ADVERTISEMENT

ADVERTISEMENT

കോൺഗ്രസ് പ്രതിഷേധ ജാഥ നടത്തി

അയിലൂർ: പഞ്ചായത്തിലെ 3, 5 വാർഡുകളിലെ റോഡുകളുടെ തകർച്ച ഉടൻ പരിഹരിക്കുക, തെളിയാത്ത തെരുവ് വിളക്കുകൾ തെളിക്കുക, ലൈഫ് പദ്ധതി ലിസ്റ്റിൽപ്പെട്ട മുഴുവൻപേർക്കും ഉടൻ വീട് അനുവദിക്കുക, വികസനത്തിലെ രാഷ്ട്രീയ വിവേചനം അവസാനിപ്പിക്കുക എന്നീ ആവശ്യങ്ങളുന്നയിച്ച് അയിലൂർ മണ്ഡലം കോൺഗ്രസ് കമ്മിറ്റി അയിലൂർ വേല മന്ദം വെയിറ്റിംഗ് ഷെഡ് മുതൽ പൂളയ്ക്കൽപറമ്പ് വരെ പ്രതിഷേധ പ്രചരണ ജാഥ നടത്തി. ഡിസിസി അംഗം പ്രദീപ് നെന്മാറ ഉദ്ഘാടനം ചെയ്തു.

മണ്ഡലം കോൺഗ്രസ് പ്രസിഡന്‍റ് എസ്.എം. ഷാജഹാൻ അധ്യക്ഷനായി. നേതാക്കളായ കെ. കുഞ്ഞൻ, എ. സുന്ദരൻ, എസ്. കാസിം, കെ. വിനു, എ. ശിവപ്രസാദ്, വി. ബാലകൃഷണൻ, എ. ജയാനന്ദൻ, ഗിരിജ ചെന്താമരാക്ഷൻ, വി.ദാമോദരൻ, കെ.എം.ശശീന്ദ്രൻ, എ. വിജു, പി.വിജയൻ , വി.എം. സ്കറിയ, എൻ. ഉണ്ണികൃഷ്ണൻ , കെ.സുരേഷ്, ആറുമുഖൻ, കെ. രാജൻ, എൻ. ജയഗണേഷ്, എ. മോഹൻദാസ്, വി. വിനേഷ് , എം.എം. മനോജ്, എസ്. സുരേഷ് കുമാർ എന്നിവർ പ്രസംഗിച്ചു.

ADVERTISEMENT

രാത്രിയിൽ ഈ ശ്മശാനത്തിൽ...

എം.വി. വസന്ത് പാലക്കാട്: പതിനാലേക്കർവരുന്ന പൊതുശ്മശാനത്തിൽ രാത്രികാലങ്ങളിൽ വിലസുന്നതു വിലാസിനിയും മണവാട്ടിയും അടക്കമുള്ളവർ!. ഭയപ്പെടേണ്ട, ഇവരെല്ലാവരും നമുക്ക് പ്രിയപ്പെട്ടവർതന്നെ. പകൽപോലും ശ്മശാനക്കാട്ടിൽ പോകാൻ പലരും ഭയപ്പെടുന്പോഴാണ് ഒരുകൂട്ടം ആളുകൾ രാത്രിയിൽ ഇവിടെയെത്തിയത്. പ്രേത, ഭൂത, പിശാചുക്കളെ കണ്ടെത്തി ഉച്ചാടനം ചെയ്യാനല്ല, മറിച്ച് രാത്രിയിലെ അന്തേവാസികളുടെ ക്ഷേമത്തിനു പുത്തൻപച്ചപ്പൊരുക്കാൻ... പാലക്കാട് നഗരത്തിലെ ഏറ്റവും വലിയ പച്ചത്തുരുത്തായ മാട്ടുമന്ത പൊതുശ്മശാനത്തിൽ ഇത്തവണ പരിസ്ഥിതിസംഘടനകളുടെ സർവേ നടത്തിയതു രാത്രിയിൽ. "വനംതുരുത്തുകളിലുമുണ്ട് അപൂർവ അതിഥികൾ' എന്ന ദീപിക വാർത്തയുടെ ചുവടുപിടിച്ചായിരുന്നു സർവേ. പുനർജനി പരിസ്ഥിതിസംഘടന, നാച്ചുറൽ ഹിസ്റ്ററി സൊസൈറ്റി ഓഫ് പാലക്കാട്, അകത്തേത്തറ ഗ്രാമപഞ്ചായത്ത് ബയോഡൈവേഴ്സിറ്റി മാനേജ്മെന്‍റ് കമ്മിറ്റി, സഹ്യാദ്രി നേച്ചർ ഓർഗനൈസേഷൻ, പരിസ്ഥിതി ഐക്യവേദി എന്നീ സംഘടനകൾ സംയുക്തമായാണ് സർവേ നടത്തിയത്. വൈകുന്നേരം നാലിന് ആരംഭിച്ച സർവേ രാത്രി പത്തിനാണ് സമാപിച്ചത്. വിലാസിനിയും കൂട്ടരും സർവേയിൽ കണ്ടെത്തിയത് 64 ഇനം പക്ഷികളെ. മുപ്പതിനം പൂന്പാറ്റകളും അപൂർവയിനം തുന്പികളും വിവിധയിനം തവളകളും അരണയും പല്ലിയും പ്രാണികളുമെല്ലാം സർവേയിൽ കണ്ടെത്താനായി. മീൻകൂമൻ, കാലൻകോഴി, ചെവിയൻനത്ത്, കാവി തുടങ്ങിയ പക്ഷികളുടെ വരവും പോക്കുമെല്ലാം സർവേ നടത്തിയവർക്കു ഹരമായി. ഗരുഡശലഭം, വിലാസിനി, മഞ്ഞപ്പാപ്പാത്തി, ചിന്നപ്പുൽച്ചാടൻ, നീലക്കടുവ ഇനത്തിൽപെട്ട പൂന്പാറ്റകളും മഞ്ഞക്കാലി പാൽതുമ്പി, നാട്ടുപുൽച്ചിന്നൻ, പച്ചവ്യാളി, തുലാത്തുമ്പി തുടങ്ങിയ തുന്പിയിനങ്ങളും ദൃശ്യവിരുന്നായി. സ്വർണകുറുവായൻ, ചിത്രത്തവള, വർണബലൂൺ തവള, മണവാട്ടിത്തവള, പാറത്തവള, വയനാടൻ കരിയിലത്തവള, ഇലത്തവള, ചെങ്കൽചിലപ്പൻ, ചിലുചിലപ്പൻ, വയൽത്തവള തുടങ്ങി ഇരുപതോളം തവളകളും പച്ചയോന്ത്, നാട്ടുമരപ്പല്ലി, പൊന്നൻമരപ്പല്ലി, പുള്ളിപല്ലി, വരയൻപല്ലി, ചെമ്പൻഅരണ, കാട്ടരണ, പാമ്പരണ, കുട്ടിവിരലൻപല്ലി തുടങ്ങിയവയെല്ലാം കാഴ്ചവട്ടമൊരുക്കി. ഭീകരത, ശ്മശാനത്തോളം മൂന്നു പതിറ്റാണ്ടുമുന്പ് കാടുപിടിച്ചു കിടന്നിരുന്ന മാട്ടുമന്ത ശ്മശാനത്തിനകത്തു കടക്കാൻ ആരും ധൈര്യപ്പെട്ടിരുന്നില്ല.പാമ്പുകളും മുയലുകളും കുറുക്കനും കീരിയും ഉടുന്പും പന്നിയും ഉൾപ്പെടെയുള്ള മൃഗങ്ങളുടെ വിഹാരകേന്ദ്രമായിരുന്നു ശ്മശാനം. നഗരം കേന്ദ്രീകരിച്ച് ഭൂമിക്കച്ചവടം ശക്തിപ്പെട്ടതോടെ ശ്മശാനത്തോടു ചേർന്നുള്ള കാടുകളും പിന്നീട് ശ്മശാനവും വെട്ടിത്തെളിക്കുകയുണ്ടായി. തരിശായി കിടന്ന ശ്മശാനഭൂമിയിൽ 15 വർഷങ്ങൾക്ക് മുന്പാണ് മാട്ടുമന്തയിലെ യുവാക്കൾ വനവത്കരണവുമായി രംഗത്തെത്തിയതും ചെറുവനമായി രൂപപ്പെടുത്തിയതും. മുക്കൈപ്പുഴയുടെ സാന്നിധ്യം ശ്മശാനഭൂമിയിലെ ജൈവവൈവിധ്യത്തിനും മുതൽക്കൂട്ടായെന്നു പരിസ്ഥിതിസ്നേഹികൾ പറയുന്നു. ജില്ലയിലെ വിവിധ പച്ചത്തുരുത്തുകളുടെ ജൈവവൈവിധ്യം രേഖപ്പെടുത്തുന്നതിനായി പാലക്കാട് നാച്ചുറൽ ഹിസ്റ്ററി സൊസൈറ്റി വിവിധ സംഘടനകളുമായി സഹകരിച്ച് നടത്തുന്ന യജ്ഞത്തിന്‍റെ ഭാഗമായാണ് മാട്ടുമന്ത ശ്മശാനത്തിൽ കഴിഞ്ഞദിവസം സര്‍വേ നടത്തിയത്. ആർ.അശ്വതി, അഡ്വ. ലിജോ പനങ്ങാടൻ, ഡോ. വിവേക് വൈദ്യനാഥൻ, എസ്. അരുൺ, വിവേക് സുധാകരൻ എന്നിവർ നേതൃത്വം നൽകിയ പരിപാടിയിൽ ലതിക അനോത്ത്, ഡോ. രാജേഷ് രാധാകൃഷ്ണൻ, സേതുമാധവൻ, നന്ദൻ കോട്ടായി, ദീപം സുരേഷ്, ബോബൻ മാട്ടുമന്ത, അശ്വജിത്ത്, അജീഷ്, രുദ്ര,വേണു, അനുരൂപ, ഡോ. അഭിജിത്ത് മോഹൻ, രവി കാവുങ്കൽ, നവനീത് നമ്പ്യാർ, രാധാകൃഷ്ണൻ,ഹരി, ആർ. സതീഷ്, കെ. രാജേഷ് എന്നിവർ പങ്കെടുത്തു.

സർവീസ് റോഡിലേക്കു തിരിയാൻ സൂചനാബോർഡും വെളിച്ചവുമില്ല

വടക്കഞ്ചേരി: വടക്കഞ്ചേരി- മണ്ണുത്തി ആറുവരി ദേശീയപാതയിൽനിന്നു സർവീസ് റോഡിലേക്കു പ്രവേശിക്കുന്ന ജംഗ്ഷനുകളിൽ മതിയായ സൂചനാബോർഡുകളോ വെളിച്ചമോ ഇല്ലാത്തത് അപകടങ്ങൾക്കു കാരണമാകുന്നതായി പരാതി. പാലക്കാട് ലൈനിൽ ഹോട്ടൽ ഡയാനയ്ക്കടുത്ത ജംഗ്ഷനിലും മംഗലംപാലത്തിനടുത്തെ ജംഗ്ഷനിലുമാണ് അപകടങ്ങൾ തുടരുന്നത്. പന്നിയങ്കര ടോൾപ്ലാസ കടന്ന് വടക്കഞ്ചേരിയിലേക്കും മംഗലംഡാം, കിഴക്കഞ്ചേരി, നെന്മാറ തുടങ്ങി സംസ്ഥാനപാതയിലേക്കും പോകേണ്ട വാഹനങ്ങൾക്ക് സർവീസ് റോഡിലേക്കു തിരിയേണ്ട സ്ഥലം ദൂരെനിന്നുതന്നെ അറിയാൻ കഴിയാത്തതാണ് പ്രശ്നമാകുന്നത്. ഡയാനയ്ക്കടുത്ത ജംഗ്ഷനിൽ വടക്കഞ്ചേരിയെന്ന് സൂചന നൽകുന്ന വളരെ ചെറിയ ബോർഡാണ് സ്ഥാപിച്ചിട്ടുള്ളത്. സ്ഥിരമായി പോകുന്നവർക്കുമാത്രമേ ഈ ബോർഡ് കാണാനാകൂ. രാത്രിസമയം ഇവിടെ വെളിച്ചമില്ലാത്തതിനാൽ ദൂരസ്ഥലങ്ങളിൽനിന്നുവരുന്നവർ തിരിയേണ്ട കവല കാണാനാകാതെ മുന്നോട്ടുപോയി മേൽപ്പാലത്തിൽ കയറി വഴിതെറ്റുന്ന സ്ഥിതിയാണ്. മംഗലം പാലത്തിനടുത്ത കവലയിൽ സൂചനാബോർഡോ വെളിച്ചമോ ഇല്ല. സർവീസ് റോഡുകളിൽ വാഹനങ്ങൾ നിർത്തിയിടുന്നതും അപകടങ്ങൾക്കു കാരണമാകുന്നുണ്ട്.

ബൈപാസ് റോഡുകൾ പ്രഖ്യാപനത്തിൽ ഒതുങ്ങി: വീർപ്പുമുട്ടി നെന്മാറ ടൗൺ

ജോജി തോമസ് നെന്മാറ: അന്തർസംസ്ഥാനപാത കടന്നുപോകുന്ന നെന്മാറ ടൗൺ ഗതാഗതക്കുരുക്കിൽ വീർപ്പുമുട്ടുന്നു. പാതനവീകരണവും ബൈപാസ് നിർമാണവും പത്തുവർഷമായിട്ടും എങ്ങുമെത്തിയില്ല. പ്രതിദിനം എണ്ണായിരത്തിലേറെ വാഹനങ്ങൾ കടന്നുപോകുന്ന ഈ പാതയിൽ ഗതാഗതക്കുരുക്ക് ഒഴിവാക്കുന്നതിനായി 2016 ൽ നെന്മാറയിൽ ബൈപാസ് റോഡിനു ബജറ്റിൽ നിർദേശം വന്നെങ്കിലും ഒന്പതുവർഷങ്ങൾക്കുശേഷവും പ്രാരംഭനടപടികൾപോലുമായില്ല. വാഹനഗതാഗതവും ജനപ്പെരുപ്പവും വർധിച്ചതോടെ പത്തുവർഷംമുമ്പ് പ്രഖ്യാപിച്ച ബൈപാസ് റോഡുപോലും മതിയാകാത്ത സ്ഥിതിയാണ്. 2007-നു ശേഷം മംഗലം- ഗോവിന്ദാപുരം സംസ്ഥാനപാതയിൽ സമ്പൂർണ നവീകരണം നടന്നിട്ടില്ല. ഇടയ്ക്ക് കുഴിയടയ്ക്കലും അറ്റകുറ്റപ്പണികൾ നടത്തലും മാത്രമാണ് നടന്നിട്ടുള്ളത്. 18 വർഷമായിട്ടും റോഡ് വീതികൂട്ടലോ മറ്റു നടപടികളുമുണ്ടായിട്ടില്ല. ഫണ്ട് ലഭിക്കുന്ന മുറയ്ക്ക് ഒന്നോരണ്ടോ വർഷംകൂടുമ്പോൾ മൂന്നും രണ്ടുംമൂന്നും കിലോമീറ്റർ ദൈർഘ്യത്തിൽ താത്കാലിക ഉപരിതലം പുതുക്കൽമാത്രമാണ് നടക്കുന്നത്. നടപ്പാതപോലുമില്ലാതെ റോഡിൽ കിട്ടാവുന്ന രീതിയിൽ ടാർചെയ്ത് പലപ്പോഴായി വീതികൂട്ടിയതൊഴിച്ചാൽ മറ്റൊന്നും നടന്നില്ല. എന്നാൽ, റോഡ് അതിർത്തിവരെ ടാർചെയ്ത പല സ്ഥലങ്ങളിലും അഴുക്കുചാൽ ഇല്ലാത്തതും റോഡിലേക്ക് തള്ളി നിൽക്കുന്ന വൈദ്യുതതൂണുകൾ മാറ്റാത്തതും യാത്രാദുരിതമായി തുടരുന്നു. നിലവിൽ മഴപെയ്താൽ റോഡിൽ വെള്ളക്കെട്ടുണ്ടാകുന്ന രീതിയിൽ അഴുക്കുചാലുകൾ പോലും പലയിടത്തും മൂടി കിടക്കുകയാണ്. അന്തർസംസ്ഥാന പാതയിൽ 2009-ൽ കൊല്ലങ്കോട്ടും ബൈപാസുകൾ നിർമിക്കുമെന്നു പ്രഖ്യാപിച്ചുവെങ്കിലും അതും പ്രഖ്യാപനത്തിലൊതുങ്ങി. ഭാരതമാല പദ്ധതിയിലുൾപ്പെടുത്തി ദേശീയപാതനിലവാരത്തിലേക്കുയർത്തുമെന്ന വാഗ്ദാനം വന്നുവെങ്കിലും അതും യാഥാർഥ്യമായില്ല. വർഷങ്ങൾക്കുശേഷം മലയോരഹൈവേയിൽ ഉൾപ്പെടുത്തി പുനരുദ്ധരിക്കും എന്ന പ്രഖ്യാപനംവന്നെങ്കിലും അതും പ്രയോഗത്തിൽ വന്നില്ല.

