വിജയശ്രീ കോ-ഓർഡിനേറ്റർമാർക്കു ശില്പശാല നടത്തി

ശ്രീകൃഷ്ണപുരം: മണ്ണാർക്കാട്, ഒറ്റപ്പാലം വിദ്യാഭ്യാസ ജില്ലാതല വിജയശ്രീ കോ- ഓർഡിനേറ്റർമാരുടെ ശില്പശാല ശ്രീകൃഷ്ണപുരം ബ്ലോക്ക് പഞ്ചായത്ത് ഹാളിൽ നടത്തി.

ഡയറ്റ്, പാലക്കാട് ജില്ലാ പഞ്ചായത്ത്‌, പൊതു വിദ്യാഭ്യാസ വകുപ്പ് എന്നിവയുടെ സംയുക്താഭിമുഖ്യത്തിലാണ് ശില്പശാല നടന്നത്.

ഒറ്റപ്പാലം ജില്ലാ വിദ്യാഭ്യാസ ഓഫീസർ സിജു തോമസിന്‍റെ അധ്യക്ഷതയിൽ ജില്ലാ പഞ്ചായത്ത് വിദ്യാഭ്യാസ സ്ഥിരംസമിതി അധ്യക്ഷ എ. ഷാബിറടീച്ചർ ശില്പശാല ഉദ്ഘാടനം ചെയ്തു.

പാലക്കാട് ജില്ലാ വിദ്യാഭ്യാസ പരിശീലന കേന്ദ്രം (ഡയറ്റ്) പ്രിൻസിപ്പൽ ഡോ.പി. ശശിധരൻ ആമുഖപ്രഭാഷണം നടത്തി. വിജയശ്രീ ജില്ലാ കോ- ഓഡിനേറ്റർ ടി. ജയപ്രകാശ്, മണ്ണാർക്കാട് ജില്ലാ വിദ്യാഭ്യസ ഓഫീസർ കെ. ഗീതാകുമാരി, വേണു പുഞ്ചപ്പാടം, ഡയറ്റ് ഫാക്കൽറ്റി കെ.വി. രാധ, വിദ്യാഭ്യാസ ജില്ലാ കോ- ഓഡിനേറ്റർമാർ, വിജയശ്രീ ജില്ലാ കോർകമ്മിറ്റി പ്രതിനിധികൾ, മണ്ണാർക്കാട്, ഒറ്റപ്പാലം എന്നീ വിദ്യാഭ്യാസ ജില്ലകളിലെ 85 വിദ്യാലയങ്ങളിൽ നിന്നുള്ള വിജയശ്രീ കോ- ഓർഡിനേറ്റർമാർ എന്നിവർ പങ്കെടുത്തു.

ADVERTISEMENT

പോത്തുണ്ടി അണക്കെട്ടിലെ പുല്ലുവെട്ടൽ തുടങ്ങി

നെന്മാറ: പോത്തുണ്ടിഡാമിലെ അണക്കെട്ടിലെ പുല്ലുകൾ വെട്ടിമാറ്റി വൃത്തിയാക്കാൻ ആരംഭിച്ചു. പൂർണമായും മണ്ണിൽ നിർമിച്ച അണക്കെട്ടിലെ വെള്ളം സംഭരിക്കാത്ത പുറംഭാഗത്ത് വളർന്നുനിൽക്കുന്ന പാഴ്ചെടികളും പുല്ലുമാണ് വെട്ടി വൃത്തിയാക്കുന്നത്. ഓണത്തിന് കൂടുതൽ സന്ദർശകരെത്തുന്നതിന് മുന്നോടിയായി ഡാം പരിസരം വൃത്തിയാക്കുന്നതിന്‍റെ ഭാഗമായാണ് നടപടി. കഴിഞ്ഞ ഒരാഴ്ചയോളമായി പുല്ലുവെട്ടി യന്ത്രം ഉപയോഗിച്ചുള്ള വൃത്തിയാക്കാൻ അണക്കെട്ടിന്‍റെ പകുതിയിലേറെ ദൂരം പൂർത്തിയായി. നെല്ലിയാമ്പതി റോഡ് ഭാഗത്തുനിന്ന് തുടങ്ങിയ പുല്ലുവെട്ടൽ അണക്കെട്ടിന്‍റെ മധ്യഭാഗം വരെ എത്തി. ആകെ ഒന്നര കിലോമീറ്ററോളം ദൂരം (1450 മീറ്റർ) നീളമുള്ള അണക്കെട്ടാണിത്. നിലവിൽ പാഴ്ചെടികളും പുല്ലും വള്ളിപ്പടർപ്പുകളും കയറി ഒരാൾ ഉയരത്തിൽ വളർന്നുനിൽക്കുകയായിരുന്നു. സാധാരണ വർഷത്തിൽ രണ്ട് പ്രാവശ്യം വെട്ടി വൃത്തിയാക്കുന്നത് ഡാം സുരക്ഷയുടെ ഭാഗമായി പതിവുള്ളതാണ്.

പ്രകൃതിയെ പച്ചപ്പിലാക്കാൻ ഓടിനടന്ന് കൈതവളപ്പിൽ രാജു

വടക്കഞ്ചേരി: മഴക്കാലമായാൽ മംഗലത്തെ കൈതവളപ്പിൽ രാജുവിന് പിന്നെ വിശ്രമമില്ല. പ്രകൃതിയെ പച്ചപ്പിലാക്കാൻ തൈ‌നടീലും പച്ചത്തുരുത്തുകളുടെ സംരക്ഷണവുമായി പകലിലെ കൂടുതൽ സമയവും മംഗലംപുഴയോരത്തുണ്ടാകും. മംഗലംപുഴയുടെ തീരത്ത് മൂച്ചിത്തൊടിയിൽ ഹരിതഗ്രാമം പദ്ധതിക്കുകൂടി അനുമതി ലഭിച്ചതോടെ അതിന്‍റെ തിരക്കുകൾ കൂടിയുണ്ട് രാജുവിന്. കേരളത്തിൽ നാല് പച്ചത്തുരുത്തുകളുള്ള ഏക പഞ്ചായത്ത് വടക്കഞ്ചേരിയാണ്. പഞ്ചായത്തിനുള്ള ഈ പദവിക്കു പിന്നിൽ പ്രവർത്തിച്ചത് രാജുവാണെന്ന് പഞ്ചായത്ത് പ്രസിഡന്‍റ് ലിസി സുരേഷും സാക്ഷ്യപ്പെടുത്തുന്നു. 2018ൽ പ്രളയമുണ്ടായപ്പോഴാണ് പുഴകളുടെ പ്രാധാന്യവും പുഴസംരക്ഷണത്തിന്‍റെ ആവശ്യകതയും ഭരണതലത്തിൽ ഏറെ ചർച്ച ചെയ്യപ്പെട്ടത്. പുഴകളുടെ പൂർവകാല വിസ്തൃതി വീണ്ടെടുക്കണമെന്ന ചിന്തകൾക്കും പിന്തുണയേറി. ഇതിന്‍റെ ഭാഗമായാണ് ഭാരതപ്പുഴ പുനർജീവന പദ്ധതി ആരംഭിച്ചത്. ഇതോടനുബന്ധിച്ച് ഭാരതപ്പുഴയുടെ കൈവഴിയായ മംഗലംപുഴ സംരക്ഷണവും പുഴയോരത്ത് മൂച്ചിതൊടിയിൽ 35 സെന്‍റ് സ്ഥലത്ത് ആദ്യ പച്ചത്തുരുത്തിനുംതുടക്കം കുറിച്ചു. ഇല്ലി നട്ടുവളർത്തിയായിരുന്നു പുഴയോര സംരക്ഷണം ആരംഭിച്ചത്. തുടർന്നുള്ള വർഷങ്ങളിൽ തന്നെ അതിന്‍റെ പ്രയോജനം കാണാൻ തുടങ്ങി. കാലവർഷങ്ങളിൽ പുഴ കുത്തിയൊഴുകിയപ്പോഴും പുഴയോരത്തെ മണ്ണൊലിപ്പ് തടഞ്ഞ് ഇല്ലിക്കാടുകൾ സംരക്ഷണം വലയംതീർത്തു. പിന്നെ ജില്ലാ പഞ്ചായത്ത് സാധിക്കാവുന്ന പഞ്ചായത്ത് പ്രദേശങ്ങളിലെല്ലാംപച്ചത്തുരുത്തുകൾ തുടങ്ങുന്നതിനുള്ള ശ്രമങ്ങൾ നടത്തി. മറ്റു പലയിടത്തും തുടക്കത്തിലെ ആരംഭശൂരത്വം പിന്നീടുണ്ടായില്ലെങ്കിലും വടക്കഞ്ചേരിയിൽ രാജുവിന്‍റെ നേതൃത്വത്തിൽ ഇന്നും ഇത്തരം പ്രവർത്തനം വളരെ സജീവമാണ്. ജനകീയാസൂത്രണത്തിന്‍റെ പഞ്ചായത്ത് ലെവൽ വൈസ് ചെയർമാനും ആരോഗ്യ വകുപ്പിലെ റിട്ട. ഉദ്യോഗസ്ഥനുമായ മംഗലത്തെ അപ്പുണ്ണിനായരാണ് രാജുവിന്‍റെ കൂട്ട്. പരിസ്ഥിതി -സാമൂഹ്യരംഗത്ത് സജീവമാണ് തൊണ്ണൂറാം വയസിലും അപ്പുണ്ണിനായർ. ജൂൺ അഞ്ചിന് ലോക പരിസ്ഥിതി ദിനത്തോടെയാണ് പ്രദേശങ്ങളെ പച്ചപ്പണിയിക്കുന്ന പ്രവൃത്തികളുമായി രാജു രംഗത്തുവരിക. വടക്കഞ്ചേരി പഞ്ചായത്തിന്‍റെ വിവിധ ഭാഗങ്ങളിൽ നടക്കുന്ന പരിസ്ഥിതിദിന പരിപാടികളിലെല്ലാം രാജു ഓടിയെത്തും. ഒരു കവറിൽ ചെടികളുടെയും വൃക്ഷങ്ങളുടെയും തൈകളും വിത്തുകളും കൂടെ കരുതും. പരിപാടികൾ നടക്കുന്നിടത്ത് സ്ഥലം കണ്ടെത്തി അവിടെയെല്ലാം ഫലവൃക്ഷ തൈകളും ആയുർവേദ മരുന്നു തൈകളും നടും. ഉങ്ങ്, നെല്ലി, ആര്യവേപ്പ്, പേര, ഇല്ലി തുടങ്ങി 20 ഇനം വൃക്ഷത്തൈകളാണ് പച്ചത്തുരുത്തുകളിൽ നിറയുന്നത്. മഴക്കാലത്ത് നടുന്ന ചെടികളെ വേനലിൽ നനയ്ക്കാനും സംരക്ഷിക്കാനും പ്രാദേശികമായുള്ള സംവിധാനങ്ങളും ഒരുക്കും. ‌ ഹരിത കേരള മിഷന്‍റെ ജില്ലാ പഞ്ചായത്ത് കിഴക്കഞ്ചേരി ഡിവിഷൻ റിസോഴ്സ് പേഴ്സൺ, ജൈവവൈവിധ്യ പരിപാലന സമിതി കോ -ഓർഡിനേറ്റർ എന്നിങ്ങനെ സ്ഥാനങ്ങൾ കൂടിയുള്ളതിനാൽ പ്രകൃതി സംരക്ഷണ പ്രവർത്തനങ്ങളിലെല്ലാം കെ.എം. രാജുവിന്‍റെ സാന്നിധ്യമുണ്ട്. രാജുവിന്‍റെ വീട് നിൽക്കുന്ന മംഗലംപുഴയുടെ മൂച്ചിതൊടി പുഴയോരം ഇന്ന് വിവിധയിനം ചെടികളുടെ പച്ചത്തുരുത്താണ്. ഹരിതകാർഷിക ക്ലബ്ബും രാജുവിന്‍റെ നേതൃത്വത്തിലുണ്ട്. പഞ്ചായത്തിന്‍റെ ജൈവവൈവിധ്യ രജിസ്റ്ററിന്‍റെ രണ്ടാംഘട്ടം തയാറാക്കിയതും രാജു ഉൾപ്പെടുന്ന കമ്മിറ്റിയുടെ മേൽനോട്ടത്തിലായിരുന്നു. സംസ്ഥാനത്തുതന്നെ ഹരിതകേരള മിഷന്‍റെ ശ്രദ്ധേയമായ മൂന്ന് പച്ചതുരുത്തുകളിൽ ഒരെണ്ണമാണ് മംഗലംപുഴയോരത്തെ മൂച്ചിതൊടി. ഹരിത കേരള മിഷന്‍റെ അവാർഡ് നിർണയ സമിതി കഴിഞ്ഞ ദിവസം ഈ പച്ചത്തുരുത്തുകളിൽ സന്ദർശനം നടത്തിയിരുന്നു. പഞ്ചായത്തിലെ മൂന്നാംവാർഡായ കണ്ണംകുളം, പത്താംവാർഡായ വള്ളിയോട് പൂക്കാട്, പതിനൊന്നാം വാർഡായ മംഗലം ആര്യൻകടവ്, പന്ത്രണ്ടാം വാർഡായ കോമാട്ടിക്കുളം എന്നിവിടങ്ങളിൽകൂടി പുതിയ പച്ചത്തുരുത്തുകൾ ഉണ്ടാക്കുമെന്ന് രാജു പറഞ്ഞു. ഫ്രാൻസിസ് തയ്യൂർ

കിഴക്കഞ്ചേരി കുടുംബശ്രീ സിഡിഎസിനു ഐഎസ്ഒ അംഗീകാരം

വടക്കഞ്ചേരി: പ്രവർത്തനമികവിന് കിഴക്കഞ്ചേരി പഞ്ചായത്ത് കുടുംബശ്രീ സിഡിഎസിനു ഐഎസ്ഒ അംഗീകാരം ലഭിച്ചു. വിവിധ പദ്ധതികൾ മാതൃകാപരമായി നടപ്പിലാക്കിയതിനാണ് അംഗീകാരം. ഓഫീസിലെ ഫയൽ ക്രമീകരണം, സാമ്പത്തിക ഇടപാടുകൾ, രജിസ്റ്ററുകൾ പരിപാലിക്കുന്നതിലെ കൃത്യത, അയൽക്കൂട്ടങ്ങളുടെ കാര്യക്ഷമത, വിവിധ മേഖലയിൽ ജനങ്ങൾക്ക് നല്കുന്ന സേവനങ്ങൾ എന്നിവയും അവാർഡിന് പരിഗണിച്ചിരുന്നു. പഞ്ചായത്തിൽ 431 കുടുംബശ്രീ യൂണിറ്റുകളിലായി വിവിധ പദ്ധതികൾ നടപ്പിലാക്കി വരുന്നുണ്ട്. 125 ആടുവളർത്തൽ, 175 പശുവളർത്തൽ, 215 ടൈലറിംഗ്, 25 കാന്‍റീൻ ആൻഡ് കാറ്ററിംഗ്, രണ്ട് ഉജ്ജീവനം പദ്ധതിയും 40 ജെഎൻജി സംരംഭങ്ങളും കുടുംബശ്രീ സിഡിഎസിലൂടെ നടപ്പിലാക്കി വരുന്നുണ്ട്.

ആദരമൊരുക്കി മംഗലംഡാമിൽ ക്ഷീരകർഷക സംഗമം

മംഗലംഡാം: നെന്മാറ ബ്ലോക്കും ക്ഷീരവികസനവകുപ്പും സംയുക്തമായി മംഗലംഡാമിൽ സംഘടിപ്പിച്ച ക്ഷീരകർഷക സംഗമം കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. മികച്ച കർഷകരെ ചടങ്ങിൽ ആദരിച്ചു. ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി അധ്യക്ഷത വഹിച്ചു. വണ്ടാഴി പഞ്ചായത്ത് പ്രസിഡന്‍റ് കെ.എൽ. രമേഷ്, ബ്ലോക്ക് വൈസ് പ്രസിഡന്‍റ് ശ്രീജ രാജീവ്, സ്റ്റാൻഡിംഗ് കമ്മിറ്റി ചെയർമാൻമാരായ കെ. രാജൻ, പി.എച്ച്. സെയ്താലി, ബ്ലോക്ക് മെംബർ നസീമ, ക്ഷീരവികസനവകുപ്പ് ഡെപ്യൂട്ടി ഡയറക്ടർ എൻ. ബിന്ദു, ക്ഷീര വികസന ഓഫീസർ ടി.സി. സീമ, ക്ഷീരസംഘം പ്രസിഡന്‍റുമാർ, സെക്രട്ടറിമാർ പങ്കെടുത്തു.

