ടിവി, ഡിജിറ്റൽ വിതരണാവകാശം വിറ്റതിലൂടെ മാത്രമല്ല ഐപിഎല്ലിൽനിന്ന് ബിസിസിഐക്കു പണമെത്തുന്നത്. ഫ്രാഞ്ചൈസികൾ, സ്പോണ്സർഷിപ് എന്നിവ വഴിയും പണം എത്തും. ഈ രണ്ടു കാര്യങ്ങളിലും 2022 സീസണിനേക്കാൾ വരുമാനം വർധിച്ചു എന്നും കണക്കുകൾ വ്യക്തമാക്കുന്നു.
2023 ഐപിഎല്ലിൽ ഫ്രാഞ്ചൈസികൾ വഴി ബിസിസിഐക്കു ലഭിച്ചത് 2,117 കോടി രൂപയാണ്. 2022 സീസണിൽ അത് 1,730 കോടി രൂപയായിരുന്നു, വന്നത് 22 ശതമാനത്തിന്‍റെ വർധനവ്.
2022നെ അപേക്ഷിച്ച് 2023ൽ സ്പോണ്സർഷിപ്പിലൂടെ രണ്ടു ശതമാനത്തിന്‍റെ വരുമാന വർധനവുമുണ്ടായി. 2023ൽ സ്പോണ്സർഷിപ്പിലൂടെ ലഭിച്ചത് 847 കോടി രൂപയാണ്.
വനിതാ ലീഗും ലാഭം 2023ൽ അരങ്ങേറിയ പ്രഥമ വനിതാ പ്രീമിയർ ലീഗും (ഡബ്ല്യുപിഎൽ) ലാഭത്തിലായിരുന്നു എന്നാണ് ബിസിസിഐ വാർഷിക കണക്കു വ്യക്തമാക്കുന്നത്. 377 കോടി രൂപയാണ് ലാഭമായി മാത്രം ഡബ്ല്യുപിഎല്ലിന്‍റെ ഉദ്ഘാടന സീസണിൽ ബിസിസിഐ അക്കൗണ്ടിൽ എത്തിയത്.
സംപ്രേഷണം, ഫ്രാഞ്ചൈസി ഫീസ്, സ്പോണ്സർഷിപ് തുടങ്ങിയ കാര്യങ്ങളിൽനിന്ന് ബോർഡിനു കിട്ടിയത് 636 കോടി രൂപ. ചെലവായത് 259 കോടി രൂപയും. പുരുഷ ട്വന്‍റി-20 ലീഗിനു മാത്രമല്ല, വനിതാ ലീഗിനും ഇന്ത്യയിൽ വേരോട്ടമുണ്ടെന്ന് അടിവരയിടുന്നതാണ് ഈ ലാഭകണക്ക്.
ബാങ്ക് ബാലൻസ് 16,493 കോടി രൂപ ലോകത്തിലെ ഏറ്റവും സന്പത്തുള്ള ക്രിക്കറ്റ് ഭരണ കേന്ദ്രമാണ് ബിസിസിഐ. 2023 സാന്പത്തിക വർഷത്തിൽ ബിസിസിഐയുടെ ബാങ്ക് ബാലൻസ് 16,493.2 കോടി രൂപയാണ്. സേവിംഗ്, കറന്‍റ്, എഫ്ഡി അക്കൗണ്ടുകളിലായുള്ള കണക്കാണിത്. 2022ൽ ഇത് 10,991.29 കോടി രൂപയായിരുന്നു.
ലാഭം കുമിഞ്ഞു കൂടുന്നതനുസരിച്ച് പണം കൈയയച്ചു നൽകാനും ബിസിസിഐക്കു മടിയില്ല. 2023ൽ ഐപിഎൽ ഫ്രാഞ്ചൈസികൾക്കായി ബിസിസിഐ ലാഭവിഹിതമായി നൽകിയത് 4,670 കോടി രൂപയാണ്.
2022ൽ ഇത് 2,205 കോടി മാത്രമായിരുന്നു. മാത്രമല്ല, 2024 ഐസിസി ട്വന്‍റി-20 ലോകകപ്പ് ട്രോഫി സ്വന്തമാക്കിയ ഇന്ത്യൻ പുരുഷ ടീമിന് ബിസിസിഐ 125 കോടി രൂപ സമ്മാനിക്കുകപോലും ചെയ്തു.