ഗുരുപ്രീത് ചാടിക്കയറിയത് സ്വര്‍ണത്തിലേക്ക്
Sunday, November 10, 2024 2:01 AM IST
കൊച്ചി: ആദ്യമായി സംസ്ഥാന സ്‌കൂള്‍ മീറ്റില്‍ പങ്കെടുത്ത് സുവര്‍ണനേട്ടവുമായി മടങ്ങുകയാണ് എ.ആര്‍. ഗുരുപ്രീത്.
സബ് ജൂണിയര്‍ ആണ്‍കുട്ടികളുടെ ഹൈജംപില്‍ 1.70 മീറ്റര്‍ ചാടിയാണ് ഗുരുപ്രീത് മഹാരാജാസ് ജംപിംഗ് പിറ്റില്‍ നിന്നും സ്വര്‍ണം നേടിയത്. കോഴിക്കോട് മണിയൂര്‍ പഞ്ചായത്ത് ഹയര്‍സെക്കന്‍ഡറി സ്‌കൂള്‍ വിദ്യാര്‍ഥിയാണ്.
റിട്ടയേര്‍ഡ് ആര്‍മി ഉദ്യോഗസ്ഥന് സി.കെ. പൊന്നുവിന്‍റെയും ശ്രീരമ്യയുടെയും മകനാണ്. അച്ഛന്‍ തന്നെയാണ് കായിക ലോകത്തേക്ക് ഗുരുപ്രീതിനെ കൊണ്ടുവന്നത്. ഒരു വര്‍ഷമായി മണിയൂര്‍ സര്‍ക്കാര്‍ ഹയര്‍സെക്കന്‍ഡറി സ്‌കൂളിലെ കായിക അധ്യാപകന്‍ ഡോ. എം. ഷിംജിത്തിന്‍റെ കീഴിലാണ് പരീശീലനം. ആദ്യമായാണ് സംസ്ഥാന മീറ്റില്‍ പങ്കെടുത്തത്.
ആലപ്പുഴ എഴുപുന്ന സെന്‍റ് റാഫേല്‍സ് എച്ച്എസ്എസിലെ കെ.യു. അര്‍ജുന്‍ 1.63 മീറ്റര്‍ ചാടി വെള്ളിയും തൃശൂര്‍ മാള എച്ച്സിസിഇഎംഎച്ച്എസ്എസ് സ്നേഹഗിരിയിലെ കൃഷ് ഡാര്‍വിന്‍ രാജ് വെങ്കലവും സ്വന്തമാക്കി.