കുടിവെള്ളപദ്ധതിയുടെ പേരിൽ റോഡ് വെട്ടിപ്പൊളിച്ചു പൈപ്പിടൽ

മംഗലംഡാം: അടുത്തകാലത്തൊന്നും നടപ്പിലാകാത്ത കുടിവെള്ള പദ്ധതിക്കായി റോഡ് വെട്ടിപ്പൊളിച്ച് പൈപ്പിട്ട് യാത്ര മുടക്കുന്നതായി പരാതി. മലയോര മേഖലയായ ഓടംതോട് പടങ്ങിട്ടതോട് ഭാഗത്താണ് റോഡിന്‍റെ വശം കിടങ്ങുപോലെ താഴ്ത്തി ജനങ്ങളുടെ യാത്ര ബുദ്ധിമുട്ടിലാക്കിയിട്ടുള്ളത്. നന്നേ വീതി കുറഞ്ഞ റോഡിന്‍റെ ഒരുവശം ജെസിബി ഉപയോഗിച്ച് താഴ്ത്തി. പിന്നീട് ചാലിൽ പൈപ്പിട്ടെങ്കിലും വേണ്ടവിധം മണ്ണിട്ടുമൂടി ഉറപ്പിക്കാത്തതിനാൽ മഴവെള്ളത്തിന്‍റെ കുത്തൊഴുക്കിൽ മൂടിയ മണ്ണെല്ലാം ഒലിച്ചുപോയി. ഇപ്പോൾ റോഡിലൂടെ വാഹനം ഓടിക്കാനാകാത്ത സ്ഥിതിയാണെന്നു പ്രദേശവാസികൾ പറയുന്നു. താഴെ സൗകര്യമുള്ള സ്ഥലത്ത് വാഹനംനിർത്തി വീടുകളിലേക്ക് ഏറെദൂരം നടന്നു പോകേണ്ട ഗതികേടിലാണ് താമസക്കാർ. ഉരുൾപൊട്ടി ഒഴുകിയ നിലയിലാണ് പൈപ്പിടാൻ കുഴിച്ച ചാലുകളെല്ലാം. ഈയടുത്ത കാലത്ത് ടാറിംഗ് നടത്തി ഗതാഗതയോഗ്യമാക്കിയ റോഡാണ് കുത്തിപ്പൊളിച്ച് താറുമാറാക്കിയിട്ടുള്ളത്. ചാലുകൾ ശരിയാംവണ്ണം മൂടി ബലപ്പെടുത്തി വാഹനങ്ങൾ ഓടിച്ചു പോകാൻ സൗകര്യം ഒരുക്കണമെന്നാണ് നാട്ടുകാരുടെ ആവശ്യം. മംഗലംഡാം റിസർവോയർ ഉറവിടമാക്കിയുള്ള കുടിവെള്ള പദ്ധതിയുടെ പൈപ്പിടലാണ് നാട്ടിലാകെ ജനങ്ങളെ ബുദ്ധിമുട്ടിക്കുന്ന സ്ഥിതിയിലേക്ക് മാറിയിട്ടുള്ളത്. ഡാമിലെ മണ്ണ് നീക്കംചെയ്ത് ജലസംഭരണം കൂട്ടിവേണം കുടിവെള്ള പദ്ധതി നടപ്പിലാക്കാൻ. എന്നാൽ മൂന്നുവർഷമായി മണ്ണുനീക്കൽ മുടങ്ങിക്കിടക്കുകയാണ്. ഇനി ഏതുകാലത്ത് പുനഃരാരംഭിക്കും എന്ന് ബന്ധപ്പെട്ടവർക്കുപോലും അറിയുന്നില്ല. അത്തരം പദ്ധതിക്കാണ് ധൃതിപിടിച്ച് റോഡുകൾ നശിപ്പിച്ച് പൈപ്പിടൽ നടത്തുന്നത്.

എംഡിഎംഎയുമായി യുവാവ് പിടിയിൽ

ചിറ്റൂർ: അഞ്ചാംമൈലിൽ 3.16 ഗ്രാം എംഡിഎംഎയുമായി യുവാവിനെ ചിറ്റൂർ പോലീസ് അറസ്റ്റുചെയ്തു. പാലക്കാട് കുന്നത്തൂർമേട് എംആർ നഗർ കോളനി ജമീലാ മൻസിലിൽ എ. സനൂപ് (29) ആണ് അറസ്റ്റിലായത്. ജില്ലാ ലഹരിവിരുദ്ധ സ്ക്വാഡ്, ചിറ്റൂർ പോലീസ് എന്നിവരുടെ സംയുക്ത വാഹനപരിശോധനയ്ക്കിടെ ഇന്നലെ പുലർച്ചെയാണ് ഇയാൾ കുടുങ്ങിയത്. ൊ സുഹൃത്തുക്കളിൽനിന്നും ലഭിച്ച ലഹരിവസ്തു ഇയാൾ വീട്ടിലേക്ക് കൊണ്ടുപോവുകയായിരുന്നുവെന്ന് ചിറ്റൂർ പോലീസ് അറിയിച്ചു. എസ്ഐ രമേഷ്, എഎസ്ഐ പ്രകാശൻ, സിവിൽ പോലീസ് ഓഫീസർമാരായ സതീഷ് നിഖിൽ, ഡാൻസാഫ് സംഘവുമാണ് വാഹന പരിശോധ നടത്തിയത്. കോടതിയിൽ ഹാജരാക്കിയ പ്രതിയെ റിമാൻഡുചെയ്തു.

ലോക കൊതുകുദിനം ജില്ലാതല ഉദ്ഘാടനം

തൃത്താല: ലോക കൊതുകുദിനത്തിന്‍റെ ജില്ലാതല ഉദ്ഘാടനം തൃത്താല ബ്ലോക്ക് പഞ്ചായത്ത് ഹാളില്‍ പ്രസിഡന്‍റ് അഡ്വ.വി.പി. റജീന നിര്‍വഹിച്ചു. ഡെങ്കിപ്പനി, മലേറിയ, ചിക്കുന്‍ഗുനിയ തുടങ്ങിയ കൊതുകുകള്‍ പരത്തുന്ന വിവിധ രോഗങ്ങളെകുറിച്ച് അവബോധം സൃഷ്ടിക്കുക എന്ന ലക്ഷ്യത്തോടെയാണ് ലോക കൊതുകുദിനം ആചരിക്കുന്നത്. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. കെ.ആര്‍ വിദ്യ മുഖ്യപ്രഭാഷണം നടത്തി. ജില്ലാ വെക്ടര്‍ ബോണ്‍ ഡിസീസ് കണ്‍ട്രോള്‍ ഓഫീസര്‍ പി.വി. സാജന്‍ കൊതുകുജന്യ രോഗങ്ങളെക്കുറിച്ച് ബോധവത്കരണ ക്ലാസെടുത്തു. പരിപാടിയുടെ ഭാഗമായി ബോധവത്കരണ റാലിയും ഫ്ളാഷ് മോബും സംഘടിപ്പിച്ചു. നാഗലശ്ശേരി ഗ്രാമ പഞ്ചായത്ത് പ്രസിഡന്‍റ് വി.വി. ബാലചന്ദ്രന്‍ അധ്യക്ഷനായി. ചാലിശ്ശേരി സാമൂഹികാരോഗ്യ കേന്ദ്രം സൂപ്രണ്ട് ഡോ. ഖലീല്‍ മാജിദ്, ജില്ലാ എഡ്യുക്കേഷന്‍ മീഡിയ ഓഫീസര്‍ എസ്. സയന, ബയോളജിസ്റ്റ് സി.കെ. മനോജ് കുമാര്‍ എന്നിവർ പ്രസംഗിച്ചു.

മാരത്തൺ ഹരമാക്കി രാഹുൽ കൃഷ്ണ

പാലക്കാട്: കർണ്ണകയമ്മൻ ഹയർസെക്കൻഡറി സ്കൂളിലെ എട്ടാംക്ലാസ് വിദ്യാർഥി രാഹുൽ കൃഷ്ണ ഇപ്പോൾ തന്‍റെ എൺപതാമത്തെ മാരത്തൺ ഓട്ടം പൂർത്തിയാക്കിയത്തിന്‍റെ സന്തോഷത്തിലാണ്. ലഹരി ഉൾപ്പെടെയുള്ള സാമൂഹിക വിഷയങ്ങളോടനുബന്ധിച്ചുനടന്ന വിവിധ മാരത്തണുകളിലെ പ്രധാനതാരമാണ് ഈ കൊച്ചുമിടുക്കൻ. പുതുശ്ശേരി ചെറുകര വീട്ടിൽ രാധാകൃഷ്ണന്‍റെയും മീരയുടേയും മകനാണ്. വീട്ടിലെ സ്വീകരണമുറിയിൽ മെഡ ലുകളുടെയും ട്രോഫികളുടെയും നീണ്ടനിര തന്നെയുണ്ട്. വിദ്യാലയത്തിലെ സ്കൗട്ട് അംഗം കൂടിയാണ് രാഹുൽ. മാരത്തൺ ഓട്ടക്കാരൻ എന്നതിനു പുറമേ നല്ലൊരു യോഗപരിശീലകൻ കൂടിയാണ് ഈ വിദ്യാർഥി. സ്കൂളിലെ നൂറോളം വിദ്യാർഥികൾക്ക് യോഗാപരിശീലനം നൽകിവരുന്നു. പ്രധാനാധ്യാപിക നിഷ ടീച്ചർ അടക്കമുള്ള അധ്യാപകരുടെയും കൂട്ടുകാരുടെയും പിന്തുണയാണ് നേട്ടങ്ങൾക്കു പിന്നിലെന്നു രാഹുൽകൃഷ്ണ പറഞ്ഞു.

മലമ്പുഴയിലെ മാലിന്യസംസ്‌കരണ യൂണിറ്റ്: ആശങ്ക വേണ്ടെന്നു കളക്ടർ

പാലക്കാട്‌: മലമ്പുഴയിൽ നിർമിക്കാനിരിക്കുന്ന മാലിന്യസംസ്കരണ യൂണിറ്റുമായി ബന്ധപ്പെട്ട്‌ ആശങ്കവേണ്ടെന്നു ജില്ലാ കളക്ടർ എം.എസ്‌. മാധവിക്കുട്ടി. പാലക്കാട്‌ പ്രസ്‌ ക്ലബ്ബിൽ സംഘടിപ്പിച്ച മുഖാമുഖം പരിപാടിയിൽ സംസാരിക്കുകയായിരുന്നു കളക്ടർ. മാലിന്യസംസ്കരണ യൂണിറ്റിന്‍റെ പ്രാഥമിക പരിശോധനയാണു നടക്കുന്നത്‌. പരിസ്ഥിതിക്ക്‌ ദോഷമേൽക്കാത്ത രീതിയിലായിരിക്കും പ്രവർത്തനങ്ങൾ. ഇതുമായി ബന്ധപ്പെട്ട്‌ പ്രദേശത്തെ ജനങ്ങളെ ബോധവത്കരിക്കും. മാലിന്യസംസ്കരണ രംഗത്ത്‌ മികച്ച മാതൃകയാണ് സംസ്ഥാനത്തു നടക്കുന്നത്‌. അതിന്‍റെ ഗുണവശങ്ങൾ പൊതുജനങ്ങളിലെത്തിക്കാൻ ജില്ലാ ഭരണകേന്ദ്രം പ്രവർത്തിക്കും. വന്യജീവി ആക്രമണം കുറയ്‌ക്കാനുള്ള ഇടപെടലുകൾ സജീവമാക്കും. വന്യമൃഗങ്ങൾ ജനവാസ മേഖലയിലേക്കു പ്രവേശിക്കാതിരിക്കാൻ എഐ കാമറ തുടങ്ങിയ ആധുനിക രീതികൾ പരിശോധിച്ച്‌ ബന്ധപ്പെട്ടവർക്ക് നിർദേശം നൽകും. കാലാവസ്ഥാ വ്യതിയാനത്തെത്തുടർന്നുണ്ടാകുന്ന പ്രകൃതിക്ഷോഭങ്ങളെ നേരിടാനുള്ള പ്രവർത്തനങ്ങൾ നടത്തും. കാലാവസ്ഥ കൃത്യമായി മനസ്സിലാക്കാൻ ഓട്ടോമാറ്റിക്‌ വെതർ സ്റ്റേഷനുകളുടെ എണ്ണം വർധിപ്പിക്കും. ഉരുൾപൊട്ടൽ, മണ്ണിടിച്ചിൽ ഭീഷണിയുള്ള പ്രദേശങ്ങളിൽ മഴയളക്കാൻ റെയിൻ ഗേജുകൾ സ്ഥാപിക്കും. ജില്ലയിലെ ലഹരിവ്യാപനം തടയാൻ സംസ്ഥാന സർക്കാരിന്‍റെ ലഹരിവിരുദ്ധ പരിപാടികൾക്ക്‌ കൂടുതൽ പ്രധാന്യം നൽകും. സർക്കാർ നിർദേശമനുസരിച്ച്‌ നെൽക്കർഷകരുടെ പ്രയാസങ്ങൾ പരിഹരിക്കും. അട്ടപ്പാടിയിലെ ഭൂമി കൈയേറ്റം സംബന്ധിച്ച്‌ കൂടുതൽ പഠനം നടത്തുമെന്നും കളക്ടർ പറഞ്ഞു. പ്രസിഡന്‍റ് നോബിൾ ജോസ്, സെക്രട്ടറി എം. ശ്രീനേഷ്, ട്രഷറർ ടി.എസ്. മുഹമ്മദലി എന്നിവർ പ്രസംഗിച്ചു.

തൃത്താല കാർഷിക കാർണിവൽ: സംഘാടകസമിതി രൂപീകരിച്ചു

തൃത്താല: ഓണത്തോടനുബന്ധിച്ച് സെപ്റ്റംബർ ഒന്നുമുതൽ മൂന്നുവരെ തൃത്താല മണ്ഡലത്തിൽ സംഘടിപ്പിക്കുന്ന ജനകീയ കാർഷികോത്സവത്തിന്‍റെ സംഘാടകസമിതി രൂപീകരിച്ചു. ബ്ലോക്ക് പഞ്ചായത്ത് പ്രസിഡന്‍റ് വി.പി. റജീന ചെയർപേഴ്സണും കൃഷി അസിസ്റ്റന്‍റ് ഡയറക്ടർ മാരിയത്ത് കിബിത്തിയ കണ്‍വീനറുമായി 251 അംഗ സംഘാടക സമിതിയാണ് രൂപീകരിച്ചത്. പടിഞ്ഞാറങ്ങാടി സാസ് ഓഡിറ്റോറിയത്തിൽ നടന്ന സംഘാടകസമിതി രൂപീകരണ യോഗം ബ്ലോക്ക് പഞ്ചായത്ത് പ്രസിഡന്‍റ് വി.പി. റജീന ഉദ്ഘാടനം ചെയ്തു. കപ്പൂർ ഗ്രാമപഞ്ചായത്ത് പ്രസിഡന്‍റ് ഷറഫുദ്ദീൻ കളത്തിൽ അധ്യക്ഷനായി. ഗ്രാമപഞ്ചായത്ത് പ്രസിഡന്‍റുമാരായ വി.വി. ബാലചന്ദ്രൻ, ടി. സുഹറ, ബ്ലോക്ക് പഞ്ചായത്ത് വൈസ് പ്രസിഡന്‍റ് പി.ആർ. കുഞ്ഞുണ്ണി, പട്ടിത്തറ പഞ്ചായത്ത് വൈസ് പസിഡന്‍റ് സെബു സദക്കത്തുള്ള, കൃഷി അസിസ്റ്റന്‍റ് ഡയറക്ടർ മാരിയത്ത് കിബിത്തിയ, നവകേരള മിഷൻ ജില്ലാ കോ-ഓർഡിനേറ്റർ പി. സെയ്തലവി, ജനപ്രതിനിധികൾ തുടങ്ങിയവർ പങ്കെടുത്തു.

എന്നു യാഥാർഥ്യമാകും ഒറ്റപ്പാലത്തെ ബ്ലഡ് ബാങ്ക്?

ഒറ്റപ്പാലം: രക്തബാങ്കിന് വേണ്ടിയുള്ള ഒറ്റപ്പാലത്തിന്‍റെ കാത്തിരിപ്പ് അനിശ്ചിതമായി തുടരുന്നു. അഞ്ചുവർഷം മുമ്പാണ് ഒറ്റപ്പാലത്ത് രക്തബാങ്ക് പദ്ധതി പ്രഖ്യാപിച്ചത്. കേന്ദ്ര ആരോഗ്യമന്ത്രാലയത്തിനു കീഴിലുള്ള സെൻട്രൽ ഡ്രഗ്‌സ് സ്റ്റാൻഡേഡ് കൺട്രോൾ ഓർഗനൈസേഷന്‍റെ അനുമതികൂടി ലഭിച്ചാലേ ഈ പദ്ധതി യാഥാർഥ്യമാവുകയുള്ളു. ഇതിനായി ഡെപ്യൂട്ടി ഡ്രഗ്‌സ് കൺട്രോളറുടെ പരിശോധന പൂർത്തിയാക്കി അന്തിമാനുമതിക്കായി സമർപ്പിച്ചിട്ടുണ്ടന്നാണ് സൂചന. അഞ്ചുവർഷം മുമ്പ് പി. ഉണ്ണി എംഎൽഎയായിരിക്കെയാണ് താലൂക്ക് ആശുപത്രിയിൽ രക്തബാങ്ക് തുടങ്ങാനുള്ള പദ്ധതി പ്രഖ്യാപിച്ചത്. ദിവസേന അറുപതിലേറെ രോഗികൾക്ക് ഡയാലിസിസ് ചെയ്തുനൽകുന്ന ആശുപത്രിയിൽ രക്തബാങ്കിന്‍റെ സാധ്യത മുന്നിൽകണ്ടായിരുന്നു പദ്ധതിയൊരുക്കൽ. 74 ലക്ഷം രൂപ ചെലവിലാണ് പദ്ധതി. ഭൗതികസാഹചര്യങ്ങളും യന്ത്രസംവിധാനങ്ങളും ഇതിന് വേണ്ട ജീവനക്കാരുടെ നിയമനവുമെല്ലാം പൂർത്തിയായിട്ടുണ്ട്. ദേശീയ ആരോഗ്യദൗത്യം മുഖാന്തരമാണ് ഡോക്ടറെയും കൗൺസിലറെയും സാങ്കേതികജീവനക്കാരെയും നിയമിച്ചത്. നടപ്പായാൽ ഒറ്റപ്പാലത്തിന് പുറമേ, പടിഞ്ഞാറൻ പാലക്കാടൻ മേഖലയ്ക്കാകെ ഗുണകരമാകും. ജില്ലയിൽ മണ്ണാർക്കാട്ടും പാലക്കാട് ജില്ലാശുപത്രിയിലും മാത്രമാണ് രക്തബാങ്കുള്ളത്. ഒറ്റപ്പാലം താലൂക്ക് ആശുപത്രിക്കുപോലും രക്തം എത്തിക്കുന്നത് പാലക്കാട്ടുനിന്നാണ്. ബാങ്ക് വരുന്നതോടെ പട്ടാമ്പി, ഷൊർണൂർ, തൃത്താല ഭാഗത്തുള്ളവർക്കും സ്വകാര്യാശുപത്രികൾക്കും ഗുണകരമാകും. അനുമതി കിട്ടിയാലുടൻ പ്രവർത്തനം തുടങ്ങാനുള്ള ഒരുക്കത്തിലാണ് അധികൃതർ. ഒരു മാസം 80 യൂണിറ്റ് മുതൽ 100 യൂണിറ്റ് വരെ രക്തമാണ് ഒറ്റപ്പാലത്ത് സംഭരിക്കാനാവുക. ദന്തവിഭാഗം ഒപി പ്രവർത്തിക്കുന്ന കെട്ടിടത്തിലാണ് രക്തബാങ്കിനും സ്ഥലമൊരുക്കിയിട്ടുള്ളത്. പ്ലേറ്റ്‌ലെറ്റ് അടക്കമുള്ള രക്തബാങ്കും അനുബന്ധസൗകര്യങ്ങളുമാണുണ്ടാവുക. കുട്ടികളുടെ കുത്തിവയ്പ് നടക്കുന്ന ആശുപത്രിക്കെട്ടിടത്തിലെ മുകൾനിലയിലെ മുറിയാണ് രക്തബാങ്കിനായി കണ്ടെത്തിയിട്ടുള്ളത്.

