ADVERTISEMENT

ADVERTISEMENT

വിജയോത്സവം നടത്തി

മണ്ണാർക്കാട്: പ്ലസ് ടു തുല്യതാപഠിതാക്കളുടെ വിജയോത്സവം നഗരസഭാ ചെയർമാൻ സി. മുഹമ്മദ് ബഷീർ ഉദ്ഘാടനം ചെയ്തു. വൈസ് ചെയർപേഴ്സൺ കെ. പ്രസീദ അധ്യക്ഷയായി. 92 ശതമാനം വിജയമാണ് ഈ വർഷം പ്ലസ് ടു തുല്യതയ്ക്ക് മണ്ണാർക്കാട് ജിഎംയുപി സ്കൂൾ കേന്ദ്രമായി പ്രവർത്തിക്കുന്ന സ്റ്റഡി സെന്‍ററിന് ലഭിച്ചത്. കൗൺസിലർമാരായ മാസിദ സത്താർ, സി.പി. പുഷ്പാനന്ദ്, അരുൺകുമാർ പാലക്കുറുശി, മുഹമ്മദ് ഇബ്രാഹിം, സമീർ വേളക്കാടൻ, കെ. ഹസീന, ഷറഫുനീസ, കെ. ഖദീജ, അധ്യാപകരായ കെ.കെ. വിനോദ് കുമാർ, ടി. മൊയ്തീൻ, ജിഎംയുപി സ്കൂൾ പ്രധാനാധ്യാപകൻ എം. നാരായണൻ എന്നിവർ പ്രസംഗിച്ചു.

കോഴ്സ് കോ-ഓർഡിനേറ്റർ പുഷ്പലത വിജയകുമാറിനെ ആദരിച്ചു. തുടർന്ന് പഠിതാക്കളുടെ കലാപരിപാടികളും ഉണ്ടായി. കോഴ്സ് ലീഡർ ഹസീന, ഷമീർ വേളക്കാടൻ, സക്കീർ മുല്ലക്കർ എന്നിവർ നേതൃത്വം നൽകി.

ADVERTISEMENT

സൈലന്‍റ്‌വാലി തൂക്കുപാലം നിർമാണം ഇന്നു പുനരാരംഭിക്കും

മണ്ണാർക്കാട്: സൈലന്‍റ്‌വാലി തൂക്കുപാലത്തിന്‍റെ നിർമാണപ്രവർത്തനം ഇന്നു പുനഃരാരംഭിക്കുമെന്ന് അധികൃതർ. ഫണ്ടിന്‍റെ അപര്യാപ്തത ചൂണ്ടികാണിച്ച് സർക്കാക്കാറിനു കത്തയച്ചിരുന്നു. ഇതിന്‍റെ അടിസ്ഥാനത്തിൽ 90 ശതമാനം ഫണ്ടും കരാർ ഏറ്റെടുത്ത കമ്പനിയായ സിൽക്കിന് ലഭിച്ചു. പ്രവൃത്തികൾ ഇന്നാരംഭിക്കുമെന്ന് സിൽക്ക് അധികൃതർ അറിയിച്ചതായി സൈലന്‍റ്‌വാലി അസിസ്റ്റന്‍റ് വൈൽഡ് ലൈഫ് വാർഡൻ വി.എസ്. വിഷ്ണു പറഞ്ഞു. സൈലന്‍റ്‌വാലി നാഷണൽ പാർക്കിൽ സൈരന്ധ്രിയിൽ കുന്തിപ്പുഴയ്ക്കു കുറുകെ കടന്നു പോകുവാനുള്ള തൂക്കുപാലം തകർന്നിട്ട് ആറുവർഷം പിന്നിട്ടു. പുച്ചിപ്പാറയിലേക്ക് കടന്നുപോകുന്ന തൂക്കുപാലമാണ് തകർന്നു കിടക്കുന്നത്. ഇവിടേക്കു കടന്നുപോകണമെങ്കിൽ ഇതല്ലാതെ മറ്റു വഴികളുമില്ല. പാത്രക്കടവിനു മേൽഭാഗത്തായി പൂച്ചിപ്പാറയിലെ വനംവകുപ്പിന്‍റെ സംരക്ഷണ ക്യാമ്പിലെത്താൻ ഏകമാർഗവുമാണ് ഈ തൂക്കുപാലം. 1985ൽ സൈലന്‍റ്‌വാലി നാഷണൽ പാർക്കായി പ്ര ഖ്യാപിക്കപ്പെടുന്നതിനു മുൻപുതന്നെ പാലമുണ്ടായിരുന്നു. 2018ലെ പ്രളയത്തിൽ തൂക്കുപാലത്തിന്‍റെ ബാലൻസ് പില്ലർ തകർന്നതോടെ റോപ്പിന്‍റെ പ്രവർത്തനവും നിലച്ചിരുന്നു. 35 മീറ്ററോളം നീളംവരുന്ന തൂക്കുപാലം തീർത്തും ഉപയോഗശുന്യമാണ്. പൂച്ചിപ്പാറ സംരക്ഷണ ക്യാമ്പിൽ എട്ടോളം ജീവനക്കാരാണ് രാപകൽ വ്യത്യാസമില്ലാതെ ജോലി ചെയ്യുന്നത്. എന്നാൽ കഴിഞ്ഞ ആറുവർഷമായി ഇവർ അതിസാഹസികമായി പുഴ നീന്തി കടന്നാണ് ജോലിക്കെത്തുന്നത്.

കിഴക്കഞ്ചേരിയിൽ പന്നികളെ വെടിവച്ചുകൊന്നു

വടക്കഞ്ചേരി: വനംവകുപ്പിന്‍റെ മനുഷ്യ- വന്യജീവി സംഘർഷ ലഘൂകരണ യജ്ഞത്തിന്‍റെ ഭാഗമായി കിഴക്കഞ്ചേരി പഞ്ചായത്തിലെ വിവിധ പാടശേഖരങ്ങളിലെ അഞ്ച് കാട്ടുപന്നികളെ വെടിവച്ചുകൊന്നു. പഞ്ചായത്ത് പ്രസിഡന്‍റ് കവിത മാധവൻ, മെംബർ പോപ്പി ജോൺ എന്നിവരുടെ നേതൃത്വത്തിൽ മംഗലംഡാം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ കെ.എ. മുഹമ്മദ് ഹാഷിം, സെക്്ഷൻ ഫോറസ്റ്റ് ഓഫീസർ എൻ.കെ. കരീം, ബീറ്റ് ഫോറസ്റ്റ് ഓഫീസർമാരായ വി. വിനീത്, യു. രമേഷ്. എൻ. ദിവ്യ, എസ്. അശ്വിനി, സച്ചു, ഫോറസ്റ്റ് ഡ്രൈവർ കെ. മുരളീധരൻ, ഷൂട്ടർമാരായ ബെന്നി പോൾ, ദിലീപ് കുമാർ, പി.ജെ.ജോസഫ്, വാച്ചർമാർ തുടങ്ങിയവരുൾപ്പെടുന്ന സംഘമാണ് രാത്രിസമയം കാവലിരുന്ന് പന്നി പിടുത്തം നടത്തിയത്. നിർമാർജന യജ്ഞ പരിപാടി വരുംരാത്രികളിലും തുടരുമെന്നു വനംവകുപ്പ് അധികൃതർ അറിയിച്ചു.

കോൺഗ്രസ് വിശ്വാസസംരക്ഷണയാത്രയ്ക്ക് ജില്ലയിൽ തുടക്കം

പട്ടാമ്പി: ശബരിമല അയ്യപ്പന്‍റെ സ്വത്ത് കവര്‍ച്ച നടത്തിയവര്‍ ആരായാലും അവരെ പൊതുജനമധ്യത്തിലും നിയമത്തിനുമുന്നിലും കൊണ്ടുവരുന്നതുവരെ പോരാട്ടവുമായി കോണ്‍ഗ്രസ് മുന്നോട്ടുപോകുമെന്നു കോണ്‍ഗ്രസ് പ്രവര്‍ത്തകസമിതി അംഗം കൊടിക്കുന്നില്‍ സുരേഷ് എംപി. ശബരിമലയുടെ ആചാരവും വിശ്വാസവും സംരക്ഷിക്കണമെന്നും സ്വർണക്കവർച്ച നടത്തിയവരെ ശിക്ഷിക്കണമെന്നും ആവശ്യപ്പെട്ട് കോണ്‍ഗ്രസ് നടത്തുന്ന പാലക്കാട് മേഖലാ വിശ്വാസ സംരക്ഷണജാഥയില്‍ പ്രസംഗിക്കുകയായിരുന്നു അദ്ദേഹം. തൃത്താല വെളളിയാങ്കല്ല് യജ്ഞേശ്വര ക്ഷേത്രപരിസരത്ത് നടന്ന ജാഥയുടെ ഉദ്ഘാടന ചടങ്ങില്‍ നൂറുകണക്കിനു വിശ്വാസികള്‍ പങ്കെടുത്തു. നേരത്തേ പന്നിയൂര്‍ വാരാഹമൂര്‍ത്തി ക്ഷേത്രം, വെള്ളിയാങ്കല്ല് യജ്ഞേശ്വര ക്ഷേത്രം, പാക്കനാര്‍കാഞ്ഞിരം എന്നിവിടങ്ങളില്‍ ദര്‍ശനം നടത്തിയശേഷമാണ് ജാഥാ ക്യാപ്റ്റന്‍ കൊടിക്കുന്നിലും ടി.എന്‍. പ്രതാപനും മേഖലാ ജാഥയില്‍ പങ്കെടുക്കാനെത്തിയത്. തൃത്താലയിലെത്തിയ കെപിസിസി പ്രസിഡന്‍റ് സണ്ണി ജോസഫ്, ജാഥാ ക്യാപ്റ്റന്‍ കൊടിക്കുന്നില്‍ സുരേഷ്, ടി.എന്‍. പ്രതാപന്‍ എന്നിവരെ ഡിസിസി പ്രസിഡന്‍റ് എ. തങ്കപ്പന്‍, നേതാക്കളായ വി.ടി. ബല്‍റാം, സി. ചന്ദ്രന്‍, സി.വി. ബാലചന്ദ്രന്‍, പി. ഹരിഗോവിന്ദന്‍, സി.പി. മുഹമ്മദ് തുടങ്ങിയവര്‍ ചേര്‍ന്ന് സ്വീകരിച്ചു.

ജില്ലാ സ്കൂൾ കായികോത്സവത്തിനു ചാത്തന്നൂരിൽ തുടക്കം

ആദ്യദിനം മുണ്ടൂർ ഹൈസ്കൂളിന്‍റെ കുതിപ്പ്; ഉപജില്ലകളിൽ പറളിയുടെ മുന്നേറ്റം കൂറ്റനാട്: ചാത്തന്നൂർ സിന്തറ്റിക് ട്രാക്കില്‍ ജില്ലാ സ്‌കൂള്‍ കായികമേളയുടെ ട്രാക്കുണര്‍ന്നപ്പോള്‍ ആദ്യദിനത്തില്‍ മുണ്ടൂര്‍ ഹൈസ്‌കൂളിന്‍റെ കുതിപ്പ്. വടവന്നൂർ, പറളി സ്കൂളുകൾ തൊട്ടുപിന്നിലുണ്ട്. അഞ്ചു സ്വര്‍ണവും മൂന്നുവെങ്കലവുമായി 37 പോയിന്‍റാണ് ആദ്യദിനത്തിൽ മുണ്ടൂര്‍ എച്ച്എസിലെ താരങ്ങൾ സ്വന്തമാക്കിയത്. മൂന്നു സ്വര്‍ണവും ഏഴുവെള്ളിയും നേടി വടവന്നൂര്‍ വിഎംഎച്ച്എസ് സ്കൂളാണ് രണ്ടാംസ്ഥാനത്ത്. അഞ്ചു സ്വര്‍ണവും രണ്ടു വെള്ളിയും നാലു വെങ്കലവുമായി 35 പോയിന്‍റോടെ പറളി എച്ച്എസാണ് മൂന്നാംസ്ഥാനത്ത്. ഉപജില്ലകളിൽ 114 പോയിന്‍റോടെ പറളി മുന്നേറ്റം തുടങ്ങി. കഴിഞ്ഞ ആറുവര്‍ഷമായി പറളി തന്നെയാണ് ജില്ലാ കീരിടംചൂടുന്നത്. 10 സ്വര്‍ണവും അഞ്ചുവെള്ളിയും ഏഴു വെങ്കലവുമാണ് പറളി ഉപജില്ലയുടെ ആദ്യദിനത്തിലെ നേട്ടം. 49 പോയിന്‍റോടെ കൊല്ലങ്കോട് ഉപജില്ലയും 44 പോയിന്‍റോടെ പാലക്കാട് ഉപജില്ലയുമാണ് രണ്ടും മൂന്നും സ്ഥാനത്തുള്ളത്. രാവിലെ ജില്ലാ വിദ്യാഭ്യാസ ഡപ്യൂട്ടി ഡയറക്ടര്‍ സലീന ബീവി കായികമേളയുടെ പതാക ഉയര്‍ത്തി. പി. മമ്മിക്കുട്ടി എംഎല്‍എ ഉദ്ഘാടനം നിർവഹിച്ചു. തൃത്താല ബ്ലോക്ക് പഞ്ചായത്ത് പ്രസിഡന്‍റ് വി.പി. റജീന അധ്യക്ഷത വഹിച്ചു. 1850 കുട്ടികള്‍ പങ്കെടുക്കുന്ന മേള നാളെ സമാപിക്കും. ജില്ലാ പഞ്ചായത്ത് പ്രസിഡന്‍റ് കെ. ബിനുമോള്‍ സമാപന സമ്മേളനം ഉദ്ഘാടനം ചെയ്യും.

ചിറ്റിലഞ്ചേരി ജപമാലറാണി പള്ളി തിരുനാളിന് ഇന്നു കൊടിയേറും

നെന്മാറ: ചിറ്റില്ലഞ്ചേരി ജപമാലറാണി പള്ളിയിലെ പരിശുദ്ധ ജപമാലറാണിയുടെയും, വിശുദ്ധ സെബാസ്ത്യാനോസിന്‍റെയും സംയുക്ത തിരുനാളിന് ഇന്നു കൊടിയേറും. വൈകുന്നേരം 5.30 ന് നെന്മാറ ക്രിസ്തുരാജ പള്ളി വികാരി ഫാ. സെബാസ്റ്റ്യൻ താമരശ്ശേരിയുടെ കാർമികത്വത്തിൽ കൊടിയേറ്റം നടക്കും. തുടർന്ന് കുർബാനയും ജപമാലയും ലദീഞ്ഞും. നാളെ മുതൽ 24 വരെയുള്ള ദിവസങ്ങളിൽ വൈകുന്നേരം 5. 30ന് വിശുദ്ധ കുർബാനയും ലദീഞ്ഞും ജപമാലയും നടക്കും. 25ന് ജപമാല പ്രയാണ ദിനവും 26ന് പ്രധാന തിരുനാളായും ആഘോഷിക്കും. 27ന് മരിച്ചവർക്കുവേണ്ടിയുള്ള വിശുദ്ധ കുർബാനയോടെ തിരുനാളിനു സമാപനമാകും. വികാരി ഫാ. അൻസൺ കൊച്ചറക്കൽ, കൺവീനർമാരായ നൈജു വടാശ്ശേരി, വർഗീസ് അച്ചാണ്ടി, സോണി പാറയിൽ, കൈകാരന്മാർ അഗസ്റ്റിൻ മഞ്ഞളി, ലൂക്കോസ് കാപ്പിൽ തുടങ്ങിയവർ പരിപാടികൾക്ക് നേതൃത്വം നൽകും.

21 ഗ്രാമപഞ്ചായത്തുകളിലെ സംവരണ വാർഡ് നറുക്കെടുപ്പ് പൂർത്തിയായി

പാലക്കാട്: തദ്ദേശ സ്വയംഭരണ പൊതുതെരഞ്ഞെടുപ്പിനോടനുബന്ധിച്ചുള്ള സംവരണ വാർഡ് നറുക്കെടുപ്പ് പാലക്കാട് കളക്ടറേറ്റ് കോൺഫറൻസ് ഹാളിൽ നടത്തി. മണ്ണാർക്കാട്, പാലക്കാട്, ശ്രീകൃഷ്ണപുരം ബ്ലോക്കുകളുടെ പരിധിയിലുള്ള 21 ഗ്രാമപഞ്ചായത്തുകളിലെ സംവരണ വാർഡുകളുടെ നറുക്കെടുപ്പാണ് ഇതോടെ പൂർത്തിയായത്. ജില്ലാ കളക്ടർ എം.എസ്. മാധവിക്കുട്ടി നറുക്കെടുപ്പ് നിർവഹിച്ചു. രാവിലെ പത്തിനു തുടങ്ങിയ നടപടികൾ ഉച്ചയ്ക്കുശേഷം മൂന്നിനു സമാപിച്ചു. മണ്ണാർക്കാട് ബ്ലോക്കിലെ അലനല്ലൂർ, കരിമ്പ , കോട്ടോപ്പാടം, കുമരംപുത്തൂർ, കാഞ്ഞിരപ്പുഴ, തച്ചമ്പാറ, തെങ്കര, തച്ചനാട്ടുകര തുടങ്ങിയ ഗ്രാമപഞ്ചായത്തുകളിലെയും, പാലക്കാട് ബ്ലോക്കിലെ പിരായിരി, മുണ്ടൂർ, കോങ്ങാട്, കേരളശ്ശേരി, മണ്ണൂർ, മങ്കര, പറളി ഗ്രാമപഞ്ചായത്തുകളിലെയും, ശ്രീകൃഷ്ണപുരം ബ്ലോക്കിലെ കടമ്പഴിപ്പുറം, കരിമ്പുഴ, ശ്രീകൃഷ്ണപുരം, വെള്ളിനേഴി, കാരാകുറിശ്ശി, പൂക്കോട്ടുകാവ് പഞ്ചായത്തുകളിലെയും സംവരണ വാർഡുകളാണ് നറുക്കെടുത്തത്. ഗ്രാമപഞ്ചായത്ത് സെക്രട്ടറിമാരും രാഷ്ട്രീയ പാർട്ടി പ്രതിനിധികളും തെരഞ്ഞെടുപ്പ് വിഭാഗത്തിലെ ഉദ്യോഗസ്ഥരും പങ്കെടുത്തു.

