ഫാ. മാത്യു പഴേവീട്ടില്‍ എംസിബിഎസിന്‍റെ സംസ്കാരം ഞായറാഴ്ച

ജോസ് കുമ്പിളുവേലില്‍

കൊളോണ്‍: ജര്‍മനിയില്‍ അന്തരിച്ച എംസിബിഎസ് സഭാംഗവും കൊളോണ്‍ ഫ്രെഷനിലെ ബുഴ്ബെല്‍ സെന്‍റ് ഉള്‍റിഷ് ഇടവകയിലെ ചാപ്ലെയിനുമായ ഫാ. മാത്യു പഴേവീട്ടിലിന്‍റെ(59) സംസ്കാരം ഞായറാഴ്ച രാവിലെ 10.30ന് കണ്ണൂര്‍ പരിയാരം എംസിബിഎസ് മൈനര്‍ സെമിനാരിയില്‍ നടക്കും.

ജര്‍മനിയിലെ ഫ്രാങ്ക്ഫര്‍ട്ടില്‍ നിന്നും വെള്ളിയാഴ്ച വൈകുന്നേരം എയര്‍ ഇന്ത്യ വിമാനത്തില്‍ ഡല്‍ഹി വഴിയാണ് കൊച്ചിയില്‍ എത്തിക്കുന്നത്. എംസിബിഎസ് അംഗങ്ങളായ ഫാ. ടോം കൂട്ടുങ്കല്‍, ഫാറോബിന്‍ തുറയ്ക്കല്‍, ഫ്രെഷനിലുള്ള സി. മറീന എഫ്സിസി എന്നിവര്‍ ഫാ. മാത്യുവിന്‍റെ മൃതദേഹത്തെ അനുഗമിക്കുന്നുണ്ട്.

ശനിയാഴ്ച രാത്രി 10.30ന് നെടുമ്പാശേരിയിലെത്തുന്ന മൃതദേഹം എംസിബിഎസ് സഭാംഗങ്ങളും കുടുംബാംഗങ്ങളും ചേര്‍ന്ന് ഏറ്റുവാങ്ങി രാത്രി 12ന് കണ്ണൂര്‍ പരിയാരം സെന്‍റ് മേരീസ് മൈനര്‍ സെമിനാരിയിലേക്ക് വിലാപയാത്രയായി കൊണ്ടുപോകും.

ഞായറഴ്ച രാവിലെ ഏഴിന് പരിയാരം മൈനര്‍ സെമിനാരിയില്‍ എത്തിച്ച് അന്തിമോപചാരം അര്‍പ്പിക്കാന്‍ അവസരം നല്‍കും. രാവിലെ എട്ടിന് വൈദികരുടെ സംസ്ക്കാര ശുശ്രൂഷയുടെ ആദ്യഭാഗവും 10 ന് രണ്ടാം ഭാഗവും പൂര്‍ത്തിയാക്കി 10.30ന് സംസ്ക്കരിക്കും. സംസ്കാര ശുശ്രൂഷകളുടെ തത്സമയ സംപ്രേക്ഷണവും ഉണ്ടായിരിക്കും.

കോഴിക്കോട് കൂരാച്ചുണ്ട് വട്ടച്ചിറ സെന്‍റ് ഗെബ്രിയേല്‍ യൂണിറ്റിലെ കുടുംബമായ പഴേവീട്ടില്‍ ത്രേസ്യാമ്മയുടെയും പരേതനായ മൈക്കളിന്‍റെയും മൂന്നു മക്കളില്‍ മൂത്തയാളാണ് ഫാ.മാത്യു. ഇളയ സഹോദരന്‍ ഫാ.ജോസ് പഴേവീട്ടില്‍ വിന്‍സെന്‍ഷ്യന്‍ സഭാംഗമാണ്. ബെന്നി ഇവരുടെ ഏറ്റവും ഇളയ സഹോദരനാണ്.

198 ല്‍ നൊവീഷ്യേറ്റും 87 വരെ ഫിലോസഫി പഠനവും, 92 വരെ തിയോളജി പഠനവും നടത്തിയ മാത്യു 28.12.1992ലാണ് പുരോഹിതനായി അഭിഷിക്തനായത്. തുടര്‍ന്ന് 96 വരെ കര്‍ണ്ണാടകയിലെ ഷിമോഗയില്‍ മിഷനറിയായും 1999 വരെ വൈദിക സെമിനാരിയില്‍ ടീച്ചറായും ജോലി ചെയ്തു. തുടര്‍ന്ന് 2000ല്‍ ജര്‍മനിയിലെത്തി മാര്‍ച്ച് 21ന് ഫ്രെഷനില്‍ ജോലി തുടങ്ങി.

