തി. എംഎൽഎ ഫണ്ടിൽനിന്ന് 10 ലക്ഷം രൂപ വീതം ചെലവഴിച്ച് നിർമിച്ച മേലെ പെരുവന്പാടം വനം റോഡ്, വണ്ടനാനിക്കൽ റോഡ്, ബ്ലോക്ക് പഞ്ചായത്ത് ഫണ്ടിൽനിന്ന് 10 ലക്ഷം രൂപ ചെലവിൽ നിർമിച്ച പെരുന്പാടം നഗർ റോഡ് എന്നിവയുടെ ഉദ്ഘാടനവും ഗ്രാമപഞ്ചായത്ത് 10 ലക്ഷം രൂപ ചെലവഴിച്ച് നിർമിക്കുന്ന പെരുന്പാടം പുഴക്കടവ്-തൊണ്ടിയൽ നടപ്പാത, എംഎൽഎ ഫണ്ടിൽനിന്ന് 10 ലക്ഷം രൂപ ചെലവഴിച്ചുള്ള ഇടിവണ്ണ - പെരുവന്പാടം റോഡ് എന്നിവയുടെ പ്രവൃത്തി ഉദ്ഘാടനവുമാണ് പി.കെ. ബഷീർ എംഎൽഎ നിർവഹിച്ചത്. മേലെ പെരുവന്പാടം വനം റോഡ് ഉദ്ഘാടനത്തിൽ നിലന്പൂർ നോർത്ത് ഡിഎഫ്ഒ പി. ധനേഷ് കുമാറും പങ്കെടുത്തു. പെരുവന്പാടം വാർഡിൽ ഉൾപ്പെടെ ചാലിയാർ പഞ്ചായത്തിന്‍റെ വിവിധ ഭാഗങ്ങളിൽ എംഎൽഎ ഫണ്ട് ഉപയോഗിച്ച് നിരവധി റോഡുകളുടെ പ്രവൃത്തി പൂർത്തീരിക്കാൻ സാധിച്ചതായി എംഎൽഎ പറഞ്ഞു. 112 കോടിയിലേറെ രൂപ ചെലവഴിച്ച് നിർമാണം ആരംഭിച്ചിട്ടുള്ള നിലന്പൂർ - നായാടംപൊയിൽ മലയോര ഹൈവേ മലയോര മേഖലക്ക് ഏറെ നേട്ടമാകുമെന്നും എംഎൽഎ പറഞ്ഞു. ഒരു പ്രതിപക്ഷ എംഎൽഎ എന്ന നിലയിൽ ജനങ്ങളുടെ പ്രതീക്ഷക്കനുസരിച്ച് വികസന പ്രവർത്തനങ്ങൾ നടത്താൻ കഴിഞ്ഞതായും പി.കെ. ബഷീർ പറഞ്ഞു. നിലന്പൂർ ബ്ലോക്ക് പഞ്ചായത്ത് പ്രസിഡന്‍റ് പി. പുഷ്പവല്ലി അധ്യക്ഷത വഹിച്ചു. ചാലിയാർ ഗ്രാമപഞ്ചായത്ത് പ്രസിഡന്‍റ് പി. മനോഹരൻ മുഖ്യപ്രഭാഷണം നടത്തി. അഡ്വ. ഐ.കെ. യൂനസ് സലിം, കല്ലട കുഞ്ഞുമുഹമ്മദ്, നാലകത്ത് ഹൈദരാലി, ബെന്നി കൈതോലിൽ, തോണിക്കടവൻ ഷൗക്കത്ത്, ഹാരീസ് ആട്ടിരി എന്നിവർ പ്രസംഗിച്ചു. കഴിഞ്ഞ അഞ്ചുവർഷംകൊണ്ട് എംഎൽഎ, ജില്ലാ പഞ്ചായത്ത്, ബ്ലോക്ക് പഞ്ചായത്ത്, ഗ്രാമപഞ്ചായത്ത് ഫണ്ടുകൾ ഉപയോഗിച്ച് വാർഡിൽ രണ്ട് കോടി രൂപയുടെ വികസന പദ്ധതികൾ നടപ്പാക്കാൻ കഴിഞ്ഞതായി വാർഡ് അംഗം സിബി അന്പാട്ട് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]