സൈലന്‍റ്‌വാലിയിൽ ആറു തുമ്പികളെക്കൂടി കണ്ടെത്തി

അഗളി: വനംവന്യജീവി വകുപ്പും സൊസൈറ്റി ഫോർ ഒഡോണെറ്റ് സ്റ്റഡീസും സംയുക്തമായി സൈലന്‍റ്‌വാലി നാഷണൽ പാർക്കിൽ നടത്തിയ നാലാമത് തുമ്പി സർവേയിൽ ആറു പുതിയ തുമ്പികളെക്കൂടി കണ്ടെത്തി. 10, 11, 12 തീയതികളിലായി നടന്ന സർവേയിൽ ആകെ 83 ഇനം തുമ്പികളെ കണ്ടെത്താനായി. ഇതോടെ സൈലന്‍റ്‌വാലിയിൽ കണ്ടെത്തിയ തുമ്പികളുടെ വൈവിധ്യം 109 ആയി. പുള്ളിവാലൻ ചോലക്കടുവ, ചൂടൻ പെരുംകണ്ണൻ, നിഴൽ കോമരം, നീലക്കഴുത്തൻ നിഴൽത്തുമ്പി, വയനാടൻ അരുവിയൻ, മഞ്ഞക്കറുപ്പൻ മുളവാലൻ എന്നീ തുമ്പിയിനങ്ങളെയാണ് പുതിയതായി കണ്ടെത്തിയത്. ശുദ്ധജല സൂചകങ്ങളായ അരുവിയൻ തുമ്പികളുടെ സാന്നിധ്യം പ്രദേശത്തെ അരുവികളുടെ ഭദ്രമായ ആരോഗ്യസ്ഥിതി ഉ റപ്പിക്കുന്നതാണെന്ന് സർവേ സംഘം വിലയിരുത്തി. വടക്കൻ അരുവിയൻ, ചെങ്കപ്പൻ അരുവിയൻ, വയനാടൻ അരുവിയൻ എന്നീ മൂന്ന് അരുവിയൻ തുമ്പികളെയും സർവേയിൽ കണ്ടെത്തിയിരുന്നു. പശ്ചിമഘട്ടത്തിലെ ഉയർന്ന മലനിരകളിൽ മാത്രം കണ്ടു വരുന്ന കാട്ടുമുളവാലൻ തുമ്പിയെ കണ്ടെത്താൻ കഴിഞ്ഞത് ശ്രദ്ധേയമായി. പശ്ചിമഘട്ടത്തിൽ മാത്രം കണ്ടുവരുന്ന തുമ്പിയിനങ്ങളായ തീക്കറുപ്പൻ, ചതുപ്പു മുളവാലൻ, വടക്കൻ മുളവാലൻ, നീലക്കഴുത്തൻ നിഴൽത്തുമ്പി, പുള്ളി നിഴൽത്തുമ്പി, കുങ്കുമ നിഴൽത്തുമ്പി എന്നിവയെയും കണ്ടെത്തി. സൈലന്‍റ്‌വാലി റേഞ്ച് അസിസ്റ്റന്‍റ് വൈൽഡ് ലൈഫ് വാർഡൻ വി.എസ്. വിഷ്ണു, ഭവാനി റേഞ്ച് അസിസ്റ്റന്‍റ് വൈൽഡ് ലൈഫ് വാർഡൻ എൻ. ഗണേശൻ എന്നിവരുടെ നേത്യത്വത്തിലുള്ള ഫോറസ്റ്റ് ഉദ്യോഗസ്ഥരും സംസ്ഥാനത്തിന്‍റെ വിവിധ ഭാഗങ്ങളിൽ നിന്നെത്തിയ 37 സന്നദ്ധപ്രവർത്തകരും സർവേയിൽ പങ്കെടുത്തു. തുമ്പി നിരീക്ഷകരായ ഡോ. സുജിത് വി ഗോപാലൻ, ഡോ.വിവേക് ചന്ദ്രൻ, മുഹമ്മദ് ഷെരീഫ്, രഞ്ജിത് ജേക്കബ് മാത്യൂസ്, ജി ചന്ദ്രൻ എന്നിവർ സർവേക്കു നേതൃത്വം നൽകി.

ഞെട്ടൽ വിട്ടുമാറാതെ നിധിന്‍റെ അമ്മ

കല്ലടിക്കോട്‌: അവൻ എന്‍റെ മകനെ കൊന്നു. പോലീസിനോട് ഇങ്ങനെ പറയാൻപോലും ഷൈലയ്ക്കു ത്രാണിയില്ലായിരുന്നു. എന്നുംകാണുന്ന അയൽവാസിയായ ബിനു മകൻ നിധിനെ കൊന്നതു വിശ്വസിക്കാനാകാതെ തേങ്ങുകയായിരുന്നു ആ അമ്മ. മകന്‍റെ മരണവാർത്തയറിഞ്ഞ്‌ പണിസ്ഥലത്തുനിന്ന് അലറിവിളിച്ച് ഓടിയെത്തിയതായിരുന്നു ഷൈല. ചുള്ളിയാംകുളത്തിനു സമീപം മരുതുംകാട്ടിലെ വീടിനുമുമ്പിൽ ഒരാൾ വെടിയേറ്റു മരിച്ചുകിടക്കുന്നുണ്ടെന്നും വേഗം എത്തണമെന്നും സമീപവാസികൾ ഷൈലയെ വിളിച്ച്‌ ആവശ്യപ്പെട്ടപ്പോൾ തന്‍റെ മകനെ കൊന്നയാളാണെന്നു കരുതിയിരുന്നില്ല. കൂലിപ്പണിക്കുപോകുന്ന ഷൈലയും ഒന്നാം വർഷ ബിരുദത്തിനു‌ പഠിക്കുന്ന മകൻ ബേബിയും ഈ വീട്ടിലാണു താമസിക്കുന്നത്‌. വീട്ടുമുറ്റത്ത്‌ എത്തിയപ്പോൾമാത്രമാണ് മകൻ മരിച്ചതറിഞ്ഞത്‌. പൊട്ടിക്കരഞ്ഞ ഷൈലയെ പഞ്ചായത്ത്‌ പ്രസിഡന്‍റ് പി.എസ്‌. രാമചന്ദ്രനും പഞ്ചായത്തംഗം അനിത സന്തോഷും ചേർന്ന് സമീപത്തുനിന്നും മാറ്റി. ബിനുവിന്‍റെ വണ്ടിയിലാണ് പലപ്പോഴും നിധിനും ബേബിയും കവലയിലേക്കു പോകാറുള്ളത്‌.

ബിജെപി തെരഞ്ഞെടുപ്പ് കമ്മിറ്റി ഓഫീസ് ഉദ്ഘാടനം

ഒലവക്കോട്: ബിജെപി അകത്തേത്തറ പഞ്ചായത്ത് തെരഞ്ഞെടുപ്പ് കമ്മിറ്റി ഓഫീസ് ഉദ്ഘാടനം സംസ്ഥാന വൈസ് പ്രസിഡന്‍റ് സി. കൃഷ്ണകുമാർ നിർവഹിച്ചു. പഞ്ചായത്ത് കമ്മിറ്റി പ്രസിഡന്‍റ് ഇ. വിവേക് അധ്യക്ഷത വഹിച്ചു. മലന്പുഴ മണ്ഡലം പ്രസിഡന്‍റ് ജി. സുജിത്, ജനറൽ സെക്രട്ടറി വിപിൻ, ജില്ലാ കമ്മിറ്റി അംഗം മോഹനൻ, സംസ്ഥാന കൗണ്‍സിൽ അംഗം ഉണ്ണികൃഷ്ണൻ, മണ്ഡലം വൈസ് പ്രസിഡന്‍റുമാരായ എസ്. ഷിജു, മല്ലിക, സുബ്രമണ്യൻ, സെക്രട്ടറിമാരായ കെ.കെ. അജയ്, സുധീർ, ഗീത ട്രഷറർ സന്ദീപ് കമ്മിറ്റിയംഗം സന്തോഷ് കുന്നത്, വാർഡ് മെന്പർമാരായ ഐശ്വര്യ, ശ്രീദേവി, സുരേഷ്കുമാർ, പഞ്ചായത്ത് ജനറൽ സെക്രട്ടറി മുരളീധരൻ, വെസ്റ്റ് ഏരിയ പ്രസിഡന്‍റ് ജയപ്രകാശ്, ജനറൽ സെക്രട്ടറി സന്ദീപ്, യുവമോർച്ച ജില്ലാ വൈസ് പ്രസിഡന്‍റ് മാധവദാസ്, രാജഗോപാൽ, സോഹൻ, മണികണ്ഠൻ ആറ്റൂർ എന്നിവർ പ്രസംഗിച്ചു.

ജില്ലാ ആശുപത്രിയിൽ പ്രതിഷേധസംഗമം

പാലക്കാട്: ചികിത്സാപിഴവ് മൂലം നാലാംക്ലാസുകാരിയുടെ പ്ലാസ്റ്ററിട്ട കൈ മുറിച്ചുമാറ്റിയ സംഭവത്തിൽ കുറ്റക്കാരനായ ഡോക്ടർക്കെതിരെ നിയമനടപടികൾ സ്വീകരിക്കണമെന്നും ആശുപത്രി അന്വേഷണസംഘം കുറ്റക്കാരാണെന്ന് കണ്ടെത്തിയ രണ്ട് ജൂണിയർ ഡോക്ടർമാരെ സസ്പെൻഡ് ചെയ്തതിന്‍റെയടിസ്ഥാനത്തിൽ പലപ്രാവശ്യം ഒപി ബഹിഷ്കരിക്കുന്ന ഡോക്ടർമാർക്കെതിരെ നടപടികൾ സ്വീകരിക്കണമെന്നും ആവശ്യപ്പെട്ട് പാലക്കാട് ഗവ. മെഡിക്കൽ കോളജ് സമരസമിതിയുടെ നേതൃത്വത്തിൽ ജില്ലാ ആശുപത്രിയിൽ പ്രതിഷേധസംഗമം നടത്തി. വിളയോടി ശിവൻകുട്ടി ഉദ്ഘാടനം ചെയ്തു. ഡോക്ടർമാരുടെ ഒപി ബഹിഷ്കരണ സമരങ്ങൾ സാധാരണ ജനങ്ങളോടുള്ള വെല്ലുവിളിയും കടുത്ത മനുഷ്യാവകാശ ലംഘനവും പ്രാകൃതവുമാണെന്നും ജനങ്ങളെ അണിനിരത്തി അതിനെ ചെറുത്തുതോൽപ്പിക്കുമെന്നും സംഘടന മുന്നറിയിപ്പ് നൽകി. സമര സമിതി ചെയർമാൻ ആറുമുഖൻ പത്തിച്ചിറ, കണ്‍വീനർ റെയ്മന്‍റ് ആന്‍റണി, പുതുശേരി ശ്രീനിവാസൻ, സജീഷ് കുത്തന്നൂർ, എ. രമേഷ്കുമാർ, എ.എൻ. കരുന്തരപ്പുള്ളി, ബോബൻ മാട്ടുമന്ത, ഹിമേഷ് കുത്തന്നൂർ, ബാലചന്ദ്രൻ പോത്തയൻകാട്, കാർത്തികേയൻ മംഗലം, എം. അഖിലേഷ്കുമാർ, സി. വിജയകുമാർ, എസ്. സഹാവുദ്ദീൻ, കനകൻ, കെ.കെ. രാജൻ കാഞ്ഞിരപ്പുഴ, സി. രാമചന്ദ്രൻ, വി. മണി, ജയൻ മന്പറം, പാണ്ടിയോട് പ്രഭാകരൻ പ്രസംഗിച്ചു.

ട്രിനിറ്റി സ്കൂളിൽ ബോധവത്കരണറാലി നടത്തി

കോയമ്പത്തൂർ: ട്രിനിറ്റി മെട്രിക്കുലേഷൻ ഹയർ സെക്കൻഡറി സ്കൂളിൽ സാമൂഹ്യബോധവത്കരണ റാലി നടത്തി. കോയമ്പത്തൂർ സിറ്റി ട്രാഫിക് അസിസ്റ്റന്‍റ് പോലീസ് കമ്മീഷണർ തിരുനാവുക്കരശ്, ട്രാഫിക് ബോധവത്കരണറാലി ഉദ്ഘാടനം ചെയ്തു. റോഡ് സുരക്ഷ, ലഹരിവിരുദ്ധം, പരിസ്ഥിതി സംരക്ഷണം, സ്ത്രീ സുരക്ഷ, ശാന്തി -സമാധാനം, എന്നിവയ്ക്കു വേണ്ടിയാണ് റാലി നടത്തിയത്. സ്കൂൾ കറസ്പോണ്ടന്‍റ് ഫാ. മാർട്ടിൻ പട്ടരുമഠത്തിൽ, പ്രിൻസിപ്പൽ ഡോ.ജെ. ധനലക്ഷ്മി, സെക്രട്ടറി കെ.എ. കുരിയച്ചൻ, അധ്യാപകർ, വിദ്യാർഥികൾ തുടങ്ങിയവർ റാലിയിൽപങ്കെടുത്തു.

സംസ്ഥാന സീനിയർ ഫുട്ബോൾ ചാന്പ്യൻഷിപ്പ്: ജില്ലാടീമിനെ പ്രഖ്യാപിച്ചു

പാലക്കാട്: എറണാകുളം മഹാരാജാസ് ഗ്രൗണ്ടിൽ നടക്കുന്ന അറുപത്തിഒന്നാമത് സംസ്ഥാന സീനിയർ ഫുട്ബോൾ ചാന്പ്യൻഷിപ്പിനുള്ള പാലക്കാട് ജില്ലാടീമിനെ പ്രഖ്യാപിച്ചു. കഴിഞ്ഞവർഷം നടന്ന നാഷണൽ ഗെയിംസിൽ ചാന്പ്യന്മാർ ആയിരുന്ന കേരള ടീം താരം കെ. മഹേഷ് ആണ് ക്യാപ്റ്റൻ. തമിഴ്നാട് മുൻ സന്തോഷ് ട്രോഫി താരവും ഇന്ത്യൻ ബാങ്കിന്‍റെ കളിക്കാരനും ആയിരുന്ന അബ്ദുൾ അജിത് ആണ് ടീം കോച്ച്. ടീം മാനേജർ എ. അരുണ്‍. കണ്ണൂരുമായി 17 ന് ആണ് പാലക്കാടിന്‍റെ ആദ്യ മത്സരം. സന്തോഷ് ട്രോഫി മത്സരങ്ങൾക്ക് ഉള്ള കേരളടീമിനെ ഈ ടൂർണമെന്‍റിൽ നിന്ന് തെരഞ്ഞെടുക്കും. ടീം അംഗങ്ങൾ- ജി. അഭിജിത്, കെ. മഹേഷ്, ഇബ്നു ഷഹാരത്ത്, ടി.പി. യദുകൃഷ്ണൻ, മഹേഷ് മോഹനൻ, എസ്. ഷാനവാസ്, എ. അനൂപ്, എ. രഞ്ജിത്, സി.‍യു. ഫാമിസ്, വിഷ്ണു വിനേഷ്, കെ.എം. അഭിജിത്, എസ്. ശ്രീകാന്ത്, കെ. അഭിജിത്, എ. മുഹമ്മദ് ആഷിഫ്, പി. സരത്, മുഹമ്മദ് അംജദ്, യു. വൈശാഖ്, പി.എം. സജിത്, കെ.വി. ആദിത്യ, പി. സദക്കത്തുള്ള.

മർച്ചന്‍റ്സ് അസോസിയേഷൻ മേഖലായോഗം

നെന്മാറ: അടിപ്പെരണ്ട മർച്ചന്‍റ്സ് അസോസിയേഷൻ കരിമ്പാറ മേഖലയോഗം ചേർന്നു. നികുതി വെട്ടിച്ചുള്ള ഓൺലൈൻ വ്യാപാരവും ലൈസൻസ് ഇല്ലാത്ത വഴിയോര കച്ചവടം എന്നിവ മൂലം വ്യാപാരികൾക്ക് ഉണ്ടാകുന്ന ബുദ്ധിമുട്ട് യോഗം ചർച്ച ചെയ്തു. ടൂറിസം വികസനത്തിനും വ്യാപാരത്തിനും തടസമായി നിൽക്കുന്ന നെന്മാറ-ഒലിപ്പാറ റോഡ് നവീകരണം വേഗം പൂർത്തിയാക്കണമെന്നും ജിഎസ്ടി പരിഷ്കരണത്തിലെ ഇളവ് സാധനങ്ങൾ മുൻകൂട്ടി വാങ്ങിച്ച വ്യാപാരികൾക്ക് ലഭ്യമാക്കാൻ നടപടി ഉണ്ടാവണമെന്നും കയറാടി, കരിമ്പാറ, പറയമ്പളം, കോപ്പംകുളമ്പ് മേഖലകളിൽ വർധിച്ചുവരുന്ന വന്യമൃഗശല്യത്തിന് ശാശ്വതപരിഹാരം കാണണമെന്നും, വൈകുന്നേരം വ്യാപാരസ്ഥാപനങ്ങൾ തുറന്നിരിക്കുന്നതിന് വന്യമൃഗങ്ങൾ ഭീഷണിയാവുന്നതായും അംഗങ്ങൾ പരാതിപ്പെട്ടു. തെരുവുവിളക്കുകൾ കത്തിക്കുക തുടങ്ങിയ ആവശ്യങ്ങളും ഉന്നയിച്ചു. മുതിർന്ന അംഗങ്ങളെ ചടങ്ങിൽ ആദരിച്ചു. മർച്ചന്‍റ്സ് അസോസിയേഷൻ ജില്ലാ ട്രഷറർ ഹുസൈൻകുട്ടി യോഗം ഉദ്ഘാടനം ചെയ്തു. അടിപ്പെരണ്ട യൂണിറ്റ് വൈസ് പ്രസിഡന്‍റ് അബ്ദുൾ റഹ്മാൻ മരുതംചേരി അധ്യക്ഷനായി. യൂണിറ്റ് കൺവീനർ പി. ഗംഗാധരൻ പറയമ്പള്ളം റിപ്പോർട്ട് അവതരിപ്പിച്ചു. മോഹനൻ കരിമ്പാറ, ലിബിൻ ശശി തോടുകാട്, പി. ഇസ്ഹാക്ക് കരിമ്പാറ, സുലൈമാൻ ചക്രായി, കെ. സുദേവൻ, എം. സന്തോഷ്, രാധാകൃഷ്ണൻ കോപ്പൻകുളമ്പ് എന്നിവർ പ്രസംഗിച്ചു.