വാർഡ് മെംബറെ മർദിച്ചെന്നു പോലീസിൽ പരാതി; വ്യാജമെന്നു നാട്ടുകാർ

മണ്ണാർക്കാട്: സിപിഎം ലോക്കൽ കമ്മിറ്റി അംഗവും കാഞ്ഞിരപ്പുഴ രണ്ടാംവാർഡ് മെംബറുമായ പ്രതീഷിനെയും കുടുംബത്തെയും ഒരുസംഘം മർദിച്ചതായി പരാതി. കഴിഞ്ഞദിവസമാണ് സംഭവം. പ്രതീഷും കുടുംബവും ആശുപത്രിയിൽ ചികിത്സതേടി. തുടർന്ന് മണ്ണാർക്കാട് പോലീസിൽ പരാതിയുംനൽകി. അക്രമസംഭവത്തിൽ പ്രതിഷേധിച്ച് സിപിഎം കാഞ്ഞിരപ്പുഴ ലോക്കൽ കമ്മിറ്റിയുടെ നേതൃത്വത്തിൽ പൊറ്റശേരിയിൽ പ്രതിഷേധപ്രകടനം നടത്തി. ലോക്കൽ സെക്രട്ടറി മുഹമ്മദ് നിസാർ നേതൃത്വം നൽകി. എന്നാൽ, കേസ് വ്യാജമെന്നു നാട്ടുകാർ വാർത്താസമ്മേളനത്തിൽ ആരോപിച്ചു. കഴിഞ്ഞദിവസം നടന്ന കേരളോത്സവത്തിൽ കാഞ്ഞിരപ്പുഴ പച്ചത്തുരുത്തിലുള്ള ക്ലബ്ബിനായിരുന്നു വിജയം. ഇതിൽ മാനസികമായി പ്രശ്നത്തിലായ മെംബർ പ്രതീഷ് മദ്യപിച്ചു ക്ലബ്ബിലെത്തി മെംബർമാരെ ജാതിപ്പേരു വിളിച്ച് അസഭ്യം പറയുകയും മർദിക്കുകയും ചെയ്തുവെന്നാണ് നാട്ടുകാരുടെ ആരോപണം. തുടർന്ന് മെംബർ പോലീസിൽ പരാതി നൽകുകയായിരുന്നു. ഇനിയും ആക്രമിക്കുമെന്നുപറഞ്ഞ് വെല്ലുവിളിക്കുകയും ചെയ്തിരുന്നു. ഇതിൽ ഭയന്ന് ക്ലബ്ബിലുള്ള യുവാക്കളെല്ലാം ഒളിവിലാണ്. സംഘർഷം ഒഴിവാക്കാൻ ബന്ധപ്പെട്ടവർ ഉടൻ പരിഹാരം കാണണമെന്ന് ക്ലബ്ബിലുള്ള വനിതകൾ മണ്ണാർക്കാട്ടു വിളിച്ചുചേർത്ത വാർത്താസമ്മേളനത്തിൽ ആവശ്യപ്പെട്ടു. അമ്മമാരും യുവതികളും കുട്ടികളുമുൾപ്പെടെ അമ്പതോളംപേരാണ് വാർത്താസമ്മേളനത്തിനെത്തിയത്.

റവന്യൂ ജില്ലാ സ്കൂൾ കായികോത്സവം ചാത്തന്നൂരിൽ ഇന്നുമുതൽ

തൃത്താല: പാലക്കാട് റവന്യൂ ജില്ലാ സ്കൂൾ കായികോത്സവം 14,15,16ന് ചാത്തനൂർ സിന്തറ്റിക് ട്രാക്കിൽ നടക്കും. ഇന്നുരാവിലെ ജില്ലാ വിദ്യാഭ്യാസ ഡെപ്യൂട്ടി ഡയറക്ടർ ടി.എ. സലീനബീവി പതാകയുയർത്തും. ഷൊർണൂർ എംഎൽഎ പി. മമ്മിക്കുട്ടി ഉദ്ഘാടനം നിർവഹിക്കും. തൃത്താല ബ്ലോക്ക് പഞ്ചായത്ത് പ്രസിഡന്‍റ് അഡ്വ.വി.പി. റജീന അധ്യക്ഷത വഹിക്കും. ജനപ്രതിനിധികൾ, വിവിധ അധ്യാപക സംഘടനാപ്രതിനിധികൾ പങ്കെടുക്കും. 16ന് സമാപനസമ്മേളനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ ഉദ്ഘാടനം ചെയ്യും. തിരുമിറ്റക്കോട് ഗ്രാമപഞ്ചായത്ത് പ്രസിഡന്‍റ് ടി. സുഹറ അധ്യക്ഷത വഹിക്കും. മൂന്നു ദിവസങ്ങളിലായി ജില്ലയിലെ മൂവായിരത്തോളം കായികതാരങ്ങൾ പങ്കെടുക്കും. കായികമേളയുടെ ലോഗോ പ്രകാശനം പ്രചാരണ കമ്മിറ്റി ചെയർപേഴ്സൺ പി. ഷീബ ഒറ്റപ്പാലം വിദ്യാഭ്യസ ഓഫീസർ സിജു തോമസിനു നൽകി പ്രകാശനം ചെയ്തു. ലോഗോ രൂപകല്പന ചെയ്തത് ആലത്തൂർ ഉപജില്ലാ എരിമയൂർ ഗവ. ഹയർ സെക്കൻഡറി സ്കൂൾ അധ്യാപകൻ ടി.പി. സന്തോഷ് കുമാറാണ്. തിരുമിറ്റക്കോട് ഗ്രാമപഞ്ചായത്ത് പ്രസിഡന്‍റ് ടി. സുഹറ ചെയർപേഴ്സണും പാലക്കാട് വിദ്യാഭ്യാസ ഡെപ്യൂട്ടി ഡയറക്ടർ ടി.എ. സലീന ബീവി ജനറൽ കൺവീനറും ഒറ്റപ്പാലം വിദ്യാഭ്യാസ ജില്ലാ ഓഫീസർ സിജു തോമസ് ട്രഷററുമായ സംഘാടകസമിതിയാണ് പ്രവർത്തനങ്ങൾക്കു നേതൃത്വം നൽകുന്നത്. വാർത്താസമ്മേളനത്തിൽ ഡിഇഒ സിജു തോമസ്, തൃത്താല എഇഒ കെ. പ്രസാദ്, കായികാധ്യാപകപ്രതിനിധി കെ. കൃഷ്ണൻ, പബ്ലിസിറ്റി കമ്മിറ്റി ചെയർപേഴ്സൺ പി. ഷീബ, കൺവീനർ പി.എസ്. വിനിത് എന്നിവർ പങ്കെടുത്തു.

ഷാഫി പറമ്പിലിനെ മർദിച്ച സംഭവം: വണ്ടാഴിയിൽ കോൺഗ്രസ് പ്രതിഷേധം

വടക്കഞ്ചേരി: കോഴിക്കോട് പേരാമ്പ്രയിൽ ഷാഫി പറമ്പില്‍ എംപി, ഡിസിസി പ്രസിഡന്‍റ് പ്രവീണ്‍കുമാര്‍ തുടങ്ങിയ നേതാക്കളെ പോലീസ് മർദിച്ച സംഭവത്തിൽ കോൺഗ്രസ് വണ്ടാഴി മണ്ഡലം കമ്മിറ്റിയുടെ ആഭിമുഖ്യത്തില്‍ പ്രകടനം നടത്തി. ബ്ലോക്ക് പ്രസിഡന്‍റ് കെ.വി. കണ്ണൻ ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.എം. ശശീന്ദ്രൻ അധ്യക്ഷത വഹിച്ചു. ആർ. സുരേഷ്, ഡിനോയ് കോമ്പാറ, എൻ. വിഷ്ണു, ഗണേഷ് മുടപ്പലൂർ, ഗൗതം, ഗോപി കണിയമംഗലം, ഹസൻ മംഗലംഡാം പ്രസംഗിച്ചു.

പഞ്ചായത്തുകളിലെ ഇ- മാലിന്യ ശേഖരണം: പരിശീലനം നൽകി

മണ്ണാർക്കാട്: മാലിന്യമുക്തം നവകേരളം ശുചിത്വ കാമ്പയിനിന്‍റെ ഭാഗമായി മണ്ണാർക്കാട്, ശ്രീകൃഷ്ണപുരം ബ്ലോക്കുകളിലെ പഞ്ചായത്തുകളിൽ ഇ-വേസ്റ്റ്, ഇതര മാലിന്യങ്ങൾ എന്നിവയുടെ ശേഖരണം പ്രത്യേകമായും കലണ്ടർപ്രകാരവും നടത്തുന്നതിന് പഞ്ചായത്ത് ഹരിതകർമസേന കൺസോർഷ്യം പ്രതിനിധികൾ, പഞ്ചായത്തിലെ വില്ലേജ് എക്സ്റ്റൻ ഓഫീസർമാർ, ഹെൽത്ത് ഇൻസ്പെക്ടർമാർ എന്നിവർക്ക് മണ്ണാർക്കാട് ബ്ലോക്ക് പഞ്ചായത്ത് ഹാളിൽ പരിശീലനം നൽകി. പഞ്ചായത്ത് അസിസ്റ്റന്‍റ് സെക്രട്ടറിമാരും പങ്കെടുത്തു. ഹരിതകർമസേനാംഗങ്ങൾ വില കൊടുത്താണ് ജനങ്ങളിൽ നിന്നും ഇ മാലിന്യം ശേഖരിക്കുക. ക്ലീൻ കേരള കമ്പനിയുമായി സഹകരിച്ച് പഞ്ചായത്തുകളുടെ ആഭിമുഖ്യത്തിലാണ് ശേഖരണം നടത്തുന്നത്. ഹരിത കർമസേന കാര്യശേഷി വികസനം, ഗുണപരത മെച്ചപ്പെടുത്തൽ, സംരഭകത്വം എന്നിവയുമായി ബന്ധപ്പെട്ടും ക്ലാസെടുത്തു. ബ്ലോക്ക് പഞ്ചായത്ത് പ്രസിഡന്‍റ് വി. പ്രീത ഉദ്ഘാടനം നിർവഹിച്ചു. സെക്രട്ടറി എ.ആർ. രാഗിണി അധ്യക്ഷത വഹിച്ചു. ജനറൽ എക്സ്റ്റൻഷൻ ഓഫീസർ ഇ.എം. അബ്ദുൾ ബഷീർ സ്വാഗതം പറഞ്ഞു. ക്ലീൻകേരള സെക്ടർ കോ-ഓർഡിനേറ്റർ പി.വി. സഹദേവൻ ക്ലാസെടുത്തു. പരിശീലനത്തിന് ശേഷം പഞ്ചായത്ത്തല പ്രവർത്തനം സംബന്ധിച്ച് സമഗ്രചർച്ചയും നടന്നു.

രണ്ടാംവിള ഞാറ്റടിക്കായി ഞാറുപാകൽ തുടങ്ങി

ചിറ്റൂർ: നല്ലേപ്പിള്ളിയിൽ രണ്ടാംവിള ഞാറ്റടിക്ക് ഞാറുപാകൽ പണികൾ ആരംഭിച്ചു. ഒന്നാംവിള കൊയ്ത്ത്, നെല്ല് ഉണക്കൽ പണികൾ അവസാനിക്കും മുമ്പ് തന്നെ രണ്ടാംവിള ഇറക്കാൻ വേണ്ട ഞാറു തയാറാക്കൽ പണികളുംആരംഭിച്ചു. കൊയ്ത്ത് കഴിഞ്ഞ പാടങ്ങളിൽ രണ്ടുപ്രാവശ്യം 10 ദിവസം മുമ്പ് ഉഴുതുമറിച്ച ശേഷമാണ് ഞാറ് പാകുന്നത്. സിആർ, പൊന്മണി ഇനത്തിൽപ്പെട്ട വിത്തിനമാണ് പാകുന്നത്. അഞ്ചുമാസത്തെ മൂപ്പാണുള്ളത്. 30 ദിവസത്തിനുള്ളിൽ പറിച്ചുനട്ടാൽ മാർച്ച് ആദ്യആഴ്ച തന്നെ കൊയ്ത്ത് നടത്താൻ കഴിയും. ഞാറ്റടി തയാറാക്കുന്നത് കനാൽവെള്ളം ലഭിക്കാത്തതു കൊണ്ട് കുഴൽകിണർ വെള്ളം കൊണ്ടാണ് ഞാറുപാകുന്നത്. നല്ലേപ്പിള്ളിയിൽ വ്യാപകമായി കൊയ്ത്ത് ആരംഭിക്കാൻ രണ്ടാഴ്ച കഴിയും. മൂപ്പ് കുറഞ്ഞ ടിപിഎസ് വിത്തിനം കൃഷിയിറക്കത് കൊണ്ടാണ് കൊയ്ത്ത് നടത്താൻ കഴിഞ്ഞത്. ഭദ്ര, ഉമ നെല്ലിനമാണെങ്കിൽ 20 ദിവസത്തിൽ കൂടുതൽ വൈകും. ആദ്യം ഞാറ് ആകുന്നവർക്ക് പറിച്ചുനടീൽ നടത്താൻ നാട്ടുകാരായ തൊഴിലാളികളെ കിട്ടും. വൈകിയാൽ ബംഗാളികളെയും തമിഴ്നാട്ടുകാരെയും ഉയർന്നകൂലി കൊടുത്തു പണിചെയ്യേണ്ടിവരും. മഴ, കൊയ്ത നെല്ലിന്‍റെ ഉണക്കൽപണി, തൊഴിലുറപ്പ് പണികൾക്കിടയിലാണ് ഭൂരിപക്ഷം കർഷകർക്കും തൊഴിലാളികളെ കിട്ടാതെ വരുന്ന സാഹചര്യം ഉണ്ടാകുന്നത്. മൂപ്പ് ഇല്ലാത്ത ഞാറു സമയത്തിന് നടീൽ നടത്തിയാൽ മെച്ചപ്പെട്ട വിളവു ലഭിക്കുമെന്ന പ്രതീക്ഷയിലാണ് കർഷകരെന്ന് നെൽകർഷകനായ വി. രാജൻ പറഞ്ഞു.

‘വടക്കഞ്ചേരി ഫയർസ്റ്റേഷന് സ്വന്തം സ്ഥലം കണ്ടെത്തി മാറ്റിസ്ഥാപിക്കണം’

വടക്കഞ്ചേരി: മൂന്ന് പതിറ്റാണ്ടിലേറെയായി വാടകകെട്ടിടത്തിൽ തുടരുന്ന വടക്കഞ്ചേരി ഫയർ സ്റ്റേഷന് സ്വന്തം സ്ഥലം കണ്ടെത്തി മാറ്റി സ്ഥാപിക്കണമെന്ന് കേരള ഫയർ സർവീസ് അസോസിയേഷൻ വടക്കഞ്ചേരി യൂണിറ്റ് സമ്മേളനം ആവശ്യപ്പെട്ടു. 1995 ഓഗസ്റ്റ് അഞ്ചിനാണ് അഞ്ചുമൂർത്തിമംഗലം ഗാന്ധി സ്മാരക യുപി സ്കൂളിനു സമീപം പഴയ തീപ്പെട്ടി കമ്പനിയിൽ ഫയർ സ്റ്റേഷൻ ആരംഭിച്ചത്. രണ്ടുവർഷത്തിനുള്ളിൽ സ്ഥലം കണ്ടെത്തി കെട്ടിടം നിർമിക്കുമെന്ന ഉറപ്പിലായിരുന്നു വാടക കെട്ടിടത്തിൽ ആരംഭിച്ചത്. കാലപ്പഴക്കത്തിൽ അപകടഭീഷണിയുള്ള കെട്ടിടത്തിലാണ് ഇപ്പോൾ ഫയർസ്റ്റേഷൻ പ്രവർത്തിക്കുന്നത്. അസോസിയേഷൻ സംസ്ഥാനകമ്മിറ്റി അംഗം ടി. സി. സജിത്ത് പതാക ഉയർത്തി. മേഖലാ പ്രസിഡന്‍റ് ആർ. രഞ്ജിഷ് ഉദ്ഘാടനം ചെയ്തു. സെക്രട്ടറി എൻ. ഷജി, ജോ. സെക്രട്ടറി കെ. ഗിരീഷ്, വൈസ് പ്രസിഡന്‍റ് പ്രകാശൻ എന്നിവർ പ്രസംഗിച്ചു. ടി.സി. സജിത്ത്, കെ. ഗിരീഷ്, സി. സന്ദീപ് എന്നിവരെ മേഖല കമ്മിറ്റി അംഗങ്ങളായും എം. മുകേഷിനെ ലോക്കൽ കൺവീനറായും എ. അർജുനെ ട്രഷറായും തെരഞ്ഞെടുത്തു.

പറമ്പിക്കുളത്ത് തെരുവുനായ്ക്കളുടെ ശല്യം രൂക്ഷം; വിനോദസഞ്ചാരികൾക്ക് ഭീഷണി

പറമ്പിക്കുളം: വിനോദസഞ്ചാരത്തിന് സ്ത്രീകളും കുഞ്ഞുങ്ങളുമായെത്തുന്ന സംഘത്തിന് പറമ്പിക്കുളത്തും തെരുവുനായകൾ ഭീഷണിയാവുകയാണ്. യാത്രക്കാർ വാഹനമിറങ്ങുന്ന സ്ഥലം പറമ്പിക്കുളം ജംഗ്ഷനിലാണ്. ഇവിടെയാണ് ഭക്ഷണശാലയും ശീതളപാനീയ സ്റ്റാളുകളുമുള്ളത്. ഇവിടെനിന്നുമാണ് ബോട്ട് ജെട്ടി, അണക്കെട്ട്, കന്നിമാരിതേക്ക്, തൂണക്കടവ് വനമേഖല സന്ദർശനത്തിന് വിനോദയാത്രക്കാർ പോവാറുള്ളത്. നായകൾ അഞ്ചും ആറും എണ്ണം കൂട്ടമായാണ് ജനക്കൂട്ടത്തിനിടയിൽ എത്തുന്നത്. പലപ്പോഴും ഇവിടത്തെ വ്യാപാരികളാണ് നായകളെ ഓടിക്കുന്നത്. നായകൾ പരസ്പരം കടിച്ചുകീറി പരാക്രമം കാണിക്കുന്നതും ഭീതിജനകമാവുകയാണ്. ഇവിടെ നായപിടുത്തവും വന്ധീകരണവും നടത്താറില്ലെന്നാണ് താമസക്കാർ പരാതിപ്പെടുന്നത്. റോഡരികിൽ നിർത്തിയിടുന്ന വാഹനങ്ങൾക്കടിയിൽ ഒളിക്കുന്ന നായ്ക്കൾ വാഹനത്തിൽ കയറുന്നവർക്കെതിരെയും ആക്രമണത്തിനു തുനിയാറുണ്ട്.

