മുടപ്പല്ലൂർ - മംഗലംഡാം റോഡിന്‍റെ നവീകരണപ്രവൃത്തികൾ തുടങ്ങി : Deepika.com Nattu Visesham

PALAKKAD

മുടപ്പല്ലൂർ - മംഗലംഡാം റോഡിന്‍റെ നവീകരണപ്രവൃത്തികൾ തുടങ്ങി

Saturday, November 16, 2024 4:39 AM IST

വടക്കഞ്ചേരി: കാത്തിരിപ്പുകൾക്കും വിവാദങ്ങൾക്കുമൊടുവിൽ മുടപ്പല്ലൂർ - മംഗലംഡാം റോഡിന്‍റെ നവീകരണപ്രവൃത്തികൾ തുടങ്ങി. വശങ്ങളിൽ മെറ്റലിട്ട് ബലപ്പെടുത്തുന്ന ജോലികളാണ് ഇപ്പോൾ നടക്കുന്നത്. ഇതിനുപിന്നാലെ റീടാറിംഗ് പണികളും ഉണ്ടാകും. മംഗലംഡാം വിനോദ സഞ്ചാര കേന്ദ്രത്തിലേക്കും മലയോര മേഖലയിലേക്കുമുള്ള ഈ പ്രധാന റോഡിന്‍റെ വർക്കുകൾ വൈകുന്നതിനെതിരെ വ്യാപകമായ പ്രതിഷേധങ്ങളാണ് ഉയർന്നിരുന്നത്.

തകർന്നുകിടന്നിരുന്ന റോഡ് ഈയടുത്തായി കുടിവെള്ള പൈപ്പിടാൻ വെട്ടിപ്പൊളിച്ചത് വാഹന ഗതാഗതം ഏറെ ദുഷ്കരമാക്കി. വെള്ളത്തിന്‍റെ ഉറവിടം പോലും കണ്ടെത്താതെ കുടിവെള്ള പദ്ധതിയുടെ പേരിൽ റോഡുകൾ വെട്ടിപ്പൊളിച്ച് പൈപ്പുകൾ ഇടുന്നതിനെതിരെയായിരുന്നു പ്രതിഷേധം. മംഗലംഡാം റിസർവോയർ ഉറവിടമാക്കിയാണ് നാല് പഞ്ചായത്തുകളിലേക്കുള്ള കുടിവെള്ള പദ്ധതി ആസൂത്രണം ചെയ്തിട്ടുള്ളത്. ഇതിന് മംഗലംഡാമിന്‍റെ ജലസംഭരണ ശേഷികൂട്ടണം. സംഭരണ ശേഷി കൂട്ടാൻ ഡാമിലെ മണ്ണും ചെളിയും നീക്കം ചെയ്യണം.എന്നാൽ ഈ പ്രവൃത്തികളെല്ലാം രണ്ട് വർഷമായി മുടങ്ങികിടക്കുകയാണ്. ഇനി മണ്ണുനീക്കൽ ഏത് കാലത്ത് നടക്കും എന്നൊന്നും ആർക്കും ഒരു നിശ്ചയവുമില്ല.

ഇങ്ങനെയുള്ള പദ്ധതിയുടെ പൈപ്പിടലാണ് റോഡുകളെല്ലാം വെട്ടിപ്പൊളിച്ച് തകൃതിയായി നടക്കുന്നത്. മഴയില്ലെങ്കിൽ പൊടി നിറഞ്ഞ് യാത്ര ചെയ്യാൻ കഴിയാത്ത സ്ഥിതിയാണ് ഡാം റോഡിലുളളത്. മൂടിക്കെട്ടിയാണ് പാതയോരത്തെ കടകളിലെല്ലാം കച്ചവടം നടക്കുന്നത്. വീട്ടുകാരും ദുരിതത്തിലാണ്. റോഡിന്‍റെ പല ഭാഗത്തും മതിയായ വീതിയില്ലാത്തതും അപകടങ്ങൾക്കും കാരണമാകുന്നുണ്ട്. റോഡ് നവീകരണത്തിനായി ഇപ്പോൾ അനുവദിച്ചിട്ടുള്ള ഫണ്ട് അപര്യാപ്തമാണെന്നും ചൂണ്ടിക്കാട്ടുന്നു. ഇത് റീടാറിംഗ് വർക്കുകളിൽ അപാകതകളുണ്ടാക്കും. അങ്ങനെ വന്നാൽ റീടാറിംഗിന്‍റെ ആയുസും കുറയും.