ആരോഗ്യ, നേത്ര പരിശോധനാക്യാമ്പ്

വടക്കഞ്ചേരി: ശ്രീകുറുമ്പ എഡ്യുക്കേഷണൽ ആൻഡ് ചാരിറ്റബിൾ ട്രസ്റ്റ്, ശോഭ ഹെൽത്ത് കെയർ, അഹല്യ ഫൗണ്ടേഷൻ കണ്ണാശുപത്രി എന്നിവയുടെ സഹകരണത്തോടെ കണ്ണമ്പ്ര പഞ്ചായത്ത് കാരയങ്കാട്, കൊന്നഞ്ചേരി വാർഡ് സംയുക്ത ആരോഗ്യ ജാഗ്രത സമിതി എന്നിവയുടെ നേതൃത്വത്തിൽ സൗജന്യ ആരോഗ്യ, നേത്ര പരിശോധനാക്യാമ്പ് സംഘടിപ്പിച്ചു. കൊന്നഞ്ചേരി ലക്ഷ്മി ഓഡിറ്റോറിയത്തിൽനടന്ന ക്യാമ്പ് കണ്ണമ്പ്ര പഞ്ചായത്ത് പ്രസിഡന്‍റ് എം.സുമതി ടീച്ചർ ഉദ്ഘാടനം ചെയ്തു. വാർഡ് മെംബർ കെ.അബ്ദുൾ ഷുക്കൂർ അധ്യക്ഷത വഹിച്ചു. ഡോ. ആനന്ദ് സന്തോഷ്, ഡോ. ഫാത്തിമ, വി.ഹരിദാസൻ, എം. ഉണ്ണികൃഷ്ണൻ, സി.വി. ഉണ്ണികൃഷ്ണൻ, ഡി. മണി പ്രസംഗിച്ചു.

നവീകരിച്ച പാതയിൽ കേബിളിടാൻ കുഴിയെടുത്തതിൽ പ്രതിഷേധം

വണ്ടിത്താവളം: ഒരു കോടി രൂപ ചെലവഴിച്ച് വണ്ടിത്താവളം ടൗണിൽ റോഡ് നവീകരണം നടത്തിയത് സ്വകാര്യ മൊബൈൽ കേബിളിടാൻ കുഴിയെടുത്ത് നശിപ്പിക്കുന്നതായി യാത്രക്കാരുടെ പരാതി. വണ്ടിത്താവളം പള്ളിമൊക്ക് മുതൽ ബസ് സ്റ്റാൻഡ് വരെയാണ് റോഡിന്‍റെ വടക്കുഭാഗത്ത് നവീകരണ പ്രവർത്തനം നടന്നത്. യാത്രക്കാർക്കും ഈ സ്ഥലത്തു പ്രവർത്തിക്കുന്ന ഹയർസെക്കൻഡറി സ്കൂൾ വിദ്യാർഥികൾക്കും നടന്നുപോവാൻ നടപ്പാതയും നിർമിച്ചിരുന്നു. റോഡിന്‍റെ വടക്കുഭാഗത്ത് കേബിളിടാൻ സൗകര്യം ഉണ്ടായിരുന്നിട്ടും അത് ഒഴിവാക്കിയാണ് തെക്കുഭാഗത്തു കൂടി ഭൂഗർഭകേബിൾ നിർമാണ ജോലികൾ നടന്നുവരുന്നത്. കേബിൾ സ്ഥാപിച്ചു കഴിഞ്ഞാൽ ഉടൻ ടാറിംഗ് നടത്തി പാത പൂർവസ്ഥിതിയിൽ സഞ്ചാര യോഗ്യക്കണമെന്ന് നാട്ടുകാർ ആവശ്യപ്പെട്ടു.

മലന്പുഴയ്ക്ക് ഇനി പുതിയ മുഖം; 75.87 കോടിയുടെ നവീകരണപദ്ധതിക്കു തുടക്കം

പാലക്കാട്: വിനോദസഞ്ചാര ഭൂപടത്തിൽ മലന്പുഴയ്ക്ക് ഇനി പുതിയ മുഖം. മൈസൂർ വൃന്ദാവൻ ഗാർഡൻസിന്‍റെ മാതൃകയിൽ മലന്പുഴ ഉദ്യാനവും പരിസരവും നവീകരിക്കുന്നതിനുള്ള 75.87 കോടി രൂപയുടെ ബൃഹദ് പദ്ധതിക്ക് തുടക്കമായി. കേന്ദ്ര സർക്കാരിന്‍റെ സ്വദേശ് ദർശൻ 2.0 പദ്ധതിയിൽ ഉൾപ്പെടുത്തിയാണ് മലന്പുഴയെ വടക്കൻ കേരളത്തിലെ ഒരു പ്രധാന ടൂറിസം കേന്ദ്രമായി ഉയർത്താനുള്ള പ്രവൃത്തികൾ നടത്തുന്നത്. ജലസേചന വകുപ്പിന്‍റെ പൂർണസഹകരണത്തോടെയാണ് ടൂറിസം വകുപ്പ് പദ്ധതി നടപ്പാക്കുന്നത്. ഇരു വകുപ്പുകളും ധാരണയിലെത്തുകയും കരാറിൽ ഏർപ്പെടുകയും ചെയ്തതോടെ പ്രവൃത്തികൾക്ക് ഒൗദ്യോഗികമായി തുടക്കമായി. ഉൗരാളുങ്കൽ ലേബർ കോണ്‍ട്രാക്ട് സഹകരണസംഘമാണ് നിർമാണ പ്രവൃത്തികൾ നടത്തുന്നത്. മലന്പുഴയുടെ പ്രകൃതിഭംഗിക്ക് കോട്ടം തട്ടാതെ സന്ദർശകർക്ക് കൂടുതൽ ആധുനികവും ആകർഷകവുമായ സൗകര്യങ്ങൾ ഒരുക്കുകയാണ് പദ്ധതിയുടെ പ്രധാന ലക്ഷ്യം. ഇതിന്‍റെ ഭാഗമായി പുതിയ തീം പാർക്കുകൾ, വാട്ടർ ഫൗണ്ടനുകൾ, മറ്റ് വിനോദകേന്ദ്രങ്ങൾ എന്നിവ സ്ഥാപിക്കും. ഇത് കുട്ടികൾക്കും മുതിർന്നവർക്കും ഒരുപോലെ ആസ്വാദ്യകരമായ അനുഭവം നൽകും. കൂടാതെ ഓർക്കിഡ് പുഷ്പങ്ങൾക്കായിപ്രത്യേക ഓർക്കിഡ് പാർക്ക് ഒരുങ്ങും. നിലവിലുള്ള ഉദ്യാനത്തിന്‍റെ രൂപകല്പനയിൽ മാറ്റങ്ങൾ വരുത്തിക്കൊണ്ട് പൂന്തോട്ടത്തിന് നടുവിലൂടെ വിശാലമായ നടപ്പാതകളും വിശ്രമിക്കാനുള്ള ഇരിപ്പിടങ്ങളും സ്ഥാപിക്കും. പ്രാദേശിക കാർഷിക പൈതൃകത്തിലേക്ക് വിരൽ ചൂണ്ടുന്ന ഒരു പ്രത്യേക മാന്പഴത്തോട്ടം ഒരുക്കും. അതോടൊപ്പം പരന്പരാഗത കലാരൂപങ്ങൾ അവതരിപ്പിക്കാനുള്ള വേദികളും നിർമിക്കും. ഭിന്നശേഷിക്കാർക്ക് ഉദ്യാനത്തിൽ എളുപ്പത്തിൽ സഞ്ചരിക്കാൻ കഴിയുന്ന രീതിയിൽ പ്രത്യേക വഴികളും റാന്പുകളും നിർമിക്കും. പരിസ്ഥിതി സൗഹൃദപരമായ മാലിന്യ സംസ്കരണ സംവിധാനങ്ങൾ ഉറപ്പുവരുത്തിക്കൊണ്ട് മലന്പുഴയെ കൂടുതൽ വൃത്തിയുള്ളതും സുസ്ഥിരവുമായ ഒരു വിനോദസഞ്ചാര കേന്ദ്രമാക്കി മാറ്റും. 2026 മാർച്ച് 31ന് മുന്പ് പദ്ധതി പൂർത്തീകരിക്കും.

ഒറ്റപ്പാലം താലൂക്ക് ആശുപത്രിയുടെ ഒപി കൗണ്ടർ മാറ്റണമെന്ന് ആവശ്യം

ഒറ്റപ്പാലം: താലൂക്ക് ആശുപത്രിയിൽ ഒപി കൗണ്ടർ താഴത്തെ നിലയിലേക്ക് മാറ്റണമെന്ന് ആവശ്യം. ആശുപത്രിയിൽ പുതിയകെട്ടിടത്തിൽ ഒന്നാംനിലയിലാണ് ഒപി കൗണ്ടർ ഇപ്പോൾ പ്രവർത്തിക്കുന്നത്. അത്യാഹിതവിഭാഗത്തിൽ എത്തുന്ന രോഗികൾക്ക് ഒപി ചീട്ട് എടുക്കാൻ ഒന്നാം നിലയിൽ എത്തേണ്ട അവസ്ഥ ബുദ്ധിമുട്ടുണ്ടാക്കുന്നതായാണ് പരാതി ഉയർന്നിരിക്കുന്നത്. രോഗബാധിതരായി തളർന്നെത്തുന്ന രോഗികൾ താഴത്തെനിലയിൽ പ്രവർത്തിക്കുന്ന അത്യാഹിത വിഭാഗത്തിൽ ചികിത്സ തേടുമ്പോൾ ഒപി ചീട്ട് എടുക്കാൻ ഒന്നാം നിലയിലെത്തേണ്ട സാഹചര്യം ഒഴിവാക്കണമെന്നാണ് ആവശ്യം. രോഗി തനിച്ചാണ് വരുന്നതെങ്കിൽ ചവിട്ട് പടികൾ കയറിയോ ലിഫ്റ്റിൽ കയറിയോ ഒപി ചീട്ട് എടുത്ത് വീണ്ടും താഴത്തേക്ക് തിരിച്ചുവന്ന് ഡോക്ടറെ കാണുക എന്നത് വലിയ വെല്ലുവിളിയാണ് ഉയർത്തുന്നത്. വളരെ കഷ്ടപ്പെട്ട് ഒപി ചീട്ടെടുത്ത് താഴത്തെനിലയിൽ എത്തി അത്യാഹിതവിഭാഗത്തിലെ ഡോക്ടറുടെ പരിശോധന കഴിഞ്ഞ് സ്പെഷലിസ്റ്റ് ഡോക്ടറെ കാണാനാണ് നിർദേശമെങ്കിൽ വീണ്ടും മറ്റൊരു ഒപി ചീട്ട് എടുക്കണം എന്ന് നിർബദ്ധിക്കുന്നത് വലിയ ബുദ്ധിമുട്ടുകൾ ഉയർത്തുന്നതായി ആക്ഷേപമുണ്ട്. ഒറ്റയ്ക്ക് വരുന്ന രോഗികൾക്കും കൂട്ടിരിപ്പിന് ആളില്ലാതെ കുട്ടികളുമായി വരുന്ന രോഗികൾക്കും അത്യാഹിതവിഭാഗത്തിൽ ചികിത്സക്ക് എത്തുമ്പോൾ മുകളിലെനിലയിൽ എത്തി ഒപി ചീട്ട് എടുക്കാൻ വളരെ ബുദ്ധിമുട്ട് നേരിടേണ്ടി വരുന്നതിന് പരിഹാരം വേണമെന്നാണ് ജനകീയാവശ്യം. ഒപി ചീട്ട് എടുക്കാനുള്ള കൗണ്ടറും അന്വേഷണ കൗണ്ടറും ആശുപത്രികളുടെ താഴത്തെ നിലയിൽ ആയിട്ടാണ് മറ്റ് ആശുപത്രികളിലെല്ലാം പ്രവർത്തിക്കുന്നത്. അപകടങ്ങൾ സംഭവിച്ചും അത്യാസന്ന നിലയിലും എത്തുന്ന രോഗികൾക്ക് 24 മണിക്കൂറും അത്യാഹിതവിഭാഗത്തിൽ നിന്നുതന്നെ ചീട്ട് നൽകാൻ കഴിയുമോ എന്നുകൂടി പരിശോധിക്കണമെന്നും ആവശ്യമുയർന്നിട്ടുണ്ട്.

കെഎച്ച്ആർഎ യൂണിറ്റ് ഓഫീസ് ഉദ്ഘാടനം ചെയ്തു

മണ്ണാർക്കാട്: കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ മണ്ണാർക്കാട് യൂണിറ്റ് ഓഫീസ് കോടതിപ്പടി ക്യാപിറ്റൽ പ്ലാസയിൽ സംസ്ഥാന സെക്രട്ടറി ഷിനാജ് റഹ്മാൻ ഉദ്ഘാടനം ചെയ്തു. സംസ്ഥാന കമ്മിറ്റി നടപ്പിലാക്കിയ മരണാനന്തര സഹായ നിധി, കെഎച്ച്ആർഎ സുരക്ഷാ പദ്ധതിയിൽ അംഗമായവർക്കുള്ള സർട്ടിഫിക്കറ്റുകളുടെ വിതരണം ജില്ലാ പ്രസിഡന്‍റ് സി. സന്തോഷ് നിർവഹിച്ചു. യൂണിറ്റിലെ അംഗങ്ങളുടെ മക്കളിൽ വിദ്യാഭ്യാസ രംഗത്ത് ഉന്നത പഠനത്തിന് അർഹത നേടിയ കുട്ടികളെ ജില്ലാ സെക്രട്ടറി ഫസലുൽ റഹ്മാൻ ആദരിച്ചു. പഞ്ചഗുസ്തി മത്സര വിഭാഗത്തിൽ സംസ്ഥാന ദേശീയ അംഗീകാരങ്ങൾ നേടിയ ആര്യയെ സംസ്ഥാന സെക്രട്ടറി ഷിനാജ് റഹ്മാൻ അനുമോദിച്ചു. യൂണിറ്റ് പ്രസിഡന്‍റ് ഇ.എ. നാസർ അധ്യക്ഷത വഹിച്ചു. യൂണിറ്റ് സെക്രട്ടറി ഫിറോസ് ബാബു, ജില്ലാ ട്രഷറർ സുബൈർ പട്ടാമ്പി, ജില്ലാ വർക്കിംഗ് പ്രസിഡന്‍റ് കെ. സഫീർ, യുണിറ്റ് ട്രഷറർ എം. മിൻഷാദ്, ജയൻ ജ്യോതി, ഭാരവാഹികളായ കെ. നാസർ, പി. കരീം, ടി.കെ. സിദ്ദിക്ക്, ഷാജഹാൻ, റസാക്ക്, സബിത പ്രസംഗിച്ചു.

മൊണ്ടിപതി മാലിന്യസംസ്കരണ പ്ലാന്‍റിന് സ്റ്റോപ്പ് മെമ്മോ നൽകണമെന്ന് ആവശ്യം

മുതലമട: മൂച്ചൻകുണ്ട് മൊണ്ടിപതിയിൽ പ്രവർത്തനമാരംഭിച്ച മാലിന്യസംസ്കരണ പ്ലാന്‍റ് പൊതുജനങ്ങൾക്ക് ഗുരുതമായ ആരോഗ്യപ്രശ്നങ്ങൾ ഉണ്ടാക്കുന്നതായി വാർഡ് മെംബർ പി. കൽപ്പനാദേവി മുതലമട ഗ്രാമപഞ്ചായത്ത് സെക്രട്ടറി പരാതി നൽകി. കോടികളുടെ മൂലധന നിക്ഷേപത്തിലാണ് സംസ്കരണ പ്ലാന്‍റ് തുടങ്ങിയിരിക്കുന്നത്. കഴിഞ്ഞ പത്തുദിവസമായി ട്രയൽ റൺ എന്ന പേരിൽ മാംസമാലിന്യസംസ്കരണ പ്ലാന്‍റ് പ്രവർത്തിച്ച് വരികയാണ്. ഈ സ്ഥലത്തേക്ക് വാഹനങ്ങളിൽ മാലിന്യം കൊണ്ടുവരുന്നതുമൂലം അസഹനീയ ദുർഗന്ധമാണുണ്ടാവുന്നത്. ജീർണിച്ച മാംസഅവശിഷ്ടങ്ങളിൽനിന്നും മലിനജലം റോഡിലൊഴുകുന്നതും ഇതുവഴി സഞ്ചാരം ഏറെ ദുർഘടമാക്കിയിരിക്കുകയാണ്. സംസ്ക്കരണ പ്ലാന്‍റിനു സമീപത്ത് താമസിക്കുന്ന അഞ്ച് കുടുംബങ്ങൾക്ക് വായുവിലൂടെ എത്തുന്ന ദുർഗന്ധവും ദുരിതമായിക്കുന്നു. പ്ലാന്‍റ് സ്ഥാപിക്കുന്നതിനു മുൻപ്തന്നെ ജനങ്ങൾ വിയോജിപ്പ് പ്രകടപ്പിച്ചിരുന്നു. കമ്പനിയുടെ തുടർ പ്രവർത്തനങ്ങൾ മൂലം ഗുരുതരമായ ആരോഗ്യപ്രശ്നങ്ങൾ ഉണ്ടാകുമെന്നാണ് ജനങ്ങളുടെ ഭയം. അടിയന്തരമായി മാലിന്യസംസ്കരണ പ്ലാന്‍റിനു സ്റ്റോപ്പ് മെമ്മോ നൽകണമെന്നും വാർഡ് കൗൺസിലർ പി. കൽപ്പനാദേവി സെക്രട്ടറിക്കു നൽകിയ പരാതിയിൽ ആവശ്യപ്പെട്ടിട്ടുണ്ട്.

