ADVERTISEMENT

ADVERTISEMENT

പട്ടാമ്പി നഗരസഭ വികസന സെമിനാർ

ഷൊർണൂർ: പട്ടാമ്പി നഗരസഭ വികസന സെമിനാർ ചെയർപേഴ്സൺ ഒ.ലക്ഷ്മിക്കുട്ടി ഉദ്ഘാടനം ചെയ്തു. വൈസ് ചെയർമാൻ ടി.പി. ഷാജി അധ്യക്ഷത വഹിച്ചു. വിവിധ രംഗങ്ങളിൽ മികവു തെളിയിച്ചവരെ ആദരിച്ചു.

നഗരസഭ സ്ഥിരം സമിതി അധ്യക്ഷരായ പി.വിജയകുമാർ, കെ.ടി റുക്കിയ, എൻ.രാജൻ മാസ്റ്റർ, പി.കെ. കവിത, ആനന്ദവല്ലി, കൗൺസിലർമാരായ കെ.ആർ നാരായണസ്വാമി, സി.എ. സാജിത്ത്, എ.സുരേഷ്, കെ.ടി. ഹമീദ്, കെ.മോഹൻ, കെ.ബഷീർ, എം.ശ്രീനിവാസൻ, പി.കെ.മഹേഷ്, സി.സംഗീത, കെ.സി ദീപ, പി.ഷബ്ന, സജ്ന ഫൈസൽ ബാബു, സി.എ.റാസി, സെയ്തലവി വടക്കേതിൽ, അർഷ അശോകൻ, പ്രമീള, കെ.റസ്ന, മുഹമ്മദ് മുസ്തഫ, റഷീദ മുഹമ്മദ്കുട്ടി, ലബീബ, നഗരസഭ സെക്രട്ടറി ബെസി സെബാസ്റ്റ്യൻ, സൂപ്രണ്ട് കെ.എം ഹമീദ് തുടങ്ങിയവർ പ്രസംഗിച്ചു.

ADVERTISEMENT

ആലത്തൂരിൽ തെരുവുനായകൾ ഭീഷണിയാകുന്നു

ആലത്തൂർ: തെരുവ് നായകൾ റോഡിലൂടെ അലഞ്ഞു തിരിയുന്നത് കാൽനട യാത്രക്കാർക്കും വാഹനങ്ങൾക്കും ഭീഷണിയാകുന്നു. കൂട്ടമായി എത്തുന്ന നായകൾ പലപ്പോഴും ആക്രമണകാരികളാണ്. പലപ്പോഴും പത്തോളം നായകൾ വരെ ഒരു സംഘത്തിൽ ഉണ്ടാകും. കാൽനടയാത്രക്കാർ പലപ്പോഴും ഇവയുടെ ആക്രമണത്തിന് ഇരയാകുന്നുണ്ട്. കൂടാതെ ഇരുചക്ര വാഹനങ്ങൾ ഇവയിൽ ഏതിനെ എങ്കിലും തട്ടിയാൽ വീണ് അപകടം ഉണ്ടാകുന്നതും പതിവായിരിക്കുന്നു. മഴക്കാലമായതിനാൽ റോഡിൽ പലയിടത്തും കുണ്ടും കുഴികളും മൂലം യാത്ര ചെയ്യാൻ ബുദ്ധിമുട്ടുന്ന യാത്രക്കാർക്ക് നായകളുടെ അപ്രതീക്ഷിതമായ കടന്നുവരവും ആക്രമണവും ഭീഷണി തന്നെയാണ്. കൃത്യമായി ബന്ധപ്പെട്ട അധികൃതർ ഇവയെ വന്ധീകരിക്കാത്തതാണ് നായകൾ പെറ്റു പെരുകാൻ കാരണം. പേവിഷബാധയ്ക്കുള്ള വാക്സിന്‍റെ ലഭ്യതക്കുറവാണ് മറ്റൊരു പ്രശ്നം. ഒരു കേന്ദ്രത്തിൽ നിന്ന് മറ്റ് കേന്ദ്രങ്ങളിലേക്ക് എത്തിച്ചാണ് വാക്സിൻ ക്ഷാമം പരിഹരിക്കുന്നത്. പാലക്കാട് ജില്ലാ ആശുപത്രിക്ക് പുറമേ ആലത്തൂർ താലൂക്ക് ആശുപത്രി, പഴമ്പാലക്കോട് പിഎച്ച്സി, വടക്കഞ്ചേരി ഗവ.ആശുപത്രി, കുഴൽമന്ദം ഗവ. ആശുപത്രി എന്നിവിടങ്ങളിലാണ് ഈ മേഖലയിൽ പേവിഷബാധക്കുള്ള വാക്സിൻ ലഭ്യമാകുന്നത്.

വാണിയംകുളം-കോതകുറുശി പാതയിൽ അപകടയാത്ര

ഷൊർണൂർ: വാണിയംകുളം-കോതകുറുശി പാതയിൽ നടുവൊടിക്കും യാത്ര. ഇതുവഴി യാത്ര ചെയ്യുന്നവരെ കാത്തിരിക്കുന്നത് റോഡിലാകെയുള്ള അപകടക്കുഴികളാണ്. നല്ല റോഡാണെന്നുകരുതി വേഗത്തിൽ വരുന്ന വാഹനങ്ങളെ പല ഭാഗങ്ങളിലുള്ള ചതിക്കുഴികൾ അപകടത്തിൽചാടിക്കും. ഇരുചക്രവാഹനയാത്രികരാണു കൂടുതലായും അപകടത്തിൽപ്പെടുന്നത്. മഴപെയ്ത് കുഴികളിൽ വെള്ളം കെട്ടിനിൽക്കുന്നതു കാരണം കുഴിയാണെന്നറിയാതെയാണ് അപകടം സംഭവിക്കുന്നത്. കാറുകൾക്കും ഓട്ടോറിക്ഷകൾക്കും കേടുപാടുകൾ ഉണ്ടാവുകയും ചെയ്യുന്നു. ഇതിനുപുറമേ, കുഴിയിൽപെടാതിരിക്കാൻ വാഹനങ്ങൾ പെട്ടെന്ന് വെട്ടിക്കുന്നതും അപകടങ്ങൾക്കു കാരണമാകുന്നുണ്ട്. ചെർപ്പുളശേരി-പെരിന്തൽമണ്ണ മേഖലകളിലേക്കുള്ള പ്രധാനപാതകൂടിയാണിത്. റോഡിൽ വാണിയംകുളം പഴയ സിനിമാതീയറ്റർ, കാറ്റാടിപ്പടി, പത്തംകുളം എന്നിവയടക്കമുള്ള പല ഭാഗങ്ങളിലും നിറയെ കുഴികളാണ്. ഒട്ടേറെ സ്വകാര്യബസുകളും സ്കൂൾ ബസുകളും ആംബുലൻസ് അടക്കമുള്ള വാഹനങ്ങളും നിത്യേന സഞ്ചരിക്കുന്ന പാതയാണിത്. ആറുവർഷത്തിലേറെയായി റോഡ് നവീകരണം തുടങ്ങിയിട്ട്. എന്നാൽ, നവീകരണത്തിന്‍റെ ഒന്നാംഘട്ടത്തിനു ശേഷം രണ്ടുവർഷത്തോളമായി പണി നിലച്ചിരിക്കുകയാണ്. നേരത്തെയുണ്ടായിരുന്ന കരാറുകാരൻ ഒഴിവായതോടെയാണ് തുടർപണികൾ നിലച്ചത്. അതേസമയം റോഡിലെ കുഴികൾ ഉടൻ അടയ്ക്കാൻ നടപടി സ്വീകരിച്ചിട്ടുണ്ടെന്ന് കെആർഎഫ്ബി അധികൃതർ പറഞ്ഞു. എന്തായാലും ഈ മഴക്കാലം കഴിയാതെ പാതയിൽ നവീകരണം നടക്കില്ലെന്ന കാര്യം ഉറപ്പാണ്.

കരിപ്പാലി, പാളയം, കണിയമംഗലം പാലങ്ങൾ ഉയരംകൂട്ടി പുനർനിർമിക്കണമെന്ന ആവശ്യം ശക്തം

വടക്കഞ്ചേരി: മഴക്കാലങ്ങളിൽ പലദിവസവും വെള്ളംമുങ്ങുന്ന പ്രധാന റോഡുകളിലെ കരിപ്പാലി, പാളയം, കണിയമംഗലം പാലങ്ങൾ ഉയരംകൂട്ടി പുനർനിർമിക്കണമെന്ന ആവശ്യം ശക്തമായി. ഏതാനും ദിവസങ്ങൾക്കു മുമ്പും ഈ പാലങ്ങൾ മുങ്ങി. കിഴക്കഞ്ചേരി, മംഗലം -ഗോവിന്ദാപുരം സംസ്ഥാനപാതകളെ തമ്മിൽ ബന്ധിപ്പിക്കുന്ന പാളയം-കരിപ്പാലി റോഡിൽ രണ്ട് പാലങ്ങളും മഴക്കാലത്ത് സ്ഥിരമായി മുങ്ങുന്നവയാണ്. ഇതുമൂലം ഈ റോഡിലുള്ള സ്കൂളുകളുടെ പ്രവർത്തനവും പലദിവസവും തടസപ്പെടുന്ന സ്ഥിതിയുണ്ട്. പുഴകളിൽ വെള്ളം ഉയർന്നാൽ സ്കൂളിന് അവധി നൽകണം. രണ്ടു പാലങ്ങളും മുങ്ങിയാൽ സ്കൂൾ നിൽക്കുന്ന പ്രദേശം ഒറ്റപ്പെടും. താഴ്ന്നനിലയിലുള്ള കണിയമംഗലം പാലവും മുങ്ങുന്ന പാലങ്ങളിലെ മുമ്പനാണ്. മംഗലം ഡാമിന്‍റെ ഷട്ടറുകൾ കൂടുതൽ ഉയർത്തിയാൽ പാലംമുങ്ങി ഗതാഗതം നിലക്കും. ഇതോടെ നിരവധി പ്രദേശത്തുകാർക്ക് യാത്ര ചെയ്യാനാകാത്ത സ്ഥിതി വരും. കൊഴുക്കുള്ളി -മുടപ്പല്ലൂർ റോഡിലെ പാലവും മുങ്ങുന്ന പാലങ്ങളിൽപ്പെടുന്നതാണ്. വണ്ടാഴിയിലെ പാലവുമുണ്ട് മുങ്ങുന്ന കൂട്ടത്തിൽ. തച്ചനടി തെക്കെപ്പൊറ്റ റോഡിൽ പുത്തിരിപ്പാടത്തെ പാലവും മഴക്കാലത്ത് മുങ്ങുന്ന പാലം എന്ന ദുഷ്പേരുള്ള മറ്റൊരു പാലമാണ്. 2018, 2019 വർഷങ്ങളിലെ പ്രളയവർഷങ്ങൾക്കു ശേഷം തരൂർ, ആലത്തൂർ എന്നീ നിയമസഭാ മണ്ഡലങ്ങളിലായി അരഡസനോളം വലിയ പാലങ്ങൾ യാഥാർഥ്യമായത് നിരവധി ഗ്രാമങ്ങളെ മുങ്ങലിൽ നിന്നും വിമുക്തമാക്കി. ചിറ്റടി -എളവമ്പാടം -കുണ്ടുകാട് റോഡിൽ മംഗലംപുഴക്ക് കുറുകെ നിർമിച്ച മമ്പാട് പാലം, മഴക്കാലത്ത് കൂടുതൽ ദിവസങ്ങളിലും മുങ്ങിക്കിടക്കുന്ന പുളിങ്കുട്ടം - ഇരട്ടക്കുളം - പാടൂർ റോഡിലെ തെന്നിലാപുരം പാലം, വടക്കഞ്ചേരി - പുളിങ്കുട്ടം -മണപ്പാടം റോഡിൽ കൊളയക്കാട് പാലം, മണപ്പാടം - കാവശേരി റോഡിൽ അരങ്ങാട്ടുകടവ് പാലം, രണ്ട് വർഷം മുമ്പ് തുറന്നു കൊടുത്ത മംഗലം പാലം തുടങ്ങി ഉയരം കുറഞ്ഞതും വീതിയില്ലാതിരുന്നതും കാലപ്പഴക്കം ചെന്നതുമായ പാലങ്ങളെല്ലാം ഉയർത്തി പണിതതോടെ മഴക്കാലങ്ങളിൽ പാലം മുങ്ങി വാഹനഗതാഗതം തടസപ്പെടുന്ന സ്ഥിതി ഇല്ലാതായിട്ടുണ്ട്. വനത്തിനകത്ത് കടപ്പാറ തളികകല്ലിലെ ആദിവാസികൾ ഒറ്റപ്പെടുന്നതും ഇപ്പോൾ ഇല്ലാതായി. അവിടെ പോത്തൻതോട് കാട്ടുചോലയ്ക്ക് കുറുകെ പാലം വന്നത് ആദിവാസികൾ ഒറ്റപ്പെടുന്നത് ഇല്ലാതായിട്ടുണ്ട്. മുടപ്പല്ലൂർ - മംഗലംഡാം റോഡിൽ വണ്ടാഴിയിൽ വളയൽ പുഴ കവിഞ്ഞൊഴുകി മംഗലംഡാം റോഡിലേക്ക് വെള്ളം കയറുന്നതും ഒഴിവായി. പ്രളയവർഷങ്ങളിൽ എല്ലാ പ്രദേശങ്ങളും ഒറ്റപ്പെടുന്ന സ്ഥിതിയുണ്ടായത് ഏറെ ഭീതിജനകമായിരുന്നു. ഇതേ തുടർന്നായിരുന്നു പുതിയ പാലങ്ങളുടെ പണികൾ ദ്രുതഗതിയിൽ നടന്നത്.

യുവക്ഷേത്രയിൽ പുസ്തകപ്രകാശനവും സർട്ടിഫിക്കറ്റ് വിതരണവും

മുണ്ടൂർ: യുവക്ഷേത്ര കോളേജ് ബികോം സിഎ യുടെ നേതൃത്വത്തിൽ സംഘടിപ്പിച്ച ഷാഡോ ഇൻ നെറ്റ് വർക്ക് എന്ന പുസ്തകപ്രകാശനവും ഇന്ത്യൻ കോണ്‍സ്റ്റിട്യൂഷൻ സർട്ടിഫിക്കറ്റ് വിതരണവും വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ ഉദ്ഘാടനം ചെയ്തു. ബികോം സിഎ മേധാവി രജിത രാജേന്ദ്രൻ ആശംസകളർപ്പിച്ചു. അസി.പ്രഫ.കെ. സംഗീത സ്വാഗതവും വിദ്യാർഥിനി ആർ. അസ്ന നന്ദിയും പറഞ്ഞു.

വനമഹോത്സവത്തിനു തുടക്കം; ഉദ്ഘാടനം ഇന്ന്

പാലക്കാട്: സാമൂഹ്യ വനവത്കരണ വിഭാഗത്തിന്‍റെ ആഭിമുഖ്യത്തിൽ ഏഴ് വരെ നടക്കുന്ന വനമഹോത്സവം ഇന്ന് ആരണ്യഭവനിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ ഉദ്ഘാടനം ചെയ്യും. ചീഫ് ഫോറസ്റ്റ് കൺസർവേറ്റർമാരായ കെ. വിജയാനന്ദൻ, ടി. ഉമ, ജില്ലാ വിദ്യാഭ്യാസ ഡെപ്യൂട്ടി ഡയറക്ടർ ടി.എം. സലീന ബീവി എന്നിവർ പങ്കെടുക്കും. ചടങ്ങിൽ ജില്ലയിലെ തെരഞ്ഞെടുത്ത കാവുകൾക്കുള്ള സംരക്ഷണ ധനസഹായം വിതരണം ചെയ്യും. തുടർന്ന് ജില്ലയിലെ ഫോറസ്ട്രി ക്ലബ് കോ-ഓർഡിനേറ്റർമാരുടെ ശില്പശാല നടക്കും. നാളെ ഒറ്റപ്പാലം അനങ്ങൻമലയിൽ പ്രകൃതി പഠനയാത്ര, ജില്ലയിലെ വിവിധ വിദ്യാവനങ്ങളുടെ മെയിന്‍റനൻസ് എന്നിവയും നാലിന് ധോണി ഇക്കോ ടൂറിസം കേന്ദ്രത്തിൽ മുണ്ടൂർ ഗ്രാമപഞ്ചായത്തിലെ ഹരിതകർമസേനാ അംഗങ്ങളുടെ ശില്പശാലയും വനയാത്രയും 5 ന് പുതിയ സർപ്പ വോളന്‍റിയർമാരുടെ പരിശീലനം ആരണ്യഭവനിലും വിത്തൂട്ട് നെന്മാറ അകമ്പാടത്തും നടക്കും. 7 ന് കുടുംബശ്രീ അംഗങ്ങൾക്കായി അമൃത് പദ്ധതിയുടെ വുമൺ ഫോർ ട്രീ പരിശീലനവും സംഘടിപ്പിച്ചിട്ടുണ്ട്.

കരിപ്പോട് റെയിൽവേ ഗേറ്റ് റോഡ് തകർന്ന് വാഹനയാത്ര ദുഷ്കരം

പുതുനഗരം: കരിപ്പോട് റെയിൽവേഗേറ്റ് റോഡ് വർഷങ്ങളായി ഗർത്തങ്ങൾ ഉണ്ടായി സഞ്ചാരയോഗ്യമല്ലാതായിരിക്കുകയാണ്. മഴക്കാലം തുടങ്ങിയതോടെ റോഡിൽ ചെളിയും വെള്ളക്കെട്ടും കാരണം ഇരുചക്ര വാഹനങ്ങൾ, ഓട്ടോ മറ്റു വാഹനങ്ങൾ എന്നിവ നിരന്തരം അപകടത്തിൽപ്പെടുകയാണ്. റോഡിലെ ഗർത്തത്തിൽ കെട്ടി നിൽക്കുന്ന വെള്ളവും ചെളിയും കൽനടയാത്ര പോലും ദുർഘടമായിട്ടുണ്ട്. റെയിൽവേ ക്രോസിംഗ് വഴി രണ്ട് വിദ്യാലയങ്ങളിലേക്ക് വിദ്യാർഥികൾ സഞ്ചരിക്കുന്നത് വെള്ളക്കെട്ടിലൂടെയാണ്. ഗർത്തത്തിലെ ചെളിവെള്ളത്തിൽ വിദ്യാർഥികൾ വീണ് വസ്ത്രവും ബാഗും മലിനമാവുന്നതായി രക്ഷിതാക്കളുടെ പരാതിയും നിലവിലുണ്ട്. അടിയന്തരമായി ടാറിംഗ് നടത്തി ഇന്‍റർലോക്ക് സംവിധാനത്തിൻ റോഡ് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.

തങ്കമണിക്ക് ആശ്വാസം: പഴയ നോട്ടുകൾ എംഎൽഎ വീട്ടിലെത്തി മാറ്റിനൽകി

കോയന്പത്തൂർ: നോട്ടുനിരോധനത്തെക്കുറിച്ച് അറിവില്ലാതെ പഴയ നോട്ടുകൾ കൈവശംവച്ച് ദുരിതത്തിലായ തങ്കമണി എന്ന വയോധികയ്ക്ക് ആശ്വാസമായി സിംഗനല്ലൂർ എംഎൽഎ കെ.ആർ. ജയറാം. തങ്കമണിയുടെ വീട്ടിലെത്തി 15,000 രൂപ നൽകി. പഴയ നോട്ടുകൾ മാറ്റാനാകാതെ ഓഫീസുകൾ കയറിയിറങ്ങിയ വയോധികയുടെ വാർത്ത ഇന്നലെ മാധ്യമങ്ങൾ പ്രസിദ്ധീകരിച്ചിരുന്നു. ഇതറിഞ്ഞ എംഎൽഎ പഴയ നോട്ടുകൾക്കുപകരം പുതിയ നോട്ടുകൾ നൽകുകയായിരുന്നു. പണം മാറ്റിനൽകാൻ സഹായിക്കണമെന്ന് ആവശ്യപ്പെട്ട് അവർ ജില്ലാ കളക്ടർക്ക് ഇന്നലെ നിവേദനം നൽകിയിരുന്നു. മൂന്നുവർഷം മുന്പ് ഒരു റോഡപകടത്തിൽ വയോധികയുടെ മകൻ മരണപ്പെട്ടിരുന്നു.