കത്തോലിക്ക കോൺഗ്രസ് അവകാശസംരക്ഷണയാത്ര; സംഘാടകസമിതി യോഗം ചേർന്നു

പാലക്കാട്: ന്യൂനപക്ഷ അവകാശങ്ങൾ സംരക്ഷിക്കുന്നതിന് കത്തോലിക്ക കോൺഗ്രസ് പ്രതിജ്ഞാബദ്ധമാണെന്ന് രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ പറഞ്ഞു. ന്യൂനപക്ഷ അവകാശങ്ങളിൽ വെള്ളം ചേർക്കുവാനുള്ള പരിശ്രമങ്ങൾ അനുവദിക്കില്ല. കാസർഗോഡ് മുതൽ തിരുവനന്തപുരം വരെ കത്തോലിക്ക കോൺഗ്രസ് സംഘടിപ്പിക്കുന്ന അവകാശ സംരക്ഷണ യാത്രയുടെ സംഘാടകസമിതി യോഗത്തിൽ മുഖ്യപ്രഭാഷണം നടത്തുകയായിരുന്നു ഫാ. ചെറിയാൻ ആഞ്ഞിലിമൂട്ടിൽ. നീതി ഔദാര്യമല്ല അവകാശമാണ് എന്ന മുദ്രാവാക്യവുമായി 12 മുതൽ 24 വരെയാണ് അവകാശ സംരക്ഷണയാത്ര സംഘടിപ്പിച്ചിട്ടുള്ളത്. 17ന് മണ്ണാർക്കാടും വടക്കഞ്ചേരിയിലും ജാഥയ്ക്ക് സ്വീകരണം നൽകും. രൂപത പ്രസിഡന്‍റ് അഡ്വ. ബോബി ബാസ്റ്റിൻ അധ്യക്ഷത വഹിച്ചു. ജനറൽ സെക്രട്ടറി ആന്‍റണി കുറ്റിക്കാടൻ, ട്രഷറർ ജോസ് മുക്കട, ജോമി മാളിയേക്കൽ, ജോസ് വടക്കേക്കര, ബെന്നി ചിറ്റേട്ട്, ബെന്നി മറ്റപ്പള്ളി, വിൽസൺ കൊള്ളന്നൂർ, ജോസ് കാഞ്ഞിരത്തിങ്കൽ, ദീപ ബൈജു, ഷേർളി റാവു, ജോസ് നീലങ്കാവിൽ, ജോബി മാസ്റ്റർ, ഷാജി ചക്കാലക്കൽ തുടങ്ങിയവർ പ്രസംഗിച്ചു.

കരിങ്കുന്നത്തെ ടാര്‍ മിക്സിംഗ് പ്ലാന്‍റിനെതിരേ പ്രദേശവാസികള്‍ പ്രക്ഷോഭത്തിനിറങ്ങുന്നു

വടക്കഞ്ചേരി: പ്രദേശവാസികൾക്ക് രോഗകാരണമാകുന്ന തേനിടുക്കിനടുത്ത് കരിങ്കുന്നത്തെ ടാര്‍ മിക്സിംഗ് പ്ലാന്‍റിനെതിരെ നാട്ടുകാർ പ്രക്ഷോഭത്തിനിറങ്ങുന്നു. ഇതിന്‍റെ ഭാഗമായി സമീപത്തെ ഗാന്ധിഗ്രാമം റസിഡൻഷ്യൽ അസോസിയേഷന്‍റെ നേതൃത്വത്തിൽ ജില്ലാ കളക്ടർ, മലിനീകരണ നിയന്ത്രണ ബോർഡ് തുടങ്ങിയവർക്ക് പരാതി നൽകി. മലിനീകരണ നിയന്ത്രണബോർഡിന്‍റെ കുറ്റകരമായ അനാസ്ഥയാണ് പ്രദേശവാസികളെ മാറാരോഗികളാക്കുന്ന പ്ലാന്‍റിന്‍റെ പ്രവർത്തനത്തിന് പിന്നിലെന്ന ആക്ഷേപമാണ് താമസക്കാർ ഉന്നയിക്കുന്നത്. മാനദണ്ഡങ്ങൾ പാലിക്കാതെ പ്രവർത്തിക്കുന്ന പ്ലാന്‍റ് നടത്തിപ്പിനെതിരെ നടപടി എടുക്കാമെന്നിരിക്കെ അതുചെയ്യാതെ സാങ്കേതികത്വം പറഞ്ഞ് അനധികൃത നടപടികൾക്ക് കൂട്ടുനിൽക്കുകയാണെന്നാണ് ആരോപണം. ഇതിനെതിരെ അടുത്ത ദിവസം മുതൽ ശക്തമായ സമരപരിപാടികൾ ആരംഭിക്കാനാണ് പ്രദേശത്തെ കുടുംബങ്ങളുടെ തീരുമാനം. പ്ലാന്‍റ് പ്രവർത്തിക്കുമ്പോൾ ദുസഹമായ ഗന്ധമാണ് ഉയരുക. ഇത് രണ്ട് കിലോമീറ്റർ ചുറ്റളവിൽ വ്യാപിക്കുന്ന സ്ഥിതിയാണ്. കഠിനമായ പുക പുറത്തേക്ക് തള്ളി പ്രദേശത്തെ കാർഷിക വിളകൾക്കും നാശമുണ്ടാകുന്നതായി താമസക്കാർ പറയുന്നു. തുടർച്ചയായി പുകയടിച്ച് വൃക്ഷങ്ങളുടെ ഇലകളെല്ലാം കറുപ്പ് വർണമായി. വളർച്ച മുരടിക്കും. പ്ലാന്‍റിൽ നിന്നുള്ള മാലിന്യപുക ശ്വസിച്ച് പ്രായമായവരും കുട്ടികളും ഉള്‍പ്പെടെ രോഗികളാകുന്ന ഗുരുതരമായ പ്രശ്നമായി മാറിയിരിക്കുകയാണ്. തലകറക്കം, തലവേദന, വയറിളക്കം, ഛര്‍ദി തുടങ്ങിയ ലക്ഷണങ്ങളാണ് കാണപ്പെടുന്നത്. പുക ശ്വസിച്ച് ശ്വാസം മുട്ടൽ അനുഭവപ്പെട്ട് ഏതാനും താമസക്കാർ ബന്ധുവീടുകളിലേക്ക് താമസം മാറിയ സാഹചര്യവുമുണ്ട്. മംഗലംഡാം ഉറവിടമാക്കിയുള്ള കുടിവെള്ള പദ്ധതിയുടെ ഒരു മെയിൻ ടാങ്ക് ഈ പ്ലാന്‍റിനടുത്താണ്. പുക നിയന്ത്രണ സംവിധാനങ്ങളില്ലാതെ പ്ലാന്‍റ് പ്രവർത്തിക്കുന്നത് തുടർന്നാൽ അത് കുടിവെള്ളം മലിനമാകാനും അതുവഴി കൂടുതൽ പ്രദേശങ്ങളിലേക്ക് രോഗവ്യാപനത്തിനും വഴിവക്കുമെന്ന് ചൂണ്ടിക്കാട്ടുന്നു. ജനങ്ങൾക്ക് ബുദ്ധിമുട്ട് ഉണ്ടാകാത്ത വിധം പ്ലാന്‍റ് പ്രവർത്തിപ്പിക്കാൻ ബന്ധപ്പെട്ടവർ അടിയന്തരനടപടി സ്വീകരിക്കണമെന്നാണ് ആവശ്യം. അപ്പോളോ ടയര്‍ കമ്പനി ചെയ്യുന്ന രീതിയില്‍ പ്ലാന്‍റിൽ നിന്നുള്ള പുക വെള്ളത്തിലേക്ക് വിട്ട് ലയിപ്പിച്ചാല്‍ മണമുണ്ടാകില്ലെന്ന് പറയുന്നു. എന്നാല്‍ ഇത്തരത്തിലുള്ള യാതൊരു മുന്‍കരുതലുകളും സ്വീകരിക്കാതെയാണ് പ്ലാന്‍റ് പ്രവർത്തിക്കുന്നത്. പ്ലാന്‍റിന്‍റെ പ്രവർത്തനം നിര്‍ത്തിവെപ്പിക്കണമെന്ന് ഗാന്ധി ഗ്രാമം റസിഡന്‍ഷ്യല്‍ അസോസിയേഷന്‍ ആവശ്യപ്പെട്ടു. പ്രസിഡന്‍റ് ബെന്നി വര്‍ഗീസ്, സെക്രട്ടറി പി.കെ. ബാബു, ട്രഷറര്‍ ടി.എന്‍. രാജേന്ദ്രന്‍, ജോയിന്‍റ് സെക്രട്ടറി പ്രിന്‍സ് മാത്യു, ജോണ്‍സണ്‍ മാത്യു, വര്‍ഗീസ് ചുമ്മാര്‍, ജ്യോതികുമാർ, കെ.എം. ജലീല്‍, പി.എ. ഫിലിപ്പ്, സുനില്‍ ചാക്കോ, വിശാഖ്, പയസ് എന്നിവർ പ്രസംഗിച്ചു.

ഒലിപ്പാറ റോഡ് നവീകരണം ഇഴയുന്നു; പൊടിയിൽകുളിച്ച് യാത്രികരും നാട്ടുകാരും

നെന്മാറ: നെന്മാറ- ഒലിപ്പാറ പാത നവീകരണത്തിൽ ദുരിതത്തിലായി പ്രദേശവാസികൾ. റോഡ് നവീകരണത്തിന്‍റെ ഭാഗമായി ഉപരിതലംപൊളിച്ച് മെറ്റലും പാറപ്പൊടിയും വിരിച്ച റോഡിൽ വാഹനങ്ങൾ കടന്നുപോകുമ്പോൾ പൊടിപടലം ഉയരുന്നതാണ് ദുരിതമാകുന്നത്. കണിമംഗലംമുതൽ തിരുവഴിയാട് വരെയുള്ള ആറുകിലോമീറ്റർ ദൂരത്താണ് ഈ ദുരവസ്ഥ. വാഹനം കടന്നുപോയാൽ സമീപത്തെ വീടുകളിലും കിണറുകളിലുമടക്കം പൊടിപടലംമൂടും. വലിയ വാഹനങ്ങൾ കടന്നുപോയാൽ ഇരുചക്ര വാഹനങ്ങളിൽ യാത്രചെയ്യാൻ പോലുമാകില്ല. കല്ലുകൾ ഇളകി കിടക്കുന്നതിനാൽ ഇരുചക്രവാഹനങ്ങൾ തെന്നിവീഴുന്നതും പതിവാണ്. റോഡരികിലെ വീട്ടുകാർ പൊടിശല്യം ഒഴിവാക്കാൻ സാരികളും പ്ലാസ്റ്റിക് ഷീറ്റുകളും മറ്റുംകെട്ടി ജനലുകളും വാതിലുകളും കിണറും അടച്ചുസൂക്ഷിക്കുകയാണ്. വലിയ വാഹനങ്ങൾ കടന്നു പോയാൽ ഹെൽമെറ്റ് ധരിച്ചവർക്ക് ഗ്ലാസ് മുഴുവൻ പൊടിയിൽ കുളിക്കുന്നതിനാൽ ഗ്ലാസ് തുടച്ചുമാറ്റിയശേഷം മാത്രമേ യാത്രതുടരാൻ കഴിയൂ. ബസിൽ സഞ്ചരിക്കുന്നവരുടെയും ഇരുചക്രവാഹനക്കാരുടെയും വസ്ത്രങ്ങളിലും കണ്ണിലും പൊടിവീഴുന്നതും ദുരിതം കൂട്ടുന്നു. ടാങ്കർ ലോറിയിൽ വെള്ളം കൊണ്ടുവന്ന് ദിവസം നാലുപ്രാവശ്യമെങ്കിലും നനച്ച് പൊടിശല്യത്തിനു പരിഹാരം കാണണമെന്നാണ് നാട്ടുകാരുടെ ആവശ്യം.

രാത്രിയിൽ ഈ ശ്മശാനത്തിൽ...

എം.വി. വസന്ത് പാലക്കാട്: പതിനാലേക്കർവരുന്ന പൊതുശ്മശാനത്തിൽ രാത്രികാലങ്ങളിൽ വിലസുന്നതു വിലാസിനിയും മണവാട്ടിയും അടക്കമുള്ളവർ!. ഭയപ്പെടേണ്ട, ഇവരെല്ലാവരും നമുക്ക് പ്രിയപ്പെട്ടവർതന്നെ. പകൽപോലും ശ്മശാനക്കാട്ടിൽ പോകാൻ പലരും ഭയപ്പെടുന്പോഴാണ് ഒരുകൂട്ടം ആളുകൾ രാത്രിയിൽ ഇവിടെയെത്തിയത്. പ്രേത, ഭൂത, പിശാചുക്കളെ കണ്ടെത്തി ഉച്ചാടനം ചെയ്യാനല്ല, മറിച്ച് രാത്രിയിലെ അന്തേവാസികളുടെ ക്ഷേമത്തിനു പുത്തൻപച്ചപ്പൊരുക്കാൻ... പാലക്കാട് നഗരത്തിലെ ഏറ്റവും വലിയ പച്ചത്തുരുത്തായ മാട്ടുമന്ത പൊതുശ്മശാനത്തിൽ ഇത്തവണ പരിസ്ഥിതിസംഘടനകളുടെ സർവേ നടത്തിയതു രാത്രിയിൽ. "വനംതുരുത്തുകളിലുമുണ്ട് അപൂർവ അതിഥികൾ' എന്ന ദീപിക വാർത്തയുടെ ചുവടുപിടിച്ചായിരുന്നു സർവേ. പുനർജനി പരിസ്ഥിതിസംഘടന, നാച്ചുറൽ ഹിസ്റ്ററി സൊസൈറ്റി ഓഫ് പാലക്കാട്, അകത്തേത്തറ ഗ്രാമപഞ്ചായത്ത് ബയോഡൈവേഴ്സിറ്റി മാനേജ്മെന്‍റ് കമ്മിറ്റി, സഹ്യാദ്രി നേച്ചർ ഓർഗനൈസേഷൻ, പരിസ്ഥിതി ഐക്യവേദി എന്നീ സംഘടനകൾ സംയുക്തമായാണ് സർവേ നടത്തിയത്. വൈകുന്നേരം നാലിന് ആരംഭിച്ച സർവേ രാത്രി പത്തിനാണ് സമാപിച്ചത്. വിലാസിനിയും കൂട്ടരും സർവേയിൽ കണ്ടെത്തിയത് 64 ഇനം പക്ഷികളെ. മുപ്പതിനം പൂന്പാറ്റകളും അപൂർവയിനം തുന്പികളും വിവിധയിനം തവളകളും അരണയും പല്ലിയും പ്രാണികളുമെല്ലാം സർവേയിൽ കണ്ടെത്താനായി. മീൻകൂമൻ, കാലൻകോഴി, ചെവിയൻനത്ത്, കാവി തുടങ്ങിയ പക്ഷികളുടെ വരവും പോക്കുമെല്ലാം സർവേ നടത്തിയവർക്കു ഹരമായി. ഗരുഡശലഭം, വിലാസിനി, മഞ്ഞപ്പാപ്പാത്തി, ചിന്നപ്പുൽച്ചാടൻ, നീലക്കടുവ ഇനത്തിൽപെട്ട പൂന്പാറ്റകളും മഞ്ഞക്കാലി പാൽതുമ്പി, നാട്ടുപുൽച്ചിന്നൻ, പച്ചവ്യാളി, തുലാത്തുമ്പി തുടങ്ങിയ തുന്പിയിനങ്ങളും ദൃശ്യവിരുന്നായി. സ്വർണകുറുവായൻ, ചിത്രത്തവള, വർണബലൂൺ തവള, മണവാട്ടിത്തവള, പാറത്തവള, വയനാടൻ കരിയിലത്തവള, ഇലത്തവള, ചെങ്കൽചിലപ്പൻ, ചിലുചിലപ്പൻ, വയൽത്തവള തുടങ്ങി ഇരുപതോളം തവളകളും പച്ചയോന്ത്, നാട്ടുമരപ്പല്ലി, പൊന്നൻമരപ്പല്ലി, പുള്ളിപല്ലി, വരയൻപല്ലി, ചെമ്പൻഅരണ, കാട്ടരണ, പാമ്പരണ, കുട്ടിവിരലൻപല്ലി തുടങ്ങിയവയെല്ലാം കാഴ്ചവട്ടമൊരുക്കി. ഭീകരത, ശ്മശാനത്തോളം മൂന്നു പതിറ്റാണ്ടുമുന്പ് കാടുപിടിച്ചു കിടന്നിരുന്ന മാട്ടുമന്ത ശ്മശാനത്തിനകത്തു കടക്കാൻ ആരും ധൈര്യപ്പെട്ടിരുന്നില്ല.പാമ്പുകളും മുയലുകളും കുറുക്കനും കീരിയും ഉടുന്പും പന്നിയും ഉൾപ്പെടെയുള്ള മൃഗങ്ങളുടെ വിഹാരകേന്ദ്രമായിരുന്നു ശ്മശാനം. നഗരം കേന്ദ്രീകരിച്ച് ഭൂമിക്കച്ചവടം ശക്തിപ്പെട്ടതോടെ ശ്മശാനത്തോടു ചേർന്നുള്ള കാടുകളും പിന്നീട് ശ്മശാനവും വെട്ടിത്തെളിക്കുകയുണ്ടായി. തരിശായി കിടന്ന ശ്മശാനഭൂമിയിൽ 15 വർഷങ്ങൾക്ക് മുന്പാണ് മാട്ടുമന്തയിലെ യുവാക്കൾ വനവത്കരണവുമായി രംഗത്തെത്തിയതും ചെറുവനമായി രൂപപ്പെടുത്തിയതും. മുക്കൈപ്പുഴയുടെ സാന്നിധ്യം ശ്മശാനഭൂമിയിലെ ജൈവവൈവിധ്യത്തിനും മുതൽക്കൂട്ടായെന്നു പരിസ്ഥിതിസ്നേഹികൾ പറയുന്നു. ജില്ലയിലെ വിവിധ പച്ചത്തുരുത്തുകളുടെ ജൈവവൈവിധ്യം രേഖപ്പെടുത്തുന്നതിനായി പാലക്കാട് നാച്ചുറൽ ഹിസ്റ്ററി സൊസൈറ്റി വിവിധ സംഘടനകളുമായി സഹകരിച്ച് നടത്തുന്ന യജ്ഞത്തിന്‍റെ ഭാഗമായാണ് മാട്ടുമന്ത ശ്മശാനത്തിൽ കഴിഞ്ഞദിവസം സര്‍വേ നടത്തിയത്. ആർ.അശ്വതി, അഡ്വ. ലിജോ പനങ്ങാടൻ, ഡോ. വിവേക് വൈദ്യനാഥൻ, എസ്. അരുൺ, വിവേക് സുധാകരൻ എന്നിവർ നേതൃത്വം നൽകിയ പരിപാടിയിൽ ലതിക അനോത്ത്, ഡോ. രാജേഷ് രാധാകൃഷ്ണൻ, സേതുമാധവൻ, നന്ദൻ കോട്ടായി, ദീപം സുരേഷ്, ബോബൻ മാട്ടുമന്ത, അശ്വജിത്ത്, അജീഷ്, രുദ്ര,വേണു, അനുരൂപ, ഡോ. അഭിജിത്ത് മോഹൻ, രവി കാവുങ്കൽ, നവനീത് നമ്പ്യാർ, രാധാകൃഷ്ണൻ,ഹരി, ആർ. സതീഷ്, കെ. രാജേഷ് എന്നിവർ പങ്കെടുത്തു.

