അധികാരത്തിൽ തിരിച്ചെത്തും: കോൺഗ്രസ്
Thursday, March 30, 2023 1:54 AM IST
ബംഗളൂരു: കർണാടകയിൽ അധികാരത്തിൽ തിരിച്ചെത്തുമെന്ന് ആവർത്തിച്ചു കോൺഗ്രസ്. ഭരണകക്ഷിയായ ബിജെപിയുടെ അംഗബലം 60-65 ആയി ചുരുങ്ങുമെന്നും മൂന്നു മാസം മുന്പെ പാർട്ടി തെരഞ്ഞെടുപ്പിന് ഒരുങ്ങിയിരുന്നുവെന്നും കോൺഗ്രസ് സംസ്ഥാന അധ്യക്ഷൻ ഡി.കെ.ശിവകുമാർ പറഞ്ഞു.
ബിജെപി സർക്കാർ അടുത്തിടെ പ്രഖ്യാപിച്ച സംവരണ പ്രഖ്യാപനത്തിൽ ആരും സന്തുഷ്ടരല്ലെന്നും വിഷയം കോടതിയിലെത്തിയാൽ നിലനിൽക്കില്ലെന്നും അദ്ദേഹം വ്യക്തമാക്കി. കോൺഗ്രസ് അധികാരത്തിലെത്തിയാൽ ബിജെപി വരുത്തിവച്ച പിഴവുകൾ തിരുത്തും.
സ്വത്ത് വീതം വയ്ക്കുന്നതുപോലെയാണ് വളരെ ധൃതിപ്പെട്ടു ബിജെപിസർക്കാർ സംവരണം പ്രഖ്യാപിച്ചത്. അധികാരത്തിലെത്തിയാൽ പാർട്ടിയുടെ തെരഞ്ഞെടുപ്പുവാഗ്ദാനങ്ങളെല്ലാം പാലിക്കും. കോൺഗ്രസിൽ ചേരാനായി നിരവധി ബിജെപി നേതാക്കളാണു സമീപിക്കുന്നതെന്നും എല്ലാവരെയും ഉൾക്കൊള്ളാനാകാത്തതിനാൽ ഇതിനു വലിയ പ്രോത്സാഹനം നൽകുന്നില്ലെന്നും ശിവകുമാർ വ്യക്തമാക്കി.
കർണാടകയിലെ ഡബിൾ എൻജിൻ സർക്കാർ ദയനീയമായി പരാജയപ്പെട്ടെന്നും പുതിയ എൻജിൻ സർക്കാരിനെ തെരഞ്ഞെടുക്കാൻ സംസ്ഥാനത്തെ ജനങ്ങൾ തയാറായിരിക്കുകയാണെന്നും ശിവകുമാർ പറഞ്ഞു.