പെൻഷനേഴ്സ് അസോസിയേഷൻ കരിദിനം ആചരിച്ചു

വടക്കഞ്ചേരി: ഒരു വർഷമായിട്ടും പരിഷ്‌ക്കരണം നടപ്പിലാക്കാതെ പെൻഷൻക്കാരെ വഞ്ചിച്ച സർക്കാർ നിലപാടിൽ പ്രതിഷേധിച്ച് കേരള സർവീസ് പെൻഷനേഴ്സ് അസോസിയേഷൻ കരിദിനം ആചരിച്ചു. സംസ്ഥാന വ്യാപകമായി നടത്തുന്ന സമരത്തിന്‍റെ ഭാഗമായി വടക്കഞ്ചേരി സബ് ട്രഷറിക്കു മുന്നിൽ നടന്ന ധർണ അസോസിയേഷൻ സംസ്ഥാന കമ്മിറ്റി അംഗം പി. രാമനാഥൻ ഉദ്ഘാടനം ചെയ്തു. തരൂർ നിയോജക മണ്ഡലം പ്രസിഡന്‍റ് പി.കേശവദാസ് അധ്യക്ഷത വഹിച്ചു.ജില്ലാ സമിതി അംഗങ്ങളായ എൻ.അശോകൻ ,ഇ. എസ്.എം. ഹനീഫ, ലിസി വർഗീസ്,നിയോജക മണ്ഡലം വനിത ഫോറം പ്രസിഡന്‍റ് എം.പി. ശശികല, വടക്കഞ്ചേരി മണ്ഡലം പ്രസിഡന്‍റ് പ്രസാദ് വർക്കി, നിയോജക മണ്ഡലം ഖജാൻജി ടി. മത്തായി പ്രസംഗിച്ചു. ചിറ്റൂർ: 2024 ജൂലൈ മുതൽ പെൻഷൻകാർക്ക് ലഭിക്കേണ്ട പെൻഷൻ പരിഷ്കരണ ആനുകൂല്യങ്ങൾ നടപ്പിലാക്കാത്ത ഇടതു സർക്കാരിന്‍റെ തെറ്റായ നടപടികൾക്കെതിരെ കെഎസ്എസ്പിഎ ചിറ്റൂർ നിയോജകമണ്ഡലം കമ്മിറ്റി കരിദിനം ആചരിച്ചു. ചിറ്റൂർ സബ് ട്രഷറിയ്ക്ക് മുൻപിൽ നടത്തിയ പ്രതിഷേധധർണയും വിശദീകരണ യോഗവും സെക്രട്ടേറിയേറ്റ് അംഗം എം. പോൾ ഉദ്ഘാടനം ചെയ്തു. സി. സുകുമാരൻ അധ്യക്ഷത വഹിച്ചു. മുൻ സംസ്ഥാന സെക്രട്ടറി സി. വേലായുധൻ, ചന്ദ്രൻ, എം. വനജദലാക്ഷൻ, എം. സത്യൻ, വി. നിത്യനന്ദൻ, ആർ.പി. സുരേഷ്, എം. കണ്ണൻ കുട്ടി, കെ.കെ.ശൈലജകുമാരി, എ.കെ ഗീത, കെ. ജയപ്രകാശ് നാരായണൻ, കെ. കുഞ്ചു, കെ. ലീല എന്നിവർ പ്രസംഗിച്ചു. അഗളി: പെൻഷൻ പരിഹരിക്കേണ്ടതിന്‍റെ ഒന്നാം വാർഷികം പിന്നിട്ടിട്ടും കമ്മീഷനെ നിയോഗിക്കാൻ പോലും തയ്യാറാകാത്ത പിണറായി സർക്കാരിനെതിരെ കെഎസ്എസ്പിഎ അഗളി ട്രഷറിക്ക് മുന്നിൽ കരിദിനം ആചരിച്ചു. കെപിസിസി അംഗം പിസി ബേബി ഉദ്ഘാടനം ചെയ്തു. കെഎസ്എസ്പിഎ സംസ്ഥാന കൗൺസിൽ അംഗം അച്ചൻ മാത്യു മുഖ്യപ്രഭാഷണം നടത്തി. അട്ടപ്പാടി മണ്ഡലം പ്രസിഡന്‍റ് പി.പി. മാത്യു അധ്യക്ഷനായി. ഐഎൻടിയുസി നേതാവ് എൻ.കെ. രഘുത്തമൻ, കോൺഗ്രസ് അഗളി മണ്ഡലം പ്രസിഡന്‍റ് ജോബി കുരീക്കാട്ടിൽ, കെഎസ്എസ്പിഎ ജില്ലാ കൗൺസിൽ അംഗം സൈമൺ ജോർജ്, എ. ശിവദാസൻ, ജെയിംസ് വില്യംസ്, കെ.യു. റോസമ്മ ടീച്ചർ, സി.പി. ജോൺ, സി.പി. ജേക്കബ്, തോമസ്, കന്തസ്വാമി, ഭഗവതി, ചിന്നൻ എന്നിവർ പ്രസംഗിച്ചു. മണ്ണാർക്കാട്: മണ്ണാർക്കാട് ട്രഷറിക്ക് മുൻപിൽ നടന്ന ധർണ കെഎസ്എസ്പിഎ ജില്ലാ സെക്രട്ടറി കെ.എം. മുഹമ്മദ് റഷീദ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് കെ. വേണുഗോപാൽ അധ്യക്ഷത വഹിച്ചു. ബ്ലോക്ക് കോൺഗ്രസ് പ്രസിഡന്‍റ് അസീസ് ഭീമനാട്, കെഎസ്എസ്പിഎ നിയോജകമണ്ഡലം സെക്രട്ടറി ഗോപി പൂന്തോട്ടത്തിൽ, ജില്ലാ ജോയിന്‍റ് സെക്രട്ടറി ഉണ്ണികൃഷ്ണൻ പുളിയങ്കോട്, സംസ്ഥാന കൗൺസിൽ അംഗങ്ങളായ കെ.ജി. ബാബു, വി. സുകുമാരൻ, ജില്ലാ കമ്മിറ്റി അംഗങ്ങളായ തോമസ് ആന്‍റണി, കെ.സി.എം. ബഷീർ, സി.ജി. മോഹനൻ, ജയപ്രകാശൻ, ഉസ്മാൻ, ദാമോദരൻ നമ്പീശൻ, ആലീസ് ആന്‍റണി, ജോളി ജോൺ, വി.ഡി. പ്രേംകുമാർ, ഷാജി ആന്‍റണി, നാസർ പാറക്കോട്, മുഹമ്മദാലി പോത്തുക്കാടൻ, അബൂബക്കർ, സുലൈമാൻ, തച്ചമ്പാറ മണ്ഡലം പ്രസിഡന്‍റ് രാധാകൃഷ്ണൻ എന്നിവർ പ്രസംഗിച്ചു.

ഓങ്ങല്ലൂരിലും പരിസരപ്രദേശങ്ങളിലും ഡെങ്കിപ്പനി പടരുന്നു

ഷൊർണൂർ: ഓങ്ങല്ലൂരിലും പരിസര പ്രദേശങ്ങളിലും ഡെങ്കിപ്പനി പടർന്നുപിടിക്കുന്നു. ആക്രികടകളിൽ സബ്കളക്ടറുടെ നേതൃത്വത്തിൽ റെയ്ഡ് നടത്തി. കാലവർഷം ശക്തമായി തുടരവേയാണ് ഡെങ്കിപ്പനി പടർന്നുപിടിക്കുന്നത്. ദിനംപ്രതി പനി ബാധിതരുടെ എണ്ണം കൂടിവരികയാണ്. ഇതിനകം 130 ന് പുറത്ത് ആളുകൾക്ക് രോഗം സ്ഥിരീകരിച്ചു. രോഗബാധിതർ സ്വകാര്യ -സർക്കാർ ആശുപത്രികളിൽ ചികിത്സ തേടിയിരിക്കുകയാണ്. ഇതിനിടയിലാണ് ഒറ്റപ്പാലം സബ് കളക്ടറുടെ നേതൃത്വത്തിൽ ഓങ്ങല്ലൂർ പരിസരപ്രദേശങ്ങളിലുള്ള ആക്രികടകളിൽ റെയ്ഡ് നടത്തിയത്. ഇത്തരം ആക്രികടകൾ ഗുരുതരമായ ആരോഗ്യ പ്രശ്നങ്ങളുടെ കേന്ദ്രമായി തീർന്നിട്ടുണ്ടെന്നാണ് അധികൃതർ കരുതുന്നത്. പ്രദേശത്ത് ഏറ്റവും കൂടുതൽ ഡെങ്കിപ്പനിബാധിതർ ഉള്ളത് ഓങ്ങല്ലൂരിലാണ്. 67 പേർക്ക് പഞ്ചായത്തിൽ രോഗം സ്ഥിരീകരിച്ചിട്ടുണ്ട്. പട്ടാമ്പി 22, മുതുതല 15, വിളയൂർ 11, കൊപ്പം 9, കുലുക്കല്ലൂർ 8, തിരുവേഗപ്പുറ 6 എന്നിങ്ങനെയാണ് മറ്റു പഞ്ചായത്തുകളിൽ രോഗം സ്ഥിരീകരിച്ചവരുടെ എണ്ണം. ഇത് ഔദ്യോഗിക കണക്കാണ്. ഇതിന്‍റെ മൂന്നോ നാലോ ഇരട്ടിയിലേറെ രോഗബാധിതർ ഉണ്ടെന്നാണ് അനൗദ്യോഗിക വിവരം. പട്ടാമ്പി ബ്ലോക്ക് പഞ്ചായത്ത് പരിധിയിൽ പരുതൂരിൽ 12 പേർ ഇതിനോടകം ചികിത്സ തേടിയിട്ടുണ്ട്. രോഗവ്യാപനം തുടരുമ്പോഴും ആരോഗ്യവകുപ്പിന്‍റെ ഇടപെടലുകൾ പൂർണമായും ഫലപ്രാപ്തിയിലെത്തുന്നില്ല. വ്യത്യസ്ത സ്ക്വാഡുകളായി ആരോഗ്യവകുപ്പ് പ്രവർത്തകർ മുഴുവൻ പഞ്ചായത്തുകളിലും സന്ദർശനം നടത്തുന്നുണ്ട്. രോഗവ്യാപനം ഗുരുതരമായി തുടരുമ്പോഴും അധികൃതരുടെ ഭാഗത്തുനിന്ന് ജാഗ്രതക്കുറവുള്ളതായി പരാതിയുണ്ട്. പട്ടാമ്പി മേഖലയിൽ പകർച്ചരോഗങ്ങൾ വ്യാപകമാകാൻ തുടങ്ങിയിട്ട് ആഴ്ചകളായി. ഡെങ്കിപ്പനി ബാധിച്ച് തിരുവേഗപ്പുറയിൽ ഒരു യുവതി മരിച്ചിരുന്നു. മഞ്ഞപ്പിത്തം ഉൾപ്പെടെ പല രോഗങ്ങളും വ്യാപകമായിരുന്നു. നിലവിലെ ആരോഗ്യവകുപ്പിന്‍റെ സംവിധാനത്തിലെ പോരായ്മ കാരണം രോഗവ്യാപന ഇടങ്ങളിൽ കൃത്യമായ ഇടപെടലുകൾ നടത്താൻ കഴിയുന്നില്ലെന്നും ജീവനക്കാരുടെ കുറവും മറ്റു സംവിധാനങ്ങളുടെ പോരായ്മയും ആരോഗ്യവകുപ്പ് ഇടപെടലുകൾക്ക് തടസമാണെന്നും ബ്ലോക്ക് പഞ്ചായത്ത്‌ വൈസ് പ്രസിഡന്‍റ് കെ.എ. റഷീദ് പറഞ്ഞു. ഡെങ്കിപ്പനി പടർന്നു പിടിക്കാനുള്ള സാഹചര്യം ആണ് നിലനിൽക്കുന്നത്. ഇതിനെതിരെ ജാഗ്രത പാലിക്കണമെന്ന് ആരോഗ്യവകുപ്പ് അധികൃതർ അറിയിച്ചു.

ആരോഗ്യവകുപ്പ് അഴിമതിയുടെ കേന്ദ്രമായി: വി.കെ. ശ്രീകണ്ഠൻ എംപി

പാലക്കാട്: കേരളത്തിലെ ആരോഗ്യവകുപ്പ് അഴിമതിയുടെ കേന്ദ്രമായി മാറിയതിന്‍റെ പരിണിതഫലമാണ് ഇന്നത്തെ മെഡിക്കൽ കോളജുകളിലെ ദുരവസ്ഥയ്ക്ക് കാരണമെന്നു വി.കെ. ശ്രീകണ്ഠൻ എംപി. മെഡിക്കൽ കോളജുകളിലെ ദുരവസ്ഥയ്ക്കെതിരേ കെപിസിസി ആഹ്വാനം ചെയ്ത പ്രതിഷേധധർണയുടെ ഭാഗമായി പാലക്കാട് മെഡിക്കൽ കോളജിനുമുന്നിൽ ജില്ലാ കോണ്‍ഗ്രസ് കമ്മിറ്റി നടത്തിയ പ്രതിഷേധ ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മെഡിക്കൽ കോളജുകളിലെ ശോചനീയാവസ്ഥ ഡോക്ടർമാർതന്നെ വിളിച്ചുപറയുന്ന സ്ഥിതിക്കുകാരണം ഭരണനേതൃത്വത്തിന്‍റെ കഴിവുകേടാണെന്നും അദ്ദേഹം പറഞ്ഞു. ജില്ലാ പ്രസിഡന്‍റ് എ. തങ്കപ്പൻ അധ്യക്ഷത വഹിച്ച പ്രതിഷേധധർണയിൽ മുൻ ആരോഗ്യമന്ത്രി വി.സി. കബീർ, കെപിസിസി ജനറൽ സെക്രട്ടറിമാരായ സി. ചന്ദ്രൻ, കെ.എ. തുളസി, മുൻ ഡിസിസി പ്രസിഡന്‍റ് സി.വി. ബാലചന്ദ്രൻ, മുൻ എംഎൽഎ കെ.എ. ചന്ദ്രൻ, കെപിസിസി സെക്രട്ടറി പി.വി. രാജേഷ്, യുഡിഎഫ് കണ്‍വീനർ പി. ബാലഗോപാലൻ എന്നിവർ പ്രസംഗിച്ചു. ഡിസിസി ജനറൽ സെക്രട്ടറി വി. രാമചന്ദ്രൻ സ്വാഗതവും കെ.എം. ഫെബിൻ നന്ദിയും പറഞ്ഞു.

മേഴ്സി കോളജിൽ നാലുവർഷ ബിരുദ വിദ്യാർഥികളുടെ പ്രവേശനോദ്ഘാടനം

പാലക്കാട്: മേഴ്സി കോളജിൽ നാലുവർഷ ബിരുദ വിദ്യാർഥികളുടെ പ്രവേശനോദ്ഘാടനം വിജ്ഞാനോത്സവം 2025 ആഘോഷിച്ചു. ഉന്നത വിദ്യാഭ്യാസ മന്ത്രി ഡോ.ആർ. ബിന്ദുവിന്‍റെ സംസ്ഥാനതല ഓണ്‍ലൈൻ ഉദ്ഘാടനത്തിനുശേഷം മേഴ്സി കോളജ് തല ഉദ്ഘാടനം മുഖ്യാതിഥിയായ ഡോ. ശങ്കരനാരായണൻ പാലേരി നിർവഹിച്ച് മുഖ്യപ്രഭാഷണം നടത്തി. കോളജ് പ്രിൻസിപ്പൽ സിസ്റ്റർ ഡോ. എൻ.എം. ലൗലി അധ്യക്ഷത വഹിച്ചു. മേഴ്സി കോളജ് ലോക്കൽ മാനേജരും ബയോടെക്നോളജി വിഭാഗം മേധാവിയുമായ സിസ്റ്റർ ഡോ. ഷൈനി, വാർഡ് കൗണ്‍സിലർ മിനി ബാബു, പിടിഎ വൈസ് പ്രസിഡന്‍റ് വി. ഭവജൻ തുടങ്ങിയവർ പ്രസംഗിച്ചു. അർച്ചന നവാഗതരെ പ്രതിനിധീകരിച്ച് സംസാരിച്ചു. അനൈഡ ആൻ ജേക്കബ് സ്വാഗതവും ഡോ. കെ. വാണിശ്രീ നന്ദിയും പറഞ്ഞു.

പടിഞ്ഞാറൻ അട്ടപ്പാടിയിൽ ഭീതിപരത്തി കാട്ടാനകൾ

അഗളി: പടിഞ്ഞാറൻ അട്ടപ്പാടിയിൽ കാട്ടാനശല്യം രൂക്ഷമായി. മഞ്ഞച്ചോല പ്രദേശത്ത് ആഴ്ചകളായി ചുറ്റിക്കറങ്ങിയിരുന്ന കാട്ടാനകളാണ് ഇന്നലെ മുക്കാലിയിലും പരിസരപ്രദേശങ്ങളിലും വിലസിയത്. ഇന്നലെ പുലർച്ചെ ജനവാസ കേന്ദ്രത്തിൽ എത്തിയ മൂന്നംഗ സംഘത്തെ തുരത്താൻ മുക്കാലി ഒമ്മല ഫോറസ്റ്റ് സ്റ്റേഷനിലെ ഉദ്യോഗസ്ഥരും ആർആർടി സംഘവും നാട്ടുകാരും നടത്തിയ ശ്രമം വിജയം കണ്ടില്ല. പടക്കംപൊട്ടിച്ചും കൂകിവിളിച്ചും ആനകളെ മന്ദംപൊട്ടിവരെ എത്തിച്ചെങ്കിലും കാടുകയറാൻ കൂട്ടാതെ വീണ്ടും ജനവാസകേന്ദ്രത്തിലേക്ക് എത്തി. മുക്കാലി ഊരിലും പറയൻകുന്ന് പ്രദേശത്തും ചോലക്കാട് ജനവാസകേന്ദ്രത്തിലും എംആർഎസ് സ്കൂളിനു പരിസരത്തും കാട്ടാനകൾ ഓടി നടന്നു. സന്ധ്യയോടെ പ്രദേശവാസികൾ അധികം പേരും ആനയോടിക്കൽ മതിയാക്കി വീടുകളിലേക്ക് മടങ്ങി. ആർആർടി, ഫോറസ്റ്റ് സംഘങ്ങൾ ശ്രമം തുടരുകയാണ്. വനത്തിൽനിന്ന് ജനവാസകേന്ദ്രങ്ങളിലേക്കു വന്യമൃഗങ്ങൾ കടക്കാത്തവിധം ശക്തമായ സംവിധാനം ഉണ്ടാക്കണമെന്ന് നാട്ടുകാർ ആവശ്യപ്പെട്ടു. ആനയും പുലിയും അടക്കമുള്ള വന്യമൃഗങ്ങളെ ഭയന്ന് പകൽപോലും പുറത്തിറങ്ങാൻ ആകാത്ത സ്ഥിതിയിലാണ് അട്ടപ്പാടിക്കാർ. അഗളി സ്റ്റേറ്റ് ബാങ്ക് ജംഗ്ഷൻ അടക്കം അട്ടപ്പാടിയിലെ പ്രധാന കേന്ദ്രങ്ങളിൽ ഒക്കെ വന്യമൃഗങ്ങൾ പ്രത്യക്ഷപ്പെടുന്നു. വന്യമൃഗങ്ങളിൽനിന്ന് ജനങ്ങൾക്കു ശാശ്വതമായ സംരക്ഷണം നൽകാൻ സർക്കാർ യാതൊരു നടപടിയും സ്വീകരിക്കുന്നില്ലെന്ന് കർഷകർ ചൂണ്ടിക്കാട്ടി. ജൂൺ അഞ്ചിന് കിസാൻ സഭ അട്ടപ്പാടി മണ്ഡലം കമ്മിറ്റി ആനപ്രശ്നം, ഭൂമിപ്രശ്നം എന്നിവയ്ക്കു പരിഹാരം ആവശ്യപ്പെട്ടു മുക്കാലി ഫോറസ്റ്റ് ഓഫീസിനു മുമ്പിൽ സമരം നടത്തുമെന്ന് ബന്ധപ്പെട്ടവർ അറിയിച്ചു. പൊറ്റശേരി മണികണ്ഠൻ സമരം ഉദ്ഘാടനം ചെയ്യും.

