കൊറിയറില്‍ മയക്കുമരുന്നും ആധാര്‍ കാര്‍ഡും നിങ്ങള്‍ അയച്ച കൊറിയറിലോ നിങ്ങള്‍ക്കായി വന്ന പാഴ്‌സലിലോ മയക്കുമരുന്നും ആധാര്‍ കാര്‍ഡുകളും വ്യാജ പാസ്‌പോര്‍ട്ടും ഉണ്ടെന്ന് പറഞ്ഞായിരിക്കും തട്ടിപ്പുകാര്‍ ബന്ധപ്പെടുക.
വെബ്‌സൈറ്റില്‍ നിങ്ങള്‍ അശ്ലീലദൃശ്യങ്ങള്‍ തെരഞ്ഞു എന്നുപറഞ്ഞും തട്ടിപ്പുണ്ട്. ഉന്നത പോലീസ് ഉദ്യോഗസ്ഥരുടെ യൂണിഫോം ധരിച്ചായിരിക്കും വീഡിയോകോളില്‍ ഇവര്‍ പ്രത്യക്ഷപ്പെടുക. നിങ്ങളുടെ ഭാഗത്തുനിന്നുണ്ടായിരിക്കുന്നതു ഗുരുതര കുറ്റകൃത്യമാണെന്നും നിങ്ങള്‍ വെര്‍ച്വല്‍ അറസ്റ്റിലാണെന്നും ധരിപ്പിക്കും. പണം ആവശ്യപ്പെടും. അവര്‍ നല്കുന്ന ബാങ്ക് അക്കൗണ്ടിലേക്ക് പണം ഓണ്‍ലൈനായി നിക്ഷേപിക്കുന്നതോടെ തട്ടിപ്പുകാരെ കാണാതാകും.
വെര്‍ച്വല്‍ അറസ്റ്റ് ഒന്നാന്തരം തട്ടിപ്പ് വെര്‍ച്വല്‍ അറസ്റ്റ് എന്നു പറയുന്നത് തട്ടിപ്പാണെന്ന് പൊതുജനങ്ങള്‍ മനസിലാക്കണമെന്നാണ് പോലീസ് നിര്‍ദേശം. പോലീസ് ആരെയും വെര്‍ച്വല്‍ അറസ്റ്റ് ചെയ്യില്ല. അന്വേഷണ ഏജന്‍സികള്‍ക്ക് സംശയാസ്പദമായ രീതിയില്‍ കണ്ടെത്തുന്ന ഏതൊരു അക്കൗണ്ടും നിയമപരമായിത്തന്നെ മരവിപ്പിക്കാന്‍ കഴിയും. പോലീസിനു കൃത്യമായ നടപടിക്രമങ്ങളുണ്ട്.
ഓര്‍മയിലുണ്ടാവണം 1930 ഓണ്‍ലൈന്‍ സാമ്പത്തിക തട്ടിപ്പിനിരയായാല്‍ ഗോള്‍ഡന്‍ അവറായ ഒരുമണിക്കൂറിനകം വിവരം 1930ല്‍ സൈബര്‍ പോലീസിനെ അറിയിക്കണം. അല്ലെങ്കില്‍ www.cybercrime.gov.in എന്ന വെബ്‌സൈറ്റില്‍ പരാതി രജിസ്റ്റര്‍ ചെയ്യണം. എത്രയും നേരത്തേ റിപ്പോര്‍ട്ട് ചെയ്താല്‍ നഷ്ടപ്പെട്ട തുക തിരിച്ചുലഭിക്കാന്‍ സാധ്യത കൂടുതലുണ്ട്‌. പൊതുജനങ്ങളില്‍നിന്നു തട്ടിയെടുക്കുന്ന പണം സംഘം വളരെ പെട്ടെന്നുതന്നെ മറ്റ് അക്കൗണ്ടുകളിലേക്കു മാറ്റും.
