ഇരിട്ടി: കരിന്തളം വയനാട് 400 കെവി ലൈൻ നഷ്ടപരിഹാരവുമായി ബന്ധപ്പെട്ട് കണ്ണൂർ കളക്ടറേറ്റിൽ നടന്ന ചർച്ചയിലും തീരുമാനമായില്ല. മുൻ ചർച്ചയിൽ ന്യായവില സംബന്ധിച്ച വിവരങ്ങൾ നല്കാത്ത പഞ്ചായത്തുകളോട് ഉടൻ നല്കാൻ യോഗത്തിൽ കളക്ടർ നിർദേശിച്ചു. നിലവിൽ ആലക്കോട്, ഉദയഗിരി, ഏരുവേശി പഞ്ചായത്തുകൾ ലൈൻ കടന്നുപോകുന്ന പ്രദേശത്തിന്‍റെ ന്യായവില സംബന്ധിച്ച രേഖകൾ കൈമാറിയിട്ടില്ല.
ടവർ സ്ഥാപിക്കുന്ന സ്ഥലത്തിന് സെന്‍റിന് ഒരു ലക്ഷവും ലൈൻ കടന്നുപോകുന്ന സ്ഥലത്തിന് അരലക്ഷവും എന്ന ആവശ്യം സമരസമിതി ആവർത്തിച്ചു. വീടുകൾക്ക് സംഭവിക്കുന്ന നഷ്ടത്തിന് ഉചിതമായ നഷ്ടപരിഹാരം നല്കണം, വിഭജിക്കപ്പെട്ടു പോകുന്ന സ്ഥലം കൂടി നഷ്ടപരിഹാരത്തിൽ ഉൾപ്പെടുത്തണം എന്ന ആവശ്യവും യോഗത്തിൽ ഉയർന്നു.
കൂടുതൽ നാശനഷ്ടം ഒഴിവാക്കാൻ ലൈനിൽ അലൈൻമെന്‍റുകൾ ആവശ്യമെങ്കിൽ ആലോചിക്കാമെന്ന് അധികൃതർ യോഗത്തെ അറിയിച്ചു. ജനങ്ങളുടെ ആശങ്കയകറ്റാൻ ആലക്കോട്, ഉദയഗിരി, ഏരുവേശി പഞ്ചായത്തുകളെ ഉൾപ്പെടുത്തി ആലക്കോട് മേഖലയിൽ കളക്ടറുടെ അധ്യക്ഷതയിൽ ഒരു യോഗം വിളിക്കണമെന്ന നിർദേശം ആക്‌ഷൻ കൗൺസിൽ ചെയർമാൻ തോമസ് വർഗീസിന്‍റെ നിർദേശം അധ്യക്ഷൻ അംഗീകരിച്ചു.
ഭൂവുടമകളുടെ അനുമതിയില്ലാതെ നിർമാണ പ്രവൃത്തികൾ ആരംഭിക്കില്ല എന്ന ഉറപ്പും അധ്യക്ഷൻ പഞ്ചായത്ത് പ്രസിഡന്‍റുമാർക്ക് നല്കി.
എംഎൽഎമാരുടെയും കളക്ടറുടെയും അഭാവത്തിൽ സബ് കളക്ടർ കാർത്തിക് പാണിഗ്രാഹി യോഗത്തിന് അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയി കുര്യൻ, പഞ്ചായത്ത് പ്രസിഡന്‍റുമാരായ ആന്‍റണി സെബാസ്റ്റ്യൻ (കണിച്ചാർ), കുര്യാച്ചൻ പൈമ്പള്ളികുന്നേൽ (അയ്യൻകുന്ന്), പി. രജനി (പായം), പി.സി. ഷാജി (ഉളിക്കൽ), ബേബി ഓടംപള്ളി (നടുവിൽ), ജോണി കണ്ണിക്കാട്ട് (ആലക്കോട്), തോമസ് പുളിക്കക്കണ്ടം (സ്റ്റാൻഡിംഗ് കമ്മറ്റി ചെയർമാൻ, കേളകം), ഫാ. പയസ് പടിഞ്ഞാറേമുറിയിൽ, ആക്‌ഷൻ കമ്മിറ്റി ഭാരവാഹികളായ ബെന്നി പുതിയാമ്പുറം, ജയിംസ് നെല്ലിമൂട്ടിൽ, ഡെപ്യൂട്ടി ചീഫ് എൻജിനിയർ ഇൻചാർജ് ട്രാൻസ്‍ഗ്രിഡ് ഷൊർണൂർ വി. സുരേഷ്, എക്സിക്യൂട്ടീവ് എൻജിനിയർ ട്രാൻസ്‍ഗ്രിഡ് കണ്ണൂർ ഡിവിഷൻ എം. കൃഷ്‌ണേന്ദു തുടങ്ങിവർ യോഗത്തിൽ പങ്കെടുത്തു.