ശ്രീധരന്‍പിള്ള ഭാവനയും തീക്ഷ്ണഭാഷയുമുള്ള എഴുത്തുകാരന്‍: ഡോ. പ്രതിഭ റായ്
Friday, November 29, 2024 2:59 AM IST
ഡോണാപോള (ഗോവ ): ഗോവ ഗവര്‍ണര്‍ പി.എസ്. ശ്രീധരന്‍പിള്ള തീക്ഷ്ണഭാവനയും തീവ്രമായ ഭാഷയും കൈവശമുള്ള എഴുത്തുകാരനെന്ന് വിഖ്യാത എഴുത്തുകാരിയും ജ്ഞാനപീഠ ജേതാവുമായ ഡോ. പ്രതിഭാ റായ്.
പി.എസ്. ശ്രീധരന്‍പിള്ളയുടെ ‘തത്ത വരാതിരിക്കില്ല’ എന്ന കഥാസമാഹാരത്തിന്‍റെ ഒഡിയ പരിഭാഷ ‘ആഷാര ആലോക’ ഒഡീഷ ഗവര്‍ണര്‍ രഘുബര്‍ ദാസില്‍നിന്ന് ആദ്യപ്രതി ഏറ്റുവാങ്ങി സംസാരിക്കുകയായിരുന്നു അവര്‍.
ശ്രീധരന്‍പിള്ളയുടെ കഥകളുടെ ഒഡിയ പരിഭാഷ ഒഡീഷയിലെ വായനക്കാര്‍ക്ക് മലയാള കഥയുടെയും സംസ്‌കാരത്തിന്‍റെയും ലോകത്തിലേക്കുള്ള ഒരു വാതിലാണെന്ന് പ്രകാശനം നിര്‍വഹിച്ചുകൊണ്ട് ഗവര്‍ണര്‍ രഘുബര്‍ ദാസ് പറഞ്ഞു.
ഭുവനേശ്വറിൽ രാജ്ഭവന്‍ ഹാളില്‍ നടന്ന ചടങ്ങില്‍ ഒഡീഷയിലെ കലാസാഹിത്യ സാംസ്‌കാരിക രംഗങ്ങളിലെ പ്രമുഖര്‍ പങ്കെടുത്തു. പ്രമുഖ ഒഡിയ പരിഭാഷകന്‍ ഡോ. നിരഞ്ജന്‍ സാഹുവാണ് കഥാസമാഹാരത്തിന്‍റെ വിവര്‍ത്തനം നിര്‍വഹിച്ചത്. പ്രഫ. ജതിന്‍ നായക്, ജീവാനന്ദ മിശ്ര എന്നിവര്‍ പ്രസംഗിച്ചു.