വിവരാവകാശനിയമം: പരിശീലനം നൽകും

പാലക്കാട്: ജനകീയ പ്രശ്നങ്ങളിൽ വിവരാവകാശനിയമം പ്രയോജനപ്പെടുത്തി സുതാര്യവും ഉത്തരവാദിത്വമുള്ള ഭരണത്തിന് വേണ്ടി ക്രിയാത്മക ഇടപെടലുകൾ നടത്തിക്കൊണ്ടിരിക്കുന്നവർക്ക് വിദഗ്ധപരിശീലനം നൽകുന്നു. ഇത്തരം പ്രവർത്തനങ്ങളിൽ പ്രാഥമികഘട്ടത്തിലുള്ളവർക്കും പാതിവഴിയിൽ എത്തിനിൽക്കുന്നവർക്കും പൂർണവിജയത്തിന്‍റെ അനുഭവങ്ങളുള്ളവർക്കും പ്രത്യേകം പരിശീലനം നൽകും. വിവരാവകാശനിയമത്തെ സദ്ഭരണത്തിനും പൗരഭരണത്തിനുമുള്ള പ്രവർത്തനങ്ങൾക്ക് പ്രേരകശക്തിയും ചാലകശക്തിയുമാക്കി മാറ്റാനുള്ള ശ്രമത്തിന്‍റെ ഭാഗമായാണ് ഈ പരിശീലനം. പങ്കാളിത്തരീതിയിലുള്ള ഈ പരിശീലനത്തിലൂടെ പങ്കെടുക്കുന്നവരുടെ പ്രവർത്തന അനുഭവങ്ങൾ പങ്കുവെക്കുകയും അതിനെ വിലയിരുത്തുകയും കൂടുതൽ പ്രചോദനങ്ങളും ഫലപ്രദമായ മാർഗങ്ങളും നേടുന്നതിനും പരിശീലനത്തിലൂടെ ലക്ഷ്യമിടുന്നുണ്ട്. രാമശേരി ഗാന്ധി ആശ്രമവും സർവോദയ കേന്ദ്രവും ദേശീയ വിവരാവകാശ കൂട്ടായ്മയും ചേർന്ന് നടത്തുന്ന പ്രായോഗിക പരിശീലനത്തിൽ പങ്കെടുക്കാൻ ആഗ്രഹിക്കുന്നവർ 9447483106 എന്ന വാട്സാപ്പ് നന്പറിലേക്ക് ബയോഡാറ്റ സഹിതം അപേക്ഷ നൽകണം.

‘പ്രാദേശിക സാന്പത്തിക വികസനം: പ്രാഥമിക മേഖലയ്ക്ക് പ്രാമുഖ്യം നൽകണം’

പാലക്കാട്: സംരംഭകത്വം നിലനിർത്തുന്നതിനും പ്രാദേശിക സാന്പത്തിക വികസനം ഉറപ്പാക്കുന്നതിനും കൃഷി പോലുള്ള പ്രാഥമിക മേഖലകൾക്ക് പ്രാമുഖ്യം നൽകണമെന്ന് വിഷൻ 2031 സെമിനാറിന്‍റെ ഭാഗമായി ‘ഉപജീവനം, പ്രാദേശിക സാന്പത്തിക വികസനം’ എന്ന വിഷയത്തിൽ നടന്ന ചർച്ച അഭിപ്രായപ്പെട്ടു. കുടുംബശ്രീ അടക്കമുള്ള വിവിധ ഏജൻസികളെ സംയോജിപ്പിച്ച് മാസ്റ്റർ പ്ലാൻ തയ്യാറാക്കിയാൽ മാത്രമേ പ്രാദേശിക സാന്പത്തിക വികസനം സാധ്യമാകൂ എന്നും ചർച്ചയിൽ വിലയിരുത്തി. വിവിധ മേഖലകളിൽ നാം ഇതുവരെ നേടിയ നേട്ടങ്ങളെ സുസ്ഥിരമായി നിലനിർത്താൻ സാന്പത്തികമായ സുസ്ഥിരത ആവശ്യമാണ്. കേരളത്തിന്‍റെ സാന്പത്തിക നിലനിൽപ്പിലെ പ്രധാന വെല്ലുവിളിയാണ് വരുമാനത്തിലെ അസന്തുലിതാവസ്ഥ. സംസ്ഥാനത്തിന്‍റെ വരുമാനത്തിൽ 65% വും സേവന മേഖലയിൽ നിന്നാണ്. ഉത്പാദന മേഖലയുടെ സംഭാവന 10% ൽ താഴെ മാത്രമാണ്. ഈ സ്ഥിതി സാന്പത്തികമായ നിലനിൽപ്പിന് വെല്ലുവിളിയാണ്. സംസ്ഥാനത്തിന്‍റെ തനത് വരുമാനം വർധിപ്പിക്കേണ്ടതുണ്ട്. കേന്ദ്രത്തിൽ നിന്നുള്ള ധനസഹായത്തിൽ 26 % ന്‍റെ കുറവാണ് ഈ വർഷം ഉണ്ടായിട്ടുള്ളത്. തദ്ദേശസ്ഥാപനങ്ങൾക്ക് സാന്പത്തിക വികസനത്തിൽ വലിയ പങ്കുണ്ട്. നാടിന്‍റെ വികസനത്തിലേക്കുള്ള ചവിട്ടുപടിയായാണ് സംരംഭകത്വത്തെ കാണേണ്ടത്. സംരംഭകത്വ മനോഭാവം കുട്ടികളിലേ വളർത്തിയെടുക്കണം. കാർഷിക മേഖല ‘അഗ്രി ബിസിനസ്’ എന്ന രീതിയിലേക്ക് മാറിയാൽ മാത്രമേ കൃഷിയിലൂടെയുള്ള പ്രാദേശിക സാന്പത്തിക വികസനം സാധ്യമാവൂ. വിളവെടുപ്പ് വരെയുള്ള കാലം, വിളവെടുപ്പിന് ശേഷമുള്ള കാലം എന്നിങ്ങനെ കൃഷിയെ വേർതിരിച്ച് ശാസ്ത്രീയമായ രീതിയിൽ പ്രവർത്തനങ്ങൾ നടത്തണം. കാർഷിക ഉത്പന്നങ്ങൾ കുടുംബശ്രീ, ഫാർമേഴ്സ് പ്രൊഡ്യൂസർ യൂണിറ്റുകൾ തുടങ്ങി വിവിധ ഏജൻസികളുടെ നേതൃത്വത്തിൽ ആധുനിക സാങ്കേതിക വിദ്യകൾ ഉപയോഗപ്പെടുത്തി പ്രാദേശികമായി സംസ്കരിക്കണം. ഉത്പന്നങ്ങളുടെ വിപണനത്തിന് നല്ല പാക്കേജിംഗ് സിസ്റ്റം ആവശ്യമാണ്. പ്രാദേശിക സാന്പത്തിക വികസന മേഖലയിൽ തൊഴിലുറപ്പ് പദ്ധതിയുമായി ബന്ധപ്പെട്ട സാധ്യതകൾ പരിശോധിക്കണം. കേവലം 100 ദിവസം തൊഴിൽ നൽകുക എന്നതിലുപരി തൊഴിലുറപ്പ് പദ്ധതിയുടെ മറ്റു മേഖലകൾക്കും പ്രാധാന്യം നൽകണം. സ്ത്രീകൾക്ക് കൂടുതൽ തൊഴിൽ നൽകുക, സാന്പത്തിക സാക്ഷരത നൽകൽ, മൈക്രോ ഫിനാൻസ് എന്നീ മേഖലകൾക്ക് കൂടുതൽ പ്രാമുഖ്യം നൽകണമെന്നും ചർച്ച അഭിപ്രായപ്പെട്ടു. കുടുംബശ്രീയുടെ ആധുനികവത്കരണം, സാങ്കേതികമായി പുരോഗമിക്കേണ്ടതിന്‍റെ ആവശ്യകതയും ചർച്ചയിൽ ഉയർന്നു വന്നു. കുടുംബശ്രീ എക്സിക്യുട്ടീവ് ഡയറക്ടർ എച്ച്. ദിനേശൻ വിഷയാവതരണം നടത്തിയ ചർച്ചയിൽ സംസ്ഥാന ആസൂത്രണ ബോർഡ് അംഗം പ്രഫ. ജിജു. പി. അലക്സ് അധ്യക്ഷത വഹിച്ചു. കെ. ഡിസ്ക് മെംബർ സെക്രട്ടറി ഡോ.പി.വി. ഉണ്ണികൃഷ്ണൻ, ആര്യനാട് ഗ്രാമ പഞ്ചായത്ത് കുടുംബശ്രീ സിസിഎസ് ചെയർപേഴ്സണ്‍ കെ.ആർ. സുനിതാകുമാരി, ഉദ്യം ലേണിംഗ് ഫൗണ്ടേഷൻ സീനിയർ മാനേജർ ടോണി കെ. ജോസ്, ഐസിഎആർസി ടിസിആർഐ പ്രിൻസിപ്പൽ സയന്‍റിസ്റ്റ് ഡോ.എം.എസ്. സജീവ്, കുടുംബശ്രീ മുൻ പ്രോഗ്രാം ഓഫീസർ പി. ബാലചന്ദ്രൻ, നബാർഡ് മുൻ അസി. ജനറൽ മാനേജർ രമേഷ് വേണുഗോപാൽ തുടങ്ങിയവർ ചർച്ചയിൽ പങ്കെടുത്തു.

കാലത്തിന്‍റെ വെല്ലുവിളികളെ നേരിടാൻ തദ്ദേശവകുപ്പ് പരിഷ്കരിക്കും: മന്ത്രി എം.ബി. രാജേഷ്

പാലക്കാട്: പുതിയ കാലത്തിന്‍റെ വെല്ലുവിളികളെ നേരിടാനുതകുന്ന രൂപത്തിൽ തദ്ദേശസ്വയംഭരണ വകുപ്പിനെ രൂപപ്പെടുത്തുമെന്ന് മന്ത്രി എം.ബി. രാജേഷ്. ലോകശ്രദ്ധ നേടിയ കേരള വികസന മാതൃക രൂപപ്പെടുത്തിയതിൽ തദ്ദേശ സ്വയംഭരണ വകുപ്പ് മുഖ്യ പങ്കാണ് വഹിച്ചിട്ടുള്ളതെന്നും മന്ത്രി പറഞ്ഞു. വിഷൻ 2031 തദ്ദേശ സ്വയംഭരണ വകുപ്പ് സംസ്ഥാനതല സെമിനാറിന്‍റെ പ്രാരംഭ സെഷനിൽ കേരളത്തിന്‍റെ വികസനം 2031 ൽ എന്ന വിഷയത്തിൽ കരട് നയരേഖ അവതരിപ്പിച്ച് സംസാരിക്കുകയായിരുന്നു മന്ത്രി. വികസനത്തിന്‍റെ ഗുണഫലങ്ങൾ എല്ലാ വിഭാഗം ജനങ്ങളിലേക്കും എത്തിക്കുന്നതിൽ തദ്ദേശവകുപ്പ് വലിയ പങ്ക് വഹിച്ചിട്ടുണ്ട്. ജനങ്ങളുടെ സർഗാത്മകത, ഉൗർജം എന്നിവയെ കെട്ടഴിച്ചുവിട്ടാണ് കേരളം ഈ നേട്ടം കൈവരിച്ചത്. ഇതിന് നേതൃത്വം നൽകിയത് തദ്ദേശവകുപ്പാണ്. കെസ്മാർട്ട് അടക്കമുള്ള ഇ ഗവേർണൻസ് സംവിധാനങ്ങളിലൂടെ ശാസ്ത്രീയ നികുതി സമാഹരണം വഴി തദ്ദേശസ്ഥാപനങ്ങൾക്ക് സാന്പത്തിക ശാക്തീകരണം കൈവരിക്കാൻ സാധിച്ചതായും മന്ത്രി പറഞ്ഞു. കുത്തകകൾക്ക് ബദൽ ഉയർത്താൻ സാധിക്കുന്ന രൂപത്തിൽ കുടുംബശ്രീയെ പ്രാപ്തരാക്കുമെന്നും മന്ത്രി പറഞ്ഞു. തദ്ദേശസ്ഥാപനങ്ങളെ കാലാനുസൃതമായി പരിഷ്കരിക്കുക, തദ്ദേശസ്ഥാപനങ്ങളെ ശക്തിപ്പെടുത്തുക എന്നിവയിൽ ഉൗന്നിയുള്ള കരട് നയരേഖ അവതരണം മന്ത്രി നിർവഹിച്ചു. പ്രാദേശിക സാന്പത്തിക വികസനം ത്വരിതപ്പെടുത്തുന്നതിനുള്ള ചാലകശക്തിയായി തദ്ദേശസ്ഥാപനങ്ങളെ മാറ്റും. സുസ്ഥിര അടിസ്ഥാന സൗകര്യ വികസനം, സംയോജിത വികസനം എന്നിവയ്ക്ക് ഉൗന്നൽ നൽകും. കാലാവസ്ഥാ വ്യതിയാനം, ദുരന്ത പ്രതികരണം എന്നിവ മുന്നിൽ കണ്ടുകൊണ്ടുള്ള പ്രവർത്തനം ശക്തിപ്പെടുത്തും. സുസ്ഥിര വികസന പ്രസ്ഥാനം എന്ന നിലയിലേക്ക് കുടുംബശീയെ ഉയർത്തിക്കൊണ്ടുവരും. സ്ത്രീകളുടെ തൊഴിൽപങ്കാളിത്തം 50 ശതമാനമായി വർധിപ്പിക്കും. ഇതിലൂടെ കേരളത്തിന്‍റെ സാമൂഹ്യഘടനയിൽ വലിയ മാറ്റം സൃഷ്ടിക്കാനാവും. തദ്ദേശ വകുപ്പുമായി ബന്ധപ്പട്ട നിയമങ്ങളും ചട്ടങ്ങളും കാലാനുസൃതമായി പരിഷ്കരിക്കുമെന്നും കരട്നയരേഖ അവതരണത്തിൽ മന്ത്രി പറഞ്ഞു. കഴിഞ്ഞ 10 വർഷം കൊണ്ട് തദ്ദേശ സ്വയംഭരണവകുപ്പ് കരസ്ഥമാക്കിയ വിവിധ നേട്ടങ്ങളും വകുപ്പ് അവതരിപ്പിച്ച മികച്ച മാതൃകകളും തദ്ദേശ സ്വയംഭരണ വകുപ്പ് പ്രിൻസിപ്പൽ സെക്രട്ടറി ടിങ്കു ബിസ്വാൾ പരിചയപ്പെടുത്തി. പാലക്കാട് കോസ്മോപൊളിറ്റൻ ക്ലബ്ബിൽ നടന്ന സെഷനിൽ തദ്ദേശ സ്വയംഭരണ വകുപ്പ് സ്പെഷൽ സെക്രട്ടറി ടി.വി. അനുപമ സ്വാഗതവും പ്രിൻസിപ്പൽ ഡയറക്ടർ ജെറോമിക് ജോർജ് നന്ദിയും പറഞ്ഞു.

പാസ്‌വേഡ് കരിയർ ഗൈഡൻസ് ക്യാമ്പ് തുടങ്ങി

പാലക്കാട്: സംസ്ഥാന ന്യൂനപക്ഷ ക്ഷേമ വകുപ്പിന്‍റെ ആഭിമുഖ്യത്തിൽ ഹയർ സെക്കൻഡറി വിദ്യാർഥികൾക്കായി നടത്തുന്ന പാസ്‌വേഡ് പദ്ധതിയുടെ രണ്ടാംഘട്ടമായ ദ്വിദിന സൗജന്യ വ്യക്തിത്വവികസന ഫ്ലവറിംഗ് സഹവാസ ക്യാമ്പ് ധോണിയിലെ സ്റ്റാർട്ട് അനിമേഷൻ സെന്‍റർ കാമ്പസിൽ തുടങ്ങി. എ. പ്രഭാകരൻ എംഎൽഎ ക്യാമ്പ് ഉദ്ഘാടനം ചെയ്തു. അകത്തേത്തറ പഞ്ചായത്ത് പ്രസിഡന്‍റ് സുനിത അനന്തകൃഷ്ണൻ അധ്യക്ഷത വഹിച്ചു. അനിമേഷൻ സെന്‍റർ എക്‌സിക്യുട്ടീവ് സെക്രട്ടറി ഫാ. സീജോ കാരിക്കാട്ടിൽ, ഡോ.കെ. വാസുദേവൻപിള്ള, വി. രഘുകുമാർ പ്രസംഗിച്ചു. ഡോ. ഡെയ്സൺ പണങ്ങാടൻ, ഡോ. സരിത നമ്പൂതിരി, സി. ശബരീഷ് എന്നിവർ ക്ലാസുകൾ നയിച്ചു.

മങ്കര ഗ്രാമപഞ്ചായത്ത് വികസനസദസ്‌

പാലക്കാട്: സംസ്ഥാന സർക്കാറിന്‍റെ ആഭിമുഖ്യത്തിൽ തദ്ദേശ സ്വയംഭരണ വകുപ്പും ഇൻഫർമേഷൻ പബ്ലിക് റിലേഷൻസ് വകുപ്പും സംയുക്തമായി സംഘടിപ്പിക്കുന്ന വികസന സദസ്‌ മങ്കര ഗ്രാമപഞ്ചായത്തിൽ പാലക്കാട് ബ്ലോക്ക് പഞ്ചായത്ത് പ്രസിഡന്‍റ് വി. സേതുമാധവൻ ഉദ്ഘാടനം ചെയ്തു. വെള്ളറോഡ് പ്രിയദർശിനി ഓഡിറ്റോറിയത്തിൽ നടന്ന പരിപാടിയിൽ ഗ്രാമ പഞ്ചായത്ത് വൈസ് പ്രസിഡന്‍റ് എ. മല്ലിക അധ്യക്ഷയായി. സ്ഥിരംസമിതി അധ്യക്ഷരായ കെ.വി. രാമചന്ദ്രൻ, ഇ.പി. സുരേഷ്, ജില്ലാ പഞ്ചായത്ത് അംഗം അഡ്വ.എം.എച്ച്. സഫ്ദാർ ഷെരീഫ്, ഗ്രാമപഞ്ചായത്ത് അസിസ്റ്റന്‍റ് സെക്രട്ടറി എൻ.കെ. കണ്ണൻ, ജനപ്രതിനിധികൾ, ഹരിതകർമ സേനാംഗങ്ങൾ, ആശവർക്കർമാർ, സാമൂഹ്യ സാംസ്കാരിക പ്രവർത്തകർ, ഉദ്യോഗസ്ഥർ പങ്കെടുത്തു.