സർവീസ് റോഡുകൾ തുറന്നു; വാടാനംകുർശിയിൽ യാത്രാക്ലേശത്തിനു താത്കാലികപരിഹാരം

ഷൊർണൂർ: റെയിൽവേ മേൽപ്പാല നിർമാണം നടക്കുന്ന വാടാനംകുർശി ഭാഗത്ത് സർവീസ് റോഡുകൾ ഗതാഗതത്തിനു തുറന്നുകൊടുത്തത്‌ അനുഗ്രഹമായി. ബൈക്കുകളും ചെറുവാഹനങ്ങളും മാത്രമാണ് റോഡിലൂടെ കടത്തിവിടുന്നതെങ്കിലും ഗതാഗതകുരുക്കഴിക്കാൻ ഇത് പര്യപ്തമാണ്. ബസ് അടക്കമുള്ള വാഹനങ്ങളും ചരക്കു വാഹനങ്ങളും ബന്ധപ്പെട്ടവർ യോഗം ചേർന്ന് തീരുമാനം എടുത്തതിനു ശേഷമേ കടത്തി വിടാൻ തുടങ്ങൂവെന്നാണ് വിവരം. ഒരുമാസം മുമ്പാണ് വാടാനാംകുറിശിയിൽ പാലം പണിയും സർവീസ് റോഡ് നിർമാണവും നടത്താൻ റോഡിൽ ഗതാഗതം പൂർണമായും നിരോധിച്ചത്. 10 ദിവസം കെ‍ാണ്ട് സർവീസ് റോഡിന്‍റെ പണി തീർക്കുമെന്നാണ് അറിയിച്ചിരുന്നതെങ്കിലും മഴ തടസമായതോടെ വീണ്ടും ഒരാഴ്ചകൂടി റോഡ് അടച്ചിടാൻ തീരുമാനിക്കുകയായിരുന്നു. രണ്ടാഴ്ച കെ‍ാണ്ട് പാലത്തിന് ഒരു വശത്തെ റോഡ് പണിതീർത്ത് ഗതാഗതത്തിന് തുറന്നെങ്കിലും റോഡിന്‍റെ വീതിക്കുറവ് കാരണം റോഡിൽ ഗതാഗതക്കുരുക്കായതോടെ ഒരു ഭാഗത്തേക്ക് മാത്രമായി ചെറുവാഹനങ്ങൾ കടത്തിവിടുകയും വീണ്ടും രണ്ടാഴ്ചകൂടി സമയമെടുത്ത് മറുവശത്തെ സർവീസ് റോഡിന്‍റെ പണികൂടി തീർത്ത് ഗതാഗതത്തിന് തുറക്കുകയുമായിരുന്നു. പുതുതായി നിർമിക്കുന്ന പാലത്തിന്‍റെ ഇരുവശവും സർവീസ് റോഡുകൾ കട്ടവിരിച്ച് നവീകരിച്ചതോടെ ഇനി വാഹനങ്ങൾക്ക് ഇതുവഴിയും കടന്നുപോകാം. ഒരു മാസമായി ബസുകൾ റെയിൽവേ ഗേറ്റിന് അപ്പുറവും ഇപ്പുറവും വന്ന് യാത്രക്കാരെ ഇറക്കി തിരിച്ച് പോകുകയാണ് ചെയ്തിരുന്നത്. ബസുകൾ കൂടി കടത്തിവിടാൻ തുടങ്ങിയാൽ മാത്രമേ ഇതുവഴിയുള്ള ഗതാഗതം പൂർണമായും പുനഃസ്ഥാപിക്കാനാകു. റെയിൽവേ മേൽപ്പാലം നിർമാണം അന്തിമ ഘട്ടത്തിലാണ്. ഒരു മാസത്തിനകം പണി പൂർത്തീകരിക്കാനാകുമെന്നാണ് ബന്ധപ്പെട്ടവർ നൽകുന്ന സൂചന. പാലത്തിന്‍റെ പണി തീർന്നെങ്കിൽ മാത്രമേ വാടാനാംകുറിശി റെയിൽവേ ഗേറ്റ് അടയ്ക്കുന്നത് മൂലം ഉണ്ടാകുന്ന ഗതാഗതതടസം ഒഴിവാകൂ. പട്ടാമ്പി–കുളപ്പുള്ളി പാത നവീകരണവും പുരോഗമിക്കുകയാണ്. കുളപ്പുള്ളി ഐപിടിഐ പരിസരത്ത് നിന്ന് ആരംഭിച്ച് പട്ടാമ്പി നിള ആശുപത്രി വരെയാണ് റോഡ് വീതികൂട്ടി നവീകരിക്കുന്നത്. ഐപിടിഐ പരിസരത്ത്നിന്ന് ആരംഭിച്ച് നവീകരണം മേലെ പട്ടാമ്പി ചെർപ്പുളശേരി റോഡ് ജം‍‍ഗ്ഷൻ വരെ എത്തിയിട്ടുണ്ട്. ഇതിനിടയിൽ പണി തീർക്കാനുള്ള വാടാനാംകുറിശി, ഓങ്ങല്ലൂർ പാടം ഭാഗങ്ങളിൽ പണി പുരോഗമിക്കുകയാണ്. റോഡ് നവീകരണം പൂർത്തിയാകുകയും വാടാനാംകുറിശി റെയിൽവേ മേൽ‌പ്പാലം പണി പൂർത്തീകരിച്ച് ഗതാഗതത്തിന് തുറക്കുകയും ചെയ്താ‍ൽ പട്ടാമ്പി-കുളപ്പുള്ളി റോഡിലെ ഗതാഗത തടസങ്ങളെല്ലാം നീങ്ങും. ഇപ്പോഴുള്ള പ്രശ്നപരിഹാരം ശാശ്വതമായിട്ട് അല്ലെങ്കിലും ഗതാഗതകുരുക്കിന് വലിയ അളവിൽ പരിഹാരം കാണാൻ ഉതകുന്നുണ്ട്.

പുതിയ സ്റ്റാഫ് ക്വാർട്ടേഴ്സ് പ്രവൃത്തിക്കു തുടക്കമാകുന്നു

ചിറ്റൂർ: താലൂക്ക് ആശുപത്രിയിൽ ജീവനക്കാർക്കായി 10 കോടിയുടെ പുതിയ സ്റ്റാഫ് ക്വാർട്ടേഴ്സ് നിർമാണ പ്രവൃത്തികൾക്ക് തുടക്കമാവുന്നു. ജീർണാവസ്ഥയിലുള്ള പഴയ കെട്ടിടങ്ങൾ പൊളിച്ച് മാറ്റി 10 കോടി രൂപ ചെലവിലാണ് ഫ്ളാറ്റ് മാതൃകയിൽ പുതിയ കെട്ടിടം നിർമിക്കുന്നത്. 2019-20 ലെ സംസ്ഥാന ബജറ്റിൽ സ്റ്റാഫ് ക്വാർട്ടേഴ്സ് നിർമാണത്തിനായി തുക വകയിരുത്തിയിരുന്നു. ഇത് പ്രകാരം ആധുനിക സൗകര്യങ്ങളുള്ള ഗ്രൗണ്ട് ഫ്ലോർ അടക്കം ആറു നിലകളോടുകൂടിയ കെട്ടിടമാണ് വിഭാവനം ചെയ്തിരിക്കുന്നത്. ആകെ 2566 ചതുരശ്ര മീറ്റർ വിസ്തീർണമുള്ള കെട്ടിടത്തിൽ 15 കുടുംബങ്ങൾക്ക് താമസിക്കാനുള്ള സൗകര്യമുണ്ടാകും. കാർ പാർക്കിംഗ്, ലോബി, ലോഞ്ച്, ലിഫ്റ്റ്, സ്റ്റെയർകേസുകൾ, കിടപ്പുമുറികൾ, അറ്റാച്ച്ഡ് ശൂചിമുറികൾ, ഡ്രോയിംഗ് ആൻഡ് ഡൈനിംഗ് റൂം, അടുക്കള, വർക്ക് ഏരിയ എന്നിവയുണ്ടാകും. ടെറസ് ഫ്ലോറിൽ ജിഐ ഷീറ്റ് ഉപയോഗിച്ചുള്ള റൂഫിംഗ് സൗകര്യവും ഒരുക്കും. 891.49 ലക്ഷം രൂപ സിവിൽ പ്രവൃത്തികൾക്കായി 8.9 കോടി രൂപയും ഇലക്ട്രിക്കൽ പ്രവൃത്തികൾക്ക് 1.1 കോടി രൂപയുമാണ് വകയിരുത്തിയിട്ടുള്ളത്.

സ്റ്റേജ് കാര്യേജ് പെർമിറ്റിനു പോലീസ് ക്ലിയറൻസ് സർട്ടിഫിക്കറ്റ് നിർബന്ധം

പാലക്കാട്: ജില്ലയിൽ സ്വകാര്യ ബസുകൾ ഉൾപ്പടെയുള്ള വാഹനങ്ങളുടെ സ്റ്റേജ് കാര്യേജ് പെർമിറ്റ് ലഭിക്കുന്നതിന് സെപ്റ്റംബർ 15 മുതൽ പോലീസ് ക്ലിയറൻസ് സർട്ടിഫിക്കറ്റ്/ നോണ്‍ ഇൻവോൾവ്മെന്‍റ് ഇൻ ഒഫൻസസ് സർട്ടിഫിക്കറ്റ് നിർബന്ധമാക്കി. ജില്ലാ റീജണൽ ട്രാൻസ്പോർട്ട് അഥോറിറ്റിയാണ് ഇത് സംബന്ധിച്ച ഉത്തരവ് പുറപ്പെടുവിച്ചത്. പുതിയ പെർമിറ്റ് എടുക്കുന്നതിനും നിലവിലുള്ള പെർമിറ്റ് പുതുക്കുന്നതിനും താത്കാലിക പെർമിറ്റ് എടുക്കുന്നതിനുമെല്ലാം വാഹനങ്ങളിലെ ഡ്രൈവർ, കണ്ടക്ടർ തുടങ്ങിയവരുടെ പോലീസ് ക്ലിയറൻസ് സർട്ടിഫിക്കറ്റ് നിർബന്ധമാണെന്ന് ജില്ലാ റീജണൽ ട്രാൻസ്പോർട്ട് അഥോറിറ്റി സെക്രട്ടറിയും ആർടിഒയുമായ സി.യു മുജീബ് അറിയിച്ചു. 1988 ലെ മോട്ടോർ വെഹിക്കിൾസ് ആക്ട്, 1989ലെ കേരള മോട്ടോർ വെഹിക്കിൾ റൂൾസ് എന്നിവയിലെ വ്യവസ്ഥകൾക്കനുസരിച്ചാണ് തീരുമാനം. ഡ്രൈവർമാരും കണ്ടക്ടർമാരും ഏതെങ്കിലും കുറ്റകൃത്യങ്ങളിൽ ഏർപ്പെട്ടിട്ടുണ്ടോ എന്ന് പരിശോധിക്കുന്നതിനും വാഹന യാത്രക്കാരുടെ സുരക്ഷ ഉറപ്പുവരുത്തുന്നതിനുമാണ് നടപടി.

കോൺട്രാക്ടേഴ്സ് അസോസിയേഷൻ യോഗം

കൊഴിഞ്ഞാമ്പാറ: അവ്യക്തമായ ഉത്തരവുകൾ കരാറുകാർക്കും ഉദ്യേഗസ്ഥർക്കും ഉണ്ടാക്കുന്ന പ്രതിസന്ധി ഒഴിവാക്കണമെന്നും പണി പൂർത്തിയായാൽ സമയബന്ധിതമായി ബില്ല് പാസാക്കി പണം നൽകണമെന്നും ആൾ കേരള ഗവ. കോൺട്രാക്ടേഴ്സ് അസോസിയേഷൻ ചിറ്റൂർ താലൂക്ക് കമ്മിറ്റി വാർഷിക പൊതുയോഗം സർക്കാരിനോടാവശ്യപ്പെട്ടു. കൊഴിഞ്ഞാമ്പാറയിൽ ചേർന്ന സമ്മേളനം സംസ്ഥാന ജനറൽസെക്രട്ടറി സണ്ണി ചെന്നിക്കര ഉദ്ഘാടനം ചെയ്തു. താലൂക്ക് പ്രസിഡന്‍റ് വി. കൃഷ്ണകുമാർ അധ്യക്ഷനായി. സംസ്ഥാന രക്ഷാധികാരി കെ.സി. ജോൺ, കെ. നന്ദകുമാർ, സംസ്ഥാന ഓർഗനൈസിംഗ് സെക്രട്ടറി കെ. ബാലകൃഷ്ണൻ, ജില്ലാ പ്രസിഡന്‍റ് പി.ഇ. തങ്കച്ചൻ, സെക്രട്ടറി സച്ചിദാനന്ദൻ, സി. ശിവദാസ് എന്നിവർ പ്രസംഗിച്ചു. സംഘടനാ കുടുംബാംഗങ്ങളിൽ ഉന്നതവിജയം നേടിയ വിദ്യാർഥികൾക്കു മൊമന്‍റോ നൽകി ആദരിച്ചു. ഭാരവാഹികൾ: സി. ശിവദാസ് -പ്രസിഡന്‍റ്, കെ. മനോജ്- സെക്രട്ടറി, വി. രാമചന്ദ്രൻ-ട്രഷറർ.

സർക്കാർസേവനങ്ങളിലെ പരിഷ്കാരങ്ങൾ സ്വാഗതാർഹം: നിഖിൽ കൊടിയത്തൂർ

പാലക്കാട്: തദ്ദേശ സ്വയംഭരണ വകുപ്പിന്‍റെ സേവനങ്ങളും സംരംഭകർക്കും വ്യവസായികൾക്കും ആവശ്യമായ ലൈസൻസുകളും ത്വരിതഗതിയിൽ ലഭ്യമാക്കാനുള്ള സർക്കാർ നടപടി സ്വാഗതാർഹമാണെന്ന് പീപ്പിൾ റെസ്പോണ്‍സിബിൾ ഓർഗനൈസേഷൻ ഫോർ അർബൻ ഡെവലപ്പ്മെന്‍റ് (പ്രൗഡ്) ചെയർമാൻ നിഖിൽ കൊടിയത്തൂർ പറഞ്ഞു. സംസ്ഥാനത്ത് നിലനിന്നിരുന്ന വികലമായ നടപടിക്രമങ്ങൾ പിൻവലിച്ചതിലൂടെ ജനങ്ങൾക്ക് ആശ്വാസകരവും ഉപകാരപ്രദവുമായ സാഹചര്യം സംജാതമായിരിക്കുകയാണെന്നും ലൈസൻസ് സന്പ്രദായത്തിലെ ഉദാരവത്കരണം നാടിന്‍റെ വികസനത്തിന് മുതൽക്കൂട്ടാവുമെന്നും അദ്ദേഹം പറഞ്ഞു.

ഗായത്രിപ്പുഴയിൽ ഒഴുക്കിൽപ്പെട്ടയാളുടെ മൃതദേഹം കണ്ടെത്തി

ആലത്തൂർ: ഗായത്രിപ്പുഴയിലെ കൂളിയാടുകടവ് പാലത്തിനുസമീപം ഒഴുക്കിൽപ്പെട്ടയാളുടെ മൃതദേഹം ആലത്തൂർ എടാംപറന്പ് തടയണയ്ക്കു സമീപത്തുനിന്ന് കണ്ടെടുത്തു. കുനിശേരി മലക്കാട്ടുകുന്നിൽ പരേതനായ ചാത്തേലന്‍റെ മകൻ ലക്ഷ്മണന്‍റെ (44) മൃതദേഹമാണു കണ്ടെടുത്തത്. പാലക്കാട് ജില്ലാ ആശുപത്രിയിൽ പോസ്റ്റ്മോർട്ടത്തിനുശേഷം മൃതദേഹം തിരുവില്വാമല ഐവർമഠത്തിൽ സംസ്കരിച്ചു. കെട്ടിട നിർമാണത്തൊഴിലാളിയായ ലക്ഷ്മണൻ അവിവാഹിതനാണ്. അമ്മ: കുഞ്ചി. സഹോദരങ്ങൾ: രാമൻകുട്ടി, കൃഷ്ണൻകുട്ടി, കമലം, ശാന്ത, ദേവകി, സീത. ഇന്നലെ രാവിലെ ഏഴരയോടെ കണ്ടെത്തിയ മൃതദേഹം നാട്ടുകാർ കരയ്ക്കടുപ്പിക്കുകയായിരുന്നു. തുടർന്ന് പോലീസെത്തി മൃതദേഹം തിരിച്ചറിഞ്ഞ് തുടർനടപടികൾ സ്വീകരിച്ചു. ഞായറാഴ്ച രാവിലെ ഏഴരയോടെ സുഹൃത്തുക്കളോടൊപ്പം മീൻപിടിക്കാനെത്തിയ ലക്ഷ്മണൻ പുഴയിലൂടെ ഒഴുകിവന്ന തേങ്ങ എടുക്കാൻ ശ്രമിക്കുന്നതിനിടെ ഒഴുക്കിൽപ്പെടുകയായിരുന്നു.

കുമരംപുത്തൂർ ഗ്രാമപഞ്ചായത്തിന്‍റെ മാലിന്യശേഖരത്തിനു തീപിടിച്ചു

കുമരംപുത്തൂർ: കുമരംപുത്തൂർ ഗ്രാമപഞ്ചായത്തിന്‍റെ മാലിന്യശേഖരണ കേന്ദ്രത്തിനുസമീപം കൂട്ടിയിട്ട പ്ലാസ്റ്റിക് മാലിന്യത്തിനു തീപിടിച്ചു. അഗ്നിശമനസേനയെത്തി തീയണച്ചു. ഇന്നലെ വൈകുന്നേരം അറു മണിയോടെയാണ് കുമരംപുത്തൂർ ചുങ്കം മങ്കുഴിപാറയിലെ പൊതുശ്മശാനത്തിനു സമീപത്തു തീപിടിത്തമുണ്ടായത്. പുതുതായി നിർമിച്ച എംസിഎഫ് കെട്ടിടത്തു സമീപം പുറത്ത് പ്ലാസ്റ്റിക് ചാക്കുകളിലായി കൂട്ടിയിട്ട മാലിന്യ കൂമ്പാരത്തിനു തീപിടിക്കുകയായിരുന്നു. അഗ്നിരക്ഷാസേന ഉടൻ എത്തിയെങ്കിലും സേനയുടെ വാഹനം എത്താനുള്ള റോഡില്ലാത്തത്തിനാൽ സ്വകാര്യ വ്യക്തികളുടെ തോട്ടത്തിലൂടെ വാഹനമെത്തിച്ചാണ് തീയണച്ചത്. ഏറെനേരത്തെ ശ്രമത്തിനൊടുവിലാണ് തീ അണയ്ക്കാനായത്.