തെരുവുനായകളെ ഇടിച്ച് ബൈക്ക് മറിഞ്ഞു വീട്ടമ്മയ്ക്കു പരിക്ക്

അകത്തേത്തറ: ദമ്പതികൾ സഞ്ചരിച്ചിരുന്ന ഇരുചക്രവാഹനത്തി ൽ തെരുവുനായകൾ വന്നിടിച്ച് വാഹനത്തിനു പിറകിലിരുന്ന വീട്ടമ്മ തെറിച്ചുവീണു. അകത്തേത്തറ ചിത്രനഗർ ഗ്രീൻസ് വീട്ടിലെ ശ്രീവല്ലഭന്‍റെ ഭാര്യ ശ്രീപാർവതി(61) ക്കാണ് പരിക്കുപറ്റിയത്. അപകടത്തെതുടർന്ന് സ്വകാര്യ ആശുപത്രിയിലെത്തിച്ചു. ശ്രീപാർവതിയുടെ കാലിന്‍റെ എല്ലുപൊട്ടി. തിങ്കൾ രാവിലെ 11.30 ഓടെ മലമ്പുഴ മെയിൻ റോഡിലൂടെ ദമ്പതികൾ സഞ്ചരിച്ചിരുന്ന വാഹനത്തിലേക്കു തട്ടുറുമ്പുകാട് ഇടവഴിയിൽനിന്നും കടിപിടികൂടി ഓടിവന്ന തെരുവുനായകൾ ഇടിക്കുകയായിരുന്നു. പരാക്രമത്തിൽ നായകളുടെ നഖം ശ്രീപാർവതിയുടെ ദേഹത്തുകൊണ്ട് പോറലേറ്റിരിക്കാമെന്ന നിഗമനത്തിൽ വാക്സിൻ എടുക്കാനും ഡോക്ടർ നിർദേശിച്ചു. ഈ പ്രദേശത്തു തെരുവുനായകളുടെ ശല്യം രൂക്ഷമാണെന്നും പലപ്പോഴും അപകടങ്ങൾ ഉണ്ടാവാറുണ്ടെന്നും അധികൃതർ ശക്തമായ നടപടിയെടുക്കണമെന്നും നാട്ടുകാർ ആവശ്യപ്പെട്ടു.

വന്യമൃഗങ്ങളുടെ ആക്രമണഭീതിയിൽ മലയോരമേഖല

പാലക്കയം: മലയോരജനതയുടെ ആശങ്കകൾ പങ്കുവെച്ച് തച്ചമ്പാറ പഞ്ചായത്ത് ജനജാഗ്രതസമിതിയുടെ ആലോചനായോഗം ചേർന്നു. ജാഗ്രതായോഗം തച്ചമ്പാറ പഞ്ചായത്ത് പ്രസിഡന്‍റ് നൗഷാദ് ബാബു ഉദ്ഘാടനം ചെയ്തു. പാലക്കയം സെന്‍റ് മേരീസ്‌ പള്ളി വികാരി ഫാ. ചെറിയാൻ ആഞ്ഞിലിമൂട്ടിൽ അധ്യക്ഷത വഹിച്ചു. ഫോറസ്റ്റ് റേഞ്ച് ഓഫീസർ മനോജ് അടക്കമുള്ള ഉദ്യോഗസ്ഥരോട് കർഷകർ ആശങ്കകൾ പങ്കുവെച്ചു. വനാതിർത്തികളിൽ വന്യമൃഗപ്രതിരോധ സംവിധാനങ്ങൾ ഏർപ്പെടുത്തിയിട്ടും കാട്ടാനകളിറങ്ങുന്നത് മലയോരേഖലയിലെ ജനജീവിതം ദുരിതത്തിലാക്കുന്നു. മുണ്ടൂർ, പുതുപ്പരിയാരം, അകത്തേത്തറ, കരിമ്പ, തച്ചമ്പാറ പഞ്ചായത്തുകളിലെ വനാതിർത്തികളിലാണ് കാട്ടാനശല്യം രൂക്ഷമായത്. പലവട്ടം കാട്ടിലേക്ക് തുരത്തിയിട്ടും രാത്രി വീണ്ടും കാടിറങ്ങുന്ന ആനകൾ വ്യാപകമായി കൃഷി നശിപ്പിക്കുന്നുണ്ട്. ധോണി, പയറ്റാംകുന്ന്, കയ്യറ, ഞാറക്കോട്, അത്താണിപ്പറമ്പ്, പുളിയംപുള്ളി, വടക്കന്‍റെ കാട്, മലമ്പള്ള, എതിർപ്പുള്ളി, മേലേപയ്യാനി, മുതുകാട് പറമ്പ്്, പാങ്ങ്, ചെറുമല, തരുപ്പപ്പതി, മുണ്ടനാട്, അച്ചിലട്ടി, ചീനിക്കപ്പാറ, വട്ടപ്പാറ തുടങ്ങിയ ഭാഗങ്ങളിലും കാഞ്ഞിരപ്പുഴ പഞ്ചായത്തിലെ ഇരുമ്പകച്ചോലയിലും വന്യമൃഗങ്ങൾ സ്ഥിരമായി ഇറങ്ങുന്നത് പ്രതിരോധസംവിധാനങ്ങൾ തകർത്താണ്. പൂർത്തീകരിച്ച ഭാഗങ്ങളിൽ ഫെൻസിംഗ് തകർത്ത് ആനകളിറങ്ങുന്നതും വെല്ലുവിളിയാവുകയാണ്. കർഷകർക്ക് കൃഷിയിടങ്ങളിൽ പോലും ഇറങ്ങാൻ കഴിയാതെ കഷ്ടപ്പെടുകയാണ്. കല്ലടിക്കോടൻ മലയുടെ താഴ് വാരത്ത് വൈദ്യുതിവേലികളുടെ നിർമാണം പലഭാഗങ്ങളിലും പൂർത്തിയായിട്ടില്ല. പൂർത്തിയാക്കിയ ഭാഗങ്ങളിൽ കാട്ടാനകൾ തകർത്ത് അകത്തുകയറുന്നതും പതിവാണ്. മരങ്ങൾ തള്ളിയിട്ട് വേലിതകർത്താണ് ആനകളിറങ്ങുന്നത്. കൃത്രിമശബ്ദം പുറപ്പെടുവിച്ച് ആനകളെ വിരട്ടിയോടിക്കാനുള്ള ഫാംഗാർഡ് സംവിധാനവും ചില ഭാഗങ്ങളിൽ സ്ഥാപിച്ചിട്ടുണ്ട്. ഫെൻസിംഗ് നിർമാണം ഉടൻ പൂർത്തിയാക്കണമെന്നാവശ്യപ്പെട്ട് കെസിവൈഎം പൊന്നംകോട് ഫൊറോനാ സമിതി കല്ലടിക്കോട്ട് ഏകദിന സത്യാഗ്രഹം നടത്തുകയുണ്ടായി. കാട്ടാന, മാൻ, കടുവ, പുലി, ചെന്നായ, തുടങ്ങിയ മൃഗങ്ങൾ കൃഷിയിടത്തിലും വീടുകൾക്കു സമീപവും എത്തുന്നതും ആളുകളെ ആക്രമിക്കുന്നതും കൃഷി നശിപ്പിക്കുന്നതും പതിവാണ്. പൂഞ്ചോലമുതൽ വേലിക്കാടുവരെ 37 കിലോമീറ്ററിലാണ് ഇവിടെ സൗരോർജ തൂക്കുവേലി ഒരുക്കുന്നത്. മൂന്നു റീച്ചുകളിലായാണ് നിർമാണം. ഇതിൽ 12.7 കിലോമീറ്റർ പൂർത്തിയായി. കർഷകരുടെ പരാതികൾ സ്വീകരിക്കുകയും ആശങ്കകൾ പരിഹരിക്കാൻ നടപ ടി സ്വീകരിക്കുമെന്നും അധികാരികൾ പറഞ്ഞു.

അട്ടപ്പാടി റോഡ് കരാറുകാരനെതിരേ പരാതിയുമായി എംഎൽഎ

മണ്ണാർക്കാട്: അട്ടപ്പാടി റോഡ് കരാറുകാരനെതിരേ പരാതിയുമായി എൻ. ഷംസുദീൻ എംഎൽഎ കിഫ്‌ബി ആസ്ഥാനത്ത്. സിഇഒ ഡോ.കെ.എം. അബ്രഹാമിനെ നേരിൽ കണ്ട് പരാതി നൽകി. മണ്ണാർക്കാട് ചിന്നത്തടാകം റോഡിന്‍റെ ഒന്നാംഘട്ട പ്രവൃത്തി ഒന്നര വർഷമായിട്ടും പൂർത്തീകരിക്കാൻ കരാറുകാരനും ഉദ്യോഗസ്ഥർക്കും കഴിയാത്തതിനാലാണ് കരാറുകാരനെതിരെ എംഎൽഎ പരാതി നൽകിയത്. വിഷയത്തിൽ ഇടപെടാമെന്ന് കിഫ്‌ബി സിഇഒ എംഎൽഎക്ക് ഉറപ്പ് നൽകി. നെല്ലിപ്പുഴ മുതൽ ആനമൂളി വരെയാണ് ഒന്നാംഘട്ട പ്രവൃത്തികൾ നടക്കുന്നത്. ഡ്രൈനേജിന്‍റെ പ്രവൃത്തികളും ടാർ ചെയ്യുന്ന പ്രവർത്തികളും പൂർത്തീകരിച്ചിട്ടില്ല. ഇതോടെ ഇതുവഴിയുള്ള ഗതാഗതം ദുഷ്കരമാണ്. പലതവണ എംഎൽഎ ഉൾപ്പെടെ പറഞ്ഞിട്ടും കരാറുകാർ റോഡ്പണി പൂർത്തീകരിക്കുന്നതിന് തയ്യാറായില്ല. തുടർന്ന് വിവിധ രാഷ്ട്രീയപാർട്ടികളും സംഘടനകളും സമരവുമായി രംഗത്ത് വന്നിരുന്നു. എന്നിട്ടും ഫലമുണ്ടായില്ല.

നെല്ലിയാമ്പതി കൈകാട്ടി-നൂറടി റോഡിന്‍റെ വശം ഇടിഞ്ഞ് അപകടഭീഷണി

നെല്ലിയാമ്പതി: കൈകാട്ടി നൂറടി റോഡിന്‍റെ വശം ഇടിഞ്ഞു. എവിടി ഫാക്ടറിക്കും കൂനംപാലത്തിനും ഇടയിലുള്ള ഭാഗത്താണ് റോഡ് ഇടിഞ്ഞത്. നെല്ലിയാമ്പതി പഞ്ചായത്ത് അധികൃതരുടെ നേതൃത്വത്തിൽ പാതയുടെ ഇടിഞ്ഞ ഭാഗം കല്ലുകളും മണ്ണ് നിറച്ച ചാക്കുകളും വെച്ച് താത്കാലിക സംരക്ഷണ ഭിത്തി നിർമിച്ചു ഗതാഗത സൗകര്യമൊരുക്കി. പൊതുമരാമത്ത് വകുപ്പ് അധികൃതർ റോഡിന്‍റെ വശം ഇടിഞ്ഞത് പരിശോധിച്ചു. ചായത്തോട്ടത്തിൽ നിന്നും ഒഴുകിവരുന്ന വെള്ളം റോഡ് മുറിച്ച് കടക്കുന്ന ഭാഗത്താണ് വശം ഇടിഞ്ഞുപോയത്. വീതി കുറഞ്ഞ റോഡും വളവും ആയതിനാൽ വാഹനയാത്രയ്ക്ക് ബുദ്ധിമുട്ടുണ്ട്. കാരപ്പാറ, വിക്ടോറിയ, നൂറടി ഭാഗങ്ങളിലേക്കുള്ള കെഎസ്ആർടിസി, സ്വകാര്യ ബസ്, സ്കൂൾ വാഹനങ്ങൾ മറ്റു വാഹനങ്ങൾ എന്നിവ ഇതുവഴിയാണ് കടന്നുപോകുന്നത്. എത്രയും വേഗം വാഹന ഗതാഗതത്തിന് പാത യോഗ്യമാക്കണമെന്ന് ഗ്രാമപഞ്ചായത്ത് പ്രസിഡണ്ട് പ്രിൻസ് ജോസഫ്, നാഷണൽ ജനതാദൾ നെല്ലിയാമ്പതി പഞ്ചായത്ത് കമ്മിറ്റി സെകട്ടറി വി.എസ്. പ്രസാദ്, കെ.ജെ. ഫ്രാൻസിസ് എന്നിവർ ആവശ്യപ്പെട്ടു.

വന്യമൃഗങ്ങൾ നാട്ടിലിറങ്ങുന്നതിനു ശാശ്വതപരിഹാരം കാണണം: സേവ് സിപിഐ ജില്ലാ ലീഡേഴ്സ് ക്യാമ്പ്

വടക്കഞ്ചേരി: ജില്ലയിൽ രൂക്ഷമായിട്ടുള്ള വന്യമൃഗശല്യത്തിന് ശാശ്വതപരിഹാരം കാണണമെന്നും എല്ലാ വിളവെടുപ്പിലും നെല്ലെടുപ്പ് പ്രഹസനം നടത്തി കർഷകരെ വഞ്ചിക്കുന്ന മന്ത്രി പ്രഹസന മാമാങ്കം അവസാനിപ്പിക്കണമെന്നും സേവ് സിപിഐ ജില്ലാ ലീഡേഴ്സ് ക്യാമ്പ് ആവശ്യപ്പെട്ടു. ഗതാഗതയോഗ്യമല്ലാത്ത ദേശീയപാതയിലെ ടോൾ പിരിവ് നിർത്തിവെയ്്പിക്കണമെന്നും ക്യാമ്പിൽ ആവശ്യമുന്നയിച്ചു. വടക്കഞ്ചേരിയിൽ നടന്ന ക്യാമ്പ് സേവ് സിപിഐ ജില്ലാ സെക്രട്ടറി പാലോട് മണികണ്ഠൻ ഉദ്ഘാടനം ചെയ്തു. എ.പി. അഹമ്മദ് മാസ്റ്റർ, വി.എ. റഷീദ്, എൽദോ, പി. സുഭാഷ്, പി.കെ. സുഭാഷ്, ജയൻ മണ്ണാർക്കാട്, യൂസഫലി പട്ടാമ്പി, സജീവൻ തൃത്താല, സലാം ഒറ്റപ്പാലം, സുരേഷ് കരിമ്പുഴ, ബിജോയ് ജോർജ് അട്ടപ്പാടി, കെ.വി. നൗഷാദ് കോങ്ങാട്, ടി. എ. കൃഷ്ണൻ പാലക്കാട്, സുഭാഷ് കുഴൽമന്ദം, സുരേഷ് ഫൈസൽ ആലത്തൂർ എന്നിവർ പ്രസംഗിച്ചു. പാലോട് മണികണ്ഠൻ -സെക്രട്ടറി, കൊടിയിൽ രാമകൃഷ്ണൻ, ആർ.രാധാകൃഷ്ണൻ- അസിസ്റ്റന്‍റ് സെക്രട്ടറിമാർ, ടി.വി. ജോൺസൺ - ട്രഷറർ എന്നിവരെ തെരഞ്ഞെടുത്തു.

വാഹനാപകടത്തിൽ പരിക്കേറ്റ് ചികിത്സയിലുള്ള സുബ്രഹ്മണ്യന്‍റെ ജീവിതം ദുരിതപൂർണം

വടക്കഞ്ചേരി: വാഹനാപകടത്തിൽ പരിക്കേറ്റ് ചികിത്സയിൽ കഴിയുന്ന വണ്ടാഴി പഞ്ചായത്ത് ഓഫീസിനടുത്തെ സുബ്രഹ്മണ്യനും കുടുംബവും വലിയ കഷ്ടപ്പാടിലാണ്. ചികിത്സ തുടരുന്നതിനോ നിത്യചെലവുകൾക്കോ മാർഗമില്ലാതെ ഏറെ ദുരിതത്തിലാണ് ഇവരുടെ ജീവിതം. 11 മാസം മുമ്പാണ് വീടിനടുത്ത് വച്ച് സുബ്രഹ്മണ്യ (53)നെ ബൈക്ക് ഇടിച്ചത്. ഇടിച്ച ബൈക്ക് നിർത്താതെ പോയി. റോഡിൽ അവശനിലയിൽ കിടന്നിരുന്ന സുബ്രഹ്മണ്യനെ പിന്നീട് നാട്ടുകാരാണ് ആശുപത്രിയിൽ എത്തിച്ചത്. അപകടത്തിൽ ഇടുപ്പിലും കാലിനും ഗുരുതരമായി പരിക്കേറ്റിരുന്നു. താലൂക്ക്, ജില്ലാ ആശുപത്രികളിൽ ചികിത്സ നടത്തിയാണ് വീട്ടിൽ കൊണ്ടുവന്നത്. എന്നാൽ ഇപ്പോഴും സ്വയം എഴുന്നേറ്റു നടക്കാനോ സ്വന്തം കാര്യങ്ങൾക്കോ ശക്തിയില്ല. ഭാര്യ കൂലിപ്പണിക്കുപോയി കിട്ടുന്ന തുച്ഛമായ വരുമാനം കൊണ്ടാണ് ചികിത്സകളും വീട്ടുചെലവുകളും നടക്കുന്നത്. പണിയില്ലെങ്കിൽ ഉള്ളതും ഇല്ലാതാകും. മകൻ പഠനം നിർത്തി ഹോട്ടൽ പണിക്ക് പോകുന്നുണ്ടെങ്കിലും അച്ഛനെ സഹായിക്കാനുള്ള വരുമാനമൊന്നും ആയിട്ടില്ല. രണ്ടു സെന്‍റ് സ്ഥലത്ത് രണ്ടുമുറി തേക്കാത്ത കുടുസുമുറിയാണ് വീട്. തണുപ്പടിക്കുന്ന കോൺക്രീറ്റിൽ നിലത്ത് തുണി വിരിച്ചാണ് സുബ്രഹ്മണ്യൻ കിടക്കുന്നത്. മഴക്കാലത്ത് തണുപ്പടിക്കാതിരിക്കാൻ ഒരു കട്ടിലെങ്കിലും കിട്ടിയിരുന്നെങ്കിൽ എന്ന ആഗ്രഹമാണ് സുബ്രഹ്മണ്യൻ പങ്കുവക്കുന്നത്. ചികിത്സകളും തുടരണം. എന്നാലെ സ്വയം നടക്കാവുന്ന സ്ഥിതി വരൂ. ഭാര്യ രാവിലെ പണിക്കുപോകും മുമ്പ് എന്തെങ്കിലുമൊക്കെ ഭക്ഷണം ഉണ്ടാക്കി സുബ്രഹ്മണ്യന്‍റെ അടുത്ത്‌വച്ച് പോകും. കൂലിപ്പണികഴിഞ്ഞ് തിരിച്ച് വീട്ടിൽ തിരിച്ചെത്തിയാലും ഭാര്യക്കും വിശ്രമമില്ല. ഭർത്താവിന്‍റെ പകലിലെ പ്രാഥമികാവശ്യങ്ങൾ വരെ നിറവേറ്റുന്നത് പണികഴിഞ്ഞ് ഭാര്യ വീട്ടിൽ തിരിച്ചെത്തുമ്പോഴാണ്. സമീപത്തു തന്നെയുള്ള പഞ്ചായത്ത് ഓഫീസിൽ വീട്ടുകാരുടെ ദൈന്യസ്ഥിതി അറിയിച്ചിട്ടും സഹായങ്ങളൊന്നും ഉണ്ടാകുന്നുമില്ല. സമീപവാസിയായ ഗഫൂർ മുടപ്പല്ലൂർ ഉൾപ്പെടെയുള്ളവർ ഇടയ്ക്ക് ഭക്ഷണവും മറ്റും എത്തിച്ചുകൊടുക്കുന്നുണ്ട്.