സരസിലേക്ക് സമൃദ്ധിയോടെ: തൃത്താല മണ്ഡലത്തിൽ 300 ഏക്കറിൽ പച്ചക്കറികൃഷി

തൃത്താല: ജനുവരി രണ്ടിനു ചാലിശ്ശേരിയിൽ ആരംഭിക്കുന്ന ദേശീയ സരസ്മേളയുടെ ഭാഗമായി തൃത്താല മണ്ഡലത്തിൽ 300 ഏക്കറിൽ പച്ചക്കറി കൃഷി നടത്തും. സരസിലേക്ക് സമൃദ്ധിയോടെ പച്ചക്കറി എന്ന കാന്പയിൻ മണ്ഡലമാകെ വ്യാപിപ്പിക്കും. കുടുംബശ്രീയുടെ നേതൃത്വത്തിൽ 150 ഏക്കർ സ്ഥലത്തും പാടശേഖരസമിതികളുടെ നേതൃത്വത്തിൽ 150 ഏക്കർ സ്ഥലത്തുമായാണ് കൃഷി നടത്തുന്നത്. പച്ചക്കറി കൃഷിയുടെ വിത്തിടൽ മഹോത്സവം 25ന് രാവിലെ പത്തിനു മന്ത്രി എം.ബി. രാജേഷ് വട്ടത്താണി പാടശേഖരത്തിൽ നിർവഹിക്കും. ഈമാസം 31 നുള്ളിൽ 2000 കേന്ദ്രങ്ങളിലായി വിത്തിടൽ ഉത്സവവും നടത്തും. ദേശീയ സരസ് മേളയ്ക്ക് എത്തുന്ന ജനങ്ങൾക്ക് നാടൻ വിഷരഹിത പച്ചക്കറി മിതമായ നിരക്കിൽ ലഭ്യമാക്കുക എന്നതാണ് പച്ചക്കറി കൃഷി നടത്തുന്നതിന്‍റെ ലക്ഷ്യം.

ഷാഫി പറമ്പിലിനെ മർദിച്ച സംഭവം: പലയിടത്തും കോൺഗ്രസ് പ്രകടനം

വടക്കഞ്ചേരി: പേരാമ്പ്രയിൽ ഷാഫി പറമ്പിൽ എംപി ക്കും കോൺഗ്രസ് പ്രവർത്തകർക്കും നേരെയുണ്ടായ പോലീസ് അതിക്രമത്തിൽ പ്രതിഷേധിച്ച് കോൺഗ്രസ് ബ്ലോക്ക് കമ്മറ്റിയുടെ നേതൃത്വത്തിൽ വടക്കഞ്ചേരിയിൽ പ്രതിഷേധ പ്രകടനവും പൊതുയോഗവും നടത്തി. കെപിസിസി അംഗം പാളയം പ്രദീപ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് അഡ്വ.എം. ദിലീപ് അധ്യക്ഷത വഹിച്ചു. ഡോ. അർസലൻ നിസാം, ഇല്യാസ് പടിഞ്ഞാറെക്കളം, കെ. ഉദയൻ, കാരയങ്കാട് ശിവരാമകൃഷ്ണൻ, എം.എൻ. സോമൻ, വി.എച്ച്. ബഷീർ, റെജി കെ. മാത്യു, ബാബുമാധവൻ, വി.എ. മൊയ്തു, വി.എസ്. ഷാജഹാൻ, എൻ. ജയരാജ്, മോഹനൻ കല്ലിങ്കൽപാടം, കെ. മോഹൻദാസ്, ഇഎസ്എം ഹനീഫ പ്രസംഗിച്ചു. കിഴക്കഞ്ചേരി കുണ്ടുകാട് കോൺഗ്രസ്‌ മണ്ഡലം കമ്മിറ്റി നടത്തിയ പ്രതിഷേധ കൂട്ടായ്മ ബ്ലോക്ക് വൈസ് പ്രസിഡന്‍റ് വി.ജെ. ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. ബാബു മാസ്റ്റർ, ഷാനവാസ് പ്രസംഗിച്ചു.

മുതലമട റെയിൽവേ തുരങ്കപാത തകർന്ന് യാത്ര ഭീതിജനകം

മുതലമട: റെയിൽവേ സ്റ്റേഷൻ തുരങ്കപാത റോഡിന്‍റെ ഇരുവശവും തകർന്ന് യാത്രാദുരിതം രക്ഷമായെന്നു യാത്രികർ. കഴിഞ്ഞ ദിവസങ്ങളിലെ മഴയിൽ ടാറിംഗ് പൂർണമായി അടർന്നതാണ് യാത്രാദുരിതം കൂട്ടിയത്. അരക്കിലോമീറ്ററോളം ദൈർഘ്യമുള്ള പാതയിൽ ബസ് ഉൾപ്പെടെ വലിയ വാഹനങ്ങൾക്കു സഞ്ചരിക്കാൻ കഴിയാത്ത സ്ഥിതിയാണുള്ളത്. ഇരുചക്രവാഹനങ്ങൾ നിയന്ത്രണം വിട്ടുമറിഞ്ഞും കാറുകളുടെ അടിഭാഗം മുട്ടിയുമെല്ലാം അപകടം പതിവായിട്ടുണ്ട്. നന്ദിയോട് മുതൽ റെയിൽവേ റിംഗ്റോഡിന്‍റെ വടക്കുഭാഗം വരേയും തെക്കുഭാഗം മുതൽ കാമ്പ്രത്ത്ച്ചള്ള ജംഗ്ഷൻ വരേയും രണ്ടുവർഷം മുൻപ് റോഡ് നവീകരിച്ചിരുന്നു. ഇക്കാരണത്താൽ കൊല്ലങ്കോട്, മീങ്കര, ഗോവിന്ദാപുരം ഭാഗത്തേക്കുള്ള വാഹനങ്ങൾ ഇറോഡിലാണ് എത്തുന്നത്. ചരക്കുലോറികൾ കുഴികളിലിറങ്ങി അപകടത്തിൽപ്പെടുന്നതു പതിവാണ്. സ്ഥലം റെയിൽവേയുടെ അധികാര പരിധിയിൽ എന്നതിനാൽ പട്ടഞ്ചേരി , മുതലമട പഞ്ചായത്തുകൾക്ക് നവീകരണം നടത്താനും കഴിയുകയില്ല. സമീപവാസികളും യാത്രക്കാരും പലതവണ മുതലമട റയിൽവേ അധികാരികൾക്ക് റോഡ് പുനർ നിർമാണത്തിനായ നൽകിയ അപേക്ഷകൾ മാസങ്ങളായി അവഗണിച്ച നിലയിൽ തന്നെയാണ്.

പറമ്പിക്കുളത്ത് കണ്ടെയ്നർ ടോയ്‌ലറ്റ് പൈപ്പുപൊട്ടി മലിനജലം പുറത്തേക്ക്

മുതലമട: വിനോദ സഞ്ചാരികളുടെ സൗകര്യം പരിഗണിച്ച് വനംവകുപ്പ് പറമ്പിക്കുളത്ത് നിർമിച്ച കണ്ടെയ്നർ ടോയ്‌ലറ്റിൽ മലിനജലം ചോർന്ന് അസഹനീയ ദുർഗന്ധം വമിക്കുന്നതു സന്ദർശകർക്കു ദുരിതമായി. സന്ദർശകരുടെ സൗകര്യത്തിനായി പത്തുലക്ഷംരൂപ ചെലവഴിച്ച് വനംവകപ്പ് മാസങ്ങൾക്കുമുൻപാണ് ടോയ്‌ലറ്റ് പ്രവർത്തനക്ഷമമാക്കിയത്. രണ്ടുവശങ്ങളിലായി ടീഷോപ്പും വിശ്രമകേന്ദ്രവുമുണ്ട്. ആരോഗ്യവകുപ്പ് ഉദ്യോഗസ്ഥർ ഇതുവഴിയാണ് സഞ്ചാരമെങ്കിലും കണ്ടമട്ടില്ല.

ദൈവദാൻ സെന്‍ററിൽ കാരുണ്യസ്പർശവുമായി ചെറുപുഷ്പം സ്കൂൾ ഗൈഡ്സ് വിദ്യാർഥിനികൾ

വടക്കഞ്ചേരി: അനാഥരും അശരണരുമായ 200 അമ്മമാരെ സംരക്ഷിക്കുന്ന മംഗലംപാലത്തെ ദൈവദാൻ സെന്‍റർ സന്ദർശിച്ച് ചെറുപുഷ്പം ഗേൾസ് സ്കൂളിലെ എയ്റ്റ്ത്ത് ഗൈഡ് കമ്പനി ഗൈഡ്സ്.വിവിധ ദേശങ്ങളിൽ നിന്നുള്ളവരും വിവിധ ഭാഷക്കാരുമായ അമ്മമാരോടൊപ്പം പാട്ടുപാടിയും വിശേഷങ്ങൾ പങ്കുവച്ചും ഏറെ സമയം ഗൈഡുകൾ സെന്‍ററിൽ ചെലവഴിച്ചു. കുട്ടികൾ സമാഹരിച്ച ഒരുനേരത്തെ പ്രാതലിനുള്ള ഭക്ഷ്യവസ്തുക്കളും സെന്‍ററിൽ നൽകി. ഗൈഡ് ക്യാപ്റ്റൻ പി.എസ്. അന്നമ്മ , കമ്പനി ലീഡർ ശ്രീലേഖ എന്നിവരുടെ നേതൃത്വത്തിലായിരുന്നു സന്ദർശനം.

സന്ദർശകർക്കു കാഴ്ചവിരുന്നായി ആര്യമ്പള്ളം തടയണ വെള്ളച്ചാട്ടം

ചിറ്റൂർ: ചിറ്റൂർപ്പുഴ ആര്യമ്പള്ളം കുടിവെള്ള തടയണ വെള്ളച്ചാട്ടം സന്ദർശകരായെത്തുന്നവർക്ക് കാഴ്ചവിരുന്നാകുന്നു. വേനൽസമയങ്ങളിലും തടയണയിൽ ജലസമൃദ്ധിയുള്ളതിനാൽ തമിഴ്നാട്ടിൽനിന്നുപേലും നിരവധിയാളുകളെത്തുന്നുണ്ട്. തടയണയിലെ തെളിഞ്ഞ വെള്ളത്തിൽ ഇറങ്ങി കുളിച്ചാണ് പലരുടെയും മടക്കം. മൂന്നുമാസം മുൻപ് വിളയോടി നിലമ്പതിപ്പാലത്തിനു സമീപം രണ്ട് കോളജ് വിദ്യാർഥികൾ മുങ്ങിമരിച്ച സംഭവത്തിനുശേഷം ഇവിടേക്ക് നാട്ടുകാർ നിയന്ത്രണം ഏർപ്പെടുത്തിയിരുന്നു. ഇതോടെ കാഴ്ച കാണാനെത്തുന്നവരുടെ എണ്ണം കുറഞ്ഞിട്ടുണ്ട്. നീന്തൽ വശമില്ലാത്തവർ തടയണ മധ്യത്തിലേക്ക് ഇറങ്ങുന്നത് കുളിക്കാനെത്തുന്ന സമീപവാസികൾ വിലക്കാറുണ്ട്. തടയണയുടെ മുകൾഭാഗത്തുനിന്നും വെള്ളച്ചാട്ട ദൃശ്യങ്ങൾ പകർത്താനുള്ള സൗകര്യം ഏർപ്പെടുത്തണമെന്ന ആവശ്യവും ശക്തമാണ്. പ്രാദേശിക വിനോദസഞ്ചാര കേന്ദ്രമായി പ്രദേശത്തെ വികസിപ്പിക്കണമെന്നും ആവശ്യമുയരുന്നുണ്ട്.

കുരുന്നുകൾക്ക് പൾസ് പോളിയോ തുള്ളിമരുന്ന് നൽകി

പാലക്കാട്: ജില്ലയിൽ അഞ്ചുവയസു വരെയുള്ള കുഞ്ഞുങ്ങൾക്കു പൾസ് പോളിയോ തുള്ളിമരുന്ന് നൽകി. ആരോഗ്യ കേന്ദ്രങ്ങൾ, അങ്കണവാടികൾ, സ്കൂളുകൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങി 2157 പോളിയോ ബൂത്തുകൾ വഴിയാണ് പോളിയോ പ്രതിരോധ തുള്ളിമരുന്ന് ലഭ്യമാക്കിയത്. തുള്ളിമരുന്ന് വിതരണത്തിന്‍റെ ജില്ലാതല ഉദ്ഘാടനം കെ. ശാന്തകുമാരി എംഎൽഎ നിർവഹിച്ചു. കോങ്ങാട് സാമൂഹികാരോഗ്യ കേന്ദ്രത്തിൽ സംഘടിപ്പിച്ച പരിപാടിയിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ അധ്യക്ഷത വഹിച്ചു. പാലക്കാട് ബ്ലോക്ക് പഞ്ചായത്ത് പ്രസിഡന്‍റ് വി. സേതുമാധവൻ മുഖ്യാതിഥിയായി പങ്കെടുത്തു. ജില്ലാ ആർസിഎച്ച് ഓഫീസർ എ.കെ. അനിത വിഷയാവതരണം നടത്തി. കോങ്ങാട് ഗ്രാമപഞ്ചായത്ത് പ്രസിഡന്‍റ് ടി. അജിത്ത്, ജില്ലാ പഞ്ചായത്ത് മെംബർ എ. പ്രശാന്ത്, ബ്ലോക്ക് പഞ്ചായത്ത് മെംബർമാരായ എം. നസീർ, ബി. നന്ദിനി, കോങ്ങാട് ഗ്രാമപഞ്ചായത്ത് മെംബർമാരായ അബ്ദുൾ സലീം, കെ.ടി. ശശിധരൻ, പബ്ലിക് ഹെൽത്ത് അഡീഷണൽ ഡിഎച്ച്എസ് കെ.പി. റീത്ത എന്നിവർ പ്രസംഗിച്ചു. മറ്റു ജനപ്രതിനിധികൾ, ആരോഗ്യവകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു. പോളിയോ സബ് നാഷണൽ ഇമ്യൂണൈസേഷൻ ദിനാചരണത്തിന്‍റെ ഭാഗമായാണ് പോളിയോ തുള്ളി മരുന്ന് വിതരണം ചെയ്തത്.

മണ്ണാർക്കാട് യൂണിവേഴ്സൽ കോളജിനു പുതിയ ഭരണസമിതി

മണ്ണാർക്കാട്: മണ്ണാർക്കാട് യൂണിവേഴ്സൽ കോളജിൽ പുതിയ ഭരണസമിതി ചുമതലയേറ്റു. എസ്.ആർ. ഹബീബുള്ളയാണ് ചെയർമാൻ. മുൻ എംഎൽഎ പി.കെ. ശശി ചെയർമാനായിരുന്ന ഭരണസമിതിയുടെ കാലാവധി തീർന്നതിനെ തുടർന്നാണ് പുതിയ ഭരണസമിതി ചുമതലയേറ്റത്. എതിരില്ലാതെയാണ് തെരഞ്ഞെടുപ്പ് നടന്നത്. സിപിഎം അനുമതിയില്ലാതെ യൂണിവേഴ്സൽ കോളജിനു വേണ്ടി പി.കെ. ശശി സഹകരണ ബാങ്കുകളിൽനിന്ന് ഷെയർ വാങ്ങി എന്ന ആരോപണം ഉൾപ്പെടെ വൻ വിവാദമായിരുന്നു. പി.കെ. ശശിക്കെതിരെ ഉയർന്ന ആരോപണങ്ങളിൽ യൂണിവേഴ്സൽ കോളജുമായി ബന്ധപ്പെട്ട ആരോപണങ്ങളും ഉയർന്നിരുന്നു. ഭരണസമിതിയുടെ കാലാവധി തീർന്നതിനെ തുടർന്ന് അഡ്മിനിസ്ട്രേറ്ററെ നിയമിക്കുകയും തെരഞ്ഞെടുപ്പ് പ്രഖ്യാപിക്കുകയും ചെയ്തു. അഡ്മിനിസ്ട്രേറ്ററുടെ നേതൃത്വത്തിൽ തയാറാക്കിയ വോട്ടർ പട്ടികയിൽ ക്രമക്കേടുണ്ടെന്നും തെരഞ്ഞെടുപ്പ് മാറ്റിവയ്ക്കണമെന്നും ആവശ്യപ്പെട്ട് പി.കെ. ശശി ഹൈക്കോടതിയിൽ ഹർജി നൽകിയിരുന്നു. എന്നാൽ കോളജിന്‍റെ പ്രവർത്തന പരിധിക്ക് പുറത്തു താമസിക്കുന്ന ശശിക്ക് അംഗത്വത്തിന് അർഹതയില്ലെന്നായിരുന്നു കോളജിന്‍റെ മറുവാദം. ഇരുവിഭാഗത്തിന്‍റെയും വാദംകേട്ട കോടതി പി.കെ. ശശിയുടെ ഹർജി തള്ളുകയായിരുന്നു. ഇതോടെയാണ് തെരഞ്ഞെടുപ്പിന് വഴി തെളിഞ്ഞത്. സിപിഎം പാനൽ എതിരില്ലാതെ തെരഞ്ഞെടുക്കപ്പെട്ടു. വൈസ് ചെയർപേഴ്സനായി സീതാലക്ഷ്മിയെ തെരഞ്ഞെടുത്തു. ഡയറക്ടർമാരായി കെ. റിയാസുദ്ദീൻ, എം. വിനോദ് കുമാർ, എം. ജിനേഷ്, പി. ഷാജി, പി.പി.കെ മുഹമ്മദ് അബ്ദു റഹ്്മാൻ, പി.കെ. മോഹൻദാസ്, എം. മനോജ്, സി.കെ. ജയശ്രീ, എ.ദിൽന എന്നിവരെയും തെരഞ്ഞെടുത്തു.