മൂവാണ്ടനിൽ നേട്ടംകൊയ്ത് സിബി ഐസക് കുരിയത്തടം

ജോജി തോമസ് നെന്മാറ: കർഷകരുടെ നഷ്ടക്കണക്കുകൾക്കിടയിലും പുതുമയാർന്ന കൃഷിരീതികളുമായി നേട്ടംകൊയ്ത് ശ്രദ്ധനേടി വിത്തനശ്ശേരി സിബി ഐസക് കുരിയത്തടം. 42 വർഷമായി കാർഷികരംഗത്തുള്ള സിബിയുടെ മികവിനു അംഗീകാരവും പ്രശസ്തിയും ഏറുകയാണ്. കഴിഞ്ഞ ദിവസം കർഷകദിനത്തിൽ നെന്മാറ പഞ്ചായത്ത് തലത്തിലെ മികച്ച കർഷകനുള്ള ആദരവൊരുക്കി കൃഷിവകുപ്പ് അനുമോദിക്കുകയും ചെയ്തു. വർഷം മുഴുവൻ വിളവെടുപ്പിലൂടെ ആദായംനേടാനാകുന്ന മാവുകൃഷിയിലൂടെയാണ് സിബി ശ്രദ്ധേയനാകുന്നത്. മൂന്നേക്കറിലായി 250 മൂവാണ്ടൻ മാവാണ് വർഷം മുഴുവൻ സിബിക്ക് ആദായം നേടിത്തരുന്നത്. കഴിഞ്ഞ 20 വർഷമായി മൂവാണ്ടൻ മാവുകൃഷി പരീക്ഷണത്തിലായിരുന്നു സിബി. 20 വർഷം മുമ്പുനട്ട മൂവാണ്ടൻ മാവുകളിലൂടെ ആദായം വർധിച്ചതോടെ പിന്നീട് കൂടുതൽ സ്ഥലങ്ങളിലേക്ക് കൃഷി വ്യാപിപ്പിക്കുകയായിരുന്നു. 20, 15, 10 വർഷം എന്നിങ്ങനെ പല പ്രായത്തിലുള്ള മാവുകളാണ് അന്പത്തിയെട്ടുകാരനായ സിബിയുടെ കൃഷിയിടത്തിലുള്ളത്. മൂവാണ്ടൻ മാവായതിനാൽ സാധാരണ മാങ്ങാവിളവെടുപ്പ് സീസണിലും അതു കഴിഞ്ഞും വിളവു തരുന്നതു ഗുണകരമായിട്ടുണ്ട്. സീസൺ കഴിഞ്ഞാലും മാങ്ങ ലഭ്യമായതിനാൽ നല്ല ആദായം ലഭിക്കുന്നുണ്ടെന്നു സിബി സാക്ഷ്യപ്പെടുത്തുന്നു. മൂവാണ്ടൻമാവ് തോട്ടംകൃഷിയായി കർഷകർ ചെയ്യാറില്ല. പരീക്ഷണാടിസ്ഥാനത്തിലാണ് തോട്ടമായി സിബി ഇതു പരിപാലിച്ചു വരുന്നത്. ഇതാണ് കൂടുതൽ ആദായത്തിന് പുതിയ വഴിതുറന്നു നൽകിയത്. സാധാരണ വീട്ടുവളപ്പുകളിലും കൃഷിയിടങ്ങളിലും എല്ലാം സീസണുകളിലും ഫലം തരുന്ന ഒന്നോ രണ്ടോ മൂവാണ്ടൻ മാവാണുണ്ടാവാറുള്ളത്. വളരെ ചെറുപ്രായത്തിൽ തന്നെ ആദായം തരുന്നതിനാലും കൂടുതൽ ശുശ്രൂഷ വേണ്ടാത്തതിനാലും മൂവാണ്ടൻ മാവുകൃഷി കർഷകർക്കു ഗുണകരമാകുമെന്നും സിബി പറയുന്നു. മാവുകൃഷിക്കു പുറമെ നെല്ല്, തെങ്ങ്, പച്ചക്കറി തുടങ്ങിയ പരമ്പരാഗത കൃഷിയും സിബി തോട്ടത്തിൽ തുടർന്നുവരുന്നുണ്ട്. ഭാര്യ പ്രസന്നയും മകൻ ആൻഡ്രൂസ് കുരിയത്തടം എന്നിവരും കൃഷിയിൽ സഹായിക്കുന്നുണ്ട്. മകൾ തളിപ്പറമ്പിൽ നഴ്സിംഗ് വിദ്യാർഥിനിയാണ്.

കുടുംബശ്രീയുടെ ഓണസദ്യ ഇനി വീട്ടുപടിക്കലെത്തും

പാലക്കാട്: തിരക്കുകൾക്കിടയിൽ ഓണസദ്യ ഒരുക്കാൻ സമയം ലഭിക്കാത്തവർക്ക് ഇത്തവണ കുടുംബശ്രീ ഓണസദ്യ ഓർഡർ ചെയ്യാം. കുടുംബശ്രീയുടെ മികച്ച കഫെ യൂണിറ്റുകൾ ഇത്തവണ ഓർഡർ അനുസരിച്ച് ഓണസദ്യ ഒരുക്കാൻ തയാറായിക്കഴിഞ്ഞു. ഓർഡർ ചെയ്യുന്നതിന് അനുസരിച്ച് മിതമായ നിരക്കിൽ ഓണസദ്യ യൂണിറ്റുകൾ ലഭ്യമാക്കും. ജില്ലയിലെ വിവിധ പ്രദേശങ്ങളിൽ നിന്നുള്ള മുപ്പതോളം കുടുംബശ്രീ കഫേ യൂണിറ്റുകളാണ് ഓണസദ്യ ഒരുക്കുന്നത്. ഉപഭോക്താക്കളുടെ ഓർഡറുൾ സ്വീകരിച്ചു തുടങ്ങി.രണ്ടുദിവസം മുമ്പ് ബുക്കുചെയ്യണം. ചോറ്, അവിയൽ, സാമ്പാർ, പപ്പടം, അച്ചാർ, പച്ചടി, കിച്ചടി, പായസം, ചിപ്സ്, ശർക്കര വരട്ടി, പുളിയിഞ്ചി, കാളൻ, രസം, മോര് തുടങ്ങി വാഴയില വരെ ലഭ്യമാകും. ആവശ്യക്കാരുടെ താത്പര്യം അനുസരിച്ച് വിഭവങ്ങൾ തെരഞ്ഞെടുക്കാനും എത്ര ഇനം വേണമെന്ന് തീരുമാനിക്കാനും സാധിക്കും. പോക്കറ്റ് മാർട്ട്, ഓണക്കിറ്റുകൾ തുടങ്ങിയവയ്ക്ക് പുറമെയാണ് കുടുംബശ്രീയുടെ കഫെ യൂണിറ്റുകൾ ഓണസദ്യ തയാറാക്കുന്നത്. വിശദ വിവരങ്ങള്‍ക്ക് : പല്ലശ്ശന -9961204035, പെരിങ്ങോട്ടുകുറിശ്ശി - 9744346963, ഷൊര്‍ണൂര്‍ - 9645816055, വടവന്നൂര്‍ - 9744546107, വിളയൂര്‍ - 7356984290, കൊഴിഞ്ഞാമ്പാറ- 9497387895, പെരുവെമ്പ് - 9562010045, കാരകുറിശ്ശി - 9544323860, ഷോളയൂര്‍ - 8086584559, പൂക്കോട്ട്കാവ്- 9745511432, വെള്ളിനേഴി- 9747730588, കരിമ്പുഴ - 9496495005, കടമ്പഴിപ്പുറം - 8289825337, ശ്രീകൃഷ്ണപുരം - 9526608257, പാലക്കാട് നോര്‍ത്ത്- 9497132975, കേരളശ്ശേരി- 6235455957, വണ്ടാഴി - 9961012026, കുഴല്‍ മന്ദം - 9895946819, വാണിയംകുളം - 9605677483, അനങ്ങനടി - 9645211389, ഒറ്റപ്പാലം - 9995478497, മലമ്പുഴ -8606499437, തൃത്താല - 9048297575, കരിമ്പ - 9744587159.

നെല്ലിയാമ്പതി ചുരംറോഡിൽ മരം കടപുഴകിവീണ് ഗതാഗതം മുടങ്ങി

നെന്മാറ: നെല്ലിയാമ്പതി ചുരംറോഡിൽ മരംകടപുഴകിവീണ് ഗതാഗതം തടസപ്പെട്ടു. നെന്മാറ- നെല്ലിയാമ്പതി ചുരംറോഡിൽ കുണ്ടർചോലയ്ക്കു സമീപമാണ് വൻമരം മൂന്നരയോടെയുണ്ടായ മഴയിലും കാറ്റിലും കടപുഴകി വീണത്. മരം വീഴുന്ന സമയത്ത് വാഹനങ്ങൾ ഇല്ലാതിരുന്നതിനാൽ അപകടം ഒഴിവായി. റോഡിനു കുറുകെ മരം കിടന്നതിനാൽ നെല്ലിയാമ്പതിയിലേക്കുള്ള വാഹനങ്ങളും തിരിച്ചുമുള്ള വാഹനങ്ങളും റോഡിൽ മൂന്നു മണിക്കൂറിലേറെ കുടുങ്ങി. മൊബൈൽ റേഞ്ച് ഇല്ലാത്ത സ്ഥലമായതിനാൽ ഇരുചക്രവാഹന യാത്രക്കാർ ഏറെ ദൂരം സഞ്ചരിച്ചാണ് പോത്തുണ്ടി വനം ചെക്ക്പോസ്റ്റിലും അഗ്നിരക്ഷാ സേനയെയും വിവരമറിയിച്ചത്. മൊബൈൽ റേഞ്ചില്ലാത്ത സ്ഥലം ആയതിനാൽ ഗതാഗതം പുനഃസ്ഥാപിക്കാനുള്ള നടപടികൾ ആരംഭിക്കാനും വൈകി. കൊല്ലങ്കോട്ടുനിന്ന് അഗ്നി രക്ഷാസേനയും വനം ജീവനക്കാരും സന്നദ്ധപ്രവർത്തകരും ചേർന്നാണ് ഭാഗികമായി മരച്ചില്ലകൾ വെട്ടിമാറ്റി ഗതാഗതം പുനഃസ്ഥാപിച്ചത്. വലിപ്പം കൂടിയ മരമായതിനാൽ മുറിച്ചുമാറ്റിയ കഷണങ്ങളും മറ്റും നീക്കാൻ ഏറെ ബുദ്ധിമുട്ടേണ്ടി വന്നു.

അട്ടപ്പാടിയിൽ ഡിജിറ്റൽ സർവേ ഉടൻ പൂർത്തിയാക്കും: മന്ത്രി കെ. രാജൻ

മണ്ണാർക്കാട്: അട്ടപ്പാടിയിൽ ഡിജിറ്റൽ സർവേ ഉടൻ പൂർത്തിയാക്കി ഭൂമിപ്രശ്നം തീർക്കുമെന്നു റവന്യൂ മന്ത്രി കെ. രാജൻ. മണ്ണാർക്കാട്ടുനടന്ന താലൂക്ക്തല പട്ടയമേള ഉദ്ഘാടനം ചെയ്യുകയായിരുന്നു അദ്ദേഹം. ഈ സർക്കാർ അധികാരത്തിൽവന്ന ശേഷം സംസ്ഥാനത്ത് 2,23,945 പട്ടയങ്ങൾ വിതരണം ചെയ്തതായും അതിൽ 55,280 എണ്ണം പാലക്കാട് ജില്ലയിലാണെന്നും മന്ത്രി പറഞ്ഞു. മണ്ണാർക്കാട് റൂറൽ ബാങ്ക് ഹാളിൽ നടന്ന പട്ടയമേളയിൽ എൻ. ഷംസുദ്ദീൻ എംഎൽഎ അധ്യക്ഷനായി. മണ്ണാർക്കാട് ബ്ലോക്ക് പഞ്ചായത്ത് പ്രസിഡന്‍റ് വി. പ്രീത, അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റുമാരുതി മുരുകൻ, അലനല്ലൂർ ഗ്രാമപഞ്ചായത്ത് പ്രസിഡന്‍റ് സജ്ന സത്താർ, സിപിഎം ഏരിയ സെക്രട്ടറി എം.കെ. നാരായണൻകുട്ടി, സിപിഐ മണ്ഡലം സെക്രട്ടറി എ.കെ. അസീസ്, ജില്ലാ കളക്ടർ എം.എസ്. മാധവിക്കുട്ടി, സബ് കളക്ടർ അൻജിത് സിംഗ് തുടങ്ങിയവർ പ്രസംഗിച്ചു. മണ്ണാർക്കാട്ടും അട്ടപ്പാടിയിലുമായി 459 പട്ടയങ്ങളാണ് വിതരണം ചെയ്തത്.

ദേശീയപാതയിലെ നിർമാണ പ്രവൃത്തികൾ സമയബന്ധിതമായി പൂർത്തിയാക്കും

വടക്കഞ്ചേരി: പന്നിയങ്കര ടോൾപ്ലാസയിൽ ഏഴര കിലോമീറ്ററിലുള്ള പ്രദേശവാസികൾക്ക് സൗജന്യ യാത്രയ്ക്കുള്ള വാഹനരേഖകൾ സമർപ്പിക്കാൻ കഴിയാത്തവർക്ക് ഈമാസം 31 വരെ രേഖകൾ സമർപ്പിക്കുന്നതിനുള്ള സൗകര്യമുണ്ടാകുമെന്ന് ടോൾവിഷയവുമായി ബന്ധപ്പെട്ട് കളക്ടറുടെ ചേംബറിൽ നടന്ന ചർച്ചയിൽ തീരുമാനം. ഈ ദൂരപരിധിയിലുള്ള പ്രദേശവാസികൾ പുതിയ വാഹനം വാങ്ങുമ്പോഴും സെക്കൻഡ് ഹാൻഡ് വാഹനം വാങ്ങുമ്പോഴും സൗജന്യ യാത്രയ്ക്കുള്ള അപേക്ഷ നൽകിയാൽ കരാർകമ്പനി സ്വീകരിക്കും. വാർഷിക ടോൾപാസ് എടുക്കുന്നവർക്ക് സൗജന്യ യാത്രാനുകൂല്യം ലഭ്യമാകില്ലെന്നും കരാർകമ്പനി പ്രതിനിധികൾ പറഞ്ഞു. പാതനിർമാണം പൂർത്തിയാകാത്ത സാഹചര്യത്തിൽ ടോൾപിരിവ് നിർത്തിവയ്പ്പിക്കണമെന്ന ആവശ്യവുമായി പി.പി. സുമോദ് എംഎൽഎ ജില്ലാ കളക്ടർക്ക് നൽകിയ കത്തിന്‍റെ അടിസ്ഥാനത്തിലായിരുന്നു യോഗം. ചുവട്ടുപാടം ഭാഗത്ത് പൂർത്തീകരിക്കാനുള്ള സർവീസ് റോഡ് ടെൻഡർ ആയിട്ടുണ്ട്. മഴ മാറി സെപ്റ്റംബർ മാസത്തോടുകൂടി പ്രവൃത്തി ആരംഭിക്കും. ഇതിനു മുന്നോടിയായി എംഎൽഎ പ്രതിനിധിയും ദേശീയപാത അഥോറിറ്റി പ്രതിനിധിയും ടോൾകമ്പനി പ്രതിനിധികളും സംയുക്തമായി സ്ഥലം പരിശോധിച്ച് സർവീസ് റോഡിന്‍റെ പ്രശ്നങ്ങൾ പരിഹരിക്കും. കുതിരാൻ, വഴുക്കുംപാറ പാലം ഭാഗത്ത് രാത്രി കാലങ്ങളിൽ ലൈറ്റില്ലാത്തതിനാൽ വാഹനങ്ങൾ അപകടത്തിൽപ്പെടുന്നത് പരിഹരിക്കുന്നതിനായി വേണ്ടതായ പ്രവൃത്തി നടത്തും. വടക്കഞ്ചേരി തങ്കം ജംഗ്ഷൻ മേൽപ്പാലം , മംഗലംപാലം എന്നിവ കുത്തിപ്പൊളിക്കുന്നത് നവംബറിൽ റോഡിന്‍റെ ഫുൾ ടാറിംഗ് ആരംഭിക്കുന്നതിന്‍റെ ഭാഗമായിട്ടാണെന്നു കരാർകമ്പനി യോഗത്തിൽ അറിയിച്ചു. മംഗലം ഇടതുകര കനാലിലേക്ക് തങ്കം ജംഗ്ഷനിലെ സർവീസ് റോഡ് ഡ്രൈനേജിലെ വെള്ളം കനാൽ വകുപ്പിന്‍റെ അനുമതിയില്ലാതെ കനാലിലേക്ക് ഒഴുക്കിവിടുന്നതു നിർത്തുന്നതിന് ആവശ്യമായ ബദൽ പരിഹാരമാർഗം കാണും. നേരത്തെ സൗജന്യയാത്ര അനുവദിച്ച വാഹനങ്ങൾക്ക് ലിമിറ്റ് എക്സീഡ് എന്ന രീതിയിൽ സൗജന്യ യാത്ര നിഷേധിക്കുന്നുണ്ടെന്നു എംഎൽഎ ചൂണ്ടിക്കാട്ടി. എന്നാൽ അത്തരം പരാതിയുണ്ടെങ്കിൽ ഓഫീസിൽ വന്നാൽ അതുപരിഹരിക്കാമെന്നും ടോൾ കരാർ കമ്പനി അറിയിച്ചു. മേൽപ്പാല നിർമാണങ്ങളുടെ ഭാഗമായി ഉണ്ടാകുന്ന ഗതാഗതക്കുരുക്കിന് അടിയന്തരപരിഹാരം കാണും. യോഗതീരുമാനങ്ങൾ നിശ്ചിത കലയളവിൽ നടപ്പാക്കിയില്ലെങ്കിൽ ടോൾപിരിവ് നിർത്തിവയ്പിക്കുന്നതിനുള്ള നടപടി സ്വീകരിക്കാനും ധാരണയായിട്ടുണ്ട്. യോഗത്തിൽ എംഎൽഎ യെ കൂടാതെ അഡീഷണൽ ജില്ലാ മജിസ്ട്രേറ്റ് കെ. സുനിൽകുമാർ, ആർഡിഒ മണികണ്ഠൻ, ജോസഫ് സ്റ്റീഫൻ, എൽഎഎൻഎച്ചിലെ റോബി, ഡെപ്യൂട്ടി കളക്ടർ, ദേശീയപാത അഥോറിറ്റി പ്രതിനിധികൾ, വാളയാർ ടോൾകമ്പനി പ്രതിനിധികൾ എന്നിവർ പങ്കെടുത്തു.