സർവീസ് റോഡിലേക്കു തിരിയാൻ സൂചനാബോർഡും വെളിച്ചവുമില്ല

വടക്കഞ്ചേരി: വടക്കഞ്ചേരി- മണ്ണുത്തി ആറുവരി ദേശീയപാതയിൽനിന്നു സർവീസ് റോഡിലേക്കു പ്രവേശിക്കുന്ന ജംഗ്ഷനുകളിൽ മതിയായ സൂചനാബോർഡുകളോ വെളിച്ചമോ ഇല്ലാത്തത് അപകടങ്ങൾക്കു കാരണമാകുന്നതായി പരാതി. പാലക്കാട് ലൈനിൽ ഹോട്ടൽ ഡയാനയ്ക്കടുത്ത ജംഗ്ഷനിലും മംഗലംപാലത്തിനടുത്തെ ജംഗ്ഷനിലുമാണ് അപകടങ്ങൾ തുടരുന്നത്. പന്നിയങ്കര ടോൾപ്ലാസ കടന്ന് വടക്കഞ്ചേരിയിലേക്കും മംഗലംഡാം, കിഴക്കഞ്ചേരി, നെന്മാറ തുടങ്ങി സംസ്ഥാനപാതയിലേക്കും പോകേണ്ട വാഹനങ്ങൾക്ക് സർവീസ് റോഡിലേക്കു തിരിയേണ്ട സ്ഥലം ദൂരെനിന്നുതന്നെ അറിയാൻ കഴിയാത്തതാണ് പ്രശ്നമാകുന്നത്. ഡയാനയ്ക്കടുത്ത ജംഗ്ഷനിൽ വടക്കഞ്ചേരിയെന്ന് സൂചന നൽകുന്ന വളരെ ചെറിയ ബോർഡാണ് സ്ഥാപിച്ചിട്ടുള്ളത്. സ്ഥിരമായി പോകുന്നവർക്കുമാത്രമേ ഈ ബോർഡ് കാണാനാകൂ. രാത്രിസമയം ഇവിടെ വെളിച്ചമില്ലാത്തതിനാൽ ദൂരസ്ഥലങ്ങളിൽനിന്നുവരുന്നവർ തിരിയേണ്ട കവല കാണാനാകാതെ മുന്നോട്ടുപോയി മേൽപ്പാലത്തിൽ കയറി വഴിതെറ്റുന്ന സ്ഥിതിയാണ്. മംഗലം പാലത്തിനടുത്ത കവലയിൽ സൂചനാബോർഡോ വെളിച്ചമോ ഇല്ല. സർവീസ് റോഡുകളിൽ വാഹനങ്ങൾ നിർത്തിയിടുന്നതും അപകടങ്ങൾക്കു കാരണമാകുന്നുണ്ട്.

ബൈപാസ് റോഡുകൾ പ്രഖ്യാപനത്തിൽ ഒതുങ്ങി: വീർപ്പുമുട്ടി നെന്മാറ ടൗൺ

ജോജി തോമസ് നെന്മാറ: അന്തർസംസ്ഥാനപാത കടന്നുപോകുന്ന നെന്മാറ ടൗൺ ഗതാഗതക്കുരുക്കിൽ വീർപ്പുമുട്ടുന്നു. പാതനവീകരണവും ബൈപാസ് നിർമാണവും പത്തുവർഷമായിട്ടും എങ്ങുമെത്തിയില്ല. പ്രതിദിനം എണ്ണായിരത്തിലേറെ വാഹനങ്ങൾ കടന്നുപോകുന്ന ഈ പാതയിൽ ഗതാഗതക്കുരുക്ക് ഒഴിവാക്കുന്നതിനായി 2016 ൽ നെന്മാറയിൽ ബൈപാസ് റോഡിനു ബജറ്റിൽ നിർദേശം വന്നെങ്കിലും ഒന്പതുവർഷങ്ങൾക്കുശേഷവും പ്രാരംഭനടപടികൾപോലുമായില്ല. വാഹനഗതാഗതവും ജനപ്പെരുപ്പവും വർധിച്ചതോടെ പത്തുവർഷംമുമ്പ് പ്രഖ്യാപിച്ച ബൈപാസ് റോഡുപോലും മതിയാകാത്ത സ്ഥിതിയാണ്. 2007-നു ശേഷം മംഗലം- ഗോവിന്ദാപുരം സംസ്ഥാനപാതയിൽ സമ്പൂർണ നവീകരണം നടന്നിട്ടില്ല. ഇടയ്ക്ക് കുഴിയടയ്ക്കലും അറ്റകുറ്റപ്പണികൾ നടത്തലും മാത്രമാണ് നടന്നിട്ടുള്ളത്. 18 വർഷമായിട്ടും റോഡ് വീതികൂട്ടലോ മറ്റു നടപടികളുമുണ്ടായിട്ടില്ല. ഫണ്ട് ലഭിക്കുന്ന മുറയ്ക്ക് ഒന്നോരണ്ടോ വർഷംകൂടുമ്പോൾ മൂന്നും രണ്ടുംമൂന്നും കിലോമീറ്റർ ദൈർഘ്യത്തിൽ താത്കാലിക ഉപരിതലം പുതുക്കൽമാത്രമാണ് നടക്കുന്നത്. നടപ്പാതപോലുമില്ലാതെ റോഡിൽ കിട്ടാവുന്ന രീതിയിൽ ടാർചെയ്ത് പലപ്പോഴായി വീതികൂട്ടിയതൊഴിച്ചാൽ മറ്റൊന്നും നടന്നില്ല. എന്നാൽ, റോഡ് അതിർത്തിവരെ ടാർചെയ്ത പല സ്ഥലങ്ങളിലും അഴുക്കുചാൽ ഇല്ലാത്തതും റോഡിലേക്ക് തള്ളി നിൽക്കുന്ന വൈദ്യുതതൂണുകൾ മാറ്റാത്തതും യാത്രാദുരിതമായി തുടരുന്നു. നിലവിൽ മഴപെയ്താൽ റോഡിൽ വെള്ളക്കെട്ടുണ്ടാകുന്ന രീതിയിൽ അഴുക്കുചാലുകൾ പോലും പലയിടത്തും മൂടി കിടക്കുകയാണ്. അന്തർസംസ്ഥാന പാതയിൽ 2009-ൽ കൊല്ലങ്കോട്ടും ബൈപാസുകൾ നിർമിക്കുമെന്നു പ്രഖ്യാപിച്ചുവെങ്കിലും അതും പ്രഖ്യാപനത്തിലൊതുങ്ങി. ഭാരതമാല പദ്ധതിയിലുൾപ്പെടുത്തി ദേശീയപാതനിലവാരത്തിലേക്കുയർത്തുമെന്ന വാഗ്ദാനം വന്നുവെങ്കിലും അതും യാഥാർഥ്യമായില്ല. വർഷങ്ങൾക്കുശേഷം മലയോരഹൈവേയിൽ ഉൾപ്പെടുത്തി പുനരുദ്ധരിക്കും എന്ന പ്രഖ്യാപനംവന്നെങ്കിലും അതും പ്രയോഗത്തിൽ വന്നില്ല.

വാർഡ് മെംബറെ മർദിച്ചെന്നു പോലീസിൽ പരാതി; വ്യാജമെന്നു നാട്ടുകാർ

മണ്ണാർക്കാട്: സിപിഎം ലോക്കൽ കമ്മിറ്റി അംഗവും കാഞ്ഞിരപ്പുഴ രണ്ടാംവാർഡ് മെംബറുമായ പ്രതീഷിനെയും കുടുംബത്തെയും ഒരുസംഘം മർദിച്ചതായി പരാതി. കഴിഞ്ഞദിവസമാണ് സംഭവം. പ്രതീഷും കുടുംബവും ആശുപത്രിയിൽ ചികിത്സതേടി. തുടർന്ന് മണ്ണാർക്കാട് പോലീസിൽ പരാതിയുംനൽകി. അക്രമസംഭവത്തിൽ പ്രതിഷേധിച്ച് സിപിഎം കാഞ്ഞിരപ്പുഴ ലോക്കൽ കമ്മിറ്റിയുടെ നേതൃത്വത്തിൽ പൊറ്റശേരിയിൽ പ്രതിഷേധപ്രകടനം നടത്തി. ലോക്കൽ സെക്രട്ടറി മുഹമ്മദ് നിസാർ നേതൃത്വം നൽകി. എന്നാൽ, കേസ് വ്യാജമെന്നു നാട്ടുകാർ വാർത്താസമ്മേളനത്തിൽ ആരോപിച്ചു. കഴിഞ്ഞദിവസം നടന്ന കേരളോത്സവത്തിൽ കാഞ്ഞിരപ്പുഴ പച്ചത്തുരുത്തിലുള്ള ക്ലബ്ബിനായിരുന്നു വിജയം. ഇതിൽ മാനസികമായി പ്രശ്നത്തിലായ മെംബർ പ്രതീഷ് മദ്യപിച്ചു ക്ലബ്ബിലെത്തി മെംബർമാരെ ജാതിപ്പേരു വിളിച്ച് അസഭ്യം പറയുകയും മർദിക്കുകയും ചെയ്തുവെന്നാണ് നാട്ടുകാരുടെ ആരോപണം. തുടർന്ന് മെംബർ പോലീസിൽ പരാതി നൽകുകയായിരുന്നു. ഇനിയും ആക്രമിക്കുമെന്നുപറഞ്ഞ് വെല്ലുവിളിക്കുകയും ചെയ്തിരുന്നു. ഇതിൽ ഭയന്ന് ക്ലബ്ബിലുള്ള യുവാക്കളെല്ലാം ഒളിവിലാണ്. സംഘർഷം ഒഴിവാക്കാൻ ബന്ധപ്പെട്ടവർ ഉടൻ പരിഹാരം കാണണമെന്ന് ക്ലബ്ബിലുള്ള വനിതകൾ മണ്ണാർക്കാട്ടു വിളിച്ചുചേർത്ത വാർത്താസമ്മേളനത്തിൽ ആവശ്യപ്പെട്ടു. അമ്മമാരും യുവതികളും കുട്ടികളുമുൾപ്പെടെ അമ്പതോളംപേരാണ് വാർത്താസമ്മേളനത്തിനെത്തിയത്.

റവന്യൂ ജില്ലാ സ്കൂൾ കായികോത്സവം ചാത്തന്നൂരിൽ ഇന്നുമുതൽ

തൃത്താല: പാലക്കാട് റവന്യൂ ജില്ലാ സ്കൂൾ കായികോത്സവം 14,15,16ന് ചാത്തനൂർ സിന്തറ്റിക് ട്രാക്കിൽ നടക്കും. ഇന്നുരാവിലെ ജില്ലാ വിദ്യാഭ്യാസ ഡെപ്യൂട്ടി ഡയറക്ടർ ടി.എ. സലീനബീവി പതാകയുയർത്തും. ഷൊർണൂർ എംഎൽഎ പി. മമ്മിക്കുട്ടി ഉദ്ഘാടനം നിർവഹിക്കും. തൃത്താല ബ്ലോക്ക് പഞ്ചായത്ത് പ്രസിഡന്‍റ് അഡ്വ.വി.പി. റജീന അധ്യക്ഷത വഹിക്കും. ജനപ്രതിനിധികൾ, വിവിധ അധ്യാപക സംഘടനാപ്രതിനിധികൾ പങ്കെടുക്കും. 16ന് സമാപനസമ്മേളനം ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ ഉദ്ഘാടനം ചെയ്യും. തിരുമിറ്റക്കോട് ഗ്രാമപഞ്ചായത്ത് പ്രസിഡന്‍റ് ടി. സുഹറ അധ്യക്ഷത വഹിക്കും. മൂന്നു ദിവസങ്ങളിലായി ജില്ലയിലെ മൂവായിരത്തോളം കായികതാരങ്ങൾ പങ്കെടുക്കും. കായികമേളയുടെ ലോഗോ പ്രകാശനം പ്രചാരണ കമ്മിറ്റി ചെയർപേഴ്സൺ പി. ഷീബ ഒറ്റപ്പാലം വിദ്യാഭ്യസ ഓഫീസർ സിജു തോമസിനു നൽകി പ്രകാശനം ചെയ്തു. ലോഗോ രൂപകല്പന ചെയ്തത് ആലത്തൂർ ഉപജില്ലാ എരിമയൂർ ഗവ. ഹയർ സെക്കൻഡറി സ്കൂൾ അധ്യാപകൻ ടി.പി. സന്തോഷ് കുമാറാണ്. തിരുമിറ്റക്കോട് ഗ്രാമപഞ്ചായത്ത് പ്രസിഡന്‍റ് ടി. സുഹറ ചെയർപേഴ്സണും പാലക്കാട് വിദ്യാഭ്യാസ ഡെപ്യൂട്ടി ഡയറക്ടർ ടി.എ. സലീന ബീവി ജനറൽ കൺവീനറും ഒറ്റപ്പാലം വിദ്യാഭ്യാസ ജില്ലാ ഓഫീസർ സിജു തോമസ് ട്രഷററുമായ സംഘാടകസമിതിയാണ് പ്രവർത്തനങ്ങൾക്കു നേതൃത്വം നൽകുന്നത്. വാർത്താസമ്മേളനത്തിൽ ഡിഇഒ സിജു തോമസ്, തൃത്താല എഇഒ കെ. പ്രസാദ്, കായികാധ്യാപകപ്രതിനിധി കെ. കൃഷ്ണൻ, പബ്ലിസിറ്റി കമ്മിറ്റി ചെയർപേഴ്സൺ പി. ഷീബ, കൺവീനർ പി.എസ്. വിനിത് എന്നിവർ പങ്കെടുത്തു.

ഷാഫി പറമ്പിലിനെ മർദിച്ച സംഭവം: വണ്ടാഴിയിൽ കോൺഗ്രസ് പ്രതിഷേധം

വടക്കഞ്ചേരി: കോഴിക്കോട് പേരാമ്പ്രയിൽ ഷാഫി പറമ്പില്‍ എംപി, ഡിസിസി പ്രസിഡന്‍റ് പ്രവീണ്‍കുമാര്‍ തുടങ്ങിയ നേതാക്കളെ പോലീസ് മർദിച്ച സംഭവത്തിൽ കോൺഗ്രസ് വണ്ടാഴി മണ്ഡലം കമ്മിറ്റിയുടെ ആഭിമുഖ്യത്തില്‍ പ്രകടനം നടത്തി. ബ്ലോക്ക് പ്രസിഡന്‍റ് കെ.വി. കണ്ണൻ ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.എം. ശശീന്ദ്രൻ അധ്യക്ഷത വഹിച്ചു. ആർ. സുരേഷ്, ഡിനോയ് കോമ്പാറ, എൻ. വിഷ്ണു, ഗണേഷ് മുടപ്പലൂർ, ഗൗതം, ഗോപി കണിയമംഗലം, ഹസൻ മംഗലംഡാം പ്രസംഗിച്ചു.

പഞ്ചായത്തുകളിലെ ഇ- മാലിന്യ ശേഖരണം: പരിശീലനം നൽകി

മണ്ണാർക്കാട്: മാലിന്യമുക്തം നവകേരളം ശുചിത്വ കാമ്പയിനിന്‍റെ ഭാഗമായി മണ്ണാർക്കാട്, ശ്രീകൃഷ്ണപുരം ബ്ലോക്കുകളിലെ പഞ്ചായത്തുകളിൽ ഇ-വേസ്റ്റ്, ഇതര മാലിന്യങ്ങൾ എന്നിവയുടെ ശേഖരണം പ്രത്യേകമായും കലണ്ടർപ്രകാരവും നടത്തുന്നതിന് പഞ്ചായത്ത് ഹരിതകർമസേന കൺസോർഷ്യം പ്രതിനിധികൾ, പഞ്ചായത്തിലെ വില്ലേജ് എക്സ്റ്റൻ ഓഫീസർമാർ, ഹെൽത്ത് ഇൻസ്പെക്ടർമാർ എന്നിവർക്ക് മണ്ണാർക്കാട് ബ്ലോക്ക് പഞ്ചായത്ത് ഹാളിൽ പരിശീലനം നൽകി. പഞ്ചായത്ത് അസിസ്റ്റന്‍റ് സെക്രട്ടറിമാരും പങ്കെടുത്തു. ഹരിതകർമസേനാംഗങ്ങൾ വില കൊടുത്താണ് ജനങ്ങളിൽ നിന്നും ഇ മാലിന്യം ശേഖരിക്കുക. ക്ലീൻ കേരള കമ്പനിയുമായി സഹകരിച്ച് പഞ്ചായത്തുകളുടെ ആഭിമുഖ്യത്തിലാണ് ശേഖരണം നടത്തുന്നത്. ഹരിത കർമസേന കാര്യശേഷി വികസനം, ഗുണപരത മെച്ചപ്പെടുത്തൽ, സംരഭകത്വം എന്നിവയുമായി ബന്ധപ്പെട്ടും ക്ലാസെടുത്തു. ബ്ലോക്ക് പഞ്ചായത്ത് പ്രസിഡന്‍റ് വി. പ്രീത ഉദ്ഘാടനം നിർവഹിച്ചു. സെക്രട്ടറി എ.ആർ. രാഗിണി അധ്യക്ഷത വഹിച്ചു. ജനറൽ എക്സ്റ്റൻഷൻ ഓഫീസർ ഇ.എം. അബ്ദുൾ ബഷീർ സ്വാഗതം പറഞ്ഞു. ക്ലീൻകേരള സെക്ടർ കോ-ഓർഡിനേറ്റർ പി.വി. സഹദേവൻ ക്ലാസെടുത്തു. പരിശീലനത്തിന് ശേഷം പഞ്ചായത്ത്തല പ്രവർത്തനം സംബന്ധിച്ച് സമഗ്രചർച്ചയും നടന്നു.