അതിദരിദ്രരില്ലാത്ത നഗരസഭയായി മണ്ണാർക്കാട്

മണ്ണാർക്കാട്: അതിദരിദ്രരില്ലാത്ത നഗരസഭയായി മണ്ണാർക്കാട് നഗരസഭയെ പ്രഖ്യാപിച്ചു. നഗരസഭാ ചെയർമാൻ സി. മുഹമ്മദ് ബഷീർ പ്രഖ്യാപനം നടത്തി. മണ്ണാർക്കാട് നഗരസഭാ പരിധിയിലെ അതിദരിദ്ര ഗുണഭോക്താക്കളിൽ സ്ഥലവും വീടുമില്ലാത്ത ഒമ്പത് ഗുണഭോക്താക്കൾക്ക് മൂന്നുസെന്‍റ് ഭൂമി വാങ്ങുന്നതിനും ലൈഫ് പദ്ധതി പ്രകാരം വീടുവയ്ക്കുന്നതിനും തുക കൈമാറി. സംസ്ഥാനത്തെ ഏറ്റവും കൂടുതൽ ആളുകൾക്ക് വസ്തു വാങ്ങിയതിനുള്ള ധനസഹായം നൽകിയത് മണ്ണാർക്കാട് നഗരസഭയാണെന്നു പ്രഖ്യാപന ചടങ്ങിൽ നഗരസഭാ ചെയർമാൻ പറഞ്ഞു. നഗരസഭ വാങ്ങി നൽകിയ സ്ഥലത്തിന്‍റെ ആധാരം ഗുണഭോക്താക്കൾക്ക് കൈമാറി. നഗരസഭാ വൈസ് ചെയർപേഴ്സൺ പ്രസീത, സ്ഥിരം സമിതി അധ്യക്ഷരായ ബാലകൃഷ്ണൻ, മാസിത സത്താർ, വത്സലകുമാരി, ഹംസ കുറുവണ്ണ, നഗരസഭ കൗൺസിലർമാരായ യൂസഫ് ഹാജി, മുജീബ് ചോലോത്ത്, അരുൺകുമാർ പാലക്കുറുശ്ശി, ടി.ആർ. സെബാസ്റ്റ്യൻ, അമുദ, ഷറഫുന്നിസ, സുഹറ, സിന്ധു, സൗദാമിനി, ഉഷ, കയറുന്നിസ, രാധാകൃഷ്ണൻ, ഹസീന, ലക്ഷ്മി, നഗരസഭ സെക്രട്ടറി സതീഷ് കുമാർ, ഹെൽത്ത് ഇൻസ്പെക്ടർ ഡി.ആർ. ബിജു, പദ്ധതി പ്രോജക്ട് ഓഫീസർ ബീന തുടങ്ങിയവർ പങ്കെടുത്തു.

സംഭരിക്കാൻ ഇടമില്ലാതെ വെള്ളം പുഴയിലേക്ക്

മംഗലംഡാം: മംഗലംഡാം റിസർവോയർ മണ്ണുനിറഞ്ഞു നികന്നു. മലകളിൽ നിന്നും കാട്ടിൽനിന്നും റിസർവോയറിലേക്ക് ഒഴുകിയെത്തുന്ന വെള്ളത്തിന്‍റെ പകുതിപോലും സംഭരിക്കാൻ ഇടമില്ലാതെ വെള്ളം പുഴയിലേക്കൊഴുക്കി പാഴാക്കുന്നു. മംഗലം പുഴയിൽ തടയണകളെല്ലാം തകർന്നു കിടക്കുന്നതിനാൽ പുഴയിലേക്ക് ഒഴുക്കുന്ന വെള്ളം എവിടെയും നിൽക്കാതെ ഭാരതപ്പുഴയിലേക്ക്. കാലവർഷത്തിൽ മംഗലംഡാമിന്‍റെ ഷട്ടറുകൾ തുറന്ന് പുഴയിലേക്കൊഴുക്കുന്നത് ഒരുഡാം നിറയാനുള്ളത്ര വെള്ളമാണെന്നാണ് വിലയിരുത്തൽ. ഈ വർഷം ജൂൺ16ന് തന്നെ ഡാമിന്‍റെ മുഴുവൻ ഷട്ടറുകളും തുറന്നു. നാലുമാസത്തോളമായി ഷട്ടറുകൾ തുറന്നു തന്നെയാണ്. ഇപ്പോൾ ഒന്നും ആറും ഷട്ടറുകൾ തുറന്നിരിപ്പാണ്. മിക്കവാറും വർഷങ്ങളിലും ജൂലൈ ആദ്യത്തിലും പകുതിയോടെയും ഷട്ടറുകൾ തുറക്കാറുണ്ട്. ഇങ്ങനെയൊക്കെ ജലസമൃദ്ധിയുണ്ടെങ്കിലും നല്ല വേനലുണ്ടായാൽ മംഗലംഡാം വരണ്ടുണങ്ങും. മേയ് മാസം അവസാനത്തിലും ജൂൺ ആദ്യത്തിലുമൊക്കെയായി കനത്ത കുറച്ചു മഴ ലഭിച്ചാൽ മതി ഡാം നിറയും. പിന്നെ നാലഞ്ചുമാസങ്ങൾ ഷട്ടറുകൾ തുറന്നുവയ്ക്കണം. അതല്ലാതെ മറ്റു വഴികളില്ല. വൃഷ്ടി പ്രദേശത്ത് ഏറ്റവും കൂടുതൽ മഴ ലഭിക്കുന്ന ഡാമുകളിൽ ഒന്നായ മംഗലംഡാമിൽ അധികജലം സംഭരിക്കുന്നതിന് നടപടികളില്ലാത്തത് ഇപ്പോഴും വലിയ പോരായ്മയായി നില നിൽക്കുകയാണ്. പാഴാക്കുന്ന വെള്ളം പുഴയിൽ തടഞ്ഞു നിർത്താൻ മൂന്നോ നാലോ കിലോമീറ്റർ ഇടവിട്ട് ചെക്ക് ഡാമുകൾ കെട്ടി കുറെ വെള്ളം വേനലിലേക്കായി സഭരിക്കാൻ കഴിയും. എന്നാൽ ബന്ധപ്പെട്ട വകുപ്പുകളൊന്നും കർഷകരുടെ രക്ഷക്ക് ഉതകുന്ന നടപടികളിലേക്കില്ല. 2018 ലും 2019ലും അതിവർഷവും തുടർന്നുള്ള പ്രളയവുമുണ്ടായപ്പോൾ ഡാമിന്‍റെ വൃഷ്ടിപ്രദേശങ്ങളായ മലകളിലും വ്യാപകമായി ഉരുൾപൊട്ടലുകളുണ്ടായി. അവിടെനിന്നെല്ലാം മണ്ണും മണലും പാറകളും മരങ്ങളുമെല്ലാം ഡാമിൽ അടിഞ്ഞുകൂടി. ഇത് ഡാമിന്‍റെ സംഭരണശേഷി 2015ലെ പരിശോധനാ റിപ്പോർട്ടിനേക്കാൾ വീണ്ടും കുറച്ചു. 2020 ഡിസംബർ 17നാണ് ഡാമിൽ അടിഞ്ഞുകൂടിയിട്ടുള്ള മണ്ണും മണലും നീക്കം ചെയ്യുന്നതിനുള്ള പ്രവൃത്തി തുടങ്ങിയത്. തുടക്കം നന്നായെങ്കിലും പിന്നീടിതു നിലച്ചു. ഇതു മൂലം ഡാം ജല ഉറവിടമാക്കി നടപ്പാക്കാൻ ലക്ഷ്യംവച്ച കുടിവെള്ള പദ്ധതിയും മുടങ്ങിക്കിടക്കുകയാണ്.

അവഗണന അവസാനിപ്പിക്കണം: പെൻഷനേഴ്സ് അസോസിയേഷൻ

വടക്കഞ്ചേരി: പെൻഷൻകാരോടുള്ള അവഗണന അവസാനിപ്പിക്കണമെന്ന് കെഎസ്എസ്പിഎ വടക്കഞ്ചേരി മണ്ഡലം കമ്മിറ്റി. സംസ്ഥാന സമിതി അംഗം എ. ഗോപിനാഥൻ ഉദ്ഘാടനം ചെയ്തു. യൂണിറ്റ് പ്രസിഡന്‍റ് പ്രസാദ് വർക്കി അധ്യക്ഷത വഹിച്ചു. ജില്ലാകമ്മിറ്റി അംഗം കെ. അശോകൻ മുഖ്യപ്രഭാഷണം നടത്തി. ജില്ലാകമ്മിറ്റി അംഗം ഇഎസ്എം ഹനീഫ, നിയോജക മണ്ഡലം പ്രസിഡന്‍റ് പി. കേശവദാസ്, സെക്രട്ടറി എ.എസ്. സാബു, കെ. വേലുണ്ണി, നിയോജക മണ്ഡലം ചെയർമാൻ ആനിയമ്മ ജോസഫ്, ജെയ്സൺ എം. ജേക്കബ് പ്രസംഗിച്ചു. ഭാരവാഹികളായി എം.പി. ശശികല - പ്രസിഡന്‍റ്, കുമാരി ടീച്ചർ - വൈസ് പ്രസിഡന്‍റ്, ജെയ്സൺ എം. ജേക്കബ് - സെക്രട്ടറി, വാക്കുട്ടി - ജോയിന്‍റ് സെകട്ടറി, വി. രവീന്ദ്രൻ - ട്രഷറർ എന്നിവരെ തെരഞ്ഞെടുത്തു.

പുതുനഗരം സിഗ്നൽറോഡിൽ വാഹന പാർക്കിംഗ് തടയണമെന്ന് ആവശ്യം

പുതുനഗരം: ഹൈസ്കൂൾ റോഡിൽ സിഗ്നലിനു സമീപം വാഹനസഞ്ചാര തടസമായി വണ്ടികൾ ദീർഘനേരം നിർത്തിയിടുന്നവർക്കെതിരെ പോലീസ് നടപടി വേണമെന്ന് യാത്രക്കാർ. സിഗ്നൽ കഴിഞ്ഞ് കരിപ്പോട് ഭാഗത്തേക്കുള്ള വാഹനങ്ങളാണ് അനധികൃത പാർക്കിംഗ് കാരണം വഴിയിലകപ്പെടുന്നത്. ഇതു കാരണം സമയം വൈകി ഓടുന്നതുമൂലം ബസ് ജീവനക്കാർ തമ്മിൽ സമയത്തെചൊല്ലി തർക്കമുണ്ടാവാറുമുണ്ട്. വാഹനങ്ങൾ റോഡിൽ നിർത്തി പിന്നീട് ദീർഘനേരം കഴിഞ്ഞാണ് വാഹനം മാറ്റിയിടാൻ വരുന്നത്. ഈ സമയത്ത് സിഗ്നൽ കഴിഞ്ഞുവരുന്ന വാഹനങ്ങൾ മുന്നോട്ട് പോവാനാതെ ചിലപ്പോൾ നാൽക്കവല റോഡ് ഗതാഗതകുരുക്കിൽ അകപ്പെടുകയും വാഹനങ്ങൾ ഹോൺ മുഴക്കി ബഹളമുണ്ടാക്കുകയും ചെയ്യാറുണ്ട്. ഈ സ്ഥലത്ത് റോഡിനു വീതി കുറവാണെന്നതിനാൽ ഇരുചക്ര വാഹനം നിർത്തിയാൽപോലും കുരുക്ക് മുറുകുന്ന അവസ്ഥയുണ്ട്. രാവിലെ 8.30 മുതൽ 11 വരെയും വൈകുന്നേരം 3.30 മുതൽ 6.30 വരെയും വാഹനഗതാഗതം കൂടുതലുണ്ടാവാറുണ്ട്. രോഗികളുമായി വരുന്ന ആംബുലൻസ്പോലും കുരുക്കിൽ അകപ്പെടുന്നതായും ആരോപണമുണ്ട്.

ആധുനിക കൃഷിരീതിയും ശാസ്ത്രസാങ്കേതികവിദ്യയും ഏകോപിപ്പിക്കണം: മന്ത്രി പി. പ്രസാദ്

ആലത്തൂർ: ആധുനിക കൃഷിരീതിയും ശാസ്ത്രസാങ്കേതികവിദ്യയും ഏകോപിപ്പിച്ച് കാർഷിക മേഖലയെ മെച്ചപ്പെടുത്താനുള്ള ശ്രമങ്ങളാണ് ഓരോ പദ്ധതികളുമെന്ന് കൃഷിമന്ത്രി പി. പ്രസാദ് പറഞ്ഞു. സംസ്ഥാനങ്ങളിലെ കാർഷികോത്പാദനം പ്രോത്സാഹിപ്പിക്കുന്നതിന് കേന്ദ്രസർക്കാർ നടപ്പാക്കുന്ന പ്രധാനമന്ത്രി ധൻ-ധാന്യ കൃഷി യോജന പദ്ധതിയുടെ സംസ്ഥാനതല ഉദ്ഘാടനം നിർവഹിക്കുകയായിരുന്നു മന്ത്രി. കേരളത്തിൽ കോഴിക്കോട്, കണ്ണൂർ, കാസർഗോഡ് ജില്ലകളിലാണ് പ്രാരംഭമായി പദ്ധതി നടപ്പിലാക്കുന്നത്. നെല്ല് സംഭരിച്ചാൽ ഉടൻ പണം കൊടുക്കാൻ പറ്റുന്ന തരത്തിലേക്ക് കേരള ബാങ്ക് അടക്കമുള്ള സർക്കാർ നിയന്ത്രണത്തിലുള്ള ബാങ്കുകളെ കൂടി ഈ രംഗത്തേക്ക് ബന്ധപ്പെടുത്താനാണ് ശ്രമിക്കുന്നത്. കർഷകരിൽ നിന്ന് നെല്ല് എടുത്ത് സിവിൽ സപ്ലൈസ് അരിയാക്കി റേഷൻകടകളിൽ എത്തിച്ച് ജനങ്ങൾ അരി വാങ്ങി ഭക്ഷണം കഴിച്ച കണക്ക് കേന്ദ്രത്തിൽ കൊടുത്തുകഴിയുമ്പോഴാണ് കേരളത്തിന് നെല്ലിന്‍റെ പൈസക്ക് അപേക്ഷിക്കാൻ കഴിയുക എന്നതാണ് നിലവിലെ കേന്ദ്ര വ്യവസ്ഥ .ഈ കാലതാമസമാണ് കർഷകർക്ക് നെല്ലിന്‍റെ വില ലഭ്യമാക്കാനും താമസം നേരിടുന്നതെന്നും ഇതിൽ മാറ്റം വേണമെന്നും ഏത് പദ്ധതി കൊണ്ടും ഉദ്ദേശിക്കുന്നത് കാർഷിക മേഖലയിലെ മെച്ചപ്പെട്ട വരുമാനമാണെന്നും മന്ത്രി പറഞ്ഞു.കെ.ഡി. പ്രസേനൻ എംഎൽ എ അധ്യക്ഷത വഹിച്ചു.

ശബരിമല സ്വർണക്കവർച്ച; കോൺഗ്രസ് പ്രതിഷേധജ്വാല

വടക്കഞ്ചേരി: കോൺഗ്രസ് കമ്മറ്റി സംഘടിപ്പിച്ച പ്രതിഷേധ ജ്വാല ഡിസിസി സെക്രട്ടറി ഡോ. അർസലൻ നിസാം ഉദ്‌ലാടനം ചെയ്തു. മണ്ഡലം പ്രസിഡന്‍റ് ഇല്യാസ് പടിഞ്ഞാറെക്കളം അധ്യക്ഷത വഹിച്ചു. ബാബു മാധവൻ, ജി. സതീഷ് കുമാർ, വി.എച്ച്. ബഷീർ, എ. ഭാസ്കരൻ,ജോണി ഡയൻ, ശ്രീനാഥ് വെട്ടത്ത്, സി.കെ. ദേവദാസ്, കെ. സുരേഷ്, ബി. സുരേഷ്, സുനിൽ ചുവട്ടുപാടം, പി.എസ്. മുജീബ്, സി.പി. രാജൻ, വി.എ. ബെന്നി, എൻ സോമൻ പ്രസംഗിച്ചു. പുതുക്കോട് മണ്ഡലം കമ്മിറ്റി പ്രതിഷേധ ജ്വാല സംഘടിപ്പിച്ചു. ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മണ്ഡലം പ്രസിഡന്‍റ് കെ. ഉദയൻ അധ്യക്ഷത വഹിച്ചു. സി.എം. അബ്ദുൾറഹ്മാൻ, ഇഎസ്എം ഹനീഫ, ടി.എച്ച്. സാദിക് , വി.എം. വഹാബ്, ആർ. ഭാഗ്യലക്ഷ്മി, പി.എം. ഹാരിഷ് പ്രസംഗിച്ചു. കിഴക്കഞ്ചേരിയിൽ കുണ്ടുകാട് നടന്ന പ്രതിഷേധ ജ്വാലയിൽ മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. വി.ജെ. ജോസഫ്, ബാബു പോൾ, ടി.കെ.ഷാനവാസ്, സുനിൽ എം. പോൾ. പി.പി. പത്മനാഭൻ, അരുൺ മാണിക്കത്ത്, സണ്ണി മണ്ടകത്ത്, ഷാജു ആന്‍റണി പ്രസംഗിച്ചു.

തത്തമംഗലം വാട്ടർടാങ്കിലെ തേനീച്ചക്കൂടുകൾ നീക്കണം

ചിറ്റൂർ: തത്തമംഗലം വാട്ടർടാങ്കിൽ കാണപ്പെടുന്ന തേനീച്ചകളും കൂടും നീക്കംചെയ്യണമെന്ന് സമീപവാസികൾ. ഇടയ്ക്കിടെ കൂടിളകി തേനീച്ച ആക്രമണങ്ങളിൽ അപകടം കൂടിവരുന്നത് സമീപവാസികളെ ആശങ്കപ്പെടുത്തുകയാണ്. തത്തമംഗലം കൺവൻഷൻ സെന്‍ററിനു സമീപത്താണ് വാട്ടർ ടാങ്കും തേനീച്ചകൂടും ഉള്ളത്. കാക്കയോ മറ്റു പറവകളൊ കൊത്തിയാൽ തേനീച്ചകൾ അക്രമാസക്തമാവുന്നതും നാട്ടുകാരെ ഭയപ്പെടുത്തുകയാണ്. നൂറുകണക്കിനാളുകൾ ഒത്തുചേരുന്ന കൺവൻഷൻ സെന്‍ററിലെത്തുന്നവർക്കും തേനീച്ചകൂട് അപകടഭീഷണി ഉയർത്തുന്നുണ്ട്. നിരവധി കുടുംബങ്ങളും ഇവിടെ അടുത്ത് താമസക്കാരായുണ്ട്.

കൃഷിഭവനു സമീപം ചാക്കുകെട്ടുകൾ കുന്നുകൂടി; നാട്ടുകാർക്കു ദുരിതം

കൊടുവായൂർ: പുതുനഗരം കൃഷിഭവൻ, മൃഗാശുപത്രിക്കു മുന്നിൽ കുന്നുപോലെ കൂട്ടിയിരിക്കുന്ന ഹരിതകർമസേനയുടെ ചാക്കുകെട്ടുകൾ മാറ്റിയിടണമെന്ന് നാട്ടുകാർ. ഇതുമൂലം കൃഷിഭവനിൽ പ്രവേശിക്കാൻ ഏറെ വിഷമകരമാവുന്നു. സമീപത്തുതന്നെയുള്ള മൃഗാശുപത്രിയുടെ കാര്യവും പരിതാപകരമാണ്. സ്ഥലത്ത് പഞ്ചായത്ത് കമ്യൂണിറ്റി ഹാളിലേക്ക് പോവുന്നതും ഇതു വഴിയാണ്. ചാക്കുകെട്ടുകൾ സുരക്ഷിതമായ സ്ഥലത്തേക്ക് മാറ്റിയിടണമെന്ന് പഞ്ചായത്തതികൃതർക്ക് മുൻപ് പരാതി നൽകിയിട്ടും നടപടി ഉണ്ടാവുന്നില്ലെന്ന ആരോപണവും നിലവിലുണ്ട്.