ലക്കിടി നെഹ്റു അക്കാദമി ഓഫ് ലോയില്‍ എല്‍എല്‍ബി പ്രവേശനോത്സവം

ലക്കിടി: ലക്കിടി നെഹ്റു അക്കാദമി ഓഫ് ലോയില്‍ എല്‍എല്‍ബി പുതിയ ബാച്ചുകളുടെ പ്രവേശനോത്സവം റിട്ട ഹൈക്കോടതി ജഡ്ജിയും സംസ്ഥാന ഉപ ലോകായുക്തയുമായിരുന്ന ബാബുമാത്യു പി.ജോസഫ് ഉദ്ഘാടനം ചെയ്തു. കുസാറ്റ് ഫാക്കല്‍റ്റി ഓഫ് ലോ പ്രഫസര്‍ ആൻഡ് ഡീന്‍ ഡോ.എ. വാണി കേസരി വിശിഷ്ടാഥിതിയായിരുന്നു. ഡോ.എച്ച്.എന്‍. നാഗരാജ, ഡോ.പി.ഡി. സെബാസ്റ്റ്യന്‍, പാലക്കാട് ബാര്‍ അസോസിയേഷന്‍ പ്രസിഡന്‍റ് അഡ്വ. രവികുമാര്‍, വിദ്യാര്‍ഥി പ്രതിനിധികളായ സാന്ദ്ര, ഹരിദാസ് എന്നിവര്‍ പ്രസംഗിച്ചു. എല്‍എല്‍ബി പരീക്ഷയില്‍ കഴിഞ്ഞ വര്‍ഷം റാങ്ക് നേടിയ ആര്‍. ജ്യോതിയെ ചടങ്ങില്‍ ആദരിച്ചു. പ്രിന്‍സിപ്പൽ ഡോ. സോണി വിജയന്‍ സ്വാഗതവും അസിസ്റ്റന്‍റ് പ്രഫസര്‍ കെ. കരിസ്മ നന്ദിയും പറഞ്ഞു.

ഹൈസ്‌കൂള്‍ അധ്യാപകര്‍ക്കായി സംസ്ഥാന ബാലാവകാശ കമ്മീഷന്‍റെ പരിശീലനം

പാലക്കാട്: സംസ്ഥാന ബാലാവകാശ കമ്മീഷന്‍ സംഘടിപ്പിക്കുന്ന ഹൈസ്‌കൂള്‍ അധ്യാപകര്‍ക്കുള്ള ഏകദിന പരിശീലനം കൊടുമ്പ് പഞ്ചായത്തിലെ കനല്‍ കമ്മ്യൂണിറ്റി ഹാളില്‍ നടന്നു. പരിശീലനത്തിന്‍റെ ജില്ലാതല ഉദ്ഘാടനം ബാലാവകാശ സംരക്ഷണ കമ്മീഷന്‍ അംഗം ടി.സി. ജലജമോള്‍ നിര്‍വഹിച്ചു. ബാലാവകാശ കമ്മീഷന്‍ അംഗം കെ.കെ. ഷാജു, സൈക്യാട്രിസ്റ്റ് സ്റ്റെല്ല കുര്യന്‍, സൈബര്‍ വിംഗ് സബ്ഇന്‍സ്പെക്ടര്‍ അറുമുഖന്‍ എന്നിവര്‍ ക്ലാസുകളെടുത്തു. സംസ്ഥാന വ്യാപകമായി നല്‍കുന്ന പരിശീലനത്തിന്‍റെ ഒന്നാംഘട്ടത്തിനാണ് ജില്ലയില്‍ തുടക്കമായത്. പാലക്കാട് ജില്ലാ വിദ്യാഭ്യാസ ഓഫീസര്‍ ആസിഫ് അലിയാര്‍ അധ്യക്ഷനായ പരിപാടിയില്‍ ജില്ലാ ശിശുസംരക്ഷണ ഓഫീസര്‍ ആര്‍. രമ, ബാലാവകാശ സംരക്ഷണ കമ്മീഷന്‍ അംഗം സിസിലി ജോസഫ്, അധ്യാപകര്‍, മറ്റുദ്യോഗസ്ഥര്‍ എന്നിവര്‍ പങ്കെടുത്തു.

താലൂക്ക് ആശുപത്രി നിയമനങ്ങൾക്കെതിരേ പ്രതിഷേധവുമായി യുവജനതാദൾ-എസ്

ചിറ്റൂർ: താലൂക്ക് ആശുപത്രിയിലെ വിവിധ തസ്തികകളിലേക്കുള്ള ഇന്‍റർവ്യൂ ലിസ്റ്റ് അട്ടിമറിക്കാനുള്ള രാഷ്ട്രീയ നീക്കത്തിനെതിരേ യുവജനതാദൾ- എസ്. പരാതിയുമായി രംഗത്ത്. ആശുപത്രി സൂപ്രണ്ടിനെ നേരിൽകണ്ട് പ്രതിഷേധം അറിയിച്ചു. നിലവിൽ സ്റ്റാഫ് നഴ്സ് , റേഡിയോഗ്രാഫർ, ലാബ് ടെക്നീഷ്യൻ, ഫാർമസിസ്റ്റ്, ഇസിജി ടെക്നീഷ്യൻ, എച്ച്എംസി ക്ലാർക്ക്, ഡാറ്റാ എൻട്രി ഓപ്പറേറ്റർ എന്നീ തസ്തികകളിലേക്കാണ് ഇന്‍റർവ്യൂ നടന്നീട്ടുള്ളത്. അർഹരായവരെ ഒഴിവാക്കി ഇഷ്ടക്കാരെ തിരുകിക്കയറ്റാനുള്ള നീക്കമാണ് ഇന്‍റർവ്യൂ ബോർഡിലെ ചിലർ നടത്തുന്നതെന്നും അത്തരത്തിൽ നിയമനം നടത്തിയാൽ നിയമപരമായും സംഘടനാപരമായും നേരിടുമെന്നും ആശുപത്രി സൂപ്രണ്ടിനെ സമരക്കാർ അറിയിച്ചു. മുഖ്യമന്ത്രി, ആരോഗ്യമന്ത്രി, സ്ഥലം എംഎൽഎയും മന്ത്രിയുമായ കെ. കൃഷ്ണൻകുട്ടി, ജില്ലാ കളക്ടർ, ഡിഎംഒ എന്നിവർക്കു പരാതി നൽകിയതായും അറിയിച്ചു. യുവജനതാദൾ- എസ് ജില്ലാ പ്രസിഡന്‍റ് വിജീഷ് കണ്ണികണ്ടത്തിന്‍റെ നേതൃത്വത്തിൽ നേതാക്കളായ ജാസിർ ഹുസൈൻ, ശ്യാമപ്രസാദ് പാർത്ഥസാരഥി, എം. ബിനു, എസ്. മനുപ്രസാദ്, എസ്. സുകേഷ്, നവനീത് എന്നിവരാണ് ആശുപത്രി സൂപ്രണ്ടിനെ പരാതി അറിയിച്ചത്.

മേഴ്‌സി കോളജിൽ അര്‍ണോസ് പാതിരി ചെയർ തുടങ്ങി

പാലക്കാട്: മേഴ്‌സി കോളജിൽ അര്‍ണോസ് പാതിരി ചെയർ ഉദ്ഘാടനം നടന്നു. അർണോസ് പാതിരി അക്കാദമി ഡയറക്ടർ ഫാ. ജോർജ് ജോസഫ് തേനാടിക്കുളം ചെയറിന്‍റെ ഉദ്ഘാടനം നിർവഹിച്ചു. കോളജ് പ്രിൻസിപ്പൽ സിസ്റ്റർ ഡോ. എൻ.എം. ലവ്‌ലി അധ്യക്ഷയായിരുന്നു. ഗവ. വിക്ടോറിയ കോളജ് മലയാളം അധ്യാപിക ഡോ. സുഷമകുമാരി മുഖ്യപ്രഭാഷണം നടത്തി. സിസ്റ്റർ ജിൽസ തെരേസ്, സിസ്റ്റർ പ്രഭ തെരേസ്, ഫാ. ജോസ് തച്ചിൽ, ഇ.ടി. ഷൈനി എന്നിവർ സംസാരിച്ചു. മലയാളഭാഷയ്ക്ക് മികച്ച സംഭാവനകൾ നൽകിയ ജർമൻ മിഷണറിയായ അർണോസ് പാതിരിയുടെ പേരിൽ ആരംഭിക്കുന്ന പഠനഗവേഷണ ഉദ്യമത്തിലൂടെ അക്കാദമികവും അല്ലാത്തതുമായ പ്രവർത്തനങ്ങളാണ് ലക്ഷ്യംവച്ചിരിക്കുന്നത്.

തൃത്താല ഓണം കാര്‍ഷികോത്സവം സെപ്റ്റംബര്‍ ഒന്നുമുതല്‍ മൂന്നുവരെ

തൃത്താല: മണ്ഡലത്തിലെ ഓണം ജനകീയ കാര്‍ഷികോത്സവം സെപ്തംബര്‍ ഒന്നുമുതല്‍ മൂന്നുവരെ നടക്കും. മണ്ഡലത്തിലെ സമഗ്ര വികസനം ലക്ഷ്യമിട്ട് മന്ത്രി എം. ബി. രാജേഷ് നടപ്പാക്കുന്ന സുസ്ഥിര തൃത്താല പദ്ധതിയുടെ ഭാഗമായാണ് കാര്‍ഷികോത്സവം സംഘടിപ്പിക്കുന്നത്. ഓണവിപണി ലക്ഷ്യമിട്ട് 160 ഏക്കര്‍ സ്ഥലത്ത് നടത്തിയ പച്ചക്കറിയും കിഴങ്ങു വിളകളും പൂക്കളുമെല്ലാം ഓണ വിപണിയ്ക്ക് തയാറായി. കര്‍ഷകരില്‍നിന്ന് 20 ശതമാനം അധിക വിലയ്ക്ക് പച്ചക്കറികള്‍ സംഭരിച്ച് 30 ശതമാനം കുറഞ്ഞ വിലയ്ക്ക് വിപണനം നടത്തുമെന്നതാണ് കാര്‍ഷികോത്സവത്തിന്‍റെ പ്രത്യേകത. മണ്ഡലത്തിലെ എല്ലാ തരിശു ഭൂമിയെയും കൃഷിയോഗ്യമാക്കി തൃത്താലയിലെ ജനങ്ങള്‍ക്ക് ആവശ്യമായ പച്ചക്കറി കൃഷിചെയ്യാനും പച്ചക്കറിക്കൃഷിയില്‍ സ്വയം പര്യാപ്തത നേടാനുമാണ് പദ്ധതി ലക്ഷ്യമിടുന്നത്. കൂടാതെ ഓണക്കിറ്റ് പദ്ധതിയും കാര്‍ണിവലിന്‍റെ ഭാഗമായുണ്ടാകും. കുടുംബശ്രീ പ്രവര്‍ത്തകരെ ഉള്‍പ്പെടുത്തിയാണ് വിഭവങ്ങള്‍ തയാറാക്കുക. പ്രദര്‍ശന വിപണനമേള, കാര്‍ഷിക പ്രദര്‍ശനം, കാര്‍ഷിക സംരംഭകരുടെയും പ്രൊഫഷണലുകളുടെയും സംഗമം, കാര്‍ഷിക സാഹിത്യോത്സവം, പുസ്തകോത്സവം, കാര്‍ഷിക സെമിനാറുകള്‍, സംവാദങ്ങള്‍, പ്രാദേശിക കാര്‍ഷിക തനതുസാംസ്‌കാരിക പരിപാടികള്‍ എന്നിവയും സംഘടിപ്പിക്കും.

വീടുകളിലെത്തി രോഗികളുടെ ആവശ്യങ്ങൾ ചോദിച്ചറിഞ്ഞ് സി.കെ. രാജേന്ദ്രനും സംഘവും

വടക്കഞ്ചേരി: വീടുകളിൽ രോഗികളായി കഴിയുന്നവരെ നേരിട്ടുകണ്ട് ആവശ്യങ്ങൾ അന്വേഷിച്ച് സിപിഎം സംസ്ഥാന കമ്മിറ്റി അംഗവും മുൻ എംഎൽഎയുമായ സി.കെ. രാജേന്ദ്രനും പാർട്ടി പ്രവർത്തകരും. കിഴക്കഞ്ചേരി പഞ്ചായത്തിലെ വടക്കത്തറ, കിഴക്കഞ്ചേരി എന്നീ വാർഡുകളിൽ രോഗികളായി കഴിയുന്നവരുടെ വീടുകളിൽകയറി രോഗിയിൽ നിന്നും വിവരങ്ങൾ നേരിട്ടറിഞ്ഞായിരുന്നു സന്ദർശനങ്ങളുടെ തുടക്കം. ഒരുവാർഡിൽതന്നെ ശരാശരി 25 ൽ കൂടുതൽപേർ വീടുകളിൽ രോഗികളായി കഴിയുന്നവരുണ്ട്. ഇവർക്കെല്ലാം പാലിയേറ്റീവ് കെയർ ആവശ്യമുള്ളവരാണ്. രോഗികളുടെ ആവശ്യമനുസരിച്ച് വിവിധയിനം ബെഡുകളും വീൽചെയറുകൾ, വാക്കറുകൾ തുടങ്ങിയവ വാർഡുകളിലെ ഇഎംഎസ് പാലിയേറ്റീവ് ട്രസ്റ്റിന്‍റെ നേതൃത്വത്തിൽ നൽകിവരുന്നുണ്ട്. കൂടുതലായി എന്തെങ്കിലും ആവശ്യമുള്ളവർക്ക് അതുകൂടി ലഭ്യമാക്കാൻ നടപടി സ്വീകരിക്കുമെന്ന് ഉറപ്പുനൽകിയാണ് സി.കെ. രാജേന്ദ്രൻ നേതൃത്വത്തിലുള്ള കൂട്ടായ്മയുടെ സന്ദർശനം നടക്കുന്നത്. എൻ. രാമകൃഷ്ണൻ, റോബിൻ പൊന്മല , എം. അശോകൻ, സുദേവൻ, വി. സുരേഷ്, ലക്ഷ്മി എന്നിവരും ഭവന സന്ദർശനത്തിനുണ്ടായിരുന്നു.

മംഗലംഡാം ടൗൺ- 35 റോഡിന്‍റെ റീ ടാറിംഗ് പ്രവൃത്തികൾ തുടങ്ങി

മംഗലംഡാം: വഴി നടക്കാനാകാത്ത വിധം തകർന്നു കിടന്നിരുന്ന മംഗലംഡാം ടൗണിലെ 35 എന്ന പ്രദേശത്തേക്കുള്ള റോഡിന്‍റെ റീ ടാറിംഗ് വർക്കുകൾ തുടങ്ങി. ഇതിന്‍റെ ഭാഗമായി ആദ്യഘട്ട മെറ്റൽ വിരിച്ച് റോഡ് ബലപ്പെടുത്തുന്ന പണികളാണ് നടക്കുന്നത്. മഴക്കാലം മാറുന്നതോടെ ടാറിംഗ് നടത്തുമെന്നു അധികൃതർ പറഞ്ഞു. ഒരു പതിറ്റാണ്ടിലേറെയായി തകർന്നു കിടക്കുന്ന റോഡാണിത്. മംഗലംഡാം ഉദ്യാനത്തിലേക്കുള്ള പ്രവേശ കവാടത്തിനോടു ചേർന്നുള്ള ഇടുങ്ങിയ വഴിയിലൂടെ തുടങ്ങുന്നതാണ് കഷ്ടി ഒരുകിലോമീറ്റർ ദൂരമുള്ള ഈ റോഡ്. എഴുപതോളം വീടുകളുണ്ട് ഈ പ്രദേശത്ത്. ഇറിഗേഷൻ വകുപ്പിനു കീഴിലുള്ളതാണ് റോഡ്. യഥാസമയം ടാറിംഗ് നടത്താതിരുന്നതിനാൽ ടാറിംഗിന്‍റെ ശേഷിപ്പുകൾ മാത്രമെ റോഡിലുണ്ടായിരുന്നുള്ളു. മംഗലംഡാം കമ്മീഷൻ ചെയ്തതുമുതൽ 70 വർഷത്തോളമായി പ്രദേശത്തേക്കുള്ള വഴിയും ഇതാണ്. സിസ്റ്റേഴ്സിന്‍റെ കോൺവന്‍റ് ഉൾപ്പെടെ തിങ്ങിനിറഞ്ഞ് വീടുകളുണ്ട് 35 പ്രദേശത്ത്. വീടുകൾക്കു മുന്നിലുള്ള ഇറിഗേഷൻ ഭൂപ്രദേശങ്ങൾ പൊന്തക്കാടായി കിടക്കുന്നതിനാൽ പ്രദേശം മുഴുവൻ പന്നിക്കൂട്ടങ്ങൾ കൈയടക്കിയ നിലയിലാണിപ്പോൾ. ആളുകൾ മാലിന്യം തള്ളുന്നതും പഴയകാലത്ത് പൂന്തോട്ടങ്ങൾ നിറഞ്ഞ സ്ഥലങ്ങളിലാണ്. റോഡ് ഗതാഗതയോഗ്യമാക്കുന്നതിനൊപ്പം അപകട ഭീഷണിയായി നിൽക്കുന്ന വഴിയിലെ വൻമരങ്ങൾ മുറിച്ചുമാറ്റി ഭീതിയില്ലാതെ നടന്നു പോകാൻ സൗകര്യമുണ്ടാക്കണമെന്നും 35 ലെ വീട്ടുകാർ ആവശ്യപ്പെട്ടു.

