ആൾക്കൂട്ട ആക്രമണം: മൂന്നാമനും മരിച്ചു
Wednesday, June 19, 2024 2:05 AM IST
റായ്പുർ: ഛത്തീസ്ഗഢിൽ ആൾക്കൂട്ട ആക്രമണത്തിൽ പരിക്കേറ്റ മൂന്നാമത്തെ യുവാവും മരണത്തിനു കീഴടങ്ങി. സദ്ദാം ഖുറേഷി (25) ആണ് ഡികെഎസ് സൂപ്പർ സ്പെഷാലിറ്റി ആശുപത്രിയിൽ ഇന്നലെ മരിച്ചത്.
കന്നുകാലിക്കടത്ത് ആരോപിച്ച് ഒരുസംഘം ആളുകൾ കഴിഞ്ഞ ഏഴിന് മൂന്നു യുവാക്കളെ ക്രൂരമായി മർദിക്കുകയായിരുന്നു. ആക്രമണത്തിൽ പരിക്കേറ്റ ഗുഡ്ഡു ഖാൻ (35) ചന്ദ് മിയ ഖാൻ (23) എന്നിവർ അന്നുതന്നെ മരിച്ചു.
മഹാസമുന്ദിൽനിന്നു കാലികളുമായി ലോറിയിൽ പോകുകയായിരുന്ന ഇവരെ ബൈക്കിലും മറ്റ് വാഹനങ്ങളിലുമായി എത്തിയ സംഘം വാഹനം തടഞ്ഞ് ആക്രമിക്കുകയായിരുന്നുവെന്ന് ബന്ധുക്കൾ ആരോപിച്ചു.
അരംഗ് മേഖലയിലെ മഹാനദിയിലെ പാലത്തിനു താഴെനിന്നാണ് ഇവരെ കണ്ടെത്തിയതെന്ന് പോലീസ് പറഞ്ഞു. ഇതുവരെ ആരെയും അറസ്റ്റ് ചെയ്തിട്ടില്ല.