എക്സൈസ് വകുപ്പിനെ ആധുനികവത്കരിക്കാൻ സർക്കാർ ശ്രമം: മന്ത്രി എം.ബി. രാജേഷ്

പാലക്കാട്: എക്സൈസ് വകുപ്പിനെ ആധുനികവത്കരിച്ച് കൂടുതൽ ജനകീയമാക്കുന്നതിനാണ് സർക്കാർ ശ്രമം നടത്തുന്നതെന്ന് എക്സൈസ് വകുപ്പ് മന്ത്രി എം.ബി. രാജേഷ്. എക്സൈസ് വകുപ്പിന്‍റെ ഭാവി വികസനലക്ഷ്യങ്ങൾ ചർച്ച ചെയ്യുന്നതിനായി സംഘടിപ്പിക്കുന്ന സംസ്ഥാനതല സെമിനാറിന്‍റെ സംഘാടകസമിതി രൂപീകരണയോഗം ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. വുമണ്‍ എക്സൈസ് ഓഫീസർമാരുടെ തസ്തികകൾ ഉൾപ്പെടെ നിരവധി തസ്തികകൾ സൃഷ്ടിക്കാൻ ഈ സർക്കാരിന് സാധിച്ചെന്നും, വകുപ്പിന്‍റെ അംഗബലം വർധിപ്പിക്കാനാണ് സർക്കാർ തീരുമാനമെന്നും മന്ത്രി സൂചിപ്പിച്ചു. കുറ്റവാളികളെ കണ്ടെത്തി ശിക്ഷിക്കുന്നതിനു പുറമേ ഇരകളായവരെ കൗണ്‍സിലിംഗിലൂടെയും മറ്റു മാർഗങ്ങളിലൂടെയും മോചിപ്പിക്കുന്നതിനും പ്രതിരോധം സൃഷ്ടിക്കുന്നതിനും വകുപ്പ് നിരവധി പ്രവർത്തനങ്ങൾ നടപ്പിലാക്കി വരുന്നുണ്ടെന്ന് മന്ത്രി പറഞ്ഞു. കളക്ടറേറ്റ് കോണ്‍ഫറൻസ് ഹാളിൽ നടന്ന പരിപാടിയിൽ എക്സൈസ് കമ്മീഷണർ എം.ആർ. അജിത്കുമാർ അധ്യക്ഷത വഹിച്ചു. ജില്ലാ കളക്ടർ എം.എസ്. മാധവിക്കുട്ടി, അഡീഷണൽ എക്സൈസ് കമ്മീഷണർ എസ്. ദേവമനോഹർ, എക്സൈസ് ഇൻസ്പെക്ടർ കെ.ആർ. അജിത്ത്, മധ്യമേഖല ജോയിന്‍റ് എക്സൈസ് കമ്മീഷണർ എസ്. കൃഷ്ണകുമാർ എന്നിവർ പ്രസംഗിച്ചു.

കുഞ്ചൻനമ്പ്യാർ സ്മാരക നവീകരണത്തിന് 39 ലക്ഷം അനുവദിച്ചു

ഒറ്റപ്പാലം: കുഞ്ചൻനമ്പ്യാർ സ്മാരക നവീകരണത്തിന് 39,20,000 രൂപ ധനകാര്യവകുപ്പ് അനുവദിച്ചു. കാലപ്പഴക്കം മൂലം ബലക്ഷയം ബാധിച്ച കലക്കത്ത് ഭവനത്തിന്‍റെ നവീകരണത്തിനാണ് അവസാനം ധനകാര്യ വകുപ്പിന്‍റെ കരുണയുണ്ടായത്. തുള്ളൽകലയുടെ ഇതിഹാസം ജനിച്ച പാലക്കാട് കിള്ളിക്കുറുശിമംഗലത്തെ കലക്കത്ത് ഭവനത്തിന്‍റെ തനിമ നിലനിർത്തിയുള്ള നവീകരണത്തിനാണ് തുക പൂർണമായും വിനിയോഗിക്കുക. 1700- 1770 കാലഘട്ടത്തിൽ ജീവിച്ച മഹാകവിയുടെ ജന്മഗൃഹം അച്യുതമേനോൻ സർക്കാരിന്‍റെ കാലഘട്ടത്തിലാണ് കലക്കത്ത് കുടുംബത്തിൽ നിന്ന് ഏറ്റെടുത്ത് സംരക്ഷിച്ചുവരുന്നത്. നൂറ്റാണ്ടുകൾ പഴക്കമുള്ള കവി ഗൃഹം സർക്കാർ ഏറ്റെടുക്കുന്നത് പടിപ്പുര തകർന്ന് നിലം പൊത്തുമെന്ന അവസ്ഥയിലായിരുന്നു. തുടർന്ന് അതാതുകാലഘട്ടത്തിൽ അറ്റകുറ്റപ്പണികൾ നടത്തി സംരക്ഷിച്ചു പോന്നു. കേരള സർക്കാർ സാംസ്കാരിക വകുപ്പ് നിയോഗിക്കുന്ന ഭരണസമിതി 1997-98 കാലഘട്ടങ്ങളിലാണ് ബലക്ഷയങ്ങൾ പരിഹരിച്ച് അക്കാലത്ത് നവീകരിച്ചിരുന്നത്. ഇതിനുശേഷം വന്ന ഭരണസമിതികൾ ഓടുപുര മേഞ്ഞ മൺചുമരോട് കൂടിയ വീടിന്‍റെ അറ്റകുറ്റപണികളും നടത്തിവന്നു. അറ്റകുറ്റപണി കൊണ്ട് മാത്രം കഴിയാത്ത വിധത്തിൽ അടുത്തിടെ മേൽക്കൂര തകരുന്ന അവസ്ഥയും കാലപഴക്കം കൊണ്ട് മൺചുമർ അടർന്ന് വിള്ളൽ വരുന്ന സ്ഥിതി വിശേഷവും ഉണ്ടായി.കഴിഞ്ഞ നാല് മാസത്തിലേറെയായി കവിഗൃഹത്തിനുള്ളിലേയ്ക്ക് സന്ദർശകരുടെ സുരക്ഷ കണക്കിലെടുത്ത് പ്രവേശനം നിർത്തിവെക്കുന്ന സ്ഥിതിയും ഉണ്ടായി. സ്പെഷൽ ഗ്രാന്‍റിന്‍റെ അപര്യാപ്തത മൂലം ജീവനക്കാർക്കും താത്കാലിക അധ്യാപകർക്കും ശമ്പളകുടിശികയും ഉണ്ടായതും ഏറെക്കുറെ പരിഹരിച്ചുകഴിഞ്ഞു. അടുത്തായി തന്നെ നവീകരണ പ്രവർത്തനങ്ങൾ നടത്താനാകും എന്ന് സർക്കാർ വകുപ്പുകൾ അറിയിച്ചു. കെ. പ്രേംകുമാർ എംഎൽഎ, ലക്കിടി പേരൂർ പഞ്ചായത്ത് പ്രസിഡന്‍റ് കെ. സുരേഷ്, സ്മാരകം ചെയർമാർ ജയദേവൻ, സെക്രട്ടറി എൻ. നാരായണൻ നമ്പൂതിരി, തുള്ളൽ കലാകാരനായ കുഞ്ചൻ സ്മാരകം രാജേഷ് എന്നിവർ അടക്കമുള്ള ഭരണസമിതി അംഗങ്ങളുടെ കൂട്ടായ പരിശ്രമമാണ് നവീകരണത്തിന് തുക അനുവദിച്ചതിനു സഹായകരമായത്.

ഇരുചക്രവാഹനത്തിലെത്തി സ്ത്രീകളുടെ മാലപൊട്ടിച്ച് മോഷണം

കോയമ്പത്തൂർ: കോയമ്പത്തൂരിൽ ആഭരണ മോഷണസംഭവങ്ങൾ വർധിക്കുന്നു. പൊള്ളാച്ചിക്ക് സമീപം ഒരു മണിക്കൂറിനുള്ളിൽ പട്ടാപ്പകൽ രണ്ട് സ്ത്രീകളിൽനിന്ന് ആഭരണങ്ങൾ മോഷ്ടിക്കപ്പെട്ട സംഭവം പൊതുജനങ്ങൾക്കിടയിൽ ഭീതി ജനിപ്പിച്ചു. ദേശീയപാതയിൽ ഇരുചക്രവാഹനത്തിലെത്തിയ രണ്ട് പുരുഷന്മാർ രണ്ട് സ്ത്രീകളിൽനിന്ന് ആഭരണങ്ങൾ തട്ടിയെടുക്കുകയായിരുന്നു. ഇന്നലെ രാവിലെ 10.30 ക്ക് ആയിരുന്നു ആദ്യസംഭവം. കുളത്തുപുതൂരിന് സമീപം ഭുവനേശ്വരി (30) എന്ന സ്ത്രീ നടന്നുപോകുന്നതിനിടെ ഇരുചക്രവാഹനത്തിലെത്തിയ രണ്ടുപേർ ഭുവനേശ്വരിയുടെ കഴുത്തിൽ ധരിച്ചിരുന്ന മാല തട്ടിയെടുത്ത് മിന്നൽവേഗത്തിൽ കടന്നുകളഞ്ഞു. മീനാക്ഷിപുരം റോഡിലെ കെടികെ മിൽ പ്രദേശത്ത് മൊബൈൽഫോണിൽ സംസാരിച്ചുകൊണ്ട് നടക്കുകയായിരുന്ന മുത്തുലക്ഷ്മി എന്ന സ്ത്രീയുടെ കഴുത്തിൽനിന്ന് മാലപൊട്ടിച്ചതാണ് രണ്ടാമത്തെ സംഭവം. രണ്ടു സ്ത്രീകളുടേയും ആഭരണം സ്വർണം പൂശിയതായിരുന്നതിനാൽ ധനനഷ്ടം ഉണ്ടായില്ല. രണ്ട് സ്ത്രീകളും പരിക്കേൽക്കാതെ രക്ഷപ്പെട്ടു. സംഭവത്തിൽ ആനമല പോലീസ് അന്വേഷണം തുടരുകയാണ്. പ്രതികളെ കണ്ടെത്താൻ നാലംഗ പ്രത്യേക സംഘം രൂപീകരിച്ചിട്ടുണ്ട്. സംഭവത്തിന്‍റെ സിസി ടിവി ദൃശ്യങ്ങൾ സോഷ്യൽ മീഡിയയിൽ വൈറലായിട്ടുണ്ട്.

പ്രകൃതി നെൽകൃഷിയുടെ വിളവെടുപ്പ് മന്ത്രി പി. പ്രസാദ് നിർവഹിച്ചു

ആലത്തൂർ: കാലാവസ്ഥാ മാറ്റത്തെ അതിജീവിച്ച് കീടരോഗ ആക്രമണങ്ങൾ തീരെ ബാധിക്കാതെയും വിളവിൽ കുറവ് വരാതെയും പരീക്ഷണാടിസ്ഥാനത്തിൽ പ്രകൃതികൃഷി രീതിയിൽ കൃഷിയിറക്കിയ ആലത്തൂർ സീഡ് ഫാമിലെ നെൽകൃഷിയുടെ വിളവെടുപ്പ് ഉദ്ഘാടനം കൃഷിമന്ത്രി പി. പ്രസാദ് നിർവഹിച്ചു. കനത്തമഴയിലും തുടർന്നുണ്ടായ കനത്ത ചൂടിലും നിരവധി രോഗകീടങ്ങൾ, ബാക്റ്റീരിയകൾ, ഓലകരിച്ചിൽ രോഗം, പോളചീയൽ രോഗം, ഇലപ്പേൻ, മുഞ്ഞ, ഓലചുരുട്ടിപുഴു, തണ്ടുതുരപ്പൻപുഴു എന്നിവയുടെ ആക്രമണം വളരെ രൂക്ഷമായിരുന്നു. എന്നാൽ സീഡ് ഫാമിലെ പരീക്ഷണാടിസ്ഥാനത്തിൽ കൃഷിയിറക്കിയ ഒരു ഏക്കറിലെ നെൽകൃഷിയിൽ കാലാവസ്ഥാമാറ്റം കൊണ്ട് രൂക്ഷമാകുന്ന കീടരോഗ ബാധകൾ ഒട്ടും ബാധിച്ചില്ല എന്നത് ശ്രദ്ധേയമാണ്. കൃഷിയിടത്തിൽ മിത്രപ്രാണികളുടെ എണ്ണം വർധിച്ച തോതിൽ നിലനിർത്താൻ സാധിക്കുന്നുണ്ട് എന്നതും പ്രകൃതി കൃഷിയുടെ പ്രത്യേകതയാണ്. ഒരു ഏക്കറിൽനിന്നും 1638 കിലോഗ്രാം വിളവാണ് പ്രകൃതി കൃഷിയിലൂടെ ലഭിച്ചത്. ഉത്പാദന ഉപാധികളുടെ ചെലവ് വളരെ കുറക്കാനും ഇതുമൂലം സാധിച്ചു എന്നതും നേട്ടമാണ്. സുസ്ഥിര പ്രകൃതി കൃഷിരീതികൾ പ്രോത്സാഹിപ്പിക്കുന്നതിലൂടെ കാലാവസ്ഥാ വ്യതിയാനത്തെ നേരിടാനും മണ്ണിന്‍റെ ആരോഗ്യം സംരക്ഷിക്കാനും പ്രകൃതിദത്ത ഉത്പന്നങ്ങളുടെ വിപണനത്തിലൂടെ കർഷകരുടെ വരുമാനം വർധിപ്പിക്കാനും ലക്ഷ്യമിട്ടുകൊണ്ട് ജൈവ കാർഷികമിഷന്‍റെ ഒരു സബ് മിഷൻ ആയി കേരള സർക്കാർ പ്രകൃതികൃഷിമിഷൻ രൂപീകരിച്ചിട്ടുണ്ട്. കെ.ഡി. പ്രസേനൻ എംഎൽഎ അധ്യക്ഷത വഹിച്ച ചടങ്ങിൽ ജില്ലാപഞ്ചായത്ത് പ്രസിഡന്‍റ് കെ. ബിനുമോൾ മുഖ്യാതിഥിയായി.

ഓട്ടോറിക്ഷ ഇടിച്ച് പരിക്കേറ്റ വയോധികൻ മരിച്ചു

കല്ലടിക്കോട്: റോഡ് മുറിച്ചുകടക്കുന്നതിനിടെ ഓട്ടോറിക്ഷ ഇടിച്ചു ചികിത്സയിലായിരുന്ന വയോധികൻ മരിച്ചു. കാരാകുറിശി കോരംകടവ് ചെമ്പൻപാടത്ത് ശ്രീനാരായണനിലയത്തിൽ അപ്പുക്കുട്ടി(71)യാണ് മരിച്ചത്. റിട്ട. ജില്ലാ പ്രോജക്ട് ഓഫീസറാണ്. സംസ്‌കാരം ഇന്നു രാവിലെ പത്തിന് വീട്ടുവളപ്പിൽ. വ്യാഴാഴ്ച വൈകീട്ട് 6.45 നാണ് അപകടം. കല്ലടിക്കോട് ദീപ ജംഗ്ഷനിൽ കാർ നിർത്തി ദേശീയപാത മുറിച്ചുകടക്കുന്നതിനിടെ കല്ലടിക്കോട് ചുങ്കത്തുനിന്നും വരികയായിരുന്ന ഓട്ടോ ഇടിക്കുകയായിരുന്നു. റോഡിൽ വീണ ഇദ്ദേഹത്തെ നാട്ടുകാർ പാലക്കാട് ജില്ലാ ആശുപത്രിയിലും തുടർന്ന് തൃശൂരിലെ സ്വകാര്യ ആശുപതിയിലും എത്തിച്ചു. ഇന്നലെ രാവിലെയാണ് മരിച്ചത്. ഭാര്യ: സുലോചന. മക്കൾ: സജിത്ത് (അധ്യാപകൻ, കാട്ടുകുളം ഹൈസ്കൂൾ), അജിത്ത് (ബിസിനസ്).

റോഡ് ആക്സിഡന്‍റ് ആക്‌ഷ‌‌‌ൻ ഫോറം ജില്ലാ കമ്മിറ്റിയോഗം

പാലക്കാട്: റോഡ് ആക്സിഡന്‍റ് ആക്ഷൻ ഫോറം ജില്ലാ കമ്മിറ്റിയോഗം ചേർന്നു. ടി.കെ. രാധാകൃഷ്ണൻ അധ്യക്ഷത വഹിച്ച ചടങ്ങിൽ സംസ്ഥാന പ്രസിഡന്‍റ് ഡോ. കെ.എം. അബ്ദു ഉദ്ഘാടനം ചെയ്തു. ജില്ലാ സെക്രട്ടറി എം. രാജഗോപാലൻ റിപ്പോർട്ട് അവതരിപ്പിച്ചു. ഫ്രാപ് ജില്ലാ സെക്രട്ടറി പ്രസാദ്, റിട്ട.പോലീസ് സബ് ഇൻസ്പെക്ടർമാരായ മുത്തുകൃഷ്ണൻ, ആറുമുഖൻ, വിമുക്തി ജില്ലാ കമ്മിറ്റി അംഗം കാദർ മൊയ്തീൻ, അസീസ് മാസ്റ്റർ, സ്വാമിനാഥൻ, കെ.വി. കൃഷ്ണകുമാർ, രാമദാസ്, വിക്ടോറിയ വിൻസന്‍റ് എന്നിവർ പ്രസംഗിച്ചു. പാലക്കാട് മെഡിക്കൽ കോളജിൽ വിദഗ്ദചികിത്സക്കായി ട്രോമ കെയർ യൂണിറ്റ് പ്രവർത്തിപ്പിക്കാൻ വേണ്ട നടപടി സ്വീകരിക്കണമെന്ന് സർക്കാരിനോട് ആവശ്യപ്പെട്ടു. വർധിച്ചു വരുന്ന റോഡപകടങ്ങൾ കുറക്കുന്നതിനുവേണ്ടി ജില്ലാ റോഡ് സേഫ്റ്റി കമ്മിറ്റികൾ വിളിച്ചുകൂട്ടി പ്രവർത്തനക്ഷമമാക്കണമെന്ന് ജില്ലാകളക്ടറോട് അഭ്യർഥിച്ചു.