രണ്ടാംവിള ഞാറ്റടിക്കായി ഞാറുപാകൽ തുടങ്ങി

ചിറ്റൂർ: നല്ലേപ്പിള്ളിയിൽ രണ്ടാംവിള ഞാറ്റടിക്ക് ഞാറുപാകൽ പണികൾ ആരംഭിച്ചു. ഒന്നാംവിള കൊയ്ത്ത്, നെല്ല് ഉണക്കൽ പണികൾ അവസാനിക്കും മുമ്പ് തന്നെ രണ്ടാംവിള ഇറക്കാൻ വേണ്ട ഞാറു തയാറാക്കൽ പണികളുംആരംഭിച്ചു. കൊയ്ത്ത് കഴിഞ്ഞ പാടങ്ങളിൽ രണ്ടുപ്രാവശ്യം 10 ദിവസം മുമ്പ് ഉഴുതുമറിച്ച ശേഷമാണ് ഞാറ് പാകുന്നത്. സിആർ, പൊന്മണി ഇനത്തിൽപ്പെട്ട വിത്തിനമാണ് പാകുന്നത്. അഞ്ചുമാസത്തെ മൂപ്പാണുള്ളത്. 30 ദിവസത്തിനുള്ളിൽ പറിച്ചുനട്ടാൽ മാർച്ച് ആദ്യആഴ്ച തന്നെ കൊയ്ത്ത് നടത്താൻ കഴിയും. ഞാറ്റടി തയാറാക്കുന്നത് കനാൽവെള്ളം ലഭിക്കാത്തതു കൊണ്ട് കുഴൽകിണർ വെള്ളം കൊണ്ടാണ് ഞാറുപാകുന്നത്. നല്ലേപ്പിള്ളിയിൽ വ്യാപകമായി കൊയ്ത്ത് ആരംഭിക്കാൻ രണ്ടാഴ്ച കഴിയും. മൂപ്പ് കുറഞ്ഞ ടിപിഎസ് വിത്തിനം കൃഷിയിറക്കത് കൊണ്ടാണ് കൊയ്ത്ത് നടത്താൻ കഴിഞ്ഞത്. ഭദ്ര, ഉമ നെല്ലിനമാണെങ്കിൽ 20 ദിവസത്തിൽ കൂടുതൽ വൈകും. ആദ്യം ഞാറ് ആകുന്നവർക്ക് പറിച്ചുനടീൽ നടത്താൻ നാട്ടുകാരായ തൊഴിലാളികളെ കിട്ടും. വൈകിയാൽ ബംഗാളികളെയും തമിഴ്നാട്ടുകാരെയും ഉയർന്നകൂലി കൊടുത്തു പണിചെയ്യേണ്ടിവരും. മഴ, കൊയ്ത നെല്ലിന്‍റെ ഉണക്കൽപണി, തൊഴിലുറപ്പ് പണികൾക്കിടയിലാണ് ഭൂരിപക്ഷം കർഷകർക്കും തൊഴിലാളികളെ കിട്ടാതെ വരുന്ന സാഹചര്യം ഉണ്ടാകുന്നത്. മൂപ്പ് ഇല്ലാത്ത ഞാറു സമയത്തിന് നടീൽ നടത്തിയാൽ മെച്ചപ്പെട്ട വിളവു ലഭിക്കുമെന്ന പ്രതീക്ഷയിലാണ് കർഷകരെന്ന് നെൽകർഷകനായ വി. രാജൻ പറഞ്ഞു.

‘വടക്കഞ്ചേരി ഫയർസ്റ്റേഷന് സ്വന്തം സ്ഥലം കണ്ടെത്തി മാറ്റിസ്ഥാപിക്കണം’

വടക്കഞ്ചേരി: മൂന്ന് പതിറ്റാണ്ടിലേറെയായി വാടകകെട്ടിടത്തിൽ തുടരുന്ന വടക്കഞ്ചേരി ഫയർ സ്റ്റേഷന് സ്വന്തം സ്ഥലം കണ്ടെത്തി മാറ്റി സ്ഥാപിക്കണമെന്ന് കേരള ഫയർ സർവീസ് അസോസിയേഷൻ വടക്കഞ്ചേരി യൂണിറ്റ് സമ്മേളനം ആവശ്യപ്പെട്ടു. 1995 ഓഗസ്റ്റ് അഞ്ചിനാണ് അഞ്ചുമൂർത്തിമംഗലം ഗാന്ധി സ്മാരക യുപി സ്കൂളിനു സമീപം പഴയ തീപ്പെട്ടി കമ്പനിയിൽ ഫയർ സ്റ്റേഷൻ ആരംഭിച്ചത്. രണ്ടുവർഷത്തിനുള്ളിൽ സ്ഥലം കണ്ടെത്തി കെട്ടിടം നിർമിക്കുമെന്ന ഉറപ്പിലായിരുന്നു വാടക കെട്ടിടത്തിൽ ആരംഭിച്ചത്. കാലപ്പഴക്കത്തിൽ അപകടഭീഷണിയുള്ള കെട്ടിടത്തിലാണ് ഇപ്പോൾ ഫയർസ്റ്റേഷൻ പ്രവർത്തിക്കുന്നത്. അസോസിയേഷൻ സംസ്ഥാനകമ്മിറ്റി അംഗം ടി. സി. സജിത്ത് പതാക ഉയർത്തി. മേഖലാ പ്രസിഡന്‍റ് ആർ. രഞ്ജിഷ് ഉദ്ഘാടനം ചെയ്തു. സെക്രട്ടറി എൻ. ഷജി, ജോ. സെക്രട്ടറി കെ. ഗിരീഷ്, വൈസ് പ്രസിഡന്‍റ് പ്രകാശൻ എന്നിവർ പ്രസംഗിച്ചു. ടി.സി. സജിത്ത്, കെ. ഗിരീഷ്, സി. സന്ദീപ് എന്നിവരെ മേഖല കമ്മിറ്റി അംഗങ്ങളായും എം. മുകേഷിനെ ലോക്കൽ കൺവീനറായും എ. അർജുനെ ട്രഷറായും തെരഞ്ഞെടുത്തു.

പറമ്പിക്കുളത്ത് തെരുവുനായ്ക്കളുടെ ശല്യം രൂക്ഷം; വിനോദസഞ്ചാരികൾക്ക് ഭീഷണി

പറമ്പിക്കുളം: വിനോദസഞ്ചാരത്തിന് സ്ത്രീകളും കുഞ്ഞുങ്ങളുമായെത്തുന്ന സംഘത്തിന് പറമ്പിക്കുളത്തും തെരുവുനായകൾ ഭീഷണിയാവുകയാണ്. യാത്രക്കാർ വാഹനമിറങ്ങുന്ന സ്ഥലം പറമ്പിക്കുളം ജംഗ്ഷനിലാണ്. ഇവിടെയാണ് ഭക്ഷണശാലയും ശീതളപാനീയ സ്റ്റാളുകളുമുള്ളത്. ഇവിടെനിന്നുമാണ് ബോട്ട് ജെട്ടി, അണക്കെട്ട്, കന്നിമാരിതേക്ക്, തൂണക്കടവ് വനമേഖല സന്ദർശനത്തിന് വിനോദയാത്രക്കാർ പോവാറുള്ളത്. നായകൾ അഞ്ചും ആറും എണ്ണം കൂട്ടമായാണ് ജനക്കൂട്ടത്തിനിടയിൽ എത്തുന്നത്. പലപ്പോഴും ഇവിടത്തെ വ്യാപാരികളാണ് നായകളെ ഓടിക്കുന്നത്. നായകൾ പരസ്പരം കടിച്ചുകീറി പരാക്രമം കാണിക്കുന്നതും ഭീതിജനകമാവുകയാണ്. ഇവിടെ നായപിടുത്തവും വന്ധീകരണവും നടത്താറില്ലെന്നാണ് താമസക്കാർ പരാതിപ്പെടുന്നത്. റോഡരികിൽ നിർത്തിയിടുന്ന വാഹനങ്ങൾക്കടിയിൽ ഒളിക്കുന്ന നായ്ക്കൾ വാഹനത്തിൽ കയറുന്നവർക്കെതിരെയും ആക്രമണത്തിനു തുനിയാറുണ്ട്.

വിവരാവകാശനിയമം: പരിശീലനം നൽകും

പാലക്കാട്: ജനകീയ പ്രശ്നങ്ങളിൽ വിവരാവകാശനിയമം പ്രയോജനപ്പെടുത്തി സുതാര്യവും ഉത്തരവാദിത്വമുള്ള ഭരണത്തിന് വേണ്ടി ക്രിയാത്മക ഇടപെടലുകൾ നടത്തിക്കൊണ്ടിരിക്കുന്നവർക്ക് വിദഗ്ധപരിശീലനം നൽകുന്നു. ഇത്തരം പ്രവർത്തനങ്ങളിൽ പ്രാഥമികഘട്ടത്തിലുള്ളവർക്കും പാതിവഴിയിൽ എത്തിനിൽക്കുന്നവർക്കും പൂർണവിജയത്തിന്‍റെ അനുഭവങ്ങളുള്ളവർക്കും പ്രത്യേകം പരിശീലനം നൽകും. വിവരാവകാശനിയമത്തെ സദ്ഭരണത്തിനും പൗരഭരണത്തിനുമുള്ള പ്രവർത്തനങ്ങൾക്ക് പ്രേരകശക്തിയും ചാലകശക്തിയുമാക്കി മാറ്റാനുള്ള ശ്രമത്തിന്‍റെ ഭാഗമായാണ് ഈ പരിശീലനം. പങ്കാളിത്തരീതിയിലുള്ള ഈ പരിശീലനത്തിലൂടെ പങ്കെടുക്കുന്നവരുടെ പ്രവർത്തന അനുഭവങ്ങൾ പങ്കുവെക്കുകയും അതിനെ വിലയിരുത്തുകയും കൂടുതൽ പ്രചോദനങ്ങളും ഫലപ്രദമായ മാർഗങ്ങളും നേടുന്നതിനും പരിശീലനത്തിലൂടെ ലക്ഷ്യമിടുന്നുണ്ട്. രാമശേരി ഗാന്ധി ആശ്രമവും സർവോദയ കേന്ദ്രവും ദേശീയ വിവരാവകാശ കൂട്ടായ്മയും ചേർന്ന് നടത്തുന്ന പ്രായോഗിക പരിശീലനത്തിൽ പങ്കെടുക്കാൻ ആഗ്രഹിക്കുന്നവർ 9447483106 എന്ന വാട്സാപ്പ് നന്പറിലേക്ക് ബയോഡാറ്റ സഹിതം അപേക്ഷ നൽകണം.

കോൺഗ്രസ് പ്രതിഷേധ ജാഥ നടത്തി

അയിലൂർ: പഞ്ചായത്തിലെ 3, 5 വാർഡുകളിലെ റോഡുകളുടെ തകർച്ച ഉടൻ പരിഹരിക്കുക, തെളിയാത്ത തെരുവ് വിളക്കുകൾ തെളിക്കുക, ലൈഫ് പദ്ധതി ലിസ്റ്റിൽപ്പെട്ട മുഴുവൻപേർക്കും ഉടൻ വീട് അനുവദിക്കുക, വികസനത്തിലെ രാഷ്ട്രീയ വിവേചനം അവസാനിപ്പിക്കുക എന്നീ ആവശ്യങ്ങളുന്നയിച്ച് അയിലൂർ മണ്ഡലം കോൺഗ്രസ് കമ്മിറ്റി അയിലൂർ വേല മന്ദം വെയിറ്റിംഗ് ഷെഡ് മുതൽ പൂളയ്ക്കൽപറമ്പ് വരെ പ്രതിഷേധ പ്രചരണ ജാഥ നടത്തി. ഡിസിസി അംഗം പ്രദീപ് നെന്മാറ ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് എസ്.എം. ഷാജഹാൻ അധ്യക്ഷനായി. നേതാക്കളായ കെ. കുഞ്ഞൻ, എ. സുന്ദരൻ, എസ്. കാസിം, കെ. വിനു, എ. ശിവപ്രസാദ്, വി. ബാലകൃഷണൻ, എ. ജയാനന്ദൻ, ഗിരിജ ചെന്താമരാക്ഷൻ, വി.ദാമോദരൻ, കെ.എം.ശശീന്ദ്രൻ, എ. വിജു, പി.വിജയൻ , വി.എം. സ്കറിയ, എൻ. ഉണ്ണികൃഷ്ണൻ , കെ.സുരേഷ്, ആറുമുഖൻ, കെ. രാജൻ, എൻ. ജയഗണേഷ്, എ. മോഹൻദാസ്, വി. വിനേഷ് , എം.എം. മനോജ്, എസ്. സുരേഷ് കുമാർ എന്നിവർ പ്രസംഗിച്ചു.

‘പ്രാദേശിക സാന്പത്തിക വികസനം: പ്രാഥമിക മേഖലയ്ക്ക് പ്രാമുഖ്യം നൽകണം’

പാലക്കാട്: സംരംഭകത്വം നിലനിർത്തുന്നതിനും പ്രാദേശിക സാന്പത്തിക വികസനം ഉറപ്പാക്കുന്നതിനും കൃഷി പോലുള്ള പ്രാഥമിക മേഖലകൾക്ക് പ്രാമുഖ്യം നൽകണമെന്ന് വിഷൻ 2031 സെമിനാറിന്‍റെ ഭാഗമായി ‘ഉപജീവനം, പ്രാദേശിക സാന്പത്തിക വികസനം’ എന്ന വിഷയത്തിൽ നടന്ന ചർച്ച അഭിപ്രായപ്പെട്ടു. കുടുംബശ്രീ അടക്കമുള്ള വിവിധ ഏജൻസികളെ സംയോജിപ്പിച്ച് മാസ്റ്റർ പ്ലാൻ തയ്യാറാക്കിയാൽ മാത്രമേ പ്രാദേശിക സാന്പത്തിക വികസനം സാധ്യമാകൂ എന്നും ചർച്ചയിൽ വിലയിരുത്തി. വിവിധ മേഖലകളിൽ നാം ഇതുവരെ നേടിയ നേട്ടങ്ങളെ സുസ്ഥിരമായി നിലനിർത്താൻ സാന്പത്തികമായ സുസ്ഥിരത ആവശ്യമാണ്. കേരളത്തിന്‍റെ സാന്പത്തിക നിലനിൽപ്പിലെ പ്രധാന വെല്ലുവിളിയാണ് വരുമാനത്തിലെ അസന്തുലിതാവസ്ഥ. സംസ്ഥാനത്തിന്‍റെ വരുമാനത്തിൽ 65% വും സേവന മേഖലയിൽ നിന്നാണ്. ഉത്പാദന മേഖലയുടെ സംഭാവന 10% ൽ താഴെ മാത്രമാണ്. ഈ സ്ഥിതി സാന്പത്തികമായ നിലനിൽപ്പിന് വെല്ലുവിളിയാണ്. സംസ്ഥാനത്തിന്‍റെ തനത് വരുമാനം വർധിപ്പിക്കേണ്ടതുണ്ട്. കേന്ദ്രത്തിൽ നിന്നുള്ള ധനസഹായത്തിൽ 26 % ന്‍റെ കുറവാണ് ഈ വർഷം ഉണ്ടായിട്ടുള്ളത്. തദ്ദേശസ്ഥാപനങ്ങൾക്ക് സാന്പത്തിക വികസനത്തിൽ വലിയ പങ്കുണ്ട്. നാടിന്‍റെ വികസനത്തിലേക്കുള്ള ചവിട്ടുപടിയായാണ് സംരംഭകത്വത്തെ കാണേണ്ടത്. സംരംഭകത്വ മനോഭാവം കുട്ടികളിലേ വളർത്തിയെടുക്കണം. കാർഷിക മേഖല ‘അഗ്രി ബിസിനസ്’ എന്ന രീതിയിലേക്ക് മാറിയാൽ മാത്രമേ കൃഷിയിലൂടെയുള്ള പ്രാദേശിക സാന്പത്തിക വികസനം സാധ്യമാവൂ. വിളവെടുപ്പ് വരെയുള്ള കാലം, വിളവെടുപ്പിന് ശേഷമുള്ള കാലം എന്നിങ്ങനെ കൃഷിയെ വേർതിരിച്ച് ശാസ്ത്രീയമായ രീതിയിൽ പ്രവർത്തനങ്ങൾ നടത്തണം. കാർഷിക ഉത്പന്നങ്ങൾ കുടുംബശ്രീ, ഫാർമേഴ്സ് പ്രൊഡ്യൂസർ യൂണിറ്റുകൾ തുടങ്ങി വിവിധ ഏജൻസികളുടെ നേതൃത്വത്തിൽ ആധുനിക സാങ്കേതിക വിദ്യകൾ ഉപയോഗപ്പെടുത്തി പ്രാദേശികമായി സംസ്കരിക്കണം. ഉത്പന്നങ്ങളുടെ വിപണനത്തിന് നല്ല പാക്കേജിംഗ് സിസ്റ്റം ആവശ്യമാണ്. പ്രാദേശിക സാന്പത്തിക വികസന മേഖലയിൽ തൊഴിലുറപ്പ് പദ്ധതിയുമായി ബന്ധപ്പെട്ട സാധ്യതകൾ പരിശോധിക്കണം. കേവലം 100 ദിവസം തൊഴിൽ നൽകുക എന്നതിലുപരി തൊഴിലുറപ്പ് പദ്ധതിയുടെ മറ്റു മേഖലകൾക്കും പ്രാധാന്യം നൽകണം. സ്ത്രീകൾക്ക് കൂടുതൽ തൊഴിൽ നൽകുക, സാന്പത്തിക സാക്ഷരത നൽകൽ, മൈക്രോ ഫിനാൻസ് എന്നീ മേഖലകൾക്ക് കൂടുതൽ പ്രാമുഖ്യം നൽകണമെന്നും ചർച്ച അഭിപ്രായപ്പെട്ടു. കുടുംബശ്രീയുടെ ആധുനികവത്കരണം, സാങ്കേതികമായി പുരോഗമിക്കേണ്ടതിന്‍റെ ആവശ്യകതയും ചർച്ചയിൽ ഉയർന്നു വന്നു. കുടുംബശ്രീ എക്സിക്യുട്ടീവ് ഡയറക്ടർ എച്ച്. ദിനേശൻ വിഷയാവതരണം നടത്തിയ ചർച്ചയിൽ സംസ്ഥാന ആസൂത്രണ ബോർഡ് അംഗം പ്രഫ. ജിജു. പി. അലക്സ് അധ്യക്ഷത വഹിച്ചു. കെ. ഡിസ്ക് മെംബർ സെക്രട്ടറി ഡോ.പി.വി. ഉണ്ണികൃഷ്ണൻ, ആര്യനാട് ഗ്രാമ പഞ്ചായത്ത് കുടുംബശ്രീ സിസിഎസ് ചെയർപേഴ്സണ്‍ കെ.ആർ. സുനിതാകുമാരി, ഉദ്യം ലേണിംഗ് ഫൗണ്ടേഷൻ സീനിയർ മാനേജർ ടോണി കെ. ജോസ്, ഐസിഎആർസി ടിസിആർഐ പ്രിൻസിപ്പൽ സയന്‍റിസ്റ്റ് ഡോ.എം.എസ്. സജീവ്, കുടുംബശ്രീ മുൻ പ്രോഗ്രാം ഓഫീസർ പി. ബാലചന്ദ്രൻ, നബാർഡ് മുൻ അസി. ജനറൽ മാനേജർ രമേഷ് വേണുഗോപാൽ തുടങ്ങിയവർ ചർച്ചയിൽ പങ്കെടുത്തു.