ഗായത്രിപ്പുഴയിൽ ഒഴുക്കിൽപ്പെട്ടയാളുടെ മൃതദേഹം കണ്ടെത്തി

ആലത്തൂർ: ഗായത്രിപ്പുഴയിലെ കൂളിയാടുകടവ് പാലത്തിനുസമീപം ഒഴുക്കിൽപ്പെട്ടയാളുടെ മൃതദേഹം ആലത്തൂർ എടാംപറന്പ് തടയണയ്ക്കു സമീപത്തുനിന്ന് കണ്ടെടുത്തു. കുനിശേരി മലക്കാട്ടുകുന്നിൽ പരേതനായ ചാത്തേലന്‍റെ മകൻ ലക്ഷ്മണന്‍റെ (44) മൃതദേഹമാണു കണ്ടെടുത്തത്. പാലക്കാട് ജില്ലാ ആശുപത്രിയിൽ പോസ്റ്റ്മോർട്ടത്തിനുശേഷം മൃതദേഹം തിരുവില്വാമല ഐവർമഠത്തിൽ സംസ്കരിച്ചു. കെട്ടിട നിർമാണത്തൊഴിലാളിയായ ലക്ഷ്മണൻ അവിവാഹിതനാണ്. അമ്മ: കുഞ്ചി. സഹോദരങ്ങൾ: രാമൻകുട്ടി, കൃഷ്ണൻകുട്ടി, കമലം, ശാന്ത, ദേവകി, സീത. ഇന്നലെ രാവിലെ ഏഴരയോടെ കണ്ടെത്തിയ മൃതദേഹം നാട്ടുകാർ കരയ്ക്കടുപ്പിക്കുകയായിരുന്നു. തുടർന്ന് പോലീസെത്തി മൃതദേഹം തിരിച്ചറിഞ്ഞ് തുടർനടപടികൾ സ്വീകരിച്ചു. ഞായറാഴ്ച രാവിലെ ഏഴരയോടെ സുഹൃത്തുക്കളോടൊപ്പം മീൻപിടിക്കാനെത്തിയ ലക്ഷ്മണൻ പുഴയിലൂടെ ഒഴുകിവന്ന തേങ്ങ എടുക്കാൻ ശ്രമിക്കുന്നതിനിടെ ഒഴുക്കിൽപ്പെടുകയായിരുന്നു.

സമുദായ അംഗങ്ങൾ രാഷ്ട്രീയത്തിൽ ഇടപെടാൻ തയാറാകണം: കത്തോലിക്ക കോൺഗ്രസ്

കല്ലടിക്കോട്: കത്തോലിക്ക സമുദായഅംഗങ്ങൾ രാഷ്ട്രീയത്തിൽ സജീവമായി ഇടപെടാൻ തയ്യാറാകണമെന്ന് കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് രാജീവ് കൊച്ചുപറമ്പിൽ പറഞ്ഞു. കേരളത്തിലെ തദ്ദേശ സ്വയംഭരണ സ്ഥാപനങ്ങളിലേക്ക് ഈ വർഷം നടക്കാൻ പോകുന്ന തെരഞ്ഞെടുപ്പിൽ ജനങ്ങളെ നിസ്വാർഥമായി സേവിച്ചുകൊണ്ടിരിക്കുന്ന സമുദായഅംഗങ്ങളെ കണ്ടെത്തി അവരെ വിവിധ രാഷ്ട്രീയപാർട്ടികളുടെ അംഗീകാരത്തോടെ മത്സരിപ്പിച്ച് വിജയിപ്പിക്കാൻ സമുദായ അംഗങ്ങൾ തയ്യാറാകണമെന്നും അദ്ദേഹം ആവശ്യപ്പെട്ടു. രൂപതയിലെ കത്തോലിക്ക കോൺഗ്രസ് നേതാക്കൾക്ക് തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന് ഒരുക്കമായുള്ള രൂപതാതല പരിശീലനശില്പശാല "സജ്ജം 2025’ പൊന്നംകോട് സെന്‍റ് ആന്‍റണീസ് ഫൊറോന പള്ളി പാരിഷ്ഹാളിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കത്തോലിക്ക കോൺഗ്രസ് ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, പീറ്റർ എൻ. രാജ് എന്നിവർ ക്ലാസ് എടുത്തു. രൂപതയിലെ 6 ഫൊറോനകളിൽ നിന്നുള്ള കത്തോലിക്ക കോൺഗ്രസ് നേതാക്കൾ ശില്പശാലയിൽ പങ്കെടുത്തു. പൊതുസമ്മേളനത്തിൽ കത്തോലിക്ക കോൺഗ്രസ് രൂപത പ്രസിഡന്‍റ് ബോബി പൂവത്തിങ്കൽ അധ്യക്ഷത വഹിച്ചു. കത്തോലിക്ക കോൺഗ്രസ് രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, ഫൊറോന വികാരി ഫാ. മാർട്ടിൻ കളമ്പാടൻ, ഗ്ലോബൽ ജനറൽസെക്രട്ടറി ജോസുകുട്ടി ഒഴുകയിൽ, ആന്‍റണി കുറ്റിക്കാടൻ, ബെന്നി ചിറ്റേട്ട്, ഗ്ലോബൽ വൈസ് പ്രസിഡന്‍റുമാരായ തോമസ് ആന്‍റണി , ട്രീസ ലിസ് സെബാസ്റ്റ്യൻ, ബെന്നി ആന്‍റണി , ജോസ് വടക്കേകര, ജോസ് മുക്കട, ജോമി മാളിയക്കൽ എന്നിവർ പ്രസംഗിച്ചു.

വിക്ടോറിയ കോളജിൽ പ്രൊട്ടക്‌ഷൻ ഗ്രൂപ്പ് പ്രവർത്തനം തുടങ്ങി

പാലക്കാട്: ഗവ. വിക്ടോറിയ കോളജിൽ കോളജ് പ്രൊട്ടക്‌ഷൻ ഗ്രൂപ്പ് പ്രവർത്തനം ആരംഭിച്ചു. ടൗൺ നോർത്ത് പോലീസ് ഇൻസ്പെക്ടർ വിപിൻ കെ. വേണുഗോപാൽ ഉദ്ഘാടനം ചെയ്തു. കോളജ് പ്രിൻസിപ്പൽ എസ്.എൽ. സിന്ധു അധ്യക്ഷത വഹിച്ചു. പിടിഎ വൈസ് പ്രസിഡന്‍റ് ഡോ . മാത്യു കല്ലടിക്കോട്, പ്രൊട്ടക്ഷൻ ഗ്രൂപ്പ് നോഡൽ ഓഫീസർ സുധീർ, സബ് ഇൻസ്പെക്ടർ വാസുദേവൻ ഉണ്ണി, പ്രൊട്ടക്ഷൻ ഗ്രൂപ്പ് ജോയിന്‍റ് കൺവീനർ എ. യേശുദാസൻ എന്നിവർ പ്രസംഗിച്ചു. കുട്ടികളിൽ സുരക്ഷിതത്വബോധം വർധിപ്പിക്കാനും ആവശ്യമായ സഹായങ്ങൾ നൽകുന്നതിന് വേണ്ടിയാണ് പ്രൊട്ടക്ഷൻ ഗ്രൂപ്പ് രൂപീകരിച്ചിട്ടുള്ളത്.

റോഡിൽ ഇറങ്ങുന്ന ആട്ടിൻകൂട്ടം ഗതാഗതക്കുരുക്കുണ്ടാക്കുന്നു

പുതുനഗരം: പെരുവെമ്പ് പാതയിൽ ആട്ടിൻകൂട്ടം റോഡിലൂടെ നടക്കുന്നത് വാഹന സഞ്ചാരത്തിനു അപകടഭീഷണിയാകുന്നു. ഒരു ഡസൻ ആടുകളാണ് പാലക്കാട് പാതയിലുള്ള പെട്രോൾ പമ്പിനു സമീപം തലങ്ങും വിലങ്ങും ഓടുന്നത്. ആടുകൾ റോഡിൽ നിന്നും മാറാൻ വലിയ വാഹനങ്ങൾ ഹോൺ മുഴക്കിയാൽ ഇവ പരക്കംപായും. ഇത് ഇരുചക്രവാഹന യാത്രക്കാർക്ക് അപകടം സൃഷ്ടിക്കും. ആടിന്‍റെ ഉടമ വൈകുന്നേരത്താണ് സ്ഥലത്തെത്തി തിരിച്ചുകൊണ്ടുപോവുന്നത്. വാഹനങ്ങൾ ഇടിച്ച് ആടുകൾക്ക് പരിക്കുപറ്റിയിൽ നഷ്ടപരിഹാരവും കൊടുക്കേണ്ടിവരും. വിവരം പോലീസ് അധികൃതരെ അറിയിച്ചാലും തിരിഞ്ഞുനോക്കാറില്ലെന്നാണ് പരാതി. റോഡുകളിൽ ആടുകളേയും പശുക്കളേയും അഴിച്ചുവിടുന്നവർക്കെതിരെ പിഴയടക്കമുള്ളനടപടിയെടുക്കണമെന്നാണ് യാത്രക്കാരുടെ ആവശ്യം.

കെ.കെ. കുഞ്ഞുമോൻ അനുസ്മരണസമ്മേളനം

നെന്മാറ: നെന്മാറയിലെ രാഷ്ട്രീയ നേതാവായും ജനപ്രതിനിധിയായും സഹകാരിയായും പതിറ്റാണ്ടുകൾ പ്രവർത്തിച്ച കെ.കെ. കുഞ്ഞുമോൻ അഞ്ചാം ചരമവാർഷിക അനുസ്മരണ സമ്മേളനം രാഹുൽ മാങ്കൂട്ടത്തിൽ എംഎൽഎ ഉദ്ഘാടനം ചെയ്തു. ചടങ്ങിൽ സംസ്ഥാന സർക്കാരിന്‍റെ കർഷക മിത്ര അവാർഡ് നേടിയ എലവഞ്ചേരിയിലെ ആർ. ശിവദാസിനെ ആദരിച്ചു. വിവിധ രോഗികൾക്ക് ചികിത്സാസഹായ വിതരണം നടത്തി. കെ.കെ. കുഞ്ഞുമോൻ സ്മാരക സമിതി നെന്മാറയുടെ നേതൃത്വത്തിലായിരുന്നു പരിപാടി സംഘടിപ്പിച്ചത്. എസ്.എം. ഷാജഹാൻ അധ്യക്ഷത വഹിച്ചു. കെപിസിസി ജനറൽസെക്രട്ടറി സി. ചന്ദ്രൻ മുഖ്യാതിഥിയായി. യൂത്ത് കോൺഗ്രസ് ജില്ലാ പ്രസിഡന്‍റ് കെ.എസ്. ജയഘോഷ്, ഡിസിസി ജനറൽ സെക്രട്ടറിമാരായ കെ.ജി. എൽദോ, എം. പദ്മഗിരീശൻ, അഡ്വ. കെ.കെ. അൻഷിൻ, കൊല്ലങ്കോട് ബ്ലോക്ക് കോൺഗ്രസ് പ്രസിഡന്‍റ് കെ. ഗുരുവായൂരപ്പൻ, കെ.വി. ഗോപാലകൃഷ്ണൻ, പി. പി. ശിവപ്രസാദ്, പ്രബിത ജയൻ, പ്രദീപ് നെന്മാറ, കെ. കുഞ്ഞൻ, എം. ദേവൻ, സി. വിഷ്ണു, വിനീഷ് കരിമ്പാറ, എ. മോഹനൻ, എം. ഷാജു, എൻ. സോമൻ, ആർ. വേലായുധൻ, എ. യൂസഫ്, മുരളീധരൻ കൊടുവായൂർ, രാജേഷ് നെന്മാറ, കെ.യു. ഫിറോസ് തുടങ്ങിയവർ പ്രസംഗിച്ചു.

കുന്ദംകാട്ടുപതിയിൽ മോട്ടോർ തകരാറിലായി; കുടിവെള്ളവിതരണം നിലച്ചു

വണ്ടിത്താവളം: കേരള വാട്ടർ അഥോറിറ്റി ജലവിതരണം നിലച്ചതോടെ ആയിരക്കണക്കിനു കുടുംബങ്ങൾ കുടിവെള്ളം ലഭിക്കാതെ വലഞ്ഞു. കുന്ദംകാട്ടുപതി ജലസംഭരണി ശുദ്ധീകരണശാലയിലെ മോട്ടോർ തകരാറിലായതാണ് പമ്പിംഗ് നിലച്ചത്. പട്ടഞ്ചേരി - പെരുമാട്ടി പഞ്ചായത്ത് പ്രദേശങ്ങളിലെ ഹോട്ടൽ ഉൾപ്പെടെ വ്യാപാര സ്ഥാപനങ്ങൾക്കും കുടിവെള്ള സംഭരണത്തിനായി വാഹനങ്ങളിൽ ദൂരെ ദിക്കുകളിൽ പോവേണ്ടതായി വന്നു. പമ്പിംഗ് സ്റ്റേഷനിൽ ഇടയ്ക്കിടെ യന്ത്രതകരാറുണ്ടാകുന്നത് താമസക്കാർക്ക് ഏറെ വിഷമകരമായിരിക്കുകയാണ്. മിക്ക വീടുകളിലും പൈപ്പ്കണക്ഷൻ ലഭിച്ചതിനാൽ കുടിവെള്ള ശേഖരണത്തിനായി കിണറുകളേയോ മറ്റു ജലസംഭരണികളയോ ആശ്രയിക്കാറില്ല. തകരാറിലായ മോട്ടോർ ശരിപ്പെടുത്തുന്ന ജോലികൾ പുരോഗമിച്ചുവരുന്നതിനാൽ ഇന്നുരാവിലെമുതൽ ജലവിതരണം പുനരാംരംഭിക്കാനാവുമെന്ന് ചിറ്റൂർ വാട്ടർ അഥോറിറ്റി അധികൃതർ അറിയിച്ചു.

കല്ലടിക്കോട് കുടുംബാരോഗ്യകേന്ദ്രത്തിന് ദേശീയ അംഗീകാരം

കല്ലടിക്കോട്: കരിമ്പ ഗ്രാമപഞ്ചായത്ത് കല്ലടിക്കോട് കുടുംബാരോഗ്യ കേന്ദ്രം വീണ്ടും ദേശീയ ഗുണനിലവാര അംഗീകാരത്തിന്‍റെ നിറവിൽ. സംസ്ഥാനത്തെ 5 ആരോഗ്യ സ്ഥാപനങ്ങൾക്ക് കൂടി ദേശീയ ഗുണനിലവാരം അംഗീകരിച്ച കൂട്ടത്തിലാണ് 90.6% മാർക്ക് നേടി കല്ലടിക്കോട് കുടുംബാരോഗ്യ കേന്ദ്രവും ഉൾപ്പെട്ടിട്ടുള്ളത്. 2020 ൽ ലഭിച്ച അംഗീകാരം ദേശീയസംഘം പുന:പരിശോധന നടത്തിയതിലാണ് ഇപ്പോഴുള്ള ഈ അംഗീകാരം. 2 ലക്ഷം രൂപ പാരിതോഷികമായി ലഭിക്കും. ആശുപത്രിയിലെ ഭൗതിക സൗകര്യങ്ങൾ, രോഗികൾക്ക് നൽകുന്ന സേവനങ്ങൾ, ഫീൽഡ് തല പ്രവർത്തനങ്ങൾ, ആരോഗ്യ പരിപാടികൾ തുടങ്ങിയവ ദേശീയ ആരോഗ്യ വകുപ്പിന്‍റെ മാനദണ്ഡങ്ങൾക്ക് അനുസരിച്ച് പ്രവർത്തിക്കുന്ന സ്ഥാപനങ്ങൾക്കാണ് നാഷണൽ ക്വാളിറ്റി അഷ്വറൻസ് സ്റ്റാൻഡേർഡ്സ് (എൻക്യുഎഎസ്) അംഗീകാരം ലഭിക്കുന്നത്. ഒപി വിഭാഗം, ജനറൽ അഡ്മിനിസ്ട്രേഷൻ, ലാബോറട്ടറി, ഫാർമസി, ദേശീയ ആരോഗ്യപരിപാടികൾ, മാതൃ-ശിശു ആരോഗ്യസംരക്ഷണം തുടങ്ങി വിവിധ വിഭാഗങ്ങളിലാണ് പരിശോധന നടത്തിയത്. രോഗീപരിചരണം, രോഗികൾക്ക് ആവശ്യമായ മികച്ച സൗകര്യങ്ങൾ ഒരുക്കൽ, ശുചിത്വം, മാലിന്യ നിർമാർജനം, ഉപകരണങ്ങളുടെ കാര്യക്ഷമത, മരുന്നുകളുടെ ലഭ്യതയും വിതരണവും, അണുബാധ നിയന്ത്രണം, ആശുപത്രി പരിപാലനം, ദേശീയ ആരോഗ്യ പരിപാടികൾ നടപ്പിലാക്കൽ തുടങ്ങിയവ നേരിട്ട് നിരീക്ഷിച്ചും രോഗികളുമായും ജീവനക്കാരുമായും കൂടിക്കാഴ്ച നടത്തിയുമാണ് ഗുണനിലവാര പരിശോധന നടത്തിയത്. ദിനംപ്രതി മുന്നൂറോളം പേർ ചികിത്സക്കായി ആശ്രയിക്കുന്ന കല്ലടിക്കോട് കുടുംബാരോഗ്യ കേന്ദ്രത്തിൽ വൈകുന്നേരം ആറുവരെ ഡോക്ടർമാരുടെ സേവനം ലഭ്യമാണ്. കൂടാതെ ജനകീയ ആസൂത്രണ പദ്ധതിയുടെ ഭാഗമായി ഫിസിയോതെറാപ്പി സെന്‍റർ, പകൽവീട്, വനിതാ ജിംനേഷ്യം, യോഗ ക്ലാസുകൾ തുടങ്ങിയവ ആശുപത്രിയോട് അനുബന്ധമായി പ്രവർത്തിച്ചു വരുന്നു. 108 ആംബുലൻസ് സൗകര്യവും, പാലിയേറ്റീവ് പ്രവർത്തനങ്ങൾക്ക് സ്വന്തമായ വാഹനവും ലഭ്യമാണ്. പൊതുജനാരോഗ്യ പ്രവർത്തന രംഗത്ത് സജീവമായി ഇടപെടുന്ന കുടുംബാരോഗ്യ കേന്ദ്രത്തിന് മുൻവർഷങ്ങളിലും കായകൽപ് അവാർഡ്, ആർദ്ര കേരളം പുരസ്കാരം തുടങ്ങിയവ ലഭിച്ചിട്ടുണ്ട്. ഭരണസമിതിയുടേയും ആശുപത്രി ജീവനക്കാരുടേയും ഒരുമിച്ചുള്ള പ്രവർത്തനമാണ് അംഗീകാരം നേടാൻ കാരണമായതെന്ന് ഗ്രാമപഞ്ചായത്ത് പ്രസിഡന്‍റ് പി.എസ്.രാമചന്ദ്രൻ മാസ്റ്റർ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എച്ച്. ജാഫർ, മെഡിക്കൽ ഓഫീസർ ഡോ. ഹണി റോസ് തോമസ്, അസി.സർജൻ ഡോ.ജിനു എൽ. തോമസ് എന്നിവർ പറഞ്ഞു.