പാലക്കാട് നഗരസഭയിൽ വികസനസദസ്‌ കേന്ദ്രമന്ത്രി സുരേഷ് ഗോപി ഉദ്ഘാടനം ചെയ്തു

പാലക്കാട്: സംസ്ഥാന സർക്കാരിന്‍റെ ആഭിമുഖ്യത്തിൽ തദ്ദേശ സ്വയംഭരണ വകുപ്പും ഇൻഫർമേഷൻ പബ്ലിക് റിലേഷൻസ് വകുപ്പും സംയുക്തമായി സംഘടിപ്പിക്കുന്ന വികസനസദസിന്‍റെ പാലക്കാട് നഗരസഭാതല ഉദ്ഘാടനം കേന്ദ്ര സഹമന്ത്രി സുരേഷ് ഗോപി നിർവഹിച്ചു. നഗരസഭ അങ്കണത്തിൽ നടന്ന പരിപാടിയിൽ നഗരസഭ ചെയർപേഴ്സണ്‍ പ്രമീള ശശിധരൻ അധ്യക്ഷത വഹിച്ചു. മുനിസിപ്പൽ സെക്രട്ടറി അൻസൽ ഐസക് റിപ്പോർട്ട് അവതരണം നടത്തി. വൈസ് ചെയർമാൻ ഇ. കൃഷ്ണദാസ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ടി. ബേബി, വിദ്യാഭ്യാസ കലാകായിക സ്റ്റാൻഡിംഗ് കമ്മിറ്റി ചെയർമാൻ പി. സാബു, അസിസ്റ്റന്‍റ് എക്സിക്യൂട്ടീവ് എൻജിനീയർ എസ്. ജ്യോതിസ്, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ വി.എസ്. മിനിമോൾ, പി. സ്മിതേഷ്, ടി.എസ്. മീനാക്ഷി, മുനിസിപ്പൽ എൻജിനീയർ ജി. ജീന, എക്സിക്യൂട്ടീവ് എൻജിനീയർ വി.ആർ. പ്രവിത, മറ്റു നഗരസഭ കൗണ്‍സിലർമാർ, ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

ക്ഷീരകർഷകരെ സഹായിക്കാൻ സർക്കാർ പ്രതിജ്ഞാബദ്ധം: മന്ത്രി ജെ. ചിഞ്ചുറാണി

പാലക്കാട്: ക്ഷീരകർഷകരുടെ ഉന്നമനത്തിനായി സർക്കാർ പ്രതിജ്ഞാബദ്ധമാണെന്നും ഇതിന്‍റെ ഭാഗമായി നൂതനമായ നിരവധി ക്ഷേമപദ്ധതികൾ നടപ്പാക്കിവരുന്നുണ്ടെന്നും മന്ത്രി ജെ. ചിഞ്ചുറാണി പറഞ്ഞു. ജില്ലാ ക്ഷീര കർഷകസംഗമത്തിന്‍റെ ഭാഗമായി തേങ്കുറുശി കെഎംആർ ഓഡിറ്റോറിയത്തിൽ നടന്ന സമാപന പൊതുസമ്മേളനം ഓണ്‍ലൈനായി ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. സംസ്ഥാനത്ത് ഏറ്റവും കൂടുതൽ പാൽ ഉത്പാദിപ്പിക്കുന്ന ജില്ലയായ പാലക്കാട് ക്ഷീരമേഖലയിൽ വിപ്ലവകരമായ മുന്നേറ്റമാണ് നടത്തുന്നത്. നിലവിൽ ജില്ലയിലെ 332 ക്ഷീരസംഘങ്ങൾ വഴി പ്രതിദിനം ഏകദേശം 3.3 ലക്ഷം ലിറ്റർ പാൽ സംഭരിക്കുന്നു എന്നത് കർഷകർക്ക് അഭിമാനിക്കാവുന്ന നേട്ടമാണ്. ക്ഷീരകർഷകരെ സഹായിക്കാനായി എംഎസ്ഇപി പദ്ധതിയിൽ ഉൾപ്പെടുത്തി രണ്ട്, അഞ്ച്, പത്ത് എന്നിങ്ങനെ ഡയറി യൂണിറ്റുകൾ സ്ഥാപിക്കുന്നതിനും കറവകേന്ദ്രം വാങ്ങുന്നതിനും സബ്സിഡികളും പദ്ധതികളും നടപ്പിലാക്കുന്നുണ്ട്. തീറ്റച്ചെലവ് കുറയ്ക്കുന്നതിന് ലക്ഷ്യമിട്ട് തീറ്റപ്പുൽകൃഷി വ്യാപനവും കാലിത്തീറ്റ സബ്സിഡിയും സർക്കാർ നൽകുന്നുണ്ട്. തീറ്റച്ചെലവ് അനിയന്ത്രിതമായി വർധിക്കുന്ന സാഹചര്യത്തിൽ കർഷകർക്ക് ആശ്വാസമേകാനായി മിൽമയും പൊതുമേഖലാ സ്ഥാപനമായ കേരള ഫീഡ്സും കാലിത്തീറ്റയിൽ സബ്സിഡികളും ഇളവുകളും പ്രഖ്യാപിച്ചിട്ടുണ്ട്. ക്ഷീര കർഷകരുടെ ആശ്രിതർക്ക് മിൽമയുടെ നിയമനത്തിൽ സംവരണം ഏർപ്പെടുത്തുന്നതിനും തീരുമാനിച്ചതായി മന്ത്രി പറഞ്ഞു. പരിപാടിയിൽ കെ.ഡി. പ്രസേനൻ എംഎൽഎ അധ്യക്ഷനായി. മികച്ച ക്ഷീര കർഷകൻ, കർഷക, എസ്‌സി, എസ്ടി കർഷകൻ എന്നിവർക്കുള്ള പുരസ്കാരം കെ. രാധാകൃഷ്ണൻ എംപി സമ്മാനിച്ചു. കൂടുതൽ പാൽ അളന്ന ആപ്കോസ്, പരന്പരാഗത സംഘത്തിന് കെ. ബാബു എംഎൽഎ പുരസ്കാരം നൽകി. വിവിധ മേഖലകളിൽ മികവ് പുലർത്തിയ ക്ഷീര സംഘങ്ങൾക്കുള്ള സമ്മാനദാനം അഡ്വ.കെ. ശാന്തകുമാരി എംഎൽഎയും നിർവഹിച്ചു. ബ്ലോക്ക് തലത്തിലെ മികച്ച ക്ഷീരകർഷകരെ കെ.ഡി. പ്രസേനൻ എംഎൽഎ ആദരിച്ചു. കന്നുകാലിപ്രദർശന മത്സര വിജയികൾക്കുള്ള സമ്മാനദാനം അഡ്വ.കെ.പ്രേംകുമാർ എംഎൽഎ നിർവഹിച്ചു. ഡയറി ക്വിസ് മത്സര വിജയികൾക്കുള്ള സമ്മാനദാനം കേരള ഫീഡ്സ് ചെയർമാൻ കെ. ശ്രീകുമാർ നൽകി. ക്ഷീരവികസന വകുപ്പ് ഡയറക്ടർ ശാലിനി ഗോപിനാഥ് പദ്ധതി വിശദീകരണം നടത്തി. പരിപാടിയിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, വിവിധ ബ്ലോക്ക് പഞ്ചായത്ത് പ്രസിഡന്‍റുമാർ, ബ്ലോക്ക് പഞ്ചായത്ത് അംഗങ്ങൾ, ഗ്രാമപഞ്ചായത്ത് പ്രസിഡന്‍റുമാർ എന്നിവർ പങ്കെടുത്തു.

ടൂറിസം വികസനത്തിനായി മംഗലംഡാമിൽ ചെലവഴിച്ച കോടികളെല്ലാം പാഴായി

മംഗലംഡാം: പത്തുവർഷത്തിനിടെ പത്തു കോടിയോളം രൂപ ടൂറിസം വികസനത്തിനായി ചെലവഴിച്ച മംഗലംഡാമിൽ സന്ദർശകരെ വരവേൽക്കുന്നത് പൊന്തക്കാടുകളും കാട്ടുപന്നിക്കൂട്ടങ്ങളും. ചെലവഴിച്ചെന്നുപറയുന്ന കോടികളുടെ വികസനമെല്ലാം കാണാമറയത്തായി. ഡാമിൽ സന്ദർശകരായെത്തുന്നത് കമിതാക്കൾമാത്രം. കുടുംബസമേതം ഡാം കാണാനെത്തുന്നവർ കണ്ണുപൊത്തിനടക്കേണ്ട സ്ഥിതി. പ്രകൃതി മനോഹരിയായ മംഗലംഡാമിനെ എല്ലാവരുടെയും അറിവോടെ നശിപ്പിക്കുകയാണ്. പൊന്തക്കാടുകൾ വൃത്തിയാക്കാതെ എല്ലാ അരുതായ്മകൾക്കും കൂട്ടുനിൽക്കുന്നവിധമാണ് അധികൃതരുടെ നടപടികളും. മംഗലംഡാമിലെ സന്ദർശകരിൽ കൂടുതലും പഠിക്കാനെന്ന് പറഞ്ഞ് വീട്ടിൽനിന്നിറങ്ങുന്ന വിദ്യാർഥികളാണ്. പത്തുമണിയോടെ ഡാമിലെത്തും. വൈകുന്നേരം വീടുകളിലെത്തേണ്ട സമയത്തു തിരിച്ചുപോകും. സ്കൂൾ പെൺകുട്ടികൾവരെയുണ്ട് കൂട്ടത്തിൽ. ബന്ധപ്പെട്ടവർക്കെല്ലാം ഇതെല്ലാം അറിയാമെങ്കിലും നക്കാപ്പിച്ച പ്രവേശനഫീസിനു വേണ്ടി തലമുറകളെ നശിപ്പിക്കുന്ന കേന്ദ്രമായി മംഗലംഡാമിനെ മാറ്റുകയാണെന്ന ആക്ഷേപമാണുള്ളത്. കൊട്ടിഘോഷിച്ച് സ്ഥാപിച്ച അഡ്വഞ്ചർ പാർക്ക് സന്ദർശകർക്ക് പ്രയോജനപ്പെടാതെ കാടുമൂടി എല്ലാ സംവിധാനങ്ങളും നശിച്ചു. വഴിയിൽനിന്നും അഡ്വഞ്ചർ പാർക്കിലേക്ക് കയറിപ്പോകുന്ന സ്റ്റെപ്പുകളെല്ലാം കാടുമൂടി. ഇവിടെയെല്ലാം കാട്ടുപന്നികളുടെ താവളങ്ങളാണ്. കുട്ടികളും പ്രായമായവരുമായി കാഴ്ചകാണാൻ പോകുന്നവർ ശ്രദ്ധിക്കണം. ഏതുസമയവും പന്നികൾ കുതിച്ചെത്തി ആക്രമിക്കാം. ഉദ്ഘാടനദിവസം പോലും തുറക്കാതെ അഴിമതിയിൽ മുങ്ങിയ വികസനങ്ങളെല്ലാം രഹസ്യമാക്കിവച്ചു. 2020 ഒക്ടോബർ 22നാണ് 4.76 കോടി രൂപയുടെ ടൂറിസം വികസനപദ്ധതികൾ നടപ്പിലാക്കി എന്ന് അവകാശപ്പെട്ട് ഏറ്റവും ഒടുവിൽ ഉദ്ഘാടനം നടന്നത്. ഓൺലൈനായി മുഖ്യമന്ത്രിയായിരുന്നു ഉദ്ഘാടകൻ. അഡ്വഞ്ചർ സ്പോർട്സ് ആൻഡ് കിഡ്സ് പാർക്കാണ് ഉദ്യാന നവീകരണത്തിൽ പ്രധാനമായി അവതരിപ്പിച്ചത്. വലിയ മരങ്ങളിൽ അവിടവിടെയായി കമ്പികൾ വലിച്ചുകെട്ടി പഴയ മുളകൾ തൂക്കിയിട്ടാണ് അഡ്വഞ്ചർ സ്പോർട്സ് പാർക്ക് ഉണ്ടാക്കിയിരുന്നത്. അതിനുമുമ്പും 4.62 കോടി രൂപ ചെലവഴിച്ച് ഉദ്യാന നവീകരണം നടത്തിയിരുന്നു. എന്നാൽ ഇത്രയും കോടി രൂപ ചെലവഴിച്ചതിന്‍റെ ടൂറിസം വികസന മൊന്നും മംഗലംഡാമിൽ കാണാനാകില്ല. ആർക്കൊക്കെയോ വേണ്ടി കുറെ ഫണ്ട് അനുവദിക്കുകയും അതിൽ കുറച്ച് തുക കൊണ്ട് എന്തൊക്കെയോ കാട്ടിക്കൂട്ടലുകളാണ് നടക്കുന്നത്. മലമ്പുഴയെ വെല്ലുന്ന പ്രകൃതിസൗന്ദര്യം മംഗലംഡാമിലുണ്ടെങ്കിലും അത് പ്രയോജനപ്പെടുത്തി സന്ദർശകരെ ആകർഷിക്കാനുള്ള യാതൊരു നടപടികളും ഇപ്പോഴും വരുന്നില്ല. സ്ഥലപരിമിതിയുള്ള പോത്തുണ്ടി ഡാമിൽ പോലും സന്ദർശകരുടെ പ്രവാഹമുണ്ടാകുമ്പോൾ മംഗലംഡാമിലേക്ക് സന്ദർശകരാരും തിരിഞ്ഞുനോക്കുന്നില്ല.

എയ്ഡഡ് വിദ്യാഭ്യാസമേഖലയിലെ പ്രതിസന്ധി പരിഹരിക്കണം: കത്തോലിക്ക കോൺഗ്രസ്

പൊന്നങ്കോട്: എയ്ഡഡ് വിദ്യാഭ്യാസമേഖലയിലെ പ്രതിസന്ധികൾ അടിയന്തരമായി പരിഹരിക്കണമെന്ന് കത്തോലിക്ക കോൺഗ്രസ് പൊന്നങ്കോട് ഫൊറോന കൺവൻഷൻ ആവശ്യപ്പെട്ടു. പൊന്നങ്കോട് ഫൊറോന കൺവൻഷൻ ഫൊറോന വികാരി ഫാ. മാർട്ടിൻ കളമ്പാടൻ ഉദ്ഘാടനം ചെയ്തു. കത്തോലിക്ക കോൺഗ്രസ് അവകാശ സംരക്ഷണ യാത്രയ്ക്ക് 17 ന് രാവിലെ 9.30 ന് മണ്ണാർക്കാട് നൽകുന്ന സ്വീകരണത്തിൽ പൊന്നങ്കോട് ഫൊറോന യിലെ വിവിധ പള്ളികളിൽ നിന്നും പരമാവധി ആളുകളെ പങ്കെടുപ്പിക്കാൻ തീരുമാനിച്ചു. വിദ്യാഭ്യാസമേഖല അഭിമുഖീകരിക്കുന്ന പ്രശ്നങ്ങൾ, വന്യജീവി ആക്രമണം, കാർഷികമേഖലയോടുള്ള അവഗണന, ഭരണഘടന നൽകുന്ന ന്യൂനപക്ഷ അവകാശങ്ങൾ നിഷേധിക്കപ്പെടുന്ന അവസ്ഥ, ജെ.ബി. കോശി കമ്മീഷൻ റിപ്പോർട്ട് പുറത്തുവിടുക തുടങ്ങിയ ആവശ്യങ്ങൾ ഉന്നയിച്ച് 24 ന് തിരുവനന്തപുരത്ത് നടക്കുന്ന സെക്രട്ടറിയേറ്റ് ധർണയിൽ പൊന്നകോട് ഫൊറോനയിൽ നിന്ന് പരമാവധി ആളുകൾ പങ്കെടുക്കാൻ തീരുമാനിച്ചു. യോഗത്തിൽ ഫൊറോന പ്രസിഡന്‍റ് ഫ്രാൻസിസ് തുടിയൻപ്ലാക്കൽ അധ്യക്ഷത വഹിച്ചു. ഫൊറോന ഡയറക്ടർ ഫാ. ജെയ്സൻ കൊള്ളനൂർ, രൂപത പ്രസിഡന്‍റ് ബോബി പൂവത്തുങ്കൽ, ഗ്ലോബൽ വൈസ് പ്രസിഡന്‍റ് തോമസ് ആന്‍റണി, ജെയ്മോൻ പഴുക്കാത്തറ, സജി ചിറക്കൽ എന്നിവർ പ്രസംഗിച്ചു.

കേരഗ്രാമം പദ്ധതി ഉദ്ഘാടനം ചെയ്തു

നെന്മാറ: അയിലൂർ കൃഷിഭവൻ കേരഗ്രാമം പദ്ധതി ഉദ്ഘാടനം നടത്തി. നാളികേരത്തിന്‍റെ ഉത്പാദനവും ഉത്പാദനക്ഷമതയും വർധിപ്പിക്കുന്നതിനും വിലതകർച്ചയും രോഗകീടാക്രമണം മൂലം പ്രതിസന്ധി നേരിടുന്ന കേരകർഷകർക്ക് കൈത്താങ്ങാവുക എന്ന ലക്ഷ്യത്തോടെ കേരള സർക്കാർ ആവിഷ്ക്കരിച്ച 3 വർഷം നീണ്ടുനിൽക്കുന്ന ബൃഹത്പദ്ധതിയാണ് ‘കേരഗ്രാമം പദ്ധതി'. നാളികേരകർഷകരുടെ ജീവിതനിലവാരം ഉയർത്തുക, തെങ്ങിന്‍റെ ചങ്ങാതിക്കൂട്ടങ്ങളെ സൃഷ്‌ടിക്കുക, മൂല്യവർധിത യൂണിറ്റ് ഉണ്ടാക്കുക തുടങ്ങിയ ലക്ഷ്യങ്ങൾ കൈവരിക്കാനുള്ള പദ്ധതിയാണിത്. മികച്ച കർഷകനായ സ്വാമിനാഥൻ പുതുച്ചി, കേരകർഷക തൊഴിലാളി ചന്ദ്രൻ പയ്യാങ്കോട് എന്നിവരെ ആദരിച്ചു. കേരഗ്രാമം പദ്ധതിയുടെ ഉദ്ഘാടനം കെ. ബാബു എംഎൽഎ നിർവഹിച്ചു. അയിലൂർ ഗ്രാമപഞ്ചായത്ത് പ്രസിഡന്‍റ് എസ്. വിഘ്നേഷ് അധ്യക്ഷത വഹിച്ചു.