കാലത്തിന്‍റെ വെല്ലുവിളികളെ നേരിടാൻ തദ്ദേശവകുപ്പ് പരിഷ്കരിക്കും: മന്ത്രി എം.ബി. രാജേഷ്

പാലക്കാട്: പുതിയ കാലത്തിന്‍റെ വെല്ലുവിളികളെ നേരിടാനുതകുന്ന രൂപത്തിൽ തദ്ദേശസ്വയംഭരണ വകുപ്പിനെ രൂപപ്പെടുത്തുമെന്ന് മന്ത്രി എം.ബി. രാജേഷ്. ലോകശ്രദ്ധ നേടിയ കേരള വികസന മാതൃക രൂപപ്പെടുത്തിയതിൽ തദ്ദേശ സ്വയംഭരണ വകുപ്പ് മുഖ്യ പങ്കാണ് വഹിച്ചിട്ടുള്ളതെന്നും മന്ത്രി പറഞ്ഞു. വിഷൻ 2031 തദ്ദേശ സ്വയംഭരണ വകുപ്പ് സംസ്ഥാനതല സെമിനാറിന്‍റെ പ്രാരംഭ സെഷനിൽ കേരളത്തിന്‍റെ വികസനം 2031 ൽ എന്ന വിഷയത്തിൽ കരട് നയരേഖ അവതരിപ്പിച്ച് സംസാരിക്കുകയായിരുന്നു മന്ത്രി. വികസനത്തിന്‍റെ ഗുണഫലങ്ങൾ എല്ലാ വിഭാഗം ജനങ്ങളിലേക്കും എത്തിക്കുന്നതിൽ തദ്ദേശവകുപ്പ് വലിയ പങ്ക് വഹിച്ചിട്ടുണ്ട്. ജനങ്ങളുടെ സർഗാത്മകത, ഉൗർജം എന്നിവയെ കെട്ടഴിച്ചുവിട്ടാണ് കേരളം ഈ നേട്ടം കൈവരിച്ചത്. ഇതിന് നേതൃത്വം നൽകിയത് തദ്ദേശവകുപ്പാണ്. കെസ്മാർട്ട് അടക്കമുള്ള ഇ ഗവേർണൻസ് സംവിധാനങ്ങളിലൂടെ ശാസ്ത്രീയ നികുതി സമാഹരണം വഴി തദ്ദേശസ്ഥാപനങ്ങൾക്ക് സാന്പത്തിക ശാക്തീകരണം കൈവരിക്കാൻ സാധിച്ചതായും മന്ത്രി പറഞ്ഞു. കുത്തകകൾക്ക് ബദൽ ഉയർത്താൻ സാധിക്കുന്ന രൂപത്തിൽ കുടുംബശ്രീയെ പ്രാപ്തരാക്കുമെന്നും മന്ത്രി പറഞ്ഞു. തദ്ദേശസ്ഥാപനങ്ങളെ കാലാനുസൃതമായി പരിഷ്കരിക്കുക, തദ്ദേശസ്ഥാപനങ്ങളെ ശക്തിപ്പെടുത്തുക എന്നിവയിൽ ഉൗന്നിയുള്ള കരട് നയരേഖ അവതരണം മന്ത്രി നിർവഹിച്ചു. പ്രാദേശിക സാന്പത്തിക വികസനം ത്വരിതപ്പെടുത്തുന്നതിനുള്ള ചാലകശക്തിയായി തദ്ദേശസ്ഥാപനങ്ങളെ മാറ്റും. സുസ്ഥിര അടിസ്ഥാന സൗകര്യ വികസനം, സംയോജിത വികസനം എന്നിവയ്ക്ക് ഉൗന്നൽ നൽകും. കാലാവസ്ഥാ വ്യതിയാനം, ദുരന്ത പ്രതികരണം എന്നിവ മുന്നിൽ കണ്ടുകൊണ്ടുള്ള പ്രവർത്തനം ശക്തിപ്പെടുത്തും. സുസ്ഥിര വികസന പ്രസ്ഥാനം എന്ന നിലയിലേക്ക് കുടുംബശീയെ ഉയർത്തിക്കൊണ്ടുവരും. സ്ത്രീകളുടെ തൊഴിൽപങ്കാളിത്തം 50 ശതമാനമായി വർധിപ്പിക്കും. ഇതിലൂടെ കേരളത്തിന്‍റെ സാമൂഹ്യഘടനയിൽ വലിയ മാറ്റം സൃഷ്ടിക്കാനാവും. തദ്ദേശ വകുപ്പുമായി ബന്ധപ്പട്ട നിയമങ്ങളും ചട്ടങ്ങളും കാലാനുസൃതമായി പരിഷ്കരിക്കുമെന്നും കരട്നയരേഖ അവതരണത്തിൽ മന്ത്രി പറഞ്ഞു. കഴിഞ്ഞ 10 വർഷം കൊണ്ട് തദ്ദേശ സ്വയംഭരണവകുപ്പ് കരസ്ഥമാക്കിയ വിവിധ നേട്ടങ്ങളും വകുപ്പ് അവതരിപ്പിച്ച മികച്ച മാതൃകകളും തദ്ദേശ സ്വയംഭരണ വകുപ്പ് പ്രിൻസിപ്പൽ സെക്രട്ടറി ടിങ്കു ബിസ്വാൾ പരിചയപ്പെടുത്തി. പാലക്കാട് കോസ്മോപൊളിറ്റൻ ക്ലബ്ബിൽ നടന്ന സെഷനിൽ തദ്ദേശ സ്വയംഭരണ വകുപ്പ് സ്പെഷൽ സെക്രട്ടറി ടി.വി. അനുപമ സ്വാഗതവും പ്രിൻസിപ്പൽ ഡയറക്ടർ ജെറോമിക് ജോർജ് നന്ദിയും പറഞ്ഞു.

പാസ്‌വേഡ് കരിയർ ഗൈഡൻസ് ക്യാമ്പ് തുടങ്ങി

പാലക്കാട്: സംസ്ഥാന ന്യൂനപക്ഷ ക്ഷേമ വകുപ്പിന്‍റെ ആഭിമുഖ്യത്തിൽ ഹയർ സെക്കൻഡറി വിദ്യാർഥികൾക്കായി നടത്തുന്ന പാസ്‌വേഡ് പദ്ധതിയുടെ രണ്ടാംഘട്ടമായ ദ്വിദിന സൗജന്യ വ്യക്തിത്വവികസന ഫ്ലവറിംഗ് സഹവാസ ക്യാമ്പ് ധോണിയിലെ സ്റ്റാർട്ട് അനിമേഷൻ സെന്‍റർ കാമ്പസിൽ തുടങ്ങി. എ. പ്രഭാകരൻ എംഎൽഎ ക്യാമ്പ് ഉദ്ഘാടനം ചെയ്തു. അകത്തേത്തറ പഞ്ചായത്ത് പ്രസിഡന്‍റ് സുനിത അനന്തകൃഷ്ണൻ അധ്യക്ഷത വഹിച്ചു. അനിമേഷൻ സെന്‍റർ എക്‌സിക്യുട്ടീവ് സെക്രട്ടറി ഫാ. സീജോ കാരിക്കാട്ടിൽ, ഡോ.കെ. വാസുദേവൻപിള്ള, വി. രഘുകുമാർ പ്രസംഗിച്ചു. ഡോ. ഡെയ്സൺ പണങ്ങാടൻ, ഡോ. സരിത നമ്പൂതിരി, സി. ശബരീഷ് എന്നിവർ ക്ലാസുകൾ നയിച്ചു.

മങ്കര ഗ്രാമപഞ്ചായത്ത് വികസനസദസ്‌

പാലക്കാട്: സംസ്ഥാന സർക്കാറിന്‍റെ ആഭിമുഖ്യത്തിൽ തദ്ദേശ സ്വയംഭരണ വകുപ്പും ഇൻഫർമേഷൻ പബ്ലിക് റിലേഷൻസ് വകുപ്പും സംയുക്തമായി സംഘടിപ്പിക്കുന്ന വികസന സദസ്‌ മങ്കര ഗ്രാമപഞ്ചായത്തിൽ പാലക്കാട് ബ്ലോക്ക് പഞ്ചായത്ത് പ്രസിഡന്‍റ് വി. സേതുമാധവൻ ഉദ്ഘാടനം ചെയ്തു. വെള്ളറോഡ് പ്രിയദർശിനി ഓഡിറ്റോറിയത്തിൽ നടന്ന പരിപാടിയിൽ ഗ്രാമ പഞ്ചായത്ത് വൈസ് പ്രസിഡന്‍റ് എ. മല്ലിക അധ്യക്ഷയായി. സ്ഥിരംസമിതി അധ്യക്ഷരായ കെ.വി. രാമചന്ദ്രൻ, ഇ.പി. സുരേഷ്, ജില്ലാ പഞ്ചായത്ത് അംഗം അഡ്വ.എം.എച്ച്. സഫ്ദാർ ഷെരീഫ്, ഗ്രാമപഞ്ചായത്ത് അസിസ്റ്റന്‍റ് സെക്രട്ടറി എൻ.കെ. കണ്ണൻ, ജനപ്രതിനിധികൾ, ഹരിതകർമ സേനാംഗങ്ങൾ, ആശവർക്കർമാർ, സാമൂഹ്യ സാംസ്കാരിക പ്രവർത്തകർ, ഉദ്യോഗസ്ഥർ പങ്കെടുത്തു.

സരസിലേക്ക് സമൃദ്ധിയോടെ: തൃത്താല മണ്ഡലത്തിൽ 300 ഏക്കറിൽ പച്ചക്കറികൃഷി

തൃത്താല: ജനുവരി രണ്ടിനു ചാലിശ്ശേരിയിൽ ആരംഭിക്കുന്ന ദേശീയ സരസ്മേളയുടെ ഭാഗമായി തൃത്താല മണ്ഡലത്തിൽ 300 ഏക്കറിൽ പച്ചക്കറി കൃഷി നടത്തും. സരസിലേക്ക് സമൃദ്ധിയോടെ പച്ചക്കറി എന്ന കാന്പയിൻ മണ്ഡലമാകെ വ്യാപിപ്പിക്കും. കുടുംബശ്രീയുടെ നേതൃത്വത്തിൽ 150 ഏക്കർ സ്ഥലത്തും പാടശേഖരസമിതികളുടെ നേതൃത്വത്തിൽ 150 ഏക്കർ സ്ഥലത്തുമായാണ് കൃഷി നടത്തുന്നത്. പച്ചക്കറി കൃഷിയുടെ വിത്തിടൽ മഹോത്സവം 25ന് രാവിലെ പത്തിനു മന്ത്രി എം.ബി. രാജേഷ് വട്ടത്താണി പാടശേഖരത്തിൽ നിർവഹിക്കും. ഈമാസം 31 നുള്ളിൽ 2000 കേന്ദ്രങ്ങളിലായി വിത്തിടൽ ഉത്സവവും നടത്തും. ദേശീയ സരസ് മേളയ്ക്ക് എത്തുന്ന ജനങ്ങൾക്ക് നാടൻ വിഷരഹിത പച്ചക്കറി മിതമായ നിരക്കിൽ ലഭ്യമാക്കുക എന്നതാണ് പച്ചക്കറി കൃഷി നടത്തുന്നതിന്‍റെ ലക്ഷ്യം.

ഷാഫി പറമ്പിലിനെ മർദിച്ച സംഭവം: പലയിടത്തും കോൺഗ്രസ് പ്രകടനം

വടക്കഞ്ചേരി: പേരാമ്പ്രയിൽ ഷാഫി പറമ്പിൽ എംപി ക്കും കോൺഗ്രസ് പ്രവർത്തകർക്കും നേരെയുണ്ടായ പോലീസ് അതിക്രമത്തിൽ പ്രതിഷേധിച്ച് കോൺഗ്രസ് ബ്ലോക്ക് കമ്മറ്റിയുടെ നേതൃത്വത്തിൽ വടക്കഞ്ചേരിയിൽ പ്രതിഷേധ പ്രകടനവും പൊതുയോഗവും നടത്തി. കെപിസിസി അംഗം പാളയം പ്രദീപ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് അഡ്വ.എം. ദിലീപ് അധ്യക്ഷത വഹിച്ചു. ഡോ. അർസലൻ നിസാം, ഇല്യാസ് പടിഞ്ഞാറെക്കളം, കെ. ഉദയൻ, കാരയങ്കാട് ശിവരാമകൃഷ്ണൻ, എം.എൻ. സോമൻ, വി.എച്ച്. ബഷീർ, റെജി കെ. മാത്യു, ബാബുമാധവൻ, വി.എ. മൊയ്തു, വി.എസ്. ഷാജഹാൻ, എൻ. ജയരാജ്, മോഹനൻ കല്ലിങ്കൽപാടം, കെ. മോഹൻദാസ്, ഇഎസ്എം ഹനീഫ പ്രസംഗിച്ചു. കിഴക്കഞ്ചേരി കുണ്ടുകാട് കോൺഗ്രസ്‌ മണ്ഡലം കമ്മിറ്റി നടത്തിയ പ്രതിഷേധ കൂട്ടായ്മ ബ്ലോക്ക് വൈസ് പ്രസിഡന്‍റ് വി.ജെ. ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. ബാബു മാസ്റ്റർ, ഷാനവാസ് പ്രസംഗിച്ചു.

മുതലമട റെയിൽവേ തുരങ്കപാത തകർന്ന് യാത്ര ഭീതിജനകം

മുതലമട: റെയിൽവേ സ്റ്റേഷൻ തുരങ്കപാത റോഡിന്‍റെ ഇരുവശവും തകർന്ന് യാത്രാദുരിതം രക്ഷമായെന്നു യാത്രികർ. കഴിഞ്ഞ ദിവസങ്ങളിലെ മഴയിൽ ടാറിംഗ് പൂർണമായി അടർന്നതാണ് യാത്രാദുരിതം കൂട്ടിയത്. അരക്കിലോമീറ്ററോളം ദൈർഘ്യമുള്ള പാതയിൽ ബസ് ഉൾപ്പെടെ വലിയ വാഹനങ്ങൾക്കു സഞ്ചരിക്കാൻ കഴിയാത്ത സ്ഥിതിയാണുള്ളത്. ഇരുചക്രവാഹനങ്ങൾ നിയന്ത്രണം വിട്ടുമറിഞ്ഞും കാറുകളുടെ അടിഭാഗം മുട്ടിയുമെല്ലാം അപകടം പതിവായിട്ടുണ്ട്. നന്ദിയോട് മുതൽ റെയിൽവേ റിംഗ്റോഡിന്‍റെ വടക്കുഭാഗം വരേയും തെക്കുഭാഗം മുതൽ കാമ്പ്രത്ത്ച്ചള്ള ജംഗ്ഷൻ വരേയും രണ്ടുവർഷം മുൻപ് റോഡ് നവീകരിച്ചിരുന്നു. ഇക്കാരണത്താൽ കൊല്ലങ്കോട്, മീങ്കര, ഗോവിന്ദാപുരം ഭാഗത്തേക്കുള്ള വാഹനങ്ങൾ ഇറോഡിലാണ് എത്തുന്നത്. ചരക്കുലോറികൾ കുഴികളിലിറങ്ങി അപകടത്തിൽപ്പെടുന്നതു പതിവാണ്. സ്ഥലം റെയിൽവേയുടെ അധികാര പരിധിയിൽ എന്നതിനാൽ പട്ടഞ്ചേരി , മുതലമട പഞ്ചായത്തുകൾക്ക് നവീകരണം നടത്താനും കഴിയുകയില്ല. സമീപവാസികളും യാത്രക്കാരും പലതവണ മുതലമട റയിൽവേ അധികാരികൾക്ക് റോഡ് പുനർ നിർമാണത്തിനായ നൽകിയ അപേക്ഷകൾ മാസങ്ങളായി അവഗണിച്ച നിലയിൽ തന്നെയാണ്.

പറമ്പിക്കുളത്ത് കണ്ടെയ്നർ ടോയ്‌ലറ്റ് പൈപ്പുപൊട്ടി മലിനജലം പുറത്തേക്ക്

മുതലമട: വിനോദ സഞ്ചാരികളുടെ സൗകര്യം പരിഗണിച്ച് വനംവകുപ്പ് പറമ്പിക്കുളത്ത് നിർമിച്ച കണ്ടെയ്നർ ടോയ്‌ലറ്റിൽ മലിനജലം ചോർന്ന് അസഹനീയ ദുർഗന്ധം വമിക്കുന്നതു സന്ദർശകർക്കു ദുരിതമായി. സന്ദർശകരുടെ സൗകര്യത്തിനായി പത്തുലക്ഷംരൂപ ചെലവഴിച്ച് വനംവകപ്പ് മാസങ്ങൾക്കുമുൻപാണ് ടോയ്‌ലറ്റ് പ്രവർത്തനക്ഷമമാക്കിയത്. രണ്ടുവശങ്ങളിലായി ടീഷോപ്പും വിശ്രമകേന്ദ്രവുമുണ്ട്. ആരോഗ്യവകുപ്പ് ഉദ്യോഗസ്ഥർ ഇതുവഴിയാണ് സഞ്ചാരമെങ്കിലും കണ്ടമട്ടില്ല.