സ്മൈൽ ഭവനപദ്ധതി വീടുകളുടെ തറക്കല്ലിടൽ നടത്തി

പാലക്കാട്: രാഹുൽ മാങ്കൂട്ടത്തിൽ എംഎൽഎ യും ഇൻഡൽ മണിയും ചേർന്ന് ഒരുക്കുന്ന ഭവനപദ്ധതി സ്മൈലിന്‍റെ ആദ്യഘട്ടത്തിൽ 20 വീടുകൾ നിർമിച്ചുനൽകും. 575 ചതുരശ്രഅടി വരെയുള്ള വീടുകളാണ് നിർമിച്ചു നൽകുന്നത്. ആദ്യഘട്ടത്തിൽ 5 വീടുകളുടെ തറക്കല്ലിടൽ കർമം നിർവഹിച്ചു. ചലച്ചിത്രതാരം ആസിഫ് അലി തറക്കല്ലിടൽ ഉദ്ഘാടനം ചെയ്തു. മാത്തൂർ പഞ്ചായത്തിലെ കിഴക്കേക്കരയിലുള്ള സുകന്യക്കും കുടുംബത്തിനും നൽകുന്ന വീടിന്‍റെ തറക്കല്ലിടലാണ് ഉദ്ഘാടനം ചെയ്തത്. കണ്ണാടിയിൽ ഇന്‍റൽ ഗ്രൂപ്പ് ചെയർമാൻ മോഹനൻ ഗോപാലകൃഷ്ണനും മാത്തൂർ ഇടക്കാട്ടുപടിയിൽ രാഹുൽ മാങ്കൂട്ടത്തിൽ എംഎൽഎ യും പിരായിരി മോഴിപുലത്ത് എസ്പി രാജേഷ് കുമാറും തിരുനെല്ലായിൽ വി.കെ. ശ്രീകണ്ഠൻ എംപി ഓൺലൈനായും വീടുകളുടെ തറക്കല്ലിടൽ നടത്തി. ജനുവരിയിൽ താക്കോൽ കൈമാറുവാൻ ആണ് ലക്ഷ്യമിടുന്നതെന്ന് എംഎൽഎ പറഞ്ഞു. പാലക്കാട് നിയോജകമണ്ഡലം പരിധിയിൽ താമസിക്കുന്നവർക്കാണ് വീട് നൽകുന്നത്.

കത്തോലിക്ക കോൺഗ്രസ് വഞ്ചനദിനാചരണം

മംഗലംഡാം: കാർഷിക മേഖലയോടും കർഷകരോടുമുള്ള കേന്ദ്ര, സംസ്ഥാന സർക്കാരുകളുടെ അവഗണയിൽ പ്രതിഷേധിച്ച് കത്തോലിക്ക കോൺഗ്രസ് ചിങ്ങംഒന്ന് കർഷക വഞ്ചനാദിനമായി ആചരിച്ചു. സംഭരിക്കുന്ന നെല്ലിന്‍റെ വില യഥാസമയം നൽകാതെ കർഷകരെ കടക്കെണിയിലാക്കുന്നതിനെതിരേയും വന്യമൃഗശല്യത്തിനു ശാശ്വത പരിഹാരം കണ്ടെത്താത്തതിലുമായിരുന്നു പ്രതിഷേധം. മംഗലംഡാമിൽ കത്തോലിക്ക കോൺഗ്രസ്‌ ഫൊറോന സമിതി പന്തംകൊളുത്തി പ്രകടനവും പ്രതിഷേധ പൊതുയോഗവും നടത്തി. ഗ്ലോബൽ സെക്രട്ടറി ഡെന്നി തെങ്ങുംപള്ളി ഉദ്ഘാടനം ചെയ്തു. ഫൊറോന പ്രസിഡന്‍റ് ബെന്നി ജോസഫ് മറ്റപ്പള്ളിൽ അധ്യക്ഷത വഹിച്ചു. ഫൊറോന വികാരി ഫാ. സുമേഷ് നാല്പതാംകളം മുഖ്യപ്രഭാഷണം നടത്തി. ഗ്ലോബൽ സമിതിഅംഗം ജിജോ അറക്കൽ, രൂപത സെക്രട്ടറി സേവ്യർ കലങ്ങോട്ടിൽ, രൂപത എക്സിക്യൂട്ടീവ് അംഗങ്ങളായ ബിനു മുളമ്പള്ളിൽ, ബെന്നി വലിയ മർത്താങ്കൽ എന്നിവർ പ്രസംഗിച്ചു.

കുട്ടികൾക്ക് സുരക്ഷിതമായ പഠനാന്തരീക്ഷം ഉറപ്പുവരുത്തണം: മന്ത്രി കെ. കൃഷ്ണൻകുട്ടി

നെന്മാറ: സാമൂഹികആരോഗ്യ സാഹചര്യം മെച്ചപ്പെടുത്തി കുട്ടികളെ സുരക്ഷിതമായ പഠനാന്തരീക്ഷത്തിലേക്ക് കൊണ്ടുവരണമെന്നു മന്ത്രി കെ. കൃഷ്ണൻകുട്ടി. സംസ്ഥാനത്ത് ഏകദേശം മൂന്നുശതമാനംപേർ ഇപ്പോഴും നിരക്ഷരരായുണ്ടെന്നും അവരെ ആറുമാസത്തിനകം എഴുതാനും വായിക്കാനും അറിയുന്നവരാക്കി മാറ്റിയെടുക്കണമെന്നും മന്ത്രി പറഞ്ഞു. ന്യൂ ഇന്ത്യ ലിറ്ററസി പ്രോഗ്രാമിന്‍റെ (ഉല്ലാസ്) മൂന്നാംഘട്ട സർവേ പ്രവർത്തനത്തിന്‍റെ ജില്ലാതല ഉദ്ഘാടനം നിർവഹിക്കുകയായിരുന്നു അദ്ദേഹം. രണ്ടാംഘട്ട സർവേ പൂർത്തീകരിച്ചതിന്‍റെ സർട്ടിഫിക്കറ്റുകളും മന്ത്രി വിതരണം ചെയ്തു. നെന്മാറ നേതാജി ആർട്സ് ആൻഡ് സയൻസ് കോളജ് ഓഡിറ്റേറിയത്തിൽ നടന്ന പരിപാടിയിൽ കെ.ബാബു എംഎൽഎ അധ്യക്ഷത വഹിച്ചു. ജില്ലാ സാക്ഷരതാ മിഷൻ ജില്ലാ കോ-ഓർഡിനേറ്റർ സജി തോമസ്, കാലിക്കട്ട് സർവകലാശാല എൻഎസ്എസ് കോ-ഓർഡിനേറ്റർ ഡോ.എൻ.എ. ശിഹാബ്, നേതാജി കോളജ് പ്രിൻസിപ്പൽ പ്രഫ.വി. ഫൽഗുനൻ, നെന്മാറ ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി, ജില്ലാ പഞ്ചായത്ത് ആരോഗ്യവിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ കെ. ഷാബിറ ടീച്ചർ, ജില്ലാ പഞ്ചായത്ത് അംഗം ആർ. ചന്ദ്രൻ പ്രസംഗിച്ചു.

അച്ഛനെയും മകനെയും വീട്ടില്‍കയറി അക്രമിച്ചെന്നു പരാതി

പട്ടാമ്പി: അച്ഛനെയും മകനെയും രാത്രി വീട്ടില്‍കയറി അക്രമിച്ചതായി പരാതി. ഞായറാഴ്ച രാത്രി പതിനൊന്നിനു പട്ടാമ്പി കല്പക സ്വദേശി കൊപ്പത്ത് പാറമ്മല്‍ വീട്ടില്‍ ഷാഹിദിനു നേരെയാണ് അക്രമണമുണ്ടായത്. പടിഞ്ഞാറങ്ങാടി സ്വദേശികളായ ഷാജഹാന്‍, നിഷാദ് എന്നിവര്‍ മര്‍ദിച്ചതായാണ് പരാതി. രാത്രി വീട്ടില്‍ അതിക്രമിച്ചു കയറി ഷാഹിദിന് വലിയ ചുറ്റികകൊണ്ട് അടിച്ചെന്നു പരാതിയിലുണ്ട്. ഷാഹിദിന്‍റെ തലയില്‍ അഞ്ച് സ്റ്റിച്ചുണ്ട്. വീട്ടിലുണ്ടായിരുന്ന ഷാഹിദിന്‍റെ ഒന്പതു വയസുകാരനായ മകനുനേരയും കൈയ്യേറ്റമുണ്ടായി. കുട്ടിയുടെ കഴുത്തില്‍ പിടിക്കുകയും തള്ളുകയും ചെയ്തുവെന്നും സ്ത്രീകളെ ഭീഷണിപ്പെടുത്തിയതായി പരാതിയില്‍ പറയുന്നു. ഷാഹിദും മകനും പട്ടാമ്പി താലൂക്ക് ആശുപത്രിയില്‍ ചികിത്സ തേടി. പോലീസ് കേസെടുക്കുകയും പിന്നീട് ഷാജഹാനെയും നിഷാദിനെയും അറസ്റ്റുചെയ്തു.

കൊഴിഞ്ഞാന്പാറയിൽ മരംവീണ് മണിക്കൂറുകളോളം ഗതാഗത തടസം

ചിറ്റൂർ: കൊഴിഞ്ഞാമ്പാറ പുത്തൻപാതയിൽ കനത്തമഴയിൽ മരം കടപുഴകി റോഡിന് കുറുകെവീണ് രണ്ടു മണിക്കൂറോളം ഗതാഗതം തടസപ്പെട്ടു. പുത്തൻപാതയിൽ ഇന്നലെ രാവിലെ എട്ടിനാണ് സംഭവം. കൂറ്റൻമരം നിലമ്പതിച്ചതിൽ അഞ്ച് വൈദ്യുതി പോസ്റ്റുകളും കമ്പികളും പൊട്ടി. അപകടസമയത്ത് നിരത്തിൽ കാൽനടയാത്രക്കാരോ വാഹനങ്ങളോ ഇല്ലാതിരുന്നതിനാൽ അനിഷ്ട സംഭവങ്ങൾ ഒഴിവായി. ചിറ്റൂർ അഗ്നിരക്ഷാസേനയും പൊതുമരാമത്ത് ജീവനക്കാരും ചേർന്ന് മരംമുറിച്ചുനീക്കി പത്തുമണിയോടെ ഗതാഗതം പുന:സ്ഥാപിച്ചു. ചിറ്റൂർ നിലയം സീനിയർ ഫയർ ആൻഡ് റസ്ക്യൂ ഓഫീസർ ബൈജു, എഫ്ആർഒമാരായ ഇസ്മയിൽ, കൃഷ്ണദാസ്, ബിജു എന്നിവരുടെ നേതൃത്വത്തിലാണ് രക്ഷാപ്രവർത്തനം നടന്നത്.

മാര്യപ്പാടത്ത് വീട് തകർന്നുവീണ് രണ്ടുപേർക്കു പരിക്ക്

വടക്കഞ്ചേരി: കനത്ത മഴയിൽ കിഴക്കഞ്ചേരി മാര്യപ്പാടത്ത് വീട് തകർന്നുവീണ് രണ്ടുപേർക്ക് പരിക്ക്. മാര്യപ്പാടം ചന്ദ്രന്‍റെ മക്കളായ നിഖിൽ (23), അഭിലാഷ് (21) എന്നിവർക്കാണ് പരിക്കേറ്റത്. ഇവരെ ചികിത്സക്കു വിധേയമാക്കി. കനത്ത മഴയെ തുടർന്ന് വീടിന്‍റെ മേൽക്കൂര ഒന്നാകെ തകരുകയായിരുന്നു. ഇഷ്ടികയും മറ്റും വീണാണ് ഇരുവർക്കും പരിക്കേറ്റത്. അപകടസമയത്ത് ചന്ദ്രന്‍റെ ഭാര്യയും മക്കളുമാണ് വീട്ടിലുണ്ടായിരുന്നത്. ശബ്ദം കേട്ട് പുറത്തേക്ക് ഓടിയതിനാൽ ദുരന്തം ഒഴിവായി.

തേനീച്ചക്കർഷകർക്ക് മഴക്കാലം നഷ്ടകാലം

മംഗലംഡാം: മഴക്കാലം തേനീച്ചക്കർഷകർക്കു നഷ്ടങ്ങളുടെ മാസങ്ങൾ. നാലഞ്ചുമാസം തേനീച്ചകൾക്ക് ഭക്ഷണം കൊടുത്ത് അവയെ സംരക്ഷിച്ചു നിർത്തണം. ഈച്ചകൾ പട്ടിണികിടന്ന് ആരോഗ്യം നഷ്ടപ്പെട്ടാൽ സീസണിൽ തേനീച്ചകളുടെ തേൻശേഖരണം കുറയും. പഞ്ചസാര ലായനിയാണ് തേനീച്ചകൾക്ക് തീറ്റയായി നൽകുക. ഒരു ലിറ്റർ വെള്ളത്തിൽ ഒരുകിലോ പഞ്ചസാര ചേർത്തുള്ള ലായനിയാണ് നൽകേണ്ടതെന്ന് രണ്ടുപതിറ്റാണ്ടിലേറെയായി തേനീച്ച വളർത്തലിൽ പരിശീലനം നൽകിവരുന്ന എളവമ്പാടം മാതൃകാ റബർ ഉത്പാദക സംഘം ഡയറക്ടർ ഡെന്നി തെങ്ങുംപള്ളി ദീപികയോടു പറഞ്ഞു. ആഴ്ചയിൽ 250 മില്ലിലിറ്റർ ലായനി എന്ന തോതിൽ ഓരോ പെട്ടിയിലും വച്ചുകൊടുക്കണം. തേനീച്ചകൾ ഈ ലായനിയെടുത്ത് തേൻഅടകളിൽ സൂക്ഷിക്കും. ക്ഷാമദിവസങ്ങളിലേക്കുള്ള കരുതലാണിത്. പ്രകൃതിയിൽ സ്വാഭാവിക തേൻ ആകുന്നതോടെ പിന്നെ ഇത്തരം പഞ്ചസാര ലായനികൾ ഈച്ചകൾ സൂക്ഷിക്കില്ല. മഴക്കാലത്ത് തീറ്റയായി നൽകുന്ന ലായനി പിന്നീട് തേനിൽ കലരുമോ എന്ന സംശയങ്ങൾക്ക് അടിസ്ഥാനമില്ലെന്നും ഡെന്നി തെങ്ങുംപള്ളി പറഞ്ഞു. ശുദ്ധമായ പ്രകൃതിദത്ത തേൻ മാത്രമേ തേനീച്ചകൾ അടകളിൽ സംഭരിച്ചുവയ്ക്കൂ. മനുഷ്യരെ പോലെ മായം ചേർക്കലൊന്നും തേനീച്ചകൾക്കില്ല. ക്ഷാമകാലം അതിജീവിക്കാനാണ് ഇത്തരം തീറ്റകൾ ഈ ചെറു ജീവികൾ കണ്ടെത്തുന്നത്. സാമ്പത്തിക ശാസ്ത്രത്തിൽ പറയുന്നതുപോലെ എല്ലാ ഘടകങ്ങളും അനുകൂലമാകുമ്പോൾ മാത്രമേ തേൻ ഉത്പാദനവും പ്രതീക്ഷിച്ച തോതിലുണ്ടാകൂ. ഇതിന് കരുത്തുള്ള തേനീച്ചകളും നല്ല കാലാവസ്ഥയും പ്രധാനമാണ്. ഭാരിച്ച ഉത്പാദനചെലവ് കൂട്ടിമുട്ടിച്ച് തൊഴിൽ മുന്നോട്ടുകൊണ്ടുപോകാൻ തേൻഉത്പാദനം വലിയ തോതിൽ വേണമെന്നു കുലത്തൊഴിലായി തേനീച്ചവളർത്തൽ രംഗത്തുള്ള തിരുവനന്തപുരം മാർത്താണ്ഡത്തെ അരുമന സ്വദേശി ജയൻ ദീപികയോടു പറഞ്ഞു. മംഗലംഡാം കരിങ്കയം തുടങ്ങിയ പ്രദേശങ്ങളിലെ റബർ തോട്ടങ്ങളിലാണ് മാർത്താണ്ഡത്തു നിന്നുള്ളവർ നൂറുകണക്കിന് തേനീച്ചപ്പെട്ടികൾവച്ച് തേൻഉത്പാദനം നടത്തുന്നത്. കേരളത്തിൽ റബർ തോട്ടങ്ങളുള്ളിടത്തെല്ലാം മാർത്താണ്ഡത്തുകാർ തേൻ ഉത്പാദനവുമായുണ്ട്. ഒരു തോട്ടത്തിൽ 25 വരെ പെട്ടികളാണ് മാർത്താണ്ഡത്തുകാർ വക്കുക. തേൻ എടുക്കുമ്പോൾ ഒരു കിലോ വരുന്ന ഒരു കുപ്പി തേൻ തോട്ടം ഉടമക്ക് നൽകും. തേനീച്ചകൾ വഴി കൃഷിയിടത്തിലെ വിളകളിൽ പരാഗണം വേഗത്തിലാകുന്നതിനാൽ വിളവ് കൂടുന്നതും തോട്ടം ഉടമക്ക് ഗുണകരമാണ്. പഞ്ചസാര വില കൂടുന്നത് തേനീച്ച വളർത്തുന്ന കർഷകർക്കും വിനയാവുകയണ്. മഴക്കാലത്ത് മതിയായ തീറ്റ നൽകിയില്ലെങ്കിൽ തേനീച്ചകൾ സ്ഥലം മാറിപ്പോകും. ചിലപ്പോൾ കൂട്ടത്തോടെ ചാവുമെന്നും കർഷകർ പറയുന്നു. ഒക്ടോബർ മുതൽ ഡിസംബർ വരെ തേനീച്ചകളുടെപ്രജനന കാലമാണ്. ജനുവരി മുതൽ ഏപ്രിൽ വരെയാണ് തേൻ ഉത്പാദനകാലം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]