വന്യമൃഗശല്യം രൂക്ഷമായിട്ടും അധികൃതർക്ക് നിസംഗത; കോൺഗ്രസ് പ്രക്ഷോഭത്തിലേക്ക്

മണ്ണാർക്കാട്: കോട്ടോപ്പാടം പഞ്ചായത്തിലെ കാപ്പുപറമ്പ്, അമ്പലപ്പാറ, ഇരട്ടവാരി, തിരുവിഴാംകുന്ന്, കച്ചേരിപ്പറമ്പ്, പുറ്റാനിക്കാട്, കണ്ടമംഗലം, മേക്കളപ്പാറ എന്നീ പ്രദേശങ്ങളിൽ ജനവാസമേഖലയിൽ കാട്ടാന ഇറങ്ങുന്നത് പതിവായിരിക്കുകയാണ്. വൈകുന്നേരം ഏഴു മണിയായാൽ ഇവിടുത്തെ താമസക്കാർക്ക് പുറത്തിറങ്ങാൻ കഴിയാത്ത സ്ഥിതിയാണ്. പുലർച്ചയ്ക്ക് റബർ ടാപ്പിംഗിന് പോകുന്ന തൊഴിലാളികൾ പല തവണ മെയിൻ റോഡിൽ വച്ച് കാട്ടാനയെ കണ്ട അവസ്ഥയുണ്ടായിട്ടുണ്ട്. നിരവധി ആളുകളാണ് രാവിലെ അഞ്ചു മണിക്ക് മുമ്പായി റോഡിലൂടെ സഞ്ചരിക്കുന്നത്. തലനാരിഴക്ക് കാട്ടാനയിൽനിന്നും രക്ഷപ്പെട്ട അനുഭവം പലർക്കും ഉണ്ടായിട്ടുണ്ട്. വളർത്തു മൃഗങ്ങളെ കൊണ്ടുപോകുന്ന വന്യജീവിയുമുണ്ട്. ആടിനെയും പശുക്കളെയും വളർത്തി ഉപജീവനം കണ്ടെത്തുന്ന നിരവധി കുടുംബങ്ങളുള്ള പ്രസ്തുത പ്രദേശങ്ങളിലെ സ്ഥിതിയിതാണ്. കുരങ്ങ് ശല്യം കാരണം തെങ്ങുകളിൽ ഒരു നാളികേരം പോലും കിട്ടാത്ത കർഷകർക്ക് സ്വത്തിനും ജീവനും വന്യമൃഗങ്ങളിൽനിന്നും ശാശ്വതമായ പരിഹാരം ലഭ്യമാക്കണമെന്ന് കോൺഗ്രസ് ആവശ്യപ്പെട്ടു. തിരുവിഴാംകുന്ന് വെറ്ററിനറി ഫാമിൽ കാട്ടാന കയറികഴിഞ്ഞാൽ പിന്നെ ഫാംതൊഴിലാളികളും പരിസരങ്ങളിൽ താമസിക്കുന്നവരും ഫാമിലെ വിദ്യാർഥികളും ഭീതിയോടെയും ആശങ്കയിലുമാണ്. വനപാലകരും ആർആർടിയും വന്നാൽ തന്നെ സൈലന്‍റ് വാലി ബഫർ സോണിലേക്ക് കാട്ടാനകളെ തുരത്താൻ കഴിയാറില്ല. രാത്രിയിൽ തിരുവിഴാംകുന്ന്, ഇരട്ടവാരി, അമ്പലപ്പാറ, കാപ്പുപറമ്പ് ഭാഗത്തേക്ക് റോഡിലൂടെ സഞ്ചരിക്കുന്നവർ കടുത്തപേടിയോടെയാണ് സഞ്ചരിക്കുന്നത്. കേരള അഗ്രികൾച്ചറൽ വെറ്ററിനറി ഫാമിന് ചുറ്റും ചുറ്റുമതിൽ കെട്ടുന്നതിന് നടപടി സ്വീകരിക്കണമെന്നും വനംവകുപ്പ് മേഖലയിലെ ജനങ്ങളുടെ ജീവനും സ്വത്തിനും സംരക്ഷണം നൽകാൻ ശാശ്വതപരിഹാരം കാണണമെന്നാവശ്യപ്പെട്ടും കോട്ടോപ്പാടം മണ്ഡലം കോൺഗ്രസ് കമ്മറ്റിയുടെ നേതൃത്വത്തിൽ പ്രക്ഷോഭം സംഘടിപ്പിക്കാൻ തീരുമാനിച്ചു. യോഗം ബ്ലോക്ക് കോൺഗ്രസ് പ്രസിഡന്‍റ് അസീസ് ഭീമനാട് ഉദ്ഘാടനം ചെയതു.

തൊഴിൽമേഖല ഉപേക്ഷിച്ച് പുതുതലമുറ പുതിയ തൊഴിലിടങ്ങളിലേക്ക്

ഒറ്റപ്പാലം: കൈത്തറി നെയ്ത്തു തൊഴിലാളികൾക്ക് പറയാനുള്ളത് ദുരിതകഥ മാത്രം. കൈത്തറി മേഖല വളരെ വലിയ പ്രതിസന്ധിഘട്ടത്തിലൂടെയാണ് കടന്നുപോയിക്കൊണ്ടിരിക്കുന്നത്. ഇവയുടെ നിലനിൽപ്പ്തന്നെ അവതാളത്തിലായിക്കഴിഞ്ഞു. സർക്കാരിന്‍റെ ഭാഗത്തുനിന്നുള്ള അനാസ്ഥയാണ് ഈ തൊഴിൽ മേഖലയെ വഴിമുട്ടിക്കുന്നത്. നൂറുകണക്കിന് തൊഴിലാളികൾ ഈ മേഖലയോട് ഇതിനകംതന്നെ വിടപറഞ്ഞു കഴിഞ്ഞു. ഇത്തരം യൂണിറ്റുകളെ പ്രോത്സാഹിപ്പിക്കുന്നതിനായി തുടങ്ങിയ കൈത്തറി യൂണിഫോം പദ്ധതിയും ഇവർക്ക് ഗുണകരമായില്ല. യൂണിഫോം നെയ്ത്തിന്‍റെ വേതനം കിട്ടാത്തതിനാൽ ഇവർക്ക് ഇതും പാതിവഴിയിൽ നിർത്തേണ്ട സ്ഥിതിയാണുണ്ടായത്.യൂണിഫോം നെയ്ത്തിലൂടെ പ്രതിസന്ധി ഒഴിവായി കരകയറാമെന്ന മോഹവും ഇതോടെ അസ്തമിച്ചു കഴിഞ്ഞു. പദ്ധതി നടപ്പാക്കിയതിനുപിന്നാലെ വർഷങ്ങൾക്കുമുമ്പ് തുടങ്ങിയ നെയ്ത്താണ് ഒന്നരവർഷംമുൻപ് നിർത്തിയത്. യൂണിഫോം നെയ്ത്തിന് രണ്ടുതൊഴിലാളികളാണ് രാവന്തിയോളം തൊഴിലെടുത്തിരുന്നത്. ഒരുദിവസം രണ്ടു തൊഴിലാളികൾ ചേർന്ന് 20 മീറ്ററിലേറെ യൂണിഫോം തുണികളാണു നെയ്തുണ്ടാക്കിയിരുന്നത്. മാസത്തിൽ 500 മീറ്ററോളം തുണി പാലപ്പുറത്തുനിന്നുമാത്രം യൂണിഫോമായി കുട്ടികളുടെ കൈകളിൽ എത്തിയിരുന്നു. ആദ്യകാലങ്ങളിൽ വേതനം കൃത്യമായി ലഭിച്ചെങ്കിലും പിന്നീട് കാലതാമസം വന്നുതുടങ്ങി. ആറുമാസത്തിലധികം വേതനക്കുടിശിക വന്നുതുടങ്ങിയതോടെ ഒരാൾ തൊഴിൽ നിർത്തി. മറ്റൊരാൾ ഇതുകാരണവും വാർധക്യസഹജമായ പ്രശ്നങ്ങളുംമൂലം നെയ്ത്തിൽനിന്ന് പിന്മാറി. നെയ്ത്തിൽനിന്നുള്ള വരുമാനത്തെ മാത്രം ആശ്രയിച്ചാണ് തൊഴിലാളികൾ മുന്നോട്ടുപോയിരുന്നത്. സർക്കാർ വഴി പണം നേരിട്ട് അക്കൗണ്ടിൽ നിക്ഷേപിക്കുകയാണുചെയ്തിരുന്നത്. തൊഴിലാളികൾ ഇല്ലാതായതോടെ അതുവഴി സഹകരണസംഘത്തിനുലഭിച്ച വരുമാനവും നിലച്ചു. സഹകരണസംഘത്തിൽ കൈത്തറി നെയ്ത്തിൽ ഏർപ്പെട്ടിരുന്ന തൊഴിലാളികൾക്ക് സർക്കാർ നൽകിയിരുന്ന പ്രൊഡക്ഷൻ ഇൻസെന്‍റീവും അഞ്ചുവർഷത്തോളമായി കുടിശികയാണ്. അഞ്ച് നെയ്ത്തുതൊഴിലാളികൾക്ക് 2019 സെപ്റ്റംബർമുതൽ 2023 വരെയാണ് കുടിശികയുള്ളത്. ഈയിനത്തിൽ ഏകദേശം ഒൻപതുലക്ഷം രൂപയാണ് കുടിശികയായിക്കിടക്കുന്നത്. ഒരു ദിവസം നാലുമീറ്ററിൽ കൂടുതൽ തുണി നെയ്യുന്ന തൊഴിലാളികൾക്ക് മാസാമാസം സർക്കാർ അനുവദിക്കാറുള്ളതാണു പ്രൊഡക്ഷൻ ഇൻസെന്‍റീവ്. തുണി കുലത്തൊഴിലാളി സ്വീകരിച്ചു വന്നിരുന്ന ഒരു ജാതി സമൂഹം തന്നെ ഈ മേഖലയിൽ പ്രവർത്തിച്ചുവരുന്നുണ്ട് എന്നാൽ പുതിയ തലമുറയിൽ പെട്ടവർ ഈ തൊഴിൽ എടുക്കാൻ തയ്യാറാകുന്നില്ല. ജീവിതം വഴിമുട്ടി പോകും എന്നുള്ളതാണ് ഇതിന് കാരണം.

തെരുവുനായകൾക്കു പേവിഷബാധയ്ക്കെതിരായ കുത്തിവയ്പ് ഒറ്റപ്പാലത്തു തുടങ്ങി

ഒറ്റപ്പാലം: നഗരസഭ പ്രദേശത്ത് തെരുവുനായകൾക്ക് പേവിഷബാധയ്ക്കെതിരായ പ്രതിരോധ കുത്തിവെയ്്പ് എടുക്കുന്ന നടപടികൾ തുടങ്ങി. മൃഗസംരക്ഷണ വകുപ്പ് നൽകിയ ശുപാർശ പരിഗണിച്ചാണു മുഴുവൻ തെരുവുനായകളെയും കുത്തിവെപ്പിനു വിധേയമാക്കാൻ നഗരസഭ നടപടികൾ തുടങ്ങിയത്. നഗരസഭയുടെ വാർഷിക പദ്ധതിയിൽ ഉൾപ്പെടുത്തിയാണിത്. ഈ ആഴ്ച തന്നെ ആദ്യ 4 വാർഡുകളിൽ കുത്തിവെയ്്പ് പൂർത്തിയാക്കുമെന്നു മൃഗസംരക്ഷണവകുപ്പിലെ ഉദ്യോഗസ്ഥർ അറിയിച്ചു. നായകളെ പിടിച്ച് അവിടെ വച്ചുതന്നെ കുത്തിവെപ്പിനു വിധേയമാക്കിയ ശേഷം തുറന്നുവിടുന്നതാണു രീതി. ഒരു മാസം മുന്പാണു പ്രഭാത സവാരിക്കിറങ്ങിയ മായന്നൂർ സ്വദേശിയായ എഴുപതുകാരിയെയും ഈസ്റ്റ് ഒറ്റപ്പാലം സ്വദേശിയെയും നായ കടിച്ചത്. ഇതിനുപിന്നാലെ നാട്ടുകാരും മൃഗസംരക്ഷണ വകുപ്പും ചേർന്നു പിടികൂടിയ നായയെ നിരീക്ഷിച്ച ശേഷമാണു പേവിഷബാധ സ്ഥിരീകരിച്ചത്. പിന്നാലെ കുത്തിവെപ്പു നടത്തണമെന്ന് ആവശ്യപ്പെട്ടു മൃഗസംരക്ഷണ വകുപ്പ് നഗരസഭയ്ക്കു കത്തു നൽകുകയായിരുന്നു. ഇതിനിടെ റെയിൽവേ സ്റ്റേഷൻ, ബസ് സ്റ്റാൻഡ് പരിസരങ്ങളിലും കേന്ദ്രീയ വിദ്യാലയം പ്രദേശം ഉൾപ്പെടെ കിഴക്കൻ മേഖലയിലും തെരുവുനായ ശല്യം രൂക്ഷമായി. പ്രഭാതസവാരിക്കിറങ്ങിയവർ ആക്രമിക്കപ്പെട്ട മായന്നൂർപ്പാലം പരിസരത്തും നായ്ക്കളുടെ ശല്യത്തിനു ഇപ്പോഴും കുറവില്ലാത്ത സ്ഥിതിയാണ്.

നെൽകർഷകർക്ക് കുടിശിക ഉടൻ നൽകണം: കേരള കോണ്‍ഗ്രസ്‌-ജേക്കബ്

പാലക്കാട്: 9 വർഷത്തെ ഇടതുപക്ഷ ഭരണം ജനങ്ങളെ ദുരിതത്തിലാക്കിയതിന്‍റെ വിധിയെഴുത്താണ് കഴിഞ്ഞ നിലന്പൂർ ഉപതെരഞ്ഞെടുപ്പിൽ യുഡിഎഫിന് വൻഭൂരിപക്ഷത്തിൽ വിജയിക്കാൻ സാധിച്ചതെന്ന് കേരളാ കോണ്‍ഗ്രസ്‌-ജേക്കബ് സംസ്ഥാന വൈസ് ചെയർമാൻ വി.ഡി. ജോസഫ് പറഞ്ഞു. ജില്ലാ സെക്രട്ടറിയേറ്റ് യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ജില്ലയിലെ നെൽകർഷകരുടെ കാര്യം വളരെ പരിതാപകരമാണ്. രണ്ടാം കൃഷിയുടെ നെല്ല് സപ്ലൈകോയ്ക്ക് കൊടുത്ത് കർഷകർക്ക് പി.ആഎസ് ലഭിച്ചിട്ട് മാസങ്ങളായി 35966 കർഷകർക്ക് ഇനിയും 263.871 കോടി രൂപ കൊടുക്കാനുണ്ട്. കർഷകർ വീണ്ടും കടം വാങ്ങി കക്ഷി ഒന്നാം കൃഷിയിറക്കി ഇതുവരെയായിട്ടും കർഷകർക്ക് പണം ലഭിച്ചിട്ടില്ല. മുഴുവൻ കർഷകർക്കും ഉടൻ സർക്കാർ പണം അനുവദിച്ചില്ലെങ്കിൽ കർഷകരെ പങ്കെടുപ്പിച്ചുകൊണ്ട് സമരപരിപാടിയുമായി മുന്നോട്ട് പോകാൻ പാർട്ടി തീരുമാനിച്ചു. യോഗത്തിൽ പാർട്ടി ജില്ലാ വൈസ് പ്രസിഡന്‍റ് എൻ.കെ പുരുഷോത്തമൻ അധ്യക്ഷത വഹിച്ചു. ജില്ലാ ജനറൽ സെക്രട്ടറി കെ.വി. സുദേവൻ സ്വാഗതം പറഞ്ഞു. പാർട്ടി ജില്ലാ ഭാരവാഹികളായ ശശി പിരായിരി, വി.എ. കേശവൻ, കെ.പി. തങ്കച്ചൻ, പി.എം. ജോസ്, നാരായണൻ പരുത്തിപ്പുള്ളി, ബിജു സെബാസ്റ്റ്യൻ, മുരളി കല്ലടിക്കോട്, രാജേന്ദ്രൻ, ജെയിംസ് തോമസ് എന്നിവർ പ്രസംഗിച്ചു. ജില്ലാ ജനറൽ സെക്രട്ടറി വി. അനിൽകുമാർ നന്ദി പറഞ്ഞു.

ഷൊർണൂർ ജംഗ്ഷൻ റെയിൽവേ സ്റ്റേഷനിൽ ബാറ്ററി കാർ സർവീസിനു വിലക്ക്

ഷൊർണൂർ: ജംഗ്ഷൻ റെയിൽവേ സ്റ്റേഷനിൽ ബാറ്ററി കാർ സർവീസിനു വിലക്ക്. പ്ലാറ്റ്‌ഫോമുകളിൽ യാത്രക്കാരെ കൊണ്ടുപോയിരുന്നതായിരുന്നു ഈ ബാറ്ററി കാർ സർവീസ്. സുരക്ഷാമാനദണ്ഡങ്ങൾ ലംഘിക്കുന്നതായി കണ്ടെത്തിയതോടെയാണ് റെയിൽവേ സുരക്ഷാവിഭാഗം ബാറ്ററി കാർ സർവീസ് നിർത്താൻ ഉത്തരവിട്ടത്. റെയിൽവേ സ്റ്റേഷനിലെ ഏഴ് പ്ലാറ്റ്‌ഫോമുകളിലേക്കും യാത്രക്കാരെയും ബാഗേജും കൊണ്ടുപോകാൻ സഹായിച്ചിരുന്ന ബാറ്ററി കാറാണ് സർവീസ് തുടങ്ങിയതിന് തൊട്ട് പുറകെ നിർത്തലാക്കിയത്. പ്രവേശനകവാടത്തിൽനിന്ന് പ്ലാറ്റ്‌ഫോമുകളിലേക്ക് യാത്രക്കാരുമായി പോകാനുള്ള ബാറ്ററി കാർ യാത്രക്കാർക്കു ഏറെ സഹായകമായിരുന്നു. എന്നാൽ, ബാറ്ററി കാറുകൾ റെയിൽവേ ട്രാക്കുകൾ മുറിച്ചുകടക്കുന്നെന്ന് കണ്ടെത്തിയതോടെയാണ് നടപടി. പ്ലാറ്റ്‌ഫോമുകളിൽമാത്രം സർവീസ് നടത്താൻ അനുമതി നൽകിയ ബാറ്ററി കാർ റെയിൽവേ ട്രാക്ക് മുറിച്ചുകടക്കുന്നത് പരാതിയായതോടെ സേഫ്റ്റി കമ്മീഷണർ ഇടപെടുകയായിരുന്നു. ഇതോടെ യാത്രക്കാർ വീണ്ടും ഭാരമേറിയ ലഗേജുമായി പ്ലാറ്റ്‌ഫോമുകൾ കയറിയിറങ്ങേണ്ട അവസ്ഥയാണ്. രണ്ടാമത്തെ മേൽപ്പാലം പണി നടക്കുന്നതിനാൽ പ്ലാറ്റ്‌ഫോമുകളുടെ പടിഞ്ഞാറേ അറ്റത്തെ മേൽപ്പാലം മാത്രമാണ് യാത്രക്കാർക്ക് ആശ്രയം. പ്രവേശനകവാടംമുതൽ മേൽപ്പാലം കയറി ഏഴാമത്തെ പ്ലാറ്റ്‌ഫോമിലെത്തുംവരെ നടക്കണം. പ്രായമായവരും ഗർഭിണികളും ഉൾപ്പെടെയുള്ളവർ ഏറെ പ്രയാസപ്പെടുന്നുണ്ട്. ബാറ്ററി കാർ സർവീസ് വീണ്ടും പുനരാരംഭിക്കുവാൻ നടപടി വേണമെന്ന് യാത്രക്കാരുടെ ഭാഗത്തുനിന്നും ആവശ്യമുയർന്നിട്ടുണ്ട്.

നിരോധിച്ച നോട്ടുമായി ഓഫീസുകൾ കയറിയിറങ്ങി വയോധിക

കോയമ്പത്തൂർ: പഴയ നോട്ടുകൾ മാറ്റിവാങ്ങാൻ ആവശ്യപ്പെട്ട് നാലാമത്തെ തവണയും കളക്ടർക്ക് പരാതിനൽകി വയോധിക. നോട്ട് അസാധുവാക്കിയത് അറിയാതെ പഴയ കറൻസികൾ കൈവശം വച്ചിരുന്ന കോയമ്പത്തൂരിൽ നിന്നുള്ള തങ്കമണി എന്ന വയോധിക ഏകദേശം 15,000 രൂപയുടെ പഴയ കറൻസി നോട്ടുകൾ മാറ്റിത്തരണമെന്ന് ആവശ്യപ്പെട്ട് നാലാം തവണയും കളക്ടറുടെ അടുത്തെത്തി. കോയമ്പത്തൂരിലെ സിംഗനല്ലൂരിലെ ഉപ്പിലിപ്പാലയം സ്വദേശിയാണ് തങ്കമണി (79). ഭർത്താവ് ബാലകൃഷ്ണൻ. മകൻ സെന്തിൽകുമാർ ലോറി ഡ്രൈവറായിരുന്നു. 2018-ൽ സെന്തിൽകുമാർ ഹൃദയാഘാതം മൂലം മരിച്ചു. ഒരു ദിവസം വീട് വൃത്തിയാക്കുന്നതിനിടെ മകന്‍റെ ബാഗിൽ 15,000 രൂപയുടെ നോട്ടുകൾ കണ്ടതായി തങ്കമണി പറയുന്നു. ഇന്നലെ കളക്ടറേറ്റിൽ നടക്കുന്ന പൊതുജന പരാതി പരിഹാരയോഗത്തിൽ പരാതി നൽകാൻ വയോധിക എത്തി. ഇതുസംബന്ധിച്ച് മൂന്ന് തവണ ജില്ലാ കളക്ടറുടെ ഓഫീസിൽ പരാതി നൽകിയിട്ടും അധികാരികൾ ശരിയായ രീതിയിൽ പ്രതികരിച്ചിട്ടില്ലെന്ന് അവർ പറഞ്ഞു. തനിക്ക് ബന്ധുക്കളാരുമില്ലെന്ന് പറയുന്ന വയോധിക 15,000 രൂപ മാറ്റിയാൽ ഒരു ചെറിയ കട ആരംഭിച്ച് ഉപജീവനം കണ്ടെത്തുമെന്ന് പറഞ്ഞു.

