കോതമംഗലം: വിവിധ പ്രശ്നങ്ങളിൽ നട്ടംതിരിയുന്ന കർഷകരുടെ ക്ഷമ ഇനിയും പരീക്ഷിക്കരുതെന്നു കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ. കത്തോലിക്ക കോണ്ഗ്രസ് കോതമംഗലം ഫൊറോനയുടെ നേതൃത്വത്തിൽ സംഘടിപ്പിച്ച കർഷക പ്രതിഷേധ സദസ് ഉദ്ഘാടനം ചെയ്യുകയായിരുന്നു രൂപതാധ്യക്ഷൻ.
എക്കാലത്തും അധ്വാനിക്കുവാനും ഭാരം വഹിക്കാനുമുള്ള കഴുതകളാണ് കർഷകരെന്ന് ആരും കരുതേണ്ടതില്ല. തെരെഞ്ഞെടുപ്പ് സമയങ്ങളിൽ മാത്രം കർഷകരെ ഓർത്താൽ പോരെന്നും എക്കാലവും അവരെ സംരക്ഷിക്കണമെന്നും ബിഷപ് ആവശ്യപ്പെട്ടു. മനുഷ്യ ജീവനേക്കാൾ കാട്ടുമൃഗങ്ങൾക്ക് പരിഗണന നൽകുന്ന അധികൃതരുടെ കാട്ടുനീതിക്കെതിരെയും കർഷകർക്കും ഇവിടെ ആത്മാഭിമാനത്തോടെ ജീവിക്കണമെന്ന് സന്ദേശം ഉയർത്തിയുമാണ് കർഷക പ്രതിഷേധ സദസ് സംഘടിപ്പിച്ചത്.
പരിപാടിയുടെ ഭാഗമായി കർഷക പ്രതിഷേധ ജ്വാല തെളിക്കുകയും കർഷക സംരക്ഷണ പ്രതിജ്ഞയെടുക്കുകയും ചെയ്തു. കോതമംഗലം ഫൊറോന പ്രസിഡന്റ് സണ്ണി കടൂത്താഴെ അധ്യക്ഷത വഹിച്ചു. കർഷക അതിജീവന സമിതി ജില്ലാ കണ്വീനർ ഫാ. തോമസ് ജെ. പറയിടം മുഖ്യപ്രഭാഷണം നടത്തി.
രൂപത വികാരി ജനറാൾ മോണ്. ഡോ. പയസ് മലേക്കണ്ടത്തിൽ, ഗ്ലോബൽ ജനറൽ സെക്രട്ടറി രാജീവ് കൊച്ചുപറന്പിൽ, ഫൊറോന ഡയറക്ടർ ഫാ. ജിയോ തടിക്കാട്ട്, ജനറൽ സെക്രട്ടറി ഷൈജു ഇഞ്ചക്കൽ, ജിജി പുളിക്കൽ, ആന്റണി പാലക്കുഴി, ബേബിച്ചൻ നിധീരിക്കൽ, ജോർജ് ഒലിയപ്പുറം എന്നിവർ പ്രസംഗിച്ചു. രൂപത ചാൻസിലർ ഫാ. ജോസ് കുളത്തൂർ സമാപന സന്ദേശം നൽകി. മോൻസി മങ്ങാട്ട്, ജോർജ് മങ്ങാട്ട്, വി.യു. ചാക്കോ, ബിജു വെട്ടിക്കുഴ, പയസ് തെക്കേകുന്നേൽ, സീന മുണ്ടക്കൽ, തോമസ് മലേക്കുടി, പയസ് ഓലിയപ്പുറം, ജോർജ് അന്പാട്ട്, ജോണ്സണ് പീച്ചാട്ട്, ബെന്നി പാലക്കുഴ, സേവ്യർ അറക്കൽ, സോണി പാന്പക്കൽ, ജിജോ അറക്കൽ, ബിനോയ് പള്ളത്ത്, ജോജി മുക്കാലുവീട്ടിൽ, ജോയി ജോസഫ് എലിച്ചറയിൽ, ജോസ് കൈതക്കൽ എന്നിവർ നേതൃത്വം നൽകി.