മലപ്പുറം: കാല്പന്ത് കളിയെ നെഞ്ചേറ്റുന്ന അരീക്കോടിന്റെ മണ്ണില് ആത്മസമര്പ്പണത്തിന്റെയും കഠിനാധ്വാനത്തിന്റെയും പ്രതീകമമായ ജോളി ജോസഫിന് മലപ്പുറം ജില്ലാ പഞ്ചായത്തിന്റെ ആദരം.
അരീക്കോട് ഗവണ്മെന്റ് ഹയര് സെക്കന്ഡറി സ്കൂള് വളപ്പില് ഒരുക്കിയ ഔഷധ സസ്യങ്ങളാല് സമ്പന്നമായ ജൈവവൈവിധ്യ പാര്ക്കിന്റെ നിര്മാണത്തിന് ചുക്കാന് പിടിച്ചതിനാണ് ചിങ്ങം ഒന്നിന് കര്ഷകദിനത്തില് ജില്ലാ പഞ്ചായത്ത് പ്രസിഡന്റ് എം.കെ. റഫീഖ, ജില്ലാ പഞ്ചായത്ത് ഡിവിഷന് മെംബര് ഷെരിഫ തുടങ്ങിയവരുടെ സാന്നിധ്യത്തില് ജോളി ജോസ്ഫിനെ ആദരിച്ചത്.
അരിക്കോട് ജിഎച്ച്എസ്എസിലെ മുന് അധ്യാപകനാണ് ജോളി ജോസഫ്. കര്ഷക കുടുംബത്തില് ജനിച്ച ഇദ്ദേഹം അധ്യാപനത്തോടെപ്പം കാര്ഷിക മേഖലയിലും മികവ് തെളിയിച്ച വ്യക്തിയാണ്. അരീക്കോട് സ്കൂളിലെ ഉപയോഗശൂന്യമായ 45 സെന്റ് സ്ഥലത്ത് സഹപ്രവര്ത്തകരുടെ സഹകരണത്തോടെ ജോളി ജോസഫ് നിര്മിച്ച ജൈവ വൈവിധ്യപാര്ക്ക് സന്ദര്ശകര്ക്ക് വേറിട്ട അനുഭവമാണ് നല്കുന്നത്.
സ്കൂളിലെ പിടിഎ, എസ്എംസി കമ്മിറ്റികളുടെ മികച്ച പിന്തുണയയും സഹകരണവും ലഭിച്ചപ്പോള് പെരുമ്പറമ്പിന്റെ കാര്ഷിക ചരിത്രത്തില് ജൈവവൈവിധ്യപാര്ക്ക് മികവുറ്റതായി. കര്പ്പൂരം, കുന്തരിക്കം, രക്തചന്ദനം, പേര, നീര്മരുത്, പതിമുഖം, നെല്ലി, വിവിധതരം മുളകള് തുടങ്ങിയ വ്യത്യസ്ഥമായ സസ്യങ്ങള് വച്ചുപിടിപ്പിച്ചിരിക്കുന്നു. ഇതിനു പുറമെ പച്ചക്കറി കൃഷിയും ധാരാളമുണ്ട്. വരണ്ടുണങ്ങിയ സ്കൂള് വളപ്പിലെ മണ്ണില് കംപ്രസര് ഉപയോഗിച്ച് കുഴിയെടുത്താണ് സസ്യങ്ങള് നട്ടുപിടിച്ചിരിക്കുന്നതെന്നത് ശ്രദ്ധേയമാണ്. സമീപപ്രദേശത്തു നിന്നാണ് വെള്ളമെത്തിച്ചത്.
അധ്യാപകരുടെ കൂട്ടായ ശ്രമത്തിനൊപ്പം വിദ്യാര്ഥികളാണ് ഇവ സംരക്ഷിച്ചു പോരുന്നത്. കോവിഡ് കാലത്താണ് ജോളി ജോസഫ് രംഗത്തിറങ്ങിയത്. അദ്ദേഹം ഈ ആശയം മുന്നോട്ടുവച്ചപ്പോള്എല്ലാവരും പിന്തുണച്ചു. കോഴിക്കോട് ജില്ലയിലെ കൂടരഞ്ഞി സ്വദേശിയാണ് ജോളി ജോസഫ്. കളികളിലൂടെ ഇംഗ്ലീഷ് പഠനം എളുപ്പമാക്കുന്നനൂതനരീതി ആവിഷ്കരിച്ച് ശ്രദ്ധ നേടിയ വ്യക്തിയാണ് ഇദ്ദേഹം.
അരീക്കോട് ഗവണ്മെന്റ് സ്കൂളില് ജില്ലാ പഞ്ചായത്തിന്റെ സഹകരണത്തോടെ പുനര്നിര്മിച്ച സ്കൂള് ഗേറ്റിന്റെയും സ്റ്റേജിന്റെയും ഉദ്ഘാടന ചടങ്ങിലായിരുന്നു ജോളി ജോസഫിനെ ജില്ലാ പഞ്ചായത്ത് പ്രസിഡന്റ് എം.കെ. റഫീഖ പൊന്നാടയണിച്ച് ആദരിച്ചത്. ചടങ്ങില് വിവിധ പദ്ധതികളുടെ ഉദ്ഘാടനവും ജില്ലാ പഞ്ചായത്ത് പ്രസിഡന്റ് നിര്വഹിച്ചു. ജില്ലാ പഞ്ചായത്ത് മെംബര് ഷെരിഫ അധ്യക്ഷയായിരുന്നു.
അരിക്കോട് ഗ്രാമപഞ്ചായത്ത് പ്രസിഡന്റ് നൗഷര് കല്ലട, ബ്ലോക്ക് മെംബര് ഷിബിന് ലാല്, പിടിഎ പ്രസിഡന്റ് ടി.പി. ഉമ്മര്, എസ്എംസി ചെയര്മാന് സുരേഷ് ബാബു, പിടിഎ വൈസ് പ്രസിഡന്റ് അഷ്റഫ് പട്ടേക്കല്, എസ്എംസി വൈസ് ചെയര്മാന് റഷീദ് തലേക്കര, ജോളി ജോസഫ്, ഹയര് സെക്കന്ഡറി പ്രിന്സിപ്പല് മുഫിദ, ഹൈസ്കൂള് ഹെഡ്മാസ്റ്റര് ഫസലുറഹ്മാന് എന്നിവര് പ്രസംഗിച്ചു.