പാർലമെന്‍റിൽ ജനങ്ങളുടെ ശബ്ദമാകും: പ്രിയങ്ക
Friday, November 29, 2024 3:53 AM IST
ന്യൂഡൽഹി: പാർലമെന്‍റിൽ ജനങ്ങളുടെ ശബ്‌ദമാകാൻ ആഗ്രഹിക്കുന്നുവെന്ന് കേരളത്തിന്‍റെ വയനാട് എംപി പ്രിയങ്ക ഗാന്ധി. “നിങ്ങൾ അർപ്പിക്കുന്ന വിശ്വാസത്തിനു നന്ദിയുണ്ട്. ഈ വിജയം നിങ്ങളുടെ വിജയമാണെന്ന് നിങ്ങൾക്ക് ശരിക്കും തോന്നുന്നുവെന്ന് കാലക്രമേണ ഞാൻ ഉറപ്പാക്കും.
നിങ്ങളെ പ്രതിനിധീകരിക്കാൻ നിങ്ങൾ തെരഞ്ഞെടുത്ത വ്യക്തി നിങ്ങളുടെ പ്രതീക്ഷകളും സ്വപ്നങ്ങളും മനസിലാക്കുകയും നിങ്ങൾക്കായി പോരാടുകയും ചെയ്യും. പാർലമെന്‍റിൽ നിങ്ങളുടെ ശബ്‌ദമാകാൻ ഞാൻ കാത്തിരിക്കുകയാണ്’’-പ്രിയങ്ക സമൂഹമാധ്യമമായ എക്സിൽ കുറിച്ചു.
ലോക്സഭയിൽ പ്രിയങ്കയുടെ സത്യപ്രതിജ്ഞയ്ക്കു സാക്ഷ്യം വഹിക്കാൻ അമ്മ സോണിയ ഗാന്ധി, സഹോദരൻ രാഹുൽ, ഭർത്താവ് റോബർട്ട് വാദ്ര, മക്കളായ മിറായ, റെയ്ഹാൻ തുടങ്ങിയവരും കോണ്ഗ്രസ് അധ്യക്ഷൻ മല്ലികാർജുൻ ഖാർഗെയും എത്തിയിരുന്നു. മുതിർന്ന മന്ത്രിമാരും നേതാക്കളും ഉൾപ്പെടെ ഭൂരിപക്ഷം എംപിമാരും സന്നിഹിതരായിരുന്നു.
വയനാട്ടിൽനിന്നുള്ള എംഎൽഎമാരായ ടി. സിദ്ദിഖ്, എ.പി. അനിൽകുമാർ, ഐ.സി. ബാലകൃഷ്ണൻ, കെ.എൽ. പൗലോസ് എന്നിവരും യുഡിഎഫ് നേതാക്കളായ എൻ.ഡി. അപ്പച്ചൻ, കെ.എൽ. പൗലോസ് തുടങ്ങിയവരും പ്രിയങ്കയെ അഭിനന്ദിക്കാൻ ഡൽഹിയിലെത്തിയിരുന്നു.