ദൈവദാൻ സെന്‍ററിൽ കാരുണ്യസ്പർശവുമായി ചെറുപുഷ്പം സ്കൂൾ ഗൈഡ്സ് വിദ്യാർഥിനികൾ

വടക്കഞ്ചേരി: അനാഥരും അശരണരുമായ 200 അമ്മമാരെ സംരക്ഷിക്കുന്ന മംഗലംപാലത്തെ ദൈവദാൻ സെന്‍റർ സന്ദർശിച്ച് ചെറുപുഷ്പം ഗേൾസ് സ്കൂളിലെ എയ്റ്റ്ത്ത് ഗൈഡ് കമ്പനി ഗൈഡ്സ്.വിവിധ ദേശങ്ങളിൽ നിന്നുള്ളവരും വിവിധ ഭാഷക്കാരുമായ അമ്മമാരോടൊപ്പം പാട്ടുപാടിയും വിശേഷങ്ങൾ പങ്കുവച്ചും ഏറെ സമയം ഗൈഡുകൾ സെന്‍ററിൽ ചെലവഴിച്ചു. കുട്ടികൾ സമാഹരിച്ച ഒരുനേരത്തെ പ്രാതലിനുള്ള ഭക്ഷ്യവസ്തുക്കളും സെന്‍ററിൽ നൽകി. ഗൈഡ് ക്യാപ്റ്റൻ പി.എസ്. അന്നമ്മ , കമ്പനി ലീഡർ ശ്രീലേഖ എന്നിവരുടെ നേതൃത്വത്തിലായിരുന്നു സന്ദർശനം.

സന്ദർശകർക്കു കാഴ്ചവിരുന്നായി ആര്യമ്പള്ളം തടയണ വെള്ളച്ചാട്ടം

ചിറ്റൂർ: ചിറ്റൂർപ്പുഴ ആര്യമ്പള്ളം കുടിവെള്ള തടയണ വെള്ളച്ചാട്ടം സന്ദർശകരായെത്തുന്നവർക്ക് കാഴ്ചവിരുന്നാകുന്നു. വേനൽസമയങ്ങളിലും തടയണയിൽ ജലസമൃദ്ധിയുള്ളതിനാൽ തമിഴ്നാട്ടിൽനിന്നുപേലും നിരവധിയാളുകളെത്തുന്നുണ്ട്. തടയണയിലെ തെളിഞ്ഞ വെള്ളത്തിൽ ഇറങ്ങി കുളിച്ചാണ് പലരുടെയും മടക്കം. മൂന്നുമാസം മുൻപ് വിളയോടി നിലമ്പതിപ്പാലത്തിനു സമീപം രണ്ട് കോളജ് വിദ്യാർഥികൾ മുങ്ങിമരിച്ച സംഭവത്തിനുശേഷം ഇവിടേക്ക് നാട്ടുകാർ നിയന്ത്രണം ഏർപ്പെടുത്തിയിരുന്നു. ഇതോടെ കാഴ്ച കാണാനെത്തുന്നവരുടെ എണ്ണം കുറഞ്ഞിട്ടുണ്ട്. നീന്തൽ വശമില്ലാത്തവർ തടയണ മധ്യത്തിലേക്ക് ഇറങ്ങുന്നത് കുളിക്കാനെത്തുന്ന സമീപവാസികൾ വിലക്കാറുണ്ട്. തടയണയുടെ മുകൾഭാഗത്തുനിന്നും വെള്ളച്ചാട്ട ദൃശ്യങ്ങൾ പകർത്താനുള്ള സൗകര്യം ഏർപ്പെടുത്തണമെന്ന ആവശ്യവും ശക്തമാണ്. പ്രാദേശിക വിനോദസഞ്ചാര കേന്ദ്രമായി പ്രദേശത്തെ വികസിപ്പിക്കണമെന്നും ആവശ്യമുയരുന്നുണ്ട്.

കുരുന്നുകൾക്ക് പൾസ് പോളിയോ തുള്ളിമരുന്ന് നൽകി

പാലക്കാട്: ജില്ലയിൽ അഞ്ചുവയസു വരെയുള്ള കുഞ്ഞുങ്ങൾക്കു പൾസ് പോളിയോ തുള്ളിമരുന്ന് നൽകി. ആരോഗ്യ കേന്ദ്രങ്ങൾ, അങ്കണവാടികൾ, സ്കൂളുകൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങി 2157 പോളിയോ ബൂത്തുകൾ വഴിയാണ് പോളിയോ പ്രതിരോധ തുള്ളിമരുന്ന് ലഭ്യമാക്കിയത്. തുള്ളിമരുന്ന് വിതരണത്തിന്‍റെ ജില്ലാതല ഉദ്ഘാടനം കെ. ശാന്തകുമാരി എംഎൽഎ നിർവഹിച്ചു. കോങ്ങാട് സാമൂഹികാരോഗ്യ കേന്ദ്രത്തിൽ സംഘടിപ്പിച്ച പരിപാടിയിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ അധ്യക്ഷത വഹിച്ചു. പാലക്കാട് ബ്ലോക്ക് പഞ്ചായത്ത് പ്രസിഡന്‍റ് വി. സേതുമാധവൻ മുഖ്യാതിഥിയായി പങ്കെടുത്തു. ജില്ലാ ആർസിഎച്ച് ഓഫീസർ എ.കെ. അനിത വിഷയാവതരണം നടത്തി. കോങ്ങാട് ഗ്രാമപഞ്ചായത്ത് പ്രസിഡന്‍റ് ടി. അജിത്ത്, ജില്ലാ പഞ്ചായത്ത് മെംബർ എ. പ്രശാന്ത്, ബ്ലോക്ക് പഞ്ചായത്ത് മെംബർമാരായ എം. നസീർ, ബി. നന്ദിനി, കോങ്ങാട് ഗ്രാമപഞ്ചായത്ത് മെംബർമാരായ അബ്ദുൾ സലീം, കെ.ടി. ശശിധരൻ, പബ്ലിക് ഹെൽത്ത് അഡീഷണൽ ഡിഎച്ച്എസ് കെ.പി. റീത്ത എന്നിവർ പ്രസംഗിച്ചു. മറ്റു ജനപ്രതിനിധികൾ, ആരോഗ്യവകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു. പോളിയോ സബ് നാഷണൽ ഇമ്യൂണൈസേഷൻ ദിനാചരണത്തിന്‍റെ ഭാഗമായാണ് പോളിയോ തുള്ളി മരുന്ന് വിതരണം ചെയ്തത്.

മണ്ണാർക്കാട് യൂണിവേഴ്സൽ കോളജിനു പുതിയ ഭരണസമിതി

മണ്ണാർക്കാട്: മണ്ണാർക്കാട് യൂണിവേഴ്സൽ കോളജിൽ പുതിയ ഭരണസമിതി ചുമതലയേറ്റു. എസ്.ആർ. ഹബീബുള്ളയാണ് ചെയർമാൻ. മുൻ എംഎൽഎ പി.കെ. ശശി ചെയർമാനായിരുന്ന ഭരണസമിതിയുടെ കാലാവധി തീർന്നതിനെ തുടർന്നാണ് പുതിയ ഭരണസമിതി ചുമതലയേറ്റത്. എതിരില്ലാതെയാണ് തെരഞ്ഞെടുപ്പ് നടന്നത്. സിപിഎം അനുമതിയില്ലാതെ യൂണിവേഴ്സൽ കോളജിനു വേണ്ടി പി.കെ. ശശി സഹകരണ ബാങ്കുകളിൽനിന്ന് ഷെയർ വാങ്ങി എന്ന ആരോപണം ഉൾപ്പെടെ വൻ വിവാദമായിരുന്നു. പി.കെ. ശശിക്കെതിരെ ഉയർന്ന ആരോപണങ്ങളിൽ യൂണിവേഴ്സൽ കോളജുമായി ബന്ധപ്പെട്ട ആരോപണങ്ങളും ഉയർന്നിരുന്നു. ഭരണസമിതിയുടെ കാലാവധി തീർന്നതിനെ തുടർന്ന് അഡ്മിനിസ്ട്രേറ്ററെ നിയമിക്കുകയും തെരഞ്ഞെടുപ്പ് പ്രഖ്യാപിക്കുകയും ചെയ്തു. അഡ്മിനിസ്ട്രേറ്ററുടെ നേതൃത്വത്തിൽ തയാറാക്കിയ വോട്ടർ പട്ടികയിൽ ക്രമക്കേടുണ്ടെന്നും തെരഞ്ഞെടുപ്പ് മാറ്റിവയ്ക്കണമെന്നും ആവശ്യപ്പെട്ട് പി.കെ. ശശി ഹൈക്കോടതിയിൽ ഹർജി നൽകിയിരുന്നു. എന്നാൽ കോളജിന്‍റെ പ്രവർത്തന പരിധിക്ക് പുറത്തു താമസിക്കുന്ന ശശിക്ക് അംഗത്വത്തിന് അർഹതയില്ലെന്നായിരുന്നു കോളജിന്‍റെ മറുവാദം. ഇരുവിഭാഗത്തിന്‍റെയും വാദംകേട്ട കോടതി പി.കെ. ശശിയുടെ ഹർജി തള്ളുകയായിരുന്നു. ഇതോടെയാണ് തെരഞ്ഞെടുപ്പിന് വഴി തെളിഞ്ഞത്. സിപിഎം പാനൽ എതിരില്ലാതെ തെരഞ്ഞെടുക്കപ്പെട്ടു. വൈസ് ചെയർപേഴ്സനായി സീതാലക്ഷ്മിയെ തെരഞ്ഞെടുത്തു. ഡയറക്ടർമാരായി കെ. റിയാസുദ്ദീൻ, എം. വിനോദ് കുമാർ, എം. ജിനേഷ്, പി. ഷാജി, പി.പി.കെ മുഹമ്മദ് അബ്ദു റഹ്്മാൻ, പി.കെ. മോഹൻദാസ്, എം. മനോജ്, സി.കെ. ജയശ്രീ, എ.ദിൽന എന്നിവരെയും തെരഞ്ഞെടുത്തു.

അതിദരിദ്രരില്ലാത്ത നഗരസഭയായി മണ്ണാർക്കാട്

മണ്ണാർക്കാട്: അതിദരിദ്രരില്ലാത്ത നഗരസഭയായി മണ്ണാർക്കാട് നഗരസഭയെ പ്രഖ്യാപിച്ചു. നഗരസഭാ ചെയർമാൻ സി. മുഹമ്മദ് ബഷീർ പ്രഖ്യാപനം നടത്തി. മണ്ണാർക്കാട് നഗരസഭാ പരിധിയിലെ അതിദരിദ്ര ഗുണഭോക്താക്കളിൽ സ്ഥലവും വീടുമില്ലാത്ത ഒമ്പത് ഗുണഭോക്താക്കൾക്ക് മൂന്നുസെന്‍റ് ഭൂമി വാങ്ങുന്നതിനും ലൈഫ് പദ്ധതി പ്രകാരം വീടുവയ്ക്കുന്നതിനും തുക കൈമാറി. സംസ്ഥാനത്തെ ഏറ്റവും കൂടുതൽ ആളുകൾക്ക് വസ്തു വാങ്ങിയതിനുള്ള ധനസഹായം നൽകിയത് മണ്ണാർക്കാട് നഗരസഭയാണെന്നു പ്രഖ്യാപന ചടങ്ങിൽ നഗരസഭാ ചെയർമാൻ പറഞ്ഞു. നഗരസഭ വാങ്ങി നൽകിയ സ്ഥലത്തിന്‍റെ ആധാരം ഗുണഭോക്താക്കൾക്ക് കൈമാറി. നഗരസഭാ വൈസ് ചെയർപേഴ്സൺ പ്രസീത, സ്ഥിരം സമിതി അധ്യക്ഷരായ ബാലകൃഷ്ണൻ, മാസിത സത്താർ, വത്സലകുമാരി, ഹംസ കുറുവണ്ണ, നഗരസഭ കൗൺസിലർമാരായ യൂസഫ് ഹാജി, മുജീബ് ചോലോത്ത്, അരുൺകുമാർ പാലക്കുറുശ്ശി, ടി.ആർ. സെബാസ്റ്റ്യൻ, അമുദ, ഷറഫുന്നിസ, സുഹറ, സിന്ധു, സൗദാമിനി, ഉഷ, കയറുന്നിസ, രാധാകൃഷ്ണൻ, ഹസീന, ലക്ഷ്മി, നഗരസഭ സെക്രട്ടറി സതീഷ് കുമാർ, ഹെൽത്ത് ഇൻസ്പെക്ടർ ഡി.ആർ. ബിജു, പദ്ധതി പ്രോജക്ട് ഓഫീസർ ബീന തുടങ്ങിയവർ പങ്കെടുത്തു.

സംഭരിക്കാൻ ഇടമില്ലാതെ വെള്ളം പുഴയിലേക്ക്

മംഗലംഡാം: മംഗലംഡാം റിസർവോയർ മണ്ണുനിറഞ്ഞു നികന്നു. മലകളിൽ നിന്നും കാട്ടിൽനിന്നും റിസർവോയറിലേക്ക് ഒഴുകിയെത്തുന്ന വെള്ളത്തിന്‍റെ പകുതിപോലും സംഭരിക്കാൻ ഇടമില്ലാതെ വെള്ളം പുഴയിലേക്കൊഴുക്കി പാഴാക്കുന്നു. മംഗലം പുഴയിൽ തടയണകളെല്ലാം തകർന്നു കിടക്കുന്നതിനാൽ പുഴയിലേക്ക് ഒഴുക്കുന്ന വെള്ളം എവിടെയും നിൽക്കാതെ ഭാരതപ്പുഴയിലേക്ക്. കാലവർഷത്തിൽ മംഗലംഡാമിന്‍റെ ഷട്ടറുകൾ തുറന്ന് പുഴയിലേക്കൊഴുക്കുന്നത് ഒരുഡാം നിറയാനുള്ളത്ര വെള്ളമാണെന്നാണ് വിലയിരുത്തൽ. ഈ വർഷം ജൂൺ16ന് തന്നെ ഡാമിന്‍റെ മുഴുവൻ ഷട്ടറുകളും തുറന്നു. നാലുമാസത്തോളമായി ഷട്ടറുകൾ തുറന്നു തന്നെയാണ്. ഇപ്പോൾ ഒന്നും ആറും ഷട്ടറുകൾ തുറന്നിരിപ്പാണ്. മിക്കവാറും വർഷങ്ങളിലും ജൂലൈ ആദ്യത്തിലും പകുതിയോടെയും ഷട്ടറുകൾ തുറക്കാറുണ്ട്. ഇങ്ങനെയൊക്കെ ജലസമൃദ്ധിയുണ്ടെങ്കിലും നല്ല വേനലുണ്ടായാൽ മംഗലംഡാം വരണ്ടുണങ്ങും. മേയ് മാസം അവസാനത്തിലും ജൂൺ ആദ്യത്തിലുമൊക്കെയായി കനത്ത കുറച്ചു മഴ ലഭിച്ചാൽ മതി ഡാം നിറയും. പിന്നെ നാലഞ്ചുമാസങ്ങൾ ഷട്ടറുകൾ തുറന്നുവയ്ക്കണം. അതല്ലാതെ മറ്റു വഴികളില്ല. വൃഷ്ടി പ്രദേശത്ത് ഏറ്റവും കൂടുതൽ മഴ ലഭിക്കുന്ന ഡാമുകളിൽ ഒന്നായ മംഗലംഡാമിൽ അധികജലം സംഭരിക്കുന്നതിന് നടപടികളില്ലാത്തത് ഇപ്പോഴും വലിയ പോരായ്മയായി നില നിൽക്കുകയാണ്. പാഴാക്കുന്ന വെള്ളം പുഴയിൽ തടഞ്ഞു നിർത്താൻ മൂന്നോ നാലോ കിലോമീറ്റർ ഇടവിട്ട് ചെക്ക് ഡാമുകൾ കെട്ടി കുറെ വെള്ളം വേനലിലേക്കായി സഭരിക്കാൻ കഴിയും. എന്നാൽ ബന്ധപ്പെട്ട വകുപ്പുകളൊന്നും കർഷകരുടെ രക്ഷക്ക് ഉതകുന്ന നടപടികളിലേക്കില്ല. 2018 ലും 2019ലും അതിവർഷവും തുടർന്നുള്ള പ്രളയവുമുണ്ടായപ്പോൾ ഡാമിന്‍റെ വൃഷ്ടിപ്രദേശങ്ങളായ മലകളിലും വ്യാപകമായി ഉരുൾപൊട്ടലുകളുണ്ടായി. അവിടെനിന്നെല്ലാം മണ്ണും മണലും പാറകളും മരങ്ങളുമെല്ലാം ഡാമിൽ അടിഞ്ഞുകൂടി. ഇത് ഡാമിന്‍റെ സംഭരണശേഷി 2015ലെ പരിശോധനാ റിപ്പോർട്ടിനേക്കാൾ വീണ്ടും കുറച്ചു. 2020 ഡിസംബർ 17നാണ് ഡാമിൽ അടിഞ്ഞുകൂടിയിട്ടുള്ള മണ്ണും മണലും നീക്കം ചെയ്യുന്നതിനുള്ള പ്രവൃത്തി തുടങ്ങിയത്. തുടക്കം നന്നായെങ്കിലും പിന്നീടിതു നിലച്ചു. ഇതു മൂലം ഡാം ജല ഉറവിടമാക്കി നടപ്പാക്കാൻ ലക്ഷ്യംവച്ച കുടിവെള്ള പദ്ധതിയും മുടങ്ങിക്കിടക്കുകയാണ്.

അവഗണന അവസാനിപ്പിക്കണം: പെൻഷനേഴ്സ് അസോസിയേഷൻ

വടക്കഞ്ചേരി: പെൻഷൻകാരോടുള്ള അവഗണന അവസാനിപ്പിക്കണമെന്ന് കെഎസ്എസ്പിഎ വടക്കഞ്ചേരി മണ്ഡലം കമ്മിറ്റി. സംസ്ഥാന സമിതി അംഗം എ. ഗോപിനാഥൻ ഉദ്ഘാടനം ചെയ്തു. യൂണിറ്റ് പ്രസിഡന്‍റ് പ്രസാദ് വർക്കി അധ്യക്ഷത വഹിച്ചു. ജില്ലാകമ്മിറ്റി അംഗം കെ. അശോകൻ മുഖ്യപ്രഭാഷണം നടത്തി. ജില്ലാകമ്മിറ്റി അംഗം ഇഎസ്എം ഹനീഫ, നിയോജക മണ്ഡലം പ്രസിഡന്‍റ് പി. കേശവദാസ്, സെക്രട്ടറി എ.എസ്. സാബു, കെ. വേലുണ്ണി, നിയോജക മണ്ഡലം ചെയർമാൻ ആനിയമ്മ ജോസഫ്, ജെയ്സൺ എം. ജേക്കബ് പ്രസംഗിച്ചു. ഭാരവാഹികളായി എം.പി. ശശികല - പ്രസിഡന്‍റ്, കുമാരി ടീച്ചർ - വൈസ് പ്രസിഡന്‍റ്, ജെയ്സൺ എം. ജേക്കബ് - സെക്രട്ടറി, വാക്കുട്ടി - ജോയിന്‍റ് സെകട്ടറി, വി. രവീന്ദ്രൻ - ട്രഷറർ എന്നിവരെ തെരഞ്ഞെടുത്തു.