കഴിഞ്ഞ കാല്‍ നൂറ്റാണ്ടോളം കൊളോണ്‍ അതിരൂപതയിലെ ഫ്രെഷനില്‍ സേവനം ചെയ്തിരുന്ന ഫാ. മാത്യു ജര്‍മന്‍ ഇടവകക്കാരുടെ കണ്ണിലുണ്ണിയായിരുന്നു. ഇടവക സമൂഹത്തിന്‍റെ സ്നേഹവും ആദരവും പിടിച്ചുപറ്റിയ മാത്യു അച്ചന്‍റെ ഇടവക സേവനത്തിന്‍റെ സില്‍വര്‍ ജൂബിലി ആഘോഷിക്കാനിരിക്കെ ആകസ്മികമായ വേര്‍പാട് ഇടവക സമൂഹത്തെ മുഴുവന്‍ കണ്ണീരിലാഴ്ത്തി.

കൂടാതെ അടുത്ത കാലത്ത് ജര്‍മനിയിലും പ്രത്യേകിച്ച് ഫ്രെഷനിലും പരിസര പ്രദേശങ്ങളിലും ജോലിക്കും പഠനത്തിനുമായി എത്തിയ മലയാളികള്‍ക്ക് എല്ലാതരത്തിലും മാത്യു അച്ചന്‍ ഒരു മാര്‍ഗദര്‍ശിയും ഒരു കൂടെപ്പിറപ്പെന്നപോലെ, ജേഷ്ഠസഹോദരനെപ്പോലെ കരുതലും കാവലുമായി സഹായിയുമായിരുന്നു. അച്ചന്‍റെ വേര്‍പാട് എല്ലാവരേയും വളരെയധികം വേദനിപ്പിച്ചു.

ഇടവക സമൂഹത്തിന്‍റെ സ്മരണാഞ്ജ്ഞലി

ഫാ.മാത്യു പഴേവീട്ടിലിന്‍റെ ആത്ശാന്തിയ്ക്കായുള്ള ദിവ്യബലി ഫ്രെഷന്‍ ക്വേണിംഗ്സ്ഡോര്‍ഫ് ഹില്‍ഡെബോള്‍ഡ് ദേവാലയത്തില്‍ വെള്ളിയാഴ്ച രാവിലെ 11ന് നടന്നു. ദിവ്യബലിക്ക് ആമുഖമായി മാത്യു അച്ചന്‍റെ ജീവിതത്തിന്‍റെ നാള്‍വഴി ഫാ. മനീഷ് ഓലംകണ്ണേല്‍ വായിച്ചു.

ഇടവക വികാരി ഫാ. ക്രിസ്റ്റോഫ് ഡ്യൂറിഷ് സമൂഹബലിയില്‍ മുഖ്യകാര്‍മികനായി. ജര്‍മന്‍ വൈദികരെ കൂടാതെ ജര്‍മനിയിലെ എംസിബിഎസ് സഭാംഗങ്ങളും സിഎംഐ സഭയിലെയും മറ്റു രൂപതകളില്‍ സേവനം ചെയ്യുന്ന വൈദികരും ഉള്‍പ്പടെ ഏതാണ്ട് അന്‍പതിലധികം വൈദികര്‍ സഹകാര്‍മികരായി.

ജര്‍മന്‍ ഭാഷയിലും മലയാളത്തിലും അര്‍പ്പിച്ച ദിവ്യബലിയെ തുടര്‍ന്ന് സീറോമലബാര്‍ ആരാധനാ ക്രമത്തില്‍ ഒപ്പീസും നടത്തി. തുടര്‍ന്ന് ജര്‍മനിയിലെ എംസിബിഎസ് സൊസൈറ്റിയുടെ സുപ്പീരിയര്‍ ഫാ.സജി പെരുമ്പാട്ട് നന്ദി പറഞ്ഞു. ജര്‍മന്‍ ഇടവകക്കാരും മലയാളികളും സിസ്റ്റേഴ്സും ഉള്‍പ്പടെ ഏതാണ്ട് 450 ഓളം ആളുകള്‍ മാത്യു അച്ചന് സ്മരണാഞ്ജലി അര്‍പ്പിക്കാന്‍ എത്തിയിരുന്നു.

കഴിഞ്ഞമാസം 21ന് വൈകുന്നേരം ദിവ്യബലി അര്‍പ്പിക്കാനായി ത‌യാറെടുപ്പുകള്‍ നടത്തിക്കൊണ്ടിരിയ്ക്കുമ്പോളാണ് 59 വയസുകാരനായ ഫാ.മാത്യുവിന് നെഞ്ചുവേദനയുണ്ടായത്. ഉടന്‍ തന്നെ അടുത്തുള്ള ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.