നെടുമ്പാശേരിയിലെ സ്വീകരണത്തിനുശേഷം തുറന്ന ജീപ്പില് ആരാധകരെ അഭിവാദ്യം ചെയ്തുകൊണ്ട് ശ്രീജേഷ് ആലുവയിലേക്ക് തിരിച്ചു. ആലുവ യുസി കോളജില് ഫിസിക്കല് എഡ്യൂക്കേഷന് ഡിപ്പാര്ട്ട്മെന്റിന്റെ സഹകരണത്തോടെ കേരള ഒളിമ്പിക്സ് അസോസിയേഷന് ശ്രീജേഷിന് സ്വീകരണം നല്കി. നമുക്ക് പല കഴിവുകളുണ്ടെന്നും അത് കണ്ടെത്തി വിജയത്തിനായി പരിശ്രമിക്കണമെന്നും അദ്ദേഹം വിദ്യാര്ഥികളോട് ആഹ്വാനം ചെയ്തു.
ചടങ്ങില് ആലുവ നഗരസഭ ചെയര്മാന് എം.ഒ. ജോണ്, യുസി കോളജ് മാനേജര് ഡോ. പി.എം. കുര്യച്ചന്, പ്രിന്സിപ്പല് എല്ദോ വര്ഗീസ്, ഡോ. എം. ബിന്ദു, കെ.എസ്. നാരായണന് എന്നിവര് പ്രസംഗിച്ചു. വിമാനത്താവളത്തില്നിന്ന് യുസി കോളജ് കലാലയാങ്കണത്തില് എത്തിയ ശ്രീജേഷിന് എന്സിസി കേഡറ്റുകളുടെ ഗാര്ഡ് ഓഫ് ഓണറും ഹോക്കി ടീമിന്റെ ഹോക്കി സ്റ്റിക്ക് അഭിവാദ്യവും നല്കി.
തുടര്ന്ന് ജന്മനാടായ കിഴക്കമ്പലത്ത് നാട്ടുകാരും ശ്രീജേഷിന് സ്വീകരണം ഒരുക്കിയിരുന്നു. പൗരാവലി സംഘടിപ്പിച്ച സ്വീകരണച്ചടങ്ങില് മന്ത്രി പി. രാജീവ്, ശ്രീജേഷിന് ഓണക്കോടി സമ്മാനിച്ചു.