ഗതാഗതക്കുരുക്ക്: സംയുക്തപഠനം തുടങ്ങി

കോയമ്പത്തൂർ: നഗരത്തിലെ വർധിച്ചുവരുന്ന ഗതാഗതക്കുരുക്ക് കുറയ്ക്കുന്നതിനായി വിവിധ പ്രധാന റോഡ് ജംഗ്ഷനുകളിൽ വാഹനങ്ങളുടെ സുഗമമായ ചലനം ഉറപ്പാക്കുന്നതിനായി കോർപറേഷൻ റോഡ് ഗതാഗത വിദഗ്ധരുമായും സ്വകാര്യ സംഘടനകളുമായും സംയുക്തപഠനം ആരംഭിച്ചു. നഗരത്തിലെ വാഹനങ്ങളുടെ എണ്ണം വർഷം തോറും വർധിച്ചുകൊണ്ടിരിക്കുകയാണ്. ചില സമയങ്ങളിൽ പ്രധാന റോഡുകളിലെ ഗതാഗതക്കുരുക്ക് കാരണം വാഹനങ്ങൾ ഇഴഞ്ഞുനീങ്ങേണ്ടി വരുന്നു. നഗരത്തിലെ 15 പ്രധാന റോഡ് ജംഗ്ഷനുകൾ മെച്ചപ്പെടുത്താൻ കോയമ്പത്തൂർ കോർപറേഷൻ പദ്ധതിയിട്ടിട്ടുണ്ട്. ഈ സ്ഥലങ്ങളിൽ, ഒരു വിദഗ്ദ്ധ സമിതി കോർപറേഷനും സ്വകാര്യ സംഘടനകളും സംയുക്തമായി ഒരു പഠനം നടത്തി അന്തിമ റിപ്പോർട്ട് സമർപ്പിക്കും. 15 ജംഗ്ഷനുകളിൽ 4 എണ്ണത്തിൽ കമ്മീഷണർ പരിശോധന നടത്തി. കോയമ്പത്തൂർ നഗരത്തിലെ ഗതാഗതക്കുരുക്കുള്ള ചില പ്രദേശങ്ങളായ സതിശാല, വിലാങ്കുറിച്ചി, തുടിയലൂർ ബസ് സ്റ്റാൻഡ്, ചുറ്റുമുള്ള റോഡുകൾ, തടകംശാലൈ എന്നിവയും അദ്ദേഹം പരിശോധിച്ചു. ഈ പ്രദേശങ്ങളിലെ റോഡുകൾ മെച്ചപ്പെടുത്തുന്നതിനും ആവശ്യമായ സ്ഥലങ്ങളിൽ പുതിയ അടിസ്ഥാന സൗകര്യങ്ങൾ ഒരുക്കുന്നതിനും പരിഗണനയിലാണ്. സംയുക്ത പരിശോധന നടത്തുന്ന പ്രത്യേകസംഘം സമർപ്പിക്കുന്ന അന്തിമ റിപ്പോർട്ടിന്‍റെ അടിസ്ഥാനത്തിൽ നടപടി സ്വീകരിക്കും.

വിദ്യാലയങ്ങളിൽ പേവിഷബാധ ബോധവത്കരണവും വന്യമൃഗ ജാഗ്രതാനിർദേശവും നൽകി

നെല്ലിയാമ്പതി: മലയോര മേഖലയായ നെല്ലിയാമ്പതിയിൽ പ്രവർത്തിക്കുന്ന വിദ്യാലയങ്ങളായ ജിഎൽപിഎസ് സീതാർകുണ്ട്, ജിഎൽപിഎസ് ചന്ദ്രാമല, എംഇഎൽപിഎസ് പോത്തുപാറ, പിഎച്ച്എസ്എസ് പോളച്ചിറക്കൽ എന്നീ സ്കൂളുകളിൽ സ്പെഷൽ അസംബ്ലി കൂടുകയും പേവിഷബാധയെക്കുറിച്ച് ബോധവത്കരണ ക്ലാസ് നൽകുകയും മുഴുവൻ വിദ്യാർഥികളും പേവിഷ ബാധക്കെതിരെ പ്രതിജ്ഞ എടുക്കുകയും ചെയ്തു. പേവിഷബാധ പ്രതിരോധത്തിന്‍റെ നിർദേശങ്ങൾ അടങ്ങുന്ന പോസ്റ്റർ സ്റ്റിക്കർ രൂപത്തിലാക്കി സ്കൂളുകളിൽ പതിക്കുകയും ചെയ്തു. നെല്ലിയാമ്പതിയിൽ കഴിഞ്ഞ ദിവസം ഉണ്ടായ കരടി ആക്രമണത്തിന്‍റെ ഭാഗമായി ഹെൽത്ത്‌ ഇൻസ്‌പെക്ടർ ജെ. ആരോഗ്യം ജോയ്‌സന്‍റെ നിർദേശപ്രകാരം കുട്ടികളും രക്ഷകർത്താക്കളും രാത്രികാലങ്ങളിൽ പാടിയിൽനിന്നും പുറത്തിറങ്ങുമ്പോൾ ടോർച്ച് നിർബന്ധമായും ഉപയോഗിക്കണമെന്നും അനാവശ്യ രാത്രിസഞ്ചാരം ഒഴിവാക്കണമെന്നും പ്രത്യേക ജാഗ്രതാ നിർദേശങ്ങൾ മുഴുവൻ വിദ്യാലയങ്ങളിലെയും കുട്ടികൾക്ക് അസംബ്ലിയിൽ നൽകി. ജൂണിയർ ഹെൽത്ത്‌ ഇൻസ്‌പെക്ടർമാരായ ബി. അഫ്സൽ, സൈനു സണ്ണി, എസ്. ശരൺറാം ജൂണിയർ പബ്ലിക് ഹെൽത്ത്‌ നേഴ്സ് സുധിന സുരേന്ദ്രൻ എന്നിവർ നേതൃത്വം നൽകി.

ബ്രെയിലി പഠിതാക്കളുടെ സംഗമം

പാലക്കാട്: ജില്ലാ സാക്ഷരതാ മിഷന്‍റെ നേതൃത്വത്തിൽ ജില്ലയിൽ ബ്രെയിലി പഠിതാക്കളുടെ സംഗമം നടത്തി. മോയൻ എൽപി സ്കൂളിലായിരുന്നു പരിപാടി. ജില്ലാ പഞ്ചായത്ത് പ്രസിഡന്‍റ് ബിനുമോൾ ഉദ്ഘാടനം ചെയ്തു. ജില്ലാ സാക്ഷരതാ സമിതി അംഗം വിജയൻ മാസ്റ്റർ അധ്യക്ഷത വഹിച്ചു. സംസ്ഥാന സാക്ഷരതാ മിഷൻ ഡയറക്ടർ പ്രഫ.എ.ജി. ഒലീന മുഖ്യാതിഥിയായി. ബ്രൈയിൽ ലിപിയിൽ തയ്യാറാക്കിയ ലൈബ്രറി പുസ്തകം കൈമാറി. കേരള ഫെഡറേഷൻ ഓഫ് ദി ബ്ലൈൻഡ് ജില്ല പ്രസിഡന്‍റ് വി.എ. ചന്ദ്രമോഹൻ പദ്ധതി വിശദീകരണം നടത്തി. നഗരസഭ കൗണ്‍സിലർ സൈദു മീരാൻ, സാക്ഷരതാ സമിതി അംഗം ഡോ.പി.സി. ഏലിയാമ്മ, കേരള ഫെഡറേഷൻ ഓഫ് ബ്ലൈൻഡ് ജില്ലാ സെക്രട്ടറി എം.കെ. ഷെരീഫ് എന്നിവർ പ്രസംഗിച്ചു. ജില്ലാ സാക്ഷരതാമിഷൻ കോ-ഓർഡിനേറ്റർ സജി തോമസ് സ്വാഗതവും അസിസ്റ്റന്‍റ് കോ-ഓർഡിനേറ്റർ പി.വി. പാർവതി നന്ദിയും പറഞ്ഞു. തുല്യതാ പഠിതാവായ ശശികലയെയും അധ്യാപക സ്ഥാനത്ത് നിന്ന് വിരമിക്കുന്ന കേരള ഫെഡറേഷൻ ഓഫ് ബ്ലൈൻഡ് പ്രസിഡന്‍റ് വി.എ. ചന്ദ്രമോഹനെയും ആദരിച്ചു.

വായനാവസന്തം താലൂക്ക്തല ഉദ്ഘാടനം

മണ്ണാർക്കാട്: താലൂക്ക് ലൈബ്രറി കൗൺസിലിന്‍റെ നേതൃത്വത്തിൽ നടന്ന വായനാവസന്തം താലൂക്കുതല ഉദ്ഘാടനവും കൗൺസിൽ സംഗമവും പുസ്തകപ്രകാശനവും കവി ആലങ്കോട് ലീലാകൃഷ്ണൻ ഉദ്ഘാടനം ചെയ്തു. റൂറൽ ബാങ്ക് ഹാളിൽ നടന്ന പരിപാടിയിൽ എസ്.ആർ. ഹബീബുള്ള അധ്യക്ഷനായി. വായനവസന്തം കിറ്റ് വട്ടമ്പലം വാസു ലൈബ്രറിക്ക് നൽകി. ജി.പി. രാമചന്ദ്രൻ, എം.ജെ. ശ്രീചിത്രൻ, സീന ശ്രീവത്സൻ, ഷെറീന തയ്യിൽ എന്നിവരെ ആദരിച്ചു. റഷീദ് കുമരംപുത്തൂരിന്‍റെ ‘പ്രതിയും കാക്കയും’ എന്ന പുസ്തകം കെപിഎസ് പയ്യനെടം പി.കെ. വിജയന് നൽകിയും ഇബ്നു അലി എടത്തനാട്ടുകരയുടെ തറുതല എന്ന നോവൽ ജി.പി. രാമചന്ദ്രൻ കെ.എസ്. ജയന് നൽകിയും ഫസൽ എം. റഹ്മാന്‍റെ പ്രണയാക്ഷരങ്ങൾ എന്ന പുസ്തകം ടി.ആർ. തിരുവിഴാംകുന്ന് പി.ഒ. കേശവന് നൽകിയും പി.കെ. സലിലയുടെ ഓർമ്മ വരമ്പത്തെ ഓലച്ചൂട്ട് എം.ജെ. ശ്രീചിത്രൻ കെ. ചന്ദ്രന് നൽകിയും കെ.ടി. റജീനയുടെ ഓർമ നിറങ്ങൾ എന്ന പുസ്തകം പ്രതാപൻ തായാട്ട് കെ. ഹരിദാസനു നൽകിയും പ്രകാശിപ്പിച്ചു. തുടർന്ന് നടന്ന കൗൺസിൽസംഗമം ജില്ലാ സെക്രട്ടറി പി.എൻ. മോഹനൻ ഉദ്ഘാടനം ചെയ്തു. താലൂക്ക് സെക്രട്ടറി എം. കൃഷ്ണദാസ് പ്രവർത്തനറിപ്പോർട്ടും വരവ് ചെലവ് കണക്കും ബജറ്റ് നിർദേശങ്ങളും അവതരിപ്പിച്ചു. വൈസ് പ്രസിഡന്‍റ് കെ.എസ്. ജയൻ സ്വാഗതവും എ.ആർ. രവിശങ്കർ നന്ദിയും പറഞ്ഞു. താലൂക്ക് ജോയിന്‍റ് സെക്രട്ടറി സി.ടി. മുരളിധരൻ, എസ്. കാളിസ്വാമി, ഒ. സാബു, ലൈബ്രേറിയൻസ്‌ യൂണിയൻ താലൂക്ക് സെക്രട്ടറി പി. വിജയകുമാരി എന്നിവർ പ്രസംഗിച്ചു.

ഓൾ കേരള റീട്ടെയിൽ റേഷൻ ഡീലേഴ്സ് അസോസിയേഷൻ ജില്ലാ സമ്മേളനം

പാലക്കാട്: ഓൾ കേരള റീട്ടെയിൽ റേഷൻ ഡീലേഴ്സ് അസോസിയേഷൻ ജില്ലാ സമ്മേളനം സംസ്ഥാന പ്രസിഡന്‍റ് ജോണി നെല്ലൂർ ഉദ്ഘാടനം ചെയ്തു. ചടങ്ങിൽ ജില്ലാ പ്രസിഡന്‍റ് വി.പി. ജയപ്രകാശ് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ടി. മുഹമ്മദാലി മുഖ്യപ്രഭാഷണം നടത്തി, സംസ്ഥാന സെക്രട്ടറിമാരായ ബി. ഉണ്ണികൃഷ്ണപിളള, കെ.എം. അബ്ദുൾ സത്താർ, ജില്ലാ ജനറൽ സെക്രട്ടറി എ. കൃഷ്ണൻ, കെ. അച്യുതൻകുട്ടി, പി.എ. സേതു രാജ്, കെ.എൽ. പോൾ, ടി. മൊയ്തുട്ടി, രവീന്ദ്രൻ പട്ടാന്പി, എം.എച്ച്. അബ്ദുൾ നസീർ, എച്ച്. റാഫി, ബേബി ശ്രീകൃഷ്ണപുരം, വി.പി. രഘുനാഥ്, ആർ. സന്തോഷ്, എസ്. ഗണേശൻ എന്നിവർ പ്രസംഗിച്ചു. പുതിയ ജില്ലാ ഭാരവാഹികളായി വി.പി. ജയപ്രകാശ്- പ്രസിഡന്‍റ്, ടി. മൊയ്തുട്ടി- വർക്കിംഗ് പ്രസിഡന്‍റ്, വി.പി.രഘുനാഥ്, പി.എം.അബ്ദുൾ നാസർ- വൈസ് പ്രസിഡന്‍റുമാർ, എ. കൃഷ്ണൻ- ജനറൽ സെക്രട്ടറി, എച്ച്. റാഫി- ഓർഗനൈസിംഗ് സെക്രട്ടറി, കെ. സതീഷ് കുമാർ, പി.എൻ. പ്രേംനവാസ്, രവീന്ദ്രൻ പട്ടാന്പി-ജോയിന്‍റ്് സെക്രട്ടറിമാർ, പി.എ. സേതു രാജ്- ട്രഷറർ എന്നിവരെ തെരഞ്ഞെടുത്തു.

കഞ്ചിക്കോട് കിൻഫ്ര പാർക്ക് രണ്ടാംഘട്ടം അലോട്ട്മെന്‍റ് ആരംഭിച്ചു

പാലക്കാട്: കഞ്ചിക്കോട് കിൻഫ്ര ഇന്‍റഗ്രേറ്റഡ് ഇൻഡസ്ട്രിയൽ പാർക്കിലെ രണ്ടാം ഘട്ടത്തിന്‍റെ അലോട്ട്മെന്‍റ് ആരംഭിച്ചു. 213 ഏക്കർ വരുന്ന രണ്ടാം ഘട്ടത്തിൽ 74 ഏക്കർ ഭൂമി ഭാരത് പെട്രോളിയം ലിമിറ്റഡിന് അനുവദിച്ചു. കൊച്ചിയിൽ ഫെബ്രുവരിയിൽ നടന്ന ഇൻവെസ്റ്റ് കേരള ആഗോള നിക്ഷേപക സംഗമത്തിൽ ധാരണാപത്രം ഒപ്പിട്ട പദ്ധതിയാണിത്. പൊതുഇടത്തിന്‍റെ വികസനാവശ്യങ്ങൾക്കുശേഷംവരുന്ന ഏതാണ്ട് നൂറ് ഏക്കറോളം ഭൂമി മാത്രമാണ് പാർക്കിൽ ഇനി അനുവദിക്കാനുള്ളത്. പാർക്കിന്‍റെ വികസന പ്രവർത്തനങ്ങൾ വ്യവസായ മന്ത്രി പി. രാജീവ് നേരിട്ടെത്തി വിലയിരുത്തി. രണ്ടു ഘട്ടങ്ങളും ചേർത്ത് 430 ഏക്കറോളം ഭൂമിയാണ് പാർക്കിൽ ആകെയുള്ളത്. ഒന്നാംഘട്ടത്തിൽ 155.51 ഏക്കർ ഭൂമിയും 1,21,553 ചതുരശ്ര അടി വിസ്തീർണമുള്ള സ്റ്റാൻഡേർഡ് ഡിസൈൻ ഫാക്ടറിയുമാണ് സംരംഭകർക്കായി കിൻഫ്ര സജ്ജമാക്കിയത്. ഇതിലെ 142.55 ഏക്കർ ഭൂമി 128 വ്യവസായങ്ങൾക്കായാണ് അനുവദിച്ചത്. ഏകദേശം 450 കോടി രൂപയുടെ നിക്ഷേപവും നാലായിരത്തിൽപരം തൊഴിലവസരങ്ങളുമാണ് ഒന്നാംഘട്ടത്തിൽ സൃഷ്ടിച്ചിട്ടുള്ളത്. എസ്ഡിഎഫ് പൂർണമായും അനുവദിച്ചിരിക്കുന്നത് ഖനനരംഗത്തെ പ്ലാന്‍റുകളുടെയും ഉപകരണങ്ങളുടേയും നിർമാതാക്കളായ ഹെയ്ൽ സ്റ്റോണിനാണ്. 2020ൽ ഇവിടെ അഞ്ച് ഏക്കർ ഭൂമിയിൽ പ്രവർത്തനമാരംഭിച്ച ഹെയ്ൽസ്റ്റോണ്‍ യൂണിറ്റ് വിവിധ ഖനനാവശ്യങ്ങൾക്കുള്ള ഉപകരണങ്ങൾ വികസിപ്പിക്കുന്നതിനാണ് എസ്ഡിഎഫിൽ സ്ഥലം ഏറ്റെടുത്തത്. 20 കോടി രൂപ നിക്ഷേപമുള്ള ഈ പദ്ധതി, നടപടിക്രമങ്ങൾ പൂർത്തിയാക്കി മെയ് അഞ്ചിനാണ് പ്രവർത്തനം ആരംഭിച്ചത്. ഇൻവെസ്റ്റ് കേരള നിക്ഷേപക സംഗമത്തിൽ ധാരണാപത്രം ഒപ്പിട്ട പദ്ധതിയാണ് ഇതും. ഇവിടെ ആദ്യമായി വികസിപ്പിച്ച ലോകോത്തര നിലവാരത്തിലുള്ള ട്രാക് മൗണ്ടിംഗ് മെഷീൻ മന്ത്രി രാജീവ് അനാച്ഛാദനം ചെയ്തു. രണ്ടാം ഘട്ടത്തിൽ 650 കോടി രൂപയുടെ നിക്ഷേപം പ്രതീക്ഷിക്കുന്ന ബിപിസിഎല്ലിന്‍റെ പദ്ധതിക്ക് 90 വർഷമാണ് പാട്ടക്കാലാവധി. മാർച്ച് മാസം അവസാനത്തോടെ നടപടിക്രമങ്ങൾ പൂർത്തിയാക്കി ഭൂമി കന്പനിക്ക് കൈമാറി. 1,19,711 കിലോലിറ്റർ സംഭരണശേഷിയുള്ള പ്ലാന്‍റാണ് ഭാരത് പെട്രോളിയം ഇവിടെ സ്ഥാപിക്കുന്നത്. പാർക്കിൽ രണ്ടാംഘട്ടം വികസനത്തിന്‍റെ ഭാഗമായി കിൻഫ്ര നടത്തിവരുന്ന അടിസ്ഥാന സൗകര്യ വികസനത്തിന് സമാന്തരമായി ബിപിസിഎൽ തങ്ങൾക്കാവശ്യമായ നിർമാണപ്രവർത്തനങ്ങളും ആരംഭിച്ചുകഴിഞ്ഞു.

