റുവാണ്ടയില്‍ പിടിയിലായ ലഷ്‌കര്‍ ഭീകരനെ ഇന്ത്യക്കു കൈമാറി
Friday, November 29, 2024 3:53 AM IST
ന്യൂഡല്‍ഹി: നിരോധിത സംഘടനയായ ലഷ്‌കർ-ഇ-തൊയ്ബ (എല്‍ഇടി) ഭീകരന്‍ സല്‍മാന്‍ റഹ്‌മാന്‍ ഖാനെ റുവാണ്ട ഇന്ത്യക്കുകൈമാറി.
ഇന്‍റര്‍പോളിന്‍റെ റെഡ് നോട്ടീസിന്‍റെ അടിസ്ഥാനത്തില്‍ റുവാണ്ടയിലെ കിഗാലിയില്‍വച്ചാണ് ഇയാളെ അധികൃതര്‍ പിടികൂടിയത്. ബംഗളൂരു ജയിലുകളിലെ ഭീകരാക്രമണ ഗൂഢാലോചനക്കേസില്‍ സല്‍മാന്‍ ഉള്‍പ്പെട്ടിരുന്നു. ഭീകരർക്ക് സ്‌ഫോടകവസ്തുക്കള്‍ വിതരണം ചെയ്തതിലും ഇയാൾക്കു പങ്കുള്ളതായി കണ്ടെത്തിയിരുന്നു.
റുവാണ്ട ഇന്‍വെസ്റ്റിഗേഷന്‍ ബ്യൂറോ, ഇന്‍റര്‍പോള്‍, നാഷണല്‍ സെന്‍ട്രല്‍ ബ്യൂറോ എന്നിവയുടെ സഹകരണത്തോടെയായിരുന്നു അറസ്റ്റ്. ഇന്നലെ പുലര്‍ച്ചെ ഇന്ത്യയിലേക്കയച്ച സല്‍മാനെ എന്‍ഐഎ കസ്റ്റഡിയിലെടുത്തു. നേരത്തേ പിടികിട്ടാപ്പുള്ളിയായി പ്രഖ്യാപിച്ച സല്‍മാനെതിരേ യുഎപിഎ, ആയുധ നിയമം, സ്ഫോടകവസ്തു നിയമം എന്നിവ ചുമത്തിയിട്ടുണ്ട്.