മുതിർന്ന കോൺഗ്രസ് നേതാവ് കിരൺ ചൗധരിയും മകൾ ശ്രുതിയും ബിജെപിയിലേക്ക്
Wednesday, June 19, 2024 1:32 AM IST
ചണ്ഡിഗഡ്: ഹരിയാനയിലെ മുതിർന്ന കോൺഗ്രസ് നേതാവ് കിരൺ ചൗധരിയും മകളും മുൻ എംപിയുമായ ശ്രുതി ചൗധരിയും കോൺഗ്രസ് വിട്ടു.
ഇരുവരും ഇന്ന് ബിജെപിയിൽ ചേരും. ഹരിയാന കോൺഗ്രസ് വർക്കിംഗ് പ്രസിഡന്റായ ശ്രുതി മുൻ ഭിവാനി-മഹേന്ദ്രഗഡ്-എംപിയാണ്.ഹരിയാന രാഷ്ട്രീയത്തിലെ അതികായനായിരുന്ന ബൻസിലാലിന്റെ മരുമകളായ കിരൺ ചൗധരി മുന്പ് ഹരിയാന പ്രതിപക്ഷനേതാവായി പ്രവർത്തിച്ചിട്ടുണ്ട്.
ഭൂപീന്ദർ സിംഗ് ഹൂഡയുടെ എതിർപക്ഷത്താണ് കിരൺ ചൗധരിയും മകളും നിലയുറപ്പിച്ചിരുന്നത്. ഇത്തവണ ശ്രുതിക്ക് ഭിവാനി-മഹേന്ദ്രഗഡ് സീറ്റ് നല്കിയിരുന്നില്ല. ഇതിൽ കിരണിനും മകൾക്കും കടുത്ത അതൃപ്തിയുണ്ടായിരുന്നു.
ഹൂഡയുടെ അനുയായി ആയ റാവു ദാൻ സിംഗാണ് സീറ്റ് നല്കിയത്. എന്നാൽ, ദാൻ സിംഗ് ബിജെപിയിലെ ധരംബീർ സിംഗിനോടു തോറ്റു.
ഹരിയാന നിയമസഭാ തെരഞ്ഞെടുപ്പ് അടുത്തിരിക്കേ പ്രമുഖ നേതാക്കൾ പാർട്ടി വിടുന്നത് കോൺഗ്രസിനു കനത്ത തിരിച്ചടിയാണ്.