സാന്പത്തിക ഞെരുക്കം: സംസ്ഥാനത്തെ ഏക സർക്കാർ കമ്യൂണിറ്റി കോളജ് കഴിഞ്ഞവർഷം പ്രവർത്തിച്ചില്ല

ഫ്രാൻസിസ് തയ്യൂർ വടക്കഞ്ചേരി: സംസ്ഥാനത്തെ ഏക സർക്കാർ കമ്യൂണിറ്റി കോളജ് കഴിഞ്ഞവർഷം പ്രവർത്തിച്ചില്ല. ഈ അധ്യയനവർഷവും പ്രവർത്തിക്കുമോ എന്നതിലും അനിശ്ചിതത്വം തുടരുകയാണ്. ജൂൺമാസം അവസാനിച്ചിട്ടും തിരുവനന്തപുരത്തുനിന്നും അനുമതി വന്നിട്ടില്ലെന്നാണ് കോളജ് നടത്തിവരുന്ന ഏജൻസി നൽകുന്ന വിവരം. സർക്കാർഫണ്ട് ഉപയോഗിച്ച് പട്ടികജാതി വികസനവകുപ്പിനു കീഴിൽ തലശേരിയിലെ നെട്ടൂർ ടെക്നിക്കൽ ട്രെയ്നിംഗ് ഫൗണ്ടേഷനാണ് കോഴ്സുകൾ നടത്തുന്നത്. ബംഗളൂരുവാണ് ഏജൻസിയുടെ ആസ്ഥാനം. കോളജിന്‍റെ പ്രവർത്തനം സംബന്ധിച്ച് കഴിഞ്ഞവർഷം പ്രൊപ്പോസൽ നൽകിയിരുന്നെങ്കിലും അനുമതി ലഭിച്ചില്ലെന്നു പറയുന്നു. സർക്കാർ നൽകേണ്ട ഫണ്ടിന്‍റെ കുറവാണ് കോളജിന്‍റെ പ്രവർത്തനം താളംതെറ്റാൻ കാരണമായത്. കഴിഞ്ഞവർഷം കോളജ് പ്രവർത്തിക്കാത്തത് അധികമാരും അറിഞ്ഞതുമില്ല. ഈ വർഷവും പ്രവർത്തനാനുമതി വൈകിയതോടെയാണ് കഴിഞ്ഞവർഷവും കോളജ് പ്രവർത്തിക്കാതിരുന്നതു പുറത്തുവരാൻ കാരണമായത്. വാടകകെട്ടിടം ഉള്ളിലേക്ക് മാറിയായതും നാല്പത് കുട്ടികൾക്കുമാത്രം പ്രവേശനമുള്ളതും കോളജിന്‍റെ പ്രവർത്തനം സംബന്ധിച്ച് അധികമാർക്കും അറിയില്ല. കണക്കൻതുരുത്തി റോഡിൽ മണ്ണാംപറമ്പിൽ കോളജിനായി നിർമാണം പൂർത്തിയാകുന്ന സ്വന്തംകെട്ടിടത്തിൽ ജൂലൈ മാസംമുതൽ കോളജിന്‍റെ പ്രവർത്തനം ആരംഭിക്കുമെന്നു വടക്കഞ്ചേരി സർക്കാർ ആശുപത്രികെട്ടിട ഉദ്ഘാടനവേളയിൽ പി.പി. സുമോദ് എംഎൽഎ പറഞ്ഞിരുന്നു. പക്ഷെ, ഇതിനുള്ള നടപടികൾക്ക് ഇപ്പോഴും വേഗത വന്നിട്ടില്ല. മണ്ണാംപറമ്പിൽ കോളജിനുള്ള കെട്ടിടനിർമാണം പൂർത്തിയായിട്ടുണ്ട്. ഇതിനോടുചേർന്നുള്ള ഹോസ്റ്റൽ കെട്ടിടത്തിന്‍റെ പണികൾ പൂർത്തിയാകാൻ ഇനിയും ഒന്നരമാസംകൂടി കാലതാമസം വരുമെന്നാണ് കരാർകമ്പനി പറയുന്നത്. ടൈൽസ് വർക്ക് ഉൾപ്പെടെ നടക്കാനുണ്ട്. റോഡിൽനിന്നും കോളജിലേക്കുള്ളവഴിയും സഞ്ചാരയോഗ്യമാക്കാനുണ്ട്. 2012 ൽ ആരംഭിച്ച കോളജ് സർക്കാർ ആശുപത്രിക്ക് സമീപം വാടക കെട്ടിടത്തിലാണ് പ്രവർത്തിച്ചുവരുന്നത്. ഒരു വർഷം കോളജിന്‍റെ പ്രവർത്തനം നിലച്ചതിനാൽ വാടക കെട്ടിടവും കാടുമൂടിയ നിലയിലായി. പ്രവർത്തിക്കാതെ കോടികൾ വിലമതിക്കുന്ന കെട്ടിടത്തിലെ മെഷിനുകളും ഇപ്പോൾ കേടുവന്ന നിലയിലാണ്.

പട്ടികജാതി വിഭാഗത്തോടു കടുത്ത അവഗണന

വടക്കഞ്ചേരി: സർട്ടിഫിക്കറ്റ് പ്രോഗ്രാം ഇൻ പ്രിസിഷൻ മെഷനിസ്റ്റ് എന്ന രണ്ടു വർഷത്തെ കോഴ്സാണ് ഇവിടെ നടത്തുന്നത്. വാഹന നിർമാണ കമ്പനികളിൽ മെഷിനിസ്റ്റ് എന്ന പോസ്റ്റിലാണ് നിയമനം ലഭിക്കുക. ലെയ്ത്ത്, ഡ്രില്ലിംഗ് തുടങ്ങിയവയാണ് കോഴ്സിൽ ഉൾപ്പെടുന്നത്. പത്താം ക്ലാസാണ് അടിസ്ഥാന വിദ്യാഭ്യാസ യോഗ്യത. പട്ടികജാതി വിഭാഗത്തിന് മുൻഗണന നൽകിയാണ് പ്രവേശനം. സമൂഹത്തിലെ താഴെ തട്ടിലുള്ളവർക്ക് രണ്ടുവർഷത്തെ കോഴ്സ് പൂർത്തിയാക്കിയാൽ ഉയർന്ന ശമ്പളത്തോടു കൂടി ജോലി ലഭിക്കുന്ന സാധ്യതകളാണ് സർക്കാരിന്‍റെ അനാസ്ഥ മൂലം ഇല്ലാതാകുന്നതെന്ന ആക്ഷേപവുമുണ്ട്. കോഴ്സ് പൂർത്തിയാക്കിയവക്കെല്ലാം കമ്പനികളിൽ പ്ലെയ്സ്മെന്‍റ് ലഭിക്കുന്നുണ്ട്. 2018 ജൂണിലാണ് മണ്ണാംപറമ്പിൽ കമ്യുണിറ്റി കോളജിനായി അന്നത്തെ പട്ടികജാതി പട്ടികവർഗ വികസന വകുപ്പ് മന്ത്രിയായിരുന്ന എ. കെ. ബാലൻ ശിലാസ്ഥാപനം നിർവഹിച്ചത്. ഫണ്ടിന്‍റെ കുറവിൽ കെട്ടിടനിർമാണവും ഇടയ്ക്ക് നിർത്തിവയ്ക്കുന്ന സ്ഥിതിയുണ്ടായി.

ആലത്തൂരിൽ ലഹരിവിരുദ്ധ കൂട്ടയോട്ടം

ആലത്തൂർ: കഴനി കല്ലേപ്പുള്ളി ജയ്‌ഭാരത് വായനശാലയുടെ ആഭിമുഖ്യത്തിൽ ലഹരിവിരുദ്ധ കൂട്ടയോട്ടം സംഘടിപ്പിച്ചു. ആലത്തൂർ പോലീസ് സബ് ഇൻസ്പെക്ടർ സി. വിവേക് നാരായണൻ കൂട്ടയോട്ടം ഫ്ലാഗ്‌ഓഫ് ചെയ്തു. വായന പക്ഷാചരണത്തിന്‍റെ ഭാഗമായാണ് ലഹരിവിരുദ്ധ കൂട്ടയോട്ടം സംഘടിപ്പിച്ചത്. കല്ലേപ്പുള്ളിയിൽ നിന്നുതുടങ്ങി കഴനി തെക്കുമുറി വഴി മൂന്നുകിലോമീറ്റർപിന്നിട്ട് കഴനി ചുങ്കത്ത് അവസാനിച്ചു. വായനശാല പ്രസിഡന്‍റ് എം. കൊച്ചുകൃഷ്ണൻ, സെക്രട്ടറി ബിനു വലിയവീട് വാർഡ് മെംബർ ഗിരിജ പ്രേം പ്രകാശ് തുടങ്ങിയവർ നേതൃത്വം നൽകി.

കരിയർ ഗൈഡൻസ് സെമിനാറും അനുമോദനയോഗവും

വടക്കഞ്ചേരി: കണ്ണമ്പ്ര കൊട്ടേക്കാട് വായനശാലയുടെയും പ്രവാസി ഗ്രൂപ്പിന്‍റെയും സംയുക്താഭിമുഖ്യത്തിൽ അനുമോദനം 2025 - കരിയർ ഗൈഡൻസ് ബോധവത്കരണ സെമിനാർ നടന്നു. കെ.രാധാകൃഷ്ണൻ എംപി ഉദ്ഘാടനം ചെയ്തു.വായനശാല പ്രസിഡന്‍റ് എ. രവീന്ദ്രൻ അധ്യക്ഷത വഹിച്ചു. പഞ്ചായത്ത് മെംബർ മേഘ അനിൽകുമാർ, താലൂക്ക് ലൈബ്രറി കൗൺസിൽ ജോയിന്‍റ് സെക്രട്ടറി സി.സി. ചന്ദ്രബോസ്, യുവശക്തി വായനശാല പ്രസിഡന്‍റ് എം.കൃഷ്ണദാസ്, ലൈബ്രറി കൗൺസിൽ അംഗം അനിൽകുമാർ, വനിതാവേദി സെക്രട്ടറി ലഷ്മിക്കുട്ടി സ്വാമിനാഥൻ, വായനശാല സെകട്ടറി കെ.ആർ. ഷൺമുഖൻ, ലൈബ്രറി കൗൺസിൽ അംഗവും പാലിയേറ്റീവ് കമ്മിറ്റി സെക്രട്ടറിയുമായ അബ്ദുൾ ഷമീർ എന്നിവർ പ്രസംഗിച്ചു. എം.ആർ. രാഹുൽ ഇൻഫ്ലുവൻസർ ക്ലാസ് നയിച്ചു.

തത്തമംഗലത്തെ തെരുവുനായ്ക്കളെ ഭയന്ന് വിദ്യാർഥികളും രക്ഷിതാക്കളും

തത്തമംഗലം: ടൗണിലും സ്കൂൾ പരിസരത്തുമെല്ലാം തെരുവുനായ്ക്കളുടെ വിളയാട്ടം. ശ്രീകുറുംബക്കാവ്, ചേമ്പാടം, എൽഎസ്എസ് കരയോഗമന്ദിരത്തിനു സമീപം, ദേവിനഗര്‍ ഉൾപ്പെടെ പ്രദേശങ്ങളിൽ തെരുവുനായക്കൂട്ടം വിലസുകയാണ്. വിദ്യാർഥികളെയും മുതിർന്നവരെയും ഒരുപോലെ തുരത്തിയോടിച്ച് ആക്രമിക്കുകയാണ് തെരുവുനായകൾ. ജിയുപിഎസ്, തത്തമംഗലം എസ്എം എൽപി സ്കൂൾ, , എസ്എം ഹൈസ്കൂൾ വിദ്യാർഥികളും അധ്യാപകരും ഇതുവഴി വന്നുപോകുന്നതു ഏറെ കരുതലോടെയാണ്. മിക്ക വീടുകൾക്കു സമീപവും അലഞ്ഞുതിരിയുന്ന തെരുവുനായ്ക്കളെ കാണാം. കുട്ടികളെ വെളിയിലേക്കു വിടാൻ പോലും രക്ഷിതാക്കൾ മടിക്കുകയാണ്. കഴിഞ്ഞ വർഷം പേയിളകിയ ചെറിയ നായ അഞ്ചുപേരേയാണ് കടിച്ചു പരിക്കേൽപ്പിച്ചത്. തെരുവുനായ്ക്കളെ വന്ധ്യംകരണം നടത്താറുണ്ടെന്നു നഗരസഭ പറയുന്പോഴും അക്രമണപരന്പരകൾക്കു കുറവില്ല. രാത്രികാലങ്ങളിൽ അരക്കിലോമീറ്റർ അകലെയുള്ള വീടുകളിലെത്താൻ പലരും ഓട്ടോറിക്ഷ ആശ്രയിക്കേണ്ട ഗതികേടിലാണ്.

തത്തമംഗലം ബസ് സ്റ്റാൻഡിൽ അസൗകര്യങ്ങൾ മാത്രം...

ചിറ്റൂർ: തത്തമംഗലം ബസ് സ്റ്റാൻസിനകത്ത് യാത്രക്കാരുടെ ഇരിപ്പിടഭാഗത്ത് ചോർന്നൊലിക്കുന്നു, പ്രാവിന്‍റെ കാഷ്ഠാവശിഷ്ടം കാരണം ദുർഗന്ധമയമായിരിക്കുകയാണ്. ചീഞ്ഞ പായൽ പടർന്നുപിടിച്ച സ്ഥലത്ത് കൊതുക്, പുഴുശല്യവും അതിരൂക്ഷം. കോയമ്പത്തൂരിലേക്ക് പോവുന്ന യാത്രികർ സ്റ്റാൻഡികത്തെത്തിയാണ് ബസിൽ കയറുന്നത്. പ്രായാധിക്യമുള്ളവർക്കും കുഞ്ഞുങ്ങൾക്കും സാവധാനത്തിൽ ബസ് കയറാൻ സൗകര്യമുണ്ടായിരുന്നു. എന്നാൽ നിലവിലെ സ്ഥിതി യാത്രക്കാർക്ക് വിഷമകരമാവുന്നുണ്ട്. പലപ്പോഴും ബസുകളൊന്നും സ്റ്റാൻഡിൽ കയറാതെ പോകുന്നതു ഇത്തരം യാത്രികർക്കു വിനയാകുന്നുണ്ട്. രാത്രിയാവുന്നതോടെ സാമൂഹ്യവിരുദ്ധരുടെ താവളമായി ബസ് സ്റ്റാൻഡ് മാറുന്നെന്നും പരാതി ഉയരുന്നുണ്ട്. ബസ് സ്റ്റാൻഡിലെ ശോചനീയാവസ്ഥ നാട്ടുകാരും യാത്രക്കാരും കൗൺസിലർമാരും നിരന്തരം നഗരസഭാ സെക്രട്ടറിയെ അറിയിച്ചാലും നടപടിയുണ്ടാകുന്നില്ല. കോടികൾ ചെലവഴിച്ചു നിർമിച്ച സ്റ്റാൻഡിൽ ബസ് കയറുന്നില്ലെന്നു മാത്രമല്ല, അഞ്ചോ ആറോ വ്യാപാരസ്ഥാപന നടത്തിപ്പിനു മാത്രമായാണ് ഉപകരിക്കുന്നത്. മേൽക്കൂര പത്തുലക്ഷം ചെലവിൽ നവീകരിക്കുമെന്നു നഗരസഭയിൽ പ്രഖ്യാപനമുണ്ടായി മാസങ്ങൾ കഴിഞ്ഞും നടപടികളൊന്നമുണ്ടായില്ല.

ചിന്നത്തടാകം റോഡ് ശോച്യാവസ്ഥ പരിഹരിക്കാൻ നാട്ടുകാർ രംഗത്ത്

അഗളി: അട്ടപ്പാടിയെ അലട്ടിക്കൊണ്ടിരിക്കുന്ന വിവിധ പ്രശ്നങ്ങൾക്ക് പരിഹാരം കാണാൻ അട്ടപ്പാടിയുടെ ശബ്ദം എന്ന വാട്ട്സാപ് കൂട്ടായ്മ ഗൂളിക്കടവ് ജംഗ്ഷനിൽ യോഗം ചേർന്നു. ഗൂളിക്കടവിൽ ഓടിക്കൊണ്ടിരുന്ന ഓട്ടോറിക്ഷയിലേക്ക് മരംവീണ് യുവാവ് മരിച്ച സംഭവത്തോടെയാണ് കൂട്ടായ്മ രൂപം കൊണ്ടത്. ആയിരത്തോളംപേർ ഗ്രൂപ്പിലുണ്ട്. റോഡരികിലെ മരങ്ങളും മറ്റു തടസങ്ങളും നീക്കാൻ കൂട്ടായ്മ മുൻകൈയെടുത്ത് പ്രവർത്തിച്ചു. മണ്ണാർക്കാട് ചിന്നത്തടാകം റോഡും ചർച്ചാവിഷയമായി. വർഷങ്ങളായി റോഡ് തകർന്നു കിടക്കുകയാണ്. തെങ്കര മുതൽ ആനമൂളി വരെയുള്ള റോഡ് കുണ്ടും കുഴിയും നിറഞ്ഞ് ചെളിക്കുളമായി മാറിക്കഴിഞ്ഞു. ഗൂളിക്കടവിൽനിന്നും മണ്ണാർക്കാടുവരെ 37 കിലോമീറ്റർ സഞ്ചരിക്കാൻ രണ്ടുമണിക്കൂർ സമയം വേണ്ടിവരുന്ന സ്ഥിതിയാണ്. ഗൂളിക്കടവിൽ നിന്നും ആനക്കട്ടി വരെയുള്ള പാതയും അതിദുർഘടമാണ്. ഇതുസംബന്ധിച്ച് വാട്സ്ആപ് ഗ്രൂപ്പിൽ രണ്ടുദിവസങ്ങളിലായി നടന്ന ചർച്ചയിലാണ് യോഗം ചേർന്ന് പ്രശ്നപരിഹാരത്തിന് രൂപം നൽകാൻ തീരുമാനിച്ചത്. ഇന്നലെ ഉച്ചയ്ക്ക് 2.45 ന് വി.പി. ലോഡ്ജ് ഹാളിൽ ചേർന്ന യോഗത്തിൽ നൂറോളം പേർ പങ്കെടുത്തു. അട്ടപ്പാടിയിലേക്കുള്ള ബദൽ റോഡ്, വൈദ്യുതി പ്രശ്നം,ഭൂമി പ്രശ്നം, വന്യമൃഗം,കുടിവെള്ളം തുടങ്ങി വിവിധ വിഷയങ്ങൾ ചർച്ചയായി. ഓരോ പ്രശ്നങ്ങളും ഘട്ടംഘട്ടമായി പരിഹരിക്കുകയാണ് ലക്ഷ്യം. ജനപ്രതിനിധികളും സാമൂഹ്യപ്രവർത്തകരും നാട്ടുകാർ,ഓട്ടോ ടാക്സി ജീവനക്കാർ തുടങ്ങിയവർ യോഗത്തിൽ പങ്കെടുത്തു പ്രസംഗിച്ചു.

സ്കൂട്ടി മോഷ്ടിച്ചയാൾ പോലീസ് പിടിയിൽ

കൊല്ലങ്കോട്: ഊട്ടറയിൽ ഹോട്ടലിനു മുന്നിൽനിന്നു സ്കൂട്ടി കവർന്ന സംഭവത്തിൽ പ്രതി കൊല്ലങ്കോട് പോലീസ് പിടിയിൽ. എറണാകുളം ചേരനല്ലൂർ സെബാസ്റ്റ്യന്‍റെ മകൻ സന്തോഷ് (45) നെയാണ് ഇന്നലെ തൃശൂരിൽനിന്നും പിടികൂടിയത്. ഊട്ടറ റഹ്്മാനിയ മൻസിൽ മുജീബ് റഹ്്മാന്‍റെ സ്കൂട്ടി ശനിയാഴ്ച പുലർച്ചെ ഊട്ടറയിലെ കടയ്ക്കുമുന്നിൽ നിന്നാണ് കാണാതായത്. എസ്ഐ സത്യനാരായണൻ, ജിഎസ്ഐ അബ്ദുൾ റഹീം, എസ്‌സിപിഒ അനിൽകുമാർ എന്നിവരടങ്ങിയ സംഘമാണ് പ്രതിയേയും സ്കൂട്ടിയും കണ്ടെത്തിയത്. കോടതിയിൽ ഹാജരാക്കിയ പ്രതിയെ റിമാൻഡുചെയ്തു.

അയിലൂർ ആരോഗ്യകേന്ദ്രത്തിൽ സായാഹ്ന ഒപി ആരംഭിച്ചു

നെന്മാറ: അയിലൂർ കുടുംബാരോഗ്യ കേന്ദ്രത്തിൽ സായാഹ്ന ഒപി ആരംഭിച്ചു. ഗ്രാമീണ മേഖലയുടെ ചികിത്സാ സൗകര്യത്തിനു സായാഹ്ന ഒപി സഹായകരമാകും. ഇതോടെ മേഖലയ്ക്ക് മുഴുവൻ സമയ ചികിത്സാ സൗകര്യം ലഭ്യമാകും. ഇതിനായി പഞ്ചായത്ത് ഡോക്ടറെയും ഫാർമസിസ്റ്റിനെയും പുതുതായി നിയമിച്ചിട്ടുണ്ട്. അയിലൂർ കരിങ്കുളത്തുള്ള കുടുംബാരോഗ്യ കേന്ദ്രത്തിൽ സായാഹ്ന ഒപി ചികിത്സയുടെ പ്രവർത്തന ഉദ്ഘാടനം കെ. രാധാകൃഷ്ണൻ എംപി ഉദ്ഘാടനം ചെയ്തു. കെ. ബാബു എംഎൽഎ മുഖ്യാതിഥിയായി. അയിലൂർ ഗ്രാമപഞ്ചായത്ത് പ്രസിഡന്‍റ് എസ്. വിഗ്നേഷ് അധ്യക്ഷതവഹിച്ചു. നെന്മാറ ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി, മേഖലയിലെ ത്രിതല പഞ്ചായത്ത് ജനപ്രതിനിധികളും രാഷ്ട്രീയപാർട്ടി പ്രതിനിധികളും ചടങ്ങിൽ പങ്കെടുത്തു.