കിഴക്കഞ്ചേരിയിൽ കാട്ടുപന്നികളെ വെടിവച്ചു കൊല്ലാൻ ഉത്തരവ്; പാനൽ രൂപീകരിച്ചു

വടക്കഞ്ചേരി: കിഴക്കഞ്ചേരി പഞ്ചായത്തിലെ ജനവാസ മേഖലയിൽ ജനങ്ങളുടെ ജീവനും സ്വത്തിനും നാശം വരുത്തുന്ന കാട്ടുപന്നികളെ അനുയോജ്യമായ മാർഗങ്ങളിലൂടെ ഇല്ലായ്മ ചെയ്യാൻ അനുമതിയായി. പഞ്ചായത്ത് പ്രസിഡന്‍റിനെ വൈൽഡ് ലൈഫ് ഹോണററി വാർഡനാക്കിയാണ് ഉത്തരവ്. ഇതിനായി കാട്ടുപന്നികളെ വെടിവച്ച് കൊല്ലാൻ തോക്ക് ലൈസൻസുള്ള സന്നദ്ധരായവരുടെ പാനലും രൂപീകരിച്ചിട്ടുണ്ടെന്ന് മംഗലംഡാം കരിങ്കയം ഫോറസ്റ്റ് ഡെപ്യൂട്ടി റേഞ്ച് ഓഫീസർ മുഹമ്മദ് ഹാഷിം അറിയിച്ചു. പന്നിയുടെ ജഡം പഞ്ചായത്ത്, വനം വകുപ്പ് എന്നിവരുടെ സാന്നിധ്യത്തിൽ സംസ്കരിക്കണം. മുലയൂട്ടുന്ന കാട്ടുപന്നികളെ കൊല്ലാൻ പാടില്ലെന്ന നിർദേശവുമുണ്ട്. കിഴക്കഞ്ചേരി പട്ടയംപാടം ബെന്നി പോൾ, യാക്കര കടംതുരുത്തി നവീൻ, കല്പാത്തി സ്പ്രിംഗ് വാലി ദിലീപ്കുമാർ, കുഴൽമന്ദം മണ്ണിരാട് പൃഥ്വിരാജൻ, പാലക്കുഴി മാത്യുസേവ്യർ, പാലക്കുഴി വീട്ടിയാങ്കൽ ആന്‍റണി, ജോസ്, കരിങ്കയം ചുങ്കപ്പുരക്കൽ സി.ജെ. മാത്യു, കിഴക്കഞ്ചേരി പട്ടയംപാടം ബേബി പോൾ, കിഴക്കഞ്ചേരി വക്കാല ജോസഫ്, കോരഞ്ചിറ കോമുട്ടികുളമ്പ് രാജഗോപാലൻ, വക്കാല പി.ജെ. മാത്യു, തൊടുപുഴ മറ്റം ഉല്ലാസ്, തൃശൂർ കരുവന്നൂർ പനംകുളം മുഹമ്മദ് റഷീദ്, കരിങ്കയം ചുങ്കപ്പുരക്കൽ സി.എം. മാത്യു, ഭരണങ്ങാനം ഇടപ്പാടി ഷാജിമോൻ എന്നിവരടങ്ങുന്ന പാനലാണ് കാട്ടുപന്നികളെ വെടിവച്ചുകൊല്ലാൻ രൂപീകരിച്ചിട്ടുള്ളത്.

മീഡിയേഷൻ ഫോർ ദി നേഷൻ കാന്പയിൻ: ജില്ലയിൽ 368 കേസുകൾ തീർപ്പാക്കി

പാലക്കാട്: കോടതികളിൽ കെട്ടിക്കിടക്കുന്ന കേസുകൾക്ക് വേഗത്തിൽ തീർപ്പുകൽപ്പിച്ച് കക്ഷികൾക്ക് യഥാസമയം നീതി ഉറപ്പാക്കുന്നതിന്‍റെ ഭാഗമായി നടന്ന ‘മീഡിയേഷൻ ഫോർ ദി നേഷൻ’ കാന്പയിൻ ജില്ലയിൽ വൻവിജയം. സുപ്രീംകോടതിയുടെ കീഴിലുള്ള മീഡിയേഷൻ ആൻഡ് കണ്‍സീലിയേഷൻ പ്രോജക്ട് കമ്മിറ്റിയും നാഷണൽ ലീഗൽ സർവീസസ് അഥോറിറ്റിയും സംയുക്തമായി രാജ്യവ്യാപകമായി നടത്തിയ കാന്പയിനിന്‍റെ ഭാഗമായാണ് ജില്ലയിലും പരിപാടി നടന്നത്. ജൂലൈ ഒന്നു മുതൽ സെപ്റ്റംബർ 30 വരെയായി 90 ദിവസം നീണ്ടുനിന്ന കാന്പയിനിലൂടെ 368 കേസുകൾ ജില്ലയിൽ തീർപ്പാക്കി. ജില്ലയിലെ വിവിധ കോടതികളിൽ നിന്ന് ജൂലൈ 1 മുതൽ 31 വരെയുളള പ്രത്യേക കോസ് ലിസ്റ്റിൽ ഉൾപ്പെടുത്തി 1705 കേസുകളാണ് മധ്യസ്ഥതയ്ക്കായി റഫർ ചെയ്തിരുന്നത്. തീർപ്പാക്കിയ കേസുകളിൽ 10 വർഷത്തിലധികം പഴക്കമുള്ള 11 കേസുകൾ ഉൾപ്പെടുന്നു. ഇതിൽ 1982ൽ ഫയൽ ചെയ്ത ഒരു കേസ് പോലും മധ്യസ്ഥതയിലൂടെ പരിഹരിക്കാൻ കഴിഞ്ഞു.വൈവാഹിക തർക്ക കേസുകൾ, അപകട ക്ലെയിം കേസുകൾ, ഗാർഹിക അതിക്രമ കേസുകൾ, ചെക്ക് ബൗണ്‍സ് കേസുകൾ, വാണിജ്യതർക്കം, ഉപഭോക്തൃ തർക്കം, പാർട്ടീഷൻ, കടം വീണ്ടെടുക്കൽ, ഒഴിപ്പിക്കൽ, ഭൂമി ഏറ്റെടുക്കൽ, സർവീസ് വിഷയ കേസുകൾ തുടങ്ങിയവയാണ് മധ്യസ്ഥതയ്ക്ക് റഫർ ചെയ്ത് തീർപ്പാക്കിയത്. കക്ഷികളുടെ സൗകര്യം കണക്കിലെടുത്ത് നേരിട്ടും ഓണ്‍ലൈനിലൂടെയും മധ്യസ്ഥചർച്ചകൾ നടത്തി. മധ്യസ്ഥതയിൽ തീർപ്പാക്കുന്ന കേസുകൾക്ക് കോടതിച്ചെലവ് കക്ഷികൾക്ക് തിരികെ ലഭിക്കുകയും ചെയ്യും.

കോയമ്പത്തൂരിൽനിന്ന് ശ്രീലങ്കയിലേക്ക് നേരിട്ട് വിമാനസർവീസ് ഉടൻ

കോയന്പത്തൂർ: കോയമ്പത്തൂർ വിമാനത്താവളത്തിൽനിന്ന് ശ്രീലങ്കയിലേക്ക് നേരിട്ടുള്ള വിമാന സർവീസ് ഉടൻ ആരംഭിക്കുമെന്ന് കോയമ്പത്തൂരിലെത്തിയ ശ്രീലങ്കൻ ടൂറിസം മന്ത്രിതലസംഘം അറിയിച്ചു. അവിനാശി റോഡിലെ സ്വകാര്യ ഹോട്ടലിൽ ശ്രീലങ്കൻ ടൂറിസത്തെക്കുറിച്ചു നടത്തിയ പത്രസമ്മേളനത്തിനിടെയാണ് ശ്രീലങ്കൻ ടൂറിസം ഉപമന്ത്രി റുവാൻ രണസിംഗെ ഇക്കാര്യം അറിയിച്ചത്. ഒന്പതു ഇന്ത്യൻ നഗരങ്ങളെ ശ്രീലങ്കയുമായി ബന്ധിപ്പിക്കുന്ന 88 വിമാന സർവീസുകൾ ശ്രീലങ്കൻ എയർലൈൻസ് നടത്തുന്നുണ്ട്. ഇന്ത്യയിൽ നിന്നുള്ള വിനോദസഞ്ചാരികളുടെ എണ്ണം വർധിച്ചിട്ടുണ്ടെന്നും ഇന്ത്യ ശ്രീലങ്കയുടെ പ്രാഥമിക ടൂറിസം വിപണിയായി തുടരുന്നുവെന്നും അദ്ദേഹം പറഞ്ഞു. ഇന്ത്യൻ വിനോദസഞ്ചാരികൾക്ക് വിസാരഹിത പ്രവേശനം അനുവദിച്ചിട്ടുണ്ടെന്നും അറിയിച്ചു.

വാൽപ്പാറ പള്ളിയിൽ തിരുനാളിനു കൊടിയേറി

വാൽപ്പാറ: രാമനാഥപുരം രൂപതയിലെ വാൽപ്പാറ വിശുദ്ധ ലൂക്കായുടെ നാമത്തിലുള്ള പള്ളിയിൽ 18ന് മധ്യസ്ഥതിരുനാൾ അഘോഷിക്കും. വികാരി ഫാ. ജോസഫ് പുത്തൂർ തിരുനാളിനു കൊടിയുയർത്തി. ഇന്നു മുതൽ 17 വരെ ജപമാലയും വിശുദ്ധ കുർബാനയും ലദീഞ്ഞും നൊവേനയുമുണ്ടാകും. തിരുനാൾദിനമായ 18 ന് വൈകുന്നേരം 4.30ന് ജപമാലയെ തുടർന്ന് ആഘോഷമായ തിരുനാൾ പാട്ടുകുർബാനയ്ക്ക് ഫാ. സച്ചിൻ കല്ലിങ്ങൽ കാർമികത്വം വഹിക്കും. ഫാ. ബെൻജോ ചിറ്റാട്ടുകരക്കാരൻ തിരുനാൾസന്ദേശം നൽകും. ഫാ. ജഗൻ ആന്‍റണി ദിവ്യകാരുണ്യ ആശീർവാദം നൽകും. തുടർന്ന് നേർച്ചഭക്ഷണത്തോടെ തിരുനാളിനു സമാപനമാകും. തിരുനാൾ ആഘോഷങ്ങൾക്കു കൈക്കാരന്മാരായ പോളി തേക്കിനേടത്ത്, ഷാജു തെക്കിനിയത്ത്, തിരുനാൾ പ്രസുദേന്തി ത്രേസ്യാമ്മ ജോർജ് മാളിയേക്കൽ, പാരിഷ് കൗൺസിൽ അംഗങ്ങൾ എന്നിവർ നേതൃത്വം നൽകും.

പൊറ്റശേരി സ്കൂളിൽ വിദ്യാർഥികൾ നിർമിച്ച ഉത്പന്നങ്ങളുടെ വിപണനോദ്ഘാടനം

കാഞ്ഞിരപ്പുഴ: പൊറ്റശ്ശേരി ഗവൺമെന്‍റ് ഹയർ സെക്കൻഡറി സ്കൂളിലെ ഇഡി ക്ലബിന്‍റെ നേതൃത്വത്തിൽ കോമേഴ്സ് വിദ്യാർഥികൾ തയാറാക്കിയ ആദ്യ ഉൽപന്നമായ നിയോ വാഷ് ഫ്ലോർ ക്ലീനറിന്‍റെ വിപണനോദ്ഘാടനം നടത്തി. വിദ്യാർഥികളിൽ സംരഭകത്വ താൽപര്യം വളർത്തുന്നതിനൊപ്പം പാഠഭാഗങ്ങൾ പ്രായോഗികമായി പഠിക്കുക എന്ന ലക്ഷ്യത്തോടെയാണ് ഉത്പാദനത്തിനൊപ്പം വിപണനവും നടത്തുന്നത്. കാഞ്ഞിരപ്പുഴ ഗ്രാമപഞ്ചായത്ത് പ്രസിഡന്‍റ് സതി രാമരാജൻ ഉദ്ഘാടനം നടത്തി. പിടിഎ പ്രസിഡന്‍റ് കെ.എസ്. സുനേഷ് അധ്യക്ഷത വഹിച്ച ചടങ്ങിൽ ഇഡി ക്ലബ് കോ-ഓർഡിനേറ്റർ ടി. രാധാകൃഷ്ണൻ പരിപാടിയുടെ ഉദ്ദേശ്യലക്ഷ്യത്തെക്കുറിച്ച് പ്രസംഗിച്ചു. അധ്യാപകരായ എൻ. ഉണ്ണികൃഷ്ണൻ, ധന്യ കാർത്തികേയൻ, ജീന ജോസി, വിദ്യാർഥികളായ യു. അർച്ചന, പി. മുഫീദ, സംവൃതശ്രീ, എസ്. നയന, എസ്. ഹിത, കെ.വി. ഇസ്റ, പി.എസ്. അനാമിക, അമൽ ബിനോയ്, കെ. അഭിജിത്ത്, വി.എൻ. ദേവിക, കെ. നിവേദ്യ തുടങ്ങിയവർ വില്പനയ്ക്ക് നേതൃത്വം നൽകി.

വോട്ട് ചോരി: ഒപ്പുശേഖരണവുമായി മഹിളാ കോൺഗ്രസ് ജില്ലാ കമ്മിറ്റി

പാലക്കാട്: കേന്ദ്രസർക്കാരിന്‍റെ വോട്ട് കൊള്ളയിൽ പ്രതിഷേധിച്ച് രാഹുൽഗാന്ധി നടത്തിവരുന്ന വോട്ട് ചോരി കാമ്പയിനു പിന്തുണയുമായി മഹിളാ കോൺഗ്രസ് ജില്ലാ കമ്മിറ്റി ഒപ്പുശേഖരണം നടത്തി. ജില്ലാ പ്രസിഡന്‍റ് സിന്ധു രാധാകൃഷ്ണന്‍റെ അധ്യക്ഷതയിൽ കൊല്ലങ്കോട് ബ്ലോക്ക് കോൺഗ്രസ്കമ്മിറ്റി ഓഫീസിനു മുന്നിൽ ആദ്യഒപ്പിട്ട് ഉദ്ഘാടനം നിർവഹിച്ചു. ബ്ലോക്ക് കോൺഗ്രസ് വൈസ് പ്രസിഡന്‍റ് പി. ശെൽവരാജ് മുഖ്യപ്രഭാഷണം നടത്തി. മഹിളാ കോൺഗ്രസ് ജില്ലാ ഭാരവാഹികളായ പി. പാഞ്ചാലി, ഗീത ശിവദാസ്, വി.കെ. റഹ്മത്ത്, യു. പ്രസന്ന, സാവിത്രി മാധവൻ നേതൃത്വം നൽകി.

കേരള കോൺഗ്രസ്- എം ജന്മദിനാഘോഷം

പാലക്കാട്: കേരള കോൺഗ്രസ്- എം ജില്ലാ കമ്മിറ്റിയുടെ ആഭിമുഖ്യത്തിൽ ജന്മദിന ആഘോഷങ്ങളും പതാക ഉയർത്തലും നടത്തി. ജില്ലാ കമ്മിറ്റി ഓഫീസ് അങ്കണത്തിൽ പാർട്ടി ജില്ലാ ജനറൽ സെക്രട്ടറി തോമസ് ജോൺ പതാക ഉയർത്തി. തുടർന്ന് നടന്ന ജന്മദിനാഘോഷയോഗത്തിൽ നിയോജകമണ്ഡലം പ്രസിഡന്‍റ് എൽ. കൃഷ്ണ മോഹൻ അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് അഡ്വ. ടൈറ്റസ് ജോസഫ് ഉദ്ഘാടനം ചെയ്തു. ജില്ലാ ജനറൽ (സെക്രട്ടറി ഓഫീസ് ചാർജ്) തോമസ് ജോൺ കാരുവള്ളി മുഖ്യപ്രഭാഷണം നടത്തി. ജില്ലാ ജനറൽസെക്രട്ടറിമാരായ ജോസ് വടക്കേക്കര, പമ്പാവാസൻ കൊട്ടേക്കാട്, റെനി കരിമാലത്ത്, കെ.എം. ഉണ്ണികൃഷ്ണൻ, വിവിധ മണ്ഡലം ഭാരവാഹികൾ പ്രസംഗിച്ചു.

സ്മാർട്ടായി ഞങ്ങാട്ടിരിക്കടവ് അങ്കണവാടി

തൃത്താല: പഞ്ചായത്തിലെ ഞങ്ങാട്ടിരിക്കടവ് പതിനാലാം നന്പർ അങ്കണവാടിയും സ്മാർട്ടായി. മന്ത്രി എം.ബി. രാജേഷിന്‍റെ എംഎൽഎ ഫണ്ടിൽനിന്നും 20 ലക്ഷം രൂപയും തൃത്താല ബ്ലോക്ക് പഞ്ചായത്തിന്‍റെ 80,000 രൂപയും പഞ്ചായത്തിന്‍റെ ഒരുലക്ഷം രൂപയും ഉൾപ്പെടുത്തി 21.80 ലക്ഷം രൂപ വിനിയോഗിച്ചാണ് അങ്കണവാടി നിർമിച്ചത്. നാളെ വൈകുന്നേരം ആറിനു മന്ത്രി എം.ബി. രാജേഷ് ഉദ്ഘാടനം നിർവഹിക്കും. പരിമിത സൗകര്യത്തിൽ താത്കാലിക കെട്ടിടത്തിലായിരുന്നു അങ്കണവാടി പ്രവർത്തിച്ചിരുന്നത്. വാർഡ് മെംബർ ഫാത്തിമ സീനത്തിന്‍റെ നേതൃത്വത്തിൽ പ്രദേശവാസികളുടെ സഹായത്തിൽ പിരിച്ചെടുത്ത ഏഴുലക്ഷം രൂപ വിനിയോഗിച്ചാണ് അങ്കണവാടി നിർമിക്കുന്നതിനായി മൂന്നര സെന്‍റ് സ്ഥലം വാങ്ങിയത്. പഞ്ചായത്തിലെ രണ്ടാമത്തെ സ്മാർട്ട് അങ്കണവാടിയാണിത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]