പണം നഷ്ടപ്പെട്ട് ഒരു മണിക്കൂറിനകം അറിയിച്ചാല്‍ പോലീസിനു ബാങ്കുമായി ബന്ധപ്പെട്ട് ഫ്രീസ് ചെയ്യാന്‍ സാധിക്കും. പണം ഒരുപരിധിവരെ തിരിച്ചെടുക്കാനും സാധിക്കും. പരാതി നല്കാന്‍ താമസിച്ചാൽ അന്വേഷിച്ച് എത്തുമ്പോഴേക്കും പണം മറ്റ് അക്കൗണ്ടുകളിലേക്കു മാറ്റിയിട്ടുണ്ടാകും.
വി.ആര്‍. ജഗദീഷ്എസ്എച്ച്ഒ, സൈബര്‍ സെല്‍, കോട്ടയം ദിവസവും നിരവധി പരാതികളാണ് സൈബര്‍ തട്ടിപ്പുകളുമായി ബന്ധപ്പെട്ടു വിവിധ ഭാഗങ്ങളില്‍നിന്നും ലഭിക്കുന്നത്. ഭൂരിഭാഗവും പണം നഷ്ടമായ കേസുകളാണ്. കഴിഞ്ഞ ഒരു വര്‍ഷം മുമ്പു വരെ ഒരു ജില്ലയില്‍ ഉണ്ടാകുന്ന സൈബര്‍ തട്ടിപ്പു കേസുകള്‍ രജിസ്റ്റര്‍ ചെയ്തിരുന്നതു സൈബര്‍ സെല്‍ സ്റ്റേഷനുകളിലായിരുന്നു.
എന്നാല്‍ കേസുകളുടെ ബാഹുല്യം കണക്കിലെടുത്ത് ഇപ്പോള്‍ അതാതു പോലീസ് സ്‌റ്റേഷനുകളില്‍ തന്നെ കേസുകള്‍ രജിസ്റ്റര്‍ ചെയ്യുകയാണ്. ജില്ലയിലെ ഓരോ സ്‌റ്റേഷനുകളില്‍നിന്നും ആവശ്യപ്പെടുന്നതുസരിച്ചു സൈബര്‍ സെല്‍ വിദഗ്ധരുടെ സേവനം ലഭ്യമാക്കുകയാണ് ചെയ്യുന്നത്.
< b>എ. ഷാഹുല്‍ ഹമീദ് കോട്ടയം ജില്ലാ പോലീസ് ചീഫ്
ഓണ്‍ലൈന്‍ സാമ്പത്തിക ഇടപാടുകളിലും സോഷ്യല്‍ മീഡിയയുടെ ഉപയോഗത്തിലും ജാഗ്രത പാലിക്കണം. കബളിപ്പിക്കപ്പെട്ടാല്‍ ഒരു നിമിഷംപോലും വൈകാതെ ഒരു മണിക്കൂറിനുള്ളില്‍ കൃത്യമായ വിവരം 1930 എന്ന നമ്പറില്‍ പോലീസിനു കൈമാറണം. അല്ലെങ്കില്‍ www.cyber crime.gov.in എന്ന വെബ്‌സൈറ്റില്‍ പരതി നല്കണം. വൈകുംതോറും തട്ടിപ്പിന്‍റെ ഉറവിടം കണ്ടെത്താന്‍ ബുദ്ധിമുട്ടാകും. അതു പോലെ നഷ്ടപ്പെട്ട പണം തിരിച്ചെടുക്കാനും സാധിക്കില്ല. സോഷ്യല്‍ മീഡിയകളില്‍ അപരിചിതരുടെ വീഡിയോ കോളുകള്‍ എടുക്കരുത്.
അപരിചിതര്‍ നല്കുന്ന ലിങ്കുകളില്‍ ക്ലിക്ക് ചെയ്തു സൈറ്റുകളില്‍ പ്രവേശിക്കരുത്. ഒരു കാരണവശാലും കെവൈസി, ഒടിപി വിവരങ്ങള്‍ ആരുമായും പങ്കുവയ്ക്കരുത്. സൈബര്‍ തട്ടിപ്പുകള്‍ വര്‍ധിക്കുന്ന സാഹചര്യത്തില്‍ പോലീസ് കൂടുതല്‍ ബോധവത്കരണം നടത്തിവരികയാണ്.