പുതുനഗരം സിഗ്നൽറോഡിൽ വാഹന പാർക്കിംഗ് തടയണമെന്ന് ആവശ്യം

പുതുനഗരം: ഹൈസ്കൂൾ റോഡിൽ സിഗ്നലിനു സമീപം വാഹനസഞ്ചാര തടസമായി വണ്ടികൾ ദീർഘനേരം നിർത്തിയിടുന്നവർക്കെതിരെ പോലീസ് നടപടി വേണമെന്ന് യാത്രക്കാർ. സിഗ്നൽ കഴിഞ്ഞ് കരിപ്പോട് ഭാഗത്തേക്കുള്ള വാഹനങ്ങളാണ് അനധികൃത പാർക്കിംഗ് കാരണം വഴിയിലകപ്പെടുന്നത്. ഇതു കാരണം സമയം വൈകി ഓടുന്നതുമൂലം ബസ് ജീവനക്കാർ തമ്മിൽ സമയത്തെചൊല്ലി തർക്കമുണ്ടാവാറുമുണ്ട്. വാഹനങ്ങൾ റോഡിൽ നിർത്തി പിന്നീട് ദീർഘനേരം കഴിഞ്ഞാണ് വാഹനം മാറ്റിയിടാൻ വരുന്നത്. ഈ സമയത്ത് സിഗ്നൽ കഴിഞ്ഞുവരുന്ന വാഹനങ്ങൾ മുന്നോട്ട് പോവാനാതെ ചിലപ്പോൾ നാൽക്കവല റോഡ് ഗതാഗതകുരുക്കിൽ അകപ്പെടുകയും വാഹനങ്ങൾ ഹോൺ മുഴക്കി ബഹളമുണ്ടാക്കുകയും ചെയ്യാറുണ്ട്. ഈ സ്ഥലത്ത് റോഡിനു വീതി കുറവാണെന്നതിനാൽ ഇരുചക്ര വാഹനം നിർത്തിയാൽപോലും കുരുക്ക് മുറുകുന്ന അവസ്ഥയുണ്ട്. രാവിലെ 8.30 മുതൽ 11 വരെയും വൈകുന്നേരം 3.30 മുതൽ 6.30 വരെയും വാഹനഗതാഗതം കൂടുതലുണ്ടാവാറുണ്ട്. രോഗികളുമായി വരുന്ന ആംബുലൻസ്പോലും കുരുക്കിൽ അകപ്പെടുന്നതായും ആരോപണമുണ്ട്.

ആധുനിക കൃഷിരീതിയും ശാസ്ത്രസാങ്കേതികവിദ്യയും ഏകോപിപ്പിക്കണം: മന്ത്രി പി. പ്രസാദ്

ആലത്തൂർ: ആധുനിക കൃഷിരീതിയും ശാസ്ത്രസാങ്കേതികവിദ്യയും ഏകോപിപ്പിച്ച് കാർഷിക മേഖലയെ മെച്ചപ്പെടുത്താനുള്ള ശ്രമങ്ങളാണ് ഓരോ പദ്ധതികളുമെന്ന് കൃഷിമന്ത്രി പി. പ്രസാദ് പറഞ്ഞു. സംസ്ഥാനങ്ങളിലെ കാർഷികോത്പാദനം പ്രോത്സാഹിപ്പിക്കുന്നതിന് കേന്ദ്രസർക്കാർ നടപ്പാക്കുന്ന പ്രധാനമന്ത്രി ധൻ-ധാന്യ കൃഷി യോജന പദ്ധതിയുടെ സംസ്ഥാനതല ഉദ്ഘാടനം നിർവഹിക്കുകയായിരുന്നു മന്ത്രി. കേരളത്തിൽ കോഴിക്കോട്, കണ്ണൂർ, കാസർഗോഡ് ജില്ലകളിലാണ് പ്രാരംഭമായി പദ്ധതി നടപ്പിലാക്കുന്നത്. നെല്ല് സംഭരിച്ചാൽ ഉടൻ പണം കൊടുക്കാൻ പറ്റുന്ന തരത്തിലേക്ക് കേരള ബാങ്ക് അടക്കമുള്ള സർക്കാർ നിയന്ത്രണത്തിലുള്ള ബാങ്കുകളെ കൂടി ഈ രംഗത്തേക്ക് ബന്ധപ്പെടുത്താനാണ് ശ്രമിക്കുന്നത്. കർഷകരിൽ നിന്ന് നെല്ല് എടുത്ത് സിവിൽ സപ്ലൈസ് അരിയാക്കി റേഷൻകടകളിൽ എത്തിച്ച് ജനങ്ങൾ അരി വാങ്ങി ഭക്ഷണം കഴിച്ച കണക്ക് കേന്ദ്രത്തിൽ കൊടുത്തുകഴിയുമ്പോഴാണ് കേരളത്തിന് നെല്ലിന്‍റെ പൈസക്ക് അപേക്ഷിക്കാൻ കഴിയുക എന്നതാണ് നിലവിലെ കേന്ദ്ര വ്യവസ്ഥ .ഈ കാലതാമസമാണ് കർഷകർക്ക് നെല്ലിന്‍റെ വില ലഭ്യമാക്കാനും താമസം നേരിടുന്നതെന്നും ഇതിൽ മാറ്റം വേണമെന്നും ഏത് പദ്ധതി കൊണ്ടും ഉദ്ദേശിക്കുന്നത് കാർഷിക മേഖലയിലെ മെച്ചപ്പെട്ട വരുമാനമാണെന്നും മന്ത്രി പറഞ്ഞു.കെ.ഡി. പ്രസേനൻ എംഎൽ എ അധ്യക്ഷത വഹിച്ചു.

ശബരിമല സ്വർണക്കവർച്ച; കോൺഗ്രസ് പ്രതിഷേധജ്വാല

വടക്കഞ്ചേരി: കോൺഗ്രസ് കമ്മറ്റി സംഘടിപ്പിച്ച പ്രതിഷേധ ജ്വാല ഡിസിസി സെക്രട്ടറി ഡോ. അർസലൻ നിസാം ഉദ്‌ലാടനം ചെയ്തു. മണ്ഡലം പ്രസിഡന്‍റ് ഇല്യാസ് പടിഞ്ഞാറെക്കളം അധ്യക്ഷത വഹിച്ചു. ബാബു മാധവൻ, ജി. സതീഷ് കുമാർ, വി.എച്ച്. ബഷീർ, എ. ഭാസ്കരൻ,ജോണി ഡയൻ, ശ്രീനാഥ് വെട്ടത്ത്, സി.കെ. ദേവദാസ്, കെ. സുരേഷ്, ബി. സുരേഷ്, സുനിൽ ചുവട്ടുപാടം, പി.എസ്. മുജീബ്, സി.പി. രാജൻ, വി.എ. ബെന്നി, എൻ സോമൻ പ്രസംഗിച്ചു. പുതുക്കോട് മണ്ഡലം കമ്മിറ്റി പ്രതിഷേധ ജ്വാല സംഘടിപ്പിച്ചു. ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. മണ്ഡലം പ്രസിഡന്‍റ് കെ. ഉദയൻ അധ്യക്ഷത വഹിച്ചു. സി.എം. അബ്ദുൾറഹ്മാൻ, ഇഎസ്എം ഹനീഫ, ടി.എച്ച്. സാദിക് , വി.എം. വഹാബ്, ആർ. ഭാഗ്യലക്ഷ്മി, പി.എം. ഹാരിഷ് പ്രസംഗിച്ചു. കിഴക്കഞ്ചേരിയിൽ കുണ്ടുകാട് നടന്ന പ്രതിഷേധ ജ്വാലയിൽ മണ്ഡലം പ്രസിഡന്‍റ് സി. ചന്ദ്രൻ അധ്യക്ഷത വഹിച്ചു. വി.ജെ. ജോസഫ്, ബാബു പോൾ, ടി.കെ.ഷാനവാസ്, സുനിൽ എം. പോൾ. പി.പി. പത്മനാഭൻ, അരുൺ മാണിക്കത്ത്, സണ്ണി മണ്ടകത്ത്, ഷാജു ആന്‍റണി പ്രസംഗിച്ചു.

തത്തമംഗലം വാട്ടർടാങ്കിലെ തേനീച്ചക്കൂടുകൾ നീക്കണം

ചിറ്റൂർ: തത്തമംഗലം വാട്ടർടാങ്കിൽ കാണപ്പെടുന്ന തേനീച്ചകളും കൂടും നീക്കംചെയ്യണമെന്ന് സമീപവാസികൾ. ഇടയ്ക്കിടെ കൂടിളകി തേനീച്ച ആക്രമണങ്ങളിൽ അപകടം കൂടിവരുന്നത് സമീപവാസികളെ ആശങ്കപ്പെടുത്തുകയാണ്. തത്തമംഗലം കൺവൻഷൻ സെന്‍ററിനു സമീപത്താണ് വാട്ടർ ടാങ്കും തേനീച്ചകൂടും ഉള്ളത്. കാക്കയോ മറ്റു പറവകളൊ കൊത്തിയാൽ തേനീച്ചകൾ അക്രമാസക്തമാവുന്നതും നാട്ടുകാരെ ഭയപ്പെടുത്തുകയാണ്. നൂറുകണക്കിനാളുകൾ ഒത്തുചേരുന്ന കൺവൻഷൻ സെന്‍ററിലെത്തുന്നവർക്കും തേനീച്ചകൂട് അപകടഭീഷണി ഉയർത്തുന്നുണ്ട്. നിരവധി കുടുംബങ്ങളും ഇവിടെ അടുത്ത് താമസക്കാരായുണ്ട്.

കൃഷിഭവനു സമീപം ചാക്കുകെട്ടുകൾ കുന്നുകൂടി; നാട്ടുകാർക്കു ദുരിതം

കൊടുവായൂർ: പുതുനഗരം കൃഷിഭവൻ, മൃഗാശുപത്രിക്കു മുന്നിൽ കുന്നുപോലെ കൂട്ടിയിരിക്കുന്ന ഹരിതകർമസേനയുടെ ചാക്കുകെട്ടുകൾ മാറ്റിയിടണമെന്ന് നാട്ടുകാർ. ഇതുമൂലം കൃഷിഭവനിൽ പ്രവേശിക്കാൻ ഏറെ വിഷമകരമാവുന്നു. സമീപത്തുതന്നെയുള്ള മൃഗാശുപത്രിയുടെ കാര്യവും പരിതാപകരമാണ്. സ്ഥലത്ത് പഞ്ചായത്ത് കമ്യൂണിറ്റി ഹാളിലേക്ക് പോവുന്നതും ഇതു വഴിയാണ്. ചാക്കുകെട്ടുകൾ സുരക്ഷിതമായ സ്ഥലത്തേക്ക് മാറ്റിയിടണമെന്ന് പഞ്ചായത്തതികൃതർക്ക് മുൻപ് പരാതി നൽകിയിട്ടും നടപടി ഉണ്ടാവുന്നില്ലെന്ന ആരോപണവും നിലവിലുണ്ട്.

എക്സൈസ് വകുപ്പിനെ ആധുനികവത്കരിക്കാൻ സർക്കാർ ശ്രമം: മന്ത്രി എം.ബി. രാജേഷ്

പാലക്കാട്: എക്സൈസ് വകുപ്പിനെ ആധുനികവത്കരിച്ച് കൂടുതൽ ജനകീയമാക്കുന്നതിനാണ് സർക്കാർ ശ്രമം നടത്തുന്നതെന്ന് എക്സൈസ് വകുപ്പ് മന്ത്രി എം.ബി. രാജേഷ്. എക്സൈസ് വകുപ്പിന്‍റെ ഭാവി വികസനലക്ഷ്യങ്ങൾ ചർച്ച ചെയ്യുന്നതിനായി സംഘടിപ്പിക്കുന്ന സംസ്ഥാനതല സെമിനാറിന്‍റെ സംഘാടകസമിതി രൂപീകരണയോഗം ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. വുമണ്‍ എക്സൈസ് ഓഫീസർമാരുടെ തസ്തികകൾ ഉൾപ്പെടെ നിരവധി തസ്തികകൾ സൃഷ്ടിക്കാൻ ഈ സർക്കാരിന് സാധിച്ചെന്നും, വകുപ്പിന്‍റെ അംഗബലം വർധിപ്പിക്കാനാണ് സർക്കാർ തീരുമാനമെന്നും മന്ത്രി സൂചിപ്പിച്ചു. കുറ്റവാളികളെ കണ്ടെത്തി ശിക്ഷിക്കുന്നതിനു പുറമേ ഇരകളായവരെ കൗണ്‍സിലിംഗിലൂടെയും മറ്റു മാർഗങ്ങളിലൂടെയും മോചിപ്പിക്കുന്നതിനും പ്രതിരോധം സൃഷ്ടിക്കുന്നതിനും വകുപ്പ് നിരവധി പ്രവർത്തനങ്ങൾ നടപ്പിലാക്കി വരുന്നുണ്ടെന്ന് മന്ത്രി പറഞ്ഞു. കളക്ടറേറ്റ് കോണ്‍ഫറൻസ് ഹാളിൽ നടന്ന പരിപാടിയിൽ എക്സൈസ് കമ്മീഷണർ എം.ആർ. അജിത്കുമാർ അധ്യക്ഷത വഹിച്ചു. ജില്ലാ കളക്ടർ എം.എസ്. മാധവിക്കുട്ടി, അഡീഷണൽ എക്സൈസ് കമ്മീഷണർ എസ്. ദേവമനോഹർ, എക്സൈസ് ഇൻസ്പെക്ടർ കെ.ആർ. അജിത്ത്, മധ്യമേഖല ജോയിന്‍റ് എക്സൈസ് കമ്മീഷണർ എസ്. കൃഷ്ണകുമാർ എന്നിവർ പ്രസംഗിച്ചു.

കുഞ്ചൻനമ്പ്യാർ സ്മാരക നവീകരണത്തിന് 39 ലക്ഷം അനുവദിച്ചു

ഒറ്റപ്പാലം: കുഞ്ചൻനമ്പ്യാർ സ്മാരക നവീകരണത്തിന് 39,20,000 രൂപ ധനകാര്യവകുപ്പ് അനുവദിച്ചു. കാലപ്പഴക്കം മൂലം ബലക്ഷയം ബാധിച്ച കലക്കത്ത് ഭവനത്തിന്‍റെ നവീകരണത്തിനാണ് അവസാനം ധനകാര്യ വകുപ്പിന്‍റെ കരുണയുണ്ടായത്. തുള്ളൽകലയുടെ ഇതിഹാസം ജനിച്ച പാലക്കാട് കിള്ളിക്കുറുശിമംഗലത്തെ കലക്കത്ത് ഭവനത്തിന്‍റെ തനിമ നിലനിർത്തിയുള്ള നവീകരണത്തിനാണ് തുക പൂർണമായും വിനിയോഗിക്കുക. 1700- 1770 കാലഘട്ടത്തിൽ ജീവിച്ച മഹാകവിയുടെ ജന്മഗൃഹം അച്യുതമേനോൻ സർക്കാരിന്‍റെ കാലഘട്ടത്തിലാണ് കലക്കത്ത് കുടുംബത്തിൽ നിന്ന് ഏറ്റെടുത്ത് സംരക്ഷിച്ചുവരുന്നത്. നൂറ്റാണ്ടുകൾ പഴക്കമുള്ള കവി ഗൃഹം സർക്കാർ ഏറ്റെടുക്കുന്നത് പടിപ്പുര തകർന്ന് നിലം പൊത്തുമെന്ന അവസ്ഥയിലായിരുന്നു. തുടർന്ന് അതാതുകാലഘട്ടത്തിൽ അറ്റകുറ്റപ്പണികൾ നടത്തി സംരക്ഷിച്ചു പോന്നു. കേരള സർക്കാർ സാംസ്കാരിക വകുപ്പ് നിയോഗിക്കുന്ന ഭരണസമിതി 1997-98 കാലഘട്ടങ്ങളിലാണ് ബലക്ഷയങ്ങൾ പരിഹരിച്ച് അക്കാലത്ത് നവീകരിച്ചിരുന്നത്. ഇതിനുശേഷം വന്ന ഭരണസമിതികൾ ഓടുപുര മേഞ്ഞ മൺചുമരോട് കൂടിയ വീടിന്‍റെ അറ്റകുറ്റപണികളും നടത്തിവന്നു. അറ്റകുറ്റപണി കൊണ്ട് മാത്രം കഴിയാത്ത വിധത്തിൽ അടുത്തിടെ മേൽക്കൂര തകരുന്ന അവസ്ഥയും കാലപഴക്കം കൊണ്ട് മൺചുമർ അടർന്ന് വിള്ളൽ വരുന്ന സ്ഥിതി വിശേഷവും ഉണ്ടായി.കഴിഞ്ഞ നാല് മാസത്തിലേറെയായി കവിഗൃഹത്തിനുള്ളിലേയ്ക്ക് സന്ദർശകരുടെ സുരക്ഷ കണക്കിലെടുത്ത് പ്രവേശനം നിർത്തിവെക്കുന്ന സ്ഥിതിയും ഉണ്ടായി. സ്പെഷൽ ഗ്രാന്‍റിന്‍റെ അപര്യാപ്തത മൂലം ജീവനക്കാർക്കും താത്കാലിക അധ്യാപകർക്കും ശമ്പളകുടിശികയും ഉണ്ടായതും ഏറെക്കുറെ പരിഹരിച്ചുകഴിഞ്ഞു. അടുത്തായി തന്നെ നവീകരണ പ്രവർത്തനങ്ങൾ നടത്താനാകും എന്ന് സർക്കാർ വകുപ്പുകൾ അറിയിച്ചു. കെ. പ്രേംകുമാർ എംഎൽഎ, ലക്കിടി പേരൂർ പഞ്ചായത്ത് പ്രസിഡന്‍റ് കെ. സുരേഷ്, സ്മാരകം ചെയർമാർ ജയദേവൻ, സെക്രട്ടറി എൻ. നാരായണൻ നമ്പൂതിരി, തുള്ളൽ കലാകാരനായ കുഞ്ചൻ സ്മാരകം രാജേഷ് എന്നിവർ അടക്കമുള്ള ഭരണസമിതി അംഗങ്ങളുടെ കൂട്ടായ പരിശ്രമമാണ് നവീകരണത്തിന് തുക അനുവദിച്ചതിനു സഹായകരമായത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]