തീറ്റ തേടിയെത്തിയ കടൽകൊറ്റികൾ കണ്ണിനു വിരുന്നായി

തത്തമംഗലം: നൂറുകണക്കിനു കടൽകൊറ്റികൾ തീറ്റതേടി വയലുകളിൽ ഇറങ്ങിയതു വഴിയാത്രികർക്കു കൗതുകകാഴ്ചയായി . മേട്ടുപ്പാളം- പുഴപ്പാലം റോഡരികിലെ വയലുകളിലാണ് ദേശാടന കൊറ്റി സംഘം എത്തിയത്. കടൽക്ഷോഭമുണ്ടാവുന്ന സമയങ്ങളിലാണ് ഈ പറവകൾ തീറ്റതേടി ദൂരദിക്കുകളിലെത്തുന്നതത്രെ. എല്ലാവർഷവും ജൂൺ, ജൂലൈ മാസങ്ങളിൽ കൊറ്റികൾ എത്താറുണ്ടെന്ന് സമീപവാസികൾ സാക്ഷ്യപ്പെടുത്തുന്നു. ഭാരംകൂടിയ ശരീരവും നീണ്ടുകറുത്തകൊക്കുകളുമാണ് ഇവയുടെ ദൃശ്യഭംഗി കൂട്ടുന്നത്. പ്രദേശത്ത് കാണുന്ന നാട്ടുകൊറ്റികൾ ഇവയുമായി അടുക്കറില്ല എന്നു മാത്രമല്ല ശത്രുതമനോഭാവവും പ്രകടിപ്പിക്കാറുണ്ട്.

മംഗലംഡാം സെന്‍റ് ഫ്രാൻസിസ് സ്കൂളിൽ ലഹരിവിരുദ്ധ ദിനാചരണം

മംഗലംഡാം: സെന്‍റ് സേവിയേഴ്സ് സെൻട്രൽ സ്കൂളിൽ ലഹരിവിരുദ്ധ ദിനാചരണത്തോടനുബന്ധിച്ച് വിവിധ പരിപാടികൾ നടന്നു. ഡാം എസ്ഐ കെ.എ. ഷാജു പരിപാടികൾ ഉദ്ഘാടനം ചെയ്തു. കൂടുതൽ അറിവ് ആർജിക്കാനുള്ള ലഹരിയാകണം വിദ്യാർഥികൾക്കുണ്ടാകേണ്ടതെന്നു അദേഹം കുട്ടികളെ ഓർമിപ്പിച്ചു. പ്രിൻസിപ്പൽ ഫാ. സിബിൻ തോമസ് അധ്യക്ഷത വഹിച്ചു. ജനമൈത്രി പോലീസ് ഓഫീസർ സജ്ന, സ്കൂൾ വൈസ് പ്രിൻസിപ്പൽ ജാൻസി ഷാജി അധ്യാപകരായ മിനി, സന്ധ്യ ഹെഡ് ബോയ് ബെനഡിന്‍റ് ജോസഫ് ജിമ്മി, ഹെഡ് ഗേൾ ഹെലൻ മേരി മാത്യു പ്രസംഗിച്ചു. പ്രിൻസിപ്പൽ ഫാ. സിബിൻ തോമസ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. തുടർന്ന് പ്ലക്കാർഡുകളുമായി ലഹരിക്കെതിരെ മംഗലംഡാം ടൗണിൽ കുട്ടികൾ റാലി നടത്തി. ലഹരി വിപത്തിനെക്കുറിച്ച് പൊതുജനങ്ങളിൽ അവബോധമുണ്ടാക്കാൻ ഫ്ലാഷ് മോബും ടൗണിൽ സംഘടിപ്പിച്ചു.

കോയന്പത്തൂരിൽ സിടിഎംഎ ഉത്സവ് -2025 തുടങ്ങി

കോയന്പത്തൂർ: തമിഴ്നാട്ടിലെ പ്രവാസി മലയാളികൾക്കായി കോൺഫെഡറേഷൻ ഓഫ് തമിഴ്നാട് മലയാളി അസോസിയേഷൻസ് (സിടിഎംഎ) സംഘടിപ്പിക്കുന്ന കലോത്സവമായ ഉത്സവ് - 2025ന്‍റെ പതിമൂന്നാം എഡിഷനു തുടക്കം. ചെന്നൈയിലും കോയമ്പത്തൂരിലുമാണ് ചിത്ര- സാഹിത്യ രചനാ മത്സരങ്ങൾ അരങ്ങേറിയത്. കോയമ്പത്തൂർ കേരളസമാജത്തിൽ നടന്ന ചടങ്ങിൽ സിടിഎംഎ മുൻ പ്രസിഡന്‍റ് എം.കെ. സോമൻ മാത്യു മുഖ്യാതിഥിയായി പങ്കെടുത്ത് ഉദ്ഘാടനം നിർവഹിച്ചു. ബാബു നിലയത്തിങ്ങൽ, എം.സി. തോമസ്, ജോർജ് ആന്‍റണി യേശുദാസ്, സിടിഎംഎ വൈസ് പ്രസിഡന്‍റ് സി.സി. സണ്ണി, സെക്രട്ടറി ടി.ഷിബു, വൈസ് ചെയർമാൻ എ.കെ. ജോൺസൺ, ഉത്സവ് കോ- ഓർഡിനേറ്റർ കെ. നവീൻ, ബേബി വാൽപ്പാറ, സെബി സെബാസ്റ്റൃൻ, സി. പത്മനാഭൻ, കെ. രാമകൃഷ്ണൻ എന്നിവർ പ്രസംഗിച്ചു.

ശുചിത്വ സര്‍വേ: മലന്പുഴ ബ്ലോക്കിൽ സ്റ്റേറ്റ് ഹോള്‍ഡേഴ്സിന്‍റെ യോഗം ചേര്‌ന്നു

പാലക്കാട്: മലമ്പുഴ ബ്ലോക്ക് പഞ്ചായത്തില്‍ ശുചിത്വ സര്‍വേയുടെ ഭാഗമായി സ്റ്റേറ്റ് ഹോള്‍ഡേഴ്സിന്‍റെ യോഗം ചേര്‍ന്നു. സ്വച്ഛ് ഭാരത് മിഷന്‍റെ കീഴില്‍ വിവരിച്ചിരിക്കുന്ന മാനദണ്ഡങ്ങളുടെ അടിസ്ഥാനത്തില്‍ ഇന്ത്യയിലെ എല്ലാ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും ജില്ലകള്‍ക്കും ദേശീയ റാങ്കിംഗ് നല്‍കുക എന്നതാണ് സര്‍വേയുടെ പ്രധാന ലക്ഷ്യം. സര്‍വേയുടെ ലോഗോ പ്രകാശനം മലമ്പുഴ ബ്ലോക്ക് പഞ്ചായത്ത് പ്രസിഡന്‍റ് വി. ബിജോയ് നിര്‍വഹിച്ചു. മലമ്പുഴ ബ്ലോക്ക് പഞ്ചായത്ത് സെക്രട്ടറി സദാശിവന്‍ സ്വച്ഛ് സര്‍വേഷന്‍ ഗ്രാമീണ്‍ 2025 സര്‍വ്വേയുടെ പ്രാധാന്യത്തക്കുറിച്ച് വിശദീകരിച്ചു. സിറ്റിസണ്‍ ഫീഡ്ബാക്ക് സര്‍വേയുടെ മൊബൈല്‍ അപ്ലിക്കേഷന്‍ ആര്‍.ജി.എസ്.എ കോര്‍ഡിനേറ്റര്‍ പ്രസീത അവതരിപ്പിച്ചു. വൃത്തിയുടെ അടിസ്ഥാനത്തില്‍ രാജ്യത്തെ ഏറ്റവും മികച്ച സംസ്ഥാനങ്ങളെയും ജില്ലകളെയും തിരഞ്ഞെടുക്കുന്നതിനാണ് ഒന്നിച്ചിറങ്ങാം ഒന്നാമതാകാം എന്ന ആപ്തവാക്യത്തില്‍ ശുചിത്വ സര്‍വേ 'സ്വച്ഛ് സര്‍വേക്ഷന്‍ ഗ്രാമീണ്‍ 2025 നടത്തുന്നത്. വീടുകള്‍, വില്ലേജുകള്‍, പൊതുസ്ഥലങ്ങള്‍ എന്നിവിടങ്ങളിലെ വ്യത്തിയാണ് സര്‍വേയില്‍ പരിശോധിക്കുക. രാജ്യത്തെ വിവിധ അംഗീകൃത ഏജന്‍സികള്‍ വഴിയാണ് സര്‍േവ നടത്തുന്നത്. തദ്ദേശവകുപ്പ്, ശുചിത്വമിഷന്‍ എന്നിവയാണ് സംസ്ഥാനത്തെ പ്രവര്‍ത്തനങ്ങള്‍ ഏകോപിപ്പിക്കുന്നത്. മലമ്പുഴ ബ്ലോക്ക് പഞ്ചായത്ത് ഹാളില്‍ നടന്ന യോഗത്തില്‍ മരുതറോഡ്, പുതുപ്പരിയാരം, പുതുശ്ശേരി, കൊടുമ്പ്, അകത്തേത്തറ, മലമ്പുഴ ഗ്രാമപഞ്ചായത്തുകളിലെ ജനപ്രതിനിധികള്‍, ഉദ്യോഗസ്ഥര്‍, കുടുംബശ്രീ ഭാരവാഹികള്‍, ആരോഗ്യ പ്രവര്‍ത്തകര്‍ എന്നിവര്‍ പങ്കെടുത്തു.

ചിറ്റൂരിൽ ബസ് സ്റ്റാൻഡ് നിർമാണം ഉടൻ തുടങ്ങാൻ നഗരസഭാ തീരുമാനം

ചിറ്റൂർ: ഷോപ്പിംഗ് കോംപ്ലക്സിൽ നിർമിക്കാൻ പോകുന്ന ബസ് സ്റ്റാൻഡിന്‍റെ ഡിപിആർ ഉടൻ തയാറാക്കും. ഇതുമായി ബന്ധപ്പെട്ട കരാർകമ്പനിയുമായി ചർച്ചനടത്തി നടപടകൾ വേഗത്തിക്കാൻ ചിറ്റൂർ-തത്തമംഗലം നഗരസഭ കൗൺസിൽ യോഗത്തിൽ തീരുമാനമായി. അണിക്കോട്ടിൽ മലിനജലം റോഡിലേക്ക് ഒഴുകുന്നതു തടയാൻ അഴുകുചാലുകൾ ഉടൻ വൃത്തിയാക്കും. തത്തമംഗലം രാജീവ് ഗാന്ധി കൺവൻഷൻ സെന്‍ററിൽ വിവാഹാവശ്യങ്ങൾക്ക് മണ്ഡപം ബുക്കുചെയ്യുന്നവർക്ക് അസൗകര്യങ്ങൾ ഏറെയുണ്ടെന്നു പരാതിയുയർന്നു. ഇവിടെ തൊഴിലാളികളുടെ നിർബന്ധപ്പിരിവ് നടക്കുന്നതായും ആരോപണമുയർന്നു. അടുക്കളപാത്രങ്ങളടക്കം മുന്തിയ വാടകയ്ക്കു പുറന്നുനിന്നും കൊണ്ടുവരേണ്ട സ്ഥിതിയുണ്ട്. മുൻകാല സൗകര്യങ്ങൾ പുനഃസ്ഥാപിക്കാൻ ജീവനക്കാക്ക് ചെയർപേഴ്സൺ നിർദേശം നൽകി. അമൃത് പദ്ധതി പ്രകാരം കുടിവെള്ള പൈപ്പിടുന്നതിനായി പൊളിക്കുന്ന റോഡുകൾ പൂർവസ്ഥിതിയിലാക്കുന്നതിനുള്ള നടപടി സ്വീകരിക്കും. മഴക്കാലത്ത് റോഡ് വെട്ടിപ്പൊളിക്കുന്നത് നിർത്തണമെന്നും യോഗത്തിൽ ആവശ്യം ഉയർന്നു. പിഎംഎവൈ പദ്ധതിയിൽ ഉൾപ്പെട്ട ഗുണഭോക്താക്കൾ ഡിസംബറിനകം നിർമാണം പൂർത്തീകരിക്കണം. അല്ലാത്തപക്ഷം തുക ലഭിക്കില്ലെന്നും സെക്രട്ടറി അറിയിച്ചു. കൗൺസിൽ യോഗത്തിൽ നഗരസഭാ ചെയർപേഴ്സൺ കെ.എൽ. കവിത അധ്യക്ഷയായി. സ്ഥിരംസമിതി അധ്യക്ഷരായ കെ. ഷീജ, എം. റാഫി, മുഹമ്മദ് സലിം, ഓമന കണ്ണൻകുട്ടി, കെ. സുമതി, കൗൺസിലർമാരായ കെ. മധു, ആർ. കിഷോർ കുമാർ, ബാബുദാസ്, എം. മുകേഷ്, ആർ. അച്യൂതാനന്ദ്, എം. ഉണ്ണികൃഷ്ണൻ, ആരോഗ്യസ്വാമി എന്നിവർ പ്രസംഗിച്ചു.

ലഹരിവിമുക്ത സന്ദേശമായി പാലക്കുഴിയിൽ സജീവം സൺഡേ കാന്പയിൻ

പാലക്കാട്‌: അന്താരാഷ്ട്ര ലഹരിവിരുദ്ധ ദിനത്തിനോട് അനുബന്ധിച്ച് പാലക്കാട് പീപ്പിൾ സർവീസ് സൊസൈറ്റിയുടെ നേതൃത്വത്തിൽ വടക്കഞ്ചേരി പാലക്കുഴി സെന്‍റ് തോമസ് ദേവാലയത്തിൽ സജീവം സൺഡേ ആചരിച്ചു. പിഎസ്എസ്പി മുൻ ഡയറക്ടറും ഇടവകവികാരിയുമായ ഫാ.ജ സ്റ്റിൻ കോലം കണ്ണി ക്ലാസ്നയിച്ചു. പ്രോജക്ട് കോ- ഓർഡിനേറ്റർ ബാബു പോൾ നേതൃത്വം നൽകി. ലഹരി വിരുദ്ധ കാന്പയിനിന്‍റെ ഭഗമായി ഒപ്പുശേഖരണം നടത്തി. ഇടവകയിലെ എല്ലാ യുവജനങ്ങളും ഇടവക അംഗങ്ങളും കാമ്പയിനിൽ പങ്കാളികളായ സജീവം സൺഡേ ആചരണം ലഹരിമുക്ത ജീവിതത്തിനും പോരട്ടത്തിനുമുള്ള പ്രചോദനവേദിയായി. ലഹരിമുക്ത കേരളം എന്ന ലക്ഷ്യത്തെ മുൻനിർത്തി കാരിത്താസ് ഇന്ത്യ, കേരള കാത്തലിക് ബിഷപ്സ് കൗൺസിൽ ,കേരള സോഷ്യൽ സർവീസ് ഫോറം എന്നിവരുടെ നേതൃത്വത്തിൽ വിവിധ സർക്കാർ സംവിധാനങ്ങളുടെ സഹായത്തോടെ സജീവം എന്ന പേരിൽ ലഹരി വിരുദ്ധ കാമ്പയിൻ കേരളത്തിലൂടനീളം നടന്നുവരുന്നുണ്ട്.

കനാലിൽ മുങ്ങിമരിച്ചനിലയിൽ കണ്ടെത്തി

കൊല്ലങ്കോട്: വടവന്നൂരിൽ ദേഹശുദ്ധി വരുത്താൻ കനാലിൽ ഇറിങ്ങിയ മധ്യവയസ്കനെ മുങ്ങിമരിച്ച നിലയിൽ കണ്ടെത്തി. വടവന്നൂർ കീഴ്ചിറ അഹമ്മദ് സാഹിബിന്‍റെ മകൻ ഷാഹുൽ ഹമീദ് (58) ആണ് മരിച്ചത്. വെള്ളത്തിൽ ഒഴുകിപ്പോയ മൃതദേഹം ഓവിന്‍റെ ഭാഗത്ത് തടഞ്ഞുനിന്നു. ആക്രി സാധനങ്ങൾ ശേഖരിച്ച് വിൽപ്പന നടത്തുന്ന ഷാഹുൽ ഹമീദ് രാവിലെ വീട്ടിൽ നിന്നുമിറങ്ങിയാൽ വൈകുന്നേരമാണ് തിരിച്ചെത്താറ്. കൊല്ലങ്കോട് പോലീസ് ഇൻക്വസ്റ്റിനു ശേഷം പോസ്റ്റുമോർട്ടം നടത്തി ബന്ധുകൾക്ക് വിട്ടു കൊടുത്തു. ഭാര്യ സുബൈദ: മക്കൾ: ഷാജഹാൻ, സാഹിത. മരുമകൻ: അബൂബക്കർ, സിദ്ധിഖ്.

