പരിഷ്‌കരണവുമായി യുജിസി; ബിരുദ കാലയളവ് വെട്ടിക്കുറയ്ക്കാനും ദീര്‍ഘിപ്പിക്കാനും അവസരം
Friday, November 29, 2024 2:59 AM IST
ന്യൂഡല്‍ഹി: ബിരുദ കാലയളവ് വെട്ടിക്കുറയ്ക്കാനും ദീര്‍ഘിപ്പിക്കാനും വിദ്യാര്‍ഥികള്‍ക്ക് അവസരം നല്‍കുന്ന പദ്ധതിക്ക് യുജിസി അംഗീകാരം നല്‍കി. ഇതനുസരിച്ച് മൂന്നു വര്‍ഷ ബിരുദം വിദ്യാര്‍ഥിയുടെ പഠനശേഷി അനുസരിച്ച് രണ്ടു വര്‍ഷംകൊണ്ടു തീര്‍ക്കാനാകും. പഠനകാലയളവ് മൂന്നു വര്‍ഷത്തില്‍ കൂടുതല്‍ ദീര്‍ഘിപ്പിക്കാനും വിദ്യാര്‍ഥികള്‍ക്ക് അവസരം ലഭിക്കും.
പഠനകാലയളവ് കുറയ്ക്കാന്‍ അനുമതി നല്‍കുന്ന ആക്‌സിലറേറ്റഡ് ഡിഗ്രി പ്രോഗ്രാം (എഡിപി), ദീര്‍ഘിപ്പിക്കാന്‍ അനുമതി നല്‍കുന്ന എക്സ്റ്റൻഡഡ് ഡിഗ്രി പ്രോഗ്രാം (ഇഡിപി) എന്നിവയ്ക്ക് അനുമതിയായതായി യുജിസി ചെയര്‍മാന്‍ ജഗദീഷ് കുമാര്‍ അറിയിച്ചു. ഇവയുടെ സ്റ്റാന്‍ഡേര്‍ഡ് ഓഫ് പ്രൊസീജ്യര് യുജിസി യോഗം അംഗീകരിച്ചു. ഇവ പ്രതികരണത്തിനായി ഉടന്‍ പ്രസിദ്ധീകരിക്കുമെന്ന് ജഗദീഷ് കുമാര്‍ അറിയിച്ചു.
കോഴ്‌സ് നേരത്തേ പൂര്‍ത്തിയാക്കിയാലും സമയമെടുത്തു ചെയ്താലും സാധാരണ ഡിഗ്രിക്കു തുല്യമായിരിക്കും. തുടര്‍പഠനത്തിനും ജോലിക്കും സാധാരണ ഡിഗ്രിയായിത്തന്നെയാകും ഇവ പരിഗണിക്കുക.
ഓരോ സെമസ്റ്ററിലും കൂടുതല്‍ ക്രെഡിറ്റ് നേടിയാണ് ബിരുദം വേഗത്തില്‍ പൂര്‍ത്തിയാക്കാനാകുക. നിശ്ചിത ക്രെഡിറ്റിലും കുറവ് നേടി കോഴ്‌സ് കാലയളവ് ദീര്‍ഘിപ്പിക്കാം. വിദ്യാര്‍ഥികള്‍ക്ക് അവരുടെ പഠനശേഷിയനുസരിച്ച് ഇക്കാര്യത്തില്‍ തീരുമാനമെടുക്കാം. എഡിപിയിലും ഇഡിപിയിലും വിദ്യാര്‍ഥികളെ പ്രവേശിപ്പിക്കുന്നത് ഉന്നതസമിതിയുടെ പരിശോധനയ്ക്കുശേഷമായിരിക്കും. അതിനായി ഉന്നതവിദ്യാഭ്യാസ സ്ഥാപനങ്ങള്‍ വിലയിരുത്തല്‍ സമിതി രൂപീകരിക്കണം.
വിദ്യാര്‍ഥികളുടെ ശേഷിയാകും സമിതി വിലയിരുത്തുക. ആദ്യ സെമസ്റ്ററിന്‍റെയോ അവസാന സെമസ്റ്ററിന്‍റെയോ അവസാനമാണ് എഡിപിയിലേക്കോ ഇഡിപിയിലേക്കോ മാറാന്‍ അപേക്ഷ നല്‍കേണ്ടത്. ഇഡിപിയില്‍ പരമാവധി രണ്ടു സെമസ്റ്ററാണ് അധികമായി ചേര്‍ക്കാനാകുക.