വെളിയനാട്: ഭരണ-രാഷ്ട്രീയ സംവിധാനങ്ങള് കുട്ടനാടിനെ അവഗണിക്കുന്ന നിലപാട് സ്വീകരിച്ചാല് വരുംതെരഞ്ഞെടുപ്പുകളില് പ്രത്യക്ഷ നിലപാട് സ്വീകരിക്കാന് നിര്ബന്ധിതരാകുമെന്ന് കത്തോലിക്ക കോണ്ഗ്രസ് ചങ്ങനാശേരി അതിരൂപത. പരമ്പരാഗത കാര്ഷിക മേഖലയില് നിലനില്ക്കുന്ന പ്രശ്നങ്ങള്,
നെല്ലിന്റെ വില വൈകല്, ശുദ്ധജല ക്ഷാമം, പശ്ചാത്തല മേഖലയിലെ അശാസ്ത്രീയ നിര്മാണ പ്രവര്ത്തനങ്ങള് തുടങ്ങി സാധാരണ ജനങ്ങളെ ബാധിക്കുന്ന നിരവധിയായ പ്രശ്നങ്ങള് കുട്ടനാട്ടില് നിലനില്ക്കുമ്പോള് ഭരണ, പ്രതിപക്ഷ കക്ഷികള് നിസംഗത പുലര്ത്തിയാല് കുട്ടനാട്ടില് കത്തോലിക്ക കോണ്ഗ്രസിന് വ്യക്തമായ രാഷ്ട്രീയ നിലപാടുകള് സ്വീകരിക്കേണ്ടിവരുമെന്നും യോഗം മുന്നറിയിപ്പു നല്കി.
വെളിയനാട് സെന്റ് സേവ്യേഴ്സ് യൂണിറ്റില് സംഘടിപ്പിച്ച എവേക്ക്-24 യൂണിറ്റ് ശക്തീകരണ പരിപാടിയിലാണ് കത്തോലിക്ക കോണ്ഗ്രസ് നിലപാട് വ്യക്തമാക്കിയത്.
യൂണിറ്റ് പ്രസിഡന്റ് ജോസഫ് മാത്യുവിന്റെ അധ്യക്ഷതയില് കൂടിയ സമ്മേളനം അതിരൂപത ഡയറക്ടര് ഫാ. സെബാസ്റ്റ്യന് ചാമക്കാല ഉദ്ഘാടനം ചെയ്തു. യൂണിറ്റ് ഡയറക്ടര് ഫാ. ജോസഫ് കുറിയന്നൂര്പറമ്പില് ആമുഖസന്ദേശവും അതിരൂപത പ്രസിഡന്റ് ബിജു സെബാസ്റ്റ്യന് പടിഞ്ഞാറേവീട്ടില് മുഖ്യസന്ദേശവും അതിരൂപത ജനറല് സെക്രട്ടറി ബിനു ഡൊമിനിക് നടുവിലേഴം വിഷയാവതരണ പ്രസംഗവും നടത്തി.
കത്തോലിക്ക കോണ്ഗ്രസ് അതിരൂപത ഭാരവാഹികളായ ജോസ് ജോണ് വെങ്ങാന്തറ, ജിനോ ജോസഫ് കളത്തില്, രാജേഷ് ജോണ് നന്തികാട്, ടോമിച്ചന് അയ്യരുകുളങ്ങര, ജോബ് കെ. മാത്യു, സി.ടി. തോമസ് കാച്ചാംകോട്, കുഞ്ഞ് കളപ്പുര, സെബാസ്റ്റ്യന് വര്ഗീസ്, ചാക്കപ്പന് ആന്റണി, പി.സി. കുഞ്ഞപ്പന്, ജെസി ആന്റണി, സിസി അമ്പാട്ട് എന്നിവര് പ്രസംഗിച്ചു.