ദോഡയിൽ ആറു സൈനികർക്കു പരിക്കേറ്റു : Deepika.com National News |

ജമ്മു: ജമ്മു കാഷ്മീരിലെ കഠുവ ജില്ലയിൽ ഭീകരരുമായുണ്ടായ ഏറ്റുമുട്ടലിൽ ഒരു സിആർപിഎഫ് ജവാൻ വീരമൃത്യു വരിച്ചു. മധ്യപ്രദേശ് സ്വദേശിയായ കബീർ ദാസ് ആണ് വീരമൃത്യു വരിച്ചത്. ഏറ്റുമുട്ടലിനിടെ ഗുരുതരമായി പരിക്കേറ്റ ഇദ്ദേഹം ആശുപത്രിയിൽവച്ചാണു മരിച്ചത്.

15 മണിക്കൂർ നീണ്ട ഏറ്റുമുട്ടലിനൊടുവിൽ അതിർത്തിഗ്രാമത്തിൽ ഒളിച്ച ഭീകരനെ വധിച്ചു. ഇയാളുടെ കൂട്ടാളിയെ നേരത്തേ വധിച്ചിരുന്നു. ചൊവ്വാഴ്ച രാത്രിയായിരുന്നു ഏറ്റുമുട്ടൽ ആരംഭിച്ചത്. സയിഗ സുഖാൽ ഗ്രാമത്തിലായിരുന്നു ഭീകരർ ഒളിച്ചിരുന്നത്.

ദോഡ ജില്ലയിൽ ഒരു ചെക്പോസ്റ്റിനു നേർക്ക് ഭീകരർ നടത്തിയ ആക്രമണത്തിൽ രാഷ്‌ട്രീയ റൈഫിൾസിലെ അഞ്ചു ട്രൂപ്പർമാർക്കും ഒരു സ്പെഷൽ പോലീസ് ഓഫീസർക്കും(എസ്പിഒ) പരിക്കേറ്റു.

ഞായറാഴ്ച തീർഥാടകർ സഞ്ചരിച്ചിരുന്ന ബസിനു നേർക്ക് ഭീകരർ ആക്രമണം നടത്തിയിരുന്നു. ഭീകരരുടെ വെടിവയ്പിൽ നിയന്ത്രണം തെറ്റിയ ബസ് കൊക്കയിലേക്കു പതിച്ച് ഒന്പതു തീർഥാടകർ മരിച്ചു. ആക്രമണം നടത്തിയ ഭീകരരെക്കുറിച്ച് വിവരം നല്കുന്നവർക്ക് പോലീസ് 20 ലക്ഷം രൂപ പാരിതോഷികം പ്രഖ്യാപിച്ചിട്ടുണ്ട്.