കോട്ടയം: അശരണരായ വനിതകള്ക്കു എംപ്ലോയ്മെന്റ് എക്സ്ചേഞ്ച് വഴി നടപ്പാക്കുന്ന ശരണ്യ സ്വയംതൊഴില് പദ്ധതിയില് 49 അപേക്ഷകള്ക്ക് ജില്ലാതല കമ്മിറ്റി യോഗം അംഗീകാരം നല്കി.
ജില്ലയിലെ വൈക്കം, കോട്ടയം, ചങ്ങനാശേരി, കാഞ്ഞിരപ്പള്ളി, പാലാ എംപ്ലോയ്മെന്റ് എക്സ്ചേഞ്ചുകള് വഴി ലഭിച്ച 63 അപേക്ഷകളാണ് പരിഗണനയ്ക്കെത്തിയത്. പശുവളര്ത്തല്, വസ്ത്രനിര്മാണം, ഹോട്ടല്, തട്ടുകട, ക്ലീനിംഗ് ഉത്പന്നങ്ങള്, തയ്യല്യൂണിറ്റ്, എല്ഇഡി ഉത്പാദനം, സ്റ്റേഷനറിക്കട, ചായക്കട, കൂണ്കൃഷി, ഇറച്ചിക്കോഴിവളര്ത്തല്, പലചരക്കുകട, അച്ചാര് യൂണിറ്റ്, പലഹാരക്കട, ബേക്കറി തുടങ്ങിയ സംരംഭങ്ങള്ക്കാണ് അപേക്ഷകള് സമര്പ്പിച്ചിട്ടുള്ളത്.
പരമാവധി 50,000 രൂപ വരെ പലിശരഹിത വായ്പ അനുവദിക്കും. കളക്ടറേറ്റ് തൂലിക കോണ്ഫറന്സ് ഹാളില് ചേര്ന്ന ശരണ്യ ജില്ലാ കമ്മിറ്റി യോഗത്തില് അഡീഷണല് ജില്ലാ മജിസ്ട്രേറ്റ് ബീന പി. ആനന്ദ്, ജില്ലാ എംപ്ലോയ്മെന്റ് ഓഫീസര് ജി. സജയന്, ഏറ്റുമാനൂര് ഗവൺമെന്റ് ഐടിഐ പ്രിന്സിപ്പല് കെ. സന്തോഷ്കുമാര്, അസിസ്റ്റന്റ് ഇന്ഫര്മേഷന് ഓഫീസര് ഇ.വി. ഷിബു, ജില്ലാ വ്യവസായകേന്ദ്രം പ്രതിനിധി എം. അരുണ്രാജ്, കുടുംബശ്രീ പ്രതിനിധി ജിത എ. നായര് എന്നിവര് പങ്കെടുത്തു.