ലിംഗായത്ത് വിഭാഗത്തെ തഴയുന്നുവെന്ന് കോൺഗ്രസ് നേതാവ് ഷാമന്നൂർ ശിവശങ്കരപ്പ
Monday, October 2, 2023 4:23 AM IST
ബംഗഗളൂരു: കർണാടകയിലെ കോൺഗ്രസ് സർക്കാരിൽ വീരശൈവ ലിംഗായത്ത് വിഭാഗത്തെ തഴഞ്ഞെന്ന് കുറ്റപ്പെടുത്തി മുതിർന്ന കോൺഗ്രസ് നേതാവ് ഷാമന്നൂർ ശിവശങ്കരപ്പ.
മുൻ മുഖ്യമന്ത്രിയും ലിംഗായത്ത് നേതാവുമായ ബി.എസ്. യെദിയൂരപ്പ ശിവശങ്കരപ്പയുടെ പ്രസ്താവനയെ സ്വാഗതം ചെയ്തു രംഗത്തുവന്നു. തൊണ്ണൂറ്റിരണ്ടുകാരനായ ശിവശങ്കരപ്പ ഓൾ ഇന്ത്യ വീരശൈവ മഹാസഭാ പ്രസിഡന്‍റാണ്. ഇദ്ദേഹത്തിന്‍റെ മകൻ എസ്.എസ്. മല്ലികാർജുൻ കർണാടകയിൽ മന്ത്രിയാണെന്നതാണു ശ്രദ്ധേയം.
ലിംഗായത്ത് വിഭാഗക്കാരായ അനേകം ഓഫീസർമാർക്ക് നല്ല പദവികൾ നല്കുന്നില്ലെന്നും സമുദായം അവഗണന നേരിടുന്നുവെന്നും ശിവശങ്കരപ്പ തുറന്നടിച്ചു. ഉപമുഖ്യമന്ത്രിസ്ഥാനംകൊണ്ട് സമുദായം തൃപ്തരാകില്ലെന്നും അദ്ദേഹം പറഞ്ഞു. കർണാടക നിയമസഭയിലെ ഏറ്റവും പ്രായംകൂടിയ എംഎൽഎയാണ് ശിവശങ്കരപ്പ
ശിവശങ്കരപ്പയുടെ ആരോപണം മുഖ്യമന്ത്രി സിദ്ധരാമയ്യ തള്ളി. മന്ത്രിസഭയിൽ ഏഴ് ലിംഗായത്ത് മന്ത്രിമാരുണ്ടെന്ന് അദ്ദേഹം ചൂണ്ടിക്കാട്ടി.