വാളയാർ ഡാം മണലെടുപ്പിനു വിലക്ക്; നടപടിയുണ്ടാകുമെന്നു ജില്ലാ കളക്ടർ

പാലക്കാട്: വാളയാർ ഡാമിൽ നിന്നുള്ള മണലെടുപ്പ് അടിയന്തരമായി നിർത്തിവെക്കാൻ ജില്ലാ കളക്ടർ ജി. പ്രിയങ്കയുടെ കർശന നിർദേശം. ഡാമിൽ നിന്ന് ശേഖരിക്കുന്ന മണലിനൊപ്പം പുഴയിലെ മണലും അനധികൃതമായി കടത്തുന്നുവെന്ന പരാതിയെ തുടർന്നാണ് നടപടി. കളക്ടറേറ്റ് കോണ്‍ഫറൻസ് ഹാളിൽ ചേർന്ന ജില്ലാ വികസന സമിതി യോഗത്തിൽ എ. പ്രഭാകരൻ എംഎൽഎയുടെ ആവശ്യപ്രകാരമാണ് ജില്ല കളക്ടറുടെ നിർദേശം. ഡാമിലെ ഡീസിൽറ്റേഷൻ പ്രവൃത്തിയുടെ നിർവഹണ ഏജൻസിയായ കെഇഎംഡിഇഎല്ലിനോട് ഇനിയൊരു അറിയിപ്പുണ്ടാകുന്നതുവരെ മണലെടുപ്പ് നിർത്തിവെക്കാനാണ് നിർദേശം. നിയമലംഘനം നടത്തിയാൽ പോലീസ് കേസ് അടക്കമുള്ള നടപടികൾ നേരിടേണ്ടിവരുമെന്നും ജില്ലാ കളക്ടർ മുന്നറിയിപ്പ് നൽകി. മഴ മൂലമുള്ള മണ്ണിടിച്ചിൽ മുൻകൂട്ടി കണ്ട് മണ്ണുമാന്തി യന്ത്രങ്ങൾ ഉൾപ്പടെയുള്ള രക്ഷാപ്രവർത്തന ഉപകരണങ്ങൾ നെല്ലിയാന്പതി ഉൾപ്പെടെ എല്ലാ പഞ്ചായത്തുകളിലും തയ്യാറാക്കി വെക്കണമെന്ന് തദ്ദേശവകുപ്പ് ജോയിന്‍റ് ഡയറക്ടർക്ക് ജില്ലാ കളക്ടർ നിർദേശം നൽകി. ഭാരതപ്പുഴയിൽ അടിഞ്ഞു കൂടിയ മണൽ കാലവർഷം ശക്തിപ്പെടുന്നത് മുൻകൂട്ടി കണ്ട് നീക്കം ചെയ്യാനുള്ള നടപടികൾ സ്വീകരിക്കണമെന്ന് മുഹമ്മദ് മുഹസിൻ എംഎൽഎ യോഗത്തിൽ ആവശ്യപ്പെട്ടു. കൂടല്ലൂർ, പട്ടാന്പി ഭാഗങ്ങളിൽ ഭാരതപ്പുഴയിൽ മണൽ അടിഞ്ഞു കൂടിയത് വെള്ളപ്പൊക്കത്തിന് കാരണമായേക്കാമെന്നും എംഎൽഎ ചൂണ്ടിക്കാട്ടി. ഉപഭോക്താക്കൾക്ക് അമിത കുടിവെള്ള ബിൽ ആണ് മണ്ഡലത്തിലെ പലയിടങ്ങളിലും ലഭിക്കുന്നതെന്നും ഇക്കാര്യം ജലഅഥോറിറ്റി പരിശോധിക്കണമെന്നും എംഎൽഎ ആവശ്യപ്പെട്ടു. വന്യമൃഗശല്യംമൂലം കൃഷി നശിച്ചവർക്ക് കാലതാമസം കൂടാതെ നഷ്ടപരിഹാരതുക വിതരണം ചെയ്യണമന്ന് വനം വകുപ്പിനോട് യോഗം നിർദേശിച്ചു. നിലവിൽ 76 കർഷകർക്ക് നഷ്ടപരിഹാര തുക നൽകാനുള്ളതായി കെ. ബാബു എംഎൽഎ യോഗത്തിൽ പറഞ്ഞു. 2024-25 സീസണിൽ രണ്ടാംവിള നെല്ല് സംഭരണത്തിനായി 68785 കർഷകർ രജിസ്റ്റർ ചെയ്തതായും അതിൽ 62711 കർഷകരെ കൃഷിഭവൻതലത്തിൽ അംഗീകരിച്ചതായും കെ. ബാബു എംഎൽഎയുടെ ചോദ്യത്തിനുത്തരമായി ജില്ലാ പാഡി ഓഫീസർ അറിയിച്ചു. ഇതിൽ 57311 കർഷകരാണ് സപ്ലൈകോയിലേക്ക് നെല്ലളന്നത്. ആകെ 143954.317 മെട്രിക് ടണ്‍ നെല്ല് സംഭരിച്ചു. 407.678 കോടി രൂപയാണ് ജില്ലയിൽ ഇതിനായി ആകെ അനുവദിക്കേണ്ട തുക. 21345 കർഷകരുടെ 50779.282 മെട്രിക് ടണ്‍ നെല്ലിന്‍റെ വിലയായ 143.806 കോടി രൂപയാണ് നിലവിൽ വിതരണം ചെയ്തുകൊണ്ടിരിക്കുന്നത്. 2025 ഏപ്രിൽ 25 വരെ പിആർഎസ് ലഭിച്ച കർഷകരാണ് ഇവർ. ബാക്കിയുള്ള 35966 കർഷകർക്ക് 93175.035 ടണ്ണിന്‍റെ തുകയായ 263.871 കോടി രൂപ കൂടി ഇനി അനുവദിക്കാനുണ്ടെന്നും ജില്ലാ പാഡി ഓഫീസർ അറിയിച്ചു. പറന്പിക്കുളം ആളിയാർ പദ്ധതി കരാർ പ്രകാരം ചിറ്റൂർ പുഴയ്ക്ക് അർഹതപ്പെട്ട ജലം ലഭ്യമാക്കുന്നതിന് സർക്കാർ അടിയന്തരമായി ഇടപെടണമെന്ന് യോഗം പ്രമേയത്തിലൂടെ ആവശ്യപ്പെട്ടു. കെ ബാബു എംഎൽഎ അവതരിപ്പിച്ച പ്രമേയം കെ.ഡി. പ്രസേനൻ എംഎൽഎ പിന്താങ്ങി. ലോവർ നീരാറിൽ നിന്നുള്ള നീരൊഴുക്കും പറന്പിക്കുളം ഗ്രൂപ്പ് ഡാമുകളിലെ യീൽഡും ഇതിനകം 19 ടിഎംസിയിൽ അധികമായിട്ടുണ്ട്. പറന്പിക്കുളം ആളിയാർ പദ്ധതി കരാർപ്രകാരം 16.5 ടിഎംസിയിൽ അധികമായി വരുന്ന മുഴുവൻ ജലവും കേരളത്തിന് അവകാശപ്പെട്ടതാണ്. നെല്ല് സംഭരണ തുക ലഭിക്കുന്നതിനായി ആളുകൾ ബാങ്കുകൾ കയറിയിറങ്ങേണ്ട സാഹചര്യം ഇല്ലാതാക്കണമെന്ന് പി. മമ്മിക്കുട്ടി എംഎൽഎ ആവശ്യപ്പെട്ടു. മുണ്ടൂർ-തൂത പാതയിലെ കാക്കാതോട് പാലം തകർന്ന സമയത്ത് വാഹനങ്ങൾ സഞ്ചരിച്ച പാതയിൽ കുടിവെള്ള പൈപ്പുകൾ തകർന്ന അവസ്ഥയിലാണെന്നും അവ അടിയന്തരമായി നന്നാക്കണമെന്നും കെഎസ്ടിപി അധികൃതരോട് എംഎൽഎ ആവശ്യപ്പെട്ടു. ജില്ലാ ആശുപത്രി കഴിഞ്ഞാൽ ഏറ്റവും കൂടുതൽ രോഗികൾ എത്തുന്ന ആലത്തൂർ താലൂക്ക് ആശുപത്രിയിൽ ജനറൽ ഒപിയിൽ കൂടുതൽ ഡോക്ടർമാരെ നിയോഗിക്കണമെന്നും സൂപ്രണ്ട് തസ്തികയിൽ അടിയന്തരമായി നിയമനം നടത്തണമെന്നും കെ.ഡി. പ്രസേനൻ എംഎൽഎ ആവശ്യപ്പെട്ടു. ആശുപത്രിയിലെ മരുന്നു ക്ഷാമം പരിഹരിച്ചതായും എംഎൽഎയുടെ ചോദ്യത്തിനുത്തരമായി ജില്ലാ മെഡിക്കൽ ഓഫീസർ യോഗത്തിൽ അറിയിച്ചു. ആലത്തൂർ പറക്കുന്നം പാലം നിർമാണത്തിന്‍റെ ഡിപിആർ ഒരാഴ്ചയ്ക്കുള്ളിൽ തയ്യാറാക്കി നൽകണമെന്നും യോഗത്തിൽ ജില്ലാ കളക്ടർ നിർദേശം നൽകി. തരൂർ മണ്ഡലത്തിലെ കഴനി-പഴന്പാലക്കോട് റോഡിലെ ഒന്പത് കിലോമീറ്റർ ദൂരത്തിൽ ജൽജീവൻ മിഷന്‍റെ ഭാഗമായി എടുത്ത കുഴികൾ റീസ്റ്റോർ ചെയ്യാത്തതുമൂലം വാഹനങ്ങൾ അപകടത്തിൽപെടുന്നത് പതിവാണെന്നും കരാർ പ്രകാരം പ്രവൃത്തി പൂർത്തീകരിക്കാതെ കാലതാമസം വരുത്തുന്നതുമൂലം ബജറ്റിൽ അനുവദിച്ച ഒന്പതു കോടി വിനിയോഗിച്ച് റോഡ് പ്രവൃത്തി ആരംഭിക്കാൻ കഴിയുന്നില്ലെന്നും പി.പി സുമോദ് എംഎൽഎ യോഗത്തിൽ പറഞ്ഞു. അടിക്കടി അപകടങ്ങൾ ഉണ്ടാവുന്ന മുണ്ടൂർ ജംഗ്ഷനിൽ റിഫ്ലക്ടറുകൾ അടക്കമുള്ള മുന്നറിയിപ്പ് സംവിധാനങ്ങൾ സ്ഥാപിക്കണമെന്ന് എ. പ്രഭാകരൻ എംഎൽഎ നിർദേശിച്ചു. പൊരിയാനി കയ്യാറ അരിമണി റോഡിൽ പതിനൊന്ന് ഇലക്ട്രിക് പോസ്റ്റുകൾ സ്ഥാപിക്കുന്നത് വേഗത്തിലാക്കണം. ജൽജീവൻ മിഷൻ പദ്ധതിയുടെ ഭാഗമായി പലയിടത്തും ടാങ്കുകളുടെ പണി പൂർത്തിയായെങ്കിലും പൈപ്പിടൽ പ്രവൃത്തി ത്വരിതപ്പെടുത്തി കുടിവെള്ള വിതരണം അടിയന്തിരമായി ആരംഭിക്കണമെന്നും എംഎൽഎ ആവശ്യപ്പെട്ടു. തമിഴ്നാട്ടിൽ നിന്നും കല്ലുകയറ്റി വരുന്ന ഭാരവാഹനങ്ങൾ സ്കൂൾ സമയങ്ങളിൽ റോഡിലൂടെ സഞ്ചരിക്കുന്നുണ്ടെന്നും പരിശോധന ശക്തമാക്കണമെന്നും മന്ത്രി കെ. കൃഷ്ണൻകുട്ടിയുടെ പ്രതിനിധി യോഗത്തിൽ ആവശ്യപ്പെട്ടു. ഇത് സംബന്ധിച്ച പരിശോധന കർശനമാക്കാൻ പൊലീസിനും മോട്ടോർവാഹന വകുപ്പിനും ജില്ലാ കളക്ടർ നിർദേശം നൽകി. പാറ-പൊള്ളാച്ചി റോഡിന്‍റെ അറ്റകുറ്റപണികൾ വേഗത്തിലാക്കണമെന്നും മന്ത്രി കെ. കൃഷ്ണൻകുട്ടിയുടെ പ്രതിനിധി ആവശ്യപ്പെട്ടു. കരകലകുളന്പ് പുഴയോരം കോളനിയിലുൾപ്പെട്ട 27 അപേക്ഷകർക്ക് അടുത്ത പട്ടയമേളയിൽ പട്ടയം വിതരണം ചെയ്യാനാവുമെന്ന് ജില്ലാ കളക്ടർ അറിയിച്ചു. കാലവർഷക്കെടുതിയിൽ ജില്ലയിൽ ഈ വർഷം ഇതു വരെ 266 വീടുകൾ ഭാഗികമായും 23 വീടുകൾ പൂർണമായും തകർന്നതായി ജില്ലാ കളക്ടർ യോഗത്തിൽ അറിയിച്ചു. വന്യമൃഗശല്യത്തിൽ നിന്നും വിള സംരക്ഷിക്കുന്നതിനായി കൃഷിഭൂമികളിലും മറ്റും വൈദ്യുത വേലികൾ സ്ഥാപിക്കുന്നതിന് ഇലക്ട്രിക്കൽ ഇൻസ്പെക്ടറേറ്റ് വകുപ്പിന്‍റെ അനുമതി ആവശ്യമാണെന്നും ജില്ലാ കളക്ടർ അറിയിച്ചു.

കനത്ത മഴയിൽ വെള്ളം മുങ്ങിക്കിടന്ന നെൽപ്പാടങ്ങളിലെ കൃഷി നശിച്ചു

നെന്മാറ: കഴിഞ്ഞ ദിവസങ്ങളിൽ ഉണ്ടായ കനത്തമഴയെ തുടർന്ന് വെള്ളം മുങ്ങിക്കിടന്ന നെൽപ്പാടങ്ങളിലെ കൃഷി നശിച്ചു. മഴ കുറഞ്ഞതിനെതുടർന്ന് നെൽപ്പാടങ്ങളിലെ വെള്ളം താഴ്ന്നതോടെയാണ് ചീഞ്ഞുപോയ നെൽച്ചെടികൾ പുറത്തുകാണാൻ തുടങ്ങിയത്. നടീൽ കഴിഞ്ഞ് ദിവസങ്ങളായ നെൽപ്പാടങ്ങൾ മൂന്നുദിവസത്തിലേറെ വെള്ളം മുങ്ങിയതോടെയാണ് നെൽച്ചെടികൾ ചീഞ്ഞുപോയത്. നെൽച്ചെടികൾ നശിച്ച പാടങ്ങളിൽ ആവർത്തനകൃഷി നടത്താൻ ഞാറ്റടി ലഭ്യമല്ലാത്തതിനാൽ മിക്ക കർഷകരും ഒന്നാം വിള ഉപേക്ഷിച്ച നിലയിലാണ്. ചില കർഷകർ ആദ്യം തയ്യാറാക്കിയ ഞാറ്റടി നശിച്ചതിനെ തുടർന്ന് വീണ്ടും വിത്ത് പാകി മുളപ്പിച്ച ഞാറാണ് നട്ടിരുന്നത്. രണ്ടുപ്രാവശ്യം വിത്തുപാകി നട്ടകൃഷി നശിച്ചതോടെ ഇനിയും വിളയിറക്കാൻ തയ്യാറായാൽ മാസങ്ങളുടെ വൈകൽ ഉണ്ടാകുമെന്നും ഉഴവുകൂലിയും കൂലി ചെലവുമായി വലിയ സാമ്പത്തിക ബാധ്യത വരുമെന്നും ഇതുമൂലം രണ്ടാംവിള ഇറക്കാനും വൈകുമെന്നും കർഷകർ ചൂണ്ടിക്കാണിക്കുന്നു. അയിലൂർ പഞ്ചായത്തിലെ മരുതഞ്ചേരി, ആലംപള്ളം, കയറാടി, പയ്യാങ്കോട്, പുത്തൻതറ തുടങ്ങിയ മേഖലകളിലും നെന്മാറ പഞ്ചായത്തിലെ തേവർമണി, നെന്മാറപാടം, ചാത്തമംഗലം, പോത്തുണ്ടി മേഖലകളിലായി നൂറോളം ഏക്കർ നെൽകൃഷി നശിച്ചിട്ടുണ്ടെന്നാണ് വിവിധ പാടശേഖരസമിതി ഭാരവാഹികൾ പറയുന്നത്. നെൽച്ചെടികൾ ചീഞ്ഞു പോയതിനെ തുടർന്ന് ഒന്നാംവിള മുന്നോട്ടു കൊണ്ടുപോകാൻ കഴിയാത്ത സ്ഥിതിയായി. നെൽകൃഷി നശിച്ച കർഷകർക്ക് കാലാവസ്ഥ ഇൻഷ്വറൻസ് ആനുകൂല്യപ്രകാരം നഷ്ടപരിഹാരം ലഭ്യമാക്കണമെന്ന് കർഷകർ ആവശ്യപ്പെട്ടു.

ദേശീയപാതയുടെ അശാസ്ത്രീയ നിർമാണം: വടക്കഞ്ചേരിയിൽ സ്ട്രീറ്റുകൾ വെള്ളക്കെട്ടിൽ

വടക്കഞ്ചേരി: വടക്കഞ്ചേരി - മണ്ണുത്തി ആറുവരി ദേശീയപാതയുടെ അശാസ്ത്രീയമായ നിർമാണംമൂലം ഹോട്ടൽ ഡയാനക്കടുത്തുള്ള വിവിധ സ്ട്രീറ്റുകളിലെ മുപ്പതോളം കുടുംബങ്ങൾ രൂക്ഷമായ വെള്ളക്കെട്ടിൽ. മഴപെയ്താൽ സമീപത്തെ കുന്നുകളിൽ നിന്നുള്ള വെള്ളം വരെ ഒഴുകിയെത്തി കെട്ടിനിൽക്കുന്നത് ഇവിടുത്തെ ഉല്ലാസ് നഗർ സ്ട്രീറ്റുകളിലാണ്. ദേശീയപാത നിർമിച്ചപ്പോൾ പാതകളുടെ ഇരു ഭാഗത്തും കുത്തിയൊഴുകിയെത്തുന്ന മഴവെള്ളം ഒഴിഞ്ഞു പോകാൻ വഴിയുണ്ടാക്കാത്തതാണ് ഈ ദുരവസ്ഥയ്ക്ക് കാരണമെന്ന് വീട്ടുകാർ പറഞ്ഞു. മൂന്നടിയോളം ഉയരത്തിൽ പ്രദേശമാകെ വെള്ളം പൊങ്ങി റോഡും പറമ്പും വീടും തിരിച്ചറിയാനാകാത്ത വിധമാകും വെള്ളക്കെട്ട്. തോരാത്ത മഴ തുടർന്നാൽ വെള്ളം പൊങ്ങി വീടുകളുടെ കൂടുതൽ ഭാഗങ്ങൾ മുങ്ങും. തേനിടുക്ക്, പമ്പരംകുന്ന് എന്നിവിടങ്ങളിൽ നിന്നുള്ള വെള്ളവും ഒഴുകിയെത്തുന്നത് ഇവിടേക്കാണ്. ദേശീയപാതയുടെ സർവീസ് റോഡിൽ സ്ട്രീറ്റുകളിലേക്കുള്ള പ്രവേശന വഴികൾ അടച്ച് രാത്രി കാലങ്ങളിൽ ചരക്കു ലോറികൾ ഉൾപ്പെടെ നിർത്തിയിടുന്നതുമൂലം വീട്ടുകാർ തടങ്കലിലാകുന്ന സ്ഥിതിയുമുണ്ട്. ചികിത്സ ഉൾപ്പെടെ അത്യാവശ്യങ്ങൾക്ക് വാഹനം ഓടിച്ച് പോകാനും ഇതുമൂലം ബുദ്ധിമുട്ടുണ്ടാക്കുന്നുണ്ട്. ദേശീയപാത അഥോറിറ്റിക്കും കരാർ കമ്പനിക്കും പഞ്ചായത്തിനും വെള്ളക്കെട്ട് സംബന്ധിച്ച് നിരവധിതവണ പരാതി നൽകിയിട്ടും നടപടി സ്വീകരിക്കുന്നില്ലെന്നാണ് ആക്ഷേപം. അധികൃതരുടെ അനാസ്ഥ തുടർന്നാൽ പ്രത്യക്ഷ സമരപരിപാടികൾ ആരംഭിക്കാനുള്ള നീക്കത്തിലാണ് വീട്ടുകാരിപ്പോൾ.

വന്യജീവി ആക്രമണങ്ങൾക്ക് എതിരേ കെസിവൈഎം ഉപവാസസമരം നടത്തി

കല്ലടിക്കോട്: അനുദിനം വർധിച്ചുവരുന്ന വന്യജീവി ആക്രമണങ്ങൾക്ക് എതിരെ കെസിവൈഎം പൊന്നങ്കോട് ഫൊറോനയിലെ 30 അംഗങ്ങൾ ഏകദിന ഉപവാസ സമരം നടത്തി. രാവിലെ ആരംഭിച്ച ഉപവാസസമരം ഫൊറോന വികാരി ഫാ. മാർട്ടിൻ കളമ്പാടൻ ഉദ്ഘാടനം ചെയ്തു. കെസിവൈഎം രൂപത സെക്രട്ടറി ജിബിൻ പയസ് വിഷയാവതരണം നടത്തി. എകെസിസി ഭാരവാഹികൾ പ്രസംഗിച്ചു. വൈകുന്നേരം നടന്ന പൊതുസമ്മേളനം രൂപത വികാരി ജനറാൾ മോൺ ജീജോ ചാലയ്ക്കൽ ഉദ്ഘാടനം ചെയ്തു. പൊന്നങ്കോട് ഫൊറോന പ്രസിഡന്‍റ് ആഗിൻ നോബിൾ അധ്യക്ഷത വഹിച്ച യോഗത്തിൽ കെ. ശാന്തകുമാരി എംഎൽഎ മുഖ്യാഥിതിയായി. കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ, കെസിവൈഎം രൂപത പ്രസിഡന്‍റ് അഭിഷേക പുന്നാംതടത്തിൽ, രൂപത കെസിവൈഎം ഡയറക്ടർ ഫാ. ജോബിൻ മേലേമുറിയിൽ, കാഞ്ഞിരപ്പള്ളി രൂപത മുൻ ഡെപ്യൂട്ടി പ്രസിഡന്‍റ് ഷോൺ, പൊന്നങ്കോട് യുവജന പ്രതിനിധി ജോമിൻ, കരിമ്പ പഞ്ചായത്ത് പ്രസിഡന്‍റ് രാമചന്ദ്രൻ മാസ്റ്റർ, കെപിസിസി സെക്രട്ടറി ഹരിഗോവിന്ദൻ, മാതൃവേദി പ്രതിനിധി ബീന തകരപ്പിള്ളി, ഡോ. മാത്യു കല്ലടിക്കോട്, പൊന്നങ്കോട് ഫൊറോന കെസിവൈഎം ഡയറക്ടർ ഫാ. ജിബിൻ കണ്ടത്തിൽ, ഫാ. ജോജി വടക്കേക്കര, ഫാ. റിജോ മേടക്കൽ, ഫാ. ജോൺ പുത്തൂക്കര, എകെസിസി പ്രതിനിധികൾ തുടങ്ങിയവർ പ്രസംഗിച്ചു. കേന്ദ്ര - സംസ്ഥാന സർക്കാരുകൾ പ്രശ്നങ്ങളിൽ ദ്രുതഗതിയിൽ ഇടപെടണമെന്ന് സമരസമിതി ആവശ്യപ്പെട്ടു. മലയോരമേഖലകളിലെ ജനങ്ങൾക്ക് സംരക്ഷണം നൽകണമെന്ന ആവശ്യം മുൻനിർത്തി പ്രമേയം എംഎൽഎക്ക് കൈമാറി. കെസിവൈഎം പൊന്നങ്കോട് ഫൊറോന ഭാരവാഹികൾ പരിപാടിക്ക് നേതൃത്വം കൊടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]